Канон святому мученику Иринарху Севастийскому

От собла́зн жите́йских и страсте́й, стужа́ющих ми́, умири́ мо́й у́м, страда́льче Ирина́рше, твою́ похвали́ти па́мять ти́хо сподо́би.

Струя́ми крове́й твои́х пла́мень гони́телей угаси́в, напои́л еси́ помышле́ния ве́рных возрасти́ти жела́ние живота́ ве́чнаго благоче́стно, му́чениче Ирина́рше.

Священнопобе́дныя венцы́ я́ко страда́лец прие́м, Ирина́рше, преложи́лся еси́ от земли́ к ми́ру нера́тному, и све́ту, и животу́ и́стинному, блаже́ннейше.

Вжиля́ешися кре́постию Боже́ственною и гряде́ши к подвиго́м усе́рдно, всеблаже́нне, терпя́ ра́ны и растерза́ния гоня́щих, страстоте́рпче му́чениче до́блественнейше.

Кре́пость ти́ дае́т Христо́с, вели́кий Страстополо́жник, погуби́ти пре́лесть и посрами́ти врага́, хва́лящася безсту́дно и су́етно, му́чениче, свире́пеющаго.

Низложи́ боле́зньми му́жественными злонача́льнаго зми́я ли́к святы́х, пострада́в кре́пко и ра́ны и у́зы претерпе́в си́лою Боже́ственнаго Ду́ха.

Зако́нно поте́кл еси́, зако́нно пострада́л еси́ и зако́нно венча́лся еси́, Бо́жиим зако́ном укрепля́емь, и непревре́дна тебе́ сама́го соблюда́я, блаже́ннейше.

Не терпя́, сла́вне, в пре́лести ходи́ти, к Богорожде́нию я́ко смы́слен, ра́дуяся устреми́лся еси́, Све́т разу́мный прие́м и свети́льник показу́яся.

Отню́д не покры́ глубина́, прие́мши тя́, всеблаже́нне му́чениче, позна́вши тя́ Боже́ственных страсте́й всеи́стиннейшаго Христа́ Боже́ственнаго свиде́теля, Ирина́рше.

Священноде́йствуемы, и предзакала́емы, и стру́жемы ку́пно, и огне́м отвсю́ду пали́мы, не отверго́стеся Христа́, страстоте́рпицы досточу́дныя.

Копие́м уязви́ся вра́г терпе́ния кре́пкаго доблему́дреннаго му́ченика и того́ пята́м покори́ся, и сме́х ви́дится и посрамля́ется.

Нога́ твоя́ ста́ проро́чески, му́чениче, на пра́вости я́ве, непревра́тным мудрова́нием подпина́ющи многоко́зненнаго и стезя́ми муче́ния удобря́ема.

Ты́ зло́бу гоня́щих, незло́бив и про́ст яви́вся, му́чениче, отри́нул еси́, Ирина́рше, и конча́нием твоея́ кро́ве венцы́ нетле́ния венча́лся еси́.

Возше́д на во́ды, окормля́емь руко́ю живонача́льною, Ирина́рше, и спа́слся еси́ си́ми, гони́телей погрузи́в злоче́стия, моли́твою приле́жною, свяще́ннейше.

Ма́лыми искупи́вше вели́кая, на вели́ка себе́ са́мыя преда́ша муче́ния свяще́нныя жены́, лестца́ Е́вина ду́хом умертви́вше, зми́я началозло́бнаго.

О́троцы святи́и, а́гнцы чи́стии и приноше́ния соверше́нная, на́с ра́ди пожре́ному я́ко же́ртва и́стинному А́гнцу приведе́ни бы́ша, в воню́ благово́ния веселя́щеся.

Любве́ е́же к пло́ти распря́г тво́й у́м, блаже́ннейше, пали́мь и огне́м жго́мь, му́дре, о́троческую вопия́л еси́ пе́снь: благослове́н еси́, Го́споди Бо́же оте́ц на́ших.

