Иной канон святому преподобному Макарию, игумену Калязинскому

Ума́ чи́стыми светлостьми́ Боже́ственная зря́, му́жеским нра́вом, блаже́нне, к подвиго́м устреми́лся еси́, преми́рными блиста́нии Трисо́лнечнаго Све́та озаря́емь.

Поста́вив но́зе на ка́мени ве́ры, не поколеба́лся еси́, блаже́нне, от искуше́ний и наве́т вра́жиих, но, я́ко огнепа́льна звезда́, попаля́я вся́ благода́тию Пресвята́го Ду́ха.

Зако́ны Боже́ственныя соблюда́я, побе́ду ве́чную взя́л еси́, преподо́бне, прогони́ти ду́хи лука́выя и си́х до конца́ низложи́л еси́.

Неизглаго́ланно зачала́ еси́ Бо́га и па́че естества́ родила́ еси́, Пречи́стая Влады́чице, земны́я от прегреше́ний изме́ншаго. Те́мже молю́ Тя́: мно́гих мя́ согреше́ний изба́ви.

Я́коже честны́й би́сер, твоя́ мо́щи, преподо́бне, все́ми ви́димы, предлежа́т, разли́чная исцеле́ния неоску́дно подаю́ще.

Лику́ют собра́ния мона́шествующих, моле́бный соверша́юще пра́здник в честне́м твое́м преставле́нии, от души́ вопию́ще: помина́й ны́, приснопомина́ющия тя́.

Напра́вился еси́, преподо́бне, к Боже́ственным приста́нищем окормле́нием Христа́ Бо́га на́шего, напа́стей преше́д свире́пых во́лн.

Де́ло, е́же соде́лал еси́, Го́споди, кто́ ска́жет? Ю́же бо прокля́л еси́ в печа́лех роди́ти ча́да, Сы́н Ея́ показа́лся еси́, и ра́дуется же́нское отпа́дшее естество́ о Тебе́, Бо́зе, Богоро́дицы ра́ди.

Поче́т до́брыми твои́ми нра́вы Бо́га Преблага́го, Мака́рие, те́мже исцеле́ний исто́чник излива́еши, зно́й отгоня́я боле́зней же и печа́лей, му́дре.

Ны́нешняго жития́ красоты́ вся́ уме́ты вмени́л еси́, да Христа́ приобря́щеши, и сего́ ра́ди до́бре потруди́лся еси́, венцено́сче великоимени́тый.

Просте́р у́м ко еди́ному Влады́це, вене́ц нетле́ния от Него́ прия́л еси́, сия́ющий све́тлыми светоли́тии и бога́тыми дарова́нии, иде́же перворо́дных жили́ща.

Влады́чице ми́ра, Богоро́дице, помози́ ми́, прелука́вый вра́г поглоща́ет мя́ зе́льне лю́тыми воспомина́нии и помышле́нии, я́же от Бо́га мя́ разлуча́ют, не оста́ви у́бо мене́, ниже́ пре́зри.

Стра́сти попали́л еси́ огне́м воздержа́ния, ду́шу озари́в Боже́ственными сия́нии, де́монов прогони́тель яви́лся еси́, Боже́ственным Ду́хом просвеща́емь.

До́блести твоя́, Мака́рие, человекоуби́йца зре́ти не моги́й, искуше́ния тебе́ простира́ет, и мужему́дренно противля́яся, до конца́ сего́ низложи́л еси́.

Мирска́го смуще́ния отбе́гл еси́, доброде́тельми удобри́в житие́ твое́, мона́хов утвержде́ние бы́л еси́, о́тче Мака́рие преподо́бне.

Ты́ кре́пость моя́, Ты́ похвала́ и ра́дование, храни́тельница ми́ и заступле́ние, и прибе́жище, и предста́тельница непобеди́ма, Пресвята́я Богоро́дице, те́мже спаси́ раба́ Твоего́.

Ду́ха си́лою, блаже́нне, мы́сленных волко́в че́люсти сокруши́л еси́ и просвеще́нным ра́зумом небе́сную тишину́ получи́л еси́.

