Кондак 1
Избра́нный от Царя́ Си́л Го́спода Иису́са, ди́вно просла́вленный от Него́ святы́х моще́й твои́х явле́нием и мно́жеством чудотворе́ний, уго́дниче Бо́жий Иа́кове пра́ведный, о твои́х источа́емых на́м благодея́ниих благода́рни су́ще, похва́льное воспису́ем ти́ пе́ние, и мо́лимтися о е́же от вся́ких бе́д свободи́тися на́м твои́ми моли́твами, ра́достно и умиле́нно тебе́ зову́щым:
Ра́дуйся, Иа́кове пра́ведный, чудотво́рче Христо́в преди́вный.
Икос 1
Ангелоподо́бное житие́ твое́ на земли́ явля́еши на́м по сме́рти, богому́дре Иа́кове, святы́х моще́й твои́х пресла́вным прославле́нием, от ни́хже то́ки исцеле́ний благода́тных источа́еши неду́жным. Те́мже Росси́йская страна́ тобо́ю красу́ется, стяжа́вши тя́, богодарова́ннаго целе́бника, мы́ же с любо́вию ти́ зове́м:
Ра́дуйся, вели́кий уго́дниче Бо́жий, утаи́вый от на́с Оте́чествие твое́ земно́е, да уве́риши, я́ко от Бо́га к на́м по́слан еси́; ра́дуйся, равноа́нгельный челове́че, облиста́вый на́с боже́ственною заре́ю пресла́вных твои́х чуде́с.
Ра́дуйся, небожи́телю, горе́ со А́нгелы обита́яй; ра́дуйся, от Небе́сных высо́т благосе́рдием твои́м к земноро́дным приника́яй.
Ра́дуйся, в та́йне Го́сподеви порабо́тавый в преподо́бии и пра́вде; ра́дуйся, я́вно и пресла́вно от Го́спода просла́вленный нетле́нием и чудесы́.
Ра́дуйся, Иа́кове пра́ведный, чудотво́рче Христо́в преди́вный.
Кондак 2
Ви́дя льди́ну, ма́нием Бо́жиим проти́ву быстри́н водны́х плыву́щую, и от нея́ ды́м кади́льный горе́ вознося́щийся, недоумева́ху лю́дие ве́си Борови́чския о необы́чнем се́м явле́нии. Приста́вшей же льди́не ко бре́гу ре́чному, обрето́ша на не́й на кла́де древе́сней лежа́щыя, нетле́нием процве́тшия святы́я мо́щи твоя́, смиренному́дре Иа́кове. Те́мже и на́с подвиза́еши Просла́вльшему тя́ Го́споду пе́ти: Аллилу́иа.
Икос 2
Ра́зум боже́ственныя та́йны неразумева́юще, убоя́шася лю́дие Борови́чстии прия́ти тя́ незна́ема и непогребе́нна, и вспя́ть отри́нуша льди́ну с моща́ми твои́ми в быстри́ну ре́чную. О́ней же па́ки к ни́м три́жды возвра́щшейся, предста́в святы́й Иа́ков в со́ннем виде́нии старе́йшинам Борови́чским, обличи́л еси́ и́х си́це глаго́ля: «Что́ го́ните мя́ христиа́нина ве́рна, и́менем тезоимени́та свято́му апо́столу Иа́кову бра́ту Бо́жию су́ща»; о се́м ра́дующеся благодари́м и зове́м ти́ такова́я:
Ра́дуйся, незло́бием твои́м Христу́ Го́споду, от иуде́й гони́му, подража́вый; ра́дуйся, простоту́ и неразу́мие отри́нувших тя́ не наказа́вый.
Ра́дуйся, неве́дение и́х явле́нием твои́м вразуми́вый; ра́дуйся, ве́ру твою́ во Христа́ я́сно испове́давый.
Ра́дуйся, и́мя твое́ свято́е от на́с не скры́вый; ра́дуйся, благода́ть тебе́ от Го́спода дарова́нную чудесы́ пресла́вными прояви́вый.
Ра́дуйся, Иа́кове пра́ведный, чудотво́рче Христо́в преди́вный.
Кондак 3
Си́ла Бо́жия сла́вно просла́вися во святы́х моще́х твои́х, Иа́кове свя́те, к ни́мже притека́юще, неду́жнии исцеле́ние, слепи́и прозре́ние, неми́и ясноглаго́лание получа́ху, и здра́ви возвраща́хуся, прославля́юще тя́ чудотво́рца ми́лостиваго. Те́мже мо́лим тя́ и на́с, немощству́ющих грехи́ мно́гими, посети́ благоутро́бне и умоли́ за на́с Человеколю́бца Бо́га, Ему́же воспева́ем: Аллилу́иа.
Икос 3
Име́юще помышле́ния сумни́тельная о чу́днем явле́нии моще́й твои́х святы́х, лю́дие Борови́чстии на бре́зе ре́чнем положи́ша и́х на кла́де древе́сней: оба́че и вре́мя дово́льно лежа́вшим и́м та́мо, неистле́ни яви́шася и чудесы́ о твое́й святы́ни удостове́риша, свя́тче Бо́жий, прославля́емый от ве́рных богомо́льцев пе́нии си́ми:
Ра́дуйся, ю́ности преизя́щная похвало́; ра́дуйся, свя́то процве́тшая розго́ небе́снаго вертогра́да Иису́сова.
Ра́дуйся, цве́те нетле́ния, облагоуха́вый Росси́йскую страну́ воне́ю благоуха́ния Христо́ва; ра́дуйся, кри́не чистоты́, пренесе́нный от земли́ в ра́й превы́шний.
Ра́дуйся, многоцеле́бный сосу́де безме́зднаго врачева́ния неду́гов челове́ческих; ра́дуйся, чуде́с исто́чниче, ороси́вый на́с к плодоно́сию духо́вному.
Ра́дуйся, Иа́кове пра́ведный, чудотво́рче Христо́в преди́вный.
Кондак 4
Бу́ря недоуме́ния смути́ святи́теля Новогра́дскаго Феодо́сиа о пресла́внем явле́нии моще́й твои́х, свя́те Иа́кове: те́мже возвести́ти о се́м первосвяти́телю Моско́вскому Мака́рию и благове́рному царю́ Иоа́нну вско́ре потща́ся. Ти́и же ве́сть благу́ю прие́мше, ве́рою позна́ша тя́ чудотво́рца богодарова́ннаго, и со благода́рным чу́вствием Просла́вльшему тя́ Христу́ Бо́гу возгласи́ша: Аллилу́иа.
Икос 4
Слы́шавше бли́жнии и да́льнии неисце́льно боля́щии, я́ко исто́чник целе́б то́чит свяще́нная ра́ка твоя́, уго́дниче Бо́жий Иа́кове, со тща́нием устреми́шася к тебе́ и по ве́ре свое́й приима́ху исцеле́ния свои́м неду́гом, немо́лчными усты́ возглаша́юще тебе́ сия́ пе́сненная словеса́:
Ра́дуйся, ско́рый помо́щниче скорбя́щих и озло́бленных; ра́дуйся, до́брый целе́бниче боле́знми обремене́нных.
Ра́дуйся, благи́й посети́телю неисце́льно стра́ждущих; ра́дуйся, скоропредста́тельный врачу́ отча́янно неду́гующих.
Ра́дуйся, укрепле́ние немощны́х и разсла́бленных; ра́дуйся, утеше́ние уныва́ющих и безнаде́жных.
Ра́дуйся, Иа́кове пра́ведный, чудотво́рче Христо́в преди́вный.
Кондак 5
Богосве́тлая лампа́да, еле́ем ми́лости Бо́жия испо́лненная и преизлива́ющаяся явля́ешися, свя́тче Бо́жий Иа́кове в посме́ртных дея́ниих твои́х, мно́гим бо с ве́рою притека́ющих к моще́м твои́м, благоде́тельствовал еси́ чуде́сно, и безчи́сленных неду́жных уврачева́л еси́ ми́лостивно, подвиза́я на́с гла́сы немо́лчными воспева́ти тобо́ю благоде́ющему на́м Бо́гу: Аллилу́иа.
Икос 5
Ви́девше ве́лию благода́ть целе́бную, от Го́спода тебе́ дарова́нную по́сланнии от святи́теля Новогра́дскаго Феодо́сиа благогове́йнии свяще́нницы принесо́ша цельбопода́тельныя мо́щи твоя́ в хра́м Бо́жий, Иа́кове досточу́дне, да не сокры́т бу́дет толи́кий свети́льник чуде́с, но на све́щнице святоле́пнем Це́ркве Борови́чския да све́тит все́м, ве́рою чту́щым тя́ благохвале́нии си́ми:
Ра́дуйся, доброде́тели твоя́ во глубине́ смире́ния твоего́ от на́с сокры́вый; ра́дуйся, и моще́м твои́м святы́м вне́ хра́ма Бо́жия на до́лзе пребыва́ти попусти́вый.
