Акафист святому преподобному Анатолию Оптинскому (старшему)

Мирска́го треволне́ния избежа́в, преподо́бне, Бо́гу посвяще́н бы́в от роди́телей, я́коже Самуи́л. Сего́ ра́ди ю́ношеское твое́ благоче́стие похваля́юще, вопие́м ти́:

Ра́дуйся, благочести́вое Бо́гу приноше́ние; ра́дуйся, боголюби́вым роди́телем твои́м похвале́ние.

Ра́дуйся, от ю́ности твоея́ проти́ву греха́ подвиза́выйся; ра́дуйся, в зре́лости твое́й венце́м побе́ды венча́выйся.

Ра́дуйся, моли́твами де́тскими украси́вый ду́шу твою́; ра́дуйся, слеза́ми чи́стыми ороси́вый лани́ты твоя́.

Ра́дуйся, де́вство соблю́л еси́, я́ко зе́ницу о́ка; ра́дуйся, моли́тву стяжа́л еси́, я́ко Херуви́мския о́чи.

Ра́дуйся, Анато́лие, зерца́ло моли́твы у́мныя.

И́ноческим житие́м вдохнови́выйся, богому́дре о́тче, по́стничество, послуша́ния, труды́ и бде́ния стро́го держа́. Сего́ ра́ди окова́нный му́жеством сосу́д души́ твоея́ соде́лал еси́. Те́мже приими́ похвалы́ сия́:

Ра́дуйся, послу́шниче приле́жный; ра́дуйся, и́ноче благогове́йный.

Ра́дуйся, мона́шескаго чи́на украше́ние; ра́дуйся, а́нгельскому ликостоя́нию соревнова́телю.

Ра́дуйся, доброде́тельми я́ко звезда́ми уясни́л еси́ житие́ твое́; ра́дуйся, я́ко от тмы́ страсте́й очи́стил еси́ ду́шу твою́.

Ра́дуйся, све́тлая во Христе́ со́весте; ра́дуйся, чи́стое о Бо́зе се́рдце.

Ра́дуйся, Анато́лие, зерца́ло моли́твы у́мныя.

Смире́нием я́ко покро́вом Бо́жиим тя́ охраня́ше богому́дрый ста́рец Мака́рий и проти́ву похва́л обличе́ньми тя́ наставля́ше. Ты́ же укоре́ния от ста́рца я́ко во́ду чисти́тельную приима́л еси́. Сего́ ра́ди чистоте́ души́ твоея́ дивя́щеся, си́це тебе́ вопие́м:

Ра́дуйся, благоду́шное укори́зны терпе́ние; ра́дуйся, доблему́дрое к труда́м понужде́ние.

Ра́дуйся, от мирски́х похва́л удале́ние; ра́дуйся, нищеты́ и́ноческия взыска́ние.

Ра́дуйся, я́ко ста́рцу твоему́ вся́кий по́мысл открыва́л еси́; ра́дуйся, я́ко вся́кую стра́сть мече́м разсужде́ния закла́л еси́.

Ра́дуйся, послуша́нием животво́рным во́лю свою́ умертви́вый; ра́дуйся, нечу́вствие я́ко ка́мень от се́рдца твоего́ отвали́вый.

Ра́дуйся, Анато́лие, зерца́ло моли́твы у́мныя.

Со смиренному́дрием сочета́л еси́ моли́твенное де́лание, о́тче му́дре, я́ко проти́в го́рдых де́монов бра́нь подъя́л еси́, в не́йже побе́ду зако́нную получи́л еси́. Сего́ ра́ди пе́сенныя тебе́ исплета́ются венцы́:

Ра́дуйся, моли́твы сто́лпе; ра́дуйся, смире́ния высото́.

Ра́дуйся, го́рдых де́монов попаля́яй; ра́дуйся, моли́твенным биче́м и́х погоня́яй.

Ра́дуйся, све́тлых А́нгелов у́мным созерца́нием привлека́яй; ра́дуйся, и́ноческия чи́ны серде́чным умиле́нием вдохновля́яй.

Ра́дуйся, Иису́сову моли́тву я́ко дыха́ние стяжа́л еси́; ра́дуйся, ве́тром Ду́ха Свята́го в при́стань безстра́стия дости́гл еси́.

