Кондак 1
Избра́ннаго сосу́да благода́ти Бо́жия, Иоа́нна богохва́льнаго, притеце́м вси́ восхвали́ти, от Дама́ска у́бо гра́да звезду́ всесве́тло возше́дшую, Вселе́нския же Це́ркве свире́ль приснопою́щую Боже́ственных та́ин и́стину, пренебре́гшаго сла́ву ми́ра сла́вы ра́ди Христа́ Бо́га, да вознесе́м ему́ моли́тву ра́дования:
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Икос 1
Ангелонра́вное житие́ предпоче́т, Иоа́нне благознамени́те, прине́сл еси́ же́ртву Христу́ великосано́вныя жи́зни отрече́ния, си́це и от му́дрости челове́чи поче́рп, наипа́че возлюби́л еси́ Бо́жия прему́дрости сла́дость, и в пусты́ни смире́нно все́лься, изъясни́л еси́ пра́выя ве́ры высо́т простоту́. Сего́ ра́ди я́ко боже́ственных уче́ний исто́чнику взыва́ем ти́:
Ра́дуйся, свети́льниче Боже́ственнаго све́та, сия́яй в нощи́ неве́рия; ра́дуйся, побо́рниче и́стинныя ве́ры, умудря́яй словесы́ богопозна́ния.
Ра́дуйся, благознамени́таго ро́да о́трасле; ра́дуйся, смиренному́драго преподо́бия о́бразе.
Ра́дуйся, процве́тшая во среде́ ага́рян христиа́нская похвало́; ра́дуйся, во тщесла́внем ми́ре прозя́бшее кро́тости Христо́вы преподо́бие.
Ра́дуйся, от филосо́фов ми́ра науче́нный; ра́дуйся, от прему́дрости Бо́жия умудре́нный.
Ра́дуйся, я́ко возда́л еси́ Бо́жие Бо́гови; ра́дуйся, я́ко презре́л еси́ кра́сная ца́рская.
Ра́дуйся, благода́ти Бо́жия тезоимени́те; ра́дуйся, Ца́рства ве́чнаго насле́дниче.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 2
Ви́дя Бо́г, я́ко се́мя, И́м се́янное, на до́бру зе́млю паде́ и хо́щет пло́д многобога́т принести́, упа́сл е́сть до́м тво́й, Иоа́нне Дамаски́не, роди́телев, в Христо́ве ве́ре утвержде́н, я́ко да неудобоприя́тну те́рнию яви́т в не́м богоприя́тную розгу́, всеми́рно песносло́вящую: Аллилу́иа.
Икос 2
Ра́зума высокому́дрие посрамля́ется, ви́дящим на́м пе́рваго сове́тника власти́теля ага́рянскаго, вла́сть во стране́ инове́рней ве́лию иму́ща, уничиже́нным же и гони́мым прилежа́ща се́рдцем, оби́димым и досажда́емым помога́юща. Те́мже и ны́не припаде́м ко Иоа́нну, о на́с печа́льнику, да ны́ услы́шит к нему́ вопию́щия:
Ра́дуйся, христолюби́выя па́ствы благи́й упра́вителю; ра́дуйся, ангелоподо́бный в беда́х су́щим храни́телю.
Ра́дуйся, а́ки до́брый самаряни́н больны́м прилежа́вый; ра́дуйся, благи́ми де́лы Христа́ пропове́давый.
Ра́дуйся, рабо́тати Бо́гови в безмо́лвии возжеле́вый; ра́дуйся, оба́че кро́тце повину́выйся власте́м, да послу́жиши держа́ве твое́й.
Ра́дуйся, вся́ку вла́сть я́ко от Бо́га су́щу почита́вый; ра́дуйся, от смире́ния вели́кая обрета́вый.
Ра́дуйся, я́ко ро́да твоего́ сла́ву вельми́ умно́жил еси́; ра́дуйся, превозше́дый в ра́зуме наста́вников и сро́дников твои́х.
Ра́дуйся, я́ко во́лю се́рдца твоего́ во́ли Бо́жии приклони́л еси́; ра́дуйся, я́ко ве́ры твоея́ о́гнь в се́рдцы твое́м при́сно пламене́ющ вся́ко соблю́л еси́.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 3
Си́лою Вы́шняго подви́женный, Иоа́нне богопослу́шне, царя́ иконобо́рца не убоя́лся еси́: подо́бя бо ся Иоа́нну Предте́чи, ре́вностнаго словесе́ не удержа́л еси́, да научи́ши лю́ди, кла́няющася во ико́не Первоо́бразу, взыва́ти Бо́гови: Аллилу́иа.
Икос 3
Име́я вну́трь себе́ Боже́ственныя сла́вы ре́вность, возвы́сил еси́ гла́с тво́й, Иоа́нне Дамаски́не, и писа́ньми обличи́л еси́ ху́льники церко́вныя, да отщети́тся те́х зломы́слие. Си́х ра́ди бы́вших о тебе́, сла́вне, сла́вим тя́:
Ра́дуйся, пе́рваго честна́го богосло́вия до́брый после́дователю; ра́дуйся, вне́млющих да́же до ны́не слове́сным млеко́м пита́телю.
Ра́дуйся, сло́ва Бо́жия ме́ч взе́мый, я́ко да ерети́ческаго мудрова́ния главу́ усече́ши; ра́дуйся, Преда́ния церко́внаго прее́мниче, и́мже ве́ры измене́ния избе́гнеши.
Ра́дуйся, ве́ру Христо́ву сло́вом изъясни́вый; ра́дуйся, прему́драя Небе́сных словесы́ му́дрости земноро́дных изложи́вый.
Ра́дуйся, гро́мов гла́се богосло́вствуяй; ра́дуйся, сло́ва Бо́жия бога́тство некра́домое.
Ра́дуйся, церко́внаго зда́ния пли́нфо несокруши́мая; ра́дуйся, ни еди́но от вра́жия ле́сти поколе́блемый.
Ра́дуйся, основа́ния богому́дрых муже́й проба́вителю; ра́дуйся, благоглаго́ливых отце́в сораде́телю.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 4
Бу́ри злоко́зненныя клеветы́ восприя́л еси́ обстоя́ние, преподо́бне богосло́ве, богосло́вия ра́ди твоего́. Се́ еди́н ца́рь ино́му подо́бие письма́ твоего́ пи́шет, я́ко а́ще преда́тельство мни́л еси́ в не́м: се́ лжехристо́в Христо́ва сарацы́ну предае́т на ка́знь, Иу́ды подража́тель, да я́ко умолча́т уста́, глаго́лющая пра́во: Аллилу́иа.
Икос 4
Благоуслы́шася наве́т о тебе́ во у́шию царя́ Дама́скова: оглаго́льству бо подло́жныя хартии́ ве́ру я́т, ника́ко оправда́ний словесе́ неви́ннаго боголю́бца послу́ша повели́тель: на усече́ние десни́цы предаде́ тя, е́юже пи́сьменне вси́ ху́лящии Бо́га бя́ху облича́лися, но сего́ ра́ди тебе́, о Иоа́нне, воспое́м:
Ра́дуйся, ве́дый, я́ко на пра́во сла́вящия Бо́га ко́зни вра́жия изоби́луют; ра́дуйся, те́х дово́льное да́же до кро́ве де́йство претерпе́вый.
Ра́дуйся, му́ченическому ли́ку соприче́тниче; ра́дуйся, испове́дником Христо́вым и́стый о́бщниче.
Ра́дуйся, руко́ Боговоди́тельствуемая; ра́дуйся, льсти́ваго врага́ до́блий одоле́телю.
Ра́дуйся, изъясни́тельное Неопи́саннаго писа́ние; ра́дуйся, лука́ваго де́йства посрамле́ние.
Ра́дуйся, я́ко от стре́л зави́стников стра́ждеши; ра́дуйся, я́ко те́ми уязвля́емь, пра́вды Бо́жия не отрека́ешися.
Ра́дуйся, я́ко кро́вию вме́сто черни́л ру́ку твою́ омочи́л еси́; ра́дуйся, я́ко по ка́зни Бо́жия Ма́тере и Го́спода попече́нию ся́ пре́дал еси́.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 5
Боготе́чныя звезды́ сла́ву подража́ющи, яви́ся десни́ца твоя́, Иоа́нне богоно́се, я́ко волхво́м, указу́ющая лю́дем, ка́ко мо́гут поклоне́ние пра́во принести́ Бо́гови, во о́бразе у́бо зря́ще Су́щаго, в пе́нии же Тому́ пою́ще: Аллилу́иа.
Икос 5
Ви́де Пречи́стая Влады́чица Иоа́нна припа́дающа ко о́бразу Ея́, в боле́зни стеня́ща, усече́нную десни́цу прилага́юща, и по ве́ре свое́й на Ея́ по́мощь упова́юща: вся́ бо соде́яти мо́жет, я́ко Ма́ти Бо́жия, хотя́щи. Яви́ся же ему́ во сне́ Пречи́стая, прие́млющи обе́т того́, писа́ньми не преста́ти восхваля́я Бо́га и Богороди́тельницу, и се́ исцеле́ние удо́бь дарова́ руце́ ве́рнаго, ему́же мы́ возопии́м:
Ра́дуйся, благогове́йный к Бо́гу моле́бниче; ра́дуйся, Богоро́дицы Пречи́стыя дерзнове́нный бесе́дниче.
Ра́дуйся, я́ко во у́шию Ея́ бы́сть моли́тва твоя́; ра́дуйся, я́ко вня́т Хода́таице вседержа́вный Сы́н Ея́.
Ра́дуйся, всемо́щнаго покро́ва Богома́тере ликова́ние; ра́дуйся, неистощи́мыя благода́ти Небе́сныя прия́телище.
Ра́дуйся, непосра́мленное упова́ние на Го́спода; ра́дуйся, цельбы́ Небе́сныя и на́м ны́не проше́ние.
Ра́дуйся, чудесе́ Бо́жия свиде́телю; ра́дуйся, оглаго́ланных, в боле́знех су́щих и в муче́ниих прия́телю.
Ра́дуйся, я́ко Всемогу́щаго Врача́ лека́рство улучи́л еси́; ра́дуйся, я́ко Тому́, в ве́ре па́ки укре́плься, все́м живото́м послужи́л еси́.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 6
Пропове́да покланя́емаго тобо́ю Бо́га чу́до исцеле́ния твоего́ пред царе́м сарацы́нским: го́ре мне́, проглаго́лати у́бо увеща́вшее, непра́веднаго же буесло́вия того́ пода́вшее разуме́ние. Ты́ же, Иоа́нне богоблаже́нне, воспе́л еси́ десни́цы Вы́шняго Боже́ственную си́лу: Аллилу́иа.
