Канон молебный святой великомученице Варваре Илиопольской

Во́ду нече́стия тиме́нну оста́вивши, к воде́ чисти́тельной притекла́ еси́, Варва́ро, и на́ша очи́сти сердца́, чи́сто пе́ти твоя́ страда́ния.

Водо́ю креще́ния очи́стившися, великому́ченице, чи́стому Жениху́, Христу́, прилепи́лася еси́, Ему́же и на́с чи́сто присво́й, моли́твами твои́ми.

В воде́ пото́пльшему зми́я лука́ваго подо́бящися, кро́вию твое́ю страда́льческою вра́жию погрузи́ла еси́ си́лу, страстоно́сице, от него́же и на́м изба́витися Спа́са умоли́.

Небе́снаго кру́га смотря́ющи украше́ние, му́драя де́во Варва́ро, Верхотво́рца позна́ла еси́, Его́же и возлю́бльши, Тому́ служи́ти изво́лила еси́; и на́с в любви́ Его́ утверди́, мо́лимся.

Небе́снаго Творца́ в Тро́ице пресве́тлое изобразу́ющи естество́, три́ о́кна в ба́не оте́честей изобрази́ти повеле́ла еси́, Тро́ическому покланя́тися уча́щи Божеству́, Ему́же и на́с ве́чно покланя́тися сподо́би.

Небе́снаго черто́га жела́ющи, небе́сному Жениху́ чистоту́ де́вства твоего́ соблюла́ еси́, вре́меннаго презре́вши; и мене́ в чистоте́ Тому́ служи́ти, му́ченице, укрепи́.

Услы́шавши, Варва́ро, небеса́, пове́дающа сла́ву Бо́жию, на земли́ Бо́га сла́вити возжела́ла еси́, Его́же сла́вы и на́с сподо́би.

Услы́шав оте́ц тво́й тебе́, Вы́шняго Отца́ испове́дующу, гоня́ше на убие́ние, но не возмо́же отто́ргнути от и́стиннаго Бо́га.

Услы́шавши преще́ния оте́ческая и му́ки от него́ терпя́щи, Варва́ро, непоколеби́ма пребыла́ еси́, и мене́ непоколеби́ма в доброде́телех упра́ви.

Просвети́вши свещу́ свою́, му́ченице, ве́рою, свеща́ми опали́ти те́ло твое́ предала́ еси́, в черто́г небе́сный све́тло вни́ти жела́ющи.

Просвеща́хуся ве́рою неве́рием омраче́ннии лю́дие, ви́дяще тя́, жже́ния, бие́ния, ре́зания терпя́щую до́блественне, му́ченице.

Просвети́ мя́, о Варва́ро, омраче́ннаго мгло́ю грехо́вною, и све́том невече́рним осиява́тися, све́тлая де́во, молю́ся, сотвори́.

Моли́тву твою́ страда́льческую услы́шав, Христо́с, Варва́ро, в темни́це затворе́нную посети́, исцеле́ние от ра́н подаде́ и на по́двиг укрепи́; ты́ же моя́ ра́ны грехо́вныя уврачу́й, му́ченице, молю́ся.

Моли́твою ти́, и страда́льческим тве́рдым терпе́нием, и чу́дным исцеле́нием Иулиани́ю от злоче́стия привлекла́ еси́ страда́ти с тобо́ю за Христа́, привлецы́ и мене́ к го́рнему мудрова́нию, страстоно́сице.

Моли́тву вся́к принося́й с ве́рою тебе́, му́ченице, и к моща́м твои́м святы́м притека́яй, душе́вных страсте́й и теле́сных исцеле́ние ско́ро прие́млет, е́же и на́м бога́тно подава́й, мо́лимся.

Де́ти евре́йския а́нгел от огня́ неопа́льны сохрани́вый и тебе́, Варва́ро, на́гу води́му, от студа́ защити́, оде́ждою свы́ше обле́к, пою́щую: благослове́н еси́, Го́споди Бо́же, во ве́ки.