Ра́дуйся, от брега́ ре́чнаго, я́ко би́сер многоце́нен в це́рковь Госпо́дню принесе́нный; ра́дуйся, я́ко сокро́вище дража́йшее, та́мо положе́нный.
Ра́дуйся, смире́ние соверше́нное и нищету́ нело́жную по сме́рти засвиде́тельствовавый; ра́дуйся, убо́жеством ри́з твои́х нестяжа́ние твое́ обличи́вый.
Ра́дуйся, Иа́кове пра́ведный, чудотво́рче Христо́в преди́вный.
Кондак 6
Пропове́дник немо́лчный твои́х чуде́с яви́ся святе́йший патриа́рх Ни́кон, и́же устро́ив оби́тель пресла́вну Богома́тери, та́мо святы́я мо́щи твоя́ с благоле́пною че́стию свяще́нства принести́ потща́ся, иде́же и ны́не, я́ко кри́н благоуха́нен пребыва́ют источа́юща исцеле́ния благода́тныя все́м тре́бующым, Бо́гу же вопию́щым: Аллилу́иа.
Икос 6
Возсия́л еси́ я́ко звезда́ путево́дная, заре́ю чуде́с твои́х, все́х путеводя́щая к Небе́сному Оте́чествию, Иа́кове всеблаже́нне. Кто́ бо не умили́тся, ви́дя, я́ко в ю́нем во́зрасте ста́рцев доброде́телию превозше́л еси́, и ве́лий да́р чудотворе́ний пра́ведно от Бо́га восприя́л еси́; о се́м диви́мся и зове́м ти́ во умиле́нии ду́ш и серде́ц:
Ра́дуйся, избра́нниче Бо́жий, непоро́чное житие́ на земли́ препроводи́вый; ра́дуйся, люби́миче Христо́в, кро́тостию и ти́хостию твое́ю блаже́нство кро́тких унасле́довавый.
Ра́дуйся, в ми́ре сконча́выйся и к преми́рным оби́телем ра́йским возше́дый; ра́дуйся, со а́нгелы и все́ми святы́ми та́мо на ве́ки водвори́выйся.
Ра́дуйся, граждани́не всесве́тлаго гра́да Иерусали́ма Го́рняго; ра́дуйся, а́нгеле земны́й и челове́че небе́сный.
Ра́дуйся, Иа́кове пра́ведный, чудотво́рче Христо́в преди́вный.
Кондак 7
Хотя́ Человеколю́бец Госпо́дь яви́ти и́стину Правосла́вия святы́я Восто́чныя Це́ркве благода́тным нетле́нием моще́й святы́х Свои́х уго́дников, и чудесы́ от ни́х истека́ющими, сию́ свиде́тельствует, во обличе́ние инове́рных и неве́рных, и во утвержде́ние правосла́вных. Сие́ ди́вное смотре́ние Бо́жие в пресла́внем явле́нии моще́й твои́х, Иа́кове пра́ведный, разуме́юще ве́рою, прино́сим Царю́ Небесе́ и земли́ благода́рственную пе́снь: Аллилу́иа.
Икос 7
Но́вое зна́мение благоволе́ния Бо́жия в стране́ Росси́йстей ви́дим в многочуде́снем явле́нии святы́х моще́й твои́х, Иа́кове пра́ведный, и с любо́вию притека́юще к твоему́ моли́твенному заступле́нию, я́ко богодарова́нному засту́пнику на́шему, прино́сим ти́ сия́ похвалы́:
Ра́дуйся, чудесы́ твои́ми и́стины святы́я правосла́вныя ве́ры удостове́ривый; ра́дуйся, прису́щей святе́й Восто́чней Це́ркви благода́ти Свята́го Ду́ха пропове́дниче.
Ра́дуйся, гряду́щаго воскресе́ния ме́ртвых све́тлый проо́бразе; ра́дуйся, немерца́ющаго трисо́лнечнаго сия́ния светле́йшее отображе́ние.
Ра́дуйся, ве́чныя безсме́ртныя о Христе́ жи́зни цельбоно́сныя проявле́ние; ра́дуйся, ра́йскаго несконча́емаго блаже́нства всежела́тельный на́м хода́таю.
Ра́дуйся, Иа́кове пра́ведный, чудотво́рче Христо́в преди́вный.
Кондак 8
Стра́нники и прише́льцы су́ще в ми́ре се́м преле́стнем, к тебе́ прибега́ем Иа́кове свя́те: упра́ви на́с вла́ющихся окормле́нием твои́м к ти́хому приста́нищу спасе́ния, наста́ви твои́ми моли́твами на стезю́ покая́ния, и заступи́ от вся́каго диа́вольскаго искуше́ния, да тобо́ю вспомоществу́еми, сподо́бимся улучи́ти блаже́нство ве́чное, и со а́нгелы и все́ми святы́ми Созда́телю на́шему пе́ти: Аллилу́иа.
Икос 8
Ве́сь бе́ в ни́жних, оба́че и вы́шних ду́хом не отступи́л еси́, свя́те Иа́кове, егда́ живя́ше на земли́. Ны́не же пребыва́еши в вы́шних, предстоя́ со а́нгелы Престо́лу Го́спода Сла́вы: оба́че и ни́жних не отступа́еши, моли́твами благоспоспе́шествуя на́м и чудесы́ посеща́я на́с, пою́щих тебе́ такова́я:
Ра́дуйся, неле́ностный во́ли Бо́жией исполни́телю; ра́дуйся, бу́йство Христо́во па́че прему́дрости мирски́я вмени́вый.
Ра́дуйся, во смире́нии глубо́цем безве́стно жи́знь пра́ведную сконча́вый; ра́дуйся, а́нгелы от земли́ к оби́телем небе́сным на ло́но Авраа́мле пренесе́нный.
Ра́дуйся, ли́ку святы́х Бо́жиих Престо́лу предстоя́щих горе́ сопричте́нный; ра́дуйся, благоволе́нием Бо́жиим и до́лу на земли́ нетле́нием и чудесы́ просла́вленный.
Ра́дуйся, Иа́кове пра́ведный, чудотво́рче Христо́в преди́вный.
Кондак 9
Вся́к во́зраст не неудо́бен благоче́стию быва́ет, а́ще осени́т свы́ше благода́ть Бо́жия, немощна́я врачу́ющи и оскудева́ющая восполня́ющи: те́мже и тебе́ уго́дниче Бо́жий, в ю́ностнем во́зрасте толи́ко укрепи́, я́ко вся́ доброде́тели удо́бно соверши́л еси́, и безпло́тным непоро́чностию и чистото́ю уподо́бился еси́, и еще́ на земли́ в бре́ннем телеси́, небе́сным нра́вом украше́нный, сподо́бился еси́ досто́йно пе́ти Бо́гу а́нгельскую пе́снь: Аллилу́иа.
Икос 9
Вити́йство му́дрых ми́ра сего́ недоуме́ет изъясни́ти та́йну чу́днаго нетле́ния моще́й святы́х Бо́жиих: мы́ же, испыта́ния чу́жди, ве́рою несумне́нною зало́г безсме́ртия в се́м ви́дяще, с любо́вию припа́даем ко святы́м и многоцеле́бным моще́м твои́м, свя́те Иа́кове, и я́ко ве́рнаго раба́ Христо́ва и чудотво́рца сла́внаго, венча́ем тя́ благохвале́нии си́ми:
Ра́дуйся, моли́тв благово́нное кади́ло, благоуха́ющее горе́ у Престо́ла Бо́жия; ра́дуйся, кри́не благово́нный, Це́рковь Росси́йскую арома́ты ра́йскими услади́вый.
Ра́дуйся, би́сере пресве́тлый, озари́вший на́с сия́нием пресла́вных чуде́с; ра́дуйся, заре́ безсме́ртия, возсия́вшая на́м от гро́ба, явля́ющаго нетле́нную жи́знь.
Ра́дуйся, мирополо́жнице благода́ти, на вся́к неду́г душе́вный врачева́ние источа́ющая; ра́дуйся, пода́телю ра́дования и утеше́ния вся́цей души́ скорбя́щей, с упова́нием и ве́рою к тебе́ притека́ющей.
Ра́дуйся, Иа́кове пра́ведный, чудотво́рче Христо́в преди́вный.
