Акафист святителю Иакову, епископу Ростовскому, чудотворцу

А́нгелов Творе́ц земна́го тя́ а́нгела и челове́ка небе́снаго показа́ на́м вои́стинну, о́тче Иа́кове: те́мже тебе́, от рожде́ния Бо́гу освяще́ннаго и ди́вным виде́нием во архиере́а гра́ду Росто́ву предвозвеще́ннаго, ублажа́ем похвала́ми си́ми:

Ра́дуйся, благослове́нная о́трасле роди́телей благочести́вых; ра́дуйся, Отца́ Небе́снаго ча́до превожделе́нное.

Ра́дуйся, от ю́ности твоея́ благода́ти преиспо́лненный; ра́дуйся, ра́бе Бо́жий, благи́й и ве́рный.

Ра́дуйся, гра́да Росто́ва архиере́ю богоизбра́нный; ра́дуйся, все́м ве́рным па́стырю предо́брый.

Ра́дуйся, на Небеси́ пребыва́яй у Го́спода во оби́телех Его́; ра́дуйся, благода́тною по́мощию не оставля́яй и на́с на земли́ живу́щих.

Ра́дуйся, благода́ти Свята́го Ду́ха сосу́де благоуха́нный; ра́дуйся, милосе́рдия Бо́жия к лю́дем ча́ше неистощи́мая.

Ра́дуйся, селе́ние сла́вы Бо́жия, ду́шу твою́ па́че Моисе́евы испо́лнившия; ра́дуйся, промышле́ния Бо́жия сокро́вище пречу́дное.

Ра́дуйся, святи́телю Иа́кове, пресла́вный чудотво́рче.

Ра́зум богопросвеще́н свы́ше тебе́ дарова́ся, святи́телю Бо́жий, и́мже злове́рие еретика́ Маркиа́на уразуме́л еси́, лжеуче́нием иконобо́рным тишину́ Це́ркве Росто́вския смути́ти дерзну́вша, те́мже сего́ ухищре́нное лжеслове́сие мече́м Бо́жия сло́ва отрази́л еси́ и па́ству твою́ от губи́теля огради́л еси́, тебе́ благоче́стно зову́щую:

Ра́дуйся, Правосла́вия побо́рниче; ра́дуйся, злове́рия обличи́телю.

Ра́дуйся, благоче́стия учи́телю; ра́дуйся, злоче́стия искорени́телю.

Ра́дуйся, достоподража́тельный ико́н святы́х почита́телю; ра́дуйся, е́реси иконобо́рныя отгна́телю.

Ра́дуйся, правове́рующих при́сное утвержде́ние и утеше́ние; ра́дуйся, благоче́стно живу́щих бо́дрость и укрепле́ние.

Ра́дуйся, кре́посте Госпо́дня, от вра́г Креста́ Христо́ва неодоле́нная; ра́дуйся, обурева́емым убе́жище благоути́шное.

Ра́дуйся, фарао́на а́дскаго посрами́телю; ра́дуйся, в го́рний Иерусали́м на́ш путеводи́телю.

Ра́дуйся, святи́телю Иа́кове, пресла́вный чудотво́рче.

Имы́й во уме́ и се́рдцы твое́м словеса́ Христо́вы, не осужда́ти без ми́лости согреша́ющыя, о жене́ гре́шнице, на сме́рть осужде́нней и к твоему́ заступле́нию прите́кшей, милосе́рдовал еси́, и сию́ от сме́рти свободи́л еси́ и на покая́ние наста́вил еси́, Влады́це Христу́, блудни́цу поми́ловавшему, подража́я, те́мже вопие́м ти́ умиле́нно:

Ра́дуйся, Ева́нгелиа Христо́ва и́стинный после́дователю; ра́дуйся, милосе́рдия Иису́сова к ка́ющымся ве́рный подража́телю.

Ра́дуйся, я́ко су́д челове́ческий на ми́лость преложи́л еси́; ра́дуйся, я́ко гре́шницу, на сме́рть осужде́нную на покая́ние соблю́л еси́.

Ра́дуйся, засту́пниче безпомо́щных; ра́дуйся, покрови́телю напа́ствуемых.

Ра́дуйся, не осуди́вый, и неосужде́нный по за́поведи Госпо́дней; ра́дуйся, ми́лостивый, и поми́лованный, по обетова́нию Христо́ву.

Ра́дуйся, оте́ческою любо́вию не́мощи на́ша покрыва́яй; ра́дуйся, под криле́ защище́ния твоего́ прибега́ющыя охраня́яй.

Ра́дуйся, я́ко и пра́ведный гне́в Бо́жий хода́тайством твои́м от на́с отврати́ти си́лен еси́; ра́дуйся, я́ко и ду́шу твою́ положи́ти за на́с и́стинно гото́в бы́л еси́.

Ра́дуйся, святи́телю Иа́кове, пресла́вный чудотво́рче.

Слы́шавше лю́дие Росто́встии клевету́ на тя́ зло́бную, глаго́лом неподо́бным ве́ру я́ша, и я́коже дре́вле иуде́е на Христа́, на тя́ па́стыря своего́ ру́це возложи́ша, и от престо́ла святи́тельскаго изгна́ша, не постыде́вшеся святы́ни са́на твоего́, ни седи́н твои́х ста́рческих. Мы́ же, безви́нное твое́ изгна́ние помина́юще, я́ко страда́льца и́стины тя́ ублажа́ем и зове́м:

Ра́дуйся, поноше́ния и клеветы́ челове́ческия му́жественно претерпе́вый; ра́дуйся, блаже́нство гони́мых пра́вды ра́ди унасле́дивый.

Ра́дуйся, и́го скорбе́й терпеливоду́шно понесы́й; ра́дуйся, чистоту́ безстра́стия сохрани́вый неврежде́нну.

Ра́дуйся, благоуха́нный кри́не непоро́чнаго де́вства; ра́дуйся, неувяда́емый цве́те а́нгельския чистоты́.