Ра́дуйся, Анато́лие, зерца́ло моли́твы у́мныя.

Вво́инился еси́ в по́лк Ста́рцев О́птинских, о́тче Анато́лие, броня́ми благода́ти обложе́н и дара́ми многоразли́чными окруже́н Ду́ха Свята́го. Сего́ ра́ди спаса́еши от бе́д к тебе́ прибега́ющия и в благода́рности зову́щия:

Ра́дуйся, равностоя́телю отце́в О́птинских; ра́дуйся, единомы́сленниче святы́х Отце́в.

Ра́дуйся, церко́внаго Преда́ния непоколеби́мое утвержде́ние; ра́дуйся, цевни́це благозву́чная му́дрых изрече́ний.

Ра́дуйся, даро́в многоразли́чныя благода́ти сокро́вище; ра́дуйся, ско́рый пода́телю многообра́зныя по́мощи.

Ра́дуйся, я́ко унасле́довал еси́ Амвро́сиеву любо́вь богоподража́тельную; ра́дуйся, я́ко Мака́риево восприя́л еси́ богому́дрие.

Ра́дуйся, Анато́лие, зерца́ло моли́твы у́мныя.

Терпе́нием стяжа́л еси́ ду́шу твою́, по сло́ву Христа́ Го́спода, в у́мнем де́лании пребыва́я де́нь и но́щь, при́сно взыску́я Го́спода, и обре́л еси́ вхо́д в кле́ти серде́чней в Ца́рствие Бо́жие. Сего́ ра́ди песнопе́нии тя́ велича́ем славосло́вными:

Ра́дуйся, де́лателю моли́твы у́мно-серде́чныя; ра́дуйся, храни́телю сокро́вища богодарова́ннаго.

Ра́дуйся, ле́ствице А́нгельскаго восхожде́ния; ра́дуйся, мо́сте преходя́й страсте́й мо́ре.

Ра́дуйся, я́ко благода́ти причасти́лся еси́ та́мошняго блаже́нства; ра́дуйся, я́ко на земли́ живы́й граждани́ном бы́л еси́ бу́дущаго ве́ка.

Ра́дуйся, и́мже восхожде́ние в моли́тве обрета́ем; ра́дуйся, и́мже нераде́ние духо́вное побежда́ем.

Ра́дуйся, Анато́лие, зерца́ло моли́твы у́мныя.

О́птинский ста́рец Амвро́сий, я́ко ви́де тя́, о́тче Анато́лие, в во́зраст Христо́в прише́дша, граждани́на тя́ го́рняго Иерусали́ма наре́кл е́сть, еще́ на земли́ живу́щаго. Мы́ же соверше́нству твоему́ чудя́щеся, си́це тебе́ зове́м:

Ра́дуйся, земны́й небожи́телю; ра́дуйся, го́рняго Иерусали́ма служи́телю.

Ра́дуйся, мона́шествующих богому́дрый наста́вниче; ра́дуйся, моли́твенником духоно́сный учи́телю.

Ра́дуйся, непари́тельное пребыва́ние в моли́тве; ра́дуйся, созерца́тельное устрое́ние ума́.

Ра́дуйся, чи́стое зре́ние невече́рняго све́та; ра́дуйся, я́сное ви́дение сокрове́нных та́ин.

Ра́дуйся, Анато́лие, зерца́ло моли́твы у́мныя.

Свети́льник яви́лся еси́ богоза́рный, о́тче Анато́лие, световодя́й к невече́рнему дню́ ча́да твоя́, от но́щи неве́дения избавля́яй и от страсте́й изыма́яй, вопию́щих тебе́ сия́:

Ра́дуйся, свети́льник под спу́дом жите́йския толстоты́ не сокры́тый; ра́дуйся, гра́де на верху́ горы́ доброде́телей стоя́й сооруже́нный.

Ра́дуйся, на тве́рде у́мней незаходи́мое свети́ло; ра́дуйся, на высоте́ духо́вней разсужде́ния звездо́.

Ра́дуйся, сла́дким и́менем Иису́совым пита́яй ча́да твоя́; ра́дуйся, мече́м обоюдоо́стрым сло́ва Бо́жия посеца́яй враги́ твоя́.

