Кондак 1
Возбра́нный чудотво́рче и ско́рый в ско́рбех помо́щниче, святи́телю о́тче Инноке́нтие, я́ко име́я ве́лие дерзнове́ние пред Го́сподем, от вся́ких на́с бе́д свобожда́й, да с ра́достию зове́м ти́:
Ра́дуйся, Инноке́нтие, моли́твенниче о душа́х на́ших.
Икос 1
А́нгельскому жи́тельству на небесе́х поревнова́л еси́, о́тче: по и́мени бо и житие́ твое́ непоро́чно бы́сть на земли́, сего́ ра́ди и возвы́сился еси́ до лицезре́ния Творца́ А́нгелов. Отню́дуже призира́я вы́ну на гра́д се́й и лю́ди, услы́ши на́с, похва́льная воспису́ющих ти́ сия́:
Ра́дуйся, неви́нностию А́гнца непоро́чнаго подража́тель бы́вый; ра́дуйся, воздержа́нием твои́м а́нгельское во пло́ти житие́ яви́вый.
Ра́дуйся, я́ко а́нгел, Сиби́рския це́ркве Бо́жия дела́ возвеща́яй; ра́дуйся, я́ко архистрати́г си́лы небе́сныя, все́х прибега́ющих к тебе́ от бе́д сохраня́яй.
Ра́дуйся, непоро́чности и неви́нности соиме́нный учи́телю; ра́дуйся, незло́бия и чистоты́ усе́рдный храни́телю.
Ра́дуйся, убеле́нный неви́нностию кри́не ра́йскаго прозябе́ния; ра́дуйся, умаще́нная чистото́ю ма́слино небе́снаго благослове́ния.
Ра́дуйся, у́ме небе́сных неизрече́нных бла́г наслажда́яйся; ра́дуйся, па́стырю, с му́дрыми в ра́дость Пастыренача́льника своего́ вше́дый.
Ра́дуйся, я́ко све́т лица́ Бо́жия я́сно на небеси́ смотря́еши; ра́дуйся, я́ко те́м же све́том осия́нный, притека́ющих к тебе́ неизрече́нно возвеселя́еши.
Ра́дуйся, Инноке́нтие, моли́твенниче о душа́х на́ших.
Кондак 2
Ве́дый Госпо́дь вели́ка тя́ бы́ти свети́льника во стране́ язы́ков, благоволи́ сокры́ти ро́д и оте́чество твое́, да яви́шися в земли́ Хи́нстей, я́коже Мелхиседе́к в Ханаа́нстей, и уве́риши, я́ко не от челове́к прише́л еси́ к на́м, но от Бо́га, Ему́ же пое́м: Аллилу́иа.
Икос 2
Ра́зум просвеще́нный хотя́ име́ти, богому́дре о́тче, от ю́ности избра́л еси́ в ме́сто образова́ния своего́ ма́терь градо́в правосла́вныя ве́ры на́шея и подви́жничества, да живя́ среди́ земны́х а́нгелов и взира́я на сконча́ние жи́тельства и́х, подража́тель яви́шися ве́ре и́х; те́мже и са́м соде́лался еси́ небе́сным челове́ком. Сего́ ра́ди слы́шиши от на́с сия́:
Ра́дуйся, виногра́де многопло́дный, в благорастворе́ннем ю́зе возра́стший; ра́дуйся, цве́те благово́нный, в Ма́лей Росси́и процве́тший.
Ра́дуйся, сла́во и удобре́ние гра́да Ки́ева; ра́дуйся, красото́ и утеше́ние отце́в Пече́рския ла́вры.
Ра́дуйся, я́ко измла́да му́дрости прилежа́, Боже́ственное писа́ние я́сне извы́кл еси́; ра́дуйся, я́ко отложи́в вся́ мирски́я сла́сти, Христо́в яре́м носи́ти изво́лил еси́.
Ра́дуйся, в ю́ности посвяти́вый в же́ртву прия́тну Го́споду себе́ сама́го; ра́дуйся, сохрани́вый невре́дно целому́дрие де́вства драга́го.
Ра́дуйся, я́ко в земне́м учи́лищи небе́сныя прему́дрости учи́вый; ра́дуйся, я́ко щито́м ве́ры вся́ разжже́нныя лука́ваго стре́лы угаси́вый.
Ра́дуйся, я́ко изде́тска Бо́га возлюби́вый; ра́дуйся, я́ко за́поведий Его́ нело́жный храни́тель бы́вый.
Ра́дуйся, Инноке́нтие, моли́твенниче о душа́х на́ших.
Кондак 3
Си́лою свы́ше позна́ тогда́ благове́рный ца́рь непоро́чное и свято́е жи́тельство твое́, свя́тче Бо́жий, и́же и избра́ тя́ во апо́стольское служе́ние и предпосла́, я́ко пе́рвенца духо́внаго сыноположе́ния, насажда́ти святу́ю ве́ру в земли́ язы́ков чужди́х, неве́дущих пе́ти Бо́гу: Аллилу́иа.
Икос 3
Име́ет тебе́, святи́телю о́тче Инноке́нтие, вся́ страна́ Сиби́рская вели́ка учи́теля и ди́вна в ве́ре наста́вника; сего́ ра́ди, я́ко до́бляго побо́рника ве́рным и ско́раго моли́твенника тя́ чту́ще, с весе́лием и ра́достию да́ры тебе́ прино́сим таковы́я:
Ра́дуйся, свяще́нная главо́, ра́зума вода́ми напоя́ема; ра́дуйся, пло́д благоуха́нен житие́м твои́м от ю́ности явля́яй.
Ра́дуйся, искорени́телю терно́внаго служе́ния и́дольскаго; ра́дуйся, насади́телю лозы́ правосла́вныя ве́ры.
Ра́дуйся, но́вый апо́столе, облагоуха́вый ве́рою после́дния концы́ Росси́и; ра́дуйся, до́брый па́стырю, утверди́вый кра́сныя но́ги своя́ на восто́це ца́рства Сиби́ри.
Ра́дуйся, мра́чныя страны́ просвети́телю; ра́дуйся, душе́вныя темноты́ озари́телю.
Ра́дуйся, враго́в ве́ры Христо́вы разруши́телю; ра́дуйся, прельсти́телей ду́ш христиа́нских рази́телю.
Ра́дуйся, идолослужи́тельных ста́рец му́дрость посрами́вый; ра́дуйся, му́дрых ве́ка сего́ мудре́йший.
Ра́дуйся, Инноке́нтие, моли́твенниче о душа́х на́ших.
Кондак 4
Бу́ря зло́бы дре́вляго зми́я обуя́ ца́рство хи́нов, егда́ не можа́ху отве́рзти ушеса́ ко глаго́лом Ца́рствия Христо́ва, тобо́ю, но́вый апо́столе, возвеща́емым, и не хотя́ху прия́ти тя́, втори́цею на преде́лех и́х я́вльшася, да умудри́ши я́ воспева́ти еди́ному Бо́гу: Аллилу́иа.
Икос 4
Слы́шаще и ве́дуще тя́ прему́дра учи́теля и и́стиннаго сказа́теля та́ин Бо́жиих, прихожда́ху к тебе́ не то́чию ста́рцы, но и ю́нии, в ни́хже ра́зум напечатлева́л еси́ дре́вния и́стины Ева́нгельския, сего́ ра́ди я́ко па́стыря, просвети́теля и отца́ на́шего ублажа́юще, зове́м ти́:
Ра́дуйся, ра́бе благи́й и де́лателю до́брый; ра́дуйся, искорени́телю злы́х и прогони́телю нече́стия бо́дрый.
Ра́дуйся, я́ко сугу́бу мзду́ небе́сную сугу́ба ра́ди путеше́ствия к хи́ном прия́л еси́; ра́дуйся, я́ко сподо́бился еси́ восприя́ти чуде́с да́р и сла́вы вене́ц пресве́тел.
Ра́дуйся, апо́столу Па́влу в по́двизех служе́ния своего́ подража́вый; Ра́дуйся, терпе́нию его́ в науче́нии безкни́жных ю́ношей после́довавый.
Ра́дуйся, я́ко на па́жити ве́ры пра́выя и при исто́чнице воды́ живы́я лю́ди твоя́ па́ствил еси́; ра́дуйся, я́ко на зла́це кра́сне пребы́ти твоему́ ста́ду му́дре наста́вил еси́.
Ра́дуйся, свети́льниче всесве́тлый и вселюби́мый; ра́дуйся, па́че зве́зд ясне́йший и вожделе́ннейший.
Ра́дуйся, виногра́да живо́тнаго святопрозя́бший гро́зд, вино́ иска́пающий; ра́дуйся, святопома́занная главо́, честны́й на́ш учи́телю.
Ра́дуйся, Инноке́нтие, моли́твенниче о душа́х на́ших.
Кондак 5
Богото́чный исто́чник превели́ких чуде́с яви́лся еси́ в земли́ на́шей, достосла́вне о́тче, прия́л бо еси́, еще́ на земли́ ти́ жи́вшу, вла́сть неду́ги исцеля́ти, по сме́рти же наипа́че просла́ви тя́ Бо́г мно́гими чудотворе́ньми, да вси́ чудоде́йствующему тобо́ю Бо́гу вопие́м: Аллилу́иа.
Икос 5
Ви́девше жи́телие Ирку́тстии святу́ю це́рковь, в не́йже почива́ше нетле́нное и цельбоно́сное те́ло твое́, уго́дниче Бо́жий, я́ко втору́ю купину́ в пла́мени су́щу, си́лою же твои́х моли́тв невре́дно сохране́нную, просла́виша Бо́га; те́мже и мы́, ви́дяще о́ную доны́не це́лу, благоле́пну и я́ве пове́дающую зна́мения и чудеса́ твоя́, воспева́ем тебе́ си́це:
Ра́дуйся, всю́ страну́ Сиби́рскую удиви́вый чудесы́, и́миже оби́тель твоя́ освяти́ся; ра́дуйся, оружено́сец духо́вный, и́мже вся́ка зла́я стра́сть и боле́знь от ве́рных прого́нится.
Ра́дуйся, я́ко излия́нием чуде́с от Бо́га обогати́лся еси́; ра́дуйся, я́ко неоску́дный исто́чник исцеле́ний яви́лся еси́.
