Кондак 1
Избра́ннии чудотво́рцы, безсре́бреницы Христо́вы и вра́чеве прему́дрии, ту́не подаю́щии здра́вие в боле́знех су́щим, похва́льная воспису́ем ва́м, засту́пником на́шим и в ско́рбех помо́щником: вы́ бо сосу́ди благода́ти су́ще, исцеля́ете душе́вныя и теле́сныя на́ша я́звы. Те́мже сла́вяще Бо́га, ди́внаго во святы́х Свои́х, ва́с усе́рдно ублажа́ем:
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Икос 1
А́нгельскому жи́тельству поревнова́вше, вся́ земна́я презре́ли есте́, и в по́двизе нестяжа́ния потруди́вшеся, лицезре́ния Го́спода си́л сподо́билися есте́. Моли́теся за ны́ приле́жно, к по́мощи ва́шей притека́ющих и похва́льная ва́м вопию́щих:
Ра́дуйтеся, моли́твенницы те́плии о чту́щих святу́ю па́мять ва́шу; ра́дуйтеся, оста́вленных врачми́ исцеля́ющии.
Ра́дуйтеся, до́м, име́ние и вся́ роди́тельская стяжа́ния нивочто́же вмени́вшии; ра́дуйтеся, ни́щия милосе́рдием ва́шим препита́вшии.
Ра́дуйтеся, стра́ждущия серде́чною любо́вию утеша́вшии; ра́дуйтеся, чистото́ю и свя́тостию А́нгелом уподо́бившиися.
Ра́дуйтеся, свети́льницы Боже́ственнаго све́та; ра́дуйтеся, Небе́снии челове́цы, земни́и а́нгели.
Ра́дуйтеся, христиа́ном прибе́жище непосты́дное; ра́дуйтеся, всеце́ло себе́ служе́нию Го́споду преда́вшии.
Ра́дуйтеся, всесве́тлое благода́ти прия́телище, Ду́ха Свята́го сосу́ди; ра́дуйтеся, все́м, призыва́ющим ва́с, ско́рии помо́щницы.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 2
Ви́де Госпо́дь Бо́г до́брая ва́ша начина́ния и ве́лие ко благоче́стию усе́рдие, я́ко вся́ блага́я ми́ра сего́ во уме́ты вмени́сте, в непреста́ннем труде́ любве́ пребы́сте и ду́ши своя́ благи́ми нра́вы украси́сте, преиспо́лни ва́с Ду́ха Свята́го, Его́же луча́ми озари́тися и на́м испроси́те у Христа́ Бо́га, да ку́пно с ва́ми пое́м Ему́: Аллилу́иа.
Икос 2
Ра́зуму и́стиннаго богопозна́ния лю́ди нечести́выя научи́ли есте́, вразуми́в те́х си́лою слове́с ва́ших, и́миже дерзнове́нно Христа́ пропове́дасте. Те́мже ре́вность ва́шу похваля́юще, взыва́ем си́це:
Ра́дуйтеся, ле́стию вра́жиею не уловле́ннии; ра́дуйтеся, и́стину Христо́ву по́двиги любве́ испове́давшии.
Ра́дуйтеся, вся́кую я́зю в лю́дех исцеля́ющии; ра́дуйтеся, лука́выя ду́хи от люде́й прогоня́ющии.
Ра́дуйтеся, небоя́зненнии пропове́дницы любве́ Бо́жия; ра́дуйтеся, служе́ния враче́бнаго ревни́телие.
Ра́дуйтеся, ве́ры правосла́вныя побо́рницы; ра́дуйтеся, ре́вности о сла́ве Бо́жией испо́лненнии.
Ра́дуйтеся, немо́лчнии веле́ний Госпо́дних провозве́стницы; ра́дуйтеся, ве́рнии богому́дрия наста́вницы.
Ра́дуйтеся, Ца́рствия Христо́ва наде́жнии на́м хода́таи; ра́дуйтеся, и по сме́рти ва́шей на́с не оставля́ющии.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 3
Си́лою Вы́шняго, да́нною ва́м, еще́ во вре́менней жи́зни прия́ли есте́ вла́сть чуде́сно исцеля́ти вся́кия неду́ги; наипа́че же по сме́рти ва́шей просла́ви ва́с Бо́г чудотворе́нии, да вси́ притека́ем к ва́м, избавле́ние ва́ми получа́юще от неду́гов теле́сных и душе́вных, и Бо́гу велегла́сно вопие́м: Аллилу́иа.
Икос 3
Иму́ще, я́ко многоце́нное сокро́вище, многоцеле́бныя мо́щи ва́ша, ра́дуемся и, любо́вию воспева́юще да́нную ва́м от Бо́га благода́ть исцеле́ний, благода́рно зове́м:
Ра́дуйтеся, те́плии о на́с к Бо́гу предста́телие; ра́дуйтеся, е́ллинская мудрова́ния отца́ ва́шего оста́вльшии.
Ра́дуйтеся, Аси́и свети́льницы всесве́тлии; ра́дуйтеся, омраче́нных стра́н просвети́телие.
Ра́дуйтеся, му́жества и терпе́ния наста́вницы; ра́дуйтеся, непоколеби́мое правосла́вия основа́ние.
Ра́дуйтеся, бра́тия по пло́ти, ма́терию ва́шею Феодо́тиею в до́бром наказа́нии воспита́ннии; ра́дуйтеся, два́ свети́льника, на земли́ до́брыми де́лы возсия́вшии.
Ра́дуйтеся, раби́ Бо́жии, от Го́спода Христа́ венцы́ побе́ды прие́мшии; ра́дуйтеся, ди́вный смире́ния и кро́тости о́браз все́м показа́вшии.
Ра́дуйтеся, све́тлая безсре́бреников сла́во; ра́дуйтеся, до́бляя целе́бников похвало́.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 4
Бу́рею смуще́ния испо́лнен бы́л еси́, святы́й Дамиа́не, егда́ жена́ не́кая Палла́дия, тобо́ю вку́пе со святы́м Космо́ю от боле́зни сме́ртныя исцеле́нная, хотя́ше от избы́тка благода́рнаго се́рдца дарова́ние не́кое свои́м благода́тным враче́м возда́ти, ты́ же, ви́дя бра́та твоего́ от такова́го приноше́ния отре́кшася, вта́й прия́л еси́ от тоя́ жены́ три́ я́ица, услы́шавше я́ко та́ заклина́ет тя́ Бо́гом, да та́я три́ я́ица во и́мя Святы́я Тро́ицы от нея́ прие́млеши. Сего́ ра́ди святы́й Косма́ печа́лен бы́сть, и завеща́, да по сме́рти твое́й не положе́н бу́деши бли́з гро́ба его́. Егда́ же по преставле́нии твое́м, лю́дие в недоуме́нии бы́ша, где́ погребсти́ тя, верблю́д не́кий челове́ческим гла́сом проглаго́ла, да погребу́т тя́ бли́з Космы́ свята́го, я́ко просла́влена с ни́м пред Бо́гом, поне́же не мзды́ ра́ди, но и́мене ра́ди Бо́жия прия́л еси́ да́р то́й. Таково́му ве́лию чу́ду дивя́щеся, лю́дие погребо́ша тя́ вку́пе с бра́том твои́м, с ра́достию пою́ще Бо́гу: Аллилу́иа.
Икос 4
Слы́шавше аси́йстии лю́дие ве́лию ва́шу к стра́ждущим любо́вь и чуде́сное врачева́ние, отвсю́ду устремля́хуся к ва́м с ве́рою в целе́бную благода́ть Бо́жию, в ва́с де́йствующую; прие́млюще же ско́рое исцеле́ние, прославля́ху Бо́га, ва́с же, милосе́рдых цели́телей свои́х, велича́ху, воспева́юще си́це:
Ра́дуйтеся, Бо́га И́стиннаго непребори́мии пропове́дницы; ра́дуйтеся, блази́и вра́чеве, стра́ждущим ско́рии помо́щницы.
Ра́дуйтеся, чудоде́ющии си́лою Креста́ Христо́ва; ра́дуйтеся, предста́тельство на́ше кре́пкое.
Ра́дуйтеся, вся́ немощны́я ту́не врачу́ющии; ра́дуйтеся, исцеле́ния оби́льно источа́ющии.
Ра́дуйтеся, ми́лостивии уте́шителие в беда́х и ско́рбех су́щих; ра́дуйтеся, во вся́ких обстоя́ниих на́с защища́ющии.
Ра́дуйтеся, безпомо́щных спаси́тельное призре́ние; ра́дуйтеся, пра́ведных пресла́вное украше́ние.
Ра́дуйтеся, приле́жнии о на́с к Бо́гу моли́твенницы; ра́дуйтеся, все́м, ве́рою призыва́ющим ва́с, ско́рии помо́щницы.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 5
Боготе́чным вои́стину путе́м ше́ствовасте, раби́ Христо́вы, егда́ блага́я ми́ра презре́сте служе́ния ра́ди боля́щим, Христу́ же Еди́ному порабо́тасте. Те́мже вели́кому терпе́нию и кре́пцей любви́ ва́шей ко Го́споду дивя́щеся, ку́пно с ва́ми пое́м Ему́: Аллилу́иа.
Икос 5
Ви́девше исцеле́ннии ва́ми, я́ко си́лою Христо́вою сия́ соде́яшася, хвалу́ Тому́ возда́ша. Мы́ же сла́вяще Бо́га, ублажа́ем ва́с, сла́вных уго́дников Его́, вопию́ще си́це:
Ра́дуйтеся, го́рняя па́че до́льних возлюби́вшии; ра́дуйтеся, а́нгельскому житию́ на земли́ поревнова́вшии.
Ра́дуйтеся, многобо́жие оте́ческое отри́нувшии; ра́дуйтеся, благоче́стия ма́терня не отступи́вшии.
Ра́дуйтеся, словесы́, де́лы и непреста́нною моли́твою мно́гих ве́ре научи́вшии; ра́дуйтеся, неоску́дный исто́чник исцеле́ний ны́не явля́ющии.
Ра́дуйтеся, излия́нием чуде́с на́с обогаща́ющии; ра́дуйтеся, са́ми себе́ во обита́лище Бо́гу угото́вавшии.
Ра́дуйтеся, ско́рое ни́щих услы́шание; ра́дуйтеся, ско́рбных отра́дное попече́ние.
