Канон святому священномученику Петру, архиепископу Воронежскому

Сло́во прему́дрости Госпо́дни испроси́вше, просла́вим по достоя́нию ди́внаго в ли́це святы́х Петра́ достоблаже́ннаго, святи́теля, му́ченика же и испове́дника, во дни́ гоне́ния по́двигом до́брым просия́вшаго и зало́г Христо́в до после́дняго издыха́ния неврежде́нно сохра́ньшаго.

От ю́ности благонра́вными роди́тели твои́ми благоче́стию науча́емь, о́браз Христо́в любо́вию в се́рдце твое́м носи́л еси́, свя́те Пе́тре, та́же и, доброде́телем ева́нгельским подража́ти тща́ся, в стра́се Бо́жии возраста́л еси́.

Чи́стым се́рдцем да́ры благода́ти во мно́жестве прие́м, предызбра́ние твое́ от Бо́га оправда́л еси́, святи́телю, пра́востию же ду́ха и дея́ний угоди́в Избра́вшему тя́, вои́стинну ца́рское свяще́ние яви́лся еси́.

Ре́вность Петро́ву по Бо́зе стяжа́в, святи́телю, соиме́нник тому́ достосла́вен яви́лся еси́ и, я́коже то́й, в лови́тву спасе́ния Бо́жия челове́ки управля́л еси́, воспреща́я си́лам вра́жиим, хотя́щим ду́ши людски́я погуби́ти.

Учи́тель духо́вный и нача́льник оби́телем и́ноческим бы́л еси́, достоблаже́нне, благоче́стию и́стинному неле́ностне науча́я, и, во́ины росси́йския во бране́х ми́лостивно утеша́я, пропове́дник ре́вностный Сло́ва Бо́жия яви́лся еси́, пита́я ду́ши от жи́тницы Христо́вы.

Же́зл святи́тельский от десни́цы Ти́хона Святе́йшаго, Первопресто́льника Росси́йскаго и испове́дника сла́внаго, досто́йно восприя́л еси́, блаже́нне Пе́тре, и, си́лою свы́ше оболки́йся, ни́вы Христо́вы де́латель му́дрый яви́лся еси́, пло́д творя́ в терпе́нии и Творца́, Господи́на жа́твы, воспева́я немо́лчно.

Во дни́ богоборе́ний лю́тых яви́ Госпо́дь земли́ Ру́сстей ве́рныя служи́тели Своя́, и́же, стра́ха вра́жия не устраши́вшеся, ду́ши своя́ за о́вцы слове́сныя полага́ху, я́коже и Пе́тр, священнострада́лец Солове́цкий, Небе́сному Архиере́ю подо́бяся.

Священному́чениче досточе́стне, святи́телю Моско́вскому Петру́ тезоимени́те, ты́, же́зл архипа́стырский прие́м, в вертогра́де Госпо́днем, я́коже о́ный, усе́рдно потруди́лся еси́, сло́во и́стины исправля́я, се́ бо и́стинен Зва́вый тя́, Пребыва́яй во ве́ки.

Слу́жбу Боже́ственную все́ю душе́ю возлюби́в, досточу́дне, со ве́лиим тща́нием сию́ благогове́йне соверша́л еси́ и, ни еди́ному словеси́ слу́х се́рдца своего́ затворя́я, псалмопе́нию любо́вию навы́кл еси́.

Лю́дем ве́рным ра́дость приноси́л еси́, и́же, с тобо́ю вку́пе Бо́га славосло́вяще, утеше́ние в ско́рбех обрета́ху. Ты́ же, и в заточе́нии сы́й, с соу́зники твои́ми же́ртву благодаре́ния Бо́гу приноси́л еси́, престо́л живы́й Трапе́зы Госпо́дни собо́ю явля́я.

Духо́вным о́ком созерца́яй Го́спода воскре́сшаго и серде́чным слу́хом вне́мляй Боже́ственным глаго́лом, сла́достию любве́ Христо́вы исполня́лся еси́, о́тче Пе́тре, и па́ству твою́ му́дре упра́вил еси́.

К тебе́, стяжа́вшему Христа́ в се́рдцы свое́м, мно́жество взыску́ющих Его́, я́ко ко вмести́лищу благода́ти Бо́жия, прихожда́ху и утеше́ние в ско́рбех во святы́ни любве́ твоея́ обрета́ху.