По́стническим огне́м искуси́вся, о́ко се́рдца твоего́ преочи́стив, и доброде́тельным нра́вом ду́шу просвети́л еси́.

Вни́де в тя́ раче́ние Соде́теля, богому́дре, оста́вль земны́х пристра́стие, единосе́льник показа́лся еси́ вы́шним служи́телем.

Без Се́мене во чре́ве Бо́га зачала́ еси́, Де́ва пребы́вши по рождестве́, Чи́стая, стра́шнем. Те́мже хвала́ми Тя́ сла́вим, Тобо́ю изба́вльшеся кля́твы, Пречи́стая.

Воздержа́ния росо́ю до́блественне страстну́ю пе́щь погаси́л еси́, сле́з же ка́плями, возду́шных князе́й написа́ния растерза́л еси́ и со дерзнове́нием вопия́л еси́ Христу́: оте́ц на́ших Бо́же, благослове́н еси́.

По́стников ты́ бы́л еси́ похвала́, Мака́рие, кре́пко низложи́в де́монская шата́ния, и ны́не наслажда́ешися неизрече́нныя красоты́, вопия́ Христу́: оте́ц на́ших Бо́же, благослове́н еси́.

Еди́ному Бо́гу возложи́в ду́шу и помышле́ние, те́сный пу́ть ше́ствовал еси́, те́м получи́л еси́ небе́снаго Ца́рствия наслажде́ние. И ны́не взыва́еши: оте́ц на́ших Бо́же, благослове́н еси́.

Тро́ице во еди́нстве правосла́вно служа́ще, Тя́, Ма́ти Де́во Чи́стая, я́ко Бо́га пло́тию ро́ждшую пропове́дающе, земни́и, боже́ственне пое́м: оте́ц на́ших Бо́же, благослове́н еси́.

Ду́ха благода́ть прии́м, о́тче Мака́рие, сосу́д избра́нный показа́лся еси́, святы́ню прии́м от Христа́ Бо́га, Ему́же непреста́нно вопия́: да благослови́т тва́рь вся́ Го́спода и превозно́сит во вся́ ве́ки.

Боже́ственною си́лою укрепля́емь, победи́л еси́ неви́димых вра́г ополче́ния, к Све́ту прибли́жился еси́ невече́рнему, при́сно воспева́я: да благослови́т вся́ тва́рь Го́спода и превозно́сит во вся́ ве́ки.

Мона́шествующих бы́л еси́ пра́вило пра́вости и стра́сти вся́ кре́пко попра́л еси́. Те́мже, возше́д на высоту́, научи́л еси́ воспева́ти: да благослови́т тва́рь вся́ Го́спода и превозно́сит во вся́ ве́ки.

Спасе́ния хода́таица на́м яви́лася еси́, Богоро́дице, ро́ждшая Спа́са и Влады́ку все́х. Те́мже молю́ Тя́: спасе́ния сподо́би смире́нную мою́ ду́шу песносло́вити Тя́ ве́рно во вся́ ве́ки.

Мра́з нощны́й до́блественне претерпе́л еси́ и ва́р дневны́й поне́сл еси́, до́м Прему́дрости Бо́жия бы́л еси́ и возше́л еси́ на го́ру боже́ственнаго ра́зума.

А́лчбою, и моли́твами непреста́нными, и чистото́ю Бо́гу соединя́яся, мно́жества мона́шествующих научи́л еси́ веще́ственных все́х огреба́тися.

Ста́до твое́, о́тче, возгна́л еси́ на па́жить чи́сту воздержа́ния, и приве́л еси́ к безстра́стия исто́чнику, и ны́не потщи́ся, па́стырю до́брый, сохрани́ти сие́ невре́дно.

О, Пресвята́я Де́во, Ма́ти Бо́га Вы́шняго! Твое́ Рождество́ на земли́ спасе́ние яви́ся гре́шником и смире́нным, о Тебе́ бо спасо́хомся, ве́ровавшии, но спаса́еши мя́ ны́не и во вся́ ве́ки жи́зненныя.

