Канон Введению во храм Пресвятой Богородицы (второй)

Стеце́мся дне́сь, Богоро́дицу почита́юще пе́сньми, и торжеству́им духо́вный пра́здник: в хра́м бо Бо́гу да́р прино́сится.

Пе́сньми да воспои́м Богоро́дицы сла́вное предше́ствие: ко хра́му бо дне́сь, я́ко хра́м Бо́жий, прино́сится проро́чески да́р многоце́нный.

А́нна непоро́чная ра́довашеся, я́ко да́р многоце́нен Бо́гу принося́щи в хра́м ма́терски, Иоаки́м же с не́ю торжеству́ет све́тло.

Дави́д, пра́отец Тво́й, воспе́ Тя́ дре́вле, Де́во Богоневе́сто, Дще́рь глаго́ля Тя́ Царя́ Христа́, Его́же и, роди́вши, ма́терски Младе́нца дои́ла еси́.

Пло́тию триле́тствующи, Богоро́дица Го́споду прино́сится; Заха́рия же Сию́, свяще́нник Бо́жий, прие́м, ра́дуяся, в хра́м возложи́.

Де́вы, ликовству́йте, свещено́сицы, начни́те дне́сь, и ма́тери, воспо́йте Цари́це Ма́тери, приходя́щей в хра́м Царя́ Христа́.

Торжеству́им, празднолю́бцы, и сра́дуемся ду́хом во святе́м пра́зднице, учрежда́ющеся дне́сь, Дще́ре Царе́вы и Ма́тере Бо́га на́шего.

Иоаки́ме, ра́дуйся дне́сь, и весели́ся, А́нно, ду́хом, рожде́нную из ва́с Го́споду приводя́ще триле́тствующу, я́ко Ю́ницу Чи́сту Всенепоро́чную.

Бо́жие селе́ние во хра́м святы́й приво́дится, Богоро́дица Мариа́м, пло́тию триле́тствующая, и То́й свещесве́тят де́вы, предтеку́ще.

Бо́жия А́гница небла́зненная и голуби́ца нескве́рная, Боговмести́мая ски́ния, сла́вы освяще́ние, в ски́нии святе́й обита́ти избра́.

Триле́тствующая те́лом и многоле́тствующая ду́хом, ши́ршая небе́с и го́рних си́л превы́шшая, да восхва́лится пе́сньми Богоневе́стная.

Богоро́дицы пра́зднующе в невходи́мых предше́ствие, свещеиму́ще у́мно с весе́лием, дне́сь и мы́ с де́вами ко хра́му прибли́жимся.

Свяще́нницы Бо́жии, облецы́теся в пра́вду благода́тию и сря́щите све́тло, вхо́ды подаю́ще Дще́ри Царя́ и Бо́га во свята́я.

Проро́че Иса́ие, прорцы́ на́м, Де́ва кто́ е́сть, иму́щая во чре́ве? Я́же из Иу́дина ко́рене прозя́бши и ро́ждшися из Дави́да царя́, се́мене свята́го пло́д благосла́вный.

Начина́йте, де́вы, и воспо́йте пе́сни, рука́ми держа́ще свещи́, Чи́стыя Богоро́дицы предше́ствие хва́ляще, ны́не гряду́щия во хра́м Бо́жий, ку́пно с на́ми пра́зднующи.

Иоаки́ме и А́нно, весели́теся ны́не, во хра́м приводя́ще Госпо́день Чи́стую Бо́га Ма́терь Христа́ Всецаря́ бу́дущую, от ва́с же ро́ждшуюся, я́ко триле́тствующую Ю́ницу.

Свята́я святы́х су́щи, Чи́стая, во хра́м святы́й возлюби́ла еси́ всели́тися и, со а́нгелы, Де́во, бесе́дующи, пребыва́еши, пресла́вне с небе́с хле́б прие́млющи, Пита́тельнице Жи́зни.

Ро́ждше па́че наде́жды Пречи́стую Де́ву, благочести́во обеща́хуся Бо́гу принести́ и исполня́ют, даю́ще я́ко же́ртву, рожде́нную от ни́х, Иоаки́м дне́сь и А́нна, в до́м Бо́жий.

