Кондак 1
Возбра́нный чудотво́рче и изря́дный уго́дниче Христо́в, многоцеле́бный чуде́с исто́чниче, неисчерпа́емыя благода́ти хода́таю, те́плый моли́твенниче, вели́кий святи́телю Христо́в Дими́трие, я́ко име́яй дерзнове́ние ко Христу́ Бо́гу на́шему, от вся́ких на́с бе́д свободи́ зову́щих:
Ра́дуйся, Дими́трие, но́вый и вели́кий чудотво́рче.
Икос 1
А́нгел нра́вом, а́ще и челове́к естество́м бы́л еси́, святи́телю Дими́трие: от са́мых бо млады́х ногте́й у́м тво́й, пренебре́гши земна́я, в небе́сная впери́л еси́, и пло́ть нося́, о пло́ти неради́л еси́. Те́мже и всели́ся в тя́ Пресвяты́й Ду́х, Его́же тя́ обита́лищем бы́ти уве́девше, похва́льная воспису́ем ти́:
Ра́дуйся, незло́бием твои́м А́гнца, прорече́ннаго Иса́ием, подража́вый; ра́дуйся, милосе́рдием ни́щия препита́вый.
Ра́дуйся, воздержа́нием а́нгелов удиви́вый; ра́дуйся, посто́м и моли́твою пло́ть твою́ удручи́вый.
Ра́дуйся, к подвла́стным чадолюби́вым отце́м бы́вый; ра́дуйся, стра́ждущия сердобо́лием уте́шивый.
Ра́дуйся, вме́сто тле́нных нетле́нная стяжа́вый; ра́дуйся, небе́сный челове́че.
Ра́дуйся, земны́й а́нгеле; ра́дуйся, Ду́ха Свята́го сосу́де избра́нный.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 2
Ви́дяще оби́льную реку́ чуде́с и исцеле́ний, от святы́х твои́х моще́й истека́ющую, благогове́ния и ра́дости испо́лншеся, благодари́м Бо́га, прославля́ющаго святы́я Своя́, Ему́же и о тебе́ вопие́м: Аллилу́ия.
Икос 2
Ра́зум и́стиннаго богосло́вия внуша́я ча́дом Христо́вым Це́ркве, златослове́сными поуче́ниями утвержда́л еси́, ерети́чествующих же раско́льников, привлека́я к спаси́тельному единомы́слию, в заблужде́ниях облича́л еси́, за таково́е твое́ о душа́х на́ших попече́ние взыва́ем ти́ си́це:
Ра́дуйся, таи́нниче Пресвяты́я Тро́ицы; ра́дуйся, пропове́дниче неисче́тных чуде́с Бо́жиих.
Ра́дуйся, апо́стольских преда́ний блюсти́телю; ра́дуйся, бры́нских душегу́бцев победи́телю.
Ра́дуйся, пла́меню, е́реси пожига́ющий; ра́дуйся, гро́ме, устраша́ющий соблазня́ющия.
Ра́дуйся, свеще́, Бо́гом возже́нная, мра́к нече́стия разгоня́ющая; ра́дуйся, звездо́, пу́ть ко спасе́нию показу́ющая.
Ра́дуйся, тимпа́не, Бо́жию сла́ву бряца́яй; ра́дуйся, орга́не Ду́ха Свята́го.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 3
Си́лою благода́ти Бо́жия еще́ во вре́менной жи́зни прия́л еси́ вла́сть, свя́те Дими́трие, неду́ги исцеля́ти и бе́сы изгоня́ти. По сме́рти же твое́й наипа́че просла́ви тебе́ Всемогу́щий Бо́г мно́гими чудотворе́ниями, да вси́, взира́я на сие́, усе́рдно притека́ют ко исцеле́нию тобо́ю от неду́гов теле́сных, а па́че душе́вных, Бо́гу же вопию́т: Аллилу́ия.
Икос 3
Име́я неусы́пное попече́ние о спасе́нии ду́ш, вве́ренных тебе́ от Бо́га, святи́телю Дими́трие, па́стырски к душеспаси́тельной жи́зни и сло́вом и са́мым де́лом, показу́я неле́ностный по́двиг в подража́нии святы́м Бо́жиим, непреста́нно наставля́л еси́. Сего́ ра́ди приими́ от на́шего усе́рдия досто́йныя похвалы́ тебе́:
Ра́дуйся, па́стырю до́брый, заблужда́ющих по гора́м суему́дрия взыска́вый; ра́дуйся, благи́й ра́бе и ве́рный, да́нный тебе́ от Го́спода тала́нт усугу́бивый.
Ра́дуйся, де́лателю виногра́да Христо́ва; ра́дуйся, благоче́стия сто́лпе неподви́жимый.
Ра́дуйся, тве́рдое забра́ло Христо́вы Це́ркве; ра́дуйся, щи́те, защища́яй благоче́стие.
Ра́дуйся, мечу́ остре́йший, посека́яй злоче́стие; ра́дуйся, непоколеби́мое Правосла́вия основа́ние.
Ра́дуйся, тве́рдый ка́меню ве́ры; ра́дуйся, корми́ло церко́вное, управля́ющее ве́рных к ти́хому приста́нищу.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 4
Бу́ря ересе́й от преиспо́дних, чрез А́рия по Гре́ции возроди́вшаяся, а в после́дняя ле́та про́исками Марти́на Армени́на чрез бры́нских скитонача́льников возни́кшая в на́шем оте́честве, гото́ва была́ опрове́ргнуть тишину́ еди́ныя, святы́я собо́рныя и апо́стольския Це́ркви. Ты́ же, па́стырь до́брый, положи́вый ду́шу твою́ за о́вцы, прогна́в о́ных душепа́губных волко́в, бу́рю суему́дрия укроти́л еси́, ве́рныя же научи́л еси́ Триипоста́сному Бо́гу взыва́ти: Аллилу́ия.
Икос 4
Слы́шаша суему́дреннии раско́льницы твое́ к ни́м изобличе́ние, е́же ты́, боле́знуя о серде́чном и́х заблужде́нии, написа́л еси́, возбеси́шася зело́ зело́, и мно́жество из ни́х вме́сто до́лжнаго исправле́ния а́дский пла́мень изры́гнуша на тя́; ты́ же, я́ко тве́рдый адама́нт, под уда́рами зло́бы и не́нависти не измени́лся еси́. Сего́ ра́ди Це́рковь свята́я блажи́т тя́ приве́тствии си́ми:
Ра́дуйся, а́нгелов сожи́телю; ра́дуйся, апо́столов прее́мниче.
Ра́дуйся, святи́телей сопресто́льниче; ра́дуйся, Росси́йский златоу́сте.
Ра́дуйся, Спиридо́ну, вели́кому Васи́лию, Григо́рию Богосло́ву и про́чим вели́ким святи́телям единоче́стне; ра́дуйся, Никола́ю Мирлики́йскому и Меле́тию Антиохи́йскому единонра́вне.
Ра́дуйся, преподо́бных собесе́дниче; ра́дуйся, мона́хов и по́стников наста́вниче.
Ра́дуйся, му́чеников удобре́ние; ра́дуйся, пра́ведных украше́ние.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 5
Боготе́чная звезда́ яви́лся еси́ в тече́нии твое́м, е́же ты́ соверша́л еси́, свое́ устроя́я спасе́ние; приме́ром же ве́рных ду́ши назида́я, научи́л еси́ благоприя́тно пе́ти Бо́гу: Аллилу́ия.
Икос 5
Ви́девше а́нгельстии чи́нове еще́ во вре́менной жи́зни вели́кие твои́ по́двиги во вся́ком благоче́стии и чистоте́, удивля́хуся, прославля́юще Человеколю́бца Бо́га, немощно́е челове́ческое естество́ подкрепля́ющаго. Мы́ же тя́, усе́рдно любо́вию почита́юще, честву́ем похвала́ми си́ми:
Ра́дуйся, луча́ Трисо́лнечнаго Све́та; ра́дуйся, свети́льниче, на све́щнице церко́вном поста́вленный.
Ра́дуйся, свети́ло, пу́ть пра́вый показу́ющее; ра́дуйся, во́ине Христо́в непобеди́мый.
Ра́дуйся, Единосу́щныя Тро́ицы и́стинный побо́рниче; ра́дуйся, уста́ ерети́ческая загради́вый.
Ра́дуйся, златослове́сными уста́ми небе́сныя и́стины веща́яй; ра́дуйся, вся́ своя́ име́ния по словеси́ Госпо́дню прода́вый.