Ра́дуйся, невестово́дец церко́вный ду́ш Бо́гу посвяще́нных; ра́дуйся, обру́чник мона́шеских чино́в Це́ркви – Неве́сте Христо́вой.

Ра́дуйся, Анато́лие, зерца́ло моли́твы у́мныя.

А́нгелов сослужа́щих тебе́ Боже́ственную литурги́ю сподо́бился еси́ име́ти, о́тче Анато́лие, егда́ с пра́ведным Иоа́нном па́стырем Кроншта́дтским сослужи́л еси́. Сего́ ра́ди ангелоподо́бному твоему́ житию́ чудя́щеся, ангелоле́пную тебе́ прино́сим хвалу́:

Ра́дуйся, Боже́ственныя ча́ши умиле́нный прича́стниче; ра́дуйся, Безкро́вныя же́ртвы тре́петный соверши́телю.

Ра́дуйся, не́бо отве́рзый моли́твами твои́ми; ра́дуйся, я́ко славосло́виши и ны́не с А́нгельскими чи́нми.

Ра́дуйся, А́нгелов я́ко диа́конов име́л еси́ тебе́ служа́щими; ра́дуйся, Ангелоре́вностному Иоа́нну приме́ром бы́в для подража́ния.

Ра́дуйся, я́ко тебе́ ра́ди та́йнам Христо́вым с тре́петом приобща́емся; ра́дуйся, я́ко тебе́ ра́ди на Литурги́ю я́ко к А́нгельскому служе́нию поспеша́ем.

Ра́дуйся, Анато́лие, зерца́ло моли́твы у́мныя.

Арома́тами моли́твы твоея́ богодарова́нныя при́сно увеселя́еши ча́д твои́х, о́тче богоно́сне, е́юже и посеща́еши и просвеща́еши и спаса́еши от бе́д и напа́стей многоразли́чных, вопию́щих тебе́ сицева́я:

Ра́дуйся, моли́твы боговдохнове́нная цевни́це; ра́дуйся, орга́не псалмопе́ния, дви́жимый Ду́хом Святы́м.

Ра́дуйся, чистоты́ серде́чныя стро́гое соблюде́ние; ра́дуйся, па́мяти о Бо́зе бы́строе воспламене́ние.

Ра́дуйся, от моли́твы де́ятельное рожде́ние любве́ явля́еши; ра́дуйся, от хране́ния ума́ духо́вный пло́д созерца́ния показу́еши.

Ра́дуйся, и́мже плене́ний ума́ свобожда́емся; ра́дуйся, и́мже непреста́нно моли́тися науча́емся.

Ра́дуйся, Анато́лие, зерца́ло моли́твы у́мныя.

Тве́рдь Церко́вную озари́л еси́ о́тче сия́нием моли́твы твоея́ и я́коже со́лнце богокра́сное прогна́л еси́ тьму́ бесо́вскую, луча́ми любве́ согрева́яй ча́да твоя́, де́монская попаля́яй по́лчища. Сего́ ра́ди во све́те дея́ний твои́х я́коже во дни́ ходя́ще си́це тебе́ вопие́м:

Ра́дуйся, солнцезра́чный пропове́дниче; ра́дуйся, моли́твы богосия́нный свети́льниче.

Ра́дуйся, теплото́ю любве́ согрева́яй ча́да твоя́; ра́дуйся, све́том смире́ния попаля́яй де́моны.

Ра́дуйся, во тьме́ неве́дения возсия́л еси́ я́ко разсужде́ния звездо́; ра́дуйся, се́рдце твое́ яви́ся я́ко не́бо невмести́мое.

Ра́дуйся, сы́не невече́рняго дне́; ра́дуйся, трисо́лнечнаго Божества́ таи́нниче.

Ра́дуйся, Анато́лие, зерца́ло моли́твы у́мныя.

Естество́ пону́дил еси́ труда́ми по́стническими и вышеесте́ственную све́тлость и ангелоподо́бную доброде́тель стяжа́л еси́, о́тче Анато́лие, ко Го́споду преста́вился еси́, по́честей вене́ц от Него́ прие́м. Сего́ ра́ди мы́, ча́да твоя́, слове́сный вене́ц похва́л тебе́ прино́сим:

Ра́дуйся, моли́твенная похвало́ о́птинскаго ста́рчества; ра́дуйся, созерца́тельная высото́ труднодостижи́мая А́нгелом.

