Канон святителю Нектарию, митрополиту Пентапольскому, Эгинскому чудотворцу

Любовию движимь, молю Содетеля Господа слово ми подати по достоянию воспети великаго в чудотворцех Нектария богомудраго.

Юдоль земнаго жития безпорочно прошел еси, отче досточудне, и с лики небесными водворился еси, отонюдуже посещаеши нас дивными чудесы.

Бурею носимь житейских треволнений, во Эгинстем острове пристанище обрел еси и дом Живоначальней Троице преукрашенный воздвигл еси.

Изнемогающих нас от стрел вражиих свободи заступлением твоим всемощным, скорый наш предстателю, Нектарие.

Просветився светом дел благих, богодухновенне, столп веры пламенеющий явился еси, Нектарие, уверяя малодушных сердца.

Разум Небесный стяжал еси, отче Нектарие, на земли пребывая, с Горними умом сожительствовал еси, воспевая сладце Триипостасному Владыце твоему.

Исцелений источник неоскудевающий явился еси, Нектарие блаженне, присно напаяяй нас милостию Божией и погашаяй пламень душегубных страстей.

Молитвенник теплейший и отец чадолюбивый явился еси, отче преподобне, покрывающий всех любовию твоею и до ныне нас милующий.

Избави притекающих к тебе и твоему образу благочестно покланяющихся от всякаго прилога диавольскаго и наследие в Царстве Живоначальныя Троицы получити сподоби.

Радость велию и сокровище многочудное Господь нам дарова, святыя мощи твоя, отче Нектарие блаженне, ихже любовию лобызающе, тя приснаго за нас ходатая прославляем.

Иноков и мирских наставник богопросвещенный явился еси, Нектарие чудне, и нас, тепле призывающих тя, настави на стезю заповедей и повелений Господних.

Назираеши с Превыспренних за обителию и стадом, еже собрал еси, блаженне отче, и николиже любовь твоя преста от нас. Сие добре ведуще, радуемся и прославляем дивнаго во святых Своих Господа.

Широкий путь погибельный возненавидев, отвратил еси плещи своя от мира, славу и честь земную презрев, Небесныя сладости наследник явился еси.

Еже паче ко спасению потребная возлюбил еси, отче прехвальне, осени благодатию твоею души наша, святе, очеса разума и сердца к свету Христовых дел приведи твоими молитвами.

Нетленное сокровище тя ведахом и море чудес, всеблаженне, яко из тебе изливается благодать, недуги исцеляющая и страсти угашающая.

Елеем благих дел украшенный светильник пресветлый сущим во тьме явился еси, отче всеблаженне, и целитель недугов миро врачевания источающий.

От славы твоея Небесныя призри на нас, любовию тя похваляющих, отче всесвященне, и потщися избавити нас от напастей и скорбей.

Тело твое многотрудное источник исцелений соделал Господь, труды и подвиги твоя прослави и имя твое превознесе, сего ради любовию тя ублажаем.

Единонравна пустыннолюбителем древним безмолвия рачителя тя Христос показа и единомудреннаго отцем Церкви столпа веры и благочестия блюстителя яви.

Исходатайствуй молитвами твоими, отче священне Нектарие, исправление навыков наших греховных, покаяние всецелое и радость о Христе Господе нашем.

Ликовствующе в памяти твоей, отче Нектарие богоблаженне, прославляем Спасителя нашего Господа, обновившаго и освятившаго естество наше, и Ему славословие приносим.

Изгнания, поношения, лишения многоразличныя и козни бесовския мужественне претерпел еси, отче добропобедне, выну хвалу возсылая Промыслителю Богу.

Наветов всяческих, болезней и душегибельнаго отчаяния нас свободи, Нектарие преподобне, и благодать Христову с Небесе низпосли, да непрестанно тя, заступника нашего, хвалим.

Отвергся мира и самаго себе, крест взял еси и за Христом последовал еси, и славу от Него получил еси, еяже и нас причастники быти сподоби, любовию почитающих тя, отче Нектарие чудне.