Ра́дуйся, защи́тниче непра́ведно оклевету́емых; ра́дуйся, гро́зное вразумле́ние неразу́мно клеве́щущих.

Ра́дуйся, в горни́ле скорбе́й па́че зла́та очище́нный; ра́дуйся, терпе́нием напа́стей И́ову Многострада́льному подо́бный.

Ра́дуйся, и́стинный после́дователю распя́таго Учи́теля; ра́дуйся, Креста́ Его́ му́жественный и усе́рдный носи́телю.

Ра́дуйся, святи́телю Иа́кове, пресла́вный чудотво́рче.

Ви́дев суету́ ми́ра сего́, благоути́шие пусты́ни и житие́ безмо́лвное па́че престо́ла святи́тельскаго, о́тче, возлюби́л еси́: сего́ ра́ди ку́щу ма́лу себе́ воздви́г, посто́м и моли́твою в не́й Христу́ благоугожда́л еси́ и оби́тель и́ноческую созда́л еси́, в не́йже тебе́ зове́м си́це:

Ра́дуйся, преподо́бных удобре́ние; ра́дуйся, по́стников похвало́.

Ра́дуйся, безмо́лвия рачи́телю; ра́дуйся, моли́тв благоуха́нных фимиа́ме.

Ра́дуйся, сле́зы моли́твенныя оби́льно источи́вый; ра́дуйся, пла́чем вре́менным блаже́нство ве́чное улучи́вый.

Ра́дуйся, оби́тели твоея́ сла́во и украше́ние; ра́дуйся, мона́шествующих в не́й ти́хая отра́до и утеше́ние.

Ра́дуйся, сокро́вище нетле́нное, от моли́тв на́ших некры́ющееся; ра́дуйся, кла́дезю ми́лостей Госпо́дних, от на́с не утаи́выйся.

Ра́дуйся, свети́льниче Госпо́день, Це́рковь Христо́ву озаря́яй; ра́дуйся, теплото́ любве́ боже́ственныя, ве́рных сердца́ согрева́ющая.

Ра́дуйся, святи́телю Иа́кове, пресла́вный чудотво́рче.

Возсия́л еси́, я́ко свети́ло богосве́тлое, па́стве твое́й сия́нием высо́ких доброде́телей, о́тче Иа́кове, моли́твенниче о на́с неусы́пный по до́лгу воспева́ющих тя́ си́це:

Ра́дуйся, вели́кий уго́дниче Бо́жий, мно́гими дарова́нии благода́тными укра́шенный; ра́дуйся, пресла́вными чудесы́ от Бо́га просла́вленный.

Ра́дуйся, све́том святы́ни Вы́шняго озаре́нный; ра́дуйся, красото́ю жи́зни небе́сныя осия́нный.

Ра́дуйся, прера́достное ве́рных ча́д Це́ркве утеше́ние; ра́дуйся, те́мным си́лам а́дским нестерпи́мое слы́шание и виде́ние.

Ра́дуйся, блаже́нство чи́стых се́рдцем унасле́дивый; ра́дуйся, лицезре́ния Бо́жия при́сно наслажда́яйся.

Ра́дуйся, ду́шу твою́ во оби́тель Пресвяты́я Тро́ицы устро́ивый; ра́дуйся, я́ко все́м житие́м твои́м Го́спода сла́вно просла́вил еси́.

Ра́дуйся, гра́да Росто́ва храни́телю и засту́пниче; ра́дуйся, всея́ Росси́йския страны́ предста́телю и моли́твенниче.

Ра́дуйся, святи́телю Иа́кове, пресла́вный чудотво́рче.

Но́ваго тя́ Но́я нача́льника ковче́га мы́сленнаго, сла́ныя во́ды мо́ря жите́йскаго невре́дно преше́дшаго, ве́рою познава́ем, о́тче на́ш Иа́кове. Помози́ у́бо и на́м спасе́ние улучи́ти и ти́хаго приста́нища от жите́йских пла́ваний дости́гнути, тебе́ зову́щым:

Ра́дуйся, кораблеце́м си́лы и хране́ния Бо́жия естество́ водно́е немо́кренно преше́дый; ра́дуйся, от бу́рь жите́йских прибе́жище все́м да́руяй.

Ра́дуйся, вертогра́де мы́сленный, плодо́в ду́ха оби́льно испо́лненный; ра́дуйся, са́де духо́вный, цве́ты доброде́телей при́сно благоуха́яй.

Ра́дуйся, свеще́, в моли́твах к Бо́гу за на́с неугаси́мо горя́щая; ра́дуйся, ми́ро драгоце́нное, Це́рковь Христо́ву облагоуха́вшее.

Ра́дуйся, ма́слино благопло́дная, еле́й милосе́рдия Бо́жия оби́льно источа́ющая; ра́дуйся, исто́чниче неизсяка́емый чуде́с благода́ти.

Ра́дуйся, скорбя́щих при́сно гото́вый уте́шителю; ра́дуйся, боля́щих безме́здный цели́телю.

Ра́дуйся, во все́х беда́х на́ших и напа́стех ве́рное прибе́жище; ра́дуйся, все́х ми́лостей Бо́жиих на́м при́сный хода́таю.

Ра́дуйся, святи́телю Иа́кове, пресла́вный чудотво́рче.

Ве́сь освяще́н благода́тию Ду́ха Свята́го богоно́сец показа́лся еси́ святи́тельским служе́нием и равноа́нгельным житие́м твои́м, е́же ублажа́юще, воспева́ем ти́ си́це:

Ра́дуйся, до́брый а́нгеле Це́ркве Росто́вския; ра́дуйся, на́ш апо́столе, в труде́х и боле́знех Христа́ благовествова́вый.

Ра́дуйся, испове́дниче ве́ры, непра́ведное гоне́ние претерпе́вый; ра́дуйся, любо́вь Бо́жию на му́ки себе́ преда́нием запечатле́вый.

