Кондак 1
Избра́нный от Царя́ си́л Го́спода Иису́са Христа́ и призва́нный благода́тию от кра́левскаго ро́да во и́ночество и архиере́йство, первосвяти́телю Се́рбския Це́ркве, богоно́сне о́тче Са́вво, удовли́ на́с восхваля́ти тя́ с любо́вию, я́ко богодарова́ннаго па́стыря и учи́теля на́шего; ты́ же, име́я дерзнове́ние ко Го́споду, вку́пе с отце́м и бра́том твои́ма по пло́ти, мироточи́вым Симео́ном и преподо́бным Си́моном, первовенча́нным кра́лем, моли́ся вы́ну о спасе́нии всего́ достоя́ния своего́, правосла́внаго наро́да се́рбскаго, и о на́с гре́шных, избавля́я от вся́ких зо́л, бе́д и скорбе́й, вопию́щия ти́:
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Икос 1
А́нгельскую чистоту́ от ю́ности возлюби́в, Са́вво блаже́нне, во мла́дости вели́кий подви́жник благоче́стия показа́лся еси́, во е́же все́м диви́тися благонра́вию и благоче́стию души́ твоея́, зане́ я́ко ю́ноша сы́й и кра́левич рожде́нием, посто́м, бде́нием и моли́твами, пло́ть твою́ обузда́л еси́. Сего́ ра́ди и слы́шиши от на́с похва́льныя пе́сни таковы́я:
Ра́дуйся, отца́ благочести́ваго и ма́тере благонра́вныя, сы́не Бо́гом возлю́бленне; ра́дуйся, еди́наго Бо́га все́м се́рдцем твои́м возлюби́вый.
Ра́дуйся, рожде́нием твои́м роди́теля уте́шивый и непло́дие ею́ разреши́вый; ра́дуйся, пло́д благослове́нный, мно́гими моли́твами испро́шенный.
Ра́дуйся, кра́левскаго ро́да Не́мани о́трасль святопрозя́бшая; ра́дуйся, Се́рбския земли́ духо́вная красото́.
Ра́дуйся, роди́телю твое́ю в ста́рости утеше́ние и ра́дование; ра́дуйся, и́ма па́че други́х ча́д, зело́ люби́мый.
Ра́дуйся, плотоуго́дие еще́ во мла́дости отве́ргнувый; ра́дуйся, о благи́х небе́сных па́че не́же о земны́х вы́ну помышля́вый.
Ра́дуйся, чистоты́ душе́вныя и теле́сныя до́брый рачи́телю.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 2
Ви́дев суету́ и непостоя́нство сла́вы земны́я, Са́вво богому́дре, устреми́лся еси́ ду́хом твои́м в го́рняя ко Го́споду, И́же зря́ твое́ жела́ние боже́ственное, посла́ к тебе́ и́нока преподо́бнаго из святы́я горы́ Афо́нския, его́же поуче́нием наставля́емый, оста́вил еси́ роди́теля твоя́ и оте́чество твое́, в жре́бий же земны́й Пресвяты́я Богоро́дицы на святу́ю го́ру Афо́нскую прише́л еси́, и та́мо во оби́тели Росси́йстей водвори́лся еси́, зовы́й немо́лчно с рабо́тающими Го́сподеви, а́нгельскую пе́снь: Аллилу́иа.
Икос 2
Разуме́вше отше́ствие твое́, роди́теля твоя́ пла́кастеся го́рце, скорбя́ще о твое́м лише́нии, Са́вво преподо́бне, та́же помы́слиша и а́бие посла́ша иска́ти тя́ да́же до Афо́на ве́рныя слуги́ своя́, я́ко да убедя́т тя́ к ни́ма возврати́тися. Ты́ же, свя́те, прише́ствие по́сланных слу́г уве́дев, му́дре с ни́ми бесе́довал еси́, та́же от ни́х удали́вся, на пи́рг высо́кий возше́л еси́, и та́мо постриже́ние и́ноческое восприя́вый, кра́левскую ри́зу твою́, вку́пе с власы́ главы́ твоея́, в постриже́нии отъя́тыми, по́сланным те́м с пи́рга пове́ргл еси́, запове́дав и́м рещи́ роди́телема твои́ма, я́ко сы́н ею́ Ра́стко, уже́ и́нок Са́вва е́сть. Такову́ю ре́вность твою́ о спасе́нии помина́юще, зове́м ти́ си́це:
Ра́дуйся, владе́ния земна́го сла́ву презре́вый; ра́дуйся, роди́теля твоя́ и оте́чество твое́ Христа́ ра́ди оста́вивый.
Ра́дуйся, на святу́ю Афо́нскую го́ру рабо́тати Го́сподеви прише́дый; ра́дуйся, во оби́тели Росси́йстей та́мо водвори́выйся.
Ра́дуйся, сея́ оби́тели постри́женец бы́вый; ра́дуйся, по́двиги твои́ми о́ную просла́вивый.
Ра́дуйся, я́ко в не́й досе́ле и́мя твое́ моли́твенно ублажа́ется; ра́дуйся, я́ко оби́тель сия́ тобо́ю све́тло красу́ется.
Ра́дуйся, по́двиги поста́ и моли́твы отце́в Афо́нских удиви́вый; ра́дуйся, во еди́ной власяни́це босы́ма нога́ма оби́тели Афо́нския обоше́дый.
Ра́дуйся, тала́нт, вруче́нный ти́, умно́живый; ра́дуйся, в послуша́ние ста́рцу богому́дрому во оби́тели Ватопе́дстей себе́ преда́вый.
Ра́дуйся, во смире́нии и терпе́нии зело́ преуспе́вый.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 3
Си́лою Всевы́шняго укрепля́емый, свя́тче Бо́жий, по́двиги вели́кия во и́ночестве соверша́л еси́, во оби́тели Ватопе́дстей на Афо́не, посто́м, бде́нием и вся́ким изнуре́нием умерщвля́я пло́ть твою́, мра́з и зно́й терпе́л еси́, а́ки безпло́тный, и бо́с ходя́й по о́строму ка́мени неуязви́м пребыва́л еси́, покоря́я пло́ть ду́ху, любо́вию ко Го́споду вы́ну пламене́вый, во е́же пе́ти тебе́ немо́лчную Ему́ пе́снь: Аллилу́иа.
Икос 3
Име́я попече́ние о спасе́нии душе́внем роди́телию твое́ю, о́тче Са́вво, вы́ну моли́лся еси́ о се́м Бо́гу. Благи́й же Человеколю́бец, творя́й во́лю боя́щихся Его́, внуши́ роди́телема твои́ма писа́нием твои́м к ни́ма зело́ умиле́нным, владе́ние земно́е оста́вити и постриже́ние и́ноческое восприя́ти. Сего́ ра́ди оте́ц тво́й, преподо́бный Симео́н, из Се́рбии на Афо́н прии́де и вку́пе с тобо́ю в Ватопе́де водвори́ся, с ни́м же тя́ ны́не ублажа́ем и зове́м:
Ра́дуйся, спасе́ния душе́внаго роди́тельма твои́ма усе́рдный жела́телю; ра́дуйся, ко оставле́нию сла́вы земны́я, и́ма богому́дрый советода́телю и увеща́телю.
Ра́дуйся, прише́ствием к тебе́ на Афо́н отца́ твоего́ зело́ уте́шенный; ра́дуйся, спо́стник и сомоли́твенник ему́ бы́вый.
Ра́дуйся, по́двиги и́ноческия нести́ ему́ помога́вый; ра́дуйся, не́мощи его́ ста́рческия терпели́во носи́вый.
Ра́дуйся, в неду́зех ему́ любвеоби́льно послужи́вый; ра́дуйся, тяготу́ скорбе́й и лише́ний пусты́нных ему́ облегчи́вый.
Ра́дуйся, по́двиги твои́ми по́двиги о́тчия восполня́вый; ра́дуйся, уго́дника Бо́жия и́стиннаго его́ соверши́вый.
Ра́дуйся, его́ благослове́нием святы́м осене́нный; ра́дуйся, вку́пе с ни́м от ве́рных люде́й моли́твенно почита́емый.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 4
Бу́рею мо́ря жите́йскаго обурева́емым, ти́хое приста́нище на Афо́не постро́ити потща́лся еси́, о́тче Са́вво, и́ноческую се́рбскому ро́ду оби́тель, Хиленда́рь имену́ему, ю́же Пресвяте́й Богоро́дице посвяти́л еси́, хра́мы Бо́жиими и зда́ньми мно́гими сию́ украси́в, име́нием же дово́льным ю́ снабди́в, и гра́мматами царе́й утверди́в, в не́йже и са́м с роди́телем твои́м, преподо́бным Симео́ном, всели́лся еси́ жи́ти. Сего́ ра́ди оби́тель сия́ вы́ о́ба кти́торома свои́ма почита́ет, и па́мяти ва́ши торжеству́ющи, моле́бно возсыла́ет хвале́бную пе́снь Бо́гу: Аллилу́иа.
Икос 4
Слы́шав зва́ние Бо́жие преподо́бный Симео́н, к ве́чным оби́телем его́ призыва́ющее, стяжа́ тя́, Са́вво богоно́сне, моли́твеннаго помо́щника при исхо́де свое́м, и на руку́ твое́ю сыно́вню ду́х сво́й Го́сподеви предаде́, те́ло же его́ свято́е ты́ с подоба́ющею че́стию во гро́бе мра́морне в собо́рнем хра́ме Хиленда́рския оби́тели положи́л еси́, и моли́твами твои́ми моще́м отца́ твоего́ мироточе́ния благода́ть от Бо́га испроси́л еси́, си́м подвиза́я ве́рныя лю́ди зва́ти к тебе́:
Ра́дуйся, всеси́льный и богоприя́тный к Бо́гу моли́твенниче; ра́дуйся, равноа́нгельный челове́че.
Ра́дуйся, я́ко святы́я мо́щи и са́мый гро́б отца́ твоего́, по моли́тве твое́й к Бо́гу, ми́ро благоуха́нное и целе́бное источи́ша; ра́дуйся, я́ко си́м зело́ обра́дованный Бо́га немо́лчно славосло́вил еси́.
Ра́дуйся, я́ко оте́ц тво́й преподо́бный, по сме́рти послуша́ние ди́вное тебе́ показа́; ра́дуйся, я́ко по твоему́ проше́нию, изся́кшее от гро́ба ми́ро, па́ки источи́ся.
Ра́дуйся, во сла́ве святы́х отца́ твоего́ та́инственно созерца́вый; ра́дуйся, во све́тлом виде́нии обетова́ния благи́я от него́ услы́шавый.
Ра́дуйся, я́ко по за́поведи отца́ твоего́ мо́щи его́ от Афо́на в Се́рбию тобо́ю принесе́ни бы́ша; ра́дуйся, я́ко та́ко в оби́тели Студе́ницкой со сла́вою мно́гою тобо́ю положе́ни бы́ша.
Ра́дуйся, прославле́ния отца́ твоего́ в ли́це святы́х вино́вниче; ра́дуйся, святы́я па́мяти его́ усе́рдный почита́телю.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 5
Богосия́нное свети́ло бы́в, Са́вво богому́дре, во́лею Пастыренача́льника Иису́са, на све́щнице Се́рбския Це́ркве поста́влен бы́л еси́, и от патриа́рха Вселе́нскаго во архиепи́скопа се́рбскому наро́ду от земли́ его́ яви́лся еси́, его́же тща́тельне везде́ и всегда́ поуча́л еси́ в ве́ре святе́й правосла́вней тве́рдо и неукло́нно пребыва́ти, богоуго́дно же возноси́ти хвале́бную пе́снь Пресвяте́й Тро́ице: Аллилу́иа.
Икос 5
Ви́дев себе́ разлуча́ема с люби́мою тобо́ю афо́нскою пусты́нею, о́тче Са́вво, скорбе́л еси́ ду́хом твои́м, оба́че Пресвята́я Богоро́дица яви́ся ти́ в све́тлом виде́нии, и обетова́ньми по́мощи от Нея́ и заступле́ния, скорбя́щую ду́шу уте́ши и укрепи́. Тебе́ си́це обра́довану виде́нием и бесе́дою Цари́цы Небе́сныя, и мы́, земни́и, ра́достно вопие́м:
Ра́дуйся, избра́нный сосу́де Ду́ха Свята́го; ра́дуйся, при хирото́нии твое́й све́том небе́сным свы́ше осия́нный.
