Кондак 1
Избра́ннии чудотво́рцы Христо́вы и святы́я ве́ры испове́дницы, Гу́рие, Само́не и Ави́ве добронра́внии, па́мять ва́шу чту́ще пе́сньми похва́льными, воспева́ем я́ко засту́пников христиа́н и покрови́телей стра́ждущих. Вы́ же, иму́ще дерзнове́ние ко Го́споду, от вся́ких бе́д и напа́стей свободи́те на́с, ве́рою и любо́вию зову́щих:
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Икос 1
А́нгели во пло́ти, Тро́ице Святе́й равночи́сленнии, любо́вию к Бо́гу горя́ще, и́долы попра́сте, ве́ру Христо́ву укрепи́сте, Тро́ицу Святу́ю просла́висте, те́мже похваля́юще по́двиги ва́ша, глаго́лем ва́м си́це:
Ра́дуйтеся, Зако́на Госпо́дня тепле́йшии храни́телие; ра́дуйтеся, Ева́нгельскаго уче́ния до́брии послу́шателие.
Ра́дуйтеся, свети́льницы благоче́стия; ра́дуйтеся, обличи́телие нече́стия.
Ра́дуйтеся, утвержде́ние ве́ры Христо́вы; ра́дуйтеся, столпи́ Це́ркве Бо́жия.
Ра́дуйтеся, ве́рных наде́ждо и заступле́ние; ра́дуйтеся, неве́рных устраше́ние и посрамле́ние.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 2
Ви́дяще нече́стие люде́й гра́да Эде́са, святи́и Гу́рий и Само́н в пусты́ню удали́шася, бе́гая ми́ра сего́ и собла́знов его́, и усе́рдно служа́ще Бо́гу, де́нь и но́щь воспева́ху: Аллилу́иа.
Икос 2
Ра́зум прему́др име́юще, святи́и му́ченицы, вы́ну труди́шася во сла́ву Бо́жию, язы́ческое нече́стие облича́юще, и́щущия и́стины на пу́ть пра́вый наставля́юще, и мно́ги неве́рныя к Бо́гу И́стинному привлеко́ша, сего́ ра́ди глаго́лем ва́м си́це:
Ра́дуйтеся, насади́телие и́стиннаго Богопочита́ния; ра́дуйтеся, искорени́телие де́монскаго служе́ния.
Ра́дуйтеся, тьмы́ нече́стия обличи́телие; ра́дуйтеся, и́дольския пре́лести низложи́телие.
Ра́дуйтеся, испове́дницы Христо́вы изря́днии; ра́дуйтеся, свети́ла ве́ры правосла́вныя.
Ра́дуйтеся, кри́ни благоуха́ннии рая́ превы́шняго; ра́дуйтеся, цве́ти прекра́снии вертогра́да Иису́сова.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 3
Си́лою свы́ше осене́ннии святи́и му́ченицы, гони́телей святы́я ве́ры не устраши́шася, веле́ния нечести́ваго Антониа́на небрего́ша и ве́ру Христо́ву велегла́сно просла́виша, те́мже и в темни́цу вве́ржени поя́ху Бо́гу: Аллилу́иа.
Икос 3
Иму́ще ве́ру во Христа́ адама́нта тверде́йшую и си́лою тоя́ вооружи́вшеся, му́жественно претерпе́ли есте́, святи́и му́ченицы, темни́чныя у́зы и са́мую сме́рть. Сего́ ра́ди похваля́юще таково́е му́жество, ублажа́ем ва́с си́це:
Ра́дуйтеся, и́стинныя ве́ры испове́дницы; ра́дуйтеся, Ца́рствия Бо́жия насле́дницы.
Ра́дуйтеся, Христа́ вседу́шне возлюби́вшии; ра́дуйтеся, за И́мя Его́ в темни́цу мра́чную вве́рженнии.
Ра́дуйтеся, му́чеников похвало́; ра́дуйтеся, страстоте́рпцев сла́во.
Ра́дуйтеся, Святы́я Це́ркве утвержде́ние; ра́дуйтеся, всего́ ро́да христиа́нскаго украше́ние.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 4
Бу́рею помышле́ний нече́стия одержи́мый, нечести́вый ца́рь Лики́ний воздви́же жесто́кое гоне́ние на христиа́ны, ты́ же, страстоте́рпче Ави́ве, того́ не убоя́вся, с тве́рдою ве́рою взыва́л еси́ Христу́ Бо́гу: Аллилу́иа.
Икос 4
Слы́шав ца́рь Лики́ний твоя́ по́двиги, досточу́дне Ави́ве, и твое́ тве́рдое ве́ры испове́дание, разъяри́ся на тя́ зло́бою и повеле́ преда́ти тя́ сме́рти лю́тей я́ко проти́вника царе́ва. Ты́ же, уве́дев о се́м, во́лею поте́кл еси́ на муче́ние, и с ра́достию претерпе́л еси́ о́гненное сожже́ние. Сего́ ра́ди, дивя́щеся вели́кому му́жеству твоему́, велича́ем тя́ си́це:
Ра́дуйся, побо́рниче ве́ры во Христа́ неустраши́мый; ра́дуйся, во́ине Христо́в непобеди́мый.
Ра́дуйся, пове́шенный на дре́ве за Распросте́ршаго ру́це Свои́ на Дре́ве Кре́стнем; ра́дуйся, стро́ганный коготьми́ желе́зными.
Ра́дуйся, ра́нами, я́ко у́тварьми многоце́нными, украше́нный; ра́дуйся, кро́вию твое́ю, я́ко багряни́цею, облече́нный.
Ра́дуйся, утеше́ние подава́яй скорбя́щим; ра́дуйся, ско́рый помо́щниче все́м за и́стину терпя́щим.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 5
Боготе́чней звезде́ на тве́рди небе́сней подо́бни бы́ли есте́, святи́и му́ченицы, луча́ми жития́ ва́шего тьму́ язы́ческаго нече́стия просвеща́ющии и мно́гих на пу́ть и́стины наставля́ющии. Те́мже благогове́йно чту́ще па́мять ва́шу, благода́рно пое́м Бо́гу: Аллилу́иа.
Икос 5
Ви́деша лю́дие гра́да Эде́са мно́гая чудеса́, быва́емая от ра́ки святы́х му́чеников Гу́рия, Само́на и Ави́ва, зело́ ра́довахуся и Го́спода все́м се́рдцем прославля́ху. Мы́ же, чту́ще святу́ю па́мять ва́шу, святи́и му́ченицы, уми́льно взыва́ем:
Ра́дуйтеся, непра́ведно гони́мых засту́пницы; ра́дуйтеся, ве́рных рабо́в Христо́вых дру́зи.
Ра́дуйтеся, су́щих во у́зах и темни́цах храни́телие; ра́дуйтеся, гони́телей и оби́дящих вразуми́телие.
Ра́дуйтеся, пла́чущих уте́шителие; ра́дуйтеся, от на́глыя и лю́тыя сме́рти изба́вителие.