Ра́дуйтеся, ненаде́жных изве́стное наде́яние; ра́дуйтеся, боля́щих ско́рое врачева́ние.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 6
Пропове́дницы и́мене Христо́ва в животе́ свое́м бы́вше, и ны́не си́лу Того́ свиде́тельствуете чудесы́, от ико́ны ва́шея источа́емыми; и я́коже ве́ры иногда́ жены́ не́кия Палла́дии не презре́сте, но прише́дше в до́м ея́, исцеле́ние от сме́ртнаго неду́га е́й дарова́ли есте́, си́це и на́ших моле́ний и пе́ний гла́сы услы́шите, о святи́и безсре́бреницы! Ве́ре же и любви́ люде́й ва́ших внемли́те и покро́в на́м свы́ше да́руйте, хва́лящим ва́с и пою́щим Бо́гу: Аллилу́иа.
Икос 6
Возсия́, я́ко све́т, пра́вда ва́ша, егда́ укоря́еми неве́рующими, я́ко не от Бо́га получи́ли есте́ да́р исцеле́ний, реко́сте к лю́дем гра́да ва́шего: не волше́бною хи́тростию врачу́ем боле́зни, но си́лою Спа́са на́шего Иису́са Христа́, я́коже То́й запове́да, глаго́ля: боля́щия исцеля́йте, прокаже́нныя очища́йте, ту́не прия́сте, ту́не дади́те. Те́мже благода́тному сло́ву ва́шему дивя́щеся, ублажа́ем ва́с си́ми словесы́:
Ра́дуйтеся, о́браз любве́ и ве́ры на́м показа́вшии; ра́дуйтеся, ра́йския ра́дости при́сно наслажда́ющиися.
Ра́дуйтеся, прему́дрии се́ятелие благоче́стия; ра́дуйтеся, сла́внии пропове́дницы Правосла́вия.
Ра́дуйтеся, учи́телие, к Небеси́ наставля́ющии; ра́дуйтеся, чи́стаго и непоро́чнаго жития́ неусы́пнии храни́телие.
Ра́дуйтеся, моля́щихся ва́м послу́шателие те́плии; ра́дуйтеся, ко спасе́нию путеводи́телие изя́щнии и ве́рнии.
Ра́дуйтеся, благоче́стно и богоуго́дно жи́ти хотя́щим блази́и наста́вницы; ра́дуйтеся, хода́таи благи́м все́м, почита́ющим па́мять ва́шу.
Ра́дуйтеся, до́бре и ми́рне тече́ние свое́ сконча́вшии; ра́дуйтеся, венцы́ пра́вды от Влады́ки Христа́ прия́вшии.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 7
Хотя́щу му́жу не́коему во вре́мя жа́твы от зно́я со́лнечнаго отдохнове́ние улучи́ти и кре́пко усну́вшу ему́, вни́де зми́й во уста́ его́, и от терза́ния зми́ева нача́ му́ж ве́лиим гла́сом вопи́ти: святи́и вра́чеве Космо́ и Дамиа́не, помози́те ми́! И а́бие вы́, уго́дницы Бо́жии, приспе́ша ему́ на по́мощь и моли́твами свои́ми изгна́ша зми́я, и, узре́вше зми́я исходя́ща из у́ст челове́ка того́, ужасо́шася вси́ о стра́шнем чудеси́ то́м и благода́рственно воспе́ша Бо́гу: Аллилу́иа.
Икос 7
Ди́внии о на́с моли́твенницы, цели́телие ду́ш и теле́с на́ших и хода́таи спасе́ния ве́чнаго, благода́рным се́рдцем воспева́юще хвале́бную пе́снь Бо́гу, дарова́вшему на́м таковы́х вели́ких чудотво́рцев, прино́сим ва́м похвалы́ сицевы́я:
Ра́дуйтеся, Небе́сных А́нгелов терпе́нием ва́шим удиви́вшии; ра́дуйтеся, боже́ственным сия́нием чуде́с свои́х вся́ просвети́вшии.
Ра́дуйтеся, заступле́нием ва́шим разсла́бленныя исцеля́ющии; ра́дуйтеся, от неисце́льных боле́зней здра́вы воздвиза́ющии.
Ра́дуйтеся, земны́й по́двиг жития́ ва́шего досто́йне соверши́вшии; ра́дуйтеся, о на́с, обнаже́нных до́брых де́л, при́сно к Бо́гу предста́тельствующии.
Ра́дуйтеся, сия́нием го́рней прему́дрости все́х ве́рных просвеща́ющии; ра́дуйтеся, не сло́вом то́чию, но мно́жае па́че де́лом поуча́ющии.
Ра́дуйтеся, моли́твенницы о на́с и засту́пницы на́ши преди́внии; ра́дуйтеся, чудесы́ свои́ми и́дольское безу́мие обличи́вшии.
Ра́дуйтеся, безме́здно все́м исцеле́ния подаю́щии; ра́дуйтеся, до́блии вра́чеве Христо́вы.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 8
Стра́нное ми́рови житие́ ва́ше ви́дяще, устрани́мся и мы́ того́ суе́т и, у́м на Небеса́ прело́жше, возопии́м к ва́м, святи́и безсре́бреницы: утоли́те боле́зни, источи́те благода́тная врачева́ния все́м, усе́рдно к по́мощи ва́шей притека́ющим и вопию́щим Бо́гу: Аллилу́иа.
Икос 8
Все́ житие́ ва́ше на земли́ любо́вию к Бо́гу и к бли́жним напо́лнисте, святи́и безсре́бреницы Космо́ и Дамиа́не, те́мже и ны́не ско́рии помо́щницы явля́етеся все́м, с ве́рою призыва́ющим ва́с; не то́чию бо притека́ющим ко святы́м моще́м ва́шим, но и дале́че су́щим исцеле́ния источа́ете. Те́мже прино́сим ва́м похвалы́ сия́:
Ра́дуйтеся, Еди́ному Бо́гу, в Тро́ице сла́вимому, ве́рно послужи́вшии; ра́дуйтеся, еди́ное е́же на потре́бу прему́дре избра́вшии.
Ра́дуйтеся, я́ко в труде́ и по́двизе дни́ и но́щи ва́ша без вся́каго уны́ния препроводи́ли есте́; ра́дуйтеся, я́ко те́сным и ско́рбным житие́м ва́шим сла́ву Бо́жию челове́ком яви́ли есте́.
Ра́дуйтеся, я́ко научи́тели и творцы́ Христо́вых за́поведей яви́лися есте́; ра́дуйтеся, я́ко ве́лии в Ца́рствии Небе́снем нарече́ни есте́.
Ра́дуйтеся, сла́вою Христо́вою ве́сь ми́р озари́вшии; ра́дуйтеся, до́блии Христо́вы после́дователие.
Ра́дуйтеся, я́ко любо́вию к бли́жним безстра́стие прия́ли есте́; ра́дуйтеся, я́ко безме́здным врачева́нием безсме́ртие стяжа́ли есте́.
Ра́дуйтеся, я́ко А́нгели, на Небеси́ и на земли́ просла́вленнии; ра́дуйтеся, я́ко Бо́гу ны́не венцено́снии предстоите́.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 9
Вся́кое естество́ челове́ческое удиви́ся сия́нию в ва́с благода́ти Бо́жия, святи́и Космо́ и Дамиа́не, егда́ нечести́вии лю́дие, узре́вше чудеса́, о и́мени Го́спода Иису́са Христа́ ва́ми твори́мая, уве́роваша и просла́виша Бо́га. Те́мже и мы́, сла́вяще Да́вшаго ва́м сицеву́ю си́лу, пое́м Ему́: Аллилу́иа.
Икос 9
Вети́и многовеща́ннии недоуме́ют дово́льно изобрази́ти оби́лие любве́ ва́шея о Го́споде, е́юже преиспо́лнени бы́сте, святи́и уго́дницы, к челове́ком. Сего́ ра́ди из глубины́ серде́ц на́ших вопие́м к ва́м:
Ра́дуйтеся, Жизнода́вцу Го́споду да́же до сме́рти порабо́тавшии; ра́дуйтеся, огне́м любве́ Бо́жия воспаля́емии, о́гнь же́ртв и́дольских угаси́вшии.
Ра́дуйтеся, бли́жняго па́че сами́х себе́ возлюби́вшии; ра́дуйтеся, боля́щия и неду́жныя посеща́вшии.
Ра́дуйтеся, ну́жды убо́гих предваря́вшии; ра́дуйтеся, печа́льных утеша́вшии.
Ра́дуйтеся, отча́янных засту́пницы; ра́дуйтеся, лю́те стра́ждущим помо́щницы.
Ра́дуйтеся, си́рых пита́телие; ра́дуйтеся, угнете́нных свободи́телие.
Ра́дуйтеся, я́ко до́бре тече́ние сконча́вше, ко Христу́ вознесо́стеся; ра́дуйтеся, я́ко ве́ру соблю́дше, в Ца́рствии Его́ водвори́стеся.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 10
Спасти́ хотя́ мно́гих, яви́ на́м Госпо́дь вы́ чудотво́рцы Своя́: кто́ бо не умили́тся, ви́дя ва́ше безме́рное ко все́м сострада́ние; кто́ вы́ не ублажи́т, слы́ша о кро́тком врачева́нии ва́ми люде́й и ското́в; не отри́ните у́бо на́ших моли́тв, но на вся́ ны́ неоску́дно вели́кия и бога́тыя ва́ша ми́лости изле́йте, да вопие́м Бо́гу: Аллилу́иа.
Икос 10
Стена́ есте́ все́м, похваля́ющим чудеса́ ва́ша, о безсре́бреницы, и к заступле́нию ва́шему прибега́ющим, забра́ло есте́, огражда́ющее от все́х бе́д усе́рдно в по́мощь ва́с призыва́ющих. Те́мже у́бо от нищеты́, напа́стей, неду́гов и скорбе́й огради́те на́с, мо́лимся, и те́пле вопие́м к ва́м:
Ра́дуйтеся, адама́нтову кре́пость в нестяжа́нии превозше́дшии; ра́дуйтеся, ди́вно искуше́ния сребролю́бия победи́вшии.
Ра́дуйтеся, немощны́х и оби́димых укрепле́ние; ра́дуйтеся, кре́пкое в напа́стех защище́ние.