Оу҆ма̀ чи́стыми свѣтлостьмѝ бж҃е́ствєннаѧ зрѧ̀, мꙋ́жескимъ нра́вомъ, бл҃же́нне, къ подвигѡ́мъ ᲂу҆стреми́лсѧ є҆сѝ, премі́рными блиста̑нїи трисо́лнечнагѡ свѣ́та ѡ҆зарѧ́емь.

Поста́вивъ но́зѣ на ка́мени вѣ́ры, не поколеба́лсѧ є҆сѝ, бл҃же́нне, ѿ и҆скꙋше́нїй и҆ навѣ̑тъ вра́жїихъ: но ꙗ҆́кѡ ѻ҆гнепа́льна ѕвѣзда̀, попалѧ́ѧ всѧ̑ бл҃года́тїю прест҃а́гѡ дх҃а.

Зако́ны бжⷭ҇твєнныѧ соблюда́ѧ, побѣ́дꙋ вѣ́чнꙋю взѧ́лъ є҆сѝ, преподо́бне, прогони́ти дꙋ́хи лꙋка̑выѧ, и҆ си́хъ до конца̀ низложи́лъ є҆сѝ.

Неизглаго́ланнѡ зачала̀ є҆сѝ бг҃а, и҆ па́че є҆стества̀ родила̀ є҆сѝ, пречⷭ҇таѧ влⷣчце, зємны́ѧ ѿ прегрѣше́нїй и҆змѣ́ншаго. Тѣ́мже молю̀ тѧ̀, мно́гихъ мѧ̀ согрѣше́нїй и҆зба́ви.

Ꙗ҆́коже честны́й би́серъ, твоѧ̑ мо́щи, преподо́бне, всѣ́ми ви̑димы предлежа́тъ, разли̑чнаѧ и҆сцѣлє́нїѧ неѡскꙋ́днѡ подаю́ще.

Ликꙋ́ютъ собра̑нїѧ мона́шествꙋющихъ, моле́бный соверша́юще пра́здникъ, въ честнѣ́мъ твое́мъ преставле́нїи, ѿ дꙋшѝ вопїю́ще: помина́й ны̀ приснопомина́ющыѧ тѧ̀.

Напра́вилсѧ є҆сѝ, преподо́бне, къ бжⷭ҇твєннымъ приста́нищємъ, ѡ҆кормле́нїемъ хрⷭ҇та̀ бг҃а на́шегѡ, напа́стей преше́дъ свирѣ́пыхъ во́лнъ.

Дѣ́ло, є҆́же содѣ́лалъ є҆сѝ, гдⷭ҇и, кто̀ ска́жетъ; ю҆́же бо проклѧ́лъ є҆сѝ въ печа́лехъ роди́ти ча̑да, сн҃ъ є҆ѧ̀ показа́лсѧ є҆сѝ, и҆ ра́дꙋетсѧ же́нское ѿпа́дшее є҆стество̀ ѡ҆ тебѣ̀ бз҃ѣ, бцⷣы ра́ди.

Поче́тъ до́брыми твои́ми нра́вы бг҃а преблага́го, мака́рїе, тѣ́мже и҆сцѣле́нїй и҆сто́чникъ и҆злива́еши, зно́й ѿгонѧ́ѧ болѣ́зней же и҆ печа́лей, мꙋ́дре.

Ны́нѣшнѧгѡ житїѧ̀ красоты̑ всѧ̑ ᲂу҆ме́ты вмѣни́лъ є҆сѝ, да хрⷭ҇та̀ приѡбрѧ́щеши: и҆ сегѡ̀ ра́ди до́брѣ потрꙋди́лсѧ є҆сѝ, вѣнцено́сче великоимени́тый.

Просте́ръ ᲂу҆́мъ ко є҆ди́номꙋ влⷣцѣ, вѣне́цъ нетлѣ́нїѧ ѿ негѡ̀ прїѧ́лъ є҆сѝ, сїѧ́ющїй свѣ́тлыми свѣтоли̑тїи и҆ бога́тыми дарова̑нїи, и҆дѣ́же перворо́дныхъ жили̑ща.

