Канон святому священномученику Владимиру, митрополиту Киевскому

Прииди́те, ве́рнии, пе́сньми благоле́пными Влади́мира, пе́рваго новому́ченика, восхва́лим, то́й бо в со́нме Росси́йских святы́х всели́лся е́сть.

Кро́тостию и смире́нием, добро́тою и чистото́ю серде́чною укра́шен, николи́же иски́й свои́х си́, до́бре служе́ние твое́ соверши́л еси́, святи́телю.

Сме́рть не разлучи́ тя от любве́ Бо́жия, святи́телю, му́жественне бо претерпе́л еси́ сию́ ра́ди возлюби́вшаго тя́ Христа́.

Помяни́ на́с, свя́тче Бо́жий, и́мя твое́ в ско́рбех и печа́лех призыва́ющих и ча́ющих от тебе́ по́мощи во обстоя́ниих тя́жких, находя́щих на ны́.

О́браз неусы́пнаго стра́жа Це́ркве Христо́вы яви́л еси́ себе́, святи́телю, и небоя́зненно предста́л еси́ пред беззако́нными, сме́рти твоея́ иска́вшими.

Жестокосе́рдие, неразу́мие и грехо́вное ослепле́ние мучи́телей твои́х препобеди́л еси́, святи́телю, кро́тостию и смире́нием, та́же и к Бо́гу моли́твенным призыва́нием о проще́нии и́х.

Вои́стинну апо́стольский прее́мник бы́л еси́, святи́телю, егда́ в годи́ну тя́жких испыта́ний, му́жество и тве́рдую ве́ру яви́в, безбоя́зненно за Го́спода ду́шу свою́ пре́дал еси́.

Егда́ лю́тии уби́йцы, сме́рти преда́ти тя́ хотя́ще, вне́ святы́х вра́т ведо́ша тя́, воспева́л еси́, святи́телю: Госпо́дь мне́ прибе́жище и си́ла.

Пе́рвенствующий иера́рх Це́ркве Росси́йския бы́в, пе́рвый и нра́вом и дея́нием в по́двизе иера́ршаго служе́ния яви́лся еси́, пе́рвый же в годи́ну лихоле́тий му́ченически пострада́л еси́, святи́телю.

Ско́рби и разлуче́ние с па́ствою первопресто́льнаго гра́да му́жественне восприя́л еси́, святи́телю. Оба́че и но́вей па́стве твое́й Богоспаса́емаго гра́да Ки́ева сокро́вище и приобре́тение безце́нное яви́лся еси́.

Тезоимени́тому ти́ равноапо́столу в ре́вности по Бо́зе уподобля́яся, па́ству твою́ в правосла́вней ве́ре утвержда́л еси́, святи́телю, и я́ко но́вое кра́сное со́лнце на гора́х ки́евских возсия́л еси́.

Ру́сь свята́я, вода́ми Креще́ния омы́тая, све́том Христо́ва уче́ния равноапо́стольным кня́зем Влади́миром просвеще́нная и кро́вию страстоте́рпец и новому́ченика святи́теля Влади́мира ороше́нная, храни́ ве́ру Правосла́вную, в не́йже тебе́ утвержде́ние.

Жесто́кая глумле́ния, поруга́ния и сме́рть не возмого́ша отлучи́ти тя́ от любве́ Христо́вы, но́вый испове́дниче ки́евский и всеросси́йский за Христа́ му́чениче. Сего́ ра́ди мо́лим тя́: в тве́рдей ве́ре и на́с укрепи́, пра́зднующих любо́вию святу́ю па́мять твою́.

Мно́гими ра́нами уя́звленное честно́е те́ло твое́, кро́вию исте́кшее, я́ко свиде́тельство любве́ же́ртвенныя ко Христу́ яви́л еси́, святи́телю, и, бы́в ве́рен Ему́ да́же до сме́рти, вене́ц жи́зни от Него́ прия́л еси́.

Согреше́ния моя́ прости́, Го́споди, и в ми́ре ду́х мо́й приими́, та́же не вмени́ греха́ предаю́щим мя́ сме́рти, — сле́зно моли́лся еси́, священному́чениче достохва́льне.

Мно́гая беды́ и напа́сти беззако́ннии отсту́пницы воздвиго́ша на тя́, испове́дниче, оба́че в кро́тости и смире́нии чистоту́ ве́ры храни́те и в ло́не еди́ныя Правосла́вныя Росси́йския Це́ркве пребыва́ти ве́рныя призыва́л еси́.

Глумле́ния и поруга́ния, и́мже подверго́ша тя́ гони́телие твои́, не возмого́ша пону́дити тя́ в жесто́кия дни́ оста́вити возлю́бленную па́ству, сего́ ра́ди и яви́лся еси́ па́стырь до́брый, полага́яй ду́шу за о́вцы Христо́вы.