Прозябе́ же́зл иногда́ Ааро́нов, прообразу́ющий, Чи́стая, Боже́ственное Рождество́, я́ко безсе́менно зачне́ши, и нетле́нна пребу́деши, и по рождестве́ де́вствующи яви́шися, Младе́нца пита́ющи все́х Бо́га.

Де́вы — Де́ву, и ма́тери — Ма́терь благоче́стно стецы́теся почти́ти с на́ми ро́ждшуюся я́ко непоро́чную же́ртву и рожде́нную Бо́гу плодоноси́мую, вси́ у́бо све́тло пра́зднуем.

Да светлоно́сим, правосла́внии вси́, стека́ющеся и сла́вяще Богома́терь, я́ко Го́споду дне́сь приво́дится я́ко же́ртва благоприя́тна.

Да веселя́тся пра́отцы дне́сь, Влады́чице, и да ра́дуется ро́ждшая Тя́ со отце́м Твои́м, я́ко пло́д и́х Го́споду прино́сится.

Многоимени́тую и сла́внейшую Непоро́чную Ю́ницу, я́ко пло́тию ро́ждшую Боже́ственнаго Тельца́, вси́ воспои́м, ве́рно пра́зднующе.

Уневе́щения напису́ются Боже́ственная зна́мения па́че ума́ рождества́ Твоего́, Чи́стая Де́во, дне́сь Ду́хом Святы́м в дому́ Бо́жии.

Да отве́рзутся преддве́рия сла́вы Бо́га на́шего и да прие́млют Неискусобра́чную Бо́жию Ма́терь, я́коже триле́тствующую Нескве́рную Ю́ницу.

Многочестну́ю и присе́нную го́ру воспои́м — Присноде́ву, Бо́жию Ма́терь бы́вшу: Та́ бо облиста́ све́т в конце́х.

Пра́зднуим, ве́рнии, пра́здник духо́вный Ма́тере Бо́жия, воспева́юще благоче́стно: е́сть бо святе́йша небе́сных умо́в.

Пе́сньми духо́вными восхва́лим, ве́рнии, Ма́терь Све́та, я́ко дне́сь на́м яви́ся, предходя́щи в хра́м Бо́жий.

Нескве́рная А́гница и Чи́стая Голуби́ца преведе́ся обита́ти в до́м Бо́жий, я́ко Непоро́чная, пронарече́нная бы́ти Ма́ти Бо́жия.

В хра́м зако́нный вхо́ды соверша́ет Хра́м Бо́жий, небе́сная Ски́ния, из Нея́же на́м, су́щим во тме́, Све́т возсия́.

Младе́нствующи пло́тию и соверше́на душе́ю, святы́й Киво́т в до́м Бо́жий вхо́дит воспита́тися Боже́ственною благода́тию.

От вся́ких искуше́ний и бе́д душе́вных свободи́ ны́, притека́ющия к Тебе́, Всепе́тая, Твои́ми мольба́ми, Ма́ти Христа́ Бо́га.

Ликовству́им, празднолю́бцы, дне́сь, воспои́м Чи́стую Влады́чицу, Иоаки́ма и А́нну досто́йно чту́ще.

Проро́чествуй, Дави́де, глаго́ля Ду́хом: приведу́тся де́вы в сле́д Тебе́, приведу́тся Тебе́ во хра́м Цари́цы Ма́тери.

Ра́довахуся а́нгелов чи́ни, веселя́хуся пра́ведных ду́си, я́ко Бо́жия Ма́терь во свята́я приво́дится.

Прие́млющи пи́щу небе́сную, преспева́ше му́дростию и благода́тию, бы́вши Ма́ти по пло́ти Христа́ Бо́га.

И те́лом и ду́хом ра́довашеся, пребыва́ющи Мари́я Непоро́чная во хра́ме Бо́жии, я́коже сосу́д свяще́ннейший.

Введо́ша Тя́ во вну́треннейшее хра́ма целому́дреннии роди́телие Твои́, Пречи́стая, воспита́тися стра́нно в жили́ще Христа́ Бо́га.

Весели́тся дне́сь све́тло Иоаки́м, и А́нна непоро́чная Го́споду Бо́гу прино́сит же́ртву, да́нную е́й от обеща́ния — святу́ю Дще́рь.

