Акафист святителю Феодору, архиепископу Ростовскому, чудотворцу

А́нгела о́бразом, челове́ка су́ща естество́м, имену́ем тя́ бы́ти, преблаже́нне святи́телю Фео́доре: а́ще и тле́нную на земли́ пло́ть носи́л еси́, но нетле́нием оде́ян яви́лся еси́, те́мже вопию́ще ти́, ра́дуйся, прино́сим:

Ра́дуйся, Це́ркве Христо́вы те́плый защи́тителю; ра́дуйся, избра́нный Ду́ха Свята́го сосу́де.

Ра́дуйся, А́нгелов собесе́дниче; ра́дуйся, апо́столов и́стинный прее́мниче.

Ра́дуйся, святи́телей сопресто́льниче; ра́дуйся, му́чеников похвало́.

Ра́дуйся, по́стников пресла́вное удобре́ние; ра́дуйся, преподо́бных ве́нче.

Ра́дуйся, па́стырю до́брый; ра́дуйся, во́ине Христо́в непобеди́мый.

Ра́дуйся, звездо́ пресве́тлая, в Росто́ве возсия́вшая.

Ра́дуйся, но́вый чудотво́рче Фео́доре.

Ра́зум непрекло́нный от ю́ности твоея́ стяжа́л еси́, святи́телю Фео́доре, егда́ всю́ пре́лесть, вся́ суеты́ су́етств в ми́ре се́м проразсуди́л еси́, тогда́ еди́наго безце́ннаго би́сера Христа́ Го́спода взыска́ти возжела́л еси́, те́мже вопие́м ти́:

Ра́дуйся, я́ко прему́дрости Бо́жией чи́стое прия́телище бы́л еси́; ра́дуйся, я́ко вся́ преле́стная мудрова́ния ни во что́ вмени́л еси́.

Ра́дуйся, я́ко еди́на небе́сная блага́я возлюби́л еси́; ра́дуйся, я́ко труда́ми и по́ты ду́шу твою́ просвети́л еси́.

Ра́дуйся, я́ко чи́сту же́ртву Христо́ви прине́сл еси́; ра́дуйся, я́ко пло́ть ду́ху порабо́тил еси́.

Ра́дуйся, я́ко ду́шу равноа́нгельску сотвори́л еси́; ра́дуйся, я́ко широ́кий пу́ть, веду́щий в па́губу, возненави́дел еси́.

Ра́дуйся, я́ко те́сною и приско́рбною стезе́ю па́че ше́ствовати возлюби́л еси́; ра́дуйся, я́ко проти́ву ко́знем диа́вольским ста́ти неустраши́лся еси́.

Ра́дуйся, я́ко хра́м Ду́ха Свята́го бы́л еси́.

Ра́дуйся, но́вый чудотво́рче Фео́доре.

Име́я в се́рдце твое́м неоску́дное благоразсужде́ния бога́тство, ка́ко безбе́дно преплы́ти волну́ющуюся ми́ра сего́ пучи́ну, оба́че ника́коже устраши́лся еси́ шумя́щих во́лн прираже́ние, в ма́лой пло́ти твоея́ ладии́ многомяте́жное сие́ мо́ре безбе́дно преплы́л еси́; мы́ же, недосто́йнии, удивля́ющеся таково́му твоему́ великоду́шию, си́це вопие́м ти́:

Ра́дуйся, я́ко ладию́, пло́ть твою́ доброде́тельми ума́стил еси́; ра́дуйся, я́ко волну́ющееся ми́ра сего́ мо́ре безбе́дно преплы́л еси́.

Ра́дуйся, я́ко кора́бль души́ твоея́ ко благоути́шному приста́нищу упра́вил еси́; ра́дуйся, пресве́тлая звездо́, в мо́ре пла́вающим пу́ть показу́ющая.

Ра́дуйся, все́м волну́ющимся приста́нище ти́хое; ра́дуйся, все́м от пути́ спаси́тельнаго блудя́щим ко́рмчий недре́млющий.

Ра́дуйся, до́брых защи́тниче; ра́дуйся, согреша́ющих наста́вниче.

Ра́дуйся, во́ине Христо́в неустраши́мый; ра́дуйся, победи́телю страсте́й непреобори́мый.

Ра́дуйся, ева́нгельскаго благоро́дия ве́твь прекра́сная.

Ра́дуйся, но́вый чудотво́рче Фео́доре.

Слы́шаша окре́стныя наро́ди о пресла́вных чудесе́х твои́х, я́ко твои́ми моли́твами вся́кия неду́ги исцеля́ются и вся́ люте́йшия стра́сти укроща́ются; исцели́ у́бо и мене́ окая́ннаго, бе́дне стра́ждуща и со мно́гими рыда́ньми тебе́ такова́я вопию́ща:

Ра́дуйся, все́х обурева́емых ти́хое приста́нище; ра́дуйся, печа́льных утеше́ние.

Ра́дуйся, все́х скорбя́щих ра́досте; ра́дуйся, все́х изнемога́ющих ско́рое возставле́ние.

Ра́дуйся, милосе́рдия сокро́вище неистощи́мое; ра́дуйся, пресве́тлое Правосла́вия свети́ло, всю́ Росси́ю просвеща́ющее.

