Акафист святому преподобному Варлааму Хутынскому, Новгородскому чудотворцу

А́нгелом уподо́бился еси́, Богому́дре О́тче Варлаа́ме, непоро́чным житие́м Твои́м на земли́: доброде́тельми укра́шен, пресели́лся еси́ от земли́ на Не́бо, ди́вный о́браз соверше́нства духо́внаго на́м оста́вив, да подража́ем доброде́телем Твои́м. Ты́ же со А́нгелы и все́ми святы́ми предстоя́ Престо́лу Го́спода Сла́вы, моли́ся о на́с, почита́ющих Тя́ и во умиле́нии зову́щих Ти́ такова́я:

Ра́дуйся, О́трасле Богодарова́нная ко́рене благочести́ваго; ра́дуйся, Вели́каго Нова́града Прозябе́ние пречестно́е.

Ра́дуйся, Ча́до возлю́бленное Благода́ти Ду́ха Бо́жия испо́лненное; ра́дуйся, Отроча́ Боголюбе́зное.

Ра́дуйся, измла́да Боже́ственными Писа́ньми ду́шу Твою́ насы́тивый; ра́дуйся, во мла́дости му́дрость ста́рца стяжа́вый.

Ра́дуйся, воздержа́нием роди́тели Твоя́ изуми́вый; ра́дуйся, смире́нием и послуша́нием мно́гих удиви́вый.

Ра́дуйся, ю́ность Твою́ Непоро́чностию жития́ украси́вый; ра́дуйся, целому́дрие де́вства невреди́мо сохрани́вый.

Ра́дуйся, от ю́ности в же́ртву Благоприя́тну Го́сподеви Са́м Себя́ принесы́й; ра́дуйся, во все́м житии́ еди́но попече́ние име́вый е́же Триипоста́сному Бо́гу то́кмо служи́ти.

Ра́дуйся, Варлаа́ме, Вели́кий и Пресла́вный Чудотво́рче.

Ра́зум благи́й, благоро́дство и́стинное, бога́тство неистощи́мое стяжа́л еси́, Богоблаже́нне Варлаа́ме, егда́ от ю́ности возжела́в го́рняя му́дрствовати, а не земна́я, взыска́л еси́ стези́ к Небе́сным Оби́телем в безмо́лвии и Богомы́слии. Мы́ же помина́юще толи́кую Твою́ к по́двигом духо́вным ре́вность, со умиле́нием взыва́ем Ти́ такова́я:

Ра́дуйся, безмо́лвия и Богомы́слия до́брый Рачи́телю; ра́дуйся, потре́бнаго для души́ сле́зный Иска́телю.

Ра́дуйся, во́лею Свое́ю и́го за́поведей Христо́вых подъя́вый; ра́дуйся, угожде́ние Бо́гу па́че всего́ предъизбра́вый.

Ра́дуйся, кро́ткий После́дователю Христо́в; ра́дуйся, живы́й о́бразе Ева́нгельскаго самоотверже́ния.

Ра́дуйся, воздержа́ния Пра́вило изве́стное; ра́дуйся, я́ко от ю́ности навы́кнувый поще́нию.

Ра́дуйся, всего́ ми́ра кра́сная, зна́тность ро́да и по́чести мирски́я Христа́ ра́ди ни во что́ вмени́вый; ра́дуйся, то́кмо доброде́тельное по Бо́зе житие́ возлюби́вый.

Ра́дуйся, и на́с земны́я ра́дости презира́ти науча́яй; ра́дуйся, к Го́рнему умы́ и сердца́ на́ша направля́яй.

Ра́дуйся, Варлаа́ме Вели́кий и Пресла́вный Чудотво́рче.

Име́я непреодоли́мое жела́ние И́го Христо́во на Себе́ прия́ти и во сле́д Христу́ поити́, в послуша́ние отцу́ Твоему́ духо́вному преда́лся еси́ все́ю душе́ю и все́м се́рдцем. Се́й же проразумева́я в Тебе́ сосу́д избра́нный Свято́му Ду́ху, облече́ Тя́ во А́нгельский О́браз и нарече́ и́мя Ти́ Варлаа́м. Ты́ же вся́ доброде́тели, подоба́ющий и́ноком, соверши́л еси́, и в новонача́лии Свое́м соверше́н бы́ти и́нок и до́бр Подви́жник показа́лся еси́. Сего́ ра́ди из глубины́ серде́ц вопие́м Ти́ такова́я:

Ра́дуйся, и́ноческаго жития́ ско́рби и тесноту́ возлюби́вый; ра́дуйся, сожи́тельство и собесе́дничество с преподо́бными избра́вый.

Ра́дуйся, ве́рою, любо́вию и упова́нием Спасе́ния испо́лненный; ра́дуйся, обе́том де́вства чистоту́ се́рдца яви́вый.

Ра́дуйся, обе́том нестяжа́ния высоту́ Ду́ха показа́вый; ра́дуйся, обе́том послуша́ния всесоверше́нное служе́ние Свое́ Еди́ному Бо́гу утверди́вый.

Ра́дуйся, житию́ и по́двигом дре́вних преподо́бных оте́ц поревнова́вый; ра́дуйся, в труды́ и послуша́ние отцу́ Твоему́ духо́вному преда́тися усе́рдно восхоте́вый.

Ра́дуйся, иску́с долготерпе́ния благоуспе́шно проше́дый; ра́дуйся, вся́кое послуша́ние со смире́нием и кро́тостию соверши́вый.

Ра́дуйся, благочи́ния монасты́рскаго ве́рный Храни́телю; ра́дуйся, равноа́нгельнаго жития́ стро́гий Ревни́телю.

Ра́дуйся. Варлаа́ме, Вели́кий и Пресла́вный Чудотво́рче.

Слы́шав похваля́ема Тя́ бы́ти во Оби́тели от челове́к, превозноше́ния су́етнаго убоя́лся еси́, О́тче Преподо́бне, и те́пле моли́лся еси́ ко Го́споду да сподо́бит Тя́ в пусты́нном безмо́лвии Ему́ служи́ти. Те́мже, я́ко ища́й Сла́вы Еди́наго Бо́га, прише́л еси́ на го́ру Ху́тынскую, свы́ше Тебе́ луче́м Боже́ственнаго Све́та указа́нную, да та́мо в ми́ре Еди́ному Го́споду рабо́таеши. Мы́ же, дивя́щеся Пречу́дному сему́ указа́нию, ра́достно зове́м Ти́ такова́я:

Ра́дуйся, презре́вый сла́ву челове́ческую. я́ко су́етную; ра́дуйся, восприя́вый Свято́е Смире́ние Иису́сово.

Ра́дуйся, Благода́тию Бо́жиею води́мый, я́ко еди́н от дре́вних Патриа́рхов; ра́дуйся, освяти́вый го́ру Ху́тынскую Твои́м прише́ствием.

Ра́дуйся, Лу́ч о́гнен ви́девый на не́й; ра́дуйся, чрез сие́ прия́вый от Го́спода благо́е извеще́ние о ме́сте поко́я Твоего́.

Ра́дуйся, Зри́телю Боже́ственных виде́ний; ра́дуйся, Го́рлице пустыннолюби́вая, Ху́тынскую де́брь огласи́вшая пе́нием Сла́вы Бо́жия.

Ра́дуйся, Кри́не благоуха́ющий в пусты́ни; ра́дуйся, моли́тв благово́нное Кади́ло.

Ра́дуйся, псалмопе́ния Орга́не изя́щный.

