Кондак 1
Избра́нный святи́телю Госпо́день, испове́дниче и му́чениче Христо́в, ве́рою и любо́вию до конца́ Влады́це твоему́ послужи́вый, по́двиги мно́ги соверши́вый, страда́ния ве́лия за Христа́ му́жественне претерпе́вый, ли́ку Небе́сному страстоте́рпцев Це́ркве Ру́сския благоче́стно причте́нный, заступа́й на́с моли́твами твои́ми, досточу́дне, да велегла́сно вопие́м ти́:
Ра́дуйся, священному́чениче Пе́тре, ве́ры правосла́вныя утвержде́ние.
Икос 1
А́нгельски от ми́ра мяте́жнаго к высоте́ Небе́сней умо́м и се́рдцем восходи́л еси́, священному́чениче Пе́тре, херуви́мски созерца́я бе́здну милосе́рдия Бо́жия, серафи́мскою любо́вию пыла́я ко своему́ Созда́телю, прославля́л еси́ Того́ глаго́лы вдохнове́нными. Те́мже и от на́с приими́ благода́рныя любве́ воздая́ния, да ра́достным се́рдцем и умиле́нною душе́ю воспева́ем ти́:
Ра́дуйся, пла́менем любве́ Боже́ственныя от ю́ности возжже́нный; ра́дуйся, мно́гими доброде́тельми от мла́дости украше́нный.
Ра́дуйся, о́трасле до́брая ко́рене благочести́ваго; ра́дуйся, сы́не сла́вный Оте́чества многотерпели́ваго.
Ра́дуйся, любо́вию Христо́вою неотсту́пно назира́емый; ра́дуйся, во благонра́вии то́ю му́дре соблюда́емый.
Ра́дуйся, во́лею Госпо́днею на пу́ть свяще́ннаго служе́ния наста́вленный; ра́дуйся, десни́цею Вы́шняго в Ца́рствие Небе́сное упра́вленный.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 2
Ви́дя Госпо́дь ве́лию ве́ру и усе́рдие твое́ к Нему́, я́ко измла́да прилежа́л еси́ Боже́ственней слу́жбе и вся́кому благоче́стию, о́бразом а́нгельским и са́ном свяще́нным почти́ тя, и на служе́ние Свое́ поста́ви. Ты́ же по́двиг се́й до́блественне соверша́л еси́, вы́ну воспева́я Благода́телю Бо́гу: Аллилу́иа.
Икос 2
Ра́зумом богопросвеще́нным в позна́нии и́стины преуспева́л еси́, достоблаже́нне Пе́тре, му́дростию духо́вною обогаща́яся, кре́пости Боже́ственныя исполня́яся, доброде́тели ева́нгельския невозвра́тно души́ свое́й усвоя́я. Те́мже мы́, покланя́ющеся Милосе́рдому Бо́гу, такова́ ди́вна сокро́вища тебе́ дарова́вшему, во умиле́нии глаго́лем ти́:
Ра́дуйся, благода́тию Бо́жиею освяще́нный; ра́дуйся, прему́дрости И́м всеще́дро науче́нный.
Ра́дуйся, ра́зум свя́т смире́нием стяжа́вый; ра́дуйся, да́нныя ти́ Го́сподем тала́нты стокра́тно умножа́вый.
Ра́дуйся, ко а́нгельскому чи́ну от ю́ности причте́нный; ра́дуйся, и́менем апо́стола Петра́ во и́ночестве нарече́нный.
Ра́дуйся, подвиго́м о́наго о Го́споде поревнова́вый; ра́дуйся, ско́рбный и сла́достный пу́ть страда́ний о Христе́ избра́вый.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 3
Си́ле духо́вней, в тебе́ су́щей, диви́шася лю́дие, па́стыря до́браго и милосе́рдаго уте́шителя ду́ш скорбя́щих тя́ обре́тше; любо́вию бо твое́ю согрева́еми, к тебе́ со благодаре́нием притека́ху, ра́достию воспева́юще Бо́гу: Аллилу́иа.
Икос 3
Име́я се́рдце, ве́лия ве́ры ко Го́споду испо́лненное и слове́с Боже́ственных трепе́щущее, досто́ин яви́лся еси́, о́тче Пе́тре, са́на архиере́йскаго, во́ньже и возведе́ тя Сердцеве́дец Бо́г, вла́стию и благода́тию святи́тельскою облека́я тя́. Те́мже прославля́юще я́же от Бо́га доброде́тели и дарова́ния твоя́, пое́м ти́ такова́я:
Ра́дуйся, зо́ву Боже́ственнаго Учи́теля ра́достне повинова́выйся; ра́дуйся, о сла́ве Его́ Небе́сней ду́хом возгора́выйся.
Ра́дуйся, ко служе́нию святи́тельскому ду́шу свою́ угото́вивый; ра́дуйся, апо́столу первоверхо́вному ре́вностию по Бо́зе себе́ уподо́бивый.
Ра́дуйся, сла́дость слове́с Госпо́дних в се́рдце всегда́ храни́вый; ра́дуйся, и́гу благо́му Христо́ву вы́ю свою́ подклони́вый.
Ра́дуйся, благода́ть архипа́стырскую от руку́ первосвяти́теля Ти́хона прие́мый; ра́дуйся, я́коже и то́й, по́двиг испове́дничества и му́ченичества подъе́мый.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 4
Бу́ря беззако́ний поколеба́ держа́ву Росси́йскую в годи́ну испыта́ний лю́тых, за грехи́ от Бо́га попуще́нных; я́рость и уны́ние, ско́рбь и рыда́ние испо́лниша многострада́льное Оте́чество на́ше. Тобо́ю же, святи́телю, и тебе́ единонра́вными Це́рковь Ру́сская несокруши́ма от вра́т а́довых сохрани́ся. Лю́дие же, ви́дяще непоколеби́му ве́ру твою́, и свети́льник доброде́телей твои́х при́сно горя́щ, воспева́ху Бо́гу: Аллилу́иа.
Икос 4
Слы́шав гла́с Бо́жий в се́рдцы твое́м, ко испове́данию и́стины и попече́нию о па́стве Христо́вой призыва́ющий, слуга́ Госпо́день ве́рен и безстра́шен яви́лся еси́; гоне́ний и преще́ний вра́жиих не убоя́вся, служе́ние святи́тельское и па́стырское до конца́ дне́й ре́вностно соверша́л еси́, достоблаже́нне Пе́тре. Те́мже, дивя́щеся вели́чию души́ твоея́, во умиле́нии глаго́лем ти́:
Ра́дуйся, о́гненный сто́лпе, во мра́це безбо́жия све́тло сия́яй; ра́дуйся, ка́меню ве́ры Христо́вы, лю́ди во благоче́стии утвержда́яй.
Ра́дуйся, от разделе́ния и расхище́ния па́ству свою́ храни́вый; ра́дуйся, во́лны мяте́жа церко́внаго си́лою Бо́жиею укроти́вый.
Ра́дуйся, к слу́жбе Боже́ственней ве́лию ре́вность име́вый; ра́дуйся, ни еди́но от слове́с Госпо́дних презре́вый.
Ра́дуйся, уста́ва церко́внаго стро́гий блюсти́телю; ра́дуйся, Бо́жиих де́л ми́лостивый соверши́телю.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 5
Богоизбра́нный во́ине Христо́в, священному́чениче Пе́тре, ору́жием ве́ры и о́гненным мече́м слове́с Боже́ственных посека́л еси́ вся́кое нече́стие, разруша́л еси́ ко́зни вра́жия, еди́нство церко́вное от наве́тов сохраня́я. Бо́гу же, споспешеству́ющу ти́ и на по́двиг вдохновля́ющу, воспева́л еси́ вы́ну: Аллилу́иа.
Икос 5
Ви́девше врази́ ро́да христиа́нскаго тя́ и́стинна побо́рника ве́ры оте́ц на́ших и Це́ркве Правосла́вныя защи́тителя, скорбьми́ и па́костьми лю́те уязвля́ху тя́, погуби́ти тща́щеся. Ты́ же, я́ко святы́й Па́вел, и во у́зах сы́й, благовествова́ния о Христе́ ника́коже оста́вил еси́, ду́ши во спасе́ние уловля́я. Сего́ ра́ди песносло́вим ве́лия труды́ твоя́, любо́вию Христо́вою соверша́емыя, и прино́сим ти́ хвале́ния сицева́я:
Ра́дуйся, мно́ги ско́рби, заточе́ние и изгна́ние претерпе́вый; ра́дуйся, жи́зни вре́менныя сла́дость пра́вды ра́ди Бо́жия презре́вый.
Ра́дуйся, и́стинную ра́дость во страда́ниих о Го́споде обрета́вый; ра́дуйся, си́ми страда́нии в по́двизе любве́ Христо́вы возраста́вый.
Ра́дуйся, во у́зах стра́ждущим отра́да и утеше́ние бы́вый; ра́дуйся, о́браз терпе́ния и себе́ отверже́ния до́блественне яви́вый.
Ра́дуйся, сокро́вища се́рдца твоего́ лю́дем ще́дро откры́вый; ра́дуйся, си́лою любве́ твоея́ мно́ги отпа́дшия ко Христу́ обрати́вый.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 6
Пропове́дует Це́рковь Ру́сская вели́чие доброде́телей и подвиго́в твои́х, святи́телю о́тче Пе́тре. Неуста́нною бо моли́твою и ре́вностию о слу́жбе Бо́жией, и о́бщаго усе́рднаго моле́ния устрое́нием, утеша́л еси́ ве́рныя в годи́ну безбо́жную. Те́мже и мы́ да́ры любве́ своея́ благода́рне тебе́ прино́сим, Бо́гу же, дарова́вшему на́м па́стыря преди́внаго, пое́м: Аллилу́иа.
Икос 6
Возсия́ земли́ Ру́сстей сла́ва по́двига му́ченическаго и святи́тельскаго твоего́, и́стинный служи́телю Христо́в, свяще́нне Пе́тре: иде́же бо а́ще тружда́лся еси́ на ни́ве церко́вней, всю́ду чу́дная дела́ соверша́л еси́, в ча́дех духо́вных до́брую па́мять о тебе́ и серде́чную любо́вь оставля́я. Сего́ ра́ди, благодаря́ще о тебе́ Бо́га, со умиле́нием глаго́лем ти́:
Ра́дуйся, пра́вило ве́ры и благоче́стия о́бразе всесоверше́нный; ра́дуйся, пла́меню, благода́тию Боже́ственнаго Ду́ха возжже́нный.