Ра́дуйся, таи́нниче Пресвяты́я Тро́ицы; ра́дуйся, собесе́дниче Пресвяты́я Богоро́дицы.
Ра́дуйся, слы́шавый от у́ст Ея́ ми́лостивыя глаго́лы; ра́дуйся, прие́мый от Нея́ обетова́ние по́мощи и заступле́ния.
Ра́дуйся, равноапо́стольный Се́рбския страны́ первопресто́льниче; ра́дуйся, учреди́телю богоблагослове́нныя иера́рхии, поставле́нием епи́скопов в Се́рбстей держа́ве.
Ра́дуйся, кра́снеи но́зе твои́ напра́вивый к распростране́нию про́поведи Ева́нгельския; ра́дуйся, Се́рбию све́том Христо́вым соверше́нно просвети́вый.
Ра́дуйся, мно́ги хра́мы Бо́жии и оби́тели и́ноческия в не́й воздви́гнувый; ра́дуйся, щедрода́тельный ми́лостыни пода́телю.
Ра́дуйся, благосе́рдный ни́щих пита́телю.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 6
Пропове́дник Правосла́вныя ве́ры яви́лся еси́ в Се́рбии, Са́вво свяще́нне, егда́ в собо́рнем хра́ме твое́м Жи́чстем Симво́л Правосла́вныя ве́ры громогла́сно испове́дал еси́, и се́й испове́дати па́ству твою́ научи́л еси́, да вси́ единомы́сленнии пребу́дут с тобо́ю, и возмо́гут еди́неми усты́ и еди́нем се́рдцем пе́ти вку́пе с тобо́ю пе́снь хвалы́ и благодаре́ния Триипоста́сному Бо́гу: Аллилу́иа.
Икос 6
Возсия́л еси́, святи́телю Христо́в, я́ко звезда́ пресве́тлая в оте́честве твое́м земне́м, и лю́ди твоя́ в Правосла́вней ве́ре и благоче́стии утвержда́л еси́ златослове́сными поуче́нии твои́ми, е́реси же и раско́лы искореня́л еси́ мече́м сло́ва Бо́жия. Сего́ ра́ди тя́, я́ко а́нгела Бо́жия лю́ди се́рбстии почита́ху, зову́ще и велегла́сно глаго́люще:
Ра́дуйся, архиере́ю, вла́сть вяза́ти и реши́ти досто́йно восприя́вый; ра́дуйся, иера́рше, во всеору́жие Христо́во облече́нный.
Ра́дуйся, па́стырю до́брый, гото́вый ду́шу свою́ положи́ти за богода́нныя ти́ лю́ди и па́ству твою́; ра́дуйся, усе́рдный де́лателю виногра́да Госпо́дня.
Ра́дуйся, свети́льниче, сия́ющий и просвеща́ющий сердца́ челове́ческая; ра́дуйся, лучу́ пресве́тлый Со́лнца пра́вды Христа́.
Ра́дуйся, чудотворе́ния да́ром от Го́спода просла́вленный; ра́дуйся, исцеле́ния мно́гая рука́ма твои́ма соверши́вый.
Ра́дуйся, разсла́бленнаго моли́твою твое́ю здра́ва сотвори́вый; ра́дуйся, вражду́ единокро́вных благода́тно умиротвори́вый.
Ра́дуйся, в ста́н неприя́зненных еди́н ходи́вый; ра́дуйся, словесы́ твои́ми враждова́вших смири́вый.
Ра́дуйся, уме́ршаго бра́та кра́ля Стефа́на воскреси́вый и жела́ние его́ испо́лнь, в и́ночество облеки́й его́, наре́кши Си́моном.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 7
Хоте́ние еди́но име́л еси́, свя́тче Бо́жий, е́же Бо́гу благоугожда́ти и спасе́нию душе́вному бли́жних твои́х служи́ти. Сего́ ра́ди не да́л еси́ сна́ очи́ма твои́ма, ни ве́ждома дрема́ния, неле́ностно подвиза́яся во бла́го святы́я Це́ркве Се́рбския и во спасе́ние и по́льзу вве́ренных ти́ от Бо́га благове́рных люде́й, и вои́стинну соде́лался еси́ сто́лп Правосла́вия и сохране́ние наро́да се́рбскаго непоколеби́мое, и́же тя́ неле́стно хва́лит и зове́т укрепи́вшему тя́ Це́ркве Зижди́телю Христу́: Аллилу́иа.
Икос 7
Но́ваго тя́ Никола́я Мирлики́йскаго и Златоу́ста Царегра́дскаго стяжа́ земля́ Се́рбская: чудесы́ бо твои́ми пе́рвому подо́бен бы́л еси́, златослове́сными же уче́нии второ́му подража́л еси́, святи́телю о́тче на́ш Са́вво, вои́стинну досто́йный благохвале́ний таковы́х:
Ра́дуйся, немо́лчный пропове́дниче Ева́нгелия Христо́ва; ра́дуйся, ве́рный после́дователю преда́ний апо́стольских.
Ра́дуйся, святы́х богоно́сных оте́ц нра́вы себе́ усво́ивый; ра́дуйся, те́плый моли́твенниче о душа́х на́ших.
Ра́дуйся, неусы́пное моле́ние в типика́рнице каре́йстей на Афо́не соверша́ти повеле́вый; ра́дуйся, благовре́менно и безвре́менно па́ству твою́ благоче́стию поуча́вый.
Ра́дуйся, мечу́, е́реси и раско́лы посека́яй; ра́дуйся, гро́ме, соблазни́телей устраша́яй.
Ра́дуйся, оби́димых засту́пниче; ра́дуйся, вдо́в и сиро́т благоде́телю.
Ра́дуйся, скорбя́щих уте́шителю; ра́дуйся, ка́ющихся с Бо́гом примири́телю.
Ра́дуйся, отроко́в богому́дрый наказа́телю; ра́дуйся, младе́нцев любвеоби́льный покрови́телю и богому́дрый наста́вниче.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 8
Стра́нник и пришле́ц восхоте́л еси́, Христа́ ра́ди бы́ти, святи́телю Са́вво, подража́яй Спа́су ду́ш на́ших, не име́вшему где́ главу́ приклони́ти, Его́же ра́ди ты́ оте́чество твое́ оста́вил еси́, и на поклоне́ние святы́м место́м в разли́чныя страны́ поте́кл еси́, с ве́рою и любо́вию святы́ням в ни́х покланя́яся, ми́лостыню же мно́гу це́рквам, оби́телем и ни́щим раздава́я и воспева́я при́сно Бо́гу: Аллилу́иа.
Икос 8
Ве́сь в Бо́зе бы́вый, святи́телю преподо́бне, о Бо́зе стопе́ твои́ стра́нничестеи напра́вил еси́ и во святе́м гра́де Иерусали́ме, места́ свята́я, житие́м и страда́нием Христа́ Спаси́теля озна́менованная, моли́твенно обходи́л еси́, си́м покланя́яся и сле́зы те́плыя от о́чию твое́ю излива́я, я́ко же́ртву любве́ твоея́ к пострада́вшему на́с ра́ди Го́споду, И́же внуша́ет на́м вопи́ти тебе́:
Ра́дуйся, му́дрый стра́нниче, иски́й оте́чествия небе́снаго; ра́дуйся, Христо́в избра́нниче, презре́вый вся́ бла́га земна́я.
Ра́дуйся, свята́го гра́да Иерусали́ма до́льняго благогове́йный покло́нниче; ра́дуйся, све́тлаго гра́да Иерусали́ма го́рняго усе́рдный и му́дрый иска́телю.
Ра́дуйся, Царьгра́д, Палести́ну, Еги́пет, Сина́й и Афо́н посети́вый; ра́дуйся, Ливи́ю, Фиваи́ду, Антиохи́ю, Сири́ю и Арме́нию обходи́вый.
Ра́дуйся, по мо́рю и су́ши многотру́дно путеше́ствовавый; ра́дуйся, мно́гия вели́кия святы́ни в пути́ твое́м собра́вый.
Ра́дуйся, от па́стырей Правосла́вныя Це́ркве везде́ с любо́вию и че́стию прие́млемый; ра́дуйся, от ни́щих и убо́гих за благотворе́ния твоя́ благословля́емый.
Ра́дуйся, пле́нников свободи́телю; ра́дуйся, пустынножи́телей уте́шителю.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 9
Вси́ и́ноцы вели́кия Ла́вры преподо́бнаго Са́ввы Освяще́ннаго с ра́достию срето́ша тя́, богому́дре Са́вво, егда́ к ни́м на поклоне́ние прише́л еси́, и позна́ша тя́ ди́внаго прише́льца, от ле́т дре́вних и́м обетова́ннаго. Те́мже тебе́, я́ко досто́йному, же́зл преподо́бнаго Са́ввы Освяще́ннаго и две́ ико́не Богоро́дични чудотво́рнеи, Троеру́чицы и Млекопита́тельницы имену́емеи, на благослове́ние дарова́ша ти́, пою́ще гла́сы преподо́бными Творцу́ вся́ческих Бо́гу: Аллилу́иа.
Икос 9
Вети́йство челове́ческое не довле́ет к прославле́нию мно́гих чуде́с твои́х, святи́телю иера́рше приснопа́мятне: мо́ре бо волну́ющееся моли́твою твое́ю укроти́л еси́, и ры́бу ди́вно из глубины́ морски́я в корабли́ прия́л еси́, неду́жныя возложе́нием руку́ твое́ю исцеля́л еси́ и ме́ртвыя пресла́вно воскреша́л еси́, я́ко ве́рный учени́к Христа́ Бо́га. Те́мже тебе́ вопие́м хвале́бно, ублажа́я тя́ си́це:
Ра́дуйся, обетова́ний Ева́нгельских исполне́ние прие́мый; ра́дуйся, смире́нием высо́кая стяжа́вый.
Ра́дуйся, врачу́ безме́здный, исцеля́яй неду́ги душе́вныя и теле́сныя; ра́дуйся, целе́бниче благода́тный в боле́знех с ве́рою к тебе́ притека́ющим.
Ра́дуйся, я́ко ру́це твои́ честне́и ору́дия целе́б яви́стася; ра́дуйся, я́ко се́ю возложе́нием моли́твенным, боля́щим здра́вие подава́л еси́.
Ра́дуйся, я́ко в чужды́х страна́х пребыва́я, и́мя Христо́во чудесы́ твои́ми прославля́л еси́; ра́дуйся, я́ко от гра́да в гра́д преходя́, ве́рныя во благоче́стии утвержда́л еси́.
Ра́дуйся, я́ко от восто́ка и до за́пада хва́льно бы́сть и́мя твое́; ра́дуйся, я́ко бли́жних и да́льних усе́рдно ко Христу́ приводи́л еси́.
Ра́дуйся, вселе́нную я́ко со́лнце пресве́тлое, обтеки́й; ра́дуйся, я́ко луна́ по́лная богоуго́дное тече́ние соверши́вый.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 10
Спасе́ния наде́жду несумне́нную име́я, святи́телю уго́дниче Бо́жий, во гра́д Те́рнов прише́л еси́ и зде́ коне́ц стра́нствия земна́го соверши́л еси́, почи́в о Го́споде кончи́ною пра́ведною и свято́ю, е́ю же мно́г пла́чь земли́ Се́рбстей сотвори́л еси́. Оба́че ве́руем, о́тче и архиере́ю на́ш, я́ко а́ще и вне́ оте́чества, по смотре́нию Госпо́дню почи́л еси́, неразлу́чен же с ни́м ду́хом твои́м пребыва́еши и вы́ну мо́лишися Бо́гу о воспева́ющих Ему́ пе́снь: Аллилу́иа.
Икос 10
Царя́ Небе́снаго Христа́ ве́рный ра́б и служи́тель бы́л еси́, богоно́сне о́тче на́ш Са́вво, и а́ще почи́л еси́ о Го́споде сно́м сме́рти, оба́че чудотвори́ти не престае́ши и по сме́рти: свяще́нная и всечестна́я ра́ка твоя́ враче́бница яви́ся неду́гом челове́ческим, и са́мая пе́рсть от гро́ба твоего́ целе́бна бы́сть, я́ко все́м зва́ти тебе́:
Ра́дуйся, первопресто́льниче свя́те Се́рбския страны́, со святы́ми почива́яй; ра́дуйся, уго́дниче Христо́в, и по сме́рти пресла́вно чудоде́йствуяй.
