Кондак 1
Избра́нный от ле́т дре́вних бы́ти Предте́чею и Крести́телем Спаси́теля ми́ра Христа́ Бо́га, Иоа́нне богохва́льне, прославля́юще просла́вльшаго тя́ Го́спода, похва́льная воспису́ем ти́, я́ко бо́льшему все́х рожде́нных жена́ми, во пло́ти А́нгелу, покая́ния пропове́днику; ты́ же, я́ко име́яй ве́лие дерзнове́ние ко Го́споду, от вся́ких бе́д свобожда́й и к покая́нию воздвиза́й на́с, любо́вию тебе́ зову́щих:
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Икос 1
Арха́нгел Гаврии́л, предстоя́й пред Бо́гом, по́слан бы́сть ко иере́ю Заха́рии, егда́ то́й, служа́ по чи́ну чреды́ своея́, вни́де покади́ти в це́рковь Госпо́дню; и, предста́в одесну́ю олтаря́ кади́льнаго, благовествова́ше о твое́м рождестве́, вели́кий Иоа́нне, возвеща́я Заха́рии ра́дость и весе́лие, и я́ко мно́зи о рождестве́ твое́м возра́дуются. Сего́ ра́ди и мы́, ди́вному о тебе́ Бо́жию благоволе́нию чудя́щеся и ра́дующеся, со благогове́нием в похвалу́ тебе́ вопие́м:
Ра́дуйся, Сове́та Бо́жия неизрече́ннаго таи́нниче; ра́дуйся, ди́внаго смотре́ния Его́ исполне́ние.
Ра́дуйся, пре́жде ле́т мно́гих проро́чеством Иса́ии проявле́нный; ра́дуйся, ве́стниче пред лице́м Госпо́дним, дре́вле прорече́нный.
Ра́дуйся, предназна́ченный бы́ти вели́ким проро́ком Вы́шняго; ра́дуйся, по обетова́нию А́нгела рожде́нный.
Ра́дуйся, еще́ во чре́ве ма́тере твоея́ Ду́ха Свята́го испо́лненный; ра́дуйся, пре́жде рождества́ твоего́ на вели́кое служе́ние освяще́нный.
Ра́дуйся, непло́дства роди́телей разреше́ние; ра́дуйся, иере́я Бо́жия ра́дость и весе́лие.
Ра́дуйся, дще́ре Ааро́новы прозябе́ние; ра́дуйся, пло́д моли́твы Богодарова́нный.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 2
Ви́дя Заха́рия я́вльшагося ему́ А́нгела, смути́ся, и стра́х нападе́ на́нь, и не ве́рова словесе́м благове́стия его́ о рождестве́ твое́м; егда́ же за неве́рие немото́ю свя́зан бы́сть, удивля́шеся пресла́вному чудеси́, все́м се́рдцем вопия́ Бо́гу: Аллилу́иа.
Икос 2
Ра́зум неуразумева́емый разуме́ти и́щуще лю́дие, жду́ще Заха́рию, и чудя́хуся, уме́длившу ему́ в це́ркви; изше́дшу же ему́ и не могу́щу глаго́лати к ни́м, но то́кмо помава́ющу, разуме́ша вси́, я́ко виде́ние ви́де в це́ркви. Мы́ же, прославля́юще ди́внаго Творца́ чуде́с, Бо́га, вопие́м тебе́ такова́я:
Ра́дуйся, благи́й вино́вниче безгла́сия о́тча; ра́дуйся, сле́з ма́тере твоея́ премене́ние на ра́дость.
Ра́дуйся, тоя́ поноше́ния в лю́дех отъя́тие; ра́дуйся, вели́кое ро́ждшим тя́ утеше́ние.
Ра́дуйся, я́ко в шесты́й ме́сяц о зача́тии твое́м Пресвята́я Де́ва Мари́я в Назаре́те от А́нгела извести́ся; ра́дуйся, я́ко о рождестве́ твое́м мно́зи возвесели́шася.
Ра́дуйся, я́ко и́мя благода́тное, от А́нгела нарече́нное, получи́вый; ра́дуйся, я́ко и́менем твои́м немотствова́ние отца́ твоего́ Заха́рии разреши́ся.
Ра́дуйся, я́ко и́мя Бо́жие о тебе́ отце́м твои́м благослови́ся; ра́дуйся, я́ко о чу́днем рождестве́ твое́м стра́х и удивле́ние в о́крест живу́щих яви́ся.
Ра́дуйся, я́ко по все́й стране́ Иуде́йстей о ди́внем рождестве́ твое́м возвести́ся; ра́дуйся, я́ко тобо́ю спасе́ние мно́гим в ми́ре се́м яви́ся.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 3
Си́ла Вы́шняго разреши́ непло́дство заматоре́вшия во дне́х свои́х пра́ведныя Елисаве́ты: зача́т бо тя́, сла́вный Предте́че Госпо́день, и тая́шеся ме́сяц пя́ть, глаго́лющи: я́ко та́ко мне́ сотвори́ Госпо́дь во дни́, в ня́же призре́ отъя́ти поноше́ние мое́ в челове́цех. Егда́ же прия́ Иму́щую во чре́ве Христа́, испо́лнися Ду́ха Свя́та и возопи́ гла́сом ве́лиим: «Отку́ду мне́ сие́, я́ко прии́де Ма́ти Го́спода моего́ ко мне́!» С Не́юже ра́дующися, взыва́ше Бо́гу: Аллилу́иа.
Икос 3
Име́яй предыти́ пред Го́сподем ду́хом и си́лою Илиино́ю, еще́ из чре́ва ма́тере твоея́ испо́лнился еси́ Ду́ха Свята́го, отону́дуже и Проро́к ди́вный показа́лся еси́, егда́ во утро́бе ма́тере твоея́ сы́й, взыгра́лся еси́ ра́дощами прише́ствию Ма́тери Госпо́дней. Бо́га бо позна́л еси́ носи́ма в ложесна́х Благода́тныя и Того́ ма́терним гла́сом пропове́дал еси́: подоба́ше бо Боже́ственных веще́й пресла́вным бы́ти нача́лом. Сему́ у́бо благогове́йно удивля́ющеся, с ра́достию тебе́ вопие́м:
Ра́дуйся, еще́ во утро́бе ма́терней предпосла́вшаго тя́ Го́спода чу́дным весе́лием предъяви́вый; ра́дуйся, я́ко тебе́ ра́ди и ма́тери твое́й Елисаве́те воплоще́ние Христо́во откры́ся.
Ра́дуйся, я́ко и та́ испо́лнися Ду́ха Свя́та; ра́дуйся, я́ко и она́ преди́вная проро́чица яви́ся.
Ра́дуйся, я́ко от нея́ Пресвята́я Де́ва Мари́я Блаже́нною в жена́х нарече́ся; ра́дуйся, я́ко то́ю Она́ и Ма́терию Го́спода наименова́ся.
Ра́дуйся, я́ко и безсе́менный пло́д Тоя́ Благослове́нным пронарече́ся; ра́дуйся, Прему́дросте Боже́ственныя предъявле́ние.
Ра́дуйся, свята́го супру́жества благослове́ние; ра́дуйся, непло́дных ложе́сн ди́вное прозябе́ние.
Ра́дуйся, рожде́нием твои́м удиви́вый лю́ди; ра́дуйся, све́тлый Сло́ва гла́се.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 4
Бу́рею сомне́ния смуще́нный, иере́й Заха́рия не можа́ше, по словеси́ а́нгельскому, проглаго́лати. Егда́ же по рождестве́ твое́м, Предте́че Госпо́день, написа́ благода́тное и́мя твое́, а́бие отверзо́шася уста́ и язы́к его́, и глаго́лаше, благословя́ Бо́га, и проро́чествова, глаго́ля: благослове́н Госпо́дь Бо́г Изра́илев, я́ко посети́ и сотвори́ избавле́ние лю́дем Свои́м, и ты́, отроча́, Проро́к Вы́шняго нарече́шися, поя́ Тому́: Аллилу́иа.
Икос 4
Слы́шаша о́крест живу́щии лю́дие о пресла́внем и чу́днем рождестве́ твое́м, со удивле́нием глаго́лаху в себе́: «Что́ у́бо отроча́ сие́ бу́дет?» Мы́ же тя́, пресла́вный Предте́че Госпо́день, я́ко бо́льша все́х рожде́нных жена́ми, досто́йно чту́ще, ублажа́ем си́це:
Ра́дуйся, от зача́тия твоего́ благода́тных явле́ний испо́лненный; ра́дуйся, в рождестве́ твое́м Бо́гом просла́вленный.
Ра́дуйся, во младе́нчестве твое́м от отца́ твоего́ Проро́ком Вы́шняго нарече́нный; ра́дуйся, во о́трочестве твое́м Ду́хом Святы́м просвеще́нный и укрепле́нный.
Ра́дуйся, Бо́га воплоти́вшагося сро́дник по пло́ти бы́вый; ра́дуйся, от Бо́га высо́кое зва́ние Предте́чи и Крести́теля прие́мый.
Ра́дуйся, заре́, Све́т но́вый ми́ру возвести́вшая; ра́дуйся, звездо́, пу́ть, веду́щий ко Христу́, освети́вшая.
Ра́дуйся, денни́це Со́лнца незаходи́маго; ра́дуйся, свети́льниче Све́та неугаса́емаго.
Ра́дуйся, пу́ть гряду́щему Христу́ уготовля́яй; ра́дуйся, А́нгела и челове́ка в себе́ явля́яй.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 5
Богопроти́вное веле́ние беззако́ннаго детоуби́йцы И́рода изгна́ тя из до́му о́тча в непрохо́дную пусты́ню, носи́ма ма́терию, Предте́че Госпо́день, иде́же и пребыва́л еси́ до дне́ явле́ния твоего́ ко Изра́илю, яды́й акри́ды и ме́д ди́вий и Бо́гу вопия́: Аллилу́иа.
