Песнь 1
Ирмос
Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.
Тропарь
Сло́во благода́ти пода́ждь ми́, Человеколю́бче Го́споди, я́ко да возмогу́ досто́йне просла́вити три́ святи́тели, и́хже Ты́ Са́м до́бре просла́вил еси́.
Тропарь
Вы́ в ми́ре просия́сте, прему́дрии святи́телие, исполне́нием Боже́ственных веле́ний Царя́ ца́рствующих, того́ ра́ди от Него́ просла́вистеся.
Тропарь
Просия́вшия в ми́ре благоче́стия све́том и нече́стия тьму́ в земли́ Зыря́нстей разгна́вшия, три́ святи́тели, ве́рнии, просла́вим.
Богородичен
Я́ко заче́ншую Предве́чное Сло́во и пло́тию па́че сло́ва Того́ ро́ждшую, Тя́, Пречи́стая, по до́лгу вси́ ро́ди земни́и прославля́ют.
Песнь 3
Ирмос
Утвержде́й в нача́ле Небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.
Тропарь
Воздержа́нием и́стинным и моли́твою непреста́нною, прему́дрии святи́телие Гера́симе, Питири́ме и Ио́но, возшли́ есте́ в Вы́шний гра́д, вопию́ще: не́сть свя́т, па́че Тебе́, Еди́не Человеколю́бче.
Тропарь
Я́ко иму́щия дерзнове́ние к Бо́гу, святи́телие преподо́бнии, моли́те спасти́ся на́м, ве́рою почита́ющим па́мять ва́шу и Христу́ вопию́щим: не́сть свя́т, па́че Тебе́, Еди́не Человеколю́бче.
Тропарь
Я́ко со́лнце, просия́ете доброде́тельми ва́шими, святи́телие, и тьму́ идолобе́сия от люде́й, ва́м вве́ренных, отгна́вше, все́х научи́сте взыва́ти не́сть свя́т, па́че Тебе́, Еди́не Человеколю́бче.
Богородичен
Не́бо и престо́л Бо́жий Тя́ почита́ем вси́, Богороди́тельнице Де́во, и немо́лчно Тебе́ вопие́м: не́сть Пречи́стыя, па́че Тебе́, еди́на Богома́ти.
Песнь 4
Ирмос
Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Тропарь
Прему́дростию, во усте́х ва́ших излия́вшеюся, святи́телие, ко Христо́ву позна́нию наста́висте лю́ди, и́же и просла́виша Того́ Божество́.
Тропарь
Спасти́ся моли́те лю́дем, и́хже уче́нии ва́шими ко Влады́це приведо́сте и научи́сте прославля́ти Того́ Божество́.
Тропарь
Преподо́бнии отцы́, Гера́симе, Питири́ме и Ио́но, приле́жно моли́те и на́м все́м дела́ Бо́жии разуме́ти и просла́вити Того́ Божество́.
Богородичен
Безневе́стная Неве́сто и Неискусобра́чная Чи́стая Ма́ти Христа́ Бо́га, моли́ спасти́ся душа́м прославля́ющих Того́ Божество́.
Песнь 5
Ирмос
У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.
Тропарь
Апо́стольски лю́ди от тьмы́ и́дольския просвети́вше, научи́сте вся́ взыва́ти: Го́споди, спаси́ ны́, кро́ме бо Тебе́, ино́го не ве́мы.
Тропарь
От Бо́га прие́мше свяще́нства избра́ние, Боже́ственною си́лою свы́ше оде́яни, ро́д Зыря́нский научи́ли есте́ испове́дати: кроме́ Еди́наго Бо́га, ино́го не ве́мы.
Тропарь
Ревни́телю Илии́ и Моисе́ю Богови́дцу возревнова́вше, отцы́ всечестни́и, посрами́сте идолослужи́телей, не восхоте́вшия пе́ти: кроме́ Еди́наго Бо́га, ино́го не ве́мы.
Богородичен
Я́ко Цари́цу, все́х Царя́ ро́ждшую, прииди́те, ве́рнии вси́, Благослове́нную почти́м, кроме́ бо Ея́, Помо́щницы таковы́я не ве́мы.