Ра́дуйся, Варлаа́ме, Вели́кий и Пресла́вный Чудотво́рче.

Спасти́ хотя́й ду́шу Твою́, Уго́дниче Бо́жий, а́ще и всеме́рно бе́гал еси́ сла́вы, я́же от челове́к: ве́рно оба́че Сло́во Го́спода, я́ко не мо́жет гра́д укры́тися верху́ горы́ стоя́, та́ко бо и о Твое́м пусты́нном по́двизе уве́деша Вели́каго Нова́града лю́дие, и нача́ша благогове́йно приходи́ти к Тебе́, прося́ у Тебе́ моли́тв, душеполе́зных наставле́ний и благослове́ния. Ты́ же все́х с любо́вию прие́мля, поуча́л еси́ от Боже́ственнаго Писа́ния е́же твори́ти За́поведи Госпо́дни и име́ти любо́вь нелицеме́рну. Мы́ же ублажа́юще Тя́ вопие́м Ти́ такова́я:

Ра́дуйся, Гра́де, верху́ горы́ стоя́й и не моги́й укры́тися; ра́дуйся, Свети́льниче, Боже́ственным Пла́менем возже́нный.

Ра́дуйся, Огневи́дный Сто́лпе, наставля́яй на пу́ть Спасе́ния; ра́дуйся, Лучеза́рный Свети́льниче, ве́рныя просвеща́яй.

Ра́дуйся, Цве́те духо́вный, Благода́тию привлека́яй взо́ры душе́вныя к Тебе́ приходя́щих; ра́дуйся, Пчело́ трудолюби́вая, со́ты доброде́телей в насыще́ние а́лчущих с Собо́ю нося́щая.

Ра́дуйся, гре́шныя на пу́ть Спасе́ния направля́яй; ра́дуйся, скорбя́щия сла́достию слове́с Твои́х утеша́яй.

Ра́дуйся, ю́ныя наставля́яй; ра́дуйся, ста́рыя не сло́вом то́чию, па́че житие́м укрепля́яй.

Ра́дуйся, притека́ющим к Тебе́, те́плый Моли́твенниче и Боговеща́нный Учи́телю; ра́дуйся, и на́с все́х обремене́нных грехи́ мно́гими, в любви́ дру́г ко дру́гу Ди́вный Наста́вниче.

Ра́дуйся, Варлаа́ме, Вели́кий и Пресла́вный Чудотво́рче.

Возсия́в от Вели́каго Нова́града, О́тче на́ш Варлаа́ме, просвети́л еси́ чу́дным житие́м Твои́м го́ру Ху́тынскую, на не́йже и Оби́тель и́ноком во спасе́ние Бо́жиим изволе́нием устро́ил еси́, и це́рковь во И́мя Преображе́ния Госпо́дня созда́л еси́, и свяще́нства Благода́ть восприя́ти чрез святи́теля Бо́жия и Игу́меном созда́нныя Тобо́ю Оби́тели от него́ нарещи́ся не уклони́лся еси́, а́ще и тужа́ше ду́х Тво́й, ужаса́яся высоты́ сея́. Мы́ же, прославля́юще Тя́, любо́вию вопие́м Ти́:

Ра́дуйся, во удале́нии от ми́ра су́етнаго пусты́нную Оби́тель ра́ди и́щущих спасе́ния до́бре основа́вый; ра́дуйся, водвори́вшимся в не́й Вели́кий Учи́телю и Богому́дрый Наста́вниче.

Ра́дуйся, благогове́йный алтаря́ Госпо́дня Служи́телю, о ве́рных моля́йся; ра́дуйся, со мно́гим дерзнове́нием о на́с недосто́йных ко Го́споду предста́тельствующий.

Ра́дуйся, Та́ин Бо́жиих и́стинный Строи́телю; ра́дуйся, слове́снаго ста́да Твоего́ До́брый Па́стырю.

Ра́дуйся, Предводи́телю Богому́дрый в пути́ Спасе́ния; ра́дуйся, вождю́ до́блий, Мно́гих приведы́й ко спасе́нию.

Ра́дуйся, святы́я Во́ли Бо́жия Исполни́телю; ра́дуйся, оте́ческих преда́ний усе́рдный Храни́телю.

Ра́дуйся, и́ноков благочести́вых Похвало́ и Украше́ние; ра́дуйся, и о на́с гре́шных Судии́ Пра́веднаго Умоле́ние.

Ра́дуйся, Варлаа́ме, Вели́кий и Пресла́вный Чудотво́рче.

Ди́вное и пресла́вное чу́до показа́ Тобо́ю на земли́ все́х чуде́с Творе́ц и Влады́ка, егда́ премени́шася естества́ уста́вы: среди́ бо ле́та мра́з си́лен и сне́г глубо́к яви́стася в преде́лах Нова́града, е́же Ты́ предре́кл еси́ о́ному святи́телю; Святи́тель Бо́жий и лю́дие Нова́града смути́шася тогда́ зело́, боя́хубося, я́ко гла́д ве́лий наста́нет в стране́ и́х. Егда́ же услы́шаша от Тебе́ изволе́ние Бо́жие, явле́нное в ви́димом и благо́е промышле́ние о лю́дех Свои́х, ра́дости испо́лнишася и возблагодари́ша Бо́га Ди́внаго во Святы́х Свои́х. Мы́ же, дивя́щеся Си́ле Бо́жией, обита́ющей в Тебе́ и помина́юще ско́рое Твое́ заступле́ние, со умиле́нием покланя́емся Тебе́, я́ко ве́лие дерзнове́ние иму́щему пред Го́сподем и благода́рственно вопие́м:

Ра́дуйся, в ми́ре преми́рным яви́выйся; ра́дуйся, страну́ Новагра́дскую удиви́вый чудесы́.

Ра́дуйся, и́мже о Си́ле Бо́жией естества́ уста́вы премени́шася; ра́дуйся, и́мже лю́дие Нова́града от гла́да изба́вишася.

Ра́дуйся, Де́лателю чуде́с пресла́вных; Ра́дуйся, Хода́таю и Пода́телю дарова́ний многообра́зных.

Ра́дуйся, мно́гия от тя́жких напа́стей и скорбе́й изба́вивый; ра́дуйся, ско́рый Помо́щниче все́х в беда́х су́щих.

Ра́дуйся, Нова́града Красото́ и Утвержде́ние; ра́дуйся, горы́ Ху́тынския Сла́во и Похвале́ние.

Ра́дуйся, Промышле́ние о лю́дех благо́е Прия́телище; ра́дуйся, и на́с гре́шных прибега́ющих под кро́в Тво́й, неусы́пный Засту́пниче.

Ра́дуйся, Варлаа́ме, Вели́кий и Пресла́вный Чудотво́рче.

Ве́сь еси́ с ве́рою к Тебе́ притека́ющим вои́стинну Помо́щник Вели́кий, Уго́дниче Бо́жий Варлаа́ме! не то́чию прибега́ющим к цельбоно́сным моще́м Твои́м, но и дале́че отстоя́щим и призыва́ющим всечестно́е И́мя Твое́. Те́мже во умиле́нии зове́м Ти́, я́ко вои́стину досто́йному благохвале́ний:

Ра́дуйся, Утеше́ние! скорбя́ми жите́йскими утесне́нных; ра́дуйся, Весе́лие, в печа́лех су́щих.