Ра́дуйся, заре́ светоза́рная, на восто́це возсия́вшая; ра́дуйся, озаре́ние трисо́лнечнаго све́та.

Ра́дуйся, денни́це незаходи́маго Со́лнца; ра́дуйся, свеще́, Боже́ственным пла́менем возжже́нная.

Ра́дуйся, ве́рный целому́дрия ключарю́.

Ра́дуйся, но́вый чудотво́рче Фео́доре.

Воздержа́нием и бде́нием те́ло ду́ху порабо́тил еси́, ду́шу же равноа́нгельску сотвори́л еси́; помина́й, преблаже́нне, ве́рою чту́щия тя́ и си́це вопию́щия тебе́:

Ра́дуйся, благоче́стия сто́лпе; ра́дуйся, ве́рных прибе́жища гра́де.

Ра́дуйся, тве́рдое Правосла́вия укрепле́ние; ра́дуйся, свято́е очисти́лище нра́вов.

Ра́дуйся, доброде́телей вели́кое вмести́лище; ра́дуйся, святы́ни чи́стое и честно́е жили́ще.

Ра́дуйся, свети́льниче пресве́тлый; ра́дуйся, све́те златоза́рный.

Ра́дуйся, досто́йный а́нгелов собесе́дниче; ра́дуйся, до́брый челове́ком наста́вниче.

Ра́дуйся, пра́вило ве́ры благочести́выя.

Ра́дуйся, но́вый чудотво́рче Фео́доре.

Ве́сь и все́м вся́к помо́щник яви́лся еси́, присноблаже́нне Фео́доре, я́ко да́нною тебе́ от Бо́га благода́тию слепы́я просвеща́еши, хромы́я исправля́еши, бе́сы прогоня́еши, и все́м вся́ проси́мая подае́ши, незави́стно получи́вше у́бо такова́я, благода́рственно прино́сим ти́, вопию́ще си́це:

Ра́дуйся, слепы́х просвети́телю; ра́дуйся, хромы́х испра́вителю.

Ра́дуйся, бесо́в изгони́телю; ра́дуйся, врачу́ ско́рый с ве́рою призыва́ющим.

Ра́дуйся, все́м скорбя́щим прия́тное попече́ние; ра́дуйся, трисо́лнечнаго Све́та пресве́тлый луче́.

Ра́дуйся, ева́нгельскаго све́та изъясни́телю; ра́дуйся, свети́льниче, на высо́ком доброде́телей све́щнице поста́вленный.

Ра́дуйся, Небе́сный челове́че; ра́дуйся, земны́й а́нгеле. Ра́дуйся, я́ко возше́л еси́ в ра́дость Го́спода твоего́.

Ра́дуйся, но́вый чудотво́рче Фео́доре.

Наслади́вся воздержа́ния, богому́дре Фео́доре, и жела́ние пло́ти твоея́ обузда́в, на престо́ле святи́тельства се́л еси́, и я́ко звезда́ пресве́тлая, просвеща́еши ве́рных сердца́ заря́ми чуде́с твои́х, о́тче на́ш, святи́телю Фео́доре. Сего́ ра́ди мы́ вопие́м ти́:

Ра́дуйся, па́дших возстановле́ние; ра́дуйся, согреша́ющих исправле́ние.

Ра́дуйся, чистоты́ селе́ние; ра́дуйся, единосу́щныя Тро́ицы прия́телище избра́нное.

Ра́дуйся, превели́кое сокро́вище медото́чных уче́ний; ра́дуйся, благово́ние Ду́ха Свята́го.

Ра́дуйся, боже́ственное селе́ние; ра́дуйся, реко́ богото́чная.

Ра́дуйся, пресве́тлое благода́ти сия́ние; ра́дуйся, смире́ния Христо́ва и́стинный подража́телю.

Ра́дуйся, врачу́ ду́ш и теле́с на́ших.

Ра́дуйся, но́вый чудотво́рче Фео́доре.

Вся́ зако́ны духо́вныя соблю́л еси́, архипа́стырь бы́в в преслову́том гра́де Росто́ве, слове́сныя о́вцы твоя́ благоче́стию научи́в, и те́ло твое́ в не́м я́ко да́р освяще́нный положи́л еси́, кото́рое мно́гими ле́ты в земли́ сокрове́нно, ны́не же обре́теся це́ло и нетле́нно, к нему́ же приходя́щии и лобыза́ющии освяща́ются, с ве́рою и любо́вию вопию́ще и глаго́люще:

Ра́дуйся, свеще́ пресве́тлая; ра́дуйся, всеросси́йский свети́льниче.

Ра́дуйся, заре́ прекра́сная; ра́дуйся, звездо́ незаходи́мая.

Ра́дуйся целому́дрия сто́лпе, и́мже вся́кая стра́сть попра́ся; ра́дуйся, смире́нием высо́кий, и́мже де́монов горды́ню низложи́л еси́.

Ра́дуйся, свети́льниче многосве́тлый; ра́дуйся, сиро́т засту́пниче.

Ра́дуйся, ни́щих пита́телю; ра́дуйся, чудоде́лателю о Бо́зе да́нных чуде́с.

Ра́дуйся, Росси́йская похвало́.

Ра́дуйся, но́вый чудотво́рче Фео́доре.