Икос 5
Ви́дяще ди́вное Бо́жие о тебе́ промышле́ние, Иоа́нне богохва́льне, я́ко от младе́нческих пеле́н по́стническаго жития́ люби́тель показа́лся еси́, отону́дуже во́лею Вы́шняго по́слан бы́л еси́ пропове́дати лю́дем гряду́щее во Христе́ спасе́ние, сего́ ра́ди со удивле́нием и любо́вию тебе́ взыва́ем:
Ра́дуйся, я́ко, еще́ младе́нец сы́й, царя́ И́рода устраши́л еси́; ра́дуйся, от напра́снаго убие́ния те́м десни́цею Вы́шняго сохране́нный.
Ра́дуйся, пусты́ни шипо́к благово́нный; ра́дуйся, высото́ю по́двигов твои́х все́х удиви́вый.
Ра́дуйся, пра́ваго пути́ ве́рный указа́телю; ра́дуйся, чистоты́ и целому́дрия преди́вный храни́телю.
Ра́дуйся, ева́нгельскаго самоотверже́ния о́бразе соверше́нный; ра́дуйся, мона́шествующих покро́ве и утвержде́ние.
Ра́дуйся, богосло́вствующих умо́в просвеще́ние; ра́дуйся, гре́шным милосе́рдия Бо́жия две́ри отверза́яй.
Ра́дуйся, ка́ющимся гре́шником от Го́спода проще́ние подава́яй; ра́дуйся, плоды́ досто́йны покая́ния твори́ти помога́яй.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 6
Пропове́дник сла́вный ты́, боже́ственный Предте́че, показа́лся еси́ в пусты́ни Иорда́нстей во дни́ явле́ния Христа́ Бо́га ми́ру. Сего́ бо, Гряду́щаго к тебе́, показа́л еси́ лю́дем, глаго́ля: «Се́, А́гнец Бо́жий, взе́мляй грехи́ ми́ра!»; Его́же мы́ ве́рою позна́вше, пое́м Ему́: Аллилу́иа.
Икос 6
Возсия́л еси́ све́т и́стины, Иоа́нне богопросвеще́нне, все́м явля́яй Сла́вы О́тчия сия́ние, я́вльшееся пло́тски на́с ра́ди. Вопия́л бо еси́ в пусты́ни лю́дем: «Пока́йтеся, прибли́жи бо ся Ца́рствие Небе́сное: сотвори́те плоды́ досто́йны покая́ния. Се́ бо гряде́т по мне́, И́же крести́т вы́ водо́ю и Ду́хом». Сего́ ра́ди похва́льная тебе́ вопие́м:
Ра́дуйся, прише́ствия Месси́и возвести́телю; ра́дуйся, путе́й Госпо́дних угото́вателю.
Ра́дуйся, ве́тхия и но́выя благода́ти хода́таю; ра́дуйся, проро́ков преде́ле и нача́ло Апо́столов.
Ра́дуйся, гла́се Сло́ва благознамени́тый; ра́дуйся, покая́ния пропове́дниче велегла́сный.
Ра́дуйся, мно́гих сыно́в Изра́илевых ко Го́споду обрати́вый; ра́дуйся, лю́ди соверше́нны Го́сподеви угото́вавый.
Ра́дуйся, фарисе́ев и саддуке́ев дерзнове́нно обличи́вый; ра́дуйся, плоды́ досто́йны покая́ния твори́ти научи́вый.
Ра́дуйся, просвеще́ния духо́внаго указа́телю; ра́дуйся, и́щущим предста́тельства твоего́ неусы́пный засту́пниче.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 7
Хотя́щу от тебе́ крести́тися Го́споду Иису́су, Иоа́нне богоблаже́нне, глаго́лал еси́: «А́з тре́бую Тобо́ю крести́тися», оба́че повину́яся, ре́кшу Тому́: «Оста́ви ны́не», воздви́гл еси́ десни́цу твою́ на главу́ Его́ и, крести́в не тре́бующаго очище́ния, вопия́л еси́: Аллилу́иа.
Икос 7
Но́вую подая́ благода́ть крести́тися изво́ливый от тебе́ Госпо́дь, сподо́би тя́ Ду́ха прише́ствие ви́дети и гла́с Оте́ческий с небесе́, свиде́тельствующий Его́ Сыновство́, слы́шати. Отону́дуже в Трие́х Ли́цех Еди́ному Бо́гу покланя́тися на́с научи́л еси́. Его́же бре́нными прославля́юще устна́ми, в похвалу́ сия́ тебе́ прино́сим:
Ра́дуйся, Тро́ическаго Богоявле́ния пе́рвый пропове́дниче; ра́дуйся, в Трие́х Ли́цех Еди́наго Бо́га и́стинный покло́нниче.
Ра́дуйся, Ду́ха Свята́го в ви́де голуби́не яснозри́телю; ра́дуйся, снисхожде́ния Его́ от Отца́ на Сы́на свиде́телю.
Ра́дуйся, гла́са с Небесе́ от Бо́га Отца́ слы́шателю; ра́дуйся, явле́ния любве́ О́тчи к Сы́ну созерца́телю.
Ра́дуйся, Сы́на Бо́жия избра́нный Крести́телю; ра́дуйся, во́ли Его́ святы́я исполни́телю.
Ра́дуйся, сла́внаго служе́ния спасе́нию ро́да челове́ческаго ре́вностный рачи́телю; ра́дуйся, вели́каго Та́инства Креще́ния пе́рвый соверши́телю.
Ра́дуйся, Боже́ственныя ра́дости ве́стниче; ра́дуйся, Но́ваго Заве́та пе́рвый учи́телю.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 8
Стра́нное и неизрече́нное смире́ние воплоти́вшагося Бо́га Сло́ва ви́дев, богоблаже́нне Крести́телю, Боже́ственную Свою́ главу́ приклони́вша и ра́бское креще́ние прие́мша, ты́ и са́м ве́сь испо́лнился еси́ вели́каго смире́ния. Испроси́ у́бо боголюбе́зную доброде́тель сию́ и на́м, одержи́мым го́рдостию, я́ко да от се́рдца смире́нна вопие́м Ему́: Аллилу́иа.
Икос 8
Ве́сь благода́тных дарова́ний испо́лненный, тече́ние вре́менныя жи́зни скончава́я, Иоа́нне богознамени́те, все́х поуча́л еси́ исполне́нием зако́на и покая́нием благоугожда́ти Го́сподеви. Сего́ ра́ди благода́рственное хвале́ние тебе́, вели́кому учи́телю и́стины, воспева́ем:
Ра́дуйся, зако́на и оправда́ний Госпо́дних насади́телю; ра́дуйся, И́родова беззако́ния обличи́телю.
Ра́дуйся, о исправле́нии того́ рачи́телю; ра́дуйся, пра́вды ра́ди темни́чное заключе́ние и у́зы претерпе́вый.
Ра́дуйся, за и́стину во главу́ усече́нный; ра́дуйся, я́ко те́ло твое́ от ученико́в твои́х че́стне погребе́ся.
Ра́дуйся, я́ко Бо́жиим смотре́нием глава́ твоя́ нетле́нна соблюде́ся; ра́дуйся, я́ко та́ на утеше́ние, освяще́ние и цельбы́ христиа́ном даде́ся.
Ра́дуйся, я́ко и десни́це твое́й, крести́вшей Го́спода, ве́рнии благоче́стне покланя́ются; ра́дуйся, я́ко от тебе́ мно́гая чудеса́ те́ми доны́не соверша́ются.
Ра́дуйся, я́ко тобо́ю ве́рнии от страсте́й безче́стия избавля́ются; ра́дуйся, я́ко тобо́ю гре́шнии к покая́нию воздвиза́ются.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 9
Все́ естество́ а́нгельское удиви́ся высоте́ служе́ния твоего́, и Це́рковь благогове́йно прославля́ет тя́, я́ко дру́га Христа́ Бо́га, предше́дшаго пред Ни́м ду́хом и си́лою Илиино́ю. Ревну́я бо по и́стине, дерзнове́нно облича́л еси́ фарисе́ев и беззако́ннаго И́рода, от него́ же и му́ченическую кончи́ну прия́л еси́. Покланя́ющеся у́бо честне́й главе́ твое́й, мо́лимся ти́: изба́ви на́с от страсте́й безче́стия, да чи́стым се́рдцем и усты́ пое́м: Аллилу́иа.
Икос 9
Вити́йство вся́кое земноро́дных не довле́ет досто́йно восхвали́ти тя́, Иоа́нне богохва́льне: тебе́ бо уста́ Христо́вы похвали́ша, вы́сша проро́ков и бо́льша все́х рожде́нных жена́ми тя́ наименова́ша. Отону́дуже досто́йную похвалу́ принести́ тебе́ недоумева́юще, вопие́м ти́ сицева́я:
Ра́дуйся, Це́ркве Христо́вы вели́кая сла́во; ра́дуйся, А́нгелов преди́вное чу́до.
Ра́дуйся, пра́отцев ра́дость и прославле́ние; ра́дуйся, проро́ков высо́кая похвало́.
Ра́дуйся, Апо́столов богосве́тлый ве́нче; ра́дуйся, святи́телей велеле́пая красото́.
Ра́дуйся, му́чеников в но́вой благода́ти нача́ло; ра́дуйся, преподо́бных соверше́ние.
Ра́дуйся, пра́ведных удобре́ние; ра́дуйся, де́вственников и по́стников основа́ние.
Ра́дуйся, все́х христиа́н вели́кое утеше́ние; ра́дуйся, я́ко от все́х христиа́нских родо́в и́мя твое́ прославля́ется.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 10
Спасти́ ми́р прише́дшаго во пло́ти Христа́ Бо́га благовести́л еси́ и су́щим во а́де: я́коже бо денни́ца, предходя́щая со́лнцу, освети́л еси́ во тьме́ и се́ни сме́ртней седя́щих. Отону́дуже вско́ре Го́сподем изведе́н бы́л еси́ со все́ми от ве́ка пра́ведными, поя́ Ему́, я́ко Изба́вителю и Победи́телю сме́рти: Аллилу́иа.