Кондак 10
Спасе́ние и блаже́нство ра́йское житие́м пра́ведным унасле́довав, свя́тче Бо́жий, ни в че́мже лише́н еси́, но ра́вный дина́рий с дре́вними вели́кими святы́ми от небе́снаго Домовлады́ки прия́в, моли́ приле́жно о е́же и на́м немощны́м и гре́шным житие́ сие́ вре́менное без поро́ка прейти́, и блаже́нство ве́чное улучи́ти, и во Ца́рствии Небе́снем ра́достно пе́ти Бо́гу Спаси́телю гре́шных: Аллилу́иа.
Икос 10
Стено́ю моли́тв твои́х, уго́дниче Христо́в, огради́ на́с от вся́каго душевре́днаго искуше́ния диа́вольскаго, я́ко тебе́ дарова́ на́м Преблаги́й Бо́г покро́в и защи́ту душа́м и телесе́м на́шым. Тебе́ у́бо прославля́ем и про́сим: помози́ на́м во вся́цей ско́рби и обстоя́нии, си́це тебе́ вопию́щым:
Ра́дуйся, Це́ркве торжеству́ющия на небеси́ изря́дное украше́ние; ра́дуйся, Це́ркве во́инствующия на земли́ кре́пкое вспоможе́ние.
Ра́дуйся, целому́дрия и чистоты́ зерца́ло светле́йшее; ра́дуйся, кро́тости и нищеты́ духо́вныя о́бразе соверше́ннейший.
Ра́дуйся, смире́ния люби́телю; ра́дуйся, в жи́зни и по сме́рти о́браз смиренному́дрия показа́вый.
Ра́дуйся, Иа́кове пра́ведный, чудотво́рче Христо́в преди́вный.
Кондак 11
Пе́ние умиле́нное, от любве́ и усе́рдия в похвалу́ тебе́ от на́с возноси́мое, приими́ благоутро́бне, свя́тче Бо́жий Иа́кове, воззри́ не на на́с недосто́йных, но на усе́рдное произволе́ние на́ше, и подража́я милосе́рдию Христа́ Спаси́теля на́шего, приклони́ся к на́м ми́лостивно, и в покая́нии преуспе́ти сподо́би, да твои́ми моли́твами всегда́ пое́м Бо́гу: Аллилу́иа.
Икос 11
Све́тлую па́мять твою́, я́ко торжество́ ве́ры и благоче́стия све́тле соверша́ет свята́я Христо́ва Це́рковь, уго́дниче Бо́жий и чудотво́рче Иа́кове, созыва́ющи ве́рныя ча́да своя́ на похвалу́ пра́веднаго жития́ твоего́ и пресла́вных чуде́с твои́х. Приими́ у́бо, ублажа́емый избра́нниче Христо́в, гла́сы хвале́бныя, тебе́ ра́достно от на́с возноси́мыя си́це:
Ра́дуйся, а́нгелов подо́бниче и челове́ков засту́пниче; ра́дуйся, святы́х сожи́телю при́сный Бо́гу.
Ра́дуйся, я́ко предстои́ши Бо́жию Престо́лу во све́те немерца́ющия сла́вы; ра́дуйся, венцено́сче, увенча́нный от руки́ Вседержи́теля.
Ра́дуйся, ри́зою нетле́ния облече́нный и да́ром чуде́с обогаще́нный; ра́дуйся, моли́твенниче неусыпа́яй и предста́телю богоприя́тный.
Ра́дуйся, Иа́кове пра́ведный, чудотво́рче Христо́в преди́вный.
Кондак 12
Благода́ть целе́бную прия́л еси́ от Всеще́драго Бо́га, Иа́кове свя́те, е́юже неду́ги и я́зи челове́ческия врачу́еши пресла́вно, не мзды́ от на́с ко уврачева́нию тре́буя, но ве́ры несумне́нныя ожида́я. Те́мже, ве́дуще тя́ врача́ благоиску́сна и целе́бника немздоприи́мна, к тебе́ прибега́ем и по проше́нию дарова́нная благодея́ния прие́млем, пою́ще Бо́гу: Аллилу́иа.
Икос 12
Пою́ще многочуде́сное прославле́ние святы́х моще́й твои́х, испове́дуем неисче́тная твоя́ благодея́ния, явле́нная и присноявля́емая тобо́ю все́м с ве́рою и любо́вию к тебе́ притека́ющым, Иа́кове досточу́дне, и́хже и на́с не лиши́ смире́нных, упова́ние на тя́ возложи́вших, и та́ко к тебе́ от глубины́ души́ вопию́щих:
Ра́дуйся, Святы́я Живонача́льныя Тро́ицы благоволе́нием горе́ осене́нный; ра́дуйся, а́нгельским светоза́рным си́лам сопричте́нный.
Ра́дуйся, ве́чнаго ликова́ния святы́х, во гла́се ра́дования блаже́нный соприча́стниче; ра́дуйся, блаже́нства неизглаго́ланнаго, пра́ведным от ве́ка угото́ваннаго сонасле́дниче.
Ра́дуйся, Ду́ха Свята́го оби́теле, чистото́ю благоукраше́нная; ра́дуйся, ду́ш и теле́с на́ших целе́бниче преми́лостивый.
Ра́дуйся, Иа́кове пра́ведный, чудотво́рче Христо́в преди́вный.
Кондак 13
О чудотво́рче преди́вный и преми́лостивый, Иа́кове преблаже́нне! Ма́лое сие́ моле́ние на́ше ми́лостивно прии́м, да́нною ти́ от Го́спода благода́тию уврачу́й не́мощи ду́ш и теле́с на́ших: моли́твами же твои́ми изми́ на́с гее́нския му́ки, и сподо́би с тобо́ю и все́ми святы́ми в ра́йских селе́ниих, пе́ти Бо́гу Спаси́телю на́шему: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
Ангелоподо́бное житие́ твое́ на земли́ явля́еши на́м по сме́рти, богому́дре Иа́кове, святы́х моще́й твои́х пресла́вным прославле́нием, от ни́хже то́ки исцеле́ний благода́тных источа́еши неду́жным. Те́мже Росси́йская страна́ тобо́ю красу́ется, стяжа́вши тя́, богодарова́ннаго целе́бника, мы́ же с любо́вию ти́ зове́м:
Ра́дуйся, вели́кий уго́дниче Бо́жий, утаи́вый от на́с Оте́чествие твое́ земно́е, да уве́риши, я́ко от Бо́га к на́м по́слан еси́; ра́дуйся, равноа́нгельный челове́че, облиста́вый на́с боже́ственною заре́ю пресла́вных твои́х чуде́с.
Ра́дуйся, небожи́телю, горе́ со А́нгелы обита́яй; ра́дуйся, от Небе́сных высо́т благосе́рдием твои́м к земноро́дным приника́яй.
Ра́дуйся, в та́йне Го́сподеви порабо́тавый в преподо́бии и пра́вде; ра́дуйся, я́вно и пресла́вно от Го́спода просла́вленный нетле́нием и чудесы́.
Ра́дуйся, Иа́кове пра́ведный, чудотво́рче Христо́в преди́вный.
Кондак 1
Избра́нный от Царя́ Си́л Го́спода Иису́са, ди́вно просла́вленный от Него́ святы́х моще́й твои́х явле́нием и мно́жеством чудотворе́ний, уго́дниче Бо́жий Иа́кове пра́ведный, о твои́х источа́емых на́м благодея́ниих благода́рни су́ще, похва́льное воспису́ем ти́ пе́ние, и мо́лимтися о е́же от вся́ких бе́д свободи́тися на́м твои́ми моли́твами, ра́достно и умиле́нно тебе́ зову́щым:
Ра́дуйся, Иа́кове пра́ведный, чудотво́рче Христо́в преди́вный.
Молитвы
О святы́й вели́кий пра́ведниче и пресла́вный чудотво́рче, богоблаже́нный уго́дниче Христо́в Иа́кове, ди́вно просла́вленный на Небеси́ и на земли́ да́нный на́м от Го́спода целе́бниче и засту́пниче, к тебе́ припа́даем с ве́рою, любо́вию и благогове́нием и мо́лимся от глубины́ души́: помози́ на́м, зело́ прогне́вавшим Го́спода и Созда́теля на́шего, и испроси́ на́м вся́ я́же к житию́ вре́менному и спасе́нию ве́чному потре́бная; земли́ плодоно́сие, возду́хов благорастворе́ние, ду́ш и теле́с здра́вие, в покая́нии и благоче́стии преспе́яние, ве́ры правосла́вныя укрепле́ние, суеве́рия посрамле́ние, неве́рия искорене́ние, и вся́каго блага́го проше́ния на́шего ко Го́споду исполне́ние.