Ве́рныя непреста́нно науча́л еси́ пребыва́ти в сою́зе любве́, и́мже связу́еми бы́ша во Христе́ апо́столи, па́стырю до́брый. Сего́ ра́ди ны́не ти́ взыва́ем: и на́с соблюди́ моли́твами твои́ми в любви́ Христо́ве.

Стра́ха не иму́, гото́во се́рдце мое́, гото́во сме́рть прия́ти на вся́кое вре́мя Це́ркве ра́ди Христо́вы, да утверди́тся ве́ра правосла́вная во оте́честве на́шем, — ре́кл еси́ во дни́ испыта́ний твои́х, па́стырю му́жественнейший.

До́брый де́латель бы́в в вертогра́де Госпо́дни, святи́телю Христо́в, ду́шу твою́ положи́л еси́, во е́же це́ло и неврежде́нно соблюсти́ достоя́ние Его́. Сего́ ра́ди и досто́ин яви́лся еси́ услы́шати гла́с, зову́щий ти́: благи́й и ве́рный ра́бе, вни́ди в ра́дость Го́спода твоего́.

Пра́во пра́вил еси́ сло́во Боже́ственныя и́стины, те́мже и Ца́рствия Бо́жия сподо́бился еси́, святи́телю, в не́мже пребыва́я во сла́ве со все́ми святы́ми, не преста́й моли́тися Влады́це, да и мы́ насле́дники сего́ бу́дем.

Пра́вило ве́ры и благоче́стия яви́лся еси́, святи́телю. Сию́ бо ве́ру, любо́вию ко Христу́ и лю́дем споспешеству́ему, до́бре свиде́тельствовал еси́ пред враги́ твои́ми, та́же и благоче́стие, во е́же умре́ти тоя́ ра́ди любве́, изря́дно показа́л еси́.

У́м на́ш просвети́, святи́телю, моли́твами твои́ми к Бо́гу, да, пра́вый пу́ть избра́вше, Христа́ обря́щем и в черто́зех Его́ водвори́мся.

Стра́стию озлобле́ния обурева́емии, злочести́вии лю́дие сме́рти лю́тей преда́ша тя́, та́же телеси́ твоему́ глумля́хуся, и честно́му погребе́нию его́ претя́ху. Оба́че, не имя́ху вла́сти над душе́ю твое́ю, непобеди́мый страда́льче, оста́влени бы́ша тщи́ во зло́бе свое́й.

Прїиди́те, вѣ́рнїи, пѣ́сньми бл҃голѣ́пными влади́мїра, пе́рваго новомч҃нка, восхва́лимъ, то́й бо въ со́нмѣ рѡссі́йскихъ ст҃ы́хъ всели́лсѧ є҆́сть.

Кро́тостїю и҆ смире́нїемъ, добро́тою и҆ чистото́ю серде́чною ᲂу҆кра́шенъ, николи́же и҆скі́й свои́хъ сѝ, до́брѣ слꙋже́нїе твоѐ соверши́лъ є҆сѝ, ст҃и́телю.

Сме́рть не разлꙋчи́ тѧ ѿ любвѐ бж҃їѧ, ст҃и́телю, мꙋ́жественнѣ бо претерпѣ́лъ є҆сѝ сїю̀ ра́ди возлюби́вшагѡ тѧ̀ хрⷭ҇та̀.

Помѧнѝ на́съ, ст҃че бж҃їй, и҆́мѧ твоѐ въ ско́рбехъ и҆ печа́лехъ призыва́ющихъ и҆ ча́ющихъ ѿ тебѐ по́мощи во ѡ҆бстоѧ́нїихъ тѧ́жкихъ, находѧ́щихъ на ны̀.

Ѻ҆́бразъ неꙋсы́пнагѡ стра́жа цр҃кве хрⷭ҇то́вы ꙗ҆ви́лъ є҆сѝ себѣ̀, ст҃и́телю, и҆ небоѧ́зненнѡ предста́лъ є҆сѝ пред̾ беззако́нными, сме́рти твоеѧ̀ и҆ска́вшими.

Жестокосе́рдїе, неразꙋ́мїе и҆ грѣхо́вное ѡ҆слѣпле́нїе мꙋчи́телей твои́хъ препобѣди́лъ є҆сѝ, ст҃и́телю, кро́тостїю и҆ смире́нїемъ, та́же и҆ къ бг҃ꙋ моли́твеннымъ призыва́нїемъ ѡ҆ проще́нїи и҆́хъ.

