Канон Введению во храм Пресвятой Богородицы (первый)

Прему́дрости, Пречи́стая, Тя́ сокро́вище ве́мы и благода́ти, точа́щую исто́чник приснотеку́щий ра́зума, про́сим: Твоя́ ка́пли одожди́, Влады́чице, е́же воспева́ти Тя́ при́сно.

Превы́шши, Пречи́стая, небе́с бы́вши, хра́м и пала́та, в хра́м Бо́жий возложи́лася еси́ Тому́ угото́ватися в Боже́ственное жили́ще прише́ствия Его́.

Све́т возсия́вши Богоро́дица благода́ти, вся́ просвети́ и совокупи́ пресве́тлое Ея́ украси́ти торжество́ пе́сньми: прииди́те, к Не́й стеце́мся.

Две́рь сла́вная, по́мыслы непроходи́мая, две́ри отве́рзши хра́ма Бо́жия, ны́не повелева́ет на́м, совше́дшим, Боже́ственных Ея́ чуде́с наслади́тися.

Невестокраси́тель дне́сь яви́ся кра́сный Де́вы хра́м и черто́г, прие́мь одушевле́нный черто́г Бо́жий, Чи́стую, и Непоро́чную, и Светле́йшую всея́ тва́ри.

Дави́д, предначина́я ликова́ние, игра́ет, и ликовству́ет с на́ми, и Цари́цу зове́т Тя́ укра́шену, Пречи́стая, предстоя́щу, Всечи́стая, в хра́ме Царю́ и Бо́гу.

Из нея́же преступле́ние произы́де дре́вле ро́ду челове́ческому, из Тоя́ исправле́ние и нетле́ние процвете́: Богоро́дица дне́сь приводи́ма в до́м Бо́жий.

Игра́ют а́нгельская во́инства и все́х челове́к мно́жество, и пред лице́м, Пречи́стая, предтеку́т Твои́м дне́сь свещено́сицы, зову́ще вели́чествия Твоя́ в дому́ Бо́жии.

Две́рь непрохо́дную Бо́жий до́м прие́мля дне́сь, преста́ти сотвори́ вся́кой слу́жбе зако́нной, я́ко и́стинно яви́ся, зовы́й, су́щим на земли́ И́стина.

Гора́ присе́нная, ю́же прови́де дре́вле Авваку́м, предпропове́да вну́трь вмести́вшуюся в нехо́дных хра́ма, доброде́тели процве́тши, и покрыва́ет концы́.

Ви́девши пресла́вная вся́ земля́ стра́нныя же и ди́вныя ве́щи, ка́ко Де́ва, от а́нгела пи́щу прие́млющи, о́бразы строе́ния но́сит.

Хра́м, и пала́та, и не́бо одушевле́нное я́вльшися, Богоневе́сто Царе́ва, во хра́м зако́нный приводи́ма дне́сь, Тому́ соблюда́ема, Пречи́стая.

Свяще́ние сла́вное и свяще́нное возложе́ние, дне́сь Пречи́стая Де́ва, возложи́вшися в хра́м Бо́жий, Всецарю́ на́шему Бо́гу Еди́ному в жили́ще соблюда́ется, я́ко ве́сть Са́м.

Добро́ту, Пречи́стая, души́ Твоея́ зря́ не́когда, ве́рою Заха́рия возопи́: Ты́ еси́ избавле́ние, Ты́ еси́ все́х ра́дость, Ты́ еси́ воззва́ние на́ше, Е́юже Невме́стный вмеще́н мне́ яви́тся.

О, па́че ума́ чуде́с Твои́х, Всечи́стая! Стра́нное Твое́ рождество́ е́сть, стра́нен о́браз возраще́ния Твоего́, стра́нна и пресла́вна Твоя́, Богоневе́сто, вся́ и челове́ки несказа́нна.

Све́щник многосве́тлый су́щи, Богоневе́сто, дне́сь возсия́ла еси́ в дому́ Госпо́дни и озаря́еши ны́ честны́ми дарова́нии, Чи́стая, чуде́с Твои́х, Богоро́дице всепе́тая.

Вся́ческая Нося́й глаго́лом, моли́тву пра́ведных услы́ша. Те́мже непло́дныя разреши́л еси́ неду́г, я́ко Благоутро́бен, ра́дости Вино́вную си́м дарова́.

Сказа́ти хотя́ Госпо́дь язы́ком Свое́ спасе́ние, Неискусобра́чную ны́не от челове́к прия́т, примире́ния зна́мение и обновле́ния.