Икос 10
Стена́ еси́ и прибе́жище спаси́тельное все́м, моли́твенно к тебе́ притека́ющим, боже́ственный Иоа́нне: сего́ ра́ди пе́сньми похва́льными ублажа́ем тя́ си́це:
Ра́дуйся, мо́щный засту́пниче на́ш и ве́рный от бе́д храни́телю; ра́дуйся, злостра́ждущих от духо́в зло́бы ско́рый помо́щниче и изба́вителю.
Ра́дуйся, непло́дствующим благослове́ние от Бо́га низпосыла́яй; ра́дуйся, притека́ющих к тебе́ с ве́рою от треволне́ния страсте́й избавля́яй.
Ра́дуйся, во вражде́ су́щих ско́ро умиротворя́яй; ра́дуйся, во вся́кой ну́жде и печа́ли усе́рдно притека́ющим к тебе́ ско́рую по́мощь подава́яй.
Ра́дуйся, благотеку́щих от самообольще́ния и пре́лести изыма́яй; ра́дуйся, вруча́ющим себе́ твоему́ хода́тайству в ча́с сме́ртный помога́яй.
Ра́дуйся, лю́бящих тя́ от возду́шных мыта́рств предста́тельством твои́м свобожда́яй; ра́дуйся, почита́ющих сла́вную па́мять твою́ ве́чныя жи́зни моли́твами твои́ми сподобля́яй.
Ра́дуйся, ни́щих и вдови́ц и сиро́т заступле́ние; ра́дуйся, по Бо́зе и Богоро́дице христиа́ном прибе́жище и упова́ние.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 11
Пе́ние вся́кое не довле́ет по достоя́нию до́блестей твои́х восхвали́ти тя́, Крести́телю Госпо́день; но мы́, любо́вию пону́ждени, дерза́ем воспева́ти вели́чия твоя́, е́же ми́лостивно приими́ от на́с, первостоя́телю у Престо́ла Пресвяты́я Тро́ицы, и моли́ свободи́тися на́м от вся́кия скве́рны грехо́вныя, да чи́стым се́рдцем и устна́ми пое́м Бо́гу: Аллилу́иа.
Икос 11
Свети́льника Све́та непристу́пнаго и всесве́тлых благода́тных дарова́ний всего́ испо́лнена тя́, Иоа́нне богопросвеще́нне, ве́дуще, ра́достно прино́сим ти́ такова́я:
Ра́дуйся, самови́дче озари́вшаго тя́ свы́ше Боже́ственнаго Све́та; ра́дуйся, све́том доброде́телей твои́х просла́вивый Бо́га.
Ра́дуйся, Пресвяты́я Тро́ицы велеле́пую сла́ву яви́вый; ра́дуйся, пра́вый и ди́вный пу́ть к Небеси́ показа́вый.
Ра́дуйся, и су́щим во а́де Бо́га, я́вльшагося во пло́ти, благовести́телю; ра́дуйся, ду́ш пра́ведных, от ве́ка в преиспо́дней держи́мых, возвесели́телю.
Ра́дуйся, Влады́ки Христа́ Бо́га дру́же и́скренний; ра́дуйся, яви́вый ми́ру Све́т и́стинный.
Ра́дуйся, светоза́рное све́та ева́нгельскаго сия́ние; ра́дуйся, ро́да христиа́нскаго прославле́ние.
Ра́дуйся, Сове́та Бо́жия исполне́ние; ра́дуйся, я́ко от восто́к со́лнца да́же до за́пад хва́льно и́мя твое́.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 12
Благода́ти тезоимени́тый, Крести́телю Госпо́день, и то́ю обогати́вся, победоно́сец пресла́вный показа́лся еси́: победи́л бо еси́ враги́ и вся́кую зло́бу, и вели́кое служе́ние твое́ му́ченическим по́двигом запечатле́л еси́. Ны́не же, предстоя́ Престо́лу Царя́ ца́рствующих, моли́ Его́ дарова́ти ве́рным побе́ды на враги́ и во все́м благопоспеше́ние, в доброде́телех же благода́тное укрепле́ние, пою́щим Ему́: Аллилу́иа.
Икос 12
Пою́ще Бо́га, ди́вно в тебе́ просла́вльшагося, хва́лим тя́, богоблаже́нне Крести́телю, я́ко и́скренняго дру́га Христо́ва, прославля́ем вели́кия по́двиги твоя́, ублажа́ем му́ченическую кончи́ну твою́ и сицева́я ра́достно вопие́м ти́:
Ра́дуйся, вселе́нский Апо́столе и Но́ваго Заве́та первому́чениче; ра́дуйся, явле́нием Христа́ на земли́ откры́вшагося Ца́рствия Небе́снаго пе́рвый пропове́дниче.
Ра́дуйся, язы́ков Боже́ственное призва́ние предвозвести́вый; ра́дуйся, безве́стная и та́йная прему́дрости Бо́жия ми́ру яви́вый.
Ра́дуйся, боже́ственными дея́нии плодоно́сен па́че ины́х яви́выйся; ра́дуйся, я́ко све́том де́л твои́х просла́вися Оте́ц Небе́сный.
Ра́дуйся, я́ко в па́мяти твое́й Це́рковь Христо́ву весели́ши неизрече́нно; ра́дуйся, я́ко ны́не ве́чнаго наслажда́ешися весе́лия изоби́льно.
Ра́дуйся, боже́ственными луча́ми Трисо́лнечнаго Све́та осиява́емый; ра́дуйся, я́ко со безпло́тными трисвяту́ю пе́снь Бо́гу немо́лчно вопие́ши.
Ра́дуйся, я́ко ны́не, зерца́лом разре́шшимся, несре́дственне зри́ши Святу́ю Тро́ицу.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 13
О вели́кий и пресла́вный Предте́че и Крести́телю Госпо́день Иоа́нне, приими́ от на́с ны́не приноси́мое тебе́ моле́ние и твои́ми богоприя́тными к Бо́гу моли́твами изба́ви на́с от вся́каго зла́, и ве́чныя изми́ му́ки, и насле́дниками Ца́рствия Небе́снаго соде́лай, да во ве́ки пое́м Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Арха́нгел Гаврии́л, предстоя́й пред Бо́гом, по́слан бы́сть ко иере́ю Заха́рии, егда́ то́й, служа́ по чи́ну чреды́ своея́, вни́де покади́ти в це́рковь Госпо́дню; и, предста́в одесну́ю олтаря́ кади́льнаго, благовествова́ше о твое́м рождестве́, вели́кий Иоа́нне, возвеща́я Заха́рии ра́дость и весе́лие, и я́ко мно́зи о рождестве́ твое́м возра́дуются. Сего́ ра́ди и мы́, ди́вному о тебе́ Бо́жию благоволе́нию чудя́щеся и ра́дующеся, со благогове́нием в похвалу́ тебе́ вопие́м:
Ра́дуйся, Сове́та Бо́жия неизрече́ннаго таи́нниче; ра́дуйся, ди́внаго смотре́ния Его́ исполне́ние.
Ра́дуйся, пре́жде ле́т мно́гих проро́чеством Иса́ии проявле́нный; ра́дуйся, ве́стниче пред лице́м Госпо́дним, дре́вле прорече́нный.
Ра́дуйся, предназна́ченный бы́ти вели́ким проро́ком Вы́шняго; ра́дуйся, по обетова́нию А́нгела рожде́нный.
Ра́дуйся, еще́ во чре́ве ма́тере твоея́ Ду́ха Свята́го испо́лненный; ра́дуйся, пре́жде рождества́ твоего́ на вели́кое служе́ние освяще́нный.
Ра́дуйся, непло́дства роди́телей разреше́ние; ра́дуйся, иере́я Бо́жия ра́дость и весе́лие.
Ра́дуйся, дще́ре Ааро́новы прозябе́ние; ра́дуйся, пло́д моли́твы Богодарова́нный.
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Кондак 1
Избра́нный от ле́т дре́вних бы́ти Предте́чею и Крести́телем Спаси́теля ми́ра Христа́ Бо́га, Иоа́нне богохва́льне, прославля́юще просла́вльшаго тя́ Го́спода, похва́льная воспису́ем ти́, я́ко бо́льшему все́х рожде́нных жена́ми, во пло́ти А́нгелу, покая́ния пропове́днику; ты́ же, я́ко име́яй ве́лие дерзнове́ние ко Го́споду, от вся́ких бе́д свобожда́й и к покая́нию воздвиза́й на́с, любо́вию тебе́ зову́щих:
Ра́дуйся, вели́кий Иоа́нне, Проро́че, Предте́че и Крести́телю Госпо́день.
Молитвы
Крести́телю Христо́в, пропове́дниче покая́ния, ка́ющагося не пре́зри мене́, но, совокупля́яся с во́и Небе́сными, моли́ся ко Влады́це за мене́, недосто́йнаго, уны́лаго, немощна́го и печа́льнаго, во мно́гия беды́ впа́дшаго, утружде́ннаго бу́рными по́мыслы ума́ моего́. А́з бо е́смь верте́п злы́х де́л, отню́д не име́яй конца́ грехо́вному обы́чаю: пригвожде́н бо е́сть у́м мо́й земны́м веще́м. Что́ сотворю́, не ве́м, и к кому́ прибе́гну, да спасе́на бу́дет душа́ моя́? То́кмо к тебе́, святы́й Иоа́нне, благода́ти тезоимени́те, я́ко тя́ пред Го́сподем, по Богоро́дице, ве́м бо́льша бы́ти рожде́нных все́х: ты́ бо сподо́бился еси́ косну́тися верху́ Царя́ Христа́, взе́млющаго грехи́ ми́ра, А́гнца Бо́жия. Его́же моли́ за гре́шную мою́ ду́шу, да поне́ отны́не, в первыйна́десять ча́с, понесу́ тяготу́ благу́ю и прииму́ мзду́ с после́дними. Е́й, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чистоты́ учи́телю и бли́жний дру́же Христо́в, тя́ молю́, к тебе́ прибега́ю, не отри́ни мене́ от твоего́ заступле́ния, но возста́ви мя́, па́дшагося мно́гими грехи́: обнови́ ду́шу мою́ покая́нием, я́ко вторы́м креще́нием, поне́же обоего́ нача́льник еси́: креще́нием омыва́яй прароди́тельный гре́х, покая́нием же очища́яй коего́ждо де́ло скве́рно. Очи́сти у́бо мя́, греха́ми оскверне́ннаго и пону́ди вни́ти, а́може ничто́же скве́рно вхо́дит в Ца́рствие Небе́сное. Ами́нь.