Икос 6
Сия́ние святы́ни твоея́ яви́ся пред царя́ Дама́сскаго, не удержа́ бо ле́сти вла́сть на се́рдцы неве́рнаго власти́теля власти́тель ле́сти, о Иоа́нне пра́ведне. Че́сть же са́на хотя́ тебе́ возврати́ти и вла́сти полноту́, услы́ша тя́ кня́зь, к нога́ма его́ припа́дша и прося́ща, да пу́стит тя́, по Го́споде ити́ мона́хом. Еда́ у́бо о се́м смире́нии не воспои́м избра́ннаго Христо́ва си́це:
Ра́дуйся, пра́веднаго жития́ оправда́ние; ра́дуйся, преподо́бнаго жи́тельства жела́ние.
Ра́дуйся, Богома́терняго чудесе́ соприча́стниче; ра́дуйся, Христо́вы и́стины изъясни́телю.
Ра́дуйся, срамля́ющим я́же о Христе́ оби́димыя срамле́ние; ра́дуйся, благословля́ющим я́же о Бо́зе благотворя́щия благослове́ние.
Ра́дуйся, Бо́жия чудесе́ явле́ние; ра́дуйся, я́ко яви́лся еси́ Богоневе́стныя Ма́тере благоволе́ние.
Ра́дуйся, и́ноческаго жития́ ча́ятелю; ра́дуйся, кра́сных земны́х, любве́ ра́ди Бо́жия, отрева́телю.
Ра́дуйся, собла́зну не име́вый ме́ста в се́рдцы твое́м; ра́дуйся, я́ко о́но то́чию любве́ и кро́тости испо́лнил еси́.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 7
Хотя́щу ти́ пра́во возда́ти сло́во Бо́гови и в нищету́ смире́ния облещи́ся, ра́бе благи́й Христо́в, рабы́ твоя́ пусти́л и вся́ име́ния разда́л еси́, в рабо́ту мона́ха предложи́тися гряды́й. Те́м у́бо во оби́тель прише́дый свята́го Са́ввы, игу́меном прия́т бы́в, хвале́бная воспе́л еси́: Аллилу́иа.
Икос 7
Но́вых подвиго́в риста́лище себе́ стяжа́л еси́, Иоа́нне во́ине Христо́в, еди́на ста́рца во учи́теля прие́м, я́ко да смире́нию научи́т тя́ и послуша́нию: се́ да не пре́жних чесо́ твори́л бы, а́ще и благи́х, по твое́й во́ли, но во́ля ста́рца, и безмо́лвие, и се́рдца чистота́, и тру́д рабо́тен тебе́ во о́браз бытия́ вмени́шася: сего́ ра́ди восхваля́ем тя́, блаже́нне Иоа́нне:
Ра́дуйся, фимиа́ме доброде́тельнаго жи́тельства; ра́дуйся, о гресе́х пре́жния жи́зни сле́з проли́тие.
Ра́дуйся, теле́сными труды́ украше́йся; ра́дуйся, духо́вными по́двиги преображе́йся.
Ра́дуйся, богогла́сная трубо́, смире́ния ра́ди умолча́вшая; ра́дуйся, писа́ло отложи́вый е́же избе́гнути превозноше́ния мы́сленнаго.
Ра́дуйся, теле́сно здра́вствуя, ду́шу уврачева́ти прише́дый; ра́дуйся, обоя́ от Творца́ прие́мый.
Ра́дуйся, высото́ смиренному́дрия; ра́дуйся, красото́ Христо́ва подража́ния.
Ра́дуйся, прекосло́вия и ро́пота в се́рдцы твое́м не позна́вый; ра́дуйся, зми́я гне́ва и сумне́ния из по́мысл твои́х изгна́вый.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 8
Стра́нное и А́нгелом, и челове́ком бы́сть ви́дети тя́, Иоа́нне богоно́се, во гра́де бы́вшия твоея́ сла́вы вре́тищем оболче́ннаго, по послуша́нию ко́шницы просты́я цено́ю превы́шшею и́щуща прода́ти: оба́че о таце́м небре́г уничиже́нии, помо́гшаго ти́ Бо́га благослове́ние духо́внаго отца́ испо́лнити хваля́ просла́вил еси́: Аллилу́иа.
Икос 8
Ве́сь бы́в го́рних испо́лнь, Иоа́нне богослове́сниче, обре́лся еси́ от ста́рца облича́емь, а́ки Ада́м преслуша́нием подпа́д рая́ отлуче́нию, в до́льних хоте́ние вмени́ бо то́й о еди́нем бра́те заупоко́йное твое́ пе́ние, е́же умоле́н бы́в сотвори́л бе́ ты́: мы́ же ве́рующе дне́сь ти́ во усла́де ра́йстей бы́ти, пое́м ти́ сла́вная:
Ра́дуйся, се́рдце имы́й состра́ждущее; ра́дуйся, вне́мляй слезе́ прося́щаго.
Ра́дуйся, поя́й сла́ву ко Христу́ отше́дших; ра́дуйся, услажда́яй живы́х о ра́дости Небе́с дости́гших.
Ра́дуйся, покая́ния пред сме́ртию моли́тву в пе́сни проли́ти науча́яй; ра́дуйся, вся́ тле́нная грехо́вная пред сре́тением Го́спода оста́вити взыва́яй.
Ра́дуйся, оста́вил бо еси́ высо́кая земна́я; ра́дуйся, насле́дил бо еси́ си́х ра́ди превы́спренняя Небе́сная.
Ра́дуйся, послуша́ния вся́каго исполне́ние на ся́ взе́мый; ра́дуйся, в преслуша́нии покая́ние де́тельное яви́вый.
Ра́дуйся, я́ко, греха́ ра́ди исправле́ния, гну́са не возгнуша́лся еси́; ра́дуйся, я́ко иску́са ра́ди неудобоприя́тная претерпе́л еси́.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 9
Вся́кое естество́ бы изнемогло́ наложе́ннаго на тя́, Иоа́нне смиреннолю́бче, преще́ния, а́ще и мона́шескими доброде́тельми украше́но: но твое́ зря́ ста́рец на уничиже́ния благоприя́тие, ти́ спребыва́юща воспе́ смире́нна се́рдцем и кро́ткаго Христа́: Аллилу́иа.
Икос 9
Вети́й глагололю́бных пра́здно яви́ся сло́во, благовеща́нна мудролю́бца Иоа́нна тща́щеся воспе́ти доброде́тель: не у́бо то́й свое́ю во́лею, но во́лею Пречи́стыя Влады́чицы, ко ста́рцу его́ я́вльшияся, откры́ уста́ своя́, Госпо́дь же та́ испо́лни Ду́ха. Да помо́жет Се́й и на́м, блаже́нне, тебе́ воспе́ти:
Ра́дуйся, вся́кия пло́ти ра́дость о Богоро́дице воспе́вый; ра́дуйся, я́ко веле́нием Пренепоро́чныя из устну́ твое́ю то́ки богосло́вия излия́шася.
Ра́дуйся, общежи́тельнаго жития́ согла́сие; ра́дуйся, мона́шескую мни́вый ке́ллию я́ко рая́ блаже́нство.
Ра́дуйся, неижди́вное ангелоподо́бное пе́ние; ра́дуйся, я́ко до ны́не преподо́бными гла́сы твои́ми Бо́га воспева́еши.
Ра́дуйся, сла́ву обреты́й в безсла́вии земне́м; ра́дуйся, собла́зна избеги́й в вели́чиих до́льных.
Ра́дуйся, о Цари́ Бо́зе раба́ себе́ соде́явый; ра́дуйся, ра́бство земны́я вла́сти презре́вый.
Ра́дуйся, е́же сла́вити Бо́га ме́де усто́м на́шим; ра́дуйся, богосло́вия необину́емаго златослове́сниче.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 10
Спасе́ния лю́дем хотя́щаго Бо́га просла́вил еси́, достоблаже́нне Иоа́нне богоревни́телю, да не ка́ко ра́зумы отве́ргнутся Творца́, у́мно челове́ки призыва́яй пе́ти И́же греха́ жа́ло сме́ртное от челове́к Отъе́мшаго: Аллилу́иа.
Икос 10
Стены́ церко́вныя ча́сть бы́в, святы́й уго́дниче Дамаски́не, твоея́ души́ врагу́ не да́л еси́, ни лю́ди церко́вныя растли́ти словесы́ бла́зными: не измышле́ний ба́сни ре́к, но посеще́ния сподо́блься Ду́ха Бо́жия, веща́л еси́, о Иоа́нне, Боже́ственная оправда́ния, о ни́хже си́це благода́рственне ти́ воспису́ем:
Ра́дуйся, Бо́га созерца́ющее се́рдце; ра́дуйся, духоначерта́нное писа́ние.
Ра́дуйся, на мы́сленный Сина́й боговиде́ния возше́дый; ра́дуйся, из глубины́ смире́ния на церко́вную го́ру святы́ни вознесы́йся.
Ра́дуйся, святи́телей тве́рдое богомы́слие; ра́дуйся, преподо́бных тишино́ смиренному́драя.
Ра́дуйся, иере́ем свяще́нныя та́йны изъясне́ние; ра́дуйся, ниже́ кому́ и́стину затворе́й сла́дости богопозна́ния.
Ра́дуйся, возлюби́вый не обину́яся после́довати пра́вде; ра́дуйся, из ке́ллии воздержа́ния израсти́вый плодобога́тство в духо́вных ча́дех.
Ра́дуйся, свети́льниче све́та пребоже́ственнаго; ра́дуйся, ма́нтиею и́ноческою погребы́й ми́ра сла́ву бре́нную.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 11
Пою́щим на́м словеса́ тобо́ю воспе́тая, благи́й Христо́в учениче́ Иоа́нне, исчи́слити я́ не могу́ще, не то́щих тщи́мся подража́ти глаго́лов мно́жество, но увере́ния Боже́ственнаго си́лу зря́ще в словесе́х твои́х, не премолчи́м в тебе́ Свята́го Ду́ха де́йствия, глаго́люще: Аллилу́иа.
Икос 11
Светосия́нную наде́жду живота́ ве́чнаго в творе́ния твоя́ вдохну́л еси́: все́м и́же погребсти́ иму́щим, е́же о на́с показа́л еси́ расторже́ния соу́за Богосочета́ннаго ду́ш и теле́с та́инство, оба́че блаже́нства нестаре́ющагося обетова́ние и во кро́вех пра́ведных вселе́ния наде́жду слове́сне изобразу́я; в тебе́ же ви́дим, блаже́нне Иоа́нне Дамаски́не, по преставле́нии твое́м, я́ко дово́льне послужи́вшу Бо́гови, си́х свято́е восприя́тие: те́мже, а́ще и ску́дную, приими́ от на́с пе́снь сию́:
Ра́дуйся, у гро́ба пла́чущия утеша́яй; ра́дуйся, глаго́лы усо́пших на́м пе́сненно веща́яй.