Вити́я многовеща́нныя, я́ко ры́ба безгла́сныя, недоумева́ет, что́ о тебе́ глаго́лати, па́че же стра́хом и ра́достию объя́ти быва́ют, я́ко по многовре́меннем в земли́ пребыва́нии честны́я твоя́ мо́щи, святи́телю Фео́доре, це́лы и не разруши́мы обрето́шася; сего́ ра́ди мы́, благодаря́ще такова́я Дарова́вшему на́м, похва́льная воспису́ем ти́:

Ра́дуйся, апо́стольских преда́ний ве́рный храни́телю; ра́дуйся, я́ко земна́го оте́чества любо́вь ни во что́ вмени́л еси́.

Ра́дуйся, я́ко еди́ну небе́снаго оте́чества красоту́ и́скренно возлюби́л еси́; ра́дуйся, кре́ст тво́й со мно́гою ра́достию терпеливоду́шно поне́сл еси́.

Ра́дуйся, избра́нный сосу́де Ду́ха Свята́го; ра́дуйся, я́ко вся́ стра́сти воздержа́нием умертви́л еси́.

Ра́дуйся, я́ко у́м тво́й безстра́стием просвети́л еси́; ра́дуйся, Росси́йския Це́ркве свети́ло пресве́тлое.

Ра́дуйся, де́лателю виногра́да Христо́ва; ра́дуйся, смиренному́дрия наста́вниче.

Ра́дуйся, кро́тости пучи́но.

Ра́дуйся, но́вый чудотво́рче Фео́доре.

Свеща́ де́л мои́х темна́ е́сть и ужаса́юся с не́ю прибли́житися ко святы́м моща́м твои́м: но ты́, святи́телю Фео́доре, моли́твами твои́ми на пу́ть пра́вый напра́ви мя́, и страсте́й мои́х многови́дных бу́рю утиши́, да досто́йне принесу́ ти́ сицеву́ю пе́снь:

Ра́дуйся, россиа́ном похвала́ и прибе́жище непосты́дное; ра́дуйся, наро́ду на́шему в побе́дах упова́ние тве́рдое.

Ра́дуйся, я́ко твои́ми моли́твами проти́внии побежда́ются; ра́дуйся, я́ко тобо́ю Правосла́вие утвержда́ется.

Ра́дуйся, я́ко все́м прося́щим подае́ши да́р от Го́спода тебе́ дарова́нный исцеле́ния; ра́дуйся, доброде́телей пресве́тлое украше́ние.

Ра́дуйся, благоутро́бия вели́кое сокро́вище; ра́дуйся, избра́нный сосу́де Ду́ха Свята́го.

Ра́дуйся, покро́ве все́м обурева́емым; ра́дуйся, прему́дрости Бо́жия прия́телище бы́вый.

Ра́дуйся, я́ко все́х зва́ти тебе́ подвиза́емь.

Ра́дуйся, но́вый чудотво́рче Фео́доре.

Светоприе́мна свети́льника стяжа́хом тя́, святи́телю Фео́доре, и́бо светоза́рными твои́х доброде́телей луча́ми омраче́нная на́ша сердца́ просвеща́еши, отча́янных на пу́ть покая́ния обраща́еши. Просвети́вшеся у́бо све́том твои́х доброде́телей, такова́я воспису́ем ти́ благодаре́ния:

Ра́дуйся, я́ко отча́янных на пу́ть покая́ния напра́вил еси́; ра́дуйся, омраче́нная просвети́вый.

Ра́дуйся, расточе́нная собра́вый; ра́дуйся, ве́ры и благоче́стия сто́лпе непоколеби́мый.

Ра́дуйся, ле́ствице боже́ственная, на высоту́ доброде́телей возводя́щая; ра́дуйся, нескве́рное доброде́телей зерца́ло.

Ра́дуйся, по́стников неизме́нный о́бразе; ра́дуйся, со́лнце за́пада неприча́стное.

Ра́дуйся, все́м боля́щим ско́рое врачева́ние; ра́дуйся, в беда́х су́щим вели́кий уте́шителю.

Ра́дуйся, вдова́м и сирота́м те́плый засту́пниче.

Ра́дуйся, но́вый чудотво́рче Фео́доре.

Пою́ще и восхваля́юще твоя́ чудеса́, восхваля́ем тя́ вси́, святи́телю Фео́доре, и ве́руем, я́ко по многотру́дней твое́й жи́зни премени́л вре́менная на ве́чная, преше́л еси́ от ско́рби на ра́дость, от печа́ли на ве́чное весе́лие, преше́л еси́ от земны́х в небе́сная; сего́ ра́ди мы́ недосто́йнии, недосто́йными устна́ми еще́ вопие́м ти́:

Ра́дуйся, я́ко и́стинно премени́л еси́ вре́менная на ве́чная; ра́дуйся, я́ко преше́л еси́ от печа́ли на ра́дость;

Ра́дуйся, я́ко при́сно наслажда́яся мы́слей неизрече́нных; ра́дуйся, я́ко свои́м житие́м все́х небе́сных и земны́х жи́телей удиви́л еси́;

Ра́дуйся, я́ко кре́ст тво́й со мно́гим терпе́нием носи́л еси́; ра́дуйся, я́ко неукло́нно приско́рбным путе́м ше́ствовал еси́;

Ра́дуйся, непоколеби́мое пра́вды пра́вило; ра́дуйся, све́тлая святи́телей похвало́;

Ра́дуйся, благи́й ра́бе ве́рный, я́ко от Бо́га вве́ренный тебе́ тала́нт возрасти́л еси́; ра́дуйся, гра́ду Росто́ву вели́кое украше́ние;

Ра́дуйся, всея́ Росси́и ра́дование.