Ра́дуйся, я́ко ста́ду твоему́ по́мощь и заступле́ние дава́еши; ра́дуйся, я́ко чуде́с сия́нии па́ству твою́ просвеща́еши.
Ра́дуйся, невреди́мо от огня́ сохрани́вый це́рковь, в не́йже, жи́в сы́й, воздева́л еси́ о спасе́нии люди́й преподо́бныя ру́це свои́; ра́дуйся, я́вственно те́м свиде́тельствовавый, я́ко свя́то бы́сть почива́вшее в не́й нетле́нное те́ло твое́.
Ра́дуйся, все́м безпомо́щным прия́тное попече́ние; ра́дуйся, коея́ждо не́мощи ско́рый и безме́здный врачу́.
Ра́дуйся, я́ко и вся́к благопотре́бен да́р от Го́спода прося́щим подава́еши; Ра́дуйся, я́ко прославля́яй тя́ чудесы́ Бо́г тобо́ю все́х к Себе́ призыва́ет.
Ра́дуйся, Инноке́нтие, моли́твенниче о душа́х на́ших.
Кондак 6
Словеса́ апо́стольская, е́же моли́тися о спасе́нии па́ствы твоея́, я́ко иера́рх во у́шию свое́ю прие́м, не то́чию в жи́зни, но и по преставле́нии явля́ешися священноде́йствитель Боже́ственных та́ин, уверя́я ве́рующих в непреста́ннем хода́тайстве о тре́бующих твоея́ по́мощи и воспева́ющих Бо́гу: Аллилу́иа.
Икос 6
Возсия́л еси́ пречу́дно, архиере́ю Бо́жий, егда́ втори́цею яви́выйся зе́льне стра́ждущему, уда́рив в по́л жезло́м, я́звою на дре́ве того́ ме́ста уврачева́л еси́ душе́вную я́зву омраче́ннаго неве́рием; а́бие бо позна́ тя́ бы́ти благода́тнаго врача́ и сла́вя тя́, вопия́ше:
Ра́дуйся, иера́рше благи́й и ве́рный; ра́дуйся, де́лателю неутоми́мый виногра́да Христо́ва.
Ра́дуйся, служи́телю Госпо́день, о ве́рных умоля́яй; ра́дуйся, наста́вниче, гре́шных к небеси́ направля́яй.
Ра́дуйся, та́ин Бо́жиих и́стинный строи́телю; ра́дуйся, моли́твенных ру́к непреста́нный воздева́телю.
Ра́дуйся, я́ко избавля́еши от неве́рия; ра́дуйся, я́ко исцеля́еши от малоду́шия.
Ра́дуйся, укрепле́ние му́дростию благоду́шия; ра́дуйся, просвеще́ние све́тлостию благоче́стия.
Ра́дуйся, прему́дрый пропове́дателю; ра́дуйся, пресла́дкий обличи́телю.
Ра́дуйся, Инноке́нтие, моли́твенниче о душа́х на́ших.
Кондак 7
Хотя́ще не́когда санови́тии гра́да сего́ в неподо́бное вре́мя ви́дети и любопы́тною десни́цею осяза́ти нетле́нием уже́ процвета́вшия святы́я мо́щи твоя́, святи́телю Христо́в, потща́шася прикры́ти дерзнове́ние свое́ благослове́нием архипа́стыря: но ты́, чистоты́ люби́телю и ве́ры рачи́телю, не восхоте́л еси́ яви́ти себе́ и́м, науча́я те́м не высокому́дрствовати, но в смиренному́дрии пе́ти Бо́гу: Аллилу́иа.
Икос 7
Но́вое и пресла́вное чу́до показа́ на́м тобо́ю на земли́ все́х чуде́с Творе́ц и Влады́ка, егда́ тебе́ ра́ди премени́шася естества́ уста́вы; среди́ бо ле́та и зно́я мра́з и и́ней яви́стася при цельбоно́снем гро́бе твое́м, е́же зна́мением бы́сть, я́ко а́ще и у́мерл еси́ на земли́ пло́тию, но душе́ю в вы́шнем селе́нии всегда́ жи́в сы́й, те́плым свои́м хода́тайством посо́бствуеши вопию́щим тебе́:
Ра́дуйся, смиренному́дрия сто́лпе необори́мый; ра́дуйся, презре́нную го́рдость низлага́яй.
Ра́дуйся, лю́бящия чистоту́ ду́ш соблюда́яй; ра́дуйся, гре́шных к покая́нию воззыва́яй.
Ра́дуйся, де́лателю чуде́с многосла́вных; ра́дуйся, хода́таю и пода́телю дарова́ний многоразли́чных.
Ра́дуйся, заблу́ждших и ослепле́нных наста́вниче; ра́дуйся, любопы́тных и малове́рных обличи́телю.
Ра́дуйся, я́ко сла́ву земну́ю в уме́ты вмени́л еси́; ра́дуйся, я́ко че́сть Бо́га Вы́шняго все́м се́рдцем взыска́л еси́.
Ра́дуйся, и́мже о си́ле Бо́жией естества́ уста́вы пременя́ются; ра́дуйся, и́мже по́мыслы зло́бнии прогоня́ются.
Ра́дуйся, Инноке́нтие, моли́твенниче о душа́х на́ших.
Кондак 8
Стра́нно бе́ ви́дети, ка́ко три́ по естеству́ мо́щная живо́тная, си́лою, да́нною ти́ свы́ше, обезси́леша, я́ко не можа́ху довлещи́ до оби́тели твоея́ еди́наго пу́тника из жи́телей гра́да сего́, вразумля́юща те́м, я́коже дре́вле осля́ Валаа́ма, да не и́дет в да́льнюю страну́, не прия́в от тебе́ путева́го напу́тствия, а́бие же, воспомяну́в отложе́нный обе́т сво́й, позна́ тя́ ско́раго помо́щника и возопи́: Аллилу́иа.
Икос 8
Ве́сь всего́ себе́ испо́лнив любве́ нелицеме́рныя к па́стве свое́й, бы́л еси́ ско́рый помо́щник призыва́ющим тя́ в по́мощь, святи́телю о́тче Инноке́нтие: не то́чию бо бли́з притека́ющих к ра́це моще́й твои́х, но и дале́че отстоя́щих и призыва́ющих и́мя твое́ исцеля́еши от вся́кия боле́зни. За таково́е у́бо врачева́ние приими́ от на́с похвалы́ сия́:
Ра́дуйся, цельбы́ испо́лнь яви́выйся алава́стре, я́ко лю́ди Христо́вы арома́тствуеши твои́ми исцеле́нии; ра́дуйся, арома́тный фиа́ле, чудесы́ удивля́я, на́рда писти́ка многоце́нный.
Ра́дуйся, исто́чниче, благода́ть изцеле́ний излива́ющий на́м от всечестны́я ра́ки твоея́ незави́стно; ра́дуйся, я́ко те́ло твое́ трудолю́бное вме́сто ма́стей на́м во гро́бе оста́вил еси́ истоща́ти исцеле́ния.
Ра́дуйся, я́ко твои́ми моли́твами слепи́и прозре́ша; ра́дуйся, я́ко твои́м хода́тайством хро́мии и безно́гии ходи́ти нача́ша.
Ра́дуйся, я́ко твои́м заступле́нием разсла́бленнии исцеле́ша; ра́дуйся, я́ко твои́м предста́тельством от неисце́льныя огне́вичныя боле́зни здра́ви бы́ша.
Ра́дуйся, покры́тых стру́пами, я́ко прокаже́нных, уврачева́вый; ра́дуйся, впа́дших в лихора́дочныя и тряса́вичныя я́зи возста́вивый.
Ра́дуйся, я́ко лише́нных смы́сла здра́вым умо́м снабдева́еши; ра́дуйся, я́ко от стра́ха и мечта́ний томи́мых свобожда́еши.
Ра́дуйся, Инноке́нтие, моли́твенниче о душа́х на́ших.
Кондак 9
Вся́кия ско́рби и го́рькая испыта́ния терпели́вно подъя́л еси́, о́тче, я́ко до́бр во́ин Христо́в, о́во терпя́ наве́ты от клеветнико́в злы́х, о́во же препира́яся с по́лчищем неве́рных и суеве́рных и о́во искуша́емь от дре́вляго зми́я, уязвля́вшаго тя́ за же́ртвы своя́, из че́люстей его́ тобо́ю исхища́емыя, но вся́ сия́ побежда́я за возлюби́вшаго тя́ Христа́, немо́лчно воспева́л еси́ Ему́: Аллилу́иа.
Икос 9
Вити́йство челове́ческое изнемога́ет изрещи́ вся́ ско́рби, лише́ния, уничиже́ния, боле́зни и страда́ния, я́же ра́ди спасе́ния па́ствы твоея́, свя́те Инноке́нтие, подъя́л еси́. Те́мже терпе́нию твоему́ то́чию дивя́щеся и любо́вию побежда́еми, с благода́рным чу́вствием вопие́м:
Ра́дуйся, во́ине Христо́в непобеди́мый; ра́дуйся, тверде́йший адама́нте, в терпе́нии невреди́мый.
Ра́дуйся, я́ко я́рость неблагомы́слящих, гне́вающихся непра́ведне, претерпе́л еси́; ра́дуйся, я́ко превознося́щияся злочести́вым шата́нием па́ки лю́те сокруша́емы ви́дел еси́.
Ра́дуйся, жесто́ких и злоко́зненных влады́к укроще́ние; ра́дуйся, угнете́нных и стра́ждущих рабо́в ско́рое заступле́ние.
Ра́дуйся, я́ко коре́ния заблужде́ний и те́рние неве́рия трудолю́бне исторга́л еси́; ра́дуйся, я́ко Боже́ственных повеле́ний насажде́ния в сердца́х ве́рных мно́гими труды́ возде́ловал еси́.
Ра́дуйся, смире́нием свои́м диа́вола победи́вый; ра́дуйся, моли́твою и бде́нным стоя́нием пло́ть свою́ умертви́вый.
Ра́дуйся, я́ко кра́сныя твои́ но́зе до́бльственне к боре́нию со врага́ми просте́рл еси́; ра́дуйся, я́ко до́бре тече́ние соверши́в, ко Христу́ восхожде́ние обре́л еси́.
Ра́дуйся, Инноке́нтие, моли́твенниче о душа́х на́ших.
