Акафист святому благоверному князю Всеволоду во Святом Крещении Гавриилу, Псковскому чудотворцу

А́нгела нра́вом, а́ще и челове́ка естество́м, ве́мы тя́, святы́й благове́рный кня́же Все́володе Гаврии́ле; кро́тостию бо и ми́лостию преиспо́лнен бы́л еси́, блаже́нне, и соу́з соверше́нства духо́внаго, любо́вь боже́ственную, стяжа́л еси́ от ю́ности твоея́, я́ко бы́ти тебе́ вои́стину уго́дником Бо́жиим, досто́йным похва́л таковы́х:

Ра́дуйся, от ко́рене свята́го произра́стший; ра́дуйся, вели́каго и равноапо́стольнаго кня́зя Влади́мира пра́внуче благослове́нный.

Ра́дуйся, благове́рных роди́телей сы́не; ра́дуйся, кня́жескаго ро́да прозябе́ние честно́е.

Ра́дуйся, роди́теля твоего́, кня́зя Мстисла́ва, доброде́тели унасле́дивый; ра́дуйся, благоче́стию его́ и хра́брости подража́вый.

Ра́дуйся, от млады́х ле́т стра́ху Бо́жию науче́нный; ра́дуйся, от ю́ности твоея́ чте́ние сло́ва Бо́жия возлюби́вый.

Ра́дуйся, моли́твами и ми́лостынями Бо́гу угожда́вый; ра́дуйся, целому́дрием и воздержа́нием себе́ украша́вый.

Ра́дуйся, пра́ведниче Бо́жий, Его́же пра́вда сия́ет непомерка́емо во ве́ки; ра́дуйся, уго́дниче Христо́в, просла́вленный на небеси́ и на земли́.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Разу́мно бы́сть все́м лю́дем Новгоро́дским благоче́стие твое́ христиа́нское, святы́й благове́рный кня́же Все́володе Гаврии́ле, егда́ оби́тель во и́мя свята́го великому́ченика и победоно́сца Гео́ргиа бли́з Нова́града сооруди́л еси́ и собо́рный хра́м из ка́мене в не́й созда́л еси́, и́же доны́не свиде́тельствует на́м о твое́м благоче́стии, о не́мже тя́ ублажа́ем и зове́м:

Ра́дуйся, власти́телю ми́лостивый и кро́ткий; ра́дуйся, вла́сть земну́ю пра́ведно и благоче́стно содержа́вый.

Ра́дуйся, ни́щих и убо́гих препита́вый; ра́дуйся, вдови́цам и сирота́м защи́тник бы́вый.

Ра́дуйся, боля́щих и стра́нников в до́ме твое́м упокоева́вый; ра́дуйся, я́звы и стру́пы прокаже́нных рука́ма твои́ма врачева́вый.

Ра́дуйся, и́ноков люби́телю и покрови́телю; ра́дуйся, свяще́нников усе́рдный почита́телю.

Ра́дуйся, хра́мы Бо́жия от име́ний твои́х благоукраша́вый; ра́дуйся, оби́тели и́ноческия созида́вый.

Ра́дуйся, Бо́гу и бли́жним твои́м ре́вностно служи́вый.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Име́я стра́х Бо́жий в се́рдцы твое́м, святы́й благове́рный кня́же Все́володе Гаврии́ле, послуша́ние яви́л еси́ старе́йшему вели́кому кня́зю Яропо́лку и по во́ли его́ от вели́каго Нова́града в Переясла́вль княжи́ти преше́л еси́, но по во́ли Бо́жией в ма́ле вре́мени па́ки в вели́кий Новогра́д возврати́лся еси́ княжи́ти, и, име́я посо́бника себе́ святи́теля Христо́ва Ни́фонта, собо́рный хра́м вели́каго святи́теля и чудотво́рца Никола́я та́мо сооруди́л еси́, и хра́мы Богома́тере и Предте́чи созда́л еси́, си́м показу́яй ве́лию любо́вь твою́ к Бо́гу и святы́м Его́ и подвиза́яй на́с хвале́бно взыва́ти к тебе́:

Ра́дуйся, о́браз послуша́ния на́м в себе́, яви́вый; ра́дуйся, во́ли старе́йшаго вели́каго кня́зя во́лю твою́ покори́вый.

Ра́дуйся, пресе́льник в земли́ твое́й бы́вый; ра́дуйся, го́рняго гра́да вы́ну усе́рдно взыска́вый.

Ра́дуйся, му́дрый стра́нниче, на пу́ть спасе́ния стопы́ твоя́ напра́вивый; ра́дуйся, Бо́жий избра́нниче, ско́рби мно́ги претерпе́вый.

Ра́дуйся, кро́тко и ми́рно в вели́кий Новогра́д княжи́ти возврати́выйся; ра́дуйся, богоуго́дно и пра́ведно та́мо княжи́вый.

Ра́дуйся, блаже́нный храмозда́телю; ра́дуйся, благоле́пия церко́внаго люби́телю.

Ра́дуйся, святы́х Бо́жиих усе́рдный чти́телю; ра́дуйся, небе́сныя и́х сла́вы сонасле́дниче.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Слы́шавше о премно́гих ско́рбех и безче́стиях претерпе́нных тобо́ю, святы́й благове́рный кня́же Все́володе Гаврии́ле, от бу́иих и своево́льных люди́й тебе́ подвла́стных, диви́мся кро́тости и терпе́нию твоему́ и, я́ко ве́рнаго подража́теля Христо́ва и му́чеником ра́вна, ублажа́ем тя́ с любо́вию пе́сньми хвале́бными таковы́ми:

Ра́дуйся, кро́тости пра́вило, за изгоня́вшия тя́ моли́выйся я́ко за благотво́рцев; ра́дуйся, терпе́ния сто́лпе, безче́стие претерпе́вый от люди́й твои́х.

Ра́дуйся, у́зы и темни́цу восприя́вый безро́потно; ра́дуйся, во изгна́нии твое́м непра́веднем вы́ну сла́вивый Бо́га.

Ра́дуйся, вре́менными скорбьми́ дости́гий блаже́нства ве́чнаго; ра́дуйся, возше́дый на высоту́ соверше́нства духо́внаго.

Ра́дуйся, блаже́нство изгна́нных пра́вды ра́ди досто́йно получи́вый; ра́дуйся, в пу́ть изгна́ния кро́тко и незло́биво изше́дый.

Ра́дуйся, от вели́каго кня́зя с любо́вию восприя́тый; ра́дуйся, в Вы́шгороде уде́л от него́ получи́вый.