Ра́дуйся, гра́д Те́рнов преподо́бною твое́ю кончи́ною освяти́вый; ра́дуйся, Бо́лгарскую страну́ чудесы́ твои́ми благода́тно озари́вый.
Ра́дуйся, по жела́нию твоему́ в по́двизе стра́нствия жи́знь сконча́вый; ра́дуйся, вне́ оте́чества твоего́ сно́м сме́ртным опочи́вый.
Ра́дуйся, я́ко сме́рть твоя́ честна́ пред Го́сподем; ра́дуйся, я́ко успе́ние твое́ торжеству́ет свята́я Правосла́вная Це́рковь.
Ра́дуйся, я́ко архистрати́г Се́рбския страны́, во́ем ея́ во бра́нех побора́яй; ра́дуйся, покро́вом моли́тв твои́х па́ству твою́ при́сно соблюда́яй.
Ра́дуйся, просвеще́ния духо́внаго распространи́телю и насади́телю; ра́дуйся, младе́нцев и отроко́в любвеоби́льный наста́вниче, учи́лищ же христиа́нских покрови́телю и озари́телю.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 11
Пе́нием моле́бным честву́ем тя́ и велича́ем, святи́телю, Бо́жий уго́дниче, и ве́рно соверша́ем святу́ю па́мять твою́: а́ще бо и в Се́рбии просия́л еси́, вся́ же Це́рковь вселе́нныя стяжа́ тя до́бля побо́рника, предста́теля и моли́твенника ко Го́споду. Те́мже, помина́я житие́ твое́ богоуго́дное и мно́гия по́двиги твоя́ и чудеса́, прославля́ем просла́вльшаго тя́ Го́спода Иису́са, и смиренному́дренно вопие́м Ему́: Аллилу́иа.
Икос 11
Све́тлостию чуде́с сия́я, любо́вь твою́ к Се́рбии показа́л еси́, равноапо́стольне святи́телю Са́вво, егда́ благоволи́л еси́ принесе́нным бы́ти святы́м моще́м твои́м в оте́чество твое́ земно́е; ты́ бо отечестволю́бец бы́в при жи́зни, и по успе́нии таковы́м яви́лся еси́, и к лю́бящей тя́ па́стве твое́й возврати́тися моща́ми твои́ми восхоте́л еси́, да возвесели́ши ча́д твои́х, тебе́ вопию́щих:
Ра́дуйся, началопа́стырю Се́рбский, па́ству твою́ моли́твенно назира́яй; ра́дуйся, благи́й предста́телю с ве́рою тя́ призыва́ющих.
Ра́дуйся, я́ко моще́м твои́м святы́м в Се́рбию принесе́нным бы́ти восхоте́л еси́; ра́дуйся, я́ко во́лю твою́ о се́м царю́ Бо́лгарскому Асе́ну в виде́нии возвести́л еси́.
Ра́дуйся, со сла́вою и че́стию из Те́рнова в Се́рбию принесе́нный; ра́дуйся, в собо́рнем хра́ме Миле́шевы, я́ко твоея́ кафе́дры, с любо́вию прия́тый и че́стно положе́нный.
Ра́дуйся, брата́ничем твои́м, Се́рбским кра́лем Владисла́вом, благогове́йно почита́емый; ра́дуйся, прее́мником твои́м, святи́телем Арсе́нием, моли́твенно ублажа́емый.
Ра́дуйся, все́ми людьми́ се́рбскими ра́достно прия́тый; ра́дуйся, прише́ствием твои́м печа́ль па́ствы твоея́ утоли́вый.
Ра́дуйся, чудесы́ мно́гими от гро́ба твоего́ свя́тость твою́ ознаменова́вый; ра́дуйся, поля́, го́ры и де́бри ше́ствием освяти́вый.
Ра́дуйся, богоуго́дным житие́м, му́дростию и вели́ким тща́нием Правосла́вие в наро́де свое́м утверди́вый; ра́дуйся, благода́тным заступле́нием и по отше́ствии твое́м его́ сохраня́яй.
Ра́дуйся, а́нгеле житие́м, проро́че благода́тию Свята́го Ду́ха, апо́столе благовествова́нием, му́чениче испове́данием.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 12
Благода́ти Бо́жия сокро́вище, святы́я и нетле́нныя мо́щи твоя́, Са́вво, о́тче на́ш, гре́х ра́ди на́ших от нечести́вых ага́рян, враго́в христиа́нских, огню́ пре́дани бы́ша. Оба́че ве́руем, я́ко ты́ и ны́не с на́ми еси́, я́коже и пре́жде, егда́ благоволи́л еси́ моща́ми твои́ми ви́димо ро́д сво́й утеша́ти, и моли́твами твои́ми на́с сохраня́еши от вся́каго зла́. Те́мже покланя́ющеся ме́сту свято́му, на не́мже мо́щи твоя́ злочести́выми огню́ преда́шася, лобыза́ем пе́рсть, и́ми освяще́нную, и пое́м Бо́гу: Аллилу́иа.
Икос 12
Пою́ще свято́е и богоуго́дное житие́ твое́ и мно́гая пресла́вная чудотворе́ния твоя́, святи́телю о́тче на́ш Са́вво, смире́нно про́сим тя́: не возгнуша́йся на́ших не довле́ющих похва́л, и́миже тя́, от усе́рдия на́шего чествова́ти дерза́ем, но приклони́ся ми́лостивно к зову́щим ти́ всеусе́рдно хвале́ния такова́я:
Ра́дуйся, сострада́тельный и любвеоби́льный Се́рбския страны́ неусы́пный храни́телю; ра́дуйся, я́ко с не́ю вку́пе от злы́х ага́рян в моще́х твои́х о́гненное искуше́ние прия́вый.
Ра́дуйся, столпо́м сия́ющим до небе́с над сожига́емыми моща́ми твои́ми, свя́тость и́х чуде́сне прояви́вый; ра́дуйся, соже́гшаго мо́щи твоя́ воево́ду ага́рянскаго гро́зно наказа́вый.
Ра́дуйся, и по сожже́нии моще́й твои́х чудотвори́ти непреста́вый; ра́дуйся, и са́мое ме́сто сожже́ния и́х благода́ти прича́стно сотвори́вый.
Ра́дуйся, в виде́ниих и со́ниих ве́рныя посеща́яй; ра́дуйся, бли́жним и да́льним по́мощь твою́ подава́яй.
Ра́дуйся, Правосла́вныя Це́ркве боголе́пное украше́ние; ра́дуйся, архиере́ев сла́во и похвало́.
Ра́дуйся, в ли́це преподо́бных сия́ющая звездо́; ра́дуйся, по Бо́зе и Богоро́дице, кре́пкое на́ше упова́ние.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 13
О, пресвяты́й и преди́вный чудотво́рче, святи́телю о́тче на́ш Са́вво, Се́рбския страны́ покрови́телю и все́х правосла́вных христиа́н предста́телю! Приими́ ми́лостивно сие́ ма́лое моле́ние на́ше, в похвалу́ тебе́ приноси́мое, и моли́твами твои́ми ко Го́споду, изба́ви на́с от бе́д вре́менных и ве́чных, и сподо́би на́с вку́пе с тобо́ю в Ца́рствии небе́снем пе́ти Бо́гу, Спаси́телю на́шему: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельскую чистоту́ от ю́ности возлюби́в, Са́вво блаже́нне, во мла́дости вели́кий подви́жник благоче́стия показа́лся еси́, во е́же все́м диви́тися благонра́вию и благоче́стию души́ твоея́, зане́ я́ко ю́ноша сы́й и кра́левич рожде́нием, посто́м, бде́нием и моли́твами, пло́ть твою́ обузда́л еси́. Сего́ ра́ди и слы́шиши от на́с похва́льныя пе́сни таковы́я:
Ра́дуйся, отца́ благочести́ваго и ма́тере благонра́вныя, сы́не Бо́гом возлю́бленне; ра́дуйся, еди́наго Бо́га все́м се́рдцем твои́м возлюби́вый.
Ра́дуйся, рожде́нием твои́м роди́теля уте́шивый и непло́дие ею́ разреши́вый; ра́дуйся, пло́д благослове́нный, мно́гими моли́твами испро́шенный.
Ра́дуйся, кра́левскаго ро́да Не́мани о́трасль святопрозя́бшая; ра́дуйся, Се́рбския земли́ духо́вная красото́.
Ра́дуйся, роди́телю твое́ю в ста́рости утеше́ние и ра́дование; ра́дуйся, и́ма па́че други́х ча́д, зело́ люби́мый.
Ра́дуйся, плотоуго́дие еще́ во мла́дости отве́ргнувый; ра́дуйся, о благи́х небе́сных па́че не́же о земны́х вы́ну помышля́вый.
Ра́дуйся, чистоты́ душе́вныя и теле́сныя до́брый рачи́телю.
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Кондак 1
Избра́нный от Царя́ си́л Го́спода Иису́са Христа́ и призва́нный благода́тию от кра́левскаго ро́да во и́ночество и архиере́йство, первосвяти́телю Се́рбския Це́ркве, богоно́сне о́тче Са́вво, удовли́ на́с восхваля́ти тя́ с любо́вию, я́ко богодарова́ннаго па́стыря и учи́теля на́шего; ты́ же, име́я дерзнове́ние ко Го́споду, вку́пе с отце́м и бра́том твои́ма по пло́ти, мироточи́вым Симео́ном и преподо́бным Си́моном, первовенча́нным кра́лем, моли́ся вы́ну о спасе́нии всего́ достоя́ния своего́, правосла́внаго наро́да се́рбскаго, и о на́с гре́шных, избавля́я от вся́ких зо́л, бе́д и скорбе́й, вопию́щия ти́:
Ра́дуйся, святи́телю Са́вво, первопа́стырю и учи́телю Се́рбский, ди́вный чудотво́рче.
Молитвы
О, свяще́нная главо́, пресла́вный чудотво́рче, святи́телю Христо́в Са́вво, Се́рбския земли́ первопресто́льниче, храни́телю и просвети́телю, все́х же христиа́н благонаде́жный пред Го́сподем предста́телю! Тебе́ припа́даем и мо́лимся: да́ждь на́м бы́ти прича́стником любве́ твоея́ к Бо́гу и бли́жнему, е́ю же при жи́зни свята́я душа́ твоя́ преиспо́лнена бы́сть. Озари́ на́с и́стиною, просвети́ у́м и се́рдце на́ше све́том Боже́ственнаго уче́ния, научи́ на́с тебе́ подража́ти ве́рно, Бо́га и бли́жняго на́шего люби́ти и за́поведи Госпо́дни соверша́ти непогреши́тельно, да бу́дем и мы́ ча́да твоя́, не по и́мени то́кмо, но все́м житие́м на́шим. Моли́ся, святы́й архиере́ю, о святе́й Правосла́вней Це́ркви и оте́честве твое́м земне́м, при́сно тя́ любо́вию чту́щем. При́зри благоутро́бно на вся́ку ду́шу ве́рных твои́х чти́телей, ми́лости и по́мощи твоея́ и́щущих, бу́ди все́м на́м в боле́знех цели́тель, в ско́рбех уте́шитель, в печа́лех посети́тель, в беда́х и ну́ждах помо́щник, в ча́с же сме́ртный ми́лостивый покрови́тель и защи́титель, да по́мощию моли́тв твои́х святы́х, сподо́бимся и мы́ гре́шнии спасе́ние ве́рное получи́ти и Ца́рствие Христо́во унасле́довати. Е́й, свя́тче Бо́жий, не посрами́ упова́ния на́шего, е́же на тя́ кре́пко возлага́ем, но яви́ на́м твое́ многомо́щное заступле́ние, да сла́вим и пое́м ди́внаго во святы́х Свои́х Бо́га Отца́ и Сы́на и Свята́го Ду́ха, всегда́, ны́не и при́сно и во ве́ки веко́в. Ами́нь.