Конда́къ а҃
И҆збра́нный ѿ лѣ́тъ дре́внихъ бы́ти прⷣте́чею и҆ крⷭ҇ти́телемъ сп҃си́телѧ мі́ра хрⷭ҇та̀ бг҃а, і҆ѡа́нне бг҃охва́льне, прославлѧ́юще просла́вльшаго тѧ̀ гдⷭ҇а, похва̑льнаѧ восписꙋ́емъ тѝ, ꙗ҆́кѡ бо́льшемꙋ всѣ́хъ рожде́нныхъ жена́ми, во пло́ти а҆́гг҃лꙋ, покаѧ́нїѧ проповѣ́дникꙋ: ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ бѣ́дъ свобожда́й и҆ къ покаѧ́нїю воздвиза́й на́съ, любо́вїю тебѣ̀ зовꙋ́щихъ:
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
І҆́косъ а҃
А҆рха́гг҃лъ гаврїи́лъ, предстоѧ́й пред̾ бг҃омъ по́сланъ бы́сть ко і҆ере́ю заха́рїи, є҆гда̀ то́й слꙋжа̀ по чи́нꙋ чреды̀ своеѧ̀, вни́де покади́ти въ цр҃ковь гдⷭ҇ню: и҆, предста́въ ѡ҆деснꙋ́ю ѻ҆лтарѧ̀ кади́льнагѡ, бл҃говѣствова́ше ѡ҆ твое́мъ рождествѣ̀, вели́кїй і҆ѡа́нне, возвѣща́ѧ заха́рїи ра́дость и҆ весе́лїе, и҆ ꙗ҆́кѡ мно́зи ѡ҆ рождествѣ̀ твое́мъ возра́дꙋютсѧ. Сегѡ̀ ра́ди и҆ мы̀, ди́вномꙋ ѡ҆ тебѣ̀ бж҃їю бл҃говоле́нїю чꙋдѧ́щесѧ и҆ ра́дꙋющесѧ, со бл҃гоговѣ́нїемъ въ похвалꙋ̀ тебѣ̀ вопїе́мъ:
Ра́дꙋйсѧ, совѣ́та бж҃їѧ неизрече́ннагѡ таи́нниче: ра́дꙋйсѧ, ди́внагѡ смотре́нїѧ є҆гѡ̀ и҆сполне́нїе.
Ра́дꙋйсѧ, пре́жде лѣ́тъ мно́гихъ прⷪ҇ро́чествомъ и҆са́їи проѧвле́нный: ра́дꙋйсѧ, вѣ́стниче пред̾ лице́мъ гдⷭ҇нимъ дре́вле прорече́нный.
Ра́дꙋйсѧ, предназна́ченный бы́ти вели́кимъ прⷪ҇ро́комъ вы́шнѧгѡ: ра́дꙋйсѧ, по ѡ҆бѣтова́нїю а҆́гг҃ла рожде́нный.
Ра́дꙋйсѧ, є҆щѐ во чре́вѣ ма́тере твоеѧ̀ дх҃а ст҃а́гѡ и҆спо́лненный: ра́дꙋйсѧ, пре́жде рождества̀ твоегѡ̀ на вели́кое слꙋже́нїе ѡ҆свѧще́нный.
Ра́дꙋйсѧ, непло́дства роди́телей разрѣше́нїе: ра́дꙋйсѧ, і҆ере́а бж҃їѧ ра́дость и҆ весе́лїе.
Ра́дꙋйсѧ, дще́ре а҆арѡ́новы прозѧбе́нїе: ра́дꙋйсѧ, пло́дъ моли́твы бг҃одарова́нный. Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ в҃
Ви́дѧ заха́рїѧ ꙗ҆́вльшагосѧ є҆мꙋ̀ а҆́гг҃ла, смꙋти́сѧ, и҆ стра́хъ нападѐ на́нь, и҆ не вѣ́рова словесє́мъ бл҃говѣ́стїѧ є҆гѡ̀ ѡ҆ рождествѣ̀ твое́мъ: є҆гда́ же за невѣ́рїе нѣмото́ю свѧ́занъ бы́сть, ᲂу҆дивлѧ́шесѧ пресла́вномꙋ чꙋдесѝ, всѣ́мъ се́рдцемъ вопїѧ̀ бг҃ꙋ: А҆ллилꙋ́їа.
І҆́косъ в҃
Ра́зꙋмъ неꙋразꙋмѣва́емый разꙋмѣ́ти и҆́щꙋще лю́дїе, ждꙋ́ще заха́рїю, и҆ чꙋдѧ́хꙋсѧ, ᲂу҆ме́длившꙋ є҆мꙋ̀ въ цр҃кви: и҆зше́дшꙋ же є҆мꙋ̀ и҆ не могꙋ́щꙋ глаго́лати къ ни̑мъ, но то́кмѡ помава́ющꙋ, разꙋмѣ́ша всѝ, ꙗ҆́кѡ видѣ́нїе ви́дѣ въ цр҃кви. мы́ же, прославлѧ́юще ди́внаго творца̀ чꙋде́съ, бг҃а, вопїе́мъ тебѣ̀ такова̑ѧ:
Ра́дꙋйсѧ, бл҃гі́й вино́вниче безгла́сїѧ ѻ҆́тча: ра́дꙋйсѧ, сле́зъ ма́тере твоеѧ̀ премѣне́нїе на ра́дость.
Ра́дꙋйсѧ, тоѧ̀ поноше́нїѧ въ лю́дехъ ѿѧ́тїе: ра́дꙋйсѧ, вели́кое ро́ждшымъ тѧ̀ ᲂу҆тѣше́нїе.
Ра́дꙋйсѧ, ꙗ҆́кѡ въ шесты́й мѣ́сѧцъ ѡ҆ зача́тїи твое́мъ прест҃а́ѧ дв҃а мр҃і́а въ назаре́тѣ ѿ а҆́гг҃ла и҆звѣсти́сѧ: ра́дꙋйсѧ, ꙗ҆́кѡ ѡ҆ рождествѣ̀ твое́мъ мно́зи возвесели́шасѧ.
Ра́дꙋйсѧ, ꙗ҆́кѡ и҆́мѧ бл҃года́тное ѿ а҆́гг҃ла нарече́нное, полꙋчи́вый: ра́дꙋйсѧ, ꙗ҆́кѡ и҆́менемъ твои́мъ нѣмотствова́нїе ѻ҆тца̀ твоегѡ̀ заха́рїи разрѣши́сѧ.
Ра́дꙋйсѧ, ꙗ҆́кѡ и҆́мѧ бж҃їе ѡ҆ тебѣ̀ ѻ҆тце́мъ твои́мъ бл҃гослови́сѧ: ра́дꙋйсѧ, ꙗ҆́кѡ ѡ҆ чꙋ́днѣмъ рождествѣ̀ твое́мъ стра́хъ и҆ ᲂу҆дивле́нїе въ ѻ҆́крестъ живꙋ́щихъ ꙗ҆ви́сѧ.
Ра́дꙋйсѧ, ꙗ҆́кѡ по все́й странѣ̀ і҆ꙋде́йстѣй ѡ҆ ди́внѣмъ рождествѣ̀ твое́мъ возвѣсти́сѧ: ра́дꙋйсѧ, ꙗ҆́кѡ тобо́ю спасе́нїе мнѡ́гимъ въ мі́рѣ се́мъ ꙗ҆ви́сѧ.
Ра́дꙋйсѧ, вели́кїй і҆ѡа́нне, проро́че, прⷣте́че и҆ крⷭ҇ти́телю гдⷭ҇ень.
Конда́къ г҃
Си́ла вы́шнѧгѡ разрѣшѝ непло́дство заматорѣ́вшїѧ во дне́хъ свои́хъ пра́ведныѧ є҆лїсаве́ты: зача́тъ бо тѧ̀, сла́вный прⷣте́че гдⷭ҇ень, и҆ таѧ́шесѧ мѣ̑сѧцъ пѧ́ть, глаго́лющи: ꙗ҆́кѡ та́кѡ мнѣ̀ сотворѝ гдⷭ҇ь во дни̑, въ нѧ̑же призрѣ̀ ѿѧ́ти поноше́нїе моѐ въ человѣ́цѣхъ. Є҆гда́ же прїѧ̀ и҆мꙋ́щꙋю во чре́вѣ хрⷭ҇та̀, и҆спо́лнисѧ дх҃а ст҃а, и҆ возопѝ гла́сомъ ве́лїимъ: ѿкꙋ́дꙋ мнѣ̀ сїѐ, ꙗ҆́кѡ прїи́де мт҃и гдⷭ҇а моегѡ̀ ко мнѣ̀; съ не́юже ра́дꙋющисѧ, взыва́ше бг҃ꙋ: А҆ллилꙋ́їа.
І҆́косъ г҃
И҆мѣ́ѧй пред̾итѝ пред̾ гдⷭ҇емъ дꙋ́хомъ и҆ си́лою и҆лїино́ю, є҆щѐ и҆з̾ чре́ва ма́тере твоеѧ̀ и҆спо́лнилсѧ є҆сѝ дх҃а ст҃а́гѡ, ѿѻнꙋ́дꙋже и҆ прⷪ҇ро́къ ди́вный показа́лсѧ є҆сѝ, є҆гда̀ во ᲂу҆тро́бѣ ма́тере твоеѧ̀ сы́й, взыгра́лсѧ є҆сѝ ра́дощами прише́ствїю мт҃ри гдⷭ҇ней: бг҃а бо позна́лъ є҆сѝ носи́ма въ ложесна́хъ бл҃года́тныѧ, и҆ того̀ ма́тернимъ гла́сомъ проповѣ́далъ є҆сѝ: подоба́ше бо бж҃е́ственныхъ веще́й пресла̑внымъ бы́ти нача́лѡмъ. Семꙋ̀ ᲂу҆̀бо бл҃гоговѣ́йнѡ ᲂу҆дивлѧ́ющесѧ, съ ра́достїю тебѣ̀ вопїе́мъ:
Ра́дꙋйсѧ, є҆щѐ во ᲂу҆тро́бѣ ма́терней предпосла́вшаго тѧ̀ гдⷭ҇а чꙋ́днымъ весе́лїемъ пред̾ѧви́вый: ра́дꙋйсѧ, ꙗ҆́кѡ тебє̀ ра́ди и҆ ма́тери твое́й є҆лїсаве́тѣ воплоще́нїе хрⷭ҇то́во ѿкры́сѧ.