Я́ко до́м су́щи благода́ти, в не́мже сокро́вища лежа́т неизрече́ннаго Бо́жия строе́ния, Всечи́стая, в хра́ме причасти́лася еси́ нетле́нныя сла́дости.

Диади́му Тя́ ца́рскую прие́м, хра́м, Богоневе́сто, просвеща́шеся и подступа́ше лу́чшим, предрече́нных зря́ на Тебе́ сбытие́.

Се́ дне́сь возсия́ конце́м весна́ ра́достная, просвеща́ющи на́шу ду́шу, и помышле́ние и у́м благода́тию, торжество́м Богоро́дицы дне́сь та́инственно да учреди́мся.

Да дароно́сят дне́сь вся́ческая Цари́це, Ма́тери Бо́жии, не́бо и земля́, и а́нгелов чи́ни, и челове́ков мно́жество и да вопию́т: во хра́м вво́дится Ра́дость и Избавле́ние.

Писа́ние мимотече́ и оскуде́ зако́н, я́коже се́нь, и благода́ти лучи́ возсия́ша в хра́м Бо́жий вше́дшей Тебе́, Де́во Ма́ти Чи́стая, в не́м благослове́нная.

Повину́ся Рождеству́ Твоему́, Всечи́стая, я́ко Творцу́ и Бо́гу не́бо, и земля́, и преиспо́дняя, и вся́к язы́к земны́х испове́дает, я́ко Госпо́дь яви́ся, Спа́с ду́ш на́ших.

Пречи́стый хра́м в до́м Бо́жий приводя́щи А́нна иногда́, вопию́щи, с ве́рою рече́ свяще́ннику: ча́до, от Бо́га да́нное мне́, прии́м ны́не, введи́ во хра́м Зижди́теля твоего́ и, ра́дуяся, по́й Ему́: благослови́те, вся́ дела́ Госпо́дня, Го́спода.

Рече́, ви́дев, А́нне иногда́ Ду́хом Заха́рия: Жи́зни Ма́терь вво́диши и́стинную, Ю́же све́тло проро́цы Бо́жии Богоро́дицу пропове́даша, и ка́ко хра́м вмести́т Ю́? Те́м чудя́ся, вопию́: благослови́те, вся́ дела́ Госпо́дня, Го́спода.

Раба́ Бо́жия бы́х а́з, — отвеща́ А́нна ему́, — призыва́ющи Сего́ ве́рою и моли́твою, прия́ти моея́ боле́зни пло́д, по прия́тии же рожде́нную привести́ Да́вшему Ю́. Те́м, зовя́, вопию́: благослови́те, вся́ дела́ Госпо́дня Го́спода.

Зако́нное вои́стинну де́ло е́сть, — свяще́нник рече́ е́й, — стра́нну же весьма́ ве́щь поразумева́ю, зря́ Приводи́мую в до́м Бо́жий, пресла́вно превосходя́щую свята́я благода́тию. Те́м и ра́дуяся, вопию́: благослови́те, вся́ дела́ Госпо́дня, Го́спода.

Возмога́ю, — рече́ А́нна ему́, — зна́ющи, я́же глаго́леши, разуме́еши бо сия́ Ду́хом Бо́жиим, я́сно я́же Де́вы пропове́дал еси́; приими́ у́бо Пречи́стую в хра́м Созда́теля твоего́ и, ра́дуяся, по́й Ему́: благослови́те, вся́ дела́ Госпо́дня, Го́спода.

Светоно́сна на́м возжже́ся свеща́, — возопи́ свяще́нник, — ра́дость велича́йшую светя́щи в хра́ме; ду́ши проро́ческия да сра́дуются мне́, я́ко пресла́вная зря́ще, соверша́емая в дому́ Бо́жии, и да вопию́т при́сно: благослови́те, вся́ дела́ Госпо́дня, Го́спода.

Я́ко пресве́тлую, Богоро́дице Чи́стая, душе́вныя чистоты́ иму́щи добро́ту, благода́тию же Бо́жиею исполня́ема с небесе́, Све́том Присносу́щным просвеща́еши всегда́ с весе́лием вопию́щия: и́стинно вы́шши все́х еси́, Де́во Чи́стая.

