Песнь 1
Ирмос
Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Тропарь
Прииди́те, пе́сньми духо́вными восхва́лим све́тлую па́мять святи́теля Кли́мента, и́мже вся́ Це́рковь просвеще́нна Христа́ сла́вит.
Тропарь
Я́коже со́лнце, в ми́ре сия́я, святи́телю Кли́менте, просвеща́еши вселе́нную житие́м твои́м, и́мже и мене́ просвети́, молю́ся.
Тропарь
Наста́ светоза́рная па́мять твоя́, святи́телю Кли́менте, озаря́ющи все́х, в святе́й твое́й це́ркви ве́рных соше́дшихся и тя́ сла́вящих.
Богородичен
Две́рь Небе́сную, Ю́же проро́цы пропове́даша, Де́ву, Христа́ ро́ждшую, в пе́снех по достоя́нию возвели́чим.
Песнь 3
Ирмос
Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, Еди́не Человеколю́бче.
Тропарь
Прииди́те вси́, почти́м краси́теля церко́внаго Кли́мента, моля́ще не преста́ти ста́ду своему́ ми́р и душа́м на́шим ми́лость посыла́ти.
Тропарь
К твое́й святы́ни припа́дающе, блаже́нне, умиле́нным гла́сом тебе́ вопие́м: при́зри на ны́ моли́твами твои́ми, мо́лим тя́.
Тропарь
Луча́ми кни́жнаго уче́ния напая́я ве́сь ми́р слове́нский, сия́еши, я́коже со́лнце, златоза́рными словесы́, и́миже озари́ на́с, мо́лим тя́.
Богородичен
Неизрече́нно ро́ждши Оте́ческую Зарю́, Вседе́теля всея́ тва́ри и Спа́са ду́ш на́ших, утверди́ ны́ в любви́ Твое́й, Пречи́стая.
Песнь 4
Ирмос
Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча, и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.
Тропарь
Тя́ ми́рови Христо́с па́стыря подаде́, поручи́в ти́ ста́до избра́нное, блаже́нне. Те́м, я́ко со́лнце, сия́еши, озаря́я моля́щих ти́ ся́.
Тропарь
Очи́стив ду́шу, и те́ло, и у́м, му́дре Кли́менте, я́ко зла́то, на земли́ све́тел бы́л еси́, сосу́д досто́ин Пресвята́го Ду́ха.
Тропарь
Вся́ тва́рь дне́сь прославля́ет труды́ твоя́, святи́телю Кли́менте. Просвети́ ны́ у́бо и отпуще́ние грехо́в пода́ждь моли́твами твои́ми.
Богородичен
Безсе́менно заче́ншая Творца́ все́х, Пренепоро́чная, пречи́стеи ру́це возде́вши, в ми́ре покры́й ны́ крыло́ма Твои́ма и от гряду́щаго гне́ва изба́ви ны́.
Песнь 5
Ирмос
Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́ окая́ннаго, но обрати́ мя́, и к све́ту за́поведей Твои́х пути́ моя́ напра́ви, молю́ся.
Тропарь
К твое́й святы́ни вси́ припа́даем, Кли́менте, святи́телю Спа́сов, умиле́нными глаго́лы со слеза́ми вопию́ще: не забу́ди моли́твенники твоя́.
Тропарь
А́нгельское житие́ име́в на земли́, ра́вную со А́нгелы че́сть восприе́млеши, с ни́миже ны́не предстоя́ Влады́це, моли́ся о ста́де твое́м.
Тропарь
Свяще́нную слу́жбу всегда́ Бо́гу вознося́, все́х ко благоче́стию приводи́л еси́ словесы́ духо́вными, и́миже и мене́ озари́, молю́ тя́.
Богородичен
Ма́тернее дерзнове́ние к Сы́ну Твоему́ иму́щи, на спасе́ние челове́ков рожде́нному, не пре́зри моли́тв на́ших, Пречи́стая, Тя́ бо по Бо́зе Еди́ну помо́щницу и́мамы.