Хва́лятся святи́и Дави́д и Иессе́й, и Иу́да чти́тся, из ко́рене бо и́х израсте́ пло́д — Де́ва Чи́стая, из Нея́же роди́ся Бо́г Преве́чный.

Мари́я Пречи́стая и одушевле́нная ски́ния приво́дится дне́сь в до́м Бо́жий, и прие́млет Сию́ Заха́рия рука́ми, я́ко освяще́нное сокро́вище Госпо́дне.

Я́ко две́рь спаси́тельную и го́ру мы́сленную, я́ко ле́ствицу одушевле́нную, почти́м, ве́рнии, вои́стинну Де́ву и Ма́терь Бо́жию, благослове́нную рука́ми иере́ев.

Проро́цы, апо́столи и му́ченицы Христо́вы, а́нгелов чи́ни, и вси́ земноро́днии, почти́м пе́сньми Де́ву Чи́стую, я́ко благослове́нную Ма́терь Высоча́йшаго.

В хра́м Тя́ принесо́ша, Всенепоро́чная Чи́стая, Боже́ственне ро́ждшии Тя́, я́ко же́ртву чи́сту, и стра́нно водворя́ешися в неходи́мых Бо́гу предугото́ватися в жили́ще Сло́ву.

Из пра́ведных произы́де Иоаки́ма и А́нны обеща́ния пло́д — Богоотрокови́ца Мари́я и, я́ко кади́ло прия́тное, пло́тию младе́нствующи, приво́дится во святи́лище свято́е я́ко Свята́я во святы́х обита́ти.

Младе́нствующую естество́м и па́че естества́ я́вльшуюся Ма́терь Бо́жию восхва́лим пе́сньми: в хра́м бо зако́нный Го́споду дне́сь приво́дится в воню́ благово́ния, пра́ведных я́ко пло́д духо́вный.

Со а́нгелом, е́же — ра́дуйся, — Богоро́дице прили́чне возопии́м, ве́рнии, — ра́дуйся, вседо́брая Неве́сто; ра́дуйся, о́блаче све́тлый, из него́же на́м возсия́ Госпо́дь, во тме́ неве́дения седя́щим; ра́дуйся, все́х Наде́ждо.

Святы́х свята́я и Богома́ти Мари́е, моли́твами Твои́ми, Чи́стая, свободи́ ны́ от се́тей вра́жиих и вся́кия е́реси и ско́рби, ве́рно покланя́ющияся о́бразу свята́го Твоего́ зра́ка.

Пе́снь досто́йную Богоро́дице вся́ тва́рь со а́нгелом Гаврии́лом взыва́ет, вопию́ще: ра́дуйся, Ма́ти Бо́жия Всенепоро́чная, Е́юже изба́вихомся пе́рвыя кля́твы, бы́вше нетле́ния о́бщницы.

Херуви́м пребо́льши, и серафи́м вы́шши, и ши́рши небе́с яви́лася еси́, Де́во, я́ко Невме́стнаго все́ми во утро́бе вмести́вши, Бо́га на́шего, и ро́ждши несказа́нно: Его́же моли́ приле́жно о на́с.

Стеце́мсѧ дне́сь бцⷣꙋ почита́юще пѣ́сньми: и҆ торжествꙋ́имъ дх҃о́вный пра́здникъ: въ хра́мъ бо бг҃ꙋ да́ръ прино́ситсѧ.

Пѣ́сньми да воспои́мъ бцⷣы сла́вное предше́ствїе: ко хра́мꙋ бо дне́сь, ꙗ҆́кѡ хра́мъ бж҃їй, прино́ситсѧ прⷪ҇ро́чески, да́ръ многоцѣ́нный.

А҆́нна непоро́чнаѧ ра́довашесѧ, ꙗ҆́кѡ да́ръ многоцѣ́ненъ бг҃ꙋ приносѧ́щи въ хра́мъ мт҃рски, і҆ѡакі́мъ же съ не́ю торжествꙋ́етъ свѣ́тлѡ.

Дв҃дъ пра́ѻтецъ тво́й воспѣ́ тѧ дре́вле, дв҃о бг҃оневѣ́сто, дще́рь глаго́лѧ тѧ̀ цр҃ѧ̀ хрⷭ҇та̀, є҆го́же и҆ роди́вши мт҃рски млⷣнца дои́ла є҆сѝ.