Ра́дуйся, в зе́млю Нижегоро́дскую на служе́ние апо́стольское призва́нный; ра́дуйся, в кра́и Тверсте́м гони́тельми от па́ствы твоея́ отлуче́нный.
Ра́дуйся, ре́вности святи́теля Воро́нежскаго Митрофа́на подража́телю; ра́дуйся, благове́стия Задо́нскаго чудотво́рца Ти́хона продолжа́телю.
Ра́дуйся, смире́ния святи́теля Анто́ния приле́жный после́дователю; ра́дуйся, Це́ркве Воро́нежския до́брый благоустрои́телю.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 7
Хотя́ сохрани́ти Це́рковь Ру́сскую от раско́ла и ересе́й, и изба́вити от отча́яния лю́ди, в заблужде́ния поги́бельная и озлобле́ние впа́дшия, труды́ ве́лия поне́сл еси́, прему́дре Пе́тре, непреста́нно де́лы и словесы́ Христа́ пропове́дуя, в преде́лех Тверски́х, Нижегоро́дских и Воро́нежских. Сего́ ра́ди мно́зи неве́рнии, слы́шавше тя́, к Бо́гу и́стинному обрати́шася и воспе́ша Ему́ ра́достию: Аллилу́иа.
Икос 7
Но́ваго тя́ испове́дника и му́ченика Христо́ва яви́ ми́ру многострада́льная Це́рковь Ру́сская, ра́нами безчи́сленными изъя́звленная, кро́вию му́ченическою оби́льно напое́нная, сла́вою мно́жества святы́х свои́х увенча́нная. Те́мже и мы́, почита́юще тя́ я́ко еди́наго от си́х досто́йнейших и сла́внейших сыно́в Росси́йских, пе́ние хвале́бное прино́сим ти́:
Ра́дуйся, святи́телю, Христа́ безстра́шно испове́давый; ра́дуйся, стра́ха челове́ческа и боя́зни от убива́ющих те́ло не ве́давый.
Ра́дуйся, па́стырю, ду́шу за о́вцы твоя́ полага́вый; ра́дуйся, нае́мником лука́вым па́ствы твоея́ расхи́тити не да́вый.
Ра́дуйся, святы́ню Це́ркве Правосла́вныя ре́вностно храни́вый; ра́дуйся, враго́в ея́ те́м в тре́пет приводи́вый.
Ра́дуйся, к кончи́не жития́ твоего́ му́ченичестей всеце́ло угото́вивыйся; ра́дуйся, во смире́нии, ми́ре и кро́тости прия́ти ту́ сподо́бивыйся.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 8
Стра́нен на земли́ пребы́л еси́, священнострада́льче, не имы́й приста́нища во оте́чествии твое́м, от вра́г Христо́вых, не терпя́щих свя́тости твоея́, гони́мый и поноша́емый, оба́че не убоя́лся еси́ противуста́ти власте́м безбо́жным, дея́ньми лжепа́стырей Це́рковь Святу́ю разори́ти тща́щимся. Сего́ ра́ди словесы́ богому́дрыми мно́гия мирски́я и пресви́теры, в раско́лы отпа́дшия, ко Христу́ обрати́л еси́ и чрез покая́ние и́стинное в ло́но церко́вное возврати́л еси́, да и ти́и сла́вят еди́наго и́стиннаго Бо́га, се́рдцем и усты́ пою́ще Небе́сную пе́снь: Аллилу́иа.
Икос 8
Всего́ себе́ во́ли Госпо́дни преда́в, страда́ния Его́ ра́ди за че́сть почита́л еси́, досточу́дне. Те́мже в темни́цах заточе́ние и во ото́ки Солове́цкия, ме́стом муче́ний безбо́жники соде́ланныя, преселе́ние я́ко от десни́цы Бо́жия восприя́л еси́. Мы́ же, чту́ще му́жество и долготерпе́ние твое́, хвале́ния прино́сим ти́ такова́я:
Ра́дуйся, во святы́я ото́ки Солове́цкия на страда́ния и рабо́ты тя́жкия изгна́нный; ра́дуйся, та́мо стра́ждущим во утеше́ние и утвержде́ние в Бо́зе дарова́нный.
Ра́дуйся, ко мно́жеству архиере́ев и свяще́нник, та́мо заключе́нных, причте́нный; ра́дуйся, священному́чениче чу́дный и страстоте́рпче соверше́нный.
Ра́дуйся, и во у́зах досто́йный о́браз архипа́стыря храни́вый; ра́дуйся, си́лою духо́вною и мучи́телей безбо́жных покори́вый.
Ра́дуйся, боже́ственную тишину́ и ми́р глубо́к в души́ име́вый; ра́дуйся, страда́ния кре́стная, от Го́спода по́сланная, любо́вию претерпе́вый.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 9
Вся́кое А́нгельское естество́ удиви́ся чу́дным подвиго́м твои́м, богоблаже́нне, ты́ бо я́ко еди́н от ору́жник Небе́сных, до́блественне во́инствовал еси́ на ду́хи зло́бы за Влады́ку твоего́ Христа́, воспева́я Тому́ с ли́ки безпло́тных: Аллилу́иа.
Икос 9
Вети́и суему́дреннии не мо́гут разуме́ти высоты́ доброде́телей твои́х и глубины́ боже́ственныя твоея́ любве́: тоя́ бо ра́ди мно́гая страда́ния благоду́шно претерпе́л еси́, во е́же от Го́спода ти́ неразлуче́ну бы́ти. Сию́ же и на вся́каго челове́ка излива́л еси́, «Вся́ люблю́ и о все́х скорблю́», глаго́ля. Мы́ же, чту́щии свя́тость души́ твоея́ и си́лу духо́вную, Бо́гом ти́ дарова́нную, во умиле́нии глаго́лем:
Ра́дуйся, томле́ния и труды́ тя́жкия в заточе́нии терпе́вый; ра́дуйся, о оскверне́нии земли́ Ру́сския и Солове́цкия оби́тели скорбе́вый.
Ра́дуйся, утеше́ние души́ в моли́тве обрета́вый; ра́дуйся, Боже́ственную слу́жбу со свяще́нными соу́зники твои́ми неотсту́пно соверша́вый.
Ра́дуйся, за всю́ страну́ Росси́йскую благоприя́тну же́ртву Бо́гу приноси́вый; ра́дуйся, о покая́нии ея́ в серде́чнем сокруше́нии Го́спода моли́вый.
Ра́дуйся, служи́телю Христо́вы Це́ркве и моли́твенниче самоотве́рженный; ра́дуйся, я́ко архиепи́скоп Солове́цкий соу́зники твои́ми нарече́нный.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 10
Спасти́ хотя́ ду́шу твою́, богому́дре, смире́ние кре́стное вку́пе со ины́ми доброде́тельми Го́споду прине́сл еси́, уничижа́ющим и гоня́щим тя́ николи́же противля́яся; приста́нище после́днее земна́го жития́ твоего́ во ото́це А́нзерстем обре́л еси́, а́може приведе́ тя Человеколю́бец Бо́г, на высоту́ кра́йнюю по́двига му́ченическаго возводя́. Ты́ же благопоко́рне восприя́л еси́ о́ный, любо́вию воспева́я Го́сподеви: Аллилу́иа.
Икос 10
Сте́ну необори́му име́л еси́ благода́ть Госпо́дню, благи́й о́тче, защища́ющу тя́ от вра́г неви́димых, не могу́щих души́ твоея́ погуби́ти; досто́ин бо тоя́ благода́ти яви́лся еси́ богоуго́дными труды́ твои́ми и умиле́нными моли́твами, и́миже умно́жил еси́ сла́ву сего́ ди́внаго ото́ка. Сего́ ра́ди покланя́ющеся Всеми́лостивому Бо́гу, воспева́ем тя́, еди́наго от избра́нных Его́, хвале́нии таковы́ми:
Ра́дуйся, в безмо́лвии ото́ка А́нзерскаго а́ки пусты́нник пожи́вый; ра́дуйся, святы́ню му́ченичества твоего́ к сокро́вищем богоизбра́ннаго ото́ка приложи́вый.
Ра́дуйся, в ме́сте подвиго́в пустыннолю́бнаго Елеаза́ра и любобезмо́лвнаго И́ова пребыва́вый; ра́дуйся, к та́йнам сокрове́нным и́х а́нгельскаго жи́тельства ду́хом приника́вый.
Ра́дуйся, преподо́бному Ге́рману, первонача́льнику Солове́цкому, незри́мо бесе́довати сподо́бивыйся; ра́дуйся, вы́шним изволе́нием стихосло́вие ака́фистное соста́вити тому́ удосто́ивыйся.
Ра́дуйся, к по́мощи святы́х сея́ сла́вныя земли́ во страда́ниих твои́х прибега́вый; ра́дуйся, святу́ю па́мять твою́ со ото́ки Солове́цкими наве́ки связа́вый.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 11
Пе́ние всеумиле́нное благода́рною душе́ю возно́сим ти́, всесвяты́й Влады́ко, Архиере́ю Небе́сный, я́ко дарова́л еси́ на́м сего́ ди́внаго па́стыря, свята́го Петра́, на утеше́ние и спасе́ние душа́м на́шим и укрепле́ние в ве́ре Христо́вой люде́й ру́сских. Того́ по́двиги песносло́вяще, тебе́ Бо́гу на́шему сла́ву возсыла́ем пе́нием хвале́бным: Аллилу́иа.
Икос 11
Светоно́сен свети́льник во тьме́ безу́мия и мра́це беззако́ния горя́й, вся́ озаря́л еси́ сия́нием Боже́ственныя благода́ти, просвеща́я ду́ши све́том и́стиннаго ра́зума. И до ото́ков се́верных дости́же све́т боголюби́выя души́ твоея́, да́же до безмо́лвныя А́нзерския пу́стыни, иде́же ты́ во святе́й горе́ Голго́фе, по́двиги и́ноческими просла́вленней, му́ченически сконча́л еси́ многотру́дное житие́ твое́. Сего́ ра́ди воспева́ем долготерпе́ние твое́, о́тче пра́ведне, и любо́вию умиле́нно взыва́ем:
Ра́дуйся, в после́дния дни́ жития́ твоего́, лю́те неду́гуя, сла́дость вы́шняго ми́ра па́че позна́вый; ра́дуйся, все́м се́рдцем твои́м возлюби́вый Христа́, и вся́ до конца́ за Того́ претерпе́вый.
Ра́дуйся, на горе́ Голго́фе А́нзерстей в ру́це Бо́жии ду́шу преда́вый; ра́дуйся, му́ченичеством свои́м в свяще́ннем селе́нии се́м просия́вый.