Ра́дуйся, но́вый чудотво́рче Фео́доре.

А҆́гг҃ла ѡ҆́бразомъ, человѣ́ка сꙋ́ща є҆стество́мъ, и҆менꙋ́емъ тѧ̀ бы́ти, пребл҃же́нне ст҃и́телю ѳео́дѡре: а҆́ще и҆ тлѣ́ннꙋю на землѝ пло́ть носи́лъ є҆сѝ, но нетлѣ́нїемъ ѡ҆дѣ́ѧнъ ꙗ҆ви́лсѧ є҆сѝ, тѣ́мже вопїю́ще тѝ, ра́дꙋйсѧ, прино́симъ:

Ра́дꙋйсѧ, це́ркве хрⷭ҇то́вы те́плый защи́тителю: ра́дꙋйсѧ, и҆збра́нный дх҃а ст҃а́гѡ сосꙋ́де.

Ра́дꙋйсѧ, а҆́гг҃лѡвъ собесѣ́дниче: ра́дꙋйсѧ, а҆пⷭ҇лѡвъ и҆́стинный прее́мниче.

Ра́дꙋйсѧ, ст҃и́телей сопресто́льниче: ра́дꙋйсѧ, мꙋ́ченикѡвъ похвало̀.

Ра́дꙋйсѧ, по́стникѡвъ пресла́вное ᲂу҆добре́нїе: ра́дꙋйсѧ, прпⷣбныхъ вѣ́нче.

Ра́дꙋйсѧ, па́стырю до́брый: ра́дꙋйсѧ, во́ине хрⷭ҇то́въ непобѣди́мый.

Ра́дꙋйсѧ, ѕвѣздо̀ пресвѣ́тлаѧ, въ росто́вѣ возсїѧ́вшаѧ.

Ра́дꙋйсѧ, но́вый чꙋдотво́рче ѳео́дѡре.

Ра́зꙋмъ непрекло́нный ѿ ю҆́ности твоеѧ̀ стѧжа́лъ є҆сѝ, ст҃и́телю ѳео́дѡре, є҆гда̀ всю̀ пре́лесть, всѧ̑ сꙋеты̀ сꙋ́етствъ въ мі́рѣ се́мъ проразсꙋди́лъ є҆сѝ, тогда̀ є҆ди́наго безцѣ́ннаго би́сера хрⷭ҇та̀ гдⷭ҇а взыска́ти возжела́лъ є҆сѝ, тѣ́мже вопїе́мъ тѝ:

Ра́дꙋйсѧ, ꙗ҆́кѡ премꙋ́дрости бж҃їей чи́стое прїѧ́телище бы́лъ є҆сѝ: ра́дꙋйсѧ, ꙗ҆́кѡ всѧ̑ преле́стнаѧ мꙋдрова̑нїѧ ни во что̀ вмѣни́лъ є҆сѝ.

Ра́дꙋйсѧ, ꙗ҆́кѡ є҆ди́на нбⷭ҇наѧ бл҃га́ѧ возлюби́лъ є҆сѝ: ра́дꙋйсѧ, ꙗ҆́кѡ трꙋда́ми и҆ по́ты дꙋ́шꙋ твою̀ просвѣти́лъ є҆сѝ.

Ра́дꙋйсѧ, ꙗ҆́кѡ чи́стꙋ же́ртвꙋ хрⷭ҇то́ви прине́слъ є҆сѝ: ра́дꙋйсѧ, ꙗ҆́кѡ пло́ть дꙋ́хꙋ порабо́тилъ є҆сѝ.

Ра́дꙋйсѧ, ꙗ҆́кѡ дꙋ́шꙋ равноа́гг҃льскꙋ сотвори́лъ є҆сѝ: ра́дꙋйсѧ, ꙗ҆́кѡ широ́кїй пꙋ́ть, ведꙋ́щїй въ па́гꙋбꙋ, возненави́дѣлъ є҆сѝ.

Ра́дꙋйсѧ, ꙗ҆́кѡ тѣ́сною и҆ приско́рбною стезе́ю па́че ше́ствовати возлюби́лъ є҆сѝ: ра́дꙋйсѧ, ꙗ҆́кѡ проти́вꙋ ко́знемъ дїа́вѡльскимъ ста́ти неꙋстраши́лсѧ є҆сѝ.

Ра́дꙋйсѧ, ꙗ҆́кѡ хра́мъ дх҃а ст҃а́гѡ бы́лъ є҆сѝ.

Ра́дꙋйсѧ, но́вый чꙋдотво́рче ѳео́дѡре.

