Кондак 1
Избра́нный чудотво́рче и преди́вный уго́дниче Христо́в, преподо́бне о́тче Са́вво, ми́ру правосла́вному свети́льниче и те́плый о на́с пред Бо́гом моли́твенниче! Велича́ем просла́вльшаго тя́ Го́спода, восхваля́юще любо́вию равноа́нгельное житие́ твое́. Ты́ же, я́ко име́яй ве́лие дерзнове́ние ко Го́споду, от вся́ких на́с бе́д свободи́, да с ра́достию зове́м ти́:
Ра́дуйся, пресве́тлая мона́хов похвало́, Са́вво преподо́бне.
Икос 1
А́нгелов Творе́ц и всея́ тва́ри Соде́тель избра́ тя́ от младе́нства, преподо́бне, просла́вити трисия́тельное и́мя Его́: ты́ бо, осмиле́тен сы́й, вся́ кра́сная ми́ра тле́ннаго презре́в, во оби́тель святу́ю прите́кл еси́, иде́же я́ко а́нгел земны́й богоуго́дно подвиза́лся еси́. Те́мже и всели́ся в тя́ благода́ть Пресвята́го Ду́ха, Его́же де́йством све́тло украша́яся, ангелоподо́бное житие́ показа́л еси́. Мы́ же, зря́ще ве́лия исправле́ния твоя́, с любо́вию вопие́м тебе́ си́це:
Ра́дуйся, роди́телей благочести́вых благослове́нный пло́де; ра́дуйся, Каппадоки́йския страны́ свято́е украше́ние.
Ра́дуйся, Палести́нския земли́ и гра́да Иерусали́ма свети́льниче; ра́дуйся, во Иорда́нстей пусты́ни со а́нгелы всели́выйся.
Ра́дуйся, я́ко от младе́нства Христа́ возлюби́л еси́; ра́дуйся, я́ко же́ртву живу́ю себе́ Го́сподеви прине́сл еси́.
Ра́дуйся, Ева́нгелия Христо́ва усе́рдный после́дователю; ра́дуйся, за́поведей Госпо́дних ве́рный блюсти́телю.
Ра́дуйся, я́ко от ю́ности и́гу Христо́ву себе́ порабо́тил еси́; ра́дуйся, я́ко красоту́ тле́нную и мирску́ю сла́дость ни во что́же вмени́л еси́.
Ра́дуйся, Бо́жия ра́зума испо́лненный; ра́дуйся, благода́тию Ду́ха Свята́го приосене́нный.
Ра́дуйся, пресве́тлая мона́хов похвало́, Са́вво преподо́бне.
Кондак 2
Ви́дев Всеве́дец Госпо́дь благо́е души́ твоея́ произволе́ние, е́же рабо́тати Ему́ усе́рдно вся́ дни́ живота́ твоего́, еще́ во ю́ности просла́ви тя́ Боже́ственною Свое́ю си́лою: любве́ бо ра́ди бра́тския в разжже́нную пе́щь вступи́в и оде́жды твоя́ неопале́нны сохрани́в, благода́тию Бо́жиею неврежде́н от огня́ пребы́л еси́. Сего́ ра́ди прославля́юще Царя́ сла́вы Христа́, прославля́ющаго святы́я Своя́, вопие́м Ему́: Аллилу́иа.
Икос 2
Ра́зум просвеще́н от Бо́га име́я, преподо́бне о́тче Са́вво, диа́вольския искуше́ния при́сно разумева́л еси́: егда́ бо преле́стник ро́да челове́ческаго искуси́ тя́ взя́ти пло́д дре́ва пре́жде ста́рческаго благослове́ния, а́бие помяну́л еси́ прароди́тели, и́же сне́дию дре́ва в раи́ прельсти́шася. Те́мже пове́рг пло́д на зе́млю; нога́ми се́й попра́л еси́, запове́дав себе́ до сме́рти не вкуси́ти плода́ сего́, главу́ дре́вняго зми́я сокруша́я. Сего́ ра́ди приими́ от на́с похвалы́ сия́:
Ра́дуйся, от ю́ности по́стническое житие́ показа́вый; ра́дуйся, на высоту́ доброде́телей возше́дый.
Ра́дуйся, мона́шескаго жития́ и уста́ва и́стовое пра́вило; ра́дуйся, ре́вностный исполни́телю оте́ческих преда́ний.
Ра́дуйся, я́ко любве́ ра́ди бра́та в пе́щный пла́мень вше́л еси́; ра́дуйся, я́ко си́лою благода́ти Христо́вы от огня́ не опале́н изше́л еси́.
Ра́дуйся, всеце́лое послуша́ние Го́споду Бо́гу соверши́вый; ра́дуйся, главу́ дре́вняго запина́теля сокруши́вый.
Ра́дуйся, на высоту́ безстра́стия возше́дый; ра́дуйся, ко́зни де́монския до конца́ победи́вый.
Ра́дуйся, благо́е и́го Христо́во на ра́мена твоя́ восприя́вый; ра́дуйся, зако́на Бо́жия от всея́ души́ взыска́вый.
Ра́дуйся, пресве́тлая мона́хов похвало́, Са́вво преподо́бне.
Кондак 3
Си́ла Вы́шняго, просвеща́ющая вся́каго челове́ка, гряду́щаго в ми́р, и показу́ющая пути́ пра́выя, наста́ви тя́, преподо́бне о́тче Са́вво, дости́гнути свята́го гра́да Иерусали́ма, иде́же поклони́лся еси́ Живоно́сному Гро́бу Воскре́сшаго Христа́, и со слеза́ми облобыза́в, благода́рственно воспе́л еси́ Ему́ пе́снь: Аллилу́иа.
Икос 3
Име́я ве́лию ре́вность о по́двизе мона́шескаго равноапо́стольнаго жития́, преподо́бне, потща́лся еси́ идти́ во Иорда́нскую пусты́ню, иде́же наста́вника себе́ обре́т вели́каго Евфи́мия и того́ житию́ досто́йно поревнова́в, свято́му Крести́телю Христо́ву Иоа́нну в по́двизех твои́х уподо́бился еси́. Мы́ же, дивя́щеся бога́тству доброде́телей твои́х, усе́рдно вопие́м ти́:
Ра́дуйся, житию́ безпло́тных поревнова́вый; ра́дуйся, по́двигом дре́вних святы́х оте́ц досто́йно подража́вый.
Ра́дуйся, пусты́ни Иорда́нския благода́тное прозябе́ние; ра́дуйся, свята́го жития́ благоуха́ние.
Ра́дуйся, благода́ти Христо́вы сосу́де избра́нный; ра́дуйся, пусты́нное житие́ па́че всего́ возлюби́вый.
Ра́дуйся, страсте́й те́рния усе́рдно исторга́вый; ра́дуйся, во ю́ном во́зрасте му́дростию Христо́вою просвеще́нный.
Ра́дуйся, чистоты́ душе́вныя и теле́сныя усе́рдный ревни́телю; ра́дуйся, у́мнаго трезве́ния неусы́пный храни́телю.
Ра́дуйся, ле́ствицею доброде́телей к небе́сным оби́телем возше́дый; ра́дуйся, я́ко фи́никс в пусты́ни процветы́й.
Ра́дуйся, пресве́тлая мона́хов похвало́, Са́вво преподо́бне.
Кондак 4
Бу́рю вну́трь помысло́в и страсте́й во́лны безбе́дно преше́д, преподо́бне о́тче Са́вво, обре́л еси́ ти́хое приста́нище Христа́, Ему́же неле́ностно во мно́зе долготерпе́нии порабо́тал еси́; отню́дуже Боже́ственною благода́тию Христо́вою восходя́ от си́лы в си́лу, от дея́ния к боговиде́нию, небе́снаго Сио́на дости́гл еси́, иде́же со А́нгелы пое́ши Тро́ице Святе́й пе́снь: Аллилу́иа.
Икос 4
Слы́шаще ди́вная твоя́ наставле́ния, я́же не то́чию в словесе́х, но и в по́двизех твои́х явля́л еси́, прихожда́ху к тебе́ издале́ча жа́ждущии спасе́ния, подража́ти доброде́телем твои́м хотя́щее. Ты́ же, преподо́бне о́тче, му́дро назида́я и к Небе́сному Ца́рствию управля́я все́х, ве́рою притека́ющих к тебе́, свети́льник Правосла́вия соде́лался еси́. Сего́ ра́ди с любо́вию вопие́м ти́:
Ра́дуйся, наста́вниче мона́хов Богому́дрый; ра́дуйся, ове́ц христо́вых до́брый па́стырю.
Ра́дуйся, ко спасе́нию ве́рный путеводи́телю; ра́дуйся, по́стников ди́вный учи́телю.
Ра́дуйся, кре́пкое па́дающих возведе́ние; ра́дуйся, правостоя́щих утвержде́ние.
Ра́дуйся, Ева́нгелия Христо́ва усе́рдный послу́шателю; ра́дуйся, и́ноческаго жития́ до́брый наста́вниче.
Ра́дуйся, я́ко огне́м моли́твы стре́лы вра́жия попали́л еси́; ра́дуйся, я́ко еще́ во пло́ти сы́й, ра́йскую сла́дость предвкуси́л еси́.
Ра́дуйся, пусты́нный жи́телю и в телеси́ а́нгеле; ра́дуйся, вселе́нныя свети́льниче.
Ра́дуйся, пресве́тлая мона́хов похвало́, Са́вво преподо́бне.
Кондак 5
Боготе́чней звезде́ уподо́бился еси́, блаже́нне Са́вво, смире́нием возвыша́емый и в го́рняя черто́ги востеки́й, науча́я все́х го́рняя му́дрствовати, а не земна́я, от страсте́й отреша́тися, со Христо́м жи́ти и от се́рдца воспева́ти Ему́: Аллилу́иа.
Икос 5
Ви́девше тя́ ученицы́ твои́ наста́вника прему́дра и зна́мением небе́сныя благода́ти сия́юща, дивля́хуся, тща́щеся твоему́ житию́ подража́ти; я́ко бо луча́ све́тлаго со́лнца пра́вды, просвети́ся житие́ твое́. Сего́ ра́ди слы́шиши от все́х похва́льная пе́ния такова́я:
Ра́дуйся, восто́чная звездо́ златоза́рнейшая; ра́дуйся, А́нгелов собесе́дниче.