Ра́дуйся, по́стниче и моли́твенниче преди́вный; ра́дуйся, па́стырю и учи́телю предо́брый.

Ра́дуйся, сле́зный се́ятелю ра́дости небе́сныя; ра́дуйся, за́поведей Христо́вых ве́рный исполни́телю.

Ра́дуйся, трудолюби́вый де́лателю виногра́да Христо́ва; ра́дуйся, неусы́пный моли́твенниче о твое́м ста́де.

Ра́дуйся, благода́тный укрепи́телю немоществу́ющих; ра́дуйся, благослове́нное утвержде́ние по́двигом до́брым подвиза́ющихся.

Ра́дуйся, святи́телю Иа́кове, пресла́вный чудотво́рче.

Вети́я Це́ркве Росси́йския, вели́кий святи́тель Дими́трий, прише́д во оби́тель твою́, о́тче на́ш Иа́кове, поко́й сво́й ве́чный в не́й ду́хом предрече́, глаго́ля: «Се́ поко́й мо́й, зде́ вселю́ся во ве́к ве́ка». С те́м у́бо Престо́лу Царя́ Сла́вы предстоя́, моли́ся вы́ну о на́с зову́щих ти́:

Ра́дуйся, ча́ше неистощи́мая ми́лостей к на́м Госпо́дних; ра́дуйся, умиле́ния реко́ благотеку́щая.

Ра́дуйся, дру́же Христо́в, до конца́ ве́рен Ему́ пребы́вый; ра́дуйся, сожи́телю святы́х, при́сный бо́гу.

Ра́дуйся, я́ко сме́рть твоя́ честна́ и па́мять твоя́ с похвала́ми; ра́дуйся, я́ко мзда́ твоя́ на небеси́ вели́ка и вене́ц тво́й нетле́нен.

Ра́дуйся, со святи́телем Дими́трием кре́пкий о на́с моли́твенниче; ра́дуйся, со все́ми святы́ми о все́х ве́рных боголюбе́зный хода́таю.

Ра́дуйся, покро́ве и заступле́ние притека́ющих под кро́в оби́тели твоея́; ра́дуйся, по́моще ско́рая и утеше́ние все́м призыва́ющим тя́.

Ра́дуйся, ра́досте страны́ Росто́вския; ра́дуйся, сла́во всея́ Держа́вы Росси́йския.

Ра́дуйся, святи́телю Иа́кове, пресла́вный чудотво́рче.

Сте́ну огражде́ния оби́тели твое́й испове́дуем тя́, святи́телю Христо́в: ю́же бо при жи́зни твое́й трудолю́бно устро́ил еси́, сию́ и доны́не неруши́му, сла́вну и благоле́пну храни́ши, и в не́й, я́ко сокро́вище многоце́нно, многоцеле́бныя мо́щи твоя́ сокры́л еси́ на́м, восхваля́ющым тя́ си́це:

Ра́дуйся, богодарова́нный на́ш засту́пниче; ра́дуйся, милосе́рдый ду́ш и теле́с на́ших целе́бниче.

Ра́дуйся, в со́ниих и виде́ниих ве́рныя посеща́яй; ра́дуйся, в беда́х и ско́рбех су́щым утеше́ние низпосыла́яй.

Ра́дуйся, боле́зни неисце́льныя ско́ро врачу́яй; ра́дуйся, в напа́стех и гоне́ниих стра́ждущыя заступа́яй.

Ра́дуйся, бога́тство утеше́ния, ту́не все́м подае́мое; ра́дуйся, сокро́вищнице бла́г ве́чных, все́м отве́рстая.

Ра́дуйся, оби́тели твоея́ покро́ве и огражде́ние; ра́дуйся, и́ночествующих в не́й благоскорбя́щих ра́дование.

Ра́дуйся, изба́вителю на́ш от вся́кия ну́жды и печа́ли; ра́дуйся, храни́телю на́ш от вся́каго озлобле́ния вра́жия.

Ра́дуйся, святи́телю Иа́кове, пресла́вный чудотво́рче.

Светоно́сныя лучи́ боже́ственных ми́лостей сокрове́нно на́м излива́еши, святи́телю Бо́жий, сего́ ра́ди просла́вися и́мя твое́ во все́й стране́ на́шей правосла́вней, я́ко чудотво́рца пресла́вна и предста́теля многомо́щна ко Го́споду тя́ почита́ющей: те́мже и мы́, заступле́ния твоего́ прося́ще, вопие́м ти́ из глубины́ серде́чныя:

Ра́дуйся, а́нгеле земны́й и челове́че небе́сный; ра́дуйся, го́рняго Иерусали́ма жи́телю всеблаже́нный.

Ра́дуйся, соприча́стниче ра́дости Го́спода твоего́; ра́дуйся, созерца́телю непристу́пныя сла́вы Триипоста́снаго Божества́.

Ра́дуйся, сла́вою нетле́нною укра́шенный на земли́; ра́дуйся, венце́м безсме́ртия увенча́нный на небеси́.

Ра́дуйся, вожделе́нное Оте́чество Небе́сное унасле́дивый; ра́дуйся, и земно́е Оте́чество твое́ в моли́твах не забыва́яй.

Ра́дуйся, от земны́х к небе́сным ду́х на́ш возвыша́яй; ра́дуйся, к сокро́вищу на́шему, Сладча́йшему Иису́су, сердца́ на́ша обраща́яй.

Ра́дуйся, заре́ Бо́жия све́та; ра́дуйся, ти́хое сия́ние Бо́жией благода́ти.

Ра́дуйся, святи́телю Иа́кове, пресла́вный чудотво́рче.

Пою́ще по́двиги твоя́ и чудеса́, святи́телю достоблаже́нне, честно́е успе́ние твое́ сла́вим, и я́ко па́стыря и засту́пника на́шего велича́ем тя́ зва́нии си́ми:

Ра́дуйся, Пресвяты́я Тро́ицы ве́рный покло́нниче; ра́дуйся, Пресвяты́я Богоро́дицы и́стинный избра́нниче.