Ра́дуйся, звездо́ пресве́тлая, от Нова́града в Ки́ев прише́дшая; ра́дуйся, всю́ страну́ Росси́йскую до́блестию терпе́ния твоего́ удиви́вый.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Ви́девше твое́ незло́бие и кро́тость лю́дие Пско́встии, святы́й благове́рный кня́же Все́володе Гаврии́ле, прия́ша тя́ с любо́вию, от Вели́каго Нова́града к ни́м прише́дшаго, и княжи́ти над ни́ми тя́ устро́иша, напа́вших же на ни́х за тя́ бра́нию отрази́ша и победи́ша; ты́ же благодея́нии вели́кими и́м за сие́ возда́л еси́ и бы́л еси́ и́стинный благоде́тель люде́й твои́х, и́же и взыва́ху к тебе́:

Ра́дуйся, о́ко слепы́х, нога́ хромы́х и рука́ безпомо́щных бы́вый; ра́дуйся, вся́кому стра́ждущему любо́вию твое́ю сострада́вый.

Ра́дуйся, Правосла́вие во гра́де твое́м ре́вностно охраня́вый; ра́дуйся, злоухищре́ния лати́нская от него́ отража́вый.

Ра́дуйся, ме́чь тво́й на защи́ту Пско́ва му́жественно воздви́гнувый; ра́дуйся, о́ным ми́р и тишину́ в земли́ Пско́встей водвори́вый.

Ра́дуйся, милосе́рдия сокро́вище все́м ни́щым и убо́гим бы́вый; ра́дуйся, скорбя́щия и стра́ждущия утеша́вый.

Ра́дуйся, с пла́кавшими пла́кавый; ра́дуйся, в темни́це заключе́нныя посеща́вый.

Ра́дуйся, пи́щу и оде́жду все́м тре́бующим подава́вый; ра́дуйся, посто́м и моли́твою Бо́гу благоугожда́вый.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Возсия́в, я́ко со́лнце пресве́тлое, доброде́тельным житие́м твои́м во гра́де Пско́ве, святы́й благове́рный кня́же Все́володе Гаврии́ле, по ле́те еди́нем жи́тельства твоего́ в не́м к за́паду сме́ртному прибли́жился еси́, и причасти́вся святы́х Христо́вых Та́ин, ми́рно и безмяте́жно пре́дал еси́ святу́ю ду́шу твою́ в ру́це Бо́жии. Мы́ же, чту́ще тя́, а́ки надгро́бную пе́снь, с любо́вию и усе́рдием си́це тебе́ пое́м:

Ра́дуйся, вели́кий уго́дниче Бо́жий, жи́знь земну́ю свя́то и пра́ведно сконча́вый; ра́дуйся, преше́дый от скорбе́й мно́гих на поко́й ве́чный.

Ра́дуйся, восприя́тый со сла́вою во оби́тель святы́х; ра́дуйся, увенча́нный от Христа́ венце́м нетле́нныя сла́вы.

Ра́дуйся, мно́г пла́чь кончи́ною твое́ю причини́вый лю́дем пско́вским; ра́дуйся, ме́ч тво́й и́м завеща́вый в защи́ту и огражде́ние духо́вное.

Ра́дуйся, пресели́выйся к Бо́гу душе́ю твое́ю свято́ю; ра́дуйся, прия́вый от Него́ благода́ть моли́тися за гра́д тво́й и лю́ди.

Ра́дуйся, Пско́ва сла́во и похвало́; ра́дуйся, всея́ Це́ркви Христо́вы ра́дование и утеше́ние.

Ра́дуйся, чудесы́ ди́вными в погребе́нии твое́м возсия́вый; ра́дуйся, благоуха́ние сла́достное от моще́й твои́х испусти́вый.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Блаже́нство неизглаго́ланно унасле́довал еси́, уго́дниче Бо́жий, разреши́вся от у́з пло́ти и воспари́в душе́ю твое́ю во о́ный гра́д прекра́сный, Иерусали́м Небе́сный, иде́же вси́ святи́и упокоева́ются; на земли́ же те́ло твое́ свято́е, во хра́ме свята́го великому́ченика Дими́трия во гра́де Пско́ве, че́стно погребе́ся от всего́ освяще́ннаго собо́ра, и ме́ч тво́й над гро́бом твои́м пове́шен бы́сть по твоему́ заве́ту, его́же па́мятующе, со умиле́нием вопие́м ти́ си́це:

Ра́дуйся, засту́пниче усе́рдный гра́да Пско́ва и всея́ Росси́йския страны́; ра́дуйся, и по сме́рти заступле́нием твои́м святы́м на́с не оставля́яй.

Ра́дуйся, пресла́вно чудоде́йствуяй от моще́й твои́х честны́х; ра́дуйся, мече́м твои́м огражда́яй на́с от враго́в ви́димых и неви́димых.

Ра́дуйся, во дни́ бра́ней благонаде́жный гра́ду твоему́ защи́тниче; ра́дуйся, во дни́ ми́ра все́м неду́жным благода́тный целе́бниче.

Ра́дуйся, бли́жним и да́льним благодея́ния твоя́ подава́яй; ра́дуйся, в со́ниих и виде́ниих ве́рныя посеща́яй.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Ве́сь стра́ха и у́жаса испо́лнися му́ж благочести́вый, ему́же в виде́нии во све́те небе́снем предста́л еси́, благове́рный кня́же, и ре́кл ему́: «Иди́ ко освяще́нному собо́ру, кня́зю и поса́дником гра́да и рцы́ и́м, да принесу́т мо́щи моя́ от хра́ма свята́го Дими́трия в собо́рный хра́м Святы́я Тро́ицы, та́мо бо хощу́ возлещи́». Егда́ же вопроси́ о́н честна́го твоего́ и́мене, ты́ сие́ ему́ откры́л еси́ и возвести́л еси́, я́ко гра́д Пско́в пре́дан е́сть тебе́ от Го́спода во хране́ние до сконча́ния ве́ка, и я́ко и́маши его́ сохраня́ти от язы́чник и лати́н. Таково́му све́тлому явле́нию твоему́ дивя́щеся и о заступле́нии твое́м ра́дующеся, сия́ ра́достныя возглаша́ем ти́ похвалы́:

Ра́дуйся, свя́тче Бо́жий, со святы́ми почива́яй; ра́дуйся, о на́с гре́шных Бо́га вы́ну умоля́яй.

Ра́дуйся, гра́да Пско́ва храни́телю неотсту́пный; ра́дуйся, ди́вный вои́телю посме́ртный.

Ра́дуйся, во́лю твою́ в виде́нии лю́дем пско́вским объяви́вый; ра́дуйся, в собо́рнем хра́ме Святы́я Тро́ицы святы́ми моща́ми твои́ми почива́ти восхоте́вый.