Кондак 10
Спасе́ния ра́ди от ослепле́ния ста́рцу, очи́ма тя́жко ви́дящу, получи́ти же зре́ние хотя́щу и с ве́рою о се́м у тебе́ по́мощи прося́щу, ско́ро прите́кл еси́, свя́тче, в хра́мину того́, иде́же егда́ прикосну́лся еси́ боле́зненней главе́ его́, а́бие ощути́ о́н све́т во о́чию свое́ю и прозре́, хваля́ тя́ и вопия́ Бо́гу: Аллилу́иа.
Икос 10
Сте́ну кре́пкую и огражде́ние необори́мое от все́х скорбе́й и зо́л име́ет тя́, па́стырю благи́й, страна́ сия́: твои́м бо си́льным заступле́нием и предста́тельством доны́не гра́д се́й и оби́тель твоя́ сохраня́ются в ми́ре и благоде́нствии. И мы́ у́бо, спаса́емии тобо́ю, благода́рственно вопие́м ти́:
Ра́дуйся, ча́ша, еле́й ми́лости к на́м Бо́жия содержа́щая; ра́дуйся, горо́, Боже́ственнаго на на́с гне́ва ту́чи отводя́щая.
Ра́дуйся, я́ко пото́ки ми́ра к на́м приво́диши; ра́дуйся, я́ко оби́лие бла́г хода́тайствуеши.
Ра́дуйся, ми́лости превели́кия и ско́рбным сострада́ния сокро́вище; Ра́дуйся, простра́нное Бо́жия о па́стве твое́й промышле́ния прия́телище.
Ра́дуйся, в печа́лех су́щим увеселе́ние; ра́дуйся, удруче́нных попече́нии жите́йскими утеше́ние.
Ра́дуйся, в деторожде́нии ма́терем ско́рый помо́щниче; ра́дуйся, в ча́с кончи́ны моли́твенный на́ш предста́телю.
Ра́дуйся, о ми́лости и ми́ре па́ствы твоея́ изве́стный рачи́телю; ра́дуйся, о́тче честны́й, от вся́каго зла́ и бе́дствия усе́рдный на́ш храни́телю.
Ра́дуйся, Инноке́нтие, моли́твенниче о душа́х на́ших.
Кондак 11
Пе́ние всеумиле́нное и моле́ние те́плое пред нетле́нными моща́ми твои́ми, еди́ным от боля́р приноси́мое тебе́, не презре́л еси́, о́тче, но ско́ро услы́шав и во сне́ я́влься, облегчи́л еси́ боле́зни и страда́ния его́, си́це и на́ших моле́ний и пе́ний гла́сы услы́ши, иера́рше Христо́в, ве́ре же и любви́ люди́й твои́х вонми́ и свы́ше покро́в тво́й да́руй хва́лящим тя́ и пою́щим Бо́гу: Аллилу́иа.
Икос 11
Светосия́тельна тя́ свети́льника, чрез се́дмьдесят и три́ ле́та сокрыва́ема в земли́ не восхоте́ Госпо́дь оста́вити под спу́дом, е́же испо́лнитися рече́нию Его́, а́ки свети́льник на све́щник поставля́ют, да входя́щии ви́дят све́т. Те́мже и мы́ во хра́ме се́м и всю́ду, я́ко тя́ зря́ще и тобо́ю просвеща́еми, дерза́ем глаго́лати сия́:
Ра́дуйся, све́тлое на тве́рди церко́вней свети́ло и Сиби́рския страны́ сла́во; ра́дуйся, церкве́й строи́телю и обогати́телю чудесы́ те́х неску́дный.
Ра́дуйся, пресве́тлая красото́ святы́я оби́тели сея́; ра́дуйся, блестя́щая заре́ избра́ннаго тобо́ю гра́да сего́.
Ра́дуйся, све́щниче всезлаты́й и многоце́нный; ра́дуйся, би́сере предраги́й небе́сный.
Ра́дуйся, облакообра́зный покро́ве, на те́снем пути́ спасе́ния на́с осеня́ющий; ра́дуйся, огневи́дный сто́лпе, в нощи́ неве́дения и заблужде́ний на́с просвеща́ющий.
Ра́дуйся, я́ко святы́нею твое́ю все́х тре́бующих по́мощи твоея́ освяща́еши; ра́дуйся, я́ко блиста́нием чуде́с твои́х во вся́ концы́ страны́ сея́ сия́еши.
Ра́дуйся, я́ко и по преставле́нии твое́м с на́ми пребыва́еши; ра́дуйся, я́ко, и живя́ в селе́ниих ра́йских, на́с не оставля́еши.
Ра́дуйся, Инноке́нтие, моли́твенниче о душа́х на́ших.
Кондак 12
Благода́ть свы́ше с небесе́ пода́ждь, преблаже́нне о́тче, с ве́рою и благогове́нием воспомина́ющим честно́е твое́ успе́ние и пресве́тлое пренесе́ние святы́х моще́й твои́х пра́зднующим; и́маши бо дарова́нную ти́ от Бо́га си́лу и вла́сть подава́ти тре́бующим вся́, я́же ко спасе́нию проше́ния, и ны́не предстоя́ Престо́лу Боже́ственному, моли́ о тебе́ воспева́ющих: Аллилу́иа.
Икос 12
Пою́ще твое́ хода́тайство и си́льное заступле́ние прося́щим твоея́ ско́рыя по́мощи, восхваля́ем пода́теля все́х благи́х Бо́га, дарова́вшаго в после́дняя времена́ стране́ се́й тебе́, отца́ на́шего чудотво́рца, моли́твенника и засту́пника, ты́ же не возгнуша́йся на́с, гре́шных и недосто́йных рабо́в Его́, но услы́ши хвале́бными гла́сы вопию́щих тебе́:
Ра́дуйся, су́етства привре́меннаго к бу́ияго вои́стинну обличи́телю; ра́дуйся, апо́столом равноре́вностный Ева́нгельским науче́нием.
Ра́дуйся, му́чеников сострада́льче и красото́; ра́дуйся, первопа́стырю и учи́телю христоимени́тых люди́й земли́ сея́.
Ра́дуйся, церко́вное украше́ние; ра́дуйся, архиере́ев добро́то, свяще́нников и и́ноков похвало́.
Ра́дуйся, я́ко прия́л еси́ трудо́в твои́х воздая́ние; ра́дуйся, крестоно́сному наро́ду на́шему похвало́ и утвержде́ние.
Ра́дуйся, теле́с на́ших неусы́пное хране́ние; ра́дуйся, и ду́ш на́ших к Ца́рствию Небе́сному возведе́ние.
Ра́дуйся, Бо́гу соверше́нне и всеце́ле угоди́вый; ра́дуйся, вене́ц безсме́ртия наве́ки получи́вый.
Ра́дуйся, Инноке́нтие, моли́твенниче о душа́х на́ших.
Кондак 13
О преди́вный чудотво́рче и пресла́вный уго́дниче Христо́в Инноке́нтие! Вонми́ гла́су моле́ний на́ших, от сокруше́ннаго се́рдца к тебе́ возноси́мому, и богоприя́тным твои́м хода́тайством испроси́ на́м от Христа́ Бо́га на́шего проще́ние прегреше́ний на́ших, осла́бу и избавле́ние от враго́в ви́димых и неви́димых, и от вся́кия ско́рби, беды́ и напа́стей, да с тобо́ю и со все́ми святы́ми в селе́нии пра́ведных сподо́бимся пе́ти Ему́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельскому жи́тельству на небесе́х поревнова́л еси́, о́тче: по и́мени бо и житие́ твое́ непоро́чно бы́сть на земли́, сего́ ра́ди и возвы́сился еси́ до лицезре́ния Творца́ А́нгелов. Отню́дуже призира́я вы́ну на гра́д се́й и лю́ди, услы́ши на́с, похва́льная воспису́ющих ти́ сия́:
Ра́дуйся, неви́нностию А́гнца непоро́чнаго подража́тель бы́вый; ра́дуйся, воздержа́нием твои́м а́нгельское во пло́ти житие́ яви́вый.
Ра́дуйся, я́ко а́нгел, Сиби́рския це́ркве Бо́жия дела́ возвеща́яй; ра́дуйся, я́ко архистрати́г си́лы небе́сныя, все́х прибега́ющих к тебе́ от бе́д сохраня́яй.
Ра́дуйся, непоро́чности и неви́нности соиме́нный учи́телю; ра́дуйся, незло́бия и чистоты́ усе́рдный храни́телю.
Ра́дуйся, убеле́нный неви́нностию кри́не ра́йскаго прозябе́ния; ра́дуйся, умаще́нная чистото́ю ма́слино небе́снаго благослове́ния.
Ра́дуйся, у́ме небе́сных неизрече́нных бла́г наслажда́яйся; ра́дуйся, па́стырю, с му́дрыми в ра́дость Пастыренача́льника своего́ вше́дый.
Ра́дуйся, я́ко све́т лица́ Бо́жия я́сно на небеси́ смотря́еши; ра́дуйся, я́ко те́м же све́том осия́нный, притека́ющих к тебе́ неизрече́нно возвеселя́еши.
Ра́дуйся, Инноке́нтие, моли́твенниче о душа́х на́ших.
Кондак 1
Возбра́нный чудотво́рче и ско́рый в ско́рбех помо́щниче, святи́телю о́тче Инноке́нтие, я́ко име́я ве́лие дерзнове́ние пред Го́сподем, от вся́ких на́с бе́д свобожда́й, да с ра́достию зове́м ти́:
Ра́дуйся, Инноке́нтие, моли́твенниче о душа́х на́ших.