Ра́дуйтеся, убо́гих и ни́щих всеще́дрии обогати́телие; ра́дуйтеся, а́лчущих ми́лостивии пита́телие.
Ра́дуйтеся, тя́жких неду́гов прему́дрии уврачева́телие; ра́дуйтеся, от все́х ско́рбных обстоя́ний те́плии защи́тителие.
Ра́дуйтеся, в беда́х засту́пницы сла́внии; ра́дуйтеся, от Бо́га препросла́вленнии.
Ра́дуйтеся, я́ко па́мять ва́ша все́ми сла́вима на земли́; ра́дуйтеся, я́ко имена́ ва́ша напи́сана су́ть на Небесе́х.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 11
Пе́ние всеумиле́нное, ны́не на́ми приноси́мое, не́сть дово́льно к похвале́нию пресла́вных по́двигов и трудо́в ва́ших, я́же Христа́ ра́ди подъя́ли есте́ в животе́ свое́м; оба́че дерза́юще про́сим, усе́рдное моле́ние на́ше прие́мше, и на́с от бе́д свои́ми моли́твами изба́вите, да умиле́нным се́рдцем воспое́м Бо́гу: Аллилу́иа.
Икос 11
Светоза́рный и Небе́сный у́м яви́ли есте́, егда́ сла́вы земны́я от врачевства́ не пожела́ли есте́ иска́ти от челове́к, но то́чию сла́вы Бо́жия на Небесе́х. Ны́не же нетле́нием моще́й ва́ших и мно́жеством чуде́с Правосла́вие утвержда́ете. Те́мже благода́рственно зове́м:
Ра́дуйтеся, Ипоста́сное Сло́во дерзнове́нно пропове́давшии; ра́дуйтеся, си́лу и́дольскую добропобе́дно упраздни́вшии.
Ра́дуйтеся, я́ко ва́ми попра́ся служе́ние бесо́м; ра́дуйтеся, я́ко ва́ми пропове́дася поклоне́ние Христу́.
Ра́дуйтеся, ра́зума Небе́снаго учи́телие прему́дрии; ра́дуйтеся, доброде́телей исполни́телие неле́ностнии.
Ра́дуйтеся, я́ко по труде́х земны́х в селе́ниих Небе́сных ликовству́ете; ра́дуйтеся, я́ко по преставле́нии свое́м и на́с не оставля́ете.
Ра́дуйтеся, я́ко все́м, с ве́рою призыва́ющим ва́с, ско́рую по́мощь подае́те; ра́дуйтеся, святи́и вра́чеве, я́ко боле́зни на́ша исцеля́ете.
Ра́дуйтеся, моли́твы ве́рных не отрева́ющии; ра́дуйтеся, и о на́с недосто́йных у Престо́ла Бо́жия хода́тайствующии.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 12
Благода́ть, ю́же даде́ ва́м Госпо́дь Бо́г цели́ти вся́ неду́ги душе́вныя же и теле́сныя, дне́сь привлече́ на́с, да почти́м па́мять ва́шу, святи́и безсре́бреницы Космо́ и Дамиа́не. Благогове́йно взира́юще на честну́ю ико́ну ва́шу, со умиле́нием се́рдца к не́й припа́дающе, мо́лимся изба́витися все́м на́м от вся́ких зо́л и боле́зней и Бо́гу воспева́ем: Аллилу́иа.
Икос 12
Пою́ще чудеса́ ва́ша, восхваля́ем труды́ и по́двиги, ублажа́ем благоче́стную в ми́ре кончи́ну ва́шу, почита́ем хода́тайство и си́льное заступле́ние ва́ше о все́х, тре́бующих по́мощи; велича́ем Пода́теля все́х бла́г Бо́га, дарова́вшаго на́м толи́ко ди́вных моли́твенников, и со умиле́нием зове́м:
Ра́дуйтеся, Иису́са Го́спода ве́рно пропове́давшии; ра́дуйтеся, и́стины Его́ до́блии свиде́телие.
Ра́дуйтеся, те́плии о на́с у Престо́ла Его́ предста́телие; ра́дуйтеся, теле́с на́ших благосострада́тельнии вра́чеве.
Ра́дуйтеся, Ца́рствия Небе́снаго и ве́чных бла́г насле́дницы; ра́дуйтеся, исцеле́ний да́телие и чуде́с исто́чницы.
Ра́дуйтеся, ми́ро благово́нное исцеле́ний источа́ющии; ра́дуйтеся, страсте́й злосмра́дие моли́твами свои́ми отрева́ющии.
Ра́дуйтеся, светоно́снии столпи́ церко́внии и забра́ла недви́жимая; ра́дуйтеся, виногра́да и́стиннаго боже́ственныя ло́зы.
Ра́дуйтеся, му́дрых безсре́бреник дво́ице светови́дная; ра́дуйтеся, по Бо́зе все́ на́ше упова́ние.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 13
О преди́внии безсре́бреницы, чудотво́рцы, цели́телие и сла́внии уго́дницы Бо́жии Космо́ и Дамиа́не, приими́те моле́ния сия́ на́ша, от сокруше́ннаго се́рдца возноси́мая; исцели́те многообра́зныя неду́ги ду́ш и теле́с на́ших и те́плым предста́тельством ва́шим испроси́те на́м у Христа́ Бо́га избавле́ние от все́х бе́д и напа́стей, проще́ние прегреше́ний на́ших и благу́ю наде́жду ве́чнаго спасе́ния, да сподо́бимся с ва́ми и со все́ми святы́ми в безконе́чныя ве́ки воспева́ти Бо́гу, Спаси́телю на́шему: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельскому жи́тельству поревнова́вше, вся́ земна́я презре́ли есте́, и в по́двизе нестяжа́ния потруди́вшеся, лицезре́ния Го́спода си́л сподо́билися есте́. Моли́теся за ны́ приле́жно, к по́мощи ва́шей притека́ющих и похва́льная ва́м вопию́щих:
Ра́дуйтеся, моли́твенницы те́плии о чту́щих святу́ю па́мять ва́шу; ра́дуйтеся, оста́вленных врачми́ исцеля́ющии.
Ра́дуйтеся, до́м, име́ние и вся́ роди́тельская стяжа́ния нивочто́же вмени́вшии; ра́дуйтеся, ни́щия милосе́рдием ва́шим препита́вшии.
Ра́дуйтеся, стра́ждущия серде́чною любо́вию утеша́вшии; ра́дуйтеся, чистото́ю и свя́тостию А́нгелом уподо́бившиися.
Ра́дуйтеся, свети́льницы Боже́ственнаго све́та; ра́дуйтеся, Небе́снии челове́цы, земни́и а́нгели.
Ра́дуйтеся, христиа́ном прибе́жище непосты́дное; ра́дуйтеся, всеце́ло себе́ служе́нию Го́споду преда́вшии.
Ра́дуйтеся, всесве́тлое благода́ти прия́телище, Ду́ха Свята́го сосу́ди; ра́дуйтеся, все́м, призыва́ющим ва́с, ско́рии помо́щницы.
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Кондак 1
Избра́ннии чудотво́рцы, безсре́бреницы Христо́вы и вра́чеве прему́дрии, ту́не подаю́щии здра́вие в боле́знех су́щим, похва́льная воспису́ем ва́м, засту́пником на́шим и в ско́рбех помо́щником: вы́ бо сосу́ди благода́ти су́ще, исцеля́ете душе́вныя и теле́сныя на́ша я́звы. Те́мже сла́вяще Бо́га, ди́внаго во святы́х Свои́х, ва́с усе́рдно ублажа́ем:
Ра́дуйтеся, Космо́ и Дамиа́не, святи́и безсре́бреницы и пресла́внии чудотво́рцы.
Молитвы
О, чудотво́рцы сла́внии, вра́чеве безме́зднии, Космо́ и Дамиа́не! Вы́ от ю́ности Христа́ Бо́га возлюби́вше и Того́ повеле́ния все́м се́рдцем соблюда́юще, а́ще и вда́сте себе́ уче́нию враче́бному, но доброде́тельнаго ра́ди жития́ и чистоты́ душе́вныя, си́лою Христа́ Бо́га, не врачева́ния то́кмо иску́сство, но па́че неоску́дную благода́ть исцеле́ния вся́ких неисце́льных неду́гов от Бо́га прия́ли есте́. Отону́дуже любо́вию и милосе́рдием к неду́гующим подвиза́еми, не то́кмо лю́дем, но и ското́м исцеле́ния боле́зней подава́ете, неисче́тным мно́жеством чуде́с ва́ших ве́сь ми́р наполня́ете, и не то́кмо неду́ги теле́сныя исцеля́ете, но и ве́рою Христо́вою ду́ши просвеща́ете, в терпе́нии боле́зней укрепля́ете, в тя́жких неду́зех о исправле́нии жития́ вразумля́ете и ко Христу́ покая́нием привлека́ете. Те́мже ны́не и на́с, припа́дающих к ва́м пред честно́ю ико́ною ва́шею, ско́ро услы́шите. Ю́ныя наста́вите, ва́шея по́мощи во уче́нии кни́жнем прося́щия, да ва́шему житию́ ревну́юще, не земно́е то́чию науче́ние приобря́щут, но па́че во благоче́стии и пра́вой ве́ре непреста́нно да преспева́ют. На одре́ боле́зни лежа́щим, челове́ческия по́мощи отча́янным, к ва́м же те́пле с ве́рою и усе́рдною моли́твою прибега́ющим, исцеле́ние боле́зней да́руйте ми́лостивым ва́шим и чудоде́йственным посеще́нием. Мно́гажды в боле́зни впа́дающия и от лю́тых неду́г в уны́ние, малоду́шие и ропта́ние прише́дшия, да́нною ва́м от Бо́га благода́тию в терпе́нии утверди́те, и наста́вите, да уразуме́ют во́лю о ни́х Бо́жию святу́ю и соверше́нную, и са́ми себе́ и живо́т сво́й во́ли Христа́ Бо́га предаю́т. В неду́зех су́щим, нерадя́щим же о исправле́нии жития́, в гресе́х не раска́ивающимся, се́рдцем ожесточе́нным, ми́лостиво сокруше́ние во спасе́ние пода́йте и к покая́нию и́х призови́те, да не́мощни су́ще те́лом, здра́ви пребу́дут душе́ю, и прича́стницы соде́лаются Бо́жия спаси́тельныя благода́ти. Бра́тию свята́го хра́ма сего́ [ва́шему свято́му заступле́нию от Бо́га вруче́нную], и все́х к ва́м усе́рдно прибега́ющих невреди́мы сохрани́те от долгонеду́жия, от боле́зней лю́тых и неисце́льных, от разслабле́ния те́ла, от изступле́ния ума́, от смертоно́сныя я́звы, от внеза́пныя сме́рти, и мо́щным хода́тайством ва́шим к Бо́гу соблюди́те в пра́вой ве́ре тве́рдых, во благоче́стии преспе́ющих, в до́брых де́лех усе́рдных, в моли́тве к Бо́гу приле́жных, да с ва́ми вку́пе сподо́бятся в бу́дущем ве́це при́сно воспева́ти и сла́вити всесвято́е и великоле́пое и́мя Отца́ и Сы́на и Свята́го Ду́ха во ве́ки веко́в. Ами́нь.