Ра́дуйся, све́том небе́сным озаре́нный; ра́дуйся, благода́ти боже́ственныя преиспо́лненный.

Ра́дуйся, ди́вным явле́нием твои́м лю́ди пско́вския духо́вно уте́шивый; ра́дуйся, благи́м обетова́нием твои́м и́х зело́ возвесели́вый.

Ра́дуйся, ра́достный на́м ве́стниче Христо́ва всемогу́щества и си́лы; ра́дуйся, благомо́щный предста́телю за лю́ди твоя́ и гра́д, Бо́гом тебе́ вруче́нный.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Вити́йство челове́ческое не довле́ет к досто́йней похвале́ святы́х, Бо́гом просла́вленных на небеси́ и на земли́; недоуме́ем и мы́ смире́ннии досто́йно просла́вити тя́, святы́й на́ш предста́телю, благове́рный кня́же Все́володе Гаврии́ле, ди́вно просла́вленный на небеси́ сла́вою ве́чною и на земли́ чудотво́рным нетле́нием святы́х моще́й твои́х и мно́гими от ни́х зна́меньми и исцеле́ньми. Оба́че ты́, я́ко благи́й и ми́лостивый, не возгнуша́йся гласо́в на́ших хвале́бных, и́миже от любве́ серде́чныя дерза́ем благохвали́ти тя́ си́це:

Ра́дуйся, в пренесе́нии святы́х моще́й твои́х чудесы́ вели́кими просия́вый; ра́дуйся, мироточе́ния благода́ть от Го́спода получи́вый.

Ра́дуйся, цве́те нетле́ния, облагоуха́вый святу́ю Всеросси́йскую Це́рковь; ра́дуйся, сме́рть вкуси́вый, тле́ния же не позна́вый.

Ра́дуйся, по ле́тех мно́зех це́л и неруши́м в соста́вех твои́х обре́тенный; ра́дуйся, нетле́нен и благоуха́нен во гро́бе возлежа́вый.

Ра́дуйся, ми́ро благоуха́нное и целе́бное от моще́й твои́х святы́х источи́вый; ра́дуйся, ка́плями ми́ра того́ исцеле́ния мно́гим неду́жным дарова́вый.

Ра́дуйся, в собо́рнем хра́ме Святы́я Тро́ицы те́лом че́стне положе́нный; ра́дуйся, сосу́де, Бо́жия благода́ти по́лный и преизлива́ющийся.

Ра́дуйся, от исполне́ния твоего́ и на́м да́руяй благода́тныя да́ры; ра́дуйся, ми́лостивно исцеля́яй души́ на́ша и телеса́.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Стена́ защище́ния гра́ду Пско́ву бы́л еси́, святы́й благове́рный кня́же Все́володе Гаврии́ле, во дни́ ра́тных нападе́ний на него́ иноплеме́нных и инове́рных враго́в, и Пресвяте́й Влады́чице Богоро́дице в виде́нии предстоя́л еси́ с про́чими святы́ми, умоля́я Ю́ о спасе́нии гра́да от ра́тнаго разоре́ния, я́ко предста́тель и защи́титель его́ неотсту́пный. Сего́ ра́ди благода́рственно тя́ сла́вим и вопие́м ти́ си́це:

Ра́дуйся, взбра́нный воево́до, во́инство правосла́вное воодушеви́вый к побе́дам; ра́дуйся, ра́тей инове́рных низложе́ние.

Ра́дуйся, победоно́сный защи́тителю гра́да Пско́ва от вою́ющих на́нь язы́ков; ра́дуйся, пле́нных и озлобля́емых люди́й твои́х отра́до и утеше́ние.

Ра́дуйся, кре́пкое и́х упова́ние; ра́дуйся, моща́ми твои́ми святы́ми во дни́ си́льныя бра́ни со врага́ми на сте́ны гра́да прише́дый.

Ра́дуйся, нападе́ние и́х неви́димо отрази́вый; ра́дуйся, покрови́телю, Бо́гом да́нный гра́ду Пско́ву и все́й его́ о́бласти.

Ра́дуйся, щи́те, защища́яй и́х от вся́каго зла́.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Све́том трисо́лнечным горе́ озаре́нный, благове́рный и святы́й кня́же Все́володе Гаврии́ле, озари́ на́ша мра́чныя души́ сия́нием Бо́жия благода́ти и наста́ви ны́ ве́рно исполня́ти за́поведи Христа́ Бо́га: ве́мы бо, я́ко мно́го мо́жет моли́тва твоя́ пред бла́гостию Его́, я́ко ве́рнаго Его́ раба́ и уго́дника. Сего́ ра́ди со упова́нием благи́м моли́твенно к тебе́ притека́ем и взыва́ем си́це:

Ра́дуйся, великоимени́тый и многосла́вный Всеросси́йский на́ш засту́пниче; ра́дуйся, ски́птра ца́рскаго кре́пкое огражде́ние.

Ра́дуйся, князе́й удобре́ние; ра́дуйся, Це́ркви Святы́я свети́льниче пресве́тлый.

Ра́дуйся, со́ль земли́ Росси́йския, я́же николи́же обуя́ет; ра́дуйся, сто́лпе Правосла́вия непоколеби́мый.

Ра́дуйся, ма́слино благопло́дная, еле́ем ми́лости Бо́жия умаща́ющая ве́рныя души́; ра́дуйся, наде́жный хода́таю на́м ми́лости Госпо́дни.

Ра́дуйся, неусы́пный моли́твенниче на́ш ко Пресвяте́й Тро́ице.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

Пою́ще мно́гая твоя́ чудотворе́ния, уго́дниче Бо́жий, благове́рный святы́й кня́же Все́володе Гаврии́ле, моли́твенно соверша́ем святу́ю па́мять твою́, я́ко торжество́ ве́ры на́шея правосла́вныя, в не́йже еди́ней процвета́ют толи́цеи чудотво́рцы, си́льнии пред Бо́гом предста́тельством свои́м и благоде́ющия бе́дствующим и боля́щим челове́ком свы́ше да́нною и́м благода́тию, ю́же в тебе́ до́бре ве́дуще, свя́тче Бо́жий, от благода́рных усте́н си́це зове́м:

Ра́дуйся, благоволе́нием Пресвяты́я Тро́ицы осене́нный; ра́дуйся, все́х святы́х сожи́телю.

Ра́дуйся, ра́йских селе́ний обита́телю; ра́дуйся, прия́вый бла́га нетле́нная и ве́чная.

Ра́дуйся, те́хже бла́г и на́м всежела́тельный хода́таю; ра́дуйся, душе́внаго и теле́снаго здра́вия усе́рдный на́м у Го́спода проси́телю.