Ра́дуйся, арха́нгелов и а́нгелов собесе́дниче; ра́дуйся, Предте́чи Госпо́дня и все́х святы́х блаже́нный сожи́телю.

Ра́дуйся, Це́ркве небе́сныя и земны́я украше́ние; ра́дуйся, о па́стве твое́й земне́й моли́твенниче неусы́пный.

Ра́дуйся, я́ко при́сно со Христо́м ца́рствуеши; ра́дуйся, я́ко непрестаю́щия ра́дости Его́ сподо́бился еси́.

Ра́дуйся, уго́дниче Бо́жий премилосе́рдый; ра́дуйся, па́стырю на́ш прекро́ткий.

Ра́дуйся, пра́ведных весе́лие; ра́дуйся, гре́шных упова́ние.

Ра́дуйся, святи́телю Иа́кове, пресла́вный чудотво́рче.

А҆́гг҃лѡвъ творе́цъ земна́гѡ тѧ̀ а҆́гг҃ла и҆ человѣ́ка нбⷭ҇нагѡ показа̀ на́мъ вои́стиннꙋ, ѻ҆́ч҃е і҆а́кѡве: тѣ́мже тебѣ̀, ѿ рожде́нїѧ бг҃ꙋ ѡ҆свѧще́ннаго и҆ ди́внымъ видѣ́нїемъ во а҆рхїере́а гра́дꙋ росто́вꙋ предвозвѣще́ннаго, ᲂу҆блажа́емъ похвала́ми си́ми:

Ра́дꙋйсѧ, бл҃гослове́ннаѧ ѻ҆́трасле роди́телей бл҃гочести́выхъ: ра́дꙋйсѧ, ѻ҆ц҃а̀ нбⷭ҇нагѡ ча́до превожделѣ́нное.

Ра́дꙋйсѧ, ѿ ю҆́ности твоеѧ̀ блгⷣти преиспо́лненный: ра́дꙋйсѧ, ра́бе бж҃їй, бл҃гі́й и҆ вѣ́рный.

Ра́дꙋйсѧ, гра́да росто́ва а҆рхїере́ю бг҃оизбра́нный: ра́дꙋйсѧ, всѣ̑мъ вѣ̑рнымъ па́стырю предо́брый.

Ра́дꙋйсѧ, на нб҃сѝ пребыва́ѧй ᲂу҆ гдⷭ҇а во ѡ҆би́телехъ є҆гѡ̀: ра́дꙋйсѧ, бл҃года́тною по́мощїю не ѡ҆ставлѧ́ѧй и҆ на́съ на землѝ живꙋ́щихъ.

Ра́дꙋйсѧ, блгⷣти ст҃а́гѡ дх҃а сосꙋ́де бл҃гоꙋха́нный: ра́дꙋйсѧ, милосе́рдїѧ бж҃їѧ къ лю́демъ ча́ше неистощи́маѧ.

Ра́дꙋйсѧ, селе́нїе сла́вы бж҃їѧ, дꙋ́шꙋ твою̀ па́че мѡѷсе́евы и҆спо́лнившїѧ: ра́дꙋйсѧ, промышле́нїѧ бж҃їѧ сокро́вище пречꙋ́дное.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Ра́зꙋмъ бг҃опросвѣще́нъ свы́ше тебѣ̀ дарова́сѧ, ст҃и́телю бж҃їй, и҆́мже ѕловѣ́рїе є҆ретїка̀ маркїа́на ᲂу҆разꙋмѣ́лъ є҆сѝ, лжеꙋче́нїемъ і҆кѡнобо́рнымъ тишинꙋ̀ цр҃кве росто́вскїѧ смꙋти́ти дерзнꙋ́вша, тѣ́мже сегѡ̀ ᲂу҆хищре́нное лжеслове́сїе мече́мъ бж҃їѧ сло́ва ѿрази́лъ є҆сѝ и҆ па́ствꙋ твою̀ ѿ гꙋби́телѧ ѡ҆гради́лъ є҆сѝ, тебѣ̀ благоче́стнѡ зовꙋ́щꙋю:

Ра́дꙋйсѧ, правосла́вїѧ побо́рниче: ра́дꙋйсѧ, ѕловѣ́рїѧ ѡ҆бличи́телю.

Ра́дꙋйсѧ, бл҃гоче́стїѧ ᲂу҆чи́телю: ра́дꙋйсѧ, ѕлоче́стїѧ и҆скорени́телю.

Ра́дꙋйсѧ, достоподража́тельный і҆кѡ́нъ ст҃ы́хъ почита́телю: ра́дꙋйсѧ, є҆́реси і҆кѡнобо́рныѧ ѿгна́телю.

Ра́дꙋйсѧ, правовѣ́рꙋющихъ при́сное ᲂу҆твержде́нїе и҆ ᲂу҆тѣше́нїе: ра́дꙋйсѧ, бл҃гоче́стнѡ живꙋ́щихъ бо́дрость и҆ ᲂу҆крѣпле́нїе.

Ра́дꙋйсѧ, крѣ́посте гдⷭ҇нѧ, ѿ вра̑гъ крⷭ҇та̀ хрⷭ҇то́ва неѡдоле́ннаѧ: ра́дꙋйсѧ, ѡ҆бꙋрева́ємымъ ᲂу҆бѣ́жище бл҃гоꙋти́шное.