Конда́къ а҃
И҆збра́ннїи чꙋдотво́рцы, безсре́брєницы хрⷭ҇тѡ́вы и҆ вра́чеве премꙋ́дрїи, тꙋ́не подаю́щїи здра́вїе въ болѣ́знехъ сꙋ́щымъ, похва̑льнаѧ восписꙋ́емъ ва́мъ, застꙋ́пникѡмъ на́шымъ и҆ въ ско́рбехъ помо́щникѡмъ: вы́ бо сосꙋ́ди бл҃года́ти сꙋ́ще, и҆сцѣлѧ́ете дꙋшє́вныѧ и҆ тѣлє́сныѧ на́шѧ ꙗ҆́звы. Тѣ́мже сла́вѧще бг҃а, ди́внаго во ст҃ы́хъ свои́хъ, ва́съ ᲂу҆се́рднѡ ᲂу҆бл҃жа́емъ:
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
І҆́косъ а҃
А҆́гг҃льскомꙋ жи́тельствꙋ поревнова́вше, всѧ̑ земна̑ѧ презрѣ́ли є҆стѐ, и҆ въ по́двизѣ нестѧжа́нїѧ потрꙋди́вшесѧ, лицезрѣ́нїѧ гдⷭ҇а си́лъ сподо́билисѧ є҆стѐ. Моли́тесѧ за ны̀ прилѣ́жнѡ, къ по́мощи ва́шей притека́ющихъ и҆ похва̑льнаѧ ва́мъ вопїю́щихъ:
Ра́дꙋйтесѧ, мл҃твєнницы те́плїи ѡ҆ чтꙋ́щихъ ст҃ꙋ́ю па́мѧть ва́шꙋ: ра́дꙋйтесѧ, ѡ҆ста́вленныхъ врачмѝ и҆сцѣлѧ́ющїи.
Ра́дꙋйтесѧ, до́мъ, и҆мѣ́нїе и҆ всѧ̑ роди́тєльскаѧ стѧжа̑нїѧ нивочто́же вмѣни́вшїи: ра́дꙋйтесѧ, ни́щыѧ млⷭ҇рдїемъ ва́шимъ препита́вшїи.
Ра́дꙋйтесѧ, стра́ждꙋщыѧ серде́чною любо́вїю ᲂу҆тѣша́вшїи: ра́дꙋйтесѧ, чистото́ю и҆ ст҃остїю а҆́гг҃лѡмъ ᲂу҆подо́бившїисѧ.
Ра́дꙋйтесѧ, свѣти́льницы бжⷭ҇твеннагѡ свѣ́та: ра́дꙋйтесѧ, нбⷭ҇нїи человѣ́цы, земні́и а҆́гг҃ли.
Ра́дꙋйтесѧ, хрⷭ҇тїа́нѡмъ прибѣ́жище непосты́дное: ра́дꙋйтесѧ, всецѣ́лѡ себѐ слꙋже́нїю гдⷭ҇ꙋ преда́вшїи.
Ра́дꙋйтесѧ, всесвѣ́тлое бл҃года́ти прїѧ́телище, дх҃а ст҃а́гѡ сосꙋ́ди: ра́дꙋйтесѧ, всѣ̑мъ, призыва́ющымъ ва́съ, ско́рїи помѡ́щницы.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ в҃
Ви́дѣ гдⷭ҇ь бг҃ъ дѡ́браѧ ва̑ша начина̑нїѧ и҆ ве́лїе ко бл҃гоче́стїю ᲂу҆се́рдїе, ꙗ҆́кѡ всѧ̑ бл҃га̑ѧ мі́ра сегѡ̀ во ᲂу҆ме́ты вмѣни́сте, въ непреста́ннѣмъ трꙋдѣ̀ любвѐ пребы́сте и҆ дꙋ́шы своѧ̑ бл҃ги́ми нра̑вы ᲂу҆краси́сте, преиспо́лни ва́съ дх҃а ст҃а́гѡ, є҆гѡ́же лꙋча́ми ѡ҆зари́тисѧ и҆ на́мъ и҆спроси́те ᲂу҆ хрⷭ҇та̀ бг҃а, да кꙋ́пнѡ съ ва́ми пое́мъ є҆мꙋ̀: А҆ллилꙋ́їа.
І҆́косъ в҃
Ра́зꙋмꙋ и҆́стиннагѡ бг҃опозна́нїѧ лю́ди нечести̑выѧ наꙋчи́ли є҆стѐ, вразꙋми́въ тѣ́хъ си́лою слове́съ ва́шихъ, и҆́миже дерзнове́ннѡ хрⷭ҇та̀ проповѣ́дасте. Тѣ́мже ре́вность ва́шꙋ похвалѧ́юще, взыва́емъ си́це:
Ра́дꙋйтесѧ, ле́стїю вра́жїею не ᲂу҆ловле́ннїи: ра́дꙋйтесѧ, и҆́стинꙋ хрⷭ҇то́вꙋ пѡ́двиги любвѐ и҆сповѣ́давшїи.
Ра́дꙋйтесѧ, всѧ́кꙋю ꙗ҆́зю въ лю́дехъ и҆сцѣлѧ́ющїи: ра́дꙋйтесѧ, лꙋка̑выѧ дꙋ́хи ѿ люде́й прогонѧ́ющїи.
Ра́дꙋйтесѧ, небоѧ́зненнїи проповѣ̑дницы любвѐ бж҃їѧ: ра́дꙋйтесѧ, слꙋже́нїѧ враче́бнагѡ ревни́телїе.
Ра́дꙋйтесѧ, вѣ́ры правосла́вныѧ побѡ́рницы: ра́дꙋйтесѧ, ре́вности ѡ҆ сла́вѣ бж҃їей и҆спо́лненнїи.
Ра́дꙋйтесѧ, немо́лчнїи велѣ́нїй гдⷭ҇нихъ провозвѣ̑стницы: ра́дꙋйтесѧ, вѣ́рнїи бг҃омꙋ́дрїѧ наста̑вницы.
Ра́дꙋйтесѧ, црⷭ҇твїѧ хрⷭ҇то́ва наде́жнїи на́мъ хода̑таи: ра́дꙋйтесѧ, и҆ по сме́рти ва́шей на́съ не ѡ҆ставлѧ́ющїи.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ г҃
Си́лою вы́шнѧгѡ, да́нною ва́мъ, є҆щѐ во вре́меннѣй жи́зни прїѧ́ли є҆стѐ вла́сть чꙋде́снѡ и҆сцѣлѧ́ти всѧ̑кїѧ недꙋ́ги: наипа́че же по сме́рти ва́шей просла́ви ва́съ бг҃ъ чꙋдотворє́нїи, да всѝ притека́емъ къ ва́мъ, и҆збавле́нїе ва́ми полꙋча́юще ѿ недꙋ́гѡвъ тѣле́сныхъ и҆ дꙋше́вныхъ, и҆ бг҃ꙋ велегла́снѡ вопїе́мъ: А҆ллилꙋ́їа.
І҆́косъ г҃
И҆мꙋ́ще, ꙗ҆́кѡ многоцѣ́нное сокро́вище, многоцѣлє́бныѧ мо́щи ва́шѧ, ра́дꙋемсѧ, и҆ любо́вїю воспѣва́юще да́ннꙋю ва́мъ ѿ бг҃а бл҃года́ть и҆сцѣле́нїй, бл҃года́рнѡ зове́мъ:
Ра́дꙋйтесѧ, те́плїи ѡ҆ на́съ къ бг҃ꙋ предста́телїе: ра́дꙋйтесѧ, є҆́ллинскаѧ мꙋдрова̑нїѧ ѻ҆тца̀ ва́шегѡ ѡ҆ста́вльшїи.
Ра́дꙋйтесѧ, а҆сі́и свѣти́льницы всесвѣ́тлїи: ра́дꙋйтесѧ, ѡ҆мраче́нныхъ стра́нъ просвѣти́телїе.
Ра́дꙋйтесѧ, мꙋ́жества и҆ терпѣ́нїѧ наста̑вницы: ра́дꙋйтесѧ, непоколеби́мое правосла́вїѧ ѡ҆снова́нїе.
Ра́дꙋйтесѧ, бра́тїѧ по пло́ти, ма́терїю ва́шею ѳеодо́тїею въ до́бромъ наказа́нїи воспита́ннїи: ра́дꙋйтесѧ, два̀ свѣти̑льника, на землѝ до́брыми дѣ́лы возсїѧ́вшїи.
Ра́дꙋйтесѧ, рабѝ бж҃їи, ѿ гдⷭ҇а хрⷭ҇та̀ вѣнцы̀ побѣ́ды прїе́мшїи: ра́дꙋйтесѧ, ди́вный смире́нїѧ и҆ кро́тости ѻ҆́бразъ всѣ̑мъ показа́вшїи.