Ра́дуйся, о гряду́щих ко Го́споду моли́твенне воздыха́яй; ра́дуйся, сре́тение преста́вльшихся со Христо́м предобража́яй.
Ра́дуйся, слове́снаго врачева́ния нача́льниче; ра́дуйся, догмати́ческаго наказа́ния ресното́.
Ра́дуйся, бу́дущия жи́зни в го́рних яснозри́телю; ра́дуйся, о в нераска́янных гресе́х печа́ли повествова́телю.
Ра́дуйся, пе́сньми твои́ми сме́рти стра́х упрежда́яй; ра́дуйся, стра́ха Бо́жия утвержде́нию науча́яй.
Ра́дуйся, десни́це, кре́постию писа́ний благоле́пно просла́вленная; ра́дуйся, ра́зуме, просвеща́яй концы́.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 12
Благода́ти Да́теля во́льно восприя́л еси́ ра́зумом и се́рдцем, я́ко сы́й ра́б Госпо́день, ра́бства, Иоа́нне, мни́маго не убоя́лся еси́, лука́выя рабо́ты отверги́й соу́з, побе́дно восклица́я: Аллилу́иа.
Икос 12
Пое́м воспе́вшаго го́рних сла́ву, Иоа́нна всебога́таго: того́ дивля́емся благоплодоно́сию, о́браза уче́ния и му́дрости высоты́, смире́ния же тишины́ велегла́сныя, яви́ся бо вселе́нней правосла́вное исправле́ние и дре́вних христолю́бцев ко́рень, ему́же уста́ на́ша да не закосне́ют пе́ти:
Ра́дуйся, духо́внаго насле́дия сокро́вище; ра́дуйся, млека́ слове́снаго о спасе́нии изоби́льное источе́ние.
Ра́дуйся, на земли́ воспе́вый, а́ки А́нгелов ли́к, сла́ву Христо́ва Воскресе́ния; ра́дуйся, славосло́вяй ны́не Го́спода у Престо́ла Того́ на Небесе́х.
Ра́дуйся, Бо́жия Ма́тере слове́сная похвало́; ра́дуйся, Ца́рствия Небе́снаго живописа́телю.
Ра́дуйся, смоко́внице, пло́д тво́й во вре́мя свое́ преизоби́льно да́вшая; ра́дуйся, услади́вшее смо́квами слове́с твои́х благокоре́нное дре́во Христо́вы ве́ры.
Ра́дуйся, цве́те благоуха́яй и́стиною; ра́дуйся, ерети́ческаго злово́ния истощи́телю.
Ра́дуйся, сла́вы Бо́жия многопло́дное писа́ние; ра́дуйся, ве́ры Христо́вы неиждива́емое уче́ние.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 13
О вели́кий песносло́вче Иоа́нне Дамаски́не, ве́ры Христо́вы до́бльственный ра́тниче и учи́телю, велича́яй на земли́ го́рних Боже́ственную сла́ву, и до́льных науча́яй смы́слы и́стины: да не бу́дут тщи́ тебе́ моли́твы на́ша: услади́ на́с поуче́нии твои́ми, и Небе́сным засту́пничеством огради́ на́с, да небла́зненно со святы́нею твое́ю Вели́каго пое́м и велича́ем Бо́га: Аллилу́иа.
[Се́й конда́к глаго́лется три́жды.][Далее повторяем 1‑е икос и кондак:]
Повтор
Этот кондак читается трижды, затем икос 1-й и кондак 1-й.
Икос 1
Ангелонра́вное житие́ предпоче́т, Иоа́нне благознамени́те, прине́сл еси́ же́ртву Христу́ великосано́вныя жи́зни отрече́ния, си́це и от му́дрости челове́чи поче́рп, наипа́че возлюби́л еси́ Бо́жия прему́дрости сла́дость, и в пусты́ни смире́нно все́лься, изъясни́л еси́ пра́выя ве́ры высо́т простоту́. Сего́ ра́ди я́ко боже́ственных уче́ний исто́чнику взыва́ем ти́:
Ра́дуйся, свети́льниче Боже́ственнаго све́та, сия́яй в нощи́ неве́рия; ра́дуйся, побо́рниче и́стинныя ве́ры, умудря́яй словесы́ богопозна́ния.
Ра́дуйся, благознамени́таго ро́да о́трасле; ра́дуйся, смиренному́драго преподо́бия о́бразе.
Ра́дуйся, процве́тшая во среде́ ага́рян христиа́нская похвало́; ра́дуйся, во тщесла́внем ми́ре прозя́бшее кро́тости Христо́вы преподо́бие.
Ра́дуйся, от филосо́фов ми́ра науче́нный; ра́дуйся, от прему́дрости Бо́жия умудре́нный.
Ра́дуйся, я́ко возда́л еси́ Бо́жие Бо́гови; ра́дуйся, я́ко презре́л еси́ кра́сная ца́рская.
Ра́дуйся, благода́ти Бо́жия тезоимени́те; ра́дуйся, Ца́рства ве́чнаго насле́дниче.
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Кондак 1
Избра́ннаго сосу́да благода́ти Бо́жия, Иоа́нна богохва́льнаго, притеце́м вси́ восхвали́ти, от Дама́ска у́бо гра́да звезду́ всесве́тло возше́дшую, Вселе́нския же Це́ркве свире́ль приснопою́щую Боже́ственных та́ин и́стину, пренебре́гшаго сла́ву ми́ра сла́вы ра́ди Христа́ Бо́га, да вознесе́м ему́ моли́тву ра́дования:
Ра́дуйся, преподо́бне Иоа́нне, Це́ркве учи́телю сладкогла́сный и прему́дрый.
Молитвы
О преподо́бне свяще́нне Иоа́нне богосла́вный, Дама́скова похвало́, вселе́нныя правосла́вная велеле́пото: к тебе́ тече́м, к тебе́ мо́лимся, боже́ственный Дамаски́не: не преста́й про́чее моля́ся ко Пречи́стей Богоро́дице, зане́ у́бо и в житии́ твое́м земне́м послу́ша тя́: наипа́че же вы́ну пребу́ди моли́тва твоя́ о на́с ко Го́сподеви Бо́гу на́шему, Его́же Це́рковь ре́вностно, а́ки до́блий ра́тник, от ересе́й и со и́стиннаго пути́ поползнове́ния защити́л еси́. Свя́тче Бо́жий, уго́дниче преблаги́й, ты́, я́коже Соломо́н, ничесо́же испроси́в у Го́спода, ра́зве прему́дрости Бо́жия; к тому́ и смире́ния наказа́ния ничи́мже лише́н бы́л еси́, и в правле́нии страны́ твоея́ инове́рныя име́л еси́ ча́сть бога́тую: но те́м у́бо па́че показа́лся еси́ и́стинный христиани́н, в по́мощи пребыва́я убо́гим, оглаго́ланным, о пра́вей ве́ре гони́мым и угнета́емым. Помози́ на́м, Иоа́нне, соблюсти́ся, еда́ ка́ко не отсту́пим чи́м ма́лым от Христа́ Бо́га на́шего и Его́ Вселе́нския Це́ркве: огради́ святы́нею твое́ю, на́ми ны́не песносло́вимою, от зломы́слящих на́м враго́в ви́димых, наипа́че же от неви́димых духо́в зло́бы поднебе́сных. Научи́ ны, свя́те Иоа́нне, оти́шию серде́чному, ра́зума здравомы́слию, в ве́ре несумне́нию, к тому́ же любви́ я́же о Христе́ Иису́се, е́юже изря́дне украси́лся еси́, боже́ственне Дамаски́не. Бу́ди при́сный хода́тай и помо́щник во уче́нии пребыва́ющим: умудри́, уцелому́дри, просвети́ е́же у Престо́ла Бо́жия хода́тайством: с высоты́ го́рния сла́вы испроси́ вся́, я́же су́ть поле́зна спасе́ния ча́ющим и о сла́ве Бо́жией зде́, до́лу пеку́щимся. Пода́ждь сло́во бла́го и тве́рдо наста́вником, да Це́ркви ве́рныя сы́ны воспита́ют, и ча́да досто́йна держа́ве на́шей сотворя́т. Попецы́ся и о е́же смире́нию и кро́тости се́рдца научи́тися на́м, я́коже обоюдоо́стру мечу́, и́мже разсека́ется врага́ челове́ческаго плете́ние. Не оста́ви коего́ждо прося́щаго чесо́ у тебе́ в моли́тве, о благи́х де́лех благослови́ и наста́ви, да непреткнове́нно во сла́ву Ца́рства Небе́снаго поживе́м, иде́же со Влады́чицею Богоро́дицею Мари́ею и святы́ми все́ми, в ни́хже и ты́ еси́, неизрече́нное Госпо́дне благослови́тся и́мя, Отца́, и Сы́на, и Свята́го Ду́ха, всегда́, ны́не и при́сно, и во ве́ки веко́в. Ами́нь.
Боже́ственне Дамаски́не, о́тче Иоа́нне преподо́бне, Небе́снаго насле́дия учи́телю, па́стырей наста́вителю, глаго́ле я́сный уча́щих и благо́е уча́щихся внима́ние! Се́ мы́ ны́не сло́во ти́ хотя́ще моле́бное рещи́, не оставля́ем притека́ти ко твое́й святы́ни: о Небе́сных бо твое́ сотвори́л еси́ раче́ние, живо́т земны́й в жи́знь проба́вль ве́чную о Бо́зе. Те́мже у́бо проше́д путе́м неудобоходи́мым, удо́бь на́м уготовля́еши в Ца́рствие Небе́сное стези́ во уче́нии твое́м про́стем, и всеце́лем о Го́споде Иису́се твое́м житии́. О Крести́телев соиме́нниче, Христо́вых путе́й сказа́телю и от инохожде́ния духо́внаго в великомы́слии ульще́нных препя́тие, Вседержи́теля умоли́ держа́ву на́шу в ми́ре соблюсти́, от ересе́й и раско́лов те́ло огради́ти церко́вное, вла́сти и во́инства народолю́бны и лю́дем благочести́вым служи́тельны сотвори́ти и враги́ Оте́чествия на́шего вско́ре побежде́ны соде́яти, ра́зуму же на́шему пода́ти я́сность ева́нгельскую и се́рдцу о любви́ Боже́ственней простоту́. Сы́й насле́дия оте́ческаго ча́сть Дамаски́не, Правосла́вия полноты́ покажи́ ны́ прее́мники, о вели́кий Иоа́нне, велеле́пото церко́вная! Те́мже и при конце́ на́шем, а́ще и чи́м преступи́хом пред святы́нею пра́вды Бо́жия, испроси́ у Законополо́жника и Всеще́драго Судии́ прости́ти на́м я́ко ничесо́же блага́го сотво́ршим, зане́ не к кому́ бо ино́му в печа́ли или́ проше́нии припадо́хом, никому́же ино́му возвра́щшеся па́ки поклони́хомся, то́чию Христу́ Иису́су распя́тому и воскре́сшему, Сы́ну Бо́жию, с Ни́мже и Отцу́ Всевы́шнему, со Ду́хом Его́ Пресвяты́м, Боже́ственней се́й Тро́ице бу́ди сла́ва во ве́ки всеве́чныя. Ами́нь.