Ра́дуйся, злостра́ждущих от духо́в зло́бы Ско́рый Помо́щниче и Изба́вителю; ра́дуйся, я́же никто́же с ве́рою притека́яй, то́щь отхо́дит от Тебе́.

Ра́дуйся, я́ко су́щим в пучи́не скорбе́й До́бр обрета́ешися Ко́рмчий; ра́дуйся, я́ко Ми́лостивый при жи́зни, благотвори́ши все́м тре́бующим и по сме́рти.

Ра́дуйся, пла́вающих ле́гкое по вода́м Прехожде́ние; ра́дуйся, путеше́ствующих До́брый Путеводи́телю.

Ра́дуйся, си́льный вдови́ц Покрови́телю; ра́дуйся, сиро́т милосе́рдый и благопопечи́тельный Храни́телю.

Ра́дуйся, а́лчущих любвеоби́льный Пита́телю; ра́дуйся, все́х безпомо́щных ве́рный пред Го́сподем Хода́таю.

Ра́дуйся, Варлаа́ме, Вели́кий и Пресла́вный Чудотво́рче.

Вети́йствующий язы́к недоуме́ет досто́йно воспе́ти Твоя́ по́двиги и труды́, Благи́й Ра́бе Бо́жий, я́же поне́сл еси́ любве́ ра́ди и спасе́ния ду́ш при́сных Твои́х: яви́лся бо еси́ Пропове́дник воздержа́ния и терпе́ния и́ноком пустыннолюби́вым и все́м Учи́тель Му́дрый, наставля́яй на пу́ть спасе́ния. Мы́ же, чудя́щеся высоте́ и си́ле Твоея́ доброде́тели, зане́ ви́дим плоды́ ея́ в Твои́х ученика́х и сподви́жниках Анто́ние, Ксенофо́нте, Косьме́ и Константи́не, уже́ просла́вленных вме́сте с Тобо́ю во Ца́рствии Отца́ Небе́снаго, любо́вию прославля́ем Тя́ си́це:

Ра́дуйся, Трудолю́бче, тече́ние жи́зни Твоея́ в вели́ких по́двигах соверши́вый; ра́дуйся, терпе́нию Христо́ву ве́рно Подража́вый.

Ра́дуйся, све́том доброде́телей Твои́х Бо́га просла́вивый; ра́дуйся, Се́мя До́брое, на земли́ бла́зе посе́янное и стори́чный Пло́д прине́сшее.

Ра́дуйся, Свети́ло благоче́стия Немерца́ющее; ра́дуйся, Звездо́, ко спасе́нию пу́ть ве́рным показу́ющая.

Ра́дуйся, не сло́вом то́чию, но па́че житие́м поуча́яй; ра́дуйся, и́ноком пу́ть и́стинный ко спасе́нию показа́вый.

Ра́дуйся, по́стничества и терпе́ния О́браз преди́вный; ра́дуйся, воздержа́ния Учи́телю.

Ра́дуйся, за́поведей Христо́вых ве́рный Исполни́телю; ра́дуйся, и все́х на́с в любви́ к при́сным ди́вный Наста́вниче.

Ра́дуйся, Варлаа́ме, Вели́кий и Пресла́вный Чудотво́рче.

Царя́ Небе́снаго возлюби́в все́м се́рдцем Твои́м и все́ю душе́ю Твое́ю и все́ю мы́слию Твое́ю, до конца́ жи́зни Твоея́ в терпе́нии и по́двизе неосла́бно пребы́л еси́, и егда́ дости́гнув в ме́ру во́зраста и в му́жа соверше́нна, позна́л приближе́ние вре́мени, ну́жнаго челове́ку измене́ния, во е́же тле́нному насле́довати обетова́нное безсме́ртие, тогда́ завеща́л еси́ ученико́м Твои́м вся́ потре́бная ко спасе́нию, наста́вника же в Себе́ ме́сто Анто́ния сподви́жника Твоего́ оста́вил еси́, ему́же и Оби́тель Святу́ю вручи́л еси́ и бра́тию: Та́же благослови́в все́х, пре́дал еси́ Святу́ю ду́шу Твою́ в ру́це Бо́жии. Мы́ же, помина́юще сия́, из глубины́ серде́ц вопие́м Ти́ такова́я:

Ра́дуйся, и́скреннюю любо́вь к Бо́гу в душе́ и се́рдце непреста́нно име́вый; ра́дуйся, то́юже любо́вию к духо́вным ча́дам Твои́м, при отше́ствии испо́лненный.

Ра́дуйся, стра́х Бо́жий в се́рдце вы́ну сохрани́вый; ра́дуйся, Еди́ному Го́споду до конца́ послужи́вый.

Ра́дуйся, благоче́стно тече́ние вре́менныя жи́зни сконча́вый; ра́дуйся, кончи́ну Свою́ предуве́девый.

Ра́дуйся, я́ко с тве́рдым наде́янием Бла́г Ве́чных преста́вился еси́ к Бо́гу; ра́дуйся, я́ко Ца́рь ца́рствующих прия́л Тя́ в Небе́сное Ца́рствие.

Ра́дуйся, я́ко свя́тостию жития́ Ми́лость Бо́жию обре́л еси́; ра́дуйся, Ра́бе Благи́й и Ве́рный вше́дый в ра́дость Го́спода Твоего́.

Ра́дуйся, я́ко от Оби́тели земны́я в Оби́тель Небе́сную пресели́лся еси́; ра́дуйся, я́ко с Небе́сных высо́т на мольбы́ на́ша ми́лостивно призира́еши.

Ра́дуйся, Варлаа́ме, Вели́кий и Пресла́вный Чудотво́рче.

Светоза́рное Свети́ло, на Ху́тынской горе́ возсия́вшее, и по честне́м успе́нии Твое́м зри́м Тя́, Богому́дре О́тче Варлаа́ме, зане́ и ны́не све́тиши на́м зна́мении и чудесы́, от Святы́х моще́й Твои́х истека́ющими, я́же изволе́нием Бо́жиим земля́ яви́ Святи́телю Евфи́мию и бы́вшим во хра́ме с ни́м игу́мену Тара́сию, иподиа́кону Иоа́нну, я́ко многоце́нное и Благода́ти испо́лненное Сокро́вище. Те́мже и мы́, благода́рственная Бо́гу принося́ о тебе́ пе́ния, взыва́ем к тебе́ си́це:

Ра́дуйся, нетле́нием моще́й твои́х сла́вно от Бо́га возвели́ченный; ра́дуйся, от моще́й твои́х исцеле́ния неду́гов Благода́тию Бо́жией источа́яй.

Ра́дуйся, Ча́ше, излива́ющая то́ки Милосе́рдия Бо́жия; ра́дуйся, чуде́с Пучи́но, свы́ше излия́нная.

Ра́дуйся, пре́жде сме́рти яви́вый ди́вная; ра́дуйся, и по успе́нии соверша́яй чу́дная.

Ра́дуйся, я́ко и по сме́рти жи́в пребыва́еши, явля́я в Себе́ си́лы Боже́ственныя; ра́дуйся, я́ко моли́твенно Тя́ призыва́ющия, ско́ро посеща́еши.

Ра́дуйся, немощны́х Цели́телю; ра́дуйся, ско́рбных Уте́шителю.

Ра́дуйся, я́ко и по преставле́нии твое́м при́сно с на́ми пребыва́еши; ра́дуйся, я́ко и живя́ в селе́ниих Ра́йских на́с не оставля́еши.

Ра́дуйся, Варлаа́ме, Вели́кий и Пресла́вный Чудотво́рче.