Ублаже́н бы́сть отроко́в Боже́ственный собо́р и же́н седмочи́сленный ли́к святы́й, строга́ния, о́гнь и ра́ны кре́пко претерпе́вше ку́пно, и Небе́сных бла́г сподобля́еми.

Отгоня́ются от еди́наго твоего́ призыва́ния лука́вии ду́си, уве́девше тя́, страда́льца непобе́дна Христо́ва, Ирина́рше, пою́ща те́пле: благослове́н еси́, Го́споди Бо́же оте́ц на́ших.

Кро́вными тече́нии еще́ ка́пля и ра́н добро́тою удобря́емь, Победотво́рцу яви́лся еси́, Ирина́рше, побе́ды по́чести от Него́ прие́мля.

Возвы́сився любо́вию Вседержи́телевою, гони́телей вознесе́нную горды́ню низложи́л еси́ и и́дольское смири́л еси́ киче́ние, му́чениче страстоте́рпче Ирина́рше всеблаже́нне.

Милосе́рдия мя́ Боже́ственнаго, му́чениче, сподо́би, искуше́ний и бе́д избавля́я ве́рою тя́ те́плою чту́щаго, Ирина́рше, и под покро́в тво́й прибега́ющаго.

Са́мое после́днее и кра́йнейшее жела́ний пости́гл еси́, Богому́дре Ирина́рше, и прича́стием бо́г бы́л еси́, поя́ с Безтеле́сными: Свя́т, Свя́т, Свя́т, Тро́ице вседе́тельная и всеси́льная.

Избе́г се́тей ловя́щих тя́, ко гнезду́ небе́сному воспочи́л еси́, сла́вне, и му́чеников совокупи́лся еси́ во́инством, с тобо́ю сострада́вшими. Те́мже чти́м па́мять ва́шу, прера́достно торжеству́юще.

Кре́пость и си́лу Христа́ полага́я, лю́тую му́к преплы́в пучи́ну, и вы́шняго приста́нища дости́гл еси́, ве́сь укра́шен, ве́сь Ду́ха светоли́тии оби́льно облива́емь.

Ѿ собла̑знъ жите́йскихъ и҆ страсте́й, стꙋжа́ющихъ мѝ, ᲂу҆мирѝ мо́й ᲂу҆́мъ, страда́льче і҆рина́рше, твою̀ похвали́ти па́мѧть ти́хѡ сподо́би.

Стрꙋѧ́ми крове́й твои́хъ пла́мень гони́телей ᲂу҆гаси́въ, напои́лъ є҆сѝ помышлє́нїѧ вѣ́рныхъ, возрасти́ти жела́нїе живота̀ вѣ́чнагѡ благоче́стнѡ, мꙋ́чениче і҆рина́рше.

Свѧщеннопобѣ̑дныѧ вѣнцы̀, ꙗ҆́кѡ страда́лецъ прїе́мъ, і҆рина́рше, преложи́лсѧ є҆сѝ ѿ землѝ къ ми́рꙋ нера́тномꙋ, и҆ свѣ́тꙋ и҆ животꙋ̀ и҆́стинномꙋ, бл҃же́ннѣйше.

Вжилѧ́ешисѧ крѣ́постїю бжⷭ҇твенною, и҆ грѧде́ши къ подвигѡ́мъ ᲂу҆се́рднѡ, всебл҃же́нне, терпѧ̀ ра̑ны, и҆ растерза̑нїѧ гонѧ́щихъ, страстоте́рпче мч҃ниче до́блественнѣйше.

Крѣ́пость тѝ дае́тъ хрⷭ҇то́съ, вели́кїй страстополо́жникъ, погꙋби́ти пре́лесть и҆ посрами́ти врага̀, хва́лѧщасѧ безстꙋ́днѡ, и҆ сꙋ́етнѡ, мꙋ́чениче, свирѣ́пѣющаго.