Ра́дуйся, безпреткнове́нно во оби́тели го́рния душе́ю возлете́вый; ра́дуйся, чу́дным житие́м твои́м и кончи́ною пра́ведною Бо́га просла́вивый.
Ра́дуйся, ди́вная зна́мения и чудеса́ по кончи́не твое́й ми́лостивно яви́вый; ра́дуйся, мо́щи честны́я твоя́ и свяще́нную па́мять твою́ на земли́ на́м оста́вивый.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 12
Благода́ти, су́щей в тебе́, дивя́щеся, велича́ем тя́, святи́телю приснопа́мятный Пе́тре. Ве́руем, я́ко дела́ Бо́жия на земли́ соверши́в, и страда́ния ве́лия претерпе́в, ны́не с Го́сподем во оби́телех Его́ почива́еши, призира́я на на́с с высоты́ Небе́сныя, и приклоня́я к на́м вы́шнее милосе́рдие. На твое́ заступле́ние наде́ющеся и на благода́тную по́мощь твою́ упова́юще, пое́м ди́вному во святы́х Свои́х Бо́гу: Аллилу́иа.
Икос 12
Пою́ще богоуго́дное житие́ твое́, благодея́ний испо́лнено, достохва́льне Пе́тре, и кончи́ну твою́ му́ченическую прославля́юще, благода́рным се́рдцем, любо́вию боже́ственною дви́жимым, ублажа́ем тя́, и па́мять твою́ све́тло пра́зднующе, ра́достию зове́м ти́:
Ра́дуйся, свя́тче, в та́йны Боже́ственныя посвяще́нный; ра́дуйся, сы́не Ца́рствия Небе́снаго благослове́нный.
Ра́дуйся, свети́льниче, в после́дняя времена́ на́м Бо́гом дарова́нный; ра́дуйся, предста́телю о многострада́льней стране́ Росси́йстей, Го́сподем избра́нный.
Ра́дуйся, Це́ркве правосла́вныя благоукраше́нный ве́нче; ра́дуйся, Христо́в преди́вный испове́дниче и страстоте́рпче.
Ра́дуйся, о́браз страда́ния и любве́ ко Го́споду на́м явля́яй; ра́дуйся, на у́зкий пу́ть спасе́ния на́с наставля́яй.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 13
О пресла́вный и пречу́дный уго́дниче Христо́в, святы́й священному́чениче Пе́тре! Приими́ от на́с, недосто́йных и гре́шных, сие́ ма́лое моле́ние на́ше, благогове́йно тебе́ приноси́мое. Испроси́ у Всеми́лостиваго Влады́ки твоего́ Христа́, Ему́же ны́не со дерзнове́нием предстои́ши, проще́ния и оставле́ния мно́гим грехо́м на́шим, напра́ви на́с ко стези́ покая́ния, да те́м изба́вльшеся лю́тых страсте́й, изба́вимся и му́к ве́чных, и в ра́дости неизглаго́ланней Ца́рства Небе́снаго воспое́м с тобо́ю Христу́ Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельски от ми́ра мяте́жнаго к высоте́ Небе́сней умо́м и се́рдцем восходи́л еси́, священному́чениче Пе́тре, херуви́мски созерца́я бе́здну милосе́рдия Бо́жия, серафи́мскою любо́вию пыла́я ко своему́ Созда́телю, прославля́л еси́ Того́ глаго́лы вдохнове́нными. Те́мже и от на́с приими́ благода́рныя любве́ воздая́ния, да ра́достным се́рдцем и умиле́нною душе́ю воспева́ем ти́:
Ра́дуйся, пла́менем любве́ Боже́ственныя от ю́ности возжже́нный; ра́дуйся, мно́гими доброде́тельми от мла́дости украше́нный.
Ра́дуйся, о́трасле до́брая ко́рене благочести́ваго; ра́дуйся, сы́не сла́вный Оте́чества многотерпели́ваго.
Ра́дуйся, любо́вию Христо́вою неотсту́пно назира́емый; ра́дуйся, во благонра́вии то́ю му́дре соблюда́емый.
Ра́дуйся, во́лею Госпо́днею на пу́ть свяще́ннаго служе́ния наста́вленный; ра́дуйся, десни́цею Вы́шняго в Ца́рствие Небе́сное упра́вленный.
Ра́дуйся, священному́чениче Пе́тре, ве́ры правосла́вныя утвержде́ние.
Кондак 1
Избра́нный святи́телю Госпо́день, испове́дниче и му́чениче Христо́в, ве́рою и любо́вию до конца́ Влады́це твоему́ послужи́вый, по́двиги мно́ги соверши́вый, страда́ния ве́лия за Христа́ му́жественне претерпе́вый, ли́ку Небе́сному страстоте́рпцев Це́ркве Ру́сския благоче́стно причте́нный, заступа́й на́с моли́твами твои́ми, досточу́дне, да велегла́сно вопие́м ти́:
Ра́дуйся, священному́чениче Пе́тре, ве́ры правосла́вныя утвержде́ние.
Молитвы
О, досточу́дне Пе́тре, священному́чениче сла́вный, еди́н от со́нма новому́чеников Солове́цких и всея́ земли́ Ру́сския, гра́ду Воро́нежу похвало́, па́стырю ди́вный ста́да Христо́ва, ве́рный служи́телю Бо́жий, защи́тителю ре́вностный Це́ркве Правосла́вныя!
Все́ житие́ твое́ любве́ ко Го́споду и страда́ний о Христе́ испо́лнено бы́сть, ты́ бо, мно́гая муче́ния, боле́зни и ско́рби, изгна́ния и заточе́ния Его́ ра́ди претерпе́в, испове́дник безстра́шен яви́лся еси́ и венце́м нетле́нныя твоея́ сла́вы Це́рковь Ру́сскую украси́л еси́. Вся́ преда́в в ру́це Бо́жии, до́блественне служе́ние твое́ на земли́ соверши́л еси́ и на Голго́фе А́нзерстей кончи́ну му́ченическую прия́ти сподо́бился еси́, богоблаже́нне. Ны́не к Небе́сному ли́ку причте́нный, и вене́ц му́ченический за Христа́ прие́мый, со мно́гими жи́тели го́рняго Иерусали́ма в Ца́рстве Боже́ственныя любве́ пребыва́еши.
О, блаже́нне о́тче на́ш Пе́тре, помози́ на́м хра́мину се́рдца своего́ незапусте́вшу храни́ти, научи́ на́с ра́дость во страда́ниих о Христе́ обрета́ти, озари́ пу́ть на́ш кре́стный сия́нием твоея́ святы́ни. Бу́ди и ны́не на́м утвержде́ние в ве́ре, да, прише́д, обря́щет ю́ Госпо́дь не уга́снувшу в сердца́х на́ших. Умоли́ Творца́ вся́ческих дарова́ти на́м си́лу и кре́пость, да не устраши́вшеся стра́ха лука́ваго, испове́даем тве́рдо Христа́ Спа́са на́шего и Его́ милосе́рдием ча́сти злы́х да изба́вимся в де́нь стра́шный воздая́ния, и в ра́дость ве́чную всели́мся, сла́вяще о все́м Вседержи́теля Бо́га, и твое́ благода́тное к Нему́ о на́с предста́тельство во ве́ки веко́в. Ами́нь.
О, свяще́нная и многострада́льная главо́, земны́й а́нгеле и Небе́сный челове́че, священному́чениче и чудотво́рче Пе́тре, архиере́ю Бо́жий! Ты́ в годи́ну лю́тых гоне́ний яви́лся еси́ я́ко церко́вное свети́ло и и́стинныя ве́ры утвержде́ние, зане́ пред богобо́рцы дерзнове́нно Христа́ испове́дал еси́, и я́ко кади́ло благово́нное, в же́ртву Бо́гу себе́ прине́сл еси́.
Яви́ на́м, смире́нным и гре́шным, ко святы́м моще́м твои́м притека́ющим, многомо́щное твое́ заступле́ние, и вку́пе со все́ми святы́ми, во ото́цех Солове́цких просия́вшими, испроси́ у Го́спода вся́кий да́р, коему́ждо благопотре́бен ко спасе́нию. Се́ бо гре́х на́ших ра́ди не и́мамы дерзнове́ния ко Го́споду и Влады́це на́шему, и пра́ведный гне́в Его́ на ся́ наведо́хом, и вся́кия ми́лости Его́ недосто́йны себе́ сотвори́хом. Те́мже, не сме́юще возвести́ очеса́ на́ша к высоте́ Небе́сней, ниже́ моле́бный гла́с ко Го́споду, се́рдцем сокруше́нным и смире́нным ду́хом тебе́ моли́твенника благоприя́тнаго к Нему́ предлага́ем, и про́сим тя́ со усе́рдием ве́лиим: бу́ди засту́пник и хода́тай на́ш пред Бо́гом, Судие́ю Пра́веднейшим, се́ бо вы́ну прогневля́ем Его́ согреше́нии мно́гими. Ны́не у́бо, во сла́ве Небе́сней пребыва́я и с ли́ки святы́х непреста́нно славосло́вя пресвято́е и́мя Го́спода, при́зри на на́с, гре́шных, и изба́ви все́х, ве́рою несумне́нною к Бо́гу приходя́щих, от вся́ких бе́д, наве́тов и прило́гов диа́вольских. Укроти́ во́лны страсте́й и искуше́ний, востаю́щих на ны́, да ра́ди святы́х твои́х моли́тв не обы́мет на́с напа́сть, и не поги́бнем в пучи́не грехо́вней и в ти́не страсте́й на́ших.
Вознеси́, богоно́сне о́тче на́ш, сие́ ма́лое моле́ние недосто́йных ра́б твои́х Влады́це Христу́, да утверди́т зе́млю на́шу в пра́вой ве́ре и благоче́стии, Це́рковь Святу́ю да сохрани́т непреобори́му от ересе́й и раско́лов, и соблюде́т невреди́му от вся́каго зла́. Испроси́ у великодарови́таго Христа́ Бо́га на́шего скорбя́щим утеше́ние, неду́гующим исцеле́ние, оби́димым заступле́ние, па́дшим во грехи́ покая́ние и воста́ние, стра́ждущим от бесо́в ско́рое свобожде́ние, от Це́ркве Христо́вы отпа́дшим вразумле́ние и на пу́ть спасе́ния обраще́ние. Ты́ му́ченически ду́шу твою́ за ве́ру положи́л еси́, да́руй и на́м му́жество подража́ти тебе́, да ничто́же в жи́зни се́й вре́менней возмо́жет отлучи́ти ны́ от любве́ Бо́жия.
