Кондак 1
Избра́нный Боже́ственныя Тро́ицы уго́дниче пресла́вный, мона́шеских заве́тов Се́ргия чудотво́рца рачи́телю, духоно́сный наста́вниче христиа́нскаго благоче́стия, я́ко до́бре упа́сл еси́ ста́до слове́сных ове́ц, в дея́ниях бы́л еси́ пра́вило ве́ры и о́браз кро́тости, изря́днейший храмозда́телю оби́тели Тро́ицкия, те́мже с любо́вию и благодаре́нием вси́ зове́м ти́:
Ра́дуйся, Ни́коне, Ра́донежский и всея́ Росси́и чудотво́рче.
Икос 1
А́нгельское житие́ возревнова́л еси́, слы́ша о пресла́внем игу́мене Ра́донежския оби́тели Животворя́щия Тро́ицы а́вве Се́ргии, к нему́же напра́вил еси́ стопы́ своя́ из гра́да Юрияпо́льска, я́ко а́ще и ю́н бе́, все́ю душе́ю возжа́ждал еси́ узре́ти лице́ чудотво́рца и умоли́ти его́, да прии́мет во о́бщники учени́к свои́х и я́ко до́брый па́стырь да упра́вит пу́ть в Ца́рствие Небе́сное, иде́же е́сть все́х веселя́щихся о Го́споде жили́ще. Те́мже мы́ восхваля́ем тя́, пою́ще:
Ра́дуйся, от ю́ности житие́ во Христе́ возлюби́вый; ра́дуйся, ду́шу ве́тхаго челове́ка в себе́ умертви́вый.
Ра́дуйся, нищету́ духо́вную ра́ди Ца́рствия Небе́снаго избра́вый; ра́дуйся, в пла́чи души́ своея́ по Бо́зе утеше́ние улучи́вый.
Ра́дуйся, кро́тость а́ввы Се́ргия унасле́довавый; ра́дуйся, а́лчущим и жа́ждущим пра́вды Бо́жия после́довавый.
Ра́дуйся, милосе́рдием к стра́ждущим ми́лости от Бо́га себе́ испроси́вый; ра́дуйся, чи́стым се́рдцем Бо́га в Тро́ице сла́вимаго умиле́нно созерца́вый.
Ра́дуйся, Ни́коне, Ра́донежский и всея́ Росси́и чудотво́рче.
Кондак 2
Ви́дя суету́ суе́т ми́ра сего́ во зле́ лежа́щаго, скороги́бнущую красоту́ его́ и пре́лесть земны́х бла́г, тле́нию прича́стных, я́ве отри́нул еси́, восхоте́л бо еси́, я́ко ве́рный и благи́й ра́б, еди́ному Го́сподеви неле́ностно порабо́тати, в ра́дости воспева́я Ему́: Аллилу́иа.
Икос 2
Ра́зумом, от Ду́ха Свята́го просвеще́нным, прови́дя твое́ Богоуго́дное житие́, посла́ тя богому́дрый Се́ргий в оби́тель Высо́цкую к ученику́ своему́ Афана́сию, му́жу зело́ доброде́тельному, да испыта́ет ду́шу твою́ в любви́ ко Христу́ и в ре́вности к по́двигом и́ноческим, и́же и да удосто́ит тя́ прия́тия мона́шескаго чи́на. Сего́ ра́ди зове́м ти́:
Ра́дуйся, ве́рою измла́да прямы́ми стезя́ми пред Бо́гом ходи́вый; ра́дуйся, в наде́жди жи́зни ве́чныя стопы́ своя́ горе́ напра́вивый.
Ра́дуйся, любо́вию ко Христу́ се́рдце свое́ сла́дце уязви́вый; ра́дуйся, ре́вностию к житию́ мона́шескому мно́гия удиви́вый.
Ра́дуйся, обе́та послуша́ния до́блий исполни́телю; ра́дуйся, чистото́ю целому́дрия хра́ма души́ своея́ украси́телю.
Ра́дуйся, я́ко стяжа́нием Ду́ха Свята́го вся́ бла́га ми́ра сего́ презре́л еси́; ра́дуйся, я́ко нищету́ Христо́ву па́че зла́та и сребра́ возлюби́л еси́.
Ра́дуйся, Ни́коне, Ра́донежский и всея́ Росси́и чудотво́рче.
Кондак 3
Си́лою свы́ше осеня́емый, возше́д на го́ру мона́шескаго преспе́яния, вся́ ко́зни душетле́ннаго велиа́ра диа́вола разруши́л еси́ и, внегда́ дости́же ме́ру во́зраста, прему́дрости и ра́зума, возжела́л еси́ возврати́тися к отцу́ своему́ духо́вному Се́ргию, да прии́мет тя́ в свою́ оби́тель и причте́т боголюби́вой бра́тии ея́. И се́й па́стырь до́брый а́бие прия́т тя́. Ви́дев же духо́вныма очи́ма благода́ть, я́же в тебе́, о́тче Ни́коне, в ра́довании возгласи́ Бо́гу: Аллилу́иа.
Икос 3
Име́я кре́пкое произволе́ние о спасе́нии души́ своея́, всеконе́чно преда́лся еси́ води́тельству Богому́драго учи́теля мона́шескаго де́лания Се́ргия, и́же узре́в твое́ усе́рдие подвиза́тися в труде́х поста́ и моли́твы, соде́ла тя́ свои́м возлю́бленным сотаи́нником. Мы́ же, воспева́я вели́чие по́двигов твои́х, взыва́ем ти́ си́це:
Ра́дуйся, равноа́нгельнаго жития́ подража́телю; ра́дуйся, би́сера Ца́рства Небе́снаго усе́рдный иска́телю.
Ра́дуйся, Го́споду Домовлады́це я́ко ве́рный и благи́й ра́б послужи́вый; ра́дуйся, всю́ наде́жду на спасе́ние души́ своея́ на Бо́га возложи́вый.
Ра́дуйся, всего́ себе́ отцу́ духо́вному покори́вый; ра́дуйся, ко Гра́ду Небе́сному по стопа́м его́ благоше́ствовавый.
Ра́дуйся, мно́гих даро́в Богому́драго а́ввы соприча́стниче; ра́дуйся, при́сный его́ в богомы́слии собесе́дниче.
Ра́дуйся, Ни́коне, Ра́донежский и всея́ Росси́и чудотво́рче.
Кондак 4
Бу́ри жите́йских волне́ний неприча́стен бы́л еси́, егда́ всели́лся еси́ в ти́хое приста́нище оби́тели Ра́донежския. В по́двизех же неуста́нных, я́ко фи́никс процве́л еси́, восходя́, Бо́гу благода́тию вспомоществу́ющу, от си́лы в си́лу, и се́, а́вва Се́ргий, и́же в не́мощи во́зраста тогда́ су́ща, возложи́ на тя́, я́ко на прее́мника, води́тельство ста́да Христо́ва. Ты́ же смире́нно восприя́л еси́ кре́ст чинонача́лия и та́ко преспе́л еси́ с благодаре́нием зовы́й Го́споду Пастыренача́льнику: Аллилу́иа.
Икос 4
Слы́ша наро́д правосла́вный о блаже́нней кончи́не вели́каго а́ввы Се́ргия, возскорбе́ша зело́, я́ко лише́ни бы́ша вси́ такова́го духо́внаго наста́вника и чудотво́рца. Оба́че уте́шени бы́ша, ви́дяще досто́йнаго и добронра́внаго ученика́ его́, и́же по послуша́нию понесе́ мно́гия труды́ окормле́ния ста́да Христо́ва. Сего́ ра́ди воспева́ем ти́, в ра́дости зову́ще:
Ра́дуйся, стра́сти жите́йскаго ми́ра победи́вый; ра́дуйся, вся́ за́поведи Христо́вы испо́лнивый.
Ра́дуйся, на го́ру соверше́нства духо́внаго возше́дый; ра́дуйся, мно́гих даро́в Бо́жиих удосто́ивыйся.
Ра́дуйся, Се́ргия а́ввы достохва́льный насле́дниче; ра́дуйся, игу́менства его́ многорачи́тельный прее́мниче.
Ра́дуйся, Лозы́ Христо́вы розго́ многопло́дная; ра́дуйся, ни́во, в доброде́телех плодоро́дная.
Ра́дуйся, Ни́коне, Ра́донежский и всея́ Росси́и чудотво́рче.
Кондак 5
Боготе́чней звезде́ подо́бяся, све́том благода́ти Бо́жия я́же в тебе́, озаря́л еси́ пу́ть к Ца́рствию Небе́сному приходя́щим к тебе́ с ве́рою и наде́ждею на спасе́ние. Мно́зи бо тружда́ющияся и обремене́ннии осуети́шася в земны́х попече́ниих и в уны́ние впадо́ша, позна́вше же тя́, я́ко му́драго наста́вника и путеводи́теля в оби́тели небе́сныя, со тща́нием и ве́рою теча́ху к тебе́, в ра́дости пою́ще Бо́гу: Аллилу́иа.
Икос 5
Ви́дя по́двиги и́ноков ста́да своего́, несу́щих и́го Христо́во в кро́тости и смире́нии, вседу́шно ра́довался еси́ и́х преспе́янию; оба́че скорбе́л и сле́зно моли́лся еси́ о не́цыих, и́же в ле́ности и нераде́нии су́щих, да не погуби́т и́х до конца́ вра́г спасе́ния, я́ко ле́в рыка́ющий, ища́ кого́ поглоти́ти. Мы́ же диви́мся твое́й ре́вности душепопечи́тельства о бра́тии и с умиле́нием пое́м тебе́:
Ра́дуйся, жития́ в по́двизех мона́шеских смире́нный наста́вниче; ра́дуйся, бра́тии во Христе́ кро́ткий чинонача́льниче.
Ра́дуйся, усе́рдный се́ятелю ева́нгельскаго уче́ния; ра́дуйся, до́брый де́лателю па́стырскаго душепопече́ния.
Ра́дуйся, проти́ву духо́в зло́бы му́жественный вои́телю; ра́дуйся, те́мных си́л а́да до́блестный победи́телю.
Ра́дуйся, я́ко тобо́ю ста́до слове́сных ове́ц умножа́ется; ра́дуйся, я́ко тебе́ ра́ди пото́цы Бо́жия благода́ти на него́ источа́ются.
Ра́дуйся, Ни́коне, Ра́донежский и всея́ Росси́и чудотво́рче.
Кондак 6
Пропове́дник вели́ких мона́шеских по́двигов и богодухнове́нных заве́тов своего́ учи́теля, блаже́ннаго Се́ргия, бы́л еси́, во все́х труде́х со тща́нием подража́я ему́, в по́те же лица́ возде́лывал еси́ духо́вный вертогра́д, вруче́нный ти́ а́ввою, еще́ жи́ву ему́ су́щу, и та́ко до́брии плоды́ собира́л еси́ во времена́ своя́, услажда́я все́х и поя́ Бо́гу: Аллилу́иа.