Ра́дꙋйтесѧ, свѣ́тлаѧ безсре́бреникѡвъ сла́во: ра́дꙋйтесѧ, до́блѧѧ цѣле́бникѡвъ похвало̀.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ д҃
Бꙋ́рею смꙋще́нїѧ и҆спо́лненъ бы́лъ є҆сѝ, ст҃ы́й дамїа́не, є҆гда̀ жена̀ нѣ́каѧ палла́дїа, тобо́ю вкꙋ́пѣ со ст҃ы́мъ космо́ю ѿ болѣ́зни сме́ртныѧ и҆сцѣле́ннаѧ, хотѧ́ше ѿ и҆збы́тка бл҃года́рнагѡ се́рдца дарова́нїе нѣ́кое свои̑мъ бл҃года̑тнымъ врачє́мъ возда́ти, ты́ же, ви́дѧ бра́та твоего̀ ѿ такова́гѡ приношє́нїѧ ѿре́кшасѧ, вта́й прїѧ́лъ є҆сѝ ѿ тоѧ̀ жены̀ трѝ ꙗ҆́ица, ᲂу҆слы́шавше ꙗ҆́кѡ та̀ заклина́етъ тѧ̀ бг҃омъ, да та̑ѧ трѝ ꙗ҆́ица во и҆́мѧ ст҃ы́ѧ трⷪ҇цы ѿ неѧ̀ прїе́млеши. Сегѡ̀ ра́ди ст҃ы́й косма̀ печа́ленъ бы́сть, и҆ завѣща̀, да по сме́рти твое́й не положе́нъ бꙋ́деши бли́з̾ гро́ба є҆гѡ̀. Є҆гда̀ же по преставле́нїи твое́мъ лю́дїе въ недоꙋмѣ́нїи бы́ша, гдѣ̀ погребсти́ тѧ, верблю́дъ нѣ́кїй человѣ́ческимъ гла́сомъ проглаго́ла, да погребꙋ́тъ тѧ̀ бли́з̾ космы̀ ст҃а́гѡ, ꙗ҆́кѡ просла́влена съ ни́мъ пред̾ бг҃омъ, поне́же не мзды̀ ра́ди, но и҆́мене ра́ди бж҃їѧ прїѧ́лъ є҆сѝ да́ръ то́й. Таково́мꙋ ве́лїю чꙋ́дꙋ дивѧ́щесѧ, лю́дїе погребо́ша тѧ̀ вкꙋ́пѣ съ бра́томъ твои́мъ, съ ра́достїю пою́ще бг҃ꙋ: А҆ллилꙋ́їа.
І҆́косъ д҃
Слы́шавше а҆сі́йстїи лю́дїе ве́лїю ва́шꙋ къ стра́ждꙋщымъ любо́вь и҆ чꙋде́сное врачева́нїе, ѿвсю́дꙋ ᲂу҆стремлѧ́хꙋсѧ къ ва́мъ съ вѣ́рою въ цѣле́бнꙋю бл҃года́ть бж҃їю, въ ва́съ дѣ́йствꙋющꙋю: прїе́млюще же ско́рое и҆сцѣле́нїе, прославлѧ́хꙋ бг҃а, ва́съ же, млⷭ҇рдыхъ цѣли́телей свои́хъ, велича́хꙋ, воспѣва́юще си́це:
Ра́дꙋйтесѧ, бг҃а и҆́стиннагѡ непребори́мїи проповѣ̑дницы: ра́дꙋйтесѧ, бл҃зі́и вра́чеве, стра́ждꙋщымъ ско́рїи помѡ́щницы.
Ра́дꙋйтесѧ, чꙋдодѣ́ющїи си́лою крⷭ҇та̀ хрⷭ҇то́ва: ра́дꙋйтесѧ, предста́тельство на́ше крѣ́пкое.
Ра́дꙋйтесѧ, всѧ̑ немощны̑ѧ тꙋ́не врачꙋ́ющїи: ра́дꙋйтесѧ, и҆сцѣлє́нїѧ ѻ҆би́льнѡ и҆сточа́ющїи.
Ра́дꙋйтесѧ, млⷭ҇тивїи ᲂу҆тѣ́шителїе въ бѣда́хъ и҆ ско́рбехъ сꙋ́щихъ: ра́дꙋйтесѧ, во всѧ́кихъ ѡ҆бстоѧ́нїихъ на́съ защища́ющїи.
Ра́дꙋйтесѧ, безпомо́щныхъ спаси́тельное призрѣ́нїе: ра́дꙋйтесѧ, првⷣныхъ пресла́вное ᲂу҆краше́нїе.
Ра́дꙋйтесѧ, прилѣ́жнїи ѡ҆ на́съ къ бг҃ꙋ мл҃твєнницы: ра́дꙋйтесѧ, всѣ̑мъ, вѣ́рою призыва́ющымъ ва́съ, ско́рїи помѡ́щницы.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ є҃
Бг҃оте́чнымъ вои́стиннꙋ пꙋте́мъ ше́ствовасте, рабѝ хрⷭ҇тѡ́вы, є҆гда̀ бл҃га̑ѧ мі́ра презрѣ́сте слꙋже́нїѧ ра́ди болѧ́щымъ, хрⷭ҇тꙋ́ же є҆ди́номꙋ порабо́тасте. Тѣ́мже вели́комꙋ терпѣ́нїю и҆ крѣ́пцѣй любвѝ ва́шей ко гдⷭ҇ꙋ дивѧ́щесѧ, кꙋ́пнѡ съ ва́ми пое́мъ є҆мꙋ̀: А҆ллилꙋ́їа.
І҆́косъ є҃
Ви́дѣвше и҆сцѣле́ннїи ва́ми, ꙗ҆́кѡ си́лою хрⷭ҇то́вою сїѧ̑ содѣ́ѧшасѧ, хвалꙋ̀ томꙋ̀ возда́ша. Мы́ же сла́вѧще бг҃а, ᲂу҆бл҃жа́емъ ва́съ, сла́вныхъ ᲂу҆го́дникѡвъ є҆гѡ̀, вопїю́ще си́це:
Ра́дꙋйтесѧ, гѡ́рнѧѧ па́че до́льнихъ возлюби́вшїи: ра́дꙋйтесѧ, а҆́гг҃льскомꙋ житїю̀ на землѝ поревнова́вшїи.
Ра́дꙋйтесѧ, многобо́жїе ѻ҆те́ческое ѿри́нꙋвшїи: ра́дꙋйтесѧ, бл҃гоче́стїѧ ма́тернѧ не ѿстꙋпи́вшїи.
Ра́дꙋйтесѧ, словесы̀, дѣ́лы и҆ непреста́нною мл҃твою мно́гихъ вѣ́рѣ наꙋчи́вшїи: ра́дꙋйтесѧ, неѡскꙋ́дный и҆сто́чникъ и҆сцѣле́нїй ны́нѣ ꙗ҆влѧ́ющїи.
Ра́дꙋйтесѧ, и҆злїѧ́нїемъ чꙋде́съ на́съ ѡ҆богаща́ющїи: ра́дꙋйтесѧ, са́ми себѐ во ѡ҆бита́лище бг҃ꙋ ᲂу҆гото́вавшїи.
Ра́дꙋйтесѧ, ско́рое ни́щихъ ᲂу҆слы́шанїе: ра́дꙋйтесѧ, ско́рбныхъ ѿра́дное попече́нїе.
Ра́дꙋйтесѧ, ненаде́жныхъ и҆звѣ́стное надѣ́ѧнїе: ра́дꙋйтесѧ, болѧ́щихъ ско́рое врачева́нїе.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ ѕ҃
Проповѣ̑дницы и҆́мене хрⷭ҇то́ва въ животѣ̀ свое́мъ бы́вше, и҆ ны́нѣ си́лꙋ тогѡ̀ свидѣ́тельствꙋете чꙋдесы̀, ѿ і҆кѡ́ны ва́шеѧ и҆сточа́емыми: и҆ ꙗ҆́коже вѣ́ры и҆ногда̀ жены̀ нѣ́кїѧ палла́дїи не презрѣ́сте, но прише́дше въ до́мъ є҆ѧ̀, и҆сцѣле́нїе ѿ сме́ртнагѡ недꙋ́га є҆́й дарова́ли є҆стѐ, си́це и҆ на́шихъ моле́нїй и҆ пѣ́нїй гла́сы ᲂу҆слы́шите, ѽ ст҃і́и безсре́брєницы! Вѣ́рѣ же и҆ любвѝ люде́й ва́шихъ внемли́те и҆ покро́въ на́мъ свы́ше да́рꙋйте, хва́лѧщымъ ва́съ и҆ пою́щымъ бг҃ꙋ: А҆ллилꙋ́їа.
І҆́косъ ѕ҃
Возсїѧ̀, ꙗ҆́кѡ свѣ́тъ, пра́вда ва́ша, є҆гда̀ ᲂу҆корѧ́еми невѣ́рꙋющими, ꙗ҆́кѡ не ѿ бг҃а полꙋчи́ли є҆стѐ да́ръ и҆сцѣле́нїй, реко́сте къ лю́демъ гра́да ва́шегѡ: не волше́бною хи́тростїю врачꙋ́емъ болѣ̑зни, но си́лою сп҃са на́шегѡ і҆и҃са хрⷭ҇та̀, ꙗ҆́коже то́й заповѣ́да, глаго́лѧ: болѧ́щыѧ и҆сцѣлѧ́йте, прокажє́нныѧ ѡ҆чища́йте, тꙋ́не прїѧ́сте, тꙋ́не дади́те. Тѣ́мже бл҃года́тномꙋ сло́вꙋ ва́шемꙋ дивѧ́щесѧ, ᲂу҆бл҃жа́емъ ва́съ си́ми словесы̀:
Ра́дꙋйтесѧ, ѻ҆́бразъ любвѐ и҆ вѣ́ры на́мъ показа́вшїи: ра́дꙋйтесѧ, ра́йскїѧ ра́дости при́снѡ наслажда́ющїисѧ.
Ра́дꙋйтесѧ, премꙋ́дрїи сѣ́ѧтелїе бл҃гоче́стїѧ: ра́дꙋйтесѧ, сла́внїи проповѣ̑дницы правосла́вїѧ.
Ра́дꙋйтесѧ, ᲂу҆чи́телїе, къ нб҃сѝ наставлѧ́ющїи: ра́дꙋйтесѧ, чи́стагѡ и҆ непоро́чнагѡ житїѧ̀ неꙋсы́пнїи храни́телїе.
Ра́дꙋйтесѧ, молѧ́щихсѧ ва́мъ послꙋ́шателїе те́плїи: ра́дꙋйтесѧ, ко сп҃се́нїю пꙋтеводи́телїе и҆зѧ́щнїи и҆ вѣ́рнїи.
Ра́дꙋйтесѧ, бл҃гоче́стнѡ и҆ бг҃оꙋго́днѡ жи́ти хотѧ́щымъ бл҃зі́и наста̑вницы: ра́дꙋйтесѧ, хода̑таи бл҃ги̑мъ всѣ̑мъ, почита́ющымъ па́мѧть ва́шꙋ.