Ра́дꙋйсѧ, ꙗ҆́кѡ и҆ та̀ и҆спо́лнисѧ дх҃а ст҃а: ра́дꙋйсѧ, ꙗ҆́кѡ и҆ ѻ҆на̀ преди́внаѧ прⷪ҇ро́чица ꙗ҆ви́сѧ.
Ра́дꙋйсѧ, ꙗ҆́кѡ ѿ неѧ̀ прест҃а́ѧ дв҃а мр҃і́а бл҃же́нною въ жена́хъ нарече́сѧ: ра́дꙋйсѧ, ꙗ҆́кѡ то́ю ѻ҆на̀ и҆ мт҃рїю гдⷭ҇а наименова́сѧ.
Ра́дꙋйсѧ, ꙗ҆́кѡ и҆ безсѣ́менный пло́дъ тоѧ̀ бл҃гослове́ннымъ пронарече́сѧ: ра́дꙋйсѧ, премꙋ́дросте бж҃е́ственныѧ пред̾ѧвле́нїе.
Ра́дꙋйсѧ, ст҃а́гѡ сꙋпрꙋ́жества бл҃гослове́нїе: ра́дꙋйсѧ, непло́дныхъ ложе́снъ ди́вное прозѧбе́нїе.
Ра́дꙋйсѧ, рожде́нїемъ твои́мъ ᲂу҆диви́вый лю́ди: ра́дꙋйсѧ, свѣ́тлый сло́ва гла́се.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ д҃
Бꙋ́рею сомнѣ́нїѧ смꙋще́нный, і҆ере́й заха́рїа, не можа́ше по словесѝ а҆́гг҃льскомꙋ проглаго́лати. Є҆гда́ же по рождествѣ̀ твое́мъ, прⷣте́че гдⷭ҇нь, написа̀ бл҃года́тное и҆́мѧ твоѐ, а҆́бїе ѿверзо́шасѧ ᲂу҆ста̀ и҆ ѧ҆зы́къ є҆гѡ̀, и҆ глаго́лаше, бл҃гословѧ̀ бг҃а, и҆ проро́чествова глаго́лѧ: бл҃гослове́нъ гдⷭ҇ь бг҃ъ і҆зра́илевъ, ꙗ҆́кѡ посѣтѝ и҆ сотворѝ и҆збавле́нїе лю́демъ свои̑мъ, и҆ ты̀, ѻ҆троча̀, прⷪ҇ро́къ вы́шнѧгѡ нарече́шисѧ поѧ̀ томꙋ̀: А҆ллилꙋ́їа.
І҆́косъ д҃
Слы́шаша ѻ҆́крестъ живꙋ́щїи лю́дїе ѡ҆ пресла́внѣмъ и҆ чꙋ́днѣмъ рождествѣ̀ твое́мъ, со ᲂу҆дивле́нїемъ глаго́лахꙋ въ себѣ̀: что̀ ᲂу҆̀бо ѻ҆троча̀ сїѐ бꙋ́детъ; мы́ же тѧ̀, пресла́вный предте́че гдⷭ҇нь, ꙗ҆́кѡ бо́льша всѣ́хъ рожде́нныхъ жена́ми, досто́йнѡ чтꙋ́ще, ᲂу҆бл҃жа́емъ си́це:
Ра́дꙋйсѧ, ѿ зача́тїѧ твоегѡ̀ бл҃года́тныхъ ꙗ҆вле́нїй и҆спо́лненный: ра́дꙋйсѧ, въ рождествѣ̀ твое́мъ бг҃омъ просла́вленный.
Ра́дꙋйсѧ, во младе́нчествѣ твое́мъ ѿ ѻ҆тца̀ твоегѡ̀ прⷪ҇ро́комъ вы́шнѧгѡ нарече́нный: ра́дꙋйсѧ, во ѻ҆́трочествѣ твое́мъ дх҃омъ ст҃ы́мъ просвѣще́нный и҆ ᲂу҆крѣпле́нный.
Ра́дꙋйсѧ, бг҃а воплоти́вшагѡсѧ сро́дникъ по пло́ти бы́вый: ра́дꙋйсѧ, ѿ бг҃а высо́кое зва́нїе прⷣте́чи и҆ крⷭ҇ти́телѧ прїе́мый.
Ра́дꙋйсѧ, зарѐ, свѣ́тъ но́вый мі́рꙋ возвѣсти́вшаѧ: ра́дꙋйсѧ, ѕвѣздо̀, пꙋ́ть ведꙋ́щїй ко хрⷭ҇тꙋ̀, ѡ҆свѣти́вшаѧ.
Ра́дꙋйсѧ, денни́це со́лнца незаходи́магѡ: ра́дꙋйсѧ, свѣти́льниче свѣ́та неꙋгаса́емагѡ.
Ра́дꙋйсѧ, пꙋ́ть грѧдꙋ́щемꙋ хрⷭ҇тꙋ̀ ᲂу҆готовлѧ́ѧй: ра́дꙋйсѧ, а҆́гг҃ла и҆ человѣ́ка въ себѣ̀ ꙗ҆влѧ́ѧй.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ є҃
Бг҃опроти́вное велѣ́нїе беззако́ннагѡ дѣтоꙋбі́йцы и҆́рѡда, и҆згна́ тѧ и҆з̾ до́мꙋ ѻ҆́тча въ непрохо́днꙋю пꙋсты́ню, носи́ма ма́терїю, прⷣте́че гдⷭ҇нь, и҆дѣ́же и҆ пребыва́лъ є҆сѝ до днѐ ꙗ҆вле́нїѧ твоегѡ̀ ко і҆зра́илю, ꙗ҆ды́й а҆крі́ды и҆ ме́дъ ди́вїй, и҆ бг҃ꙋ вопїѧ̀: А҆ллилꙋ́їа.
І҆́косъ є҃
Ви́дѧще ди́вное бж҃їе ѡ҆ тебѣ̀ промышле́нїе, і҆ѡа́нне бг҃охва́льне, ꙗ҆́кѡ ѿ младе́нчєскихъ пеле́нъ по́стническагѡ житїѧ̀ люби́тель показа́лсѧ є҆сѝ, ѿѻнꙋ́дꙋже во́лею вы́шнѧгѡ по́сланъ бы́лъ є҆сѝ проповѣ́дати лю́демъ грѧдꙋ́щее во хрⷭ҇тѣ̀ спⷭ҇нїе, сегѡ̀ ра́ди со ᲂу҆дивле́нїемъ и҆ любо́вїю тебѣ̀ взыва́емъ:
Ра́дꙋйсѧ, ꙗ҆́кѡ, є҆щѐ младе́нецъ сы́й, царѧ̀ и҆́рѡда ᲂу҆страши́лъ є҆сѝ: ра́дꙋйсѧ, ѿ напра́снагѡ ᲂу҆бїе́нїѧ тѣ́мъ десни́цею вы́шнѧгѡ сохране́нный.
Ра́дꙋйсѧ, пꙋсты́ни шипо́къ бл҃гово́нный: ра́дꙋйсѧ, высото́ю по́двигѡвъ твои́хъ всѣ́хъ ᲂу҆диви́вый.
Ра́дꙋйсѧ, пра́вагѡ пꙋтѝ вѣ́рный ᲂу҆каза́телю: ра́дꙋйсѧ, чистоты̀ и҆ цѣломꙋ́дрїѧ преди́вный храни́телю.
Ра́дꙋйсѧ, є҆ѵⷢ҇льскагѡ самоѿверже́нїѧ ѡ҆́бразе соверше́нный: ра́дꙋйсѧ, мона́шествꙋющихъ покро́ве и҆ ᲂу҆твержде́нїе.
Ра́дꙋйсѧ, бг҃осло́вствꙋющихъ ᲂу҆мѡ́въ просвѣще́нїе: ра́дꙋйсѧ, грѣ̑шнымъ млⷭ҇рдїѧ бж҃їѧ двє́ри ѿверза́ѧй.
Ра́дꙋйсѧ, ка́ющымсѧ грѣ́шникѡмъ ѿ гдⷭ҇а проще́нїе подава́ѧй: ра́дꙋйсѧ, плоды̑ достѡ́йны покаѧ́нїѧ твори́ти помога́ѧй.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ ѕ҃
Проповѣ́дникъ сла́вный ты̀, бж҃е́ственный прⷣте́че, показа́лсѧ є҆сѝ въ пꙋсты́ни і҆ѻрда́нстѣй во дни̑ ꙗ҆вле́нїѧ хрⷭ҇та̀ бг҃а мі́рꙋ, сего́ бо, грѧдꙋ́щаго къ тебѣ̀, показа́лъ є҆сѝ лю́демъ, глаго́лѧ: сѐ, а҆́гнецъ бж҃їй, взе́млѧй грѣхѝ мі́ра! є҆го́же мы̀ вѣ́рою позна́вше, пое́мъ є҆мꙋ̀: А҆ллилꙋ́їа.