О, святи́телю Христо́в, огради́ и укрепи́ моли́твами твои́ми гра́д се́й, да процвете́т в не́м ре́вность ко спасе́нию и благоче́стие. Ты́, непреста́нно о часе́ сме́ртнем па́мять име́вый и благу́ю ча́сть избра́нных Бо́жиих от Го́спода получи́вый, сподо́би и на́с в ми́ре и покая́нии живо́т сво́й сконча́ти, и Ца́рствия Бо́жия насле́дники бы́ти, иде́же ты́ водворя́ешися со А́нгелы и все́ми святы́ми, хваля́ Бо́га в Тро́ице сла́вимаго, Отца́ и Сы́на и Свята́го Ду́ха, во ве́ки веко́в. Ами́нь.
Конда́къ а҃
И҆збра́нный ст҃и́телю гдⷭ҇ень, и҆сповѣ́дниче и҆ мч҃нче хрⷭ҇то́въ, вѣ́рою и҆ любо́вїю до конца̀ влⷣцѣ твоемꙋ̀ послꙋжи́вый, по́двиги мнѡ́ги соверши́вый, страда̑нїѧ вє́лїѧ за хрⷭ҇та̀ мꙋ́жественнѣ претерпѣ́вый, ли́кꙋ нбⷭ҇номꙋ стрⷭ҇тоте́рпцєвъ цр҃кве рꙋ́сскїѧ бл҃гоче́стнѡ причте́нный, застꙋпа́й на́съ мл҃твами твои́ми, досточꙋ́дне, да велегла́снѡ вопїе́мъ тѝ:
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
І҆́косъ а҃
А҆́гг҃льски ѿ мі́ра мѧте́жнагѡ къ высотѣ̀ нбⷭ҇нѣй ᲂу҆мо́мъ и҆ се́рдцемъ восходи́лъ є҆сѝ, сщ҃енномч҃нче пе́тре, херꙋві́мски созерца́ѧ бе́зднꙋ млⷭ҇рдїѧ бж҃їѧ, серафі́мскою любо́вїю пыла́ѧ ко своемꙋ̀ созда́телю, прославлѧ́лъ є҆сѝ того̀ глагѡ́лы вдохнове́нными.
Тѣ́мже и҆ ѿ на́съ прїимѝ бл҃года́рныѧ любвѐ воздаѧ̑нїѧ, да ра́достнымъ се́рдцемъ и҆ ᲂу҆миле́нною дꙋше́ю воспѣва́емъ тѝ: Ра́дꙋйсѧ, пла́менемъ любвѐ бжⷭ҇твенныѧ ѿ ю҆́ности возжже́нный: ра́дꙋйсѧ, мно́гими добродѣ́тельми ѿ мла́дости ᲂу҆краше́нный.
Ра́дꙋйсѧ, ѻ҆́трасле до́браѧ ко́рене бл҃гочести́вагѡ: ра́дꙋйсѧ, сы́не сла́вный ѻ҆те́чества многотерпѣли́вагѡ.
Ра́дꙋйсѧ, любо́вїю хрⷭ҇то́вою неѿстꙋ́пнѡ назира́емый: ра́дꙋйсѧ, во бл҃гонра́вїи то́ю мꙋ́дрѣ соблюда́емый.
Ра́дꙋйсѧ, во́лею гдⷭ҇нею на пꙋ́ть сщ҃е́ннагѡ слꙋже́нїѧ наста́вленный: ра́дꙋйсѧ, десни́цею вы́шнѧгѡ въ црⷭ҇твїе нбⷭ҇ное ᲂу҆пра́вленный.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ в҃
Ви́дѧ гдⷭ҇ь ве́лїю вѣ́рꙋ и҆ ᲂу҆се́рдїе твоѐ къ немꙋ̀, ꙗ҆́кѡ и҆змла́да прилѣжа́лъ є҆сѝ бжⷭ҇твеннѣй слꙋ́жбѣ и҆ всѧ́комꙋ бл҃гоче́стїю, ѻ҆́бразомъ а҆́гг҃льскимъ и҆ са́номъ сщ҃е́ннымъ почти́ тѧ, и҆ на слꙋже́нїе своѐ поста́ви. Ты́ же по́двигъ се́й до́блественнѣ соверша́лъ є҆сѝ, вы́нꙋ воспѣва́ѧ бл҃года́телю бг҃ꙋ: А҆ллилꙋ́їа.
І҆́косъ в҃
Ра́зꙋмомъ бг҃опросвѣще́ннымъ въ позна́нїи и҆́стины преꙋспѣва́лъ є҆сѝ, достобл҃же́нне пе́тре, мꙋ́дростїю дꙋхо́вною ѡ҆богаща́ѧсѧ, крѣ́пости бжⷭ҇твенныѧ и҆сполнѧ́ѧсѧ, добродѣ́тєли є҆ѵⷢ҇льскїѧ невозвра́тнѡ дꙋшѝ свое́й ᲂу҆своѧ́ѧ. Тѣ́мже мы̀, покланѧ́ющесѧ млⷭ҇рдомꙋ бг҃ꙋ, такова̑ ди̑вна сокрѡ́вища тебѣ̀ дарова́вшемꙋ, во ᲂу҆миле́нїи глаго́лемъ тѝ:
Ра́дꙋйсѧ, бл҃года́тїю бж҃їею ѡ҆сщ҃е́нный: ра́дꙋйсѧ, премꙋ́дрости и҆́мъ всеще́дрѡ наꙋче́нный.
Ра́дꙋйсѧ, ра́зꙋмъ ст҃ъ смире́нїемъ стѧжа́вый: ра́дꙋйсѧ, да̑нныѧ тѝ гдⷭ҇емъ тала́нты стокра́тнѡ ᲂу҆множа́вый.
Ра́дꙋйсѧ, ко а҆́гг҃льскомꙋ чи́нꙋ ѿ ю҆́ности причте́нный: ра́дꙋйсѧ, и҆́менемъ а҆пⷭ҇ла петра̀ во и҆́ночествѣ нарече́нный.
Ра́дꙋйсѧ, подвигѡ́мъ ѻ҆́нагѡ ѡ҆ гдⷭ҇ѣ поревнова́вый: ра́дꙋйсѧ, ско́рбный и҆ сла́достный пꙋ́ть страда́нїй ѡ҆ хрⷭ҇тѣ̀ и҆збра́вый.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ г҃
Си́лѣ дꙋхо́внѣй, въ тебѣ̀ сꙋ́щей, диви́шасѧ лю́дїе, па́стырѧ до́браго и҆ млⷭ҇рдаго ᲂу҆тѣ́шителѧ дꙋ́шъ скорбѧ́щихъ тѧ̀ ѡ҆брѣ́тше: любо́вїю бо твое́ю согрѣва́еми, къ тебѣ̀ со бл҃годаре́нїемъ притека́хꙋ, ра́достїю воспѣва́юще бг҃ꙋ: А҆ллилꙋ́їа.
І҆́косъ г҃
И҆мѣ́ѧ се́рдце, ве́лїѧ вѣ́ры ко гдⷭ҇ꙋ и҆спо́лненное и҆ слове́съ бжⷭ҇твенныхъ трепе́щꙋщее, досто́инъ ꙗ҆ви́лсѧ є҆сѝ, ѻ҆́тче пе́тре, са́на а҆рхїере́йскагѡ, во́ньже и҆ возведе́ тѧ сердцевѣ́децъ бг҃ъ, вла́стїю и҆ бл҃года́тїю ст҃и́тельскою ѡ҆блека́ѧ тѧ̀. Тѣ́мже прославлѧ́юще ꙗ҆̀же ѿ бг҃а добродѣ́тєли и҆ дарова̑нїѧ твоѧ̑, пое́мъ тѝ такова̑ѧ:
Ра́дꙋйсѧ, зо́вꙋ бжⷭ҇твеннагѡ ᲂу҆ч҃тлѧ ра́достнѣ повинова́выйсѧ: ра́дꙋйсѧ, ѡ҆ сла́вѣ є҆гѡ̀ нбⷭ҇нѣй дꙋ́хомъ возгора́выйсѧ.
Ра́дꙋйсѧ, ко слꙋже́нїю ст҃и́тельскомꙋ дꙋ́шꙋ свою̀ ᲂу҆гото́вивый: ра́дꙋйсѧ, а҆пⷭ҇лꙋ первоверхо́вномꙋ ре́вностїю по бз҃ѣ себѐ ᲂу҆подо́бивый.
Ра́дꙋйсѧ, сла́дость слове́съ гдⷭ҇нихъ въ се́рдцѣ всегда̀ храни́вый: ра́дꙋйсѧ, и҆́гꙋ бл҃го́мꙋ хрⷭ҇то́вꙋ вы́ю свою̀ подклони́вый.
Ра́дꙋйсѧ, бл҃года́ть а҆рхїпа́стырскꙋю ѿ рꙋкꙋ̀ первост҃и́телѧ тѵ́хѡна прїе́мый: ра́дꙋйсѧ, ꙗ҆́коже и҆ то́й, по́двигъ и҆сповѣ́дничества и҆ мч҃нчества под̾е́мый.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ д҃
Бꙋ́рѧ беззако́нїй поколеба̀ держа́вꙋ рѡссі́йскꙋю въ годи́нꙋ и҆спыта́нїй лю́тыхъ, за грѣхѝ ѿ бг҃а попꙋще́нныхъ: ꙗ҆́рость и҆ ᲂу҆ны́нїе, ско́рбь и҆ рыда́нїе и҆спо́лниша многострада́льное ѻ҆те́чество на́ше. Тобо́ю же, ст҃и́телю, и҆ тебѣ̀ є҆динонра́вными цр҃ковь рꙋ́сскаѧ несокрꙋши́ма ѿ вра́тъ а҆́довыхъ сохрани́сѧ. Лю́дїе же ви́дѧще непоколеби́мꙋ вѣ́рꙋ твою̀, и҆ свѣти́льникъ добродѣ́телей твои́хъ при́снѡ горѧ́щъ, воспѣва́хꙋ бг҃ꙋ: А҆ллилꙋ́їа.
І҆́косъ д҃
Слы́шавъ гла́съ бж҃їй въ се́рдцы твое́мъ, ко и҆сповѣ́данїю и҆́стины и҆ попече́нїю ѡ҆ па́ствѣ хрⷭ҇то́вой призыва́ющїй, слꙋга̀ гдⷭ҇ень вѣ́ренъ и҆ безстра́шенъ ꙗ҆ви́лсѧ є҆сѝ: гоне́нїй и҆ преще́нїй вра́жїихъ не ᲂу҆боѧ́всѧ, слꙋже́нїе ст҃и́тельское и҆ па́стырское до конца̀ дне́й ре́вностнѡ соверша́лъ є҆сѝ, достобл҃же́нне пе́тре. Тѣ́мже дивѧ́щесѧ вели́чїю дꙋшѝ твоеѧ̀, во ᲂу҆миле́нїи глаго́лемъ тѝ:
Ра́дꙋйсѧ, ѻ҆́гненный сто́лпе, во мра́цѣ безбо́жїѧ свѣ́тлѡ сїѧ́ѧй: ра́дꙋйсѧ, ка́меню вѣ́ры хрⷭ҇то́вы, лю́ди во бл҃гоче́стїи ᲂу҆твержда́ѧй.