Ди́вен показа́лся еси́ ученико́м твои́м, егда́ еди́наго от осужде́нных, никому́ же тя́ моля́щу, от ка́зни сме́ртныя свободи́л еси́, друга́го же и мно́гим тя́ о не́м прося́щим от сме́рти изба́вити не восхоте́л еси́. Мы́ же не дерза́ем испы́тывати сокрове́нная Суде́б Бо́жиих Та́йны, но со стра́хом к тебе́ взыва́ем:

Ра́дуйся, таи́нниче вели́кий, Бо́жия Благода́ти; ра́дуйся, защи́тниче, от бе́д и сме́рти непови́нныя.

Ра́дуйся, свяще́нный у́ме, постига́яй Боже́ственныя Та́йны; ра́дуйся, ра́зуме просвеще́нный све́том Го́рния Сла́вы.

Ра́дуйся, ду́ше, освяще́нный Благода́тию Бо́жиею; Ра́дуйся, се́рдцем очище́нным зря́й Непостижи́мыя Бо́жия Судьбы́.

Ра́дуйся, вну́тренняя се́рдца испыту́яй; ра́дуйся, прозрева́яй сокрове́нныя мы́сли.

Ра́дуйся, све́тлый у́ме озаре́нный Невече́рним Све́том; ра́дуйся, чи́стый душе́ю, просветле́нный Со́лнцем Пра́вды.

Ра́дуйся, Варлаа́ме, вели́кий и пресла́вный чудотво́рче.

А҆́гг҃лѡмъ ᲂу҆подо́билсѧ є҆сѝ, бг҃омꙋ́дре ѻ҆́ч҃е варлаа́ме, непоро́чнымъ житїе́мъ твои́мъ на землѝ: добродѣ́тельми ᲂу҆кра́шенъ, пресели́лсѧ є҆сѝ ѿ землѝ на нб҃о, ди́вный ѻ҆́бразъ соверше́нства дх҃о́внагѡ на́мъ ѡ҆ста́вивъ, да подража́емъ добродѣ́телемъ твои̑мъ. Ты́ же со а҆́гг҃лы и҆ всѣ́ми ст҃ы́ми предстоѧ̀ прⷭ҇то́лꙋ гдⷭ҇а сла́вы, моли́сѧ ѡ҆ на́съ, почита́ющихъ тѧ̀ и҆ во ᲂу҆миле́нїи зовꙋ́щихъ тѝ такова̑ѧ:

Ра́дꙋйсѧ, ѻ҆́трасле бг҃одарова́ннаѧ, ко́рене бл҃гочести́вагѡ: ра́дꙋйсѧ, вели́кагѡ нова́града прозѧбе́нїе пречестно́е.

Ра́дꙋйсѧ, ча́до возлю́бленное бл҃года́ти дх҃а бж҃їѧ и҆спо́лненное: ра́дꙋйсѧ, ѻ҆троча̀ бг҃олюбе́зное.

Ра́дꙋйсѧ, и҆змла́да бжⷭ҇твенными писа́ньми дꙋ́шꙋ твою̀ насы́тивый: ра́дꙋйсѧ, во мла́дости мꙋ́дрость ста́рца стѧжа́вый.

Ра́дꙋйсѧ, воздержа́нїемъ роди́тели твоѧ̑ и҆зꙋми́вый: ра́дꙋйсѧ, смире́нїемъ и҆ послꙋша́нїемъ мно́гихъ ᲂу҆диви́вый.

Ра́дꙋйсѧ, ю҆́ность твою̀ непоро́чностїю житїѧ̀ ᲂу҆краси́вый: ра́дꙋйсѧ, цѣломꙋ́дрїе дѣ́вства невреди́мѡ сохрани́вый.

Ра́дꙋйсѧ, ѿ ю҆́ности въ же́ртвꙋ бл҃гопрїѧ́тнꙋ гдⷭ҇еви са́мъ себѐ принесы́й: ра́дꙋйсѧ, во все́мъ житїѝ є҆ди́но попече́нїе и҆мѣ́вый є҆́же трїѷпоста́сномꙋ бг҃ꙋ то́кмѡ слꙋжи́ти.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Ра́зꙋмъ бл҃гі́й, благоро́дство и҆́стинное, бога́тство неистощи́мое стѧжа́лъ є҆сѝ, бг҃облаже́нне варлаа́ме, є҆гда̀ ѿ ю҆́ности возжела́въ гѡ́рнѧѧ мꙋ́дрствовати, а҆ не земна̑ѧ, взыска́лъ є҆сѝ стєзѝ къ нбⷭ҇нымъ ѻ҆би́телемъ въ безмо́лвїи и҆ бг҃омы́слїи. Мы́ же помина́юще толи́кꙋю твою̀ къ по́двигѡмъ дꙋхѡ́внымъ ре́вность, со ᲂу҆миле́нїемъ взыва́емъ тѝ такова̑ѧ:

Ра́дꙋйсѧ, безмо́лвїѧ и҆ бг҃омы́слїѧ до́брый рачи́телю: ра́дꙋйсѧ, потре́бнагѡ длѧ дꙋшѝ сле́зный и҆ска́телю.

Ра́дꙋйсѧ, во́лею свое́ю и҆́го за́повѣдей хрⷭ҇то́выхъ под̾ѧ́вый: ра́дꙋйсѧ, ᲂу҆гожде́нїе бг҃ꙋ па́че всегѡ̀ пред̾избра́вый.

Ра́дꙋйсѧ, кро́ткїй послѣ́дователю хрⷭ҇то́въ: ра́дꙋйсѧ, живы́й ѻ҆́бразе є҆ѵⷢ҇скагѡ самоѿверже́нїѧ.

Ра́дꙋйсѧ, воздержа́нїѧ пра́вило и҆звѣ́стное: ра́дꙋйсѧ, ꙗ҆́кѡ ѿ ю҆́ности навы́кнꙋвый поще́нїю.

Ра́дꙋйсѧ, всегѡ̀ мі́ра кра̑снаѧ, зна́тность ро́да и҆ по́чєсти мїрскі̑ѧ хрⷭ҇та̀ ра́ди ни во что̀ вмѣни́вый: ра́дꙋйсѧ, то́кмѡ добродѣ́тельное по бз҃ѣ житїѐ возлюби́вый.

Ра́дꙋйсѧ, и҆ на́съ зємны́ѧ ра́дости презира́ти наꙋча́ѧй: ра́дꙋйсѧ, къ го́рнемꙋ ᲂу҆мы̀ и҆ сердца̀ на̑ша направлѧ́ѧй.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

И҆мѣ́ѧ непреѡдоли́мое жела́нїе и҆́го хрⷭ҇то́во на себѐ прїѧ́ти и҆ во слѣ́дъ хрⷭ҇тꙋ̀ поитѝ, въ послꙋша́нїе ѻ҆ц҃ꙋ̀ твоемꙋ̀ дꙋхо́вномꙋ преда́лсѧ є҆сѝ все́ю дꙋше́ю и҆ всѣ́мъ се́рдцемъ. Се́й же проразꙋмѣва́ѧ въ тебѣ̀ сосꙋ́дъ и҆збра́нный ст҃о́мꙋ дх҃ꙋ, ѡ҆блечѐ тѧ̀ во а҆́гг҃льскїй ѻ҆́бразъ и҆ наречѐ и҆́мѧ тѝ варлаа́мъ. Ты́ же всѧ̑ добродѣ́тєли, подоба́ющїй и҆́нокѡмъ, соверши́лъ є҆сѝ, и҆ въ новонача́лїи свое́мъ соверше́нъ бы́ти и҆́нокъ и҆ до́бръ подви́жникъ показа́лсѧ є҆сѝ. Сегѡ̀ ра́ди и҆з̾ глꙋбины̀ серде́цъ вопїе́мъ тѝ такова̑ѧ:

Ра́дꙋйсѧ, и҆́ноческагѡ житїѧ̀ скѡ́рби и҆ тѣснотꙋ̀ возлюби́вый: ра́дꙋйсѧ, сожи́тельство и҆ собесѣ́дничество съ прпⷣбными и҆збра́вый.