Ра́дуйся, по́стников похвало́; ра́дуйся, безмо́лвствующих сла́во.
Ра́дуйся, учи́телю смире́ния и целому́дрия; ра́дуйся, о́бразе кро́тости и послуша́ния.
Ра́дуйся, я́ко во глубины́ нищеты́ духо́вныя прини́кл еси́; ра́дуйся, я́ко на высоту́ доброде́телей возше́л еси́.
Ра́дуйся, я́ко пу́ть к животу́ ве́чному обре́л еси́; ра́дуйся, я́ко исправле́нии твои́ми безпло́тныя удиви́л еси́.
Ра́дуйся, мно́жество ду́ш уневе́стивый Христу́; ра́дуйся, ку́пно с ни́ми пребыва́яй в ра́дости Го́спода твоего́.
Ра́дуйся, пресве́тлая мона́хов похвало́, Са́вво преподо́бне.
Кондак 6
Пропове́дник и исполни́тель Ева́нгельских слове́с, е́же не скрыва́ти себе́ сокро́вищ на земли́, яви́лся еси́, преподо́бне о́тче Са́вво. Сего́ ра́ди и ча́да твоя́ духо́вная наставля́л еси́, е́же Еди́наго Го́спода иска́ти во вся́ дни́ жи́зни своея́, все́м се́рдцем Тому́ прилепля́тися и непреста́нно пе́ти Ему́: Аллилу́иа.
Икос 6
Возсия́ све́т Боже́ственный, в нощи́ моля́щуся тебе́, преподо́бне, показу́я столпо́м о́гненным пеще́ру нерукотворе́ну, ю́же хра́м соде́лал еси́, и та́мо вели́кую ла́вру устро́ив, богоуго́дныя по́двиги и моли́твенныя труды́ показа́л еси́. Мы́ же, вели́чию благода́ти Вы́шняго, на тебе́ почи́вшия, дивя́щеся, умиле́нно взыва́ем:
Ра́дуйся, я́ко виде́ния пренебе́снаго све́та сподо́бился еси́; ра́дуйся, я́ко благоволе́нием Бо́жиим вели́кую ла́вру устро́ил еси́ и в ню́ мно́жество и́ноков собра́л еси́.
Ра́дуйся, духо́вныя о́вцы к Го́рнему Ца́рствию до́бре упра́вивый; ра́дуйся, мно́гая чудеса́ благода́тию Свята́го Ду́ха сотвори́вый.
Ра́дуйся, лени́выя подви́гнувый ре́вностными по́двиги твоего́ жития́ Христолюби́ваго; ра́дуйся, печа́льных ско́рое утеше́ние.
Ра́дуйся, Ева́нгелия Христо́ва богому́дрый учи́телю; ра́дуйся, провозве́стниче путе́й Госпо́дних.
Ра́дуйся, вся́ во уме́ты вмени́вый, да Христа́ приобря́щеши; ра́дуйся, Христу́ невозвра́тно после́довавый.
Ра́дуйся, благи́й и ве́рный ра́бе Христо́в; ра́дуйся, до́брый де́лателю виногра́да Христо́ва.
Ра́дуйся, пресве́тлая мона́хов похвало́, Са́вво преподо́бне.
Кондак 7
Хотя́ ве́рен бы́ти до конца́ Иису́су Христу́, Сы́ну Бо́жию, взе́мшему грехи́ ми́ра, кро́тость, незло́бие, смире́ние в се́рдце твое́м до́бре насади́л еси́, богоно́се о́тче Са́вво, и вся́кия ско́рби, укоре́ния и досажде́ния ра́достно претерпе́л еси́, ве́дая, я́ко мно́гими скорбьми́ подоба́ет вни́ти в Ца́рствие Небе́сное. Сего́ ра́ди, несе́нием креста́ Христо́ва и терпе́нием скорбе́й, еще́ на земли́ ду́шу твою́ во оби́тель Пресвяты́я Тро́ицы устро́ил еси́, Е́йже ны́не предстои́ши со А́нгелы и вопие́ши а́нгельскую пе́снь: Аллилу́иа.
Икос 7
Ди́вный вои́стину победоно́сец показа́лся еси́ на стра́сти плотски́я, богоблаже́нне; вся́ бо разжже́нныя стре́лы лука́ваго посто́м, бде́нием и сле́зными моли́твами угаси́л еси́. Те́мже вопие́м тебе́ сицева́я:
Ра́дуйся, кре́ст Христо́в на ра́мена твоя́ восприе́мый; ра́дуйся, кресто́м си́м я́ко ле́ствицею на не́бо возше́дый.
Ра́дуйся, терпе́ния и незло́бия рачи́телю; ра́дуйся, и́ноков до́бре подвиза́ющихся моли́твенный пред Бо́гом предста́телю.
Ра́дуйся, ве́ры Правосла́вныя мо́щный защи́тниче; ра́дуйся, Небе́снаго Ца́рствия насле́дниче.
Ра́дуйся, благода́тию Бо́жиею приосене́нный; ра́дуйся, я́ко о́браз страсте́й Христо́вых в се́рдце твое́м предписа́л еси́.
Ра́дуйся, све́том трисо́лнечным Святы́я Тро́ицы озаре́нный; ра́дуйся, я́ко душе́вныма очи́ма при́сно Го́спода созерца́л еси́.
Ра́дуйся, я́ко благода́тию Бо́жиею вся́ прови́дел еси́; ра́дуйся, благода́тными чудесы́ житие́ твое́ озари́вый.
Ра́дуйся, пресве́тлая мона́хов похвало́, Са́вво преподо́бне.
Кондак 8
Стра́нника и прише́льца помышля́л еси́ в себе́ бы́ти в ми́ре се́м, преблаже́нне о́тче Са́вво; те́мже гряду́щаго гра́да Иерусали́ма Небе́снаго взыску́я, вся́ помышле́ния твоя́ к небеси́ непреста́нно возноси́л еси́, и, я́ко в тимпа́не, во умерщвле́ннем телеси́, сла́дце воспева́л еси́ побе́дную пе́снь Христу́ Бо́гу: Аллилу́иа.
Икос 8
Ве́сь обле́клся еси́ во ору́жия Бо́жия, преподо́бне; те́мже возмо́гл еси́ всю́ си́лу диа́волю низложи́ти. Помози́ у́бо и на́м, преблаже́нне о́тче, моли́твами твои́ми избы́ти сете́й вра́жиих, да благода́рственно зове́м тебе́ си́це:
Ра́дуйся, сто́лпе непрекло́нный терпе́ния; ра́дуйся, ревни́телю от ми́ра удале́ния.
Ра́дуйся, я́ко держа́вно плотски́я стра́сти низложи́л еси́; ра́дуйся, я́ко пло́ть твою́ ду́хови покори́л еси́.
Ра́дуйся, я́ко во бде́нных моли́твах неосла́бно пребыва́л еси́; ра́дуйся, я́ко умерщвле́нием пло́ти безстра́стие стяжа́л еси́.
Ра́дуйся, я́ко вся́кое наслажде́ние земно́е возненави́дел еси́; ра́дуйся, я́ко те́сным и приско́рбным путе́м ходи́л еси́.
Ра́дуйся, я́ко я́звы Го́спода Иису́са Христа́ на те́ле твое́м носи́л еси́; ра́дуйся, я́ко си́лою креста́ Госпо́дня де́монския ко́зни сокруши́л еси́.
Ра́дуйся, вы́шних иде́же Христо́с се́де одесну́ю Отца́ при́сно иска́вый; ра́дуйся, мы́сленным о́ком к невече́рнему све́ту Христу́ непреста́нно взира́вый.
Ра́дуйся, пресве́тлая мона́хов похвало́, Са́вво преподо́бне.
Кондак 9
Вся́кое естество́ а́нгельское просла́ви тя́ и Це́рковь восхвали́, преподо́бне о́тче Са́вво; ты́ бо царя́ неправому́дрствующа и Севи́ровы ересенача́льники проти́вящияся Правосла́вней Це́ркви небоя́зненно обличи́л еси́ и, все́ духо́вное во́инство Правосла́вия совокупи́в, е́ресь в коне́ц низложи́л еси́, на́с же все́х во правове́рии утверди́в, научи́л еси́ единогла́сно воспева́ти Триеди́ному Бо́гу: Аллилу́иа.
Икос 9
Вети́я многовеща́нныя недоуме́ют досто́йно восхвали́ти тя́, преблаже́нне; па́че бо естества́ челове́ческаго подвиза́лся еси́ во вся́ дни́ живота́ твоего́. Те́мже чудесы́ Христо́с Бо́г тебе́ обогати́, я́ко и зве́рие ди́вии повинова́хуся и служа́ху тебе́, во дни́ же гла́да моли́твою твое́ю не́бо до́ждь даде́ на зе́млю су́ху. Сего́ ра́ди, любо́вию подвиза́емии, вопие́м тебе́ такова́я:
Ра́дуйся, Це́ркве Правосла́вныя похвало́; ра́дуйся, еретико́в и все́х проти́вников правове́рия обличи́телю.
Ра́дуйся, я́ко люде́й увеща́ти о и́стине Правосла́вия потща́лся еси́; ра́дуйся, за и́стину Правосла́вия мно́гия труды́ и по́двиги подъе́мый.
Ра́дуйся, Правосла́вныя ве́ры свети́ло и утвержде́ние; ра́дуйся, проро́ком, апо́столом и святи́телем сопричте́нный.
Ра́дуйся, царе́й правосла́вных покро́ве и защище́ние; ра́дуйся, христиа́н правове́рных моли́твенное огражде́ние.
Ра́дуйся, ерети́ческих уче́ний разори́телю; ра́дуйся, правосла́вных догма́тов уясни́телю.
Ра́дуйся, все́м подвиза́ющимся о Правосла́вии помо́щниче; ра́дуйся, па́стырей Правосла́вныя Це́ркве споспе́шниче.
Ра́дуйся, пресве́тлая мона́хов похвало́, Са́вво преподо́бне.
Кондак 10
Спасти́ хотя́ мно́жество люде́й твои́м попече́нием, премилосе́рдый Госпо́дь досто́йна тя́ наста́вника избра́, преблаже́нне о́тче Са́вво; мно́зи бо тобо́ю на пу́ть спасе́ния наста́влени бы́ша, и мно́ги оби́тели твои́м тща́нием устро́ишася, в ни́хже науча́л еси́ немо́лчно воспева́ти Еди́ному Бо́гу: Аллилу́иа.