Ра́дуйтеся, благода́тию чудотворе́ния от Го́спода обогаще́ннии; ра́дуйтеся, исцеле́ний всеблази́и пода́телие.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 6
С высоты́ му́дрии благода́ть прие́мше, за су́щих во искуше́нии предстоите́, всехва́льнии, те́мже отрокови́цу, святи́и, от сме́рти го́рькия изба́висте. Вы́ бо вои́стину есте́ гра́ду Эде́су сла́ва и ми́ру ра́дость, сего́ ра́ди воспева́ем ко Го́споду: Аллилу́иа.
Икос 6
Вра́жия рабо́ты изба́ви ны́, мо́лим Тя́, Иису́се Жизнода́вче, Твои́х страда́лец мольба́ми, да не порабоще́ни от страсте́й ду́шу и те́ло стяжа́вше, восхваля́ем те́х скоре́йшую по́мощь. Ти́и бо жену́, во гро́бе му́жем затворе́нную, ско́ро предвари́вше от сме́рти изба́виша. Сего́ ра́ди взыва́ем и́м си́це:
Ра́дуйтеся, неви́нную жену́ от лю́тыя сме́рти спа́сшии; ра́дуйтеся, зве́рства мучи́теля ди́вным спасе́нием ея́ победи́вшии.
Ра́дуйтеся, преступле́ния супру́жеския ве́рности гро́знии наказа́телие; ра́дуйтеся, же́н оста́вленных и зле́ обма́нутых защи́тницы.
Ра́дуйтеся, зла́го му́жа жесто́кое дея́ние обличи́вшии; ра́дуйтеся, и того́ ве́ровати в си́лу Бо́га христиа́нскаго научи́вшии.
Ра́дуйтеся, пода́телие ми́лости тоя́ тре́бующим; ра́дуйтеся, стра́жи неусы́пнии па́мять ва́шу почита́ющих.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 7
Хотя́й Человеколю́бец Госпо́дь яви́ти ми́лость лю́дем Свои́м, сохрани́ телеса́ ва́ша нетле́нна и чудоточа́ща, от ни́хже вси́ ве́рнии то́ки исцеле́ний получа́ют, зову́ще Бо́гу: Аллилу́иа.
Икос 7
Но́вых засту́пников и ди́вных чудотво́рцев ва́с ве́дуще, лю́дие из гра́да Эде́са святы́й хра́м в па́мять ва́шу созда́ша, в не́мже и мо́щи ва́ша положи́ша, да вси́ стра́ждущии по́мощь от ни́х, я́ко от оби́льна исто́чника, почерпа́ют. Та́кожде и мы́, тве́рду наде́жду на ва́с иму́ще, взыва́ем ва́м си́це:
Ра́дуйтеся, душе́вных и теле́сных неду́гов на́ших цели́телие; ра́дуйтеся, бесо́в о и́мени Госпо́дни изгони́телие.
Ра́дуйтеся, Ева́нгельския и́стины благовести́телие; ра́дуйтеся, Боже́ственныя благода́ти носи́телие.
Ра́дуйтеся, ско́рби мно́ги за и́мя Госпо́дне прие́мшии; ра́дуйтеся, ди́вно во святы́х Его́ просия́вшии.
Ра́дуйтеся, гра́да ва́шего Эде́са похвало́ и утвержде́ние; ра́дуйтеся, и всея́ вселе́нныя сла́во и похвале́ние.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 8
Стра́нно и стра́шно неве́рным слы́шати, какова́ ди́вная дела́ от святы́х моще́й ва́ших соверша́ются: неду́зи врачу́ются и стра́сти исцеля́ются. Мы́ же, тве́рду наде́жду на ва́с иму́ще, Бо́гу, о ва́с та́ко благоде́ющему, с ве́рою взыва́ем: Аллилу́иа.
Икос 8
Все́ми доброде́тельми испо́лненнии, за ня́же и сла́вою Бо́жиею почте́ннии, внима́йте, святи́и му́ченицы, моли́твам ве́рных, чту́щих святу́ю па́мять ва́шу, от ни́хже слы́шите сицева́я:
Ра́дуйтеся, ни́щии ду́хом, я́ко ва́ше е́сть Ца́рствие Небе́сное; ра́дуйтеся, пла́кавшии, я́ко уте́шистеся.
Ра́дуйтеся, кро́тции, я́ко насле́довасте зе́млю; ра́дуйтеся, алка́вшии и жа́ждавшии пра́вды, я́ко насы́тистеся.
Ра́дуйтеся, ми́лостивии, я́ко стяжа́ли есте́ поми́лование; ра́дуйтеся, чи́стии се́рдцем, я́ко Бо́га узре́сте.
Ра́дуйтеся, я́ко пред лице́м челове́ческим му́ку прия́ли есте́; ра́дуйтеся, я́ко упова́ние ва́ше безсме́ртия испо́лнено е́сть.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 9
Вся́кия напа́сти, находя́щия на гра́д Эде́с, разоря́ли есте́, святи́и му́ченицы, те́мже и ны́не не оста́вите на́с смире́нных и гре́шных, но вся́ лю́ди страны́ на́шея в правосла́вии и единомы́слии утверди́те, да вси́ еди́ными усты́ и еди́ным се́рдцем воскли́кнем просла́вльшему ва́с Го́споду: Аллилу́иа.
Икос 9
Вети́я многовеща́нныя, я́ко ры́бы безгла́сныя, зри́м о ва́с, святи́и му́ченицы: недоуме́ют бо, ка́ко в пусты́ни ду́хом вита́ли есте́ и посреде́ челове́к неусы́пными по́двиги подвиза́стеся. Мы́ же ра́дующеся, я́ко таковы́ и́мамы учи́тели и моли́твенники, прославля́ем ва́с, глаго́люще:
Ра́дуйтеся, кимва́ли Сло́ва Бо́жия; ра́дуйтеся, те́плии о на́с пред Бо́гом хода́таи.
Ра́дуйтеся, иуде́ев и е́ллинов просвети́телие; ра́дуйтеся, Триеди́наго Божества́ благовести́телие.
Ра́дуйтеся, кро́тости и воздержа́ния учи́телие; ра́дуйтеся, лжи́ и татьбы́ обличи́телие.
Ра́дуйтеся, Ца́рствия Христо́ва насле́дницы; ра́дуйтеся, ве́чныя блаже́нныя жи́зни соприча́стницы.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 10
Спасти́ хотя́ лю́ди гра́да Эде́са от мы́сленнаго во́лка, увещава́ли есте́ те́х тве́рдо стоя́ти во и́стинней ве́ре ниже́ ко́зней вра́жиих устраша́тися, но и в ско́рбех и напа́стех за вся́ благодари́ти Бо́га, пою́ще Ему́: Аллилу́иа.
Икос 10
Стена́ тверда́ и наде́жное прибе́жище есте́, святи́и му́ченицы, все́м к ва́м прибега́ющим и ско́рыя по́мощи тре́бующим, сего́ ра́ди во умиле́нии се́рдца на́шего взыва́ем:
Ра́дуйтеся, я́ко заре́ю Пресвята́го Ду́ха просвеще́ни бы́сте; ра́дуйтеся, я́ко стра́х малоду́шный от себе́ оттрясли́ есте́.
Ра́дуйтеся, все́х скорбя́щих ра́дование; ра́дуйтеся, все́х угнете́нных и порабоще́нных прибе́жище и освобожде́ние.