Ра́дꙋйсѧ, вѣ́рою, любо́вїю и҆ ᲂу҆пова́нїемъ спасе́нїѧ и҆спо́лненный: ра́дꙋйсѧ, ѻ҆бѣ́томъ дѣ́вства чистотꙋ̀ се́рдца ꙗ҆ви́вый.

Ра́дꙋйсѧ, ѻ҆бѣ́томъ нестѧжа́нїѧ высотꙋ̀ дх҃а показа́вый: ра́дꙋйсѧ, ѻ҆бѣ́томъ послꙋша́нїѧ всесоверше́нное слꙋже́нїе своѐ є҆ди́номꙋ бг҃ꙋ ᲂу҆тверди́вый.

Ра́дꙋйсѧ, житїю̀ и҆ по́двигѡмъ дре́внихъ прпⷣбныхъ ѻ҆те́цъ поревнова́вый: ра́дꙋйсѧ, въ трꙋды̀ и҆ послꙋша́нїе ѻ҆тцꙋ̀ твоемꙋ̀ дꙋхо́вномꙋ преда́тисѧ ᲂу҆се́рднѡ восхотѣ́вый.

Ра́дꙋйсѧ, и҆скꙋ́съ долготерпѣ́нїѧ бл҃гоꙋспѣ́шно проше́дый: ра́дꙋйсѧ, всѧ́кое послꙋша́нїе со смире́нїемъ и҆ кро́тостїю соверши́вый.

Ра́дꙋйсѧ, бл҃гочи́нїѧ монасты́рскагѡ вѣ́рный храни́телю: ра́дꙋйсѧ, равноа́гг҃льнагѡ житїѧ̀ стро́гїй ревни́телю.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Слы́шавъ похвалѧ́ема тѧ̀ бы́ти во ѡ҆би́тели ѿ человѣ̑къ, превозноше́нїѧ сꙋ́етнагѡ ᲂу҆боѧ́лсѧ є҆сѝ, ѻ҆́ч҃е прпⷣбне, и҆ те́плѣ моли́лсѧ є҆сѝ ко гдⷭ҇ꙋ да сподо́битъ тѧ̀ въ пꙋсты́нномъ безмо́лвїи є҆мꙋ̀ слꙋжи́ти. Тѣ́мже, ꙗ҆́кѡ и҆ща́й сла́вы є҆ди́нагѡ бг҃а, прише́лъ є҆сѝ на го́рꙋ хꙋ́тынскꙋю, свы́ше тебѣ̀ лꙋче́мъ бжⷭ҇твеннагѡ свѣ́та ᲂу҆каза́ннꙋю, да та́мѡ въ ми́рѣ є҆ди́номꙋ гдⷭ҇ꙋ рабо́таеши. Мы́ же, дивѧ́щесѧ пречꙋ́дномꙋ семꙋ̀ ᲂу҆каза́нїю, ра́достнѡ зове́мъ тѝ такова̑ѧ:

Ра́дꙋйсѧ, презрѣ́вый сла́вꙋ человѣ́ческꙋю, ꙗ҆́кѡ сꙋ́етнꙋю: ра́дꙋйсѧ, воспрїѧ́вый ст҃о́е смире́нїе і҆и҃сово.

Ра́дꙋйсѧ, бл҃года́тїю бж҃їею води́мый, ꙗ҆́кѡ є҆ди́нъ ѿ дре́внихъ патрїа́рхѡвъ: ра́дꙋйсѧ, ѡ҆ст҃и́вый го́рꙋ хꙋ́тынскꙋю твои́мъ прише́ствїемъ.

Ра́дꙋйсѧ, лꙋ́чь ѻ҆́гненъ ви́дѣвый на не́й: ра́дꙋйсѧ, чрез̾ сїѐ прїѧ́вый ѿ гдⷭ҇а бл҃го́е и҆звѣще́нїе ѡ҆ мѣ́стѣ поко́ѧ твоегѡ̀.

Ра́дꙋйсѧ, зри́телю бжⷭ҇твенныхъ видѣ́нїй: ра́дꙋйсѧ, го́рлице пꙋстыннолюби́ваѧ, хꙋ́тынскꙋю де́брь ѡ҆гласи́вшаѧ пѣ́нїемъ сла́вы бж҃їѧ.

Ра́дꙋйсѧ, крі́не бл҃гоꙋха́ющїй въ пꙋсты́ни: ра́дꙋйсѧ, мл҃твъ бл҃гово́нное кади́ло.

Ра́дꙋйсѧ, ѱалмопѣ́нїѧ ѻ҆рга́не и҆зѧ́щный.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Спастѝ хотѧ́й дꙋ́шꙋ твою̀, ᲂу҆го́дниче бж҃їй, а҆́ще и҆ всемѣ́рнѡ бѣ́галъ є҆сѝ сла́вы, ꙗ҆́же ѿ человѣ̑къ: вѣ́рнѡ ѻ҆ба́че сло́во гдⷭ҇а, ꙗ҆́кѡ не мо́жетъ гра́дъ ᲂу҆кры́тисѧ верхꙋ̀ горы̀ стоѧ̀. Та́кѡ бо и҆ ѡ҆ твое́мъ пꙋсты́нномъ по́двизѣ ᲂу҆вѣ́дѣша вели́кагѡ нова́града лю́дїе, и҆ нача́ша бл҃гоговѣ́йнѡ приходи́ти къ тебѣ̀, просѧ̀ ᲂу҆ тебє̀ мл҃твъ, дꙋшеполе́зныхъ наставле́нїй и҆ бл҃гослове́нїѧ. Ты́ же всѣ́хъ съ любо́вїю прїе́млѧ, поꙋча́лъ є҆сѝ ѿ бжⷭ҇твеннагѡ писа́нїѧ є҆́же твори́ти за́пѡвѣди гдⷭ҇ни и҆ и҆мѣ́ти любо́вь нелицемѣ́рнꙋ. Мы́ же ᲂу҆блажа́юще тѧ̀ вопїе́мъ тѝ такова̑ѧ:

Ра́дꙋйсѧ, гра́де верхꙋ̀ горы̀ стоѧ́й и҆ не могі́й ᲂу҆кры́тисѧ: ра́дꙋйсѧ, свѣти́льниче, бжⷭ҇твеннымъ пла́менемъ возже́нный.

Ра́дꙋйсѧ, ѻ҆гневи́дный сто́лпе, наставлѧ́ѧй на пꙋ́ть сп҃се́нїѧ: ра́дꙋйсѧ, лꙋчеза́рный свѣти́льниче, вѣ̑рныѧ просвѣща́ѧй.