Ра́дуйся, еди́наго безце́ннаго би́сера — Христа́ Го́спода сниска́вый; ра́дуйся, вма́ле бы́в ве́рен, над мно́гими поста́вленный.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 6
Пропове́дник немо́лчный та́йны Пресвяты́я, Единосу́щныя и Нераздели́мыя Тро́ицы бы́л еси́. Сего́ ра́ди пропове́дует Росси́я вели́чия Бо́жия, пока́занная на тебе́, святи́телю Дими́трие, я́ко прия́л еси́ да́р цели́ти неду́ги душе́вные и теле́сные, да вси́ еди́ным се́рдцем и еди́ными усты́ воспева́ем Бо́гу: Аллилу́ия.
Икос 6
Возсия́ в возлю́бленной Бо́гом душе́ твое́й блиста́ющий и́стиннаго богове́дения све́т на освяще́ние и просвеще́ние ве́рных, его́же с сла́достию внима́ющии спаси́тельному уче́нию твоему́ ви́дяще, ве́рно позна́ем, я́ко и в единонадеся́тый ча́с прише́дый, ра́вный с дре́вними святы́ми и богоно́сными отцы́ дина́рий прия́л еси́. Те́мже восхваля́ем тя́ си́це:
Ра́дуйся, вмести́лище доброде́телей; ра́дуйся, досто́йное святы́ни жили́ще.
Ра́дуйся, мо́ре, нече́стие ми́ра потопи́вшее; ра́дуйся, кри́не благоуха́нный, чуде́сно процве́тший.
Ра́дуйся, сокро́вище медото́чных уче́ний; ра́дуйся, уневе́стивый ду́шу твою́ Жениху́ Христу́.
Ра́дуйся, смире́ния Его́ и́стинный подража́телю; ра́дуйся, и́ноческую нищету́ до конца́ сохрани́вый.
Ра́дуйся, вше́дый с му́дрыми в ра́дость Го́спода твоего́; ра́дуйся, благово́ние Ду́ха Свята́го.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 7
Хотя́ досто́йным о́бразом соверши́ти по́двиг, возложе́нный на тя́ от Бо́га, пе́рвее укрепля́л еси́ свою́ ду́шу прочита́нием жития́ святы́х, предполага́я себе́ подража́ние о́ным. Та́же почу́вствовав по́льзу, из того́ проистека́ющую, не облени́лся еси́ бы́ти списа́телем жи́зни те́х, с ни́миже ны́не в невече́рнем све́те лику́еши, воспева́я Бо́гу: Аллилу́ия.
Икос 7
Но́ваго тя́ о на́с моли́твенника, цели́теля ду́ш и теле́с, и хода́тая на́м спасе́ния ве́чнаго стяжа́хом; но благода́рным се́рдцем и усты́ Бо́гу, толи́каго чудотво́рца в на́ши времена́ дарова́вшему, досто́йно воспе́ти не могу́ще, тебе́, святи́телю и вели́кий уго́дниче Христо́в Дими́трие, похва́льная дерза́ем приноси́ти си́це:
Ра́дуйся, все́м скорбя́щим прия́тное попече́ние; ра́дуйся, ско́рый от вся́кия боле́зни и безме́здный врачу́.
Ра́дуйся, злы́х по́мыслов прогони́телю; ра́дуйся, я́ко твои́ми моли́твами слепы́е прозре́ша.
Ра́дуйся, я́ко твои́м хода́тайством хромы́е и безно́гие ходи́ти нача́ша; ра́дуйся, я́ко тобо́ю от мно́гих бе́сове отгна́шася.
Ра́дуйся, я́ко твои́м заступле́нием разсла́бленные исцеле́ша; ра́дуйся, ломо́тныя и опу́хлыя уврачева́вый.
Ра́дуйся, тряса́вичных и огневи́чных боле́зней целе́бниче; ра́дуйся, от неисце́льныя водяны́я и ка́менныя боле́зни здра́ви возста́вивый.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 8
Стра́нно неду́гом неве́рия одержи́мым ви́дети, ка́ко в ме́ртвенном те́ле и тле́нном возмо́жно а́нгельское проходи́ти житие́ непреткнове́нно, и по успе́нии от еди́наго с ве́рою прикоснове́ния к те́лу, нетле́нием почте́нному, ди́вная соверша́ются. Мы́ же на тебе́, святи́телю Дими́трие, но́вое чуде́с всемогу́щаго Бо́га собы́тие слы́шаще и ви́дяще, моли́твами твои́ми врачу́еми, взыва́ем Ему́: Аллилу́ия.
Икос 8
Ве́сь распали́вшись и́скреннею любо́вию к Бо́гу, всего́ себе́ пре́дал еси́ во́ле Его́, и вся́ веще́ственная и тле́нная вмени́в уме́ты бы́ти, ду́хом, душе́ю и се́рдцем возжеле́л еси́ наслажда́тися лицезре́нием Бо́жиим. Но ны́не вся́ потре́бная тебе́ в ве́чность испроси́л еси́, не забу́ди и на́с, тре́бующих твоего́ заступле́ния и хода́тайства, да те́м па́че похва́льная воспису́ем ти́:
Ра́дуйся, Бо́гу соверше́нно угоди́вый; ра́дуйся, вене́ц безсме́ртия жи́зни получи́вый.
Ра́дуйся, насыща́яйся Бо́жия благода́ти; ра́дуйся, проро́ками за объясне́ние и́х писа́ний похвале́нный.
Ра́дуйся, апо́столами за после́дование и́х стопа́м ублаже́нный; ра́дуйся, святи́телями за единомы́сленную с ни́ми ре́вность просла́вленный.
Ра́дуйся, му́чениками за списа́ние страда́ний и́х увенча́нный; ра́дуйся, преподо́бными за подража́ние и́м во вся́ком благоче́стии и чистоте́ посто́м и моли́твою к ли́ку и́х причте́нный.
Ра́дуйся, пра́ведниками за высоча́йшее твое́ смире́ние и труды́ превознесе́нный; ра́дуйся, от все́х святы́х ра́достными приве́тствиями усрета́нный.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 9
Вся́кия беды́, ско́рби и напа́сти избавля́й на́с, свя́те Дими́трие, твои́ми к Бо́гу те́плыми моли́твами и потщи́ся дарова́ти на́м вре́менная блага́я, к жи́зни потре́бная, и ве́чная, да с тобо́ю ку́пно в селе́нии пра́ведных воспое́м Бо́гу: Аллилу́ия.
Икос 9
Вити́йство челове́ческое не возмо́жет изрещи́ дово́льно коли́чество благода́ти Бо́жия, излия́нныя на тебе́, свя́те Дими́трие, но любо́вию твое́ю побежда́еми, дерза́ем воспева́ти тебе́:
Ра́дуйся, насади́телю благи́х; ра́дуйся, искорени́телю злы́х.
Ра́дуйся, чистоты́ селе́ние; ра́дуйся, печа́льных утеше́ние.
Ра́дуйся, отча́янных заступле́ние; ра́дуйся, сиро́т пита́телю.
Ра́дуйся, оби́димых предста́телю; ра́дуйся, преподо́бия и пра́вды и́стинный храни́телю.
Ра́дуйся, пресве́тлый сто́лпе о́блачный, просвеща́яй мно́жеством чуде́с; ра́дуйся, о́блаче росоно́сный, погаша́яй пла́мень страсте́й.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 10
Спасти́ хотя́ ду́шу, о пло́ти твое́й неради́л еси́, но посто́м, бде́нием моли́твами и непреста́нными труда́ми пло́ть твою́ удручи́л еси́, я́ко в тимпа́не, во умервщле́нии телесе́ благоприя́тно Бо́гу вопия́: Аллилу́ия.
Икос 10
Стена́ еси́, огражда́ющая от все́х бе́д, усе́рдно тя́ в по́мощь призыва́ющих, святи́телю Дими́трие, я́ко во все́х страна́х Росси́йския держа́вы я́сно пропове́дуются оби́льныя чудеса́, бы́вшая у цельбоно́снаго твоего́ гро́ба. Сего́ ра́ди ублажа́ем тя́ си́ми:
Ра́дуйся, ча́ша, источа́ющая на́м еле́й ми́лости Бо́жия; ра́дуйся, больны́х исцеле́ние.
Ра́дуйся, немощны́х подкрепле́ние; ра́дуйся, стра́ждущих ско́рая по́моще.
Ра́дуйся, претыка́ющихся о ка́мень собла́зна наста́вниче; ра́дуйся, оби́димых засту́пниче.
Ра́дуйся, омраче́нныя просвети́вый; ра́дуйся, просвеще́нныя утверди́вый.