Ра́дуйся, я́ко чистоту́ ума́ стяжа́л еси́ присносия́тельную; ра́дуйся, я́ко Тро́ичным Све́том озари́лся еси́ богозри́тельно.

Ра́дуйся, огнезра́чным Серафи́мом подо́бниче; ра́дуйся, шестокры́лым Херуви́мом слико́вниче.

Ра́дуйся, у́мныя моли́твы тихогла́сное произведе́ние; ра́дуйся, ея́же та́инственному сердцевраще́нию на́с науче́ние.

Ра́дуйся, Анато́лие, зерца́ло моли́твы у́мныя.

Мїрска́гѡ треволне́нїѧ и҆збѣжа́въ, прпⷣбне, бг҃ꙋ посщ҃е́нъ бы́въ ѿ роди́телей, ꙗ҆́коже самꙋи́лъ. Сегѡ̀ ра́ди ю҆́ношеское твоѐ бл҃гоче́стїе похвалѧ́юще, вопїе́мъ тѝ:

Ра́дꙋйсѧ, бл҃гочести́вое бг҃ꙋ приноше́нїе: ра́дꙋйсѧ, бг҃олюби́вымъ роди́телємъ твои́мъ похвале́нїе.

Ра́дꙋйсѧ, ѿ ю҆́ности твоеѧ̀ проти́вꙋ грѣха̀ подвиза́выйсѧ. Ра́дꙋйсѧ, въ зрѣ́лости твое́й вѣнце́мъ побѣ́ды вѣнча́выйсѧ.

Ра́дꙋйсѧ, моли́твами дѣ́тскими ᲂу҆краси́вый дꙋ́шꙋ твою̀. Ра́дꙋйсѧ, слеза́ми чи́стыми ѡ҆роси́вый лани̑ты твоѧ̑.

Ра́дꙋйсѧ, дѣ́вство соблю́лъ є҆сѝ, ꙗ҆́кѡ ѕѣ́ницꙋ ѻ҆́ка. Ра́дꙋйсѧ, мл҃твꙋ стѧжа́лъ є҆сѝ, ꙗ҆́кѡ херꙋві̑мскїѧ ѻ҆́чи.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

И҆́ноческимъ житїе́мъ вдохнови́выйсѧ, бг҃омꙋ́дре ѻ҆́тче, по́стничество, послꙋша́нїѧ, трꙋды̀ и҆ бдѣ́нїѧ стро́гѡ держа̀. Сегѡ̀ ра́ди ѡ҆кова́нный мꙋ́жествомъ сосꙋ́дъ дꙋшѝ твоеѧ̀ содѣ́лалъ є҆сѝ. Тѣ́мже прїимѝ похвалы̑ сїѧ̑:

Ра́дꙋйсѧ, послꙋ́шниче приле́жный. Ра́дꙋйсѧ, и҆́ноче бл҃гоговѣ́йный.

Ра́дꙋйсѧ, мона́шескагѡ чи́на ᲂу҆краше́нїе. Ра́дꙋйсѧ, а҆́гг҃льскомꙋ ликостоѧ́нїю соревнова́телю.

Ра́дꙋйсѧ, добродѣ́тельми ꙗ҆́кѡ ѕвѣзда́ми ᲂу҆ѧсни́лъ є҆сѝ житїѐ твоѐ. Ра́дꙋйсѧ, ꙗ҆́кѡ ѿ тмы̀ страсте́й ѡ҆чи́стилъ є҆сѝ дꙋ́шꙋ твою̀.

Ра́дꙋйсѧ, свѣ́тлаѧ во хрⷭ҇тѣ̀ со́вѣсте. Ра́дꙋйсѧ, чⷭ҇тое ѡ҆ бз҃ѣ се́рдце.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Смире́нїемъ ꙗ҆́кѡ покро́вомъ бж҃їимъ тѧ̀ ѡ҆хранѧ́ше бг҃омꙋ́дрый ста́рецъ мака́рїй и҆ проти́вꙋ похва́лъ ѡ҆бличе́ньми тѧ̀ наставлѧ́ше. Ты́ же ᲂу҆коре́нїѧ ѿ ста́рца ꙗ҆́кѡ во́дꙋ чисти́тельнꙋю прїима́лъ є҆сѝ. Сегѡ̀ ра́ди чⷭ҇тотѣ̀ дꙋшѝ твоеѧ̀ дивѧ́щесѧ, си́це тебѣ̀ вопїе́мъ:

Ра́дꙋйсѧ, бл҃годꙋ́шное ᲂу҆кори́зны терпѣ́нїе. Ра́дꙋйсѧ, доблемꙋ́дрое къ трꙋда́мъ понꙋжде́нїе.