Услы́ши, уго́дниче Бо́жий, вся́ку ду́шу христиа́нскую, в ско́рби и обстоя́нии тя́ моли́твенно призыва́ющую, ускори́ на по́мощь, облегчи́ ско́рби, уврачу́й неду́ги и яви́ся ско́рый предста́тель тре́бующих твоего́ заступле́ния. Наипа́че же в ча́с кончи́ны на́шея не закосни́ приити́ на по́мощь на́м и умоли́ Го́спода дарова́ти на́м кончи́ну живота́ на́шего ми́рну, безмяте́жну, святы́х Христо́вых Та́ин прича́стну и упова́ния испо́лнену да с наде́ждою спасе́ния безбе́дно пре́йдем стра́шный пу́ть возду́шных мыта́рств, и непреткнове́нно дости́гнем вожделе́ннаго о́наго Ца́рствия, е́же угото́вал Госпо́дь лю́бящым Его́. Е́й, свя́тче Бо́жий! Услы́ши на́с и не пре́зри моле́ния на́шего, но сотвори́ на́с соуча́стники бы́ти блаже́нства ве́чнаго, да вку́пе с тобо́ю спасе́ннии милосе́рдием Христа́ Спаси́теля на́шего воспое́м и просла́вим Его́ со Отце́м и Святы́м Ду́хом, во ве́ки веко́в. Ами́нь.
Конда́къ а҃
И҆збра́нный ѿ цр҃ѧ̀ си́лъ гдⷭ҇а і҆и҃са, ди́внѡ просла́вленный ѿ негѡ̀ ст҃ы́хъ моще́й твои́хъ ꙗ҆вле́нїемъ и҆ мно́жествомъ чꙋдотворе́нїй, ᲂу҆го́дниче бж҃їй і҆а́кѡве првⷣный, ѡ҆ твои́хъ и҆сточа́емыхъ на́мъ бл҃годѣѧ́нїихъ бл҃года́рни сꙋ́ще, похва́льное восписꙋ́емъ тѝ пѣ́нїе, и҆ мо́лимтисѧ ѡ҆ є҆́же ѿ всѧ́кихъ бѣ́дъ свободи́тисѧ на́мъ твои́ми мл҃твами, ра́достнѡ и҆ ᲂу҆миле́ннѡ тебѣ̀ зовꙋ́щымъ:
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
І҆́косъ а҃
А҆гг҃лоподо́бное житїѐ твоѐ на землѝ ꙗ҆влѧ́еши на́мъ по сме́рти, бг҃омꙋ́дре і҆а́кѡве, ст҃ы́хъ моще́й твои́хъ пресла́внымъ прославле́нїемъ, ѿ ни́хже то́ки и҆сцѣле́нїй бл҃года́тныхъ и҆сточа́еши недꙋ́жнымъ. тѣ́мже рѡссі́йскаѧ страна̀ тобо́ю красꙋ́етсѧ, стѧжа́вши тѧ̀, бг҃одарова́ннаго цѣле́бника, мы̀ же съ любо́вїю тѝ зове́мъ:
Ра́дꙋйсѧ, вели́кїй ᲂу҆го́дниче бж҃їй, ᲂу҆таи́вый ѿ на́съ ѻ҆те́чествїе твоѐ земно́е, да ᲂу҆вѣ́риши, ꙗ҆́кѡ ѿ бг҃а къ на́мъ по́сланъ є҆сѝ: ра́дꙋйсѧ, равноа́гг҃льный человѣ́че, ѡ҆блиста́вый на́съ бжⷭ҇твенною заре́ю пресла́вныхъ твои́хъ чꙋде́съ: ра́дꙋйсѧ, нб҃ожи́телю, горѣ̀ со а҆́гг҃лы ѡ҆бита́ѧй.
Ра́дꙋйсѧ, ѿ нбⷭ҇ныхъ высо́тъ бл҃госе́рдїемъ твои́мъ къ земнорѡ́днымъ приника́ѧй: ра́дꙋйсѧ, въ та́йнѣ гдⷭ҇еви порабо́тавый въ прпⷣбїи и҆ пра́вдѣ: ра́дꙋйсѧ, ꙗ҆́внѡ и҆ пресла́внѡ ѿ гдⷭ҇а просла́вленный нетлѣ́нїемъ и҆ чꙋдесы̀.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ в҃
Ви́дѧ льди́нꙋ, ма́нїемъ бж҃їимъ проти́вꙋ быстри́нъ водны́хъ плывꙋ́щꙋю, и҆ ѿ неѧ̀ ды́мъ кади́льный горѣ̀ возносѧ́щїйсѧ, недоꙋмѣва́хꙋ лю́дїе ве́си борови́чскїѧ ѡ҆ неѡбы́чнѣмъ се́мъ ꙗ҆вле́нїи. приста́вшей же льди́нѣ ко бре́гꙋ рѣ́чномꙋ, ѡ҆брѣто́ша на не́й на кла́дѣ древе́снѣй лежа́щыѧ, нетлѣ́нїемъ процвѣ́тшыѧ ст҃ы́ѧ мо́щи твоѧ̑, смиренномꙋ́дре і҆а́кѡве. тѣ́мже и҆ на́съ подвиза́еши просла́вльшемꙋ тѧ̀ гдⷭ҇ꙋ пѣ́ти: А҆ллилꙋ́їа.
І҆́косъ в҃
Ра́зꙋмъ бжⷭ҇твенныѧ та́йны неразꙋмѣва́юще, ᲂу҆боѧ́шасѧ лю́дїе борови́чстїи прїѧ́ти тѧ̀ незна́ема и҆ непогребе́нна, и҆ вспѧ́ть ѿри́нꙋша льди́нꙋ съ моща́ми твои́ми въ быстри́нꙋ рѣ́чнꙋю. ѻ҆́нѣй же па́ки къ ни́мъ три́жды возвра́щшейсѧ, предста́въ ст҃ы́й і҆а́кѡвъ въ со́ннѣмъ видѣ́нїи старѣ́йшинамъ борови̑чскимъ, ѡ҆бличи́лъ є҆сѝ и҆̀хъ си́це глаго́лѧ: что̀ го́ните мѧ̀ хрⷭ҇тїа́нина вѣ́рна, и҆́менемъ тезоимени́та ст҃о́мꙋ а҆пⷭ҇лꙋ і҆а́кѡвꙋ бра́тꙋ бж҃їю сꙋ́ща; ѡ҆ се́мъ ра́дꙋющесѧ бл҃годари́мъ и҆ зове́мъ тѝ такѡва́ѧ:
Ра́дꙋйсѧ, неѕло́бїемъ твои́мъ хрⷭ҇тꙋ̀ гдⷭ҇ꙋ, ѿ і҆ꙋдє́й гони́мꙋ, подража́вый: ра́дꙋйсѧ, простотꙋ̀ и҆ неразꙋ́мїе ѿри́нꙋвшихъ тѧ̀ не наказа́вый.
Ра́дꙋйсѧ, невѣ́дѣнїе и҆́хъ ꙗ҆вле́нїемъ твои́мъ вразꙋми́вый: ра́дꙋйсѧ, вѣ́рꙋ твою̀ во хрⷭ҇та̀ ꙗ҆́снѡ и҆сповѣ́давый.
Ра́дꙋйсѧ, и҆́мѧ твоѐ ст҃о́е ѿ на́съ не скры́вый: ра́дꙋйсѧ, блгⷣть тебѣ̀ ѿ гдⷭ҇а дарова́ннꙋю чꙋдесы̀ пресла́вными проѧви́вый.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ г҃
Си́ла бж҃їѧ сла́внѡ просла́висѧ во ст҃ы́хъ моще́хъ твои́хъ, і҆а́кѡве ст҃е, къ ни̑мже притека́юще, недꙋ́жнїи и҆сцѣле́нїе, слѣпі́и прозрѣ́нїе, нѣмі́и ꙗ҆сноглаго́ланїе полꙋча́хꙋ, и҆ здра́ви возвраща́хꙋсѧ, прославлѧ́юще тѧ̀ чꙋдотво́рца ми́лостивагѡ. тѣ́мже мо́лимъ тѧ̀ и҆ на́съ, немощствꙋ́ющихъ грѣхѝ мно́гими, посѣтѝ бл҃гоꙋтро́бне и҆ ᲂу҆молѝ за на́съ человѣколю́бца бг҃а, є҆мꙋ́же воспѣва́емъ: А҆ллилꙋ́їа.