Конда́къ а҃
И҆збра́ннаго сосꙋ́да бл҃года́ти бж҃їѧ, і҆ѡа́нна бг҃охва́льнаго, притеце́мъ всѝ восхвали́ти, ѿ дама́ска ᲂу҆́бѡ гра́да ѕвѣздꙋ̀ всесвѣ́тлѡ возше́дшꙋю, вселе́нскїѧ же цр҃кве свирѣ́ль приснопою́щꙋю бжⷭ҇твенныхъ та̑инъ и҆́стинꙋ, пренебре́гшаго сла́вꙋ мі́ра сла́вы ра́ди хрⷭ҇та̀ бг҃а, да вознесе́мъ є҆мꙋ̀ мл҃твꙋ ра́дованїѧ:
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
І҆́косъ а҃
А҆гг҃лонра́вное житїѐ предпоче́тъ, і҆ѡа́нне бл҃гознамени́те, прине́слъ є҆сѝ же́ртвꙋ хрⷭ҇тꙋ̀ великосано́вныѧ жи́зни ѿрече́нїѧ, си́це и҆ ѿ мꙋ́дрости человѣ́чи поче́рпъ, наипа́че возлюби́лъ є҆сѝ бж҃їѧ премꙋ́дрости сла́дость, и҆ въ пꙋсты́ни смире́ннѡ все́льсѧ, и҆з̾ѧсни́лъ є҆сѝ пра́выѧ вѣ́ры высо́тъ простотꙋ̀. Сегѡ̀ ра́ди ꙗ҆́кѡ бжⷭ҇твенныхъ ᲂу҆че́нїй и҆сто́чникꙋ взыва́емъ тѝ:
Ра́дꙋйсѧ, свѣти́льниче бжⷭ҇твеннагѡ свѣ́та, сїѧ́ѧй въ нощѝ невѣ́рїѧ: ра́дꙋйсѧ, побо́рниче и҆́стинныѧ вѣ́ры, ᲂу҆мꙋдрѧ́ѧй словесы̀ бг҃опозна́нїѧ.
Ра́дꙋйсѧ, бл҃гознамени́тагѡ ро́да ѻ҆́трасле: ра́дꙋйсѧ, смиренномꙋ́драгѡ преподо́бїѧ ѻ҆́бразе.
Ра́дꙋйсѧ, процвѣ́тшаѧ во средѣ̀ а҆га́рѧнъ хрⷭ҇тїа́нскаѧ похвало̀: ра́дꙋйсѧ, во тщесла́внѣмъ мі́рѣ прозѧ́бшее кро́тости хрⷭ҇то́вы преподо́бїе.
Ра́дꙋйсѧ, ѿ фїлосо́фѡвъ мі́ра наꙋче́нный: ра́дꙋйсѧ, ѿ премꙋ́дрости бж҃їѧ ᲂу҆мꙋдре́нный.
Ра́дꙋйсѧ, ꙗ҆́кѡ возда́лъ є҆сѝ бж҃їе бг҃ови: ра́дꙋйсѧ, ꙗ҆́кѡ презрѣ́лъ є҆сѝ кра̑снаѧ ца̑рскаѧ.
Ра́дꙋйсѧ, бл҃года́ти бж҃їѧ тезоимени́те: ра́дꙋйсѧ, црⷭ҇тва вѣ́чнагѡ наслѣ́дниче.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ в҃
Ви́дѧ бг҃ъ, ꙗ҆́кѡ сѣ́мѧ, и҆́мъ сѣ́ѧнное, на до́брꙋ зе́млю падѐ и҆ хо́щетъ пло́дъ многобога́тъ принестѝ, ᲂу҆па́слъ є҆́сть до́мъ тво́й, і҆ѡа́нне дамаски́не, роди́телевъ, въ хрⷭ҇то́вѣ вѣ́рѣ ᲂу҆твержде́нъ, ꙗ҆́кѡ да неꙋдобопрїѧ́тнꙋ те́рнїю ꙗ҆ви́тъ въ не́мъ бг҃опрїѧ́тнꙋю розгꙋ̀, всемі́рнѡ пѣсносло́вѧщꙋю: А҆ллилꙋ́їа.
І҆́косъ в҃
Ра́зꙋма высокомꙋ́дрїе посрамлѧ́етсѧ, ви́дѧщымъ на́мъ пе́рваго совѣ́тника власти́телѧ а҆га́рѧнскагѡ, вла́сть во странѣ̀ и҆новѣ́рнѣй ве́лїю и҆мꙋ́ща, ᲂу҆ничижє́ннымъ же и҆ гони̑мымъ прилѣжа́ща се́рдцемъ, ѡ҆би̑димымъ и҆ досажда́ємымъ помога́юща. Тѣ́мже и҆ ны́нѣ припаде́мъ ко і҆ѡа́ннꙋ, ѡ҆ на́съ печа́льникꙋ, да ны̀ ᲂу҆слы́шитъ къ немꙋ̀ вопїю́щыѧ:
Ра́дꙋйсѧ, хрⷭ҇толюби́выѧ па́ствы бл҃гі́й ᲂу҆пра́вителю: ра́дꙋйсѧ, а҆гг҃лоподо́бный въ бѣда́хъ сꙋ́щымъ храни́телю.
Ра́дꙋйсѧ, а҆́ки до́брый самарѧни́нъ, больны̑мъ прилѣжа́вый: ра́дꙋйсѧ, бл҃ги́ми дѣ́лы хрⷭ҇та̀ проповѣ́давый.
Ра́дꙋйсѧ, рабо́тати бг҃ови въ безмо́лвїи возжелѣ́вый: ра́дꙋйсѧ, ѻ҆ба́че кро́тцѣ повинꙋ́выйсѧ власте́мъ, да послꙋ́жиши держа́вѣ твое́й.
Ра́дꙋйсѧ, всѧ́кꙋ вла́сть ꙗ҆́кѡ ѿ бг҃а сꙋ́щꙋ почита́вый: ра́дꙋйсѧ, ѿ смире́нїѧ вели̑каѧ ѡ҆брѣта́вый.
Ра́дꙋйсѧ, ꙗ҆́кѡ ро́да твоегѡ̀ сла́вꙋ вельмѝ ᲂу҆мно́жилъ є҆сѝ: ра́дꙋйсѧ, превозше́дый въ ра́зꙋмѣ наста́вникѡвъ и҆ сро́дникѡвъ твои́хъ.
Ра́дꙋйсѧ, ꙗ҆́кѡ во́лю се́рдца твоегѡ̀ во́ли бж҃їи приклони́лъ є҆сѝ: ра́дꙋйсѧ, ꙗ҆́кѡ вѣ́ры твоеѧ̀ ѻ҆́гнь въ се́рдцы твое́мъ при́снѡ пламенѣ́ющъ всѧ́кѡ соблю́лъ є҆сѝ.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ г҃
Си́лою вы́шнѧгѡ подви́женный, і҆ѡа́нне бг҃опослꙋ́шне, царѧ̀ і҆кѡнобо́рца не ᲂу҆боѧ́лсѧ є҆сѝ: подо́бѧ бо сѧ і҆ѡа́ннꙋ прⷣте́чи, ре́вностнагѡ словесѐ не ᲂу҆держа́лъ є҆сѝ, да наꙋчи́ши лю́ди, кла́нѧющѧсѧ во і҆кѡ́нѣ первоѻ́бразꙋ, взыва́ти бг҃ови: А҆ллилꙋ́їа.
І҆́косъ г҃
И҆мѣ́ѧ внꙋ́трь себє̀ бжⷭ҇твенныѧ сла́вы ре́вность, возвы́силъ є҆сѝ гла́съ тво́й, і҆ѡа́нне дамаски́не, и҆ писа́ньми ѡ҆бличи́лъ є҆сѝ хꙋ́льники цр҃кѡ́вныѧ, да ѡ҆тщети́тсѧ тѣ́хъ ѕломы́слїе. Си́хъ ра́ди бы́вшихъ ѡ҆ тебѣ̀, сла́вне, сла́вимъ тѧ̀:
Ра́дꙋйсѧ, пе́рвагѡ чтⷭ҇на́гѡ бг҃осло́вїѧ до́брый послѣ́дователю: ра́дꙋйсѧ, вне́млющихъ да́же до ны́нѣ слове́снымъ млеко́мъ пита́телю.
Ра́дꙋйсѧ, сло́ва бж҃їѧ ме́чь взе́мый, ꙗ҆́кѡ да є҆реті́ческагѡ мꙋдрова́нїѧ главꙋ̀ ᲂу҆сѣче́ши: ра́дꙋйсѧ, преда́нїѧ цр҃ко́внагѡ прее́мниче, и҆́мже вѣ́ры и҆змѣне́нїѧ и҆збѣ́гнеши.
Ра́дꙋйсѧ, вѣ́рꙋ хрⷭ҇то́вꙋ сло́вомъ и҆з̾ѧсни́вый: ра́дꙋйсѧ, премꙋ̑драѧ нбⷭ҇ныхъ словесы̀ мꙋ́дрости земноро́дныхъ и҆зложи́вый.
Ра́дꙋйсѧ, гро́мовъ гла́се бг҃осло́вствꙋѧй: ра́дꙋйсѧ, сло́ва бж҃їѧ бога́тство некра́домое.
Ра́дꙋйсѧ, церко́внагѡ зда́нїѧ плі́нѳо несокрꙋши́маѧ: ра́дꙋйсѧ, ни є҆ди́нѡ ѿ вра́жїѧ ле́сти поколе́блемый.
Ра́дꙋйсѧ, ѡ҆снова́нїѧ бг҃омꙋ́дрыхъ мꙋже́й проба́вителю: ра́дꙋйсѧ, бл҃гоглаго́ливыхъ ѻ҆тцє́въ сорадѣ́телю.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ д҃
Бꙋ́ри ѕлоко́зненныѧ клеветы̀ воспрїѧ́лъ є҆сѝ ѡ҆бстоѧ́нїе, прпⷣбне бг҃осло́ве, бг҃осло́вїѧ ра́ди твоегѡ̀. Сѐ є҆ди́нъ ца́рь и҆но́мꙋ подо́бїе письма̀ твоегѡ̀ пи́шетъ, ꙗ҆́кѡ а҆́ще преда́тельство мни́лъ є҆сѝ въ не́мъ: сѐ лжехрїсто́въ хрⷭ҇то́ва сарацы́нꙋ предае́тъ на ка́знь, і҆ꙋ́ды подража́тель, да ꙗ҆́кѡ ᲂу҆молча́тъ ᲂу҆ста̀, глагѡ́лющаѧ пра́вѡ: А҆ллилꙋ́їа.