Влⷣчце мі́ра бцⷣе, помозѝ мѝ, прелꙋка́вый вра́гъ поглоща́етъ мѧ̀ ѕѣ́льнѣ, лю́тыми воспомина́нїи и҆ помышлє́нїи, ꙗ҆̀же ѿ бг҃а мѧ̀ разлꙋча́ютъ: не ѡ҆ста́ви ᲂу҆̀бо менє̀, нижѐ пре́зри.

Стра̑сти попали́лъ є҆сѝ ѻ҆гне́мъ воздержа́нїѧ, дꙋ́шꙋ ѡ҆зари́въ бжⷭ҇твенными сїѧ̑нїи: де́мѡнѡвъ прогони́тель ꙗ҆ви́лсѧ є҆сѝ, бжⷭ҇твеннымъ дх҃омъ просвѣща́емь.

До́блєсти твоѧ̑, мака́рїе, человѣкоꙋбі́йца зрѣ́ти не могі́й, и҆скꙋшє́нїѧ тебѣ̀ простира́етъ: и҆ мꙋжемꙋ́дреннѡ противлѧ́ѧсѧ, до конца̀ сего̀ низложи́лъ є҆сѝ.

Мїрска́гѡ смꙋще́нїѧ ѿбѣ́глъ є҆сѝ, добродѣ́тельми ᲂу҆добри́въ житїѐ твоѐ: мона́хѡвъ ᲂу҆твержде́нїе бы́лъ є҆сѝ, ѻ҆́ч҃е мака́рїе преподо́бне.

Ты̀ крѣ́пость моѧ̀, ты̀ похвала̀ и҆ ра́дованїе, храни́тельница мѝ и҆ застꙋпле́нїе, и҆ прибѣ́жище, и҆ предста́тельница непобѣди́ма, прест҃а́ѧ бцⷣе. тѣ́мже спасѝ раба̀ твоего̀.

Дх҃а си́лою, блаже́нне, мы́сленныхъ волкѡ́въ чє́люсти сокрꙋши́лъ є҆сѝ: и҆ просвѣще́ннымъ ра́зꙋмомъ небе́снꙋю тишинꙋ̀ полꙋчи́лъ є҆сѝ.

По́стническимъ ѻ҆гне́мъ и҆скꙋси́всѧ, ѻ҆́ко се́рдца твоегѡ̀ преѡчи́стивъ, и҆ добродѣ́тельнымъ нра́вомъ дꙋ́шꙋ просвѣти́лъ є҆сѝ.

Вни́де въ тѧ̀ раче́нїе содѣ́телѧ, бг҃омꙋ́дре, ѡ҆ста́вль земны́хъ пристра́стїе, є҆диносе́льникъ показа́лсѧ є҆сѝ вы̑шнимъ слꙋжи́телємъ.

Безъ сѣ́мене во чре́вѣ бг҃а зачала̀ є҆сѝ, дв҃а пребы́вши по рождествѣ̀, чⷭ҇таѧ, стра́шнѣмъ: тѣ́мже хвала́ми тѧ̀ сла́вимъ, тобо́ю и҆зба́вльшесѧ клѧ́твы, пречⷭ҇таѧ.

Воздержа́нїѧ росо́ю до́блественнѣ страстнꙋ́ю пе́щь погаси́лъ є҆сѝ: сле́зъ же ка́плѧми воздꙋ́шныхъ кнѧзе́й написа́нїѧ растерза́лъ є҆сѝ, и҆ со дерзнове́нїемъ вопїѧ́лъ є҆сѝ хрⷭ҇тꙋ̀: ѻ҆тє́цъ на́шихъ бж҃е, благослове́нъ є҆сѝ.

По́стникѡвъ ты̀ бы́лъ є҆сѝ похвала̀, мака́рїе, крѣ́пкѡ низложи́въ дє́мѡнскаѧ шата̑нїѧ. и҆ ны́нѣ наслажда́ешисѧ неизрече́нныѧ красоты̀, вопїѧ̀ хрⷭ҇тꙋ̀: ѻ҆тє́цъ на́шихъ бж҃е, благослове́нъ є҆сѝ.