Ра́дуйся, расточе́нная собра́вый; ра́дуйся, к небе́сному немерца́ющему све́ту напра́вивый.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 11
Пе́ние немо́лчное прине́сл еси́ Пресвяте́й Тро́ице, свя́те Дими́трие, о́во мы́слию, о́во гла́сом, о́во сло́вом, о́во благотворе́ниями. И ны́не предстоя́ престо́лу Боже́ственному, моли́ о воспева́ющих о тебе́: Аллилу́ия.
Икос 11
Светоза́рное твое́ уче́ние, у́м небе́сный явля́ющее, подтвержда́емое ны́не нетле́нием моще́й твои́х и мно́жеством чуде́с, я́вное и действи́тельнейшее сре́дство дарова́ Человеколюби́вый Бо́г на обличе́ние ерети́чествующих и на утвержде́ние правосла́вных. Ны́не святы́м и медото́чным твои́м уче́нием упое́нные, с благода́рным чу́вствием вопие́м ти́:
Ра́дуйся, учи́телю прему́дрый; ра́дуйся, па́стырю преди́вный.
Ра́дуйся, испове́дниче непоколеби́мый; ра́дуйся, о́ко слепы́м.
Ра́дуйся, нога́ хромы́м; ра́дуйся, рука́ безпомо́щным.
Ра́дуйся, исто́чник златостру́йный; ра́дуйся, цевни́це духо́вная.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 12
Благода́ть, да́нная ти́ от Бо́га, цели́ти неду́ги теле́сные и душе́вные, свя́те Дими́трие, созыва́ет отвсю́ду почита́ющих явле́ние твое́ и ча́ющих тобо́ю получи́ти проси́мое от Бо́га. Те́мже и мы́, припа́дая со умиле́нием мо́лим тя́, изба́ви на́с от зо́л грехо́вных, да благода́рно Ему́ воспое́м: Аллилу́ия.
Икос 12
Пою́ще твоя́ чудеса́, святи́телю Дими́трие, восхваля́ем Бо́га, дарова́вшаго тебе́ таковы́я си́лы исцеле́ний. Ты́ же не возгнуша́йся на́с, гре́шных и недосто́йных рабо́в Его́, но услы́ши на́с, во умиле́нии вопию́щих тебе́ си́це:
Ра́дуйся, све́та непристу́пнаго зри́телю; ра́дуйся, Жениху́ Христу́ све́тел свети́льник сохрани́вый.
Ра́дуйся, душевре́дное уны́ние от себе́ истреби́вый; ра́дуйся, жесто́ким путе́м ра́йских селе́ний дости́гший.
Ра́дуйся, нището́ю бога́тыя стяжа́вый; ра́дуйся, смире́нием получи́вый высо́кая.
Ра́дуйся, тесното́ю простра́нство ве́чное сниска́вый; ра́дуйся, поноше́нием Христа́ ра́ди ве́чную с Ни́м сла́ву прия́вый.
Ра́дуйся, от Святы́я Тро́ицы увенча́нный; ра́дуйся, не гада́нием, но лице́м к лицу́ Бо́га смотря́яй.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 13
О, вели́кий святи́телю Дими́трие, раско́лов и ересе́й искорени́телю! Приими́ сие́ похва́льное пе́ние и моли́ Всемогу́щаго умири́ти ми́р и спасти́ ду́ши на́ша, все́х правосла́вно Триипоста́сному Бо́гу вопию́щих: Аллилу́ия.
Повтор
Этот кондак читается трижды, затем икос 1-й и кондак 1-й.
Икос 1
А́нгел нра́вом, а́ще и челове́к естество́м бы́л еси́, святи́телю Дими́трие: от са́мых бо млады́х ногте́й у́м тво́й, пренебре́гши земна́я, в небе́сная впери́л еси́, и пло́ть нося́, о пло́ти неради́л еси́. Те́мже и всели́ся в тя́ Пресвяты́й Ду́х, Его́же тя́ обита́лищем бы́ти уве́девше, похва́льная воспису́ем ти́:
Ра́дуйся, незло́бием твои́м А́гнца, прорече́ннаго Иса́ием, подража́вый; ра́дуйся, милосе́рдием ни́щия препита́вый.
Ра́дуйся, воздержа́нием а́нгелов удиви́вый; ра́дуйся, посто́м и моли́твою пло́ть твою́ удручи́вый.
Ра́дуйся, к подвла́стным чадолюби́вым отце́м бы́вый; ра́дуйся, стра́ждущия сердобо́лием уте́шивый.
Ра́дуйся, вме́сто тле́нных нетле́нная стяжа́вый; ра́дуйся, небе́сный челове́че.
Ра́дуйся, земны́й а́нгеле; ра́дуйся, Ду́ха Свята́го сосу́де избра́нный.
Ра́дуйся, Правосла́вия ревни́телю; ра́дуйся, душепа́губных раско́лов искорени́телю.
Ра́дуйся, Дими́трие, но́вый и вели́кий чудотво́рче.
Кондак 1
Возбра́нный чудотво́рче и изря́дный уго́дниче Христо́в, многоцеле́бный чуде́с исто́чниче, неисчерпа́емыя благода́ти хода́таю, те́плый моли́твенниче, вели́кий святи́телю Христо́в Дими́трие, я́ко име́яй дерзнове́ние ко Христу́ Бо́гу на́шему, от вся́ких на́с бе́д свободи́ зову́щих:
Ра́дуйся, Дими́трие, но́вый и вели́кий чудотво́рче.
Молитвы
О, всеблаже́нный святи́телю Дими́трие, вели́кий уго́дниче Христо́в, златоу́сте Росси́йский, услы́ши на́с, гре́шных, моля́щихся тебе́, и принеси́ моли́тву на́шу к Ми́лостивому и Человеколю́бцу Бо́гу, Ему́же ты́ ны́не в ра́дости святы́х и с ли́ки а́нгел предстои́ши. Умоли́ Его́ благоутро́бие, да не осу́дит на́с по беззако́ниям на́шим, но да сотвори́т с на́ми по ми́лости Свое́й, испроси́ на́м у Христа́ и Бо́га на́шего ми́рное и безмяте́жное житие́, здра́вие душе́вное и теле́сное, земли́ благопло́дие и во все́м вся́кое изоби́лие и благоде́нствие, и да не во зло́ обрати́м блага́я, да́руемая на́м от Ще́драго Бо́га, но в сла́ву Его́ и в прославле́ние твоего́ заступле́ния. Да́руй на́м богоуго́дно прейти́ по́прище вре́менныя жи́зни, изба́ви на́с возду́шных мыта́рств и наста́ви на́с на пу́ть, веду́щий в селе́ния пра́ведных, иде́же пра́зднующих гла́с непреста́нный, зря́щих Бо́жия лица́ неизрече́нную добро́ту. Це́рковь же святу́ю от ересе́й и раско́лов сохрани́, ве́рных укрепи́, заблужда́ющих обрати́ и все́м да́руй вся́, я́же ко спасе́нию и сла́ве Бо́жией подоба́ющая. Оте́чество твое́ сохрани́ от враго́в ненаве́тно, но побора́й ору́жию крестоно́снаго во́инства, и пода́ждь на́м все́м твое́ архипа́стырское и свято́е благослове́ние, да о́ным осеня́еми, изба́вимся от ко́зней лука́ваго и избе́гнем от вся́кия беды́ и напа́сти. Услы́ши моле́ние на́ше, о́тче Дими́трие, и моли́ непреста́нно о на́с Всеси́льнаго Бо́га, сла́вимаго и покланя́емаго в Трие́х Ипоста́сех, Ему́же подоба́ет вся́кая сла́ва, че́сть и держа́ва во ве́ки веко́в. Ами́нь.
Конда́къ а҃
Возбра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, многоцѣле́бный чꙋде́съ и҆сто́чниче, неисчерпа́емыѧ бл҃года́ти хода́таю, те́плый мл҃твенниче, вели́кїй ст҃и́телю хрⷭ҇то́въ дими́трїе, ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀, бг҃ꙋ на́шемꙋ, ѿ всѧ́кихъ на́съ бѣ́дъ свободѝ зовꙋ́щихъ:
Ра́дꙋйсѧ, дими́трїе, но́вый и҆ вели́кїй чꙋдотво́рче.