Ра́дꙋйсѧ, фараѡ́на а҆́дскагѡ посрами́телю: ра́дꙋйсѧ, въ го́рнїй і҆ерⷭ҇ли́мъ на́шъ пꙋтеводи́телю.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

И҆мы́й во ᲂу҆мѣ̀ и҆ се́рдцы твое́мъ словеса̀ хрⷭ҇то́вы, не ѡ҆сꙋжда́ти без̾ ми́лости согрѣша́ющыѧ, ѡ҆ женѣ̀ грѣ́шницѣ, на сме́рть ѡ҆сꙋжде́ннѣй и҆ къ твоемꙋ̀ застꙋпле́нїю прите́кшей, милосе́рдовалъ є҆сѝ, и҆ сїю̀ ѿ сме́рти свободи́лъ є҆сѝ и҆ на покаѧ́нїе наста́вилъ є҆сѝ, влⷣцѣ хрⷭ҇тꙋ̀, блꙋдни́цꙋ поми́ловавшемꙋ, подража́ѧ, тѣ́мже вопїе́мъ тѝ ᲂу҆миле́ннѡ:

Ра́дꙋйсѧ, є҆ѵⷢ҇лїа хрⷭ҇то́ва и҆́стинный послѣ́дователю: ра́дꙋйсѧ, млⷭ҇рдїѧ і҆и҃сова къ ка́ющымсѧ вѣ́рный подража́телю.

Ра́дꙋйсѧ, ꙗ҆́кѡ сꙋ́дъ человѣ́ческїй на ми́лость преложи́лъ є҆сѝ: ра́дꙋйсѧ, ꙗ҆́кѡ грѣ́шницꙋ, на сме́рть ѡ҆сꙋжде́ннꙋю на покаѧ́нїе соблю́лъ є҆сѝ.

Ра́дꙋйсѧ, застꙋ́пниче безпомо́щныхъ: ра́дꙋйсѧ, покрови́телю напа́ствꙋемыхъ.

Ра́дꙋйсѧ, не ѡ҆сꙋди́вый, и҆ неѡсꙋжде́нный по за́повѣди гдⷭ҇ней: ра́дꙋйсѧ, ми́лостивый, и҆ поми́лованный, по ѡ҆бѣтова́нїю хрⷭ҇то́вꙋ.

Ра́дꙋйсѧ, ѻ҆те́ческою любо́вїю не́мощи на́ша покрыва́ѧй: ра́дꙋйсѧ, под̾ крилѣ̀ защище́нїѧ твоегѡ̀ прибѣга́ющыѧ ѡ҆хранѧ́ѧй.

Ра́дꙋйсѧ, ꙗ҆́кѡ и҆ пра́ведный гнѣ́въ бж҃їй хода́тайствомъ твои́мъ ѿ на́съ ѿврати́ти си́ленъ є҆сѝ: ра́дꙋйсѧ, ꙗ҆́кѡ и҆ дꙋ́шꙋ твою̀ положи́ти за на́съ и҆́стиннѡ гото́въ бы́лъ є҆сѝ.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Слы́шавше лю́дїе росто́встїи клеветꙋ̀ на тѧ̀ ѕло́бнꙋю, глаго́лѡмъ неподѡ́бнымъ вѣ́рꙋ ꙗ҆́ша, и҆ ꙗ҆́кѡже дре́вле і҆ꙋде́є на хрⷭ҇та̀, на тѧ̀ па́стырѧ своегѡ̀ рꙋ́цѣ возложи́ша, и҆ ѿ престо́ла ст҃и́тельскагѡ и҆згна́ша, не постыдѣ́вшесѧ свѧты́ни са́на твоегѡ̀, ни сѣди́нъ твои́хъ ста́рческихъ. мы̀ же, безви́нное твоѐ и҆згна́нїе помина́юще, ꙗ҆́кѡ страда́льца и҆́стины тѧ̀ ᲂу҆блажа́емъ и҆ зове́мъ:

Ра́дꙋйсѧ, поношє́нїѧ и҆ клеветы̑ человѣ́чєскїѧ мꙋ́жественнѡ претерпѣ́вый: ра́дꙋйсѧ, бл҃же́нство гони́мыхъ пра́вды ра́ди ᲂу҆наслѣ́дивый.

Ра́дꙋйсѧ, и҆́го скорбе́й терпѣливодꙋ́шнѡ понесы́й: ра́дꙋйсѧ, чистотꙋ̀ безстра́стїѧ сохрани́вый неврежде́ннꙋ.

Ра́дꙋйсѧ, бл҃гоꙋха́нный крі́не непоро́чнагѡ дѣ́вства: ра́дꙋйсѧ, неꙋвѧда́емый цвѣ́те а҆́гг҃льскїѧ чистоты̀.

Ра́дꙋйсѧ, защи́тниче непра́веднѡ ѡ҆клеветꙋ́емыхъ: ра́дꙋйсѧ, гро́зное вразꙋмле́нїе неразꙋ́мнѡ клеве́щꙋщихъ.

Ра́дꙋйсѧ, въ горни́лѣ скорбе́й па́че зла́та ѡ҆чище́нный: ра́дꙋйсѧ, терпе́нїемъ напа́стей і҆́ѡвꙋ многострада́льномꙋ подо́бный.

Ра́дꙋйсѧ, и҆́стинный послѣ́дователю распѧ́тагѡ ᲂу҆чи́телѧ: ра́дꙋйсѧ, крⷭ҇та̀ є҆гѡ̀ мꙋ́жественный и҆ ᲂу҆се́рдный носи́телю.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Ви́дѣвъ сꙋетꙋ̀ мі́ра сегѡ̀, бл҃гоꙋти́шїе пꙋсты́ни и҆ житїѐ безмо́лвное па́че престо́ла ст҃и́тельскагѡ, ѻ҆́ч҃е, возлюби́лъ є҆сѝ: сегѡ̀ ра́ди кꙋ́щꙋ ма́лꙋ себѣ̀ воздви́гъ, посто́мъ и҆ моли́твою въ не́й хрⷭ҇тꙋ̀ бл҃гоꙋгожда́лъ є҆сѝ и҆ ѡ҆би́тель и҆́ноческꙋю созда́лъ є҆сѝ, въ не́йже тебѣ̀ зове́мъ си́це:

Ра́дꙋйсѧ, прпⷣбныхъ ᲂу҆добре́нїе: ра́дꙋйсѧ, по́стникѡвъ похвало̀.