Ра́дуйся, смире́нная проше́ния на́ша во бла́го исполня́яй; ра́дуйся, ско́рую по́мощь и заступле́ние твое́ на́м явля́яй.

Ра́дуйся, от вра́г ви́димых и неви́димых о Бо́зе кре́пкий на́ш защи́тниче.

Ра́дуйся, святы́й благове́рный кня́же Все́володе Гаврии́ле, те́плый о на́с моли́твенниче.

А҆́гг҃ла нра́вомъ, а҆́ще и҆ человѣ́ка є҆стество́мъ, вѣ́мы тѧ̀, ст҃ы́й бл҃говѣ́рный кнѧ́же все́володе гаврїи́ле: кро́тостїю бо и҆ ми́лостїю преиспо́лненъ бы́лъ є҆сѝ, бл҃же́нне, и҆ соꙋ́зъ совершє́нства дꙋхо́внагѡ, любо́вь бжⷭ҇твеннꙋю, стѧжа́лъ є҆сѝ ѿ ю҆́ности твоеѧ̀, ꙗ҆́кѡ бы́ти тебѣ̀ вои́стиннꙋ ᲂу҆го́дникомъ бж҃їимъ, досто́йнымъ похва́лъ таковы́хъ:

Ра́дꙋйсѧ, ѿ ко́рене ст҃а́гѡ произра́стшїй: ра́дꙋйсѧ, вели́кагѡ и҆ равноапⷭ҇льнагѡ кнѧ́зѧ влади́мїра пра́внꙋче бл҃гослове́нный.

Ра́дꙋйсѧ, бл҃говѣ́рныхъ роди́телей сы́не: ра́дꙋйсѧ кнѧ́жескагѡ ро́да прозѧбе́нїе честно́е.

Ра́дꙋйсѧ, роди́телѧ твоегѡ̀, кнѧ́зѧ мстисла́ва, добродѣ́тєли ᲂу҆наслѣ́дивый: ра́дꙋйсѧ, бл҃гоче́стїю є҆гѡ̀ и҆ хра́брости подража́вый.

Ра́дꙋйсѧ, ѿ млады́хъ лѣ́тъ стра́хꙋ бж҃їю наꙋче́нный: ра́дꙋйсѧ, ѿ ю҆́ности твоеѧ̀ чте́нїе сло́ва бж҃їѧ возлюби́вый.

Ра́дꙋйсѧ, моли́твами и҆ ми́лостынѧми бг҃ꙋ ᲂу҆гожда́вый: ра́дꙋйсѧ, цѣломꙋ́дрїемъ и҆ воздержа́нїемъ себѐ ᲂу҆краша́вый.

Ра́дꙋйсѧ, пра́ведниче бж҃їй, є҆гѡ́же пра́вда сїѧ́етъ непомерка́емѡ во вѣ́ки: ра́дꙋйсѧ, ᲂу҆го́дниче хрⷭ҇то́въ, просла́вленный на нб҃сѝ и҆ на землѝ.

Ра́дꙋйсѧ, ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Разꙋ́мнѡ бы́сть всѣ̑мъ лю́демъ новгоро́дскимъ бл҃гоче́стїе твоѐ хрⷭ҇тїа́нское, ст҃ы́й бл҃говѣ́рный кнѧ́же все́володе гаврїи́ле, є҆гда̀ ѡ҆би́тель во и҆́мѧ ст҃а́гѡ великомч҃ника и҆ побѣдоно́сца геѡ́ргїа бли́зъ нова́града соѡрꙋди́лъ є҆сѝ и҆ собо́рный хра́мъ и҆з̾ ка́мене въ не́й созда́лъ є҆сѝ, и҆́же доны́нѣ свидѣ́тельствꙋетъ на́мъ ѡ҆ твое́мъ бл҃гоче́стїи, ѡ҆ не́мже тѧ̀ ᲂу҆блажа́емъ и҆ зове́мъ:

Ра́дꙋйсѧ, власти́телю ми́лостивый и҆ кро́ткїй: ра́дꙋйсѧ, вла́сть земнꙋ́ю пра́веднѡ и҆ бл҃гоче́стнѡ содержа́вый.

Ра́дꙋйсѧ, ни́щихъ и҆ ᲂу҆бо́гихъ препита́вый: ра́дꙋйсѧ, вдови́цамъ и҆ сирота́мъ защи́тникъ бы́вый.

Ра́дꙋйсѧ, болѧ́щихъ и҆ стра́нникѡвъ въ до́мѣ твое́мъ ᲂу҆покоева́вый: ра́дꙋйсѧ, ꙗ҆́звы и҆ стрꙋ́пы, прокаже́нныхъ рꙋка́ма твои́ма врачева́вый.

Ра́дꙋйсѧ, и҆́нокѡвъ люби́телю и҆ покрови́телю: ра́дꙋйсѧ, сщ҃е́нникѡвъ ᲂу҆се́рдный почита́телю.

Ра́дꙋйсѧ, хра́мы бж҃їѧ ѿ и҆мѣ́нїй твои́хъ бл҃гоꙋкраша́вый: ра́дꙋйсѧ ѡ҆би́тєли и҆́ноческїѧ созида́вый.

Ра́дꙋйсѧ, бг҃ꙋ и҆ бли̑жнимъ твои̑мъ ре́вностнѡ слꙋжи́вый.

Ра́дꙋйсѧ, ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

И҆мѣ́ѧ стра́хъ бж҃їй въ се́рдцы твое́мъ, ст҃ы́й бл҃говѣ́рный кнѧ́же все́володе гаврїи́ле, послꙋша́нїе ꙗ҆ви́лъ є҆сѝ старѣ́йшемꙋ вели́комꙋ кнѧ́зю ꙗ҆ропо́лкꙋ, и҆ по во́ли є҆гѡ̀ ѿ вели́кагѡ нова́града въ переѧсла́вль кнѧжи́ти преше́лъ є҆сѝ, но по во́ли бж҃їей въ ма́лѣ вре́мени па́ки въ вели́кїй новогра́дъ возврати́лсѧ є҆сѝ кнѧжи́ти и҆ и҆мѣ́ѧ посо́бника себѣ̀ ст҃и́телѧ хрⷭ҇то́ва ні́фѡнта, собо́рный хра́мъ вели́кагѡ ст҃и́телѧ и҆ чꙋдотво́рца нїкола́ѧ та́мѡ соѡрꙋди́лъ є҆сѝ, и҆ хра́мы бг҃омт҃ре и҆ прⷣте́чи созда́лъ є҆сѝ, си́мъ показꙋ́ѧй ве́лїю любо́вь твою̀ къ бг҃ꙋ и҆ ст҃ы̑мъ є҆гѡ̀ и҆ подвиза́ѧй на́съ хвале́бнѡ взыва́ти къ тебѣ̀:

Ра́дꙋйсѧ, ѻ҆́бразъ послꙋша́нїѧ на́мъ въ себѣ̀, ꙗ҆ви́вый: ра́дꙋйсѧ, во́ли старѣ́йшагѡ вели́кагѡ кнѧ́зѧ во́лю твою̀ покори́вый.

