Канон святителю Амфилохию Иконийскому

Словеса́ злочести́вых ересе́й и киче́ния, правосла́вия заре́ю просвеще́н, удо́бно разори́л еси́; в не́мже тебе́ чту́щия, священноявле́нне, сохрани́.

И́же все́х спасе́ния при́сно хотя́й, Госпо́дь свяще́нныя тя́ па́ствы путевожда́, иера́рше, предлага́ет, сло́вом и житие́м светя́ща изря́дно ви́дев.

Зако́нно пострада́ти избра́в по Христо́ве Це́ркви, всеору́жием, о́тче, креста́ себе́ огради́л еси́ и победи́тель благода́тию и вене́чник яви́лся еси́, сла́вне.

Боже́ственное и светоза́рное твои́х догма́тов сия́ние погаси́ злочести́вый по́лк ерети́ческий, Амфило́хие сла́вне.

Во́д животво́рных, я́ко река́, сы́й, от Бо́га испо́лнена, первосвяще́нник бы́в, и́миже, благочести́вии, напая́емся.

Бога́тыми луча́ми просвеща́емь, у́м осия́л еси́ та́йным, преподо́бне, твои́х уче́ний благоле́пием.

Амфило́хия боже́ственнаго и богоглаго́ливаго свяще́нное торжество́, богому́дрии, прииди́те, ве́рою воспле́щим, того́ уче́ньми и богосло́вием укрепля́еми.

Невестово́дец, богоно́се, це́ркве су́щия в Христе́ бы́в, добро́тою слове́с сию́ украси́л еси́ и красото́ю правосла́вия уясни́л еси́.

Богосло́вный тво́й язы́к и богоглаго́ливый нача́льныя Тро́ицы единоче́стную держа́ву все́м уясни́ и Еди́но Божество́ чти́ти в Тре́х Ипоста́сех.

Просвеща́емь све́том Трисо́лнечнаго Божества́, се́л еси́ на престо́ле архиере́йства, богому́дре Амфило́хие.

Всеце́ла тебе́ сама́го Бо́гу освяти́л еси́ и бы́л еси́ богопропове́дник велегла́сен, о́тче всеблаже́нне Амфило́хие.

Ра́достный на́м пра́здник и всесвяще́нный наста́ боже́ственнаго и му́драго учи́теля, ми́р освяща́ющий.

Умертви́в в пло́ти долере́вностное мудрова́ние, безстра́стия благода́тию оде́ялся еси́, о́тче священнотаи́нниче, и всечи́стыми уче́нии Тро́ицу пропове́дал еси́.

Стра́хом огради́вся Боже́ственным, богоприя́тне, и ду́шу от скве́рн чи́сту соде́яв, богосло́вия яви́лся еси́ свяще́ннейший орга́н, преподо́бне.

Та́инственнейшим боговеща́нием твои́м вне́млюще любо́вию, А́риева, о́тче, разсече́ния Божества́ избега́ем, Тро́ицу Несозда́нную и Единосу́щную ве́рою сла́вяще.

Облича́ема уче́нием твои́м Македо́ния, о́тче, зря́ще, Ду́ха Блага́го, Отцу́ же и Сы́ну спокланя́ема и Собезнача́льна, ве́рою сла́вим.

Сло́вом уясни́в е́же па́че сло́ва Сло́ва воплоще́ние, чествова́ти в дву́х существа́х Еди́наго Бо́га богому́дренно научи́л еси́ и разделе́ния, и смеше́ния бежа́ти, богоприя́тне.

Украси́шася пе́сненно уста́ твоя́, богосло́вящая я́сно Тро́ицу несозда́нну, безнача́льну, единосу́щну, несли́тну Треми́ Ипоста́сьми, о́тче богому́дре. Е́йже вопие́м: благослови́те, вся́ дела́ Госпо́дня, Го́спода.

Бога́тство тебе́ и сла́ву честну́ю Ипоста́сная Му́дрость даде́, богосло́вившу ти́, прему́дре, благоче́стно, и ересе́й низложи́вшу горды́ню, и любо́вию пою́щу: благослови́те, вся́ дела́ Госпо́дня, Го́спода.

И́же все́м подая́й жи́знь я́ко иера́рха ве́рна и богоглаго́лива в Це́рковь тя́, преподо́бне, перворо́дных вво́дит, свяще́нствующа та́инственно и ве́рно пою́ща: благослови́те, вся́ дела́ Госпо́дня, Го́спода.