Икос 6
Возсия́ по лицу́ всея́ земли́ Ру́сския сла́ва Ра́донежския оби́тели, в ню́же я́ко в вертогра́д сла́достный тече́ мно́жество и́щущих по́мощи в беда́х и напа́стех, и́же обрето́ша та́мо наде́жду на моли́твы твоя́ и те́плое хода́тайство пред Престо́лом Царя́ Небе́снаго. Те́мже позна́ша тя́ ско́раго помо́щника в земно́й юдо́ли и в ра́дость приидо́ша, с умиле́нием тебе́ пою́ще:
Ра́дуйся, и́стинный по́двигов своего́ а́ввы после́дователю; ра́дуйся, все́х его́ духо́вных завеща́ний исполни́телю.
Ра́дуйся, мона́шескаго уста́ва неотсту́пный блюсти́телю; ра́дуйся, к соверше́нству и́ноческих доброде́телей путеводи́телю.
Ра́дуйся, пле́вел на ни́ве Бо́жией искорени́телю; ра́дуйся, виногра́да Христо́ва иску́сный насади́телю.
Ра́дуйся, я́ко тобо́ю Ра́донежская пу́стынь сла́вно распростани́ся; ра́дуйся, я́ко тобо́ю Це́рковь Ру́сская возвесели́ся.
Ра́дуйся, Ни́коне, Ра́донежский и всея́ Росси́и чудотво́рче.
Кондак 7
Хотя́ глубино́ю Про́мысла вся́ стро́ити и лу́чшее все́м дая́ти, избра́ тя Госпо́дь, я́ко сподви́жника а́ввы Се́ргия, досто́йным его́ прее́мником и па́стырем на па́житех Ра́донежских бы́ти. Ты́ же я́ко до́брая свеща́, горе́л еси́ ду́хом ве́ры и неусы́пно поуча́л еси́ ста́до слове́сных ове́ц, во е́же ходи́ти в за́поведех Госпо́дних, со стра́хом и тре́петом соверша́я служе́ние Бо́гу Вседержи́телю, да и ти́и с сыно́вним благодаре́нием всегда́ сла́вят пречестно́е и великоле́пое и́мя Святы́я Живонача́льныя Тро́ицы, пою́ще: Аллилу́иа.
Икос 7
Но́ваго засту́пника пред Престо́лом Бо́жиим узре́ тя вся́ страна́ Ру́сская, я́ко вои́стинну в тебе́ ми́лость и и́стина срето́стеся, пра́вда и ми́р облобыза́стася, и ве́дуще тя́, такова́го душе́ю чи́стою пред Триеди́ным Бо́гом, могу́щаго умоля́ти Его́, да вси́ еди́ни бу́дут, я́коже запове́дал вели́кий а́вва Се́ргий, служи́тель Тро́ицы. Те́мже благода́рне зову́ще, пое́м ти́:
Ра́дуйся, наро́да страны́ Росси́йския неусы́пный храни́телю; ра́дуйся, прибега́ющих к тебе́ в ча́с злы́х нападе́ний вра́жеских защи́тителю.
Ра́дуйся, мно́гия заблу́ждшия о́вцы от грехо́внаго пути́ обрати́вый; ра́дуйся, мно́жества стра́ждущих печа́ль в ра́дость премени́вый.
Ра́дуйся, ненави́стную ро́знь среди́ единоплеме́нников возбрани́вый; ра́дуйся, вожделе́нное едине́ние среди́ ни́х во и́мя Тро́ицы насади́вый.
Ра́дуйся, все́м житие́м свои́м Тро́ицу Единосу́щную просла́вивый; ра́дуйся, во и́мя Ея́ па́ству свою́ единомы́сленно жи́ти наста́вивый.
Ра́дуйся, Ни́коне, Ра́донежский и всея́ Росси́и чудотво́рче.
Кондак 8
Стра́нное отше́ствие твое́ в затво́р ви́девше бра́тия, зело́ возскорбе́ша, я́ко о́вцы без па́стыря пребыва́ху, до́ндеже даде́ся е́й еди́н от ни́х благогове́йный Са́вва, оба́че и то́й вма́ле оста́ви игу́менство по смире́нию. Тогда́ и́ноцы умоли́ша па́ки блаже́ннаго Ни́кона ста́ти и́х путеводи́телем, в ра́дости пою́ще Бо́гу, вся́ во бла́го устроя́ющу: Аллилу́иа.
Икос 8
Вся́ гра́ды и ве́си Ру́сския смято́шася, егда́ бы́сть наше́ствие безбо́жных ага́рян. Та́кожде стра́хом и тре́петом объя́та бы́сть Ра́донежская оби́тель от гряду́щаго злострада́ния, я́коже и святы́й Се́ргий со двема́ святи́телема Петро́м и Алекси́ем в явле́нии тебе́, преподо́бне Ни́коне, предрече́ вско́ре бы́ти разоре́нию оби́тели, оба́че да не впаде́т кто́ во уны́ние, поне́же последи́ па́ки процвете́т сия́ оби́тель па́че пре́жния. Сего́ ра́ди вопие́м ти́:
Ра́дуйся, безмо́лвие затво́ра зело́ возлюби́вый; ра́дуйся, всю́ наде́жду на во́лю Бо́жию возложи́вый.
Ра́дуйся, я́ко во дни́ тя́жких испыта́ний ника́коже в уны́ние впа́дал еси́; ра́дуйся, я́ко бра́тию в часы́ лю́тых искуше́ний ника́коже оставля́л еси́.
Ра́дуйся, открове́ния свы́ше о судьбе́ оби́тели удосто́ивыйся; ра́дуйся, до́браго обетова́ния о не́й сподо́бивыйся.
Ра́дуйся, в кре́пком упова́нии на Промышле́ние Бо́жие поко́й обрета́яй; ра́дуйся, благодаре́ние Го́споду за вся́ испыта́ния незабве́нне возсыла́яй.
Ра́дуйся, Ни́коне, Ра́донежский и всея́ Росси́и чудотво́рче.
Кондак 9
Все́ упова́ние возложи́в на по́мощь Небе́сную по отше́ствии зловре́дных иноплеме́нник, па́ки собра́л еси́ свою́ бра́тию на ме́сто, иде́же врази́ дерзну́ша сожещи́ оби́тель, и мно́зи труды́ положи́л еси́, да возроди́тся о́ная ра́ди спасе́ния и́ноков, жа́ждущих по́двигов благоче́стия: И, о чудесе́! Ско́ро число́ насе́льников оби́тели умно́жишася. Дивя́ся же сему́ Бо́жию попече́нию, воспе́л еси́ в ра́дости: Аллилу́иа.
Икос 9
Вити́и многоглаго́ливии не мо́гут изрещи́ си́лу твои́х по́двигов, и́миже неуста́нно сла́вил еси́ Живонача́льную Тро́ицу, во о́браз любве́ трие́х ли́ц Ея́ Отца́, и Сы́на, и Свята́го Ду́ха, насажда́я доброде́тели христиа́нския любве́, смире́ния и послуша́ния посреде́ бра́тии, подража́я избра́ннику и служи́телю Святы́я Тро́ицы великосла́вному Се́ргию. Мы́ же, хва́ляще твою́ ре́вность, я́же по Бо́зе, с благодаре́нием зове́м ти́:
Ра́дуйся, Живонача́льныя Тро́ицы хра́ме одушевле́нный; ра́дуйся, мно́гих даро́в, свы́ше ниспосла́нных сосу́де благоуха́нный.
Ра́дуйся, в служе́нии Святе́й Тро́ице а́ввы Се́ргия сотаи́нниче; Ра́дуйся, в почита́нии Ея́ и́мени бра́тии своея́ чу́дный наста́вниче.
Ра́дуйся, я́ко чистото́ю се́рдца та́йну Божества́ Тро́ицы созерца́л еси́; ра́дуйся, я́ко глубино́ю ве́ры души́ своея́ любо́вь тричи́сленных ли́ц Ея́ познава́л еси́.
Ра́дуйся, я́ко безмо́лвным Богомы́слием то́чию го́рняя, а не земна́я помышля́л еси́; ра́дуйся, я́ко Ца́рствие Бо́жие, а́ки ве́чную красоту́, вну́трь се́рдца восприя́л еси́.
Ра́дуйся, Ни́коне, Ра́донежский и всея́ Росси́и чудотво́рче.
Кондак 10
Спасти́ хотя́ ду́шу свою́, пло́ть свою́ распя́л еси́ со страстьми́ и похотьми́, и я́ко сто́лп, досяза́яй небе́с, свети́л еси́ во тме́ но́щи да́же до кра́я земли́ Ру́сския: вси́ бо стра́ждущии и обремене́ннии теча́ху к тебе́ с ве́рою, я́ко к скоропослу́шному помо́щнику и дерзнове́нному хода́таю пред Престо́лом Святы́я Тро́ицы, воспева́юще Е́й со умиле́нием: Аллилу́иа.
Икос 10
Стена́ обре́теся все́м с ве́рою к тебе́ прибега́ющим, не чу́жд бы́л еси́ бра́тии свое́й, но послужи́л е́й еси́ я́ко ра́б во спасе́ние души́, те́м бы́в о́браз смире́ния и послуша́ния. Устроя́я же оби́тель я́ко до́м Животворя́щия Тро́ицы по заве́ту своего́ отца́ преблаже́ннаго Се́ргия, в похвалу́ его́ воздви́гл еси́ це́рковь прекра́сну в Ея́ Трисвято́е И́мя, призва́в вя́щших строи́телей камнесе́чцев и иску́снейших иконопи́сцев Дании́ла и Андре́я. И та́ко бы́сть сия́ це́рковь невреди́ма и доны́не, я́ко чуде́сне Бо́гом храни́мая. Мы́ же, досто́йно и пра́ведно покланя́ющеся Тро́ице Единосу́щней и Неразде́льней на ме́сте се́м, пое́м тебе́ пе́снь хвале́бную:
Ра́дуйся, великоимени́тый Единосу́щныя Тро́ицы пропове́дниче; ра́дуйся, сла́вы Ея́ неизрече́нныя испове́дниче.
Ра́дуйся, в безмо́лвней моли́тве Боже́ственныя Тро́ицы тайнозри́телю; ра́дуйся, преподо́бнаго Се́ргия, служи́теля Святы́я Тро́ицы, ре́вностный после́дователю.
Ра́дуйся, все́х мона́шеских обе́тов благогове́йный храни́телю; ра́дуйся, на ка́мени ве́ры хра́ма души́ своея́ и́стый зижди́телю.
Ра́дуйся, я́ко незы́блемою наде́ждею на Бо́га спаса́лся еси́; ра́дуйся, я́ко во Ца́рствии Небе́снем диади́мою любве́ венча́лся еси́.
Ра́дуйся, Ни́коне, Ра́донежский и всея́ Росси́и чудотво́рче.