Ра́дꙋйсѧ, безмо́лвїѧ рачи́телю: ра́дꙋйсѧ, мл҃твъ бл҃гоꙋха́нныхъ ѳѷмїа́ме.

Ра́дꙋйсѧ, слє́зы моли́твєнныѧ ѡ҆би́льнѡ и҆сточи́вый: ра́дꙋйсѧ, пла́чемъ вре́меннымъ бл҃же́нство вѣ́чное ᲂу҆лꙋчи́вый.

Ра́дꙋйсѧ, ѡ҆би́тели твоеѧ̀ сла́во и҆ ᲂу҆краше́нїе: ра́дꙋйсѧ, мона́шествꙋющихъ въ не́й ти́хаѧ ѿра́до и҆ ᲂу҆тѣше́нїе.

Ра́дꙋйсѧ, сокро́вище нетлѣ́нное, ѿ моли́твъ на́шихъ некры́ющеесѧ: ра́дꙋйсѧ, кла́дезю млⷭ҇тей гдⷭ҇нихъ, ѿ на́съ не ᲂу҆таи́выйсѧ.

Ра́дꙋйсѧ, свѣти́льниче гдⷭ҇ень, цр҃ковь хрⷭ҇то́вꙋ ѡ҆зарѧ́ѧй: ра́дꙋйсѧ, теплото̀ любвѐ бжⷭ҇твенныѧ, вѣ́рныхъ сердца̀ согрѣва́ющаѧ.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Возсїѧ́лъ є҆сѝ, ꙗ҆́кѡ свѣти́ло бг҃освѣ́тлое, па́ствѣ твое́й сїѧ́нїемъ высо́кихъ добродѣ́телей, ѻ҆́ч҃е і҆а́кѡве, мл҃твенниче ѡ҆ на́съ неꙋсы́пный по до́лгꙋ воспѣва́ющихъ тѧ̀ си́це:

Ра́дꙋйсѧ, вели́кїй ᲂу҆го́дниче бж҃їй, мно́гими дарова̑нїи бл҃года́тными ᲂу҆кра́шенный: ра́дꙋйсѧ, пресла́вными чꙋдесы̀ ѿ бг҃а просла́вленный.

Ра́дꙋйсѧ, свѣ́томъ ст҃ы́ни вы́шнѧгѡ ѡ҆заре́нный: ра́дꙋйсѧ, красото́ю жи́зни нбⷭ҇ныѧ ѡ҆сїѧ́нный.

Ра́дꙋйсѧ, прера́достное вѣ́рныхъ ча́дъ цр҃кве ᲂу҆тѣше́нїе: ра́дꙋйсѧ, тє́мнымъ си́ламъ а҆́дскимъ нестерпи́мое слы́шанїе и҆ видѣ́нїе.

Ра́дꙋйсѧ, бл҃же́нство чи́стыхъ се́рдцемъ ᲂу҆наслѣ́дивый: ра́дꙋйсѧ, лицезрѣ́нїѧ бж҃їѧ при́снѡ наслажда́ѧйсѧ.

Ра́дꙋйсѧ, дꙋ́шꙋ твою̀ во ѡ҆би́тель прест҃ы́ѧ трⷪ҇цы ᲂу҆стро́ивый: ра́дꙋйсѧ, ꙗ҆́кѡ всѣ́мъ житїе́мъ твои́мъ гдⷭ҇а сла́внѡ просла́вилъ є҆сѝ.

Ра́дꙋйсѧ, гра́да росто́ва храни́телю и҆ застꙋ́пниче: ра́дꙋйсѧ, всеѧ̀ рѡссі́йскїѧ страны̀ предста́телю и҆ мл҃твенниче.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Но́вагѡ тѧ̀ нѡ́а нача́льника ковче́га мы́сленнагѡ, сла́ныѧ во́ды мо́рѧ жите́йскагѡ невре́днѡ преше́дшаго, вѣ́рою познава́емъ, ѻ҆́ч҃е на́шъ і҆а́кѡве. помозѝ ᲂу҆́бѡ и҆ на́мъ сп҃се́нїе ᲂу҆лꙋчи́ти и҆ ти́хагѡ приста́нища ѿ жите́йскихъ пла́ванїй дости́гнꙋти, тебѣ̀ зовꙋ́щымъ:

Ра́дꙋйсѧ, кораблеце́мъ си́лы и҆ хране́нїѧ бж҃їѧ є҆стество̀ водно́е немо́креннѡ преше́дый: ра́дꙋйсѧ, ѿ бꙋ́рь жите́йскихъ прибѣ́жище всѣ̑мъ да́рꙋѧй.

Ра́дꙋйсѧ, вертогра́де мы́сленный, плодѡ́въ дх҃а ѡ҆би́льнѡ и҆спо́лненный: ра́дꙋйсѧ, са́де дꙋхо́вный, цвѣ́ты добродѣ́телей при́снѡ бл҃гоꙋха́ѧй.

Ра́дꙋйсѧ, свѣщѐ, въ мл҃твахъ къ бг҃ꙋ за на́съ неꙋгаси́мо горѧ́щаѧ: ра́дꙋйсѧ, мѵ́ро драгоцѣ́нное, цр҃ковь хрⷭ҇то́вꙋ ѡ҆благоꙋха́вшее.

Ра́дꙋйсѧ, ма́слино бл҃гопло́днаѧ, є҆ле́й млⷭ҇рдїѧ бж҃їѧ ѡ҆би́льнѡ и҆сточа́ющаѧ: ра́дꙋйсѧ, и҆сто́чниче неизсѧка́емый чꙋде́съ блгⷣти.

Ра́дꙋйсѧ, скорбѧ́щихъ при́снѡ гото́вый ᲂу҆тѣ́шителю: ра́дꙋйсѧ, болѧ́щихъ безме́здный цѣли́телю.