І҆́косъ д҃
Бл҃гоꙋслы́шасѧ навѣ́тъ ѡ҆ тебѣ̀ во ᲂу҆́шїю царѧ̀ дама́скова: ѡ҆глаго́льствꙋ бо подло́жныѧ хартїѝ вѣ́рꙋ ꙗ҆́тъ, ника́кѡ ѡ҆правда́нїй словесѐ неви́ннагѡ бг҃олю́бца послꙋ́ша повели́тель: на ᲂу҆сѣче́нїе десни́цы предаде́ тѧ, є҆́юже пи́сьменнѣ всѝ хꙋ́лѧщїи бг҃а бѧ́хꙋ ѡ҆блича́лисѧ, но сегѡ̀ ра́ди тебѣ̀, ѽ і҆ѡа́нне, воспое́мъ:
Ра́дꙋйсѧ, вѣ́дый, ꙗ҆́кѡ на пра́вѡ сла́вѧщыѧ бг҃а кѡ́зни вра̑жїѧ и҆з̾ѡби́лꙋютъ: ра́дꙋйсѧ, тѣ́хъ дово́льное да́же до кро́ве дѣ́йство претерпѣ́вый.
Ра́дꙋйсѧ, мч҃нческомꙋ ли́кꙋ соприче́тниче: ра́дꙋйсѧ, и҆сповѣ́дникѡмъ хрⷭ҇тѡ́вымъ и҆́стый ѻ҆́бщниче.
Ра́дꙋйсѧ, рꙋко̀ бг҃оводи́тельствꙋемаѧ: ра́дꙋйсѧ, льсти́вагѡ врага̀ до́блїй ѡ҆долѣ́телю.
Ра́дꙋйсѧ, и҆з̾ѧсни́тельное неѡпи́саннагѡ писа́нїе: ра́дꙋйсѧ, лꙋка́вагѡ дѣ́йства посрамле́нїе.
Ра́дꙋйсѧ, ꙗ҆́кѡ ѿ стрѣ́лъ зави́стникѡвъ стра́ждеши: ра́дꙋйсѧ, ꙗ҆́кѡ тѣ́ми ᲂу҆ѧзвлѧ́емь, пра́вды бж҃їѧ не ѿрека́ешисѧ.
Ра́дꙋйсѧ, ꙗ҆́кѡ кро́вїю вмѣ́стѡ черни́лъ рꙋ́кꙋ твою̀ ѡ҆мочи́лъ є҆сѝ: ра́дꙋйсѧ, ꙗ҆́кѡ по ка́зни, бж҃їѧ мт҃ре и҆ гдⷭ҇а попече́нїю сѧ̀ пре́далъ є҆сѝ.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ є҃
Бг҃оте́чныѧ ѕвѣзды̀ сла́вꙋ подража́ющи, ꙗ҆ви́сѧ десни́ца твоѧ̀, і҆ѡа́нне бг҃оно́се, ꙗ҆́кѡ волхвѡ́мъ, ᲂу҆казꙋ́ющаѧ лю́демъ, ка́кѡ мо́гꙋтъ поклоне́нїе пра́во принестѝ бг҃ови, во ѻ҆́бразѣ ᲂу҆́бѡ зрѧ́ще сꙋ́щаго, въ пѣ́нїи же томꙋ̀ пою́ще: А҆ллилꙋ́їа.
І҆́косъ є҃
Ви́дѣ пречⷭ҇таѧ влⷣчца і҆ѡа́нна припа́дающа ко ѻ҆́бразꙋ є҆ѧ̀, въ болѣ́зни стенѧ́ща, ᲂу҆сѣче́ннꙋю десни́цꙋ прилага́юща, и҆ по вѣ́рѣ свое́й на є҆ѧ̀ по́мощь ᲂу҆пова́юща: всѧ̑ бо содѣ́ѧти мо́жетъ, ꙗ҆́кѡ мт҃и бж҃їѧ, хотѧ́щи. Ꙗ҆ви́сѧ же є҆мꙋ̀ во снѣ̀ пречⷭ҇таѧ, прїе́млющи ѻ҆бѣ́тъ тогѡ̀, писа́ньми не преста́ти восхвалѧ́ѧ бг҃а и҆ бг҃ороди́тельницꙋ, и҆ сѐ и҆сцѣле́нїе ᲂу҆до́бь дарова̀ рꙋцѣ̀ вѣ́рнагѡ, є҆мꙋ́же мы̀ возопїи́мъ:
Ра́дꙋйсѧ, бл҃гоговѣ́йный къ бг҃ꙋ моле́бниче: ра́дꙋйсѧ, бцⷣы пречⷭ҇тыѧ дерзнове́нный бесѣ́дниче.
Ра́дꙋйсѧ, ꙗ҆́кѡ во ᲂу҆́шїю є҆ѧ̀ бы́сть мл҃тва твоѧ̀: ра́дꙋйсѧ, ꙗ҆́кѡ внѧ́тъ хода́таицѣ вседержа́вный сн҃ъ є҆ѧ̀.
Ра́дꙋйсѧ, всемо́щнагѡ покро́ва бг҃омт҃ре ликова́нїе: ра́дꙋйсѧ, неистощи́мыѧ бл҃года́ти нбⷭ҇ныѧ прїѧ́телище.
Ра́дꙋйсѧ, непосра́мленное ᲂу҆пова́нїе на гдⷭ҇а: ра́дꙋйсѧ, цѣльбы̀ нбⷭ҇ныѧ и҆ на́мъ ны́нѣ проше́нїе.
Ра́дꙋйсѧ, чꙋдесѐ бж҃їѧ свидѣ́телю: ра́дꙋйсѧ, ѡ҆глаго́ланныхъ, въ болѣ́знехъ сꙋ́щихъ и҆ въ мꙋче́нїихъ прїѧ́телю.
Ра́дꙋйсѧ, ꙗ҆́кѡ всемогꙋ́щагѡ врача̀ лѣка́рство ᲂу҆лꙋчи́лъ є҆сѝ: ра́дꙋйсѧ, ꙗ҆́кѡ томꙋ̀, въ вѣ́рѣ па́ки ᲂу҆крѣ́пльсѧ, всѣ́мъ живото́мъ послꙋжи́лъ є҆сѝ.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ ѕ҃
Проповѣ́да покланѧ́емагѡ тобо́ю бг҃а чꙋ́до и҆сцѣле́нїѧ твоегѡ̀ пред̾ царе́мъ сарацы́нскимъ: го́ре мнѣ̀, проглаго́лати ᲂу҆́бѡ ᲂу҆вѣща́вшее, непра́веднагѡ же бꙋесло́вїѧ тогѡ̀ пода́вшее разꙋмѣ́нїе. Ты́ же, і҆ѡа́нне бг҃обл҃же́нне, воспѣ́лъ є҆сѝ десни́цы вы́шнѧгѡ бжⷭ҇твеннꙋю си́лꙋ: А҆ллилꙋ́їа.
І҆́косъ ѕ҃
Сїѧ́нїе ст҃ы́ни твоеѧ̀ ꙗ҆ви́сѧ пред̾ царѧ̀ дама́сскаго, не ᲂу҆держа́ бо ле́сти вла́сть на се́рдцы невѣ́рнагѡ власти́телѧ власти́тель ле́сти, ѽ і҆ѡа́нне првⷣне. Че́сть же са́на хотѧ̀ тебѣ̀ возврати́ти и҆ вла́сти полнотꙋ̀, ᲂу҆слы́ша тѧ̀ кнѧ́зь, къ нога́ма є҆гѡ̀ припа́дша и҆ просѧ́ща, да пꙋ́ститъ тѧ̀, по гдⷭ҇ѣ и҆тѝ мона́хомъ. Е҆да̀ ᲂу҆̀бо ѡ҆ се́мъ смире́нїи не воспои́мъ и҆збра́ннаго хрⷭ҇то́ва си́це:
Ра́дꙋйсѧ, првⷣнагѡ житїѧ̀ ѡ҆правда́нїе: ра́дꙋйсѧ, прпⷣбнагѡ жи́тельства жела́нїе.
Ра́дꙋйсѧ, бг҃омт҃рнѧгѡ чꙋдесѐ соприча́стниче: ра́дꙋйсѧ, хрⷭ҇то́вы и҆́стины и҆з̾ѧсни́телю.
Ра́дꙋйсѧ, срамлѧ́ющымъ ꙗ҆̀же ѡ҆ хрⷭ҇тѣ̀ ѡ҆би̑димыѧ срамле́нїе: ра́дꙋйсѧ, бл҃гословлѧ́ющымъ ꙗ҆̀же ѡ҆ бз҃ѣ бл҃готворѧ́щыѧ бл҃гослове́нїе.
Ра́дꙋйсѧ, бж҃їѧ чꙋдесѐ ꙗ҆вле́нїе: ра́дꙋйсѧ, ꙗ҆́кѡ ꙗ҆ви́лсѧ є҆сѝ бг҃оневѣ́стныѧ мт҃ре бл҃говоле́нїе.
Ра́дꙋйсѧ, и҆́ноческагѡ житїѧ̀ ча́ѧтелю: ра́дꙋйсѧ, кра́сныхъ земны́хъ, любвѐ ра́ди бж҃їѧ, ѿрѣва́телю.
Ра́дꙋйсѧ, собла́знꙋ не и҆мѣ́вый мѣ́ста въ се́рдцы твое́мъ: ра́дꙋйсѧ, ꙗ҆́кѡ ѻ҆́но то́чїю любвѐ и҆ кро́тости и҆спо́лнилъ є҆сѝ.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ з҃
Хотѧ́щꙋ тѝ пра́во возда́ти сло́во бг҃ови и҆ въ нищетꙋ̀ смире́нїѧ ѡ҆блещи́сѧ, ра́бе бл҃гі́й хрⷭ҇то́въ, рабы̑ твоѧ̑ пꙋсти́лъ и҆ всѧ̑ и҆мѣ̑нїѧ разда́лъ є҆сѝ, въ рабо́тꙋ мона́ха предложи́тисѧ грѧды́й. Тѣ́мъ ᲂу҆̀бо во ѻ҆би́тель прише́дый ст҃а́гѡ са́ввы, и҆гꙋ́меномъ прїѧ́тъ бы́въ, хвалє́бнаѧ воспѣ́лъ є҆сѝ: А҆ллилꙋ́їа.
