Песнь 1
Ирмос
Помо́щник и Покрови́тель бы́сть мне́ во спасе́ние, Се́й мо́й Бо́г, и просла́влю Его́, Бо́г отца́ моего́, и вознесу́ Его́, сла́вно бо просла́вися.
Тропарь
Бо́же, Спа́се мо́й, отве́рзи ми́ устне́ и язы́к мо́й уясни́, я́ко да воспою́ па́мять преподо́бнаго Твоего́, его́же на земли́ удиви́л еси́ славосло́вити Тя́, сла́вно бо просла́вися.
Тропарь
Па́мять твоя́, преподо́бне, пребыва́ет в ро́д и ро́д, сию́ почита́юще и Боже́ственныя твоея́ сла́вы насыща́ющеся, досто́йно Бо́жия дарова́ния, де́тели, тебе́ воздае́м, Го́сподеви пою́ще, сла́вно бо просла́вися.
Тропарь
К Боже́ственней ра́це твое́й, веселя́щеся, приближа́емся и хва́лим Боже́ственный тво́й зра́к, и́же в Вы́шних поко́ищех пребыва́ет, Го́сподеви пою́ще, сла́вно бо просла́вися.
Богородичен
Окова́нных Свободи́теля, Богоро́дице, и те́мных Просвети́теля чре́во Твое́ пресвято́е вмести́, Его́же рождество́м и́дольския льсти́ свобо́ждшеся, и и́стинную Тя́ навыко́хом воспева́ти Бо́жию Ма́терь.
Песнь 3
Ирмос
Утверди́, Го́споди, на ка́мени за́поведей Твои́х подви́гшееся се́рдце мое́, я́ко Еди́н Свя́т еси́ и Госпо́дь.
Тропарь
Па́мять твоя́ пребыва́ет в ве́к ве́ка, свя́те, кре́пость се́рдца твоего́, в ро́д и ро́д, ти́ уподобля́ющеся и Боже́ственныя твоея́ сла́вы насыща́ющеся, досто́йно тя́ воспева́ем.
Тропарь
Во́д от исто́чника ева́нгельскаго пи́в досто́йно, от чре́ва ны́не ре́ки чуде́с источа́еши и напая́еши ве́рою притека́ющия ти́.
Тропарь
Кре́пкую с высоты́ по́мощь и просвеще́ние посли́ ра́зума, я́ко ра́вно тя́ А́нгелом похва́лим, преподо́бне Ефре́ме, ты́ бо исто́чник чудесе́м бы́сть.
Богородичен
Све́т Боже́ственный из чре́ва Твоего́ возсия́, ве́рныя благоуха́я, Сего́ благово́ния получи́вше, омраче́ния свободи́хомся Тобо́ю, Богоро́дице Пречи́стая.
Песнь 4
Ирмос
Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: услы́шах слу́х Тво́й и убоя́хся; сла́ва си́ле Твое́й, Го́споди.
Тропарь
Чудеса́, и́хже Влады́кою сподо́блен бы́сть, преподо́бне, зря́ще, приходя́щии к ра́це твое́й, духо́вный сла́дости насыща́емся, предста́теля тя́ иму́ще ко Влады́це, и свобо́ду прича́стия Боже́ственнаго улучи́ти мо́лимся, пою́ще: си́ле Твое́й сла́ва, Человеколю́бче.
Тропарь
Восприи́м житие́, и́же на Небесе́х пребыва́ние, со А́нгелы лику́еши, я́ко, оста́вив зе́млю и оте́чество свое́, пресели́лся еси́ та́мо су́щему пребыва́нию.
Тропарь
Облиста́л еси́, я́ко невече́рнее со́лнце, гра́д Торже́к просвеща́я, преподо́бне Ефре́ме, тьмы́ изба́ви страсте́й, и́же на на́с наве́туемых, возста́ви от вра́г непреткнове́нным бы́ти, те́м пое́м твою́ святу́ю па́мять.
Богородичен
Чре́во деви́ческое но́сит Своего́ Созда́теля, еде́мская две́рь отверза́ется, а́бие ве́рных со́нми дерзнове́нно вхо́дят, и́стинную Богоро́дицу ве́рно восхваля́ют, Рожде́нному от Нея́ зову́ще: си́ле Твое́й сла́ва, Человеколю́бче.
