Канон святым мученикам Маркиану и Мартирию Константинопольским

Превесьма́ све́том Святы́я Тро́ицы осия́еми при́сно, свети́льницы непреле́стнии быва́ете, святи́и, те́м, ве́рою светоно́сный пра́здник ва́ш дне́сь соверша́юще, све́тло весели́мся.

Ви́дети, на земли́ возсия́вшее Сло́во, из Де́вы на́с ра́ди жела́юще, страда́льцы, Отцу́ Единосу́щна Сего́ испове́дающе, ну́жднейшую сме́рть, по́мыслом крепча́йшим, пострада́сте.

Па́вла му́драго, богоглаго́льницы, я́вльшеся после́дователе и ученицы́, единоче́стна Отцу́ Сы́на пропове́дасте, те́м, мечи́ ссече́ни бы́вше, излия́нием кро́ве, страстоте́рпцы, зе́млю освяти́сте.

Правосла́вия просвеща́еми Боже́ственным Ду́хом, А́риево омраче́ние отню́д прогна́сте, свиде́тели бы́вше Вседержи́теля.

Ра́вно Сло́во Отцу́ догма́тствующе, святи́и, разсуди́сте умре́ти, Маркиа́не и Марти́рие, и к безконе́чней Жи́зни преидо́сте.

Воинствосло́вием свяще́нным а́нгелом сочисли́стеся и му́ченик лико́м пресве́тло совокупи́стеся, те́м честну́ю ва́шу па́мять похваля́ем.

До́блим по́мыслом и соверше́нною му́дростию правосла́вия, му́ченицы Госпо́дни, утверди́вшеся, му́ченически по́двиг соверши́сте, ерети́ческую тму́ отгна́ли есте́.

И́же Сло́ва не пропове́дав Отцу́ Единосу́щна, разгне́вався несмы́сленно на му́ченики, удави́ся жи́лами свяще́нных ва́ших по́двиг и погрузи́ся кро́вными тече́ньми, Бо́жиею благода́тию.

Во́инствовавше Го́споду ве́рою, святи́и, и пострада́вше, небе́сным во́инством сочисли́стеся, те́м ублажа́етеся, укрепле́ние на́ше и просвеще́ние быва́юще.

Сосцы́ церко́внии, млеко́ источа́ющии правосла́вия, и благочести́выя пита́ющии, Маркиа́н до́блий и Марти́рий, да похва́лятся ра́достными песнопе́нии.

Прему́дрых яви́стеся догма́тов после́дователи Па́вла, священноде́теля боже́ственнаго, его́же нра́вы, му́ченицы, подража́вше, терпели́вно пострада́сте и зако́нно венча́стеся.

Я́ко зве́зды сия́ете на высоте́ честны́я Це́ркве све́тло, тму́ глубоча́йшую отгоня́юще А́риевы е́реси, му́ченицы до́блественнейшии.

Удали́вшеся, святи́и, жития́ красо́т, прибли́жистеся Христу́, мале́йшею же кро́вию недви́жимое Ца́рство, сла́внии страстоте́рпцы, насле́довасте.

Глаго́лом после́дующе па́стыря, прему́драго Па́вла, правосла́вную ве́ру соблюдо́сте, и я́ко а́гнцы, кровопи́иц мечи́ закала́етеся, ра́дующеся.

Честна́ пред Го́сподем, благосла́внии, ва́ша сме́рть яви́ся, му́дрии ору́жницы, те́м почестьми́ ле́тними, святи́и, от все́х ублажа́етеся.

Ва́с, до́блия страстоте́рпцы, Маркиа́не всеблаже́нне и Марти́рие, исто́чник чуде́с Христо́ва Це́рковь иму́щи, ве́чно весели́тся.

После́дующе до́бре свяще́ннаго па́стыря, правосла́вием удобря́еми, рука́ми закла́ни бы́сте злосла́вных всу́е, пресла́внии ору́жницы.

