Канон Архистратигу Михаилу и прочим силам безплотным

Вси́ воспои́м, ве́рнии, вся́ управля́ющую невеще́ственныя го́рних лико́в чинонача́лия, Тро́ицу несозда́нную: Свя́т, Свя́т, Свя́т еси́, вопию́ще, Бо́же Вседержи́телю.

Положи́л еси́ тва́рей нача́ло, существо́ безпло́тное, Тво́рче а́нгелов, пречи́стый Тво́й престо́л окружа́ющее, зва́ти Тебе́: Свя́т, Свя́т, Свя́т еси́, Бо́же Вседержи́телю.

Ра́дуйся, Гаврии́ле, тайнови́дче Бо́жия воплоще́ния, Михаи́ле же, чино́в невеще́ственных первостоя́телю, непреста́нно зову́ще: Свя́т, Свя́т, Свя́т еси́, Бо́же Вседержи́телю.

Кре́постию поста́вил еси́, Безсме́ртне, си́льныя, соверша́ющия всесвяту́ю Твою́ во́лю, Тебе́ в вы́шних всегда́ предстоя́щия.

Таи́нники Твоего́ вочелове́чения и честна́го воста́ния, а́нгельския чинонача́льники, Христе́, за ны́ приими́ моля́щияся.

А́нгелы приста́вил еси́ храни́тели челове́ком, я́ко Благоутро́бен, служи́тели же показа́л еси́, Христе́, спасе́ния Твои́х уго́дников.

Все́л еси́ на а́нгелы, я́коже на ко́ни, Человеколю́бче, и прия́л еси́ руко́ю Твое́ю брозды́ и́х, и спасе́ние бы́сть ежде́ние Твое́ непреста́нно вопию́щим: сла́ва си́ле Твое́й, Го́споди.

Покрыва́ет а́нгелы доброде́тель Твоя́, Человеколю́бче, и земли́ исполня́ет концы́ Твоего́ сла́внаго, Безнача́льне, Боже́ственнаго хвале́ния, с ни́ми Тебе́ вопию́щи: сла́ва си́ле Твое́й, Го́споди.

Изше́л еси́, Ще́дре, на спасе́ние люде́й Твои́х, Христе́, созыва́еши же дру́ги — си́лы Твоя́, и весе́лие бы́сть прише́ствие Твое́ ве́рно Тебе́ вопию́щим: сла́ва си́ле Твое́й, Го́споди.

Невозвра́тным жела́нием при́сно к высоте́, к Тебе́, Христе́, носи́ми, кра́йнейшему все́х жела́ний, а́нгельския си́лы непреста́нно Тя́ сла́вят.

Ты́ у́мныя по существу́, нетле́нныя благода́тию Твое́ю, Христе́, устро́ил еси́ песнопе́вцы Твоего́ вели́чества, а́нгелы Твоя́ по о́бразу соде́лав, Непостижи́ме.

Ты́ непрекло́нны на го́ршее к Тебе́ приближе́нием, Христе́, сохрани́л еси́ Твоя́ слуги́, исто́чник бо бла́гости Ты́ еси́, благотвори́ши досто́йно Тебе́ служа́щия.

Благоле́пне от не су́щих, Го́споди, сло́вом Твои́м приве́л еси́ существа́ небе́сных безсме́ртных во́инств, светови́дны ты́я соде́ловая.

Таи́нницы честни́и Бо́жия хвале́ния бы́сте, безпло́тнии, гра́ждане небе́сныя и Боже́ственныя и́стинно ски́нии, Творцу́ досто́йно служа́ще.

Безпло́тных чи́ни у́мнии Тя́, Сы́не Бо́жий пребезнача́льный, хва́лят непреста́нно и славосло́вят, я́ко Творца́ и Созда́теля вся́ческих.

Све́ты яви́л еси́, Ще́дре, а́нгелов Твои́х невеще́ственное существо́, неизрече́ннаго све́та исполня́еми непреста́нно, — благослове́н еси́, — зову́щия, — Бо́же, во ве́ки.

Ему́же предстоя́т непреста́нно, служа́ще, тмы́ а́нгелов, Лица́ же зре́ти не терпя́т зре́ния, — благослове́н еси́, — зову́ще, — Го́споди Бо́же, во ве́ки.

Сло́вом Твои́м Ипоста́сным а́нгельское естество́ соде́лал еси́, освяти́в же Боже́ственным Ду́хом, Тро́ицу богосло́вити научи́л еси́, Бо́же, во ве́ки.

А́нгельскому поревну́им житию́, и мы́сли впери́м к высоте́, и с ни́ми невеще́ственно воспои́м Го́спода, пою́ще и превознося́ще во вся́ ве́ки.

Лико́вственницы ликова́ния небе́снии, престо́л обстоя́ще сла́вы, о́крест Бо́га же всегда́ обраща́ющеся, а́нгели пою́т и превозно́сят Его́ во вся́ ве́ки.