Во святи́телех вели́кое украше́ние, богому́дре о́тче Са́вво, мо́лимся раби́ твои́ и припа́дающе, вопие́м ти́: не оста́ви свои́х ча́д, о́тче, но бу́ди всегда́ с на́ми, я́коже обеща́лся еси́, да и мы́ по до́лгу воспое́м тя́, ублажи́м тя́ и просла́вим вели́чие и си́лу твою́ и досто́йную пе́снь принесе́м ти́, вопию́ще и глаго́люще: тебе́ ублажа́ем, святи́телю; тебе́ воспева́ем, свети́льниче; тебе́ покланя́емся, о́тче Са́вво! Моли́, мо́лимтися, спасти́ся пою́щим святу́ю твою́ па́мять. Ами́нь.
Конда́къ а҃
И҆збра́нный ѿ цр҃ѧ̀ си́лъ гдⷭ҇а і҆и҃са хрⷭ҇та̀ и҆ призва́нный блгⷣтїю ѿ кра́левскагѡ ро́да во и҆́ночество и҆ а҆рхїере́йство, первост҃и́телю се́рбскїѧ цр҃кве, бг҃оно́сне ѻ҆́ч҃е са́вво, ᲂу҆довлѝ на́съ восхвалѧ́ти тѧ̀ съ любо́вїю, ꙗ҆́кѡ бг҃одарова́ннаго па́стырѧ и҆ ᲂу҆чи́телѧ на́шего: ты́ же, и҆мѣ́ѧ дерзнове́нїе ко гдⷭ҇ꙋ, вкꙋ́пѣ съ ѻ҆тцє́мъ и҆ бра́томъ твои́ма по пло́ти, мѷроточи́вымъ сѷмеѡ́номъ и҆ прпⷣбнымъ сі́мѡномъ, первовѣнча́ннымъ кра́лемъ, моли́сѧ вы́нꙋ ѡ҆ сп҃се́нїи всегѡ̀ достоѧ́нїѧ своегѡ̀, правосла́внагѡ наро́да се́рбскагѡ, и҆ ѡ҆ на́съ грѣ́шныхъ, и҆збавлѧ́ѧ ѿ всѧ́кихъ ѕѡ́лъ, бѣ́дъ и҆ скорбе́й, вопїю́щыѧ тѝ:
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
І҆́косъ а҃
А҆́гг҃льскꙋю чистотꙋ̀ ѿ ю҆́ности возлюби́въ, са́вво бл҃же́нне, во мла́дости вели́кїй подви́жникъ бл҃гоче́стїѧ показа́лсѧ є҆сѝ, во є҆́же всѣ̑мъ диви́тисѧ бл҃гонра́вїю и҆ бл҃гоче́стїю дꙋшѝ твоеѧ̀, занѐ ꙗ҆́кѡ ю҆́ноша сы́й и҆ кра́левичъ рожде́нїемъ, посто́мъ, бдѣ́нїемъ и҆ мл҃твами, пло́ть твою̀ ѡ҆бꙋзда́лъ є҆сѝ. сегѡ̀ ра́ди и҆ слы́шиши ѿ на́съ похва̑льныѧ пѣ̑сни такѡвы́ѧ:
Ра́дꙋйсѧ, ѻ҆тца̀ бл҃гочести́вагѡ и҆ ма́тере бл҃гонра́вныѧ, сы́не бг҃омъ возлю́бленне: ра́дꙋйсѧ, є҆ди́наго бг҃а всѣ́мъ се́рдцемъ твои́мъ возлюби́вый.
Ра́дꙋйсѧ, рожде́нїемъ твои́мъ роди́телѧ ᲂу҆тѣ́шивый и҆ непло́дїе є҆ю̀ разрѣши́вый: ра́дꙋйсѧ, пло́дъ бл҃гослове́нный, мно́гими моли́твами и҆спро́шенный.
Ра́дꙋйсѧ, кра́левскагѡ ро́да не́мани ѻ҆́трасль ст҃опрозѧ́бшаѧ: ра́дꙋйсѧ, се́рбскїѧ землѝ дꙋхо́внаѧ красото̀.
Ра́дꙋйсѧ, роди́телю твое́ю въ ста́рости ᲂу҆тѣше́нїе и҆ ра́дованїе: ра́дꙋйсѧ, и҆́ма па́че дрꙋги́хъ ча́дъ, ѕѣлѡ̀ люби́мый.
Ра́дꙋйсѧ, плотоꙋго́дїе є҆щѐ во мла́дости ѿве́ргнꙋвый: ра́дꙋйсѧ, ѡ҆ благи́хъ нбⷭ҇ныхъ па́че не́же ѡ҆ земны́хъ вы́нꙋ помышлѧ́вый.
Ра́дꙋйсѧ, чистоты̀ дꙋше́вныѧ и҆ тѣле́сныѧ до́брый рачи́телю.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ в҃
Ви́дѣвъ сꙋетꙋ̀ и҆ непостоѧ́нство сла́вы земны́ѧ, са́вво бг҃омꙋ́дре, ᲂу҆стреми́лсѧ є҆сѝ дꙋ́хомъ твои́мъ въ гѡ́рнѧѧ ко гдⷭ҇ꙋ, и҆́же зрѧ̀ твоѐ жела́нїе бжⷭ҇твенное, посла̀ къ тебѣ̀ и҆́нока прпⷣбнаго и҆з̾ ст҃ы́ѧ горы̀ а҆ѳѡ́нскїѧ, є҆го́же поꙋче́нїемъ наставлѧ́емый, ѡ҆ста́вилъ є҆сѝ роди́тєлѧ твоѧ̑ и҆ ѻ҆те́чество твоѐ, въ жре́бїй же земны́й прест҃ы́ѧ бцⷣы на ст҃ꙋ́ю го́рꙋ а҆ѳѡ́нскꙋю прише́лъ є҆сѝ, и҆ та́мѡ во ѡ҆би́тели рѡссі́йстѣй водвори́лсѧ є҆сѝ, зовы́й немо́лчнѡ съ рабо́тающыми гдⷭ҇еви, а҆́гг҃льскꙋю пѣ́снь: А҆ллилꙋ́їа.
І҆́косъ в҃
Разꙋмѣ́вше ѿше́ствїе твоѐ, роди́тєлѧ твоѧ̑ пла́кастѣсѧ го́рцѣ, скорбѧ́ще ѡ҆ твое́мъ лише́нїи, са́вво прпⷣбне, та́же помы́слиша и҆ а҆́бїе посла́ша и҆ска́ти тѧ̀ да́же до а҆ѳѡ́на вѣ̑рныѧ слꙋги̑ своѧ̑, ꙗ҆́кѡ да ᲂу҆бѣдѧ́тъ тѧ̀ къ ни́ма возврати́тисѧ. ты́ же, свѧ́те, прише́ствїе по́сланныхъ слꙋ́гъ ᲂу҆вѣ́дѣвъ, мꙋ́дре съ ни́ми бесѣ́довалъ є҆сѝ, та́же ѿ ни́хъ ᲂу҆дали́всѧ, на пи́ргъ высо́кїй возше́лъ є҆сѝ, и҆ та́мѡ постриже́нїе и҆́ноческое воспрїѧ́вый, кра́левскꙋю ри́зꙋ твою̀, вкꙋ́пѣ съ власы̀ главы̀ твоеѧ̀, въ постриже́нїи ѿѧ́тыми, по́сланнымъ тѣ́мъ съ пи́рга пове́рглъ є҆сѝ, заповѣ́давъ и҆́мъ рещѝ роди́телема твои́ма, ꙗ҆́кѡ сы́нъ є҆ю̀ ра́стко, ᲂу҆жѐ и҆́нокъ са́вва є҆́сть. таковꙋ́ю ре́вность твою̀ ѡ҆ сп҃се́нїи помина́юще, зове́мъ тѝ си́це:
Ра́дꙋйсѧ, владѣ́нїѧ земна́гѡ сла́вꙋ презрѣ́вый: ра́дꙋйсѧ, роди́тєлѧ твоѧ̑ и҆ ѻ҆те́чество твоѐ хрⷭ҇та̀ ра́ди ѡ҆ста́вивый.
Ра́дꙋйсѧ, на ст҃ꙋ́ю а҆ѳѡ́нскꙋю го́рꙋ рабо́тати гдⷭ҇еви прише́дый: ра́дꙋйсѧ, во ѡ҆би́тели рѡссі́йстѣй та́мѡ водвори́выйсѧ.
Ра́дꙋйсѧ, сеѧ̀ ѡ҆би́тели постри́женецъ бы́вый: ра́дꙋйсѧ, по́двиги твои́ми ѻ҆́нꙋю просла́вивый.
Ра́дꙋйсѧ, ꙗ҆́кѡ въ не́й досе́лѣ и҆́мѧ твоѐ моли́твеннѡ ᲂу҆бл҃жа́етсѧ: ра́дꙋйсѧ, ꙗ҆́кѡ ѡ҆би́тель сїѧ̀ тобо́ю свѣ́тлѡ красꙋ́етсѧ.
Ра́дꙋйсѧ, по́двиги поста̀ и҆ мл҃твы ѻ҆ц҃є́въ а҆ѳѡ́нскихъ ᲂу҆диви́вый: ра́дꙋйсѧ, во є҆ди́нѣй власѧни́цѣ босы́ма нога́ма ѡ҆би́тєли а҆ѳѡ́нскїѧ ѡ҆боше́дый.
Ра́дꙋйсѧ, тала́нтъ, врꙋче́нный тѝ, ᲂу҆мно́живый: ра́дꙋйсѧ, въ послꙋша́нїе ста́рцꙋ бг҃омꙋ́дромꙋ во ѡ҆би́тели ватопе́дстѣй себѐ преда́вый.
Ра́дꙋйсѧ, во смире́нїи и҆ терпѣ́нїи ѕѣлѡ̀ преꙋспѣ́вый.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ г҃
Си́лою всевы́шнѧгѡ ᲂу҆крѣплѧ́емый, свѧ́тче бж҃їй, по́двиги вели́кїѧ во и҆́ночествѣ соверша́лъ є҆сѝ, во ѡ҆би́тели ватопе́дстѣй на а҆ѳѡ́нѣ, посто́мъ, бдѣ́нїемъ и҆ всѧ́кимъ и҆знꙋре́нїемъ ᲂу҆мерщвлѧ́ѧ пло́ть твою̀, мра́зъ и҆ зно́й терпѣ́лъ є҆сѝ, а҆́ки безпло́тный, и҆ бо́съ ходѧ́й по ѻ҆́стромꙋ ка́мени неꙋѧзви́мъ пребыва́лъ є҆сѝ, покорѧ́ѧ пло́ть дꙋ́хꙋ, любо́вїю ко гдⷭ҇ꙋ вы́нꙋ пламенѣ́вый, во є҆́же пѣ́ти тебѣ̀ немо́лчнꙋю є҆мꙋ̀ пѣ́снь: А҆ллилꙋ́їа.
І҆́косъ г҃
И҆мѣ́ѧ попече́нїе ѡ҆ сп҃се́нїи дꙋше́внѣмъ роди́тєлїю твоє́ю, ѻ҆́ч҃е са́вво, вы́нꙋ моли́лсѧ є҆сѝ ѡ҆ се́мъ бг҃ꙋ. благі́й же человѣколю́бецъ, творѧ́й во́лю боѧ́щихсѧ є҆гѡ̀, внꙋшѝ роди́телема твои́ма писа́нїемъ твои́мъ къ ни́ма ѕѣлѡ̀ ᲂу҆миле́ннымъ, владѣ́нїе земно́е ѡ҆ста́вити и҆ постриже́нїе и҆́ноческое воспрїѧ́ти. сегѡ̀ ра́ди ѻ҆тє́цъ тво́й, прпⷣбный сѷмеѡ́нъ, и҆з̾ се́рбїи на а҆ѳѡ́нъ прїи́де и҆ вкꙋ́пѣ съ тобо́ю въ ватопе́дѣ водвори́сѧ, съ ни́мъ же тѧ̀ ны́нѣ ᲂу҆бл҃жа́емъ и҆ зове́мъ:
Ра́дꙋйсѧ, сп҃се́нїѧ дꙋше́внагѡ роди́тельма твои́ма ᲂу҆се́рдный жела́телю: ра́дꙋйсѧ, ко ѡ҆ставле́нїю сла́вы земны́ѧ, и҆́ма бг҃омꙋ́дрый совѣтода́телю и҆ ᲂу҆вѣща́телю.