И҆мѣ́ѧ въ се́рдце твое́мъ неѡскꙋ́дное бл҃горазсꙋжде́нїѧ бога́тство, ка́кѡ безбѣ́днѡ преплы́ти волнꙋ́ющꙋюсѧ мі́ра сегѡ̀ пꙋчи́нꙋ, ѻ҆ба́че ника́коже ᲂу҆страши́лсѧ є҆сѝ шꙋмѧ́щихъ во́лнъ прираже́нїе, въ ма́лой пло́ти твоеѧ̀ ладїѝ многомѧте́жное сїѐ мо́ре безбѣ́днѡ преплы́лъ є҆сѝ: мы́ же, недосто́йнїи, ᲂу҆дивлѧ́ющесѧ таково́мꙋ твоемꙋ̀ великодꙋ́шїю, си́це вопїе́мъ тѝ:

Ра́дꙋйсѧ, ꙗ҆́кѡ ладїю̀, пло́ть твою̀ добродѣ́тельми ᲂу҆ма́стилъ є҆сѝ: ра́дꙋйсѧ, ꙗ҆́кѡ волнꙋ́ющеесѧ мі́ра сегѡ̀ мо́ре безбѣ́днѡ преплы́лъ є҆сѝ.

Ра́дꙋйсѧ, ꙗ҆́кѡ кора́бль дꙋшѝ твоеѧ̀ ко бл҃гоꙋти́шномꙋ приста́нищꙋ ᲂу҆пра́вилъ є҆сѝ: ра́дꙋйсѧ, пресвѣ́тлаѧ ѕвѣздо̀, въ мо́ре пла́вающымъ пꙋ́ть показꙋ́ющаѧ.

Ра́дꙋйсѧ, всѣ̑мъ волнꙋ́ющымсѧ приста́нище ти́хое: ра́дꙋйсѧ, всѣ̑мъ ѿ пꙋтѝ спаси́тельнагѡ блꙋдѧ́щымъ ко́рмчїй недре́млющїй.

Ра́дꙋйсѧ, до́брыхъ защи́тниче: ра́дꙋйсѧ, согрѣша́ющихъ наста́вниче.

Ра́дꙋйсѧ, во́ине хрⷭ҇то́въ неꙋстраши́мый: ра́дꙋйсѧ, побѣди́телю страсте́й непреѡбори́мый.

Ра́дꙋйсѧ, є҆ѵⷢ҇льскагѡ благоро́дїѧ вѣ́твь прекра́снаѧ.

Ра́дꙋйсѧ, но́вый чꙋдотво́рче ѳео́дѡре.

Слы́шаша ѡ҆крє́стныѧ наро́ди ѡ҆ пресла́вныхъ чꙋдесѣ́хъ твои́хъ, ꙗ҆́кѡ твои́ми мл҃твами всѧ́кїѧ недꙋ́ги и҆сцѣлѧ́ютсѧ и҆ всѧ̑ лютѣ́йшїѧ стра̑сти ᲂу҆кроща́ютсѧ: и҆сцѣлѝ ᲂу҆̀бо и҆ менѐ ѻ҆каѧ́ннаго, бѣ́днѣ стра́ждꙋща и҆ со мно́гими рыда́ньми тебѣ̀ такѡва́ѧ вопїю́ща:

Ра́дꙋйсѧ, всѣ́хъ ѡ҆бꙋрева́емыхъ ти́хое приста́нище: ра́дꙋйсѧ, печа́льныхъ ᲂу҆тѣше́нїе.

Ра́дꙋйсѧ, всѣ́хъ скорбѧ́щихъ ра́досте: ра́дꙋйсѧ, всѣ́хъ и҆знемога́ющихъ ско́рое возставле́нїе.

Ра́дꙋйсѧ, милосе́рдїѧ сокро́вище неистощи́мое: ра́дꙋйсѧ, пресвѣ́тлое правосла́вїѧ свѣти́ло, всю̀ рѡссі́ю просвѣща́ющее.

Ра́дꙋйсѧ, зарѐ свѣтоза́рнаѧ, на восто́цѣ возсїѧ́вшаѧ: ра́дꙋйсѧ, ѡ҆заре́нїе трисо́лнечнагѡ свѣ́та.

Ра́дꙋйсѧ, денни́це незаходи́магѡ со́лнца: ра́дꙋйсѧ, свѣщѐ, бжⷭ҇твеннымъ пла́менемъ возжже́ннаѧ.

Ра́дꙋйсѧ, вѣ́рный цѣломꙋ́дрїѧ ключарю̀.

Ра́дꙋйсѧ, но́вый чꙋдотво́рче ѳео́дѡре.

Воздержа́нїемъ и҆ бдѣ́нїемъ тѣ́ло дꙋ́хꙋ порабо́тилъ є҆сѝ, дꙋ́шꙋ же равноа́гг҃льскꙋ сотвори́лъ є҆сѝ: помина́й, пребл҃же́нне, вѣ́рою чтꙋ́щыѧ тѧ̀ и҆ си́це вопїю́щыѧ тебѣ̀:

Ра́дꙋйсѧ, бл҃гоче́стїѧ сто́лпе: ра́дꙋйсѧ, вѣ́рныхъ прибѣ́жища гра́де.

Ра́дꙋйсѧ, тве́рдое правосла́вїѧ ᲂу҆крѣпле́нїе: ра́дꙋйсѧ, ст҃о́е ѡ҆чисти́лище нра́вѡвъ.

Ра́дꙋйсѧ, добродѣ́телей вели́кое вмѣсти́лище: ра́дꙋйсѧ, ст҃ы́ни чи́стое и҆ честно́е жили́ще.