Ра́дꙋйсѧ, ѿ мїрски́хъ похва́лъ ᲂу҆дале́нїе. Ра́дꙋйсѧ, нищеты̀ и҆́ноческїѧ взыска́нїе.

Ра́дꙋйсѧ, ꙗ҆́кѡ ста́рцꙋ твоемꙋ̀ всѧ́кїй по́мыслъ ѿкрыва́лъ є҆сѝ. Ра́дꙋйсѧ, ꙗ҆́кѡ всѧ́кꙋю стра́сть мече́мъ разсꙋжде́нїѧ закла́лъ є҆сѝ.

Ра́дꙋйсѧ, послꙋша́нїемъ животво́рнымъ во́лю свою̀ ᲂу҆мертви́вый. Ра́дꙋйсѧ, нечꙋ́вствїе ꙗ҆́кѡ ка́мень ѿ се́рдца твоегѡ̀ ѿвали́вый.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Со смиренномꙋ́дрїемъ сочета́лъ є҆сѝ мл҃твенное дѣ́ланїе, ѻ҆́тче мꙋ́дре, ꙗ҆́кѡ проти́въ го́рдыхъ де́монѡвъ бра́нь под̾ѧ́лъ є҆сѝ, въ не́йже побѣ́дꙋ зако́ннꙋю полꙋчи́лъ є҆сѝ. Сегѡ̀ ра́ди пѣ́сенныѧ тебѣ̀ и҆сплета́ютсѧ вѣнцы̀:

Ра́дꙋйсѧ, мл҃твы сто́лпе. Ра́дꙋйсѧ, смире́нїѧ высото̀.

Ра́дꙋйсѧ, го́рдыхъ де́монѡвъ попалѧ́ѧй. Ра́дꙋйсѧ, моли́твеннымъ биче́мъ и҆̀хъ погонѧ́ѧй.

Ра́дꙋйсѧ, свѣ́тлыхъ а҆́гг҃лѡвъ ᲂу҆́мнымъ созерца́нїемъ привлека́ѧй. Ра́дꙋйсѧ, и҆́ноческїѧ чи̑ны серде́чнымъ ᲂу҆миле́нїемъ вдохновлѧ́ѧй.

Ра́дꙋйсѧ, і҆и҃совꙋ мл҃твꙋ ꙗ҆́кѡ дыха́нїе стѧжа́лъ є҆сѝ. Ра́дꙋйсѧ, вѣ́тромъ дх҃а ст҃а́гѡ въ при́стань безстра́стїѧ дости́глъ є҆сѝ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Вво́инилсѧ є҆сѝ въ по́лкъ ста́рцєвъ ѻ҆́птинскихъ, ѻ҆́тче а҆нато́лїе, бронѧ́ми блгⷣти ѡ҆бложе́нъ и҆ дара́ми многоразли́чными ѡ҆крꙋже́нъ дх҃а ст҃а́гѡ. Сегѡ̀ ра́ди сп҃са́еши ѿ бѣ́дъ къ тебѣ̀ прибѣга́ющыѧ и҆ въ бл҃года́рности зовꙋ́щыѧ:

Ра́дꙋйсѧ, равностоѧ́телю ѻ҆тцє́въ ѻ҆́птинскихъ. Ра́дꙋйсѧ, є҆диномы́сленниче ст҃ы́хъ ѻ҆тцє́въ.

Ра́дꙋйсѧ, цр҃ко́внагѡ преда́нїѧ непоколеби́мое ᲂу҆твержде́нїе. Ра́дꙋйсѧ, цѣвни́це бл҃гозвꙋ́чнаѧ мꙋ́дрыхъ и҆зрече́нїй.

Ра́дꙋйсѧ, дарѡ́въ многоразли́чныѧ блгⷣти сокро́вище. Ра́дꙋйсѧ, ско́рый пода́телю многоѻбра́зныѧ по́мощи.