І҆́косъ а҃
А҆́гг҃лъ нра́вомъ, а҆́ще и҆ человѣ́къ є҆стество́мъ бы́лъ є҆сѝ, ст҃и́телю дими́трїе: ѿ са́мыхъ бо млады́хъ ногте́й ᲂу҆́мъ тво́й пренебре́гъ земна̑ѧ, въ нбⷭ҇наѧ впери́лъ є҆сѝ, и҆ пло́ть носѧ̀, ѡ҆ пло́ти неради́лъ є҆сѝ. тѣ́мже и҆ всели́сѧ въ тѧ̀ прест҃ы́й дх҃ъ, є҆гѡ́же тѧ̀ ѡ҆бита́лищемъ бы́ти ᲂу҆вѣ́дѣвше, похва̑льнаѧ восписꙋ́емъ тѝ:
Ра́дꙋйсѧ, неѕло́бїемъ твои́мъ а҆́гнцꙋ прорече́нномꙋ и҆са́їемъ подража́вый: ра́дꙋйсѧ, милосе́рдїемъ ни́щыѧ препита́вый.
Ра́дꙋйсѧ, воздержа́нїемъ а҆́гг҃лѡвъ ᲂу҆диви́вый: ра́дꙋйсѧ, посто́мъ и҆ моли́твою пло́ть твою̀ ᲂу҆дрꙋчи́вый.
Ра́дꙋйсѧ, къ подвла̑стнымъ чадолюби́вымъ ѻ҆тце́мъ бы́вый: ра́дꙋйсѧ, стра́ждꙋщыѧ сердобо́лїемъ ᲂу҆тѣ́шивый.
Ра́дꙋйсѧ, вмѣ́сто тлѣ́нныхъ нетлѣ́ннаѧ стѧжа́вый: ра́дꙋйсѧ, нбⷭ҇ный человѣ́че.
Ра́дꙋйсѧ, земны́й а҆́гг҃ле: ра́дꙋйсѧ, дх҃а ст҃а́гѡ сосꙋ́де и҆́збранный.
Ра́дꙋйсѧ, правосла́вїѧ ревни́телю: ра́дꙋйсѧ, дꙋшепа́гꙋбныхъ раздо́рѡвъ и҆скорени́телю.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ в҃
Ви́дѧще ѻ҆би́льнꙋю рекꙋ̀ чꙋде́съ и҆ и҆сцѣле́нїй, ѿ ст҃ы́хъ твои́хъ моще́й и҆стека́ющꙋю, бл҃гоговѣ́нїѧ и҆ ра́дости и҆спо́лньшесѧ, бл҃годари́мъ бг҃а, прославлѧ́ющагѡ ст҃ы̑ѧ своѧ̑, є҆мꙋ́же и҆ ѡ҆ тебѣ̀ вопїе́мъ: А҆ллилꙋ́їа.
І҆́косъ в҃
Ра́зꙋмъ и҆́стиннагѡ бг҃осло́вїѧ внꙋша́ѧ ча́дѡмъ хрⷭ҇то́вы цр҃кве, златослове́сными поꙋче́ньми ᲂу҆твержда́лъ є҆сѝ: є҆реті́чествꙋющихъ же, привлека́ѧ къ сп҃си́тельномꙋ є҆диномы́слїю, въ заблꙋжде́нїихъ ѡ҆блича́лъ є҆сѝ, за таково́е твоѐ ѡ҆ дꙋша́хъ на́шихъ попече́нїе взыва́емъ тѝ си́це:
Ра́дꙋйсѧ, таи́нниче прест҃ы́ѧ трⷪ҇цы: ра́дꙋйсѧ, проповѣ́дниче неисче́тныхъ чꙋде́съ бж҃їихъ.
Ра́дꙋйсѧ, а҆пⷭ҇льскихъ преда́нїй блюсти́телю: ра́дꙋйсѧ, бры́нскихъ дꙋшегꙋ́бцєвъ побѣди́телю.
Ра́дꙋйсѧ, пла́меню, є҆́рєси пожига́ѧй: ра́дꙋйсѧ, гро́ме, соблазнѧ́ющыѧ ᲂу҆страша́ѧй.
Ра́дꙋйсѧ, свѣщѐ, бг҃омъ возжже́ннаѧ, мра́къ нече́стїѧ разгонѧ́ющаѧ: ра́дꙋйсѧ, ѕвѣздо̀, пꙋ́ть ко сп҃се́нїю показꙋ́ющаѧ.
Ра́дꙋйсѧ, тѷмпа́не, бж҃їю сла́вꙋ брѧца́ѧй: ра́дꙋйсѧ, ѻ҆рга́не дх҃а ст҃а́гѡ.
Ра́дꙋйсѧ, правосла́вїѧ ревни́телю: ра́дꙋйсѧ, дꙋшепа́гꙋбныхъ раско́лѡвъ и҆скорени́телю.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ г҃
Си́лою блгⷣти бж҃їѧ є҆щѐ во вре́меннѣй жи́зни прїѧ́лъ є҆сѝ вла́сть, свѧ́те дими́трїе, недꙋ́ги и҆сцѣлѧ́ти и҆ бѣ́сы и҆згонѧ́ти: по сме́рти же твое́й наипа́че просла́ви тебѣ̀ всемогꙋ́щїй бг҃ъ мно́гими чꙋдотворе́ньми, да всѝ, взира́юще на сїѐ, ᲂу҆се́рднѡ притека́ютъ ко и҆сцѣле́нїю тобо́ю ѿ недꙋ́гъ тѣле́сныхъ, а҆ па́че дꙋше́вныхъ, бг҃ꙋ же вопїю́тъ: А҆ллилꙋ́їа.
І҆́косъ г҃
И҆мѣ́ѧ неꙋсы́пное попече́нїе ѡ҆ сп҃се́нїи дꙋ́шъ, ввѣ́ренныхъ тебѣ̀ ѿ бг҃а, ст҃и́телю дими́трїе, па́стырски къ дꙋшеспаси́тельной жи́зни, и҆ сло́вомъ и҆ са́мымъ дѣ́ломъ, показꙋ́ѧ нелѣ́ностный по́двигъ въ подража́нїи ст҃ы̑мъ бж҃їимъ, непреста́ннѡ наставлѧ́лъ є҆сѝ. сегѡ̀ ра́ди прїимѝ ѿ на́шегѡ ᲂу҆се́рдїѧ достѡ́йныѧ похвалы̑ тебѣ̀:
Ра́дꙋйсѧ, па́стырю до́брый, заблꙋжда́ющихъ по гора́мъ сꙋемꙋ́дрїѧ взыска́вый: ра́дꙋйсѧ, бл҃гі́й ра́бе и҆ вѣ́рный, да́нный тебѣ̀ ѿ гдⷭ҇а тала́нтъ ᲂу҆сꙋгꙋ́бивый.
Ра́дꙋйсѧ, дѣ́лателю вїногра́да хрⷭ҇то́ва: ра́дꙋйсѧ, бл҃гоче́стїѧ сто́лпе неподви́жимый.
Ра́дꙋйсѧ, тве́рдое забра́ло хрⷭ҇то́вы цр҃кве: ра́дꙋйсѧ, щи́те, защища́ѧй бл҃гоче́стїе.
Ра́дꙋйсѧ, мечꙋ̀ ѻ҆стрѣ́йшїй, посѣца́ѧй ѕлоче́стїе: ра́дꙋйсѧ, непоколеби́мое правосла́вїѧ ѡ҆снова́нїе.
Ра́дꙋйсѧ, тве́рдый ка́меню вѣ́ры: ра́дꙋйсѧ, корми́ло цр҃ко́вное, ᲂу҆правлѧ́ющее вѣ́рныхъ къ ти́хомꙋ приста́нищꙋ.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ д҃
Бꙋ́рѧ є҆ресе́й ѿ преиспо́днихъ чрез̾ а҆́рїа во гре́цїи возроди́вшаѧсѧ, а҆ въ послѣ̑днѧѧ лѣ̑та про́иски марті́на а҆рмени́на чрез̾ бры́нскихъ скитонача̑льниковъ во ѻ҆те́чествѣ на́шемъ возни́кшаѧ, гото́ва была̀ ѡ҆прове́ргнꙋти тишинꙋ̀ є҆ди́ныѧ, ст҃ы́ѧ, собо́рныѧ и҆ а҆пⷭ҇льскїѧ цр҃кве: ты̀ же, па́стырю до́брый, положи́вый дꙋ́шꙋ твою̀ за ѻ҆́вцы, ѻ҆́ныѧ прогна́въ дꙋшепа̑гꙋбныѧ во́лки, бꙋ́рю сꙋемꙋ́дрїѧ ᲂу҆кроти́лъ є҆сѝ, вѣ̑рныѧ же наꙋчи́лъ є҆сѝ трїѷпоста́сномꙋ бг҃ꙋ взыва́ти: А҆ллилꙋ́їа.