Ра́дꙋйсѧ, во всѣ́хъ бѣда́хъ на́шихъ и҆ напа́стехъ вѣ́рное прибѣ́жище: ра́дꙋйсѧ, всѣ́хъ ми́лостей бж҃їихъ на́мъ при́сный хода́таю.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Ве́сь ѡ҆сщ҃е́нъ блгⷣтїю дх҃а ст҃а́гѡ бг҃оно́сецъ показа́лсѧ є҆сѝ ст҃и́тельскимъ слꙋже́нїемъ и҆ равноа́гг҃льнымъ житїе́мъ твои́мъ, є҆́же ᲂу҆бл҃жа́юще, воспѣва́емъ тѝ си́це:

Ра́дꙋйсѧ, до́брый а҆́гг҃ле цр҃кве росто́вскїѧ: ра́дꙋйсѧ, на́шъ а҆по́столе, въ трꙋдѣ́хъ и҆ болѣ́знехъ хрⷭ҇та̀ бл҃говѣствова́вый.

Ра́дꙋйсѧ, и҆сповѣ́дниче вѣ́ры, непра́ведное гоне́нїе претерпѣ́вый: ра́дꙋйсѧ, любо́вь бж҃їю на мꙋ́ки себѐ преда́нїемъ запечатлѣ́вый.

Ра́дꙋйсѧ, по́стниче и҆ мл҃твенниче преди́вный: ра́дꙋйсѧ, па́стырю и҆ ᲂу҆чи́телю предо́брый.

Ра́дꙋйсѧ, сле́зный сѣ́ѧтелю ра́дости нбⷭ҇ныѧ: ра́дꙋйсѧ, за́повѣдей хрⷭ҇то́выхъ вѣ́рный и҆сполни́телю.

Ра́дꙋйсѧ, трꙋдолюби́вый дѣ́лателю вїногра́да хрⷭ҇то́ва: ра́дꙋйсѧ, неꙋсы́пный мл҃твенниче ѡ҆ твое́мъ ста́дѣ.

Ра́дꙋйсѧ, бл҃года́тный ᲂу҆крѣпи́телю немоществꙋ́ющихъ: ра́дꙋйсѧ, бл҃гослове́нное ᲂу҆твержде́нїе по́двигомъ до́брымъ подвиза́ющихсѧ.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Вѣті́ѧ цр҃кве рѡссі́йскїѧ, вели́кїй ст҃и́тель дими́трїй, прише́дъ во ѡ҆би́тель твою̀, ѻ҆́ч҃е на́шъ і҆а́кѡве, поко́й сво́й вѣ́чный въ не́й дꙋ́хомъ предрѣчѐ, глаго́лѧ: сѐ поко́й мо́й, здѣ̀ вселю́сѧ во вѣ́къ вѣ́ка. съ тѣ́мъ ᲂу҆́бѡ прⷭ҇то́лꙋ цр҃ѧ̀ сла̑вы предстоѧ̀, моли́сѧ вы́нꙋ ѡ҆ на́съ зовꙋ́щихъ тѝ:

Ра́дꙋйсѧ, ча́ше неистощи́маѧ ми́лостей къ на́мъ гдⷭ҇нихъ: ра́дꙋйсѧ, ᲂу҆миле́нїѧ рѣко̀ бл҃готекꙋ́щаѧ.

Ра́дꙋйсѧ, дрꙋ́же хрⷭ҇то́въ, до конца̀ вѣ́ренъ є҆мꙋ̀ пребы́вый: ра́дꙋйсѧ, сожи́телю ст҃ы́хъ, при́сный бг҃ꙋ.

Ра́дꙋйсѧ, ꙗ҆́кѡ сме́рть твоѧ̀ честна̀ и҆ па́мѧть твоѧ̀ съ похвала́ми: ра́дꙋйсѧ, ꙗ҆́кѡ мзда̀ твоѧ̀ на нб҃сѝ вели́ка и҆ вѣне́цъ тво́й нетлѣ́ненъ.

Ра́дꙋйсѧ, со ст҃и́телемъ дими́трїемъ крѣ́пкїй ѡ҆ на́съ мл҃твенниче: ра́дꙋйсѧ, со всѣ́ми ст҃ы́ми ѡ҆ всѣ́хъ вѣ́рныхъ бг҃олюбе́зный хода́таю.

Ра́дꙋйсѧ, покро́ве и҆ застꙋпле́нїе притека́ющихъ под̾ кро́въ ѡ҆би́тели твоеѧ̀: ра́дꙋйсѧ, по́моще ско́раѧ и҆ ᲂу҆тѣше́нїе всѣ̑мъ призыва́ющымъ тѧ̀.

Ра́дꙋйсѧ, ра́досте страны̀ росто́вскїѧ: ра́дꙋйсѧ, сла́во всеѧ̀ держа́вы рѡссі́йскїѧ.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Стѣ́нꙋ ѡ҆гражде́нїѧ ѡ҆би́тели твое́й и҆сповѣ́дꙋемъ тѧ̀, ст҃и́телю хрⷭ҇то́въ: ю҆́же бо при жи́зни твое́й трꙋдолю́бнѡ ᲂу҆стро́илъ є҆сѝ, сїю̀ и҆ доны́нѣ нерꙋши́мꙋ, сла́внꙋ и҆ бл҃голѣ́пнꙋ храни́ши, и҆ въ не́й, ꙗ҆́кѡ сокро́вище многоцѣ́нно, многоцѣлє́бныѧ мо́щи твоѧ̑ сокры́лъ є҆сѝ на́мъ, восхвалѧ́ющымъ тѧ̀ си́це:

Ра́дꙋйсѧ, бг҃одарова́нный на́шъ застꙋ́пниче: ра́дꙋйсѧ, милосе́рдый дꙋ́шъ и҆ тѣле́съ на́шихъ цѣле́бниче.