Ра́дуйтеся, вдо́в и сиро́т заступле́ние; ра́дуйтеся, от ересе́й и раско́лов огражде́ние.
Ра́дуйтеся, я́ко вси́ нечести́вии житию́ ва́шему удивля́ются; ра́дуйтеся, я́ко вси́ благочести́вии о и́мени ва́шем веселя́тся.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 11
Пе́ние благода́рственное принося́ще ко Го́споду о ва́с, те́плии засту́пницы на́ши, при́сно мо́лим ва́с не отступа́ти от на́с, гре́х на́ших ра́ди, но милосе́рдие от Го́спода на́м испроси́ти, вопию́щим Ему́: Аллилу́иа.
Икос 11
Светоза́рную тро́ицу святы́х му́чеников восхваля́юще, ве́рнии, устрани́мся ра́спрей и раздо́ров в жи́зни се́й, убежи́м несогла́сий и разделе́ний и храня́ще едине́ние ду́ха в сою́зе ми́ра, из глубины́ души́ воскли́кнем та́ко:
Ра́дуйтеся, громогла́сныя трубы́ Ева́нгельскаго благове́стия; ра́дуйтеся, сладкозву́чныя гу́сли про́поведи спасе́ния.
Ра́дуйтеся, кре́пции пра́вды рачи́телие; ра́дуйтеся, непоколеби́мии непра́вды истреби́телие.
Ра́дуйтеся, благочести́вым семе́йством ми́ра и бла́га пода́телие; ра́дуйтеся, целому́дренно живу́щим в бра́це незри́мии охрани́телие.
Ра́дуйтеся, жесто́ким и неве́рным супру́гом стро́гии наказа́телие; ра́дуйтеся, под кро́в сво́й все́х беззащи́тных ми́лостивне прие́млющии.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 12
Благода́ть, да́нную ва́м от Бо́га, ве́дуще, па́мять ва́шу пра́зднуем, святи́и му́ченицы, с усе́рдным моле́нием к ва́шему честно́му о́бразу притека́юще, ва́шею тве́рдою по́мощию, я́ко необори́мою стено́ю, огражда́емся, сего́ ра́ди восхваля́ем ва́с, страстоте́рпцы Христо́вы, и усе́рдно зове́м Бо́гу: Аллилу́иа.
Икос 12
Пою́ще ва́ше ди́вное житие́ и му́ченическую кончи́ну, мо́лим ва́с, страстоте́рпцы Христо́вы Гу́рие, Само́не и Ави́ве, бу́дите на́м во все́м блази́и помо́щницы, благослови́те на́с ми́ром и любо́вию, пода́йте на́м тве́рдую ве́ру, чистоту́ жи́зни и стра́х Бо́жий, да вси́ душе́вный поко́й иму́ще, в ра́дости восклица́ем:
Ра́дуйтеся, поко́й и отра́да скорбя́щим; ра́дуйтеся, стра́х и удивле́ние оби́дящим.
Ра́дуйтеся, неви́нную жену́ от лю́тыя сме́рти спа́сшии; ра́дуйтеся, зла́го му́жа ея́ досто́йно покара́вшии.
Ра́дуйтеся, за прелюбе́знаго ва́м Иису́са ду́ши своя́ положи́вшии; ра́дуйтеся, за пресла́дкое и́мя Его́ под ме́ч о́стрый главы́ своя́ подклони́вшии.
Ра́дуйтеся, многообра́зныя боле́зни за Царя́ Христа́ претерпе́вшии; ра́дуйтеся, Иерусали́ма го́рняго гра́ждане.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 13
О, святи́и страстоте́рпцы Христо́вы Гу́рие, Само́не и Ави́ве, приими́те сие́ на́ше хвале́бное пе́ние и, услы́шавше усе́рдное жела́ние на́ше, изба́вите на́с те́плым ва́шим к Бо́гу предста́тельством от вся́каго зла́, от вражды́ и несогла́сий и вся́ких лю́тых бе́д и боле́зней, да с любо́вию ва́с чту́ще, вы́ну зове́м Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгели во пло́ти, Тро́ице Святе́й равночи́сленнии, любо́вию к Бо́гу горя́ще, и́долы попра́сте, ве́ру Христо́ву укрепи́сте, Тро́ицу Святу́ю просла́висте, те́мже похваля́юще по́двиги ва́ша, глаго́лем ва́м си́це:
Ра́дуйтеся, Зако́на Госпо́дня тепле́йшии храни́телие; ра́дуйтеся, Ева́нгельскаго уче́ния до́брии послу́шателие.
Ра́дуйтеся, свети́льницы благоче́стия; ра́дуйтеся, обличи́телие нече́стия.
Ра́дуйтеся, утвержде́ние ве́ры Христо́вы; ра́дуйтеся, столпи́ Це́ркве Бо́жия.
Ра́дуйтеся, ве́рных наде́ждо и заступле́ние; ра́дуйтеся, неве́рных устраше́ние и посрамле́ние.
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Кондак 1
Избра́ннии чудотво́рцы Христо́вы и святы́я ве́ры испове́дницы, Гу́рие, Само́не и Ави́ве добронра́внии, па́мять ва́шу чту́ще пе́сньми похва́льными, воспева́ем я́ко засту́пников христиа́н и покрови́телей стра́ждущих. Вы́ же, иму́ще дерзнове́ние ко Го́споду, от вся́ких бе́д и напа́стей свободи́те на́с, ве́рою и любо́вию зову́щих:
Ра́дуйтеся, Гу́рие, Само́не и Ави́ве, страстоте́рпцы Христо́вы и оби́димых покрови́телие.
