Кондак 1
Избра́ннаго вождя́ и́ноков, изря́днаго учи́теля подви́жников, доброде́тельми я́ко цве́ты украси́вшася, чудесы́ же, я́ко луча́ми со́лнечными, сия́юща, восхваля́ем тя́ с любо́вию, преподо́бне. Ты́ же, предстоя́ престо́лу Пресвяты́я Тро́ицы, испроси́ на́м оставле́ние грехо́в и избавле́ние от все́х бе́д и зо́л; да житие́ небла́зненно и безмяте́жно теку́ще, благода́рне зове́м ти́:
Ра́дуйся, преподо́бне о́тче на́ш Анто́ние.
Икос 1
А́нгелов ревни́тель от ю́ности показа́лся еси́, преподо́бне; рожде́йся во убо́зей ве́си, я́ко граждани́н небе́снаго Иерусали́ма ходи́л еси́; про́ст сы́й земледе́лец, первозва́нному апо́столов тезоимени́т и подража́тель бы́л еси́; Христу́ после́дуя, мно́ги ученики́ собра́л еси́. Сего́ ра́ди зове́м ти́:
Ра́дуйся, рожде́нием ра́дость, я́ко пе́рвенец, роди́телем пода́вый; ра́дуйся, и на небесе́х благослове́ние перворо́дных насле́дивый.
Ра́дуйся, ю́ности бу́есть изде́тска отложи́вый; ра́дуйся, слове́сное млеко́ Боже́ственных писа́ний, па́че ма́терня, вожделе́вый.
Ра́дуйся, в душеполе́зных уче́ниих све́рстники своя́ превозше́дый; ра́дуйся, благоче́стием и ра́зумом наста́вники удиви́вый.
Ра́дуйся, я́ко измла́да сказа́ния о святы́х и жи́тельство и́х возлюби́л еси́; ра́дуйся, я́ко ра́но уразуме́л и презре́л еси́ суету́ бла́г вре́менных.
Ра́дуйся, я́ко до́м Бо́жий па́че о́тча избра́л еси́; ра́дуйся, я́ко изде́тска навы́кл еси́ песносло́вити Го́спода.
Ра́дуйся, я́ко о́браз Созда́теля на дска́х живопису́я, ясне́йшее подо́бие Его́ на скрижа́лех се́рдца твоего́ вообрази́л еси́; ра́дуйся, я́ко от ю́ности в се́рдцы твое́м к небе́сным восхожде́ния положи́л еси́.
Ра́дуйся, преподо́бне о́тче на́ш Анто́ние.
Кондак 2
Ви́дяще бли́з кончи́ну живота́ своего́, благове́рнии роди́телие твои́ с моли́твою преда́ша тя́ и бра́тию твою́ Го́сподеви. Сего́ ра́ди и по сме́рти и́х не позна́л еси́ себе́ си́ра, но со благодаре́нием возопи́л еси́ Бо́гу: Аллилу́иа.
Икос 2
Ра́зумом и испыта́нием коне́чне позна́л еси́ суету́ привре́менныя сла́дости; дости́гнув же в ме́ру во́зраста в му́жа соверше́нна, подо́бно подвигополо́жнику своему́, яви́вшему себе́ ми́рови, три́десяти ле́т вда́л еси́ себе́ в слу́жбу Го́сподеви; оста́вив ми́р и вся́, я́же в не́м, прия́л еси́ о́браз а́нгельский. Таково́е у́бо изволе́ние твое́ восхваля́юще, глаго́лем:
Ра́дуйся, я́ко на распу́тиих ми́ра сего́ обре́л еси́ пра́вый пу́ть в Ца́рствие Небе́сное; ра́дуйся, я́ко оста́вив до́м отца́ своего́ водвори́лся еси́ в дому́ Госпо́дни.
Ра́дуйся, до́брый ра́бе, я́ко бы́л еси́ ве́рен Влады́це твоему́; ра́дуйся, я́ко уже́ не́си ра́б, но сы́н и насле́дник Бо́жий.
Ра́дуйся, я́ко и в супру́жестве, ка́ко угоди́ти Го́сподеви, помышля́л еси́; ра́дуйся, я́ко во и́ночестве всеце́ло Го́сподеви себе́ преда́л еси́.
Ра́дуйся, я́ко вожделе́ния пло́ти обузда́л еси́; ра́дуйся, я́ко пло́ть ду́хови покори́л еси́.
Ра́дуйся, я́ко разда́в име́ния своя́, ни́щыя уще́дрил еси́; ра́дуйся, я́ко нището́ю бога́тство нетле́нное стяжа́л еси́.
Ра́дуйся, я́ко убе́гл еси́ собла́знов ми́ра и сете́й диа́вола; ра́дуйся, го́рлице пустыннолю́бная, исто́ргнувшаяся от се́ти ло́вчи.
Ра́дуйся, преподо́бне о́тче на́ш Анто́ние.
Кондак 3
Си́ла Боже́ственная я́ве укрепи́ тя, обнощева́вша за пя́ть по́прищ до святы́я оби́тели Пахо́миа; егда́ бо в со́ннем виде́нии кресто́м осени́ тя ста́рец святоле́пен, реки́й ти́: возми́ кре́ст тво́й и гряди́ всле́д мене́, не боя́ся ко́зней диа́волих; ты́, в ра́дости воста́в от сна́, всю́ но́щь моли́лся еси́ Го́сподеви, благода́рне воспева́я: Аллилу́иа.
Икос 3
Имы́й се́рдце угото́вано в слу́жбу Го́сподеви, Сего́ пречи́стому о́бразу со слеза́ми ра́дости и благодаре́ния поклони́лся еси́ во врате́х тоя́ оби́тели, в ню́же все́лься, не солга́л еси́ Свято́му Ду́ху, но па́че все́х рабо́тал еси́ Го́сподеви. Сего́ ра́ди зове́м ти́:
Ра́дуйся, я́ко препоя́сался еси́ с высоты́ си́лою; ра́дуйся, я́ко кре́пце ополчи́лся еси́ проти́ву пло́ти, ми́ра и диа́вола.
Ра́дуйся, я́ко прии́скренне прине́слся еси́ Бо́гови; ра́дуйся, я́ко сраспя́лся еси́ Христу́.