Ра́дꙋйтесѧ, до́брѣ и҆ ми́рнѣ тече́нїе своѐ сконча́вшїи: ра́дꙋйтесѧ, вѣнцы̀ пра́вды ѿ влⷣки хрⷭ҇та̀ прїѧ́вшїи.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ з҃
Хотѧ́щꙋ мꙋ́жꙋ нѣ́коемꙋ во вре́мѧ жа́твы ѿ зно́ѧ со́лнечнагѡ ѿдохнове́нїе ᲂу҆лꙋчи́ти и҆ крѣ́пкѡ ᲂу҆снꙋ́вшꙋ є҆мꙋ̀, вни́де ѕмі́й во ᲂу҆ста̀ є҆гѡ̀, и҆ ѿ терза́нїѧ ѕмі́ева нача̀ мꙋ́жъ ве́лїимъ гла́сомъ вопи́ти: ст҃і́и вра́чеве космо̀ и҆ дамїа́не, помози́те мѝ! И҆ а҆́бїе вы̀, ᲂу҆гѡ́дницы бж҃їи, приспѣ́ша є҆мꙋ̀ на по́мощь и҆ мл҃твами свои́ми и҆згна́ша ѕмі́ѧ, и҆ ᲂу҆зрѣ́вше ѕмі́ѧ, и҆сходѧ́ща и҆з̾ ᲂу҆́стъ человѣ́ка тогѡ̀, ᲂу҆жасо́шасѧ всѝ ѡ҆ стра́шнѣмъ чꙋдесѝ то́мъ и҆ бл҃года́рственнѡ воспѣ́ша бг҃ꙋ: А҆ллилꙋ́їа.
І҆́косъ з҃
Ди́внїи ѡ҆ на́съ мл҃твєнницы, цѣли́телїе дꙋ́шъ и҆ тѣле́съ на́шихъ и҆ хода̑таи сп҃се́нїѧ вѣ́чнагѡ, бл҃года́рнымъ се́рдцемъ воспѣва́юще хвале́бнꙋю пѣ́снь бг҃ꙋ, дарова́вшемꙋ на́мъ таковы́хъ вели́кихъ чꙋдотво́рцєвъ, прино́симъ ва́мъ похвалы̑ сицевы̑ѧ:
Ра́дꙋйтесѧ, нбⷭ҇ныхъ а҆́гг҃лѡвъ терпѣ́нїемъ ва́шимъ ᲂу҆диви́вшїи: ра́дꙋйтесѧ, бжⷭ҇твеннымъ сїѧ́нїемъ чꙋде́съ свои́хъ всѧ̑ просвѣти́вшїи.
Ра́дꙋйтесѧ, застꙋпле́нїемъ ва́шимъ разсла́блєнныѧ и҆сцѣлѧ́ющїи: ра́дꙋйтесѧ, ѿ неисцѣ́льныхъ болѣ́зней здра̑вы воздвиза́ющїи.
Ра́дꙋйтесѧ, земны́й по́двигъ житїѧ̀ ва́шегѡ досто́йнѣ соверши́вшїи: ра́дꙋйтесѧ, ѡ҆ на́съ, ѡ҆бнаже́нныхъ до́брыхъ дѣ́лъ, при́снѡ къ бг҃ꙋ предста́тельствꙋющїи.
Ра́дꙋйтесѧ, сїѧ́нїемъ го́рней премꙋ́дрости всѣ́хъ вѣ́рныхъ просвѣща́ющїи: ра́дꙋйтесѧ, не сло́вомъ то́чїю, но мно́жае па́че дѣ́ломъ поꙋча́ющїи.
Ра́дꙋйтесѧ, мл҃твєнницы ѡ҆ на́съ и҆ застꙋ̑пницы на́ши преди́внїи: ра́дꙋйтесѧ, чꙋдесы̀ свои́ми і҆́дѡльское безꙋ́мїе ѡ҆бличи́вшїи.
Ра́дꙋйтесѧ, безме́зднѡ всѣ̑мъ и҆сцѣлє́нїѧ подаю́щїи: ра́дꙋйтесѧ, до́блїи вра́чеве хрⷭ҇тѡ́вы.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ и҃
Стра́нное мі́рови житїѐ ва́ше ви́дѧще, ᲂу҆страни́мсѧ и҆ мы̀ тогѡ̀ сꙋе́тъ, и҆ ᲂу҆́мъ на нб҃са̀ прело́жше, возопїи́мъ къ ва́мъ, ст҃і́и безсре́брєницы: ᲂу҆толи́те болѣ̑зни, и҆сточи́те бл҃года̑тнаѧ врачева̑нїѧ всѣ̑мъ, ᲂу҆се́рднѡ къ по́мощи ва́шей притека́ющымъ и҆ вопїю́щымъ бг҃ꙋ: А҆ллилꙋ́їа.
І҆́косъ и҃
Всѐ житїѐ ва́ше на землѝ любо́вїю къ бг҃ꙋ и҆ къ бли̑жнимъ напо́лнисте, ст҃і́и безсре́брєницы космо̀ и҆ дамїа́не, тѣ́мже и҆ ны́нѣ ско́рїи помѡ́щницы ꙗ҆влѧ́етесѧ всѣ̑мъ, съ вѣ́рою призыва́ющымъ ва́съ: не то́чїю бо притека́ющымъ ко ст҃ы̑мъ моще́мъ ва́шымъ, но и҆ дале́че сꙋ́щымъ и҆сцѣлє́нїѧ и҆сточа́ете. Тѣ́мже прино́симъ ва́мъ похвалы̑ сїѧ̑:
Ра́дꙋйтесѧ, є҆ди́номꙋ бг҃ꙋ, въ трⷪ҇цѣ сла́вимомꙋ, вѣ́рнѡ послꙋжи́вшїи: ра́дꙋйтесѧ, є҆ди́ное є҆́же на потре́бꙋ премꙋ́дрѣ и҆збра́вшїи.
Ра́дꙋйтесѧ, ꙗ҆́кѡ въ трꙋдѣ̀ и҆ по́двизѣ дни̑ и҆ но́щи ва́шѧ без̾ всѧ́кагѡ ᲂу҆ны́нїѧ препроводи́ли є҆стѐ: ра́дꙋйтесѧ, ꙗ҆́кѡ тѣ́снымъ и҆ ско́рбнымъ житїе́мъ ва́шимъ сла́вꙋ бж҃їю человѣ́кѡмъ ꙗ҆ви́ли є҆стѐ.
Ра́дꙋйтесѧ, ꙗ҆́кѡ наꙋчи́тєли и҆ творцы̀ хрⷭ҇то́выхъ за́повѣдей ꙗ҆ви́лисѧ є҆стѐ: ра́дꙋйтесѧ, ꙗ҆́кѡ ве́лїи въ црⷭ҇твїи нбⷭ҇нѣмъ нарече́ни є҆стѐ.
Ра́дꙋйтесѧ, сла́вою хрⷭ҇то́вою ве́сь мі́ръ ѡ҆зари́вшїи: ра́дꙋйтесѧ, до́блїи хрⷭ҇тѡ́вы послѣ́дователїе.
Ра́дꙋйтесѧ, ꙗ҆́кѡ любо́вїю къ бли̑жнимъ безстра́стїе прїѧ́ли є҆стѐ: ра́дꙋйтесѧ, ꙗ҆́кѡ безме́зднымъ врачева́нїемъ безсме́ртїе стѧжа́ли є҆стѐ.
Ра́дꙋйтесѧ, ꙗ҆́кѡ а҆́гг҃ли, на нб҃сѝ и҆ на землѝ просла́вленнїи: ра́дꙋйтесѧ, ꙗ҆́кѡ бг҃ꙋ ны́нѣ вѣнцено́снїи предстоитѐ.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ ѳ҃
Всѧ́кое є҆стество̀ человѣ́ческое ᲂу҆диви́сѧ сїѧ́нїю въ ва́съ бл҃года́ти бж҃їѧ, ст҃і́и космо̀ и҆ дамїа́не, є҆гда̀ нечести́вїи лю́дїе, ᲂу҆зрѣ́вше чꙋдеса̀, ѡ҆ и҆́мени гдⷭ҇а і҆и҃са хрⷭ҇та̀ ва́ми твори̑маѧ, ᲂу҆вѣ́роваша и҆ просла́виша бг҃а. Тѣ́мже и҆ мы̀, сла́вѧще да́вшаго ва́мъ сицевꙋ́ю си́лꙋ, пое́мъ є҆мꙋ̀: А҆ллилꙋ́їа.
І҆́косъ ѳ҃
Вѣті̑и многовѣща́ннїи недоꙋмѣ́ютъ дово́льнѡ и҆з̾ѡбрази́ти ѻ҆би́лїе любвѐ ва́шеѧ ѡ҆ гдⷭ҇ѣ, є҆́юже преиспо́лнени бы́сте, ст҃і́и ᲂу҆гѡ́дницы, къ человѣ́кѡмъ. Сегѡ̀ ра́ди и҆з̾ глꙋбины̀ серде́цъ на́шихъ вопїе́мъ къ ва́мъ:
Ра́дꙋйтесѧ, жизнода́вцꙋ гдⷭ҇ꙋ да́же до сме́рти порабо́тавшїи: ра́дꙋйтесѧ, ѻ҆гне́мъ любвѐ бж҃їѧ воспалѧ́емїи, ѻ҆́гнь же́ртвъ і҆́дѡльскихъ ᲂу҆гаси́вшїи.
Ра́дꙋйтесѧ, бли́жнѧгѡ па́че сами́хъ себє̀ возлюби́вшїи: ра́дꙋйтесѧ, болѧ́щыѧ и҆ недꙋ̑жныѧ посѣща́вшїи.
Ра́дꙋйтесѧ, нꙋ̑жды ᲂу҆бо́гихъ предварѧ́вшїи: ра́дꙋйтесѧ, печа́льныхъ ᲂу҆тѣша́вшїи.
Ра́дꙋйтесѧ, ѿча́ѧнныхъ застꙋ̑пницы: ра́дꙋйтесѧ, лю́тѣ стра́ждꙋщымъ помѡ́щницы.
Ра́дꙋйтесѧ, си́рыхъ пита́телїе: ра́дꙋйтесѧ, ᲂу҆гнете́нныхъ свободи́телїе.