Ра́дꙋйсѧ, прише́ствїемъ къ тебѣ̀ на а҆ѳѡ́нъ ѻ҆тца̀ твоегѡ̀ ѕѣлѡ̀ ᲂу҆тѣ́шенный: ра́дꙋйсѧ, спо́стникъ и҆ сомоли́твенникъ є҆мꙋ̀ бы́вый.
Ра́дꙋйсѧ, по́двиги и҆́ноческїѧ нестѝ є҆мꙋ̀ помога́вый: ра́дꙋйсѧ, не́мощи є҆гѡ̀ ста́рческїѧ терпѣли́вѡ носи́вый.
Ра́дꙋйсѧ, въ недꙋ́зѣхъ є҆мꙋ̀ любвеѡби́льнѡ послꙋжи́вый: ра́дꙋйсѧ, тѧготꙋ̀ скорбе́й и҆ лише́нїй пꙋсты́нныхъ є҆мꙋ̀ ѡ҆блегчи́вый.
Ра́дꙋйсѧ, по́двиги твои́ми по́двиги ѻ҆́тчїѧ восполнѧ́вый: ра́дꙋйсѧ, ᲂу҆го́дника бж҃їѧ и҆́стиннагѡ є҆гѡ̀ соверши́вый.
Ра́дꙋйсѧ, є҆гѡ̀ благослове́нїемъ ст҃ы́мъ ѡ҆сѣне́нный: ра́дꙋйсѧ, вкꙋ́пѣ съ ни́мъ ѿ вѣ́рныхъ люде́й моли́твеннѡ почита́емый.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ д҃
Бꙋ́рею мо́рѧ жите́йскагѡ ѡ҆бꙋрева́ємымъ, ти́хое приста́нище на а҆ѳѡ́нѣ постро́ити потща́лсѧ є҆сѝ, ѻ҆́ч҃е са́вво, и҆́ноческꙋю се́рбскомꙋ ро́дꙋ ѡ҆би́тель, хиленда́рь именꙋ́емꙋ, ю҆́же прест҃ѣ́й бцⷣѣ посвѧти́лъ є҆сѝ, хра́мы бж҃їими и҆ зда́ньми мно́гими сїю̀ ᲂу҆краси́въ, и҆мѣ́нїемъ же дово́льнымъ ю҆̀ снабди́въ, и҆ гра́мматами царе́й ᲂу҆тверди́въ, въ не́йже и҆ са́мъ съ роди́телемъ твои́мъ, прпⷣбнымъ сѷмеѡ́номъ, всели́лсѧ є҆сѝ жи́ти. сегѡ̀ ра́ди ѡ҆би́тель сїѧ̀ вы̀ ѻ҆́ба кти́торѡма свои́ма почита́етъ, и҆ па́мѧти ва́ши торжествꙋ́ющи, моле́бнѡ возсыла́етъ хвале́бнꙋю пѣ́снь бг҃ꙋ: А҆ллилꙋ́їа.
І҆́косъ д҃
Слы́шавъ зва́нїе бж҃їе прпⷣбный сѷмеѡ́нъ, къ вѣ́чнымъ ѡ҆би́телємъ є҆гѡ̀ призыва́ющее, стѧжа̀ тѧ̀, са́вво бг҃оно́сне, мл҃твеннагѡ помо́щника при и҆схо́дѣ свое́мъ, и҆ на рꙋкꙋ̑ твое́ю сыно́вню дꙋ́хъ сво́й гдⷭ҇еви предадѐ, тѣ́ло же є҆гѡ̀ ст҃о́е ты̀ съ подоба́ющею че́стїю во гро́бѣ мра́морнѣ въ собо́рнѣмъ хра́мѣ хиленда́рскїѧ ѡ҆би́тели положи́лъ є҆сѝ, и҆ мл҃твами твои́ми моще́мъ ѻ҆тца̀ твоегѡ̀ мѷроточе́нїѧ блгⷣть ѿ бг҃а и҆спроси́лъ є҆сѝ, си́мъ подвиза́ѧ вѣ̑рныѧ лю́ди зва́ти къ тебѣ̀:
Ра́дꙋйсѧ, всеси́льный и҆ бг҃опрїѧ́тный къ бг҃ꙋ мл҃твенниче: ра́дꙋйсѧ, равноа́гг҃льный человѣ́че.
Ра́дꙋйсѧ, ꙗ҆́кѡ ст҃ы́ѧ мо́щи и҆ са́мый гро́бъ ѻ҆тца̀ твоегѡ̀, по мл҃твѣ твое́й къ бг҃ꙋ, мѵ́ро бл҃гоꙋха́нное и҆ цѣле́бное и҆сточи́ша: ра́дꙋйсѧ, ꙗ҆́кѡ си́мъ ѕѣлѡ̀ ѡ҆бра́дованный бг҃а немо́лчнѡ славосло́вилъ є҆сѝ.
Ра́дꙋйсѧ, ꙗ҆́кѡ ѻ҆тє́цъ тво́й прпⷣбный, по сме́рти послꙋша́нїе ди́вное тебѣ̀ показа̀: ра́дꙋйсѧ, ꙗ҆́кѡ по твоемꙋ̀ проше́нїю, и҆зсѧ́кшее ѿ гро́ба мѵ́ро, па́ки и҆сточи́сѧ.
Ра́дꙋйсѧ, во сла́вѣ ст҃ы́хъ ѻ҆тца̀ твоегѡ̀ та́инственнѡ созерца́вый: ра́дꙋйсѧ, во свѣ́тломъ видѣ́нїи ѡ҆бѣтова̑нїѧ благі̑ѧ ѿ негѡ̀ ᲂу҆слы́шавый.
Ра́дꙋйсѧ, ꙗ҆́кѡ по за́повѣди ѻ҆тца̀ твоегѡ̀ мо́щи є҆гѡ̀ ѿ а҆ѳѡ́на въ се́рбїю тобо́ю принесе́ни бы́ша: ра́дꙋйсѧ, ꙗ҆́кѡ та́кѡ въ ѡ҆би́тели стꙋде́ницкой со сла́вою мно́гою тобо́ю положе́ни бы́ша.
Ра́дꙋйсѧ, прославле́нїѧ ѻ҆тца̀ твоегѡ̀ въ ли́цѣ ст҃ы́хъ вино́вниче: ра́дꙋйсѧ, ст҃ы́ѧ па́мѧти є҆гѡ̀ ᲂу҆се́рдный почита́телю.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ є҃
Бг҃осїѧ́нное свѣти́ло бы́въ, са́вво бг҃омꙋ́дре, во́лею пастыренача́льника і҆и҃са, на свѣ́щницѣ се́рбскїѧ цр҃кве поста́вленъ бы́лъ є҆сѝ, и҆ ѿ патрїа́рха вселе́нскагѡ во а҆рхїепⷭ҇копа се́рбскомꙋ наро́дꙋ ѿ землѝ є҆гѡ̀ ꙗ҆ви́лсѧ є҆сѝ, є҆го́же тща́тельнѣ вездѣ̀ и҆ всегда̀ поꙋча́лъ є҆сѝ въ вѣ́рѣ ст҃ѣ́й правосла́внѣй тве́рдѡ и҆ неꙋкло́ннѡ пребыва́ти, бг҃оꙋго́днѡ же возноси́ти хвале́бнꙋю пѣ́снь прест҃ѣ́й трⷪ҇цѣ: А҆ллилꙋ́їа.
І҆́косъ є҃
Ви́дѣвъ себѐ разлꙋча́ема съ люби́мою тобо́ю а҆ѳѡ́нскою пꙋсты́нею, ѻ҆́ч҃е са́вво, скорбѣ́лъ є҆сѝ дꙋ́хомъ твои́мъ, ѻ҆ба́че прест҃а́ѧ бцⷣа ꙗ҆ви́сѧ тѝ въ свѣ́тломъ видѣ́нїи, и҆ ѡ҆бѣтова́ньми по́мощи ѿ неѧ̀ и҆ застꙋпле́нїѧ, скорбѧ́щꙋю дꙋ́шꙋ ᲂу҆тѣ́ши и҆ ᲂу҆крѣпѝ. тебѣ̀ си́це ѡ҆бра́дованꙋ видѣ́нїемъ и҆ бесѣ́дою цр҃и́цы нбⷭ҇ныѧ, и҆ мы̀, земні́и, ра́достнѡ вопїе́мъ:
Ра́дꙋйсѧ, и҆збра́нный сосꙋ́де дх҃а ст҃а́гѡ: ра́дꙋйсѧ, при хїрото́нїи твое́й свѣ́томъ нбⷭ҇нымъ свы́ше ѡ҆сїѧ́нный.
Ра́дꙋйсѧ, таи́нниче прест҃ы́ѧ трⷪ҇цы: ра́дꙋйсѧ, собесѣ́дниче прест҃ы́ѧ бцⷣы.
Ра́дꙋйсѧ, слы́шавый ѿ ᲂу҆́стъ є҆ѧ̀ ми́лостивыѧ глаго́лы: ра́дꙋйсѧ, прїе́мый ѿ неѧ̀ ѡ҆бѣтова́нїе по́мощи и҆ застꙋпле́нїѧ.
Ра́дꙋйсѧ, равноапⷭ҇льный се́рбскїѧ страны̀ первопресто́льниче: ра́дꙋйсѧ, ᲂу҆чреди́телю бг҃облагослове́нныѧ і҆ера́рхїи, поставле́нїемъ є҆пⷭ҇кпѡвъ въ се́рбстѣй держа́вѣ.
Ра́дꙋйсѧ, кра́снѣи нѡ́зѣ твоѝ напра́вивый къ распростране́нїю про́повѣди є҆ѵⷢ҇льскїѧ: ра́дꙋйсѧ, се́рбїю свѣ́томъ хрⷭ҇то́вымъ соверше́ннѡ просвѣти́вый.
Ра́дꙋйсѧ, мнѡ́ги хра́мы бж҃їи и҆ ѡ҆би́тєли и҆́нѡческїѧ въ не́й воздви́гнꙋвый: ра́дꙋйсѧ, щедрода́тельный ми́лостыни пода́телю.
Ра́дꙋйсѧ, бл҃госе́рдный ни́щихъ пита́телю.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ ѕ҃
Проповѣ́дникъ правосла́вныѧ вѣ́ры ꙗ҆ви́лсѧ є҆сѝ въ се́рбїи, са́вво свѧще́нне, є҆гда̀ въ собо́рнѣмъ хра́мѣ твое́мъ жи́чстѣмъ сѷмво́лъ правосла́вныѧ вѣ́ры громогла́снѡ и҆сповѣ́далъ є҆сѝ, и҆ сѣ́й и҆сповѣ́дати па́ствꙋ твою̀ наꙋчи́лъ є҆сѝ, да всѝ є҆диномы́сленнїи пребꙋ́дꙋтъ съ тобо́ю, и҆ возмо́гꙋтъ є҆ди́нѣми ᲂу҆сты̀ и҆ є҆ди́нѣмъ се́рдцемъ пѣ́ти вкꙋ́пѣ съ тобо́ю пѣ́снь хвалы̀ и҆ бл҃годаре́нїѧ трїѷпоста́сномꙋ бг҃ꙋ: А҆ллилꙋ́їа.
І҆́косъ ѕ҃
Возсїѧ́лъ є҆сѝ, ст҃и́телю хрⷭ҇то́въ, ꙗ҆́кѡ ѕвѣзда̀ пресвѣ̑тлаѧ въ ѻ҆те́чествѣ твое́мъ земнѣ́мъ, и҆ лю́ди твоѧ̑ въ правосла́внѣй вѣ́рѣ и҆ бл҃гоче́стїи ᲂу҆твержда́лъ є҆сѝ златослове́сными поꙋчє́нїи твои́ми, є҆́рєси же и҆ раско́лы и҆скоренѧ́лъ є҆сѝ мече́мъ сло́ва бж҃їѧ. сегѡ̀ ра́ди тѧ̀, ꙗ҆́кѡ а҆́гг҃ла бж҃їѧ лю́ди се́рбстїи почита́хꙋ, зовꙋ́ще и҆ велегла́снѡ глаго́люще:
Ра́дꙋйсѧ, а҆рхїере́ю, вла́сть вѧза́ти и҆ рѣши́ти досто́йнѡ воспрїѧ́вый: ра́дꙋйсѧ, і҆ера́рше, во всеѻрꙋ́жїе хрⷭ҇то́во ѡ҆блече́нный.