Ра́дуйся, я́ко сла́дце поне́сл еси́ бре́мя Его́; ра́дуйся, я́ко смире́нием украси́лся еси́.
Ра́дуйся, я́ко вся́, я́же на земли́, мудрова́ния отри́нул еси́; ра́дуйся, я́ко по́стническими труды́ Бо́гу угоди́л еси́.
Ра́дуйся, я́ко глаго́лы Боже́ственными ду́шу напита́л и укрепи́л еси́; ра́дуйся, я́ко бо́дренною моли́твою и псалмопе́нием ду́х тво́й окрили́л еси́.
Ра́дуйся, я́ко бде́нии всено́щными и хране́нием се́рдца угото́вал еси́ себе́ к зре́нию невече́рняго све́та; ра́дуйся, я́ко о́браз жития́ и́ноческаго бы́л еси́.
Ра́дуйся, преподо́бне о́тче на́ш Анто́ние.
Кондак 4
Бу́рю душегуби́тельну непщу́я бы́ти сла́ву челове́чу, из оби́тели в пусты́ню удали́лся, иде́же хра́м воздви́гл еси́, и та́мо се́дмь ле́т непреста́нными труды́, моли́твами и посты́ благоугожда́л еси́ Бо́гови, немо́лчно воспева́я: Аллилу́иа.
Икос 4
Слы́шав молву́ и преще́ния окре́стных жи́телей, помяну́в еси́ словеса́ Христо́ва, бежа́ти от гоня́щих ны́, и сквозе́ непрохо́дныя де́бри приве́л еси́ ученики́ твоя́ ко е́зеру, иде́же обре́теся ме́сто, за мно́га ле́та в жили́ще и́ноком назна́менанное, и посреде́ де́брей, бла́т и езе́р с ди́виими зверьми́ всели́лся еси́. Сего́ ра́ди взыва́ем ти́:
Ра́дуйся, смиренному́дрием вся́ку ра́спрю погаси́вый; ра́дуйся, кро́тостию зло́бу победи́вый.
Ра́дуйся, любо́вию вражду́ отмсти́вый; ра́дуйся, необита́емая места́ моли́твою освяти́вый.
Ра́дуйся, безмо́лвныя де́бри Боже́ственными пе́сньми огласи́вый; ра́дуйся, в непроходи́мых стези́ бла́ги обреты́й.
Ра́дуйся, в напа́стех и искуше́ниих терпе́ния и упова́ния не погуби́вый; ра́дуйся, спу́тники твоя́ в терпе́нии укрепи́вый.
Ра́дуйся, в непра́веднем изгна́нии, вхо́ды Ца́рства Небе́снаго обреты́й; ра́дуйся, дре́во плодоно́сно, при вода́х насажде́нное.
Ра́дуйся, фи́ниче, процветы́й в пусты́ни; ра́дуйся, я́ко ке́др, и́же от Лива́на, возвели́чивыйся.
Ра́дуйся, преподо́бне о́тче на́ш Анто́ние.
Кондак 5
Боготе́чней звезде́ уподо́бился еси́ вводя́й спу́тники твоя́ на ме́сто, иде́же пе́рвее водрузи́л еси́ Кре́ст Госпо́день, и сле́зно моли́лся еси́ Влады́це Христу́, сохрани́ти тя́ от вра́г ви́димых и неви́димых, и утверди́ти в терпе́нии нести́ кре́ст сво́й и пе́ти Бо́гу: Аллилу́иа.
Икос 5
Ви́дя неви́димых враго́в прило́ги, отгоня́л еси́ те́х, подъе́мля ру́це на моли́тву в труде́х и по́двизех непреста́нных, ди́виими то́чию зе́лии пита́лся еси́; а́лчущыя же ученики́ твоя́, не имы́й хле́ба, словесы́ Боже́ственными насыща́л и укрепля́л еси́, до́ндеже не́кто, мимоходя́й, подаде́ ти вся́ потре́бная к препита́нию и строе́нию оби́тели. Сицево́му у́бо смотре́нию Бо́жию, я́коже и ве́ре твое́й дивя́щеся, ра́достно вопие́м ти́:
Ра́дуйся, безси́лие те́мных си́л обличи́вый; ра́дуйся, си́лу моли́твы победи́тельну показа́вый.
Ра́дуйся, ве́ру непоколеби́му стяжа́вый; ра́дуйся, упова́ние неотло́жно сохрани́вый.
Ра́дуйся, любо́вь нелицеме́рну и безкоры́стну соблюды́й; ра́дуйся, вся́ко жите́йское попече́ние отложи́вый.
Ра́дуйся, вся́ку печа́ль на Го́спода возверги́й; ра́дуйся, терпе́нием во искуше́ниих, му́жество необори́мо яви́вый.
Ра́дуйся, му́дрый строи́телю, не на песце́, а на тве́рде ка́мени зи́ждяй; ра́дуйся, я́ко ни́щ бы́в Го́спода ра́ди, дово́лен бы́л еси́ мно́ги боголю́бцы собра́ти и препита́ти.
Ра́дуйся, ничто́же имы́й, вся́ содержа́й; ра́дуйся, в промышле́нии любве́ Бо́жия, исто́чник вся́каго дово́льства неизсяка́ющ обреты́й и ины́м яви́вый.
Ра́дуйся, преподо́бне о́тче на́ш Анто́ние.
Кондак 6
Пропове́дник святы́ни твоея́, преподо́бне, яви́ся вра́г тво́й, еди́н от приста́вник к собира́нию да́ней; о́н бо, непщу́я тя́ иму́ща стяжа́ния мно́га, ная́т разбо́йники расхи́тити оби́тель твою́, но не возмо́же озло́бити ю́, наро́да ра́ди, со ору́жии обстоя́ща ю́; уве́девый же, я́ко не челове́ки, но Си́лы Небе́сными охраня́ешися, при ногу́ твое́ю раска́яся о зле́, прося́й проще́ния. Ты́ же незло́бив сы́й, с любо́вию отпусти́в его́, воспе́л еси́ Бо́гу: Аллилу́иа.