Ра́дꙋйсѧ, свѣти́льниче пресвѣ́тлый: ра́дꙋйсѧ, свѣ́те златоза́рный.

Ра́дꙋйсѧ, досто́йный а҆́гг҃лѡвъ собесѣ́дниче: ра́дꙋйсѧ, до́брый человѣ́кѡмъ наста́вниче.

Ра́дꙋйсѧ, пра́вило вѣ́ры благочести́выѧ.

Ра́дꙋйсѧ, но́вый чꙋдотво́рче ѳео́дѡре.

Ве́сь и҆ всѣ̑мъ всѧ́къ помо́щникъ ꙗ҆ви́лсѧ є҆сѝ, приснобл҃же́нне ѳео́дѡре, ꙗ҆́кѡ да́нною тебѣ̀ ѿ бг҃а бл҃года́тїю слѣпы̑ѧ просвѣща́еши, хрѡмы́ѧ и҆справлѧ́еши, бѣ́сы прогонѧ́еши, и҆ всѣ̑мъ всѧ̑ проси̑маѧ подае́ши, незави́стнѡ полꙋчи́вше ᲂу҆́бѡ такѡва́ѧ, благода́рственнѡ прино́симъ тѝ, вопїю́ще си́це:

Ра́дꙋйсѧ, слѣпы́хъ просвѣти́телю: ра́дꙋйсѧ, хромы́хъ и҆спра́вителю.

Ра́дꙋйсѧ, бѣсѡ́въ и҆згони́телю: ра́дꙋйсѧ, врачꙋ̀ ско́рый съ вѣ́рою призыва́ющымъ.

Ра́дꙋйсѧ, всѣ̑мъ скорбѧ́щымъ прїѧ́тное попече́нїе: ра́дꙋйсѧ, трисо́лнечнагѡ свѣ́та пресвѣ́тлый лꙋчѐ.

Ра́дꙋйсѧ, є҆ѵⷢ҇льскагѡ свѣ́та и҆з̾ѧсни́телю: ра́дꙋйсѧ, свѣти́льниче, на высо́комъ добродѣ́телей свѣ́щницѣ поста́вленный.

Ра́дꙋйсѧ, нбⷭ҇ный человѣ́че: ра́дꙋйсѧ, земны́й а҆́гг҃ле: ра́дꙋйсѧ, ꙗ҆́кѡ возше́лъ є҆сѝ въ ра́дость гдⷭ҇а твоегѡ̀.

Ра́дꙋйсѧ, но́вый чꙋдотво́рче ѳео́дѡре.

Наслади́всѧ воздержа́нїѧ, бг҃омꙋ́дре ѳео́дѡре, и҆ жела́нїе пло́ти твоеѧ̀ ѡ҆бꙋзда́въ, на престо́лѣ ст҃и́тельства сѣ́лъ є҆сѝ, и҆ ꙗ҆́кѡ ѕвѣзда̀ пресвѣ́тлаѧ, просвѣща́еши вѣ́рныхъ сердца̀ зарѧ́ми чꙋде́съ твои́хъ, ѻ҆́ч҃е на́шъ, ст҃и́телю ѳео́дѡре. сегѡ̀ ра́ди мы̀ вопїе́мъ тѝ:

Ра́дꙋйсѧ, па́дшихъ возстановле́нїе: ра́дꙋйсѧ, согрѣша́ющихъ и҆справле́нїе.

Ра́дꙋйсѧ, чистоты̀ селе́нїе: ра́дꙋйсѧ, є҆диносꙋ́щныѧ трⷪ҇цы прїѧ́телище и҆збра́нное.

Ра́дꙋйсѧ, превели́кое сокро́вище медото́чныхъ ᲂу҆че́нїй: ра́дꙋйсѧ, бл҃гово́нїе дх҃а ст҃а́гѡ.

Ра́дꙋйсѧ, бжⷭ҇твенное селе́нїе: ра́дꙋйсѧ, рѣко̀ бг҃ото́чнаѧ.

Ра́дꙋйсѧ, пресвѣ́тлое бл҃года́ти сїѧ́нїе: ра́дꙋйсѧ, смире́нїѧ хрⷭ҇то́ва и҆́стинный подража́телю.

Ра́дꙋйсѧ, врачꙋ̀ дꙋ́шъ и҆ тѣле́съ на́шихъ.

Ра́дꙋйсѧ, но́вый чꙋдотво́рче ѳео́дѡре.

Всѧ̑ зако́ны дꙋхѡ́вныѧ соблю́лъ є҆сѝ, а҆рхїпа́стырь бы́въ въ пресловꙋ́томъ гра́дѣ росто́вѣ, словє́сныѧ ѻ҆́вцы твоѧ̑ бл҃гоче́стїю наꙋчи́въ, и҆ тѣ́ло твоѐ въ не́мъ ꙗ҆́кѡ да́ръ ѡ҆сщ҃е́нный положи́лъ є҆сѝ, кото́рое мно́гими лѣ́ты въ землѝ сокрове́нно, ны́нѣ же ѡ҆брѣ́тесѧ цѣ́ло и҆ нетлѣ́нно, къ немꙋ̀ же приходѧ́щїи и҆ лобыза́ющїи ѡ҆свѧща́ютсѧ, съ вѣ́рою и҆ любо́вїю вопїю́ще и҆ глаго́люще:

Ра́дꙋйсѧ, свѣщѐ пресвѣ́тлаѧ: ра́дꙋйсѧ, всерѡссі́йскїй свѣти́льниче.