Кондак 11
Пе́ние всеумиле́нное прино́сим ти́, о́тче Ни́коне, взира́юще на твое́ богоуго́дное и сла́вное житие́. Позна́в прехожде́ние и тще́тность вре́меннаго ми́ра сего́, че́сти и земны́я сла́вы не иска́л еси́ по за́поведи своего́ учи́теля, но пре́жде всего́ име́л еси́ стра́х Бо́жий и па́мять сме́ртную, смире́ние же с покоре́нием, по́ст и моли́тву. Страннолю́бия не забыва́л еси́, помина́я па́че всего́ ча́с сме́ртный и Второ́е Прише́ствие. Мы́ же взира́юще на о́браз твоего́ ди́внаго жития́, в ра́довании пое́м Бо́гу Человеколю́бцу: Аллилу́иа.
Икос 11
Светоза́рною звездо́ю возсия́л еси́ на сво́де небе́снем, егда́ сконча́л еси́ земно́е стра́нствие и пресели́лся еси́ в оби́тели Царя́ Небе́снаго, и́же угото́вани бы́ша все́м лю́бящим Его́. И ны́не ра́дуешися и весели́шися, я́ко мзда́ твоя́ мно́га на Небеси́. Мы́ же, ча́да твоя́, с любо́вию и благодаре́нием чти́м святу́ю па́мять твою́, с ве́рою притека́юще к честне́й твое́й ра́це, и та́мо с благогове́нием прие́млем просвеще́ние, освяще́ние и очище́ние ду́ш на́ших, благода́рственно пою́ще:
Ра́дуйся, я́ко по́двигом до́брым неосла́бно подвиза́лся еси́; ра́дуйся, я́ко тече́ние у́зкаго, многоско́рбнаго земна́го пути́ сконча́л еси́.
Ра́дуйся, я́ко ве́ру непоколеби́му в Бо́га, в Тро́ице сла́вимаго, соблю́л еси́; ра́дуйся, я́ко вене́ц пра́вды, угото́ванный Мздовоздая́телем Бо́гом, восприя́л еси́.
Ра́дуйся, ле́ствицею духо́вною, восходя́ от си́лы в си́лу, к врата́м рая́ возведе́нный; ра́дуйся, в блаже́нный поко́й Иису́сом Христо́м введе́нный.
Ра́дуйся, та́мо невече́рним све́том осиява́емый; ра́дуйся, ве́чною сла́вою Царя́ царе́й и Го́спода господе́й озаря́емый.
Ра́дуйся, Ни́коне, Ра́донежский и всея́ Росси́и чудотво́рче.
Кондак 12
Благода́ти Бо́жия испо́лнися хра́м души́ твоея́, и сию́ сугу́бую си́лу свы́ше, я́ко ми́лоть дре́вле проро́к Илия́ ученику́ своему́ Елиссе́ю, та́ко низпосла́ тебе́ Се́ргий чудотво́рец по отше́ствии свое́м в го́рний ми́р хода́тайством пред Престо́лом Святы́я Тро́ицы, и яви́ся тобо́ю хра́м назда́нный, я́ко ковче́г заве́тов Се́ргиевых, в не́мже его́ цельбоно́сныя мо́щи а́ки скрижа́ли глаго́лов вели́каго а́ввы дарова́ни су́ть все́м, чту́щим его́ святу́ю па́мять, в благодаре́нии зову́щим Бо́гу: Аллилу́иа.
Икос 12
Пою́ще твое́ предста́тельство пред Престо́лом Присносу́щныя Тро́ицы, ве́руем, я́ко не забу́деши на́с, убо́гих, до конца́, по преселе́нии бо в черто́ги Ца́рствия Небе́снаго твори́ши чудеса́, заблу́ждших вразумля́я, неду́гующих исцеля́я, бе́сных свобожда́я, и вся́ поле́зная на́м да́руя. Приими́ на́ше благодаре́ние, согла́сно пою́щих ти́:
Ра́дуйся, стезе́ю Ева́нгелия от земли́ к Небеси́ возше́дый; ра́дуйся, кре́ст мона́шескаго жития́ безро́потно понесы́й.
Ра́дуйся, и́го Христо́во на ра́мена своя́ ничто́же сумня́ся возложи́вый; ра́дуйся, бре́мя Свое́ Иису́с в легкоту́ в тебе́ преложи́вый.
Ра́дуйся, я́ко ве́чное наслажде́ние ны́не обрета́еши; ра́дуйся, я́ко Тро́ицу со А́нгелы и все́ми святы́ми при́сно прославля́еши.
Ра́дуйся, я́ко дерзнове́нием моли́тв пред Не́ю о все́х, на́с чту́щих тя́, утеша́еши; ра́дуйся, я́ко на́с, в мо́ри жите́йском обурева́емых, окормле́нием не оставля́еши.
Ра́дуйся, Ни́коне, Ра́донежский и всея́ Росси́и чудотво́рче.
Кондак 13
Опречу́дный моли́твенниче и пресла́вный Бо́жий уго́дниче! Приими́ сие́ приле́жное на́ше моле́ние. Испроси́ у Человеколюби́ваго Христа́ Бо́га на́шего ве́ры правосла́вныя утвержде́ние, дело́м милосе́рдия преспе́яние, неду́жным исцеле́ние, согреше́нием на́шим проще́ние, на Стра́шнем Суде́ до́браго отве́та возвеще́ние, да вси́ вку́пе воспое́м Ему́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельское житие́ возревнова́л еси́, слы́ша о пресла́внем игу́мене Ра́донежския оби́тели Животворя́щия Тро́ицы а́вве Се́ргии, к нему́же напра́вил еси́ стопы́ своя́ из гра́да Юрияпо́льска, я́ко а́ще и ю́н бе́, все́ю душе́ю возжа́ждал еси́ узре́ти лице́ чудотво́рца и умоли́ти его́, да прии́мет во о́бщники учени́к свои́х и я́ко до́брый па́стырь да упра́вит пу́ть в Ца́рствие Небе́сное, иде́же е́сть все́х веселя́щихся о Го́споде жили́ще. Те́мже мы́ восхваля́ем тя́, пою́ще:
Ра́дуйся, от ю́ности житие́ во Христе́ возлюби́вый; ра́дуйся, ду́шу ве́тхаго челове́ка в себе́ умертви́вый.
Ра́дуйся, нищету́ духо́вную ра́ди Ца́рствия Небе́снаго избра́вый; ра́дуйся, в пла́чи души́ своея́ по Бо́зе утеше́ние улучи́вый.
Ра́дуйся, кро́тость а́ввы Се́ргия унасле́довавый; ра́дуйся, а́лчущим и жа́ждущим пра́вды Бо́жия после́довавый.
Ра́дуйся, милосе́рдием к стра́ждущим ми́лости от Бо́га себе́ испроси́вый; ра́дуйся, чи́стым се́рдцем Бо́га в Тро́ице сла́вимаго умиле́нно созерца́вый.
Ра́дуйся, Ни́коне, Ра́донежский и всея́ Росси́и чудотво́рче.
Кондак 1
Избра́нный Боже́ственныя Тро́ицы уго́дниче пресла́вный, мона́шеских заве́тов Се́ргия чудотво́рца рачи́телю, духоно́сный наста́вниче христиа́нскаго благоче́стия, я́ко до́бре упа́сл еси́ ста́до слове́сных ове́ц, в дея́ниях бы́л еси́ пра́вило ве́ры и о́браз кро́тости, изря́днейший храмозда́телю оби́тели Тро́ицкия, те́мже с любо́вию и благодаре́нием вси́ зове́м ти́:
Ра́дуйся, Ни́коне, Ра́донежский и всея́ Росси́и чудотво́рче.
Молитвы
Освяще́нная главо́, Це́ркве Правосла́вныя похвало́, святы́й уго́дниче Бо́жий и досточу́дный служи́тель Животворя́щия Тро́ицы, преподо́бне и Богоно́сне о́тче Ни́коне, при́сный учениче́ и блаже́нный насле́дниче а́ввы Се́ргия! Ты́ положи́л еси́ ве́лия труды́, благоустроя́я насажде́нный и́м Бо́жий вертогра́д, до́м Животворя́щия Тро́ицы, луча́ми све́та своего́ озаря́ющ всю́ страну́ на́шу и су́щих в мо́ри дале́че. Кто́ исчи́слит твоя́ по́двиги, нощны́я бде́ния, сле́зы умиле́ния, серде́чныя моли́твы и душе́вныя воздыха́ния; кто́ ви́де твою́ неуста́нную бра́нь с духа́ми зло́бы поднебе́сными; кто́ слы́ша глаго́лы благодаре́ния, исходя́щия из у́ст твои́х, егда́ Влады́ка Госпо́дь избавля́ше тя́ в лю́тых обстоя́ниих и вра́жеских напа́стех; вои́стину от ю́ности ты́ благоугоди́л еси́ Подвигополо́жнику Христу́ все́м свои́м житие́м и умно́жил еси́ да́нныя тебе́ Бо́гом тала́нты во спасе́ние души́ своея́ и вруче́ннаго тебе́ ста́да слове́сных ове́ц. Приими́, о́тче святы́й, на́шу хвалу́ и благодаре́ние за вся́ твоя́ моли́твы о чту́щих святу́ю па́мять твою́, да вне́млет Всеблаги́й Госпо́дь твоему́ предста́тельству пред Ни́м о на́с, немощны́х и убо́гих рабе́х Его́. Помози́ ча́дом твои́м, в и́ночестве подвиза́ющимся и с ве́рою притека́ющим ко гро́бу твоему́, да никто́ от ни́х впаде́т в се́ти вра́жия и да не поги́бнет для жи́зни ве́чныя. Умоли́ Нача́льника жи́зни Христа́, да изведе́т из темни́цы души́ на́ша и напра́вит стопы́ на́ша к Ца́рству ве́чных бла́г, иде́же непреста́нно сла́вится Пречестно́е и Великоле́пое и́мя Отца́ и Сы́на и Свята́го Ду́ха. Ами́нь.