Де́тское игра́лище вменя́ющи му́ки, не пощади́ла еси́ те́ла твоего́, е́же бы́ти ему́ за Христа́ стру́жему и о́стро стира́ему, великому́ченице, пою́щи: благослове́н еси́, Го́споди Бо́же, во ве́ки.

Дете́й евре́йских и а́з подража́я, Варва́ро, хвалю́ Христа́, да́вшаго тебе́ кре́пость; ты́ же мя́, на по́двиг доброде́телей укре́пльши, оде́ждою небе́сною облещи́ся сподо́би во ве́ки.

Победи́телие непобеди́мыя твоея́ ве́ры мучи́теле тща́шеся бы́ти, сосца́ твоя́ неща́дно отре́зоваху, ты́ же, тве́рдо терпя́щи, млеко́м уче́ния о Бо́зе напои́ла еси́ предстоя́щия и благословя́щия Христа́ во ве́ки.

Победи́ла еси́ му́жеством твои́м, му́ченице Варва́ро, вся́ мучи́тельская ухищре́ния. Моли́ у́бо Влады́ку Христа́, мо́лим тя́, все́м ве́рным на враги́ побе́ду да́ти, пою́щим: благослови́те вся́ дела́ Го́спода, и превозноси́те Его́ во ве́ки.

Победи́тельница суро́ваго отца́ твоего́ яви́лася еси́ му́ченице: о́н бо небе́сным огне́м во а́дский о́гнь низведе́ся, ты́ же на не́бо возшла́ еси́, е́же и мне́ исхода́тайствуй, от огня́ избавля́ющи мя́ во ве́ки.

Вои́стинну Бо́га испове́дающи, му́ченице, черто́г небе́сный насле́дила еси́, его́же и на́с сподо́би, да с Тобо́ю Христа́ ве́чно велича́ем.

Вои́стинну на тебе́, Варва́ро, испо́лнися Христо́во прорече́ние: преда́ст оте́ц ча́до на сме́рть, е́юже ты́ ве́чный живо́т обрела́ еси́.

Вои́стинну никто́же притека́яй к тебе́, страстоно́сице, то́щ благода́ти твоея́ отхо́дит, ея́же и мене́ испо́лни, молю́ся.

Во́дꙋ нече́стїѧ тимѣ́ннꙋ ѡ҆ста́вивши, къ водѣ̀ чисти́тельной притекла̀ є҆сѝ варва́ро: и҆ на́ша ѡ҆чи́сти сердца̀, чи́стѡ пѣ́ти твоѧ̀ страда́нїѧ.

Водо́ю кр҃ще́нїѧ ѡ҆чи́стившисѧ великомꙋ́ченице, чⷭ҇томꙋ женихꙋ̀ хрⷭ҇тꙋ̀ прилѣпи́ласѧ є҆сѝ: є҆мꙋ́же и҆ на́съ чи́стѡ присво́й, моли́твами твои́ми.

Въ водѣ̀ пото́пльшемꙋ ѕмі́ѧ лꙋка́ваго подо́бѧщисѧ, кро́вїю твое́ю страда́льческою, вра́жїю погрꙋзи́ла є҆сѝ си́лꙋ, стрⷭ҇тоно́сице: ѿ негѡ́же и҆ на́мъ и҆зба́витисѧ сп҃са ᲂу҆молѝ.

Нбⷭ҇нагѡ крꙋ́га смотрѧ́ющи ᲂу҆краше́нїе, мꙋ́драѧ дв҃о варва́ро, верхотво́рца позна́ла є҆сѝ: є҆го́же и҆ возлю́бльши, томꙋ̀ слꙋжи́ти и҆зво́лила є҆сѝ: и҆ на́съ въ любвѝ є҆гѡ̀ ᲂу҆твердѝ, мо́лимсѧ.

Нбⷭ҇нагѡ творца̀ въ трⷪ҇цѣ пресвѣ́тлое и҆зѻбразꙋ́ющи є҆стество̀, трѝ ѻ҆́кна въ ба́нѣ ѻ҆те́честѣй и҆зѻбрази́ти повелѣ́ла є҆сѝ, трⷪ҇ческомꙋ покланѧ́тисѧ ᲂу҆ча́щи бж҃ествꙋ̀: є҆мꙋ́же и҆ на́съ вѣ́чнѡ покланѧ́тисѧ сподо́би.