Низложѝ болѣ́зньми мꙋ́жественными ѕлонача́льнаго ѕмі́ѧ, ли́къ ст҃ы́хъ пострада́въ крѣ́пкѡ, и҆ ра̑ны и҆ ᲂу҆́зы претерпѣ́въ, си́лою бжⷭ҇твеннагѡ дх҃а.

Зако́ннѡ поте́клъ є҆сѝ, зако́ннѡ пострада́лъ є҆сѝ, и҆ зако́ннѡ вѣнча́лсѧ є҆сѝ, бж҃їимъ зако́номъ ᲂу҆крѣплѧ́емь, и҆ непревре́дна тебѐ сама́го соблюда́ѧ, блаже́ннѣйше.

Не терпѧ̀, сла́вне, въ пре́лести ходи́ти, къ бг҃орожде́нїю, ꙗ҆́кѡ смы́сленъ, ра́дꙋѧсѧ ᲂу҆стреми́лсѧ є҆сѝ, свѣ́тъ разꙋ́мный прїе́мъ, и҆ свѣти́льникъ показꙋ́ѧсѧ.

Ѿню́дъ не покры̀ глꙋбина̀ прїе́мши тѧ̀, всеблаже́нне мч҃ниче, позна́вши тѧ̀ бжⷭ҇твенныхъ стрⷭ҇те́й всеи́стиннѣйшагѡ хрⷭ҇та̀ бжⷭ҇твеннаго свидѣ́телѧ, і҆рина́рше.

Свѧщеннодѣ́йствꙋемы, и҆ предзакала́емы, и҆ стрꙋ́жемы кꙋ́пнѡ, и҆ ѻ҆гне́мъ ѿвсю́дꙋ пали́мы, не ѿверго́стесѧ хрⷭ҇та̀, страстотє́рпицы досточꙋ̑дныѧ.

Копїе́мъ ᲂу҆ѧзви́сѧ вра́гъ, терпѣ́нїѧ крѣ́пкагѡ доблемꙋ́дреннагѡ мꙋ́ченика, и҆ тогѡ̀ пѧта́мъ покори́сѧ, и҆ смѣ́хъ ви́дитсѧ и҆ посрамлѧ́етсѧ.

Нога̀ твоѧ̀ ста̀ прⷪ҇ро́чески, мꙋ́чениче, на пра́вости ꙗ҆́вѣ, непревра́тнымъ мꙋдрова́нїемъ подпина́ющи многоко́зненнаго, и҆ стезѧ́ми мꙋче́нїѧ ᲂу҆добрѧ́ема.

Ты̀ ѕло́бꙋ гонѧ́щихъ, неѕло́бивъ и҆ про́стъ ꙗ҆ви́всѧ, мꙋ́чениче, ѿри́нꙋлъ є҆сѝ, і҆рина́рше, и҆ конча́нїемъ твоеѧ̀ кро́ве вѣнцы̀ нетлѣ́нїѧ вѣнча́лсѧ є҆сѝ.

Возше́дъ на во́ды ѡ҆кормлѧ́емь рꙋко́ю живонача́льною, і҆рина́рше, и҆ спа́слсѧ є҆сѝ си́ми, гони́телей погрꙋзи́въ ѕлоче́стїѧ, моли́твою прилѣ́жною, свѧще́ннѣйше.

Ма́лыми и҆скꙋпи́вше вели̑каѧ, на вели̑ка себѐ са̑мыѧ преда́ша мꙋчє́нїѧ свѧщє́нныѧ жєны̀, лестца̀ є҆́ѵина дх҃омъ ᲂу҆мертви́вше, ѕмі́ѧ началоѕло́бнагѡ.

Ѻ҆́троцы ст҃і́и, а҆́гнцы чи́стїи, и҆ приноше́нїѧ совершє́ннаѧ, на́съ ра́ди пожре́номꙋ ꙗ҆́кѡ же́ртва и҆́стинномꙋ а҆́гнцꙋ приведе́ни бы́ша, въ воню̀ благово́нїѧ веселѧ́щесѧ.