І҆́косъ г҃
И҆мѣ́юще помышлє́нїѧ сꙋмни́тєльнаѧ ѡ҆ чꙋ́днѣмъ ꙗ҆влє́нїи моще́й твои́хъ ст҃ы́хъ, лю́дїе борови́чстїи на бре́зѣ рѣ́чнемъ положи́ша и҆́хъ на кла́дѣ древе́снѣй: ѻ҆ба́че и҆ вре́мѧ дово́льнѡ лежа́вшымъ и҆̀мъ та́мѡ, неистлѣ́ни ꙗ҆ви́шасѧ и҆ чꙋдесы̀ ѡ҆ твое́й ст҃ы́ни ᲂу҆достовѣ́риша, ст҃че бж҃їй, прославлѧ́емый ѿ вѣ́рныхъ бг҃омо́льцєвъ пѣ̑нїи си́ми:
Ра́дꙋйсѧ, ю҆́ности преизѧ́щнаѧ похвало̀: ра́дꙋйсѧ, ст҃ѡ процвѣ́тшаѧ розго̀ нбⷭ҇нагѡ вертогра́да і҆и҃сова.
Ра́дꙋйсѧ, цвѣ́те нетлѣ́нїѧ, ѡ҆бл҃гоꙋха́вый рѡссі́йскꙋю странꙋ̀ воне́ю бл҃гоꙋха́нїѧ хрⷭ҇то́ва: ра́дꙋйсѧ, крі́не чистоты̀, пренесе́нный ѿ землѝ въ ра́й превы́шнїй.
Ра́дꙋйсѧ, многоцѣле́бный сосꙋ́де безме́зднагѡ врачева́нїѧ недꙋ́гѡвъ человѣ́ческихъ: ра́дꙋйсѧ, чꙋде́съ и҆сто́чниче, ѡ҆роси́вый на́съ къ плодоно́сїю дх҃о́вномꙋ.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ д҃
Бꙋ́рѧ недоꙋмѣ́нїѧ смꙋтѝ ст҃и́телѧ новогра́дскаго ѳеодо́сїа ѡ҆ пресла́внѣмъ ꙗ҆вле́нїи моще́й твои́хъ, ст҃е і҆а́кѡве: тѣ́мже возвѣсти́ти ѡ҆ се́мъ первост҃и́телю моско́вскомꙋ мака́рїю и҆ бл҃говѣ́рномꙋ царю̀ і҆ѡа́ннꙋ вско́рѣ потща́сѧ. ті́и же вѣ́сть бл҃гꙋ́ю прїе́мше, вѣ́рою позна́ша тѧ̀ чꙋдотво́рца бг҃одарова́ннаго, и҆ со бл҃года́рнымъ чꙋ́вствїемъ просла́вльшемꙋ тѧ̀ хрⷭ҇тꙋ̀ бг҃ꙋ возгласи́ша: А҆ллилꙋ́їа.
І҆́косъ д҃
Слы́шавше бли́жнїи и҆ да́льнїи неисцѣ́льнѡ болѧ́щїи, ꙗ҆́кѡ и҆сто́чникъ цѣле́бъ то́читъ сщ҃е́ннаѧ ра́ка твоѧ̀, ᲂу҆го́дниче бж҃їй і҆а́кѡве, со тща́нїемъ ᲂу҆стреми́шасѧ къ тебѣ̀ и҆ по вѣ́рѣ свое́й прїима́хꙋ и҆сцѣле́нїѧ свои́мъ недꙋ́гѡмъ, немо́лчными ᲂу҆сты̀ возглаша́юще тебѣ̀ сїѧ̑ пѣ́снєннаѧ словеса̀:
Ра́дꙋйсѧ, ско́рый помо́щниче скорбѧ́щихъ и҆ ѡ҆ѕло́бленныхъ: ра́дꙋйсѧ, до́брый цѣле́бниче болѣ́знми ѡ҆бремене́нныхъ.
Ра́дꙋйсѧ, бл҃гі́й посѣти́телю неисцѣ́льнѡ стра́ждꙋщихъ: ра́дꙋйсѧ, скоропредста́тельный врачꙋ̀ ѿча́ѧннѡ недꙋ́гꙋющихъ.
Ра́дꙋйсѧ, ᲂу҆крѣпле́нїе немощны́хъ и҆ разсла́бленныхъ: ра́дꙋйсѧ, ᲂу҆тѣше́нїе ᲂу҆ныва́ющихъ и҆ безнаде́жныхъ.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ є҃
Бг҃освѣ́тлаѧ лампа́да, є҆ле́емъ млⷭ҇ти бж҃їѧ и҆спо́лненнаѧ и҆ преизлива́ющаѧсѧ ꙗ҆влѧ́ешисѧ, ст҃че бж҃їй і҆а́кѡве, въ посме́ртныхъ дѣѧ́нїихъ твои́хъ, мнѡ́гимъ бо съ вѣ́рою притека́ющихъ къ мощє́мъ твои́мъ, бл҃годѣ́тельствовалъ є҆сѝ чꙋде́снѡ, и҆ безчи́сленныхъ недꙋ́жныхъ ᲂу҆врачева́лъ є҆сѝ ми́лостивнѡ, подвиза́ѧ на́съ гла́сы немо́лчными воспѣва́ти тобо́ю бл҃годѣ́ющемꙋ на́мъ бг҃ꙋ: А҆ллилꙋ́їа.
І҆́косъ є҃
Ви́дѣвше ве́лїю блгⷣть цѣле́бнꙋю, ѿ гдⷭ҇а тебѣ̀ дарова́ннꙋю по́сланнїи ѿ ст҃и́телѧ новогра́дскагѡ ѳеодо́сїа бл҃гоговѣ́йнїи сщ҃е́нницы принесо́ша цѣльбопода́тельныѧ мо́щи твоѧ̑ въ хра́мъ бж҃їй, і҆а́кѡве досточꙋ́дне, да не сокры́тъ бꙋ́детъ толи́кїй свѣти́льникъ чꙋде́съ, но на свѣ́щницѣ ст҃олѣ́пнѣмъ це́ркве борови́чскїѧ да свѣ́титъ всѣ̑мъ, вѣ́рою чтꙋ́щымъ тѧ̀ бл҃гохвале́нїи си́ми:
Ра́дꙋйсѧ, добродѣ́тєли твоѧ̑ во глꙋбинѣ̀ смире́нїѧ твоегѡ̀ ѿ на́съ сокры́вый: ра́дꙋйсѧ, и҆ моще́мъ твои̑мъ ст҃ы̑мъ внѣ̀ хра́ма бж҃їѧ на до́лзѣ пребыва́ти попꙋсти́вый.
Ра́дꙋйсѧ, ѿ брега̀ рѣ́чнагѡ, ꙗ҆́кѡ би́серъ многоцѣ́ненъ въ це́рковь гдⷭ҇ню принесе́нный: ра́дꙋйсѧ, ꙗ҆́кѡ сокро́вище дража́йшее, та́мѡ положе́нный.
Ра́дꙋйсѧ, смире́нїе соверше́нное и҆ нищетꙋ̀ нело́жнꙋю по сме́рти засвидѣ́тельствовавый: ра́дꙋйсѧ, ᲂу҆бо́жествомъ ри́зъ твои́хъ нестѧжа́нїе твоѐ ѡ҆бличи́вый.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ ѕ҃
Проповѣ́дникъ немо́лчный твои́хъ чꙋде́съ ꙗ҆ви́сѧ ст҃ѣ́йшїй патрїа́рхъ ні́кѡнъ, и҆́же ᲂу҆стро́ивъ ѡ҆би́тель пресла́внꙋ бг҃омт҃ри, та́мѡ ст҃ы́ѧ мо́щи твоѧ̑ съ бл҃голѣ́пною че́стїю сщ҃е́нства принестѝ потща́сѧ, и҆дѣ́же и҆ ны́нѣ, ꙗ҆́кѡ крі́нъ бл҃гоꙋха́ненъ пребыва́ютъ и҆сточа́юща и҆сцѣлє́нїѧ бл҃года́тныѧ всѣ̑мъ тре́бꙋющымъ, бг҃ꙋ же вопїю́щымъ: А҆ллилꙋ́їа.
І҆́косъ ѕ҃
Возсїѧ́лъ є҆сѝ ꙗ҆́кѡ ѕвѣзда̀ пꙋтево́днаѧ, заре́ю чꙋде́съ твои́хъ, всѣ́хъ пꙋтеводѧ́щаѧ къ нбⷭ҇номꙋ ѻ҆те́чествїю, і҆а́кѡве всебл҃же́нне. кто́ бо не ᲂу҆мили́тсѧ, ви́дѧ, ꙗ҆́кѡ въ ю҆́нѣмъ во́зрастѣ ста́рцєвъ добродѣ́телїю превозше́лъ є҆сѝ, и҆ ве́лїй да́ръ чꙋдотворе́нїй првⷣнѡ ѿ бг҃а воспрїѧ́лъ є҆сѝ: ѡ҆ се́мъ диви́мсѧ и҆ зове́мъ тѝ во ᲂу҆миле́нїи дꙋ́шъ и҆ серде́цъ:
Ра́дꙋйсѧ, и҆збра́нниче бж҃їй, непоро́чное житїѐ на землѝ препроводи́вый: ра́дꙋйсѧ, люби́миче хрⷭ҇то́въ, кро́тостїю и҆ ти́хостїю твое́ю бл҃же́нство кро́ткихъ ᲂу҆наслѣ́довавый.