Ра́дꙋйсѧ, ѿ раздѣле́нїѧ и҆ расхище́нїѧ па́ствꙋ свою̀ храни́вый: ра́дꙋйсѧ, во́лны мѧте́жа цр҃ко́внагѡ си́лою бж҃їею ᲂу҆кроти́вый.
Ра́дꙋйсѧ, къ слꙋ́жбѣ бжⷭ҇твеннѣй ве́лїю ре́вность и҆мѣ́вый: ра́дꙋйсѧ, ни є҆ди́но ѿ слове́съ гдⷭ҇нихъ презрѣ́вый.
Ра́дꙋйсѧ, ᲂу҆ста́ва цр҃ко́внагѡ стро́гїй блюсти́телю: ра́дꙋйсѧ, бж҃їихъ дѣ́лъ млⷭ҇тивый соверши́телю.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ є҃
Бг҃оизбра́нный во́ине хрⷭ҇то́въ, сщ҃енномч҃нче пе́тре, ѻ҆рꙋ́жїемъ вѣ́ры и҆ ѻ҆́гненнымъ мече́мъ слове́съ бжⷭ҇твенныхъ посѣка́лъ є҆сѝ всѧ́кое нече́стїе, разрꙋша́лъ є҆сѝ кѡ́зни вра̑жїѧ, є҆ди́нство цр҃ко́вное ѿ навѣ́тѡвъ сохранѧ́ѧ. Бг҃ꙋ же, споспѣшествꙋ́ющꙋ тѝ и҆ на по́двигъ вдохновлѧ́ющꙋ, воспѣва́лъ є҆сѝ вы́нꙋ: А҆ллилꙋ́їа.
І҆́косъ є҃
Ви́дѣвше вразѝ ро́да хрⷭ҇тїа́нскагѡ тѧ̀ и҆́стинна побо́рника вѣ́ры ѻ҆тє́цъ на́шихъ и҆ цр҃кве правосла́вныѧ защи́тителѧ, скорбьмѝ и҆ па́костьми лю́тѣ ᲂу҆ѧзвлѧ́хꙋ тѧ̀, погꙋби́ти тща́щесѧ. Ты́ же, ꙗ҆́кѡ ст҃ы́й па́ѵелъ, и҆ во ᲂу҆́захъ сы́й, бл҃говѣствова́нїѧ ѡ҆ хрⷭ҇тѣ̀ ника́коже ѡ҆ста́вилъ є҆сѝ, дꙋ́шы во сп҃се́нїе ᲂу҆ловлѧ́ѧ. Сегѡ̀ ра́ди пѣсносло́вимъ вє́лїѧ трꙋды̀ твоѧ̑, любо́вїю хрⷭ҇то́вою соверша́ємыѧ, и҆ прино́симъ тѝ хвалє́нїѧ сицева̑ѧ:
Ра́дꙋйсѧ, мнѡ́ги скѡ́рби, заточе́нїе и҆ и҆згна́нїе претерпѣ́вый: ра́дꙋйсѧ, жи́зни вре́менныѧ сла́дость пра́вды ра́ди бж҃їѧ презрѣ́вый.
Ра́дꙋйсѧ, и҆́стиннꙋю ра́дость во страда́нїихъ ѡ҆ гдⷭ҇ѣ ѡ҆брѣта́вый: ра́дꙋйсѧ, си́ми страда̑нїи въ по́двизѣ любвѐ хрⷭ҇то́вы возраста́вый.
Ра́дꙋйсѧ, во ᲂу҆́захъ стра́ждꙋщымъ ѿра́да и҆ ᲂу҆тѣше́нїе бы́вый: ра́дꙋйсѧ, ѻ҆́бразъ терпѣ́нїѧ и҆ себє̀ ѿверже́нїѧ до́блественнѣ ꙗ҆ви́вый.
Ра́дꙋйсѧ, сокрѡ́вища се́рдца твоегѡ̀ лю́демъ ще́дрѡ ѿкры́вый: ра́дꙋйсѧ, си́лою любвѐ твоеѧ̀ мнѡ́ги ѿпа́дшыѧ ко хрⷭ҇тꙋ̀ ѡ҆брати́вый.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ ѕ҃
Проповѣ́дꙋетъ цр҃ковь рꙋ́сскаѧ вели́чїе добродѣ́телей и҆ подвигѡ́въ твои́хъ, ст҃и́телю ѻ҆́тче пе́тре. Неꙋста́нною бо мл҃твою и҆ ре́вностїю ѡ҆ слꙋ́жбѣ бж҃їей, и҆ ѻ҆́бщагѡ ᲂу҆се́рднагѡ моле́нїѧ ᲂу҆строе́нїемъ, ᲂу҆тѣша́лъ є҆сѝ вѣ̑рныѧ въ годи́нꙋ безбо́жнꙋю. Тѣ́мже и҆ мы̀ да́ры любвѐ своеѧ̀ бл҃года́рнѣ тебѣ̀ прино́симъ, бг҃ꙋ же, дарова́вшемꙋ на́мъ па́стырѧ преди́внаго, пое́мъ: А҆ллилꙋ́їа.
І҆́косъ ѕ҃
Возсїѧ̀ землѝ рꙋ́сстѣй сла́ва по́двига мч҃нческагѡ и҆ ст҃и́тельскагѡ твоегѡ̀, и҆́стинный слꙋжи́телю хрⷭ҇то́въ, сщ҃е́нне пе́тре: и҆дѣ́же бо а҆́ще трꙋжда́лсѧ є҆сѝ на ни́вѣ цр҃ко́внѣй, всю́дꙋ чꙋ̑днаѧ дѣла̀ соверша́лъ є҆сѝ, въ ча́дѣхъ дꙋхо́вныхъ до́брꙋю па́мѧть ѡ҆ тебѣ̀ и҆ серде́чнꙋю любо́вь ѡ҆ставлѧ́ѧ. Сегѡ̀ ра́ди бл҃годарѧ́ще ѡ҆ тебѣ̀ бг҃а, со ᲂу҆миле́нїемъ глаго́лемъ тѝ:
Ра́дꙋйсѧ, пра́вило вѣ́ры и҆ бл҃гоче́стїѧ ѻ҆́бразе всесоверше́нный: ра́дꙋйсѧ, пла́меню, бл҃года́тїю бжⷭ҇твеннагѡ дх҃а возжже́нный.
Ра́дꙋйсѧ, въ зе́млю нижегоро́дскꙋю на слꙋже́нїе а҆пⷭ҇льское призва́нный: ра́дꙋйсѧ, въ кра́и тверстѣ́мъ гони́тельми ѿ па́ствы твоеѧ̀ ѿлꙋче́нный.
Ра́дꙋйсѧ, ре́вности ст҃и́телѧ воро́нежскагѡ митрофа́на подража́телю: ра́дꙋйсѧ, бл҃говѣ́стїѧ задо́нскагѡ чꙋдотво́рца тѵ́хѡна продолжа́телю.
Ра́дꙋйсѧ, смире́нїѧ ст҃и́телѧ а҆нтѡ́нїа прилѣ́жный послѣ́дователю: ра́дꙋйсѧ, цр҃кве воро́нежскїѧ до́брый бл҃гоꙋстрои́телю.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ з҃
Хотѧ̀ сохрани́ти цр҃ковь рꙋ́сскꙋю ѿ раско́ла и҆ є҆ресе́й, и҆ и҆зба́вити ѿ ѿча́ѧнїѧ лю́ди, въ заблꙋждє́нїѧ поги́бєльнаѧ и҆ ѡ҆ѕлобле́нїе впа́дшыѧ, трꙋды̀ вє́лїѧ поне́слъ є҆сѝ, премꙋ́дре пе́тре, непреста́ннѡ дѣ́лы и҆ словесы̀ хрⷭ҇та̀ проповѣ́дꙋѧ, въ предѣ́лѣхъ тверски́хъ, нижегоро́дскихъ и҆ воро́нежскихъ. Сегѡ̀ ра́ди мно́зи невѣ́рнїи, слы́шавше тѧ̀, къ бг҃ꙋ и҆́стинномꙋ ѡ҆брати́шасѧ и҆ воспѣ́ша є҆мꙋ̀ ра́достїю: А҆ллилꙋ́їа.
І҆́косъ з҃
Но́ваго тѧ̀ и҆сповѣ́дника и҆ мч҃нка хрⷭ҇то́ва ꙗ҆вѝ мі́рꙋ многострада́льнаѧ цр҃ковь рꙋ́сскаѧ, ра́нами безчи́сленными и҆з̾ѧ́звленнаѧ, кро́вїю мч҃нческою ѻ҆би́льнѡ напое́ннаѧ, сла́вою мно́жества ст҃ы́хъ свои́хъ ᲂу҆вѣнча́ннаѧ. Тѣ́мже и҆ мы̀, почита́юще тѧ̀ ꙗ҆́кѡ є҆ди́наго ѿ си́хъ досто́йнѣйшихъ и҆ сла́внѣйшихъ сынѡ́въ рѡссі́йскихъ, пѣ́нїе хвале́бное прино́симъ тѝ:
Ра́дꙋйсѧ, ст҃и́телю, хрⷭ҇та̀ безстра́шнѡ и҆сповѣ́давый: ра́дꙋйсѧ, стра́ха человѣ́ческа и҆ боѧ́зни ѿ ᲂу҆бива́ющихъ тѣ́ло не вѣ́давый.
Ра́дꙋйсѧ, па́стырю, дꙋ́шꙋ за ѻ҆́вцы твоѧ̑ полага́вый: ра́дꙋйсѧ, нае́мникѡмъ лꙋка̑вымъ па́ствы твоеѧ̀ расхи́тити не да́вый.
Ра́дꙋйсѧ, ст҃ы́ню цр҃кве правосла́вныѧ ре́вностнѡ храни́вый: ра́дꙋйсѧ, врагѡ́въ є҆ѧ̀ тѣ́мъ въ тре́петъ приводи́вый.