По́двиг и́ноческий все́м се́рдцем возлюби́в, посту́ и моли́тве, терпе́нию и нестяжа́нию усе́рдно прилежа́л еси́, священному́чениче Пе́тре, Вы́шним же изволе́нием по́двиг ве́лий испове́дничества подъе́м, му́ченически житие́ на ото́це А́нзерстем сконча́л еси́.

Мно́гим уго́дником Бо́жиим собесе́дник бы́ти сподо́бился еси́, Пе́тре: ста́рцем оби́тели О́птинския и Диве́евским ста́рицам, та́же и вели́кому па́стырю Кроншта́дтскому Иоа́нну, и́хже наставле́ния и моли́твы в по́двизе кре́стнем тя́ укрепля́ху.

Тьма́, в ню́же погрузи́ся земля́ Ру́сская отступле́нием от Бо́га и ве́ры ослабле́нием, не возмо́же объя́ти све́та Бо́жия, во и́стинных Его́ свети́льницех горя́щаго. Ты́ же, священному́чениче Пе́тре, еди́н от си́х избра́нных, учине́нных во мра́це беззако́ния пропове́дати Христа́ на спасе́ние мно́гим.

Благода́тию Бо́жиею и вели́чием ду́ха твоего́ люде́й, во узи́лищах с тобо́ю су́щих, утеша́л еси́, присноблаже́нне, и, немо́лчныма устна́ма Христа́ пропове́дуя, из глубины́ неве́дения и́х возводи́л еси́ и све́том И́стины просвеща́л еси́.

Ве́лию любо́вь ко святи́телем Воро́нежским Митрофа́ну, Ти́хону и Анто́нию име́я, в ме́сте по́двигов святи́тельства и́х тру́д подъя́л еси́, достоблаже́нне Пе́тре, и гра́ду Воро́нежу ра́дость ве́лию яви́л еси́, утвержде́ние и благода́тную по́мощь подава́я.

В стеня́щем мо́ри безбо́жия земли́ Ру́сския, тве́рдый ото́к благода́ти яви́лся еси́, святи́телю Пе́тре, иде́же бо мно́жится гре́х, та́мо и благода́ть изоби́лует, излива́ющися ще́дро на спасе́ния ча́ющих.

Ре́вностию о до́ме Госпо́дни снеда́емь, отсту́пником, преда́ния церко́вная отверга́ющим и нововведе́ния льсти́вая вводя́щим, противоста́л еси́, о́тче Пе́тре, и, Предте́чевым гла́сом к покая́нию заблу́ждшия приводя́, мно́гия о́вцы во огра́ду церко́вную возврати́л еси́.

Мно́гажды искуше́ние темни́цею и у́зами прия́л еси́, от беззако́нник му́чимь бе́ боле́зньми и гла́дом, скорбьми́ и непра́вдами лю́тыми. Оба́че стра́ха и́х не устраши́лся еси́, страстоте́рпче, и любо́вь твоя́ к Бо́гу николи́же преста́, страда́ния же твоя́ ве́ре твое́й утвержде́ние де́яху и му́ки безви́нныя дая́ху души́ возвыше́ние.

Во святы́х ото́цех Солове́цких ве́рх подвиго́м твои́м обре́теся, священному́чениче, ты́ бо, зва́ние архиере́йское благогове́йно храня́ и заточе́нных в Бо́зе утвержда́я, архиепи́скоп Солове́цкий нарече́н бы́сть ве́рными соу́зники твои́ми, Пе́тре, я́коже и бра́т тво́й во Христе́, священному́ченик Иларио́н богоблаже́нный.

Во удале́нии от па́ствы твоея́ в заточе́нии ти́ бы́вшу, востаю́щия на тя́ наве́ты вра́жия сокруша́л еси́ моле́нием приле́жным, любе́зная же ча́да твоя́, я́же отлуче́на от тебе́ теле́сне, во еди́нем ду́се совокупле́на с тобо́ю бя́ху и во и́стинных путе́х Госпо́дних хожде́ние при́сно творя́ху.

Благослови́м Тя́, Всеси́льне Го́споди, Бо́же Вседержи́телю, Присносу́щне О́тче, Сло́ве Бо́жий, на́с ра́ди пло́ть прие́мый, и Ду́ше Всесвяты́й Животворя́щий, Тро́ице Единосу́щная и Неразде́льная, воспева́ем Тя́ со стра́хом и вопие́м: благослови́те, вся́ дела́ Госпо́дня, Го́спода.