Законоположе́ние Бо́жие невреди́мо ве́рно сохра́нше, му́ченицы боже́ственнии, зако́нно пострада́сте, от ру́к беззако́нных ку́пно закла́ни бы́вше.

По погребе́нии свяще́ннем, приходя́щим с ве́рою ко гро́бу ва́шему, неду́ги погреба́ете, святи́и, е́же к Жизнода́телю, святы́м хода́тайством ва́шим.

От исто́чников та́инственно свяще́нных почерпа́юще Боже́ственную благода́ть целе́ний, ве́рныя напоя́ете, неду́г вся́кое изсуша́юще умноже́ние.

Я́коже два́ а́гнца, закала́етеся, А́гнца Бо́жия, единосу́щна Отцу́ пропове́дающе, и трапе́зе вы́шней принесе́ни бы́вше, страда́льцев собо́ру сочетава́етеся.

Укрепля́еми си́лою Ду́ха, искорени́сте пре́лести свире́пство, и кре́пко пострада́вше, лю́те осла́бленныя немощьми́, му́дрии исцеля́ете му́ченицы.

Вра́чеве страсте́й бы́вше ду́ш на́ших, святи́и му́ченицы, лю́тыя неду́ги и привоста́ния проти́вная разреши́те боже́ственными моли́твами.

Кре́постию вжиля́еми Боже́ственною, сме́рти, страстоте́рпцы, не убоя́стеся, но, усе́рдно подло́жше мече́м вы́и, испо́лнисте до́блественно по́двиг боже́ственный, те́м досто́йно блажите́ся.

Я́ко два́ свети́льника све́тла, просвеща́ете вселе́нныя исполне́ния Боже́ственными страда́ний светлостьми́, Маркиа́не му́дре и Марти́рие, тму́ мра́чныя е́реси А́риевы отгоня́ще.

Венцы́ сла́вы от Бо́га, победи́вше слепоу́мнаго Македо́ния, прия́сте досто́йно; и престо́лу Влады́чню предстоя́ще, прегреше́ний на́м проси́те разреше́ние соверше́нно, достосла́внии.

Па́мять боже́ственная ва́ша возсия́ со́лнца светле́йши, все́х просвеща́ющи сердца́ сию́ соверша́ющих, блаже́ннии, в не́йже умоли́те Го́спода, тмы́ согреше́ний на́с изба́вити.

Превесьма̀ свѣ́томъ ст҃ы́ѧ трⷪ҇цы ѡ҆сїѧ́еми при́снѡ, свѣти̑льницы непреле́стнїи быва́ете, ст҃і́и: тѣ́мъ, вѣ́рою свѣтоно́сный пра́здникъ ва́шъ дне́сь соверша́юще, свѣ́тлѡ весели́мсѧ.

Ви́дѣти на землѝ возсїѧ́вшее сло́во и҆зъ дв҃ы на́съ ра́ди жела́юще, страда́льцы, ѻ҆ц҃ꙋ̀ є҆диносꙋ́щна сего̀ и҆сповѣ́дающе, нꙋ́жднѣйшꙋю сме́рть по́мысломъ крѣпча́йшимъ пострада́сте.

Па́ѵла мꙋ́драгѡ, бг҃оглаго́льницы, ꙗ҆́вльшесѧ послѣ́дователє и҆ ᲂу҆ч҃ницы̀, є҆диноче́стна ѻ҆ц҃ꙋ̀ сн҃а проповѣ́дасте: тѣ́мъ, мечи̑ ссѣче́ни бы́вше, и҆злїѧ́нїемъ кро́ве, страстоте́рпцы, зе́млю ѡ҆свѧти́сте.

Правосла́вїѧ просвѣща́еми бжⷭ҇твєннымъ дх҃омъ, а҆́рїево ѡ҆мраче́нїе ѿню́дъ прогна́сте, свидѣ́тели бы́вше вседержи́телѧ.

