Канон святому мученику Парамону Вифинскому

Пою́ща светоно́сную твою́ па́мять, му́чениче Парамо́не, свеща́тельными Ду́ха заря́ми се́рдце мое́ просвети́ и пребыва́ти ми́ Боже́ственными законоположе́ньми укрепи́.

Му́ченическим пресве́тло благосла́вием, блаже́нне, обогати́лся еси́, му́ченическими просия́в добро́тами и кра́сными ра́нами украси́вся, Парамо́не. Те́мже тя́ ве́рно ублажа́ем.

Во́д животво́рных Ду́ха сы́й испо́лнен, безбо́жия зно́ем лю́те иста́явшия ороси́л еси́ и к воде́, сла́вне, воспокое́ния путеводи́л еси́.

Возноше́ние вра́жие, смири́вся Христа́ ра́ди, разруши́л еси́ и того́ полки́ мече́м терпе́ния ссе́кл еси́.

Разруши́л еси́ лука́вый сове́т и́же на ве́ру на́шу и кре́пко пострада́л еси́, му́чениче страстоте́рпче Парамо́не.

Укрепи́лся еси́ Боже́ственною благода́тию, я́ко во́ин си́лен, и лю́тыя му́ки, му́чениче, я́коже со́н, вмени́л еси́.

Се́рдце твое́, му́жеством огражда́емо и дерзнове́нием, сла́вне, разжига́емо, му́ки многоплете́нныя младе́нец стреля́ния, му́чениче доблему́дренне, вмени́л еси́.

Умерщвля́еми повеле́нием мучи́теля, страда́льцы ви́дев, я́коже они́, боже́ственную ре́вность прия́ше му́ченик Парамо́н и к страда́нию прии́де.

Кре́пко тя́ растяга́ема и ко́пии неми́лостивно бодо́ма, и ко́зни вра́жия побежда́юща, Христо́с венча́ тя подвигополо́жник, блаже́нне Парамо́не.

Терпе́нию удивля́яся му́чеников и те́х соверше́нию дивя́ся, сла́вне, те́х приобщи́лся еси́ ре́вности ве́ры и пречестно́му страда́нию.

Да́р многоце́нный, тебе́ сама́го, прине́сл еси́ Творцу́ твоему́, пострада́в и пре́лесть победи́в, му́чеников удобре́ние.

Куми́ры, му́дре, и де́монская ка́пища сокруши́л еси́, утвержде́но помышле́ние стяжа́в на ка́мени Боже́ственныя ве́ры, Парамо́не.

Де́монов мно́жество му́жественно острупи́л еси́, острупле́нием пло́ти твоея́, страда́льче доблему́дренный, те́мже тя́ ублажа́ем.

Не бы́л еси́ во вре́мя подвиго́в лени́в, встанли́в же па́че и боже́ственному страда́нию до́блествен. Сего́ ра́ди вене́ц сла́вы получи́л еси́.

Му́чеников собо́ру себе́ сочета́л еси́, сконча́вшихся усе́рдно пре́жде твоего́ страда́ния, приснопа́мятне, и с ни́ми небе́сному черто́гу сподо́бился еси́.

Ко́пия подража́теля тя́ Христо́ва соде́лаша, и́миже пробода́емь, му́чениче, к Нему́ восте́кл еси́, венцено́сец, умертви́в терпе́ния ору́жием несмы́сленныя.

Враче́вств и чуде́с благода́тию, му́дре му́чениче, от Бо́га обога́щся све́тло, врачу́еши зову́щия: благослове́н еси́ в хра́ме сла́вы Твоея́, Го́споди.

Простира́емых му́к небре́гл еси́, все́ попече́ние име́я на небесе́х и зовы́й, достосла́вне: благослове́н еси́ в хра́ме сла́вы Твоея́, Го́споди.