Пло́тїю трилѣ́тствꙋющи бцⷣа гдⷭ҇ꙋ прино́ситсѧ: заха́рїа же сїю̀ сщ҃е́нникъ бж҃їй прїе́мъ, ра́дꙋѧсѧ въ хра́мъ возложѝ.

Дѣ̑вы ликовствꙋ́йте, свѣщенѡ́сицы начни́те дне́сь и҆ ма́тєри, воспо́йте цр҃и́цѣ мт҃ри, приходѧ́щей въ хра́мъ цр҃ѧ̀ хрⷭ҇та̀.

Торжествꙋ́имъ празднолю́бцы, и҆ сра́дꙋемсѧ дꙋ́хомъ, во ст҃ѣ́мъ пра́здницѣ ᲂу҆чрежда́ющесѧ дне́сь, дще́ре цр҃е́вы, и҆ мт҃ре бг҃а на́шегѡ.

І҆ѡакі́ме, ра́дꙋйсѧ дне́сь, и҆ весели́сѧ а҆́нно дх҃омъ, рожде́ннꙋю и҆з̾ ва́съ гдⷭ҇ꙋ приводѧ́ще трилѣ́тствꙋющꙋ, ꙗ҆́кѡ ю҆́ницꙋ чтⷭ҇ꙋ всенепоро́чнꙋю.

Бж҃їе селе́нїе во хра́мъ ст҃ы́й приво́дитсѧ бцⷣа марїа́мъ, пло́тїю, трилѣ́тствꙋющаѧ, и҆ то́й свѣщесвѣ́тѧтъ дѣ̑вы предтекꙋ́ще.

Бж҃їѧ а҆́гница небла́зненнаѧ, и҆ голꙋби́ца нескве́рнаѧ, бг҃овмѣсти́маѧ ски́нїѧ, сла́вы ѡ҆сщ҃е́нїе, въ ски́нїи ст҃ѣ́й ѡ҆бита́ти и҆збра̀.

Трилѣ́тствꙋющаѧ тѣ́ломъ, и҆ многолѣ́тствꙋющаѧ дх҃омъ, ши́ршаѧ нб҃съ, и҆ го́рнихъ си́лъ превы́шшаѧ, да восхва́литсѧ пѣ́сньми бг҃оневѣ́стнаѧ.

Бцⷣы пра́зднꙋюще, въ невходи́мыхъ предше́ствїе, свѣщеимꙋ́ще, ᲂу҆́мнѡ съ весе́лїемъ дне́сь, и҆ мы̀ съ дѣ́вами ко хра́мꙋ прибли́жимсѧ.

Сщ҃е́нницы бж҃їи ѡ҆блецы́тесѧ въ пра́вдꙋ бл҃года́тїю, и҆ срѧ́щите свѣ́тлѡ, вхо́ды подаю́ще дще́ри цр҃ѧ̀ и҆ бг҃а во ст҃а̑ѧ.

Прⷪ҇ро́че и҆са́їе, прорцы̀ на́мъ, дв҃а кто̀ є҆́сть и҆мꙋ́щаѧ во чре́вѣ, ꙗ҆́же и҆з̾ і҆ꙋ́дина ко́рене прозѧ́бши, и҆ ро́ждшисѧ и҆з̾ дв҃да царѧ̀, сѣ́мене ст҃а́гѡ, пло́дъ бл҃госла́вный;

Начина́йте дѣ̑вы и҆ воспо́йте пѣ̑сни, рꙋка́ми держа́ще свѣщы̀, чтⷭ҇ыѧ бцⷣы предше́ствїе хва́лѧще, ны́нѣ грѧдꙋ́щїѧ во хра́мъ бж҃їй кꙋ́пнѡ съ на́ми пра́зднꙋющи.

І҆ѡакі́ме и҆ а҆́нно весели́тесѧ ны́нѣ, во хра́мъ приводѧ́ще гдⷭ҇нь чтⷭ҇ꙋю бг҃а мт҃рь хрⷭ҇та̀ всецр҃ѧ̀ бꙋ́дꙋщꙋю, ѿ ва́съ же ро́ждшꙋюсѧ, ꙗ҆́кѡ трилѣ́тствꙋющꙋю ю҆́ницꙋ.

