Канон святой праведной Иулиании Лазаревской, Муромской

Бу́рями страсте́й всегда́ погружа́ема мя́ и молво́ю по́мыслов грехо́вных коле́блема, к ти́хому приста́нищу Христо́вы во́ли мольба́ми твои́ми, свята́я Иулиани́е, напра́ви, я́ко да досто́йно пою́ тя́.

Вдо́вством чи́стым просвеща́ема, Богоблаже́нная, Христо́ви посто́м уневе́стися, и моли́твами, и ми́лостынею и после́дова живоно́сным Его́ стопа́м, ску́дость мно́гу во́лею претерпе́вши.

Святы́х оте́ц уче́нию после́довала еси́, сла́вная, и си́х нра́вом и чистоте́ поревнова́ла еси́, воздержа́нием, а́ки безпло́тна, су́щи и чистото́ю преподо́бна, во и́стиннем смире́нии до́бре пожи́вши.

В Небе́сныя черто́ги все́льшися, светоза́рная, Богоуго́днаго ра́ди жития́ исцеле́ния ре́ки источа́еши и стра́стная тече́ния изсуша́еши.

Распали́вши ся́ жела́нием кра́йним, возлюби́ла еси́ Христа́, Богому́драя, обнища́вшаго пло́тию премно́жеством благосе́рдия, и после́довала еси́ живоно́сным Его́ словесе́м, жите́йская вся́ презре́вши.

Позлаще́нне криле́ ми́лостынею стяжа́вши, к Небе́сней высоте́ возлете́ла еси́, Богоблаже́нная Иулиани́е, я́ко голуби́ца нетле́нная.

Све́тлое торжество́ твое́, све́том Бо́жия Ду́ха сия́ющее, озаря́ет ду́ши на́ша, ве́рою пою́щих тя́, преподо́бная.

Чудесы́ Боже́ственными уве́рила еси́ неве́дущих Влады́ку и к ве́ре Христо́ве те́х возврати́ла еси́, пре́лести тьму́ оста́вльших.

Да́р Христо́ви принесла́ еси́ – чи́стое умерщвле́ние удо́в, труды́, и воздержа́нием, и ми́лостынею Бо́гу угоди́ла еси́ и проти́ву прия́ла еси́ Небе́сное Ца́рство и ве́чное наслажде́ние,

Ру́це твои́ преподо́бныя, воздвиза́еми ко Христу́, ма́ти, низложи́ша вра́жия стремле́ния.

Удержа́в ру́ку твою́ десну́ю, Вы́шний наста́ви тя́, ма́ти, к Небе́сному Ца́рствию.

Стезю́ те́сную преше́дши в поще́нии, к широте́ ра́йстей приспе́ла еси́, всечестна́я ма́ти.

Умертви́вши двиза́ния плотски́я и над страстьми́ воцари́вши у́м, ны́не, всечестна́я Иулиани́е, в безстра́стных живе́ши све́тлостех.

О́бразу Спа́сову покланя́тися навы́кла еси́, сла́вная, всено́щными стоя́ньми, сло́вом и де́лы соблю́дши спаси́тельная Его́ уче́ния.

О́блак показа́ тя́ Христо́с, источа́ющу ми́ро, я́ко до́ждь, на исцеле́ние приходя́щим с ве́рою к моще́м твои́м.

Красоту́ тле́нную небрегла́ еси́, Иулиани́е блаже́нная, смотря́щи та́мо су́щая воздая́ния, све́т же и сла́ву нестаре́ющуюся, и Бо́жию красоту́ и весе́лие, и Боже́ственное наслажде́ние.

Ми́р тле́нный премени́ла еси́ преми́рною жи́знию нестаре́ющуюся и вре́менную пи́щу пребыва́ющим существо́м, чи́стым же вдо́вством обрела́ еси́ Небе́снаго Жениха́.

Ра́зум боголюби́в стяжа́ла еси́ в души́, пло́тию А́нгелом уподо́бившися, бдя́щи те́пле и любо́вию пою́щи: благослове́н Бо́г оте́ц на́ших.

Украше́на сия́нием чистоты́ и чи́стым житие́м просвеще́на, предстои́ши Христу́ Бо́гу на́шему, пою́щи: благослови́те, дела́ Госпо́дня, Го́спода.

Боле́зни разли́чныя челове́ком врачу́ет и бесо́вския нападе́ния прогоня́ет те́ло твое́, пра́ведная, во гро́бе пресла́вно сокрыва́емо.

Моле́бную пе́снь Го́сподеви принеси́ о пою́щих тя́, блаже́нная, и боле́зни лю́тыя облегчи́, да пое́м тя́ во ве́ки.

Возжеле́вши добро́ту Христо́ву и от ду́ши возлюби́вши Его́, зове́ши Ему́, те́пле вопию́щи: где́ пасе́ши, да почи́ю у тебе́? В Твои́х све́тлостех наслажда́юся, велича́ющи Твою́ благода́ть.

Ра́зум име́ла еси́ в души́ и смире́ние, и Боже́ственную кро́тость, и ве́ру несумне́нну, и любо́вь к Бо́гу, всено́щными мольба́ми приближа́ющися Ему́ и та́мо су́щими све́тлостьми ублажа́ема, Иулиани́е, озаря́ема и просвеща́ема.

На́с, ве́рою хва́лящих тя́, помяни́, Иулиани́е блаже́нная, душе́вных и теле́сных боле́зней изба́ви и к Небе́сней стези́ наста́ви ве́рою хва́лящих тя́.