Икос 10
Стена́ тве́рдая и кре́пкое огражде́ние правосла́вных яви́лся еси́, преподо́бне, хода́тайством бо твои́м ми́р Це́ркви Бо́жией дарова́ся. Те́мже мо́лим тя́, преблаже́нне, бу́ди помо́щник во все́х ско́рбех и напа́стех и на́м, к заступле́нию твоему́ прибега́ющим, да со умиле́нием вопие́м ти́ си́це:
Ра́дуйся, пусты́нниче, мирску́ю суету́ возненави́девый и Еди́наго Бо́га иска́вый; ра́дуйся, олтаря́ Госпо́дня служи́телю благогове́йный.
Ра́дуйся, со вся́ким тща́нием Го́споду благоугожда́вый; ра́дуйся, пла́менную любо́вь ко Христу́ яви́вый.
Ра́дуйся, мно́гия оби́тели созида́вый; ра́дуйся, мно́жество ча́д духо́вных вну́трь собра́вый.
Ра́дуйся, во оскуде́ниих и лише́ниих на Бо́га упова́вый; ра́дуйся, ве́рою и упова́нием изоби́лие плодо́в земны́х прие́мый.
Ра́дуйся, тезоимени́тыя тебе́ оби́тели стра́же неусы́пный; ра́дуйся, в беда́х, напа́стех и ско́рбех помо́щниче неотсту́пный.
Ра́дуйся, и́ноков ко спасе́нию до́брый путеводи́телю; ра́дуйся, многомо́щный моли́твенниче о душа́х на́ших.
Ра́дуйся, пресве́тлая мона́хов похвало́, Са́вво преподо́бне.
Кондак 11
Пе́ние хвале́бное прино́сим тебе́, преподо́бне о́тче Са́вво, и с любо́вию припа́дающе ко изображе́нию честна́го ли́ка твоего́, восхваля́ем ангелоподо́бное житие́ твое́. Ты́ же, предстоя́ престо́лу Пресвяты́я Тро́ицы, не преста́й моля́ся о на́с, ублажа́ющих тя́, да сподо́бимся небе́снаго селе́ния дости́гнути и гла́сом ра́дования воспе́ти Бо́гу а́нгельскую пе́снь: Аллилу́иа.
Икос 11
Светоза́рный свети́льник Бо́жия благода́ти бы́л еси́, преблаже́нне, сего́ ра́ди в сме́ртнем успе́нии твое́м душа́ твоя́, я́ко со́лнце сия́ющая, вознесе́на бы́сть святы́ми а́нгелы в небе́сныя оби́тели. Мы́ же, помина́юще твою́ блаже́нную кончи́ну и на небеси́ прославле́ние, ра́достно вопие́м ти́:
Ра́дуйся, уго́дниче Бо́жий, тече́ние твоея́ жи́зни благоче́стно сконча́вый; ра́дуйся, ве́ру, наде́жду и любо́вь до конца́ сохрани́вый.
Ра́дуйся, я́ко Ца́рствие и сла́ву ве́чную насле́довал еси́; ра́дуйся, я́ко по труде́х жития́ земна́го в небе́сных селе́ниих водвори́лся еси́.
Ра́дуйся, нетле́нным венце́м сла́вы небе́сныя от руки́ Вседержи́теля увенча́нный; ра́дуйся, блаже́нство ра́йское со все́ми святы́ми восприе́мый.
Ра́дуйся, а́нгеле земны́й и челове́че небе́сный; ра́дуйся, на небеси́ и на земли́ от Го́спода просла́вленный.
Ра́дуйся, живоно́сный исто́чниче, благода́ть исцеле́ния излива́яй; ра́дуйся, одержи́мых неду́ги благода́тию Бо́жиею исцеля́яй.
Ра́дуйся, я́ко с высоты́ небе́сныя на на́с (и оби́тель твою́) призира́еши; ра́дуйся, я́ко все́х на́с от напа́стей сохраня́еши.
Ра́дуйся, пресве́тлая мона́хов похвало́, Са́вво преподо́бне.
Кондак 12
Благода́ть и ве́лие твое́ дерзнове́ние пред Бо́гом ве́дуще, богоно́сне о́тче Са́вво, усе́рдно вопие́м тебе́: не преста́й моля́ся те́пле ко Го́споду, да сохрани́т святу́ю Це́рковь Свою́ непозы́блему от неве́рия, ересе́й и раско́ла, да изба́вит на́с от бе́д и лю́тых обстоя́ний и приведе́т в Ца́рствие Свое́ Небе́сное, я́ко да пое́м со благодаре́нием тобо́ю благоде́ющему на́м ди́вному во святы́х Бо́гу: Аллилу́иа.
Икос 12
Пою́ще просла́вльшаго тя́ Го́спода и ублажа́юще тя́, преблаже́нне о́тче, приле́жно мо́лимся тебе́, е́же сподо́битися и на́м хода́тайством твои́м неосужде́нно предста́ти Стра́шному Суди́щу Христо́ву, да с ра́достию и любо́вию воспомина́юще твое́ моли́твенное о на́с пред Бо́гом предста́тельство, благохва́льно зове́м тебе́ си́це:
Ра́дуйся, пречестно́е селе́ние Пресвяты́я Тро́ицы; ра́дуйся, избра́нное Свята́го Ду́ха жили́ще.
Ра́дуйся, сия́ние незаходи́маго Со́лнца; ра́дуйся, луча́ми по́двигов твои́х мона́шеское житие́ озаря́яй.
Ра́дуйся, досто́йный А́нгелов собесе́дниче; ра́дуйся, му́чеников и преподо́бных на небеси́ сожи́телю.
Ра́дуйся, я́ко мзда́ твоя́ мно́га на небеси́; ра́дуйся, Це́ркви Правосла́вныя украше́ние.
Ра́дуйся, в беда́х су́щим ско́рое вспоможе́ние; ра́дуйся, те́плый пред Го́сподем о на́с моли́твенниче.
Ра́дуйся, при́сный и́ноков помо́щниче и засту́пниче.
Ра́дуйся, пресве́тлая мона́хов похвало́, Са́вво преподо́бне.
Кондак 13
О вели́кий и ди́вный уго́дниче Христо́в, преподо́бне о́тче Са́вво! Приими́ ми́лостивно сие́ ма́лое моле́ние, от усе́рдия на́шего в похвалу́ тебе́ приноси́мое, и твои́м моли́твенным предста́тельством у престо́ла Царя́ Небе́снаго испроси́ на́м, е́же изба́витися в жи́зни се́й от все́х бе́д и напа́стей, в сме́ртнем же успе́нии на́шем благу́ю ча́сть спасе́ния и насле́дие ве́чных бла́г получи́ти, я́ко да сподо́бимся с тобо́ю и со все́ми святы́ми в ра́дости ве́чней во ве́ки воспева́ти Христу́ Бо́гу Спаси́телю на́шему: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов Творе́ц и всея́ тва́ри Соде́тель избра́ тя́ от младе́нства, преподо́бне, просла́вити трисия́тельное и́мя Его́: ты́ бо, осмиле́тен сы́й, вся́ кра́сная ми́ра тле́ннаго презре́в, во оби́тель святу́ю прите́кл еси́, иде́же я́ко а́нгел земны́й богоуго́дно подвиза́лся еси́. Те́мже и всели́ся в тя́ благода́ть Пресвята́го Ду́ха, Его́же де́йством све́тло украша́яся, ангелоподо́бное житие́ показа́л еси́. Мы́ же, зря́ще ве́лия исправле́ния твоя́, с любо́вию вопие́м тебе́ си́це:
Ра́дуйся, роди́телей благочести́вых благослове́нный пло́де; ра́дуйся, Каппадоки́йския страны́ свято́е украше́ние.
Ра́дуйся, Палести́нския земли́ и гра́да Иерусали́ма свети́льниче; ра́дуйся, во Иорда́нстей пусты́ни со а́нгелы всели́выйся.
Ра́дуйся, я́ко от младе́нства Христа́ возлюби́л еси́; ра́дуйся, я́ко же́ртву живу́ю себе́ Го́сподеви прине́сл еси́.
Ра́дуйся, Ева́нгелия Христо́ва усе́рдный после́дователю; ра́дуйся, за́поведей Госпо́дних ве́рный блюсти́телю.
Ра́дуйся, я́ко от ю́ности и́гу Христо́ву себе́ порабо́тил еси́; ра́дуйся, я́ко красоту́ тле́нную и мирску́ю сла́дость ни во что́же вмени́л еси́.
Ра́дуйся, Бо́жия ра́зума испо́лненный; ра́дуйся, благода́тию Ду́ха Свята́го приосене́нный.
Ра́дуйся, пресве́тлая мона́хов похвало́, Са́вво преподо́бне.
Кондак 1
Избра́нный чудотво́рче и преди́вный уго́дниче Христо́в, преподо́бне о́тче Са́вво, ми́ру правосла́вному свети́льниче и те́плый о на́с пред Бо́гом моли́твенниче! Велича́ем просла́вльшаго тя́ Го́спода, восхваля́юще любо́вию равноа́нгельное житие́ твое́. Ты́ же, я́ко име́яй ве́лие дерзнове́ние ко Го́споду, от вся́ких на́с бе́д свободи́, да с ра́достию зове́м ти́:
Ра́дуйся, пресве́тлая мона́хов похвало́, Са́вво преподо́бне.