Є҆ди́номꙋ бг҃ꙋ возложи́въ дꙋ́шꙋ и҆ помышле́нїе, тѣ́сный пꙋ́ть ше́ствовалъ є҆сѝ: тѣ́мъ полꙋчи́лъ є҆сѝ нбⷭ҇нагѡ ца́рствїѧ наслажде́нїе. и҆ ны́нѣ взыва́еши: ѻ҆тє́цъ на́шихъ бж҃е, благослове́нъ є҆сѝ.

Трⷪ҇цѣ во є҆ди́нствѣ правосла́внѡ слꙋжа́ще, тѧ̀, мт҃и дв҃о чⷭ҇таѧ, ꙗ҆́кѡ бг҃а пло́тїю ро́ждшꙋю, проповѣ́дающе земні́и, бжⷭ҇твеннѣ пое́мъ: ѻ҆тє́цъ на́шихъ бж҃е, благослове́нъ є҆сѝ.

Дх҃а благода́ть прїи́мъ, ѻ҆́ч҃е мака́рїе, сосꙋ́дъ и҆збра́нный показа́лсѧ є҆сѝ, ст҃ы́ню прїи́мъ ѿ хрⷭ҇та̀ бг҃а, є҆мꙋ́же непреста́ннѡ вопїѧ̀: да благослови́тъ тва́рь всѧ̑ гдⷭ҇а, и҆ превозно́ситъ во всѧ̑ вѣ́ки.

Бжⷭ҇твенною си́лою ᲂу҆крѣплѧ́емь, побѣди́лъ є҆сѝ неви́димыхъ вра̑гъ ѡ҆полчє́нїѧ, къ свѣ́тꙋ прибли́жилсѧ є҆сѝ невече́рнемꙋ, при́снѡ воспѣва́ѧ: да благослови́тъ всѧ̀ тва́рь гдⷭ҇а, и҆ превозно́ситъ во всѧ̑ вѣ́ки.

Мона́шествꙋющихъ бы́лъ є҆сѝ пра́вило пра́вости, и҆ стра̑сти всѧ̑ крѣ́пкѡ попра́лъ є҆сѝ. тѣ́мже возше́дъ на высотꙋ̀, наꙋчи́лъ є҆сѝ воспѣва́ти: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Спасе́нїѧ хода́таица на́мъ ꙗ҆ви́ласѧ є҆сѝ, бцⷣе, ро́ждшаѧ сп҃са и҆ влⷣкꙋ всѣ́хъ. тѣ́мже молю̀ тѧ̀: спасе́нїѧ сподо́би смире́ннꙋю мою̀ дꙋ́шꙋ, пѣсносло́вити тѧ̀ вѣ́рнѡ во всѧ̑ вѣ́ки.

Мра́зъ нощны́й до́блественнѣ претерпѣ́лъ є҆сѝ, и҆ ва́ръ дневны́й поне́слъ є҆сѝ до́мъ премꙋ́дрости бж҃їѧ бы́лъ є҆сѝ, и҆ возше́лъ є҆сѝ на го́рꙋ бжⷭ҇твеннагѡ ра́зꙋма.

А҆́лчбою и҆ моли́твами непреста́нными и҆ чистото́ю бг҃ꙋ соединѧ́ѧсѧ, мно́жєства мона́шествꙋющихъ наꙋчи́лъ є҆сѝ, веще́ственныхъ всѣ́хъ ѡ҆греба́тисѧ.

Ста́до твоѐ, ѻ҆́ч҃е, возгна́лъ є҆сѝ на па́жить чи́стꙋ воздержа́нїѧ, и҆ приве́лъ є҆сѝ къ безстра́стїѧ и҆сто́чникꙋ. И҆ ны́нѣ потщи́сѧ, па́стырю до́брый, сохрани́ти сїѐ невре́дно.

Ѽ прест҃а́ѧ дв҃о, мт҃и бг҃а вы́шнѧгѡ! твоѐ ржⷭ҇тво̀ на землѝ спасе́нїе ꙗ҆ви́сѧ грѣ́шникѡмъ и҆ смирє́ннымъ: ѡ҆ тебє̀ бо спасо́хомсѧ, вѣ́ровавшїи. но спаса́еши мѧ̀ ны́нѣ, и҆ во всѧ̑ вѣ́ки жи́знєнныѧ.