Ты́ крове́й, страда́льче, огне́м всю́ попали́л еси́ ве́щь безбо́жия, сла́вне, лука́вую; росо́ю же чуде́с твои́х су́щия в зно́и лю́тых ороша́еши, Парамо́не, зовы́й: благослове́н еси́ в хра́ме сла́вы Твоея́, Го́споди.

Бо́драго тя́ храни́теля душа́м стяжа́вше, обогати́хомся, успову́юща де́монская мечта́ния всегда́, и пло́ти свире́пыя во́лны, и бу́рю помышле́ний, му́чениче многострада́льне, вопию́щих: благослови́те, вся́ дела́ Госпо́дня, Го́спода.

Струя́ми твои́х, свяще́нных крове́й багряни́цу очервлени́л еси́ себе́, обветша́ние весьма́ прия́ти не иму́щу, и, све́тло украша́емь, на небесе́х обита́еши, вопия́, блаже́нне: благослови́те, вся́ дела́ Госпо́дня, Го́спода.

Я́коже овча́ чи́стое, и же́ртва непоро́чная, и приноше́ние, всесожега́емо у́гльми свяще́ннаго, му́чениче, страда́ния, страстополо́жнику твоему́ Христу́ прине́слся еси́, му́дре, поя́: благослови́те, вся́ дела́ Госпо́дня, Го́спода.

Се́ светоза́рнаго страстоте́рпца светоявле́нная осия́ па́мять, все́х ве́рных сердца́ просвеща́ющи Боже́ственным Ду́хом, ра́достно ликовству́ющих и ве́рою блажа́щих.

Я́ко седмокру́жною десяти́цею и трегу́бною со́тницею непобеди́мых му́чеников совокупля́емь, с ни́миже те́ло твое́, му́чениче Христо́в, лежи́т, и с ни́ми моли́ спасти́ся на́м.

По́прище проше́дше боле́зненное, многови́дных му́к испо́лнено, и со Христо́м, ми́р победи́вшим, све́тло победи́вше, венцено́сцы му́ченицы, на небесе́х жи́тельствуете.

Взя́т бы́л еси́ от земли́ и по́чести твои́х по́двиг прия́л еси́, ны́не же ре́ки источа́еши на́м чуде́с, тебе́ чту́щим и благоче́стно па́мять твою́ торжеству́ющим, Парамо́не.

Пою́ща свѣтоно́снꙋю твою̀ па́мѧть, мꙋ́чениче парамо́не, свѣща́тельными дх҃а зарѧ́ми се́рдце моѐ просвѣтѝ, и҆ пребыва́ти мѝ бжⷭ҇твенными законоположе́ньми ᲂу҆крѣпѝ.

Мч҃ническимъ пресвѣ́тлѡ благосла́вїемъ, бл҃же́нне, ѡ҆богати́лсѧ є҆сѝ, мꙋ́ченическими просїѧ́въ добро́тами, и҆ кра́сными ра́нами ᲂу҆краси́всѧ, парамо́не. тѣ́мже тѧ̀ вѣ́рнѡ ᲂу҆блажа́емъ.

Во́дъ животво́рныхъ дх҃а сы́й и҆спо́лненъ, безбо́жїѧ зно́емъ лю́тѣ и҆ста́ѧвшыѧ ѡ҆роси́лъ є҆сѝ, и҆ къ водѣ̀, сла́вне, воспокое́нїѧ пꙋтеводи́лъ є҆сѝ.

Возноше́нїе вра́жїе, смири́всѧ хрⷭ҇та̀ ра́ди, разрꙋши́лъ є҆сѝ, и҆ тогѡ̀ полкѝ мече́мъ терпѣ́нїѧ ссѣ́клъ є҆сѝ.

Разрꙋши́лъ є҆сѝ лꙋка́вый совѣ́тъ, и҆́же на вѣ́рꙋ на́шꙋ, и҆ крѣ́пкѡ пострада́лъ є҆сѝ, мч҃ниче страстоте́рпче парамо́не.