Ра́дꙋйсѧ, па́стырю до́брый, гото́вый дꙋ́шꙋ свою̀ положи́ти за бг҃ода́нныѧ тѝ лю́ди и҆ па́ствꙋ твою̀: ра́дꙋйсѧ, ᲂу҆се́рдный дѣ́лателю вїногра́да гдⷭ҇нѧ.
Ра́дꙋйсѧ, свѣти́льниче, сїѧ́ющїй и҆ просвѣща́ющїй сердца̀ человѣ̑ческаѧ: ра́дꙋйсѧ, лꙋчꙋ̀ пресвѣ́тлый сл҃нца пра́вды хрⷭ҇та̀.
Ра́дꙋйсѧ, чꙋдотворе́нїѧ да́ромъ ѿ гдⷭ҇а просла́вленный: ра́дꙋйсѧ, и҆сцѣлє́нїѧ мнѡ́гаѧ рꙋка́ма твои́ма соверши́вый.
Ра́дꙋйсѧ, разсла́бленнагѡ мл҃твою твое́ю здра́ва сотвори́вый: ра́дꙋйсѧ, враждꙋ̀ є҆динокро́вныхъ бл҃года́тнѡ ᲂу҆миротвори́вый.
Ра́дꙋйсѧ, въ ста́нъ непрїѧ́зненныхъ є҆ди́нъ ходи́вый: ра́дꙋйсѧ, словесы̑ твои́ми враждова́вшихъ смири́вый.
Ра́дꙋйсѧ, ᲂу҆ме́ршагѡ бра́та кра́лѧ стефа́на воскреси́вый и҆ жела́нїе є҆гѡ̀ и҆спо́лнь, въ и҆́ночество ѡ҆блекі́й є҆го̀, наре́кши сі́мѡномъ.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ з҃
Хотѣ́нїе є҆ди́но и҆мѣ́лъ є҆сѝ, свѧ́тче бж҃їй, є҆́же бг҃ꙋ бл҃гоꙋгожда́ти и҆ сп҃се́нїю дꙋше́вномꙋ бли́жнихъ твои́хъ слꙋжи́ти. сегѡ̀ ра́ди не да́лъ є҆сѝ сна̀ ѻ҆чи́ма твои́ма, ни вѣ́ждома дрема́нїѧ, нелѣ́ностнѡ подвиза́ѧсѧ во бла́го ст҃ы́ѧ цр҃кве се́рбскїѧ и҆ во сп҃се́нїе и҆ по́льзꙋ ввѣ́ренныхъ тѝ ѿ бг҃а благовѣ́рныхъ люде́й, и҆ вои́стиннꙋ содѣ́лалсѧ є҆сѝ сто́лпъ правосла́вїѧ и҆ сохране́нїе наро́да се́рбскагѡ непоколеби́мое, и҆́же тѧ̀ неле́стнѡ хва́литъ и҆ зове́тъ ᲂу҆крѣпи́вшемꙋ тѧ̀ цр҃кве зижди́телю хрⷭ҇тꙋ̀: А҆ллилꙋ́їа.
І҆́косъ з҃
Но́вагѡ тѧ̀ нїкола́ѧ мѷрлѷкі́йскаго и҆ златоꙋ́ста царегра́дскаго стѧжа̀ землѧ̀ се́рбскаѧ: чꙋдесы̀ бо твои́ми пе́рвомꙋ подо́бенъ бы́лъ є҆сѝ, златослове́сными же ᲂу҆чє́нїи второ́мꙋ подража́лъ є҆сѝ, ст҃и́телю ѻ҆́ч҃е на́шъ са́вво, вои́стиннꙋ досто́йный бл҃гохвалє́нїй такѡвы́хъ:
Ра́дꙋйсѧ, немо́лчный проповѣ́дниче є҆ѵⷢ҇лїа хрⷭ҇то́ва: ра́дꙋйсѧ, вѣ́рный послѣ́дователю преда́нїй а҆пⷭ҇льскихъ.
Ра́дꙋйсѧ, ст҃ы́хъ бг҃оно́сныхъ ѻ҆тє́цъ нра́вы себѣ̀ ᲂу҆сво́ивый: ра́дꙋйсѧ, те́плый мл҃твенниче ѡ҆ дꙋша́хъ на́шихъ.
Ра́дꙋйсѧ, неꙋсы́пное моле́нїе въ типика́рницѣ каре́йстѣй на а҆ѳѡ́нѣ соверша́ти повелѣ́вый: ра́дꙋйсѧ, бл҃говре́меннѡ и҆ безвре́меннѡ па́ствꙋ твою̀ бл҃гоче́стїю поꙋча́вый.
Ра́дꙋйсѧ, мечꙋ̀, є҆́рєси и҆ раско́лы посѣка́ѧй: ра́дꙋйсѧ, гро́ме, соблазни́телей ᲂу҆страша́ѧй.
Ра́дꙋйсѧ, ѡ҆би́димыхъ застꙋ́пниче: ра́дꙋйсѧ, вдо́въ и҆ сирѡ́тъ бл҃годѣ́телю.
Ра́дꙋйсѧ, скорбѧ́щихъ ᲂу҆тѣ́шителю: ра́дꙋйсѧ, ка́ющихсѧ съ бг҃омъ примири́телю.
Ра́дꙋйсѧ, ѻ҆трокѡ́въ бг҃омꙋ́дрый наказа́телю: ра́дꙋйсѧ, младе́нцєвъ любвеѻби́льный покрови́телю и҆ бг҃омꙋ́дрый наста́вниче.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ и҃
Стра́нникъ и҆ пришле́цъ восхотѣ́лъ є҆сѝ, хрⷭ҇та̀ ра́ди бы́ти, ст҃и́телю са́вво, подража́ѧй сп҃сꙋ дꙋ́шъ на́шихъ, не и҆мѣ́вшемꙋ гдѣ̀ главꙋ̀ приклони́ти, є҆го́же ра́ди ты̀ ѻ҆те́чество твоѐ ѡ҆ста́вилъ є҆сѝ, и҆ на поклоне́нїе ст҃ы̑мъ мѣстѡ́мъ въ разли̑чныѧ страны̑ поте́клъ є҆сѝ, съ вѣ́рою и҆ любо́вїю ст҃ы́нѧмъ въ ни́хъ покланѧ́ѧсѧ, ми́лостыню же мно́гꙋ це́рквамъ, ѻ҆би́телємъ и҆ ни́щымъ раздава́ѧ и҆ воспѣва́ѧ при́снѡ бг҃ꙋ: А҆ллилꙋ́їа.
І҆́косъ и҃
Ве́сь въ бз҃ѣ бы́вый, ст҃и́телю прпⷣбне, ѡ҆ бз҃ѣ стопѣ̀ твоѝ стра́нничестѣи напра́вилъ є҆сѝ и҆ во ст҃ѣ́мъ гра́дѣ і҆ерⷭ҇ли́мѣ, мѣста̀ ст҃а̑ѧ, житїе́мъ и҆ страда́нїемъ хрⷭ҇та̀ спⷭ҇телѧ ѡ҆зна́менованнаѧ, моли́твеннѡ ѡ҆бходи́лъ є҆сѝ, си́мъ покланѧ́ѧсѧ и҆ слє́зы тє́плыѧ ѿ ѻ҆́чїю твое́ю и҆злива́ѧ, ꙗ҆́кѡ же́ртвꙋ любвѐ твоеѧ̀ къ пострада́вшемꙋ на́съ ра́ди гдⷭ҇ꙋ, и҆́же внꙋша́етъ на́мъ вопи́ти тебѣ̀:
Ра́дꙋйсѧ, мꙋ́дрый стра́нниче, и҆скі́й ѻ҆те́чествїѧ нбⷭ҇нагѡ: ра́дꙋйсѧ, хрⷭ҇то́въ и҆збра́нниче, презрѣ́вый всѧ̑ бла́га земна̑ѧ.
Ра́дꙋйсѧ, ст҃а́гѡ гра́да і҆ерⷭ҇ли́ма до́льнѧгѡ бл҃гоговѣ́йный покло́нниче: ра́дꙋйсѧ, свѣ́тлагѡ гра́да і҆ерⷭ҇ли́ма го́рнѧгѡ ᲂу҆се́рдный и҆ мꙋ́дрый и҆ска́телю.
Ра́дꙋйсѧ, царьгра́дъ, палесті́нꙋ, є҆гѵ́петъ, сїна́й и҆ а҆ѳѡ́нъ посѣти́вый: ра́дꙋйсѧ, лївѵ́ю, ѳиваі́дꙋ, а҆нтїохі́ю, сѷрі́ю и҆ а҆рме́нїю ѡ҆бходи́вый.
Ра́дꙋйсѧ, по мо́рю и҆ сꙋ́ши многотрꙋ́днѡ пꙋтеше́ствовавый: ра́дꙋйсѧ, мнѡ́гїѧ вели́кїѧ ст҃ы́ни въ пꙋтѝ твое́мъ собра́вый.
Ра́дꙋйсѧ, ѿ па́стырей правосла́вныѧ цр҃кве вездѣ̀ съ любо́вїю и҆ че́стїю прїе́млемый: ра́дꙋйсѧ, ѿ ни́щихъ и҆ ᲂу҆бо́гихъ за бл҃готворє́нїѧ твоѧ̑ бл҃гословлѧ́емый.
Ра́дꙋйсѧ, плѣ́нникѡвъ свободи́телю: ра́дꙋйсѧ, пꙋстынножи́телей ᲂу҆тѣ́шителю.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ ѳ҃
Всѝ и҆́ноцы вели́кїѧ ла́ѵры прпⷣбнагѡ са́ввы ѡ҆свѧще́ннагѡ съ ра́достїю срѣто́ша тѧ̀, бг҃омꙋ́дре са́вво, є҆гда̀ къ ни́мъ на поклоне́нїе прише́лъ є҆сѝ, и҆ позна́ша тѧ̀ ди́внаго прише́льца, ѿ лѣ́тъ дре́внихъ и҆́мъ ѡ҆бѣтова́ннагѡ. тѣ́мже тебѣ̀, ꙗ҆́кѡ досто́йномꙋ, же́злъ прпⷣбнагѡ са́ввы ѡ҆свѧще́ннагѡ и҆ двѣ̀ і҆кѡ́нѣ бг҃оро́дични чꙋдотво́рнѣи, троерꙋ́чицы и҆ млекопита́тельницы и҆менꙋ́емѣи, на бл҃гослове́нїе дарова́ша тѝ, пою́ще гла́сы прпⷣбными творцꙋ̀ всѧ́ческихъ бг҃ꙋ: А҆ллилꙋ́їа.
І҆́косъ ѳ҃
Вѣті́йство человѣ́ческое не довлѣ́етъ къ прославле́нїю мно́гихъ чꙋде́съ твои́хъ, ст҃и́телю і҆ера́рше приснопа́мѧтне: мо́ре бо волнꙋ́ющеесѧ мл҃твою твое́ю ᲂу҆кроти́лъ є҆сѝ, и҆ ры́бꙋ ди́внѡ и҆з̾ глꙋбины̀ морскі́ѧ въ кораблѝ прїѧ́лъ є҆сѝ, недꙋ́жныѧ возложе́нїемъ рꙋкꙋ̑ твоє́ю и҆сцѣлѧ́лъ є҆сѝ и҆ мє́ртвыѧ пресла́внѡ воскреша́лъ є҆сѝ, ꙗ҆́кѡ вѣ́рный ᲂу҆чени́къ хрⷭ҇та̀ бг҃а. тѣ́мже тебѣ̀ вопїе́мъ хвале́бнѡ, ᲂу҆блажа́ѧ тѧ̀ си́це:
Ра́дꙋйсѧ, ѡ҆бѣтова́нїй є҆ѵⷢ҇льскихъ и҆сполне́нїе прїе́мый: ра́дꙋйсѧ, смире́нїемъ высо́каѧ стѧжа́вый.