Ра́дꙋйсѧ, пресе́льникъ въ землѝ твое́й бы́вый: ра́дꙋйсѧ, го́рнѧгѡ гра́да вы́нꙋ ᲂу҆се́рднѡ взыска́вый.

Ра́дꙋйсѧ, мꙋ́дрый стра́нниче, на пꙋ́ть сп҃се́нїѧ стѡпы̀ твоѧ̑ напра́вивый: ра́дꙋйсѧ, бж҃їй и҆збра́нниче, ско́рби мнѡ́ги претерпѣ́вый.

Ра́дꙋйсѧ, кро́ткѡ и҆ ми́рнѡ въ вели́кїй новогра́дъ кнѧжи́ти возврати́выйсѧ: ра́дꙋйсѧ, бг҃оꙋго́днѡ и҆ пра́веднѡ та́мѡ кнѧжи́вый.

Ра́дꙋйсѧ, бл҃же́нный храмозда́телю: ра́дꙋйсѧ, бл҃голѣ́пїѧ цр҃ко́внагѡ люби́телю.

Ра́дꙋйсѧ, ст҃ы́хъ бж҃їихъ ᲂу҆се́рдный чти́телю: ра́дꙋйсѧ, нбⷭ҇ныѧ и҆́хъ сла́вы сонаслѣ́дниче.

Ра́дꙋйсѧ, ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Слы́шавше ѡ҆ премно́гихъ ско́рбехъ и҆ безче́стїѧхъ, претерпѣ́нныхъ тобо́ю ст҃ы́й бл҃говѣ́рный кнѧ́же все́володе гаврїи́ле, ѿ бꙋ́їихъ и҆ своево́льныхъ люді́й тебѣ̀ подвла́стныхъ, диви́мсѧ кро́тости и҆ терпѣ́нїю твоемꙋ̀, и҆ ꙗ҆́кѡ вѣ́рнаго подража́телѧ хрⷭ҇то́ва и҆ мч҃никѡмъ ра́вна, ᲂу҆блажа́емъ тѧ̀ съ любо́вїю пѣ́сньми хвале́бными таковы́ми:

Ра́дꙋйсѧ, кро́тости пра́вило, за и҆згонѧ́вшыѧ тѧ̀ моли́выйсѧ, ꙗ҆́кѡ за бл҃готво́рцєвъ: ра́дꙋйсѧ, терпѣ́нїѧ сто́лпе, безче́стїе претерпѣ́вый ѿ люді́й твои́хъ.

Ра́дꙋйсѧ, ᲂу҆́зы и҆ темни́цꙋ воспрїѧ́вый безро́потнѡ: ра́дꙋйсѧ во и҆згна́нїи твое́мъ непра́веднѣмъ вы́нꙋ сла́вивый бг҃а.

Ра́дꙋйсѧ, вре́менными скорбьмѝ дости́гїй бл҃же́нства вѣ́чнагѡ: ра́дꙋйсѧ, возше́дый на высотꙋ̀ соверше́нства дꙋхо́внагѡ.

Ра́дꙋйсѧ бл҃же́нство и҆згна́нныхъ пра́вды ра́ди досто́йнѡ полꙋчи́вый: ра́дꙋйсѧ, въ пꙋ́ть и҆згна́нїѧ кро́ткѡ и҆ неѕло́бивѡ и҆зше́дый.

Ра́дꙋйсѧ, ѿ вели́кагѡ кнѧ́зѧ съ любо́вїю воспрїѧ́тый: ра́дꙋйсѧ, въ вы́шгородѣ ᲂу҆дѣ́лъ ѿ негѡ̀ полꙋчи́вый.

Ра́дꙋйсѧ, ѕвѣздо̀ пресвѣ́тлаѧ, ѿ нова́града въ кі́евъ прише́дшаѧ: ра́дꙋйсѧ, всю̀ странꙋ̀ рѡссі́йскꙋю до́блестїю терпѣ́нїѧ твоегѡ̀ ᲂу҆диви́вый.

Ра́дꙋйсѧ, ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Ви́дѣвше твоѐ неѕло́бїе и҆ кро́тость лю́дїе пско́встїи, ст҃ы́й бл҃говѣ́рный кнѧ́же все́володе гаврїи́ле, прїѧ́ша тѧ̀ съ любо́вїю, ѿ вели́кагѡ нова́града къ ни́мъ прише́дшагѡ, и҆ кнѧжи́ти над̾ ни́ми тѧ̀ ᲂу҆стро́иша, напа́вшихъ же на ни́хъ за тѧ̀ бра́нїю ѿрази́ша и҆ побѣди́ша: ты́ же бл҃годѣѧ̑нїи вели́кими и҆̀мъ за сїѐ возда́лъ є҆сѝ, и҆ бы́лъ є҆сѝ и҆́стинный бл҃годѣ́тель люде́й твои́хъ, и҆́же и҆ взыва́хꙋ къ тебѣ̀:

Ра́дꙋйсѧ, ѻ҆́ко слѣпы́хъ, нога̀ хромы́хъ и҆ рꙋка̀ безпомо́щныхъ бы́вый: ра́дꙋйсѧ, всѧ́комꙋ стра́ждꙋщемꙋ любо́вїю твое́ю сострада́вый.

Ра́дꙋйсѧ, правосла́вїе во гра́дѣ твое́мъ ре́вностнѡ ѡ҆хранѧ́вый: ра́дꙋйсѧ, ѕлоꙋхищрє́нїѧ латі̑нскаѧ ѿ негѡ̀ ѿража́вый.

Ра́дꙋйсѧ, ме́чь тво́й на защи́тꙋ пско́ва мꙋ́жественнѡ воздви́гнꙋвый: ра́дꙋйсѧ, ѻ҆́нымъ ми́ръ и҆ тишинꙋ̀ въ землѝ пско́встѣй, водвори́вый.

Ра́дꙋйсѧ, милосе́рдїѧ сокро́вище всѣ̑мъ ни́щымъ и҆ ᲂу҆бѡ́гимъ бы́вый: ра́дꙋйсѧ, скорбѧ́шыѧ и҆ стра́ждꙋщыѧ ᲂу҆тѣша́вый.

Ра́дꙋйсѧ, съ пла́кавшими пла́кавый: ра́дꙋйсѧ, въ темни́цѣ заключє́нныѧ посѣща́вый.