Ст҃а́ѧ ст҃ы́хъ сꙋ́щи чтⷭ҇аѧ, во хра́мъ ст҃ы́й возлюби́ла є҆сѝ всели́тисѧ, и҆ со а҆́гг҃лы, дв҃о, бесѣ́дꙋющи пребыва́еши, пресла́внѣ съ нб҃съ хлѣ́бъ прїе́млющи, пита́тельнице жи́зни.

Ро́ждше па́че наде́жды пречтⷭ҇ꙋю дв҃ꙋ, бл҃гочести́вѡ ѡ҆бѣща́хꙋсѧ бг҃ꙋ принестѝ: и҆ и҆сполнѧ́ютъ, даю́ще ꙗ҆́кѡ же́ртвꙋ рожде́ннꙋю ѿ ни́хъ, і҆ѡакі́мъ дне́сь и҆ а҆́нна, въ до́мъ бж҃їй.

Прозѧбѐ же́злъ и҆ногда̀ а҆арѡ́новъ, проѡбразꙋ́ющїй, чтⷭ҇аѧ, бж҃е́ственное ржⷭ҇тво̀, ꙗ҆́кѡ безсѣ́меннѡ зачне́ши, и҆ нетлѣ́нна пребꙋ́деши, и҆ по ржⷭ҇твѣ̀ дѣ́вствꙋющи ꙗ҆ви́шисѧ, млⷣнца пита́ющи всѣ́хъ бг҃а.

Дѣ̑вы дв҃ꙋ, и҆ ма́тєри мт҃рь бл҃гоче́стнѡ стецы́тесѧ почти́ти съ на́ми ро́ждшꙋюсѧ, ꙗ҆́кѡ непоро́чнꙋю же́ртвꙋ и҆ рожде́ннꙋю бг҃ꙋ плодоноси́мꙋю, всѝ ᲂу҆́бѡ свѣ́тлѡ пра́зднꙋемъ.

Да свѣтлоно́симъ, правосла́внїи, всѝ стека́ющесѧ и҆ сла́вѧще бг҃омт҃рь, ꙗ҆́кѡ гдⷭ҇ꙋ дне́сь приво́дитсѧ, ꙗ҆́кѡ же́ртва бл҃гопрїѧ́тна.

Да веселѧ́тсѧ пра́ѻтцы дне́сь, влⷣчце, и҆ да ра́дꙋетсѧ ро́ждшаѧ тѧ̀ со ѻ҆тце́мъ твои́мъ, ꙗ҆́кѡ пло́дъ и҆́хъ гдⷭ҇ꙋ прино́ситсѧ.

Многоимени́тꙋю и҆ сла́внѣйшꙋю непоро́чнꙋю ю҆́ницꙋ, ꙗ҆́кѡ пло́тїю ро́ждшꙋю бж҃е́ственнаго тельца̀, всѝ воспои́мъ вѣ́рнѡ пра́зднꙋюще.

Оу҆невѣ́щенїѧ написꙋ́ютсѧ бж҃е́ствєннаѧ зна́мєнїѧ, па́че ᲂу҆ма̀ ржⷭ҇тва̀ твоегѡ̀, чтⷭ҇аѧ дв҃о, дне́сь дх҃омъ ст҃ы́мъ въ домꙋ̀ бж҃їи.

Да ѿве́рзꙋтсѧ преддвє́рїѧ сла́вы бг҃а на́шегѡ, и҆ да прїе́млютъ неискꙋсобра́чнꙋю бж҃їю мт҃рь, ꙗ҆́коже трилѣ́тствꙋющꙋю нескве́рнꙋю ю҆́ницꙋ.

Многочⷭ҇тнꙋ́ю и҆ присѣ́ннꙋю го́рꙋ воспои́мъ приснодв҃ꙋ, бж҃їю мт҃рь бы́вшꙋ: та́ бо ѡ҆блиста̀ свѣ́тъ въ концѣ́хъ.

Пра́зднꙋимъ вѣ́рнїи пра́здникъ дх҃о́вный мт҃ре бж҃їѧ, воспѣва́юще бл҃гоче́стнѡ: є҆́сть бо ст҃ѣ́йша нбⷭ҇ныхъ ᲂу҆мѡ́въ.

