Песнь 1
Ирмос
Пои́м Го́сподеви,/ погрузи́вшему всю си́лу фарао́нову в мори́,/ побе́дную песнь,// я́ко прославися.
Святи́и му́ченицы, моли́те Бо́га о на́с.
Тропарь
Гряди́те, вернии, согла́сно пра́зднуим препросла́вленную па́мять страда́льцев,// в пе́снех духо́вных славосло́вяще Христа́.
Святи́и му́ченицы, моли́те Бо́га о на́с.
Тропарь
Страстоте́рпцы Христо́вы и ве́ры тве́рдии побо́рницы,// на нече́стие ополчи́вшеся кре́пко, враги́ победи́ша.
Тропарь
Нечести́вый гони́тель и ве́ры Христо́вы чуждь,// на страстоте́рпцы разгне́вався, злочести́вый ве́рою упражня́ется.
Богородичен
Па́ству, ю́же стяжа́ла еси́, Богороди́тельнице,// сию́ спаса́й от вся́кия ну́жды, моля́щи Спа́са и Бо́га на́шего.
Песнь 3
Ирмос
Утверди́ся се́рдце мое́ в Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.
Святи́и му́ченицы, моли́те Бо́га о на́с.
Тропарь
Благоче́стия и ве́ры предста́тели, Боже́ственныя страда́льцы восхва́лим,// Феопе́мпта и Фео́ну пресла́внаго.
Святи́и му́ченицы, моли́те Бо́га о на́с.
Тропарь
Пра́вило, и о́браз, и начерта́ние я́вльшеся, Христо́вы великому́ченицы,// святы́х бы́ша путевожди́ ко страда́нию.
Тропарь
Ревну́юще сих доброде́тельному жи́тельству, му́ченицы,/ ку́пно на суди́щи предстоя́ще, взыва́ху:// христиа́не есмы́ вси.
Богородичен
Роди́лся еси́ из Де́вы несказа́нно,/ яви́лся еси́, я́коже благоволи́л еси́, Человеколю́бче,// и мир обнови́л еси́, Го́споди.
Песнь 4
Ирмос
Услы́шах слух Твой и убоя́хся,/ разуме́х дела́ Твоя́// и ужасо́хся, Го́споди.
Святи́и му́ченицы, моли́те Бо́га о на́с.
Тропарь
Всю напои́ша вселе́нную словесы́ Боже́ственными/ Христо́вы великому́ченицы// и лесть упраздни́ша.
Святи́и му́ченицы, моли́те Бо́га о на́с.
Тропарь
Бога́тство некрадо́мо обрето́ша вои́стинну страстоте́рпцы,// бога́тство, сла́ву и све́тлость земны́х оплева́ша.
Тропарь
Вооружи́вшеся страстоте́рпцы Христо́вым ору́жием,// мучи́телево суровство́ все́ в сем низложи́ша.
Богородичен
Мати Чи́стая,/ Благослове́нная Свята́я Де́во,// пою́щия Тя спаса́й от вся́каго обстоя́ния.
Песнь 5
Ирмос
У́тренююще, Сло́ве, в сла́ву Твою́ и хвалу́,/ восхваля́ем непреста́нно о́браз Креста́ Твоего́,// Его́же дал еси́ нам ору́жие в по́мощь.
Святи́и му́ченицы, моли́те Бо́га о на́с.
Тропарь
Му́дрии страда́льцы, ве́ры ору́жницы,// му́ки до́блественне враго́в пребеззако́нных победи́вше, ку́пно венцы́ прия́ша.
Святи́и му́ченицы, моли́те Бо́га о на́с.
Тропарь
Ни ласка́ние, ни лесть,/ ни сла́ва земны́х возмо́же отсещи́ ве́ры ва́шея тече́ние, страда́льцы,// те́мже и ра́дуетеся.
Тропарь
Предстоя́ще престо́лу сла́вы Госпо́дни,/ со А́нгелы непреста́нно моли́теся// да́ти прегреше́ний очище́ние ве́рою пою́щим вас.
Богородичен
Всесвята́я Де́во Обра́дованная,/ ро́ждшая в ле́те Сло́во па́че сло́ва,// моли́ Его́ спасти́ ду́ши на́ша.
Песнь 6
Ирмос
Ио́на из чре́ва а́дова вопия́ше:/ возведи́ от тли живо́т мой./ Мы же Тебе́ вопие́м:// Всеси́льне Спа́се, поми́луй нас.
Святи́и му́ченицы, моли́те Бо́га о на́с.
Тропарь
Упраздни́ша и́дольскую лесть му́ченицы, на суди́щи стра́ждуще,// и нече́стие все потреби́ша от земли́ страда́нием свои́м.