Преподо́бне и преблаже́нне о́тче на́ш Ни́коне, подража́телю и сподви́жниче и насле́дниче дарова́ний Богоно́снаго отца́ на́шего Се́ргия, и́же и честны́я своя́ мо́щи в рука́х твои́х, я́коже Илия́ ми́лоть свою́ в рука́х Елиссе́я, оста́вил е́сть, тобо́ю в зе́млю сокрыва́емыя, не а́ки в погребе́ние, но во удостовере́ние нетле́ния, и тобо́ю открыва́емыя в явле́ние чуде́с и во оби́льнейшее излия́ние исто́чника исцеле́ний. К тебе́, ку́пно с ни́м на Небесе́х живу́щему, и ку́пно с ни́м на земли́ блаже́нне почива́ющему, с любо́вию простира́ем серде́чныя жела́ния и моле́бная словеса́, тебе́ предлага́юще на́ша не́мощи и ско́рби, и ну́жды, душе́вныя же и теле́сныя. Приими́ недосто́йная на́ша моле́ния и твое́ю све́тлою и кре́пкою моли́твою очи́сти, соверши́, и вознеси́ ко Многоми́лостивому и Великодарови́тому Влады́це на́шему Го́споду и Бо́гу Иису́су Христу́, да благослови́т и сохрани́т страну́ на́шу и святу́ю Оби́тель сию́ в ми́ре и тишине́. На́м же все́м да пода́ст благода́тию Свое́ю грехо́в оставле́ние, жития́ исправле́ние, неду́гов исцеле́ние, от бе́д избавле́ние, от искуше́ний избы́тие и освобожде́ние, в ско́рбех утеше́ние, в ну́ждах благовре́менну по́мощь, наипа́че же в ве́ре преспе́яние, в наде́жде утвержде́ние, в любви́ возраста́ние, ду́ш на́ших спасе́ние, я́ко да и во вре́меннем се́м житии́, соверше́ннее же в ве́чном его́ Ца́рствии, вы́ну прино́сим Ему́ сла́ву, че́сть и поклоне́ние, со Безнача́льным Его́ Отце́м, и Пресвяты́м и Благи́м, и Животворя́щим Его́ Ду́хом, во ве́ки веко́в. Ами́нь.
Конда́къ а҃
И҆збра́нный бжⷭ҇твенныѧ трⷪ҇цы ᲂу҆го́дниче пресла́вный, мона́шескихъ завѣ́тѡвъ се́ргїа чꙋдотво́рца рачи́телю, дх҃оно́сный наста́вниче хрⷭ҇тїа́нскагѡ бл҃гоче́стїѧ, ꙗ҆́кѡ до́брѣ ᲂу҆па́слъ є҆сѝ ста́до слове́сныхъ ѻ҆ве́цъ, въ дѣѧ́нїѧхъ бы́лъ є҆сѝ пра́вило вѣ́ры и҆ ѡ҆́бразъ кро́тости, и҆зрѧ́днѣйшїй храмозда́телю ѻ҆би́тели трⷪ҇цкїѧ, тѣ́мже съ любо́вїю и҆ бл҃годаре́нїемъ всѝ зове́мъ тѝ:
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
І҆́косъ а҃
А҆́гг҃льское житїѐ возревнова́лъ є҆сѝ, слы́ша ѡ҆ пресла́внѣмъ и҆гꙋ́менѣ ра́донежскїѧ ѻ҆би́тели животворѧ́щїѧ трⷪ҇цы а҆́ввѣ се́ргїи, къ немꙋ́же напра́вилъ є҆сѝ стѡпы̀ своѧ̑ и҆з̾ гра́да ю҆рїѧпо́льска, ꙗ҆́кѡ а҆́ще и҆ ю҆́нъ бѣ̀, все́ю дꙋше́ю возжа́ждалъ є҆сѝ ᲂу҆зрѣ́ти лицѐ чꙋдотво́рца и҆ ᲂу҆моли́ти є҆го̀, да прїи́метъ во ѻ҆́бщники ᲂу҆чени́къ свои́хъ и҆ ꙗ҆́кѡ до́брый па́стырь да ᲂу҆пра́витъ пꙋ́ть въ црⷭ҇твїе нбⷭ҇ное, и҆дѣ́же є҆́сть всѣ́хъ веселѧ́щихсѧ ѡ҆ гдⷭ҇ѣ жили́ще. Тѣ́мже мы̀ восхвалѧ́емъ тѧ̀, пою́ще:
Ра́дꙋйсѧ, ѿ ю҆́ности житїѐ во хрⷭ҇тѣ̀ возлюби́вый: ра́дꙋйсѧ, дш҃ꙋ ве́тхагѡ человѣ́ка въ себѣ̀ ᲂу҆мертви́вый.
Ра́дꙋйсѧ, нищетꙋ̀ дх҃о́внꙋю ра́ди црⷭ҇твїѧ нбⷭ҇нагѡ и҆збра́вый: ра́дꙋйсѧ, въ пла́чи дш҃ѝ своеѧ̀ по бз҃ѣ ᲂу҆тѣше́нїе ᲂу҆лꙋчи́вый.
Ра́дꙋйсѧ, кро́тость а҆́ввы се́ргїа ᲂу҆наслѣ́довавый: ра́дꙋйсѧ, а҆́лчꙋщымъ и҆ жа́ждꙋщымъ пра́вды бж҃їѧ послѣ́довавый.
Ра́дꙋйсѧ, млⷭ҇рдїемъ къ стра́ждꙋщымъ млⷭ҇ти ѿ бг҃а себѣ̀ и҆спроси́вый: ра́дꙋйсѧ, чи́стымъ срⷣцемъ бг҃а въ трⷪ҇цѣ сла́вимаго ᲂу҆миле́ннѡ созерца́вый.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ в҃
Ви́дѧ сꙋетꙋ̀ сꙋе́тъ мі́ра сегѡ̀ во ѕлѣ̀ лежа́щагѡ, скороги́бнꙋщꙋю красотꙋ̀ є҆гѡ̀ и҆ пре́лесть земны́хъ бла́гъ, тлѣ́нїю прича́стныхъ, ꙗ҆́вѣ ѿри́нꙋлъ є҆сѝ, восхотѣ́лъ бо є҆сѝ, ꙗ҆́кѡ вѣ́рный и҆ бл҃гі́й ра́бъ, є҆ди́номꙋ гдⷭ҇еви нелѣ́ностнѡ порабо́тати, въ ра́дости воспѣва́ѧ є҆мꙋ̀: А҆ллилꙋ́їа.
І҆́косъ в҃
Ра́зꙋмомъ, ѿ дх҃а ст҃а́гѡ просвѣще́ннымъ, прови́дѧ твоѐ бг҃оꙋго́дное житїѐ, посла́ тѧ бг҃омꙋ́дрый се́ргїй въ ѻ҆би́тель высо́цкꙋю къ ᲂу҆ченикꙋ̀ своемꙋ̀ а҆ѳана́сїю, мꙋ́жꙋ ѕѣлѡ̀ добродѣ́тельномꙋ, да и҆спыта́етъ дш҃ꙋ твою̀ въ любвѝ ко хрⷭ҇тꙋ̀ и҆ въ ре́вности къ по́двигѡмъ и҆́ноческимъ, и҆́же и҆ да ᲂу҆досто́итъ тѧ̀ прїѧ́тїѧ мона́шескагѡ чи́на. Сегѡ̀ ра́ди зове́мъ тѝ:
Ра́дꙋйсѧ, вѣ́рою и҆змла́да прѧмы́ми стезѧ́ми пред̾ бг҃омъ ходи́вый: ра́дꙋйсѧ, въ наде́жди жи́зни вѣ́чныѧ стѡпы̀ своѧ̑ горѣ̀ напра́вивый.
Ра́дꙋйсѧ, любо́вїю ко хрⷭ҇тꙋ̀ се́рдце своѐ сла́дцѣ ᲂу҆ѧзви́вый: ра́дꙋйсѧ, ре́вностїю къ житїю̀ мона́шескомꙋ мнѡ́гїѧ ᲂу҆диви́вый.
Ра́дꙋйсѧ, ѡ҆бѣ́та послꙋша́нїѧ до́блїй и҆сполни́телю: ра́дꙋйсѧ, чистото́ю цѣломꙋ́дрїѧ хра́ма дш҃ѝ своеѧ̀ ᲂу҆краси́телю.
Ра́дꙋйсѧ, ꙗ҆́кѡ стѧжа́нїемъ дх҃а ст҃а́гѡ всѧ̑ бла́га мі́ра сегѡ̀ презрѣ́лъ є҆сѝ: ра́дꙋйсѧ, ꙗ҆́кѡ нищетꙋ̀ хрⷭ҇то́вꙋ па́че зла́та и҆ сребра̀ возлюби́лъ є҆сѝ.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ г҃
Си́лою свы́ше ѡ҆сѣнѧ́емый, возше́дъ на го́рꙋ мона́шескагѡ преспѣ́ѧнїѧ, всѧ̑ кѡ́зни дꙋшетлѣ́ннагѡ велїа́ра дїа́вола разрꙋши́лъ є҆сѝ и҆, внегда̀ дости́же мѣ́рꙋ во́зраста, премꙋ́дрости и҆ ра́зꙋма, возжела́лъ є҆сѝ возврати́тисѧ къ ѻ҆тцꙋ̀ своемꙋ̀ дх҃о́вномꙋ се́ргїю, да прїи́метъ тѧ̀ въ свою̀ ѻ҆би́тель и҆ причте́тъ бг҃олюби́вой бра́тїи є҆ѧ̀. И҆ се́й па́стырь до́брый а҆́бїе прїѧ́тъ тѧ̀. Ви́дѣвъ же дꙋхо́вныма ѻ҆чи́ма благода́ть, ꙗ҆́же въ тебѣ̀, ѻ҆́тче ні́кѡне, въ ра́дованїи возгласѝ бг҃ꙋ: А҆ллилꙋ́їа.
І҆́косъ г҃
И҆мѣ́ѧ крѣ́пкое произволе́нїе ѡ҆ спасе́нїи дш҃ѝ своеѧ̀, всеконе́чнѡ преда́лсѧ є҆сѝ води́тельствꙋ бг҃омꙋ́драгѡ ᲂу҆чи́телѧ мона́шескагѡ дѣ́ланїѧ се́ргїа, и҆́же ᲂу҆зрѣ́въ твоѐ ᲂу҆се́рдїе подвиза́тисѧ въ трꙋдѣ́хъ поста̀ и҆ моли́твы, содѣ́ла тѧ̀ свои́мъ возлю́бленнымъ сотаи́нникомъ. Мы́ же, воспѣва́ѧ вели́чїе по́двигѡвъ твои́хъ, взыва́емъ тѝ си́це:
Ра́дꙋйсѧ, равноа́гг҃льнагѡ житїѧ̀ подража́телю: ра́дꙋйсѧ, би́сера црⷭ҇тва нбⷭ҇нагѡ ᲂу҆се́рдный и҆ска́телю.
Ра́дꙋйсѧ, гдⷭ҇ꙋ домовлⷣцѣ ꙗ҆́кѡ вѣ́рный и҆ благі́й ра́бъ послꙋжи́вый: ра́дꙋйсѧ, всю̀ наде́ждꙋ на спасе́нїе дш҃ѝ своеѧ̀ на бг҃а возложи́вый.
Ра́дꙋйсѧ, всего̀ себѐ ѻ҆тцꙋ̀ дх҃о́вномꙋ покори́вый: ра́дꙋйсѧ, ко гра́дꙋ нбⷭ҇номꙋ по стопа́мъ є҆гѡ̀ бл҃гоше́ствовавый.