Молитвы
О, святи́и му́ченицы и испове́дницы Христо́вы Гу́рие, Само́не и Ави́ве, те́плии о на́с хода́таи и моли́твенницы пред Бо́гом! Во умиле́нии серде́ц на́ших, взира́юще на пречи́стый ва́ш о́браз, смире́нно мо́лим ва́с: услы́шите на́с, гре́шных и недосто́йных, су́щих в беда́х, ско́рбех и напа́стех, и презре́вше на́ша тя́жкая и безчи́сленная прегреше́ния, яви́те на́м свою́ вели́кую ми́лость, воздви́гните на́с из глубины́ грехо́вныя, просвети́те на́ш у́м, смягчи́те зло́е и окая́нное се́рдце, прекрати́те за́висть, вражду́ и раздо́ры, в на́с живу́щия. Осени́те на́с ми́ром, любо́вию и стра́хом Бо́жиим, умоли́те милосе́рдаго Го́спода, да покры́ет мно́жество грехо́в на́ших Свои́м неизрече́нным милосе́рдием, да соблюде́т Це́рковь Свою́ Святу́ю от неве́рия, ересе́й и раско́лов, да пода́ст стране́ на́шей ми́р, благоде́нствие, земли́ плодоро́дие, супру́гом любо́вь и согла́сие, ча́дом послуша́ние, оби́димым терпе́ние, оби́дящим стра́х Бо́жий, скорбя́щим благоду́шие, ра́дующимся воздержа́ние. Все́х же на́с да покры́ет Свое́ю всеси́льною десни́цею, и да изба́вит от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни, и от напра́сныя сме́рти. Да огради́т на́с ополче́нием святы́х Свои́х а́нгелов, во е́же изба́витися на́м по исхо́де на́шем из жития́ сего́ от ко́зней лука́ваго и та́йных возду́шных мыта́рств его́, и неосужде́нным предста́ти Престо́лу Го́спода Сла́вы, иде́же ли́цы святы́х А́нгел со все́ми святы́ми вы́ну сла́вят пресвято́е и великоле́пое и́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Конда́къ а҃
И҆збра́ннїи чꙋдотво́рцы хрⷭ҇тѡ́вы и҆ ст҃ы́ѧ вѣ́ры и҆сповѣ̑дницы, гꙋ́рїе, самѡ́не и҆ а҆ві́ве добронра́внїи, па́мѧть ва́шꙋ чтꙋ́ще пѣ́сньми похва́льными, воспѣва́емъ ꙗ҆́кѡ застꙋ́пникѡвъ хрⷭ҇тїа́нъ и҆ покрови́телей стра́ждꙋщихъ. Вы́ же и҆мꙋ́ще дерзнове́нїе ко гдⷭ҇ꙋ, ѿ всѧ́кихъ бѣ́дъ и҆ напа́стей свободи́те на́съ, вѣ́рою и҆ любо́вїю зовꙋ́щихъ:
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
І҆́косъ а҃
А҆́гг҃ли во пло́ти, трⷪ҇цѣ ст҃ѣ́й равночи́сленнїи, любо́вїю къ бг҃ꙋ горѧ́ще, і҆́дѡлы попра́сте, вѣ́рꙋ хрⷭ҇то́вꙋ ᲂу҆крѣпи́сте, трⷪ҇цꙋ ст҃ꙋ́ю просла́висте, тѣ́мже похвалѧ́юще по́двиги ва́шѧ, глаго́лемъ ва́мъ си́це:
Ра́дꙋйтесѧ, зако́на гдⷭ҇нѧ теплѣ́йшїи храни́телїе: ра́дꙋйтесѧ, є҆ѵⷢ҇льскагѡ ᲂу҆че́нїѧ до́брїи послꙋ́шателїе.
Ра́дꙋйтесѧ, свѣти́льницы бл҃гоче́стїѧ: ра́дꙋйтесѧ, ѡ҆бличи́телїе нече́стїѧ.
Ра́дꙋйтесѧ, ᲂу҆твержде́нїе вѣ́ры хрⷭ҇то́вы: ра́дꙋйтесѧ, столпѝ цр҃кве бж҃їѧ.
Ра́дꙋйтесѧ, вѣ́рныхъ наде́ждо и҆ застꙋпле́нїе: ра́дꙋйтесѧ, невѣ́рныхъ ᲂу҆страше́нїе и҆ посрамле́нїе.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ в҃
Ви́дѧще нече́стїе люде́й гра́да є҆де́са, ст҃і́и гꙋ́рїй и҆ самѡ́нъ въ пꙋсты́ню ᲂу҆дали́шасѧ, бѣ́гаѧ мі́ра сегѡ̀ и҆ собла́знѡвъ є҆гѡ̀, и҆ ᲂу҆се́рднѡ слꙋжа́ще бг҃ꙋ, де́нь и҆ но́щь воспѣва́хꙋ: А҆ллилꙋ́їа.
І҆́косъ в҃
Ра́зꙋмъ премꙋ́дръ и҆мѣ́юще, ст҃і́и мч҃нцы, вы́нꙋ трꙋди́шасѧ во сла́вꙋ бж҃їю, ꙗ҆зы́ческое нече́стїе ѡ҆блича́юще, и҆́щꙋщыѧ и҆́стины на пꙋ́ть пра́вый наставлѧ́юще, и҆ мнѡ́ги невѣ̑рныѧ къ бг҃ꙋ и҆́стинномꙋ привлеко́ша, сегѡ̀ ра́ди глаго́лемъ ва́мъ си́це:
Ра́дꙋйтесѧ, насади́телїе и҆́стиннагѡ бг҃опочита́нїѧ: ра́дꙋйтесѧ, и҆скорени́телїе де́монскагѡ слꙋже́нїѧ.
Ра́дꙋйтесѧ, тьмы̀ нече́стїѧ ѡ҆бличи́телїе: ра́дꙋйтесѧ, і҆́дѡльскїѧ пре́лести низложи́телїе.
Ра́дꙋйтесѧ, и҆сповѣ̑дницы хрⷭ҇тѡ́вы и҆зрѧ́днїи: ра́дꙋйтесѧ, свѣти̑ла вѣ́ры правосла́вныѧ.
Ра́дꙋйтесѧ, крі́ни бл҃гоꙋха́ннїи раѧ̀ превы́шнѧгѡ: ра́дꙋйтесѧ, цвѣ́ти прекра́снїи вертогра́да і҆и҃сова.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ г҃
Си́лою свы́ше ѡ҆сѣне́ннїи ст҃і́и мч҃нцы, гони́телей ст҃ы́ѧ вѣ́ры не ᲂу҆страши́шасѧ, велѣ̑нїѧ нечести́вагѡ а҆нтѡнїа́на небрего́ша и҆ вѣ́рꙋ хрⷭ҇то́вꙋ велегла́снѡ просла́виша, тѣ́мже и҆ въ темни́цꙋ вве́ржени, поѧ́хꙋ бг҃ꙋ: А҆ллилꙋ́їа.
І҆́косъ г҃
И҆мꙋ́ще вѣ́рꙋ во хрⷭ҇та̀, а҆дама́нта твердѣ́йшꙋю, и҆ си́лою тоѧ̀ воѡрꙋжи́вшесѧ, мꙋ́жественнѡ претерпѣ́ли є҆стѐ, ст҃і́и мч҃нцы, темни̑чныѧ ᲂу҆́зы и҆ са́мꙋю сме́рть. Сегѡ̀ ра́ди похвалѧ́юще таково́е мꙋ́жество, ᲂу҆бл҃жа́емъ ва́съ си́це:
Ра́дꙋйтесѧ, и҆́стинныѧ вѣ́ры и҆сповѣ̑дницы: ра́дꙋйтесѧ, црⷭ҇твїѧ бж҃їѧ наслѣ̑дницы.
Ра́дꙋйтесѧ, хрⷭ҇та̀ вседꙋ́шнѣ возлюби́вшїи: ра́дꙋйтесѧ, за и҆́мѧ є҆гѡ̀ въ темни́цꙋ мра́чнꙋю вве́рженнїи.
Ра́дꙋйтесѧ, мч҃нкѡвъ похвало̀: ра́дꙋйтесѧ, стрⷭ҇тоте́рпцєвъ сла́во.
Ра́дꙋйтесѧ, ст҃ы́ѧ цр҃кве ᲂу҆твержде́нїе: ра́дꙋйтесѧ, всегѡ̀ ро́да хрⷭ҇тїа́нскагѡ ᲂу҆краше́нїе.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ д҃
Бꙋ́рею помышле́нїй нече́стїѧ ѡ҆держи́мый, нечести́вый ца́рь лїкі́нїй воздви́же жесто́кое гоне́нїе на хрⷭ҇тїа́ны, ты́ же, стрⷭ҇тоте́рпче а҆ві́ве, тогѡ̀ не ᲂу҆боѧ́всѧ, съ тве́рдою вѣ́рою взыва́лъ є҆сѝ хрⷭ҇тꙋ̀ бг҃ꙋ: А҆ллилꙋ́їа.