Ра́вно сло́во ѻ҆ц҃ꙋ̀ догма́тствꙋюще, ст҃і́и, разсꙋди́сте ᲂу҆мре́ти, маркїа́не и҆ мартѵ́рїе, и҆ къ безконе́чнѣй жи́зни преидо́сте.

Воинствосло́вїемъ свѧще́ннымъ а҆́гг҃лѡмъ сочисли́стесѧ и҆ мч҃никъ ликѡ́мъ пресвѣ́тлѡ совокꙋпи́стесѧ: тѣ́мъ честнꙋ́ю ва́шꙋ па́мѧть похвалѧ́емъ.

До́блимъ по́мысломъ, и҆ соверше́нною мꙋ́дростїю правосла́вїѧ мч҃ницы гдⷭ҇ни ᲂу҆тверди́вшесѧ, мч҃нически по́двигъ соверши́сте, є҆реті́ческꙋю тмꙋ̀ ѿгна́ли є҆стѐ.

И҆́же сло́ва не проповѣ́давъ ѻ҆ц҃ꙋ̀ є҆диносꙋ́щна, разгнѣ́вавсѧ несмы́сленнѡ на мч҃ники, ᲂу҆дави́сѧ жи́лами свѧще́нныхъ ва́шихъ пѡ́двигъ, и҆ погрꙋзи́сѧ кро́вными тече́ньми, бж҃їею бл҃года́тїю.

Во́инствовавше гдⷭ҇ꙋ вѣ́рою, ст҃і́и, и҆ пострада́вше, нбⷭ҇нымъ во́инствѡмъ сочисли́стесѧ: тѣ́мъ ᲂу҆блажа́етесѧ, ᲂу҆крѣпле́нїе на́ше и҆ просвѣще́нїе быва́юще.

Сосцы̀ цр҃ко́внїи, млеко̀ и҆сточа́ющїи правосла́вїѧ, и҆ благочести̑выѧ пита́ющїи, маркїа́нъ до́блїй и҆ мартѵ́рїй, да похва́лѧтсѧ ра́достными пѣснопѣ̑нїи.

Премꙋ́дрыхъ ꙗ҆ви́стесѧ догма́тѡвъ послѣ́дователи, па́ѵла свѧщеннодѣ́телѧ бжⷭ҇твеннагѡ: є҆гѡ́же нра́вы, мꙋ́ченицы, подража́вше, терпѣли́внѡ пострада́сте, и҆ зако́ннѡ вѣнча́стесѧ.

Ꙗ҆́кѡ ѕвѣ́зды сїѧ́ете на высотѣ̀ честны́ѧ цр҃кве свѣ́тлѡ, тмꙋ̀ глꙋбоча́йшꙋю ѿгонѧ́юще а҆́рїевы є҆́реси, мꙋ́чєницы до́блественнѣйшїи.

Оу҆дали́вшесѧ, ст҃і́и, житїѧ̀ красо́тъ, прибли́жистесѧ хрⷭ҇тꙋ̀: малѣ́йшею же кро́вїю недви́жимое ца́рство, сла́внїи страстоте́рпцы, наслѣ́довасте.

Глаго́лѡмъ послѣ́дꙋюще па́стырѧ премꙋ́драгѡ па́ѵла, правосла́внꙋю вѣ́рꙋ соблюдо́сте, и҆ ꙗ҆́кѡ а҆́гнцы кровопі́ицъ мечи̑ закала́етесѧ, ра́дꙋющесѧ.

Честна̀ предъ гдⷭ҇емъ, благосла́внїи, ва́ша сме́рть ꙗ҆ви́сѧ, мꙋ́дрїи ѻ҆рꙋ́жницы: тѣ́мъ почестьмѝ лѣ́тними, ст҃і́и, ѿ всѣ́хъ ᲂу҆блажа́етесѧ.

Ва́съ дѡ́блїѧ страстоте́рпцы, маркїа́не всебл҃же́нне и҆ мартѵ́рїе, и҆сто́чникъ чꙋде́съ хрⷭ҇то́ва цр҃ковь и҆мꙋ́щи, вѣ́чнѡ весели́тсѧ.