Ра́дꙋйсѧ, цвѣ́те дꙋхо́вный, бл҃года́тїю привлека́ѧй взо́ры дꙋшє́вныѧ къ тебѣ̀ приходѧ́щихъ: ра́дꙋйсѧ, пчело̀ трꙋдолюби́ваѧ, сѡ́ты добродѣ́телей въ насыще́нїе а҆́лчꙋщихъ съ собо́ю носѧ́щаѧ.

Ра́дꙋйсѧ, грѣ̑шныѧ на пꙋ́ть сп҃се́нїѧ направлѧ́ѧй: ра́дꙋйсѧ, скорбѧ́щыѧ сла́достїю слове́съ твои́хъ ᲂу҆тѣша́ѧй.

Ра́дꙋйсѧ, ю҆́ныѧ наставлѧ́ѧй: ра́дꙋйсѧ, ста̑рыѧ не сло́вомъ то́чїю, па́че житїе́мъ ᲂу҆крѣплѧ́ѧй.

Ра́дꙋйсѧ, притека́ющымъ къ тебѣ̀, те́плый мл҃твенниче и҆ бг҃овѣща́нный ᲂу҆чи́телю: ра́дꙋйсѧ, и҆ на́съ всѣ́хъ ѡ҆бремене́нныхъ грѣхи̑ мно́гими, въ любвѝ дрꙋ́гъ ко дрꙋ́гꙋ ди́вный наста́вниче.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Возсїѧ́въ ѿ вели́кагѡ нова́града, ѻ҆́тче на́шъ варлаа́ме, просвѣти́лъ є҆сѝ чꙋ́днымъ житїе́мъ твои́мъ го́рꙋ хꙋ́тынскꙋю, на не́йже и҆ ѻ҆би́тель и҆́нокѡмъ во сп҃се́нїе бж҃їимъ и҆зволе́нїемъ ᲂу҆стро́илъ є҆сѝ, и҆ цр҃ковь во и҆́мѧ преѡбраже́нїѧ гдⷭ҇нѧ созда́лъ є҆сѝ, и҆ сщ҃е́нства бл҃года́ть воспрїѧ́ти чрез̾ ст҃и́телѧ бж҃їѧ и҆ и҆гꙋ́меномъ созда́нныѧ тобо́ю ѻ҆би́тели ѿ негѡ̀ нарещи́сѧ не ᲂу҆клони́лсѧ є҆сѝ, а҆́ще и҆ тꙋжа́ше дх҃ъ тво́й, ᲂу҆жаса́ѧсѧ высоты̀ сеѧ̀. Мы́ же, прославлѧ́юще тѧ̀, любо́вїю вопїе́мъ тѝ:

Ра́дꙋйсѧ, во ᲂу҆дале́нїи ѿ мі́ра сꙋ́етнагѡ пꙋсты́ннꙋю ѻ҆би́тель ра́ди и҆́щꙋщихъ сп҃се́нїѧ до́брѣ ѡ҆снова́вый: ра́дꙋйсѧ, водвори́вшымсѧ въ не́й вели́кїй ᲂу҆чи́телю и҆ бг҃омꙋ́дрый наста́вниче.

Ра́дꙋйсѧ, бл҃гоговѣ́йный ѻ҆лтарѧ̀ гдⷭ҇нѧ слꙋжи́телю, ѡ҆ вѣ́рныхъ молѧ́йсѧ: ра́дꙋйсѧ, со мно́гимъ дерзнове́нїемъ ѡ҆ на́съ недосто́йныхъ ко гдⷭ҇ꙋ предста́тельствꙋющїй.

Ра́дꙋйсѧ, та́инъ бж҃їихъ и҆́стинный строи́телю: ра́дꙋйсѧ, слове́снагѡ ста́да твоегѡ̀ до́брый па́стырю.

Ра́дꙋйсѧ, предводи́телю бг҃омꙋ́дрый въ пꙋтѝ сп҃се́нїѧ: ра́дꙋйсѧ, вождю̀ до́блїй, мно́гихъ приведы́й ко сп҃се́нїю.

Ра́дꙋйсѧ, ст҃ы́ѧ во́ли бж҃їѧ и҆сполни́телю: ра́дꙋйсѧ, ѻ҆те́ческихъ преда́нїй ᲂу҆се́рдный храни́телю.

Ра́дꙋйсѧ, и҆́нокѡвъ бл҃гочести́выхъ похвало̀ и҆ ᲂу҆краше́нїе: ра́дꙋйсѧ, и҆ ѡ҆ на́съ грѣ́шныхъ сꙋдїѝ пра́веднагѡ ᲂу҆моле́нїе.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Ди́вное и҆ пресла́вное чꙋ́до показа̀ тобо́ю на землѝ всѣ́хъ чꙋде́съ творе́цъ и҆ влады́ка, є҆гда̀ премѣни́шасѧ є҆стества̀ ᲂу҆ста́вы: среди́ бо лѣ́та мра́зъ си́ленъ и҆ снѣ́гъ глꙋбо́къ ꙗ҆ви́стасѧ въ предѣ́лѣхъ нова́града, є҆́же ты̀ предре́клъ є҆сѝ ѻ҆́номꙋ ст҃и́телю. ст҃и́тель бж҃їй и҆ лю́дїе нова́града смꙋти́шасѧ тогда̀ ѕѣлѡ̀, боѧ́хꙋбосѧ, ꙗ҆́кѡ гла́дъ ве́лїй наста́нетъ въ странѣ̀ и҆́хъ. Е҆гда́ же ᲂу҆слы́шаша ѿ тебє̀ и҆зволе́нїе бж҃їе, ꙗ҆вле́нное въ ви́димомъ и҆ бл҃го́е промышле́нїе ѡ҆ лю́дехъ свои́хъ, ра́дости и҆спо́лнишасѧ и҆ возбл҃годари́ша бг҃а ди́внагѡ во ст҃ы́хъ свои́хъ. Мы́ же, дивѧ́щесѧ си́лѣ бж҃їей, ѡ҆бита́ющей въ тебѣ̀ и҆ помина́юще ско́рое твоѐ застꙋпле́нїе, со ᲂу҆миле́нїемъ покланѧ́емсѧ тебѣ̀, ꙗ҆́кѡ ве́лїе дерзнове́нїе и҆мꙋ́щемꙋ пред̾ гдⷭ҇емъ и҆ бл҃года́рственнѡ вопїе́мъ:

Ра́дꙋйсѧ, въ мі́ре премі́рнымъ ꙗ҆ви́выйсѧ: ра́дꙋйсѧ, странꙋ̀ новагра́дскꙋю ᲂу҆диви́вый чꙋдєсы̀.

Ра́дꙋйсѧ, и҆́мже ѡ҆ си́лѣ бж҃їей є҆стества̀ ᲂу҆ста́вы премѣни́шасѧ: ра́дꙋйсѧ, и҆́мже лю́дїе нова́града ѿ гла́да и҆зба́вишасѧ.

Ра́дꙋйсѧ, дѣ́лателю чꙋде́съ пресла́вныхъ: ра́дꙋйсѧ, хода́таю и҆ пода́телю дарова́нїй многоѡбра́зныхъ.

Ра́дꙋйсѧ, мнѡ́гїѧ ѿ тѧ́жкихъ напа́стей и҆ скорбе́й и҆зба́вивый: ра́дꙋйсѧ, ско́рый помо́щниче всѣ́хъ въ бѣда́хъ сꙋ́щихъ.

Ра́дꙋйсѧ, нова́града красото̀ и҆ ᲂу҆твержде́нїе: ра́дꙋйсѧ, горы̀ хꙋ́тынскїѧ сла́во и҆ похвале́нїе.