Ра́дꙋйсѧ, ꙗ҆́кѡ ᲂу҆наслѣ́довалъ є҆сѝ а҆мвро́сїевꙋ любо́вь бг҃оподража́тельнꙋю. Ра́дꙋйсѧ, ꙗ҆́кѡ мака́рїево воспрїѧ́лъ є҆сѝ бг҃омꙋ́дрїе.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Терпѣ́нїемъ стѧжа́лъ є҆сѝ дꙋ́шꙋ твою̀, по сло́вꙋ хрⷭ҇та̀ гдⷭ҇а, въ ᲂу҆́мнѣмъ дѣ́ланїи пребыва́ѧ де́нь и҆ но́щь, при́снѡ взыскꙋ́ѧ гдⷭ҇а, и҆ ѡ҆брѣ́лъ є҆сѝ вхо́дъ въ клѣ́ти серде́чнѣй въ црⷭ҇твїе бж҃їе. Сегѡ̀ ра́ди пѣснопѣ̑нїи тѧ̀ велича́емъ славосло́вными:

Ра́дꙋйсѧ, дѣ́лателю мл҃твы ᲂу҆мносерде́чныѧ. Ра́дꙋйсѧ, храни́телю сокро́вища бг҃одарова́ннагѡ.

Ра́дꙋйсѧ, лѣ́ствице а҆́гг҃льскагѡ восхожде́нїѧ. Ра́дꙋйсѧ, мо́сте преходѧ́й страсте́й мо́ре.

Ра́дꙋйсѧ, ꙗ҆́кѡ блгⷣти причасти́лсѧ є҆сѝ та́мошнѧгѡ бл҃же́нства. Ра́дꙋйсѧ, ꙗ҆́кѡ на землѝ живы́й граждани́номъ бы́лъ є҆сѝ бꙋ́дꙋщагѡ вѣ́ка.

Ра́дꙋйсѧ, и҆́мже восхожде́нїе въ мл҃твѣ ѡ҆брѣта́емъ. Ра́дꙋйсѧ, и҆́мже нерадѣ́нїе дꙋхо́вное побѣжда́емъ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Ѻ҆́птинскїй ста́рецъ а҆мвро́сїй, ꙗ҆́кѡ ви́дѣ тѧ̀, ѻ҆́тче а҆нато́лїе, въ во́зрастъ хрⷭ҇то́въ прише́дша, граждани́на тѧ̀ го́рнѧгѡ і҆ерⷭ҇ли́ма наре́клъ є҆́сть, є҆щѐ на землѝ живꙋ́щагѡ. Мы́ же соверше́нствꙋ твоемꙋ̀ чꙋдѧ́щесѧ, си́це тебѣ̀ зове́мъ:

Ра́дꙋйсѧ, земны́й нб҃ожи́телю. Ра́дꙋйсѧ, го́рнѧгѡ і҆ерⷭ҇ли́ма слꙋжи́телю.

Ра́дꙋйсѧ, мона́шествꙋющихъ бг҃омꙋ́дрый наста́вниче. Ра́дꙋйсѧ, моли́твенникѡмъ дх҃оно́сный ᲂу҆чи́телю.

Ра́дꙋйсѧ, непари́тельное пребыва́нїе въ мл҃твѣ. Ра́дꙋйсѧ, созерца́тельное ᲂу҆строе́нїе ᲂу҆ма̀.

Ра́дꙋйсѧ, чⷭ҇тое зрѣ́нїе невече́рнѧгѡ свѣ́та. Ра́дꙋйсѧ, ꙗ҆́сное ви́дѣнїе сокрове́нныхъ та́инъ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Свѣти́льникъ ꙗ҆ви́лсѧ є҆сѝ бг҃оза́рный, ѻ҆́тче а҆нато́лїе, свѣтоводѧ́й къ невече́рнемꙋ дню̀ ча̑да твоѧ̑, ѿ но́щи невѣ́дѣнїѧ и҆збавлѧ́ѧй и҆ ѿ страсте́й и҆зыма́ѧй, вопїю́щихъ тебѣ̀ сїѧ̑:

Ра́дꙋйсѧ, свѣти́льникъ под̾ спꙋ́домъ жите́йскїѧ толстоты̀ не сокры́тый. Ра́дꙋйсѧ, гра́де на верхꙋ̀ горы̀ добродѣ́телей стоѧ́й соѡрꙋже́нный.