Послѣ́дꙋюще до́брѣ свѧще́ннагѡ па́стырѧ, правосла́вїемъ ᲂу҆добрѧ́еми, рꙋка́ми закла́ни бы́сте ѕлосла́вныхъ всꙋ́е, пресла́внїи ѻ҆рꙋ̑жницы.

Законоположе́нїе бж҃їе невреди́мо вѣ́рнѡ сохра́нше, мч҃ницы бжⷭ҇твеннїи, зако́ннѡ пострада́сте, ѿ рꙋ́къ беззако́нныхъ, кꙋ́пнѡ закла́ни бы́вше.

По погребе́нїи свѧще́ннѣмъ, приходѧ́щымъ съ вѣ́рою ко гро́бꙋ ва́шемꙋ, недꙋ́ги погреба́ете, ст҃і́и, є҆́же къ жизнода́телю, ст҃ы́мъ хода́тайствомъ ва́шимъ.

Ѿ и҆сто́чникѡвъ та́инственнѡ свѧще́нныхъ почерпа́юще бжⷭ҇твеннꙋю благода́ть цѣле́нїй, вѣ̑рныѧ напоѧ́ете, недꙋ̑гъ всѧ́кое и҆зсꙋша́юще ᲂу҆множе́нїе.

Ꙗ҆́коже два̀ а҆́гнца закала́етесѧ, а҆́гнца бж҃їѧ є҆диносꙋ́щна ѻ҆ц҃ꙋ̀ проповѣ́дающе, и҆ трапе́зѣ вы́шнѣй принесе́ни бы́вше, страда́льцєвъ собо́рꙋ сочетава́етесѧ.

Оу҆крѣплѧ́еми си́лою дх҃а, и҆скорени́сте пре́лести свирѣ́пство, и҆ крѣ́пкѡ пострада́вше, лю́тѣ ѡ҆сла́блєнныѧ немощьмѝ, мꙋ́дрїи и҆сцѣлѧ́ете мч҃ницы.

Вра́чеве страсте́й бы́вше дꙋ́шъ на́шихъ, ст҃і́и мч҃ницы, лю̑тыѧ недꙋ́ги и҆ привоста̑нїѧ проти̑внаѧ разрѣши́те, бжⷭ҇твенными моли́твами.

Крѣ́постїю вжилѧ́еми бжⷭ҇твенною, сме́рти, страстоте́рпцы не ᲂу҆боѧ́стесѧ, но ᲂу҆се́рднѡ подло́жше мечє́мъ вы̑и, и҆спо́лнисте до́блественнѡ по́двигъ бжⷭ҇твенный: тѣ́мъ досто́йнѡ блажите́сѧ.

Ꙗ҆́кѡ два̀ свѣти̑льника свѣ̑тла, просвѣща́ете вселе́нныѧ и҆сполнє́нїѧ бжⷭ҇твенными страда́нїй свѣтлостьмѝ, маркїа́не мꙋ́дре и҆ мартѵ́рїе, тмꙋ̀ мра́чныѧ є҆́реси а҆́рїевы ѿгонѧ́ще.

Вѣнцы̀ сла́вы ѿ бг҃а, побѣди́вше слѣпоꙋ́мнаго македо́нїа, прїѧ́сте досто́йнѡ: и҆ прⷭ҇то́лꙋ влⷣчню предстоѧ́ще, прегрѣше́нїй на́мъ проси́те разрѣше́нїе соверше́нно, достосла́внїи.

Па́мѧть бжⷭ҇твеннаѧ ва́ша возсїѧ̀ со́лнца свѣтлѣ́йши, всѣ́хъ просвѣща́ющи сердца̀ сїю̀ соверша́ющихъ, блаже́ннїи, въ не́йже ᲂу҆моли́те гдⷭ҇а, тмы̀ согрѣше́нїй на́съ и҆зба́вити.