Молитвы
К тебе́, свя́тче Бо́жий, я́ко к ско́рому помо́щнику и моли́твеннику о спасе́нии мое́м, а́з недосто́йный и гре́шный припа́дая молю́ся: не пре́зри мене́ уны́лаго, немощна́го, во мно́гая беззако́ния впа́дшаго, и по вся́ дни́ и часы́ согреша́ющаго, но вонми́ души́ мое́й, я́ко скорблю́, и умоли́ Го́спода Бо́га всея́ тва́ри Соде́теля, Ему́же ны́не предстои́ши в ра́дости святы́х и с ли́ки а́нгел, поми́ловати мя́ и извести́ из темни́цы грехо́вныя ду́шу мою́, пре́жде да́же не отиду́ отсю́ду и ктому́ не у́ гото́в явлю́ся на су́д Его́. Е́й, о́тче! не посрами́ мене́, к тебе́ с ве́рою притека́ющаго, а́ще бо и недосто́ин е́смь твоего́ хода́тайства и заступле́ния, но ты́, бы́в подража́тель человеколю́бия Бо́жия, сотвори́ мя́ досто́йна чрез обраще́ние от злы́х де́л к благо́му житию́, да та́ко душе́ю и те́лом здра́в бы́в, сла́влю и пою́ ди́внаго во святы́х Свои́х Бо́га на́шего и твое́ те́плое заступле́ние, всегда́, ны́не и при́сно, и во ве́ки веко́в. Ами́нь.
Конда́къ а҃
Возбра́нный чꙋдотво́рче и҆ ско́рый въ ско́рбѣхъ помо́щниче, ст҃и́телю ѻ҆́тче і҆нноке́нтїе, ꙗ҆́кѡ и҆мѣ́ѧ ве́лїе дерзнове́нїе пред̾ гдⷭ҇емъ, ѿ всѧ́кихъ на́съ бѣ́дъ свобожда́й, да съ ра́достїю зове́мъ тѝ:
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
І҆́косъ а҃
А҆́гг҃льскомꙋ жи́тельствꙋ на нб҃сѣ́хъ поревнова́лъ є҆сѝ, ѻ҆́тче: по и҆́мени бо и҆ житїѐ твоѐ непоро́чнѡ бы́сть на землѝ, сегѡ̀ ра́ди и҆ возвы́силсѧ є҆сѝ до лицезрѣ́нїѧ творца̀ а҆́гг҃лѡвъ. ѿню́дꙋже призира́ѧ вы́нꙋ на гра́дъ се́й и҆ лю́ди, ᲂу҆слы́ши на́съ, похва́льнаѧ восписꙋ́ющыхъ тѝ сїѧ̑:
Ра́дꙋйсѧ, неви́нностїю а҆́гнца непоро́чнагѡ подража́тель бы́вый: ра́дꙋйсѧ, воздержа́нїемъ твои́мъ а҆́гг҃льское во пло́ти житїѐ ꙗ҆ви́вый.
Ра́дꙋйсѧ, ꙗ҆́кѡ а҆́гг҃лъ, сиби́рскїѧ цр҃кве бж҃їѧ дѣла̀ возвѣща́ѧй: ра́дꙋйсѧ, ꙗ҆́кѡ а҆рхїстрати́гъ си́лы нбⷭ҇ныѧ, всѣ́хъ прибѣга́ющихъ къ тебѣ̀ ѿ бѣ́дъ сохранѧ́ѧй.
Ра́дꙋйсѧ, непоро́чности и҆ неви́нности соиме́нный ᲂу҆чи́телю: ра́дꙋйсѧ, неѕло́бїѧ и҆ чⷭ҇тоты̀ ᲂу҆се́рдный храни́телю.
Ра́дꙋйсѧ, ᲂу҆бѣле́нный неви́нностїю крі́не ра́йскагѡ прозѧбе́нїѧ: ра́дꙋйсѧ, ᲂу҆маще́ннаѧ чⷭ҇тото́ю ма́слино нбⷭ҇нагѡ бл҃гослове́нїѧ.
Ра́дꙋйсѧ, ᲂу҆́ме нбⷭ҇ныхъ неизрече́нныхъ бла̑гъ наслажда́ѧйсѧ: ра́дꙋйсѧ, па́стырю, съ мꙋ́дрыми въ ра́дость пастыренача́льника своегѡ̀ вше́дый.
Ра́дꙋйсѧ, ꙗ҆́кѡ свѣ́тъ лица̀ бж҃їѧ ꙗ҆́снѡ на нб҃сѝ смотрѧ́еши: ра́дꙋйсѧ, ꙗ҆́кѡ тѣ́мъ же свѣ́томъ ѡ҆сїѧ́нный, притека́ющихъ къ тебѣ̀ неизрече́ннѡ возвеселѧ́еши.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ в҃
Вѣ́дый гдⷭ҇ь вели́ка тѧ̀ бы́ти свѣти́льника во странѣ̀ ꙗ҆зы́кѡвъ, бл҃говолѝ сокры́ти ро́дъ и҆ ѻ҆те́чество твоѐ, да ꙗ҆ви́шисѧ въ землѝ хи́нстѣй, ꙗ҆́коже мелхїседе́къ въ ханаа́нстѣй, и҆ ᲂу҆вѣ́риши, ꙗ҆́кѡ не ѿ человѣ́къ прише́лъ є҆сѝ къ на́мъ, но ѿ бг҃а, є҆мꙋ̀ же пое́мъ: А҆ллилꙋ́їа.
І҆́косъ в҃
Ра́зꙋмъ просвѣще́нный хотѧ̀ и҆мѣ́ти, бг҃омꙋ́дре ѻ҆́тче, ѿ ю҆́ности и҆збра́лъ є҆сѝ въ мѣ́сто ѡ҆бразова́нїѧ своегѡ̀ ма́терь градѡ́въ правосла́вныѧ вѣ́ры на́шеѧ и҆ подви́жничества, да живѧ̀ средѝ земны́хъ а҆́гг҃лѡвъ и҆ взира́ѧ на сконча́нїе жи́тельства и҆̀хъ, подража́тель ꙗ҆ви́шисѧ вѣ́рѣ и҆̀хъ; тѣ́мже и҆ са́мъ содѣ́лалсѧ є҆сѝ нбⷭ҇нымъ человѣ́комъ. Сегѡ̀ ра́ди слы́шиши ѿ на́съ сїѧ̑:
Ра́дꙋйсѧ, вїногра́де многопло́дный, въ бл҃горастворе́ннѣмъ ю҆́зѣ возра́стшїй. Ра́дꙋйсѧ, цвѣ́те бл҃гово́нный, въ ма́лѣй рѡссі́и процвѣ́тшїй.
Ра́дꙋйсѧ, сла́во и҆ ᲂу҆добре́нїе гра́да кі́ева. Ра́дꙋйсѧ, красото̀ и҆ ᲂу҆тѣше́нїе ѻ҆ц҃є́въ пече́рскїѧ ла́ѵры.
Ра́дꙋйсѧ, ꙗ҆́кѡ и҆змла́да мꙋ́дрости прилѣжа̀, бжⷭ҇твенное писа́нїе ꙗ҆́снѣ и҆звы́клъ є҆сѝ. Ра́дꙋйсѧ, ꙗ҆́кѡ ѿложи́въ всѧ̑ мїрскі̑ѧ сла̑сти, хрⷭ҇то́въ ꙗ҆ре́мъ носи́ти и҆зво́лилъ є҆сѝ.
Ра́дꙋйсѧ, въ ю҆́ности посвѧти́вый въ же́ртвꙋ прїѧ́тнꙋ гдⷭ҇ꙋ себѐ сама́го. Ра́дꙋйсѧ, сохрани́вый невре́днѡ цѣломꙋ́дрїе дѣ́вства драга́гѡ.
Ра́дꙋйсѧ, ꙗ҆́кѡ въ земнѣ́мъ ᲂу҆чи́лищи нбⷭ҇ныѧ премⷣрости ᲂу҆чи́вый. Ра́дꙋйсѧ, ꙗ҆́кѡ щито́мъ вѣ́ры всѧ̑ разжжє́нныѧ лꙋка́вагѡ стрѣ́лы ᲂу҆гаси́вый.
Ра́дꙋйсѧ, ꙗ҆́кѡ и҆здѣ́тска бг҃а возлюби́вый. Ра́дꙋйсѧ, ꙗ҆́кѡ за́повѣдїй є҆гѡ̀ нело́жный храни́тель бы́вый.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ г҃
Си́лою свы́ше позна̀ тогда̀ бл҃говѣ́рный ца́рь непоро́чное и҆ ст҃о́е жи́тельство твоѐ, свѧ́тче бж҃їй, и҆́же и҆ и҆збра̀ тѧ̀ во а҆пⷭ҇тольское слꙋже́нїе и҆ предпосла̀, ꙗ҆́кѡ пе́рвенца дꙋхо́внагѡ сн҃оположе́нїѧ, насажда́ти ст҃ꙋ́ю вѣ́рꙋ въ землѝ ꙗ҆зы́кѡвъ чꙋжди́хъ, невѣ́дꙋщихъ пѣ́ти бг҃ꙋ: А҆ллилꙋ́їа.
І҆́косъ г҃
И҆мѣ́етъ тебѣ̀, ст҃и́телю ѻ҆́ч҃е і҆нноке́нтїе, всѧ̀ страна̀ сиби́рскаѧ вели́ка ᲂу҆чи́телѧ и҆ ди́вна въ вѣ́рѣ наста́вника; сегѡ̀ ра́ди, ꙗ҆́кѡ до́блѧгѡ побо́рника вѣ̑рнымъ и҆ ско́рагѡ моли́твенника тѧ̀ чтꙋ́ще, съ весе́лїемъ и҆ ра́достїю да́ры тебѣ̀ прино́симъ такѡвы́ѧ:
Ра́дꙋйсѧ, сщ҃е́ннаѧ главо̀, ра́зꙋма вода́ми напоѧ́ема. Ра́дꙋйсѧ, пло́дъ бл҃гоꙋха́ненъ житїе́мъ твои́мъ ѿ ю҆́ности ꙗ҆влѧ́ѧй.
Ра́дꙋйсѧ, и҆скорени́телю терно́внагѡ слꙋже́нїѧ і҆́дѡльскагѡ. Ра́дꙋйсѧ, насади́телю лозы̀ правосла́вныѧ вѣ́ры.
Ра́дꙋйсѧ, но́вый а҆пⷭ҇толе, ѡ҆бл҃гоꙋха́вый вѣ́рою послѣ̑днїѧ концы̑ рѡссі́и. Ра́дꙋйсѧ, до́брый па́стырю, ᲂу҆тверди́вый кра̑сныѧ но́ги своѧ̑ на восто́цѣ ца́рства сиби́ри.
Ра́дꙋйсѧ, мра́чныѧ страны̀ просвѣти́телю. Ра́дꙋйсѧ, дꙋше́вныѧ темноты̀ ѡ҆зари́телю.
