Песнь 1
Ирмос
Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.
Преподо́бне о́тче Феодо́сие, моли́ Бо́га о на́с.
Тропарь
Озари́, Христе́ Бо́же Преве́чный, Све́те от Све́та, омраче́ннаго мя́, да Богому́драго пою́ Феодо́сия.
Тропарь
Све́та сподо́би, о́тче, прине́сшаго тебе́ пе́ние невече́рняго улучи́ти, в не́мже лику́еши.
Тропарь
Любве́ Боже́ственныя теплото́ю разже́гся, преподо́бне, изсуши́л еси́ пото́ки стра́стнаго взыгра́ния.
Богородичен
Во утро́бе Твое́й вме́щши Невмести́маго, все́х Творца́, изба́ви от лю́тых пою́щия Тя́, Всенепоро́чная.
Песнь 3
Ирмос
Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.
Преподо́бне о́тче Феодо́сие, моли́ Бо́га о на́с.
Тропарь
Возлюби́л еси́ от ю́ности усе́рдно Христо́ви рабо́тати, Его́же ра́ди вся́ презре́л еси́, до́лу влеку́щая.
Тропарь
Очи́стив у́м, те́ло и ду́х, треблаже́нне, до́м бы́л еси́ Трисо́лнечнаго Све́та, укра́шен доброде́тельми.
Тропарь
Естество́ пло́ти воздержа́нием утончи́л еси́, Христа́ име́я, Феодо́сие, укрепля́юща тя́ к по́двигом.
Богородичен
Моли́, Всечи́стая и Неискусобра́чная Мари́е, Сы́на Твоего́ и Бо́га на́шего, посла́ти на́м ве́лию ми́лость.
Песнь 4
Ирмос
Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Преподо́бне о́тче Феодо́сие, моли́ Бо́га о на́с.
Тропарь
Си́лою Влады́чнею лестца́ кова́рство разруши́л еси́, преше́д немяте́жно в ра́йская селе́ния.
Тропарь
Па́че бу́дущаго ничто́же и́но предпочти́л еси́ и сего́ ра́ди насле́довал еси́ ве́чное блаже́нство, о́тче на́ш Феодо́сие.
Тропарь
Сле́зными пото́ки омы́л еси́ нечистоту́ грехо́вную, бде́нием же и моли́твами лико́м святы́х сопричте́н бы́л еси́.
Богородичен
Еди́ну Тя́ пое́м и по рождестве́ Де́ву, Богоро́дице: Ты́ бо Сло́во пло́тию нетле́нно родила́ еси́ ми́рови.
Песнь 5
Ирмос
Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Преподо́бне о́тче Феодо́сие, моли́ Бо́га о на́с.
Тропарь
О́ко се́рдца упра́вив ко Творцу́ все́х, Феодо́сие, и разсмотри́в, ко́зни вра́жия твои́м тве́рдым смы́слом низложи́л еси́.
Тропарь
Мудрова́ния пло́ти покори́л еси́ ду́хови, умо́м к Вы́шнему возревнова́в, и от Него́ прия́л еси́ духо́вную благода́ть.
Тропарь
Основа́ние, его́же проти́вник не подви́же, кре́пко положи́в в души́ твое́й, живу́ща име́л еси́ Свята́го Ду́ха.
Богородичен
Щедро́т бе́здну иму́щи, Де́во Богоро́дице, при́зри на мя́, озло́бленнаго грехми́, и в ро́в па́дша возведи́ к покая́нию.
Песнь 6
Ирмос
Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.
Преподо́бне о́тче Феодо́сие, моли́ Бо́га о на́с.
Тропарь
Авраа́му подо́бяся, оста́вив земна́го оте́чества гра́д, мно́гим тща́нием Христу́ после́довал еси́.
Тропарь
Бога́тство и сла́ву презре́в, одея́ние жесто́кое носи́л еси́, си́м истка́в себе́ оде́жду нетле́ния.
Тропарь
Удобри́л еси́ себе́, Богому́дре, кра́сными восхожде́нии к Небе́сным восте́к, Боже́ственными кри́лы.
Богородичен
Де́вство чи́сто соблю́дши и Безле́тное Сло́во под коне́ц ле́том ро́ждши, Твои́м моле́нием спаси́ пою́щия Тя́.
Песнь 7
Ирмос
А́нгелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших.
Преподо́бне о́тче Феодо́сие, моли́ Бо́га о на́с.
Тропарь
Пло́тию обложе́н, безпло́тныя победи́л еси́, непреста́нно Христо́ви зовы́й: благослове́н еси́, Бо́же оте́ц на́ших.
Тропарь
Огне́м Боже́ственным те́рние грехо́вных страсте́й попали́л еси́, Богому́дре, поя́: благослове́н еси́, Бо́же оте́ц на́ших.
Тропарь
Ю́ности раче́ния оплева́в разу́мно, всего́ себе́ Бо́гови возложи́л еси́, поя́: благослове́н еси́, Бо́же оте́ц на́ших.
Богородичен
Небесе́ ши́ршую Де́ву показа́ пра́вды Со́лнце, из Нея́ возсия́в, Спа́с пою́щих: благослове́н еси́, Бо́же оте́ц на́ших.
Песнь 8
Ирмос
Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.
Преподо́бне о́тче Феодо́сие, моли́ Бо́га о на́с.
Тропарь
Славосло́вием всено́щным при́сно соодоле́л еси́ страсте́м, преблаже́нне, поя́: благослови́те, дела́ Госпо́дня, Го́спода.
Тропарь
Неприкоснове́ннаго улучи́в све́та, с ли́ки святы́х водворя́ешися, о́тче, поя́: благослови́те, дела́ Госпо́дня, Го́спода.
Тропарь
Го́рняго Иерусали́ма дости́гнути сподо́би, о́тче Феодо́сие, пою́щия: благослови́те, дела́ Госпо́дня, Го́спода.
Богородичен
Обожи́л е́сть, из Тебе́ вопло́щся, Госпо́дь, Влады́чице, земны́х существо́, пою́щих: благослови́те, дела́ Госпо́дня, Го́спода.
Песнь 9
Ирмос
Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.
Преподо́бне о́тче Феодо́сие, моли́ Бо́га о на́с.
Тропарь
Любе́зно по́двиг сконча́в и возде́лав ни́ву душе́вную, пло́д стори́чный пожа́л еси́, о́тче Феодо́сие, тя́ чту́щих.
Тропарь
Ве́чныя дости́гл еси́ жи́зни кра́йним воздержа́нием и Све́т Присносу́щныя Тро́ицы зре́ти сподо́бился еси́, о́тче Богому́дре.
Тропарь
Ко Влады́це име́я дерзнове́ние, то́чиши исцеле́ния, и все́м, чту́щим па́мять твою́, о́тче, ми́лость испроси́.
Богородичен
Ада́мовым вкуше́нием приста́вленное ору́жие Тобо́ю, Пречи́стая, вхо́д дае́т, стыдя́ся копия́, пробо́дшаго Ро́ждшагося из Тебе́.