Ра́дꙋйсѧ, мно́гихъ дарѡ́въ бг҃омꙋ́драгѡ а҆́ввы соприча́стниче: ра́дꙋйсѧ, при́сный є҆гѡ̀ въ бг҃омы́слїи собесѣ́дниче.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ д҃
Бꙋ́ри жите́йскихъ волне́нїй неприча́стенъ бы́лъ є҆сѝ, є҆гда̀ всели́лсѧ є҆сѝ въ ти́хое приста́нище ѻ҆би́тели ра́донежскїѧ. Въ по́двизѣхъ же неꙋста́нныхъ, ꙗ҆́кѡ фі́нїѯъ, процвѣ́лъ є҆сѝ, восходѧ̀, бг҃ꙋ благода́тїю вспомоществꙋ́ющꙋ, ѿ си́лы въ си́лꙋ, и҆ сѐ, а҆́вва се́ргїй, и҆́же въ не́мощи во́зраста тогда̀ сꙋ́ща, возложѝ на тѧ̀, ꙗ҆́кѡ на прее́мника, води́тельство ста́да хрⷭ҇то́ва. Ты́ же смире́ннѡ воспрїѧ́лъ є҆сѝ крⷭ҇тъ чинонача́лїѧ и҆ та́кѡ преспѣ́лъ є҆сѝ съ бл҃годаре́нїемъ зовы́й гдⷭ҇ꙋ пастыренача́льникꙋ: А҆ллилꙋ́їа.
І҆́косъ д҃
Слы́ша наро́дъ правосла́вный ѡ҆ бл҃же́ннѣй кончи́нѣ вели́кагѡ а҆́ввы се́ргїа, возскорбѣ́ша ѕѣлѡ̀, ꙗ҆́кѡ лише́ни бы́ша всѝ такова́гѡ дх҃о́внагѡ наста́вника и҆ чꙋдотво́рца. Ѻ҆ба́че ᲂу҆тѣ́шени бы́ша, ви́дѧще досто́йнаго и҆ добронра́внаго ᲂу҆ченика̀ є҆гѡ̀, и҆́же по послꙋша́нїю понесѐ мнѡ́гїѧ трꙋды̀ ѡ҆кормле́нїѧ ста́да хрⷭ҇то́ва. Сегѡ̀ ра́ди воспѣва́емъ тѝ, въ ра́дости зовꙋ́ще:
Ра́дꙋйсѧ, стра̑сти жите́йскагѡ мі́ра побѣди́вый: ра́дꙋйсѧ, всѧ̑ за́повѣди хрⷭ҇то́вы и҆спо́лнивый.
Ра́дꙋйсѧ, на го́рꙋ соверше́нства дх҃о́внагѡ возше́дый: ра́дꙋйсѧ, мно́гихъ дарѡ́въ бж҃їихъ ᲂу҆досто́ивыйсѧ.
Ра́дꙋйсѧ, се́ргїа а҆́ввы достохва́льный наслѣ́дниче: ра́дꙋйсѧ, и҆гꙋ́менства є҆гѡ̀ многорачи́тельный прее́мниче.
Ра́дꙋйсѧ, лозы̀ хрⷭ҇то́вы розго̀ многопло́днаѧ: ра́дꙋйсѧ, ни́во, въ добродѣ́телѣхъ плодоро́днаѧ.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ є҃
Бг҃оте́чнѣй ѕвѣздѣ̀ подо́бѧсѧ, свѣ́томъ бл҃года́ти бж҃їѧ ꙗ҆́же въ тебѣ̀, ѡ҆зарѧ́лъ є҆сѝ пꙋ́ть къ црⷭ҇твїю нбⷭ҇номꙋ приходѧ́щымъ къ тебѣ̀ съ вѣ́рою и҆ наде́ждею на спасе́нїе. Мно́зи бо трꙋжда́ющыѧсѧ и҆ ѡ҆бремене́ннїи ѡ҆сꙋети́шасѧ въ земны́хъ попече́нїихъ и҆ въ ᲂу҆ны́нїе впадо́ша, позна́вше же тѧ̀, ꙗ҆́кѡ мꙋ́драго наста́вника и҆ пꙋтеводи́телѧ въ ѻ҆би́тели нбⷭ҇ныѧ, со тща́нїемъ и҆ вѣ́рою теча́хꙋ къ тебѣ̀, въ ра́дости пою́ще бг҃ꙋ: А҆ллилꙋ́їа.
І҆́косъ є҃
Ви́дѧ по́двиги и҆́нокѡвъ ста́да своегѡ̀, несꙋ́щихъ и҆́го хрⷭ҇то́во въ кро́тости и҆ смире́нїи, вседꙋ́шнѡ ра́довалсѧ є҆сѝ и҆́хъ преспѣ́ѧнїю: ѻ҆ба́че скорбѣ́лъ и҆ сле́знѡ моли́лсѧ є҆сѝ ѡ҆ нѣ́цыихъ, и҆̀же въ лѣ́ности и҆ нерадѣ́нїи сꙋ́щихъ, да не погꙋби́тъ и҆́хъ до конца̀ вра́гъ спасе́нїѧ, ꙗ҆́кѡ ле́въ рыка́ющїй, и҆ща̀ кого̀ поглоти́ти. Мы́ же диви́мсѧ твое́й ре́вности дш҃епопечи́тельства ѡ҆ бра́тїи и҆ съ ᲂу҆миле́нїемъ пое́мъ тебѣ̀:
Ра́дꙋйсѧ, житїѧ̀ въ по́двизѣхъ мона́шескихъ смире́нный наста́вниче: ра́дꙋйсѧ, бра́тїи во хрⷭ҇тѣ̀ кро́ткїй чинонача́льниче.
Ра́дꙋйсѧ, ᲂу҆се́рдный сѣ́ѧтелю є҆ѵⷢ҇льскагѡ ᲂу҆че́нїѧ: ра́дꙋйсѧ, до́брый дѣ́лателю па́стырскагѡ дш҃епопече́нїѧ.
Ра́дꙋйсѧ, проти́вꙋ дꙋхѡ́въ ѕло́бы мꙋ́жественный вои́телю: ра́дꙋйсѧ, те́мныхъ си́лъ а҆́да до́блестный побѣди́телю.
Ра́дꙋйсѧ, ꙗ҆́кѡ тобо́ю ста́до слове́сныхъ ѻ҆ве́цъ ᲂу҆множа́етсѧ: ра́дꙋйсѧ, ꙗ҆́кѡ тебѐ ра́ди пото́цы бж҃їѧ бл҃года́ти на него̀ и҆сточа́ютсѧ.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ ѕ҃
Проповѣ́дникъ вели́кихъ мона́шескихъ по́двигѡвъ и҆ бг҃одꙋхнове́нныхъ завѣ́тѡвъ своегѡ̀ ᲂу҆чи́телѧ, бл҃же́ннагѡ се́ргїа, бы́лъ є҆сѝ, во всѣ́хъ трꙋдѣ́хъ со тща́нїемъ подража́ѧ є҆мꙋ̀, въ по́тѣ же лица̀ воздѣ́лывалъ є҆сѝ дх҃о́вный вертогра́дъ, врꙋче́нный тѝ а҆́ввою, є҆щѐ жи́вꙋ є҆мꙋ̀ сꙋ́щꙋ, и҆ та́кѡ до́брїи плоды̀ собира́лъ є҆сѝ во времена̀ своѧ̑, ᲂу҆слажда́ѧ всѣ́хъ и҆ поѧ̀ бг҃ꙋ: А҆ллилꙋ́їа.
І҆́косъ ѕ҃
Возсїѧ̀ по лицꙋ̀ всеѧ̀ землѝ рꙋ́сскїѧ сла́ва ра́донежскїѧ ѻ҆би́тели, въ ню́же ꙗ҆́кѡ въ вертогра́дъ сла́достный течѐ мно́жество и҆́щꙋщихъ по́мощи въ бѣда́хъ и҆ напа́стехъ, и҆̀же ѡ҆брѣто́ша та́мѡ наде́ждꙋ на мл҃твы твоѧ̑ и҆ те́плое хода́тайство пред̾ прⷭ҇то́ломъ цр҃ѧ̀ нбⷭ҇нагѡ. Тѣ́мже позна́ша тѧ̀ ско́раго помо́щника въ земно́й ю҆до́ли и҆ въ ра́дость прїидо́ша, съ ᲂу҆миле́нїемъ тебѣ̀ пою́ще:
Ра́дꙋйсѧ, и҆́стинный по́двигѡвъ своегѡ̀ а҆́ввы послѣ́дователю: ра́дꙋйсѧ, всѣ́хъ є҆гѡ̀ дх҃о́вныхъ завѣща́нїй и҆сполни́телю.
Ра́дꙋйсѧ, мона́шескагѡ ᲂу҆ста́ва неѿстꙋ́пный блюсти́телю: ра́дꙋйсѧ, къ соверше́нствꙋ и҆́ноческихъ добродѣ́телей пꙋтеводи́телю.
Ра́дꙋйсѧ, пле́велъ на ни́вѣ бж҃їей и҆скорени́телю: ра́дꙋйсѧ, вїногра́да хрⷭ҇то́ва и҆скꙋ́сный насади́телю.
Ра́дꙋйсѧ, ꙗ҆́кѡ тобо́ю ра́донежскаѧ пꙋ́стынь сла́внѡ распростани́сѧ: ра́дꙋйсѧ, ꙗ҆́кѡ тобо́ю цр҃ковь рꙋ́сскаѧ возвесели́сѧ.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ з҃
Хотѧ̀ глꙋбино́ю про́мысла всѧ̑ стро́ити и҆ лꙋ́чшее всѣ́мъ даѧ́ти, и҆збра́ тѧ гдⷭ҇ь, ꙗ҆́кѡ сподви́жника а҆́ввы се́ргїа, досто́йнымъ є҆гѡ̀ прее́мникомъ и҆ па́стыремъ на па́житехъ ра́донежскихъ бы́ти. Ты́ же ꙗ҆́кѡ до́браѧ свѣща̀, горѣ́лъ є҆сѝ дх҃омъ вѣ́ры и҆ неꙋсы́пнѡ поꙋча́лъ є҆сѝ ста́до слове́сныхъ ѻ҆ве́цъ, во є҆́же ходи́ти въ за́повѣдехъ гдⷭ҇нихъ, со стра́хомъ и҆ тре́петомъ соверша́ѧ слꙋже́нїе бг҃ꙋ вседержи́телю, да и҆ ті́и съ сыно́внимъ бл҃годаре́нїемъ всегда̀ сла́вѧтъ пречⷭ҇тно́е и҆ великолѣ́пое и҆́мѧ ст҃ы́ѧ живонача́льныѧ трⷪ҇цы, пою́ще: А҆ллилꙋ́їа.
