Песнь 1
Ирмос
Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Тропарь
Све́том Боже́ственным освети́вшися свы́ше, мра́к отжени́ неразу́мия моего́ и пода́ждь ми́ моли́твами твои́ми, Параске́во, благода́ть, воспева́ти твои́х, му́ченице, чуде́с мно́жества.
Тропарь
Со́лнца светле́йши, я́ко и́стинно возсия́ла еси́ у́тро, утвержде́ние Це́ркве бы́вши Христо́вы, озари́ла еси́ луча́ми по́двигов, му́ченице Параске́во, твои́ми чудесы́ ми́ра концы́.
Тропарь
Жениха́, безсме́ртнаго Христа́, возлюби́вши, я́ко ве́рою Того́ стра́сти о́бщница показа́лася еси́ и восприя́ла еси́ ве́чное Ца́рство и вене́ц нетле́нный, му́ченице Параске́во сла́вная.
Богородичен
Де́во Всенепоро́чная, Христа́ роди́вшая, и Сего́ в ложесна́х понесла́ еси́, истинноимени́тая, разреши́ мра́к души́ моея́ и просвети́ мя́, да пою́ Тя́.
Песнь 3
Ирмос
Лу́к си́льных изнемо́же, и немощству́ющии препоя́сашася си́лою, сего́ ра́ди утверди́ся в Го́споде се́рдце мое́.
Тропарь
Па́лицами неми́лостивно бие́ма, ра́довашеся, лы́стом сокруша́емым и косте́м вку́пе, приснопа́мятная му́ченица Параске́ва, вопию́щи: ничто́же мя́ разлучи́т от любве́ Твоея́, Христе́.
Тропарь
Уста́ нечести́вых, глаго́лющая беззако́ние на пра́веднаго, и язы́к велере́чив загради́шася, му́ченица Параске́ва вопия́ше, Спа́са пропове́дающи.
Тропарь
Крове́й твои́х кропле́нии безбо́жия о́гнь погаси́ла еси́, многострада́льная му́ченице Параске́во, и ве́рных ра́зумы просвети́ла еси́.
Богородичен
Глаго́лы благочести́вно исполня́ются Иса́иины: Де́ва бо родила́ е́сть во пло́ти Жизнода́вца Христа́, Спа́са ду́ш на́ших.
Песнь 4
Ирмос
Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.
Тропарь
Уязви́вшися любо́вию Христо́вою, ополче́ния мучи́тельская кре́постию твое́ю умертви́ла еси́, благода́ть источа́еши присноживо́тную, ю́же, страсте́й ра́ди, мздовоздая́ние восприя́ла еси́, Параске́во, му́чениц Христо́вых добро́та.
Тропарь
Превозше́дши вся́ любо́вию Христа́, Жениха́ твоего́, плотску́ю же любо́вь возненави́девши, кре́пко боле́зненная страда́ния претерпе́ла еси́, му́ченице Параске́во, вопию́щи: не разлучи́ мене́, Христе́, от жела́ния Твоего́, муче́ния по́двиг соверши́ти.
Тропарь
Отве́ргши ми́ра суету́ всю́, Бо́гу Еди́ному прилепи́лася еси́, Параске́во му́ченице, и боле́зни страда́ния претерпе́ла еси́, неве́сто Бо́жия, мужеу́мная.
Богородичен
Сни́де, я́ко до́ждь на руно́, во утро́бу Твою́ Госпо́дь, я́коже рече́ дре́вле проро́к, Всенепоро́чная, Его́же во дву́х существа́х родила́ еси́, Ему́же взыва́ем: сла́ва си́ле Твое́й, Го́споди.
Песнь 5
Ирмос
Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Тропарь
Све́т незаходи́мый всели́ся в души́ твое́й, да доброде́телию сия́еши, озаря́я тебе́ непреста́нно сла́вящия.
Тропарь
Струю́, му́ченице Параске́во, нечести́ваго безбо́жия изсуши́ла еси́, и тече́нии кро́вными, непра́ведно пролива́емыми, о́гнь пре́лести погаси́ла еси́.
Тропарь
У́м иму́щи прозра́чен, проро́ческаго да́ра сподо́билася еси́, и хотя́щая бы́ти все́м я́ве предглаго́лала еси́, Параске́во многострада́льная.
Богородичен
Ма́ти Бо́жия, ду́ш на́ших я́звы исцели́ла еси́, роди́вши Бо́га Сло́ва неизрече́нно. Сего́ ра́ди вси́ ро́ди блажа́т Тя́.
Песнь 6
Ирмос
Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Тропарь
Возсия́вши из Ри́ма, я́ко со́лнце све́тлое, свята́я му́ченице, мра́к де́монский от челове́к отгна́ла еси́ мольба́ми твои́ми, Параске́во многострада́льная.
Тропарь
Исцеле́ния прие́млют приходя́щии прикоснове́нием к ра́це моще́й твои́х: кровоточи́вии и прокаже́ннии очища́ются, и отбега́ют де́монския полки́, призыва́нием свята́го твоего́ и́мени.