Еди́но Триипоста́сное Естество́ всеблагоче́стно богосло́вив, Всесвяту́ю Тро́ицу, Богонача́льную, Непости́жную, ны́не от Нея́ почествова́лся еси́, священноявле́нне Амфило́хие.

Име́я к Бо́гу дерзнове́ние, я́ко иера́рх, богоно́се, свяще́нную и светоно́сную соверша́ющих па́мять твою́, всеблаже́нне, всегда́ помина́й, твоему́ Влады́це предстоя́.

Дава́еши ми́ оби́льную благода́ть, похвалы́ тебе́, богому́дре, спле́тшу усе́рдным се́рдцем, грехо́в разреше́ние прося́щу, я́ко святи́тель ве́рнейший, преподо́бне о́тче Амфило́хие.

Словеса̀ ѕлочести́выхъ є҆ресе́й и҆ кичє́нїѧ, правосла́вїѧ заре́ю просвѣще́нъ, ᲂу҆до́бнѡ разори́лъ є҆сѝ: въ не́мже тебѐ чтꙋ́щыѧ, свѧщенноѧвле́нне, сохранѝ.

И҆́же всѣ́хъ спасе́нїѧ при́снѡ хотѧ́й гдⷭ҇ь, свѧще́нныѧ тѧ̀ па́ствы пꙋтевожда̀, і҆ера́рше, предлага́етъ, сло́вомъ и҆ житїе́мъ свѣтѧ́ща и҆зрѧ́днѡ ви́дѣвъ.

Зако́ннѡ пострада́ти и҆збра́въ по хрⷭ҇то́вѣ цр҃кви, всеѻрꙋ́жїемъ, ѻ҆́тче, крⷭ҇та̀ себѐ ѡ҆гради́лъ є҆сѝ, и҆ побѣди́тель благода́тїю и҆ вѣне́чникъ ꙗ҆ви́лсѧ є҆сѝ, сла́вне.

Бжⷭ҇твенное и҆ свѣтоза́рное твои́хъ догма́тѡвъ сїѧ́нїе, погасѝ ѕлочести́вый по́лкъ є҆реті́ческїй, а҆мфїло́хїе сла́вне.

Во́дъ животво́рныхъ ꙗ҆́кѡ рѣка̀ сы́й ѿ бг҃а и҆спо́лнена, первосвѧще́нникъ бы́въ, и҆́миже благочести́вїи напаѧ́емсѧ.

Бога́тыми лꙋча́ми просвѣща́емь, ᲂу҆́мъ ѡ҆сїѧ́лъ є҆сѝ та́йнымъ, прпⷣбне, твои́хъ ᲂу҆че́нїй благолѣ́пїемъ.

А҆мфїло́хїа бжⷭ҇твеннагѡ и҆ бг҃оглаго́ливагѡ свѧще́нное торжество̀, бг҃омꙋ́дрїи, прїиди́те вѣ́рою воспле́щимъ, тогѡ̀ ᲂу҆че́ньми и҆ бг҃осло́вїемъ ᲂу҆крѣплѧ́еми.

Невѣстово́децъ, бг҃оно́се, цр҃кве сꙋ́щїѧ въ хрⷭ҇тѣ̀ бы́въ, добро́тою слове́съ сїю̀ ᲂу҆краси́лъ є҆сѝ, и҆ красото́ю правосла́вїѧ ᲂу҆ѧсни́лъ є҆сѝ.

Бг҃осло́вный тво́й ѧ҆зы́къ и҆ бг҃оглаго́ливый, нача́льныѧ трⷪ҇цы є҆диноче́стнꙋю держа́вꙋ всѣ̑мъ ᲂу҆ѧснѝ, и҆ є҆ди́но бжⷭ҇тво̀ чти́ти въ тре́хъ ѵ҆поста́сехъ.

Просвѣща́емь свѣ́томъ трисо́лнечнагѡ бжⷭ҇тва̀, сѣ́лъ є҆сѝ на прⷭ҇то́лѣ а҆рхїере́йства, бг҃омꙋ́дре а҆мфїло́хїе.

Всецѣ́ла тебѐ сама́го бг҃ꙋ ѡ҆свѧти́лъ є҆сѝ, и҆ бы́лъ є҆сѝ бг҃опроповѣ́дникъ велегла́сенъ, ѻ҆́тче, всебл҃же́нне а҆мфїло́хїе.

Ра́достный на́мъ пра́здникъ и҆ всесвѧще́нный наста̀, бжⷭ҇твеннагѡ и҆ мꙋ́драгѡ ᲂу҆чи́телѧ, мі́ръ ѡ҆свѧща́ющїй.