Ра́дꙋйсѧ, промышле́нїе ѡ҆ лю́дехъ бл҃го́е прїѧ́телище: ра́дꙋйсѧ, и҆ на́съ грѣ́шныхъ прибѣга́ющихъ под̾ кро́въ тво́й, неꙋсы́пный застꙋ́пниче.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Ве́сь є҆сѝ съ вѣ́рою къ тебѣ̀ притека́ющымъ вои́стиннꙋ помо́щникъ вели́кїй, ᲂу҆го́дниче бж҃їй варлаа́ме. не то́чїю прибѣга́ющымъ къ цѣльбонѡ́снымъ моще́мъ твои̑мъ, но и҆ дале́че ѿстоѧ́щымъ и҆ призыва́ющымъ всечестно́е и҆́мѧ твоѐ. Тѣ́мже во ᲂу҆миле́нїи зове́мъ тѝ, ꙗ҆́кѡ вои́стиннꙋ досто́йномꙋ бл҃гохвале́нїй:

Ра́дꙋйсѧ, ᲂу҆тѣше́нїе скорбѧ́ми жите́йскими ᲂу҆тесне́нныхъ: ра́дꙋйсѧ, весе́лїе въ печа́лехъ сꙋ́щихъ.

Ра́дꙋйсѧ, ѕлостра́ждꙋщихъ ѿ дꙋхѡ́въ ѕло́бы ско́рый помо́щниче и҆ и҆зба́вителю: ра́дꙋйсѧ, ꙗ҆́же никто́же съ вѣ́рою притека́ѧй, то́щь ѿхо́дитъ ѿ тебє̀.

Ра́дꙋйсѧ, ꙗ҆́кѡ сꙋ́щымъ въ пꙋчи́нѣ скорбе́й до́бръ ѡ҆брѣта́ешисѧ ко́рмчїй: ра́дꙋйсѧ, ꙗ҆́кѡ ми́лостивый при жи́зни, бл҃готвори́ши всѣ̑мъ тре́бꙋющымъ и҆ по сме́рти.

Ра́дꙋйсѧ, пла́вающихъ ле́гкое по вода́мъ прехожде́нїе: ра́дꙋйсѧ, пꙋтеше́ствꙋющихъ до́брый пꙋтеводи́телю.

Ра́дꙋйсѧ, си́льный вдови́цъ покрови́телю: ра́дꙋйсѧ, сирѡ́тъ милосе́рдый и҆ бл҃гопопечи́тельный храни́телю.

Ра́дꙋйсѧ, а҆́лчꙋщихъ любвеѻби́льный пита́телю: ра́дꙋйсѧ, всѣ́хъ безпомо́щныхъ вѣ́рный пред̾ гдⷭ҇емъ хода́таю.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Вѣті́йствꙋющїй ѧ҆зы́къ недоꙋмѣ́етъ досто́йнѡ воспѣ́ти твоѧ̀ по́двиги и҆ трꙋды̀, благі́й ра́бе бж҃їй, ꙗ҆́же поне́слъ є҆сѝ любвѐ ра́ди и҆ сп҃се́нїѧ дꙋ́шъ при́сныхъ твои́хъ: ꙗ҆ви́лсѧ бо є҆сѝ проповѣ́дникъ воздержа́нїѧ и҆ терпѣ́нїѧ и҆́нокѡмъ пꙋстыннолюби̑вымъ и҆ всѣ̑мъ ᲂу҆чи́тель мꙋ́дрый, наставлѧ́ѧй на пꙋ́ть сп҃се́нїѧ. Мы́ же, чꙋдѧ́щесѧ высотѣ̀ и҆ си́лѣ твоеѧ̀ добродѣ́тели, занѐ ви́димъ плоды̀ є҆ѧ̀ въ твои́хъ ᲂу҆ченика́хъ и҆ сподви́жникахъ а҆нтѡ́нїѣ, ѯенофѡ́нтѣ, косьмѣ̀ и҆ кѡнстанті́нѣ, ᲂу҆жѐ просла́вленныхъ вмѣ́стѣ съ тобо́ю во црⷭ҇твїи ѻ҆ц҃а̀ нбⷭ҇нагѡ, любо́вїю прославлѧ́емъ тѧ̀ си́це:

Ра́дꙋйсѧ, трꙋдолю́бче, тече́нїе жи́зни твоеѧ̀ въ вели́кихъ по́двигахъ соверши́вый: ра́дꙋйсѧ, терпѣ́нїю хрⷭ҇то́вꙋ вѣ́рнѡ подража́вый.

Ра́дꙋйсѧ, свѣ́томъ добродѣ́телей твои́хъ бг҃а просла́вивый: ра́дꙋйсѧ, сѣ́мѧ до́брое, на землѝ бла́зѣ посѣ́ѧнное и҆ стори́чный пло́дъ прине́сшее.

Ра́дꙋйсѧ, свѣти́ло бл҃гоче́стїѧ немерца́ющее: ра́дꙋйсѧ, ѕвѣздо̀ ко сп҃се́нїю пꙋ́ть вѣ́рнымъ показꙋ́ющаѧ.

Ра́дꙋйсѧ, не сло́вомъ то́чїю, но па́че житїе́мъ поꙋча́ѧй: ра́дꙋйсѧ, и҆́нокѡмъ пꙋ́ть и҆́стинный ко сп҃се́нїю показа́вый.

Ра́дꙋйсѧ, по́стничества и҆ терпѣ́нїѧ ѻ҆́бразъ преди́вный: ра́дꙋйсѧ, воздержа́нїѧ ᲂу҆чи́телю.

Ра́дꙋйсѧ, за́повѣдей хрⷭ҇то́выхъ вѣ́рный и҆сполни́телю: ра́дꙋйсѧ, и҆ всѣ́хъ на́съ въ любвѝ къ при̑снымъ ди́вный наста́вниче.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Цр҃ѧ̀ нбⷭ҇наго возлюби́въ всѣ́мъ се́рдцемъ твои́мъ и҆ все́ю дꙋше́ю твое́ю и҆ все́ю мы́слїю твое́ю, до конца̀ жи́зни твоеѧ̀ въ терпѣ́нїи и҆ по́двизѣ неѡсла́бнѡ пребы́лъ є҆сѝ, и҆ є҆гда̀ дости́гнꙋвъ въ мѣ́рꙋ во́зраста и҆ въ мꙋ́жа соверше́нна, позна́лъ приближе́нїе вре́мени, нꙋ́жнагѡ человѣ́кꙋ и҆змѣне́нїѧ, во є҆́же тлѣ́нномꙋ наслѣ́довати ѻ҆бѣтова́нное безсме́ртїе, тогда̀ завѣща́лъ є҆сѝ ᲂу҆ченикѡ́мъ твои́мъ всѧ̑ потрє́бнаѧ ко спасе́нїю, наста́вника же въ себє̀ мѣ́сто а҆нтѡ́нїа сподви́жника твоегѡ̀ ѡ҆ста́вилъ є҆сѝ, є҆мꙋ́же и҆ ѡ҆би́тель ст҃ꙋ́ю врꙋчи́лъ є҆сѝ и҆ бра́тїю: та́же бл҃гослови́въ всѣ́хъ, пре́далъ є҆сѝ ст҃ꙋ́ю дꙋ́шꙋ твою̀ въ рꙋ́цѣ бж҃їи. Мы́ же, помина́юще сїѧ̀, и҆з̾ глꙋбины̀ серде́цъ вопїе́мъ тѝ такова̑ѧ:

Ра́дꙋйсѧ, и҆́скреннюю любо́вь къ бг҃ꙋ въ дꙋшѐ и҆ се́рдце непреста́ннѡ и҆мѣ́вый: ра́дꙋйсѧ, то́юже любо́вїю къ дꙋхѡ́внымъ ча́дамъ твои́мъ, при ѿше́ствїи и҆спо́лненный.