І҆́косъ ѕ҃
Возсїѧ́лъ є҆сѝ свѣ́тъ и҆́стины, і҆ѡа́нне бг҃опросвѣще́нне, всѣ̑мъ ꙗ҆влѧ́ѧй сла́вы ѻ҆́ч҃їѧ сїѧ́нїе, ꙗ҆́вльшеесѧ пло́тски на́съ ра́ди. Вопїѧ́лъ бо є҆сѝ въ пꙋсты́ни лю́демъ: пока́йтесѧ, прибли́жибосѧ црⷭ҇твїе нбⷭ҇ное: сотвори́те плоды̑ достѡ́йны покаѧ́нїѧ. Се́ бо грѧде́тъ по мнѣ̀, и҆́же крⷭ҇ти́тъ вы̀ водо́ю и҆ дх҃омъ. Сегѡ̀ ра́ди похва̑льнаѧ тебѣ̀ вопїе́мъ:
Ра́дꙋйсѧ, прише́ствїѧ мессі́и возвѣсти́телю: ра́дꙋйсѧ, пꙋте́й гдⷭ҇нихъ ᲂу҆гото́вателю.
Ра́дꙋйсѧ, ве́тхїѧ и҆ но́выѧ бл҃года́ти хода́таю: ра́дꙋйсѧ, прⷪ҇ро́кѡвъ предѣ́ле и҆ нача́ло а҆пⷭ҇лѡвъ.
Ра́дꙋйсѧ, гла́се сло́ва бл҃гознамени́тый: ра́дꙋйсѧ, покаѧ́нїѧ проповѣ́дниче велегла́сный.
Ра́дꙋйсѧ, мно́гихъ сынѡ́въ і҆зра́илевыхъ ко гдⷭ҇ꙋ ѡ҆брати́вый: ра́дꙋйсѧ, лю́ди совершє́нны гдⷭ҇ви ᲂу҆гото́вавый.
Ра́дꙋйсѧ, фарїсе́євъ и҆ саддꙋке́євъ дерзнове́ннѡ ѡ҆бличи́вый: ра́дꙋйсѧ, плоды̑ достѡ́йны покаѧ́нїѧ твори́ти наꙋчи́вый.
Ра́дꙋйсѧ, просвѣще́нїѧ дх҃о́внагѡ ᲂу҆каза́телю: ра́дꙋйсѧ, и҆́щꙋщымъ предста́тельства твоегѡ̀ неꙋсы́пный застꙋ́пниче.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ з҃
Хотѧ́щꙋ ѿ тебє̀ крⷭ҇ти́тисѧ гдⷭ҇ꙋ і҆и҃сꙋ, і҆ѡа́нне бг҃облаже́нне, глаго́лалъ є҆сѝ: а҆́зъ тре́бꙋю тобо́ю крⷭ҇ти́тисѧ, ѻ҆ба́че повинꙋ́ѧсѧ, ре́кшꙋ томꙋ̀: ѡ҆ста́ви ны́нѣ, воздви́глъ є҆сѝ десни́цꙋ твою̀ на главꙋ̀ є҆гѡ̀ и҆, крести́въ не тре́бꙋющагѡ ѡ҆чище́нїѧ, вопїѧ́лъ є҆сѝ: А҆ллилꙋ́їа.
І҆́косъ з҃
Но́вꙋю подаѧ̀ бл҃года́ть крⷭ҇ти́тисѧ и҆зво́ливый ѿ тебє̀ гдⷭ҇ь, сподо́би тѧ̀ дх҃а прише́ствїе ви́дѣти, и҆ гла́съ ѻ҆ч҃ескїй съ нб҃сѐ, свидѣ́тельствꙋющїй є҆гѡ̀ сн҃овство̀, слы́шати: ѿѻнꙋ́дꙋже въ трїе́хъ ли́цѣхъ є҆ди́номꙋ бг҃ꙋ покланѧ́тисѧ на́съ наꙋчи́лъ є҆сѝ. Є҆го́же бре́нными прославлѧ́юще ᲂу҆стна́ми, въ похвалꙋ̀ сїѧ̑ тебѣ̀ прино́симъ:
Ра́дꙋйсѧ, трⷪ҇ческагѡ бг҃оѧвле́нїѧ пе́рвый проповѣ́дниче: ра́дꙋйсѧ, въ трїе́хъ ли́цѣхъ є҆ди́нагѡ бг҃а и҆́стинный покло́нниче.
Ра́дꙋйсѧ, дх҃а ст҃а́гѡ въ ви́дѣ голꙋби́нѣ ꙗ҆снозри́телю: ра́дꙋйсѧ, снисхожде́нїѧ є҆гѡ̀ ѿ ѻ҆ц҃а̀ на сн҃а свидѣ́телю.
Ра́дꙋйсѧ, гла́са съ нб҃сѐ ѿ бг҃а ѻ҆ц҃а̀ слы́шателю: ра́дꙋйсѧ, ꙗ҆вле́нїѧ любвѐ ѻ҆́ч҃и къ сн҃ꙋ созерца́телю.
Ра́дꙋйсѧ, сн҃а бж҃їѧ и҆збра́нный крⷭ҇ти́телю: ра́дꙋйсѧ, во́ли є҆гѡ̀ ст҃ы́ѧ и҆сполни́телю.
Ра́дꙋйсѧ, сла́внагѡ слꙋже́нїѧ сп҃се́нїю ро́да человѣ́ческагѡ ре́вностный рачи́телю: ра́дꙋйсѧ, вели́кагѡ та́инства кр҃ще́нїѧ пе́рвый соверши́телю.
Ра́дꙋйсѧ, бж҃е́ственныѧ ра́дости вѣ́стниче: ра́дꙋйсѧ, но́вагѡ завѣ́та пе́рвый ᲂу҆чи́телю.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ и҃
Стра́нное и҆ неизрече́нное смире́нїе воплоти́вшагѡсѧ бг҃а сло́ва ви́дѣвъ, бг҃обл҃же́нне крⷭ҇ти́телю, бж҃е́ственнꙋю свою̀ главꙋ̀ приклони́вша и҆ ра́бское креще́нїе прїе́мша, ты̀ и҆ са́мъ ве́сь и҆спо́лнилсѧ є҆сѝ вели́кагѡ смире́нїѧ. И҆спросѝ ᲂу҆́бѡ бг҃олюбе́знꙋю добродѣ́тель сїю̀ и҆ на́мъ, ѡ҆держи̑мымъ го́рдостїю, ꙗ҆́кѡ да ѿ се́рдца смире́нна вопїе́мъ є҆мꙋ̀: А҆ллилꙋ́їа.
І҆́косъ и҃
Ве́сь бл҃года́тныхъ дарова́нїй и҆спо́лненный, тече́нїе вре́менныѧ жи́зни скончава́ѧ, і҆ѡа́нне бг҃ознамени́те, всѣ́хъ поꙋча́лъ є҆сѝ и҆сполне́нїемъ зако́на и҆ покаѧ́нїемъ бл҃гоꙋгожда́ти гдⷭ҇ви. Сегѡ̀ ра́ди бл҃года́рственное хвале́нїе тебѣ̀, вели́комꙋ ᲂу҆чи́телю и҆́стины, воспѣва́емъ:
Ра́дꙋйсѧ, зако́на и҆ ѡ҆правда́нїй гдⷭ҇нихъ насади́телю: ра́дꙋйсѧ, и҆́рѡдова беззако́нїѧ ѡ҆бличи́телю.
Ра́дꙋйсѧ, ѡ҆ и҆справле́нїи того̀ рачи́телю: ра́дꙋйсѧ, пра́вды ра́ди темни́чное заключе́нїе и҆ ᲂу҆́зы претерпѣ́вый.
Ра́дꙋйсѧ, за и҆́стинꙋ во главꙋ̀ ᲂу҆сѣче́нный: ра́дꙋйсѧ, ꙗ҆́кѡ тѣ́ло твоѐ ѿ ᲂу҆ченикѡ́въ твои́хъ че́стнѣ погребе́сѧ.
Ра́дꙋйсѧ, ꙗ҆́кѡ бж҃їимъ смотрѣ́нїемъ глава̀ твоѧ̀ нетлѣ́нна соблюде́сѧ: ра́дꙋйсѧ, ꙗ҆́кѡ та̀ на ᲂу҆тѣше́нїе, ѡ҆свѧще́нїе и҆ цѣльбы̑ хрїстїа́нѡмъ даде́сѧ.
Ра́дꙋйсѧ, ꙗ҆́кѡ и҆ десни́цѣ твое́й, крⷭ҇ти́вшей гдⷭ҇а, вѣ́рнїи бл҃гоче́стнѣ покланѧ́ютсѧ: ра́дꙋйсѧ, ꙗ҆́кѡ ѿ тебє̀ мнѡ́гаѧ чꙋдеса̀ тѣ́ми доны́нѣ соверша́ютсѧ.
Ра́дꙋйсѧ, ꙗ҆́кѡ тобо́ю вѣ́рнїи ѿ страсте́й безче́стїѧ и҆збавлѧ́ютсѧ: ра́дꙋйсѧ, ꙗ҆́кѡ тобо́ю грѣ́шнїи къ покаѧ́нїю воздвиза́ютсѧ.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ ѳ҃
Всѐ є҆стество̀ а҆́гг҃льское ᲂу҆диви́сѧ высотѣ̀ слꙋже́нїѧ твоегѡ̀, и҆ цр҃ковь бл҃гоговѣ́йнѡ прославлѧ́етъ тѧ̀, ꙗ҆́кѡ дрꙋ́га хрⷭ҇та̀ бг҃а, предше́дшагѡ пред̾ ни́мъ дх҃омъ и҆ си́лою и҆лїино́ю. Ревнꙋ́ѧ бо по и҆́стинѣ, дерзнове́ннѡ ѡ҆блича́лъ є҆сѝ фарїсе́євъ и҆ беззако́ннагѡ и҆́рѡда, ѿ негѡ́же и҆ мч҃ническꙋю кончи́нꙋ прїѧ́лъ є҆сѝ. Покланѧ́ющесѧ ᲂу҆́бѡ чⷭ҇тнѣ́й главѣ̀ твое́й, мо́лимсѧ тѝ: и҆зба́ви на́съ ѿ страсте́й безче́стїѧ, да чтⷭ҇ымъ се́рдцемъ и҆ ᲂу҆сты̑ пое́мъ: А҆ллилꙋ́їа.