І҆́косъ з҃
Но́ваго застꙋ́пника пред̾ прⷭ҇то́ломъ бж҃їимъ ᲂу҆зрѣ́ тѧ всѧ̑ страна̀ рꙋ́сскаѧ, ꙗ҆́кѡ вои́стиннꙋ въ тебѣ̀ млⷭ҇ть и҆ и҆́стина срѣто́стѣсѧ, пра́вда и҆ ми́ръ ѡ҆блобыза́стасѧ, и҆ вѣ́дꙋще тѧ̀, такова́го дш҃е́ю чⷭ҇тою пред̾ трїеди́нымъ бг҃омъ, могꙋ́щаго ᲂу҆молѧ́ти є҆го̀, да всѝ є҆ди́ни бꙋ́дꙋтъ, ꙗ҆́кѡже заповѣ́далъ вели́кїй а҆́вва се́ргїй, слꙋжи́тель трⷪ҇цы. Тѣ́мже благода́рнѣ зовꙋ́ще, пое́мъ тѝ:
Ра́дꙋйсѧ, наро́да страны̀ рѡссі́йскїѧ неꙋсы́пный храни́телю: ра́дꙋйсѧ, прибѣга́ющихъ къ тебѣ̀ въ ча́съ ѕлы́хъ нападе́нїй вра́жескихъ защи́тителю.
Ра́дꙋйсѧ, мнѡ́гїѧ заблꙋ́ждшїѧ ѻ҆́вцы ѿ грѣхо́внагѡ пꙋтѝ ѡ҆брати́вый: ра́дꙋйсѧ, мно́жества стра́ждꙋщихъ печа́ль въ ра́дость премѣни́вый.
Ра́дꙋйсѧ, ненави́стнꙋю ро́знь средѝ є҆диноплеме́нникѡвъ возбрани́вый: ра́дꙋйсѧ, вожделѣ́нное є҆дине́нїе средѝ ни́хъ во и҆́мѧ трⷪ҇цы насади́вый.
Ра́дꙋйсѧ, всѣ́мъ житїе́мъ свои́мъ трⷪ҇цꙋ є҆диносꙋ́щнꙋю просла́вивый: ра́дꙋйсѧ, во и҆́мѧ є҆ѧ̀ па́ствꙋ свою̀ є҆диномы́сленнѡ жи́ти наста́вивый.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ и҃
Стра́нное ѿше́ствїе твоѐ въ затво́ръ ви́дѣвше бра́тїѧ, ѕѣлѡ̀ возскорбѣ́ша, ꙗ҆́кѡ ѻ҆́вцы без̾ па́стырѧ пребыва́хꙋ, до́ндеже даде́сѧ є҆́й є҆ди́нъ ѿ ни́хъ бл҃гоговѣ́йный са́вва, ѻ҆ба́че и҆ то́й вма́лѣ ѡ҆ста́ви и҆гꙋ́менство по смире́нїю. Тогда̀ и҆́ноцы ᲂу҆моли́ша па́ки бл҃же́ннаго ні́кѡна ста́ти и҆́хъ пꙋтеводи́телемъ, въ ра́дости пою́ще бг҃ꙋ, всѧ̑ во бла́го ᲂу҆строѧ́ющꙋ: А҆ллилꙋ́їа.
І҆́косъ и҃
Всѧ̑ гра́ды и҆ ве́си рꙋ́сскїѧ смѧто́шасѧ, є҆гда̀ бы́сть наше́ствїе безбо́жныхъ а҆га́рѧнъ. Та́кожде стра́хомъ и҆ тре́петомъ ѡ҆б̾ѧ́та бы́сть ра́донежскаѧ ѻ҆би́тель ѿ грѧдꙋ́щагѡ ѕлострада́нїѧ, ꙗ҆́коже и҆ ст҃ы́й се́ргїй со двѣма̀ ст҃и́телема петро́мъ и҆ а҆леѯі́емъ въ ꙗ҆вле́нїи тебѣ̀, прпⷣбне ні́кѡне, предречѐ вско́рѣ бы́ти разоре́нїю ѻ҆би́тели, ѻ҆ба́че да не впаде́тъ кто̀ во ᲂу҆ны́нїе, поне́же послѣдѝ па́ки процвѣте́тъ сїѧ̀ ѻ҆би́тель па́че пре́жнїѧ. Сегѡ̀ ра́ди вопїе́мъ тѝ:
Ра́дꙋйсѧ, безмо́лвїе затво́ра ѕѣлѡ̀ возлюби́вый: ра́дꙋйсѧ, всю̀ наде́ждꙋ на во́лю бж҃їю возложи́вый.
Ра́дꙋйсѧ, ꙗ҆́кѡ во днѝ тѧ́жкихъ и҆спыта́нїй ника́коже въ ᲂу҆ны́нїе впа́далъ є҆сѝ: ра́дꙋйсѧ, ꙗ҆́кѡ бра́тїю въ часы̀ лю́тыхъ и҆скꙋше́нїй ника́коже ѡ҆ставлѧ́лъ є҆сѝ.
Ра́дꙋйсѧ, ѿкрове́нїѧ свы́ше ѡ҆ сꙋдьбѣ̀ ѻ҆би́тели ᲂу҆досто́ивыйсѧ: ра́дꙋйсѧ, до́брагѡ ѡ҆бѣтова́нїѧ ѡ҆ не́й сподо́бивыйсѧ.
Ра́дꙋйсѧ, въ крѣ́пкомъ ᲂу҆пова́нїи на промышле́нїе бж҃їе поко́й ѡ҆брѣта́ѧй: ра́дꙋйсѧ, бл҃годаре́нїе гдⷭ҇ꙋ за всѧ̑ и҆спыта̑нїѧ незабве́ннѣ возсыла́ѧй.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ ѳ҃
Всѐ ᲂу҆пова́нїе возложи́въ на по́мощь нбⷭ҇нꙋю по ѿше́ствїи ѕловре́дныхъ и҆ноплемє́нникъ, па́ки собра́лъ є҆сѝ свою̀ бра́тїю на мѣ́сто, и҆дѣ́же вразѝ дерзнꙋ́ша сожещѝ ѻ҆би́тель, и҆ мно́зи трꙋды̀ положи́лъ є҆сѝ, да возроди́тсѧ ѻ҆́наѧ ра́ди спасе́нїѧ и҆́нокѡвъ, жа́ждꙋщихъ по́двигѡвъ бл҃гоче́стїѧ: и҆, ѽ чꙋдесѐ! ско́рѡ число̀ насе́льникѡвъ ѻ҆би́тели ᲂу҆мно́жишасѧ. Дивѧ́сѧ же семꙋ̀ бж҃їю попече́нїю, воспѣ́лъ є҆сѝ въ ра́дости: А҆ллилꙋ́їа.
І҆́косъ ѳ҃
Виті̑и многоглаго́ливїи не мо́гꙋтъ и҆зрещѝ си́лꙋ твои́хъ по́двигѡвъ, и҆́миже неꙋста́ннѡ сла́вилъ є҆сѝ живонача́льнꙋю трⷪ҇цꙋ, во ѡ҆́бразъ любвѐ трїе́хъ ли́цъ є҆ѧ̀ ѻ҆ц҃а̀, и҆ сн҃а, и҆ ст҃а́гѡ дх҃а, насажда́ѧ добродѣ́тєли хрⷭ҇тїа́нскїѧ любвѐ, смире́нїѧ и҆ послꙋша́нїѧ посредѣ̀ бра́тїи, подража́ѧ и҆збра́нникꙋ и҆ слꙋжи́телю ст҃ы́ѧ трⷪ҇цы великосла́вномꙋ се́ргїю. Мы́ же, хва́лѧще твою̀ ре́вность, ꙗ҆́же по бз҃ѣ, съ бл҃годаре́нїемъ зове́мъ тѝ:
Ра́дꙋйсѧ, живонача́льныѧ трⷪ҇цы хра́ме ѡ҆дш҃евле́нный: ра́дꙋйсѧ, мно́гихъ дарѡ́въ, свы́ше ниспосла́нныхъ сосꙋ́де бл҃гоꙋха́нный.
Ра́дꙋйсѧ, въ слꙋже́нїи ст҃ѣ́й трⷪ҇цѣ а҆́ввы се́ргїа сотаи́нниче. ра́дꙋйсѧ, въ почита́нїи є҆ѧ̀ и҆́мени бра́тїи своеѧ̀ чꙋ́дный наста́вниче.
Ра́дꙋйсѧ, ꙗ҆́кѡ чистото́ю се́рдца та́йнꙋ бжⷭ҇тва̀ трⷪ҇цы созерца́лъ є҆сѝ: ра́дꙋйсѧ, ꙗ҆́кѡ глꙋбино́ю вѣ́ры дш҃ѝ своеѧ̀ любо́вь тричи́сленныхъ ли́цъ є҆ѧ̀ познава́лъ є҆сѝ.
Ра́дꙋйсѧ, ꙗ҆́кѡ безмо́лвнымъ бг҃омы́слїемъ то́чїю гѡ́рнѧѧ, а҆ не земна́ѧ помышлѧ́лъ є҆сѝ: ра́дꙋйсѧ, ꙗ҆́кѡ црⷭ҇твїе бж҃їе, а҆́ки вѣ́чнꙋю красотꙋ̀, внꙋ́трь се́рдца воспрїѧ́лъ є҆сѝ.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ і҃
Спастѝ хотѧ̀ дш҃ꙋ свою̀, пло́ть свою̀ распѧ́лъ є҆сѝ со страстьмѝ и҆ похотьмѝ, и҆ ꙗ҆́кѡ сто́лпъ, досѧза́ѧй нб҃съ, свѣти́лъ є҆сѝ во тмѣ̀ но́щи да́же до кра́ѧ землѝ рꙋ́сскїѧ: вси́ бо стра́ждꙋщїи и҆ ѡ҆бремене́ннїи теча́хꙋ къ тебѣ̀ съ вѣ́рою, ꙗ҆́кѡ къ скоропослꙋ́шномꙋ помо́щникꙋ и҆ дерзнове́нномꙋ хода́таю пред̾ прⷭ҇то́ломъ ст҃ы́ѧ трⷪ҇цы, воспѣва́юще є҆́й со ᲂу҆миле́нїемъ: А҆ллилꙋ́їа.