Икос 6
Возсия́л еси́ я́ко звезда́ све́тлая, луча́ми святы́ни озаря́я Росси́ю; сла́ва бо доброде́телей твои́х промче́ся по все́м градо́м, привлача́щи мно́гия во оби́тель твою́. И ца́рь, посла́в тебе́ гра́моту, да стро́иши пусты́нное жи́тельство, предаде́ себе́ и ца́рство свое́ твои́м богоприя́тным моли́твам, и́миже огражда́еми зове́м ти́:
Ра́дуйся, росси́йских царе́й предста́телю; ра́дуйся, Оте́чествия твоего́ храни́телю.
Ра́дуйся, свети́льниче, горя́й любо́вию и светя́й святы́нею; ра́дуйся, воево́до полка́ и́ноческаго.
Ра́дуйся, пра́вый води́телю и́щущих спасе́ния; ра́дуйся, си́лою Бо́жиею изъима́яй из пле́на грехо́внаго.
Ра́дуйся, свобожда́яй от рабо́ты су́етныя; ра́дуйся, мно́гия ко́зни лука́ваго по́мощию Бо́жиею победи́вый.
Ра́дуйся, исполня́яй ду́шы сла́достей духо́вных; ра́дуйся, источа́яй то́ки сле́зныя из серде́ц окамене́нных.
Ра́дуйся, воздея́нием руку́ твое́ю, спаса́яй на́с от нападе́ний мы́сленнаго Амали́ка; ра́дуйся, преводя́й благопокори́выя ти́ в зе́млю, святы́м обетова́нную.
Ра́дуйся, преподо́бне о́тче на́ш Анто́ние.
Кондак 7
Хотя́й насыща́ти словесы́ Боже́ственными и пе́сньми духо́вными собра́нное тобо́ю ста́до, созда́л еси́ хра́м Живонача́льныя Тро́ицы, и неопи́санный о́браз Триеди́наго Божества́ потща́лся еси́ вообрази́ти на ико́не, споспешеству́ющу ти́ самому́ Го́споду, Ему́же в посте́ и моли́тве рабо́тал еси́, вопия́: Аллилу́иа.
Икос 7
Но́вое чу́до яви́ Госпо́дь, изнесы́й неви́димою руко́ю честну́ю ико́ну из горя́щия це́ркве и невреди́му ю́ поста́вивый посреде́ оби́тели; ты́ же, ра́дуяся, прие́мь ю́, с упова́нием на Го́спода, но́вый простра́ннейший до́м Пресвяте́й Тро́ице воздви́гл еси́, и ины́я хра́мы назда́л еси́, и та́ко оби́тель благоустро́ил еси́, ю́же и ны́не огражда́еши моли́твами твои́ми, спаса́яй вопию́щыя ти́:
Ра́дуйся, я́ко твои́ми моли́твами но́вый исто́чник благода́ти Бо́жия отве́рзеся; ра́дуйся, я́ко ико́на Пресвяты́я Тро́ицы, тобо́ю начерта́нная, чудесы́ просла́вися.
Ра́дуйся, я́ко в пусты́ни оби́тель благоче́стия процвете́; ра́дуйся, я́ко тобо́ю приста́нище благооти́шно душа́м угото́вася.
Ра́дуйся, я́ко тобо́ю учи́лище покая́ния устро́ися; ра́дуйся, я́ко тобо́ю откры́ся пу́ть хотя́щым к по́чести вы́шняго зва́ния тещи́.
Ра́дуйся, я́ко тобо́ю ле́ствица духо́вных восхожде́ний утверди́ся; ра́дуйся, я́ко и́щущым спасе́ния от пото́па грехо́внаго но́в кора́бль тобо́ю испра́вися.
Ра́дуйся, я́ко во оби́тели твое́й исцеля́ются неду́ги ду́ш и теле́с; ра́дуйся, дая́й прибе́жище целому́дрию, по́стничеству и во́льней нищете́.
Ра́дуйся, я́ко и́щущии твоего́ предста́тельства, при́сно ми́лость Бо́жию обрета́ют; ра́дуйся, я́ко прия́л еси́ благода́ть моли́тися о все́х.
Ра́дуйся, преподо́бне о́тче на́ш Анто́ние.
Кондак 8
Стра́нная чудеса́ во оби́тели твое́й сотвори́ Госпо́дь свое́ю ико́ною, ю́же из пла́мене чу́дно спасе́; то́чию бо прикосну́ся к не́й усты́ слуга́ не́кий, а́бие свободи́ся от ду́ха зла́го. Ины́й слуга́, положе́н бы́в пред не́ю, изба́вися паду́чия боле́зни; и сестра́ иере́а, слепа́ су́щи, а́бие прозре́, егда́ облобыза́ше чудотво́рный о́браз Пресвяты́я Тро́ицы. Сего́ ра́ди и мы́ Пресвяте́й Тро́ице вопие́м: Аллилу́иа.
Икос 8
Ве́сь собо́р и́нок едва́ возмо́же преклони́ти смире́ние твое́ к прия́тию игу́менства; е́же прие́мь, ди́вен настоя́тель бы́л еси́, пе́рвенствуя в труде́х и́ноческих, я́ко мни́й все́х и ра́б все́м показу́яся, ру́бищем покрыва́я себе́, смире́нным же зра́ком утаева́я оби́лие благода́ти и бога́тство святы́ни. Сего́ ра́ди при́снии ра́довахуся, прише́льцы же не мня́ху тя́ нача́льника бы́ти, мы́ же уми́льне зове́м ти́:
Ра́дуйся, я́ко мни́й мня́йся бы́ти, ве́лий у Го́спода сла́вы вмени́лся еси́; ра́дуйся, я́ко уча́ и́ны твори́ти, вся́ пе́рвее са́м сотвори́л еси́.
Ра́дуйся, я́ко но́щь не премо́же твоего́ бде́ния; ра́дуйся, до́брый стра́же до́ма Бо́жия.
Ра́дуйся, я́ко в зра́це твое́м при́сно явля́шеся трезве́ние ума́ твоего́; ра́дуйся, пра́вило ве́ры и о́браз смире́ния.
Ра́дуйся, я́ко тягча́йшыя рабо́ты люботру́дне со все́ми разделя́л еси́; ра́дуйся, я́ко боля́щым усе́рдно послужи́л еси́.
Ра́дуйся, я́ко стра́нныя вве́л и ни́щыя препита́л еси́; ра́дуйся, я́ко не́мощи немощны́х терпели́вно поне́сл еси́.