І҆́косъ д҃
Слы́шаша сꙋемꙋ́дреннїи раско́льницы твоѐ къ ни́мъ и҆з̾ѡбличе́нїе, є҆́же ты̀, болѣ́знꙋѧ ѡ҆ серде́чномъ и҆́хъ заблꙋжде́нїи, написа́лъ є҆сѝ, воз̾бѣси́шасѧ ѕѣлѡ̀, и҆ мно́жество и҆з̾ ни́хъ вмѣ́стѡ до́лжнагѡ и҆справле́нїѧ а҆́дскїй пла́мень и҆зры́гнꙋша на тѧ̀, ты́ же, ꙗ҆́кѡ тве́рдый а҆дама́нтъ, под̾ ᲂу҆да́рами ѕло́бы и҆ не́нависти не и҆змѣни́лсѧ є҆сѝ. сегѡ̀ ра́ди цр҃ковь ст҃а́ѧ бл҃жи́тъ тѧ̀ привѣ̑тствїи си́ми:
Ра́дꙋйсѧ, а҆́гг҃лѡвъ сожи́телю: ра́дꙋйсѧ, а҆пⷭ҇лѡвъ прее́мниче.
Ра́дꙋйсѧ, ст҃и́телей сопресто́льниче: ра́дꙋйсѧ, рѡссі́йскїй златоꙋ́сте.
Ра́дꙋйсѧ, спѷрїдѡ́нꙋ, вели́комꙋ васі́лїю, григо́рїю бг҃осло́вꙋ и҆ про́чимъ вели́кимъ ст҃и́телємъ є҆диноче́стне: ра́дꙋйсѧ, нїкола́ю мѷрлѷкі́йскомꙋ и҆ меле́тїю а҆нтїохі́йскомꙋ є҆динонра́вне.
Ра́дꙋйсѧ, прпⷣбныхъ собесѣ́дниче: ра́дꙋйсѧ, мона́хѡвъ и҆ по́стникѡвъ наста́вниче.
Ра́дꙋйсѧ, мꙋ́ченикѡвъ ᲂу҆добре́нїе: ра́дꙋйсѧ, пра́ведныхъ ᲂу҆краше́нїе.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ є҃
Бг҃оте́чнаѧ ѕвѣзда̀ ꙗ҆ви́лсѧ є҆сѝ въ тече́нїи твое́мъ, є҆́же ты̀ соверша́лъ є҆сѝ, своѐ ᲂу҆строѧ́ѧ сп҃се́нїе: примѣ́ромъ же вѣ́рныхъ дꙋ́шы назида́ѧ, наꙋчи́лъ є҆сѝ бл҃гопрїѧ́тнѡ пѣ́ти бг҃ꙋ: А҆ллилꙋ́їа.
І҆́косъ є҃
Ви́дѣвше а҆́гг҃льстїи чи́нове є҆щѐ во вре́менной жи́зни вели̑кїѧ твоѧ̑ по́двиги во всѧ́комъ бл҃гоче́стїи и҆ чистотѣ̀, ᲂу҆дивлѧ́хꙋсѧ, прославлѧ́юще человѣколю́бца бг҃а, немощно́е человѣ́ческое є҆стество̀ подкрѣплѧ́ющаго. мы́ же тѧ̀, ᲂу҆се́рднѡ любо́вїю почита́юще, чествꙋ́емъ похвала́ми си́ми:
Ра́дꙋйсѧ, лꙋчѐ трисо́лнечнагѡ свѣ́та: ра́дꙋйсѧ, свѣти́льниче, на свѣ́щницѣ цр҃ко́внѣмъ поста́вленный.
Ра́дꙋйсѧ, свѣти́ло, пꙋ́ть пра́вый показꙋ́ющее: ра́дꙋйсѧ, во́ине хрⷭ҇то́въ непобѣди́мый.
Ра́дꙋйсѧ, є҆диносꙋ́щныѧ трⷪ҇цы и҆́стинный побо́рниче: ра́дꙋйсѧ, ᲂу҆ста̀ є҆реті́чєскаѧ загради́вый.
Ра́дꙋйсѧ, златослове́сными ᲂу҆ста́ми нбⷭ҇ныѧ и҆́стины вѣща́ѧй: ра́дꙋйсѧ, всѧ̑ своѧ̑ и҆мѣ̑нїѧ по словесѝ гдⷭ҇ню прода́вый.
Ра́дꙋйсѧ, є҆ди́наго безцѣ́ннаго би́сера хрⷭ҇та̀ гдⷭ҇а сниска́вый: ра́дꙋйсѧ, вма́лѣ бы́въ вѣ́ренъ, надъ мно́гими поста́вленный.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ ѕ҃
Проповѣ́дникъ немо́лчный та́йны прест҃ы́ѧ, є҆диносꙋ́щныѧ и҆ нераздѣли́мыѧ трⷪ҇цы бы́лъ є҆сѝ. сегѡ̀ ра́ди проповѣ́дꙋетъ цр҃ковь рѡссі́йскаѧ вели́чїѧ бж҃їѧ, показа́ннаѧ на тебѣ̀, ст҃и́телю дими́трїе, ꙗ҆́кѡ прїѧ́лъ є҆сѝ да́ръ цѣли́ти недꙋ́ги дꙋшє́вныѧ и҆ тѣлє́сныѧ, да всѝ є҆ди́нымъ се́рдцемъ и҆ є҆ди́ными ᲂу҆сты̀ воспѣва́емъ бг҃ꙋ: А҆ллилꙋ́їа.
І҆́косъ ѕ҃
Возсїѧ̀ въ возлю́бленной бг҃омъ дꙋшѝ твое́й блиста́ющїй и҆́стиннагѡ бг҃овѣ́дѣнїѧ свѣ́тъ, на ѡ҆сщ҃е́нїе и҆ просвѣще́нїе вѣ́рныхъ, є҆гѡ́же съ сла́достїю внима́ющїи сп҃си́тельномꙋ ᲂу҆че́нїю твоемꙋ̀ ви́дѧще, вѣ́рнѡ познае́мъ, ꙗ҆́кѡ и҆ въ є҆динонадесѧ́тый ча́съ прише́дый ра́вный съ дре́вними ст҃ы́ми и҆ бг҃оно́сными ѻ҆тцы̑ дина́рїй прїѧ́лъ є҆сѝ. тѣ́мже восхвалѧ́емъ тѧ̀ си́це:
Ра́дꙋйсѧ, вмести́лище добродѣ́телей: ра́дꙋйсѧ, досто́йное ст҃ы́ни жили́ще.
Ра́дꙋйсѧ, мо́ре, нече́стїе мі́ра потопи́вшее: ра́дꙋйсѧ, крі́не бл҃гоꙋха́нный, чꙋде́снѡ процвѣ́тшїй.
Ра́дꙋйсѧ, сокро́вище медото́чныхъ ᲂу҆че́нїй: ра́дꙋйсѧ, ᲂу҆невѣ́стивый дꙋ́шꙋ твою̀ женихꙋ̀ хрⷭ҇тꙋ̀.
Ра́дꙋйсѧ, смире́нїѧ є҆гѡ̀ и҆́стинный подража́телю: ра́дꙋйсѧ, и҆́ноческое нестѧжа́нїе до конца̀ сохрани́вый.
Ра́дꙋйсѧ, вше́дый съ мꙋ́дрыми въ ра́дость гдⷭ҇а твоегѡ̀: ра́дꙋйсѧ, бл҃гоꙋха́нїе дх҃а ст҃а́гѡ.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ з҃
Хотѧ̀ досто́йнымъ ѡ҆́бразомъ соверши́ти по́двигъ, возложе́нный на тѧ̀ ѿ бг҃а, пе́рвѣе ᲂу҆крѣплѧ́лъ є҆сѝ дꙋ́шꙋ свою̀ прочита́нїемъ житі́й ст҃ы́хъ, предполага́ѧ себѣ̀ подража́нїе ѻ҆́нымъ: та́же, почꙋ́вствовавъ по́льзꙋ, и҆з̾ тогѡ̀ проистека́ющꙋю, не ѡ҆блѣни́лсѧ є҆сѝ бы́ти списа́телемъ жи́зни тѣ́хъ, съ ни́ми же ны́нѣ въ невече́рнѣмъ свѣ́тѣ ликꙋ́еши, воспѣва́ѧ бг҃ꙋ: А҆ллилꙋ́їа.
І҆́косъ з҃
Но́вагѡ тѧ̀ ѡ҆ на́съ мл҃твенника, цѣли́телѧ дꙋ́шъ и҆ тѣле́съ, и҆ хода́таѧ на́мъ сп҃се́нїѧ вѣ́чнагѡ стѧжа́хомъ: но бл҃года́рнымъ се́рдцемъ и҆ ᲂу҆сты̀ бг҃ꙋ, толи́каго чꙋдотво́рца въ на̑ша времена̀ дарова́вшемꙋ, досто́йнѡ воспѣ́ти не могꙋ́ще, тебѣ̀, ст҃и́телю и҆ вели́кїй ᲂу҆го́дниче хрⷭ҇то́въ дими́трїе, похва̑льныѧ дерза́емъ приноси́ти си́це:
Ра́дꙋйсѧ, всѣ̑мъ скорбѧ́щымъ прїѧ́тное попече́нїе: ра́дꙋйсѧ, ско́рый ѿ всѧ́кїѧ болѣ́зни и҆ безме́здный врачꙋ̀.