І҆́косъ з҃
Но́выхъ подвигѡ́въ риста́лище себѣ̀ стѧжа́лъ є҆сѝ, і҆ѡа́нне во́ине хрⷭ҇то́въ, є҆ди́на ста́рца во ᲂу҆чи́телѧ прїе́мъ, ꙗ҆́кѡ да смире́нїю наꙋчи́тъ тѧ̀ и҆ послꙋша́нїю: сѐ да не пре́жнихъ чесѡ̀ твори́лъ бы, а҆́ще и҆ бл҃ги́хъ, по твое́й во́ли, но во́лѧ ста́рца, и҆ безмо́лвїе, и҆ се́рдца чистота̀, и҆ трꙋ́дъ рабо́тенъ тебѣ̀ во ѻ҆́бразъ бытїѧ̀ вмѣни́шасѧ: сегѡ̀ ра́ди восхвалѧ́емъ тѧ̀, бл҃же́нне і҆ѡа́нне:
Ра́дꙋйсѧ, ѳѷмїа́ме добродѣ́тельнагѡ жи́тельства: ра́дꙋйсѧ, ѡ҆ грѣсѣ́хъ пре́жнїѧ жи́зни сле́зъ проли́тїе.
Ра́дꙋйсѧ, тѣле́сными трꙋды̑ ᲂу҆краше́йсѧ: ра́дꙋйсѧ, дꙋхо́вными пѡ́двиги преѡбраже́йсѧ.
Ра́дꙋйсѧ, бг҃огла́снаѧ трꙋбо̀, смире́нїѧ ра́ди ᲂу҆молча́вшаѧ: ра́дꙋйсѧ, писа́ло ѿложи́вый є҆́же и҆збѣ́гнꙋти превозноше́нїѧ мы́сленнагѡ.
Ра́дꙋйсѧ, тѣле́снѡ здра́вствꙋѧ, дꙋ́шꙋ ᲂу҆врачева́ти прише́дый: ра́дꙋйсѧ, ѻ҆боѧ̀ ѿ творца̀ прїе́мый.
Ра́дꙋйсѧ, высото̀ смиренномꙋ́дрїѧ: ра́дꙋйсѧ, красото̀ хрⷭ҇то́ва подража́нїѧ.
Ра́дꙋйсѧ, прекосло́вїѧ и҆ ро́пота въ се́рдцы твое́мъ не позна́вый: ра́дꙋйсѧ, ѕмі́ѧ гнѣ́ва и҆ сꙋмнѣ́нїѧ и҆з̾ пѡ́мыслъ твои́хъ и҆згна́вый.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ и҃
Стра́нное и҆ а҆́гг҃лѡмъ, и҆ человѣ́кѡмъ бы́сть ви́дѣти тѧ̀, і҆ѡа́нне бг҃оно́се, во гра́дѣ бы́вшїѧ твоеѧ̀ сла́вы вре́тищемъ ѡ҆болче́ннаго, по послꙋша́нїю кѡ́шницы просты̑ѧ цѣно́ю превы́шшею и҆́щꙋща прода́ти: ѻ҆ба́че ѡ҆ тацѣ́мъ небре́гъ ᲂу҆ничиже́нїи, помо́гшаго тѝ бг҃а бл҃гослове́нїе дꙋхо́внагѡ ѻ҆тца̀ и҆спо́лнити хвалѧ̀ просла́вилъ є҆сѝ: А҆ллилꙋ́їа.
І҆́косъ и҃
Ве́сь бы́въ го́рнихъ и҆спо́лнь, і҆ѡа́нне бг҃ослове́сниче, ѡ҆брѣ́лсѧ є҆сѝ ѿ ста́рца ѡ҆блича́емь, а҆́ки а҆да́мъ преслꙋша́нїемъ подпа́дъ раѧ̀ ѿлꙋче́нїю, въ до́льнихъ хотѣ́нїе вмѣни́ бо то́й ѡ҆ є҆ди́нѣмъ бра́тѣ заꙋпоко́йное твоѐ пѣ́нїе, є҆́же ᲂу҆моле́нъ бы́въ сотвори́лъ бѣ̀ ты̀: мы́ же вѣ́рꙋюще дне́сь тѝ во ᲂу҆сла́дѣ ра́йстѣй бы́ти, пое́мъ тѝ сла̑внаѧ:
Ра́дꙋйсѧ, се́рдце и҆мы́й состра́ждꙋщее: ра́дꙋйсѧ, вне́млѧй слезѣ̀ просѧ́щагѡ.
Ра́дꙋйсѧ, поѧ́й сла́вꙋ ко хрⷭ҇тꙋ̀ ѿше́дшихъ: ра́дꙋйсѧ, ᲂу҆слажда́ѧй живы́хъ ѡ҆ ра́дости нб҃съ дости́гшихъ.
Ра́дꙋйсѧ, покаѧ́нїѧ пред̾ сме́ртїю мл҃твꙋ въ пѣ́сни проли́ти наꙋча́ѧй: ра́дꙋйсѧ, всѧ̑ тлѣ̑ннаѧ грѣхѡ́внаѧ пред̾ срѣ́тенїемъ гдⷭ҇а ѡ҆ста́вити взыва́ѧй.
Ра́дꙋйсѧ, ѡ҆ста́вилъ бо є҆сѝ высѡ́каѧ земна̑ѧ: ра́дꙋйсѧ, наслѣ́дилъ бо є҆сѝ си́хъ ра́ди превы́спрєннѧѧ нбⷭ҇наѧ.
Ра́дꙋйсѧ, послꙋша́нїѧ всѧ́кагѡ и҆сполне́нїе на сѧ̀ взе́мый: ра́дꙋйсѧ, въ преслꙋша́нїи покаѧ́нїе дѣ́тельное ꙗ҆ви́вый.
Ра́дꙋйсѧ, ꙗ҆́кѡ, грѣха̀ ра́ди и҆справле́нїѧ, гнꙋ́са не возгнꙋша́лсѧ є҆сѝ: ра́дꙋйсѧ, ꙗ҆́кѡ и҆скꙋ́са ра́ди неꙋдобопрїѧ̑тнаѧ претерпѣ́лъ є҆сѝ.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ ѳ҃
Всѧ́кое є҆стество̀ бы и҆знемогло̀ наложе́ннагѡ на тѧ̀, і҆ѡа́нне смиреннолю́бче, преще́нїѧ, а҆́ще и҆ мона́шескими добродѣ́тельми ᲂу҆краше́но: но твоѐ зрѧ̀ ста́рецъ на ᲂу҆ничижє́нїѧ бл҃гопрїѧ́тїе, тѝ спребыва́юща воспѣ̀ смире́нна се́рдцемъ и҆ кро́ткаго хрⷭ҇та̀: А҆ллилꙋ́їа.
І҆́косъ ѳ҃
Вѣті́й глагололю́бныхъ пра́здно ꙗ҆ви́сѧ сло́во, бл҃говѣща́нна мꙋдролю́бца і҆ѡа́нна тща́щесѧ воспѣ́ти добродѣ́тель: не ᲂу҆́бѡ то́й свое́ю во́лею, но во́лею пречⷭ҇тыѧ влⷣчцы, ко ста́рцꙋ є҆гѡ̀ ꙗ҆́вльшїѧсѧ, ѿкры̀ ᲂу҆ста̀ своѧ̑, гдⷭ҇ь же та̑ и҆спо́лни дх҃а. Да помо́жетъ се́й и҆ на́мъ, бл҃же́нне, тебѣ̀ воспѣ́ти:
Ра́дꙋйсѧ, всѧ́кїѧ пло́ти ра́дость ѡ҆ бцⷣѣ воспѣ́вый: ра́дꙋйсѧ, ꙗ҆́кѡ велѣ́нїемъ пренепоро́чныѧ и҆з̾ ᲂу҆стнꙋ̀ твоє́ю то́ки бг҃осло́вїѧ и҆злїѧ́шасѧ.
Ра́дꙋйсѧ, ѻ҆бщежи́тельнагѡ житїѧ̀ согла́сїе: ра́дꙋйсѧ, мона́шескꙋю мни́вый ке́ллїю ꙗ҆́кѡ раѧ̀ бл҃же́нство.
Ра́дꙋйсѧ, неижди́вное а҆гг҃лоподо́бное пѣ́нїе: ра́дꙋйсѧ, ꙗ҆́кѡ до ны́нѣ прпⷣбными гла̑сы твои́ми бг҃а воспѣва́еши.
Ра́дꙋйсѧ, сла́вꙋ ѡ҆брѣты́й въ безсла́вїи земнѣ́мъ: ра́дꙋйсѧ, собла́зна и҆збѣгі́й въ вели́чїихъ до́льныхъ.
Ра́дꙋйсѧ, ѡ҆ цр҃ѝ бз҃ѣ раба̀ себѐ содѣ́ѧвый: ра́дꙋйсѧ, ра́бство земны́ѧ вла́сти презрѣ́вый.
Ра́дꙋйсѧ, є҆́же сла́вити бг҃а ме́де ᲂу҆стѡ́мъ на́шымъ: ра́дꙋйсѧ, бг҃осло́вїѧ неѡбинꙋ́емагѡ златослове́сниче.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ і҃
Сп҃се́нїѧ лю́демъ хотѧ́щаго бг҃а просла́вилъ є҆сѝ, достобл҃же́нне і҆ѡа́нне бг҃оревни́телю, да не ка́кѡ ра́зꙋмы ѿве́ргнꙋтсѧ творца̀, ᲂу҆́мнѡ человѣ́ки призыва́ѧй пѣ́ти и҆́же грѣха̀ жа́ло сме́ртное ѿ человѣ̑къ ѿе́мшаго: А҆ллилꙋ́їа.
І҆́косъ і҃
Стѣны̀ цр҃ко́вныѧ ча́сть бы́въ, ст҃ы́й ᲂу҆го́дниче дамаски́не, твоеѧ̀ дꙋшѝ врагꙋ̀ не да́лъ є҆сѝ, ни лю́ди цр҃кѡ́вныѧ растли́ти словесы̀ бла́зными: не и҆змышле́нїй ба̑сни ре́къ, но посѣще́нїѧ сподо́бльсѧ дх҃а бж҃їѧ, вѣща́лъ є҆сѝ, ѽ і҆ѡа́нне, бжⷭ҇твєннаѧ ѡ҆правда̑нїѧ, ѡ҆ ни́хже си́це бл҃года́рственнѣ тѝ восписꙋ́емъ:
Ра́дꙋйсѧ, бг҃а созерца́ющее се́рдце: ра́дꙋйсѧ, дх҃оначерта́нное писа́нїе.