Невеще́ственнаго огня́ творя́щей пла́мень, на высоте́ непреста́нно служа́щия, и а́нгелы ду́хи явля́ющей, Тро́ице покланя́емся и славосло́вим во вся́ ве́ки.

Тя́, неизрече́нно соедини́вшаго небе́сным, Христе́, земна́я и еди́ну Це́рковь соверши́вша а́нгелов и челове́ков, непреста́нно велича́ем.

А́нгели же и арха́нгели, престо́ли, вла́сти и госпо́дства, нача́ла же и си́лы, херуви́ми и серафи́ми, с Богоро́дицею о ми́ре моли́теся.

Все́х предста́телие показу́ющиися, Михаи́л с Гаврии́лом, посети́те от любве́ чту́щия всепра́зднственную па́мять ва́шу и ве́рно воспева́ющия: спаса́йте от вся́каго обстоя́ния.

Всѝ воспои́мъ вѣ́рнїи, всѧ̑ ᲂу҆правлѧ́ющꙋю невеще́ствєнныѧ го́рнихъ ликѡ́въ чинонача̑лїѧ, трⷪ҇цꙋ несозда́ннꙋю: ст҃ъ, ст҃ъ, ст҃ъ є҆сѝ, вопїю́ще, бж҃е вседержи́телю.

Положи́лъ є҆сѝ тва́рей нача́ло, сꙋщество̀ безпло́тное, тво́рче а҆́гг҃лѡвъ, пречⷭ҇тый тво́й прⷭ҇то́лъ ѡ҆крꙋжа́ющее, зва́ти тебѣ̀: ст҃ъ, ст҃ъ, ст҃ъ є҆сѝ, бж҃е вседержи́телю.

Ра́дꙋйсѧ гаврїи́ле, тайнови́дче бж҃їѧ воплоще́нїѧ, мїхаи́ле же, чинѡ́въ невеще́ственныхъ первостоѧ́телю, непреста́ннѡ зовꙋ́ще: ст҃ъ, ст҃ъ, ст҃ъ є҆сѝ, бж҃е вседержи́телю.

Крѣ́постїю поста́вилъ є҆сѝ, безсме́ртне, си̑льныѧ, соверша́ющыѧ всест҃ꙋ́ю твою̀ во́лю, тебѣ̀ въ вы́шнихъ всегда̀ предстоѧ́щыѧ.

Таи́нники твоегѡ̀ вочл҃вѣ́ченїѧ, и҆ чтⷭ҇на́гѡ воста́нїѧ, а҆́гг҃льскїѧ чинонача́льники, хрⷭ҇тѐ, за ны̀ прїимѝ молѧ́щыѧсѧ.

А҆́гг҃лы приста́вилъ є҆сѝ храни́тели человѣ́кѡмъ, ꙗ҆́кѡ бл҃гоꙋтро́бенъ: слꙋжи́тели же показа́лъ є҆сѝ, хрⷭ҇тѐ, сп҃се́нїѧ твои́хъ ᲂу҆го́дникѡвъ.

Всѣ́лъ є҆сѝ на а҆́гг҃лы ꙗ҆́коже на ко́ни чл҃вѣколю́бче, и҆ прїѧ́лъ є҆сѝ рꙋко́ю твое́ю брозды̑ и҆́хъ, и҆ сп҃се́нїе бы́сть ѣ҆жде́нїе твоѐ, непреста́ннѡ вопїю́щымъ: сла́ва си́лѣ твое́й, гдⷭ҇и.

Покрыва́етъ а҆́гг҃лы добродѣ́тель твоѧ̀, чл҃вѣколю́бче, и҆ землѝ и҆сполнѧ́етъ концы̀ твоегѡ̀ сла́внагѡ, безнача́льне, бж҃е́ственнагѡ хвале́нїѧ, съ ни́ми тебѣ̀ вопїю́щыѧ: сла́ва си́лѣ твое́й, гдⷭ҇и.

И҆зше́лъ є҆сѝ, ще́дре, на сп҃се́нїе люде́й твои́хъ, хрⷭ҇тѐ, созыва́еши же дрꙋ́ги а҆пⷭ҇лы твоѧ̑, и҆ весе́лїе бы́сть прише́ствїе твоѐ, вѣ́рнѡ тебѣ̀ вопїю́щымъ: сла́ва си́лѣ твое́й, гдⷭ҇и.

Невозвра́тнымъ жела́нїемъ при́снѡ къ высотѣ̀, къ тебѣ̀, хрⷭ҇тѐ, носи́ми, кра́йнѣйшемꙋ всѣ́хъ жела́нїй, а҆́гг҃льскїѧ си̑лы непреста́ннѡ тѧ̀ сла́вѧтъ.

Ты̀ ᲂу҆́мныѧ по сꙋществꙋ̀, нетлѣ̑нныѧ бл҃года́тїю твое́ю, хрⷭ҇тѐ, ᲂу҆стро́илъ є҆сѝ пѣснопѣ́вцы твоегѡ̀ вели́чества, а҆́гг҃лы твоѧ̑, по ѡ҆́бразꙋ содѣ́лавъ, непостижи́ме.