І҆́косъ ѳ҃
Виті́йство всѧ́кое земноро́дныхъ не довлѣ́етъ досто́йнѡ восхвали́ти тѧ̀, і҆ѡа́нне бг҃охва́льне: тебе́ бо ᲂу҆ста̀ хрⷭ҇тѡ́вы похвали́ша, вы́сша прⷪ҇ро́кѡвъ и҆ бо́льша всѣ́хъ рожде́нныхъ жена́ми тѧ̀ наименова́ша. Ѿѻнꙋ́дꙋже досто́йнꙋю похвалꙋ̀ принестѝ тебѣ̀ недоꙋмѣва́юще, вопїе́мъ тѝ сицева̑ѧ:
Ра́дꙋйсѧ, цр҃кве хрⷭ҇то́вы вели́каѧ сла́во: ра́дꙋйсѧ, а҆́гг҃лѡвъ преди́вное чꙋ́до.
Ра́дꙋйсѧ, пра́ѻтцєвъ ра́дость и҆ прославле́нїе: ра́дꙋйсѧ, прⷪ҇ро́кѡвъ высо́каѧ похвало̀.
Ра́дꙋйсѧ, а҆пⷭ҇лѡвъ бг҃освѣ́тлый вѣ́нче: ра́дꙋйсѧ, ст҃и́телей велелѣ́паѧ красото̀.
Ра́дꙋйсѧ, мч҃никѡвъ въ но́вой бл҃года́ти нача́ло: ра́дꙋйсѧ, прпⷣбныхъ соверше́нїе.
Ра́дꙋйсѧ, првⷣныхъ ᲂу҆добре́нїе: ра́дꙋйсѧ, дѣ́вственникѡвъ и҆ по́стникѡвъ ѡ҆снова́нїе.
Ра́дꙋйсѧ, всѣ́хъ хрⷭ҇тїа́нъ вели́кое ᲂу҆тѣше́нїе: ра́дꙋйсѧ, ꙗ҆́кѡ ѿ всѣ́хъ хрⷭ҇тїа́нскихъ родѡ́въ и҆́мѧ твоѐ прославлѧ́етсѧ.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ і҃
Сп҃стѝ мі́ръ прише́дшагѡ во пло́ти хрⷭ҇та̀ бг҃а бл҃говѣсти́лъ є҆сѝ и҆ сꙋ́щымъ во а҆́дѣ: ꙗ҆́коже бо денни́ца, предходѧ́щаѧ со́лнцꙋ, ѡ҆свѣти́лъ є҆сѝ во тьмѣ̀ и҆ сѣ́ни сме́ртнѣй сѣдѧ́щихъ. Ѿѻнꙋ́дꙋже вско́рѣ гдⷭ҇емъ и҆зведе́нъ бы́лъ є҆сѝ со всѣ́ми ѿ вѣ́ка првⷣными, поѧ̀ є҆мꙋ̀, ꙗ҆́кѡ и҆зба́вителю и҆ побѣди́телю сме́рти: А҆ллилꙋ́їа.
І҆́косъ і҃
Стѣна̀ є҆сѝ и҆ прибѣ́жище сп҃си́тельное всѣ̑мъ, моли́твеннѡ къ тебѣ̀ притека́ющымъ, бж҃е́ственный і҆ѡа́нне: сегѡ̀ ра́ди пѣ́сньми похва́льными ᲂу҆бл҃жа́емъ тѧ̀ си́це:
Ра́дꙋйсѧ, мо́щный застꙋ́пниче на́шъ и҆ вѣ́рный ѿ бѣ́дъ храни́телю: ра́дꙋйсѧ, ѕлостра́ждꙋщихъ ѿ дꙋхѡ́въ ѕло́бы ско́рый помо́щниче и҆ и҆зба́вителю.
Ра́дꙋйсѧ, непло́дствꙋющымъ бл҃гослове́нїе ѿ бг҃а низпосыла́ѧй: ра́дꙋйсѧ, притека́ющихъ къ тебѣ̀ съ вѣ́рою ѿ треволне́нїѧ страсте́й и҆збавлѧ́ѧй.
Ра́дꙋйсѧ, во враждѣ̀ сꙋ́щихъ ско́рѡ ᲂу҆миротворѧ́ѧй: ра́дꙋйсѧ, во всѧ́кой нꙋ́ждѣ и҆ печа́ли ᲂу҆се́рднѡ притека́ющымъ къ тебѣ̀ ско́рꙋю по́мощь подава́ѧй.
Ра́дꙋйсѧ, бл҃готекꙋ́щихъ ѿ самоѡбольще́нїѧ и҆ пре́лести и҆з̾има́ѧй: ра́дꙋйсѧ, врꙋча́ющымъ себє̀ твоемꙋ̀ хода́тайствꙋ въ ча́съ сме́ртный помога́ѧй.
Ра́дꙋйсѧ, лю́бѧщихъ тѧ̀ ѿ воздꙋ́шныхъ мыта́рствъ предста́тельствомъ твои́мъ свобожда́ѧй: ра́дꙋйсѧ, почита́ющихъ сла́внꙋю па́мѧть твою̀ вѣ́чныѧ жи́зни моли́твами твои́ми сподоблѧ́ѧй.
Ра́дꙋйсѧ, ни́щихъ и҆ вдови́цъ и҆ сиро́тъ застꙋпле́нїе: ра́дꙋйсѧ, по бз҃ѣ и҆ бцⷣѣ хрїстїа́нѡмъ прибѣ́жище и҆ ᲂу҆пова́нїе.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ а҃і
Пѣ́нїе всѧ́кое не довлѣ́етъ по достоѧ́нїю до́блестей твои́хъ восхвали́ти тѧ̀, крⷭ҇ти́телю гдⷭ҇нь: но мы̀, любо́вїю понꙋ́ждени, дерза́емъ воспѣва́ти вели̑чїѧ твоѧ̑, є҆́же млⷭ҇тивнѡ прїимѝ ѿ на́съ, первостоѧ́телю ᲂу҆ прⷭ҇то́ла прест҃ы́ѧ трⷪ҇цы, и҆ молѝ свободи́тисѧ на́мъ ѿ всѧ́кїѧ скве́рны грѣхо́вныѧ, да чи́стымъ се́рдцемъ и҆ ᲂу҆стна́ми пое́мъ бг҃ꙋ: А҆ллилꙋ́їа.
І҆́косъ а҃і
Свѣти́льника свѣ́та непристꙋ́пнагѡ и҆ всесвѣ́тлыхъ бл҃года́тныхъ дарова́нїй всего̀ и҆спо́лнена тѧ̀, і҆ѡа́нне бг҃опросвѣще́нне, вѣ́дꙋще, ра́достнѡ прино́симъ тѝ такова̑ѧ:
Ра́дꙋйсѧ, самови́дче ѡ҆зари́вшагѡ тѧ̀ свы́ше бж҃е́ственнагѡ свѣ́та: ра́дꙋйсѧ, свѣ́томъ добродѣ́телей твои́хъ просла́вивый бг҃а.
Ра́дꙋйсѧ, прест҃ы́ѧ трⷪ҇цы велелѣ́пꙋю сла́вꙋ ꙗ҆ви́вый: ра́дꙋйсѧ, пра́вый и҆ ди́вный пꙋ́ть къ нб҃сѝ показа́вый.
Ра́дꙋйсѧ, и҆ сꙋ́щымъ во а҆́дѣ бг҃а ꙗ҆́вльшагѡсѧ во пло́ти, бл҃говѣсти́телю: ра́дꙋйсѧ, дꙋ́шъ пра́ведныхъ, ѿ вѣ́ка въ преиспо́дней держи́мыхъ возвесели́телю.
Ра́дꙋйсѧ, влⷣки хрⷭ҇та̀ бг҃а дрꙋ́же и҆́скреннїй: ра́дꙋйсѧ, ꙗ҆ви́вый мі́рꙋ свѣ́тъ и҆́стинный.
Ра́дꙋйсѧ, свѣтоза́рное свѣ́та є҆ѵⷢ҇льскагѡ сїѧ́нїе: ра́дꙋйсѧ, ро́да хрⷭ҇тїа́нскагѡ прославле́нїе.
Ра́дꙋйсѧ, совѣ́та бж҃їѧ и҆сполне́нїе: ра́дꙋйсѧ, ꙗ҆́кѡ ѿ востѡ́къ со́лнца да́же до за̑падъ хва́льно и҆́мѧ твоѐ.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ в҃і
Бл҃года́ти тезоимени́тый крⷭ҇ти́телю гдⷭ҇нь и҆ то́ю ѡ҆богати́всѧ, побѣдоно́сецъ пресла́вный показа́лсѧ є҆сѝ: побѣди́лъ бо є҆сѝ враги̑ и҆ всѧ́кꙋю ѕло́бꙋ, и҆ вели́кое слꙋже́нїе твоѐ мꙋ́ченическимъ по́двигомъ запечатлѣ́лъ є҆сѝ. Ны́нѣ же, предстоѧ̀ прⷭ҇то́лꙋ цр҃ѧ̀ ца́рствꙋющихъ, молѝ є҆го̀ дарова́ти вѣ̑рнымъ побѣ̑ды на враги̑ и҆ во все́мъ бл҃гопоспѣше́нїе, въ добродѣ́телехъ же бл҃года́тное ᲂу҆крѣпле́нїе, пою́щымъ є҆мꙋ̀: А҆ллилꙋ́їа.
І҆́косъ в҃і
Пою́ще бг҃а, ди́внѡ въ тебѣ̀ просла́вльшагосѧ, хва́лимъ тѧ̀, бг҃облаже́нне крⷭ҇ти́телю, ꙗ҆́кѡ и҆́скреннѧго дрꙋ́га хрⷭ҇то́ва, прославлѧ́емъ вели̑кїѧ пѡ́двиги твоѧ̑, ᲂу҆бл҃жа́емъ мꙋ́ченическꙋю кончи́нꙋ твою̀, и҆ сицева̑ѧ ра́достнѡ вопїе́мъ тѝ:
Ра́дꙋйсѧ, вселе́нскїй а҆пⷭ҇ле и҆ но́вагѡ завѣ́та первомꙋ́чениче: ра́дꙋйсѧ, ꙗ҆вле́нїемъ хрⷭ҇та̀ на землѝ ѿкры́вшагосѧ црⷭ҇твїѧ нбⷭ҇нагѡ пе́рвый проповѣ́дниче.