Прелета́ет, Богоро́дице, Чи́стая, чу́до Твое́ си́лу слове́с: те́ло бо в Тебе́ поразумева́ю па́че сло́ва, тече́ния грехо́внаго неприя́тно. Те́мже благода́рственно вопию́ Ти́: и́стинно вы́шши все́х еси́, Де́во Чи́стая.

Пресла́вно прообразова́ше, Чи́стая, зако́н Тя́ ски́нию и Боже́ственную ста́мну, стра́нен киво́т, и катапета́сму, и же́зл, хра́м неразруши́мый и две́рь Бо́жию. Те́мже науча́ют Тебе́ зва́ти: и́стинно вы́шши все́х еси́, Де́во Чи́стая.

Песнопоя́ Тебе́, провозглаша́ше Дави́д, глаго́ля Тя́ Дще́рь Царе́ву, красото́ю доброде́телей, одесну́ю предстоя́щую Бо́га, ви́дев Тя́ упещре́ну. Те́мже, проро́чествуя, вопия́ше: и́стинно вы́шши все́х еси́, Де́во Чи́стая.

Богоприя́тну предзря́, Соломо́н, пропове́да Тя́ о́др Царе́в, живы́й исто́чник запеча́тствован, из него́же нему́тная на́м произы́де вода́, ве́рою вопию́щим: и́стинно вы́шши все́х еси́, Де́во Чи́стая.

Подае́ши дарова́ний Твою́ тишину́, Богоро́дице, души́ мое́й, точа́щи жи́знь Тебе́ чту́щим по до́лгу, Сама́ защища́ющи, и покрыва́ющи, и соблюда́ющи, вопи́ти Тебе́: и́стинно вы́шши все́х еси́, Де́во Чи́стая.

Премꙋ́дрости пречⷭ҇таѧ, тѧ̀ сокро́вище вѣ́мы, и҆ бл҃года́ти точа́щꙋю, и҆сто́чникъ приснотекꙋ́щїй ра́зꙋма, про́симъ, твоѧ̑ ка̑пли ѡ҆дождѝ, влⷣчце, є҆́же воспѣва́ти тѧ̀ при́снѡ.

Превы́шши пречⷭ҇таѧ нб҃съ бы́вши хра́мъ и҆ пала́та, въ хра́мъ бж҃їй возложи́ласѧ є҆сѝ, томꙋ̀ ᲂу҆гото́ватисѧ въ бж҃е́ственное жили́ще прише́ствїѧ є҆гѡ̀.

Свѣ́тъ возсїѧ́вши бцⷣа бл҃года́ти, всѧ̑ просвѣтѝ, и҆ совокꙋпѝ пресвѣ́тлое є҆ѧ̀ ᲂу҆краси́ти торжество̀ пѣ́сньми: прїиди́те къ не́й стеце́мсѧ.

Две́рь сла́внаѧ, по́мыслы непроходи́маѧ, двє́ри ѿве́рзши хра́ма бж҃їѧ, ны́нѣ повелѣва́етъ на́мъ совше́дшымъ, бж҃е́ственныхъ є҆ѧ̀ чꙋде́съ наслади́тисѧ.

Невѣстокраси́тель дне́сь ꙗ҆ви́сѧ, кра́сный дв҃ы хра́мъ и҆ черто́гъ, прїе́мъ ѡ҆дꙋшевле́нный черто́гъ бж҃їй, чтⷭ҇ꙋю, и҆ непоро́чнꙋю, и҆ свѣтлѣ́йшꙋю всеѧ̀ тва́ри.

Дв҃дъ предначина́ѧ ликова́нїе, и҆гра́етъ и҆ ликовствꙋ́етъ съ на́ми, и҆ цр҃и́цꙋ зове́тъ тѧ̀ ᲂу҆кра́шенꙋ пречⷭ҇таѧ, предстоѧ́щꙋ всечⷭ҇таѧ въ хра́мѣ цр҃ю̀ и҆ бг҃ꙋ.

И҆з̾ неѧ́же престꙋпле́нїе произы́де дре́вле ро́дꙋ человѣ́ческомꙋ, и҆з̾ тоѧ̀ и҆справле́нїе и҆ нетлѣ́нїе процвѣтѐ, бцⷣа дне́сь приводи́ма въ до́мъ бж҃їй.

И҆гра́ютъ а҆́гг҃льскаѧ вѡ́инства, и҆ всѣ́хъ человѣ̑къ мно́жество, и҆ пред̾ лице́мъ пречтⷭ҇аѧ предтекꙋ́тъ твои́мъ дне́сь свѣщенѡ́сицы зовꙋ́ще, вели́чєствїѧ твоѧ̑ въ домꙋ̀ бж҃їи.