Ра́дꙋйсѧ, ѕлы́хъ по́мыслѡвъ прогони́телю: ра́дꙋйсѧ, ꙗ҆́кѡ твои́ми мл҃твами слѣпі́и прозрѣ́ша.
Ра́дꙋйсѧ, ꙗ҆́кѡ твои́мъ хода́тайствомъ хро́мїи и҆ безно́жнїи ходи́ти нача́ша: ра́дꙋйсѧ, ꙗ҆́кѡ тобо́ю ѿ мно́гихъ бѣ́сове ѿгна́шасѧ.
Ра́дꙋйсѧ, ꙗ҆́кѡ твои́мъ застꙋпле́нїемъ разсла́бленнїи и҆сцѣлѣ́ша: ра́дꙋйсѧ, ломѡ́тныѧ и҆ ѡ҆пꙋ̑хлыѧ ᲂу҆врачева́вый.
Ра́дꙋйсѧ, трѧса́вичныхъ и҆ ѻ҆гневи́чныхъ болѣ́зней цѣле́бниче: ра́дꙋйсѧ, ѿ неисцѣ̑льныѧ водѧны́ѧ и҆ ка́мєнныѧ болѣ́зни здра̑вы возста́вивый.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ и҃
Стра́ннѡ недꙋ́гѡмъ невѣ́рїѧ ѡ҆держи̑мымъ ви́дѣти, ка́кѡ въ ме́ртвенномъ тѣ́лѣ и҆ тлѣ́нномъ возмо́жно а҆́гг҃льское проходи́ти житїѐ непреткнове́ннѡ, и҆ по ᲂу҆спе́нїи ѿ є҆ди́нагѡ съ вѣ́рою прикоснове́нїѧ къ те́лꙋ, нетлѣ́нїемъ почте́нномꙋ, ди́внаѧ соверша́ютсѧ. мы́ же на тебѣ̀, ст҃и́телю дими́трїе, но́вое чꙋде́съ бг҃а всемогꙋ́щагѡ сбытїѐ слы́шаще и҆ ви́дѧще, мл҃твами твои́ми врачꙋ́еми, взыва́емъ є҆мꙋ̀: А҆ллилꙋ́їа.
І҆́косъ и҃
Ве́сь распали́всѧ и҆́скреннею любо́вїю къ бг҃ꙋ, всегѡ̀ себѐ пре́далъ є҆сѝ во́ли є҆гѡ̀: и҆ всѧ̑ веще́ствєннаѧ и҆ тлѣ̑ннаѧ вмѣни́въ ᲂу҆ме́ты бы́ти, дꙋ́хомъ, дꙋше́ю и҆ се́рдцемъ возжелѣ́лъ є҆сѝ наслажда́тисѧ лицезрѣ́нїемъ бж҃їимъ. но ны́нѣ всѧ̑ потрє́бнаѧ тебѣ̀ въ вѣ́чности и҆спроси́лъ є҆сѝ, не забꙋ́ди и҆ на́съ, тре́бꙋющихъ твоегѡ̀ застꙋпле́нїѧ и҆ хода́тайства, да тѣ́мъ па́че похва̑льныѧ восписꙋ́емъ тѝ:
Ра́дꙋйсѧ, бг҃ꙋ соверше́ннѡ ᲂу҆годи́вый: ра́дꙋйсѧ, вѣне́цъ безсме́ртныѧ жи́зни полꙋчи́вый.
Ра́дꙋйсѧ, насыща́ѧйсѧ бж҃їѧ бл҃года́ти: ра́дꙋйсѧ, прⷪ҇ро́ки за и҆з̾ѧсне́нїе и҆́хъ писа́нїй похвале́нный.
Ра́дꙋйсѧ, а҆пⷭ҇лы за послѣ́дованїе и҆́хъ стопа́мъ ᲂу҆бл҃же́нный: ра́дꙋйсѧ, свѧти́тєли за є҆диномы́сленнꙋю съ ни́ми ре́вность просла́вленный.
Ра́дꙋйсѧ, мч҃ники за списа́нїе страда́нїй и҆́хъ ᲂу҆вѣнча́нный: ра́дꙋйсѧ, прпⷣбными за подража́нїе и҆́мъ во всѧ́комъ бл҃гоче́стїи и҆ чистотѣ̀ посто́мъ и҆ мл҃твою къ ли̑кꙋ и҆́хъ причте́нный.
Ра́дꙋйсѧ, првⷣники за высоча́йшее твоѐ смире́нїе и҆ трꙋды̀ превознесе́нный: ра́дꙋйсѧ, ѿ всѣ́хъ ст҃ы́хъ ра́достными привѣ̑тствїи срѣ́тенный.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ ѳ҃
Всѧ́кїѧ бѣды̀, ско́рби и҆ напа́сти и҆збавлѧ́й на́съ, ст҃е дими́трїе, твои́ми къ бг҃ꙋ те́плыми мл҃твами и҆ потщи́сѧ дарова́ти на́мъ вре́мєннаѧ бл҃га̑ѧ, къ жи́зни потрє́бнаѧ, и҆ вѣ̑чнаѧ, да съ тобо́ю кꙋ́пнѡ въ селе́нїи првⷣныхъ воспое́мъ бг҃ꙋ: А҆ллилꙋ́їа.
І҆́косъ ѳ҃
Виті́йство человѣ́ческое не возмо́жетъ и҆счестѝ дово́льнѡ ѡ҆би́лїе блгⷣти бж҃їю, и҆злїѧ́нныѧ на тебѐ, ст҃е дими́трїе, но, любо́вїю твое́ю побѣжда́еми, дерза́емъ воспѣва́ти тебѣ̀:
Ра́дꙋйсѧ, насади́телю бл҃ги́хъ: ра́дꙋйсѧ, и҆скорени́телю ѕлы́хъ.
Ра́дꙋйсѧ, чистоты̀ селе́нїе: ра́дꙋйсѧ, печа́льныхъ ᲂу҆тѣше́нїе.
Ра́дꙋйсѧ, ѿча́ѧнныхъ застꙋпле́нїе: ра́дꙋйсѧ, сирѡ́тъ пита́телю.
Ра́дꙋйсѧ, ѡ҆би́димыхъ предста́телю: ра́дꙋйсѧ, преподо́бїѧ и҆ пра́вды и҆́стинный храни́телю.
Ра́дꙋйсѧ, пресвѣ́тлый сто́лпе ѡ҆́блачный, просвѣща́ѧй мно́жествомъ чꙋде́съ: ра́дꙋйсѧ, ѡ҆́блаче росоно́сный, погаша́ѧй пла́мень страсте́й.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ і҃
Спастѝ хотѧ̀ дꙋ́шꙋ, ѡ҆ пло́ти твое́й неради́лъ є҆сѝ, но посто́мъ, бдѣ́нїемъ, мл҃твами и҆ непреста́нными трꙋда́ми пло́ть твою̀ ᲂу҆дрꙋчи́лъ є҆сѝ, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ благопрїѧ́тнѡ бг҃ꙋ вопїѧ̀: А҆ллилꙋ́їа.
І҆́косъ і҃
Стѣна̀ є҆сѝ, ѡ҆гражда́ющаѧ ѿ всѣ́хъ бѣ́дъ ᲂу҆се́рднѡ тѧ̀ въ по́мощь призыва́ющихъ, ст҃и́телю дими́трїе, ꙗ҆́кѡ во всѣ́хъ страна́хъ рѡссі́йскїѧ держа́вы ꙗ҆́снѡ проповѣ́дꙋютсѧ ѡ҆би̑льнаѧ чꙋдеса̀ цѣльбоно́снагѡ гро́ба твоегѡ̀. сегѡ̀ ра́ди ᲂу҆блажа́емъ тѧ̀ си́ми:
Ра́дꙋйсѧ, ча́ша, и҆сточа́ющаѧ на́мъ є҆ле́й млⷭ҇ти бж҃їѧ: ра́дꙋйсѧ, больны́хъ и҆сцѣле́нїе.
Ра́дꙋйсѧ, немощны́хъ подкрѣпле́нїе: ра́дꙋйсѧ, стра́ждꙋщихъ ско́раѧ по́моще.