Пѣ́сньми дх҃о́вными восхва́лимъ вѣ́рнїи мт҃рь свѣ́та: ꙗ҆́кѡ дне́сь на́мъ ꙗ҆ви́сѧ предходѧ́щи въ хра́мъ бж҃їй.

Нескве́рнаѧ а҆́гница, и҆ чтⷭ҇аѧ голꙋби́ца преведе́сѧ ѡ҆бита́ти въ до́мъ бж҃їй, ꙗ҆́кѡ непоро́чнаѧ, пронарече́ннаѧ бы́ти мт҃и бж҃їѧ.

Въ хра́мъ зако́нный вхо́ды соверша́етъ хра́мъ бж҃їй, нбⷭ҇наѧ ски́нїѧ, и҆з̾ неѧ́же на́мъ сꙋ́щымъ во тмѣ̀ свѣ́тъ возсїѧ̀.

Млⷣнствꙋющи пло́тїю, и҆ соверше́на дꙋше́ю, ст҃ы́й кївѡ́тъ въ до́мъ бж҃їй вхо́дитъ, воспита́тисѧ бж҃е́ственною бл҃года́тїю.

Ѿ всѧ́кихъ и҆скꙋше́нїй и҆ бѣ́дъ дꙋше́вныхъ, свободѝ ны̀ притека́ющыѧ къ тебѣ̀, всепѣ́таѧ, твои́ми мольба́ми, мт҃и хрⷭ҇та̀ бг҃а.

Ликовствꙋ́имъ празднолю́бцы дне́сь, воспои́мъ чтⷭ҇ꙋю влⷣчцꙋ, і҆ѡакі́ма и҆ а҆́ннꙋ досто́йнѡ чтꙋ́ще.

Прⷪ҇ро́чествꙋй, дв҃де, глаго́лѧ дх҃омъ: приведꙋ́тсѧ дѣ̑вы въ слѣ́дъ тебѐ, приведꙋ́тсѧ тебѣ̀ во хра́мъ цр҃и́цы мт҃ри.

Ра́довахꙋсѧ а҆́гг҃лѡвъ чи́ни, веселѧ́хꙋсѧ првⷣныхъ дꙋ́си, ꙗ҆́кѡ бж҃їѧ мт҃рь во ст҃а̑ѧ приво́дитсѧ.

Прїе́млющи пи́щꙋ нбⷭ҇нꙋю, преспѣва́ше мꙋ́дростїю и҆ бл҃года́тїю, бы́вши мт҃и по пло́ти хрⷭ҇та̀ бг҃а.

И҆ тѣ́ломъ и҆ дꙋ́хомъ ра́довашесѧ, пребыва́ющи мр҃і́а непоро́чнаѧ во хра́мѣ бж҃їи, ꙗ҆́коже сосꙋ́дъ сщ҃е́ннѣйшїй.

Введо́ша тѧ̀ во внꙋ́треннѣйшее хра́ма, цѣломꙋ́дреннїи роди́телїе твоѝ, пречⷭ҇таѧ, воспита́тисѧ стра́ннѡ, въ жили́ще хрⷭ҇та̀ бг҃а.

Весели́тсѧ дне́сь свѣ́тлѡ і҆ѡакі́мъ, и҆ а҆́нна непоро́чнаѧ гдⷭ҇ꙋ бг҃ꙋ прино́ситъ же́ртвꙋ, да́ннꙋю є҆́й ѿ ѡ҆бѣща́нїѧ свѧтꙋ́ю дще́рь.

Хва́лѧтсѧ свѧті́и, дв҃дъ и҆ і҆ессе́й, и҆ і҆ꙋ́да чти́тсѧ: и҆з̾ ко́рене бо и҆́хъ и҆зрастѐ пло́дъ, дв҃а чтⷭ҇аѧ, и҆з̾ неѧ́же роди́сѧ бг҃ъ превѣ́чный.

Мр҃і́а пречⷭ҇таѧ и҆ ѡ҆дꙋшевле́ннаѧ ски́нїѧ, приво́дитсѧ дне́сь въ до́мъ бж҃їй, и҆ прїе́млетъ сїю̀ заха́рїа рꙋка́ми, ꙗ҆́кѡ ѡ҆свѧще́нное сокро́вище гдⷭ҇не.