Две́рь непрохо́днꙋю, бж҃їй до́мъ прїе́млѧ дне́сь, преста́ти сотворѝ всѧ́кой слꙋ́жбѣ зако́нной: ꙗ҆́кѡ и҆́стиннѡ ꙗ҆ви́сѧ зовы́й, сꙋ́щымъ на землѝ и҆́стина.

Гора̀ присѣ́ннаѧ, ю҆́же прови́дѣ дре́вле а҆ввакꙋ́мъ, предпроповѣ́да внꙋ́трь вмѣсти́вшꙋюсѧ въ нехо́дныхъ хра́ма добродѣ́тели процвѣ́тши, и҆ покрыва́етъ концы̀.

Ви́дѣвши пресла̑внаѧ всѧ̀ землѧ̀, стра̑нныѧ же и҆ ди̑вныѧ вє́щи, ка́кѡ дв҃а ѿ а҆́гг҃ла пи́щꙋ прїе́млющи, ѡ҆́бразы строе́нїѧ но́ситъ.

Хра́мъ и҆ пала́та, и҆ нб҃о ѡ҆дꙋшевле́нное ꙗ҆́вльшисѧ бг҃оневѣ́сто цр҃е́ва, во хра́мъ зако́нный приводи́ма дне́сь, томꙋ̀ соблюда́ема, пречⷭ҇таѧ.

Сщ҃е́нїе сла́вное, и҆ сщ҃е́нное возложе́нїе, дне́сь пречⷭ҇таѧ дв҃а, возложи́вшисѧ въ хра́мъ бж҃їй всецр҃ю̀ на́шемꙋ бг҃ꙋ, є҆ди́номꙋ въ жили́ще соблюда́етсѧ, ꙗ҆́кѡ вѣ́сть са́мъ.

Добро́тꙋ, пречтⷭ҇аѧ, дꙋшѝ твоеѧ̀ зрѧ̀ нѣ́когда, вѣ́рою заха́рїа возопѝ: ты̀ є҆сѝ и҆збавле́нїе, ты̀ є҆сѝ всѣ́хъ ра́дость, ты̀ є҆сѝ воззва́нїе на́ше, є҆́юже невмѣ́стный вмѣще́нъ мнѣ̀ ꙗ҆ви́тсѧ.

Ѽ па́че ᲂу҆ма̀ чꙋде́съ твои́хъ, всечⷭ҇таѧ! стра́нное твоѐ ржⷭ҇тво̀ є҆́сть, стра́ненъ ѡ҆́бразъ возраще́нїѧ твоегѡ̀, стра̑нна и҆ пресла̑вна твоѧ̑, бг҃оневѣ́сто, всѧ̑, и҆ человѣ́ки несказа̑нна.

Свѣ́щникъ многосвѣ́тлый сꙋ́щи, бг҃оневѣ́сто, дне́сь возсїѧ́ла є҆сѝ въ домꙋ̀ гдⷭ҇ни, и҆ ѡ҆зарѧ́еши ны̀ чтⷭ҇ны́ми дарова́нїи, чтⷭ҇аѧ, чꙋде́съ твои́хъ, бцⷣе всепѣ́таѧ.

Всѧ́чєскаѧ носѧ́й глаго́ломъ, мл҃твꙋ првⷣныхъ ᲂу҆слы́ша. тѣ́мже непло́дныѧ разрѣши́лъ є҆сѝ недꙋ́гъ, ꙗ҆́кѡ бл҃гоꙋтро́бенъ, ра́дости вино́внꙋю си̑мъ дарова̀.

Сказа́ти хотѧ̀ гдⷭ҇ь ꙗ҆зы́кѡмъ своѐ сп҃се́нїе, неискꙋсобра́чнꙋю ны́нѣ ѿ человѣ̑къ прїѧ́тъ, примире́нїѧ зна́менїе и҆ ѡ҆бновле́нїѧ.

Ꙗ҆́кѡ до́мъ сꙋ́щи бл҃года́ти, въ не́мже сокрѡ́вища лежа́тъ неизрече́ннагѡ бж҃їѧ строе́нїѧ, всечⷭ҇таѧ, въ хра́мѣ причасти́ласѧ є҆сѝ нетлѣ́нныѧ сла́дости.