Ра́дꙋйсѧ, пи́щꙋ и҆ ѡ҆де́ждꙋ всѣ̑мъ тре́бꙋющымъ подава́вый: ра́дꙋйсѧ, посто́мъ и҆ моли́твою бо́гꙋ бл҃гоꙋгожда́вый.

Ра́дꙋйсѧ, ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Возсїѧ́въ, ꙗ҆́кѡ со́лнце пресвѣ́тлое, добродѣ́тельнымъ житїе́мъ твои́мъ во гра́дѣ пско́вѣ, ст҃ы́й бл҃говѣ́рный кнѧ́же все́володе гаврїи́ле, по лѣ́тѣ є҆ди́нѣмъ жи́тельства твоегѡ̀ въ не́мъ къ за́падꙋ сме́ртномꙋ прибли́жилсѧ є҆сѝ, и҆ причасти́всѧ ст҃ы́хъ хрⷭ҇то́выхъ та́инъ, ми́рнѡ и҆ безмѧте́жнѡ пре́далъ є҆сѝ ст҃ꙋ́ю дꙋ́шꙋ твою̀, въ рꙋ́цѣ бж҃їи. мы́ же, чтꙋ́ще тѧ̀, а҆́ки надгро́бнꙋю пѣ́снь, съ любо́вїю и҆ ᲂу҆се́рдїемъ си́це тебѣ̀ пое́мъ:

Ра́дꙋйсѧ, вели́кїй ᲂу҆го́дниче бж҃їй, жи́знь земнꙋ́ю ст҃ѡ и҆ пра́веднѡ сконча́вый: ра́дꙋйсѧ, преше́дый ѿ скорбе́й мно́гихъ на поко́й вѣ́чный.

Ра́дꙋйсѧ, воспрїѧ́тый со сла́вою во ѡ҆би́тель ст҃ы́хъ: ра́дꙋйсѧ, ᲂу҆вѣнча́нный ѿ хрⷭ҇та̀ вѣнце́мъ нетлѣ́нныѧ сла́вы.

Ра́дꙋйсѧ, мно́гъ пла́чь кончи́ною твое́ю причини́вый лю́демъ пско́вскимъ: ра́дꙋйсѧ, ме́чь тво́й и҆̀мъ завѣща́вый въ защи́тꙋ и҆ ѡ҆гражде́нїе, дꙋхо́вное.

Ра́дꙋйсѧ, пресели́выйсѧ къ бг҃ꙋ дꙋше́ю твое́ю ст҃о́ю: ра́дꙋйсѧ, прїѧ́вый ѿ негѡ̀ бл҃года́ть моли́тисѧ за гра́дъ тво́й и҆ лю́ди.

Ра́дꙋйсѧ, пско́ва сла́во и҆ похвало̀: ра́дꙋйсѧ, всеѧ̀ цр҃кви хрⷭ҇то́вы ра́дованїе и҆ ᲂу҆тѣше́нїе.

Ра́дꙋйсѧ, чꙋдесы̑ ди́вными въ погребе́нїи твое́мъ возсїѧ́вый: ра́дꙋйсѧ, бл҃гоꙋха́нїе сла́достное ѿ моще́й твои́хъ и҆спꙋсти́вый.

Ра́дꙋйсѧ ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Бл҃же́нство неизглаго́ланно ᲂу҆наслѣ́довалъ є҆сѝ, ᲂу҆го́дниче бж҃їй, разрѣши́всѧ ѿ ᲂу҆́зъ пло́ти и҆ воспари́въ дꙋше́ю твое́ю во ѻ҆́ный гра́дъ прекра́сный, і҆ерⷭ҇ли́мъ нбⷭ҇ный, и҆дѣ́же всѝ ст҃і́и ᲂу҆покоева́ютсѧ: на землѝ же тѣ́ло твоѐ ст҃о́е, во хра́мѣ ст҃а́гѡ великомч҃ника дими́трїа во гра́дѣ пско́вѣ, че́стнѡ погребе́сѧ ѿ всегѡ̀ ѡ҆свѧще́ннагѡ собо́ра, и҆ ме́чь тво́й над̾ гро́бомъ твои́мъ повѣ́шенъ бы́сть, по твоемꙋ̀ завѣ́тꙋ, є҆го́же па́мѧтꙋюще со ᲂу҆миле́нїемъ вопїе́мъ тѝ си́це:

Ра́дꙋйсѧ, застꙋ́пниче ᲂу҆се́рдный гра́да пско́ва и҆ всеѧ̀ рѡссі́йскїѧ страны̀: ра́дꙋйсѧ, и҆ по сме́рти застꙋпле́нїемъ твои́мъ ст҃ы́мъ на́съ не ѡ҆ставлѧ́ѧй.

Ра́дꙋйсѧ, пресла́внѡ чꙋдодѣ́йствꙋѧй ѿ моще́й твои́хъ честны́хъ: ра́дꙋйсѧ, мече́мъ твои́мъ ѡ҆гражда́ѧй на́съ ѿ врагѡ́въ ви́димыхъ и҆ неви́димыхъ.

Ра́дꙋйсѧ, во дни̑ бра́ней бл҃гонаде́жный гра́дꙋ твоемꙋ̀ защи́тниче: ра́дꙋйсѧ, во дни̑ ми́ра всѣ̑мъ недꙋ́жнымъ бл҃года́тный цѣле́бниче.

Ра́дꙋйсѧ, бли̑жнимъ и҆ да̑льнимъ бл҃годѣѧ̑нїѧ твоѧ̑ подава́ѧй: ра́дꙋйсѧ, въ со́нїихъ и҆ видѣ́нїихъ вѣ́рныѧ посѣща́ѧй.