Все́м житие́м Твои́м ве́рность Христу́ показа́в, се́рдце, любве́ испо́лнено, со благодаре́нием ко Го́споду простира́л еси́, священному́чениче Пе́тре, те́мже с Вы́шними чи́ны ны́не пред лице́м Госпо́дним предстои́ши и со все́ми святы́ми Бо́га хвале́бными пе́сньми прославля́еши.

Боже́ственныя слу́жбы отлуче́н бы́в и скорбьми́ мно́гими истязу́емь, моли́твою и богомы́слием жа́жду души́ твоея́ утоля́л еси́, о́тче Пе́тре, те́мже открове́ние Ду́ха дарова́ ти́ словеса́ богому́драя ко прославле́нию первонача́льника Солове́цкаго, Ге́рмана преподо́бнаго.

Лю́тою боле́знию уязви́вся и страда́ния тя́жкая претерпе́в, присноблаже́нне, сме́ртию всехва́льною просла́вил еси́ Го́спода. Те́мже и То́й ублажи́ тя в Це́ркви святы́х, явле́нии чу́дными назна́меновав души́ твоея́ свя́тость, и мо́щи честны́я твоя́ в поклоне́ние и почита́ние свяще́нное на́м ми́лостивно оста́ви.

Сло́во премꙋ́дрости гдⷭ҇ни и҆спроси́вше, просла́вимъ по достоѧ́нїю ди́внаго въ ли́цѣ ст҃ы́хъ петра̀ достобл҃же́ннаго, ст҃и́телѧ, мч҃нка же и҆ и҆сповѣ́дника, во дни̑ гоне́нїѧ по́двигомъ до́брымъ просїѧ́вшаго и҆ зало́гъ хрⷭ҇то́въ до послѣ́днѧгѡ и҆здыха́нїѧ неврежде́ннѡ сохра́ньшаго.

Ѿ ю҆́ности бл҃гонра́вными роди́тєли твои́ми бл҃гоче́стїю наꙋча́емь, ѻ҆́бразъ хрⷭ҇то́въ любо́вїю въ се́рдцѣ твое́мъ носи́лъ є҆сѝ, ст҃е пе́тре, та́же и҆ добродѣ́телемъ є҆ѵⷢ҇льскимъ подража́ти тща́сѧ, въ стра́сѣ бж҃їи возраста́лъ є҆сѝ.

Чи́стымъ се́рдцемъ да́ры бл҃года́ти во мно́жествѣ прїе́мъ, пред̾избра́нїе твоѐ ѿ бг҃а ѡ҆правда́лъ є҆сѝ, ст҃и́телю, пра́востїю же дꙋ́ха и҆ дѣѧ́нїй ᲂу҆годи́въ и҆збра́вшемꙋ тѧ̀, вои́стиннꙋ црⷭ҇кое сщ҃е́нїе ꙗ҆ви́лсѧ є҆сѝ.

Ре́вность петро́вꙋ по бз҃ѣ стѧжа́въ, ст҃и́телю, соиме́нникъ томꙋ̀ достосла́венъ ꙗ҆ви́лсѧ є҆сѝ, и҆ ꙗ҆́коже то́й, въ лови́твꙋ сп҃се́нїѧ бж҃їѧ человѣ́ки ᲂу҆правлѧ́лъ є҆сѝ, воспреща́ѧ си́ламъ вра̑жїимъ, хотѧ́щымъ дꙋ́шы людскі̑ѧ погꙋби́ти.

Оу҆чи́тель дꙋхо́вный и҆ нача́льникъ ѻ҆би́телємъ и҆́ночєскимъ бы́лъ є҆сѝ, достобл҃же́нне, бл҃гоче́стїю и҆́стинномꙋ нелѣ́ностнѣ наꙋча́ѧ, и҆ во́ины рѡссі̑йскїѧ во бране́хъ млⷭ҇тивнѡ ᲂу҆тѣша́ѧ, проповѣ́дникъ ре́вностный сло́ва бж҃їѧ ꙗ҆ви́лсѧ є҆сѝ, пита́ѧ дꙋ́шы ѿ жи́тницы хрⷭ҇то́вы.

Же́злъ ст҃и́тельскїй ѿ десни́цы тѵ́хѡна ст҃ѣ́йшагѡ, первопресто́льника рѡссі́йскагѡ и҆ и҆сповѣ́дника сла́внагѡ, досто́йнѡ воспрїѧ́лъ є҆сѝ, бл҃же́нне пе́тре, и҆ си́лою свы́ше ѡ҆болкі́йсѧ, ни́вы хрⷭ҇то́вы дѣ́латель мꙋ́дрый ꙗ҆ви́лсѧ є҆сѝ, пло́дъ творѧ̀ въ терпѣ́нїи и҆ творца̀, гдⷭ҇и́на жа́твы, воспѣва́ѧ немо́лчнѡ.