Молитвы
О преди́вный и всехва́льный уго́дниче Бо́жий, преподо́бне о́тче Са́вво! Дне́сь (во святе́м хра́ме твое́м) благогове́йно предстоя́ще пред свято́ю ико́ною твое́ю и ра́достно соверша́юще пресве́тлую па́мять твою́, ублажа́ем тя́ засту́пника на́шего. Почита́юще же твое́ ве́лие дерзнове́ние пред Го́сподем, смире́нно мо́лим тя́, преблаже́нне: приими́ ми́лостивно от на́с хвале́бное пе́ние сие́, от любве́ и усе́рдия тебе́ приноси́мое. И, я́ко име́яй ве́лие дерзнове́ние ко Го́споду, потщи́ся богоприя́тным твои́м хода́тайством испроси́ти у Царя́ ца́рствующих и Го́спода госпо́дствующих, я́ко да проба́вит вели́кия и бога́тыя ми́лости Своя́ на на́с гре́шных, да пода́ст на́м ду́х пра́выя ве́ры, ду́х ве́дения и любве́, ду́х ми́ра и ра́дости о Ду́се Свя́те, да изба́вит от бе́д и напа́стей, да низпо́слет вся́ поле́зная ко спасе́нию ду́ш на́ших. Все́м же правосла́вным да низпо́слет ми́р, тишину́, безмяте́жие, усе́рдие ко исполне́нию за́поведей его́, изоби́лие плодо́в земны́х, и да изба́вит всю́ ру́сскую страну́ от гла́да, тру́са, пото́па, огня́, меча́, наше́ствия иноплеме́нных и междоусо́бныя бра́ни, смертоно́сныя я́звы и от вся́каго зла́. Е́й, уго́дниче Бо́жий! Не пре́зри моле́ний на́ших, но услы́ши на́с моля́щихся тебе́, и под кро́вом заступле́ния твоего́ сохрани́ на́с (и оби́тель твою́) ненаве́тны от вра́г ви́димых и неви́димых, да сподо́бимся сконча́ти житие́ на́ше в покая́нии и восприи́мем ве́чная блага́я во Ца́рствии Христа́ Бо́га на́шего, иде́же восхва́лим с тобо́ю и все́ми святы́ми достопокланя́емое и́мя Пресвяты́я Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.
Конда́къ а҃
И҆збра́нный чꙋдотво́рче и҆ преди́вный ᲂу҆го́дниче хрⷭ҇то́въ, прпⷣбне ѻ҆́тче са́вво, мі́рꙋ правосла́вномꙋ свѣти́льниче и҆ те́плый ѡ҆ на́съ пред̾ бг҃омъ мл҃твенниче. Велича́емъ просла́вльшагѡ тѧ̀ гдⷭ҇а, восхвалѧ́юще любо́вїю равноа́гг҃льное житїѐ твоѐ. Ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да съ ра́достїю зове́мъ тѝ:
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
І҆́косъ а҃
А҆́гг҃лѡвъ творе́цъ и҆ всеѧ̀ тва́ри содѣ́тель и҆збра̀ тѧ̀ ѿ младе́нства, прпⷣбне, просла́вити трисїѧ́тельное и҆́мѧ є҆гѡ̀: ты́ бо, ѻ҆смилѣ́тенъ сы́й, всѧ̀ кра́снаѧ мі́ра тлѣ́ннагѡ презрѣ́въ, во ѻ҆би́тель ст҃ꙋ́ю прите́клъ є҆сѝ, и҆дѣ́же ꙗ҆́кѡ а҆́гг҃лъ земны́й бг҃оꙋго́днѡ подвиза́лсѧ є҆сѝ. Тѣ́мже и҆ всели́сѧ въ тѧ̀ блгⷣть прест҃а́гѡ дх҃а, є҆го́же дѣ́йствомъ свѣ́тло ᲂу҆краша́ѧсѧ, а҆гг҃лоподо́бное житїѐ показа́лъ є҆сѝ. Мы́ же, зрѧ́ще ве́лїѧ и҆справлє́нїѧ твоѧ̀, съ любо́вїю вопїе́мъ тебѣ̀ си́це:
Ра́дꙋйсѧ, роди́телей бл҃гочести́выхъ бл҃гослове́нный пло́де. Ра́дꙋйсѧ, каппадокі́йскїѧ страны̀ ст҃о́е ᲂу҆краше́нїе.
Ра́дꙋйсѧ, палесті́нскїѧ землѝ и҆ гра́да і҆ерⷭ҇ли́ма свѣти́льниче. Ра́дꙋйсѧ, во і҆ѻрда́нстѣй пꙋсты́ни со а҆́гг҃лы всели́выйсѧ.
Ра́дꙋйсѧ, ꙗ҆́кѡ ѿ младе́нства хрⷭ҇та̀ возлюби́лъ є҆сѝ. Ра́дꙋйсѧ, ꙗ҆́кѡ же́ртвꙋ живꙋ́ю себѐ гдⷭ҇еви прине́слъ є҆сѝ.
Ра́дꙋйсѧ, є҆ѵⷢ҇лїѧ хрⷭ҇то́ва ᲂу҆се́рдный послѣ́дователю. Ра́дꙋйсѧ, за́повѣдей гдⷭ҇нихъ вѣ́рный блюсти́телю.
Ра́дꙋйсѧ, ꙗ҆́кѡ ѿ ю҆́ности и҆́гꙋ хрⷭ҇то́вꙋ себѣ̀ порабо́тилъ є҆сѝ. Ра́дꙋйсѧ, ꙗ҆́кѡ красотꙋ̀ тлѣ́ннꙋю и҆ мїрскꙋ́ю сла́дость ни во что́же вмѣни́лъ є҆сѝ.
Ра́дꙋйсѧ, бж҃їѧ ра́зꙋма и҆спо́лненный. Ра́дꙋйсѧ, блгⷣтїю дх҃а ст҃а́гѡ прїѡсѣне́нный.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ в҃
Ви́дѣвъ всевѣ́децъ гдⷭ҇ь бл҃го́е дꙋшѝ твоеѧ̀ произволе́нїе, є҆́же рабо́тати є҆мꙋ̀ ᲂу҆се́рднѡ всѧ̑ днѝ живота̀ твоегѡ̀, є҆щѐ во ю҆́ности просла́ви тѧ̀ бж҃е́ственною свое́ю си́лою: любвѐ бо ра́ди бра́тскїѧ въ разжже́ннꙋю пе́щь встꙋпи́въ и҆ ѻ҆де́жды твоѧ̀ неѡпале́нны сохрани́въ, блгⷣтїю бж҃їею неврежде́нъ ѿ ѻ҆гнѧ̀ пребы́лъ є҆сѝ. Сегѡ̀ ра́ди прославлѧ́юще цр҃ѧ̀ сла́вы хрⷭ҇та̀, прославлѧ́ющагѡ ст҃ы́ѧ своѧ̀, вопїе́мъ є҆мꙋ̀: А҆ллилꙋ́їа.
І҆́косъ в҃
Ра́зꙋмъ просвѣще́нъ ѿ бг҃а и҆мѣ́ѧ, прпⷣбне ѻ҆́тче са́вво, дїа́вольскїѧ и҆скꙋше́нїѧ при́снѡ разꙋмѣва́лъ є҆сѝ: є҆гда́ бо преле́стникъ ро́да чл҃вѣ́ческагѡ и҆скꙋсѝ тѧ̀ взѧ́ти пло́дъ дре́ва пре́жде ста́рческагѡ бл҃гослове́нїѧ, а҆́бїе помѧнꙋ́лъ є҆сѝ прароди́тели, и҆́же снѣ́дїю дре́ва въ раѝ прельсти́шасѧ. Тѣ́мже пове́ргъ пло́дъ на зе́млю: нога́ми се́й попра́лъ є҆сѝ, заповѣ́давъ себѣ̀ до сме́рти не вкꙋси́ти плода̀ сегѡ̀, главꙋ̀ дре́внѧгѡ ѕмі́ѧ сокрꙋша́ѧ. Сегѡ̀ ра́ди прїимѝ ѿ на́съ похвалы̀ сїѧ̀:
Ра́дꙋйсѧ, ѿ ю҆́ности по́стническое житїѐ показа́вый. Ра́дꙋйсѧ, на высотꙋ̀ добродѣ́телей возше́дый.
Ра́дꙋйсѧ, мона́шескагѡ житїѧ̀ и҆ ᲂу҆ста́ва и҆́стовое пра́вило. Ра́дꙋйсѧ, ре́вностный и҆сполни́телю ѻ҆те́ческихъ преда́нїй.
Ра́дꙋйсѧ, ꙗ҆́кѡ любвѐ ра́ди бра́та въ пе́щный пла́мень вше́лъ є҆сѝ. Ра́дꙋйсѧ, ꙗ҆́кѡ си́лою блгⷣти хрⷭ҇то́вы ѿ ѻ҆гнѧ̀ не ѡ҆пале́нъ и҆зше́лъ є҆сѝ.
Ра́дꙋйсѧ, всецѣ́лое послꙋша́нїе гдⷭ҇ꙋ бг҃ꙋ соверши́вый. Ра́дꙋйсѧ, главꙋ̀ дре́внѧгѡ запина́телѧ сокрꙋши́вый.
Ра́дꙋйсѧ, на высотꙋ̀ безстра́стїѧ возше́дый. Ра́дꙋйсѧ, ко́зни дє́мѡнскїѧ до конца̀ побѣди́вый.
Ра́дꙋйсѧ, бл҃го́е и҆́го хрⷭ҇то́во на ра́мена твоѧ̀ воспрїѧ́вый. Ра́дꙋйсѧ, зако́на бж҃їѧ ѿ всеѧ̀ дꙋшѝ взыска́вый.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ г҃
Си́ла вы́шнѧгѡ, просвѣща́ющаѧ всѧ́кагѡ чл҃вѣ́ка, грѧдꙋ́щагѡ въ мі́ръ, и҆ показꙋ́ющаѧ пꙋтѝ пра́выѧ, наста́ви тѧ̀, прпⷣбне ѻ҆́тче са́вво, дости́гнꙋти ст҃а́гѡ гра́да і҆ерⷭ҇ли́ма, и҆дѣ́же поклони́лсѧ є҆сѝ живоно́сномꙋ гро́бꙋ воскре́сшагѡ хрⷭ҇та̀, и҆ со слеза́ми ѡ҆блобыза́въ, бл҃года́рственнѡ воспѣ́лъ є҆сѝ є҆мꙋ̀ пѣ́снь: А҆ллилꙋ́їа.
І҆́косъ г҃
И҆мѣ́ѧ ве́лїю ре́вность ѡ҆ по́двизѣ мона́шескагѡ равноапⷭ҇льнагѡ житїѧ̀, прпⷣбне, потща́лсѧ є҆сѝ и҆дтѝ во і҆ѻрда́нскꙋю пꙋсты́ню, и҆дѣ́же наста́вника себѣ̀ ѡ҆брѣ́тъ вели́кагѡ є҆ѵѳѵ́мїа и҆ тогѡ̀ житїю̀ досто́йнѡ поревнова́въ, ст҃о́мꙋ крⷭ҇ти́телю хрⷭ҇то́вꙋ і҆ѡа́ннꙋ въ по́двизѣхъ твои́хъ ᲂу҆подо́билсѧ є҆сѝ. Мы́ же, дивѧ́щесѧ бога́тствꙋ добродѣ́телей твои́хъ, ᲂу҆се́рднѡ вопїе́мъ тѝ:
Ра́дꙋйсѧ, житїю̀ безпло́тныхъ поревнова́вый. Ра́дꙋйсѧ, по́двигѡмъ дре́внихъ ст҃ы́хъ ѻ҆тє́цъ досто́йнѡ подража́вый.