Ра́дꙋйсѧ, врагѡ́въ вѣ́ры хрⷭ҇то́вы разрꙋши́телю. Ра́дꙋйсѧ, прельсти́телей дꙋ́шъ хрⷭ҇тїа́нскихъ рази́телю.
Ра́дꙋйсѧ, і҆дѡлослꙋжи́тельныхъ ста́рєцъ мꙋ́дрость посрами́вый. Ра́дꙋйсѧ, мⷣрыхъ вѣ́ка сегѡ̀ мꙋдрѣ́йшїй.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ д҃
Бꙋ́рѧ ѕло́бы дре́влѧгѡ ѕмі́ѧ ѡ҆бꙋѧ̀ ца́рство хи́нѡвъ, є҆гда̀ не можа́хꙋ ѿве́рзти ᲂу҆шеса̀ ко глаго́лѡмъ црⷭ҇твїѧ хрⷭ҇то́ва, тобо́ю, но́вый а҆пⷭ҇толе, возвѣща́ємымъ, и҆ не хотѧ́хꙋ прїѧ́ти тѧ̀, втори́цею на предѣ́лѣхъ и҆́хъ ꙗ҆́вльшасѧ, да ᲂу҆мꙋдри́ши ѧ҆̀ воспѣва́ти є҆ди́номꙋ бг҃ꙋ: А҆ллилꙋ́їа.
І҆́косъ д҃
Слы́шаще и҆ вѣ́дꙋще тѧ̀ премⷣра ᲂу҆чи́телѧ и҆ и҆́стиннагѡ сказа́телѧ та̑инъ бж҃їихъ, прихожда́хꙋ къ тебѣ̀ не то́чїю ста́рцы, но и҆ ю҆́нїи, въ ни́хже ра́зꙋмъ напечатлѣва́лъ є҆сѝ дре́внїѧ и҆́стины є҆ѵⷢ҇льскїѧ, сегѡ̀ ра́ди ꙗ҆́кѡ па́стырѧ, просвѣти́телѧ и҆ ѻ҆ц҃а̀ на́шегѡ ᲂу҆блажа́юще, зове́мъ тѝ:
Ра́дꙋйсѧ, ра́бе бл҃гі́й и҆ дѣ́лателю до́брый. Ра́дꙋйсѧ, и҆скорени́телю ѕлы́хъ и҆ прогони́телю нече́стїѧ бо́дрый.
Ра́дꙋйсѧ, ꙗ҆́кѡ сꙋгꙋ́бꙋ мздꙋ̀ нбⷭ҇нꙋю сꙋгꙋ́ба ра́ди пꙋтеше́ствїѧ къ хи́нѡмъ прїѧ́лъ є҆сѝ. Ра́дꙋйсѧ, ꙗ҆́кѡ сподо́билсѧ є҆сѝ воспрїѧ́ти чꙋде́съ да́ръ и҆ сла́вы вѣне́цъ пресвѣ́телъ.
Ра́дꙋйсѧ, а҆пⷭ҇толꙋ па́ѵлꙋ въ по́двизѣхъ слꙋже́нїѧ своегѡ̀ подража́вый. Ра́дꙋйсѧ, терпѣ́нїю є҆гѡ̀ въ наꙋче́нїи безкни́жныхъ ю҆́ношей послѣ́довавый.
Ра́дꙋйсѧ, ꙗ҆́кѡ на па́жити вѣ́ры пра́выѧ и҆ при и҆сто́чницѣ воды̀ живы́ѧ лю́ди твоѧ̀ па́ствилъ є҆сѝ. Ра́дꙋйсѧ, ꙗ҆́кѡ на ѕла́цѣ кра́снѣ пребы́ти твоемꙋ̀ ста́дꙋ мꙋ́дре наста́вилъ є҆сѝ.
Ра́дꙋйсѧ, свѣти́льниче всесвѣ́тлый и҆ вселюби́мый. Ра́дꙋйсѧ, па́че ѕвѣ́здъ ꙗ҆снѣ́йшїй и҆ вожделѣ́ннѣйшїй.
Ра́дꙋйсѧ, вїногра́да живо́тнагѡ ст҃опрозѧ́бшїй гро́здъ, вїно̀ и҆ска́пающїй. Ра́дꙋйсѧ, ст҃опома́заннаѧ главо̀, чⷭ҇тны́й на́шъ ᲂу҆чи́телю.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ є҃
Бг҃ото́чный и҆сто́чникъ превели́кихъ чꙋде́съ ꙗ҆ви́лсѧ є҆сѝ въ землѝ на́шей, достосла́вне ѻ҆́ч҃е, прїѧ́лъ бо є҆сѝ, є҆щѐ на землѝ тѝ жи́вшꙋ, вла́сть недꙋ́ги и҆сцѣлѧ́ти, по сме́рти же наипа́че просла́ви тѧ̀ бг҃ъ мно́гими чꙋдотворе́ньми, да всѝ чꙋдодѣ́йствꙋющемꙋ тобо́ю бг҃ꙋ вопїе́мъ: А҆ллилꙋ́їа.
І҆́косъ є҃
Ви́дѣвше жи́телїе і҆ркꙋ́тстїи ст҃ꙋ́ю цр҃ковь, въ не́йже почива́ше нетлѣ́нное и҆ цѣльбоно́сное тѣ́ло твоѐ, ᲂу҆го́дниче бж҃їй, ꙗ҆́кѡ вторꙋ́ю кꙋпинꙋ̀ въ пла́мени сꙋ́щꙋ, си́лою же твои́хъ моли́твъ невре́днѡ сохране́ннꙋю, просла́виша бг҃а: тѣ́мже и҆ мы̀, ви́дѧще ѻ҆́нꙋю доны́нѣ цѣ́лꙋ, бл҃голѣ́пнꙋ и҆ ꙗ҆́вѣ повѣ́дающꙋю зна́мєнїѧ и҆ чꙋдеса̀ твоѧ̑, воспѣва́емъ тебѣ̀ си́це:
Ра́дꙋйсѧ, всю̀ странꙋ̀ сиби́рскꙋю ᲂу҆диви́вый чꙋдесы̀, и҆́миже ѡ҆би́тель твоѧ̀ ѡ҆ст҃и́сѧ. Ра́дꙋйсѧ, ѻ҆рꙋжено́сецъ дꙋхо́вный, и҆́мже всѧ́ка ѕла́ѧ стра́сть и҆ болѣ́знь ѿ вѣ́рныхъ прого́нитсѧ.
Ра́дꙋйсѧ, ꙗ҆́кѡ и҆злїѧ́нїемъ чꙋде́съ ѿ бг҃а ѡ҆богати́лсѧ є҆сѝ. Ра́дꙋйсѧ, ꙗ҆́кѡ неоскꙋ́дный и҆сто́чникъ и҆сцѣле́нїй ꙗ҆ви́лсѧ є҆сѝ.
Ра́дꙋйсѧ, ꙗ҆́кѡ ста́дꙋ твоемꙋ̀ по́мощь и҆ застꙋпле́нїе дава́еши. Ра́дꙋйсѧ, ꙗ҆́кѡ чꙋде́съ сїѧ̑нїи па́ствꙋ твою̀ просвѣща́еши.
Ра́дꙋйсѧ, невреди́мѡ ѿ ѻ҆гнѧ̀ сохрани́вый цр҃ковь, въ не́йже, жи́въ сы́й, воздѣва́лъ є҆сѝ ѡ҆ сп҃се́нїи люді́й преподѡ́бныѧ рꙋ́цѣ своѝ. Ра́дꙋйсѧ, ꙗ҆́вственнѡ тѣ́мъ свидѣ́тельствовавый, ꙗ҆́кѡ ст҃о бы́сть почива́вшее въ не́й нетлѣ́нное тѣ́ло твоѐ.
Ра́дꙋйсѧ, всѣ̑мъ безпомѡ́щнымъ прїѧ́тное попече́нїе. Ра́дꙋйсѧ, коеѧ́ждо не́мощи ско́рый и҆ безме́здный врачꙋ̀.
Ра́дꙋйсѧ, ꙗ҆́кѡ и҆ всѧ́къ бл҃гопотре́бенъ да́ръ ѿ гдⷭ҇а просѧ́щымъ подава́еши. Ра́дꙋйсѧ, ꙗ҆́кѡ прославлѧ́ѧй тѧ̀ чꙋдесы̀ бг҃ъ тобо́ю всѣ́хъ къ себѣ̀ призыва́етъ.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ ѕ҃
Словеса̀ а҆пⷭ҇льскаѧ, є҆́же моли́тисѧ ѡ҆ сп҃се́нїи па́ствы твоеѧ̀, ꙗ҆́кѡ і҆ера́рхъ во ᲂу҆́шїю своє́ю прїе́мъ, не то́чїю въ жи́зни, но и҆ по преставле́нїи ꙗ҆влѧ́ешисѧ сщ҃еннодѣ́йствитель бжⷭ҇твенныхъ та́инъ, ᲂу҆вѣрѧ́ѧ вѣ́рꙋющихъ въ непреста́ннѣмъ хода́тайствѣ ѡ҆ тре́бꙋющихъ твоеѧ̀ по́мощи и҆ воспѣва́ющихъ бг҃ꙋ: А҆ллилꙋ́їа.
І҆́косъ ѕ҃
Возсїѧ́лъ є҆сѝ пречꙋ́днѡ, а҆рхїере́ю бж҃їй, є҆гда̀ втори́цею ꙗ҆ви́выйсѧ ѕѣ́льнѣ стра́ждꙋщемꙋ, ᲂу҆да́ривъ въ по́лъ жезло́мъ, ꙗ҆́звою на дре́вѣ тогѡ̀ мѣ́ста ᲂу҆врачева́лъ є҆сѝ дꙋше́внꙋю ꙗ҆́звꙋ ѡ҆мраче́ннагѡ невѣ́рїемъ; а҆́бїе бо позна̀ тѧ̀ бы́ти бл҃года́тнагѡ врача̀ и҆ сла́вѧ тѧ̀, вопїѧ́ше:
Ра́дꙋйсѧ, і҆ера́рше бл҃гі́й и҆ вѣ́рный. Ра́дꙋйсѧ, дѣ́лателю неꙋтоми́мый вїногра́да хрⷭ҇то́ва.