Во дни̑ бг҃оборе́нїй лю́тыхъ ꙗ҆вѝ гдⷭ҇ь землѝ рꙋ́сстѣй вѣ̑рныѧ слꙋжи́тєли своѧ̀, и҆̀же стра́ха вра́жїѧ не ᲂу҆страши́вшесѧ, дꙋ́шы своѧ̀ за ѻ҆́вцы словє́сныѧ полага́хꙋ, ꙗ҆́коже и҆ пе́тръ, сщ҃еннострада́лецъ солове́цкїй, нбⷭ҇номꙋ а҆рхїере́ю подо́бѧсѧ.

Сщ҃енномч҃нче досточⷭ҇тнѣ, ст҃и́телю моско́вскомꙋ петрꙋ̀ тезоимени́те, ты̀ же́злъ а҆рхїпа́стырскїй прїе́мъ, въ вертогра́дѣ гдⷭ҇немъ, ꙗ҆́коже ѻ҆́ный, ᲂу҆се́рднѡ потрꙋди́лсѧ є҆сѝ, сло́во и҆́стины и҆справлѧ́ѧ, се́ бо и҆́стиненъ зва́вый тѧ̀, пребыва́ѧй во вѣ́ки.

Слꙋ́жбꙋ бжⷭ҇твеннꙋю все́ю дꙋше́ю возлюби́въ, досточꙋ́дне, со ве́лїимъ тща́нїемъ сїю̀ бл҃гоговѣ́йнѣ соверша́лъ є҆сѝ, и҆ ни є҆ди́номꙋ словесѝ слꙋ́хъ се́рдца своегѡ̀ затворѧ́ѧ, ѱалмопѣ́нїю любо́вїю навы́клъ є҆сѝ.

Лю́демъ вѣ̑рнымъ ра́дость приноси́лъ є҆сѝ, и҆̀же съ тобо́ю вкꙋ́пѣ бг҃а славосло́вѧще, ᲂу҆тѣше́нїе въ ско́рбехъ ѡ҆брѣта́хꙋ. ты́ же, и҆ въ заточе́нїи сы́й, съ соꙋ̑зники твои́ми же́ртвꙋ бл҃годаре́нїѧ бг҃ꙋ приноси́лъ є҆сѝ, прⷭ҇то́лъ живы́й трапе́зы гдⷭ҇ни собо́ю ꙗ҆влѧ́ѧ.

Дꙋхо́внымъ ѻ҆́комъ созерца́ѧй гдⷭ҇а воскрⷭ҇шаго и҆ серде́чнымъ слꙋ́хомъ вне́млѧй бжⷭ҇твєннымъ глаго́лѡмъ, сла́достїю любвѐ хрⷭ҇то́вы и҆сполнѧ́лсѧ є҆сѝ, ѻ҆́тче пе́тре, и҆ па́ствꙋ твою̀ мꙋ́дрѣ ᲂу҆пра́вилъ є҆сѝ.

Къ тебѐ, стѧжа́вшемꙋ хрⷭ҇та̀ въ се́рдцы свое́мъ, мно́жество взыскꙋ́ющихъ є҆го̀, ꙗ҆́кѡ ко вмѣсти́лищꙋ бл҃года́ти бж҃їѧ, прихожда́хꙋ и҆ ᲂу҆тѣше́нїе въ ско́рбехъ во ст҃ы́ни любвѐ твоеѧ̀ ѡ҆брѣта́хꙋ.

По́двигъ и҆́ноческїй всѣ́мъ се́рдцемъ возлюби́въ, постꙋ̀ и҆ мл҃твѣ, терпѣ́нїю и҆ нестѧжа́нїю ᲂу҆се́рднѡ прилѣжа́лъ є҆сѝ, сщ҃енномч҃нче пе́тре, вы́шнимъ же и҆зволе́нїемъ по́двигъ ве́лїй и҆сповѣ́дничества под̾е́мъ, мч҃нчески житїѐ твоѐ на ѡ҆то́цѣ а҆́нзерстѣмъ сконча́лъ є҆сѝ.