Дїади́мꙋ тѧ̀ ца́рскꙋю прїе́мъ хра́мъ, бг҃оневѣ́сто, просвѣща́шесѧ, и҆ подстꙋпа́ше лꙋ́чшымъ, предрече́нныхъ зрѧ̀ на тебѣ̀ сбытїѐ.

Сѐ дне́сь возсїѧ̀ концє́мъ весна̀ ра́достнаѧ, просвѣща́ющи на́шꙋ дꙋ́шꙋ и҆ помышле́нїе и҆ ᲂу҆́мъ бл҃года́тїю, торжество́мъ бцⷣы дне́сь та́инственнѡ да ᲂу҆чреди́мсѧ.

Да дароно́сѧтъ дне́сь всѧ́чєскаѧ цр҃и́цѣ мт҃ри бж҃їи, не́бо и҆ землѧ̀, и҆ а҆́гг҃лѡвъ чи́ни, и҆ человѣ́кѡвъ мно́жество, и҆ да вопїю́тъ: во хра́мъ вво́дитсѧ ра́дость и҆ и҆збавле́нїе.

Писа́нїе мимотечѐ, и҆ ѡ҆скꙋдѣ̀ зако́нъ ꙗ҆́коже сѣ́нь, и҆ бл҃года́ти лꙋчѝ возсїѧ́ша, въ хра́мъ бж҃їй вше́дшей тебѣ̀, дв҃о мт҃и чтⷭ҇аѧ, въ не́мъ бл҃гослове́ннаѧ.

Повинꙋ́сѧ рождествꙋ̀ твоемꙋ̀, всечⷭ҇таѧ, ꙗ҆́кѡ творцꙋ̀ и҆ бг҃ꙋ, не́бо и҆ землѧ̀ и҆ преиспѡ́днѧѧ, и҆ всѧ́къ ѧ҆зы́къ земны́хъ и҆сповѣ́даетъ, ꙗ҆́кѡ гдⷭ҇ь ꙗ҆ви́сѧ сп҃съ дꙋ́шъ на́шихъ.

Пречⷭ҇тый хра́мъ въ до́мъ бж҃їй приводѧ́щи а҆́нна и҆ногда̀ вопїю́щи съ вѣ́рою речѐ сщ҃е́нникꙋ: ча́до ѿ бг҃а да́нное мнѣ̀, прїи́мъ ны́нѣ, введѝ во хра́мъ зижди́телѧ твоегѡ̀, и҆ ра́дꙋѧсѧ по́й є҆мꙋ̀: бл҃гослови́те всѧ̑ дѣла̀ гдⷭ҇нѧ гдⷭ҇а.

Речѐ ви́дѣвъ а҆́ннѣ и҆ногда̀ дх҃омъ заха́рїа: жи́зни мт҃рь вво́диши и҆́стиннꙋю, ю҆́же свѣ́тлѡ прⷪ҇ро́цы бж҃їи бцⷣꙋ проповѣ́даша, и҆ ка́кѡ хра́мъ вмѣсти́тъ ю҆̀; тѣ́мъ чꙋдѧ́сѧ вопїю̀: бл҃гослови́те всѧ̑ дѣла̀ гдⷭ҇нѧ гдⷭ҇а.

Раба̀ бж҃їѧ бы́хъ а҆́зъ, ѿвѣща̀ а҆́нна є҆мꙋ̀, призыва́ющи сего̀ вѣ́рою и҆ мл҃твою, прїѧ́ти моеѧ̀ болѣ́зни пло́дъ, по прїѧ́тїи же рожде́ннꙋю привестѝ да́вшемꙋ ю҆̀. тѣ́мъ зовѧ̀ вопїю̀: бл҃гослови́те всѧ̑ дѣла̀ гдⷭ҇нѧ гдⷭ҇а.

Зако́нное вои́стиннꙋ дѣ́ло є҆́сть, сщ҃е́нникъ речѐ є҆́й, стра́ннꙋ же весьма̀ ве́щь поразꙋмѣва́ю, зрѧ̀ приводи́мꙋю въ до́мъ бж҃їй, пресла́внѡ превосходѧ́щꙋю ст҃а̑ѧ бл҃года́тїю. тѣ́мъ и҆ ра́дꙋѧсѧ вопїю̀: бл҃гослови́те всѧ̑ дѣла̀ гдⷭ҇нѧ гдⷭ҇а.