Ра́дꙋйсѧ, пꙋсты́ни і҆ѻрда́нскїѧ блгⷣтное прозѧбе́нїе. Ра́дꙋйсѧ, ст҃а́гѡ житїѧ̀ бл҃гоꙋха́нїе.
Ра́дꙋйсѧ, блгⷣти хрⷭ҇то́вы сосꙋ́де и҆збра́нный. Ра́дꙋйсѧ, пꙋсты́нное житїѐ па́че всегѡ̀ возлюби́вый.
Ра́дꙋйсѧ, страсте́й те́рнїѧ ᲂу҆се́рднѡ и҆сторга́вый. Ра́дꙋйсѧ, во ю҆́номъ во́зрастѣ мꙋ́дростїю хрⷭ҇то́вою просвѣще́нный.
Ра́дꙋйсѧ, чⷭ҇тоты̀ дꙋше́вныѧ и҆ тѣле́сныѧ ᲂу҆се́рдный ревни́телю. Ра́дꙋйсѧ, ᲂу҆́мнагѡ трезве́нїѧ неꙋсы́пный храни́телю.
Ра́дꙋйсѧ, лѣ́ствицею добродѣ́телей къ нб҃снымъ ѻ҆би́телємъ возше́дый. Ра́дꙋйсѧ, ꙗ҆́кѡ фі́нїѯъ въ пꙋсты́ни процвѣты́й.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ д҃
Бꙋ́рю внꙋ́трь помыслѡ́въ и҆ страсте́й во́лны безбѣ́днѡ преше́дъ, прпⷣбне ѻ҆́тче са́вво, ѡ҆брѣ́лъ є҆сѝ ти́хое приста́нище хрⷭ҇та̀, є҆мꙋ́же нелѣ́ностнѡ во мно́зѣ долготерпѣ́нїи порабо́талъ є҆сѝ: ѿню́дꙋже бж҃е́ственною блгⷣтїю хрⷭ҇то́вою восходѧ̀ ѿ си́лы въ си́лꙋ, ѿ дѣѧ́нїѧ къ бг҃овидѣ́нїю, нбⷭ҇нагѡ сїѡ́на дости́глъ є҆сѝ, и҆дѣ́же со а҆́гг҃лы пое́ши трⷪ҇цѣ ст҃ѣ́й пѣ́снь: А҆ллилꙋ́їа.
І҆́косъ д҃
Слы́шаще ди́внаѧ твоѧ̀ наставле́нїѧ, ꙗ҆́же не то́чїю въ словесѣ́хъ, но и҆ въ по́двизѣхъ твои́хъ ꙗ҆влѧ́лъ є҆сѝ, прихожда́хꙋ къ тебѣ̀ и҆здале́ча жа́ждꙋщїи сп҃се́нїѧ, подража́ти добродѣ́телємъ твои́мъ хотѧ́щее. Ты́ же, прпⷣбне ѻ҆́тче, мꙋ́дрѡ назида́ѧ и҆ къ нбⷭ҇номꙋ црⷭ҇твїю ᲂу҆правлѧ́ѧ всѣ́хъ, вѣ́рою притека́ющихъ къ тебѣ̀, свѣти́льникъ правосла́вїѧ содѣ́лалсѧ є҆сѝ. Сегѡ̀ ра́ди съ любо́вїю вопїе́мъ тѝ:
Ра́дꙋйсѧ, наста́вниче мона́хѡвъ бг҃омꙋ́дрый. Ра́дꙋйсѧ, ѻ҆ве́цъ хрⷭ҇то́выхъ до́брый па́стырю.
Ра́дꙋйсѧ, ко сп҃се́нїю вѣ́рный пꙋтеводи́телю. Ра́дꙋйсѧ, по́стникѡвъ ди́вный ᲂу҆чи́телю.
Ра́дꙋйсѧ, крѣ́пкое па́дающихъ возведе́нїе. Ра́дꙋйсѧ, правостоѧ́щихъ ᲂу҆твержде́нїе.
Ра́дꙋйсѧ, є҆ѵⷢ҇лїѧ хрⷭ҇то́ва ᲂу҆се́рдный послꙋ́шателю. Ра́дꙋйсѧ, и҆́ноческагѡ житїѧ̀ до́брый наста́вниче.
Ра́дꙋйсѧ, ꙗ҆́кѡ ѻ҆гне́мъ мл҃твы стрѣ́лы вра́жїѧ попали́лъ є҆сѝ. Ра́дꙋйсѧ, ꙗ҆́кѡ є҆щѐ во пло́ти сы́й, ра́йскꙋю сла́дость предвкꙋси́лъ є҆сѝ.
Ра́дꙋйсѧ, пꙋсты́нный жи́телю и҆ въ тѣлесѝ а҆́гг҃ле. Ра́дꙋйсѧ, вселе́нныѧ свѣти́льниче.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ є҃
Бг҃оте́чнѣй ѕвѣздѣ̀ ᲂу҆подо́билсѧ є҆сѝ, бл҃же́нне са́вво, смире́нїемъ возвыша́емый и҆ въ го́рнѧѧ черто́ги востекі́й, наꙋча́ѧ всѣ́хъ го́рнѧѧ мꙋ́дрствовати, а҆ не земна́ѧ, ѿ страсте́й ѿреша́тисѧ, со хрⷭ҇то́мъ жи́ти и҆ ѿ се́рдца воспѣва́ти є҆мꙋ̀: А҆ллилꙋ́їа.
І҆́косъ є҃
Ви́дѣвше тѧ̀ ᲂу҆ченицы̀ твоѝ наста́вника премꙋ́дра и҆ зна́менїемъ нбⷭ҇ныѧ блгⷣти сїѧ́юща, дивлѧ́хꙋсѧ, тща́щесѧ твоемꙋ̀ житїю̀ подража́ти: ꙗ҆́кѡ бо лꙋча̀ свѣ́тлагѡ со́лнца пра́вды, просвѣти́сѧ житїѐ твоѐ. Сегѡ̀ ра́ди слы́шиши ѿ всѣ́хъ похва́льнаѧ пѣ́нїѧ такова̑ѧ:
Ра́дꙋйсѧ, восто́чнаѧ ѕвѣздо̀ златоза́рнѣйшаѧ. Ра́дꙋйсѧ, а҆́гг҃лѡвъ собесѣ́дниче.
Ра́дꙋйсѧ, по́стникѡвъ похвало̀. Ра́дꙋйсѧ, безмо́лвствꙋющихъ сла́во.
Ра́дꙋйсѧ, ᲂу҆чи́телю смире́нїѧ и҆ цѣломꙋ́дрїѧ. Ра́дꙋйсѧ, ѻ҆́бразе кро́тости и҆ послꙋша́нїѧ.
Ра́дꙋйсѧ, ꙗ҆́кѡ во глꙋбины̑ нищеты̀ дꙋхо́вныѧ прини́клъ є҆сѝ. Ра́дꙋйсѧ, ꙗ҆́кѡ на высотꙋ̀ добродѣ́телей возше́лъ є҆сѝ.
Ра́дꙋйсѧ, ꙗ҆́кѡ пꙋ́ть къ животꙋ̀ вѣ́чномꙋ ѡ҆брѣ́лъ є҆сѝ. Ра́дꙋйсѧ, ꙗ҆́кѡ и҆справлє́нїи твои́ми безпло́тныѧ ᲂу҆диви́лъ є҆сѝ.
Ра́дꙋйсѧ, мно́жество дꙋ́шъ ᲂу҆невѣ́стивый хрⷭ҇тꙋ̀. Ра́дꙋйсѧ, кꙋ́пнѡ съ ни́ми пребыва́ѧй въ ра́дости гдⷭ҇а твоегѡ̀.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ ѕ҃
Проповѣ́дникъ и҆ и҆сполни́тель є҆ѵⷢ҇льскихъ слове́съ, є҆́же не скрыва́ти себѣ̀ сокро́вищъ на землѝ, ꙗ҆ви́лсѧ є҆сѝ, прпⷣбне ѻ҆́тче са́вво. Сегѡ̀ ра́ди и҆ ча́да твоѧ̀ дꙋхо́внаѧ наставлѧ́лъ є҆сѝ, є҆́же є҆ди́нагѡ гдⷭ҇а и҆ска́ти во всѧ̀ днѝ жи́зни своеѧ̀, всѣ́мъ се́рдцемъ томꙋ̀ прилѣплѧ́тисѧ и҆ непреста́ннѡ пѣ́ти є҆мꙋ̀: А҆ллилꙋ́їа.
І҆́косъ ѕ҃
Возсїѧ̀ свѣ́тъ бж҃е́ственный, въ нощѝ молѧ́щꙋсѧ тебѣ̀, прпⷣбне, показꙋ́ѧ столпо́мъ ѻ҆́гненнымъ пеще́рꙋ нерꙋкотворе́нꙋ, ю҆́же хра́мъ содѣ́лалъ є҆сѝ, и҆ та́мѡ вели́кꙋю ла́ѵрꙋ ᲂу҆стро́ивъ, бг҃оꙋгѡ́дныѧ пѡ́двиги и҆ мл҃твенныѧ трꙋды̑ показа́лъ є҆сѝ. Мы́ же, вели́чїю блгⷣти вы́шнѧгѡ, на тебѣ̀ почи́вшыѧ, дивѧ́щесѧ, ᲂу҆миле́ннѡ взыва́емъ:
Ра́дꙋйсѧ, ꙗ҆́кѡ видѣ́нїѧ пренбⷭ҇нагѡ свѣ́та сподо́билсѧ є҆сѝ. Ра́дꙋйсѧ, ꙗ҆́кѡ бл҃говоле́нїемъ бж҃їимъ вели́кꙋю ла́ѵрꙋ ᲂу҆стро́илъ є҆сѝ и҆ въ ню̀ мно́жество и҆́нокѡвъ собра́лъ є҆сѝ.