Ра́дꙋйсѧ, претыка́ющихсѧ ѡ҆ ка́мень собла́зна наста́вниче: ра́дꙋйсѧ, ѡ҆би́димыхъ застꙋ́пниче.
Ра́дꙋйсѧ, ѡ҆мрачє́нныѧ просвѣти́вый: ра́дꙋйсѧ, просвѣщє́нныѧ ᲂу҆тверди́вый.
Ра́дꙋйсѧ, расточє́ннаѧ собра́вый: ра́дꙋйсѧ, къ нбⷭ҇номꙋ немерца́ющемꙋ свѣ́тꙋ напра́вивый.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ а҃і
Пѣ́нїе немо́лчное прине́слъ є҆сѝ прест҃ѣ́й трⷪ҇цѣ, ст҃е дими́трїе, ѻ҆́во мы́слїю, ѻ҆́во гла́сомъ, ѻ҆́во сло́вомъ, ѻ҆́во бл҃готворє́нїи. и҆ ны́нѣ, предстоѧ̀ престо́лꙋ бжⷭ҇твенномꙋ, молѝ ѡ҆ воспѣва́ющихъ ѡ҆ тебѣ̀: А҆ллилꙋ́їа.
І҆́косъ а҃і
Свѣтоза́рное твоѐ ᲂу҆че́нїе, ᲂу҆́мъ нбⷭ҇ный ꙗ҆влѧ́ющее, свидѣ́тельствꙋемое ны́нѣ нетлѣ́нїемъ моще́й твои́хъ и҆ мно́гими чꙋдесы̀, ꙗ҆́вное и҆ дѣйстви́тельнѣйшее сре́дство дарова́ человѣколюби́вый бг҃ъ на ѡ҆бличе́нїе є҆реті́чествꙋющихъ и҆ ᲂу҆твержде́нїе правосла́вныхъ. ны́нѣ ст҃ы́мъ и҆ медото́чнымъ твои́мъ ᲂу҆че́нїемъ ᲂу҆пое́ннїи съ бл҃года́рнымъ чꙋ́вствомъ вопїе́мъ тѝ:
Ра́дꙋйсѧ, ᲂу҆чи́телю премꙋ́дрый: ра́дꙋйсѧ, па́стырю преди́вный.
Ра́дꙋйсѧ, и҆сповѣ́дниче непоколеби́мый: ра́дꙋйсѧ, ѻ҆́ко слепы̑мъ.
Ра́дꙋйсѧ, но́ги хромы̑мъ: ра́дꙋйсѧ, рꙋ́ки безпо́мощнымъ.
Ра́дꙋйсѧ, и҆сто́чникъ златострꙋ́йный: ра́дꙋйсѧ, цѣвни́це дꙋхо́внаѧ.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ в҃і
Бл҃года́ть, да́ннаѧ тѝ ѿ бг҃а, цѣли́ти недꙋ́ги тѣлє́сныѧ и҆ дꙋшє́вныѧ, ст҃е дими́трїе, созыва́етъ ѿвсю́дꙋ почита́ющихъ ꙗ҆вле́нїе твоѐ и҆ ча́ющихъ тобо́ю полꙋчи́ти проси́мое ѿ бг҃а. те́мъ же и҆ мы̀, припа́дающе, со ᲂу҆миле́нїемъ мо́лимъ тѧ̀, и҆зба́ви на́съ ѿ ѕѡ́лъ грѣхо́вныхъ, да бл҃года́рнѡ є҆мꙋ̀ воспое́мъ: А҆ллилꙋ́їа.
І҆́косъ в҃і
Пою́ще твоѧ̑ чꙋдеса̀, ст҃и́телю дими́трїе, восхвалѧ́емъ бг҃а, дарова́вшагѡ тебѣ̀ таковы̑ѧ си́лы и҆сцѣле́нїй. ты̀ же не возгнꙋша́йсѧ на́съ, грѣ́шныхъ и҆ недосто́йныхъ рабѡ́въ є҆гѡ̀, но ᲂу҆слы́ши на́съ, во ᲂу҆миле́нїи вопїю́щихъ тебѣ̀ си́це:
Ра́дꙋйсѧ, свѣ́та непристꙋ́пнагѡ зри́телю: ра́дꙋйсѧ, женихꙋ̀ хрⷭ҇тꙋ̀ свѣ́телъ свѣти́льникъ сохрани́вый.
Ра́дꙋйсѧ, дꙋшевре́дное ᲂу҆ны́нїе ѿ себє̀ и҆стреби́вый: ра́дꙋйсѧ, жесто́кимъ пꙋте́мъ ра́йскихъ селе́нїй дости́гнꙋвый.
Ра́дꙋйсѧ, нището́ю бога̑таѧ стѧжа́вый: ра́дꙋйсѧ, смире́нїемъ полꙋчи́вый высо́каѧ.
Ра́дꙋйсѧ, тѣсното́ю простра́нство вѣ́чное сниска́вый: ра́дꙋйсѧ, поноше́нїемъ хрⷭ҇та̀ ра́ди вѣ́чнꙋю съ ни́мъ сла́вꙋ прїѧ́вый.
Ра́дꙋйсѧ, ѿ ст҃ы́ѧ трⷪ҇цы ᲂу҆вѣнча́нный: ра́дꙋйсѧ, не гада́нїемъ, но лице́мъ къ лицꙋ̀ бг҃а созерца́ѧй.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ г҃і
Ѽ вели́кїй ст҃и́телю дими́трїе, раско́лѡвъ и҆ є҆ресе́й и҆скорени́телю, прїимѝ сїѐ похва́льное пѣ́нїе и҆ молѝ всемогꙋ́щаго бг҃а ᲂу҆мири́ти мі́ръ и҆ сп҃стѝ дꙋшѝ на́ша, всѣ́хъ правосла́внѡ трїѷпоста́сномꙋ бг҃ꙋ вопїю́щихъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лъ нра́вомъ, а҆́ще и҆ человѣ́къ є҆стество́мъ бы́лъ є҆сѝ, ст҃и́телю дими́трїе: ѿ са́мыхъ бо млады́хъ ногте́й ᲂу҆́мъ тво́й пренебре́гъ земна̑ѧ, въ нбⷭ҇наѧ впери́лъ є҆сѝ, и҆ пло́ть носѧ̀, ѡ҆ пло́ти неради́лъ є҆сѝ. тѣ́мже и҆ всели́сѧ въ тѧ̀ прест҃ы́й дх҃ъ, є҆гѡ́же тѧ̀ ѡ҆бита́лищемъ бы́ти ᲂу҆вѣ́дѣвше, похва̑льнаѧ восписꙋ́емъ тѝ:
Ра́дꙋйсѧ, неѕло́бїемъ твои́мъ а҆́гнцꙋ прорече́нномꙋ и҆са́їемъ подража́вый: ра́дꙋйсѧ, милосе́рдїемъ ни́щыѧ препита́вый.
Ра́дꙋйсѧ, воздержа́нїемъ а҆́гг҃лѡвъ ᲂу҆диви́вый: ра́дꙋйсѧ, посто́мъ и҆ моли́твою пло́ть твою̀ ᲂу҆дрꙋчи́вый.
Ра́дꙋйсѧ, къ подвла̑стнымъ чадолюби́вымъ ѻ҆тце́мъ бы́вый: ра́дꙋйсѧ, стра́ждꙋщыѧ сердобо́лїемъ ᲂу҆тѣ́шивый.
Ра́дꙋйсѧ, вмѣ́сто тлѣ́нныхъ нетлѣ́ннаѧ стѧжа́вый: ра́дꙋйсѧ, нбⷭ҇ный человѣ́че.
Ра́дꙋйсѧ, земны́й а҆́гг҃ле: ра́дꙋйсѧ, дх҃а ст҃а́гѡ сосꙋ́де и҆́збранный.
Ра́дꙋйсѧ, правосла́вїѧ ревни́телю: ра́дꙋйсѧ, дꙋшепа́гꙋбныхъ раздо́рѡвъ и҆скорени́телю.
Ра́дꙋйсѧ, дими́трїе, но́вый и҆ вели́кїй чꙋдотво́рче.
Конда́къ а҃
Возбра́нный чꙋдотво́рче и҆ и҆зрѧ́дный ᲂу҆го́дниче хрⷭ҇то́въ, многоцѣле́бный чꙋде́съ и҆сто́чниче, неисчерпа́емыѧ бл҃года́ти хода́таю, те́плый мл҃твенниче, вели́кїй ст҃и́телю хрⷭ҇то́въ дими́трїе, ꙗ҆́кѡ и҆мѣ́ѧй дерзнове́нїе ко хрⷭ҇тꙋ̀, бг҃ꙋ на́шемꙋ, ѿ всѧ́кихъ на́съ бѣ́дъ свободѝ зовꙋ́щихъ:
Ра́дꙋйсѧ, дими́трїе, но́вый и҆ вели́кїй чꙋдотво́рче.