Оу҆мертви́въ въ пло́ти долѣре́вностное мꙋдрова́нїе, безстра́стїѧ бл҃года́тїю ѡ҆дѣ́ѧлсѧ є҆сѝ, ѻ҆́тче свѧщеннотаи́нниче, и҆ всечи́стыми ᲂу҆чє́нїи трⷪ҇цꙋ проповѣ́далъ є҆сѝ.

Стра́хомъ ѡ҆гради́всѧ бжⷭ҇твеннымъ, бг҃опрїѧ́тне, и҆ дꙋ́шꙋ ѿ скве́рнъ чи́стꙋ содѣ́ѧвъ, бг҃осло́вїѧ ꙗ҆ви́лсѧ є҆сѝ свѧще́ннѣйшїй ѻ҆рга́нъ, прпⷣбне.

Та́инственнѣйшымъ бг҃овѣща́нїємъ твои̑мъ вне́млюще любо́вїю, а҆́рїева, ѻ҆́тче, разсѣче́нїѧ бж҃ества̀ и҆збѣга́емъ, трⷪ҇цꙋ несозда́ннꙋю и҆ є҆диносꙋ́щнꙋю вѣ́рою сла́вѧще.

Ѡ҆блича́ема ᲂу҆че́нїемъ твои́мъ македо́нїа, ѻ҆́тче, зрѧ́ще, дх҃а бл҃га́го, ѻ҆ц҃ꙋ́ же и҆ сн҃ꙋ спокланѧ́ема, и҆ собезнача́льна, вѣ́рою сла́вимъ.

Сло́вомъ ᲂу҆ѧсни́въ, є҆́же па́че сло́ва, сло́ва воплоще́нїе, чествова́ти въ двꙋ́хъ сꙋщества́хъ є҆ди́наго бг҃а, бг҃омꙋ́дреннѡ наꙋчи́лъ є҆сѝ, и҆ раздѣле́нїѧ и҆ смѣше́нїѧ бѣжа́ти, бг҃опрїѧ́тне.

Оу҆краси́шасѧ пѣ́сненнѡ ᲂу҆ста̀ твоѧ̑ бг҃ослѡ́вѧщаѧ ꙗ҆́снѡ, трⷪ҇цꙋ несозда́ннꙋ, безнача́льнꙋ, є҆диносꙋ́щнꙋ, несли́тнꙋ тремѝ ѵ҆поста́сьми, ѻ҆́тче бг҃омꙋ́дре. є҆́йже вопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бога́тство тебѣ̀ и҆ сла́вꙋ честнꙋ́ю ѵ҆поста́снаѧ мꙋ́дрость дадѐ, бг҃осло́вившꙋ тѝ, премꙋ́дре, благоче́стнѡ, и҆ є҆ресе́й низложи́вшꙋ горды́ню, и҆ любо́вїю пою́щꙋ: благослови́те, всѧ̑ дѣла̀ гдⷭ҇нѧ, гдⷭ҇а.

И҆́же всѣ̑мъ подаѧ́й жи́знь, ꙗ҆́кѡ і҆ера́рха вѣ́рна, и҆ бг҃оглаго́лива, въ цр҃ковь тѧ̀ прпⷣбне перворо́дныхъ вво́дитъ, свѧще́нствꙋюща та́инственнѡ, и҆ вѣ́рнѡ пою́ща: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Є҆ди́но трїѷпоста́сное є҆стество̀ всеблагоче́стнѡ бг҃осло́вивъ, всесвѧтꙋ́ю трⷪ҇цꙋ бг҃онача́льнꙋю, непости́жнꙋю, ны́нѣ ѿ неѧ̀ почествова́лсѧ є҆сѝ, свѧщенноѧвле́нне а҆мфїло́хїе.

И҆мѣ́ѧ къ бг҃ꙋ дерзнове́нїе, ꙗ҆́кѡ і҆ера́рхъ, бг҃оно́се, свѧще́ннꙋю и҆ свѣтоно́снꙋю соверша́ющихъ па́мѧть твою̀, всебл҃же́нне, всегда̀ помина́й, твоемꙋ̀ влⷣцѣ предстоѧ̀.

Дава́еши мѝ ѻ҆би́льнꙋю бл҃года́ть, похвалы̑ тебѣ̀, бг҃омꙋ́дре, спле́тшꙋ ᲂу҆се́рднымъ се́рдцемъ, грѣхѡ́въ разрѣше́нїе просѧ́щꙋ, ꙗ҆́кѡ ст҃и́тель вѣ́рнѣйшїй, прпⷣбне ѻ҆́тче а҆мфїло́хїе.