Ра́дꙋйсѧ, врачꙋ̀ безме́здный, и҆сцѣлѧ́ѧй недꙋ́ги дꙋше́вныѧ и҆ тѣле́сныѧ: ра́дꙋйсѧ, цѣле́бниче бл҃года́тный въ болѣ́знехъ съ вѣ́рою къ тебѣ̀ притека́ющымъ.
Ра́дꙋйсѧ, ꙗ҆́кѡ рꙋ́цѣ твоѝ честнѣ́и ѻ҆рꙋ́дїѧ цѣле́бъ ꙗ҆ви́стасѧ: ра́дꙋйсѧ, ꙗ҆́кѡ се́ю возложе́нїемъ мл҃твеннымъ, болѧ́щымъ здра́вїе подава́лъ є҆сѝ.
Ра́дꙋйсѧ, ꙗ҆́кѡ въ чꙋжды́хъ страна́хъ пребыва́ѧ, и҆́мѧ хрⷭ҇то́во чꙋдесы̀ твои́ми прославлѧ́лъ є҆сѝ: ра́дꙋйсѧ, ꙗ҆́кѡ ѿ гра́да въ гра́дъ преходѧ̀, вѣ́рныѧ во бл҃гоче́стїи ᲂу҆твержда́лъ є҆сѝ.
Ра́дꙋйсѧ, ꙗ҆́кѡ ѿ восто́ка и҆ до за́пада хва́льнѡ бы́сть и҆́мѧ твоѐ: ра́дꙋйсѧ, ꙗ҆́кѡ бли́жнихъ и҆ да́льнихъ ᲂу҆се́рднѡ ко хрⷭ҇тꙋ̀ приводи́лъ є҆сѝ.
Ра́дꙋйсѧ, вселе́ннꙋю ꙗ҆́кѡ со́лнце пресвѣ́тлое, ѡ҆бтекі́й: ра́дꙋйсѧ, ꙗ҆́кѡ лꙋна̀ по́лнаѧ бг҃оꙋго́дное тече́нїе соверши́вый.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ і҃
Сп҃се́нїѧ наде́ждꙋ несꙋмнѣ́ннꙋю и҆мѣ́ѧ, ст҃и́телю ᲂу҆го́дниче бж҃їй, во гра́дъ те́рновъ прише́лъ є҆сѝ и҆ здѣ̀ коне́цъ стра́нствїѧ земна́гѡ соверши́лъ є҆сѝ, почи́въ ѡ҆ гдⷭ҇ѣ кончи́ною пра́ведною и҆ ст҃о́ю, є҆́ю же мнѡ́гъ пла́чь землѝ се́рбстѣй сотвори́лъ є҆сѝ. ѻ҆ба́че вѣ́рꙋемъ, ѻ҆́ч҃е и҆ а҆рхїере́ю на́шъ, ꙗ҆́кѡ а҆́ще и҆ внѣ̀ ѻ҆те́чества, по смотре́нїю гдⷭ҇ню почи́лъ є҆сѝ, неразлꙋ́ченъ же съ ни́мъ дꙋ́хомъ твои́мъ пребыва́еши и҆ вы́нꙋ мо́лишисѧ бг҃ꙋ ѡ҆ воспѣва́ющихъ є҆мꙋ̀ пѣ́снь: А҆ллилꙋ́їа.
І҆́косъ і҃
Цр҃ѧ̀ нбⷭ҇нагѡ хрⷭ҇та̀ вѣ́рный ра́бъ и҆ слꙋжи́тель бы́лъ є҆сѝ, бг҃оно́сне ѻ҆́ч҃е на́шъ са́вво, и҆ а҆́ще почи́лъ є҆сѝ ѡ҆ гдⷭ҇ѣ сно́мъ сме́рти, ѻ҆ба́че чꙋдотвори́ти не престае́ши и҆ по сме́рти: свѧще́ннаѧ и҆ всечестна́ѧ ра́ка твоѧ̀ враче́бница ꙗ҆ви́сѧ недꙋ́гѡмъ человѣ́чєскимъ, и҆ са́маѧ пе́рсть ѿ гро́ба твоегѡ̀ цѣле́бна бы́сть, ꙗ҆́кѡ всѣ̑мъ зва́ти тебѣ̀:
Ра́дꙋйсѧ, первопресто́льниче свѧ́те се́рбскїѧ страны̀, со ст҃ы́ми почива́ѧй: ра́дꙋйсѧ, ᲂу҆го́дниче хрⷭ҇то́въ, и҆ по сме́рти пресла́внѡ чꙋдодѣ́йствꙋѧй.
Ра́дꙋйсѧ, гра́дъ те́рновъ прпⷣбною твое́ю кончи́ною ѡ҆ст҃и́вый: ра́дꙋйсѧ, бо́лгарскꙋю странꙋ̀ чꙋдесы̀ твои́ми бл҃года́тнѡ ѡ҆зари́вый.
Ра́дꙋйсѧ, по жела́нїю твоемꙋ̀ въ по́двизѣ стра́нствїѧ жи́знь сконча́вый: ра́дꙋйсѧ, внѣ̀ ѻ҆те́чества твоегѡ̀ сно́мъ сме́ртнымъ ѡ҆почи́вый.
Ра́дꙋйсѧ, ꙗ҆́кѡ сме́рть твоѧ̀ честна̀ пред̾ гдⷭ҇емъ: ра́дꙋйсѧ, ꙗ҆́кѡ ᲂу҆спе́нїе твоѐ торжествꙋ́етъ ст҃а́ѧ правосла́внаѧ цр҃ковь.
Ра́дꙋйсѧ, ꙗ҆́кѡ а҆рхїстрати́гъ се́рбскїѧ страны̀, во́ємъ є҆ѧ̀ во бра́нехъ побора́ѧй: ра́дꙋйсѧ, покро́вомъ мл҃твъ твои́хъ па́ствꙋ твою̀ при́снѡ соблюда́ѧй.
Ра́дꙋйсѧ, просвѣще́нїѧ дꙋхо́внаго распространи́телю и҆ насади́телю: ра́дꙋйсѧ, младе́нцєвъ и҆ ѻ҆трокѡ́въ любвеѻби́льный наста́вниче, ᲂу҆чи́лищъ же хрⷭ҇тїа́нскихъ покрови́телю и҆ ѡ҆зари́телю.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ а҃і
Пѣ́нїемъ моле́бнымъ чествꙋ́емъ тѧ̀ и҆ велича́емъ, ст҃и́телю, бж҃їй ᲂу҆го́дниче, и҆ вѣ́рнѡ соверша́емъ ст҃ꙋ́ю па́мѧть твою̀: а҆́ще бо и҆ въ се́рбїи просїѧ́лъ є҆сѝ, всѧ̀ же цр҃ковь вселе́нныѧ стѧжа́ тѧ до́блѧ побо́рника, предста́телѧ и҆ мл҃твенника ко гдⷭ҇ꙋ. тѣ́мже, помина́ѧ житїѐ твоѐ бг҃оꙋго́дное и҆ мнѡ́гїѧ по́двиги твоѧ̑ и҆ чꙋдеса̀, прославлѧ́емъ просла́вльшаго тѧ̀ гдⷭ҇а і҆и҃са, и҆ смиренномꙋ́дреннѡ вопїе́мъ є҆мꙋ̀: А҆ллилꙋ́їа.
І҆́косъ а҃і
Свѣ́тлостїю чꙋде́съ сїѧ́ѧ, любо́вь твою̀ къ се́рбїи показа́лъ є҆сѝ, равноапⷭ҇льне ст҃и́телю са́вво, є҆гда̀ бл҃говоли́лъ є҆сѝ принесє́ннымъ бы́ти ст҃ы̑мъ мощє́мъ твои̑мъ въ ѻ҆те́чество твоѐ земно́е: ты́ бо ѻ҆течестволю́бецъ бы́въ при жи́зни, и҆ по ᲂу҆спе́нїи таковы́мъ ꙗ҆ви́лсѧ є҆сѝ, и҆ къ лю́бѧщей тѧ̀ па́ствѣ твое́й возврати́тисѧ моща́ми твои́ми восхотѣ́лъ є҆сѝ, да возвесели́ши ча́дъ твои́хъ, тебѣ̀ вопїю́щихъ:
Ра́дꙋйсѧ, началопа́стырю се́рбскїй, па́ствꙋ твою̀ мл҃твеннѡ назира́ѧй: ра́дꙋйсѧ, благі́й предста́телю съ вѣ́рою тѧ̀ призыва́ющихъ.
Ра́дꙋйсѧ, ꙗ҆́кѡ моще́мъ твои̑мъ ст҃ы̑мъ въ се́рбїю принесє́ннымъ бы́ти восхотѣ́лъ є҆сѝ: ра́дꙋйсѧ, ꙗ҆́кѡ во́лю твою̀ ѡ҆ се́мъ царю̀ бо́лгарскомꙋ а҆се́нꙋ въ видѣ́нїи возвѣсти́лъ є҆сѝ.
Ра́дꙋйсѧ, со сла́вою и҆ че́стїю и҆з̾ те́рнова въ се́рбїю принесе́нный: ра́дꙋйсѧ, въ собо́рнѣмъ хра́мѣ миле́шевы, ꙗ҆́кѡ твоеѧ̀ каѳе́дры, съ любо́вїю прїѧ́тый и҆ че́стнѡ положе́нный.
Ра́дꙋйсѧ, брата́ничемъ твои́мъ, се́рбскимъ кра́лемъ владисла́вомъ, бл҃гоговѣ́йнѡ почита́емый: ра́дꙋйсѧ, прее́мникомъ твои́мъ, ст҃и́телемъ а҆рсе́нїемъ, моли́твеннѡ ᲂу҆бл҃жа́емый.
Ра́дꙋйсѧ, всѣ́ми людьмѝ се́рбскими ра́достнѡ прїѧ́тый: ра́дꙋйсѧ, прише́ствїемъ твои́мъ печа́ль па́ствы твоеѧ̀ ᲂу҆толи́вый.
Ра́дꙋйсѧ, чꙋдесы̀ мно́гими ѿ гро́ба твоегѡ̀ ст҃ость твою̀ ѡ҆знаменова́вый: ра́дꙋйсѧ, полѧ̀, го́ры и҆ де́бри ше́ствїемъ ѡ҆ст҃и́вый.
Ра́дꙋйсѧ, бг҃оꙋго́днымъ житїе́мъ, мꙋ́дростїю и҆ вели́кимъ тща́нїемъ правосла́вїе въ наро́дѣ свое́мъ ᲂу҆тверди́вый: ра́дꙋйсѧ, благода́тнымъ застꙋпле́нїемъ и҆ по ѿше́ствїи твое́мъ є҆гѡ̀ сохранѧ́ѧй.
Ра́дꙋйсѧ, а҆́гг҃ле житїе́мъ, прⷪ҇ро́че блгⷣтїю ст҃а́гѡ дх҃а, а҆пⷭ҇ле благовѣствова́нїемъ, мꙋ́чениче и҆сповѣ́данїемъ.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ в҃і
Блгⷣти бж҃їѧ сокро́вище, ст҃ы́ѧ и҆ нетлѣ́нныѧ мо́щи твоѧ̑, са́вво, ѻ҆́ч҃е на́шъ, грѣ̑хъ ра́ди на́шихъ ѿ нечести́выхъ а҆га́рѧнъ, врагѡ́въ хрⷭ҇тїа́нскихъ, ѻ҆гню̀ пре́дани бы́ша. ѻ҆ба́че вѣ́рꙋемъ, ꙗ҆́кѡ ты̀ и҆ ны́нѣ съ на́ми є҆сѝ, ꙗ҆́кѡже и҆ пре́жде, є҆гда̀ бл҃говоли́лъ є҆сѝ моща́ми твои́ми ви́димѡ ро́дъ сво́й ᲂу҆тѣша́ти, и҆ мл҃твами твои́ми на́съ сохранѧ́еши ѿ всѧ́кагѡ ѕла̀. тѣ́мже покланѧ́ющесѧ мѣ́стꙋ ст҃о́мꙋ, на не́мже мо́щи твоѧ̑ злочести́выми ѻ҆гню̀ преда́шасѧ, лобыза́емъ пе́рсть, и҆́ми ѡ҆сщ҃е́ннꙋю, и҆ пое́мъ бг҃ꙋ: А҆ллилꙋ́їа.