Песнь 5
Ирмос
Ми́р мно́г лю́бящим Тя́, Христе́, и но́щь просвеще́ния в пи́щи слове́с Твои́х, сего́ ра́ди, от но́щи у́тренююще, про́сим ми́лости от Тебе́, Человеколю́бче.
Тропарь
Пра́зднующим све́тло честну́ю па́мять твою́, преподо́бне Ефре́ме, и чту́щим честны́я мо́щи твоя́, ми́р испроси́, усо́бныя же ра́ти укроти́, мо́лимтися, преподо́бне, боле́зни на́ша уврачу́й моли́твами твои́ми.
Тропарь
Мо́лниями чуде́с твои́х, преподо́бне всебога́те Ефре́ме, це́рковь твою́ озари́, гра́д Торже́к и лю́ди бо в не́м осия́й, пра́зднующия любо́вию па́мять твою́.
Тропарь
Преблаже́нне преподо́бне Ефре́ме, моли́ся приле́жно, отгна́ти от оби́тели се́й належа́щую ско́рбь на́шу и премину́ти, и грехо́м проще́ние испроси́, и язы́ческое преще́ние и о́блак разгна́ти, да тя́, преподо́бне, велича́ем.
Богородичен
Пра́дедняя кля́тва разреши́ся и прама́терняя боле́знь исцели́ся, Пречи́стая, чре́ва Твоего́ рождество́м, без се́мене бо заче́нши Сло́во, родила́ еси́, Ему́же приле́жно моли́ся спасти́ся на́м.
Песнь 6
Ирмос
Возопи́х все́м се́рдцем мои́м к Ще́дрому Бо́гу, и услы́ша мя́ от а́да преиспо́дняго, и возведе́ от тли́ живо́т мо́й.
Тропарь
Честна́я твоя́ ра́ка, преподо́бне, возжже́нием свещи́ в Торже́к собира́ющихся просвеща́ет: гряди́те, вои́стинну просвеща́емся, ве́рнии.
Тропарь
Гра́ду наше́ствие тече́т, провосхища́я прири́нувших на честну́ю твою́ па́мять, преподо́бне, по гла́су Ева́нгелия, я́коже рече́ Госпо́дь: прииди́те ко Мне́, вси́ тружда́ющиися и обремене́ннии, я́ко кро́ток е́смь и смире́н се́рдцем, и обря́щете поко́й душа́м ва́шим.
Тропарь
Я́коже неистеко́мый исто́чник, источа́еши исцеле́ний ре́ки от честны́я своея́ ра́ки, подае́ши врачева́ние страсте́м неисце́льным, слепы́м дае́ши све́т, и глухи́м слы́шание, и хромы́м хожде́ние, разсла́бленным здра́вие и все́м благода́ть излива́еши, я́ко ми́ро на главе́, сходя́щее на браду́ Ааро́ню, ра́дости же свещу́ возжига́я у цельбоно́снаго гро́ба своего́, о́тче Ефре́ме.
Богородичен
Искони́ проро́чествия о Тебе́ прореко́шася, ны́не же на Тебе́ испо́лнися, Пречи́стая: о́в бо Тя́ руно́ пронарече́, на него́ сни́де Сло́во Бо́жие, ны́не же Ты́ Де́вою роди́ Го́спода.
Песнь 7
Ирмос
Неизрече́нное чу́до: в пещи́ Изба́вивый преподо́бныя о́троки из пла́мене во Гро́бе ме́ртв, бездыха́нен полага́ется во спасе́ние на́с, пою́щих: Изба́вителю Бо́же, благослове́н еси́.
Тропарь
Благода́тию Бо́жиею нетле́нны сохранены́ бы́ша честны́я мо́щи твоя́, преподо́бне Ефре́ме, разли́чная исцеле́ния источа́ют ве́рою чту́щим па́мять твою́. Те́мже вопие́м, ве́рнии: благослове́н Бо́г оте́ц на́ших.