Возмога́ю, речѐ а҆́нна є҆мꙋ̀, зна́ющи ꙗ҆̀же глаго́леши: разꙋмѣ́еши бо сїѧ̑ дх҃омъ бж҃їимъ, ꙗ҆́снѡ ꙗ҆̀же дв҃ы проповѣ́далъ є҆сѝ: прїимѝ ᲂу҆́бѡ пречⷭ҇тꙋю въ хра́мъ созда́телѧ твоегѡ̀, и҆ ра́дꙋѧсѧ по́й є҆мꙋ̀: бл҃гослови́те всѧ̑ дѣла̀ гдⷭ҇нѧ гдⷭ҇а.

Свѣтоно́сна на́мъ возжже́сѧ свѣща̀, возопѝ сщ҃е́нникъ, ра́дость велича́йшꙋю свѣтѧ́щи въ хра́мѣ: дꙋ́шы прⷪ҇ро́чєскїѧ да сра́дꙋютсѧ мнѣ̀, ꙗ҆́кѡ пресла̑внаѧ зрѧ́ще соверша́ємаѧ въ домꙋ̀ бж҃їи, и҆ да вопїю́тъ при́снѡ: бл҃гослови́те всѧ̑ дѣла̀ гдⷭ҇нѧ гдⷭ҇а.

Ꙗ҆́кѡ пресвѣ́тлꙋю, бцⷣе чтⷭ҇аѧ, дꙋше́вныѧ чистоты̀ и҆мꙋ́щи добро́тꙋ, бл҃года́тїю же бж҃їею и҆сполнѧ́ема съ нб҃сѐ, свѣ́томъ присносꙋ́щнымъ просвѣща́еши всегда̀ съ весе́лїемъ вопїю́щыѧ: и҆́стиннѡ вы́шши всѣ́хъ є҆сѝ, дв҃о чтⷭ҇аѧ.

Прелета́етъ, бцⷣе, чтⷭ҇аѧ чꙋ́до твоѐ си́лꙋ слове́съ: тѣ́ло бо въ тебѣ̀ поразꙋмѣва́ю па́че сло́ва, тече́нїѧ грѣхо́внагѡ непрїѧ́тно. тѣ́мже бл҃года́рственнѡ вопїю̀ тѝ: и҆́стиннѡ вы́шши всѣ́хъ є҆сѝ, дв҃о чтⷭ҇аѧ.

Пресла́внѡ проѡбразова́ше, чтⷭ҇аѧ, зако́нъ тѧ̀ ски́нїю, и҆ бж҃е́ственнꙋю ста́мнꙋ: стра́ненъ кївѡ́тъ, и҆ катапета́смꙋ, и҆ же́злъ: хра́мъ неразрꙋши́мый, и҆ две́рь бж҃їю. тѣ́мже наꙋча́ютъ тебѣ̀ зва́ти: и҆́стиннѡ вы́шши всѣ́хъ є҆сѝ, дв҃о чтⷭ҇аѧ.

Пѣснопоѧ̀ тебѣ̀ провозглаша́ше дв҃дъ, глаго́лѧ тѧ̀ дще́рь цр҃е́вꙋ, красото́ю добродѣ́телей, ѡ҆деснꙋ́ю предстоѧ́щꙋю бг҃а, ви́дѣвъ тѧ̀ ᲂу҆пещре́нꙋ, тѣ́мже прⷪ҇ро́чествꙋѧ вопїѧ́ше: и҆́стиннѡ вы́шши всѣ́хъ є҆сѝ, дв҃о чтⷭ҇аѧ.

Бг҃опрїѧ́тнꙋ предзрѧ̀ соломѡ́нъ, проповѣ́да тѧ̀ ѻ҆́дръ цр҃е́въ, живы́й и҆сто́чникъ запеча́тствованъ, и҆з̾ негѡ́же немꙋ́тнаѧ на́мъ произы́де вода̀, вѣ́рою вопїю́щымъ: и҆́стиннѡ вы́шши всѣ́хъ є҆сѝ, дв҃о чтⷭ҇аѧ.

Подае́ши дарова́нїй твою̀ тишинꙋ̀, бцⷣе, дꙋшѝ мое́й, точа́щи жи́знь тебѐ чтꙋ́щымъ по до́лгꙋ, сама̀ защища́ющи, и҆ покрыва́ющи, и҆ соблюда́ющи, вопи́ти тебѣ̀: и҆́стиннѡ вы́шши всѣ́хъ є҆сѝ, дв҃о чтⷭ҇аѧ.