Ра́дꙋйсѧ, зарѐ прекра́снаѧ: ра́дꙋйсѧ, ѕвѣздо̀ незаходи́маѧ.

Ра́дꙋйсѧ цѣломꙋ́дрїѧ сто́лпе, и҆́мже всѧ́каѧ стра́сть попра́сѧ: ра́дꙋйсѧ, смире́нїемъ высо́кїй, и҆́мже де́мѡнѡвъ горды́ню низложи́лъ є҆сѝ.

Ра́дꙋйсѧ, свѣти́льниче многосвѣ́тлый: ра́дꙋйсѧ, сирѡ́тъ застꙋ́пниче.

Ра́дꙋйсѧ, ни́щихъ пита́телю: ра́дꙋйсѧ, чꙋдодѣ́лателю ѡ҆ бз҃ѣ да́нныхъ чꙋде́съ.

Ра́дꙋйсѧ, рѡссі́йскаѧ похвало̀.

Ра́дꙋйсѧ, но́вый чꙋдотво́рче ѳео́дѡре.

Виті̑ѧ многовѣща́нныѧ, ꙗ҆́кѡ ры́ба безгла̑сныѧ, недоꙋмѣва́етъ, что̀ ѡ҆ тебѣ̀ глаго́лати, па́че же стра́хомъ и҆ ра́достїю ѡ҆б̾ѧ́ти быва́ютъ, ꙗ҆́кѡ по многовре́меннѣмъ въ землѝ пребыва́нїи честны̑ѧ твоѧ̑ мо́щи, ст҃и́телю ѳео́дѡре, цѣ̑лы и҆ не разрꙋши́мы ѡ҆брѣто́шасѧ: сегѡ̀ ра́ди мы̀, бл҃годарѧ́ще такова́ѧ дарова́вшемꙋ на́мъ, пѡхва́льнаѧ восписꙋ́емъ тѝ:

Ра́дꙋйсѧ, а҆пⷭ҇льскихъ преда́нїй вѣ́рный храни́телю: ра́дꙋйсѧ, ꙗ҆́кѡ земна́гѡ ѻ҆те́чества любо́вь ни во что̀ вмѣни́лъ є҆сѝ.

Ра́дꙋйсѧ, ꙗ҆́кѡ є҆ди́нꙋ нбⷭ҇нагѡ ѻ҆те́чества красотꙋ̀ и҆́скреннѡ возлюби́лъ є҆сѝ: ра́дꙋйсѧ, крⷭ҇тъ тво́й со мно́гою ра́достїю терпеливодꙋ́шнѡ поне́слъ є҆сѝ.

Ра́дꙋйсѧ, и҆збра́нный сосꙋ́де дх҃а ст҃а́гѡ: ра́дꙋйсѧ, ꙗ҆́кѡ всѧ̑ стра̑сти воздержа́нїемъ ᲂу҆мертви́лъ є҆сѝ.

Ра́дꙋйсѧ, ꙗ҆́кѡ ᲂу҆́мъ тво́й безстра́стїемъ просвѣти́лъ є҆сѝ: ра́дꙋйсѧ, рѡссі́йскїѧ цр҃кве свѣти́ло пресвѣ́тлое.

Ра́дꙋйсѧ, дѣ́лателю вїногра́да хрⷭ҇то́ва: ра́дꙋйсѧ, смиренномꙋ́дрїѧ наста́вниче.

Ра́дꙋйсѧ, кро́тости пꙋчи́но.

Ра́дꙋйсѧ, но́вый чꙋдотво́рче ѳео́дѡре.

Свѣща̀ дѣ́лъ мои́хъ темна̀ є҆́сть и҆ ᲂу҆жаса́юсѧ съ не́ю прибли́житисѧ ко ст҃ы́мъ моща́мъ твои̑мъ: но ты̀, ст҃и́телю ѳео́дѡре, мл҃твами твои́ми на пꙋ́ть пра́вый напра́ви мѧ̀, и҆ страсте́й мои́хъ многови́дныхъ бꙋ́рю ᲂу҆тишѝ, да досто́йнѣ принесꙋ̀ тѝ сицевꙋ́ю пѣ́снь:

Ра́дꙋйсѧ, рѡссїа́нѡмъ похвала̀ и҆ прибѣ́жище непосты́дное: ра́дꙋйсѧ, наро́дꙋ на́шемꙋ въ побѣ́дахъ ᲂу҆пова́нїе тве́рдое.

Ра́дꙋйсѧ, ꙗ҆́кѡ твои́ми мл҃твами проти́внїи побѣжда́ютсѧ: ра́дꙋйсѧ, ꙗ҆́кѡ тобо́ю правосла́вїе ᲂу҆твержда́етсѧ.

Ра́дꙋйсѧ, ꙗ҆́кѡ всѣ̑мъ просѧ́щымъ подае́ши да́ръ ѿ гдⷭ҇а тебѣ̀ дарова́нный и҆сцѣле́нїѧ: ра́дꙋйсѧ, добродѣ́телей пресвѣ́тлое ᲂу҆краше́нїе.