Мнѡ́гимъ ᲂу҆го́дникѡмъ бж҃їимъ собесѣ́дникъ бы́ти сподо́билсѧ є҆сѝ, пе́тре: ста́рцємъ ѻ҆би́тели ѻ҆́птинскїѧ и҆ дивѣ́євскимъ ста́рицамъ, та́же и҆ вели́комꙋ па́стырю кроншта́дтскомꙋ і҆ѡа́ннꙋ, и҆̀хже наставлє́нїѧ и҆ мл҃твы въ по́двизѣ крⷭ҇тнѣмъ тѧ̀ ᲂу҆крѣплѧ́хꙋ.

Тьма̀, въ ню́же погрꙋзи́сѧ землѧ̀ рꙋ́сскаѧ ѿстꙋпле́нїемъ ѿ бг҃а и҆ вѣ́ры ѡ҆слабле́нїемъ, не возмо́же ѡ҆б̾ѧ́ти свѣ́та бж҃їѧ, во и҆́стинныхъ є҆гѡ̀ свѣти́льницѣхъ горѧ́щагѡ. ты́ же, сщ҃енномч҃нче пе́тре, є҆ди́нъ ѿ си́хъ и҆збра́нныхъ, ᲂу҆чине́нныхъ во мра́цѣ беззако́нїѧ проповѣ́дати хрⷭ҇та̀ на сп҃се́нїе мнѡ́гимъ.

Бл҃года́тїю бж҃їею и҆ вели́чїемъ дꙋ́ха твоегѡ̀ люде́й, во ᲂу҆зи́лищахъ съ тобо́ю сꙋ́щихъ, ᲂу҆тѣша́лъ є҆сѝ, приснобл҃же́нне, и҆ немо́лчныма ᲂу҆стна́ма хрⷭ҇та̀ проповѣ́дꙋѧ, и҆з̾ глꙋбины̀ невѣ́дѣнїѧ и҆̀хъ возводи́лъ є҆сѝ и҆ свѣ́томъ и҆́стины просвѣща́лъ є҆сѝ.

Ве́лїю любо́вь ко ст҃и́телємъ воро́нєжскимъ митрофа́нꙋ, тѵ́хѡнꙋ и҆ а҆нтѡ́нїю и҆мѣ́ѧ, въ мѣ́стѣ по́двигѡвъ ст҃и́тельства и҆́хъ трꙋ́дъ под̾ѧ́лъ є҆сѝ, достобл҃же́нне пе́тре, и҆ гра́дꙋ воро́нежꙋ ра́дость ве́лїю ꙗ҆ви́лъ є҆сѝ, ᲂу҆твержде́нїе и҆ бл҃года́тнꙋю по́мощь подава́ѧ.

Въ стенѧ́щемъ мо́ри безбо́жїѧ землѝ рꙋ́сскїѧ, тве́рдый ѡ҆то́къ бл҃года́ти ꙗ҆ви́лсѧ є҆сѝ, ст҃и́телю пе́тре и҆дѣ́же бо мно́житсѧ грѣ́хъ, та́мѡ и҆ бл҃года́ть и҆з̾ѡби́лꙋетъ, и҆злива́ющисѧ ще́дрѡ на сп҃се́нїѧ ча́ющихъ.

Ре́вностїю ѡ҆ до́мѣ гдⷭ҇ни снѣда́емь, ѿстꙋ́пникѡмъ, преда̑нїѧ цр҃кѡ́внаѧ ѿверга́ющымъ и҆ нововведе́нїѧ льсти̑ваѧ вводѧ́щымъ, противоста́лъ є҆сѝ, ѻ҆́тче пе́тре, и҆ прⷣте́чевымъ гла́сомъ къ покаѧ́нїю заблꙋ́ждшыѧ приводѧ̀, мнѡ́гїѧ ѻ҆́вцы во ѡ҆гра́дꙋ цр҃ко́внꙋю возврати́лъ є҆сѝ.

Мно́гажды и҆скꙋше́нїе темни́цею и҆ ᲂу҆́зами прїѧ́лъ є҆сѝ, ѿ беззакѡ́нникъ мꙋ́чимь бѣ̀ болѣ́зньми и҆ гла́домъ, скорбьмѝ и҆ непра́вдами лю́тыми. ѻ҆ба́че стра́ха и҆́хъ не ᲂу҆страши́лсѧ є҆сѝ, стрⷭ҇тоте́рпче, и҆ любо́вь твоѧ̀ къ бг҃ꙋ николи́же преста̀, страда̑нїѧ же твоѧ̀ вѣ́рѣ твое́й ᲂу҆твержде́нїе дѣ́ѧхꙋ и҆ мꙋ̑ки безви̑нныѧ даѧ́хꙋ дꙋшѝ возвыше́нїе.