І҆́косъ і҃
Стѣна̀ ѡ҆брѣ́тесѧ всѣ̑мъ съ вѣ́рою къ тебѣ̀ прибѣга́ющымъ, не чꙋ́ждъ бы́лъ є҆сѝ бра́тїи свое́й, но послꙋжи́лъ є҆́й є҆сѝ ꙗ҆́кѡ ра́бъ во спасе́нїе дш҃ѝ, тѣ̑мъ бы́въ ѻ҆́бразъ смире́нїѧ и҆ послꙋша́нїѧ. Оу҆строѧ́ѧ же ѻ҆би́тель, ꙗ҆́кѡ до́мъ животворѧ́щїѧ трⷪ҇цы по завѣ́тꙋ своегѡ̀ ѻ҆тца̀ пребл҃же́ннагѡ се́ргїа, въ похвалꙋ̀ є҆гѡ̀ воздви́глъ є҆сѝ цр҃ковь прекра́снꙋ въ є҆ѧ̀ трист҃о́е и҆́мѧ, призва́въ вѧ́щшихъ строи́телей камнесѣ́чцєвъ и҆ и҆скꙋ́снейшихъ і҆кѡнопи́сцєвъ данїи́ла и҆ а҆ндре́ѧ. И҆ та́кѡ бы́сть сїѧ̀ цр҃ковь невреди́ма и҆ доны́нѣ, ꙗ҆́кѡ чꙋде́снѣ бг҃омъ храни́маѧ. Мы́ же, досто́йнѡ и҆ првⷣнѡ покланѧ́ющесѧ трⷪ҇цѣ є҆диносꙋ́щнѣй и҆ нераздѣ́льнѣй на мѣ́стѣ се́мъ, пое́мъ тебѣ̀ пѣ́снь хвале́бнꙋю:
Ра́дꙋйсѧ, великоимени́тый є҆диносꙋ́щныѧ трⷪ҇цы проповѣ́дниче: ра́дꙋйсѧ, сла́вы є҆ѧ̀ неизрече́нныѧ и҆сповѣ́дниче.
Ра́дꙋйсѧ, въ безмо́лвнѣй моли́твѣ бжⷭ҇твенныѧ трⷪ҇цы тайнозри́телю: ра́дꙋйсѧ, прпⷣбнагѡ се́ргїа, слꙋжи́телѧ ст҃ы́ѧ трⷪ҇цы, ре́вностный послѣ́дователю.
Ра́дꙋйсѧ, всѣ́хъ мона́шескихъ ѡ҆бѣ́тѡвъ бл҃гоговѣ́йный храни́телю: ра́дꙋйсѧ, на ка́мени вѣ́ры хра́ма дш҃ѝ своеѧ̀ и҆́стый зижди́телю.
Ра́дꙋйсѧ, ꙗ҆́кѡ незы́блемою наде́ждею на бг҃а сп҃са́лсѧ є҆сѝ: ра́дꙋйсѧ, ꙗ҆́кѡ во црⷭ҇твїи нбⷭ҇нѣмъ дїади́мою любвѐ вѣнча́лсѧ є҆сѝ.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ а҃і
Пѣ́нїе всеꙋмиле́нное прино́симъ тѝ, ѻ҆́тче ні́кѡне, взира́юще на твоѐ бг҃оꙋго́дное и҆ сла́вное житїѐ. Позна́въ прехожде́нїе и҆ тще́тность вре́меннагѡ мі́ра сегѡ̀, че́сти и҆ земны́ѧ сла́вы не и҆ска́лъ є҆сѝ по за́повѣди своегѡ̀ ᲂу҆чи́телѧ, но пре́жде всегѡ̀ и҆мѣ́лъ є҆сѝ стра́хъ бж҃їй и҆ па́мѧть сме́ртнꙋю, смире́нїе же съ покоре́нїемъ, по́стъ и҆ мл҃твꙋ. Страннолю́бїѧ не забыва́лъ є҆сѝ, помина́ѧ па́че всегѡ̀ ча́съ сме́ртный и҆ второ́е прише́ствїе. Мы́ же взира́юще на ѡ҆́бразъ твоегѡ̀ ди́внагѡ житїѧ̀, въ ра́дованїи пое́мъ бг҃ꙋ чл҃вѣколю́бцꙋ: А҆ллилꙋ́їа.
І҆́косъ а҃і
Свѣтоза́рною ѕвѣздо́ю возсїѧ́лъ є҆сѝ на сво́дѣ нбⷭ҇нѣмъ, є҆гда̀ сконча́лъ є҆сѝ земно́е стра́нствїе и҆ пресели́лсѧ є҆сѝ въ ѻ҆би́тели цр҃ѧ̀ нбⷭ҇нагѡ, и҆̀же ᲂу҆гото́вани бы́ша всѣ̑мъ лю́бѧщымъ є҆го̀. И҆ ны́нѣ ра́дꙋешисѧ и҆ весели́шисѧ, ꙗ҆́кѡ мзда̀ твоѧ̀ мно́га на нб҃сѝ. Мы́ же, ча̑да твоѧ̑, съ любо́вїю и҆ благодаре́нїемъ чти́мъ ст҃ꙋ́ю па́мѧть твою̀, съ вѣ́рою притека́юще къ чⷭ҇тнѣ́й твое́й ра́цѣ, и҆ та́мѡ съ бл҃гоговѣ́нїемъ прїе́млемъ просвѣще́нїе, ѡ҆свѧще́нїе и҆ ѡ҆чище́нїе дш҃ъ на́шихъ, благода́рственнѡ пою́ще:
Ра́дꙋйсѧ, ꙗ҆́кѡ по́двигомъ до́брымъ неѡсла́бнѡ подвиза́лсѧ є҆сѝ: ра́дꙋйсѧ, ꙗ҆́кѡ тече́нїе ᲂу҆́зкагѡ, многоско́рбнагѡ земна́гѡ пꙋтѝ сконча́лъ є҆сѝ.
Ра́дꙋйсѧ, ꙗ҆́кѡ вѣ́рꙋ непоколеби́мꙋ въ бг҃а, въ трⷪ҇цѣ сла́вимагѡ, соблю́лъ є҆сѝ: ра́дꙋйсѧ, ꙗ҆́кѡ вѣне́цъ пра́вды, ᲂу҆гото́ванный мздовоздаѧ́телемъ бг҃омъ, воспрїѧ́лъ є҆сѝ.
Ра́дꙋйсѧ, лѣ́ствицею дх҃о́вною восходѧ̀ ѿ си́лы въ си́лꙋ къ врата́мъ раѧ̀ возведе́нный: ра́дꙋйсѧ, въ бл҃же́нный поко́й і҆и҃сомъ хрⷭ҇то́мъ введе́нный.
Ра́дꙋйсѧ, та́мѡ невече́рнимъ свѣ́томъ ѡ҆сїѧва́емый; ра́дꙋйсѧ, вѣ́чною сла́вою цр҃ѧ̀ цр҃е́й и҆ гдⷭ҇а господе́й ѡ҆зарѧ́емый.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ в҃і
Бл҃года́ти бж҃їѧ и҆спо́лнисѧ хра́мъ дш҃ѝ твоеѧ̀, и҆ сїю̀ сꙋгꙋ́бꙋю си́лꙋ свы́ше, ꙗ҆́кѡ ми́лѡть дре́вле прⷪ҇ро́къ и҆лїа̀ ᲂу҆ченикꙋ̀ своемꙋ̀ є҆лїссе́ю, та́кѡ низпосла̀ тебѣ̀ се́ргїй чꙋдотво́рецъ по ѿше́ствїи свое́мъ въ го́рнїй мі́ръ хода́тайствомъ пред̾ прⷭ҇то́ломъ ст҃ы́ѧ трⷪ҇цы, и҆ ꙗ҆ви́сѧ тобо́ю хра́мъ назда́нный, ꙗ҆́кѡ ковче́гъ завѣ́тѡвъ се́ргїевыхъ, въ не́мже є҆гѡ̀ цѣльбонѡ́сныѧ мо́щи а҆́ки скрижа́ли гл҃го́лѡвъ вели́кагѡ а҆́ввы дарова́ни сꙋ́ть всѣ̑мъ, чтꙋ́щымъ є҆гѡ̀ ст҃ꙋ́ю па́мѧть, въ бл҃годаре́нїи зовꙋ́щымъ бг҃ꙋ: А҆ллилꙋ́їа.
І҆́косъ в҃і
Пою́ще твоѐ предста́тельство пред̾ прⷭ҇то́ломъ присносꙋ́щныѧ трⷪ҇цы, вѣ́рꙋемъ, ꙗ҆́кѡ не забꙋ́деши на́съ, ᲂу҆бо́гихъ, до конца̀, по преселе́нїи бо въ черто́ги црⷭ҇твїѧ нбⷭ҇нагѡ твори́ши чꙋдеса̀, заблꙋ́ждшихъ вразꙋмлѧ́ѧ, недꙋ́гꙋющихъ и҆сцѣлѧ́ѧ, бѣ́сныхъ свобожда́ѧ, и҆ всѧ̑ полє́знаѧ на́мъ да́рꙋѧ. Прїимѝ на́ше благодаре́нїе, согла́снѡ пою́щихъ тѝ:
Ра́дꙋйсѧ, стезе́ю є҆ѵⷢ҇лїѧ ѿ землѝ къ нб҃сѝ возше́дый: ра́дꙋйсѧ, крⷭ҇тъ мона́шескагѡ житїѧ̀ безро́потнѡ понесы́й.
Ра́дꙋйсѧ, и҆́го хрⷭ҇то́во на ра́мена своѧ̑ ничто́же сꙋмнѧ́сѧ возложи́вый: ра́дꙋйсѧ, бре́мѧ своѐ і҆и҃съ въ легкотꙋ̀ въ тебѣ̀ преложи́вый.
Ра́дꙋйсѧ, ꙗ҆́кѡ вѣ́чное наслажде́нїе ны́нѣ ѡ҆брѣта́еши: ра́дꙋйсѧ, ꙗ҆́кѡ трⷪ҇цꙋ со а҆́гг҃лы и҆ всѣ́ми ст҃ы́ми при́снѡ прославлѧ́еши.
Ра́дꙋйсѧ, ꙗ҆́кѡ дерзнове́нїемъ моли́твъ пред̾ не́ю ѡ҆ всѣ́хъ, на́съ чтꙋ́щихъ тѧ̀, ᲂу҆тѣша́еши: ра́дꙋйсѧ, ꙗ҆́кѡ на́съ, въ мо́ри жите́йскомъ ѡ҆бꙋрева́емыхъ, ѡ҆кормле́нїемъ не ѡ҆ставлѧ́еши.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ г҃і
Ѽпречꙋ́дный мл҃твенниче и҆ пресла́вный бж҃їй ᲂу҆го́дниче! Прїимѝ сїѐ прилѣ́жное на́ше моле́нїе. И҆спросѝ ᲂу҆ чл҃вѣколюби́вагѡ хрⷭ҇та̀ бг҃а на́шегѡ вѣ́ры правосла́вныѧ ᲂу҆твержде́нїе, дѣлѡ́мъ млⷭ҇рдїѧ преспѣ́ѧнїе, недꙋ́жнымъ и҆сцѣле́нїе, согрѣше́нїємъ на́шимъ проще́нїе, на стра́шнѣмъ сꙋдѣ̀ до́брагѡ ѿвѣ́та возвѣще́нїе, да всѝ вкꙋ́пѣ воспое́мъ є҆мꙋ̀: А҆ллилꙋ́їа, а҆ллилꙋ́їа, а҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льское житїѐ возревнова́лъ є҆сѝ, слы́ша ѡ҆ пресла́внѣмъ и҆гꙋ́менѣ ра́донежскїѧ ѻ҆би́тели животворѧ́щїѧ трⷪ҇цы а҆́ввѣ се́ргїи, къ немꙋ́же напра́вилъ є҆сѝ стѡпы̀ своѧ̑ и҆з̾ гра́да ю҆рїѧпо́льска, ꙗ҆́кѡ а҆́ще и҆ ю҆́нъ бѣ̀, все́ю дꙋше́ю возжа́ждалъ є҆сѝ ᲂу҆зрѣ́ти лицѐ чꙋдотво́рца и҆ ᲂу҆моли́ти є҆го̀, да прїи́метъ во ѻ҆́бщники ᲂу҆чени́къ свои́хъ и҆ ꙗ҆́кѡ до́брый па́стырь да ᲂу҆пра́витъ пꙋ́ть въ црⷭ҇твїе нбⷭ҇ное, и҆дѣ́же є҆́сть всѣ́хъ веселѧ́щихсѧ ѡ҆ гдⷭ҇ѣ жили́ще. Тѣ́мже мы̀ восхвалѧ́емъ тѧ̀, пою́ще:
Ра́дꙋйсѧ, ѿ ю҆́ности житїѐ во хрⷭ҇тѣ̀ возлюби́вый: ра́дꙋйсѧ, дш҃ꙋ ве́тхагѡ человѣ́ка въ себѣ̀ ᲂу҆мертви́вый.