Ра́дꙋйсѧ, слꙋжи́телю гдⷭ҇ень, ѡ҆ вѣ́рныхъ ᲂу҆молѧ́ѧй. Ра́дꙋйсѧ, наста́вниче, грѣ́шныхъ къ нб҃сѝ направлѧ́ѧй.
Ра́дꙋйсѧ, та̑инъ бж҃їихъ и҆́стинный строи́телю. Ра́дꙋйсѧ, моли́твенныхъ рꙋ́къ непреста́нный воздѣва́телю.
Ра́дꙋйсѧ, ꙗ҆́кѡ и҆збавлѧ́еши ѿ невѣ́рїѧ. Ра́дꙋйсѧ, ꙗ҆́кѡ и҆сцѣлѧ́еши ѿ малодꙋ́шїѧ.
Ра́дꙋйсѧ, ᲂу҆крѣпле́нїе мⷣростїю бл҃годꙋ́шїѧ. Ра́дꙋйсѧ, просвѣще́нїе свѣ́тлостїю бл҃гоче́стїѧ.
Ра́дꙋйсѧ, премⷣрый проповѣ́дателю. Ра́дꙋйсѧ, пресла́дкїй ѡ҆бличи́телю.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ з҃
Хотѧ́ще нѣ́когда санови́тїи гра́да сегѡ̀ въ неподо́бное вре́мѧ ви́дѣти и҆ любопы́тною десни́цею ѡ҆сѧза́ти нетлѣ́нїемъ ᲂу҆жѐ процвѣта́вшїѧ ст҃ы̑ѧ мѡ́щи твоѧ̑, ст҃и́телю хрⷭ҇то́въ, потща́шасѧ прикры́ти дерзнове́нїе своѐ бл҃гослове́нїемъ а҆рхїпа́стырѧ: но ты̀, чⷭ҇тоты̀ люби́телю и҆ вѣ́ры рачи́телю, не восхотѣ́лъ є҆сѝ ꙗ҆ви́ти себѐ и҆̀мъ, наꙋча́ѧ тѣ́мъ не высокомꙋ́дрствовати, но въ смиренномⷣрїи пѣ́ти бг҃ꙋ: А҆ллилꙋ́їа.
І҆́косъ з҃
Но́вое и҆ пресла́вное чꙋ́до показа̀ на́мъ тобо́ю на землѝ всѣ́хъ чꙋде́съ творе́цъ и҆ влⷣка, є҆гда̀ тебѣ̀ ра́ди премѣни́шасѧ є҆стества̀ ᲂу҆ста́вы; среди́ бо лѣ́та и҆ зно́ѧ мра́зъ и҆ и҆́ней ꙗ҆ви́стасѧ при цѣльбоно́снѣмъ гро́бѣ твое́мъ, є҆́же зна́менїемъ бы́сть, ꙗ҆́кѡ а҆́ще и҆ ᲂу҆́мерлъ є҆сѝ на землѝ пло́тїю, но дꙋше́ю въ вы́шнемъ селе́нїи всегда̀ жи́въ сы́й, те́плымъ свои́мъ хода́тайствомъ посо́бствꙋеши вопїю́щымъ тебѣ̀:
Ра́дꙋйсѧ, смиренномⷣрїѧ сто́лпе неѡбори́мый. Ра́дꙋйсѧ, презрѣ́ннꙋю го́рдость низлага́ѧй.
Ра́дꙋйсѧ, лю́бѧщїѧ чⷭ҇тотꙋ̀ дꙋ́шъ соблюда́ѧй. Ра́дꙋйсѧ, грѣ́шныхъ къ покаѧ́нїю воззыва́ѧй.
Ра́дꙋйсѧ, дѣ́лателю чꙋде́съ многосла́вныхъ. Ра́дꙋйсѧ, хода́таю и҆ пода́телю дарова́нїй многоразли́чныхъ.
Ра́дꙋйсѧ, заблꙋ́ждшихъ и҆ ѡ҆слѣпле́нныхъ наста́вниче. Ра́дꙋйсѧ, любопы́тныхъ и҆ маловѣ́рныхъ ѡ҆бличи́телю.
Ра́дꙋйсѧ, ꙗ҆́кѡ сла́вꙋ земнꙋ́ю въ ᲂу҆ме́ты вмѣни́лъ є҆сѝ. Ра́дꙋйсѧ, ꙗ҆́кѡ че́сть бг҃а вы́шнѧгѡ всѣ́мъ се́рдцемъ взыска́лъ є҆сѝ.
Ра́дꙋйсѧ, и҆́мже ѡ҆ си́лѣ бж҃їей є҆стества̀ ᲂу҆ста́вы премѣнѧ́ютсѧ. Ра́дꙋйсѧ, и҆́мже по́мыслы ѕло́бнїи прогонѧ́ютсѧ.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ и҃
Стра́ннѡ бѣ̀ ви́дѣти, ка́кѡ трѝ по є҆стествꙋ̀ мѡ́щнаѧ живѡ́тнаѧ, си́лою, да́нною тѝ свы́ше, ѡ҆безси́лѣша, ꙗ҆́кѡ не можа́хꙋ довлещѝ до ѡ҆би́тели твоеѧ̀ є҆ди́наго пꙋ́тника и҆з̾ жи́телей гра́да сегѡ̀, вразꙋмлѧ́юща тѣ̑мъ, ꙗ҆́кѡже дре́вле ѻ҆слѧ̀ валаа́ма, да не и҆́детъ въ да́льнюю странꙋ̀, не прїѧ́въ ѿ тебє̀ пꙋтева́гѡ напꙋ́тствїѧ, а҆́бїе же, воспомѧнꙋ́въ ѿложе́нный ѡ҆бѣ́тъ сво́й, позна̀ тѧ̀ ско́раго помо́щника и҆ возопѝ: А҆ллилꙋ́їа.
І҆́косъ и҃
Ве́сь всегѡ̀ себѐ и҆спо́лнивъ любвѐ нелицемѣ́рныѧ къ па́ствѣ свое́й, бы́лъ є҆сѝ ско́рый помо́щникъ призыва́ющымъ тѧ̀ въ по́мощь, ст҃и́телю ѻ҆́ч҃е і҆нноке́нтїе: не то́чїю бо бли́з̾ притека́ющихъ къ ра́цѣ моще́й твои́хъ, но и҆ дале́че ѿстоѧ́щихъ и҆ призыва́ющихъ и҆́мѧ твоѐ и҆сцѣлѧ́еши ѿ всѧ́кїѧ болѣ́зни. За таково́е ᲂу҆̀бо врачева́нїе прїимѝ ѿ на́съ похвалы̑ сїѧ̑:
Ра́дꙋйсѧ, цѣльбы̀ и҆спо́лнь ꙗ҆ви́выйсѧ а҆лава́стре, ꙗ҆́кѡ лю́ди хрⷭ҇то́вы а҆рома́тствꙋеши твои́ми и҆сцѣлє́нїи. Ра́дꙋйсѧ, а҆рома́тный фїа́ле, чꙋдесы̑ ᲂу҆дивлѧ́ѧ, на́рда пїсти́ка многоцѣ́нный.
Ра́дꙋйсѧ, и҆сто́чниче, бл҃года́ть и҆зцѣле́нїй и҆злива́ющїй на́мъ ѿ всечⷭ҇тны́ѧ ра́ки твоеѧ̀ незави́стнѡ. Ра́дꙋйсѧ, ꙗ҆́кѡ тѣ́ло твоѐ трꙋдолю́бное вмѣ́сто ма́стей на́мъ во гро́бѣ ѡ҆ста́вилъ є҆сѝ и҆стоща́ти и҆сцѣлє́нїѧ.
Ра́дꙋйсѧ, ꙗ҆́кѡ твои́ми мл҃твами слѣпі́и прозрѣ́ша. Ра́дꙋйсѧ, ꙗ҆́кѡ твои́мъ хода́тайствомъ хро́мїи и҆ безно́гїи ходи́ти нача́ша.
Ра́дꙋйсѧ, ꙗ҆́кѡ твои́мъ застꙋпле́нїемъ разсла́бленнїи и҆сцѣлѣ́ша. Ра́дꙋйсѧ, ꙗ҆́кѡ твои́мъ предста́тельствомъ ѿ неисцѣ́льныѧ ѻ҆гне́вичныѧ болѣ́зни здра́ви бы́ша.
Ра́дꙋйсѧ, покры́тыхъ стрꙋ́пами, ꙗ҆́кѡ прокаже́нныхъ, ᲂу҆врачева́вый. Ра́дꙋйсѧ, впа́дшихъ въ лихора́дѡчныѧ и҆ трѧса́вичныѧ ꙗ҆́зи возста́вивый.
Ра́дꙋйсѧ, ꙗ҆́кѡ лише́нныхъ смы́сла здра́вымъ ᲂу҆мо́мъ снабдѣва́еши. Ра́дꙋйсѧ, ꙗ҆́кѡ ѿ стра́ха и҆ мечта́нїй томи́мыхъ свобожда́еши.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ ѳ҃
Всѧ̑кїѧ скѡ́рби и҆ гѡ́рькаѧ и҆спыта̑нїѧ терпѣли́внѡ под̾ѧ́лъ є҆сѝ, ѻ҆́ч҃е, ꙗ҆́кѡ до́бръ во́инъ хрⷭ҇то́въ, ѻ҆́во терпѧ̀ навѣ́ты ѿ клеветникѡ́въ ѕлы́хъ, ѻ҆́во же препира́ѧсѧ съ по́лчищемъ невѣ́рныхъ и҆ сꙋевѣ́рныхъ и҆ ѻ҆́во и҆скꙋша́емь ѿ дре́влѧгѡ ѕмі́ѧ, ᲂу҆ѧзвлѧ́вшагѡ тѧ̀ за жє́ртвы своѧ̑, и҆з̾ че́люстей є҆гѡ̀ тобо́ю и҆схища́ємыѧ, но всѧ̑ сїѧ̑ побѣжда́ѧ за возлюби́вшагѡ тѧ̀ хрⷭ҇та̀, немо́лчнѡ воспѣва́лъ є҆сѝ є҆мꙋ̀: А҆ллилꙋ́їа.