Ра́дуйся, преподо́бне о́тче на́ш Анто́ние.
Кондак 9
Вся́ку сла́ву и че́сть а́ще и пра́ведне тебе́ воздае́му от челове́к, непщу́я бы́ти вино́вну лише́ния сла́вы Бо́жия, преда́л еси́ вла́сть твою́ еди́ному от учени́к твои́х, и со еди́ным от ни́х та́йно отше́л еси́ во о́стров еди́н, иде́же вда́л еси́ себе́ непреста́нней моли́тве, трудо́м и поще́нию, бо́дренно воспева́я Го́сподеви: Аллилу́иа.
Икос 9
Вети́я ди́вен бы́л еси́, при́сно от се́рдца испо́лнена любве́ глаго́ляй и помышле́ния челове́ческая ду́хом прови́дяй, еди́наго от учени́к твои́х предвари́в, наста́вил еси́ не отлага́ти обе́ты и́ноческия ра́ди мирски́я пре́лести; и уте́шив его́ словесы́ Писа́ния, возбрани́л еси́ зло́му по́мыслу возврати́тися в се́рдце его́. Сего́ ра́ди зове́м ти́:
Ра́дуйся, изря́днейший врачу́ духо́вный; ра́дуйся, ве́рный наста́вниче умо́в заблу́ждших.
Ра́дуйся, серде́ц мяту́щихся упокои́телю; ра́дуйся, злы́х начина́ний разори́телю.
Ра́дуйся, благи́х по́мыслов насади́телю; ра́дуйся, святы́х жела́ний внуши́телю.
Ра́дуйся, разсла́бленныя во́ли укрепи́телю; ра́дуйся, искуше́ний и собла́знов изба́вителю.
Ра́дуйся, от прило́гов диа́волих защи́тителю; ра́дуйся, уны́лых и отчаява́ющихся уте́шителю.
Ра́дуйся, усыпле́нных со́вестей возбуди́телю; ра́дуйся, путе́й покая́ния и спасе́ния му́дрый сказа́телю.
Ра́дуйся, преподо́бне о́тче на́ш Анто́ние.
Кондак 10
Спасти́ся хотя́щии стужа́ху ти́, приходя́ще в пусты́нную ке́ллию твою́; сего́ ра́ди далеча́йше в де́брь отбе́гл еси́, и во глубине́ го́р, а́ки в коно́бе, водвори́лся еси́, и тягча́йшыя по́двиги подъя́л еси́, презре́в страхова́ния де́монов и обнажи́в до чре́сл те́ло мши́цам, в моли́тве терпе́л еси́, воспева́я Бо́гу: Аллилу́иа.
Икос 10
Стено́ю кре́пкою и опло́том наде́жным бы́л еси́ оби́тели твое́й, егда́ возврати́лся еси́ в ню́ ко ученико́м твои́м, разсе́ятися хотя́щым, и до́бре па́сл еси́ ста́до твое́; уста́ бо твоя́, я́ко со́т ме́д, иска́паху словеса́ благода́ти, зра́к же тво́й явля́ше кро́тость и любо́вь о́тчу, седи́на изве́ствоваше му́дрость ума́ и чистоту́ се́рдца, согбе́нный ви́д тво́й, ста́рче Бо́жий, подо́бяше тя́ дре́ву, кра́сных плодо́в оби́лием до́лу преклоне́ну. Сего́ ра́ди зове́м ти́:
Ра́дуйся, красото́ Це́ркве Христо́вы; ра́дуйся, сосу́де святы́ни.
Ра́дуйся, цве́те и́ночества; ра́дуйся, свети́льниче ми́рови.
Ра́дуйся, кра́сное зда́ние благода́ти Христо́вы; ра́дуйся, преукраше́нный хра́м Свята́го Ду́ха.
Ра́дуйся, но́вый о́бразе Бо́жий; ра́дуйся, подо́бие Христо́во.
Ра́дуйся, дража́йший кораблю́, внося́й в приста́нище неисче́тна сокро́вища духо́вная; ра́дуйся, купе́ц, приумно́живый вда́нныя ти́ от Бо́га тала́нты.
Ра́дуйся, ве́рный приста́вниче до́му Бо́жия.
Ра́дуйся, преподо́бне о́тче на́ш Анто́ние.
Кондак 11
Пе́ние Го́сподеви соверши́вшым ученико́м твои́м, в пра́здник боголе́пнаго Преображе́ния Христо́ва предложи́л еси́ во сла́ву Бо́жию ве́лие и чу́дно учрежде́ние на трапе́зе, я́коже и Госпо́дь сотвори́; повеле́л бо еси́ рыбаре́м, обно́щь всу́е тружда́вшымся о лови́тве ры́б, па́ки воврещи́ мре́жу во е́зеро, и я́коже предре́кл еси́ и́м, извлеко́ша мно́жество вели́ких и разли́чных ры́б, я́ко все́м диви́тися, и ди́вному во святы́х Бо́гу воспе́ти: Аллилу́иа.
Икос 11
Светоза́рную жи́знь скончава́я, (седми́десяти девяти́ ле́т) ста́рец сы́й, я́ко оте́ц чадолюби́в, вся́ смотри́тельне устро́ил еси́ во оби́тели твое́й. Ученики́ твоя́, о ско́рем преставле́нии твое́м скорбя́щыя, наста́вил и уте́шил еси́; уста́вы общежи́тия писа́нием утверди́л еси́, и вме́сто себе́ ино́го игу́мена наре́кл еси́; са́м же во бде́нии и моли́тве не вкуси́л еси́ поко́я, до́ндеже Го́сподеви пре́дал еси́ святу́ю ду́шу твою́. Ученицы́ же твои́, возвра́щшеся из хра́ма и ви́девше тя́ бездыха́нна лежа́ща, ру́це же я́ко моля́щуся при пе́рсех иму́ща, со слеза́ми возопи́ша:
Ра́дуйся, благи́й на́ш о́тче, зря́й ны́не Отца́ све́тов; ра́дуйся, па́стырю на́ш до́брый, предстоя́й ны́не пастыренача́льнику Христу́.
Ра́дуйся, пита́телю на́ш, сла́достьми небе́сными насыща́яйся; ра́дуйся, покрови́телю на́ш, во кро́вех небе́сных водвори́выйся.