Тропарь
Призыва́ющих и́мя твое́ во вся́ком ме́сте, преподо́бне, изба́ви от вся́каго зла́ и лю́тых нахожде́ний, да не одоле́ет на́с сме́рть лю́тая, вопию́щих: благослове́н Бо́г оте́ц на́ших.
Тропарь
Манове́нием Боже́ственным исцеле́ния подаю́т разли́чная мо́щи твоя́, преподо́бне, соде́йствует бо Ду́х Святы́й косте́м твои́м, исцеля́я во стра́се Бо́жий пою́щих: благослове́н Бо́г оте́ц на́ших.
Богородичен
Две́рь Тя́ затворе́нную нарече́ проро́к, Чи́стая, е́юже никто́же про́йде, то́кмо Бо́г Еди́н, отверза́ющий еде́мския вхо́ды ве́рно сла́вящим Тя́.
Песнь 8
Ирмос
За зако́ны оте́ческия блаже́ннии в Вавило́не ю́ноши предбе́дствующе, царю́ющаго оплева́ша повеле́ние безу́мное и, совоку́плени, и́мже не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.
Тропарь
Све́том Боже́ственным и благоуха́нием цвету́щи, свяще́нная па́мять твоя́, преподо́бне Ефре́ме, просвеща́ет ве́рных, созыва́ющи вопи́ти: Го́спода по́йте, дела́, и превозноси́те Его́ во ве́ки.
Тропарь
Жела́емыя сы́тости Боже́ственная твоя́ ча́да напо́лнишася, прося́ще, благоукраше́нною твое́ю па́мятию прохлажда́еми, и, веселя́щеся, ве́рно пою́т пресла́вную па́мять твою́, преподо́бне, взыва́юще: Го́спода воспева́йте, дела́, и превозноси́те Его́ во ве́ки.
Тропарь
Весе́лие приснотеку́щее твоя́ ра́ка то́чит, о́тче Ефре́ме сла́вне, приходя́щих очища́ет скве́рны плотски́я, вку́пе и душе́вныя, благода́тию все́х Царя́ и Бо́га на́шего, пою́щих: Го́спода воспева́йте, дела́, и превозноси́те Его́ во ве́ки.
Богородичен
Неоску́дныя пото́ки милосе́рдия источа́ющи призыва́ющим Тя́, Влады́чице, и пе́сньми хва́лящим Тя́, Пречи́стая, не оста́ви моля́щихся, Ца́рствию Сы́на Твоего́ сподо́би пою́щих: Го́спода воспева́йте, дела́, и превозноси́те Его́ во ве́ки.
Песнь 9
Ирмос
Стра́нствия Влады́чня и Безсме́ртныя Трапе́зы на Го́рнем ме́сте высо́кими умы́, ве́рнии, прииди́те, наслади́мся, возше́дша Сло́ва, от Сло́ва научи́вшеся, Его́же велича́ем.
Тропарь
Све́тлое торжество́, се́ па́мять свяще́нна, се́ благода́ть соше́дшимся ве́рно, оби́льно целова́ние точа́щим, присту́пим, ве́рнии, источа́ет бо на́м всечестна́я ра́ка блаже́ннаго Ефре́ма просвеще́ние приснотеку́щее безсме́ртия.
Тропарь
Вои́стинну ты́, преподо́бне, богоизбра́н на прославле́ние святы́м страстоте́рпцем, це́рковь бо воздви́гл еси́ Бори́са и Гле́ба, в не́йже ты́, блаже́нне, непреста́нно Бо́га сла́виши и по успе́нии свое́м чуде́с све́тлостию просвеща́еши у ра́ки моще́й твои́х.
Тропарь
Чудеса́ твори́ши мно́зи вои́стинну, преподо́бне, от цельбоно́снаго гро́ба твоего́ и исцеле́ния безчи́сленная незави́стно подава́еши с те́плою ве́рою притека́ющим к честне́й ра́це твое́й, Ефре́ме преблаже́нне, соблюди́ гра́д Торже́к и святу́ю оби́тель сию́.
Богородичен
Дре́вним преступле́нием введе́ в па́губу пра́баба естества́ земна́го, рождества́ Твоего́ прижи́тием, Пречи́стая, па́ки Бо́гу примири́хомся, Его́же сла́вяще, Тебе́, Де́во, велича́ем.