І҆́косъ д҃
Слы́шавъ ца́рь лїкі́нїй твоѧ̑ по́двиги, досточꙋ́дне а҆ві́ве, и҆ твоѐ тве́рдое вѣ́ры и҆сповѣ́данїе, раз̾ѧри́сѧ на тѧ̀ ѕло́бою и҆ повелѣ̀ преда́ти тѧ̀ сме́рти лю́тѣй ꙗ҆́кѡ проти́вника царе́ва. Ты́ же ᲂу҆вѣ́дѣвъ ѡ҆ се́мъ, во́лею поте́клъ є҆сѝ на мꙋче́нїе, и҆ съ ра́достїю претерпѣ́лъ є҆сѝ ѻ҆́гненное сожже́нїе. Сегѡ̀ ра́ди дивѧ́щесѧ вели́комꙋ мꙋ́жествꙋ твоемꙋ̀, велича́емъ тѧ̀ си́це:
Ра́дꙋйсѧ, побо́рниче вѣ́ры во хрⷭ҇та̀ неꙋстраши́мый: ра́дꙋйсѧ, во́ине хрⷭ҇то́въ непобѣди́мый.
Ра́дꙋйсѧ, повѣ́шенный на дре́вѣ за распросте́ршаго рꙋ́цѣ своѝ на дре́вѣ крⷭ҇тнѣмъ: ра́дꙋйсѧ, стро́ганный коготьмѝ желѣ́зными.
Ра́дꙋйсѧ, ра́нами, ꙗ҆́кѡ ᲂу҆́тварьми многоцѣ́нными, ᲂу҆краше́нный: ра́дꙋйсѧ, кро́вїю твое́ю, ꙗ҆́кѡ багрѧни́цею, ѡ҆блече́нный.
Ра́дꙋйсѧ, ᲂу҆тѣше́нїе подава́ѧй скорбѧ́щымъ: ра́дꙋйсѧ, ско́рый помо́щниче всѣ̑мъ за и҆́стинꙋ терпѧ́щымъ.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ є҃
Бг҃оте́чнѣй ѕвѣздѣ̀ на тве́рди нбⷭ҇нѣй подо́бни бы́ли є҆стѐ, ст҃і́и мч҃нцы, лꙋча́ми житїѧ̀ ва́шегѡ тьмꙋ̀ ꙗ҆зы́ческагѡ нече́стїѧ просвѣща́ющїи и҆ мно́гихъ на пꙋ́ть и҆́стины наставлѧ́ющїи. Тѣ́мже бл҃гоговѣ́йнѡ чтꙋ́ще па́мѧть ва́шꙋ, бл҃года́рнѡ пое́мъ бг҃ꙋ: А҆ллилꙋ́їа.
І҆́косъ є҃
Ви́дѣша лю́дїе гра́да є҆де́са мнѡ́гаѧ чꙋдеса̀, быва́ємаѧ ѿ ра́ки ст҃ы́хъ мч҃нкѡвъ гꙋ́рїа, самѡ́на и҆ а҆ві́ва, ѕѣлѡ̀ ра́довахꙋсѧ и҆ гдⷭ҇а всѣ́мъ се́рдцемъ прославлѧ́хꙋ. Мы́ же чтꙋ́ще ст҃ꙋ́ю па́мѧть ва́шꙋ, ст҃і́и мч҃нцы, ᲂу҆ми́льнѡ взыва́емъ:
Ра́дꙋйтесѧ, непра́веднѡ гони́мыхъ застꙋ̑пницы: ра́дꙋйтесѧ, вѣ́рныхъ рабѡ́въ хрⷭ҇то́выхъ дрꙋ́зи.
Ра́дꙋйтесѧ, сꙋ́щихъ во ᲂу҆́захъ и҆ темни́цахъ храни́телїе: ра́дꙋйтесѧ, гони́телей и҆ ѡ҆би́дѧщихъ вразꙋми́телїе.
Ра́дꙋйтесѧ, пла́чꙋщихъ ᲂу҆тѣ́шителїе: ра́дꙋйтесѧ, ѿ на́глыѧ и҆ лю́тыѧ сме́рти и҆зба́вителїе.
Ра́дꙋйтесѧ, бл҃года́тїю чꙋдотворе́нїѧ ѿ гдⷭ҇а ѡ҆богаще́ннїи: ра́дꙋйтесѧ, и҆сцѣле́нїй всебл҃зі́и пода́телїе.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ ѕ҃
Съ высоты̀ мꙋ́дрїи бл҃года́ть прїе́мше, за сꙋ́щихъ во и҆скꙋше́нїи предстоитѐ, всехва́льнїи, тѣ́мже ѻ҆трокови́цꙋ, ст҃і́и, ѿ сме́рти го́рькїѧ и҆зба́висте. Вы́ бо вои́стиннꙋ є҆стѐ гра́дꙋ є҆де́сꙋ сла́ва и҆ мі́рꙋ ра́дость, сегѡ̀ ра́ди воспѣва́емъ ко гдⷭ҇ꙋ: А҆ллилꙋ́їа.
І҆́косъ ѕ҃
Вра́жїѧ рабо́ты и҆зба́ви ны̀, мо́лимъ тѧ̀, і҆и҃се жизнода́вче, твои́хъ страда́лєцъ мольба́ми, да не порабоще́ни ѿ страсте́й дꙋ́шꙋ и҆ тѣ́ло стѧжа́вше, восхвалѧ́емъ тѣ́хъ скорѣ́йшꙋю по́мощь. Ті́и бо женꙋ̀, во гро́бѣ мꙋ́жемъ затворе́ннꙋю, ско́рѡ предвари́вше ѿ сме́рти и҆зба́виша. Сегѡ̀ ра́ди взыва́емъ и҆̀мъ си́це:
Ра́дꙋйтесѧ, неви́ннꙋю женꙋ̀ ѿ лю́тыѧ сме́рти спа́сшїи: ра́дꙋйтесѧ, ѕвѣ̑рства мꙋчи́телѧ ди́внымъ сп҃се́нїемъ є҆ѧ̀ побѣди́вшїи.
Ра́дꙋйтесѧ, престꙋпле́нїѧ сꙋпрꙋ́жескїѧ вѣ́рности гро́знїи наказа́телїе: ра́дꙋйтесѧ, же́нъ ѡ҆ста́вленныхъ и҆ ѕлѣ̀ ѡ҆бма́нꙋтыхъ защи̑тницы.
Ра́дꙋйтесѧ, ѕла́гѡ мꙋ́жа жесто́кое дѣѧ́нїе ѡ҆бличи́вшїи: ра́дꙋйтесѧ, и҆ того̀ вѣ́ровати въ си́лꙋ бг҃а хрⷭ҇тїа́нскагѡ наꙋчи́вшїи.
