Кондак 1
Избранный от Бога на проповедь народам языческим, святый Иустине, приими теплое моление сие наше, в похвалу тебе приносимое, и, яко имеяй велие дерзновение ко Господу, от всяких злых обстояний нас свобождай, со умилением тебе зовущих: Радуйся, Иустине, истины Христовы проповедниче.
Икос 1
Ангелов Творец и всея твари Содетель провидев чистоту души твоея, Иустине всехвальне, избра тя на делание спасения человеков. Мы же, воспоминающе добродетельное житие твое, вопием:
Радуйся, паче всех благ земных Господа возлюбивый.
Радуйся, не пощадив живота своего, верно Христу послуживый.
Радуйся, таланты, врученныя ти Богом, сторицею приумноживый.
Радуйся, сокровище негиблющее на Небеси себе собравый.
Радуйся, яко в радость Господа твоего вшел еси.
Радуйся, яко от Вседержительныя десницы венец правды приял еси.
Радуйся, Иустине, истины Христовы проповедниче.
Кондак 2
Видя Господь тебе, блаженне Иустине, еллинское мудрование оставивша и истиннаго богопочитания взыскавша, сотвори тя в жилище Святаго Духа, да чистым сердцем и устами возможеши пети: Аллилуия.
Икос 2
Разум Небесный свыше тебе даровася, Иустине богомудре, и свет Божественный просвети тя к познанию Истиннаго Бога. Мы же тебе, Христа, Солнце Правды, нам возвещающему и безбожия тьму от нас отгоняющему, вопием таковая:
Радуйся, Духа Святаго сосуде.
Радуйся, благодати Божия вместилище.
Радуйся, благочестием твоим верныя возвеселяяй.
Радуйся, путь ко спасению нам указуяй.
Радуйся, в проповедании Евангелия ревность велию явивый.
Радуйся, душу твою за Христа положивый.
Радуйся, Иустине, истины Христовы проповедниче.
Кондак 3
Силою Вышняго укрепленный и святым Крещением просвещенный, Иустине всеславне, дерзновенно проповедал еси Христа Бога, да обращеннии к Нему людие ум свой горе возведут и вспоют Ему: Аллилуия.
Икос 3
Имея богатство Божиих дарований, Иустине, яко добрый и верный раб врученныя ти таланты приумножил еси и Господеви своему неленостно поработал еси. Темже приими от нас похвалы сия:
Радуйся, яко вражия возношения сокрушил еси.
Радуйся, яко победоносец изрядный явился еси.
Радуйся, Вышняго града гражданине.
Радуйся, Небесных благ наследниче.
Радуйся, яко со святыми Престолу Божию предстоиши.
Радуйся, яко сладости райскаго блаженства наслаждаешися.
Радуйся, Иустине, истины Христовы неустанный проповедниче.
Кондак 4
Бурю нечестия разгоняя, богодухновенными словесы своими многия к вере христианстей обратил еси, всехвальне Иустине, темже и нас, почитающих тя, в правоверии и благочестии укрепи, да поем во вся дни: Аллилуия.
Икос 4
Слыша мудрыя словеса твоя, ихже ты яко семена спасительныя веры сеял еси посреде неверующих, людие благоразумныя прославляху Бога и тебе величаху пении сими:
Радуйся, истиннаго благочестия насадителю.
Радуйся, Евангельскаго учения благовестителю.
Радуйся, света Божественнаго светильниче.
Радуйся, ищущих спасения наставниче.
Радуйся, заповедей Христовых исполнителю.
Радуйся, христианских добродетелей стяжателю.
Радуйся, Иустине, истины Христовы неустанный проповедниче.
Кондак 5
Боготечней звезде подобен был еси, мучениче Христов Иустине, указующей путь богопочитания и служения Богу всем жаждущим спасения и Подателю всякия милости поющим: Аллилуия.
Икос 5
Видеша тя вернии, святый Иустине, в прениях с Крискентом и Маркианом языческая мудрования и еретическая лжеучения отвергающа, за истинность же и спасительность христианскаго учения ревнующа, возглашаху ти:
Радуйся, неверия честный обличителю.
Радуйся, ересей неленостный искоренителю.
Радуйся, яко веру непреложно утвердил еси.
Радуйся, яко заблуждшия на путь истины наставил еси.
Радуйся, молние, ереси пожигающая.
Радуйся, истино, житие во Христе утверждающая.
Радуйся, Иустине, истины Христовы неустанный проповедниче.
Кондак 6
Проповедник богоглаголивый явился еси, Иустине, в странах языческих неверующим людем Евангелие Христово возвещая и в агнцы Христовы их претворяя, иже и научишася тобою пети Триединому Богу: Аллилуия.