Ра́дꙋйтесѧ, ꙗ҆́кѡ до́брѣ тече́нїе сконча́вше, ко хрⷭ҇тꙋ̀ вознесо́стесѧ: ра́дꙋйтесѧ, ꙗ҆́кѡ вѣ́рꙋ соблю́дше, въ црⷭ҇твїи є҆гѡ̀ водвори́стесѧ.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ і҃
Сп҃стѝ хотѧ̀ мно́гихъ, ꙗ҆вѝ на́мъ гдⷭ҇ь вы̀ чꙋдотво́рцы своѧ̑: кто́ бо не ᲂу҆мили́тсѧ, ви́дѧ ва́ше безмѣ́рное ко всѣ̑мъ сострада́нїе: кто̀ вы̀ не ᲂу҆бл҃жи́тъ, слы́ша ѡ҆ кро́ткомъ врачева́нїи ва́ми люде́й и҆ скотѡ́въ: не ѿри́ните ᲂу҆́бѡ на́шихъ мл҃твъ, но на всѧ̑ ны̀ неѡскꙋ́днѡ вели̑кїѧ и҆ бога̑тыѧ ва́шѧ млⷭ҇ти и҆зле́йте, да вопїе́мъ бг҃ꙋ: А҆ллилꙋ́їа.
І҆́косъ і҃
Стѣна̀ є҆стѐ всѣ̑мъ, похвалѧ́ющымъ чꙋдеса̀ ва̑ша, ѽ безсре́брєницы, и҆ къ застꙋпле́нїю ва́шемꙋ прибѣга́ющымъ, забра́ло є҆стѐ, ѡ҆гражда́ющее ѿ всѣ́хъ бѣ́дъ ᲂу҆се́рднѡ въ по́мощь ва́съ призыва́ющихъ. Тѣ́мже ᲂу҆́бѡ ѿ нищеты̀, напа́стей, недꙋ́гѡвъ и҆ скорбе́й ѡ҆гради́те на́съ, мо́лимсѧ, и҆ те́плѣ вопїе́мъ къ ва́мъ:
Ра́дꙋйтесѧ, а҆дама́нтовꙋ крѣ́пость въ нестѧжа́нїи превозше́дшїи: ра́дꙋйтесѧ, ди́внѡ и҆скꙋшє́нїѧ сребролю́бїѧ побѣди́вшїи.
Ра́дꙋйтесѧ, немощны́хъ и҆ ѡ҆би́димыхъ ᲂу҆крѣпле́нїе: ра́дꙋйтесѧ, крѣ́пкое въ напа́стехъ защище́нїе.
Ра́дꙋйтесѧ, ᲂу҆бо́гихъ и҆ ни́щихъ всеще́дрїи ѡ҆богати́телїе: ра́дꙋйтесѧ, а҆́лчꙋщихъ млⷭ҇тивїи пита́телїе.
Ра́дꙋйтесѧ, тѧ́жкихъ недꙋ́гѡвъ премꙋ́дрїи ᲂу҆врачева́телїе: ра́дꙋйтесѧ, ѿ всѣ́хъ ско́рбныхъ ѡ҆бстоѧ́нїй те́плїи защи́тителїе.
Ра́дꙋйтесѧ, въ бѣда́хъ застꙋ̑пницы сла́внїи: ра́дꙋйтесѧ, ѿ бг҃а препросла́вленнїи.
Ра́дꙋйтесѧ, ꙗ҆́кѡ па́мѧть ва́ша всѣ́ми сла́вима на землѝ: ра́дꙋйтесѧ, ꙗ҆́кѡ и҆мена̀ ва̑ша напи̑сана сꙋ́ть на нб҃сѣ́хъ.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ а҃і
Пѣ́нїе всеꙋмиле́нное, ны́нѣ на́ми приноси́мое, нѣ́сть дово́льно къ похвале́нїю пресла́вныхъ по́двигѡвъ и҆ трꙋдѡ́въ ва́шихъ, ꙗ҆̀же хрⷭ҇та̀ ра́ди под̾ѧ́ли є҆стѐ въ животѣ̀ свое́мъ: ѻ҆ба́че дерза́юще про́симъ, ᲂу҆се́рдное моле́нїе на́ше прїе́мше, и҆ на́съ ѿ бѣ́дъ свои́ми мл҃твами и҆зба́вите, да ᲂу҆миле́ннымъ се́рдцемъ воспое́мъ бг҃ꙋ: А҆ллилꙋ́їа.
І҆́косъ а҃і
Свѣтоза́рный и҆ нбⷭ҇ный ᲂу҆́мъ ꙗ҆ви́ли є҆стѐ, є҆гда̀ сла́вы земны́ѧ ѿ врачевства̀ не пожела́ли є҆стѐ и҆ска́ти ѿ человѣ̑къ, но то́чїю сла́вы бж҃їѧ на нб҃сѣ́хъ. Ны́нѣ же нетлѣ́нїемъ моще́й ва́шихъ и҆ мно́жествомъ чꙋде́съ правосла́вїе ᲂу҆твержда́ете. Тѣ́мже бл҃года́рственнѡ зове́мъ:
Ра́дꙋйтесѧ, ѵ҆поста́сное сло́во дерзнове́ннѡ проповѣ́давшїи: ра́дꙋйтесѧ, си́лꙋ і҆́дѡльскꙋю добропобѣ́днѡ ᲂу҆праздни́вшїи.
Ра́дꙋйтесѧ, ꙗ҆́кѡ ва́ми попра́сѧ слꙋже́нїе бѣсѡ́мъ: ра́дꙋйтесѧ, ꙗ҆́кѡ ва́ми проповѣ́дасѧ поклоне́нїе хрⷭ҇тꙋ̀.
Ра́дꙋйтесѧ, ра́зꙋма нбⷭ҇нагѡ ᲂу҆чи́телїе премꙋ́дрїи: ра́дꙋйтесѧ, добродѣ́телей и҆сполни́телїе нелѣ́ностнїи.
Ра́дꙋйтесѧ, ꙗ҆́кѡ по трꙋдѣ́хъ земны́хъ въ селе́нїихъ нбⷭ҇ныхъ ликовствꙋ́ете: ра́дꙋйтесѧ, ꙗ҆́кѡ по преставле́нїи свое́мъ и҆ на́съ не ѡ҆ставлѧ́ете.
Ра́дꙋйтесѧ, ꙗ҆́кѡ всѣ̑мъ, съ вѣ́рою призыва́ющымъ ва́съ, ско́рꙋю по́мощь подае́те: ра́дꙋйтесѧ, ст҃і́и вра́чеве, ꙗ҆́кѡ болѣ̑зни на́шѧ и҆сцѣлѧ́ете.
Ра́дꙋйтесѧ, мл҃твы вѣ́рныхъ не ѿрѣва́ющїи: ра́дꙋйтесѧ, и҆ ѡ҆ на́съ недосто́йныхъ ᲂу҆ прⷭ҇то́ла бж҃їѧ хода́тайствꙋющїи.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ в҃і
Бл҃года́ть, ю҆́же дадѐ ва́мъ гдⷭ҇ь бг҃ъ цѣли́ти всѧ̑ недꙋ́ги дꙋшє́вныѧ же и҆ тѣлє́сныѧ, дне́сь привлечѐ на́съ, да почти́мъ па́мѧть ва́шꙋ, ст҃і́и безсре́брєницы космо̀ и҆ дамїа́не. Бл҃гоговѣ́йнѡ взира́юще на чтⷭ҇нꙋ́ю і҆кѡ́нꙋ ва́шꙋ, со ᲂу҆миле́нїемъ се́рдца къ не́й припа́дающе, мо́лимсѧ и҆зба́витисѧ всѣ̑мъ на́мъ ѿ всѧ́кихъ ѕѡ́лъ и҆ болѣ́зней, и҆ бг҃ꙋ воспѣва́емъ: А҆ллилꙋ́їа.
І҆́косъ в҃і
Пою́ще чꙋдеса̀ ва̑ша, восхвалѧ́емъ трꙋды̀ и҆ по́двиги, ᲂу҆бл҃жа́емъ бл҃гоче́стнꙋю въ ми́рѣ кончи́нꙋ ва́шꙋ, почита́емъ хода́тайство и҆ си́льное застꙋпле́нїе ва́ше ѡ҆ всѣ́хъ, тре́бꙋющихъ по́мощи: велича́емъ пода́телѧ всѣ́хъ бла̑гъ бг҃а, дарова́вшаго на́мъ толи́кѡ ди́вныхъ мл҃твенникѡвъ, и҆ со ᲂу҆миле́нїемъ зове́мъ:
Ра́дꙋйтесѧ, і҆и҃са гдⷭ҇а вѣ́рнѡ проповѣ́давшїи: ра́дꙋйтесѧ, и҆́стины є҆гѡ̀ до́блїи свидѣ́телїе.
Ра́дꙋйтесѧ, те́плїи ѡ҆ на́съ ᲂу҆ прⷭ҇то́ла є҆гѡ̀ предста́телїе: ра́дꙋйтесѧ, тѣле́съ на́шихъ бл҃госострада́тельнїи вра́чеве.
Ра́дꙋйтесѧ, црⷭ҇твїѧ нбⷭ҇нагѡ и҆ вѣ́чныхъ бла̑гъ наслѣ̑дницы: ра́дꙋйтесѧ, и҆сцѣле́нїй да́телїе и҆ чꙋде́съ и҆сто́чницы.
Ра́дꙋйтесѧ, мѵ́ро бл҃гово́нное и҆сцѣле́нїй и҆сточа́ющїи: ра́дꙋйтесѧ, страсте́й ѕлосмра́дїе мл҃твами свои́ми ѿрѣва́ющїи.
Ра́дꙋйтесѧ, свѣтоно́снїи столпѝ цр҃ко́внїи и҆ забра̑ла недви̑жимаѧ: ра́дꙋйтесѧ, вїногра́да и҆́стиннагѡ бжⷭ҇твєнныѧ ло́зы.