І҆́косъ ѳ҃
Виті́йство человѣ́ческое и҆знемога́етъ и҆зрещѝ всѧ̑ скѡ́рби, лишє́нїѧ, ᲂу҆ничижє́нїѧ, болѣ́зни и҆ страда̑нїѧ, ꙗ҆̀же ра́ди сп҃се́нїѧ па́ствы твоеѧ̀, ст҃е і҆нноке́нтїе, под̾ѧ́лъ є҆сѝ. Тѣ́мже терпѣ́нїю твоемꙋ̀ то́чїю дивѧ́щесѧ и҆ любо́вїю побѣжда́еми, съ бл҃года́рнымъ чꙋ́вствїемъ вопїе́мъ:
Ра́дꙋйсѧ, во́ине хрⷭ҇то́въ непобѣди́мый. Ра́дꙋйсѧ, твердѣ́йшїй а҆дама́нте, въ терпѣ́нїи невреди́мый.
Ра́дꙋйсѧ, ꙗ҆́кѡ ꙗ҆́рость небл҃гомы́слѧщихъ, гнѣ́вающихсѧ непра́веднѣ, претерпѣ́лъ є҆сѝ. Ра́дꙋйсѧ, ꙗ҆́кѡ превозносѧ́щїѧсѧ ѕлочести́вымъ шата́нїемъ па́ки лю́тѣ сокрꙋша́ємы ви́дѣлъ є҆сѝ.
Ра́дꙋйсѧ, жесто́кихъ и҆ ѕлоко́зненныхъ влады́къ ᲂу҆кроще́нїе. Ра́дꙋйсѧ, ᲂу҆гнете́нныхъ и҆ стра́ждꙋщихъ рабѡ́въ ско́рое застꙋпле́нїе.
Ра́дꙋйсѧ, ꙗ҆́кѡ корє́нїѧ заблꙋжде́нїй и҆ те́рнїе невѣ́рїѧ трꙋдолю́бнѣ и҆сторга́лъ є҆сѝ. Ра́дꙋйсѧ, ꙗ҆́кѡ бжⷭ҇твенныхъ повелѣ́нїй насаждє́нїѧ въ сердца́хъ вѣ́рныхъ мно́гими трꙋды̑ воздѣ́ловалъ є҆сѝ.
Ра́дꙋйсѧ, смире́нїемъ свои́мъ дїа́вола побѣди́вый. Ра́дꙋйсѧ, мл҃твою и҆ бдѣ́ннымъ стоѧ́нїемъ пло́ть свою̀ ᲂу҆мертви́вый.
Ра́дꙋйсѧ, ꙗ҆́кѡ кра̑сныѧ твоѝ но́зѣ до́бльственнѣ къ боре́нїю со врага́ми просте́рлъ є҆сѝ. Ра́дꙋйсѧ, ꙗ҆́кѡ до́брѣ тече́нїе соверши́въ, ко хрⷭ҇тꙋ̀ восхожде́нїе ѡ҆брѣ́лъ є҆сѝ.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ і҃
Сп҃се́нїѧ ра́ди ѿ ѡ҆слѣпле́нїѧ ста́рцꙋ, ѻ҆чи́ма тѧ́жкѡ ви́дѧщꙋ, полꙋчи́ти же зрѣ́нїе хотѧ́щꙋ и҆ съ вѣ́рою ѡ҆ се́мъ ᲂу҆ тебє̀ по́мощи просѧ́щꙋ, ско́рѡ прите́клъ є҆сѝ, свѧ́тче, въ хра́минꙋ тогѡ̀, и҆дѣ́же є҆гда̀ прикоснꙋ́лсѧ є҆сѝ болѣ́зненнѣй главѣ̀ є҆гѡ̀, а҆́бїе ѡ҆щꙋтѝ ѻ҆́нъ свѣ́тъ во ѻ҆́чїю своє́ю и҆ прозрѣ̀, хвалѧ̀ тѧ̀ и҆ вопїѧ̀ бг҃ꙋ: А҆ллилꙋ́їа.
І҆́косъ і҃
Стѣ́нꙋ крѣ́пкꙋю и҆ ѡ҆гражде́нїе неѡбори́мое ѿ всѣ́хъ скорбе́й и҆ ѕѡ́лъ и҆мѣ́етъ тѧ̀, па́стырю бл҃гі́й, страна̀ сїѧ̀: твои́мъ бо си́льнымъ застꙋпле́нїемъ и҆ предста́тельствомъ доны́нѣ гра́дъ се́й и҆ ѡ҆би́тель твоѧ̀ сохранѧ́ютсѧ въ ми́рѣ и҆ бл҃годе́нствїи. И҆ мы̀ ᲂу҆́бѡ, сп҃са́емїи тобо́ю, бл҃года́рственнѡ вопїе́мъ тѝ:
Ра́дꙋйсѧ, ча́ша, є҆ле́й млⷭ҇ти къ на́мъ бж҃їѧ содержа́щаѧ. Ра́дꙋйсѧ, горо̀, бжⷭ҇твеннагѡ на на́съ гнѣ́ва тꙋ́чи ѿводѧ́щаѧ.
Ра́дꙋйсѧ, ꙗ҆́кѡ пото́ки ми́ра къ на́мъ приво́диши. Ра́дꙋйсѧ, ꙗ҆́кѡ ѻ҆би́лїе бл҃гъ хода́тайствꙋеши.
Ра́дꙋйсѧ, млⷭ҇ти превели́кїѧ и҆ скѡ́рбнымъ сострада́нїѧ сокро́вище. Ра́дꙋйсѧ, простра́нное бж҃їѧ ѡ҆ па́ствѣ твое́й промышле́нїѧ прїѧ́телище.
Ра́дꙋйсѧ, въ печа́лехъ сꙋ́щымъ ᲂу҆веселе́нїе. Ра́дꙋйсѧ, ᲂу҆дрꙋче́нныхъ попечє́нїи жите́йскими ᲂу҆тѣше́нїе.
Ра́дꙋйсѧ, въ дѣторожде́нїи ма́теремъ ско́рый помо́щниче. Ра́дꙋйсѧ, въ ча́съ кончи́ны мл҃твенный на́шъ предста́телю.
Ра́дꙋйсѧ, ѡ҆ млⷭ҇ти и҆ ми́рѣ па́ствы твоеѧ̀ и҆звѣ́стный рачи́телю. Ра́дꙋйсѧ, ѻ҆́ч҃е чⷭ҇тны́й, ѿ всѧ́кагѡ ѕла̀ и҆ бѣ́дствїѧ ᲂу҆се́рдный на́шъ храни́телю.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ а҃і
Пѣ́нїе всеꙋмиле́нное и҆ моле́нїе те́плое пред̾ нетлѣ́нными моща́ми твои́ми, є҆ди́нымъ ѿ болѧ́ръ приноси́мое тебѣ̀, не презрѣ́лъ є҆сѝ, ѻ҆́ч҃е, но ско́рѡ ᲂу҆слы́шавъ и҆ во снѣ̀ ꙗ҆́вльсѧ, ѡ҆блегчи́лъ є҆сѝ болѣ̑зни и҆ страда̑нїѧ є҆гѡ̀, си́це и҆ на́шихъ моле́нїй и҆ пѣ́нїй гла́сы ᲂу҆слы́ши, і҆ера́рше хрⷭ҇то́въ, вѣ́рѣ же и҆ любвѝ люді́й твои́хъ вонмѝ и҆ свы́ше покро́въ тво́й да́рꙋй хва́лѧщымъ тѧ̀ и҆ пою́щымъ бг҃ꙋ: А҆ллилꙋ́їа.
І҆́косъ а҃і
Свѣтосїѧ́тельна тѧ̀ свѣти́льника, чрез̾ се́дмьдесѧтъ и҆ трѝ лѣ̑та сокрыва́ема въ землѝ не восхотѣ̀ гдⷭ҇ь ѡ҆ста́вити под̾ спꙋ́домъ, є҆́же и҆спо́лнитисѧ рече́нїю є҆гѡ̀, а҆́ки свѣти́льникъ на свѣ́щникъ поставлѧ́ютъ, да входѧ́щїи ви́дѧтъ свѣ́тъ. Тѣ́мже и҆ мы̀ во хра́ме се́мъ и҆ всю́дꙋ, ꙗ҆́кѡ тѧ̀ зрѧ́ще и҆ тобо́ю просвѣща́еми, дерза́емъ глаго́лати сїѧ̑:
Ра́дꙋйсѧ, свѣ́тлое на тве́рди цр҃ко́внѣй свѣти́ло и҆ сиби́рскїѧ страны̀ сла́во. Ра́дꙋйсѧ, цр҃кве́й строи́телю и҆ ѡ҆богати́телю чꙋдесы̀ тѣ́хъ нескꙋ́дный.
Ра́дꙋйсѧ, пресвѣ́тлаѧ красото̀ ст҃ы́ѧ ѡ҆би́тели сеѧ̀. Ра́дꙋйсѧ, блестѧ́щаѧ зарѐ и҆збра́ннагѡ тобо́ю гра́да сегѡ̀.
Ра́дꙋйсѧ, свѣ́щниче всезлаты́й и҆ многоцѣ́нный. Ра́дꙋйсѧ, би́сере предрагі́й нбⷭ҇ный.
Ра́дꙋйсѧ, ѡ҆блакоѡбра́зный покро́ве, на тѣ́снѣмъ пꙋтѝ сп҃се́нїѧ на́съ ѡ҆сѣнѧ́ющїй. Ра́дꙋйсѧ, ѻ҆гневи́дный сто́лпе, въ нощѝ невѣ́дѣнїѧ и҆ заблꙋжде́нїй на́съ просвѣща́ющїй.
Ра́дꙋйсѧ, ꙗ҆́кѡ ст҃ы́нею твое́ю всѣ́хъ тре́бꙋющихъ по́мощи твоеѧ̀ ѡ҆сщ҃а́еши. Ра́дꙋйсѧ, ꙗ҆́кѡ блиста́нїемъ чꙋде́съ твои́хъ во всѧ̑ концы̀ страны̀ сеѧ̀ сїѧ́еши.