Святи́и му́ченицы, моли́те Бо́га о на́с.
Тропарь
Предпоста́ви враг и гони́тель ве́ры своя́ служи́тели// мечми́, я́коже а́гнцы, убива́ти вас го́рько, му́ченицы сла́внии.
Тропарь
Я́коже ви́де лик святы́х мучи́тели, вооруже́нныя мечми́, му́жески вопия́ше:// во́ини Христо́вы есмы́, о мучи́телю!
Богородичен
Его́же родила́ еси́, Богоро́дице, несказа́нно, Бо́га на́шего,// моля́щи не преста́й изба́вите от бед пою́щия Тя, Чи́стая Присноде́во.
Песнь 7
Ирмос
Пещь горя́щую ороси́л еси́, Спа́се,/ о́троки спасл еси́, пою́щия и глаго́лющия:/ благослове́н еси́ во ве́ки,// Го́споди Бо́же оте́ц на́ших.
Святи́и му́ченицы, моли́те Бо́га о на́с.
Тропарь
Коне́ц муче́ния прия́сте ку́пно,/ мече́м умерщвля́еми с жена́ми и детьми́, Христу́ вопию́ще:// благослове́н еси́, Го́споди Бо́же оте́ц на́ших.
Святи́и му́ченицы, моли́те Бо́га о на́с.
Тропарь
Ра́довахуся святи́и, зря́ще себе́, мечи́ скончава́емыя,/ и ве́рою взыва́ху:// благослове́н еси́, Го́споди Бо́же оте́ц на́ших.
Тропарь
Нечести́вых свере́пство потреби́ся от земли́,/ и бо́зи падо́ша на зе́млю// и сокруши́шася му́ченик испове́данием, и венцы́ прия́ша.
Богородичен
Спаса́й па́ству Твою́, Всесвята́я Чи́стая, от вся́каго обстоя́ния,/ я́ко еди́на Предста́тельница ро́да на́шего,// Благослове́нная Богоро́дице Всепе́тая.
Песнь 8
Ирмос
Еди́наго Безнача́льнаго Царя́ Сла́вы,/ Его́же благословя́т Небе́сныя си́лы/ и трепе́щут чи́ни А́нгельстии,/ по́йте, свяще́нницы,// лю́дие, превозноси́те Его́ во ве́ки.
Святи́и му́ченицы, моли́те Бо́га о на́с.
Тропарь
Еди́наго Благоутро́бнаго Царя́ Сла́вы испове́дающе,/ му́дрии страда́льцы прия́ша по́чести побе́ды, вопию́ще благодерзнове́нно:// лю́дие, превозноси́те Его́ во ве́ки.
Святи́и му́ченицы, моли́те Бо́га о на́с.
Тропарь
Тве́рдо проти́вишася Христо́вы страда́льцы к мучи́телем,/ стра́ждуще до́блественне, победи́ша и́дольскую лесть, вопию́ще благодерзнове́нно:// лю́дие, превозноси́те во вся ве́ки.
Тропарь
Я́коже адама́нти, до́блии ору́жницы,/ мучи́телей преще́ния и му́ки победи́вше, ра́достно вопия́ху:// по́йте, свяще́нницы, лю́дие, превозноси́те Го́спода во ве́ки.
Богородичен
Еди́наго Благоутро́бнаго Преве́чнаго Сло́ва,/ из Де́вы в после́дняя ро́ждшагося и спа́сшаго челове́ческий род,// по́йте, свяще́нницы, людие, превозноси́те Его́ во ве́ки.
Песнь 9
Ирмос
Па́че естества́ Ма́терь и по естеству́ Де́ву,/ Еди́ну в жена́х Благослове́нную,// пе́сньми, ве́рнии, Богоро́дицу велича́ем.
Святи́и му́ченицы, моли́те Бо́га о на́с.
Тропарь
Попра́вше вся идолослуже́ния ве́рою страстоте́рпцы Христо́вы,// Боже́ственное тече́ние сконча́вше благоче́стно и ве́рою утверди́ша.
Святи́и му́ченицы, моли́те Бо́га о на́с.
Тропарь
Земна́я вся презре́вше ве́рою страстоте́рпцы Христо́вы, вку́пе усе́рдно пострада́вше,// от Бо́га прия́ша врачева́ния.
Тропарь
Страстоте́рпцы му́жески вооружи́вшеся веро́ю,// Госпо́дним кресто́м ополче́ния низложи́ша вра́жия и венцы́ прия́ша.
Богородичен
Во чре́ве заче́ншая непостижи́мое Сло́во/ и Сие́ без се́мене нам ро́ждшая,// моли́ приле́жно спасти́ся душа́м на́шим.