Нбⷭ҇нагѡ черто́га жела́ющи, нбⷭ҇номꙋ женихꙋ̀ чⷭ҇тотꙋ̀ двⷭ҇тва твоегѡ̀ соблюла̀ є҆сѝ, вре́меннаго презрѣ́вши и҆ менѐ въ чистотѣ̀ томꙋ̀ слꙋжи́ти мч҃нце ᲂу҆крѣпѝ.

Оу҆слы́шавши варва́ро, нб҃са̀ повѣ́дающа сла́вꙋ бж҃їю, на землѝ бг҃а сла́вити возжела́ла є҆сѝ: є҆гѡ́же сла́вы и҆ на́съ сподо́би.

Оу҆слы́шавъ ѻ҆те́цъ тво́й тебѐ, вы́шнѧго ѻ҆ц҃а̀ и҆сповѣ́дꙋющꙋ, гонѧ́ше на ᲂу҆бїе́нїе: но не возмо́же ѿто́ргнꙋти ѿ и҆́стиннагѡ бг҃а.

Оу҆слы́шавши преще́нїѧ ѻ҆те́ческаѧ, и҆ мꙋ̑ки ѿ негѡ̀ терпѧ́щи варва́ро, непоколеби́ма пребыла̀ є҆сѝ: и҆ менѐ непоколеби́ма въ добродѣ́телехъ ᲂу҆пра́ви.

Просвѣти́вши свѣщꙋ̀ свою̀ мч҃нце вѣ́рою, свѣща́ми ѡ҆пали́ти тѣ́ло твоѐ предала̀ є҆сѝ, въ черто́гъ нбⷭ҇ный свѣ́тлѡ вни́ти жела́ющи.

Просвѣща́хꙋсѧ вѣ́рою, невѣ́рїемъ ѡ҆мраче́ннїи лю́дїе, ви́дѧще тѧ̀, жжє́нїѧ, бїє́нїѧ, рѣ̑занїѧ терпѧ́щꙋю до́блественнѣ мч҃нце.

Просвѣти́ мѧ ѽ варва́ро, ѡ҆мраче́ннаго мгло́ю грѣхо́вною, и҆ свѣ́томъ невече́рнимъ ѡ҆сїѧва́тисѧ, свѣ́тлаѧ дв҃о, молю́сѧ, сотворѝ.

Мл҃твꙋ твою̀ страда́льческꙋю ᲂу҆слы́шавъ хрⷭ҇то́съ варва́ро, въ темни́цѣ затворе́ннꙋю посѣтѝ, и҆сцѣле́нїе ѿ ра́нъ подадѐ, и҆ на по́двигъ ᲂу҆крѣпѝ: ты́ же моѧ̀ ра̑ны грѣхѡ́вныѧ ᲂу҆врачꙋ́й мꙋ́ченице, молю́сѧ.

Мл҃твою тѝ и҆ страда́льческимъ тве́рдымъ терпѣ́нїемъ, и҆ чꙋ́днымъ и҆сцѣле́нїемъ, і҆ꙋлїані́ю ѿ ѕлоче́стїѧ привлекла̀ є҆сѝ, страда́ти съ тобо́ю за хрⷭ҇та̀: привлецы̀ и҆ менѐ къ го́рнемꙋ мꙋдрова́нїю, страстоно́сице.

Моли́твꙋ всѧ́къ приносѧ́й съ вѣ́рою тебѣ̀ мч҃нце, и҆ къ моща́мъ твои́мъ ст҃ы́мъ притека́ѧй, дꙋше́вныхъ страсте́й и҆ тѣле́сныхъ и҆сцѣле́нїе ско́рѡ прїе́млетъ: є҆́же и҆ на́мъ бога́тнѡ подава́й, мо́лимсѧ.