Ра́дꙋйсѧ, бл҃гоꙋтро́бїѧ вели́кое сокро́вище: ра́дꙋйсѧ, и҆збра́нный сосꙋ́де дх҃а ст҃а́гѡ.

Ра́дꙋйсѧ, покро́ве всѣ̑мъ ѡ҆бꙋрева́ємымъ: ра́дꙋйсѧ, премꙋ́дрости бж҃їѧ прїѧ́телище бы́вый.

Ра́дꙋйсѧ, ꙗ҆́кѡ всѣ́хъ зва́ти тебѣ̀ подвиза́емь.

Ра́дꙋйсѧ, но́вый чꙋдотво́рче ѳео́дѡре.

Свѣтопрїе́мна свѣти́льника стѧжа́хомъ тѧ̀, ст҃и́телю ѳео́дѡре, и҆́бо свѣтоза́рными твои́хъ добродѣ́телей лꙋча́ми ѡ҆мраче́ннаѧ на̑ша сердца̀ просвѣща́еши, ѿча́ѧнныхъ на пꙋ́ть покаѧ́нїѧ ѡ҆браща́еши. просвѣти́вшесѧ ᲂу҆́бѡ свѣ́томъ твои́хъ добродѣ́телей, такѡва́ѧ восписꙋ́емъ тѝ бл҃годарє́нїѧ:

Ра́дꙋйсѧ, ꙗ҆́кѡ ѿча́ѧнныхъ на пꙋ́ть покаѧ́нїѧ напра́вилъ є҆сѝ: ра́дꙋйсѧ, ѡ҆мраче́ннаѧ просвѣти́вый.

Ра́дꙋйсѧ, расточє́ннаѧ собра́вый: ра́дꙋйсѧ, вѣ́ры и҆ бл҃гоче́стїѧ сто́лпе непоколеби́мый.

Ра́дꙋйсѧ, лѣ́ствице бжⷭ҇твеннаѧ, на высотꙋ̀ добродѣ́телей возводѧ́щаѧ: ра́дꙋйсѧ, нескве́рное добродѣ́телей зерца́ло.

Ра́дꙋйсѧ, по́стникѡвъ неизмѣ́нный ѡ҆́бразе: ра́дꙋйсѧ, со́лнце за́пада неприча́стное.

Ра́дꙋйсѧ, всѣ̑мъ болѧ́щымъ ско́рое врачева́нїе: ра́дꙋйсѧ, въ бѣда́хъ сꙋ́щымъ вели́кїй ᲂу҆тѣ́шителю.

Ра́дꙋйсѧ, вдова́мъ и҆ сирота́мъ те́плый застꙋ́пниче.

Ра́дꙋйсѧ, но́вый чꙋдотво́рче ѳео́дѡре.

Пою́ще и҆ восхвалѧ́юще твоѧ̑ чꙋдеса̀, восхвалѧ́емъ тѧ̀ всѝ, ст҃и́телю ѳео́дѡре, и҆ вѣ́рꙋемъ, ꙗ҆́кѡ по многотрꙋ́дней твое́й жи́зни премѣни́лъ вре́мєннаѧ на вѣ̑чнаѧ, преше́лъ є҆сѝ ѿ ско́рби на ра́дость, ѿ печа́ли на вѣ́чное весе́лїе, преше́лъ є҆сѝ ѿ земны́хъ въ нбⷭ҇наѧ: сегѡ̀ ра́ди мы̀ недосто́йнїи, недосто́йными ᲂу҆стна́ми є҆щѐ вопїе́мъ тѝ:

Ра́дꙋйсѧ, ꙗ҆́кѡ и҆́стиннѡ премѣни́лъ є҆сѝ вре́мєннаѧ на вѣ̑чнаѧ: ра́дꙋйсѧ, ꙗ҆́кѡ преше́лъ є҆сѝ ѿ печа́ли на ра́дость.

Ра́дꙋйсѧ, ꙗ҆́кѡ при́снѡ наслажда́ѧсѧ мы́слей неизрече́нныхъ: ра́дꙋйсѧ, ꙗ҆́кѡ свои́мъ житїе́мъ всѣ́хъ небе́сныхъ и҆ земны́хъ жи́телей ᲂу҆диви́лъ є҆сѝ.

Ра́дꙋйсѧ, ꙗ҆́кѡ крⷭ҇тъ тво́й со мно́гимъ терпе́нїемъ носи́лъ є҆сѝ: ра́дꙋйсѧ, ꙗ҆́кѡ неꙋкло́ннѡ приско́рбнымъ пꙋте́мъ ше́ствовалъ є҆сѝ.

Ра́дꙋйсѧ, непоколеби́мое пра́вды пра́вило: ра́дꙋйсѧ, свѣ́тлаѧ ст҃и́телей похвало̀.

Ра́дꙋйсѧ, благі́й ра́бе вѣ́рный, ꙗ҆́кѡ ѿ бг҃а ввѣ́ренный тебѣ̀ тала́нтъ возрасти́лъ є҆сѝ: ра́дꙋйсѧ, гра́дꙋ росто́вꙋ вели́кое ᲂу҆краше́нїе.

Ра́дꙋйсѧ, всеѧ̀ рѡссі́и ра́дованїе.

Ра́дꙋйсѧ, но́вый чꙋдотво́рче ѳео́дѡре.