Икос 6
Возсиял еси, яко светильник лучезарный, дивным житием твоим, всехвальне Иустине, иго Христово на себе приемый и спасение от Подвигоположника Господа улучивый. Темже и нас молитвами твоими в Небесныя обители приведи, восхваляющих тя:
Радуйся, светом Христовым люди безбожныя просветивый.
Радуйся, учением Евангельским страны языческия огласивый.
Радуйся, во благовестии Христове неутомимо потрудивыйся.
Радуйся, Крестом Христовым от козней бесовских оградивыйся.
Радуйся, яко к познанию Сына Божия многия привел еси.
Радуйся, яко заповеди Господни соблюдати верныя научил еси.
Радуйся, Иустине, истины Христовы неустанный проповедниче.
Кондак 7
Хотя Христову истину явити и в мире Церковь соблюсти, богомудре Иустине, императору Антонию Пию подал еси «Апологию», в нейже лживость возводимых обвинений на христианы тобою показаны быша. Сего ради, тобою вразумлен, положи конец гонению император на христианы, вопиющия Богу: Аллилуия.
Икос 7
Новаго благовестника истины яви тя Господь, святый Иустине, егда ты радостную весть о Христе и о прекращении гонений на христианы в окрестных градех и странах возвещал еси. Вернии же, прославляя в тебе Милосерднаго Бога, со слезами возглашаху:
Радуйся, от Господа Иисуса благодать и силу приявый.
Радуйся, Воскресение Христово радостно возвещавый.
Радуйся, веры Христовы неустрашимый проповедниче.
Радуйся, славы апостольския сонаследниче.
Радуйся, всякия лживыя учения обличивый.
Радуйся, истинную веру хранити научи́вый.
Радуйся, Иустине, истины Христовы неустанный проповедниче.
Кондак 8
Странно бе нечестивым слышати словеса твоя, глаголемая раввину Трифону, коими ты, на основании пророков, истинность христианския веры показал еси. Мы же умудрившему тя Господеви вопием: Аллилуия.
Икос 8
Всего себе Богу предал еси, мучениче Иустине: не убоялся бо еси обвинений лживых, воздвигнутых на тя Крискентом пред судом кесаревым. Христолюбивии же людие, видяще твердую веру твою, воспеваху ти сице:
Радуйся, веры Христовы исповедниче непоколебимый.
Радуйся, Бога Истиннаго проповедниче дерзновенный.
Радуйся, яко исповеданием твоим Церковь Христову украшаеши.
Радуйся, яко лукавство врага рода человеческаго обличаеши.
Радуйся, истиннаго богопочитания насадителю.
Радуйся, идолов богомерзских сокрушителю.
Радуйся, Иустине, истины Христовы неустанный проповедниче.
Кондак 9
Всем спастися желая, многия души ко Христу привел еси, Иустине, и в Царствие Небесное их управил еси. Темже молим тя: блаженство жития вечнаго улучити и нам Господа умоли, да купно с тобою и всеми святыми вопием Ему: Аллилуия.
Икос 9
Витии многовещаннии не возмогут по достоянию изобразити подвиги и труды твоя, Иустине блаженне, имиже ты во славу Божию премного потрудился еси. От нас же приими похвалы сия:
Радуйся, верных светом истины просвещаяй.
Радуйся, немощных от страстей избавляяй.
Радуйся, яко во Единем Христе утешение полагати нас научаеши.
Радуйся, яко во страданиях призывати Бога нас вразумляеши.
Радуйся, молящимся тебе скорый помощниче.
Радуйся, от сетей вражиих несокрушимый защитниче.
Радуйся, Иустине, истины Христовы неустанный проповедниче.
Кондак 10
Спасению людей работая, мученическаго венца удостоился еси, исповедниче Христов Иустине, претерпевая же истязания многия за распятаго за ны на Кресте Господа, радостно взывал еси: Аллилуия.
Икос 10
Стена необоримая от всех напастей и скорбей ты еси, мучениче Иустине, всем усердно к тебе притекающим и пред иконою твоею умильно молящимся. Сего ради и нас молитвами твоими от всяких искушений огради и путем спасительным шествовати руководи, ублажающих тя сице:
Радуйся, всех бедствующих и скорбящих заступниче.
Радуйся, о всем мире теплый пред Богом молитвенниче.
Радуйся, яко раны душевныя и телесныя врачуеши.
Радуйся, яко веру укрепляеши и надежду утверждаеши.
Радуйся, от одра лености нас возставляяй.