Моли́твы
Ѽ преди́вный и҆ пресла́вный чꙋдотво́рче дими́трїе, и҆сцѣлѧ́ѧй недꙋ̑ги человѣ́ческїѧ! ты̀ неꙋсы́пнѡ мо́лиши гдⷭ҇а бг҃а на́шегѡ ѡ҆ всѣ́хъ грѣ́шныхъ: молю̀ ᲂу҆́бѡ тѧ̀, бꙋ́ди мѝ хода́тай пред̾ гдⷭ҇емъ и҆ помо́щникъ на преѡборе́нїе страсте́й ненасы́тныѧ пло́ти моеѧ̀ и҆ на ѡ҆доле́нїе стрѣ́лъ сопроти́вника моегѡ̀ дїа́вола, и҆́миже ᲂу҆ѧзвлѧ́етъ немощно́е се́рдце моѐ и҆, а҆́ки гла́дный и҆ лю́тый ѕвѣ́рь, а҆́лчетъ погꙋби́ти дꙋ́шꙋ мою̀. ты̀, ст҃и́телю хрⷭ҇то́въ, моѧ̀ ѡ҆гра́да, ты̀ моѐ застꙋпле́нїе и҆ ѡ҆рꙋ́жїе! за твои́мъ содѣ́йствїемъ сокрꙋшꙋ̀ всѧ̑ во мнѣ̀ сопроти̑внаѧ во́лѣ цр҃ѧ̀ ца́рствꙋющихъ. ты̀, вели́кїй чꙋдотво́рче, во днѝ подвигѡ́въ твои́хъ въ мі́рѣ се́мъ ревнꙋ́ѧ ѡ҆ правосла́вной цр҃кви бж҃їей, ꙗ҆́кѡ и҆́стинный и҆ до́брый па́стырь, небла́зненнѡ ѡ҆блича́лъ є҆сѝ грѣхѝ и҆ невѣ́жєствїѧ людскі́ѧ, и҆ ᲂу҆клони́вшихсѧ ѿ стезѝ пра́вды въ є҆́рєси и҆ раско́лы наставлѧ́лъ є҆сѝ на пꙋ́ть и҆́стины.
Споспѣ́шествꙋй ᲂу҆́бѡ и҆ мнѣ̀ и҆спра́вити кратковре́менный пꙋ́ть жи́зни моеѧ̀, да непреткнове́ннѡ пойдꙋ̀ по стезѝ за́повѣдей бж҃їихъ и҆ нелѣ́ностнѡ порабо́таю гдⷭ҇еви моемꙋ̀ і҆и҃сꙋ хрⷭ҇тꙋ̀, ꙗ҆́кѡ є҆ди́номꙋ влⷣцѣ моемꙋ̀, и҆скꙋпи́телю и҆ пра́ведномꙋ сꙋдїѝ моемꙋ̀. къ си́мъ же припа́даѧ, молю́сѧ тѝ, ᲂу҆го́дниче бж҃їй, є҆гда̀ и҆зы́ти дꙋшѝ мое́й и҆з̾ тѣлесѐ моего̀, и҆зба́ви ю҆̀ ѿ те́мныхъ мыта́рствъ: не и҆́мамъ бо до́брыхъ дѣ́лъ ко ѡ҆правда́нїю моемꙋ̀: не да́ждь сатанѣ̀ возгорди́тисѧ побѣ́дою надъ немощно́ю дꙋше́ю мое́ю. и҆зба́ви ю҆̀ ѿ гее́нны, и҆дѣ́же пла́чъ и҆ скре́жетъ зꙋбѡ́въ, и҆ ст҃ы́ми мл҃твами твои́ми сотворѝ мѧ̀ прича́стника нбⷭ҇нагѡ ца́рствїѧ въ трⷪ҇цѣ сла́вимаго бг҃а, ѻ҆ц҃а̀ и҆ сн҃а и҆ ст҃а́гѡ дх҃а. А҆ми́нь.
Ѽ всеблаже́нный ст҃и́телю дими́трїе, вели́кїй ᲂу҆го́дниче хрⷭ҇то́въ, златоꙋ́сте рѡссі́йскїй! ᲂу҆слы́ши на́съ грѣ́шныхъ, молѧ́щихсѧ тебѣ̀, и҆ принесѝ мл҃твꙋ на́шꙋ къ человѣколю́бцꙋ бг҃ꙋ, є҆мꙋ́же ты̀ ны́нѣ въ ра́дости ст҃ы́хъ, и҆ съ ли́ки а҆́гг҃лъ предстои́ши: ᲂу҆молѝ є҆гѡ̀ бл҃гоꙋтро́бїе, да не ѡ҆сꙋ́дитъ на́съ по беззако́нїємъ на́шимъ, но да сотвори́тъ съ на́ми по млⷭ҇ти свое́й. и҆спросѝ на́мъ ᲂу҆ хрⷭ҇та̀ бг҃а на́шегѡ ми́рное и҆ безмѧте́жное житїѐ, здра́вїе дꙋше́вное и҆ тѣле́сное, землѝ бл҃гопло́дїе, и҆ во все́мъ всѧ́кое и҆з̾ѡби́лїе и҆ бл҃годе́нствїе, и҆ да не во ѕло̀ ѡ҆брати́мъ бл҃га̑ѧ, да́рꙋємаѧ на́мъ ѿ ще́драгѡ бг҃а, но въ сла́вꙋ є҆гѡ̀ и҆ въ прославле́нїе твоегѡ̀ застꙋпле́нїѧ. да́рꙋй мѝ по млⷭ҇ти свое́й, и҆спросѝ на́мъ ᲂу҆ хрⷭ҇та̀ и҆ бг҃а на́шегѡ ми́рное и҆ безмѧте́жное житїѐ, здра́вїе дꙋше́вное и҆ тѣле́сное, землѝ бл҃гопло́дїе, и҆ во все́мъ всѧ́кое и҆з̾ѡби́лїе и҆ бл҃годе́нствїе, и҆ да не во ѕло̀ ѡ҆брати́мъ бл҃га̑ѧ, да́рꙋємаѧ на́мъ ѿ ще́драгѡ бг҃а, но въ сла́вꙋ є҆гѡ̀ и҆ въ прославле́нїе твоегѡ̀ застꙋпле́нїѧ. да́рꙋй на́мъ бг҃оꙋго́днѡ прейтѝ по́прище вре́менныѧ жи́зни: и҆зба́ви на́съ ѿ воздꙋ́шныхъ мыта́рствъ и҆ наста́ви на́съ на пꙋ́ть, вѣ́дꙋщїй въ селє́нїѧ првⷣныхъ, и҆дѣ́же пра́зднꙋющихъ гла́съ непреста́нный, зрѧ́щихъ бж҃їѧ лица̀ неизрече́ннꙋю добро́тꙋ: це́рковь же ст҃ꙋ́ю ѿ раско́лѡвъ и҆ є҆ресе́й сохранѝ, вѣ́рныхъ ᲂу҆крѣпѝ, заблꙋжда́ющихъ ѡ҆братѝ и҆ всѣ̑мъ да́рꙋй всѧ̑, ꙗ҆́же ко спасе́нїю и҆ сла́вѣ бж҃їей подоба̑ющаѧ: ѻ҆те́чество твоѐ сохранѝ ѿ вра̑гъ ненавѣ́тнѡ, но побора́й ѡ҆рꙋ́жїю крⷭ҇тоно́снагѡ во́инства: и҆ пода́ждь на́мъ всѣ̑мъ твоѐ а҆рхїпа́стырское и҆ ст҃о́е бл҃гослове́нїе, да ѻ҆́нымъ ѡ҆сѣнѧ́еми, и҆зба́вимсѧ ѿ ко́зней лꙋка́вагѡ и҆ и҆збѣ́гнемъ ѿ всѧ́кїѧ бѣды̀ и҆ напа́сти. ᲂу҆слы́ши моле́нїе на́ше, ѻ҆́тче дими́трїе, и҆ молѝ непреста́ннѡ ѡ҆ на́съ всеси́льнаго бг҃а, сла́вимаго и҆ поклонѧ́емаго въ трїе́хъ ѵ҆поста́сехъ, є҆мꙋ́же подоба́етъ всѧ́каѧ сла́ва, че́сть и҆ держа́ва во вѣ́ки вѣкѡ́въ. А҆ми́нь.