Ра́дꙋйсѧ, на мы́сленный сїна́й бг҃овидѣ́нїѧ возше́дый: ра́дꙋйсѧ, и҆з̾ глꙋбины̀ смире́нїѧ на цр҃ко́внꙋю го́рꙋ ст҃ы́ни вознесы́йсѧ.
Ра́дꙋйсѧ, ст҃и́телей тве́рдое бг҃омы́слїе: ра́дꙋйсѧ, прпⷣбныхъ тишино̀ смиренномꙋ́драѧ.
Ра́дꙋйсѧ, і҆ере́ємъ сщ҃е́нныѧ та́йны и҆з̾ѧсне́нїе: ра́дꙋйсѧ, нижѐ комꙋ̀ и҆́стинꙋ затворе́й сла́дости бг҃опозна́нїѧ.
Ра́дꙋйсѧ, возлюби́вый не ѡ҆бинꙋ́ѧсѧ послѣ́довати пра́вдѣ: ра́дꙋйсѧ, и҆з̾ ке́ллїи воздержа́нїѧ и҆зрасти́вый плодобога́тство въ дꙋхо́вныхъ ча́дѣхъ.
Ра́дꙋйсѧ, свѣти́льниче свѣ́та пребжⷭ҇твеннагѡ: ра́дꙋйсѧ, ма́нтїею и҆́ноческою погребы́й мі́ра сла́вꙋ бре́ннꙋю.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ а҃і
Пою́щымъ на́мъ словеса̀ тобо́ю воспѣ̑таѧ, бл҃гі́й хрⷭ҇то́въ ᲂу҆ченичѐ і҆ѡа́нне, и҆счи́слити ѧ҆̀ не могꙋ́ще, не то́щихъ тщи́мсѧ подража́ти глаго́лѡвъ мно́жество, но ᲂу҆вѣре́нїѧ бжⷭ҇твеннагѡ си́лꙋ зрѧ́ще въ словесѣ́хъ твои́хъ, не премолчи́мъ въ тебѣ̀ ст҃а́гѡ дх҃а дѣ́йствїѧ, глаго́люще: А҆ллилꙋ́їа.
І҆́косъ а҃і
Свѣтосїѧ́ннꙋю наде́ждꙋ живота̀ вѣ́чнагѡ въ творє́нїѧ твоѧ̑ вдохнꙋ́лъ є҆сѝ: всѣ̑мъ и҆̀же погребстѝ и҆мꙋ́щымъ, є҆́же ѡ҆ на́съ показа́лъ є҆сѝ расторже́нїѧ соꙋ́за бг҃осочета́ннагѡ дꙋ́шъ и҆ тѣле́съ та́инство, ѻ҆ба́че бл҃же́нства нестарѣ́ющагѡсѧ ѡ҆бѣтова́нїе и҆ во кро́вѣхъ првⷣныхъ вселе́нїѧ наде́ждꙋ слове́снѣ и҆з̾ѡбразꙋ́ѧ: въ тебѣ́ же ви́димъ, бл҃же́нне і҆ѡа́нне дамаски́не, по преставле́нїи твое́мъ, ꙗ҆́кѡ дово́льнѣ послꙋжи́вшꙋ бг҃ови, си́хъ ст҃о́е воспрїѧ́тїе: тѣ́мже, а҆́ще и҆ скꙋ́днꙋю, прїимѝ ѿ на́съ пѣ́снь сїю̀:
Ра́дꙋйсѧ, ᲂу҆ гро́ба пла́чꙋщыѧ ᲂу҆тѣша́ѧй: ра́дꙋйсѧ, глаго́лы ᲂу҆со́пшихъ на́мъ пѣ́сненнѡ вѣща́ѧй.
Ра́дꙋйсѧ, ѡ҆ грѧдꙋ́щихъ ко гдⷭ҇ꙋ мл҃твеннѣ воздыха́ѧй: ра́дꙋйсѧ, срѣ́тенїе преста́вльшихсѧ со хрⷭ҇то́мъ пред̾ѡбража́ѧй.
Ра́дꙋйсѧ, слове́снагѡ врачева́нїѧ нача́льниче: ра́дꙋйсѧ, догмати́ческагѡ наказа́нїѧ рѣсното̀.
Ра́дꙋйсѧ, бꙋ́дꙋщїѧ жи́зни въ го́рнихъ ꙗ҆снозри́телю: ра́дꙋйсѧ, ѡ҆ въ нераска́ѧнныхъ грѣсѣ́хъ печа́ли повѣствова́телю.
Ра́дꙋйсѧ, пѣ́сньми твои́ми сме́рти стра́хъ ᲂу҆прежда́ѧй: ра́дꙋйсѧ, стра́ха бж҃їѧ ᲂу҆твержде́нїю наꙋча́ѧй.
Ра́дꙋйсѧ, десни́це, крѣ́постїю писа́нїй бл҃голѣ́пнѡ просла́вленнаѧ: ра́дꙋйсѧ, ра́зꙋме, просвѣща́ѧй концы̀.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ в҃і
Бл҃года́ти да́телѧ во́льнѡ воспрїѧ́лъ є҆сѝ ра́зꙋмомъ и҆ се́рдцемъ, ꙗ҆́кѡ сы́й ра́бъ гдⷭ҇ень, ра́бства, і҆ѡа́нне, мни́магѡ не ᲂу҆боѧ́лсѧ є҆сѝ, лꙋка́выѧ рабо́ты ѿвергі́й соꙋ́зъ, побѣ́днѡ восклица́ѧ: А҆ллилꙋ́їа.
І҆́косъ в҃і
Пое́мъ воспѣ́вшаго го́рнихъ сла́вꙋ, і҆ѡа́нна всебога́таго: тогѡ̀ дивлѧ́емсѧ бл҃гоплодоно́сїю, ѻ҆́браза ᲂу҆че́нїѧ и҆ мꙋ́дрости высоты̀, смире́нїѧ же тишины̀ велегла́сныѧ, ꙗ҆ви́сѧ бо вселе́ннѣй правосла́вное и҆справле́нїе и҆ дре́внихъ хрⷭ҇толю́бцєвъ ко́рень, є҆мꙋ́же ᲂу҆ста̀ на̑ша да не закоснѣ́ютъ пѣ́ти:
Ра́дꙋйсѧ, дꙋхо́внагѡ наслѣ́дїѧ сокро́вище: ра́дꙋйсѧ, млека̀ слове́снагѡ ѡ҆ сп҃се́нїи и҆з̾ѻби́льное и҆сточе́нїе.
Ра́дꙋйсѧ, на землѝ воспѣ́вый, а҆́ки а҆́гг҃лѡвъ ли́къ, сла́вꙋ хрⷭ҇то́ва воскрⷭ҇нїѧ: ра́дꙋйсѧ, славосло́вѧй ны́нѣ гдⷭ҇а ᲂу҆ прⷭ҇то́ла тогѡ̀ на нб҃сѣ́хъ.
Ра́дꙋйсѧ, бж҃їѧ мт҃ре слове́снаѧ похвало̀: ра́дꙋйсѧ, црⷭ҇твїѧ нбⷭ҇нагѡ живописа́телю.
Ра́дꙋйсѧ, смоко́внице, пло́дъ тво́й во вре́мѧ своѐ преиз̾ѻби́льнѡ да́вшаѧ: ра́дꙋйсѧ, ᲂу҆слади́вшее смо́квами слове́съ твои́хъ бл҃гокоре́нное дре́во хрⷭ҇то́вы вѣ́ры.
Ра́дꙋйсѧ, цвѣ́те, бл҃гоꙋха́ѧй и҆́стиною: ра́дꙋйсѧ, є҆реті́ческагѡ ѕлово́нїѧ и҆стощи́телю.
Ра́дꙋйсѧ, сла́вы бж҃їѧ многопло́дное писа́нїе: ра́дꙋйсѧ, вѣ́ры хрⷭ҇то́вы неиждива́емое ᲂу҆че́нїе.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ г҃і
Ѽ вели́кїй пѣсносло́вче і҆ѡа́нне дамаски́не, вѣ́ры хрⷭ҇то́вы до́бльственный ра́тниче и҆ ᲂу҆чи́телю, велича́ѧй на землѝ го́рнихъ бжⷭ҇твеннꙋю сла́вꙋ, и҆ до́льныхъ наꙋча́ѧй смы̑слы и҆́стины: да не бꙋ́дꙋтъ тщи̑ тебѣ̀ мл҃твы на́шѧ: ᲂу҆сладѝ на́съ поꙋчє́нїи твои́ми, и҆ нбⷭ҇нымъ застꙋ́пничествомъ ѡ҆градѝ на́съ, да небла́зненнѡ со ст҃ы́нею твое́ю вели́каго пое́мъ и҆ велича́емъ бг҃а: А҆ллилꙋ́їа.
Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆гг҃лонра́вное житїѐ предпоче́тъ, і҆ѡа́нне бл҃гознамени́те, прине́слъ є҆сѝ же́ртвꙋ хрⷭ҇тꙋ̀ великосано́вныѧ жи́зни ѿрече́нїѧ, си́це и҆ ѿ мꙋ́дрости человѣ́чи поче́рпъ, наипа́че возлюби́лъ є҆сѝ бж҃їѧ премꙋ́дрости сла́дость, и҆ въ пꙋсты́ни смире́ннѡ все́льсѧ, и҆з̾ѧсни́лъ є҆сѝ пра́выѧ вѣ́ры высо́тъ простотꙋ̀. Сегѡ̀ ра́ди ꙗ҆́кѡ бжⷭ҇твенныхъ ᲂу҆че́нїй и҆сто́чникꙋ взыва́емъ тѝ:
Ра́дꙋйсѧ, свѣти́льниче бжⷭ҇твеннагѡ свѣ́та, сїѧ́ѧй въ нощѝ невѣ́рїѧ: ра́дꙋйсѧ, побо́рниче и҆́стинныѧ вѣ́ры, ᲂу҆мꙋдрѧ́ѧй словесы̀ бг҃опозна́нїѧ.
Ра́дꙋйсѧ, бл҃гознамени́тагѡ ро́да ѻ҆́трасле: ра́дꙋйсѧ, смиренномꙋ́драгѡ преподо́бїѧ ѻ҆́бразе.
Ра́дꙋйсѧ, процвѣ́тшаѧ во средѣ̀ а҆га́рѧнъ хрⷭ҇тїа́нскаѧ похвало̀: ра́дꙋйсѧ, во тщесла́внѣмъ мі́рѣ прозѧ́бшее кро́тости хрⷭ҇то́вы преподо́бїе.
Ра́дꙋйсѧ, ѿ фїлосо́фѡвъ мі́ра наꙋче́нный: ра́дꙋйсѧ, ѿ премꙋ́дрости бж҃їѧ ᲂу҆мꙋдре́нный.