Ра́дꙋйсѧ, въ ми́рѣ сконча́выйсѧ и҆ къ преми̑рнымъ ѡ҆би́телємъ ра́йскимъ возше́дый: ра́дꙋйсѧ, со а҆́гг҃лы и҆ всѣ́ми ст҃ы́ми та́мѡ на вѣ́ки водвори́выйсѧ.
Ра́дꙋйсѧ, граждани́не всесвѣ́тлагѡ гра́да і҆ерⷭ҇ли́ма го́рнѧгѡ: ра́дꙋйсѧ, а҆́гг҃ле земны́й и҆ человѣ́че нбⷭ҇ный.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ з҃
Хотѧ̀ человѣколю́бецъ гдⷭ҇ь ꙗ҆ви́ти и҆́стинꙋ правосла́вїѧ ст҃ы́ѧ восто́чныѧ цр҃кве бл҃года́тнымъ нетлѣ́нїемъ моще́й ст҃ы́хъ свои́хъ ᲂу҆го́дникѡвъ, и҆ чꙋдесы̀ ѿ ни́хъ и҆стека́ющими, сїю̀ свидѣ́тельствꙋетъ, во ѡ҆бличе́нїе и҆новѣ́рныхъ и҆ невѣ́рныхъ, и҆ во ᲂу҆твержде́нїе правосла́вныхъ. сїѐ ди́вное смотре́нїе бж҃їе въ пресла́внѣмъ ꙗ҆вле́нїи моще́й твои́хъ, і҆а́кѡве првⷣный, разꙋмѣ́юще вѣ́рою, прино́симъ цр҃ю̀ нб҃сѐ и҆ землѝ бл҃года́рственнꙋю пѣ́снь: А҆ллилꙋ́їа.
І҆́косъ з҃
Но́вое зна́менїе бл҃говоле́нїѧ бж҃їѧ въ странѣ̀ рѡссі́йстѣй ви́димъ въ многочꙋде́снѣмъ ꙗ҆вле́нїи ст҃ы́хъ моще́й твои́хъ, і҆а́кѡве првⷣный, и҆ съ любо́вїю притека́юще къ твоемꙋ̀ мл҃твенномꙋ застꙋпле́нїю, ꙗ҆́кѡ бг҃одарова́нномꙋ застꙋ́пникꙋ на́шемꙋ, прино́симъ тѝ сїѧ̑ похвалы̑:
Ра́дꙋйсѧ, чꙋдесы̀ твои́ми и҆́стины ст҃ы́ѧ правосла́вныѧ вѣ́ры ᲂу҆достовѣ́ривый: ра́дꙋйсѧ, присꙋ́щей ст҃ѣ́й восто́чнѣй цр҃кви блгⷣти ст҃а́гѡ дх҃а проповѣ́дниче.
Ра́дꙋйсѧ, грѧдꙋ́щагѡ воскрⷭ҇нїѧ ме́ртвыхъ свѣ́тлый проѡ́бразе: ра́дꙋйсѧ, немерца́ющагѡ трисл҃нечнагѡ сїѧ́нїѧ свѣтлѣ́йшее ѿѡбраже́нїе.
Ра́дꙋйсѧ, вѣ́чныѧ безсме́ртныѧ ѡ҆ хрⷭ҇тѣ̀ жи́зни цѣльбоно́сныѧ проѧвле́нїе: ра́дꙋйсѧ, ра́йскагѡ несконча́емагѡ бл҃же́нства всежела́тельный на́мъ хода́таю.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ и҃
Стра́нники и҆ прише́льцы сꙋ́ще въ мі́рѣ се́мъ преле́стнѣмъ, къ тебѣ̀ прибѣга́емъ і҆а́кѡве ст҃е: ᲂу҆пра́ви на́съ вла́ющихсѧ ѡ҆кормле́нїемъ твои́мъ къ ти́хомꙋ приста́нищꙋ сп҃се́нїѧ, наста́ви твои́ми мл҃твами на стезю̀ покаѧ́нїѧ, и҆ застꙋпѝ ѿ всѧ́кагѡ дїа́вольскагѡ и҆скꙋше́нїѧ, да тобо́ю вспомоществꙋ́еми, сподо́бимсѧ ᲂу҆лꙋчи́ти бл҃же́нство вѣ́чное, и҆ со а҆́гг҃лы и҆ всѣ́ми ст҃ы́ми созда́телю на́шемꙋ пѣ́ти: А҆ллилꙋ́їа.
І҆́косъ и҃
Ве́сь бѣ̀ въ ни́жнихъ, ѻ҆ба́че и҆ вы́шнихъ дх҃омъ не ѿстꙋпи́лъ є҆сѝ, ст҃е і҆а́кѡве, є҆гда̀ живѧ́ше на землѝ. ны́нѣ же пребыва́еши въ вы́шнихъ, предстоѧ̀ со а҆́гг҃лы прⷭ҇то́лꙋ гдⷭ҇а сла́вы: ѻ҆ба́че и҆ ни́жнихъ не ѿстꙋпа́еши, мл҃твами бл҃госпоспѣ́шествꙋѧ на́мъ и҆ чꙋдесы̀ посѣща́ѧ на́съ, пою́щихъ тебѣ̀ такѡва́ѧ:
Ра́дꙋйсѧ, нелѣ́ностный во́ли бж҃їей и҆сполни́телю: ра́дꙋйсѧ, бꙋ́йство хрⷭ҇то́во па́че премꙋ́дрости мїрскі́ѧ вмѣни́вый.
Ра́дꙋйсѧ, во смире́нїи глꙋбо́цѣмъ безвѣ́стнѡ жи́знь првⷣнꙋю сконча́вый: ра́дꙋйсѧ, а҆́гг҃лы ѿ землѝ къ ѡ҆би́телемъ нбⷭ҇нымъ на ло́но а҆враа́мле пренесе́нный.
Ра́дꙋйсѧ, ли́кꙋ ст҃ы́хъ бж҃їихъ прⷭ҇то́лꙋ предстоѧ́щихъ горѣ̀ сопричте́нный: ра́дꙋйсѧ, бл҃говоле́нїемъ бж҃їимъ и҆ до́лꙋ на землѝ нетлѣ́нїемъ и҆ чꙋдесы̀ просла́вленный.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ ѳ҃
Всѧ́къ во́зрастъ не неꙋдо́бенъ бл҃гоче́стїю быва́етъ, а҆́ще ѡ҆сѣни́тъ свы́ше блгⷣть бж҃їѧ, немощна̑ѧ врачꙋ́ющи и҆ ѡ҆скꙋдѣва̑ющаѧ восполнѧ́ющи: тѣ́мже и҆ тебѣ̀ ᲂу҆го́дниче бж҃їй, въ ю҆́ностнѣмъ во́зрастѣ толи́ко ᲂу҆крѣпѝ, ꙗ҆́кѡ всѧ̑ добродѣ̑тели ᲂу҆до́бнѡ соверши́лъ є҆сѝ, и҆ безплѡ́тнымъ непоро́чностїю и҆ чистото́ю ᲂу҆подо́билсѧ є҆сѝ, и҆ є҆щѐ на землѝ въ бре́ннѣмъ тѣлесѝ, нбⷭ҇нымъ нра́вомъ ᲂу҆краше́нный, сподо́билсѧ є҆сѝ досто́йнѡ пѣ́ти бг҃ꙋ а҆́гг҃льскꙋю пѣ́снь: А҆ллилꙋ́їа.