Ра́дꙋйсѧ, нищетꙋ̀ дх҃о́внꙋю ра́ди црⷭ҇твїѧ нбⷭ҇нагѡ и҆збра́вый: ра́дꙋйсѧ, въ пла́чи дш҃ѝ своеѧ̀ по бз҃ѣ ᲂу҆тѣше́нїе ᲂу҆лꙋчи́вый.
Ра́дꙋйсѧ, кро́тость а҆́ввы се́ргїа ᲂу҆наслѣ́довавый: ра́дꙋйсѧ, а҆́лчꙋщымъ и҆ жа́ждꙋщымъ пра́вды бж҃їѧ послѣ́довавый.
Ра́дꙋйсѧ, млⷭ҇рдїемъ къ стра́ждꙋщымъ млⷭ҇ти ѿ бг҃а себѣ̀ и҆спроси́вый: ра́дꙋйсѧ, чи́стымъ срⷣцемъ бг҃а въ трⷪ҇цѣ сла́вимаго ᲂу҆миле́ннѡ созерца́вый.
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Конда́къ а҃
И҆збра́нный бжⷭ҇твенныѧ трⷪ҇цы ᲂу҆го́дниче пресла́вный, мона́шескихъ завѣ́тѡвъ се́ргїа чꙋдотво́рца рачи́телю, дх҃оно́сный наста́вниче хрⷭ҇тїа́нскагѡ бл҃гоче́стїѧ, ꙗ҆́кѡ до́брѣ ᲂу҆па́слъ є҆сѝ ста́до слове́сныхъ ѻ҆ве́цъ, въ дѣѧ́нїѧхъ бы́лъ є҆сѝ пра́вило вѣ́ры и҆ ѡ҆́бразъ кро́тости, и҆зрѧ́днѣйшїй храмозда́телю ѻ҆би́тели трⷪ҇цкїѧ, тѣ́мже съ любо́вїю и҆ бл҃годаре́нїемъ всѝ зове́мъ тѝ:
Ра́дꙋйсѧ, ні́кѡне, ра́донежскїй и҆ всеѧ̀ рѡссі́и чꙋдотво́рче.
Моли́твы
Ѽсщ҃е́ннаѧ главо̀, цр҃кве правосла́вныѧ похвало̀, ст҃ы́й ᲂу҆го́дниче бж҃їй и҆ досточꙋ́дный слꙋжи́тель животворѧ́щїѧ трⷪ҇цы, прпⷣбне и҆ бг҃оно́сне ѻ҆́тче ні́кѡне, при́сный ᲂу҆ч҃ничѐ и҆ бл҃же́нный наслѣ́дниче а҆́ввы се́ргїа! Ты̀ положи́лъ є҆сѝ ве́лїѧ трꙋды̀, бл҃гоꙋстроѧ́ѧ насажде́нный и҆́мъ бж҃їй вертогра́дъ, до́мъ животворѧ́щїѧ трⷪ҇цы, лꙋча́ми свѣ́та своегѡ̀ ѡ҆зарѧ́ющъ всю̀ странꙋ̀ на́шꙋ и҆ сꙋ́щихъ въ мо́ри дале́че. Кто̀ и҆счи́слитъ твоѧ̑ по́двиги, нѡщны́ѧ бдѣ́нїѧ, сле́зы ᲂу҆миле́нїѧ, серде́чныѧ мл҃твы и҆ дꙋше́вныѧ воздыха́нїѧ; кто̀ ви́дѣ твою̀ неꙋста́ннꙋю бра́нь съ дꙋха́ми ѕло́бы поднебе́сными; кто̀ слы́ша гл҃го́лы бл҃годарє́нїѧ, и҆сходѧ́щыѧ и҆з̾ ᲂу҆́стъ твои́хъ, є҆гда̀ влⷣка гдⷭ҇ь и҆збавлѧ́ше тѧ̀ въ лю́тыхъ ѡ҆бстоѧ́нїихъ и҆ вра́жескихъ напа́стехъ; Вои́стиннꙋ ѿ ю҆́ности ты̀ бл҃гоꙋгоди́лъ є҆сѝ подвигополо́жникꙋ хрⷭ҇тꙋ̀ все́мъ свои́мъ житїе́мъ и҆ ᲂу҆мно́жилъ є҆сѝ да̑нныѧ тебѣ̀ бг҃омъ тала́нты во сп҃се́нїе дш҃ѝ своеѧ̀ и҆ врꙋче́ннагѡ тебѣ̀ ста́да слове́сныхъ ѻ҆ве́цъ. Прїимѝ, ѻ҆́тче ст҃ы́й, на́шꙋ хвалꙋ̀ и҆ благодаре́нїе за всѧ̑ твоѧ̑ мл҃твы ѡ҆ чтꙋ́щихъ ст҃ꙋ́ю па́мѧть твою̀, да вне́млетъ всебл҃гі́й гдⷭ҇ь твоемꙋ̀ предста́тельствꙋ пред̾ ни́мъ ѡ҆ на́съ, немощны́хъ и҆ ᲂу҆бо́гихъ рабѣ́хъ є҆гѡ̀. Помозѝ ча́дѡмъ твои́мъ, въ и҆́ночествѣ подвиза́ющымсѧ и҆ съ вѣ́рою притека́ющымъ ко гро́бꙋ твоемꙋ̀, да никто̀ ѿ ни́хъ впаде́тъ въ сѣ̑ти вра̑жїѧ и҆ да не поги́бнетъ длѧ жи́зни вѣ́чныѧ! Оу҆молѝ нача́льника жи́зни хрⷭ҇та̀, да и҆зведе́тъ и҆з̾ темни́цы дꙋ́шы на́шѧ и҆ напра́витъ стѡпы̀ на́шѧ къ црⷭ҇твꙋ вѣ́чныхъ бла̑гъ, и҆дѣ́же непреста́ннѡ сла́витсѧ пречⷭ҇тно́е и҆ великолѣ́пое и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а, а҆ми́нь.
Прпⷣбне и҆ пребл҃же́нне ѻ҆́тче на́шъ ні́кѡне, подража́телю и҆ сподви́жниче и҆ наслѣ́дниче дарова́нїй бг҃но́снагѡ ѻ҆тца̀ на́шегѡ се́ргїа, и҆́же и҆ чⷭ҇тны́ѧ своѧ̑ мо́щи въ рꙋка́хъ твои́хъ, ꙗ҆́коже и҆лїа̀ ми́лѡть свою̀ въ рꙋка́хъ є҆лїссе́а, ѡ҆ста́вилъ є҆́сть, тобо́ю въ зе́млю сокрыва́ємыѧ, не а҆́ки въ погребе́нїе, но во ᲂу҆достовѣре́нїе нетлѣ́нїѧ, и҆ тобо́ю ѿкрыва́ємыѧ въ ꙗ҆вле́нїе чꙋде́съ и҆ во ѡ҆би́льнѣйшее и҆злїѧ́нїе и҆сто́чника и҆сцѣле́нїй. Къ тебѣ̀, кꙋ́пнѡ съ ни́мъ на нб҃сѣ́хъ живꙋ́щемꙋ, и҆ кꙋ́пнѡ съ ни́мъ на землѝ бл҃же́нне почива́ющемꙋ, съ любо́вїю простира́емъ сердє́чныѧ жела̑нїѧ и҆ молє́бнаѧ словеса̀, тебѣ̀ предлага́юще на́шѧ не́мощи и҆ ско́рби, и҆ нꙋ́жды, дꙋше́вныѧ же и҆ тѣле́сныѧ. Прїимѝ недостѡ́йнаѧ на̑ша молє́нїѧ, и҆ твое́ю свѣ́тлою и҆ крѣ́пкою мл҃твою ѡ҆чи́сти, совершѝ, и҆ вознесѝ ко многомлⷭ҇тивомꙋ и҆ великодарови́томꙋ влⷣцѣ на́шемꙋ гдⷭ҇ꙋ и҆ бг҃ꙋ і҆и҃сꙋ хрⷭ҇тꙋ̀, да бл҃гослови́тъ и҆ сохрани́тъ странꙋ̀ на́шꙋ и҆ свѧтꙋ́ю ѻ҆би́тель сїю̀ въ ми́рѣ и҆ тишинѣ̀. На́мъ же всѣ̑мъ да пода́стъ благода́тїю свое́ю грѣхѡ́въ ѡ҆ставле́нїе, житїѧ̀ и҆справле́нїе, недꙋ́гѡвъ и҆сцѣле́нїе, ѿ бѣ́дъ и҆збавле́нїе, ѿ и҆скꙋше́нїй и҆збы́тїе и҆ ѡ҆свобожде́нїе, въ ско́рбѣхъ ᲂу҆тѣше́нїе, въ нꙋ́ждахъ бл҃говре́меннꙋ по́мощь, наипа́че же въ вѣ́рѣ преспѣ́ѧнїе, въ наде́ждѣ ᲂу҆твержде́нїе, въ любвѝ возраста́нїе, дꙋ́шъ на́шихъ спасе́нїе, ꙗ҆́кѡ да и҆ во вре́меннѣмъ се́мъ житїѝ, соверше́ннѣе же въ вѣ́чномъ є҆гѡ̀ црⷭ҇твїи, вы́нꙋ прино́симъ є҆мꙋ̀ сла́вꙋ, че́сть и҆ поклоне́нїе, со безнача́льнымъ є҆гѡ̀ ѻ҆ц҃е́мъ, и҆ прест҃ы́мъ и҆ бл҃ги́мъ, и҆ животворѧ́щимъ є҆гѡ̀ дх҃омъ, во вѣ́ки вѣкѡ́въ, а҆ми́нь.