Ра́дꙋйсѧ, стра́хъ бж҃їй въ се́рдцѣ вы́нꙋ сохрани́вый: ра́дꙋйсѧ, є҆ди́номꙋ гдⷭ҇ꙋ до конца̀ послꙋжи́вый.

Ра́дꙋйсѧ, бл҃гоче́стнѡ тече́нїе вре́менныѧ жи́зни сконча́вый: ра́дꙋйсѧ, кончи́нꙋ свою̀ пред̾ꙋвѣ́дѣвый.

Ра́дꙋйсѧ, ꙗ҆́кѡ съ тве́рдымъ надѣ́ѧнїемъ бла́гъ вѣ́чныхъ преста́вилсѧ є҆сѝ къ бг҃ꙋ: ра́дꙋйсѧ, ꙗ҆́кѡ цр҃ь ца́рствꙋющихъ прїѧ́лъ тѧ̀ въ нбⷭ҇ное црⷭ҇твїе.

Ра́дꙋйсѧ, ꙗ҆́кѡ ст҃остїю житїѧ̀ ми́лость бж҃їю ѡ҆брѣ́лъ є҆сѝ: ра́дꙋйсѧ, ра́бе бл҃гі́й и҆ вѣ́рный вше́дый въ ра́дость гдⷭ҇а твоегѡ̀.

Ра́дꙋйсѧ, ꙗ҆́кѡ ѿ ѡ҆би́тели земны́ѧ въ ѡ҆би́тель нбⷭ҇нꙋю пресели́лсѧ є҆сѝ: ра́дꙋйсѧ, ꙗ҆́кѡ съ нбⷭ҇ныхъ высѡ́тъ на мѡльбы̀ на́шѧ ми́лостивнѡ призира́еши.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Свѣтоза́рное свѣти́ло, на хꙋ́тынской горѣ̀ возсїѧ́вшее, и҆ по честнѣ́мъ ᲂу҆спе́нїи твое́мъ зри́мъ тѧ̀, бг҃омꙋ́дре ѻ҆́ч҃е варлаа́ме, занѐ и҆ ны́нѣ свѣ́тиши на́мъ зна́мєнїи и҆ чꙋдесы̀, ѿ ст҃ы́хъ моще́й твои́хъ и҆стека́ющими, ꙗ҆̀же и҆зволе́нїемъ бж҃їимъ землѧ̀ ꙗ҆вѝ ст҃и́телю є҆ѵфѵ́мїю и҆ бы́вшымъ во хра́мѣ съ ни́мъ и҆гꙋ́менꙋ тара́сїю, ѵ҆подїа́конꙋ і҆ѡа́ннꙋ, ꙗ҆́кѡ многоцѣ́нное и҆ бл҃года́ти и҆спо́лненное сокро́вище. Тѣ́мже и҆ мы̀, бл҃года́рствєннаѧ бг҃ꙋ приносѧ̀ ѡ҆ тебѣ̀ пѣ̑нїѧ, взыва́емъ къ тебѣ̀ си́це:

Ра́дꙋйсѧ, нетлѣ́нїемъ моще́й твои́хъ сла́внѡ ѿ бг҃а возвели́ченный: ра́дꙋйсѧ, ѿ моще́й твои́хъ и҆сцѣлє́нїѧ недꙋ́гѡвъ бл҃года́тїю бж҃їей и҆сточа́ѧй.

Ра́дꙋйсѧ, ча́ше, и҆злива́ющаѧ то́ки милосе́рдїѧ бж҃їѧ: ра́дꙋйсѧ, чꙋде́съ пꙋчи́но, свы́ше и҆злїѧ́ннаѧ.

Ра́дꙋйсѧ, пре́жде сме́рти ꙗ҆ви́вый ди̑внаѧ: ра́дꙋйсѧ, и҆ по ᲂу҆спе́нїи соверша́ѧй чꙋ̑днаѧ.

Ра́дꙋйсѧ, ꙗ҆́кѡ и҆ по сме́рти жи́въ пребыва́еши, ꙗ҆влѧ́ѧ въ себѣ̀ си̑лы бж҃є́ственныѧ: ра́дꙋйсѧ, ꙗ҆́кѡ мл҃твеннѡ тѧ̀ призыва́ющыѧ, ско́рѡ посѣща́еши.

Ра́дꙋйсѧ, немощны́хъ цѣли́телю: ра́дꙋйсѧ, ско́рбныхъ ᲂу҆тѣ́шителю.

Ра́дꙋйсѧ, ꙗ҆́кѡ и҆ по преставле́нїи твое́мъ при́снѡ съ на́ми пребыва́еши: ра́дꙋйсѧ, ꙗ҆́кѡ и҆ живѧ̀ въ селе́нїихъ ра́йскихъ на́съ не ѡ҆ставлѧ́еши.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.

Ди́венъ показа́лсѧ є҆сѝ ᲂу҆ченикѡ́мъ твои́мъ, є҆гда̀ є҆ди́нагѡ ѿ ѡ҆сꙋжде́нныхъ, никомꙋ́ же тѧ̀ молѧ́щꙋ, ѿ ка́зни сме́ртныѧ свободи́лъ є҆сѝ, дрꙋга́гѡ же и҆ мнѡ́гимъ тѧ̀ ѡ҆ не́мъ просѧ́щымъ ѿ сме́рти и҆зба́вити не восхотѣ́лъ є҆сѝ. Мы́ же не дерза́емъ и҆спы́тывати сокровє́ннаѧ сꙋде́бъ бж҃їихъ та̑йны, но со стра́хомъ къ тебѣ̀ взыва́емъ:

Ра́дꙋйсѧ, таи́нниче вели́кїй, бж҃їѧ бл҃года́ти: ра́дꙋйсѧ, защи́тниче ѿ бѣ́дъ и҆ сме́рти непови̑нныѧ.

Ра́дꙋйсѧ, свѧще́нный ᲂу҆́ме, постига́ѧй бж҃є́ственныѧ та̑йны: ра́дꙋйсѧ, ра́зꙋме просвѣще́нный свѣ́томъ го́рнїѧ сла́вы.

Ра́дꙋйсѧ, дꙋ́ше, ѡ҆свѧще́нный бл҃года́тїю бж҃їею: ра́дꙋйсѧ, се́рдцемъ ѡ҆чище́ннымъ зрѧ́й непостижи̑мыѧ бж҃їѧ сꙋдьбы̑.

Ра́дꙋйсѧ, внꙋ́трєннѧѧ се́рдца и҆спытꙋ́ѧй: ра́дꙋйсѧ, прозрѣва́ѧй сокровє́нныѧ мы̑сли.

Ра́дꙋйсѧ, свѣ́тлый ᲂу҆́ме ѡ҆заре́нный невече́рнимъ свѣ́томъ: ра́дꙋйсѧ, чи́стый дꙋше́ю, просвѣтле́нный со́лнцемъ пра́вды.

Ра́дꙋйсѧ, варлаа́ме вели́кїй и҆ пресла́вный чꙋдотво́рче.