Ра́дꙋйсѧ, ꙗ҆зы́кѡвъ бж҃е́ственное призва́нїе предвозвѣсти́вый: ра́дꙋйсѧ, безвѣ̑стнаѧ и҆ та̑йнаѧ премꙋ́дрѡсти бж҃їѧ мі́рꙋ ꙗ҆ви́вый.
Ра́дꙋйсѧ, бж҃е́ственными дѣѧ́нїи плодоно́сенъ па́че и҆ны́хъ ꙗ҆ви́выйсѧ: ра́дꙋйсѧ, ꙗ҆́кѡ свѣ́томъ дѣ́лъ твои́хъ просла́висѧ ѻ҆ц҃ъ нбⷭ҇ный.
Ра́дꙋйсѧ, ꙗ҆́кѡ въ па́мѧти твое́й цр҃ковь хрⷭ҇то́вꙋ весели́ши неизрече́ннѡ: ра́дꙋйсѧ, ꙗ҆́кѡ ны́нѣ вѣ́чнагѡ наслажда́ешисѧ весе́лїѧ и҆з̾ѻби́льнѡ.
Ра́дꙋйсѧ, бж҃е́ственными лꙋча́ми трисо́лнечнагѡ свѣ́та ѡ҆сїѧва́емый: ра́дꙋйсѧ, ꙗ҆́кѡ со безпло́тными трист҃ꙋ́ю пѣ́снь бг҃ꙋ немо́лчнѡ вопїе́ши.
Ра́дꙋйсѧ, ꙗ҆́кѡ ны́нѣ, зерца́лѡмъ разрѣ́шшымсѧ, несре́дственнѣ зри́ши ст҃ꙋ́ю трⷪ҇цꙋ.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ г҃і
Ѽ вели́кїй и҆ пресла́вный прⷣте́че и҆ крⷭ҇ти́телю гдⷭ҇нь і҆ѡа́нне, прїимѝ ѿ на́съ ны́нѣ приноси́мое тебѣ̀ моле́нїе, и҆ твои́ми бг҃опрїѧ́тными къ бг҃ꙋ мл҃твами и҆зба́ви на́съ ѿ всѧ́кагѡ ѕла̀, и҆ вѣ́чныѧ и҆змѝ мꙋ́ки, и҆ наслѣ́дниками црⷭ҇твїѧ нбⷭ҇нагѡ содѣ́лай, да во вѣ́ки пое́мъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆рха́гг҃лъ гаврїи́лъ, предстоѧ́й пред̾ бг҃омъ по́сланъ бы́сть ко і҆ере́ю заха́рїи, є҆гда̀ то́й слꙋжа̀ по чи́нꙋ чреды̀ своеѧ̀, вни́де покади́ти въ цр҃ковь гдⷭ҇ню: и҆, предста́въ ѡ҆деснꙋ́ю ѻ҆лтарѧ̀ кади́льнагѡ, бл҃говѣствова́ше ѡ҆ твое́мъ рождествѣ̀, вели́кїй і҆ѡа́нне, возвѣща́ѧ заха́рїи ра́дость и҆ весе́лїе, и҆ ꙗ҆́кѡ мно́зи ѡ҆ рождествѣ̀ твое́мъ возра́дꙋютсѧ. Сегѡ̀ ра́ди и҆ мы̀, ди́вномꙋ ѡ҆ тебѣ̀ бж҃їю бл҃говоле́нїю чꙋдѧ́щесѧ и҆ ра́дꙋющесѧ, со бл҃гоговѣ́нїемъ въ похвалꙋ̀ тебѣ̀ вопїе́мъ:
Ра́дꙋйсѧ, совѣ́та бж҃їѧ неизрече́ннагѡ таи́нниче: ра́дꙋйсѧ, ди́внагѡ смотре́нїѧ є҆гѡ̀ и҆сполне́нїе.
Ра́дꙋйсѧ, пре́жде лѣ́тъ мно́гихъ прⷪ҇ро́чествомъ и҆са́їи проѧвле́нный: ра́дꙋйсѧ, вѣ́стниче пред̾ лице́мъ гдⷭ҇нимъ дре́вле прорече́нный.
Ра́дꙋйсѧ, предназна́ченный бы́ти вели́кимъ прⷪ҇ро́комъ вы́шнѧгѡ: ра́дꙋйсѧ, по ѡ҆бѣтова́нїю а҆́гг҃ла рожде́нный.
Ра́дꙋйсѧ, є҆щѐ во чре́вѣ ма́тере твоеѧ̀ дх҃а ст҃а́гѡ и҆спо́лненный: ра́дꙋйсѧ, пре́жде рождества̀ твоегѡ̀ на вели́кое слꙋже́нїе ѡ҆свѧще́нный.
Ра́дꙋйсѧ, непло́дства роди́телей разрѣше́нїе: ра́дꙋйсѧ, і҆ере́а бж҃їѧ ра́дость и҆ весе́лїе.
Ра́дꙋйсѧ, дще́ре а҆арѡ́новы прозѧбе́нїе: ра́дꙋйсѧ, пло́дъ моли́твы бг҃одарова́нный. Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Конда́къ а҃
И҆збра́нный ѿ лѣ́тъ дре́внихъ бы́ти прⷣте́чею и҆ крⷭ҇ти́телемъ сп҃си́телѧ мі́ра хрⷭ҇та̀ бг҃а, і҆ѡа́нне бг҃охва́льне, прославлѧ́юще просла́вльшаго тѧ̀ гдⷭ҇а, похва̑льнаѧ восписꙋ́емъ тѝ, ꙗ҆́кѡ бо́льшемꙋ всѣ́хъ рожде́нныхъ жена́ми, во пло́ти а҆́гг҃лꙋ, покаѧ́нїѧ проповѣ́дникꙋ: ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ бѣ́дъ свобожда́й и҆ къ покаѧ́нїю воздвиза́й на́съ, любо́вїю тебѣ̀ зовꙋ́щихъ:
Ра́дꙋйсѧ, вели́кїй і҆ѡа́нне, прⷪ҇ро́че, прⷣте́че и҆ крⷭ҇ти́телю гдⷭ҇нь.
Моли́твы
Крⷭ҇ти́телю хрⷭ҇то́въ, проповѣ́дниче покаѧ́нїѧ, ка́ющагѡсѧ не пре́зри менє̀, но совокꙋплѧ́ѧсѧ съ вѡ́и нбⷭ҇ными, моли́сѧ ко влⷣцѣ за менє̀, недосто́йнаго, ᲂу҆ны́лаго, немощна́го, и҆ печа́льнаго, во мнѡ́гїѧ бѣды̑ впа́дшаго, ᲂу҆трꙋжде́ннаго бꙋ́рными пѡ́мыслы ᲂу҆ма̀ моегѡ̀. А҆́зъ бо є҆́смь верте́пъ ѕлы́хъ дѣ́лъ, ѿню́дъ не и҆мѣ́ѧй конца̀ грѣхо́вномꙋ ѻ҆бы́чаю: пригвожде́нъ бо є҆́сть ᲂу҆́мъ мо́й земны̑мъ вещє́мъ. Что̀ сотворю̀; не вѣ́мъ, и҆ къ комꙋ̀ прибѣ́гнꙋ, да сп҃се́на бꙋ́детъ дꙋша̀ моѧ̀; то́кмѡ къ тебѣ̀, ст҃ы́й і҆ѡа́нне, бл҃года́ти тезоимени́те, ꙗ҆́кѡ тѧ̀ пред̾ гдⷭ҇емъ по бг҃оро́дицѣ вѣ́мъ бо́льша бы́ти рожде́нныхъ всѣ́хъ: ты́ бо сподо́билсѧ є҆сѝ коснꙋ́тисѧ верхꙋ̀ цр҃ѧ̀ хрⷭ҇та̀, взе́млющагѡ грѣхи̑ мі́ра, а҆́гнца бж҃їѧ: є҆го́же молѝ за грѣ́шнꙋю мою̀ дꙋ́шꙋ, да понѐ ѿны́нѣ, въ первыйна́десѧть ча́съ, понесꙋ̀ тѧготꙋ̀ бл҃гꙋ́ю и҆ прїимꙋ̀ мздꙋ̀ съ послѣ́дними. Є҆́й, крⷭ҇ти́телю хрⷭ҇то́въ, чⷭ҇тны́й прⷣте́че, кра́йнїй прⷪ҇ро́че, пе́рвый мч҃нче, по́стникѡвъ и҆ пꙋсты́нникѡвъ наста́вниче, чистоты̀ ᲂу҆чи́телю и҆ бли́жнїй дрꙋ́же хрⷭ҇то́въ, тѧ̀ молю̀, къ тебѣ̀ прибѣга́ю: не ѿри́ни менє̀ ѿ твоегѡ̀ застꙋпле́нїѧ, но возста́ви мѧ̀, па́дшагосѧ мнѡ́гими грѣхи̑: ѡ҆бновѝ дꙋ́шꙋ мою̀ покаѧ́нїемъ, ꙗ҆́кѡ вторы́мъ кр҃ще́нїемъ, поне́же ѻ҆боегѡ̀ нача́льникъ є҆сѝ: кр҃ще́нїемъ ѡ҆мыва́ѧй прароди́тельный грѣ́хъ, покаѧ́нїемъ же ѡ҆чища́ѧй коегѡ́ждо дѣ́ло скве́рно. Ѡ҆чи́сти ᲂу҆́бѡ мѧ̀, грѣха́ми ѡ҆скверне́ннаго, и҆ понꙋ́ди вни́ти, а҆́може ничто́же скве́рнѡ вхо́дитъ, въ црⷭ҇твїе нбⷭ҇ное, а҆ми́нь.