Оу҆крѣпи́лсѧ є҆сѝ бжⷭ҇твенною благода́тїю, ꙗ҆́кѡ во́инъ си́ленъ, и҆ лю̑тыѧ мꙋ̑ки, мꙋ́чениче, ꙗ҆́коже со́нъ вмѣни́лъ є҆сѝ.

Се́рдце твоѐ мꙋ́жествомъ ѡ҆гражда́емо, и҆ дерзнове́нїемъ, сла́вне, разжига́емо, мꙋ̑ки многоплетє́нныѧ, младе́нєцъ стрѣлѧ̑нїѧ, мꙋ́чениче доблемꙋ́дренне, вмѣни́лъ є҆сѝ.

Оу҆мерщвлѧ́еми повелѣ́нїемъ мꙋчи́телѧ страда́льцы ви́дѣвъ, ꙗ҆́коже ѻ҆нѝ, бжⷭ҇твеннꙋю ре́вность прїѧ́ше мч҃никъ парамо́нъ и҆ къ страда́нїю прїи́де.

Крѣ́пкѡ тѧ̀ растѧга́ема, и҆ кѡ́пїи неми́лостивнѡ бодо́ма, и҆ кѡ́зни вра̑жїѧ побѣжда́юща, хрⷭ҇то́съ вѣнча́ тѧ подвигополо́жникъ, бл҃же́нне парамо́не.

Терпѣ́нїю ᲂу҆дивлѧ́ѧсѧ мꙋ́ченикѡвъ, и҆ тѣ́хъ соверше́нїю дивѧ́сѧ, сла́вне, тѣ́хъ приѡбщи́лсѧ є҆сѝ ре́вности вѣ́ры и҆ пречⷭ҇тно́мꙋ страда́нїю.

Да́ръ многоцѣ́нный тебѐ сама́го прине́слъ є҆сѝ творцꙋ̀ твоемꙋ̀, пострада́въ и҆ пре́лесть побѣди́въ, мꙋ́ченикѡвъ ᲂу҆добре́нїе.

Кꙋми́ры, мꙋ́дре, и҆ де́мѡнскаѧ ка̑пища сокрꙋши́лъ є҆сѝ, ᲂу҆твержде́но помышле́нїе стѧжа́въ, на ка́мени бжⷭ҇твенныѧ вѣ́ры, парамо́не.

Де́мѡнѡвъ мно́жество мꙋ́жественнѡ ѡ҆стрꙋпи́лъ є҆сѝ, ѡ҆стрꙋпле́нїемъ пло́ти твоеѧ̀, страда́льче доблемꙋ́дренный. тѣ́мже тѧ̀ ᲂу҆блажа́емъ.

Не бы́лъ є҆сѝ во вре́мѧ подвигѡ́въ лѣни́въ, встанли́въ же па́че, и҆ бжⷭ҇твенномꙋ страда́нїю до́блественъ. сегѡ̀ ра́ди вѣне́цъ сла́вы полꙋчи́лъ є҆сѝ.

Мꙋ́ченикѡвъ собо́рꙋ себѐ сочета́лъ є҆сѝ, сконча́вшихсѧ ᲂу҆се́рднѡ, пре́жде твоегѡ̀ страда́нїѧ, приснопа́мѧтне, и҆ съ ни́ми нбⷭ҇номꙋ черто́гꙋ сподо́билсѧ є҆сѝ.

Ко́пїѧ подража́телѧ тѧ̀ хрⷭ҇то́ва содѣ́лаша, и҆́миже пробода́емь, мꙋ́чениче, къ немꙋ̀ восте́клъ є҆сѝ вѣнцено́сецъ, ᲂу҆мертви́въ терпѣ́нїѧ ѻ҆рꙋ́жїемъ несмы́слєнныѧ.