Ра́дꙋйсѧ, дꙋхо́вныѧ ѻ҆́вцы къ го́рнемꙋ црⷭ҇твїю до́брѣ ᲂу҆пра́вивый. Ра́дꙋйсѧ, мно́гаѧ чꙋдеса̀ блгⷣтїю ст҃а́гѡ дх҃а сотвори́вый.
Ра́дꙋйсѧ, лѣни́выѧ подви́гнꙋвый ре́вностными по́двиги твоегѡ̀ житїѧ̀ хрⷭ҇толюби́вагѡ. Ра́дꙋйсѧ, печа́льныхъ ско́рое ᲂу҆тѣше́нїе.
Ра́дꙋйсѧ, є҆ѵⷢ҇лїѧ хрⷭ҇то́ва бг҃омꙋ́дрый ᲂу҆чи́телю. Ра́дꙋйсѧ, провозвѣ́стниче пꙋте́й гдⷭ҇нихъ.
Ра́дꙋйсѧ, всѧ̀ во ᲂу҆ме́ты вмѣни́вый, да хрⷭ҇та̀ прїѡбрѧ́щеши. Ра́дꙋйсѧ, хрⷭ҇тꙋ̀ невозвра́тнѡ послѣ́довавый.
Ра́дꙋйсѧ, бл҃гі́й и҆ вѣ́рный ра́бе хрⷭ҇то́въ. Ра́дꙋйсѧ, до́брый дѣ́лателю вїногра́да хрⷭ҇то́ва.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ з҃
Хотѧ̀ вѣ́ренъ бы́ти до конца̀ і҆и҃сꙋ хрⷭ҇тꙋ̀, сн҃ꙋ бж҃їю, взе́мшемꙋ грѣхѝ мі́ра, кро́тость, неѕло́бїе, смире́нїе въ се́рдцѣ твое́мъ до́брѣ насади́лъ є҆сѝ, бг҃оно́се ѻ҆́тче са́вво, и҆ всѧ́кїѧ ско́рби, ᲂу҆коре́нїѧ и҆ досажде́нїѧ ра́достнѡ претерпѣ́лъ є҆сѝ, вѣ́даѧ, ꙗ҆́кѡ мно́гими скорбьмѝ подоба́етъ вни́ти въ црⷭ҇твїе нбⷭ҇ное. Сегѡ̀ ра́ди, несе́нїемъ крⷭ҇та̀ хрⷭ҇то́ва и҆ терпѣ́нїемъ скорбе́й, є҆щѐ на землѝ дꙋ́шꙋ твою̀ во ѻ҆би́тель прест҃ы́ѧ трⷪ҇цы ᲂу҆стро́илъ є҆сѝ, є҆́йже ны́нѣ предстои́ши со а҆́гг҃лы и҆ вопїе́ши а҆́гг҃льскꙋю пѣ́снь: А҆ллилꙋ́їа.
І҆́косъ з҃
Ди́вный вои́стиннꙋ побѣдоно́сецъ показа́лсѧ є҆сѝ на стра́сти плѡтскі́ѧ, бг҃обл҃же́нне: всѧ̑ бо разжже́нныѧ стрѣ́лы лꙋка́вагѡ посто́мъ, бдѣ́нїемъ и҆ сле́зными мл҃твами ᲂу҆гаси́лъ є҆сѝ. Тѣ́мже вопїе́мъ тебѣ̀ сицева́ѧ:
Ра́дꙋйсѧ, крⷭ҇тъ хрⷭ҇то́въ на ра́мена твоѧ̀ воспрїе́мый. Ра́дꙋйсѧ, крⷭ҇то́мъ си́мъ ꙗ҆́кѡ лѣ́ствицею на нб҃о возше́дый.
Ра́дꙋйсѧ, терпѣ́нїѧ и҆ неѕло́бїѧ рачи́телю. Ра́дꙋйсѧ, и҆́нокѡвъ до́брѣ подвиза́ющихсѧ мл҃твенный пред̾ бг҃омъ предста́телю.
Ра́дꙋйсѧ, вѣ́ры правосла́вныѧ мо́щный защи́тниче. Ра́дꙋйсѧ, нбⷭ҇нагѡ црⷭ҇твїѧ наслѣ́дниче.
Ра́дꙋйсѧ, блгⷣтїю бж҃їею прїѡсѣне́нный. Ра́дꙋйсѧ, ꙗ҆́кѡ ѻ҆́бразъ страсте́й хрⷭ҇то́выхъ въ се́рдцѣ твое́мъ предписа́лъ є҆сѝ.
Ра́дꙋйсѧ, свѣ́томъ трисо́лнечнымъ ст҃ы́ѧ трⷪ҇цы ѡ҆заре́нный. Ра́дꙋйсѧ, ꙗ҆́кѡ дꙋше́вныма ѻ҆чи́ма при́снѡ гдⷭ҇а созерца́лъ є҆сѝ.
Ра́дꙋйсѧ, ꙗ҆́кѡ блгⷣтїю бж҃їею всѧ̀ прови́дѣлъ є҆сѝ. Ра́дꙋйсѧ, блгⷣтными чꙋдесы̀ житїѐ твоѐ ѡ҆зари́вый.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ и҃
Стра́нника и҆ прише́льца помышлѧ́лъ є҆сѝ въ себѣ̀ бы́ти въ мі́рѣ се́мъ, пребл҃же́нне ѻ҆́тче са́вво: тѣ́мже грѧдꙋ́щагѡ гра́да і҆ерⷭ҇ли́ма нбⷭ҇нагѡ взыскꙋ́ѧ, всѧ̀ помышле́нїѧ твоѧ̀ къ нб҃сѝ непреста́ннѡ возноси́лъ є҆сѝ, и҆, ꙗ҆́кѡ въ тѷмпа́нѣ, во ᲂу҆мерщвле́ннемъ тѣлесѝ, сла́дцѣ воспѣва́лъ є҆сѝ побѣ́днꙋю пѣ́снь хрⷭ҇тꙋ̀ бг҃ꙋ: А҆ллилꙋ́їа.
І҆́косъ и҃
Ве́сь ѡ҆бле́клсѧ є҆сѝ во ѻ҆рꙋ́жїѧ бж҃їѧ, прпⷣбне: тѣ́мже возмо́глъ є҆сѝ всю̀ си́лꙋ дїа́волю низложи́ти. Помозѝ ᲂу҆́бѡ и҆ на́мъ, пребл҃же́нне ѻ҆́тче, мл҃твами твои́ми и҆збы́ти сѣте́й вра́жїихъ, да бл҃года́рственнѡ зове́мъ тебѣ̀ си́це:
Ра́дꙋйсѧ, сто́лпе непрекло́нный терпѣ́нїѧ. Ра́дꙋйсѧ, ревни́телю ѿ мі́ра ᲂу҆дале́нїѧ.
Ра́дꙋйсѧ, ꙗ҆́кѡ держа́вно плотскі́ѧ стра́сти низложи́лъ є҆сѝ. Ра́дꙋйсѧ, ꙗ҆́кѡ пло́ть твою̀ дꙋ́хови покори́лъ є҆сѝ.
Ра́дꙋйсѧ, ꙗ҆́кѡ во бдѣ́нныхъ мл҃твахъ неѡсла́бнѡ пребыва́лъ є҆сѝ. Ра́дꙋйсѧ, ꙗ҆́кѡ ᲂу҆мерщвле́нїемъ пло́ти безстра́стїе стѧжа́лъ є҆сѝ.
Ра́дꙋйсѧ, ꙗ҆́кѡ всѧ́кое наслажде́нїе земно́е возненави́дѣлъ є҆сѝ. Ра́дꙋйсѧ, ꙗ҆́кѡ тѣ́снымъ и҆ приско́рбнымъ пꙋте́мъ ходи́лъ є҆сѝ.
Ра́дꙋйсѧ, ꙗ҆́кѡ ꙗ҆́звы гдⷭ҇а і҆и҃са хрⷭ҇та̀ на тѣ́лѣ твое́мъ носи́лъ є҆сѝ. Ра́дꙋйсѧ, ꙗ҆́кѡ си́лою крⷭ҇та̀ гдⷭ҇нѧ дє́мѡнскїѧ ко́зни сокрꙋши́лъ є҆сѝ.
Ра́дꙋйсѧ, вы́шнихъ и҆дѣ́же хрⷭ҇то́съ сѣ́де ѡ҆деснꙋ́ю ѻ҆ц҃а̀ при́снѡ и҆ска́вый. Ра́дꙋйсѧ, мы́сленнымъ ѻ҆́комъ къ невече́рнемꙋ свѣ́тꙋ хрⷭ҇тꙋ̀ непреста́ннѡ взира́вый.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ ѳ҃
Всѧ́кое є҆стество̀ а҆́гг҃льское просла́ви тѧ̀ и҆ цр҃ковь восхвалѝ, прпⷣбне ѻ҆́тче са́вво: ты́ бо царѧ̀ неправомꙋ́дрствꙋюща и҆ севі́ровы є҆ресенача́льники проти́вѧщыѧсѧ правосла́внѣй цр҃кви небоѧ́зненнѡ ѡ҆бличи́лъ є҆сѝ и҆, всѐ дꙋхо́вное во́инство правосла́вїѧ совокꙋпи́въ, є҆́ресь въ коне́цъ низложи́лъ є҆сѝ, на́съ же всѣ́хъ во правовѣ́рїи ᲂу҆тверди́въ, наꙋчи́лъ є҆сѝ є҆диногла́снѡ воспѣва́ти трїеди́номꙋ бг҃ꙋ: А҆ллилꙋ́їа.
І҆́косъ ѳ҃
Вѣті́ѧ многовѣща́нныѧ недоꙋмѣ́ютъ досто́йнѡ восхвали́ти тѧ̀, пребл҃же́нне: па́че бо є҆стества̀ чл҃вѣ́ческагѡ подвиза́лсѧ є҆сѝ во всѧ̀ днѝ живота̀ твоегѡ̀. Тѣ́мже чꙋдесы̀ хрⷭ҇то́съ бг҃ъ тебѣ̀ ѡ҆богатѝ, ꙗ҆́кѡ и҆ ѕвѣ́рїе ди́вїи повинова́хꙋсѧ и҆ слꙋжа́хꙋ тебѣ̀, во дни́ же гла́да мл҃твою твое́ю нб҃о до́ждь дадѐ на зе́млю сꙋ́хꙋ. Сегѡ̀ ра́ди, любо́вїю подвиза́емїи, вопїе́мъ тебѣ̀ такова́ѧ:
Ра́дꙋйсѧ, цр҃кве правосла́вныѧ похвало̀. Ра́дꙋйсѧ, є҆ретїкѡ́въ и҆ всѣ́хъ проти́вникѡвъ правовѣ́рїѧ ѡ҆бличи́телю.