Ра́дꙋйсѧ ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Ве́сь стра́ха и҆ ᲂу҆́жаса и҆спо́лнисѧ мꙋ́жъ бл҃гочести́вый, є҆мꙋ́же въ видѣ́нїи во свѣ́тѣ нбⷭ҇нѣмъ предста́лъ є҆сѝ, бл҃говѣ́рный кнѧ́же, и҆ ре́клъ є҆мꙋ̀: и҆дѝ ко ѡ҆свѧще́нномꙋ собо́рꙋ, кнѧ́зю и҆ поса́дникѡмъ гра́да, и҆ рцы̀ и҆̀мъ, да принесꙋ́тъ мо́щи моѧ̑ ѿ хра́ма ст҃а́гѡ дими́трїа въ собо́рный хра́мъ ст҃ы́ѧ трⷪ҇цы, та́мѡ бо хощꙋ̀ возлещѝ. є҆гда̀ же вопросѝ ѻ҆́нъ честна́гѡ твоегѡ̀ и҆́мене, ты̀ сїѐ є҆мꙋ̀ ѿкры́лъ є҆сѝ, и҆ возвѣсти́лъ є҆сѝ, ꙗ҆́кѡ гра́дъ пско́въ пре́данъ є҆́сть тебѣ̀ ѿ гдⷭ҇а во хране́нїе до сконча́нїѧ вѣ́ка, и҆ ꙗ҆́кѡ и҆́маши є҆гѡ̀ сохранѧ́ти ѿ ꙗ҆зы̑чникъ и҆ латі̑нъ. таково́мꙋ свѣ́тломꙋ ꙗ҆вле́нїю твоемꙋ̀ дивѧ́щесѧ и҆ ѡ҆ застꙋпле́нїи твое́мъ ра́дꙋющесѧ, сїѧ̑ ра́дѡстныѧ возглаша́емъ тѝ похвалы̑:

Ра́дꙋйсѧ, свѧ́тче Бж҃їй, со ст҃ы́ми почива́ѧй: ра́дꙋйсѧ, ѡ҆ на́съ грѣ́шныхъ бг҃а вы́нꙋ ᲂу҆молѧ́ѧй.

Ра́дꙋйсѧ, гра́да пско́ва храни́телю неѿстꙋ́пный: ра́дꙋйсѧ, ди́вный вои́телю посме́ртный.

Ра́дꙋйсѧ, во́лю твою̀ въ видѣ́нїи лю́демъ пскѡ́вскимъ ѡ҆б̾ѧви́вый: ра́дꙋйсѧ, въ собо́рнѣмъ хра́мѣ ст҃ы́ѧ трⷪ҇цы ст҃ы́ми моща́ми твои́ми почива́ти восхотѣ́вый.

Ра́дꙋйсѧ, свѣ́томъ нбⷭ҇нымъ ѡ҆заре́нный: ра́дꙋйсѧ, бл҃года́ти бжⷭ҇твенныѧ преиспо́лненный.

Ра́дꙋйсѧ, ди́внымъ ꙗ҆вле́нїемъ твои́мъ лю́ди пско́вскїѧ дꙋхо́внѡ ᲂу҆тѣ́шивый: ра́дꙋйсѧ, бл҃ги́мъ ѡ҆бѣтова́нїемъ твои́мъ и҆́хъ ѕѣлѡ̀ возвесели́вый.

Ра́дꙋйсѧ, ра́достный на́мъ вѣ́стниче хрⷭ҇то́ва всемогꙋ́щества и҆ си́лы: ра́дꙋйсѧ, бл҃гомо́щный предста́телю за лю́ди твоѧ̑ и҆ гра́дъ, бг҃омъ тебѣ̀ врꙋче́нный.

Ра́дꙋйсѧ ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Виті́йство человѣ́ческое не довлѣ́етъ къ досто́йнѣй похвалѣ̀ ст҃ы́хъ, бг҃омъ просла́вленныхъ на нб҃сѝ и҆ на землѝ: недоꙋмѣ́емъ и҆ мы̀ смире́ннїи досто́йнѡ просла́вити тѧ̀, ст҃ы́й на́шъ предста́телю, бл҃говѣ́рный кнѧ́же все́володе гаврїи́ле, ди́внѡ просла́вленный на нб҃сѝ сла́вою вѣ́чною, и҆ на землѝ чꙋдотво́рнымъ нетлѣ́нїемъ ст҃ы́хъ моще́й твои́хъ и҆ мно́гими ѿ ни́хъ зна́меньми и҆ и҆сцѣле́ньми. ѻ҆ба́че ты̀, ꙗ҆́кѡ бл҃гі́й и҆ ми́лостивый, не возгнꙋша́йсѧ гласѡ́въ на́шихъ хвалє́бныхъ, и҆́миже ѿ любвѐ серде́чныѧ дерза́емъ бл҃гохвали́ти тѧ̀ си́це:

Ра́дꙋйсѧ, въ пренесе́нїи ст҃ы́хъ, моще́й, твои́хъ чꙋдесы̀ вели́кими просїѧ́вый: ра́дꙋйсѧ мѷроточе́нїѧ бл҃года́ть ѿ гдⷭ҇а полꙋчи́вый.

Ра́дꙋйсѧ, цвѣ́те нетлѣ́нїѧ, ѡ҆бл҃гоꙋха́вый ст҃ꙋ́ю всерѡссі́йскꙋю цр҃ковь: ра́дꙋйсѧ, сме́рть вкꙋси́вый, тлѣ́нїѧ же не позна́вый.

Ра́дꙋйсѧ, по лѣ́тѣхъ мно́зѣхъ цѣ́лъ и҆ нерꙋши́мъ въ соста́вѣхъ, твои́хъ ѡ҆брѣ́тенный: ра́дꙋйсѧ, нетлѣ́ненъ и҆ бл҃гоꙋха́ненъ во гро́бѣ возлѣжа́вый.

Ра́дꙋйсѧ, мѵ́ро бл҃гоꙋха́нное и҆ цѣле́бное ѿ моще́й твои́хъ ст҃ы́хъ и҆сточи́вый: ра́дꙋйсѧ, ка́плѧми мѵ́ра тогѡ̀ и҆сцѣле́нїѧ мнѡ́гимъ недꙋ́жнымъ дарова́вый.

Ра́дꙋйсѧ, въ собо́рнѣмъ хра́мѣ ст҃ы́ѧ трⷪ҇цы тѣ́ломъ че́стнѣ положе́нный: ра́дꙋйсѧ, сосꙋ́де бж҃їѧ бл҃года́ти по́лный и҆ преизлива́ющїйсѧ.

Ра́дꙋйсѧ, ѿ и҆сполне́нїѧ твоегѡ̀ и҆ на́мъ да́рꙋѧй бл҃года̑тныѧ да́ры: ра́дꙋйсѧ ми́лостивнѡ и҆сцѣлѧ́ѧй дꙋшѝ на́ша и҆ тѣлеса̀.

Ра́дꙋйсѧ ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Стѣна̀ защище́нїѧ гра́дꙋ пско́вꙋ бы́лъ є҆сѝ, ст҃ы́й бл҃говѣ́рный кнѧ́же все́володе гаврїи́ле, во дни̑ ра́тныхъ нападе́нїй на него̀ и҆ноплеме́нныхъ и҆ и҆новѣ́рныхъ врагѡ́въ, и҆ прест҃ѣ́й влⷣчцѣ бцⷣѣ въ видѣ́нїи предстоѧ́лъ є҆сѝ съ про́чими ст҃ы́ми, ᲂу҆молѧ́ѧ ю҆̀ ѡ҆ сп҃се́нїи гра́да ѿ ра́тнагѡ разоре́нїѧ, ꙗ҆́кѡ предста́тель и҆ защи́титель є҆гѡ̀ неѿстꙋ́пный. сегѡ̀ ра́ди бл҃года́рственнѡ тѧ̀ сла́вимъ и҆ вопїе́мъ тѝ си́це:

Ра́дꙋйсѧ, взбра́нный воево́до, во́инство правосла́вное воѡдꙋшеви́вый къ побѣ́дамъ: ра́дꙋйсѧ, ра́тей и҆новѣ́рныхъ низложе́нїе.