Тропарь
У́треневала еси́ ко Христу́, невече́рнему Со́лнцу, и Того́ светлостьми́ ду́шу, богому́драя, и се́рдце озари́ла еси́, Параске́во честна́я, и к Све́ту Тро́ическому, ра́дуяся, прешла́ еси́.
Богородичен
Исцели́ души́ моея́ стра́сти, Всенепоро́чная, безстра́стия ро́ждшая Исто́чник, и отжени́ томи́тельство, непреста́нно стужа́ющее се́рдцу моему́.
Песнь 7
Ирмос
Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.
Тропарь
Голуби́це, кри́ла иму́щи злата́я и ору́жием храни́ма кре́стным, ага́ряны, в нощи́ гра́ду твоему́ прибли́жившияся, отгна́ла еси́, спа́сши ве́рныя от уби́йства, му́ченице Параске́во, пою́щия: препе́тый оте́ц на́ших Бо́же, благослове́н еси́.
Тропарь
Многообра́зныя боле́зни претерпе́вши Христа́ ра́ди, му́ченице Параске́во, неболе́зненный у Него́ обрела́ еси́ поко́й, и ра́дующися, взыва́еши: препе́тый оте́ц на́ших Бо́же, благослове́н еси́.
Тропарь
Ко́ль непобеди́мь тво́й ра́зум, Параске́во честна́я! Я́ко от нача́льников ли́ка мучи́телей му́к не убоя́лася еси́. С ни́миже бра́вшися, сконча́лася еси́, я́ко служи́тельница та́йны Боже́ственныя сла́вы, пою́щи: препе́тый оте́ц на́ших Бо́же, благослове́н еси́.
Богородичен
Благослове́н Пло́д благослове́ннаго Твоего́ чре́ва, Его́же благословя́т небе́сныя си́лы и челове́честии собо́ри восхваля́ют, на́с изба́вльшаго кля́твы дре́вния, Благослове́нная, пою́щих: препе́тый оте́ц на́ших Бо́же, благослове́н еси́.
Песнь 8
Ирмос
О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́ и превозноси́те Его́ во вся́ ве́ки.
Тропарь
Боже́ственными светлостьми́ Со́лнца мы́сленнаго просвети́вшися, му́ченице всехва́льная Параске́во, но́щь претекла́ еси́ безбо́жия, пою́щи единомы́слием души́: Го́спода воспева́йте дела́ и превозноси́те Его́ во ве́ки.
Тропарь
Я́ко а́гница, я́ко нескве́рная ю́ница, я́ко боже́ственная голуби́ца, я́ко самово́льное заколе́ние, привела́ся еси́, му́ченице Параске́во, Зижди́телю твоему́, и я́ко же́ртва непоро́чна, принесла́ся еси́, согла́сно пою́щи: Го́спода по́йте дела́ и превозноси́те Его́ во ве́ки.
Тропарь
Све́тлу себе́ от крове́й ри́зу муче́нием обложи́ла еси́, Параске́во, до́бляя му́ченице, совле́кшися и́стинно тле́ннаго со грехи́ челове́ка, ра́достно воспева́ющи: Го́спода по́йте дела́ и превозноси́те Его́ во ве́ки.
Богородичен
Во сле́д Тебе́ теко́ша жены́, ми́ра сладково́ннаго ве́дуще, Всечи́стая Богоневе́сто, еди́на Неискусобра́чная, из утро́бы Твоея́ возсия́вшаго Единоро́днаго Сы́на, Христа́ Бо́га, и с Тобо́ю ца́рствуют и́стинно, песносло́вяще Его́ во ве́ки.
Песнь 9
Ирмос
Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Тропарь
В небе́сный черто́г все́льшися, де́во Параске́во всечестна́я, и неви́димых добро́т разу́мно наслади́вшися, восприи́мши неизрече́нную све́тлость, просвети́ пою́щия и велича́ющия тя́.
Тропарь
Вене́ц восприя́ла еси́ на главе́ твое́й, Параске́во доблеу́мная, я́ко сконча́вши тече́ние и сохрани́вши ве́ру непоколеби́му, и пра́ведных чи́ни ра́достно тя́ прия́ша. Те́м ны́не ублажа́ем тя́.
Тропарь
Подае́ши исцеле́ний ка́пли тре́бующим, я́ко от исто́чника, всебога́тая му́ченице Параске́во, уставля́ющи то́ки неду́гов и страсте́й отгоня́щи зно́й, и сердца́ благочести́вых напая́ющи ко благопло́дию Боже́ственных дея́ний.
Богородичен
Му́дрости Вмести́лище, па́че ума́ лу́чшаго, яви́лася еси́, Отрокови́це Всенепоро́чная, одушевле́н же престо́л и две́рь. Те́м я́ко Цари́цу Тя́ возлю́бльше де́вы, во сле́д Тебе́ приведо́шася, Богоотрокови́це.