Ра́дꙋйсѧ, ꙗ҆́кѡ возда́лъ є҆сѝ бж҃їе бг҃ови: ра́дꙋйсѧ, ꙗ҆́кѡ презрѣ́лъ є҆сѝ кра̑снаѧ ца̑рскаѧ.
Ра́дꙋйсѧ, бл҃года́ти бж҃їѧ тезоимени́те: ра́дꙋйсѧ, црⷭ҇тва вѣ́чнагѡ наслѣ́дниче.
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Конда́къ а҃
И҆збра́ннаго сосꙋ́да бл҃года́ти бж҃їѧ, і҆ѡа́нна бг҃охва́льнаго, притеце́мъ всѝ восхвали́ти, ѿ дама́ска ᲂу҆́бѡ гра́да ѕвѣздꙋ̀ всесвѣ́тлѡ возше́дшꙋю, вселе́нскїѧ же цр҃кве свирѣ́ль приснопою́щꙋю бжⷭ҇твенныхъ та̑инъ и҆́стинꙋ, пренебре́гшаго сла́вꙋ мі́ра сла́вы ра́ди хрⷭ҇та̀ бг҃а, да вознесе́мъ є҆мꙋ̀ мл҃твꙋ ра́дованїѧ:
Ра́дꙋйсѧ, прпⷣбне і҆ѡа́нне, цр҃кве ᲂу҆чи́телю сладкогла́сный и҆ премꙋ́дрый.
Моли́твы
Ѽ прпⷣбне сщ҃е́нне і҆ѡа́нне бг҃осла́вный, дама́скова похвало̀, вселе́нныѧ правосла́внаѧ велелѣ́пото: къ тебѣ̀ тече́мъ, къ тебѣ̀ мо́лимсѧ, бжⷭ҇твенный дамаски́не: не преста́й про́чее молѧ́сѧ ко пречⷭ҇тѣй бцⷣѣ, занѐ ᲂу҆́бѡ и҆ въ житїѝ твое́мъ земнѣ́мъ послꙋ́ша тѧ̀: наипа́че же вы́нꙋ пребꙋ́ди мл҃тва твоѧ̀ ѡ҆ на́съ ко гдⷭ҇еви бг҃ꙋ на́шемꙋ, є҆гѡ́же цр҃ковь ре́вностнѡ, а҆́ки до́блїй ра́тникъ, ѿ є҆ресе́й и҆ со и҆́стиннагѡ пꙋтѝ поползнове́нїѧ защити́лъ є҆сѝ. Ст҃че бж҃їй, ᲂу҆го́дниче пребл҃гі́й, ты̀, ꙗ҆́коже соломѡ́нъ, ничесѡ́же и҆спроси́въ ᲂу҆ гдⷭ҇а, ра́звѣ премꙋ́дрости бж҃їѧ, къ томꙋ̀ и҆ смире́нїѧ наказа́нїѧ, ничи́мже лише́нъ бы́лъ є҆сѝ, и҆ въ правле́нїи страны̀ твоеѧ̀ и҆новѣ́рныѧ и҆мѣ́лъ є҆сѝ ча́сть бога́тꙋю: но тѣ́мъ ᲂу҆̀бо па́че показа́лсѧ є҆сѝ и҆́стинный хрⷭ҇тїани́нъ, въ по́мощи пребыва́ѧ ᲂу҆бѡ́гимъ, ѡ҆глагѡ́ланнымъ, ѡ҆ пра́вѣй вѣ́рѣ гони̑мымъ и҆ ᲂу҆гнета́ємымъ. Помозѝ на́мъ, і҆ѡа́нне, соблюсти́сѧ, є҆да̀ ка́кѡ не ѿстꙋ́пимъ чи́мъ ма́лымъ ѿ хрⷭ҇та̀ бг҃а на́шегѡ и҆ є҆гѡ̀ вселе́нскїѧ цр҃кве: ѡ҆градѝ ст҃ы́нею твое́ю, на́ми ны́нѣ пѣсносло́вимою, ѿ ѕломы́слѧщихъ на́мъ врагѡ́въ ви́димыхъ, наипа́че же ѿ неви́димыхъ дꙋхѡ́въ ѕло́бы поднебе́сныхъ. Наꙋчи́ ны, ст҃е і҆ѡа́нне, ѡ҆ти́шїю серде́чномꙋ, ра́зꙋма здравомы́слїю, въ вѣ́рѣ несꙋмнѣ́нїю, къ томꙋ́ же любвѝ ꙗ҆́же ѡ҆ хрⷭ҇тѣ̀ і҆и҃сѣ, є҆́юже и҆зрѧ́днѣ ᲂу҆краси́лсѧ є҆сѝ, бжⷭ҇твенне дамаски́не. Бꙋ́ди при́сный хода́тай и҆ помо́щникъ во ᲂу҆че́нїи пребыва́ющымъ: ᲂу҆мꙋдрѝ, ᲂу҆цѣломꙋ́дри, просвѣтѝ є҆́же ᲂу҆ прⷭ҇то́ла бж҃їѧ хода́тайствомъ: съ высоты̀ го́рнїѧ сла́вы и҆спросѝ всѧ̑, ꙗ҆̀же сꙋ́ть полє́зна, сп҃се́нїѧ ча́ющымъ и҆ ѡ҆ сла́вѣ бж҃їей здѣ̀, до́лꙋ, пекꙋ́щымсѧ. Пода́ждь сло́во бл҃го и҆ тве́рдо наста́вникѡмъ, да цр҃кви вѣ̑рныѧ сы́ны воспита́ютъ, и҆ ча̑да достѡ́йна держа́вѣ на́шей сотворѧ́тъ. Попецы́сѧ и҆ ѡ҆ є҆́же смире́нїю и҆ кро́тости се́рдца наꙋчи́тисѧ на́мъ, ꙗ҆́коже ѻ҆боюдоѻ́стрꙋ мечꙋ̀, и҆́мже разсѣка́етсѧ врага̀ человѣ́ческагѡ плете́нїе. Не ѡ҆ста́ви коего́ждо просѧ́щаго чесѡ̀ ᲂу҆ тебє̀ въ мл҃твѣ, ѡ҆ бл҃ги́хъ дѣ́лѣхъ бл҃гословѝ и҆ наста́ви, да непреткнове́ннѡ во сла́вꙋ црⷭ҇тва нбⷭ҇нагѡ поживе́мъ, и҆дѣ́же со влⷣчцею бцⷣею мр҃і́ею и҆ ст҃ы́ми всѣ́ми, въ ни́хже и҆ ты̀ є҆сѝ, неизрече́нное гдⷭ҇не бл҃гослови́тсѧ и҆́мѧ, ѻ҆ц҃а̀, и҆ сн҃а, и҆ ст҃а́гѡ дх҃а, всегда̀, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Бжⷭ҇твенне дамаски́не, ѻ҆́тче і҆ѡа́нне прпⷣбне, нбⷭ҇нагѡ наслѣ́дїѧ ᲂу҆чи́телю, па́стырей наста́вителю, глаго́ле ꙗ҆́сный ᲂу҆ча́щихъ и҆ бл҃го́е ᲂу҆ча́щихсѧ внима́нїе! Сѐ мы̀ ны́нѣ сло́во тѝ хотѧ́ще моле́бное рещѝ, не ѡ҆ставлѧ́емъ притека́ти ко твое́й ст҃ы́ни: ѡ҆ нбⷭ҇ныхъ бо твоѐ сотвори́лъ є҆сѝ раче́нїе, живо́тъ земны́й въ жи́знь проба́вль вѣ́чнꙋю ѡ҆ бз҃ѣ. Тѣ́мже ᲂу҆̀бо проше́дъ пꙋте́мъ неꙋдобоходи́мымъ, ᲂу҆до́бь на́мъ ᲂу҆готовлѧ́еши въ црⷭ҇твїе нбⷭ҇ное стєзѝ во ᲂу҆че́нїи твое́мъ про́стѣмъ, и҆ всецѣ́лѣмъ ѡ҆ гдⷭ҇ѣ і҆и҃сѣ твое́мъ житїѝ. Ѽ крⷭ҇ти́телевъ соиме́нниче, хрⷭ҇то́выхъ пꙋте́й сказа́телю и҆ ѿ и҆нохожде́нїѧ дꙋхо́внагѡ въ великомы́слїи ᲂу҆льще́нныхъ препѧ́тїе, вседержи́телѧ ᲂу҆молѝ держа́вꙋ на́шꙋ въ ми́рѣ соблюстѝ, ѿ є҆ресе́й и҆ раско́лѡвъ тѣ́ло ѡ҆гради́ти цр҃ко́вное, вла̑сти и҆ вѡ́инства народолю̑бны и҆ лю́демъ бл҃гочести̑вымъ слꙋжи́тєльны сотвори́ти и҆ врагѝ ѻ҆те́чествїѧ на́шегѡ вско́рѣ побѣждє́ны содѣ́ѧти, ра́зꙋмꙋ же на́шемꙋ пода́ти ꙗ҆́сность є҆ѵⷢ҇льскꙋю и҆ се́рдцꙋ ѡ҆ любвѝ бжⷭ҇твеннѣй простотꙋ̀. Сы́й наслѣ́дїѧ ѻ҆те́ческагѡ ча́сть, дамаски́не, правосла́вїѧ полноты̀ покажѝ ны̀ прее́мники, ѽ вели́кїй і҆ѡа́нне, велелѣ́пото цр҃ко́внаѧ! Тѣ́мже и҆ при концѣ̀ на́шемъ, а҆́ще и҆ чи́мъ престꙋпи́хомъ пред̾ ст҃ы́нею пра́вды бж҃їѧ, и҆спросѝ ᲂу҆ законополо́жника и҆ всеще́драгѡ сꙋдїѝ прости́ти на́мъ ꙗ҆́кѡ ничесѡ́же бл҃га́гѡ сотво́ршымъ, занѐ не къ комꙋ̀ бо и҆но́мꙋ въ печа́ли и҆лѝ проше́нїи припадо́хомъ, никомꙋ́же и҆но́мꙋ возвра́щшесѧ па́ки поклони́хомсѧ, то́чїю хрⷭ҇тꙋ̀ і҆и҃сꙋ распѧ́томꙋ и҆ воскрⷭ҇шемꙋ, сн҃ꙋ бж҃їю, съ ни́мже и҆ ѻ҆ц҃ꙋ̀ всевы́шнемꙋ, со дх҃омъ є҆гѡ̀ прест҃ы́мъ, бжⷭ҇твеннѣй се́й трⷪ҇цѣ бꙋ́ди сла́ва во вѣ́ки всевѣ̑чныѧ. А҆ми́нь.