Ꙗ҆́кѡ две́рь сп҃си́тельнꙋю, и҆ го́рꙋ мы́сленнꙋю, ꙗ҆́кѡ лѣ́ствицꙋ ѡ҆дꙋшевле́ннꙋю, почти́мъ, вѣ́рнїи, вои́стиннꙋ дв҃ꙋ и҆ мт҃рь бж҃їю, бл҃гослове́ннꙋю рꙋка́ми і҆ере́євъ.

Прⷪ҇ро́цы, а҆пⷭ҇ли и҆ мч҃нцы хрⷭ҇тѡ́вы, а҆́гг҃лѡвъ чи́ни, и҆ всѝ земноро́днїи, почти́мъ пѣ́сньми дв҃ꙋ чтⷭ҇ꙋю, ꙗ҆́кѡ бл҃гослове́ннꙋю мт҃рь высоча́йшагѡ.

Въ хра́мъ тѧ̀ принесо́ша, всенепоро́чнаѧ чтⷭ҇аѧ, бж҃е́ственнѣ ро́ждшїи тѧ̀ ꙗ҆́кѡ же́ртвꙋ чи́стꙋ: и҆ стра́ннѡ водворѧ́ешисѧ въ неходи́мыхъ бг҃ꙋ, пред̾ꙋгото́ватисѧ въ жили́ще сло́вꙋ.

И҆з̾ пра́ведныхъ произы́де і҆ѡакі́ма и҆ а҆́нны, ѡ҆бѣща́нїѧ пло́дъ бг҃оѻтрокови́ца мр҃і́а: и҆ ꙗ҆́кѡ кади́ло прїѧ́тное, пло́тїю младе́нствꙋющи, приво́дитсѧ во свѧти́лище ст҃о́е, ꙗ҆́кѡ ст҃а́ѧ во ст҃ы́хъ ѡ҆бита́ти.

Младе́нствꙋющꙋю є҆стество́мъ, и҆ па́че є҆стества̀ ꙗ҆́вльшꙋюсѧ мт҃рь бж҃їю, восхва́лимъ пѣ́сньми: въ хра́мъ бо зако́нный гдⷭ҇ꙋ дне́сь приво́дитсѧ, въ воню̀ бл҃гово́нїѧ првⷣныхъ, ꙗ҆́кѡ пло́дъ дх҃о́вный.

Со а҆́гг҃ломъ, є҆́же ра́дꙋйсѧ, бцⷣѣ прили́чнѣ возопїи́мъ вѣ́рнїи: ра́дꙋйсѧ, вседо́браѧ невѣ́сто. ра́дꙋйсѧ ѻ҆́блаче свѣ́тлый, и҆з̾ негѡ́же на́мъ возсїѧ̀ гдⷭ҇ь, во тмѣ̀ невѣ́дѣнїѧ сѣдѧ́щымъ. ра́дꙋйсѧ всѣ́хъ наде́ждо.

Ст҃ы́хъ ст҃а́ѧ, и҆ бг҃омт҃и мр҃і́е, мл҃твами твои́ми, чтⷭ҇аѧ, свободи́ ны ѿ сѣ́тей вра́жїихъ, и҆ всѧ́кїѧ є҆́реси и҆ ско́рби, вѣ́рнѡ покланѧ́ющыѧсѧ ѡ҆́бразꙋ ст҃а́гѡ твоегѡ̀ зра́ка.

Пѣ́снь досто́йнꙋю бцⷣѣ всѧ̀ тва́рь со а҆́гг҃ломъ гаврїи́ломъ взыва́етъ, вопїю́ще: ра́дꙋйсѧ, мт҃и бж҃їѧ всенепоро́чнаѧ, є҆́юже и҆зба́вихомсѧ пе́рвыѧ клѧ́твы, бы́вше нетлѣ́нїѧ ѻ҆́бщницы.

Херꙋві̑мъ пребо́льши, и҆ серафі̑мъ вы́шши, и҆ ши́рши нб҃съ ꙗ҆ви́ласѧ є҆сѝ, дв҃о: ꙗ҆́кѡ невмѣ́стнаго всѣ́ми, во ᲂу҆тро́бѣ вмѣсти́вши бг҃а на́шего, и҆ ро́ждши несказа́ннѡ, є҆го́же молѝ прилѣ́жнѡ ѡ҆ на́съ.