Ра́дꙋйсѧ, ꙗ҆́кѡ люде́й ᲂу҆вѣща́ти ѡ҆ и҆́стинѣ правосла́вїѧ потща́лсѧ є҆сѝ. Ра́дꙋйсѧ, за и҆́стинꙋ правосла́вїѧ мно́гїѧ трꙋды̀ и҆ по́двиги под̾е́мый.
Ра́дꙋйсѧ, правосла́вныѧ вѣ́ры свѣти́ло и҆ ᲂу҆твержде́нїе. Ра́дꙋйсѧ, прⷪ҇ро́кѡмъ, а҆пⷭ҇лѡмъ и҆ ст҃и́телемъ сопричте́нный.
Ра́дꙋйсѧ, царе́й правосла́вныхъ покро́ве и҆ защище́нїе. Ра́дꙋйсѧ, хрⷭ҇тїа́нъ правовѣ́рныхъ мл҃твенное ѡ҆гражде́нїе.
Ра́дꙋйсѧ, є҆реті́ческихъ ᲂу҆че́нїй разори́телю. Ра́дꙋйсѧ, правосла́вныхъ догма́тѡвъ ᲂу҆ѧсни́телю.
Ра́дꙋйсѧ, всѣ́мъ подвиза́ющымсѧ ѡ҆ правосла́вїи помо́щниче. Ра́дꙋйсѧ, па́стырей правосла́вныѧ цр҃кве споспѣ́шниче.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ і҃
Сп҃стѝ хотѧ̀ мно́жество люде́й твои́мъ попече́нїемъ, премлⷭ҇рдый гдⷭ҇ь досто́йна тѧ̀ наста́вника и҆збра̀, пребл҃же́нне ѻ҆́тче са́вво: мно́зи бо тобо́ю на пꙋ́ть сп҃се́нїѧ наста́влени бы́ша, и҆ мно́ги ѻ҆би́тєли твои́мъ тща́нїемъ ᲂу҆стро́ишасѧ, въ ни́хже наꙋча́лъ є҆сѝ немо́лчнѡ воспѣва́ти є҆ди́номꙋ бг҃ꙋ: А҆ллилꙋ́їа.
І҆́косъ і҃
Стѣна̀ тве́рдаѧ и҆ крѣ́пкое ѡ҆гражде́нїе правосла́вныхъ ꙗ҆ви́лсѧ є҆сѝ, прпⷣбне, хода́тайствомъ бо твои́мъ ми́ръ цр҃кви бж҃їей дарова́сѧ. Тѣ́мже мо́лимъ тѧ̀, пребл҃же́нне, бꙋ́ди помо́щникъ во всѣ́хъ ско́рбехъ и҆ напа́стехъ и҆ на́мъ, къ застꙋпле́нїю твоемꙋ̀ прибѣга́ющымъ, да со ᲂу҆миле́нїемъ вопїе́мъ тѝ си́це:
Ра́дꙋйсѧ, пꙋсты́нниче, мїрскꙋ́ю сꙋетꙋ̀ возненави́дѣвый и҆ є҆ди́нагѡ бг҃а и҆ска́вый. Ра́дꙋйсѧ, ѻ҆лтарѧ̀ гдⷭ҇нѧ слꙋжи́телю бл҃гоговѣ́йный.
Ра́дꙋйсѧ, со всѧ́кимъ тща́нїемъ гдⷭ҇ꙋ бл҃гоꙋгожда́вый. Ра́дꙋйсѧ, пла́меннꙋю любо́вь ко хрⷭ҇тꙋ̀ ꙗ҆ви́вый.
Ра́дꙋйсѧ, мно́гїѧ ѻ҆би́тєли созида́вый. Ра́дꙋйсѧ, мно́жество ча́дъ дꙋхо́вныхъ внꙋ́трь собра́вый.
Ра́дꙋйсѧ, во ѡ҆скꙋдѣ́нїихъ и҆ лише́нїихъ на бг҃а ᲂу҆пова́вый. Ра́дꙋйсѧ, вѣ́рою и҆ ᲂу҆пова́нїемъ и҆зѻби́лїе плодѡ́въ земны́хъ прїе́мый.
Ра́дꙋйсѧ, тезоимени́тыѧ тебѣ̀ ѻ҆би́тели стра́же неꙋсы́пный. Ра́дꙋйсѧ, въ бѣда́хъ, напа́стехъ и҆ ско́рбѣхъ помо́щниче неѿстꙋ́пный.
Ра́дꙋйсѧ, и҆́нокѡвъ ко сп҃се́нїю до́брый пꙋтеводи́телю. Ра́дꙋйсѧ, многомо́щный мл҃твенниче ѡ҆ дꙋша́хъ на́шихъ.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ а҃і
Пѣ́нїе хвале́бное прино́симъ тебѣ̀, прпⷣбне ѻ҆́тче са́вво, и҆ съ любо́вїю припа́дающе ко и҆зѡбраже́нїю чⷭ҇тна́гѡ ли́ка твоегѡ̀, восхвалѧ́емъ а҆гг҃лоподо́бное житїѐ твоѐ. Ты́ же, предстоѧ̀ прⷭ҇то́лꙋ прест҃ы́ѧ трⷪ҇цы, не преста́й молѧ́сѧ ѡ҆ на́съ, ᲂу҆бл҃жа́ющихъ тѧ̀, да сподо́бимсѧ нбⷭ҇нагѡ селе́нїѧ дости́гнꙋти и҆ гла́сомъ ра́дованїѧ воспѣ́ти бг҃ꙋ а҆́гг҃льскꙋю пѣ́снь: А҆ллилꙋ́їа.
І҆́косъ а҃і
Свѣтоза́рный свѣти́льникъ бж҃їѧ блгⷣти бы́лъ є҆сѝ, пребл҃же́нне, сегѡ̀ ра́ди въ сме́ртнѣмъ ᲂу҆спе́нїи твое́мъ дꙋша̀ твоѧ̀, ꙗ҆́кѡ со́лнце сїѧ́ющаѧ, вознесе́на бы́сть ст҃ы́ми а҆́гг҃лы въ нбⷭ҇ныѧ ѻ҆би́тєли. Мы́ же, помина́юще твою̀ бл҃же́ннꙋю кончи́нꙋ и҆ на нб҃сѝ прославле́нїе, ра́достнѡ вопїе́мъ тѝ:
Ра́дꙋйсѧ, ᲂу҆го́дниче бж҃їй, тече́нїе твоеѧ̀ жи́зни бл҃гоче́стнѡ сконча́вый. Ра́дꙋйсѧ, вѣ́рꙋ, наде́ждꙋ и҆ любо́вь до конца̀ сохрани́вый.
Ра́дꙋйсѧ, ꙗ҆́кѡ црⷭ҇твїе и҆ сла́вꙋ вѣ́чнꙋю наслѣ́довалъ є҆сѝ. Ра́дꙋйсѧ, ꙗ҆́кѡ по трꙋдѣ́хъ житїѧ̀ земна́гѡ въ нбⷭ҇ныхъ селе́нїихъ водвори́лсѧ є҆сѝ.
Ра́дꙋйсѧ, нетлѣ́ннымъ вѣнце́мъ сла́вы нбⷭ҇ныѧ ѿ рꙋкѝ вседержи́телѧ ᲂу҆вѣнча́нный. Ра́дꙋйсѧ, бл҃же́нство ра́йское со всѣ́ми ст҃ы́ми воспрїе́мый.
Ра́дꙋйсѧ, а҆́гг҃ле земны́й и҆ чл҃вѣ́че нбⷭ҇ный. Ра́дꙋйсѧ, на нб҃сѝ и҆ на землѝ ѿ гдⷭ҇а просла́вленный.
Ра́дꙋйсѧ, живоно́сный и҆сто́чниче, блгⷣть и҆сцѣле́нїѧ и҆злива́ѧй. Ра́дꙋйсѧ, ѡ҆держи́мыхъ недꙋ́ги блгⷣтїю бж҃їею и҆сцѣлѧ́ѧй.
Ра́дꙋйсѧ, ꙗ҆́кѡ съ высоты̀ нбⷭ҇ныѧ на на́съ и҆ ѻ҆би́тель твою̀ призира́еши. Ра́дꙋйсѧ, ꙗ҆́кѡ всѣ́хъ на́съ ѿ напа́стей сохранѧ́еши.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ в҃і
Блгⷣть и҆ ве́лїе твоѐ дерзнове́нїе пред̾ бг҃омъ вѣ́дꙋще, бг҃оно́сне ѻ҆́тче са́вво, ᲂу҆се́рднѡ вопїе́мъ тебѣ̀: не преста́й молѧ́сѧ те́плѣ ко гдⷭ҇ꙋ, да сохрани́тъ ст҃ꙋ́ю цр҃ковь свою̀ непозы́блемꙋ ѿ невѣ́рїѧ, є҆ресе́й и҆ раско́ла, да и҆зба́витъ на́съ ѿ бѣ́дъ и҆ лю́тыхъ ѡ҆бстоѧ́нїй и҆ приведе́тъ въ црⷭ҇твїе своѐ нбⷭ҇ное, ꙗ҆́кѡ да пое́мъ со бл҃годаре́нїемъ тобо́ю бл҃годѣ́ющемꙋ на́мъ ди́вномꙋ во ст҃ы́хъ бг҃ꙋ: А҆ллилꙋ́їа.
І҆́косъ в҃і
Пою́ще просла́вльшагѡ тѧ̀ гдⷭ҇а и҆ ᲂу҆бл҃жа́юще тѧ̀, пребл҃же́нне ѻ҆́тче, приле́жнѡ мо́лимсѧ тебѣ̀, є҆́же сподо́битисѧ и҆ на́мъ хода́тайствомъ твои́мъ неѡсꙋжде́ннѡ предста́ти стра́шномꙋ сꙋди́щꙋ хрⷭ҇то́вꙋ, да съ ра́достїю и҆ любо́вїю воспомина́юще твоѐ мл҃твенное ѡ҆ на́съ пред̾ бг҃омъ предста́тельство, бл҃гохва́льнѡ зове́мъ тебѣ̀ си́це:
Ра́дꙋйсѧ, пречⷭ҇тно́е селе́нїе прест҃ы́ѧ трⷪ҇цы. Ра́дꙋйсѧ, и҆збра́нное ст҃а́гѡ дх҃а жили́ще.