Любвѐ є҆́же къ пло́ти распрѧ́гъ тво́й ᲂу҆́мъ, блаже́ннѣйше, пали́мь и҆ ѻ҆гне́мъ жго́мь, мꙋ́дре, ѻ҆́троческꙋю вопїѧ́лъ є҆сѝ пѣ́снь: бл҃гослове́нъ є҆сѝ, гдⷭ҇и бж҃е ѻ҆ц҃ъ на́шихъ.

Оу҆блаже́нъ бы́сть ѻ҆трокѡ́въ бжⷭ҇твенный собо́ръ, и҆ же́нъ седмочи́сленный ли́къ ст҃ы́й, строга̑нїѧ, ѻ҆́гнь и҆ ра̑ны крѣ́пкѡ претерпѣ́вше кꙋ́пнѡ, и҆ нбⷭ҇ныхъ бла̑гъ сподоблѧ́еми.

Ѿгонѧ́ютсѧ ѿ є҆ди́нагѡ твоегѡ̀ призыва́нїѧ лꙋка́вїи дꙋ́си, ᲂу҆вѣ́дѣвше тѧ̀ страда́льца непобѣ́дна хрⷭ҇то́ва, і҆рина́рше, пою́ща те́плѣ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Кро́вными течє́нїи є҆щѐ ка́плѧ, и҆ ра́нъ добро́тою ᲂу҆добрѧ́емь, побѣдотво́рцꙋ ꙗ҆ви́лсѧ є҆сѝ, і҆рина́рше, побѣ́ды по́чєсти ѿ негѡ̀ прїе́млѧ.

Возвы́сивсѧ любо́вїю вседержи́телевою, гони́телей вознесе́ннꙋю горды́ню низложи́лъ є҆сѝ, и҆ і҆́дѡльское смири́лъ є҆сѝ киче́нїе, мꙋ́чениче страстоте́рпче і҆рина́рше всебл҃же́нне.

Милосе́рдїѧ мѧ̀ бжⷭ҇твеннагѡ, мꙋ́чениче, сподо́би, и҆скꙋше́нїй и҆ бѣ́дъ и҆збавлѧ́ѧ, вѣ́рою тѧ̀ те́плою чтꙋ́щаго, і҆рина́рше, и҆ подъ покро́въ тво́й прибѣга́ющагѡ.

Са́мое послѣ́днее и҆ кра́йнѣйшее жела́нїй пости́глъ є҆сѝ, бг҃омꙋ́дре і҆рина́рше, и҆ прича́стїемъ бг҃ъ бы́лъ є҆сѝ, поѧ̀ съ безтѣле́сными: ст҃ъ, ст҃ъ, ст҃ъ, трⷪ҇це вседѣ́тельнаѧ и҆ всеси́льнаѧ.

И҆збѣ́гъ сѣ́тей ловѧ́щихъ тѧ̀, ко гнѣздꙋ̀ нбⷭ҇номꙋ воспочи́лъ є҆сѝ, сла́вне, и҆ мꙋ́ченикѡвъ совокꙋпи́лсѧ є҆сѝ во́инствѡмъ, съ тобо́ю сострада́вшими. тѣ́мже чти́мъ па́мѧть ва́шꙋ, прера́достнѡ торжествꙋ́юще.

Крѣ́пость и҆ си́лꙋ хрⷭ҇та̀ полага́ѧ, лю́тꙋю мꙋ́къ преплы́въ пꙋчи́нꙋ, и҆ вы́шнѧгѡ приста́нища дости́глъ є҆сѝ, ве́сь ᲂу҆кра́шенъ, ве́сь дх҃а свѣтоли̑тїи ѻ҆би́льнѡ ѡ҆блива́емь.