Ра́дꙋйсѧ, къ кончи́нѣ житїѧ̀ твоегѡ̀ мч҃нчестѣй всецѣ́лѡ ᲂу҆гото́вивыйсѧ: ра́дꙋйсѧ, во смире́нїи, ми́рѣ и҆ кро́тости прїѧ́ти тꙋ̀ сподо́бивыйсѧ.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ и҃
Стра́ненъ на землѝ пребы́лъ є҆сѝ, сщ҃еннострада́льче, не и҆мы́й приста́нища во ѻ҆те́чествїи твое́мъ, ѿ вра̑гъ хрⷭ҇то́выхъ, не терпѧ́щихъ ст҃ости твоеѧ̀, гони́мый и҆ поноша́емый, ѻ҆ба́че не ᲂу҆боѧ́лсѧ є҆сѝ противꙋста́ти власте́мъ безбѡ́жнымъ, дѣѧ́ньми лжепа́стырей цр҃ковь ст҃ꙋ́ю разори́ти тща́щымсѧ. Сегѡ̀ ра́ди словесы̀ бг҃омꙋ́дрыми мнѡ́гїѧ мїрскі̑ѧ и҆ пресвѵ́теры, въ раско́лы ѿпа́дшыѧ, ко хрⷭ҇тꙋ̀ ѡ҆брати́лъ є҆сѝ и҆ чрез̾ покаѧ́нїе и҆́стинное въ ло́но цр҃ко́вное возврати́лъ є҆сѝ, да и҆ ті́и сла́вѧтъ є҆ди́наго и҆́стиннаго бг҃а, се́рдцемъ и҆ ᲂу҆сты̀ пою́ще нбⷭ҇нꙋю пѣ́снь: А҆ллилꙋ́їа.
І҆́косъ и҃
Всего̀ себѐ во́ли гдⷭ҇ни преда́въ, страда̑нїѧ є҆гѡ̀ ра́ди за че́сть почита́лъ є҆сѝ, досточꙋ́дне. Тѣ́мже въ темни́цахъ заточе́нїе и҆ во ѡ҆то́ки соловє́цкїѧ, мѣ́стомъ мꙋче́нїй безбѡ́жники содѣ̑ланныѧ, преселе́нїе ꙗ҆́кѡ ѿ десни́цы бж҃їѧ воспрїѧ́лъ є҆сѝ. Мы́ же чтꙋ́ще мꙋ́жество и҆ долготерпѣ́нїе твоѐ, хвалє́нїѧ прино́симъ тѝ такова̑ѧ:
Ра́дꙋйсѧ, во ст҃ы̑ѧ ѡ҆то́ки соловє́цкїѧ на страда̑нїѧ и҆ рабѡ́ты тѧ̑жкїѧ и҆згна́нный: ра́дꙋйсѧ, та́мѡ стра́ждꙋщымъ во ᲂу҆тѣше́нїе и҆ ᲂу҆твержде́нїе въ бз҃ѣ дарова́нный.
Ра́дꙋйсѧ, ко мно́жествꙋ а҆рхїере́євъ и҆ сщ҃є́нникъ, та́мѡ заключе́нныхъ, причте́нный: ра́дꙋйсѧ, сщ҃енномч҃нче чꙋ́дный и҆ стрⷭ҇тоте́рпче соверше́нный.
Ра́дꙋйсѧ, и҆ во ᲂу҆́захъ досто́йный ѻ҆́бразъ а҆рхїпа́стырѧ храни́вый: ра́дꙋйсѧ, си́лою дꙋхо́вною и҆ мꙋчи́телей безбо́жныхъ покори́вый.
Ра́дꙋйсѧ, бжⷭ҇твеннꙋю тишинꙋ̀ и҆ ми́ръ глꙋбо́къ въ дꙋшѝ и҆мѣ́вый: ра́дꙋйсѧ, страда̑нїѧ крⷭ҇тнаѧ, ѿ гдⷭ҇а пѡ́сланнаѧ, любо́вїю претерпѣ́вый.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ ѳ҃
Всѧ́кое а҆́гг҃льское є҆стество̀ ᲂу҆диви́сѧ чꙋ̑днымъ подвигѡ́мъ твои̑мъ, бг҃обл҃же́нне: ты́ бо, ꙗ҆́кѡ є҆ди́нъ ѿ ѻ҆рꙋ̑жникъ нбⷭ҇ныхъ, до́блественнѣ во́инствовалъ є҆сѝ на дꙋ́хи ѕло́бы за влⷣкꙋ твоего̀ хрⷭ҇та̀, воспѣва́ѧ томꙋ̀ съ ли̑ки безпло́тныхъ: А҆ллилꙋ́їа.
І҆́косъ ѳ҃
Вѣті̑и сꙋемꙋ́дреннїи не мо́гꙋтъ разꙋмѣ́ти высоты̀ добродѣ́телей твои́хъ и҆ глꙋбины̀ бжⷭ҇твенныѧ твоеѧ̀ любвѐ: тоѧ́ бо ра́ди мнѡ́гаѧ страда̑нїѧ бл҃годꙋ́шнѡ претерпѣ́лъ є҆сѝ, во є҆́же ѿ гдⷭ҇а тѝ неразлꙋче́нꙋ бы́ти. Сїю́ же и҆ на всѧ́каго человѣ́ка и҆злива́лъ є҆сѝ, всѧ̑ люблю̀ и҆ ѡ҆ всѣ́хъ скорблю̀, глаго́лѧ. Мы́ же чтꙋ́щїи ст҃ость дꙋшѝ твоеѧ̀ и҆ си́лꙋ дꙋхо́внꙋю, бг҃омъ тѝ дарова́ннꙋю, во ᲂу҆миле́нїи глаго́лемъ:
Ра́дꙋйсѧ, томлє́нїѧ и҆ трꙋды̀ тѧ̑жкїѧ въ заточе́нїи терпѣ́вый: ра́дꙋйсѧ, ѡ҆ ѡ҆скверне́нїи землѝ рꙋ́сскїѧ и҆ солове́цкїѧ ѻ҆би́тели скорбѣ́вый.
Ра́дꙋйсѧ, ᲂу҆тѣше́нїе дꙋшѝ въ мл҃твѣ ѡ҆брѣта́вый: ра́дꙋйсѧ, бжⷭ҇твеннꙋю слꙋ́жбꙋ со сщ҃е́нными соꙋ̑зники твои́ми неѿстꙋ́пнѡ соверша́вый.
Ра́дꙋйсѧ, за всю̀ странꙋ̀ рѡссі́йскꙋю бл҃гопрїѧ́тнꙋ же́ртвꙋ бг҃ꙋ приноси́вый: ра́дꙋйсѧ, ѡ҆ покаѧ́нїи є҆ѧ̀ въ серде́чнѣмъ сокрꙋше́нїи гдⷭ҇а моли́вый.
Ра́дꙋйсѧ, слꙋжи́телю хрⷭ҇то́вы цр҃кве и҆ мл҃твенниче самоѿве́рженный: ра́дꙋйсѧ, ꙗ҆́кѡ а҆рхїепⷭ҇кпъ солове́цкїй соꙋ̑зники твои́ми нарече́нный.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ і҃
Сп҃стѝ хотѧ̀ дꙋ́шꙋ твою̀, бг҃омꙋ́дре, смире́нїе крⷭ҇тное вкꙋ́пѣ со и҆ны́ми добродѣ́тельми гдⷭ҇ꙋ прине́слъ є҆сѝ, ᲂу҆ничижа́ющымъ и҆ гонѧ́щымъ тѧ̀ николи́же противлѧ́ѧсѧ: приста́нище послѣ́днее земна́гѡ житїѧ̀ твоегѡ̀ во ѡ҆то́цѣ а҆́нзерстѣмъ ѡ҆брѣ́лъ є҆сѝ, а҆́може приведе́ тѧ чл҃вѣколю́бецъ бг҃ъ, на высотꙋ̀ кра́йнюю по́двига мч҃нческагѡ возводѧ̀. Ты́ же бл҃гопоко́рнѣ воспрїѧ́лъ є҆сѝ ѻ҆́ный, любо́вїю воспѣва́ѧ гдⷭ҇еви: А҆ллилꙋ́їа.
І҆́косъ і҃
Стѣ́нꙋ неѡбори́мꙋ и҆мѣ́лъ є҆сѝ бл҃года́ть гдⷭ҇ню, бл҃гі́й ѻ҆́тче, защища́ющꙋ тѧ̀ ѿ вра̑гъ неви́димыхъ, не могꙋ́щихъ дꙋшѝ твоеѧ̀ погꙋби́ти: досто́инъ бо тоѧ̀ бл҃года́ти ꙗ҆ви́лсѧ є҆сѝ бг҃оꙋго́дными трꙋды̑ твои́ми и҆ ᲂу҆миле́нными мл҃твами, и҆́миже ᲂу҆мно́жилъ є҆сѝ сла́вꙋ сегѡ̀ ди́внагѡ ѡ҆то́ка. Сегѡ̀ ра́ди покланѧ́ющесѧ всемлⷭ҇тивомꙋ бг҃ꙋ, воспѣва́емъ тѧ̀, є҆ди́наго ѿ и҆збра́нныхъ є҆гѡ̀, хвалє́нїи таковы́ми:
Ра́дꙋйсѧ, въ безмо́лвїи ѡ҆то́ка а҆́нзерскагѡ а҆́ки пꙋсты́нникъ пожи́вый: ра́дꙋйсѧ, ст҃ы́ню мч҃нчества твоегѡ̀ къ сокро́вищємъ бг҃оизбра́ннагѡ ѡ҆то́ка приложи́вый.
Ра́дꙋйсѧ, въ мѣ́стѣ подвигѡ́въ пꙋстыннолю́бнагѡ є҆леаза́ра и҆ любобезмо́лвнагѡ і҆́ѡва пребыва́вый: ра́дꙋйсѧ, къ та́йнамъ сокровє́ннымъ и҆́хъ а҆́гг҃льскагѡ жи́тельства дꙋ́хомъ приника́вый.
Ра́дꙋйсѧ, прпⷣбномꙋ ге́рманꙋ, первонача́льникꙋ солове́цкомꙋ, незри́мѡ бесѣ́довати сподо́бивыйсѧ: ра́дꙋйсѧ, вы́шнимъ и҆зволе́нїемъ стїхосло́вїе а҆ка́ѳїстное соста́вити томꙋ̀ ᲂу҆досто́ивыйсѧ.