Ты̀ непрекло́нны на го́ршее, къ тебѣ̀ приближе́нїемъ, хрⷭ҇тѐ, сохрани́лъ є҆сѝ твоѧ̑ слꙋги̑: и҆сто́чникъ бо бл҃гости ты̀ є҆сѝ, бл҃готвори́ши досто́йнѡ тебѣ̀ слꙋжа́щыѧ.

Бг҃олѣ́пнѣ ѿ не сꙋ́щихъ гдⷭ҇и, сло́вомъ твои́мъ приве́лъ є҆сѝ сꙋщєства̀ нбⷭ҇ныхъ безсме́ртныхъ во́инствъ, свѣтови́дны ты̑ѧ содѣ́ловаѧ.

Таи̑нницы чтⷭ҇ні́и бж҃їѧ хвале́нїѧ бы́сте безпло́тнїи, гра́ждане нбⷭ҇ныѧ и҆ бж҃е́ственныѧ и҆́стиннѡ ски́нїи, творцꙋ̀ досто́йнѡ слꙋжа́ще.

Безпло́тныхъ чи́ни ᲂу҆́мнїи, тѧ̀ сн҃е бж҃їй пребезнача́льный, хва́лѧтъ непреста́ннѡ, и҆ славосло́вѧтъ, ꙗ҆́кѡ творца̀ и҆ созда́телѧ всѧ́ческихъ.

Свѣ́ты ꙗ҆ви́лъ є҆сѝ, ще́дре, а҆́гг҃лѡвъ твои́хъ невеще́ственное сꙋщество̀, неизрече́ннагѡ свѣ́та и҆сполнѧ́еми непреста́ннѡ, бл҃гослове́нъ є҆сѝ, зовꙋ́щыѧ, бж҃е во вѣ́ки.

Є҆мꙋ́же предстоѧ́тъ непреста́ннѡ, слꙋжа́ще тьмы̑ а҆́гг҃лѡвъ, лица́ же зрѣ́ти не терпѧ́тъ зрѣ́нїѧ, бл҃гослове́нъ є҆сѝ, зовꙋ́ще, гдⷭ҇и бж҃е, во вѣ́ки.

Сло́вомъ твои́мъ ѵ҆поста́снымъ а҆́гг҃льское є҆стество̀ содѣ́лалъ є҆сѝ: ѡ҆свѧти́въ же бж҃е́ственнымъ дх҃омъ, трⷪ҇цꙋ бг҃осло́вити наꙋчи́лъ є҆сѝ, бж҃е, во вѣ́ки.

А҆́гг҃льскомꙋ поревнꙋ́емъ житїю̀, и҆ мы́сли впери́мъ къ высотѣ̀: и҆ съ ни́ми невеще́ственнѡ воспои́мъ гдⷭ҇а, пою́ще и҆ превозносѧ́ще во всѧ̑ вѣ́ки.

Лико́вствєнницы ликова́нїѧ нбⷭ҇нїи, престо́лъ ѡ҆бстоѧ́ще сла́вы, ѻ҆́крестъ бг҃а же всегда̀ ѡ҆браща́ющесѧ, а҆́гг҃ли пою́тъ, и҆ превозно́сѧтъ є҆го̀ во всѧ̑ вѣ́ки.

Невеще́ственнагѡ ѻ҆гнѧ̀ творѧ́щей пла́мень, на высотѣ̀ непреста́ннѡ слꙋжа́щыѧ и҆ а҆́гг҃лы дх҃и ꙗ҆влѧ́ющей трⷪ҇цѣ покланѧ́емсѧ, и҆ славосло́вимъ во всѧ̑ вѣ́ки.

Тѧ̀ неизрече́ннѡ соедини́вшаго нбⷭ҇нымъ, хрⷭ҇тѐ, земна̑ѧ, и҆ є҆ди́нꙋ цр҃ковь соверши́вша а҆́гг҃лѡвъ и҆ человѣ́кѡвъ, непреста́ннѡ велича́емъ.

А҆́гг҃ли же и҆ а҆рха́гг҃ли, прⷭ҇то́ли, вла̑сти и҆ гдⷭ҇ьства, нача̑ла же и҆ си̑лы, херꙋві́ми и҆ серафі́ми, съ бцⷣею ѡ҆ мі́рѣ моли́тесѧ.

Всѣ́хъ предста́телїе показꙋ́ющїисѧ, мїхаи́лъ съ гаврїи́ломъ, посѣти́те ѿ любвѐ чтꙋ́щыѧ всепра́зднственнꙋю па́мѧть ва́шꙋ, и҆ вѣ́рнѡ воспѣва́ющыѧ: сп҃са́йте ѿ всѧ́кагѡ ѡ҆бстоѧ́нїѧ.