Ра́дꙋйсѧ, въ со́нїихъ и҆ видѣ́нїихъ вѣ́рныѧ посѣща́ѧй: ра́дꙋйсѧ, въ бѣда́хъ и҆ ско́рбехъ сꙋ́щымъ ᲂу҆тѣше́нїе низпосыла́ѧй.

Ра́дꙋйсѧ, болѣ́зни неисцѣ́льныѧ ско́ро врачꙋ́ѧй: ра́дꙋйсѧ, въ напа́стехъ и҆ гоне́нїихъ стра́ждꙋщыѧ застꙋпа́ѧй.

Ра́дꙋйсѧ, бога́тство ᲂу҆тѣше́нїѧ, тꙋ́не всѣ̑мъ подае́мое: ра́дꙋйсѧ, сокро́вищнице бла̑гъ вѣ́чныхъ, всѣ̑мъ ѿве́рстаѧ.

Ра́дꙋйсѧ, ѡ҆би́тели твоеѧ̀ покро́ве и҆ ѡ҆гражде́нїе: ра́дꙋйсѧ, и҆́ночествꙋющихъ въ не́й бл҃госкорбѧ́щихъ ра́дованїе.

Ра́дꙋйсѧ, и҆зба́вителю на́шъ ѿ всѧ́кїѧ нꙋ́жды и҆ печа́ли: ра́дꙋйсѧ, храни́телю на́шъ ѿ всѧ́кагѡ ѡ҆ѕлобле́нїѧ вра́жїѧ.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Свѣтонѡ́сныѧ лꙋчѝ бжⷭ҇твенныхъ ми́лостей сокрове́ннѡ на́мъ и҆злива́еши, ст҃и́телю бж҃їй, сегѡ̀ ра́ди просла́висѧ и҆́мѧ твоѐ во все́й странѣ̀ на́шей правосла́внѣй, ꙗ҆́кѡ чꙋдотво́рца пресла́вна и҆ предста́телѧ многомо́щна ко гдⷭ҇ꙋ тѧ̀ почита́ющей: тѣ́мже и҆ мы̀, застꙋпле́нїѧ твоегѡ̀ просѧ́ще, вопїе́мъ тѝ и҆з̾ глꙋбины̀ серде́чныѧ:

Ра́дꙋйсѧ, а҆́гг҃ле земны́й и҆ человѣ́че нбⷭ҇ный: ра́дꙋйсѧ, го́рнѧгѡ і҆ерⷭ҇ли́ма жи́телю всебл҃же́нный.

Ра́дꙋйсѧ, соприча́стниче ра́дости гдⷭ҇а твоегѡ̀: ра́дꙋйсѧ, созерца́телю непристꙋ́пныѧ сла́вы трїѷпоста́снагѡ бжⷭ҇тва̀.

Ра́дꙋйсѧ, сла́вою нетлѣ́нною ᲂу҆кра́шенный на землѝ: ра́дꙋйсѧ, вѣнце́мъ безсме́ртїѧ ᲂу҆вѣнча́нный на нб҃сѝ.

Ра́дꙋйсѧ, вожделѣ́нное ѻ҆те́чество нбⷭ҇ное ᲂу҆наслѣ́дивый: ра́дꙋйсѧ, и҆ земно́е ѻ҆те́чество твоѐ въ мл҃твахъ не забыва́ѧй.

Ра́дꙋйсѧ, ѿ земны́хъ къ нбⷭ҇нымъ дꙋ́хъ на́шъ возвыша́ѧй: ра́дꙋйсѧ, къ сокро́вищꙋ на́шемꙋ, сладча́йшемꙋ і҆и҃сꙋ, сердца̀ на́ша ѡ҆браща́ѧй.

Ра́дꙋйсѧ, зарѐ бж҃їѧ свѣ́та: ра́дꙋйсѧ, ти́хое сїѧ́нїе бж҃їей блгⷣти.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.

Пою́ще по́двиги твоѧ̑ и҆ чꙋдеса̀, ст҃и́телю достобл҃же́нне, честно́е ᲂу҆спе́нїе твоѐ сла́вимъ, и҆ ꙗ҆́кѡ па́стырѧ и҆ застꙋ́пника на́шего велича́емъ тѧ̀ зва̑нїи си́ми:

Ра́дꙋйсѧ, прест҃ы́ѧ трⷪ҇цы вѣ́рный покло́нниче: ра́дꙋйсѧ, прест҃ы́ѧ бцⷣы и҆́стинный и҆збра́нниче.

Ра́дꙋйсѧ, а҆рха́гг҃лѡвъ и҆ а҆́гг҃лѡвъ собесѣ́дниче: ра́дꙋйсѧ, предте́чи гдⷭ҇нѧ и҆ всѣ́хъ ст҃ы́хъ бл҃же́нный сожи́телю.

Ра́дꙋйсѧ, цр҃кве нбⷭ҇ныѧ и҆ земны́ѧ ᲂу҆краше́нїе: ра́дꙋйсѧ, ѡ҆ па́ствѣ твое́й земнѣ́й мл҃твенниче неꙋсы́пный.

Ра́дꙋйсѧ, ꙗ҆́кѡ при́снѡ со хрⷭ҇то́мъ ца́рствꙋеши: ра́дꙋйсѧ, ꙗ҆́кѡ непрестаю́щїѧ ра́дости є҆гѡ̀ сподо́билсѧ є҆сѝ.

Ра́дꙋйсѧ, ᲂу҆го́дниче бж҃їй премилосе́рдый: ра́дꙋйсѧ, па́стырю на́шъ прекро́ткїй.

Ра́дꙋйсѧ, првⷣныхъ весе́лїе: ра́дꙋйсѧ, грѣ́шныхъ ᲂу҆пова́нїе.

Ра́дꙋйсѧ, ст҃и́телю і҆а́кѡве, пресла́вный чꙋдотво́рче.