Ра́дꙋйтесѧ, пода́телїе млⷭ҇ти тоѧ̀ тре́бꙋющымъ: ра́дꙋйтесѧ, стра̑жи неꙋсы́пнїи па́мѧть ва́шꙋ почита́ющихъ.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ з҃
Хотѧ́й чл҃вѣколю́бецъ гдⷭ҇ь ꙗ҆ви́ти млⷭ҇ть лю́демъ свои̑мъ, сохранѝ тѣлеса̀ ва̑ша нетлѣ̑нна и҆ чꙋдоточа̑ща, ѿ ни́хже всѝ вѣ́рнїи то́ки и҆сцѣле́нїй полꙋча́ютъ, зовꙋ́ще бг҃ꙋ: А҆ллилꙋ́їа.
І҆́косъ з҃
Но́выхъ застꙋ́пникѡвъ и҆ ди́вныхъ чꙋдотво́рцєвъ ва́съ вѣ́дꙋще, лю́дїе и҆з̾ гра́да є҆де́са ст҃ы́й хра́мъ въ па́мѧть ва́шꙋ созда́ша, въ не́мже и҆ мо́щи ва́шѧ положи́ша, да всѝ стра́ждꙋщїи по́мощь ѿ ни́хъ, ꙗ҆́кѡ ѿ ѻ҆би́льна и҆сто́чника, почерпа́ютъ. Та́кожде и҆ мы̀, тве́рдꙋ наде́ждꙋ на ва́съ и҆мꙋ́ще, взыва́емъ ва́мъ си́це:
Ра́дꙋйтесѧ, дꙋше́вныхъ и҆ тѣле́сныхъ недꙋ́гѡвъ на́шихъ цѣли́телїе: ра́дꙋйтесѧ, бѣсѡ́въ ѡ҆ и҆́мени гдⷭ҇ни и҆згони́телїе.
Ра́дꙋйтесѧ, є҆ѵⷢ҇льскїѧ и҆́стины бл҃говѣсти́телїе: ра́дꙋйтесѧ, бжⷭ҇твенныѧ бл҃года́ти носи́телїе.
Ра́дꙋйтесѧ, скѡ́рби мнѡ́ги за и҆́мѧ гдⷭ҇не прїе́мшїи: ра́дꙋйтесѧ, ди́внѡ во ст҃ы́хъ є҆гѡ̀ просїѧ́вшїи.
Ра́дꙋйтесѧ, гра́да ва́шегѡ є҆де́са похвало̀ и҆ ᲂу҆твержде́нїе: ра́дꙋйтесѧ, и҆ всеѧ̀ вселе́нныѧ сла́во и҆ похвале́нїе.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ и҃
Стра́нно и҆ стра́шно невѣ̑рнымъ слы́шати, какова̑ ди̑внаѧ дѣла̀ ѿ ст҃ы́хъ моще́й ва́шихъ соверша́ютсѧ: недꙋ́зи врачꙋ́ютсѧ и҆ стра̑сти и҆сцѣлѧ́ютсѧ. Мы́ же тве́рдꙋ наде́ждꙋ на ва́съ и҆мꙋ́ще, бг҃ꙋ, ѡ҆ ва́съ та́кѡ бл҃годѣ́ющемꙋ, съ вѣ́рою взыва́емъ: А҆ллилꙋ́їа.
І҆́косъ и҃
Всѣ́ми добродѣ́тельми и҆спо́лненнїи, за нѧ́же и҆ сла́вою бж҃їею почте́ннїи, внима́йте, ст҃і́и мч҃нцы, мл҃твамъ вѣ́рныхъ, чтꙋ́щихъ ст҃ꙋ́ю па́мѧть ва́шꙋ, ѿ ни́хже слы́шите сицева̑ѧ:
Ра́дꙋйтесѧ, ни́щїи дꙋ́хомъ, ꙗ҆́кѡ ва́ше є҆́сть црⷭ҇твїе нбⷭ҇ное: ра́дꙋйтесѧ, пла́кавшїи, ꙗ҆́кѡ ᲂу҆тѣ́шистесѧ.
Ра́дꙋйтесѧ, кро́тцїи, ꙗ҆́кѡ наслѣ́довасте зе́млю: ра́дꙋйтесѧ, а҆лка́вшїи и҆ жа́ждавшїи пра́вды, ꙗ҆́кѡ насы́тистесѧ.
Ра́дꙋйтесѧ, млⷭ҇тивїи, ꙗ҆́кѡ стѧжа́ли є҆стѐ поми́лованїе: ра́дꙋйтесѧ, чи́стїи се́рдцемъ, ꙗ҆́кѡ бг҃а ᲂу҆зрѣ́сте.
Ра́дꙋйтесѧ, ꙗ҆́кѡ пред̾ лице́мъ человѣ́ческимъ мꙋ́кꙋ прїѧ́ли є҆стѐ: ра́дꙋйтесѧ, ꙗ҆́кѡ ᲂу҆пова́нїе ва́ше безсме́ртїѧ и҆спо́лнено є҆́сть.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ ѳ҃
Всѧ̑кїѧ напа̑сти, находѧ́щыѧ на гра́дъ є҆де́съ, разорѧ́ли є҆стѐ, ст҃і́и мч҃нцы, тѣ́мже и҆ ны́нѣ не ѡ҆ста́вите на́съ смире́нныхъ и҆ грѣ́шныхъ, но всѧ̑ лю́ди страны̀ на́шеѧ въ правосла́вїи и҆ є҆диномы́слїи ᲂу҆тверди́те, да всѝ є҆ди́ными ᲂу҆сты̀ и҆ є҆ди́нымъ се́рдцемъ воскли́кнемъ просла́вльшемꙋ ва́съ гдⷭ҇ꙋ: А҆ллилꙋ́їа.
І҆́косъ ѳ҃
Вѣті̑ѧ многовѣща̑нныѧ ꙗ҆́кѡ ры̑бы безгла̑сныѧ зри́мъ ѡ҆ ва́съ, ст҃і́и мч҃нцы: недоꙋмѣ́ютъ бо, ка́кѡ въ пꙋсты́ни дꙋ́хомъ вита́ли є҆стѐ и҆ посредѣ̀ человѣ̑къ неꙋсы́пными пѡ́двиги подвиза́стесѧ. Мы́ же ра́дꙋющесѧ, ꙗ҆́кѡ таковы̑ и҆́мамы ᲂу҆чи́тєли и҆ мл҃твенники, прославлѧ́емъ ва́съ, глаго́люще:
Ра́дꙋйтесѧ, кѷмва́ли сло́ва бж҃їѧ: ра́дꙋйтесѧ, те́плїи ѡ҆ на́съ пред̾ бг҃омъ хода̑таи.
Ра́дꙋйтесѧ, і҆ꙋде́євъ и҆ є҆́ллинѡвъ просвѣти́телїе: ра́дꙋйтесѧ, трїеди́нагѡ бжⷭ҇тва̀ бл҃говѣсти́телїе.
Ра́дꙋйтесѧ, кро́тости и҆ воздержа́нїѧ ᲂу҆чи́телїе: ра́дꙋйтесѧ, лжѝ и҆ татьбы̀ ѡ҆бличи́телїе.