Ра́дуйся, предста́телю на́ш пред Бо́гом, а́нгельская зря́й утеше́ния; ра́дуйся, сожи́телю святы́м небожи́телем.
Ра́дуйся, граждани́не го́рняго Иерусали́ма; ра́дуйся, свяще́нная главо́, венча́нная от Царя́ сла́вы.
Ра́дуйся, зри́телю Триипоста́снаго Све́та; ра́дуйся, ве́дче боже́ственных та́ин.
Ра́дуйся, на ло́не любве́ Бо́жия упоко́ивыйся; ра́дуйся, ра́достей ра́ди небе́сных, вся́ку боле́знь и печа́ль коне́чне забы́вый.
Ра́дуйся, преподо́бне о́тче на́ш Анто́ние.
Кондак 12
Благода́ти сосу́д честно́е те́ло твое́, не дерзну́ша ученицы́ твои́, по глаго́лу твоему́, изврещи́ в де́брь на растерза́ние звере́м, или́ обе́сити на стене́ в сне́дь пти́цам или́ потопи́ти во е́зере; но пра́ведно разори́ша завеща́ние твое́, благоче́стне поло́жше мо́щи твоя́ во хра́ме Живонача́льныя Тро́ицы и гробни́цу твою́ украси́вше святы́ми ико́ны, по вся́к ве́чер усе́рдно стека́хуся пе́ти над не́ю надгро́бная: Аллилу́иа.
Икос 12
Пе́ти вся́ чудеса́ твоя́ не возмо́жем, мно́га бо зело́ ди́вная сотвори́л еси́ и по сме́рти твое́й. Сего́ ра́ди ве́руем, я́ко ны́не на небесе́х живе́ши, и приноси́мая тебе́ пе́ния ми́лостивно прие́млеши, и па́че дерза́ем глаго́лати:
Ра́дуйся, боже́ственный врачу́, вся́ку боле́знь и вся́ку я́зю ско́ро исцеля́яй; ра́дуйся, разсла́бленныя возставля́яй.
Ра́дуйся, и малоду́шныя утвержда́яй; ра́дуйся, слепы́я ви́дети творя́й.
Ра́дуйся, и помраче́нныя умы́, смы́сленны де́яй; ра́дуйся, и неве́рующыя ве́ровати науча́яй.
Ра́дуйся, упова́ющыя спаса́яй; ра́дуйся, из грехо́вныя бе́здны изъе́мляй.
Ра́дуйся, от наси́лия де́монскаго свобожда́яй; ра́дуйся, к самоуби́йству теку́щыя воспяща́яй.
Ра́дуйся, па́че наде́жды по́мощь подава́яй; ра́дуйся, и не зва́вшым тя́, я́ко зва́н, благовре́менне помога́яй.
Ра́дуйся, преподо́бне о́тче на́ш Анто́ние.
Кондак 13
О преди́вный чудотво́рче и вели́кий уго́дниче Христо́в, преподо́бне о́тче Анто́ние, предстоя́й ны́не престо́лу Пресвяты́я Тро́ицы, приими́ от на́с гре́шных приноси́мая ти́ хвале́бная пе́ния и моли́твами твои́ми испроси́ на́м у Го́спода отпуще́ние грехо́в, избавле́ние от бе́д вре́менных и спасе́ние от му́к ве́чных, да с тобо́ю вы́ну Триипоста́сному Бо́гу воспева́ем: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелов ревни́тель от ю́ности показа́лся еси́, преподо́бне; рожде́йся во убо́зей ве́си, я́ко граждани́н небе́снаго Иерусали́ма ходи́л еси́; про́ст сы́й земледе́лец, первозва́нному апо́столов тезоимени́т и подража́тель бы́л еси́; Христу́ после́дуя, мно́ги ученики́ собра́л еси́. Сего́ ра́ди зове́м ти́:
Ра́дуйся, рожде́нием ра́дость, я́ко пе́рвенец, роди́телем пода́вый; ра́дуйся, и на небесе́х благослове́ние перворо́дных насле́дивый.
Ра́дуйся, ю́ности бу́есть изде́тска отложи́вый; ра́дуйся, слове́сное млеко́ Боже́ственных писа́ний, па́че ма́терня, вожделе́вый.
Ра́дуйся, в душеполе́зных уче́ниих све́рстники своя́ превозше́дый; ра́дуйся, благоче́стием и ра́зумом наста́вники удиви́вый.
Ра́дуйся, я́ко измла́да сказа́ния о святы́х и жи́тельство и́х возлюби́л еси́; ра́дуйся, я́ко ра́но уразуме́л и презре́л еси́ суету́ бла́г вре́менных.
Ра́дуйся, я́ко до́м Бо́жий па́че о́тча избра́л еси́; ра́дуйся, я́ко изде́тска навы́кл еси́ песносло́вити Го́спода.
Ра́дуйся, я́ко о́браз Созда́теля на дска́х живопису́я, ясне́йшее подо́бие Его́ на скрижа́лех се́рдца твоего́ вообрази́л еси́; ра́дуйся, я́ко от ю́ности в се́рдцы твое́м к небе́сным восхожде́ния положи́л еси́.
Ра́дуйся, преподо́бне о́тче на́ш Анто́ние.
Кондак 1
Избра́ннаго вождя́ и́ноков, изря́днаго учи́теля подви́жников, доброде́тельми я́ко цве́ты украси́вшася, чудесы́ же, я́ко луча́ми со́лнечными, сия́юща, восхваля́ем тя́ с любо́вию, преподо́бне. Ты́ же, предстоя́ престо́лу Пресвяты́я Тро́ицы, испроси́ на́м оставле́ние грехо́в и избавле́ние от все́х бе́д и зо́л; да житие́ небла́зненно и безмяте́жно теку́ще, благода́рне зове́м ти́:
Ра́дуйся, преподо́бне о́тче на́ш Анто́ние.