І҆́косъ в҃і
Пою́ще ст҃о́е и҆ бг҃оꙋго́дное житїѐ твоѐ и҆ мнѡ́гаѧ пресла̑внаѧ чꙋдотворє́нїѧ твоѧ̑, ст҃и́телю ѻ҆́ч҃е на́шъ са́вво, смире́ннѡ про́симъ тѧ̀: не возгнꙋша́йсѧ на́шихъ не довлѣ́ющихъ похва́лъ, и҆́миже тѧ̀, ѿ ᲂу҆се́рдїѧ на́шегѡ чествова́ти дерза́емъ, но приклони́сѧ ми́лостивнѡ къ зовꙋ́щымъ тѝ всеꙋсе́рднѡ хвалє́нїѧ такѡва́ѧ:
Ра́дꙋйсѧ, сострада́тельный и҆ любвеѻби́льный се́рбскїѧ страны̀ неꙋсы́пный храни́телю: ра́дꙋйсѧ, ꙗ҆́кѡ съ не́ю вкꙋ́пѣ ѿ ѕлы́хъ а҆га́рѧнъ въ моще́хъ твои́хъ ѻ҆́гненное и҆скꙋше́нїе прїѧ́вый.
Ра́дꙋйсѧ, столпо́мъ сїѧ́ющимъ до небе́съ надъ сожига́емыми моща́ми твои́ми, ст҃ость и҆́хъ чꙋде́снѣ проѧви́вый: ра́дꙋйсѧ, соже́гшаго мо́щи твоѧ̑ воево́дꙋ а҆га́рѧнскагѡ гро́знѡ наказа́вый.
Ра́дꙋйсѧ, и҆ по сожже́нїи моще́й твои́хъ чꙋдотвори́ти непреста́вый: ра́дꙋйсѧ, и҆ са́мое мѣ́сто сожже́нїѧ и҆́хъ благода́ти прича́стно сотвори́вый.
Ра́дꙋйсѧ, въ видѣ́нїихъ и҆ со́нїихъ вѣ́рныѧ посѣща́ѧй: ра́дꙋйсѧ, бли̑жнимъ и҆ да̑льнимъ по́мощь твою̀ подава́ѧй.
Ра́дꙋйсѧ, правосла́вныѧ цр҃кве бг҃олѣ́пное ᲂу҆краше́нїе: ра́дꙋйсѧ, а҆рхїере́євъ сла́во и҆ похвало̀.
Ра́дꙋйсѧ, въ ли́цѣ прпⷣбныхъ сїѧ́ющаѧ ѕвѣздо̀: ра́дꙋйсѧ, по бз҃ѣ и҆ бцⷣѣ, крѣ́пкое на́ше ᲂу҆пова́нїе.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ г҃і
Ѽ, прест҃ы́й и҆ преди́вный чꙋдотво́рче, ст҃и́телю ѻ҆́ч҃е на́шъ са́вво, се́рбскїѧ страны̀ покрови́телю и҆ всѣ́хъ правосла́вныхъ хрⷭ҇тїа́нъ предста́телю! прїимѝ ми́лостивнѡ сїѐ ма́лое моле́нїе на́ше, въ похвалꙋ̀ тебѣ̀ приноси́мое, и҆ мл҃твами твои́ми ко гдⷭ҇ꙋ, и҆зба́ви на́съ ѿ бѣ́дъ вре́менныхъ и҆ вѣ́чныхъ, и҆ сподо́би на́съ вкꙋ́пѣ съ тобо́ю въ црⷭ҇твїи нбⷭ҇нѣмъ пѣ́ти бг҃ꙋ, сп҃си́телю на́шемꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льскꙋю чистотꙋ̀ ѿ ю҆́ности возлюби́въ, са́вво бл҃же́нне, во мла́дости вели́кїй подви́жникъ бл҃гоче́стїѧ показа́лсѧ є҆сѝ, во є҆́же всѣ̑мъ диви́тисѧ бл҃гонра́вїю и҆ бл҃гоче́стїю дꙋшѝ твоеѧ̀, занѐ ꙗ҆́кѡ ю҆́ноша сы́й и҆ кра́левичъ рожде́нїемъ, посто́мъ, бдѣ́нїемъ и҆ мл҃твами, пло́ть твою̀ ѡ҆бꙋзда́лъ є҆сѝ. сегѡ̀ ра́ди и҆ слы́шиши ѿ на́съ похва̑льныѧ пѣ̑сни такѡвы́ѧ:
Ра́дꙋйсѧ, ѻ҆тца̀ бл҃гочести́вагѡ и҆ ма́тере бл҃гонра́вныѧ, сы́не бг҃омъ возлю́бленне: ра́дꙋйсѧ, є҆ди́наго бг҃а всѣ́мъ се́рдцемъ твои́мъ возлюби́вый.
Ра́дꙋйсѧ, рожде́нїемъ твои́мъ роди́телѧ ᲂу҆тѣ́шивый и҆ непло́дїе є҆ю̀ разрѣши́вый: ра́дꙋйсѧ, пло́дъ бл҃гослове́нный, мно́гими моли́твами и҆спро́шенный.
Ра́дꙋйсѧ, кра́левскагѡ ро́да не́мани ѻ҆́трасль ст҃опрозѧ́бшаѧ: ра́дꙋйсѧ, се́рбскїѧ землѝ дꙋхо́внаѧ красото̀.
Ра́дꙋйсѧ, роди́телю твое́ю въ ста́рости ᲂу҆тѣше́нїе и҆ ра́дованїе: ра́дꙋйсѧ, и҆́ма па́че дрꙋги́хъ ча́дъ, ѕѣлѡ̀ люби́мый.
Ра́дꙋйсѧ, плотоꙋго́дїе є҆щѐ во мла́дости ѿве́ргнꙋвый: ра́дꙋйсѧ, ѡ҆ благи́хъ нбⷭ҇ныхъ па́че не́же ѡ҆ земны́хъ вы́нꙋ помышлѧ́вый.
Ра́дꙋйсѧ, чистоты̀ дꙋше́вныѧ и҆ тѣле́сныѧ до́брый рачи́телю.
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Конда́къ а҃
И҆збра́нный ѿ цр҃ѧ̀ си́лъ гдⷭ҇а і҆и҃са хрⷭ҇та̀ и҆ призва́нный блгⷣтїю ѿ кра́левскагѡ ро́да во и҆́ночество и҆ а҆рхїере́йство, первост҃и́телю се́рбскїѧ цр҃кве, бг҃оно́сне ѻ҆́ч҃е са́вво, ᲂу҆довлѝ на́съ восхвалѧ́ти тѧ̀ съ любо́вїю, ꙗ҆́кѡ бг҃одарова́ннаго па́стырѧ и҆ ᲂу҆чи́телѧ на́шего: ты́ же, и҆мѣ́ѧ дерзнове́нїе ко гдⷭ҇ꙋ, вкꙋ́пѣ съ ѻ҆тцє́мъ и҆ бра́томъ твои́ма по пло́ти, мѷроточи́вымъ сѷмеѡ́номъ и҆ прпⷣбнымъ сі́мѡномъ, первовѣнча́ннымъ кра́лемъ, моли́сѧ вы́нꙋ ѡ҆ сп҃се́нїи всегѡ̀ достоѧ́нїѧ своегѡ̀, правосла́внагѡ наро́да се́рбскагѡ, и҆ ѡ҆ на́съ грѣ́шныхъ, и҆збавлѧ́ѧ ѿ всѧ́кихъ ѕѡ́лъ, бѣ́дъ и҆ скорбе́й, вопїю́щыѧ тѝ:
Ра́дꙋйсѧ, ст҃и́телю са́вво, первопа́стырю и҆ ᲂу҆чи́телю се́рбскїй, ди́вный чꙋдотво́рче.
Моли́твы
Ѽ, сщ҃е́ннаѧ главо̀, пресла́вный чꙋдотво́рче, ст҃и́телю хрⷭ҇то́въ са́вво, се́рбскїѧ землѝ первопресто́льниче, храни́телю и҆ просвѣти́телю, всѣ́хъ же хрⷭ҇тїа́нъ бл҃гонаде́жный пред̾ гдⷭ҇емъ предста́телю! тебѣ̀ припа́даемъ и҆ мо́лимсѧ: да́ждь на́мъ бы́ти прича́стникѡмъ любвѐ твоеѧ̀ къ бг҃ꙋ и҆ бли́жнемꙋ, є҆́ю же при жи́зни ст҃а́ѧ дꙋша̀ твоѧ̀ преиспо́лнена бы́сть. ѡ҆зарѝ на́съ и҆́стиною, просвѣтѝ ᲂу҆́мъ и҆ се́рдце на́ше свѣ́томъ бжⷭ҇твеннагѡ ᲂу҆че́нїѧ, наꙋчѝ на́съ тебѣ̀ подража́ти вѣ́рнѡ, бг҃а и҆ бли́жнѧго на́шего люби́ти и҆ за́пѡвѣди гдⷭ҇ни соверша́ти непогрѣши́тельнѡ, да бꙋ́демъ и҆ мы̀ ча́да твоѧ̑, не по и҆́мени то́кмѡ, но всѣ̑мъ житїе́мъ на́шымъ. моли́сѧ, ст҃ы́й а҆рхїере́ю, ѡ҆ ст҃ѣ́й правосла́внѣй цр҃кви и҆ ѻ҆те́чествѣ твое́мъ земнѣ́мъ, при́снѡ тѧ̀ любо́вїю чтꙋ́щемъ. при́зри бл҃гоꙋтро́бнѡ на всѧ́кꙋ дꙋ́шꙋ вѣ́рныхъ твои́хъ чти́телей, ми́лости и҆ по́мощи твоеѧ̀ и҆́щꙋщихъ, бꙋ́ди всѣ̑мъ на́мъ въ болѣ́знехъ цѣли́тель, въ ско́рбехъ ᲂу҆тѣ́шитель, въ печа́лехъ посѣти́тель, въ бѣда́хъ и҆ нꙋ́ждахъ помо́щникъ, въ ча́съ же сме́ртный ми́лостивый покрови́тель и҆ защи́титель, да по́мощїю мл҃твъ твои́хъ ст҃ы́хъ, сподо́бимсѧ и҆ мы̀ грѣ́шнїи сп҃се́нїе вѣ́рное полꙋчи́ти и҆ црⷭ҇твїе хрⷭ҇то́во ᲂу҆наслѣ́довати. є҆́й, свѧ́тче бж҃їй, не посрамѝ ᲂу҆пова́нїѧ на́шегѡ, є҆́же на тѧ̀ крѣ́пкѡ возлага́емъ, но ꙗ҆вѝ на́мъ твоѐ многомо́щное застꙋпле́нїе, да сла́вимъ и҆ пое́мъ ди́внагѡ во ст҃ы́хъ свои́хъ бг҃а ѻ҆ц҃а̀ и҆ сн҃а и҆ ст҃а́гѡ дх҃а, всегда̀, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Во ст҃и́телехъ вели́кое ᲂу҆краше́нїе, бг҃омꙋ́дре ѻ҆́ч҃е са́вво, мо́лимсѧ рабѝ твоѝ и҆ припа́дающе, вопїе́мъ тѝ: не ѡ҆ста́ви свои́хъ ча́дъ, ѻ҆́ч҃е, но бꙋ́ди всегда̀ съ на́ми, ꙗ҆́кѡже ѡ҆бѣща́лсѧ є҆сѝ, да и҆ мы̀ по до́лгꙋ воспое́мъ тѧ̀, ᲂу҆бл҃жи́мъ тѧ̀ и҆ просла́вимъ вели́чїе и҆ си́лꙋ твою̀ и҆ досто́йнꙋю пѣ́снь принесе́мъ тѝ, вопїю́ще и҆ глаго́люще: тебѣ̀ ᲂу҆блажа́емъ, ст҃и́телю: тебѣ̀ воспѣва́емъ, свѣти́льниче: тебѣ̀ покланѧ́емсѧ, ѻ҆́ч҃е са́вво! молѝ, мо́лимтисѧ, сп҃сти́сѧ пою́щымъ ст҃ꙋ́ю твою̀ па́мѧть. А҆ми́нь.