І҆́косъ ѳ҃
Виті́йство мꙋ́дрыхъ мі́ра сегѡ̀ недоꙋмѣ́етъ и҆з̾ѧсни́ти та́йнꙋ чꙋ́днагѡ нетлѣ́нїѧ моще́й ст҃ы́хъ бж҃їихъ: мы́ же, и҆спыта́нїѧ чꙋ́жди, вѣ́рою несꙋмне́нною зало́гъ безсме́ртїѧ въ се́мъ ви́дѧще, съ любо́вїю припа́даемъ ко ст҃ы̑мъ и҆ многоцѣлє́бнымъ моще́мъ твои́мъ, ст҃е і҆а́кѡве, и҆ ꙗ҆́кѡ вѣ́рнагѡ раба̀ хрⷭ҇то́ва и҆ чꙋдотво́рца сла́внагѡ, вѣнча́емъ тѧ̀ бл҃гохвалє́нїи си́ми:
Ра́дꙋйсѧ, мл҃твъ бл҃гово́нное кади́ло, бл҃гоꙋха́ющее горѣ̀ ᲂу҆ прⷭ҇то́ла бж҃їѧ: ра́дꙋйсѧ, крі́не бл҃гово́нный, цр҃ковь рѡссі́йскꙋю а҆рѡма̑ты ра́йскими ᲂу҆слади́вый.
Ра́дꙋйсѧ, би́сере пресвѣ́тлый, ѡ҆зари́вшїй на́съ сїѧ́нїемъ пресла́вныхъ чꙋде́съ: ра́дꙋйсѧ, зарѐ безсме́ртїѧ, возсїѧ́вшаѧ на́мъ ѿ гро́ба, ꙗ҆влѧ́ющагѡ нетлѣ́ннꙋю жи́знь.
Ра́дꙋйсѧ, мѷрополо́жнице блгⷣти, на всѧ́къ недꙋ́гъ дꙋше́вный врачева́нїе и҆сточа́ющаѧ: ра́дꙋйсѧ, пода́телю ра́дованїѧ и҆ ᲂу҆тѣше́нїѧ всѧ́цѣй дꙋшѝ скорбѧ́щей, съ ᲂу҆пова́нїемъ и҆ вѣ́рою къ тебѣ̀ притека́ющей.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ і҃
Спасе́нїе и҆ бл҃же́нство ра́йское житїе́мъ пра́веднымъ ᲂу҆наслѣ́довавъ, ст҃че бж҃їй, ни въ че́мже лише́нъ є҆сѝ, но ра́вный дина́рїй съ дре́вними вели́кими ст҃ы́ми ѿ нбⷭ҇нагѡ домовлⷣки прїѧ́въ, молѝ прилѣ́жнѡ ѡ҆ є҆́же и҆ на́мъ немощны̑мъ и҆ грѣ̑шнымъ житїѐ сїѐ вре́менное без̾ поро́ка прейтѝ, и҆ бл҃же́нство вѣ́чное ᲂу҆лꙋчи́ти, и҆ во црⷭ҇твїи нбⷭ҇нѣмъ ра́достнѡ пѣ́ти бг҃ꙋ сп҃си́телю грѣ́шныхъ: А҆ллилꙋ́їа.
І҆́косъ і҃
Стѣно́ю мл҃твъ твои́хъ, ᲂу҆го́дниче хрⷭ҇то́въ, ѡ҆градѝ на́съ ѿ всѧ́кагѡ дꙋшевре́днагѡ и҆скꙋше́нїѧ дїа́вольскагѡ, ꙗ҆́кѡ тебѣ̀ дарова̀ на́мъ пребл҃гі́й бг҃ъ покро́въ и҆ защи́тꙋ дꙋша́мъ и҆ тѣлесє́мъ на́шымъ. тебѣ̀ ᲂу҆̀бо прославлѧ́емъ и҆ про́симъ: помозѝ на́мъ во всѧ́цѣй ско́рби и҆ ѡ҆бстоѧ́нїи, си́це тебѣ̀ вопїю́щымъ:
Ра́дꙋйсѧ, цр҃кве торжествꙋ́ющїѧ на нб҃сѝ и҆зрѧ́дное ᲂу҆краше́нїе: ра́дꙋйсѧ, цр҃кве во́инствꙋющїѧ на землѝ крѣ́пкое вспоможе́нїе.
Ра́дꙋйсѧ, цѣломꙋ́дрїѧ и҆ чистоты̀ зерца́ло свѣтлѣ́йшее: ра́дꙋйсѧ, кро́тости и҆ нищеты̀ дꙋхо́вныѧ ѡ҆́бразе соверше́ннѣйшїй.
Ра́дꙋйсѧ, смире́нїѧ люби́телю: ра́дꙋйсѧ, въ жи́зни и҆ по сме́рти ѻ҆́бразъ смиренномꙋ́дрїѧ показа́вый.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ а҃і
Пѣ́нїе ᲂу҆миле́нное, ѿ любвѐ и҆ ᲂу҆се́рдїѧ въ похвалꙋ̀ тебѣ̀ ѿ на́съ возноси́мое, прїимѝ бл҃гоꙋтро́бне, ст҃че бж҃їй і҆а́кѡве, воззрѝ не на на́съ недосто́йныхъ, но на ᲂу҆се́рдное произволе́нїе на́ше, и҆ подража́ѧ млⷭ҇рдїю хрⷭ҇та̀ сп҃си́телѧ на́шегѡ, приклони́сѧ къ на́мъ ми́лостивнѡ, и҆ въ покаѧ́нїи преꙋспѣ́ти сподо́би, да твои́ми мл҃твами всегда̀ пое́мъ бг҃ꙋ: А҆ллилꙋ́їа.
І҆́косъ а҃і
Свѣ́тлꙋю па́мѧть твою̀, ꙗ҆́кѡ торжество̀ вѣ́ры и҆ бл҃гоче́стїѧ свѣ́тлѣ соверша́етъ ст҃а́ѧ хрⷭ҇то́ва цр҃ковь, ᲂу҆го́дниче бж҃їй и҆ чꙋдотво́рче і҆а́кѡве, созыва́ющи вѣ́рныѧ ча̑да своѧ̑ на похвалꙋ̀ првⷣнагѡ житїѧ̀ твоегѡ̀ и҆ пресла́вныхъ чꙋде́съ твои́хъ. прїимѝ ᲂу҆̀бо, ᲂу҆бл҃жа́емый и҆збра́нниче хрⷭ҇то́въ, гла́сы хвалє́бныѧ, тебѣ̀ ра́достнѡ ѿ на́съ возноси̑мыѧ си́це:
Ра́дꙋйсѧ, а҆́гг҃лѡвъ подо́бниче и҆ человѣ́кѡвъ застꙋ́пниче: ра́дꙋйсѧ, ст҃ы́хъ сожи́телю при́сный бг҃ꙋ.
Ра́дꙋйсѧ, ꙗ҆́кѡ предстои́ши бж҃їю прⷭ҇то́лꙋ во свѣ́тѣ немерца́ющїѧ сла́вы: ра́дꙋйсѧ, вѣнцено́сче, ᲂу҆вѣнча́нный ѿ рꙋкѝ вседержи́телѧ.
Ра́дꙋйсѧ, ри́зою нетлѣ́нїѧ ѡ҆блече́нный и҆ да́ромъ чꙋде́съ ѡ҆богаще́нный: ра́дꙋйсѧ, мл҃твенниче неꙋсыпа́ѧй и҆ предста́телю бг҃опрїѧ́тный.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ в҃і
Блгⷣть цѣле́бнꙋю прїѧ́лъ є҆сѝ ѿ всеще́драго бг҃а, і҆а́кѡве ст҃е, є҆́юже недꙋ́ги и҆ ꙗ҆́зи человѣ́чєскїѧ врачꙋ́еши пресла́внѡ, не мзды̀ ѿ на́съ ко ᲂу҆врачева́нїю тре́бꙋѧ, но вѣ́ры несꙋмнѣ́нныѧ ѡ҆жида́ѧ. тѣ́мже, вѣ́дꙋще тѧ̀ врача̀ бл҃гоискꙋ́сна и҆ цѣле́бника немздопрїи́мна, къ тебѣ̀ прибѣга́емъ и҆ по проше́нїю дарова̑ннаѧ бл҃годѣѧ̑нїѧ прїе́млемъ, пою́ще бг҃ꙋ: А҆ллилꙋ́їа.
І҆́косъ в҃і
Пою́ще многочꙋде́сное прославле́нїе ст҃ы́хъ моще́й твои́хъ, и҆сповѣ́дꙋемъ неисчє́тнаѧ твоѧ̑ благодѣѧ̑нїѧ, ꙗ҆влє́ннаѧ и҆ присноѧвлѧ́емаѧ тобо́ю всѣ̑мъ съ вѣ́рою и҆ любо́вїю къ тебѣ̀ притека́ющымъ, і҆а́кѡве досточꙋ́дне, и҆́хже и҆ на́съ не лишѝ смире́нныхъ, ᲂу҆пова́нїе на тѧ̀ возложи́вшихъ, и҆ та́кѡ къ тебѣ̀ ѿ глꙋбины̀ дꙋшѝ вопїю́щихъ:
Ра́дꙋйсѧ, ст҃ы́ѧ живонача́льныѧ трⷪ҇цы бл҃говоле́нїемъ горѣ̀ ѡ҆сѣне́нный: ра́дꙋйсѧ, а҆́гг҃льскимъ свѣтоза̑рнымъ си́ламъ сопричте́нный.