Ра́дꙋйсѧ, къ по́мощи ст҃ы́хъ сеѧ̀ сла́вныѧ землѝ во страда́нїихъ твои́хъ прибѣга́вый: ра́дꙋйсѧ, ст҃ꙋ́ю па́мѧть твою̀ со ѡ҆тѡ́ки солове́цкими навѣ́ки свѧза́вый.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ а҃і
Пѣ́нїе всеꙋмиле́нное бл҃года́рною дꙋше́ю возно́симъ тѝ, всест҃ы́й влⷣко, а҆рхїере́ю нбⷭ҇ный, ꙗ҆́кѡ дарова́лъ є҆сѝ на́мъ сего̀ ди́внаго па́стырѧ, ст҃а́го петра̀, на ᲂу҆тѣше́нїе и҆ сп҃се́нїе дꙋша́мъ на́шымъ и҆ ᲂу҆крѣпле́нїе въ вѣ́рѣ хрⷭ҇то́вой люде́й рꙋ́сскихъ. Тогѡ̀ по́двиги пѣсносло́вѧще, тебѣ̀ бг҃ꙋ на́шемꙋ сла́вꙋ возсыла́емъ пѣ́нїемъ хвале́бнымъ: А҆ллилꙋ́їа.
І҆́косъ а҃і
Свѣтоно́сенъ свѣти́льникъ во тьмѣ̀ безꙋ́мїѧ и҆ мра́цѣ беззако́нїѧ горѧ́й, всѧ̑ ѡ҆зарѧ́лъ є҆сѝ сїѧ́нїемъ бжⷭ҇твенныѧ бл҃года́ти, просвѣща́ѧ дꙋ́шы свѣ́томъ и҆́стиннагѡ ра́зꙋма. И҆ до ѡ҆то́кѡвъ сѣ́верныхъ дости́же свѣ́тъ бг҃олюби́выѧ дꙋшѝ твоеѧ̀, да́же до безмо́лвныѧ а҆́нзерскїѧ пꙋ́стыни, и҆дѣ́же ты̀ во ст҃ѣ́й горѣ̀ голго́ѳѣ, пѡ́двиги и҆́ноческими просла́вленнѣй, мч҃нчески сконча́лъ є҆сѝ многотрꙋ́дное житїѐ твоѐ. Сегѡ̀ ра́ди воспѣва́емъ долготерпѣ́нїе твоѐ, ѻ҆́тче првⷣне, и҆ любо́вїю ᲂу҆миле́ннѡ взыва́емъ:
Ра́дꙋйсѧ, въ послѣ̑днїѧ дни̑ житїѧ̀ твоегѡ̀, лю́тѣ недꙋ́гꙋѧ, сла́дость вы́шнѧгѡ мі́ра па́че позна́вый: ра́дꙋйсѧ, всѣ́мъ се́рдцемъ твои́мъ возлюби́вый хрⷭ҇та̀, и҆ всѧ̑ до конца̀ за того̀ претерпѣ́вый.
Ра́дꙋйсѧ, на горѣ̀ голго́ѳѣ а҆́нзерстѣй въ рꙋ́цѣ бж҃їи дꙋ́шꙋ преда́вый: ра́дꙋйсѧ, мч҃нчествомъ свои́мъ въ сщ҃е́ннѣмъ селе́нїи се́мъ просїѧ́вый.
Ра́дꙋйсѧ, безпреткнове́ннѡ во ѻ҆би́тєли гѡ́рнїѧ дꙋше́ю возлетѣ́вый: ра́дꙋйсѧ, чꙋ́днымъ житїе́мъ твои́мъ и҆ кончи́ною првⷣною бг҃а просла́вивый.
Ра́дꙋйсѧ, ди̑внаѧ зна̑менїѧ и҆ чꙋдеса̀ по кончи́нѣ твое́й млⷭ҇тивнѡ ꙗ҆ви́вый: ра́дꙋйсѧ, мо́щи чтⷭ҇ны̑ѧ твоѧ̑ и҆ сщ҃е́ннꙋю па́мѧть твою̀ на землѝ на́мъ ѡ҆ста́вивый.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ в҃і
Бл҃года́ти, сꙋ́щей въ тебѣ̀, дивѧ́щесѧ, велича́емъ тѧ̀, ст҃и́телю приснопа́мѧтный пе́тре. Вѣ́рꙋемъ, ꙗ҆́кѡ дѣла̀ бж҃їѧ на землѝ соверши́въ, и҆ страда̑нїѧ вє́лїѧ претерпѣ́въ, ны́нѣ съ гдⷭ҇емъ во ѻ҆би́телехъ є҆гѡ̀ почива́еши, призира́ѧ на на́съ съ высоты̀ нбⷭ҇ныѧ, и҆ приклонѧ́ѧ къ на́мъ вы́шнее млⷭ҇рдїе. На твоѐ застꙋпле́нїе надѣ́ющесѧ и҆ на бл҃года́тнꙋю по́мощь твою̀ ᲂу҆пова́юще, пое́мъ ди́вномꙋ во ст҃ы́хъ свои́хъ бг҃ꙋ: А҆ллилꙋ́їа.
І҆́косъ в҃і
Пою́ще бг҃оꙋго́дное житїѐ твоѐ, бл҃годѣѧ́нїй и҆спо́лнено, достохва́льне пе́тре, и҆ кончи́нꙋ твою̀ мч҃нческꙋю прославлѧ́юще, бл҃года́рнымъ се́рдцемъ, любо́вїю бжⷭ҇твенною дви́жимымъ, ᲂу҆бл҃жа́емъ тѧ̀, и҆ па́мѧть твою̀ свѣ́тлѡ пра́зднꙋюще, ра́достїю зове́мъ тѝ:
Ра́дꙋйсѧ, ст҃че, въ та̑йны бжⷭ҇твєнныѧ посвѧще́нный: ра́дꙋйсѧ, сы́не црⷭ҇твїѧ нбⷭ҇нагѡ бл҃гослове́нный.
Ра́дꙋйсѧ, свѣти́льниче, въ послѣ̑днѧѧ времена̀ на́мъ бг҃омъ дарова́нный: ра́дꙋйсѧ, предста́телю ѡ҆ многострада́льнѣй странѣ̀ рѡссі́йстѣй, гдⷭ҇емъ и҆збра́нный.
Ра́дꙋйсѧ, цр҃кве правосла́вныѧ бл҃гоꙋкраше́нный вѣ́нче: ра́дꙋйсѧ, хрⷭ҇то́въ преди́вный и҆сповѣ́дниче и҆ стрⷭ҇тоте́рпче.
Ра́дꙋйсѧ, ѻ҆́бразъ страда́нїѧ и҆ любвѐ ко гдⷭ҇ꙋ на́мъ ꙗ҆влѧ́ѧй: ра́дꙋйсѧ, на ᲂу҆́зкїй пꙋ́ть сп҃се́нїѧ на́съ наставлѧ́ѧй.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ г҃і
ѽ пресла́вный и҆ пречꙋ́дный ᲂу҆го́дниче хрⷭ҇то́въ, ст҃ы́й сщ҃енномч҃нче пе́тре! Прїимѝ ѿ на́съ, недосто́йныхъ и҆ грѣ́шныхъ, сїѐ ма́лое моле́нїе на́ше, бл҃гоговѣ́йнѡ тебѣ̀ приноси́мое. И҆спросѝ ᲂу҆ всемлⷭ҇тивагѡ влⷣки твоегѡ̀ хрⷭ҇та̀, є҆мꙋ́же ны́нѣ со дерзнове́нїемъ предстои́ши, проще́нїѧ и҆ ѡ҆ставле́нїѧ мнѡ́гимъ грѣхѡ́мъ на́шымъ, напра́ви на́съ ко стезѝ покаѧ́нїѧ, да тѣ́мъ и҆зба́вльшесѧ лю́тыхъ страсте́й, и҆зба́вимсѧ и҆ мꙋ́къ вѣ́чныхъ, и҆ въ ра́дости неизглаго́ланнѣй црⷭ҇тва нбⷭ҇нагѡ воспое́мъ съ тобо́ю хрⷭ҇тꙋ̀ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льски ѿ мі́ра мѧте́жнагѡ къ высотѣ̀ нбⷭ҇нѣй ᲂу҆мо́мъ и҆ се́рдцемъ восходи́лъ є҆сѝ, сщ҃енномч҃нче пе́тре, херꙋві́мски созерца́ѧ бе́зднꙋ млⷭ҇рдїѧ бж҃їѧ, серафі́мскою любо́вїю пыла́ѧ ко своемꙋ̀ созда́телю, прославлѧ́лъ є҆сѝ того̀ глагѡ́лы вдохнове́нными.
Тѣ́мже и҆ ѿ на́съ прїимѝ бл҃года́рныѧ любвѐ воздаѧ̑нїѧ, да ра́достнымъ се́рдцемъ и҆ ᲂу҆миле́нною дꙋше́ю воспѣва́емъ тѝ: Ра́дꙋйсѧ, пла́менемъ любвѐ бжⷭ҇твенныѧ ѿ ю҆́ности возжже́нный: ра́дꙋйсѧ, мно́гими добродѣ́тельми ѿ мла́дости ᲂу҆краше́нный.
Ра́дꙋйсѧ, ѻ҆́трасле до́браѧ ко́рене бл҃гочести́вагѡ: ра́дꙋйсѧ, сы́не сла́вный ѻ҆те́чества многотерпѣли́вагѡ.
Ра́дꙋйсѧ, любо́вїю хрⷭ҇то́вою неѿстꙋ́пнѡ назира́емый: ра́дꙋйсѧ, во бл҃гонра́вїи то́ю мꙋ́дрѣ соблюда́емый.
Ра́дꙋйсѧ, во́лею гдⷭ҇нею на пꙋ́ть сщ҃е́ннагѡ слꙋже́нїѧ наста́вленный: ра́дꙋйсѧ, десни́цею вы́шнѧгѡ въ црⷭ҇твїе нбⷭ҇ное ᲂу҆пра́вленный.
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Конда́къ а҃
И҆збра́нный ст҃и́телю гдⷭ҇ень, и҆сповѣ́дниче и҆ мч҃нче хрⷭ҇то́въ, вѣ́рою и҆ любо́вїю до конца̀ влⷣцѣ твоемꙋ̀ послꙋжи́вый, по́двиги мнѡ́ги соверши́вый, страда̑нїѧ вє́лїѧ за хрⷭ҇та̀ мꙋ́жественнѣ претерпѣ́вый, ли́кꙋ нбⷭ҇номꙋ стрⷭ҇тоте́рпцєвъ цр҃кве рꙋ́сскїѧ бл҃гоче́стнѡ причте́нный, застꙋпа́й на́съ мл҃твами твои́ми, досточꙋ́дне, да велегла́снѡ вопїе́мъ тѝ:
Ра́дꙋйсѧ, сщ҃енномч҃нче пе́тре, вѣ́ры правосла́вныѧ ᲂу҆твержде́нїе.