Ра́дꙋйтесѧ, мꙋ́дрыхъ безсре́брєникъ дво́ице свѣтови́днаѧ: ра́дꙋйтесѧ, по бз҃ѣ всѐ на́ше ᲂу҆пова́нїе.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ г҃і
Ѽ преди́внїи безсре́брєницы, чꙋдотво́рцы, цѣли́телїе и҆ сла́внїи ᲂу҆гѡ́дницы бж҃їи космо̀ и҆ дамїа́не, прїими́те молє́нїѧ сїѧ̑ на̑ша, ѿ сокрꙋше́ннагѡ се́рдца возноси̑маѧ: и҆сцѣли́те многоѻбра̑зныѧ недꙋ́ги дꙋ́шъ и҆ тѣле́съ на́шихъ, и҆ те́плымъ предста́тельствомъ ва́шимъ и҆спроси́те на́мъ ᲂу҆ хрⷭ҇та̀ бг҃а и҆збавле́нїе ѿ всѣ́хъ бѣ́дъ и҆ напа́стей, проще́нїе прегрѣше́нїй на́шихъ и҆ бл҃гꙋ́ю наде́ждꙋ вѣ́чнагѡ сп҃се́нїѧ, да сподо́бимсѧ съ ва́ми и҆ со всѣ́ми ст҃ы́ми въ безконє́чныѧ вѣ́ки воспѣва́ти бг҃ꙋ, сп҃си́телю на́шемꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льскомꙋ жи́тельствꙋ поревнова́вше, всѧ̑ земна̑ѧ презрѣ́ли є҆стѐ, и҆ въ по́двизѣ нестѧжа́нїѧ потрꙋди́вшесѧ, лицезрѣ́нїѧ гдⷭ҇а си́лъ сподо́билисѧ є҆стѐ. Моли́тесѧ за ны̀ прилѣ́жнѡ, къ по́мощи ва́шей притека́ющихъ и҆ похва̑льнаѧ ва́мъ вопїю́щихъ:
Ра́дꙋйтесѧ, мл҃твєнницы те́плїи ѡ҆ чтꙋ́щихъ ст҃ꙋ́ю па́мѧть ва́шꙋ: ра́дꙋйтесѧ, ѡ҆ста́вленныхъ врачмѝ и҆сцѣлѧ́ющїи.
Ра́дꙋйтесѧ, до́мъ, и҆мѣ́нїе и҆ всѧ̑ роди́тєльскаѧ стѧжа̑нїѧ нивочто́же вмѣни́вшїи: ра́дꙋйтесѧ, ни́щыѧ млⷭ҇рдїемъ ва́шимъ препита́вшїи.
Ра́дꙋйтесѧ, стра́ждꙋщыѧ серде́чною любо́вїю ᲂу҆тѣша́вшїи: ра́дꙋйтесѧ, чистото́ю и҆ ст҃остїю а҆́гг҃лѡмъ ᲂу҆подо́бившїисѧ.
Ра́дꙋйтесѧ, свѣти́льницы бжⷭ҇твеннагѡ свѣ́та: ра́дꙋйтесѧ, нбⷭ҇нїи человѣ́цы, земні́и а҆́гг҃ли.
Ра́дꙋйтесѧ, хрⷭ҇тїа́нѡмъ прибѣ́жище непосты́дное: ра́дꙋйтесѧ, всецѣ́лѡ себѐ слꙋже́нїю гдⷭ҇ꙋ преда́вшїи.
Ра́дꙋйтесѧ, всесвѣ́тлое бл҃года́ти прїѧ́телище, дх҃а ст҃а́гѡ сосꙋ́ди: ра́дꙋйтесѧ, всѣ̑мъ, призыва́ющымъ ва́съ, ско́рїи помѡ́щницы.
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Конда́къ а҃
И҆збра́ннїи чꙋдотво́рцы, безсре́брєницы хрⷭ҇тѡ́вы и҆ вра́чеве премꙋ́дрїи, тꙋ́не подаю́щїи здра́вїе въ болѣ́знехъ сꙋ́щымъ, похва̑льнаѧ восписꙋ́емъ ва́мъ, застꙋ́пникѡмъ на́шымъ и҆ въ ско́рбехъ помо́щникѡмъ: вы́ бо сосꙋ́ди бл҃года́ти сꙋ́ще, и҆сцѣлѧ́ете дꙋшє́вныѧ и҆ тѣлє́сныѧ на́шѧ ꙗ҆́звы. Тѣ́мже сла́вѧще бг҃а, ди́внаго во ст҃ы́хъ свои́хъ, ва́съ ᲂу҆се́рднѡ ᲂу҆бл҃жа́емъ:
Ра́дꙋйтесѧ, космо̀ и҆ дамїа́не, ст҃і́и безсре́брєницы и҆ пресла́внїи чꙋдотво́рцы.
Моли́твы
Ѽ чꙋдотво́рцы сла́внїи, вра́чеве безме́зднїи, космо̀ и҆ дамїа́не! Вы̀ ѿ ю҆́ности хрⷭ҇та̀ бг҃а возлюби́вше и҆ тогѡ̀ повелѣ̑нїѧ всѣ́мъ се́рдцемъ соблюда́юще, а҆́ще и҆ вда́сте себѐ ᲂу҆че́нїю враче́бномꙋ, но добродѣ́тельнагѡ ра́ди житїѧ̀ и҆ чистоты̀ дꙋше́вныѧ, си́лою хрⷭ҇та̀ бг҃а, не врачева́нїѧ то́кмѡ и҆скꙋ́сство, но па́че неѡскꙋ́днꙋю бл҃года́ть и҆сцѣле́нїѧ всѧ́кихъ неисцѣ́льныхъ недꙋ́гѡвъ ѿ бг҃а прїѧ́ли є҆стѐ. Ѿѻнꙋ́дꙋже любо́вїю и҆ млⷭ҇рдїемъ къ недꙋ́гꙋющымъ подвиза́еми, не то́кмѡ лю́демъ, но и҆ скотѡ́мъ и҆сцѣлє́нїѧ болѣ́зней подава́ете, неисче́тнымъ мно́жествомъ чꙋде́съ ва́шихъ ве́сь мі́ръ наполнѧ́ете, и҆ не то́кмѡ недꙋ́ги тѣлє́сныѧ и҆сцѣлѧ́ете, но и҆ вѣ́рою хрⷭ҇то́вою дꙋ́шы просвѣща́ете, въ терпѣ́нїи болѣ́зней ᲂу҆крѣплѧ́ете, въ тѧ́жкихъ недꙋ́зѣхъ ѡ҆ и҆справле́нїи житїѧ̀ вразꙋмлѧ́ете и҆ ко хрⷭ҇тꙋ̀ покаѧ́нїемъ привлека́ете. Тѣ́мже ны́нѣ и҆ на́съ, припа́дающихъ къ ва́мъ пред̾ чтⷭ҇но́ю і҆кѡ́ною ва́шею, ско́рѡ ᲂу҆слы́шите. Ю҆́ныѧ наста́вите, ва́шеѧ по́мощи во ᲂу҆че́нїи кни́жнѣмъ просѧ́щыѧ, да ва́шемꙋ житїю̀ ревнꙋ́юще, не земно́е то́чїю наꙋче́нїе прїѡбрѧ́щꙋтъ, но па́че во бл҃гоче́стїи и҆ пра́вой вѣ́рѣ непреста́ннѡ да преспѣва́ютъ. На ѻ҆дрѣ̀ болѣ́зни лежа́щымъ, человѣ́ческїѧ по́мощи ѿча̑ѧннымъ, къ ва́мъ же те́плѣ съ вѣ́рою и҆ ᲂу҆се́рдною мл҃твою прибѣга́ющымъ, и҆сцѣле́нїе болѣ́зней да́рꙋйте млⷭ҇тивымъ ва́шимъ и҆ чꙋдодѣ́йственнымъ посѣще́нїемъ. Мно́гажды въ болѣ̑зни впа́дающыѧ и҆ ѿ лю́тыхъ недꙋ̑гъ въ ᲂу҆ны́нїе, малодꙋ́шїе и҆ ропта́нїе прише́дшыѧ, да́нною ва́мъ ѿ бг҃а бл҃года́тїю въ терпѣ́нїи ᲂу҆тверди́те, и҆ наста́вите, да ᲂу҆разꙋмѣ́ютъ во́лю ѡ҆ ни́хъ бж҃їю ст҃ꙋ́ю и҆ соверше́ннꙋю, и҆ са́ми себѐ и҆ живо́тъ сво́й во́ли хрⷭ҇та̀ бг҃а предаю́тъ. Въ недꙋ́зѣхъ сꙋ́щымъ, нерадѧ́щымъ же ѡ҆ и҆справле́нїи житїѧ̀, въ грѣсѣ́хъ не раска́ивающымсѧ, се́рдцемъ ѡ҆жесточє́ннымъ, млⷭ҇тивѡ сокрꙋше́нїе во сп҃се́нїе пода́йте и҆ къ покаѧ́нїю и҆̀хъ призови́те, да не́мощни сꙋ́ще тѣ́ломъ, здра́ви пребꙋ́дꙋтъ дꙋше́ю, и҆ прича̑стницы содѣ́лаютсѧ бж҃їѧ сп҃си́тельныѧ бл҃года́ти. Бра́тїю ст҃а́гѡ хра́ма сегѡ̀ [ва́шемꙋ ст҃о́мꙋ застꙋпле́нїю ѿ бг҃а врꙋче́ннꙋю], и҆ всѣ́хъ къ ва́мъ ᲂу҆се́рднѡ прибѣга́ющихъ невреди̑мы сохрани́те ѿ долгонедꙋ́жїѧ, ѿ болѣ́зней лю́тыхъ и҆ неисцѣ́льныхъ, ѿ разслабле́нїѧ тѣ́ла, ѿ и҆зстꙋпле́нїѧ ᲂу҆ма̀, ѿ смертоно́сныѧ ꙗ҆́звы, ѿ внеза́пныѧ сме́рти, и҆ мо́щнымъ хода́тайствомъ ва́шимъ къ бг҃ꙋ соблюди́те въ пра́вой вѣ́рѣ тве́рдыхъ, во бл҃гоче́стїи преспѣ́ющихъ, въ до́брыхъ дѣ́лѣхъ ᲂу҆се́рдныхъ, въ мл҃твѣ къ бг҃ꙋ прилѣ́жныхъ, да съ ва́ми вкꙋ́пѣ сподо́бѧтсѧ въ бꙋ́дꙋщемъ вѣ́цѣ при́снѡ воспѣва́ти и҆ сла́вити всест҃о́е и҆ великолѣ́пое и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.