Молитвы
О преди́вный чудотво́рче и вели́кий уго́дниче Бо́жий, преподо́бне о́тче Анто́ние, па́стырю на́ш до́брый, те́плый засту́пниче и ско́рый помо́щниче; предстоя́й престо́лу Пресвяты́я Тро́ицы, при́зри ми́лостивым о́ком на ны́ и на вся́ лю́ди, благогове́йне притека́ющыя к честно́му гро́бу твоему́, в не́мже лежа́щыя святы́я мо́щи твоя́, от дни́й дре́вних нетле́нием цвету́щыя и благода́тию Животворя́щаго Пресвята́го Ду́ха благоуха́ющыя, исцеле́ния от вся́ких неду́гов душе́вных и теле́сных неоску́дно источа́ют. Услы́ши на́с моля́щихся тебе́ и чту́щих святу́ю па́мять твою́. Простри́ ру́це твои́ ко Влады́це небесе́ и земли́, стра́ждущую страну́ Росси́йскую от лю́тых безбо́жник и вла́сти и́х да свободи́т, и да возста́вит престо́л правосла́вных царе́й, ве́рных рабо́в Его́, в ско́рби и печа́ли де́нь и но́щь вопию́щих к Нему́, многоболе́зный во́пль да услы́шит и да изведе́т от поги́бели живо́т на́ш, и испроси́ на́м оставле́ние прегреше́ний на́ших. Моли́ ми́лостиваго Бо́га отврати́ти от на́с вся́кий гне́в Его́, пра́ведно на ны́ дви́жимый и сохрани́ти не то́чию оби́тель на́шу, но и вся́ гра́ды и ве́си, и вся́ страны́ христиа́нския, и лю́ди живу́щыя в ни́х от гра́да и гла́да, от тру́са и пото́па, от огня́ и меча́, от наше́ствия иноплеме́нных и междоусо́бныя бра́ни, от смертоно́сныя я́звы и вся́кия па́губы и вся́каго зла́, дарова́ти же на́м вся́ к жи́зни вре́менней благопотре́бная и к ве́чному спасе́нию поле́зная. Помози́ на́м, свя́тче Бо́жий, избежа́ти па́губных сете́й диа́волих, препобеди́ти собла́зны ми́ра и умертви́ти у́ды на́шя су́щыя на земли́; отврати́ о́чи на́ши от су́етных и преле́стных веще́й земны́х, напра́ви же умы́ и мы́сли на́шя к зре́нию красо́т боже́ственных, пренебе́сных и нетле́нных; сердца́ на́ша, неду́гующая страстьми́ грехо́вными, исцели́, да не прильпну́т сласте́м привре́менным, и безме́стным; согре́й же я́ боже́ственною любо́вию, да вожделе́ют и́стиннаго и непреходя́щаго блаже́нства, е́же в Бо́зе. Укрепи́ на́с ко исполне́нию за́поведей Госпо́дних, да́ждь на́м покая́ние серде́чное и умиле́ние сле́зное, моли́тву непреста́нную и трудолю́бие неосла́бное, бо́дренное трезве́ние ума́ и хране́ние се́рдца, ми́р по́мыслов, чистоту́ жела́ний, правоту́ дея́ний, да изба́вльшеся тобо́ю от все́х вра́г ви́димых и неви́димых, от вся́ких зо́л душе́вных и теле́сных, и соблю́дше ве́ру пра́вую, наде́жду неотло́жную и любо́вь нелицеме́рную, богоуго́дне сконча́ем житие́ на́ше на земли́, и преше́дше в жи́знь ве́чную, сподо́бимся зре́ти трисве́тлую зарю́ трисия́ющаго ве́чнаго Со́лнца, и в невече́рнем дни́ Небе́снаго Ца́рствия, ку́пно с тобо́ю и со все́ми святы́ми, благода́рне воспева́ти и благословля́ти Пресвяту́ю Тро́ицу, Отца́ и Сы́на, и Свята́го Ду́ха, во ве́ки веко́в. Ами́нь.
О богоблаже́нне и приснопа́мятне о́тче на́ш Анто́ние! Не мни́м тя́ ме́ртва су́ща, а́ще те́лом и преста́вился еси́ от на́с, но жи́в в собо́ре а́нгелов водворя́ешися. Моли́ за ны́, избра́нниче Христо́в, и не пре́зри на́с ве́рою и любо́вию чту́щих тя́, помина́й на́с недосто́йных у престо́ла Царя́ Небе́снаго, тебе́ бо даде́ся благода́ть моли́тися за ны́, О, засту́пниче и моли́твенниче на́ш до́брый! Се́ бо святы́х моще́й твои́х ра́ка пред очи́ма на́шима ви́дима е́сть, сохраня́й у́бо на́с всегда́ от сете́й вра́жиих; моли́ся ко Го́споду о спасе́нии ду́ш на́ших и испроси́ на́м покая́ния вре́мя и христиа́нскую кончи́ну безболе́зненну, непосты́дну, ми́рну, да невозбра́нно пре́йдем мыта́рства возду́шных князе́й и сподо́бимся Небе́снаго Ца́рствия со все́ми угоди́вшими Влады́це не́ба и земли́, Го́споду на́шему Иису́су Христу́, Ему́же подоба́ет вся́кая сла́ва, че́сть и поклоне́ние всегда́, ны́не и при́сно и во ве́ки веко́в. Ами́нь.
Конда́къ а҃
И҆збра́ннаго вождѧ̀ и҆́нокѡвъ, и҆зрѧ́днаго ᲂу҆чи́телѧ подви́жникѡвъ, добродѣ́тельми ꙗ҆́кѡ цвѣ̑ты ᲂу҆краси́вшасѧ, чꙋдесы́ же, ꙗ҆́кѡ лꙋча́ми со́лнечными, сїѧ́юща, восхвалѧ́емъ тѧ̀ съ любо́вїю, прпⷣбне. ты́ же, предстоѧ̀ прⷭ҇то́лꙋ прест҃ы́ѧ трⷪ҇цы, и҆спросѝ на́мъ ѡ҆ставле́нїе грѣхѡ́въ и҆ и҆збавле́нїе ѿ всѣ́хъ бѣ́дъ и҆ ѕѡ́лъ: да житїѐ небла́зненнѡ и҆ безмѧте́жнѡ текꙋ́ще, благода́рнѣ зове́мъ тѝ:
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
І҆́косъ а҃
А҆́гг҃лѡвъ ревни́тель ѿ ю҆́ности показа́лсѧ є҆сѝ, прпⷣбне: рожде́йсѧ во ᲂу҆бо́зѣй ве́си, ꙗ҆́кѡ граждани́нъ нбⷭ҇нагѡ і҆ерⷭ҇ли́ма ходи́лъ є҆сѝ: про́стъ сы́й земледѣ́лецъ, первозва́нномꙋ а҆пⷭ҇лѡвъ тезоимени́тъ и҆ подража́тель бы́лъ є҆сѝ: хрⷭ҇тꙋ̀ послѣ́дꙋѧ, мнѡ́ги ᲂу҆ченики̑ собра́лъ є҆сѝ. сегѡ̀ ра́ди зове́мъ тѝ:
Ра́дꙋйсѧ, рожде́нїемъ ра́дость, ꙗ҆́кѡ пе́рвенецъ, роди́телємъ пода́вый: ра́дꙋйсѧ, и҆ на нб҃сѣ́хъ бл҃гослове́нїе перворо́дныхъ наслѣ́дивый.