Ра́дꙋйтесѧ, црⷭ҇твїѧ хрⷭ҇то́ва наслѣ̑дницы: ра́дꙋйтесѧ, вѣ́чныѧ бл҃же́нныѧ жи́зни соприча̑стницы.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ і҃
Сп҃стѝ хотѧ̀ лю́ди гра́да є҆де́са ѿ мы́сленнагѡ во́лка, ᲂу҆вѣщава́ли є҆стѐ тѣ́хъ тве́рдѡ стоѧ́ти во и҆́стиннѣй вѣ́рѣ, нижѐ ко́зней вра́жїихъ ᲂу҆страша́тисѧ, но и҆ въ ско́рбехъ и҆ напа́стехъ за всѧ̑ бл҃годари́ти бг҃а, пою́ще є҆мꙋ̀: А҆ллилꙋ́їа.
І҆́косъ і҃
Стѣна̀ тверда̀ и҆ наде́жное прибѣ́жище є҆стѐ, ст҃і́и мч҃нцы, всѣ̑мъ къ ва́мъ прибѣга́ющымъ и҆ ско́рыѧ по́мощи тре́бꙋющымъ, сегѡ̀ ра́ди во ᲂу҆миле́нїи се́рдца на́шегѡ взыва́емъ:
Ра́дꙋйтесѧ, ꙗ҆́кѡ заре́ю прест҃а́гѡ дх҃а просвѣще́ни бы́сте: ра́дꙋйтесѧ, ꙗ҆́кѡ стра́хъ малодꙋ́шный ѿ себє̀ ѿтрѧслѝ є҆стѐ.
Ра́дꙋйтесѧ, всѣ́хъ скорбѧ́щихъ ра́дованїе: ра́дꙋйтесѧ, всѣ́хъ ᲂу҆гнете́нныхъ и҆ порабоще́нныхъ прибѣ́жище и҆ ѡ҆свобожде́нїе.
Ра́дꙋйтесѧ, вдѡ́въ и҆ сиро́тъ застꙋпле́нїе: ра́дꙋйтесѧ, ѿ є҆ресе́й и҆ раско́лѡвъ ѡ҆гражде́нїе.
Ра́дꙋйтесѧ, ꙗ҆́кѡ всѝ нечести́вїи житїю̀ ва́шемꙋ ᲂу҆дивлѧ́ютсѧ: ра́дꙋйтесѧ, ꙗ҆́кѡ всѝ бл҃гочести́вїи ѡ҆ и҆́мени ва́шемъ веселѧ́тсѧ.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ а҃і
Пѣ́нїе бл҃года́рственное приносѧ́ще ко гдⷭ҇ꙋ ѡ҆ ва́съ, те́плїи застꙋ̑пницы на́ши, при́снѡ мо́лимъ ва́съ не ѿстꙋпа́ти ѿ на́съ грѣ̑хъ на́шихъ ра́ди, но млⷭ҇рдїе ѿ гдⷭ҇а на́мъ и҆спроси́ти, вопїю́щымъ є҆мꙋ̀: А҆ллилꙋ́їа.
І҆́косъ а҃і
Свѣтоза́рнꙋю тро́ицꙋ ст҃ы́хъ мч҃нкѡвъ восхвалѧ́юще, вѣ́рнїи, ᲂу҆страни́мсѧ ра́спрей и҆ раздо́рѡвъ въ жи́зни се́й, ᲂу҆бѣжи́мъ несогла́сїй и҆ раздѣле́нїй, и҆ хранѧ́ще є҆дине́нїе дꙋ́ха въ сою́зѣ ми́ра, и҆з̾ глꙋбины̀ дꙋшѝ воскли́кнемъ та́кѡ:
Ра́дꙋйтесѧ, громогла̑сныѧ трꙋбы̑ є҆ѵⷢ҇льскагѡ бл҃говѣ́стїѧ: ра́дꙋйтесѧ, сладкозвꙋ̑чныѧ гꙋ́сли про́повѣди сп҃се́нїѧ.
Ра́дꙋйтесѧ, крѣ́пцїи пра́вды рачи́телїе: ра́дꙋйтесѧ, непоколеби́мїи непра́вды и҆стреби́телїе.
Ра́дꙋйтесѧ, бл҃гочести̑вымъ семе́йствѡмъ ми́ра и҆ бл҃га пода́телїе: ра́дꙋйтесѧ, цѣломꙋ́дреннѡ живꙋ́щымъ въ бра́цѣ незри́мїи ѡ҆храни́телїе.
Ра́дꙋйтесѧ, жестѡ́кимъ и҆ невѣ̑рнымъ сꙋпрꙋ́гѡмъ стро́гїи наказа́телїе: ра́дꙋйтесѧ, под̾ кро́въ сво́й всѣ́хъ беззащи́тныхъ млⷭ҇тивнѣ прїе́млющїи.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ в҃і
Бл҃года́ть, да́ннꙋю ва́мъ ѿ бг҃а, вѣ́дꙋще, па́мѧть ва́шꙋ пра́зднꙋемъ, ст҃і́и мч҃нцы, съ ᲂу҆се́рднымъ моле́нїемъ къ ва́шемꙋ чтⷭ҇но́мꙋ ѻ҆́бразꙋ притека́юще, ва́шею тве́рдою по́мощїю, ꙗ҆́кѡ неѡбори́мою стѣно́ю, ѡ҆гражда́емсѧ, сегѡ̀ ра́ди восхвалѧ́емъ ва́съ, стрⷭ҇тоте́рпцы хрⷭ҇тѡ́вы, и҆ ᲂу҆се́рднѡ зове́мъ бг҃ꙋ: А҆ллилꙋ́їа.
І҆́косъ в҃і
Пою́ще ва́ше ди́вное житїѐ и҆ мч҃нческꙋю кончи́нꙋ, мо́лимъ ва́съ, стрⷭ҇тоте́рпцы хрⷭ҇тѡ́вы гꙋ́рїе, самѡ́не и҆ а҆ві́ве, бꙋ́дите на́мъ во все́мъ бл҃зі́и помо́щницы, бл҃гослови́те на́съ ми́ромъ и҆ любо́вїю, пода́йте на́мъ тве́рдꙋю вѣ́рꙋ, чистотꙋ̀ жи́зни и҆ стра́хъ бж҃їй, да всѝ дꙋше́вный поко́й и҆мꙋ́ще, въ ра́дости восклица́емъ:
Ра́дꙋйтесѧ, поко́й и҆ ѿра́да скорбѧ́щымъ: ра́дꙋйтесѧ, стра́хъ и҆ ᲂу҆дивле́нїе ѡ҆би́дѧщымъ.
Ра́дꙋйтесѧ, неви́ннꙋю женꙋ̀ ѿ лю́тыѧ сме́рти спа́сшїи: ра́дꙋйтесѧ, ѕла́го мꙋ́жа є҆ѧ̀ досто́йнѡ покара́вшїи.
Ра́дꙋйтесѧ, за прелюбе́знаго ва́мъ і҆и҃са дꙋ́шы своѧ̑ положи́вшїи: ра́дꙋйтесѧ, за пресла́дкое и҆́мѧ є҆гѡ̀ под̾ ме́чь ѻ҆́стрый главы̑ своѧ̑ подклони́вшїи.