Вои́стиннꙋ а҆пⷭ҇льскїй прее́мникъ бы́лъ є҆сѝ, ст҃и́телю, є҆гда̀ въ годи́нꙋ тѧ́жкихъ и҆спыта́нїй, мꙋ́жество и҆ тве́рдꙋю вѣ́рꙋ ꙗ҆ви́въ, безбоѧ́зненнѡ за гдⷭ҇а дꙋ́шꙋ свою̀ пре́далъ є҆сѝ.

Є҆гда̀ лю́тїи ᲂу҆бі̑йцы, сме́рти преда́ти тѧ̀ хотѧ́ще, внѣ̀ ст҃ы́хъ вра́тъ ведо́ша тѧ̀, воспѣва́лъ є҆сѝ, ст҃и́телю: госпо́дь мнѣ̀ прибѣ́жище и҆ си́ла.

Пе́рвенствꙋющїй і҆ера́рхъ цр҃кве рѡссі́йскїѧ бы́въ, пе́рвый и҆ нра́вомъ и҆ дѣѧ́нїемъ въ по́двизѣ і҆ера́ршагѡ слꙋже́нїѧ ꙗ҆ви́лсѧ є҆сѝ, пе́рвый же въ годи́нꙋ лихолѣ́тїй мч҃нчески пострада́лъ є҆сѝ, ст҃и́телю.

Скѡ́рби и҆ разлꙋче́нїе съ па́ствою первопресто́льнагѡ гра́да мꙋ́жественнѣ воспрїѧ́лъ є҆сѝ, ст҃и́телю. ѻ҆ба́че и҆ но́вѣй па́ствѣ твое́й бг҃осп҃са́емагѡ гра́да кі́ева сокро́вище и҆ прїѡбрѣ́тенїе безцѣ́нное ꙗ҆ви́лсѧ є҆сѝ.

Тезоимени́томꙋ тѝ равноапⷭ҇толꙋ въ ре́вности по бз҃ѣ ᲂу҆подоблѧ́ѧсѧ, па́ствꙋ твою̀ въ правосла́внѣй вѣ́рѣ ᲂу҆твержда́лъ є҆сѝ, ст҃и́телю, и҆ ꙗ҆́кѡ но́вое кра́сное со́лнце на гора́хъ кі́евскихъ возсїѧ́лъ є҆сѝ.

Рꙋ́сь ст҃а́ѧ, вода́ми креще́нїѧ ѡ҆мы́таѧ, свѣ́томъ хрⷭ҇то́ва ᲂу҆че́нїѧ равноапⷭ҇льнымъ кнѧ́земъ влади́мїромъ просвѣще́ннаѧ и҆ кро́вїю стрⷭ҇тоте́рпєцъ и҆ новомч҃нка ст҃и́телѧ влади́мїра ѡ҆роше́ннаѧ, хранѝ вѣ́рꙋ правосла́внꙋю, въ не́йже тебѣ̀ ᲂу҆твержде́нїе.

Жестѡ́каѧ глꙋмлє́нїѧ, порꙋга́нїѧ и҆ сме́рть не возмого́ша ѿлꙋчи́ти тѧ̀ ѿ любвѐ хрⷭ҇то́вы, но́вый и҆сповѣ́дниче кі́евскїй и҆ всерѡссі́йскїй за хрⷭ҇та̀ мч҃нче. сегѡ̀ ра́ди мо́лимъ тѧ̀: въ тве́рдѣй вѣ́рѣ и҆ на́съ ᲂу҆крѣпѝ, пра́зднꙋющихъ любо́вїю ст҃ꙋ́ю па́мѧть твою̀.

Мно́гими ра́нами ᲂу҆ѧ́звленное честно́е тѣ́ло твоѐ, кро́вїю и҆сте́кшее, ꙗ҆́кѡ свидѣ́тельство любвѐ же́ртвенныѧ ко хрⷭ҇тꙋ̀ ꙗ҆ви́лъ є҆сѝ, ст҃и́телю, и҆, бы́въ вѣ́ренъ є҆мꙋ̀ да́же до сме́рти, вѣне́цъ жи́зни ѿ негѡ̀ прїѧ́лъ є҆сѝ.

Согрѣшє́нїѧ моѧ̀ простѝ, гдⷭ҇и, и҆ въ мі́рѣ дꙋ́хъ мо́й прїимѝ, та́же не вмѣнѝ грѣха̀ предаю́щымъ мѧ̀ сме́рти, сле́знѡ моли́лсѧ є҆сѝ, сщ҃енномч҃нче достохва́льне.