Ра́дꙋйсѧ, ю҆́ности бꙋ́есть и҆з̾дѣ́тска ѿложи́вый: ра́дꙋйсѧ, слове́сное млеко̀ бжⷭ҇твенныхъ писа́нїй, па́че ма́тернѧ, вожделѣ́вый.
Ра́дꙋйсѧ, въ дꙋшеполе́зныхъ ᲂу҆че́нїихъ све́рстники своѧ̑ превозше́дый: ра́дꙋйсѧ, бл҃гоче́стїемъ и҆ ра́зꙋмомъ наста́вники ᲂу҆диви́вый.
Ра́дꙋйсѧ, ꙗ҆́кѡ и҆з̾мла́да сказа̑нїѧ ѡ҆ ст҃ы́хъ и҆ жи́тельство и҆́хъ возлюби́лъ є҆сѝ: ра́дꙋйсѧ, ꙗ҆́кѡ ра́нѡ ᲂу҆разꙋмѣ́лъ и҆ презрѣ́лъ є҆сѝ сꙋетꙋ̀ бла̑гъ вре́менныхъ.
Ра́дꙋйсѧ, ꙗ҆́кѡ до́мъ бж҃їй па́че ѻ҆́тча и҆збра́лъ є҆сѝ: ра́дꙋйсѧ, ꙗ҆́кѡ и҆з̾дѣ́тска навы́клъ є҆сѝ пѣсносло́вити гдⷭ҇а.
Ра́дꙋйсѧ, ꙗ҆́кѡ ѡ҆́бразъ созда́телѧ на дска́хъ живописꙋ́ѧ, ꙗ҆снѣ́йшее подо́бїе є҆гѡ̀ на скрижа́лѣхъ се́рдца твоегѡ̀ воѡбрази́лъ є҆сѝ: ра́дꙋйсѧ, ꙗ҆́кѡ ѿ ю҆́ности въ се́рдцы твое́мъ къ нбⷭ҇нымъ восхождє́нїѧ положи́лъ є҆сѝ.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ в҃
Ви́дѧще близ̾ кончи́нꙋ живота̀ своегѡ̀, благовѣ́рнїи роди́телїе твоѝ съ мл҃твою преда́ша тѧ̀ и҆ бра́тїю твою̀ гдⷭ҇ви. сегѡ̀ ра́ди и҆ по сме́рти и҆́хъ не позна́лъ є҆сѝ себѐ си́ра, но со бл҃годаре́нїемъ возопи́лъ є҆сѝ бг҃ꙋ: А҆ллилꙋ́їа.
І҆́косъ в҃
Ра́зꙋмомъ и҆ и҆спыта́нїемъ коне́чнѣ позна́лъ є҆сѝ сꙋетꙋ̀ привре́менныѧ сла́дости: дости́гнꙋвъ же въ мѣ́рꙋ во́зраста въ мꙋ́жа соверше́нна, подо́бнѡ подвигополо́жникꙋ своемꙋ̀, ꙗ҆ви́вшемꙋ себѐ мі́рови, три́десѧти лѣ́тъ вда́лъ є҆сѝ себѐ въ слꙋ́жбꙋ гдⷭ҇ви: ѡ҆ста́вивъ мі́ръ и҆ всѧ̑, ꙗ҆̀же въ не́мъ, прїѧ́лъ є҆сѝ ѡ҆́бразъ а҆́гг҃льскїй. таково́е ᲂу҆́бѡ и҆зволе́нїе твоѐ восхвалѧ́юще, глаго́лемъ:
Ра́дꙋйсѧ, ꙗ҆́кѡ на распꙋ́тїихъ мі́ра сегѡ̀ ѡ҆брѣ́лъ є҆сѝ пра́вый пꙋ́ть въ црⷭ҇твїе нбⷭ҇ное: ра́дꙋйсѧ, ꙗ҆́кѡ ѡ҆ста́вивъ до́мъ ѻ҆тца̀ своегѡ̀ водвори́лсѧ є҆сѝ въ домꙋ̀ гдⷭ҇ни.
Ра́дꙋйсѧ, до́брый ра́бе, ꙗ҆́кѡ бы́лъ є҆сѝ вѣ́ренъ влⷣцѣ твоемꙋ̀: ра́дꙋйсѧ, ꙗ҆́кѡ ᲂу҆жѐ нѣ́си ра́бъ, но сы́нъ и҆ наслѣ́дникъ бж҃їй.
Ра́дꙋйсѧ, ꙗ҆́кѡ и҆ въ сꙋпрꙋ́жествѣ, ка́кѡ ᲂу҆годи́ти гдⷭ҇ви, помышлѧ́лъ є҆сѝ: ра́дꙋйсѧ, ꙗ҆́кѡ во и҆́ночествѣ всецѣ́лѡ гдⷭ҇ви себѐ преда́лъ є҆сѝ.
Ра́дꙋйсѧ, ꙗ҆́кѡ вожделѣ̑нїѧ пло́ти ѡ҆бꙋзда́лъ є҆сѝ: ра́дꙋйсѧ, ꙗ҆́кѡ пло́ть дꙋ́хови покори́лъ є҆сѝ.
Ра́дꙋйсѧ, ꙗ҆́кѡ разда́въ и҆мѣ̑нїѧ своѧ̑, ни́щыѧ ᲂу҆ще́дрилъ є҆сѝ: ра́дꙋйсѧ, ꙗ҆́кѡ нището́ю бога́тство нетлѣ́нное стѧжа́лъ є҆сѝ.
