Песнь 3
Ирмос
Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.
Святы́й великому́чениче кня́же Иоа́нне-Влади́мире, моли́ Бо́га о на́с.
Тропарь
На недви́жимем ка́мени Христо́вых за́поведей утверди́ся, ника́коже поколеба́ся умо́м, те́мже му́ченическим лико́м счи́слился еси́, досточу́дне.
Тропарь
Все́ жела́ние Христо́во име́я в се́рдце твое́м, я́же от ме́ста на ме́сто гони́м, о страда́льче Иоа́нне, претерпе́л еси́ тве́рдо, те́мже и просла́вился еси́.
Тропарь
Ны́не весели́тся ве́рно гра́д Дира́хиа, иде́же лежи́т те́ло твое́ свяще́нное, блаже́нне, неду́ги все́м исцеля́ет, ту́ су́щим.
Богородичен
Ты́ еси́ мо́ст, Чи́стая Богоро́дице Де́во, к стези́ Небе́сней наставля́ющая ве́рныя, при́сно Рождество́ Твое́ хва́лящия, Пречи́стая.
Песнь 4
Ирмос
Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.
Святы́й великому́чениче кня́же Иоа́нне-Влади́мире, моли́ Бо́га о на́с.
Тропарь
Благоуха́ет, прему́дре, ра́ка твоя́ Боже́ственная, иде́же лежи́т свяще́нное те́ло твое́, блаже́нне, да́ры исцеле́ний источа́ет почита́ющим тя́.
Тропарь
Хра́м тво́й утверди́л еси́, всесла́вне страстоте́рпче, иде́же ны́не источа́ет исцеле́ния всесвята́я ра́ка твоя́, Иоа́нне всече́стне.
Богородичен
Жи́знь прозябла́ еси́, Зижди́теля все́х, Пренепоро́чная, содержа́щаго вся́ руко́ю Свое́ю и му́дростию и ра́зумом небеса́ утверди́вшаго.
Песнь 5
Ирмос
Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.
Святы́й великому́чениче кня́же Иоа́нне-Влади́мире, моли́ Бо́га о на́с.
Тропарь
Жела́нием Боже́ственным объя́т к ве́чнующим воздая́нием, му́ки претерпе́л еси́ и от ме́ста на ме́сто прогоня́емь, в посте́ и бде́нии претерпева́я.
Тропарь
Си́лою Боже́ственною возмога́я, вся́ вра́жия кова́рства нивочто́же во уме́ вмени́л еси́, блаже́нне Иоа́нне.
Тропарь
Кре́ст Христо́в в руки́ твоя́ взе́м, взя́лся еси́ к Боже́ственным селе́нием.
Тропарь
Соверша́ющим святу́ю и честну́ю па́мять твою́, страда́льче, помога́еши всегда́, вре́да душетле́ннаго си́х избавля́я и к Бо́гу приводя́ хода́тайствы твои́ми.
Богородичен
О на́с, гре́шных, призыва́ющих Тя́, Влады́чице, ми́ру Блага́я Помо́щнице, Сы́ну Твоему́ и Бо́гу моли́ся, да изба́вит на́с от бе́д и обстоя́ний.
Песнь 6
Ирмос
Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.
Святы́й великому́чениче кня́же Иоа́нне-Влади́мире, моли́ Бо́га о на́с.
Тропарь
Мече́м тща́шеся ца́рства земна́го лиши́ти тя́, сла́вне, и в багряни́цу свы́ше обо́лкся.
Тропарь
Непребори́м бы́в искуше́нии вра́жиими, вжига́ем Ду́хом, прия́л еси́ ороше́ние от Него́, исто́чник чуде́с показа́лся еси́ ми́ру, всесла́вне.
Тропарь
Егда́ к по́двигу доше́л еси́, сла́вне, рука́ми прера́достно держа́ Кре́ст, взыва́л еси́: Ты́ ми́ бу́ди Предста́тель и Побо́рник.
Богородичен
Еди́на, поро́ждшая все́х Творца́, всегда́ о все́х моли́ся, любо́вию чту́щих ве́рно Рождество́ Твое́.
Песнь 7
Ирмос
Росода́тельну у́бо пе́щь со дела́ А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.
Святы́й великому́чениче кня́же Иоа́нне-Влади́мире, моли́ Бо́га о на́с.
Тропарь
Алба́нии показа́лся еси́ звезда́ присносия́ющая, в не́йже лежи́т честно́е те́ло твое́, творя́щее чудеса́ пресла́вная, блаже́нне, на просвеще́ние благоче́стно блажа́щих тя́.
Тропарь
Просвети́вся твои́ми страстьми́, блаже́нне, осия́я тве́рдь блиста́ющую, изводя́ благода́ть зову́щим ти́ согла́сно и Христа́ воспева́ющим: благослове́н Бо́г оте́ц на́ших.
Тропарь
Весе́лия и ра́дости испо́лненный, пра́зднственную па́мять твою́, Влади́мире, святу́ю соверша́юще, вопие́м Христу́: благослове́н еси́, Бо́же оте́ц на́ших.
Богородичен
Его́же родила́ еси́, Де́во Пречи́стая, Го́спода, изба́вит от кля́твы ве́сь ро́д челове́ческий моли́, Всенепоро́чная Влады́чице.
Песнь 8
Ирмос
Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Святы́й великому́чениче кня́же Иоа́нне-Влади́мире, моли́ Бо́га о на́с.
Тропарь
Ны́не ра́дуется гра́д Дира́хиа све́тло, тя́ предста́теля иму́щи и изба́вителя, всему́дре, но́вое бо со́лнце возсия́л еси́, озаря́я пою́щия тя́.
Тропарь
Отягче́ни вельми́ от нестерпи́мых зо́л лю́дие твои́ ве́рнии, чту́щии тя́, и́хже твои́ми к Бо́гу моли́твами избавля́еши при́сно, воспева́ющих Христа́ во ве́ки.
Тропарь
От вся́кия ну́жды изба́ви рабы́ твоя́, и́же па́мять твою́ творя́щия, му́чениче Христо́в, и ве́рно хва́лящия Христа́ во ве́ки.
Богородичен
О Пресвята́я Де́во Богоро́дице! Тебе́ вси́ сла́вим, ро́ждшую Зижди́теля все́х, е́же изба́вится на́м от искуше́ний и бе́д.
Песнь 9
Ирмос
Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.
Святы́й великому́чениче кня́же Иоа́нне-Влади́мире, моли́ Бо́га о на́с.
Тропарь
Приста́нище до́брое иму́щий Дира́хиев гра́д, Иоа́нне блаже́нне, ны́не к Бо́гу предлага́ет тя́ хода́тая, моля́щася о не́м и о все́х на́с.
Тропарь
Земля́ кро́вь твою́, страда́льче, я́коже А́велеву дре́вле, прие́мь, взыва́ше, уби́йце ища́ отмще́ния.
Тропарь
Беся́ся, окая́нный тво́й сро́дник главу́ твою́ честну́ю отсече́, злокова́рный, ты́ же, сию́ прие́мь, прите́кл еси́ на ме́сто упокое́ния, о́н же разсе́деся, я́ко Иу́да и льсте́ц.
Богородичен
Му́дре челове́ка пре́жде созда́ Сы́н Тво́й, Де́во, и истле́вша, Тобо́ю обнови́, Всепе́тая, и Боже́ственнаго све́та испо́лни все́х, Тя́, Богоро́дицу, сла́вящих.