Во ст҃ы́хъ ѡ҆то́цѣхъ солове́цкихъ ве́рхъ подвигѡ́мъ твои̑мъ ѡ҆брѣ́тесѧ, сщ҃енномч҃нче, ты́ бо, зва́нїе а҆рхїере́йское бл҃гоговѣ́йнѡ хранѧ̀ и҆ заточе́нныхъ въ бз҃ѣ ᲂу҆твержда́ѧ, а҆рхїепⷭ҇копъ солове́цкїй нарече́нъ бы́сть вѣ́рными соꙋ́зники твои́ми, пе́тре, ꙗ҆́коже и҆ бра́тъ тво́й во хрⷭ҇тѐ, сщ҃енномч҃нкъ і҆ларїѡ́нъ бг҃обл҃же́нный.

Во ᲂу҆дале́нїи ѿ па́ствы твоеѧ̀ въ заточе́нїи тѝ бы́вшꙋ, востаю́щыѧ на тѧ̀ навѣ́ты вра̑жїѧ сокрꙋша́лъ є҆сѝ моле́нїемъ прилѣ́жнымъ, любє́знаѧ же ча̑да твоѧ̀, ꙗ҆̀же ѿлꙋче́на ѿ тебє̀ тѣле́снѣ, во є҆ди́нѣмъ дꙋ́сѣ совокꙋпле́на съ тобо́ю бѧ́хꙋ и҆ во и҆́стинныхъ пꙋте́хъ гдⷭ҇нихъ хожде́нїе при́снѡ творѧ́хꙋ.

Бл҃гослови́мъ тѧ̀, всеси́льне гдⷭ҇и, бж҃е вседержи́телю, присносꙋ́щне ѻ҆́ч҃е, сло́ве бж҃їй, на́съ ра́ди пло́ть прїе́мый, и҆ дш҃е всест҃ы́й животворѧ́щїй, трⷪ҇це є҆диносꙋ́щнаѧ и҆ нераздѣ́льнаѧ, воспѣва́емъ тѧ̀ со стра́хомъ и҆ вопїе́мъ: бл҃гослови́те, всѧ̀ дѣла̀ гдⷭ҇нѧ, гдⷭ҇а.

Всѣ́мъ житїе́мъ твои́мъ вѣ́рность хрⷭ҇тꙋ̀ показа́въ, се́рдце, любвѐ и҆спо́лнено, со бл҃годаре́нїемъ ко гдⷭ҇ꙋ простира́лъ є҆сѝ, сщ҃енномч҃нче пе́тре, тѣ́мже съ вы́шними чи̑ны ны́нѣ пред̾ лице́мъ гдⷭ҇нимъ предстои́ши и҆ со всѣ́ми ст҃ы́ми бг҃а хвале́бными пѣ́сньми прославлѧ́еши.

Бжⷭ҇твенныѧ слꙋ́жбы ѿлꙋче́нъ бы́въ и҆ скорбьмѝ мно́гими и҆стѧзꙋ́емь, мл҃твою и҆ бг҃омы́слїемъ жа́ждꙋ дꙋшѝ твоеѧ̀ ᲂу҆толѧ́лъ є҆сѝ, ѻ҆́тче пе́тре, тѣ́мже ѿкрове́нїе дх҃а дарова̀ тѝ словеса̀ бг҃омꙋ̑драѧ ко прославле́нїю первонача́льника солове́цкагѡ, ге́рмана прпⷣбнагѡ.

Лю́тою болѣ́знїю ᲂу҆ѧзви́всѧ и҆ страда̑нїѧ тѧ́жкаѧ претерпѣ́въ, приснобл҃же́нне, сме́ртїю всехва́льною просла́вилъ є҆сѝ гдⷭ҇а. тѣ́мже и҆ то́й ᲂу҆бл҃жи́ тѧ въ цр҃кви ст҃ы́хъ, ꙗ҆влє́нїи чꙋ́дными назна́меновавъ дꙋшѝ твоеѧ̀ ст҃ость, и҆ мо́щи чⷭ҇тны̑ѧ твоѧ̀ въ поклоне́нїе и҆ почита́нїе сщ҃е́нное на́мъ млⷭ҇тивнѡ ѡ҆ста́ви.