Радуйся, высоту терпения всем показуяй.
Радуйся, Иустине, истины Христовы неустанный проповедниче.
Кондак 11
Пение Пресвятей Троице воздал еси, мучениче Иустине, не словом точию, но себе самаго в жертву принесением: Бога бо Истиннаго паче всего возлюбил еси и Ему Единому добре послужил еси, поя со умилением: Аллилуия.
Икос 11
Светоприемную свещу зрим тя, Иустине славный, просвещаеши бо сердца верных и к разуму Божественному наставляеши вопиющих ти таковая:
Радуйся, жития добродетельнаго рачителю.
Радуйся, терпения и смиренномудрия учителю.
Радуйся, яко имя твое на Небеси прославляется.
Радуйся, яко Церковь Святая тобою украшается.
Радуйся, светильниче пресветлый, Божиим светом озаряяй.
Радуйся, адаманте твердый, верою непоколебимою блистаяй.
Радуйся, Иустине, истины Христовы неустанный проповедниче.
Кондак 12
Благодати Божия преисполненный, все житие твое на служение Господеви предал еси; ныне же, предстоя Престолу Царя Славы, молися о нас, Иустине всеблаженне, да возможем и мы достойно поприще земное преити и, достигнувши обителей Небесных, непреткновенно пети Богу: Аллилуия.
Икос 12
Поюще дивное житие и мученическую кончину твою, ублажаем подвиги и страдания твоя, мучениче Христов, и молим тя: простри с Небесе помощь твою на нас, вопиющих ти таковая:
Радуйся, даров Божиих сосуде преизобильный.
Радуйся, исцелений и благодеяний ковчеже неоскудный.
Радуйся, яко тобою Бог прославляется.
Радуйся, яко тобою демоны посрамляются.
Радуйся, телес наших здравие и душ спасение.
Радуйся, православным христианом крепкое заступление.
Радуйся, Иустине, истины Христовы неустанный проповедниче.
Кондак 13
О всеблаженный мучениче Иустине, приими сие наше умиленное пение, в похвалу тебе приносимое, и умоли Христа Бога нашего простити нам вся наша согрешения и муки вечныя избавити, да со всеми святыми во Царствии Его поем во веки: Аллилуия.
Повтор
Этот кондак читается трижды, затем икос 1-й и кондак 1-й.
Икос 1
Ангелов Творец и всея твари Содетель провидев чистоту души твоея, Иустине всехвальне, избра тя на делание спасения человеков. Мы же, воспоминающе добродетельное житие твое, вопием:
Радуйся, паче всех благ земных Господа возлюбивый.
Радуйся, не пощадив живота своего, верно Христу послуживый.
Радуйся, таланты, врученныя ти Богом, сторицею приумноживый.
Радуйся, сокровище негиблющее на Небеси себе собравый.
Радуйся, яко в радость Господа твоего вшел еси.
Радуйся, яко от Вседержительныя десницы венец правды приял еси.
Радуйся, Иустине, истины Христовы проповедниче.
Кондак 1
Избранный от Бога на проповедь народам языческим, святый Иустине, приими теплое моление сие наше, в похвалу тебе приносимое, и, яко имеяй велие дерзновение ко Господу, от всяких злых обстояний нас свобождай, со умилением тебе зовущих: Радуйся, Иустине, истины Христовы проповедниче.
Молитвы
О святый мучениче Иустине! Призри с Небеснаго чертога на требующих твоея помощи и не отрини прошений наших, но, яко присный благодетель и ходатай наш, моли Христа Бога, да сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани; да не осудит нас, грешных, по беззакониям нашим, и да не во зло обратим благая, даруемая нам от Всещедраго Бога, но во славу святаго имене Его и в прославление крепкаго твоего заступления. Да молитвами твоими даст нам Господь мир помыслов, воздержание от пагубных страстей и от всякия скверны и да укрепит во всем мире Свою единую Святую Соборную и Апостольскую Церковь, юже стяжал есть Честною Своею Кровию. Молися прилежно, святый мучениче, да благословит Христос Бог державу нашу, да утвердит во святей Своей Православней Церкви живый дух правыя веры и благочестия, да вси чада ея пребудут в чистоте от суемудрия и суеверия, и духом и истиною да покланяются Ему и усердно пекутся о соблюдении Его заповедей, да мы вси в мире и благочестии поживем в настоящем веце и достигнем блаженныя вечныя жизни на Небеси благодатию Господа нашего Иисуса Христа, Емуже подобает всякая слава, честь и держава со Отцем и Святым Духом, ныне и присно и во веки веков. Аминь.