Враче́вствъ и҆ чꙋде́съ благода́тїю, мꙋ́дре мꙋ́чениче, ѿ бг҃а ѡ҆бога́щсѧ свѣ́тлѡ, врачꙋ́еши зовꙋ́щыѧ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Простира́емыхъ мꙋ́къ небре́глъ є҆сѝ, всѐ попече́нїе и҆мѣ́ѧ на нб҃сѣ́хъ, и҆ зовы́й, достосла́вне: благослове́нъ є҆сѝ въ хра́мѣ сла́вы твоеѧ̀, гдⷭ҇и.

Ты̀ крове́й, страда́льче, ѻ҆гне́мъ всю̀ попали́лъ є҆сѝ ве́щь безбо́жїѧ, сла́вне, лꙋка́вꙋю: росо́ю же чꙋде́съ твои́хъ, сꙋ́щыѧ въ зно́и лю́тыхъ ѡ҆роша́еши, парамо́не, зовы́й: благослове́нъ є҆сѝ въ хра́мѣ сла́вы твоеѧ̀, гдⷭ҇и.

Бо́драго тѧ̀ храни́телѧ дꙋша́мъ стѧжа́вше, ѡ҆богати́хомсѧ, ᲂу҆сповꙋ́юща де́мѡнскаѧ мечта̑нїѧ всегда̀, и҆ пло́ти свирѣ̑пыѧ во́лны, и҆ бꙋ́рю помышле́нїй, мꙋ́чениче многострада́льне, вопїю́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Стрꙋѧ́ми твои́хъ свѧще́нныхъ крове́й багрѧни́цꙋ ѡ҆червлени́лъ є҆сѝ себѣ̀, ѡ҆бветша́нїе весьма̀ прїѧ́ти не и҆мꙋ́щꙋ, и҆ свѣ́тлѡ ᲂу҆краша́емь на нб҃сѣ́хъ ѡ҆бита́еши, вопїѧ̀, блаже́нне: благослови́те, всѧ̑ дѣла̀ гдⷭ҇нѧ, гдⷭ҇а.

Ꙗ҆́коже ѻ҆вча̀ чи́стое, и҆ же́ртва непоро́чнаѧ, и҆ приноше́нїе всесожега́емо ᲂу҆́гльми свѧще́ннагѡ, мꙋ́чениче, страда́нїѧ, страстополо́жникꙋ твоемꙋ̀ хрⷭ҇тꙋ̀ прине́слсѧ є҆сѝ, мꙋ́дре, поѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Сѐ свѣтоза́рнагѡ страстоте́рпца свѣтоѧвле́ннаѧ ѡ҆сїѧ̀ па́мѧть, всѣ́хъ вѣ́рныхъ сердца̀ просвѣща́ющи бжⷭ҇твеннымъ дх҃омъ, ра́достнѡ ликовствꙋ́ющихъ и҆ вѣ́рою блажа́щихъ.

Ꙗ҆́кѡ седмокрꙋ́жною десѧти́цею и҆ трегꙋ́бною со́тницею непобѣди́мыхъ мꙋ́ченикѡвъ совокꙋплѧ́емь: съ ни́миже тѣ́ло твоѐ, мꙋ́чениче хрⷭ҇то́въ, лежи́тъ, и҆ съ ни́ми молѝ спасти́сѧ на́мъ.

По́прище проше́дше болѣ́зненное, многови́дныхъ мꙋ́къ и҆спо́лнено, и҆ со хрⷭ҇то́мъ мі́ръ побѣди́вшимъ, свѣ́тлѡ побѣди́вше, вѣнцено́сцы мч҃ницы на нб҃сѣ́хъ жи́тельствꙋете.

Взѧ́тъ бы́лъ є҆сѝ ѿ землѝ, и҆ по́чєсти твои́хъ пѡ́двигъ прїѧ́лъ є҆сѝ, ны́нѣ же рѣ́ки и҆сточа́еши на́мъ чꙋде́съ тебѐ чтꙋ́щымъ и҆ благоче́стнѡ па́мѧть твою̀ торжествꙋ́ющымъ, парамо́не.