Мнѡ́гаѧ бѣды̀ и҆ напа́сти беззако́ннїи ѿстꙋ̑пницы воздвиго́ша на тѧ̀, и҆сповѣ́дниче, ѻ҆ба́че въ кро́тости и҆ смире́нїи чистотꙋ̀ вѣ́ры храни́те и҆ въ ло́нѣ є҆ди́ныѧ правосла́вныѧ рѡссі́йскїѧ цр҃кве пребыва́ти вѣ̑рныѧ призыва́лъ є҆сѝ.

Глꙋмлє́нїѧ и҆ порꙋга̑нїѧ, и҆́мже подверго́ша тѧ̀ гони́телїе твоѝ, не возмого́ша понꙋ́дити тѧ̀ въ жестѡ́кїѧ дни̑ ѡ҆ста́вити возлю́бленнꙋю па́ствꙋ, сегѡ̀ ра́ди и҆ ꙗ҆ви́лсѧ є҆сѝ па́стырь до́брый, полага́ѧй дꙋ́шꙋ за ѻ҆́вцы хрⷭ҇то́вы.

Вѣ̑рныѧ непреста́нно наꙋча́лъ є҆сѝ пребыва́ти въ сою́зѣ любвѐ, и҆́мже свѧзꙋ́еми бы́ша во хрⷭ҇тѐ а҆пⷭ҇ли, па́стырю до́брый. сегѡ̀ ра́ди ны́нѣ тѝ взыва́емъ: и҆ на́съ соблюдѝ моли́твами твои́ми въ любвѝ хрⷭ҇то́вѣ.

Стра́ха не и҆мꙋ̀, гото́во се́рдце моѐ, гото́во сме́рть прїѧ́ти на всѧ́кое вре́мѧ цр҃кве ра́ди хрⷭ҇то́вы, да ᲂу҆тверди́тсѧ вѣ́ра правосла́внаѧ во ѻ҆те́чествѣ на́шемъ, ре́клъ є҆сѝ во дни̑ и҆спыта́нїй твои́хъ, па́стырю мꙋ́жественнѣйшїй.

До́брый дѣ́латель бы́въ въ вертогра́дѣ гдⷭ҇ни, ст҃и́телю хрⷭ҇то́въ, дꙋ́шꙋ твою̀ положи́лъ є҆сѝ, во є҆́же цѣ́ло и҆ неврежде́нно соблюстѝ достоѧ́нїе є҆гѡ̀. сегѡ̀ ра́ди и҆ досто́инъ ꙗ҆ви́лсѧ є҆сѝ ᲂу҆слы́шати гла́съ, зовꙋ́щїй тѝ: бл҃гі́й и҆ вѣ́рный ра́бе, вни́ди въ ра́дость гдⷭ҇а твоегѡ̀.

Пра́вѡ пра́вилъ є҆сѝ сло́во бжⷭ҇твенныѧ и҆́стины, тѣ́мже и҆ црⷭ҇твїѧ бж҃їѧ сподо́билсѧ є҆сѝ, ст҃и́телю, въ не́мже пребыва́ѧ во сла́вѣ со всѣ́ми ст҃ы́ми, не преста́й моли́тисѧ влⷣцѣ, да и҆ мы̀ наслѣ́дники сегѡ̀ бꙋ́демъ.

Пра́вило вѣ́ры и҆ бл҃гоче́стїѧ ꙗ҆ви́лсѧ є҆сѝ, ст҃и́телю. сїю̀ бо вѣ́рꙋ, любо́вїю ко хрⷭ҇тꙋ̀ и҆ лю́демъ споспѣшествꙋ́емꙋ, до́брѣ свидѣ́тельствовалъ є҆сѝ пред̾ врагѝ твои́ми, та́же и҆ бл҃гоче́стїе, во є҆́же ᲂу҆мре́ти тоѧ̀ ра́ди любвѐ, и҆зрѧ́днѡ показа́лъ є҆сѝ.

Оу҆́мъ на́шъ просвѣтѝ, ст҃и́телю, моли́твами твои́ми къ бг҃ꙋ, да, пра́вый пꙋ́ть и҆збра́вше, хрⷭ҇та̀ ѡ҆брѧ́щемъ и҆ въ черто́зѣхъ є҆гѡ̀ водвори́мсѧ.

Стрⷭ҇тїю ѡ҆ѕлобле́нїѧ ѡ҆бꙋрева́емїи, ѕлочести́вїи лю́дїе сме́рти лю́тѣй преда́ша тѧ̀, та́же тѣлесѝ твоемꙋ̀ глꙋмлѧ́хꙋсѧ, и҆ честно́мꙋ погребе́нїю є҆гѡ̀ претѧ́хꙋ. ѻ҆ба́че, не и҆мѧ́хꙋ вла́сти над̾ дꙋше́ю твое́ю, непобѣди́мый страда́льче, ѡ҆ста́влени бы́ша тщѝ во ѕло́бѣ свое́й.