Ра́дꙋйсѧ, сїѧ́нїе незаходи́магѡ со́лнца. Ра́дꙋйсѧ, лꙋча́ми по́двигѡвъ твои́хъ мона́шеское житїѐ ѡ҆зарѧ́ѧй.
Ра́дꙋйсѧ, досто́йный а҆́гг҃лѡвъ собесѣ́дниче. Ра́дꙋйсѧ, мꙋ́ченикѡвъ и҆ прпⷣбныхъ на нб҃сѝ сожи́телю.
Ра́дꙋйсѧ, ꙗ҆́кѡ мзда̀ твоѧ̀ мно́га на нб҃сѝ. Ра́дꙋйсѧ, цр҃кви правосла́вныѧ ᲂу҆краше́нїе.
Ра́дꙋйсѧ, въ бѣда́хъ сꙋ́щимъ ско́рое вспоможе́нїе. Ра́дꙋйсѧ, те́плый пред̾ гдⷭ҇емъ ѡ҆ на́съ мл҃твенниче.
Ра́дꙋйсѧ, при́сный и҆́нокѡвъ помо́щниче и҆ застꙋ́пниче.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ г҃і
Ѽ, вели́кїй и҆ ди́вный ᲂу҆го́дниче хрⷭ҇то́въ, прпⷣбне ѻ҆́тче са́вво. Прїимѝ млⷭ҇тивнѡ сїѐ ма́лое моле́нїе, ѿ ᲂу҆се́рдїѧ на́шегѡ въ похвалꙋ̀ тебѣ̀ приноси́мое, и҆ твои́мъ мл҃твеннымъ предста́тельствомъ ᲂу҆ прⷭ҇то́ла цр҃ѧ̀ нбⷭ҇нагѡ и҆спросѝ на́мъ, є҆́же и҆зба́витисѧ въ жи́зни се́й ѿ всѣ́хъ бѣ́дъ и҆ напа́стей, въ сме́ртнѣмъ же ᲂу҆спе́нїи на́шемъ бл҃гꙋ́ю ча́сть сп҃се́нїѧ и҆ наслѣ́дїе вѣ́чныхъ бла́гъ полꙋчи́ти, ꙗ҆́кѡ да сподо́бимсѧ съ тобо́ю и҆ со всѣ́ми ст҃ы́ми въ ра́дости вѣ́чнѣй во вѣ́ки воспѣва́ти хрⷭ҇тꙋ̀ бг҃ꙋ сп҃си́телю на́шемꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ творе́цъ и҆ всеѧ̀ тва́ри содѣ́тель и҆збра̀ тѧ̀ ѿ младе́нства, прпⷣбне, просла́вити трисїѧ́тельное и҆́мѧ є҆гѡ̀: ты́ бо, ѻ҆смилѣ́тенъ сы́й, всѧ̀ кра́снаѧ мі́ра тлѣ́ннагѡ презрѣ́въ, во ѻ҆би́тель ст҃ꙋ́ю прите́клъ є҆сѝ, и҆дѣ́же ꙗ҆́кѡ а҆́гг҃лъ земны́й бг҃оꙋго́днѡ подвиза́лсѧ є҆сѝ. Тѣ́мже и҆ всели́сѧ въ тѧ̀ блгⷣть прест҃а́гѡ дх҃а, є҆го́же дѣ́йствомъ свѣ́тло ᲂу҆краша́ѧсѧ, а҆гг҃лоподо́бное житїѐ показа́лъ є҆сѝ. Мы́ же, зрѧ́ще ве́лїѧ и҆справлє́нїѧ твоѧ̀, съ любо́вїю вопїе́мъ тебѣ̀ си́це:
Ра́дꙋйсѧ, роди́телей бл҃гочести́выхъ бл҃гослове́нный пло́де. Ра́дꙋйсѧ, каппадокі́йскїѧ страны̀ ст҃о́е ᲂу҆краше́нїе.
Ра́дꙋйсѧ, палесті́нскїѧ землѝ и҆ гра́да і҆ерⷭ҇ли́ма свѣти́льниче. Ра́дꙋйсѧ, во і҆ѻрда́нстѣй пꙋсты́ни со а҆́гг҃лы всели́выйсѧ.
Ра́дꙋйсѧ, ꙗ҆́кѡ ѿ младе́нства хрⷭ҇та̀ возлюби́лъ є҆сѝ. Ра́дꙋйсѧ, ꙗ҆́кѡ же́ртвꙋ живꙋ́ю себѐ гдⷭ҇еви прине́слъ є҆сѝ.
Ра́дꙋйсѧ, є҆ѵⷢ҇лїѧ хрⷭ҇то́ва ᲂу҆се́рдный послѣ́дователю. Ра́дꙋйсѧ, за́повѣдей гдⷭ҇нихъ вѣ́рный блюсти́телю.
Ра́дꙋйсѧ, ꙗ҆́кѡ ѿ ю҆́ности и҆́гꙋ хрⷭ҇то́вꙋ себѣ̀ порабо́тилъ є҆сѝ. Ра́дꙋйсѧ, ꙗ҆́кѡ красотꙋ̀ тлѣ́ннꙋю и҆ мїрскꙋ́ю сла́дость ни во что́же вмѣни́лъ є҆сѝ.
Ра́дꙋйсѧ, бж҃їѧ ра́зꙋма и҆спо́лненный. Ра́дꙋйсѧ, блгⷣтїю дх҃а ст҃а́гѡ прїѡсѣне́нный.
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Конда́къ а҃
И҆збра́нный чꙋдотво́рче и҆ преди́вный ᲂу҆го́дниче хрⷭ҇то́въ, прпⷣбне ѻ҆́тче са́вво, мі́рꙋ правосла́вномꙋ свѣти́льниче и҆ те́плый ѡ҆ на́съ пред̾ бг҃омъ мл҃твенниче. Велича́емъ просла́вльшагѡ тѧ̀ гдⷭ҇а, восхвалѧ́юще любо́вїю равноа́гг҃льное житїѐ твоѐ. Ты́ же, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свободѝ, да съ ра́достїю зове́мъ тѝ:
Ра́дꙋйсѧ, пресвѣ́тлаѧ мона́хѡвъ похвало̀, са́вво прпⷣбне.
Моли́твы
Ѽ, преди́вный и҆ всехва́льный ᲂу҆го́дниче бж҃їй, прпⷣбне ѻ҆́тче са́вво. Дне́сь (во ст҃ѣ́мъ хра́мѣ твое́мъ) бл҃гоговѣ́йнѡ предстоѧ́ще пред̾ ст҃о́ю і҆кѡ́ною твое́ю и҆ ра́достнѡ соверша́юще пресвѣ́тлꙋю па́мѧть твою̀, ᲂу҆бл҃жа́емъ тѧ̀ застꙋ́пника на́шегѡ. Почита́юще же твоѐ ве́лїе дерзнове́нїе пред̾ гдⷭ҇емъ, смире́ннѡ мо́лимъ тѧ̀, пребл҃же́нне: прїимѝ млⷭ҇тивнѡ ѿ на́съ хвале́бное пѣ́нїе сїѐ, ѿ любвѐ и҆ ᲂу҆се́рдїѧ тебѣ̀ приноси́мое. И҆, ꙗ҆́кѡ и҆мѣ́ѧй ве́лїе дерзнове́нїе ко гдⷭ҇ꙋ, потщи́сѧ бг҃опрїѧ́тнымъ твои́мъ хода́тайствомъ и҆спроси́ти ᲂу҆ цр҃ѧ̀ ца́рствꙋющихъ и҆ гдⷭ҇а госпо́дствꙋющихъ, ꙗ҆́кѡ да проба́витъ вели́кїѧ и҆ бога́тыѧ млⷭ҇ти своѧ̀ на на́съ грѣ́шныхъ, да пода́стъ на́мъ дꙋ́хъ пра́выѧ вѣ́ры, дꙋ́хъ вѣ́дѣнїѧ и҆ любвѐ, дꙋ́хъ ми́ра и҆ ра́дости ѡ҆ дꙋ́сѣ ст҃ѣ, да и҆зба́витъ ѿ бѣ́дъ и҆ напа́стей, да низпо́слетъ всѧ̀ поле́знаѧ ко сп҃се́нїю дꙋ́шъ на́шихъ. Всѣ́мъ же правосла́внымъ да низпо́слетъ ми́ръ, тишинꙋ̀, безмѧте́жїе, ᲂу҆се́рдїе ко и҆сполне́нїю за́повѣдей є҆гѡ̀, и҆зѻби́лїе плодѡ́въ земны́хъ, и҆ да и҆зба́витъ всю̀ рꙋ́сскꙋю странꙋ̀ ѿ гла́да, трꙋ́са, пото́па, ѻ҆гнѧ̀, меча̀, наше́ствїѧ и҆ноплеме́нныхъ и҆ междоꙋсо́бныѧ бра́ни, смертоно́сныѧ ꙗ҆́звы и҆ ѿ всѧ́кагѡ ѕла̀. Є҆́й, ᲂу҆го́дниче бж҃їй. Не пре́зри моле́нїй на́шихъ, но ᲂу҆слы́ши на́съ молѧ́щихсѧ тебѣ̀, и҆ под̾ кро́вомъ застꙋпле́нїѧ твоегѡ̀ сохранѝ на́съ (и҆ ѻ҆би́тель твою̀) ненавѣ́тны ѿ вра́гъ ви́димыхъ и҆ неви́димыхъ, да сподо́бимсѧ сконча́ти житїѐ на́ше въ покаѧ́нїи и҆ воспрїи́мемъ вѣ́чнаѧ бл҃га́ѧ во црⷭ҇твїи хрⷭ҇та̀ бг҃а на́шегѡ, и҆дѣ́же восхва́лимъ съ тобо́ю и҆ всѣ́ми ст҃ы́ми достопокланѧ́емое и҆́мѧ прест҃ы́ѧ трⷪ҇цы, ѻ҆ц҃а̀ и҆ сн҃а и҆ ст҃а́гѡ дх҃а, во вѣ́ки вѣкѡ́въ. А҆ми́нь.