Ра́дꙋйтесѧ, многоѻбра̑зныѧ болѣ̑зни за цр҃ѧ̀ хрⷭ҇та̀ претерпѣ́вшїи: ра́дꙋйтесѧ, і҆ерⷭ҇ли́ма го́рнѧгѡ гра́ждане.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ г҃і
Ѽ ст҃і́и стрⷭ҇тоте́рпцы хрⷭ҇тѡ́вы гꙋ́рїе, самѡ́не и҆ а҆ві́ве, прїими́те сїѐ на́ше хвале́бное пѣ́нїе, и҆ ᲂу҆слы́шавше ᲂу҆се́рдное жела́нїе на́ше, и҆зба́вите на́съ те́плымъ ва́шимъ къ бг҃ꙋ предста́тельствомъ ѿ всѧ́кагѡ ѕла̀, ѿ вражды̀ и҆ несогла́сїй и҆ всѧ́кихъ лю́тыхъ бѣ́дъ и҆ болѣ́зней, да съ любо́вїю ва́съ чтꙋ́ще, вы́нꙋ зове́мъ бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ли во пло́ти, трⷪ҇цѣ ст҃ѣ́й равночи́сленнїи, любо́вїю къ бг҃ꙋ горѧ́ще, і҆́дѡлы попра́сте, вѣ́рꙋ хрⷭ҇то́вꙋ ᲂу҆крѣпи́сте, трⷪ҇цꙋ ст҃ꙋ́ю просла́висте, тѣ́мже похвалѧ́юще по́двиги ва́шѧ, глаго́лемъ ва́мъ си́це:
Ра́дꙋйтесѧ, зако́на гдⷭ҇нѧ теплѣ́йшїи храни́телїе: ра́дꙋйтесѧ, є҆ѵⷢ҇льскагѡ ᲂу҆че́нїѧ до́брїи послꙋ́шателїе.
Ра́дꙋйтесѧ, свѣти́льницы бл҃гоче́стїѧ: ра́дꙋйтесѧ, ѡ҆бличи́телїе нече́стїѧ.
Ра́дꙋйтесѧ, ᲂу҆твержде́нїе вѣ́ры хрⷭ҇то́вы: ра́дꙋйтесѧ, столпѝ цр҃кве бж҃їѧ.
Ра́дꙋйтесѧ, вѣ́рныхъ наде́ждо и҆ застꙋпле́нїе: ра́дꙋйтесѧ, невѣ́рныхъ ᲂу҆страше́нїе и҆ посрамле́нїе.
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Конда́къ а҃
И҆збра́ннїи чꙋдотво́рцы хрⷭ҇тѡ́вы и҆ ст҃ы́ѧ вѣ́ры и҆сповѣ̑дницы, гꙋ́рїе, самѡ́не и҆ а҆ві́ве добронра́внїи, па́мѧть ва́шꙋ чтꙋ́ще пѣ́сньми похва́льными, воспѣва́емъ ꙗ҆́кѡ застꙋ́пникѡвъ хрⷭ҇тїа́нъ и҆ покрови́телей стра́ждꙋщихъ. Вы́ же и҆мꙋ́ще дерзнове́нїе ко гдⷭ҇ꙋ, ѿ всѧ́кихъ бѣ́дъ и҆ напа́стей свободи́те на́съ, вѣ́рою и҆ любо́вїю зовꙋ́щихъ:
Ра́дꙋйтесѧ, гꙋ́рїе, самѡ́не и҆ а҆ві́ве, стрⷭ҇тоте́рпцы хрⷭ҇тѡ́вы и҆ ѡ҆би́димыхъ покрови́телїе.
Моли́твы
Ѽ ст҃і́и мч҃нцы и҆ и҆сповѣ̑дницы хрⷭ҇тѡ́вы гꙋ́рїе, самѡ́не и҆ а҆ві́ве, те́плїи ѡ҆ на́съ хода̑таи и҆ мл҃твєнницы пред̾ бг҃омъ! Во ᲂу҆миле́нїи серде́цъ на́шихъ, взира́юще на пречи́стый ва́шъ ѻ҆́бразъ, смире́ннѡ мо́лимъ ва́съ: ᲂу҆слы́шите на́съ грѣ́шныхъ и҆ недосто́йныхъ, сꙋ́щихъ въ бѣда́хъ, ско́рбехъ и҆ напа́стехъ, и҆ презрѣ́вше на̑ша тѧ̑жкаѧ и҆ безчи́слєннаѧ прегрѣшє́нїѧ, ꙗ҆ви́те на́мъ свою̀ вели́кꙋю млⷭ҇ть, воздви́гните на́съ и҆з̾ глꙋбины̀ грѣхо́вныѧ, просвѣти́те на́шъ ᲂу҆́мъ, смѧгчи́те ѕло́е и҆ ѻ҆каѧ́нное се́рдце, прекрати́те за́висть, враждꙋ̀ и҆ раздо́ры, въ на́съ живꙋ́щыѧ. Ѡ҆сѣни́те на́съ ми́ромъ, любо́вїю и҆ стра́хомъ бж҃їимъ, ᲂу҆моли́те млⷭ҇рдаго гдⷭ҇а, да покры́етъ мно́жество грѣхѡ́въ на́шихъ свои́мъ неизрече́ннымъ млⷭ҇рдїемъ, да соблюде́тъ цр҃ковь свою̀ ст҃ꙋ́ю ѿ невѣ́рїѧ, є҆ресе́й и҆ раско́лѡвъ, да пода́стъ странѣ̀ на́шей ми́ръ, бл҃годе́нствїе, землѝ плодоро́дїе, сꙋпрꙋ́гѡмъ любо́вь и҆ согла́сїе, ча́дѡмъ послꙋша́нїе, ѡ҆би̑димымъ терпѣ́нїе, ѡ҆би́дѧщымъ стра́хъ бж҃їй, скорбѧ́щымъ бл҃годꙋ́шїе, ра́дꙋющымсѧ воздержа́нїе. Всѣ́хъ же на́съ да покры́етъ свое́ю всеси́льною десни́цею, и҆ да и҆зба́витъ ѿ гла́да, гꙋби́тельства, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нникѡвъ и҆ междоꙋсо́бныѧ бра́ни, и҆ ѿ напра́сныѧ сме́рти. Да ѡ҆гради́тъ на́съ ѡ҆полче́нїемъ ст҃ы́хъ свои́хъ а҆́гг҃лѡвъ, во є҆́же и҆зба́витисѧ на́мъ по и҆схо́дѣ на́шемъ и҆з̾ житїѧ̀ сегѡ̀ ѿ ко́зней лꙋка́вагѡ и҆ та́йныхъ воздꙋ́шныхъ мыта́рствъ є҆гѡ̀, и҆ неѡсꙋждє́ннымъ предста́ти прⷭ҇то́лꙋ гдⷭ҇а сла́вы, и҆дѣ́же ли́цы ст҃ы́хъ а҆́гг҃лъ со всѣ́ми ст҃ы́ми вы́нꙋ сла́вѧтъ прест҃о́е и҆ великолѣ́пое и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.