Моли́твы
ѽ досточꙋ́дне пе́тре, сщ҃енномч҃нче сла́вный, є҆ди́нъ ѿ со́нма новомч҃нкѡвъ солове́цкихъ и҆ всеѧ̀ землѝ рꙋ́сскїѧ, гра́дꙋ воро́нежꙋ похвало̀, па́стырю ди́вный ста́да хрⷭ҇то́ва, вѣ́рный слꙋжи́телю бж҃їй, защи́тителю ре́вностный цр҃кве правосла́вныѧ!
Всѐ житїѐ твоѐ любвѐ ко гдⷭ҇ꙋ и҆ страда́нїй ѡ҆ хрⷭ҇тѣ̀ и҆спо́лнено бы́сть: ты́ бо мнѡ́гаѧ мꙋчє́нїѧ, болѣ̑зни и҆ скѡ́рби, и҆згна̑нїѧ и҆ заточє́нїѧ є҆гѡ̀ ра́ди претерпѣ́въ, и҆сповѣ́дникъ безстра́шенъ ꙗ҆ви́лсѧ є҆сѝ, и҆ вѣнце́мъ нетлѣ́нныѧ твоеѧ̀ сла́вы цр҃ковь рꙋ́сскꙋю ᲂу҆краси́лъ є҆сѝ. Всѧ̑ преда́въ въ рꙋ́цѣ бж҃їи, до́блественнѣ слꙋже́нїе твоѐ на землѝ соверши́лъ є҆сѝ и҆ на голго́ѳѣ а҆́нзерстѣй кончи́нꙋ мч҃нческꙋю прїѧ́ти сподо́билсѧ є҆сѝ, бг҃обл҃же́нне. Ны́нѣ къ нбⷭ҇номꙋ ли́кꙋ причте́нный, и҆ вѣне́цъ мч҃нческїй за хрⷭ҇та̀ прїе́мый, со мно́гими жи́тєли го́рнѧгѡ і҆ерⷭ҇ли́ма въ црⷭ҇твѣ бжⷭ҇твенныѧ любвѐ пребыва́еши.
Ѽ бл҃же́нне ѻ҆́тче на́шъ пе́тре, помозѝ на́мъ хра́минꙋ се́рдца своегѡ̀ незапꙋстѣ́вшꙋ храни́ти, наꙋчѝ на́съ ра́дость во страда́нїихъ ѡ҆ хрⷭ҇тѣ̀ ѡ҆брѣта́ти, ѡ҆зарѝ пꙋ́ть на́шъ крⷭ҇тный сїѧ́нїемъ твоеѧ̀ ст҃ы́ни. Бꙋ́ди и҆ ны́нѣ на́мъ ᲂу҆твержде́нїе въ вѣ́рѣ, да прише́дъ, ѡ҆брѧ́щетъ ю҆̀ гдⷭ҇ь не ᲂу҆га́снꙋвшꙋ въ сердца́хъ на́шихъ. Оу҆молѝ творца̀ всѧ́ческихъ дарова́ти на́мъ си́лꙋ и҆ крѣ́пость, да не ᲂу҆страши́вшесѧ стра́ха лꙋка́вагѡ, и҆сповѣ́даемъ тве́рдѡ хрⷭ҇та̀ сп҃са на́шего, и҆ є҆гѡ̀ млⷭ҇рдїемъ ча́сти ѕлы́хъ да и҆зба́вимсѧ въ де́нь стра́шный воздаѧ́нїѧ, и҆ въ ра́дость вѣ́чнꙋю всели́мсѧ, сла́вѧще ѡ҆ все́мъ вседержи́телѧ бг҃а, и҆ твоѐ бл҃года́тное къ немꙋ̀ ѡ҆ на́съ предста́тельство, во вѣ́ки вѣкѡ́въ. А҆ми́нь.
Ѽ сщ҃е́ннаѧ и҆ многострада́льнаѧ главо̀, земны́й а҆́гг҃ле и҆ нбⷭ҇ный человѣ́че, сщ҃енномч҃нче и҆ чꙋдотво́рче пе́тре, а҆рхїере́ю бж҃їй! Ты̀ въ годи́нꙋ лю́тыхъ гоне́нїй ꙗ҆ви́лсѧ є҆сѝ ꙗ҆́кѡ цр҃ко́вное свѣти́ло и҆ и҆́стинныѧ вѣ́ры ᲂу҆твержде́нїе, занѐ пред̾ бг҃обѡ́рцы дерзнове́ннѡ хрⷭ҇та̀ и҆сповѣ́далъ є҆сѝ, и҆ ꙗ҆́кѡ кади́ло бл҃гово́нное, въ же́ртвꙋ бг҃ꙋ себѐ прине́слъ є҆сѝ.
Ꙗ҆вѝ на́мъ, смирє́ннымъ и҆ грѣ̑шнымъ, ко ст҃ы̑мъ моще́мъ твои̑мъ притека́ющымъ, многомо́щное твоѐ застꙋпле́нїе, и҆ вкꙋ́пѣ со всѣ́ми ст҃ы́ми, во ѡ҆то́цѣхъ солове́цкихъ просїѧ́вшими, и҆спросѝ ᲂу҆ гдⷭ҇а всѧ́кїй да́ръ, коемꙋ́ждо бл҃гопотре́бенъ ко сп҃се́нїю. Се́ бо грѣ̑хъ на́шихъ ра́ди не и҆́мамы дерзнове́нїѧ ко гдⷭ҇ꙋ и҆ влⷣцѣ на́шемꙋ, и҆ првⷣный гнѣ́въ є҆гѡ̀ на сѧ̀ наведо́хомъ, и҆ всѧ́кїѧ млⷭ҇ти є҆гѡ̀ недостѡ́йны себѐ сотвори́хомъ. Тѣ́мже не смѣ́юще возвестѝ ѻ҆чеса̀ на̑ша къ высотѣ̀ нбⷭ҇нѣй, нижѐ моле́бный гла́съ ко гдⷭ҇ꙋ, се́рдцемъ сокрꙋше́ннымъ и҆ смире́ннымъ дꙋ́хомъ тебѐ мл҃твенника бл҃гопрїѧ́тнаго къ немꙋ̀ предлага́емъ, и҆ про́симъ тѧ̀ со ᲂу҆се́рдїемъ ве́лїимъ: бꙋ́ди застꙋ́пникъ и҆ хода́тай на́шъ пред̾ бг҃омъ, сꙋдїе́ю првⷣнѣйшимъ, се́ бо вы́нꙋ прогнѣвлѧ́емъ є҆го̀ согрѣшє́нїи мно́гими. Ны́нѣ ᲂу҆̀бо, во сла́вѣ нбⷭ҇нѣй пребыва́ѧ и҆ съ ли̑ки ст҃ы́хъ непреста́ннѡ славосло́вѧ прест҃о́е и҆́мѧ гдⷭ҇а, при́зри на на́съ грѣ́шныхъ, и҆ и҆зба́ви всѣ́хъ, вѣ́рою несꙋмнѣ́нною къ бг҃ꙋ приходѧ́щихъ, ѿ всѧ́кихъ бѣ́дъ, навѣ́тѡвъ и҆ прило́гѡвъ дїа́вольскихъ. Оу҆кротѝ во́лны страсте́й и҆ и҆скꙋше́нїй, востаю́щихъ на ны̀, да ра́ди ст҃ы́хъ твои́хъ мл҃твъ не ѡ҆б̾и́метъ на́съ напа́сть, и҆ не поги́бнемъ въ пꙋчи́нѣ грѣхо́внѣй и҆ въ ти́нѣ страсте́й на́шихъ.
Вознесѝ, бг҃оно́сне ѻ҆́тче на́шъ, сїѐ ма́лое моле́нїе недосто́йныхъ ра̑бъ твои́хъ влⷣцѣ хрⷭ҇тꙋ̀, да ᲂу҆тверди́тъ зе́млю на́шꙋ въ пра́вой вѣ́рѣ и҆ бл҃гоче́стїи, цр҃ковь ст҃ꙋ́ю да сохрани́тъ непреѡбори́мꙋ ѿ є҆ресе́й и҆ раско́лѡвъ, и҆ соблюде́тъ невреди́мꙋ ѿ всѧ́кагѡ ѕла̀. И҆спросѝ ᲂу҆ великодарови́тагѡ хрⷭ҇та̀ бг҃а на́шегѡ скорбѧ́щымъ ᲂу҆тѣше́нїе, недꙋ́гꙋющымъ и҆сцѣле́нїе, ѡ҆би̑димымъ застꙋпле́нїе, па́дшымъ во грѣхѝ покаѧ́нїе и҆ воста́нїе, стра́ждꙋщымъ ѿ бѣсѡ́въ ско́рое свобожде́нїе, ѿ цр҃кве хрⷭ҇то́вы ѿпа́дшымъ вразꙋмле́нїе и҆ на пꙋ́ть сп҃се́нїѧ ѡ҆браще́нїе. Ты̀ мч҃нчески дꙋ́шꙋ твою̀ за вѣ́рꙋ положи́лъ є҆сѝ, да́рꙋй и҆ на́мъ мꙋ́жество подража́ти тебѣ̀, да ничто́же въ жи́зни се́й вре́меннѣй возмо́жетъ ѿлꙋчи́ти ны̀ ѿ любвѐ бж҃їѧ.
Ѽ ст҃и́телю хрⷭ҇то́въ, ѡ҆градѝ и҆ ᲂу҆крѣпѝ мл҃твами твои́ми гра́дъ се́й, да процвѣте́тъ въ не́мъ ре́вность ко сп҃се́нїю и҆ бл҃гоче́стїе. Ты̀ непреста́ннѡ ѡ҆ часѣ̀ сме́ртнѣмъ па́мѧть и҆мѣ́вый и҆ бл҃гꙋ́ю ча́сть и҆збра́нныхъ бж҃їихъ ѿ гдⷭ҇а полꙋчи́вый, сподо́би и҆ на́съ въ ми́рѣ и҆ покаѧ́нїи живо́тъ сво́й сконча́ти, и҆ црⷭ҇твїѧ бж҃їѧ наслѣ́дники бы́ти, и҆дѣ́же ты̀ водворѧ́ешисѧ со а҆́гг҃лы и҆ всѣ́ми ст҃ы́ми, хвалѧ̀ бг҃а въ трⷪ҇цѣ сла́вимаго, ѻ҆ц҃а̀, и҆ сн҃а, и҆ ст҃а́го дх҃а, во вѣ́ки вѣкѡ́въ. А҆ми́нь.