Ра́дꙋйсѧ, на тве́рдѣ ᲂу҆́мнѣй незаходи́мое свѣти́ло. Ра́дꙋйсѧ, на высотѣ̀ дꙋхо́внѣй разсꙋжде́нїѧ ѕвѣздо̀.

Ра́дꙋйсѧ, сла́дкимъ и҆́менемъ і҆и҃совымъ пита́ѧй ча̑да твоѧ̑. Ра́дꙋйсѧ, мече́мъ ѻ҆боюдоѻ́стрымъ сло́ва бж҃їѧ посѣца́ѧй врагѝ твоѧ̑.

Ра́дꙋйсѧ, невѣстово́децъ цр҃ко́вный дꙋ́шъ бг҃ꙋ посвѧще́нныхъ. Ра́дꙋйсѧ, ѡ҆брꙋ́чникъ мона́шескихъ чинѡ́въ цр҃кви невѣ́стѣ хрⷭ҇то́вой.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

А҆́гг҃лѡвъ сослꙋжа́щихъ тебѣ̀ бжⷭ҇твеннꙋю лїтꙋргі́ю сподо́билсѧ є҆сѝ и҆мѣ́ти, ѻ҆́тче а҆нато́лїе, є҆гда̀ съ пра́веднымъ і҆ѡа́нномъ па́стыремъ кроншта́дтскимъ сослꙋжи́лъ є҆сѝ. Сегѡ̀ ра́ди а҆гг҃лоподо́бномꙋ твоемꙋ̀ житїю̀ чꙋдѧ́щесѧ, а҆гг҃лолѣ́пнꙋю тебѣ̀ прино́симъ хвалꙋ̀:

Ра́дꙋйсѧ, бжⷭ҇твенныѧ ча́ши ᲂу҆миле́нный прича́стниче. Ра́дꙋйсѧ, безкро́вныѧ же́ртвы тре́петный соверши́телю.

Ра́дꙋйсѧ, нб҃о ѿве́рзый мл҃твами твои́ми. Ра́дꙋйсѧ, ꙗ҆́кѡ славосло́виши и҆ ны́нѣ съ а҆́гг҃льскими чи́нми.

Ра́дꙋйсѧ, а҆́гг҃лѡвъ ꙗ҆́кѡ дїа́конѡвъ и҆мѣ́лъ є҆сѝ тебѣ̀ слꙋжа́щими. Ра́дꙋйсѧ, а҆гг҃лоре́вностномꙋ і҆ѡа́ннꙋ примѣ́ромъ бы́въ длѧ подража́нїѧ.

Ра́дꙋйсѧ, ꙗ҆́кѡ тебѐ ра́ди та́йнамъ хрⷭ҇то́вымъ съ тре́петомъ прїѡбща́емсѧ. Ра́дꙋйсѧ, ꙗ҆́кѡ тебѐ ра́ди на лїтꙋргі́ю ꙗ҆́кѡ къ а҆́гг҃льскомꙋ слꙋже́нїю поспѣша́емъ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

А҆рома́тами мл҃твы твоеѧ̀ бг҃одарова́нныѧ прⷭ҇нѡ ᲂу҆веселѧ́еши ча́дъ твои́хъ, ѻ҆́тче бг҃оно́сне, є҆́юже и҆ посѣща́еши и҆ просвѣща́еши и҆ сп҃са́еши ѿ бѣ́дъ и҆ напа́стей многоразли́чныхъ, вопїю́щихъ тебѣ̀ сицева̑ѧ:

Ра́дꙋйсѧ, мл҃твы бг҃овдохнове́ннаѧ цѣвни́це. Ра́дꙋйсѧ, ѻ҆рга́не ѱалмопѣ́нїѧ, дви́жимый дх҃омъ ст҃ы́мъ.

Ра́дꙋйсѧ, чⷭ҇тоты̀ серде́чныѧ стро́гое соблюде́нїе. Ра́дꙋйсѧ, па́мѧти ѡ҆ бз҃ѣ бы́строе воспламене́нїе.