Ра́дꙋйсѧ, побѣдоно́сный защи́тителю гра́да пско́ва ѿ вою́ющихъ на́нь ꙗ҆зы́кѡвъ: ра́дꙋйсѧ, плѣ́нныхъ и҆ ѡ҆ѕлоблѧ́емыхъ люді́й твои́хъ ѿра́до и҆ ᲂу҆тѣше́нїе.

Ра́дꙋйсѧ, крѣ́пкое и҆́хъ ᲂу҆пова́нїе: ра́дꙋйсѧ, моща́ми твои́ми ст҃ы́ми во дни̑ си́льныѧ бра́ни со врага́ми на стѣ́ны гра́да прише́дый.

Ра́дꙋйсѧ, нападе́нїе и҆́хъ неви́димѡ ѿрази́вый: ра́дꙋйсѧ, покрови́телю бг҃омъ да́нный гра́дꙋ пско́вꙋ и҆ все́й є҆гѡ̀ ѡ҆́бласти.

Ра́дꙋйсѧ, щи́те, защища́ѧй и҆̀хъ ѿ всѧ́кагѡ ѕла̀.

Ра́дꙋйсѧ ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Свѣ́томъ трисо́лнечнымъ, горѣ̀ ѡ҆заре́нный, бл҃говѣ́рный и҆ ст҃ы́й кнѧ́же все́володе гаврїи́ле, ѡ҆зарѝ на́шѧ мра̑чныѧ дꙋшѝ сїѧ́нїемъ бж҃їѧ блгⷣти и҆ наста́ви ны̀ вѣ́рнѡ и҆сполнѧ́ти за́повѣди хрⷭ҇та̀ бг҃а: вѣ́мы бо, ꙗ҆́кѡ мно́гѡ мо́жетъ мл҃тва твоѧ̀ пред̾ бл҃гостїю є҆гѡ̀, ꙗ҆́кѡ вѣ́рнагѡ є҆гѡ̀ раба̀ и҆, ᲂу҆го́дника. сегѡ̀ ра́ди со ᲂу҆пова́нїемъ бл҃ги́мъ моли́твеннѡ къ тебѣ̀ притека́емъ и҆ взыва́емъ си́це:

Ра́дꙋйсѧ, великоимени́тый и҆ многосла́вный всерѡссі́йскїй на́шъ застꙋ́пниче: ра́дꙋйсѧ, ски́птра ца́рскагѡ крѣ́пкое ѡ҆гражде́нїе.

Ра́дꙋйсѧ, кнѧзе́й ᲂу҆добре́нїе: ра́дꙋйсѧ, цр҃кви ст҃ы́ѧ свѣти́льниче пресвѣ́тлый.

Ра́дꙋйсѧ, со́ль землѝ рѡссі́йскїѧ, ꙗ҆́же николи́же ѡ҆бꙋѧ́етъ: ра́дꙋйсѧ, сто́лпе правосла́вїѧ непоколеби́мый.

Ра́дꙋйсѧ, ма́слино бл҃гопло́днаѧ, є҆ле́емъ ми́лости бж҃їѧ ᲂу҆маща́ющаѧ вѣ́рныѧ дꙋшѝ: ра́дꙋйсѧ, наде́жный хода́таю на́мъ ми́лости гдⷭ҇ни.

Ра́дꙋйсѧ, неꙋсы́пный мл҃твенниче на́шъ ко прест҃ѣ́й трⷪ҇цѣ.

Ра́дꙋйсѧ ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.

Пою́ще мнѡ́гаѧ твоѧ̑ чꙋдотворє́нїѧ ᲂу҆го́дниче бж҃їй, бл҃говѣ́рный ст҃ы́й кнѧ́же все́володе гаврїи́ле, моли́твеннѡ соверша́емъ ст҃ꙋ́ю па́мѧть твою̀, ꙗ҆́кѡ торжество̀ вѣ́ры на́шеѧ правосла́вныѧ, въ не́йже є҆ди́нѣй процвѣта́ютъ толи́цѣи чꙋдотво́рцы, си́льнїи пред̾ бг҃омъ предста́тельствомъ свои́мъ и҆ бл҃годѣ́ющыѧ бѣ́дствꙋющымъ и҆ болѧ́щымъ человѣ́кѡмъ свы́ше да́нною и҆́мъ блгⷣтїю, ю҆́же въ тебѣ̀ до́брѣ вѣ́дꙋще, свѧ́тче Бж҃їй, ѿ бл҃года́рныхъ ᲂу҆сте́нъ си́це зове́мъ:

Ра́дꙋйсѧ, бл҃говоле́нїемъ прест҃ы́ѧ трⷪ҇цы ѡ҆сѣне́нный: ра́дꙋйсѧ, всѣ́хъ ст҃ы́хъ сожи́телю.

Ра́дꙋйсѧ, ра́йскихъ селе́нїй ѡ҆бита́телю: ра́дꙋйсѧ, прїѧ́вый бл҃га нетлѣ̑ннаѧ и҆ вѣ̑чнаѧ.

Ра́дꙋйсѧ, тѣ́хже бла̑гъ и҆ на́мъ всежела́тельный хода́таю. ра́дꙋйсѧ, дꙋше́внагѡ и҆ тѣле́снагѡ здра́вїѧ ᲂу҆се́рдный на́мъ ᲂу҆ гдⷭ҇а проси́телю.

Ра́дꙋйсѧ, смире́ннаѧ проше́нїѧ на́ша во бла́го и҆сполнѧ́ѧй: ра́дꙋйсѧ, ско́рꙋю по́мощь и҆ застꙋпле́нїе твоѐ на́мъ ꙗ҆влѧ́ѧй.

Ра́дꙋйсѧ, ѿ вра̑гъ ви́димыхъ и҆ неви́димыхъ ѡ҆ бз҃ѣ крѣ́пкїй на́шъ защи́тниче.

Ра́дꙋйсѧ ст҃ы́й бл҃говѣ́рный кнѧ́же все́володе гаврїи́ле, те́плый ѡ҆ на́съ моли́твенниче.