Ра́дꙋйсѧ, вѣ́чнагѡ ликова́нїѧ ст҃ы́хъ, во гла́сѣ ра́дованїѧ бл҃же́нный соприча́стниче: ра́дꙋйсѧ, бл҃же́нства неизглаго́ланнагѡ, првⷣнымъ ѿ вѣ́ка ᲂу҆гото́ваннагѡ сонаслѣ́дниче.
Ра́дꙋйсѧ, дх҃а ст҃а́гѡ ѻ҆би́теле, чистото́ю бл҃гоꙋкраше́ннаѧ: ра́дꙋйсѧ, дꙋ́шъ и҆ тѣле́съ на́шихъ цѣле́бниче преми́лостивый.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ г҃і
Ѽ чꙋдотво́рче преди́вный и҆ преми́лостивый, і҆а́кѡве пребл҃же́нне! ма́лое сїѐ моле́нїе на́ше ми́лостивнѡ прїи́мъ, да́нною тѝ ѿ гдⷭ҇а блгⷣтїю ᲂу҆врачꙋ́й не́мощи дꙋ́шъ и҆ тѣле́съ на́шихъ: мл҃твами же твои́ми и҆змѝ на́съ гее́нскїѧ мꙋ́ки, и҆ сподо́би съ тобо́ю и҆ всѣ́ми ст҃ы́ми въ ра́йскихъ селе́нїихъ, пѣ́ти бг҃ꙋ сп҃си́телю на́шемꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆гг҃лоподо́бное житїѐ твоѐ на землѝ ꙗ҆влѧ́еши на́мъ по сме́рти, бг҃омꙋ́дре і҆а́кѡве, ст҃ы́хъ моще́й твои́хъ пресла́внымъ прославле́нїемъ, ѿ ни́хже то́ки и҆сцѣле́нїй бл҃года́тныхъ и҆сточа́еши недꙋ́жнымъ. тѣ́мже рѡссі́йскаѧ страна̀ тобо́ю красꙋ́етсѧ, стѧжа́вши тѧ̀, бг҃одарова́ннаго цѣле́бника, мы̀ же съ любо́вїю тѝ зове́мъ:
Ра́дꙋйсѧ, вели́кїй ᲂу҆го́дниче бж҃їй, ᲂу҆таи́вый ѿ на́съ ѻ҆те́чествїе твоѐ земно́е, да ᲂу҆вѣ́риши, ꙗ҆́кѡ ѿ бг҃а къ на́мъ по́сланъ є҆сѝ: ра́дꙋйсѧ, равноа́гг҃льный человѣ́че, ѡ҆блиста́вый на́съ бжⷭ҇твенною заре́ю пресла́вныхъ твои́хъ чꙋде́съ: ра́дꙋйсѧ, нб҃ожи́телю, горѣ̀ со а҆́гг҃лы ѡ҆бита́ѧй.
Ра́дꙋйсѧ, ѿ нбⷭ҇ныхъ высо́тъ бл҃госе́рдїемъ твои́мъ къ земнорѡ́днымъ приника́ѧй: ра́дꙋйсѧ, въ та́йнѣ гдⷭ҇еви порабо́тавый въ прпⷣбїи и҆ пра́вдѣ: ра́дꙋйсѧ, ꙗ҆́внѡ и҆ пресла́внѡ ѿ гдⷭ҇а просла́вленный нетлѣ́нїемъ и҆ чꙋдесы̀.
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Конда́къ а҃
И҆збра́нный ѿ цр҃ѧ̀ си́лъ гдⷭ҇а і҆и҃са, ди́внѡ просла́вленный ѿ негѡ̀ ст҃ы́хъ моще́й твои́хъ ꙗ҆вле́нїемъ и҆ мно́жествомъ чꙋдотворе́нїй, ᲂу҆го́дниче бж҃їй і҆а́кѡве првⷣный, ѡ҆ твои́хъ и҆сточа́емыхъ на́мъ бл҃годѣѧ́нїихъ бл҃года́рни сꙋ́ще, похва́льное восписꙋ́емъ тѝ пѣ́нїе, и҆ мо́лимтисѧ ѡ҆ є҆́же ѿ всѧ́кихъ бѣ́дъ свободи́тисѧ на́мъ твои́ми мл҃твами, ра́достнѡ и҆ ᲂу҆миле́ннѡ тебѣ̀ зовꙋ́щымъ:
Ра́дꙋйсѧ, і҆а́кѡве првⷣный, чꙋдотво́рче хрⷭ҇то́въ преди́вный.
Моли́твы
Ѽ ст҃ы́й вели́кїй првⷣниче и҆ пресла́вный чꙋдотво́рче, бг҃обл҃же́нный ᲂу҆го́дниче хрⷭ҇то́въ і҆а́кѡве, ди́внѡ просла́вленный на нб҃сѝ и҆ на землѝ да́нный на́мъ ѿ гдⷭ҇а цѣле́бниче и҆ застꙋ́пниче, къ тебѣ̀ припа́даемъ съ вѣ́рою, любо́вїю и҆ бл҃гоговѣ́нїемъ и҆ мо́лимсѧ ѿ глꙋбины̀ дꙋшѝ: помозѝ на́мъ, ѕѣлѡ̀ прогнѣ́вавшымъ гдⷭ҇а и҆ созда́телѧ на́шегѡ, и҆ и҆спросѝ на́мъ всѧ̑ ꙗ҆́же къ житїю̀ вре́менномꙋ и҆ сп҃се́нїю вѣ́чномꙋ потрє́бнаѧ: землѝ плодоно́сїе, воздꙋ́хѡвъ бл҃горастворе́нїе, дꙋ́шъ и҆ тѣле́съ здра́вїе, въ покаѧ́нїи и҆ бл҃гоче́стїи преспѣ́ѧнїе, вѣ́ры правосла́вныѧ ᲂу҆крѣпле́нїе, сꙋевѣ́рїѧ посрамле́нїе, невѣ́рїѧ и҆скорене́нїе, и҆ всѧ́кагѡ блага́гѡ проше́нїѧ на́шегѡ ко гдⷭ҇ꙋ и҆сполне́нїе.
Оу҆слы́ши, ᲂу҆го́дниче бж҃їй, всѧ́кꙋ дꙋ́шꙋ хрⷭ҇тїа́нскꙋю, въ ско́рби и҆ ѡ҆бстоѧ́нїи тѧ̀ моли́твеннѡ призыва́ющꙋю, ᲂу҆скорѝ на по́мощь, ѡ҆блегчѝ скѡ́рби, ᲂу҆врачꙋ́й недꙋ́ги и҆ ꙗ҆ви́сѧ ско́рый предста́тель тре́бꙋющихъ твоегѡ̀ застꙋпле́нїѧ. наипа́че же въ ча́съ кончи́ны на́шеѧ не закоснѝ прїитѝ на по́мощь на́мъ и҆ ᲂу҆молѝ гдⷭ҇а дарова́ти на́мъ кончи́нꙋ живота̀ на́шегѡ ми́рнꙋ, безмѧте́жнꙋ, ст҃ы́хъ хрⷭ҇то́выхъ та́инъ прича́стнꙋ и҆ ᲂу҆пова́нїѧ и҆спо́лненꙋ да съ наде́ждою сп҃се́нїѧ безбѣ́днѡ пре́йдемъ стра́шный пꙋ́ть воздꙋ́шныхъ мыта́рствъ, и҆ непреткнове́ннѡ дости́гнемъ вожделѣ́ннагѡ ѻ҆́наго црⷭ҇твїѧ, є҆́же ᲂу҆гото́валъ гдⷭ҇ь лю́бѧщымъ є҆гѡ̀. є҆́й, ст҃че бж҃їй! ᲂу҆слы́ши на́съ и҆ не пре́зри моле́нїѧ на́шегѡ, но сотворѝ на́съ соꙋча́стники бы́ти бл҃же́нства вѣ́чнагѡ, да вкꙋ́пѣ съ тобо́ю сп҃се́ннїи млⷭ҇рдїемъ хрⷭ҇та̀ сп҃си́телѧ на́шегѡ воспое́мъ и҆ просла́вимъ є҆гѡ̀ со ѻ҆ц҃е́мъ и҆ ст҃ы́мъ дх҃омъ, во вѣ́ки вѣкѡ́въ. А҆ми́нь.