Песнь 1
Ирмос
Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.
Тропарь
Пои́м Го́сподеви, просла́вльшему па́мять му́ченицы, и приводя́щу земны́я ли́ки к похвале́нию дне́сь.
Тропарь
Сла́ву презре́ла еси́, о бога́тстве неради́вши, честна́я му́ченице Параске́во, на стра́сть себе́ вдала́ еси́.
Тропарь
Возжела́ Влады́ка твоея́ добро́ты, му́ченице, и в небе́сный черто́г всели́ тя́.
Богородичен
Ро́д Ада́мов па́че ума́ блаже́нства Тобо́ю, ра́й отве́рст, обре́тше Богоро́дице, досто́йно хва́лим Тя́.
Песнь 3
Ирмос
Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных и пое́т Тя́ ду́х мо́й.
Тропарь
Ты́ еси́ утвержде́ние мое́, Го́споди, — глаго́лаше му́ченица, — Ты́ же и заступле́ние, и к Тебе́ прибего́х, Царю́ ми́ра.
Тропарь
Яви́лася еси́ на суди́щи, мужеу́мну ду́шу иму́щи, и врага́, я́ко нехра́бра су́ща, победи́ла еси́, всехва́льная.
Тропарь
Души́ моея́ зе́ницы исцели́, всехва́льная му́ченице, моли́твами твои́ми и у́м мо́й упра́ви.
Богородичен
Пода́ждь на́м по́мощь моли́твами Твои́ми, Пречи́стая, сове́ты отрева́ющи лю́тых обстоя́ний.
Песнь 4
Ирмос
Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Тропарь
Услы́шавши, Го́споди, му́ченица Параске́ва за́поведи ева́нгельския, просла́ви Твое́ Божество́.
Тропарь
Не принесла́ еси́ отню́д же́ртвы де́моном ме́рзским, же́ртву жи́ву себе́ Го́споду вдала́ еси́.
Тропарь
Кре́пко на суди́щи ста́вши, вопия́ше му́ченица: со Христо́м, Женихо́м мои́м, распну́ся и возца́рствую с Ни́м.
Богородичен
Очище́ние на́ших да́руй согреше́ний, я́ко Безгре́шен, и умири́ лю́ди Твоя́, я́ко Бла́г, моли́твами Ро́ждшия Тя́.
Песнь 5
Ирмос
У́тренююще, вопие́м Ти́: Го́споди, спаси́ ны́, Ты́ бо еси́ Бо́г на́ш, ра́зве Тебе́, ино́го не ве́мы.
Тропарь
У́тренюющи, му́ченица вопия́ше Параске́ва: ничто́же мя́ разлучи́т от любве́ Христо́вы.
Тропарь
Боже́ственную му́ченицу мне́в ослабе́ти, сме́х са́м яви́ся пронырли́вый.
Тропарь
Просвеще́ние пода́ждь мне́, всехва́льная, и многомяте́жный мо́й у́м просвети́ моли́твами твои́ми.
Богородичен
Низложи́ непрестаю́щую бу́рю страсте́й, Христа́ Ро́ждшая, ко́рмчию и Го́спода.
Песнь 6
Ирмос
Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.
Тропарь
Ри́зою мя́ с небесе́ приоде́й, Го́споди, вопия́ше Параске́ва, И́же о́блаками небеса́ одева́яй, Многоми́лостиве.
Тропарь
Я́коже из ро́ва Дании́ла услы́ша Госпо́дь, та́ко и тебе́, в темни́це моля́щейся, исцеле́ние подава́ет.
Тропарь
Мучи́телеву го́рдость низложи́ла еси́, сама́ же, невреди́ма пребы́вши, на му́ки дерзну́ла еси́.
Богородичен
Сло́во Бо́жие Тя́ земны́м показа́ небе́сную ле́ствицу: Тобо́ю бо к на́м сни́де.
Песнь 7
Ирмос
От Иуде́и доше́дше о́троцы, в Вавило́не иногда́ ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Тропарь
Яви́шася па́че ума́ чудеса́ боже́ственныя му́ченицы, во ю́нотстве бо де́вства, победи́ мучи́теля, зову́щи: оте́ц на́ших Бо́же, благослове́н еси́.
Тропарь
Бу́их загради́ла еси́ богоме́рзская уста́, среди́ суди́ща ста́вши, Бо́га испове́дала еси́, взыва́ющи: оте́ц на́ших Бо́же, благослове́н еси́.
Тропарь
Забы́вши же́нскую не́мощь, му́жественно укрепи́вшися терпе́нием, стра́ждущи, вопия́ла еси́: оте́ц на́ших Бо́же, благослове́н еси́.
Богородичен
Из Деви́ческу боку́ вопло́щся, яви́лся еси́ на спасе́ние на́ше. Те́м Твою́ Ма́терь ве́дуще Богоро́дицу, благода́рно Ти́ взыва́ем: оте́ц на́ших Бо́же, благослове́н еси́.
Песнь 8
Ирмос
Царя́ Небе́снаго, Его́же пою́т во́и а́нгельстии, хвали́те и превозноси́те во вся́ ве́ки.
Тропарь
Царя́ Христа́ Бо́га, Его́же испове́да де́ва му́ченица Параске́ва, воспева́ющи: хвали́те и превозноси́те во вся́ ве́ки.
Тропарь
За любо́вь Боже́ственныя Тро́ицы о́гнь безбо́жия погаси́ла еси́, вопию́щи: превозноси́те Христа́ во ве́ки.
Тропарь
По́двиги, и́же к Бо́гу, тмы́ нача́льника низложи́ла еси́, пою́щи: превозноси́те Христа́ во ве́ки.
Богородичен
Проти́вных прило́га на ны́ угаси́ и́скры, Де́во, я́ко да пое́м Го́спода и превозно́сим Его́ во ве́ки.
Песнь 9
Ирмос
Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Тропарь
Вои́стинну тезоимени́та назва́лася еси́, Параске́во, подо́бящися страсте́м Христо́вым, с небе́сными во́инствы лику́ющи.
Тропарь
Пости́гла еси́ коне́ц муче́ния мно́гими страстьми́ и боле́зньми твои́ми, со а́нгелы Христа́ сла́вящи на небесе́х, всечестна́я.
Тропарь
Дерзнове́ние иму́щи ко Спа́су и Влады́це, моли́ за пою́щия твою́ па́мять, му́ченице сла́вная Параске́во.
Богородичен
Пе́сньми Тя́ пое́м, Богоблагода́тная, и немо́лчно Тебе́, ра́дуйся, прино́сим, Ты́ бо источи́ла еси́ все́м на́м весе́лие.