Ра́дꙋйсѧ, ꙗ҆́кѡ и҆ по преставле́нїи твое́мъ съ на́ми пребыва́еши. Ра́дꙋйсѧ, ꙗ҆́кѡ, и҆ живѧ̀ въ селе́нїихъ ра́йскихъ, на́съ не ѡ҆ставлѧ́еши.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ в҃і
Бл҃года́ть свы́ше съ нб҃сѐ пода́ждь, пребл҃же́нне ѻ҆́ч҃е, съ вѣ́рою и҆ бл҃гоговѣ́нїемъ воспомина́ющымъ чⷭ҇тно́е твоѐ ᲂу҆спе́нїе и҆ пресвѣ́тлое пренесе́нїе ст҃ы́хъ моще́й твои́хъ пра́зднꙋющымъ: и҆́маши бо дарова́ннꙋю тѝ ѿ бг҃а си́лꙋ и҆ вла́сть подава́ти тре́бꙋющымъ всѧ̑, ꙗ҆̀же ко сп҃се́нїю прошє́нїѧ, и҆ ны́нѣ, предстоѧ̀ прⷭ҇то́лꙋ бжⷭ҇твенномꙋ, молѝ ѡ҆ тебѣ̀ воспѣва́ющихъ: А҆ллилꙋ́їа.
І҆́косъ в҃і
Пою́ще твоѐ хода́тайство и҆ си́льное застꙋпле́нїе просѧ́щымъ твоеѧ̀ ско́рыѧ по́мощи, восхвалѧ́емъ пода́телѧ всѣ́хъ бл҃ги́хъ бг҃а, дарова́вшагѡ въ послѣ̑днѧѧ времена̀ странѣ̀ се́й тебѣ̀, ѻ҆ц҃а̀ на́шегѡ чꙋдотво́рца, мл҃твенника и҆ застꙋ́пника. Ты́ же не возгнꙋша́йсѧ на́съ, грѣ́шныхъ и҆ недосто́йныхъ рабѡ́въ є҆гѡ̀, но ᲂу҆слы́ши хвале́бными гла̑сы вопїю́щихъ тебѣ̀:
Ра́дꙋйсѧ, сꙋ́етства привре́меннагѡ къ бꙋ́їѧгѡ вои́стиннꙋ ѡ҆бличи́телю. Ра́дꙋйсѧ, а҆пⷭ҇толѡмъ равноре́вностный є҆ѵⷢ҇льскимъ наꙋче́нїемъ.
Ра́дꙋйсѧ, мꙋ́ченикѡвъ сострада́льче и҆ красото̀. Ра́дꙋйсѧ, первопа́стырю и҆ ᲂу҆чи́телю хрⷭ҇тоимени́тыхъ люді́й землѝ сеѧ̀.
Ра́дꙋйсѧ, цр҃ко́вное ᲂу҆краше́нїе. Ра́дꙋйсѧ, а҆рхїере́євъ добро́то, свѧще́нниковъ и҆ и҆́нокѡвъ похвало̀.
Ра́дꙋйсѧ, ꙗ҆́кѡ прїѧ́лъ є҆сѝ трꙋдѡ́въ твои́хъ воздаѧ́нїе. Ра́дꙋйсѧ, крестоно́сномꙋ наро́дꙋ на́шемꙋ похвало̀ и҆ ᲂу҆твержде́нїе.
Ра́дꙋйсѧ, тѣле́съ на́шихъ неꙋсы́пное хране́нїе. Ра́дꙋйсѧ, и҆ дꙋ́шъ на́шихъ къ црⷭ҇твїю нбⷭ҇номꙋ возведе́нїе.
Ра́дꙋйсѧ, бг҃ꙋ соверше́ннѣ и҆ всецѣ́лѣ ᲂу҆годи́вый. Ра́дꙋйсѧ, вѣне́цъ безсме́ртїѧ навѣ́ки полꙋчи́вый.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ г҃і
Ѽ, преди́вный чꙋдотво́рче и҆ пресла́вный ᲂу҆го́дниче хрⷭ҇то́въ і҆нноке́нтїе! Вонмѝ гла́сꙋ моле́нїй на́шихъ, ѿ сокрꙋше́ннагѡ се́рдца къ тебѣ̀ возноси́момꙋ, и҆ бг҃опрїѧ́тнымъ твои́мъ хода́тайствомъ и҆спросѝ на́мъ ѿ хрⷭ҇та̀ бг҃а на́шегѡ проще́нїе прегрѣше́нїй на́шихъ, ѡ҆сла́бꙋ и҆ и҆збавле́нїе ѿ врагѡ́въ ви́димыхъ и҆ неви́димыхъ, и҆ ѿ всѧ́кїѧ ско́рби, бѣды̀ и҆ напа́стей, да съ тобо́ю и҆ со всѣ́ми ст҃ы́ми въ селе́нїи првⷣныхъ сподо́бимсѧ пѣ́ти є҆мꙋ̀: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льскомꙋ жи́тельствꙋ на нб҃сѣ́хъ поревнова́лъ є҆сѝ, ѻ҆́тче: по и҆́мени бо и҆ житїѐ твоѐ непоро́чнѡ бы́сть на землѝ, сегѡ̀ ра́ди и҆ возвы́силсѧ є҆сѝ до лицезрѣ́нїѧ творца̀ а҆́гг҃лѡвъ. ѿню́дꙋже призира́ѧ вы́нꙋ на гра́дъ се́й и҆ лю́ди, ᲂу҆слы́ши на́съ, похва́льнаѧ восписꙋ́ющыхъ тѝ сїѧ̑:
Ра́дꙋйсѧ, неви́нностїю а҆́гнца непоро́чнагѡ подража́тель бы́вый: ра́дꙋйсѧ, воздержа́нїемъ твои́мъ а҆́гг҃льское во пло́ти житїѐ ꙗ҆ви́вый.
Ра́дꙋйсѧ, ꙗ҆́кѡ а҆́гг҃лъ, сиби́рскїѧ цр҃кве бж҃їѧ дѣла̀ возвѣща́ѧй: ра́дꙋйсѧ, ꙗ҆́кѡ а҆рхїстрати́гъ си́лы нбⷭ҇ныѧ, всѣ́хъ прибѣга́ющихъ къ тебѣ̀ ѿ бѣ́дъ сохранѧ́ѧй.
Ра́дꙋйсѧ, непоро́чности и҆ неви́нности соиме́нный ᲂу҆чи́телю: ра́дꙋйсѧ, неѕло́бїѧ и҆ чⷭ҇тоты̀ ᲂу҆се́рдный храни́телю.
Ра́дꙋйсѧ, ᲂу҆бѣле́нный неви́нностїю крі́не ра́йскагѡ прозѧбе́нїѧ: ра́дꙋйсѧ, ᲂу҆маще́ннаѧ чⷭ҇тото́ю ма́слино нбⷭ҇нагѡ бл҃гослове́нїѧ.
Ра́дꙋйсѧ, ᲂу҆́ме нбⷭ҇ныхъ неизрече́нныхъ бла̑гъ наслажда́ѧйсѧ: ра́дꙋйсѧ, па́стырю, съ мꙋ́дрыми въ ра́дость пастыренача́льника своегѡ̀ вше́дый.
Ра́дꙋйсѧ, ꙗ҆́кѡ свѣ́тъ лица̀ бж҃їѧ ꙗ҆́снѡ на нб҃сѝ смотрѧ́еши: ра́дꙋйсѧ, ꙗ҆́кѡ тѣ́мъ же свѣ́томъ ѡ҆сїѧ́нный, притека́ющихъ къ тебѣ̀ неизрече́ннѡ возвеселѧ́еши.
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Конда́къ а҃
Возбра́нный чꙋдотво́рче и҆ ско́рый въ ско́рбѣхъ помо́щниче, ст҃и́телю ѻ҆́тче і҆нноке́нтїе, ꙗ҆́кѡ и҆мѣ́ѧ ве́лїе дерзнове́нїе пред̾ гдⷭ҇емъ, ѿ всѧ́кихъ на́съ бѣ́дъ свобожда́й, да съ ра́достїю зове́мъ тѝ:
Ра́дꙋйсѧ, і҆нноке́нтїе, моли́твенниче ѡ҆ дꙋша́хъ на́шихъ.
Моли́твы
Къ тебѣ̀, свѧ́тче бж҃їй, ꙗ҆́кѡ къ ско́ромꙋ помо́щникꙋ и҆ мл҃твенникꙋ ѡ҆ сп҃се́нїи мое́мъ, а҆́зъ недосто́йный и҆ грѣ́шный припа́даѧ молю́сѧ: не пре́зри менѐ ᲂу҆ны́лагѡ, немощна́гѡ, во мнѡ́гаѧ беззакѡ́нїѧ впа́дшагѡ, и҆ по всѧ̑ дни̑ и҆ часы̀ согрѣша́ющагѡ, но вонмѝ дꙋшѝ мое́й, ꙗ҆́кѡ скорблю̀, и҆ ᲂу҆молѝ гдⷭ҇а бг҃а, всеѧ̀ тва́ри содѣ́телѧ, є҆мꙋ́же ны́нѣ предстои́ши въ ра́дости ст҃ы́хъ и҆ съ ли̑ки а҆́гг҃лъ, поми́ловати мѧ̀ и҆ и҆звестѝ и҆з̾ темни́цы грѣхо́вныѧ дꙋ́шꙋ мою̀, пре́жде да́же не ѿидꙋ̀ ѿсю́дꙋ и҆ ктомꙋ̀ не ᲂу҆̀ гото́въ ꙗ҆влю́сѧ на сꙋ́дъ є҆гѡ̀. Є҆́й, ѻ҆́ч҃е! Не посрамѝ менє̀, къ тебѣ̀ съ вѣ́рою притека́ющагѡ, а҆́ще бо и҆ недосто́инъ є҆́смь твоегѡ̀ хода́тайства и҆ застꙋпле́нїѧ, но ты̀, бы́въ подража́тель человѣколю́бїѧ бж҃їѧ, сотворѝ мѧ̀ досто́йна чрез̾ ѡ҆браще́нїе ѿ ѕлы́хъ дѣ́лъ къ бл҃го́мꙋ житїю̀, да та́кѡ дꙋше́ю и҆ тѣ́ломъ здра́въ бы́въ, сла́влю и҆ пою̀ ди́внагѡ во ст҃ы́хъ свои́хъ бг҃а на́шегѡ и҆ твоѐ те́плое застꙋпле́нїе, всегда̀, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.