Песнь 6
Ирмос
Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.
Тропарь
Це́рковь Правосла́вную украси́сте, отцы́ блаже́ннии, доброде́тельными ва́шими дея́нии и нече́стие из ко́рене изсуши́ли есте́.
Тропарь
Ри́зою благода́ти оде́яннии, покро́вом моли́тв свои́х осеня́йте при́сно па́ству ва́шу и всю́ зе́млю Ру́сскую.
Тропарь
Вме́сто ору́жия сло́во взе́мше, святи́телие, и язы́ческая посе́кли есте́ уче́ния вся́ и изъясни́ли есте́ Тро́ицу лю́дем зыря́нским я́вственно.
Богородичен
Роди́вся от Де́вы, ми́р просвети́л еси́, Христе́ Бо́же, и мене́ све́том лица́ Твоего́ озари́ и спаси́ мольба́ми Ро́ждшия Тя́.
Песнь 7
Ирмос
В нача́ле зе́млю основа́вый и Небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.
Тропарь
И́стинныя святи́тели Боже́ственныя ста́ду Твоему́ па́стыри показа́вый, благослове́н Бо́г оте́ц на́ших.
Тропарь
Страсте́й пла́мень погаси́сте, святи́телие, и ду́ши благочести́вых Боже́ственне ороси́сте, вопию́щих: благослове́н Бо́г оте́ц на́ших.
Тропарь
Воздержа́нием, и бде́нием, и ве́рою и́стинною труди́вшияся, святи́телие, взыва́сте: благослове́н Бо́г оте́ц на́ших.
Богородичен
На́с ра́ди рожде́йся от Де́вы и от врага́ изба́вивый ми́р, благослове́н Бо́г оте́ц на́ших.
Песнь 8
Ирмос
На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.
Тропарь
Еле́ем Боже́ственнаго ра́дования я́ко святи́телие пома́зани бы́вше, но́выя лю́ди ко Христо́ву позна́нию приведо́сте и все́х научи́сте взыва́ти: благослове́н Бо́г оте́ц на́ших.
Тропарь
Бе́гают побежде́ннии ва́ми нача́льницы идолонеи́стовства, мудрова́ния же и́х и зло́бы изба́вльшиися вопию́т Христу́: благослове́н Бо́г оте́ц на́ших.
Тропарь
Ва́ми дре́вле просвеще́нных ча́да к ва́м, я́ко живы́м су́щим, глаго́лют: не оста́вите и на́с ко благоче́стию путеводи́ти, да с ва́ми вопие́м: благослове́н Бо́г оте́ц на́ших.
Богородичен
Все́льшемуся в чре́во Святы́я Де́вы и па́че сло́ва ве́тхаго Ада́ма обно́вльшему, Го́споду пое́м: благослове́н Бо́г оте́ц на́ших.
Песнь 9
Ирмос
Проявле́нное на горе́ законополо́жнику во огни́ и купине́ Рождество́ Присноде́вы в на́ше, ве́рных, спасе́ние пе́сньми немо́лчными велича́ем.
Тропарь
Безстра́стием и ве́рою, наде́ждою и любо́вию пу́ть к жи́зни ве́чной на́м показа́вшии, прему́дрии святи́телие, пе́сньми немо́лчными ва́с велича́ем.
Тропарь
Я́ко упа́сших лю́ди жезло́м Ду́ха Свята́го и от Бо́жия Це́ркве отгна́вших во́лки лю́тыя, ва́с, трие́ святи́телие всечестни́и, пе́сньми велича́ем.
Тропарь
Мо́щи ва́ша честны́я, блаже́ннии святи́телие Гера́симе, Питири́ме и Ио́но, с любо́вию обстоя́ще, пе́сньми достодо́лжными ва́с велича́ем.
Богородичен
Ра́дуйся, присноживо́тный Исто́чниче нетле́ния, ра́дуйся, всесве́тлый со́лнца О́блаче. Ра́дуйся, Ма́ти Бо́жия, Ю́же немо́лчно велича́ем.