Ра́дꙋйсѧ, ѿ мл҃твы дѣ́ѧтельное рожде́нїе любвѐ ꙗ҆влѧ́еши. Ра́дꙋйсѧ, ѿ хране́нїѧ ᲂу҆ма̀ дꙋхо́вный пло́дъ созерца́нїѧ показꙋ́еши.

Ра́дꙋйсѧ, и҆́мже плѣне́нїй ᲂу҆ма̀ свобожда́емсѧ. Ра́дꙋйсѧ, и҆́мже непреста́ннѡ моли́тисѧ наꙋча́емсѧ.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Тве́рдь цр҃ко́внꙋю ѡ҆зари́лъ є҆сѝ ѻ҆́тче сїѧ́нїемъ мл҃твы твоеѧ̀ и҆ ꙗ҆́коже со́лнце бг҃окра́сное прогна́лъ є҆сѝ тмꙋ̀ бѣсо́вскꙋю, лꙋча́ми любвѐ согрѣва́ѧй ча̑да твоѧ̑, дє́мѡнскаѧ попалѧ́ѧй пѡ́лчища. Сегѡ̀ ра́ди во свѣ́тѣ дѣѧ́нїй твои́хъ ꙗ҆́коже во днѝ ходѧ́ще си́це тебѣ̀ вопїе́мъ:

Ра́дꙋйсѧ, солнцезра́чный проповѣ́дниче. Ра́дꙋйсѧ, мл҃твы бг҃осїѧ́нный свѣти́льниче.

Ра́дꙋйсѧ, теплото́ю любвѐ согрѣва́ѧй ча̑да твоѧ̑. Ра́дꙋйсѧ, свѣ́томъ смире́нїѧ попалѧ́ѧй де́моны.

Ра́дꙋйсѧ, во тмѣ̀ невѣ́дѣнїѧ возсїѧ́лъ є҆сѝ ꙗ҆́кѡ разсꙋжде́нїѧ ѕвѣздо̀. Ра́дꙋйсѧ, се́рдце твоѐ ꙗ҆ви́сѧ ꙗ҆́кѡ нб҃о невмѣсти́мое.

Ра́дꙋйсѧ, сы́не невече́рнѧгѡ днѣ̀. Ра́дꙋйсѧ, трисо́лнечнагѡ бжⷭ҇тва̀ таи́нниче.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.

Є҆стество̀ понꙋ́дилъ є҆сѝ трꙋда́ми по́стническими и҆ вышеесте́ственнꙋю свѣ́тлость и҆ а҆гг҃лоподо́бнꙋю добродѣ́тель стѧжа́лъ є҆сѝ, ѻ҆́тче а҆нато́лїе, ко гдⷭ҇ꙋ преста́вилсѧ є҆сѝ, по́честей вѣне́цъ ѿ негѡ̀ прїе́мъ. Сегѡ̀ ра́ди мы̀, ча̑да твоѧ̑, слове́сный вѣне́цъ похва́лъ тебѣ̀ прино́симъ:

Ра́дꙋйсѧ, моли́твеннаѧ похвало̀ ѻ҆́птинскагѡ ста́рчества. Ра́дꙋйсѧ, созерца́тельнаѧ высото̀ трꙋднодостижи́маѧ а҆́гг҃лѡмъ.

Ра́дꙋйсѧ, ꙗ҆́кѡ чⷭ҇тотꙋ̀ ᲂу҆ма̀ стѧжа́лъ є҆сѝ присносїѧ́тельнꙋю. Ра́дꙋйсѧ, ꙗ҆́кѡ трⷪ҇чнымъ свѣ́томъ ѡ҆зари́лсѧ є҆сѝ бг҃озри́тельнѡ.

Ра́дꙋйсѧ, ѻ҆гнезра́чнымъ серафі́мѡмъ подо́бниче. Ра́дꙋйсѧ, шестокры́лымъ херꙋві́мѡмъ слико́вниче.

Ра́дꙋйсѧ, ᲂу҆́мныѧ мл҃твы тихогла́сное произведе́нїе. Ра́дꙋйсѧ, є҆ѧ́же та́инственномꙋ сердцевраще́нїю на́съ наꙋче́нїе.

Ра́дꙋйсѧ, а҆нато́лїе, зерца́ло мл҃твы ᲂу҆́мныѧ.