Песнь 6
Ирмос
Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.
Тропарь
Тучено́сен о́блак яви́лся еси́ все́м Це́рквам, Кли́менте свя́те. И ны́не моли́ся Влады́це ро́су духо́вную излия́ти на на́с, певцы́ твоя́.
Тропарь
Све́тится Це́рковь О́хридская, труды́ твоя́ почита́ющи, в ню́же прише́д, сохрани́ от бе́д честву́ющих честну́ю па́мять твою́.
Тропарь
Я́ко гро́м, гремя́ громогла́сным язы́ком Небе́сное уче́ние, и я́ко кимва́л, звяца́я златоза́рными устна́ми, всю́ зе́млю огласи́л еси́, блаже́нне Кли́менте, Богогла́се.
Богородичен
Не преста́й о на́с моля́щися, Богоро́дице Де́во, я́ко ве́рным Ты́ еси́ утвержде́ние и кре́пость Боже́ственная.
Песнь 7
Ирмос
От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Тропарь
Гро́б тво́й честны́й со стра́хом обстоя́ще, святи́телю, умиле́нным гла́сом вопие́м ти́, грехо́в избавле́ние прося́ще.
Тропарь
Не отврати́ лица́ твоего́, блаже́нне Кли́менте, но моли́ся к Изба́вителю Христу́ Бо́гу, да ми́лости Своея́ сподо́бит ны́.
Тропарь
Простри́ на моли́тву пречестне́и ру́це твои́, Кли́менте свя́те, и защити́ от все́х зо́л, укрепля́я и освяща́я на́с.
Богородичен
Безсе́менно вмести́вши Творца́ во чре́ве Свое́м и неизрече́нно роди́вши, Того́ умоли́ я́ко Ма́ти спасти́ ду́ши на́ша.
Песнь 8
Ирмос
Седмери́цею пе́щь халде́йский мучи́тель благочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Тропарь
Со Безпло́тными Си́лами водворя́яся и Христу́ Бо́гу с ни́ми предстоя́, помоли́ся о творя́щих честну́ю па́мять твою́, пою́щих: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Тропарь
При́зри на птенцы́, и́хже воспита́л еси́ под кро́вом твои́м, и наслади́л еси́ слове́с твои́х медото́чных, и, просте́р ру́це, благослови́ ученики́ твоя́, пою́щия: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Тропарь
Вку́пе с блаже́нным Кири́ллом и светоза́рным Мефо́дием процве́л еси́, я́коже на горе́. Вку́пе и моли́теся при́сно о ста́де ва́шем, воспева́ющем: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Богородичен
Ма́ти Бо́жия, Спа́са пло́тию ро́ждшая, соу́з на́с страсте́й разреши́ и моли́ся спасти́ся на́м, пою́щим: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.
Песнь 9
Ирмос
Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее Небе́с, те́м Тя́, Богоро́дицу, А́нгелов и челове́к чинонача́лия велича́ют.
Тропарь
Не помяни́ безчи́сленных мои́х грехо́в, блаже́нне святи́телю, но, просте́р свы́ше пречи́стеи ру́це твои́, возведи́ мя́, во гресе́х лежа́щаго поги́бельных.
Тропарь
Тя́ молю́, Кли́менте святи́телю, и ру́це к тебе́ простира́ю, и сле́зы испуща́ю, и коле́не преклоня́ю, прося́ отпуще́ния безчи́сленных мои́х прегреше́ний моли́твами твои́ми.
Тропарь
Испроси́, блаже́нне, с Небесе́ побе́ду на проти́вныя враги́ благочести́вым лю́дем, христолюби́вое же во́инство и правосла́вный наро́д изба́ви от вся́ких зо́л, я́ко да досто́йно тя́ ублажа́ем.
Богородичен
А́нгелов Творца́ безсе́менно заче́нши и ро́ждши пло́тию Спа́са на́шего, Того́ приле́жно моли́, Богоро́дице, да́ти на́м грехо́в отпуще́ние, я́ко да досто́йно Тя́ велича́ем.