Дѣ́ти є҆врє́йскїѧ а҆́гг҃лъ ѿ ѻ҆гнѧ̀ неѡпа́льны сохрани́вый, и҆ тебѐ варва́ро на́гꙋ води́мꙋ ѿ стꙋда̀ защитѝ, ѻ҆де́ждою свы́ше ѡ҆бле́къ пою́щꙋю: бл҃гослове́нъ є҆сѝ гдⷭ҇и бж҃е во вѣ́ки.

Дѣ́тское и҆гра́лище вмѣнѧ́ющи мꙋ̑ки, не пощади́ла є҆сѝ тѣ́ла твоегѡ̀, є҆́же бы́ти є҆мꙋ̀ за хрⷭ҇та̀ стрꙋ́жемꙋ, и҆ ѻ҆́стрѡ стира́емꙋ великомч҃нце, пою́щи: бл҃гослове́нъ є҆сѝ гдⷭ҇и бж҃е во вѣ́ки.

Дѣте́й є҆вре́йскихъ и҆ а҆́зъ подража́ѧ варва́ро, хвалю̀ хрⷭ҇та̀ да́вшагѡ тебѣ̀ крѣ́пость: ты́ же мѧ̀ на по́двигъ добродѣ́телей ᲂу҆крѣ́пльши, ѻ҆де́ждою нбⷭ҇ною ѡ҆блещи́сѧ сподо́би во вѣ́ки.

Побѣди́телїе непобѣди́мыѧ твоеѧ̀ вѣ́ры, мꙋчи́телє тща́шесѧ бы́ти, сосца̀ твоѧ̑ неща́днѡ ѿрѣ́зовахꙋ: ты́ же тве́рдѡ терпѧ́щи, млеко́мъ ᲂу҆че́нїѧ ѡ҆ бз҃ѣ напои́ла є҆сѝ предстоѧ́щыѧ и҆ бл҃гословѧ́щыѧ хрⷭ҇та̀ во вѣ́ки.

Побѣди́ла є҆сѝ мꙋ́жествомъ твои́мъ мꙋ́ченице варва́ро, всѧ̀ мꙋчи́тєльскаѧ ᲂу҆хищрє́нїѧ. молѝ ᲂу҆̀бо влⷣкꙋ хрⷭ҇та̀, мо́лимъ тѧ̀, всѣ́мъ вѣ̑рнымъ на врагѝ побѣ́дꙋ да́ти, пою́щымъ: бл҃гослови́те всѧ̀ дѣла̀ гдⷭ҇а, и҆ превозноси́те є҆го̀ во вѣ́ки.

Побѣди́тельница сꙋро́вагѡ ѻ҆тца̀ твоегѡ̀ ꙗ҆ви́ласѧ є҆сѝ мꙋ́ченице: ѻ҆́нъ бо нбⷭ҇нымъ ѻ҆гне́мъ во а҆́дскїй ѻ҆́гнь низведе́сѧ, ты́ же на нб҃о возшла̀ є҆сѝ: є҆́же и҆ мнѣ̀ и҆схода́тайствꙋй, ѿ ѻ҆гнѧ̀ и҆збавлѧ́ющи мѧ̀ во вѣ́ки.

Вои́стиннꙋ бг҃а и҆сповѣ́дающи мч҃нце, черто́гъ нбⷭ҇ный наслѣ́дила є҆сѝ: є҆гѡ́же и҆ на́съ сподо́би, да съ тобо́ю хрⷭ҇та̀ вѣ́чнѡ велича́емъ.

Вои́стиннꙋ на тебѣ̀ варва́ро и҆спо́лнисѧ хрⷭ҇то́во прорече́нїе: преда́стъ ѻ҆те́цъ ча́до на сме́рть, є҆́юже ты̀ вѣ́чный живо́тъ ѡ҆брѣла̀ є҆сѝ.

Вои́стиннꙋ никто́же притека́ѧй къ тебѣ̀ страстоно́сице, то́щъ бл҃года́ти твоеѧ̀ ѿхо́дитъ, є҆ѧ́же и҆ менѐ и҆спо́лни, молю́сѧ.