Ра́дꙋйсѧ, ꙗ҆́кѡ ᲂу҆бѣ́глъ є҆сѝ собла́знѡвъ мі́ра и҆ сѣте́й дїа́вола: ра́дꙋйсѧ, го́рлице пꙋстыннолю́бнаѧ, и҆сто́ргнꙋвшаѧсѧ ѿ сѣ́ти ло́вчи.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ г҃
Си́ла бжⷭ҇твеннаѧ ꙗ҆́вѣ ᲂу҆крѣпи́ тѧ, ѡ҆бнощева́вша за пѧ́ть по́прищъ до ст҃ы́ѧ ѡ҆би́тели пахѡ́мїа: є҆гда́ бо въ со́ннѣмъ видѣ́нїи крⷭ҇то́мъ ѡ҆сѣни́ тѧ ста́рецъ ст҃олѣ́пенъ, рекі́й тѝ: возмѝ крⷭ҇тъ тво́й и҆ грѧдѝ вслѣ́дъ менє̀, не боѧ́сѧ ко́зней дїа́волихъ: ты̀, въ ра́дости воста́въ ѿ сна̀, всю̀ но́щь моли́лсѧ є҆сѝ гдⷭ҇ви, бл҃года́рнѣ воспѣва́ѧ: А҆ллилꙋ́їа.
І҆́косъ г҃
И҆мы́й се́рдце ᲂу҆гото́вано въ слꙋ́жбꙋ гдⷭ҇ви, сегѡ̀ пречⷭ҇томꙋ ѡ҆́бразꙋ со слеза́ми ра́дости и҆ бл҃годаре́нїѧ поклони́лсѧ є҆сѝ во вратѣ́хъ тоѧ̀ ѡ҆би́тели, въ ню́же все́льсѧ, не солга́лъ є҆сѝ ст҃о́мꙋ дх҃ꙋ, но па́че всѣ́хъ рабо́талъ є҆сѝ гдⷭ҇ви. сегѡ̀ ра́ди зове́мъ тѝ:
Ра́дꙋйсѧ, ꙗ҆́кѡ препоѧ́салсѧ є҆сѝ съ высоты̀ си́лою: ра́дꙋйсѧ, ꙗ҆́кѡ крѣ́пцѣ ѡ҆полчи́лсѧ є҆сѝ проти́вꙋ пло́ти, мі́ра и҆ дїа́вола.
Ра́дꙋйсѧ, ꙗ҆́кѡ прїи́скреннѣ прине́слсѧ є҆сѝ бг҃ови: ра́дꙋйсѧ, ꙗ҆́кѡ сраспѧ́лсѧ є҆сѝ хрⷭ҇тꙋ̀.
Ра́дꙋйсѧ, ꙗ҆́кѡ сла́дцѣ поне́слъ є҆сѝ бре́мѧ є҆гѡ̀: ра́дꙋйсѧ, ꙗ҆́кѡ смире́нїемъ ᲂу҆краси́лсѧ є҆сѝ.
Ра́дꙋйсѧ, ꙗ҆́кѡ всѧ̑, ꙗ҆̀же на землѝ, мꙋдрова̑нїѧ ѿри́нꙋлъ є҆сѝ: ра́дꙋйсѧ, ꙗ҆́кѡ по́стническими трꙋды̀ бг҃ꙋ ᲂу҆годи́лъ є҆сѝ.
Ра́дꙋйсѧ, ꙗ҆́кѡ глаго́лы бжⷭ҇твенными дꙋ́шꙋ напита́лъ и҆ ᲂу҆крѣпи́лъ є҆сѝ: ра́дꙋйсѧ, ꙗ҆́кѡ бо́дренною мл҃твою и҆ ѱалмопѣ́нїемъ дꙋ́хъ тво́й ѡ҆крили́лъ є҆сѝ.
Ра́дꙋйсѧ, ꙗ҆́кѡ бдѣ̑нїи всено́щными и҆ хране́нїемъ се́рдца ᲂу҆гото́валъ є҆сѝ себѐ къ зрѣ́нїю невече́рнѧгѡ свѣ́та: ра́дꙋйсѧ, ꙗ҆́кѡ ѡ҆́бразъ житїѧ̀ и҆́ноческагѡ бы́лъ є҆сѝ.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ д҃
Бꙋ́рю дꙋшегꙋби́тельнꙋ непщꙋ́ѧ бы́ти сла́вꙋ человѣ́чꙋ, и҆з̾ ѡ҆би́тели въ пꙋсты́ню ᲂу҆дали́лсѧ, и҆дѣ́же хра́мъ воздви́глъ є҆сѝ, и҆ та́мѡ се́дмь лѣ́тъ непреста́нными трꙋды̀, мл҃твами и҆ посты̀ бл҃гоꙋгожда́лъ є҆сѝ бг҃ови, немо́лчнѡ воспѣва́ѧ: А҆ллилꙋ́їа.
І҆́косъ д҃
Слы́шавъ молвꙋ̀ и҆ прещє́нїѧ ѡ҆кре́стныхъ жи́телей, помѧнꙋ́въ є҆сѝ словеса̀ хрⷭ҇тѡ́ва, бѣжа́ти ѿ гонѧ́щихъ ны̀, и҆ сквозѣ̀ непрохѡ́дныѧ дє́бри приве́лъ є҆сѝ ᲂу҆ченикѝ твоѧ̑ ко є҆́зерꙋ, и҆дѣ́же ѡ҆брѣ́тесѧ мѣ́сто, за мнѡ́га лѣ̑та въ жили́ще и҆́нокѡмъ назна́менанное, и҆ посредѣ̀ де́брей, бла́тъ и҆ є҆зе́ръ съ ди́вїими ѕвѣрьмѝ всели́лсѧ є҆сѝ. сегѡ̀ ра́ди взыва́емъ тѝ:
Ра́дꙋйсѧ, смиренномꙋ́дрїемъ всѧ́кꙋ ра́спрю погаси́вый: ра́дꙋйсѧ, кро́тостїю ѕло́бꙋ побѣди́вый.
Ра́дꙋйсѧ, любо́вїю враждꙋ̀ ѿмсти́вый: ра́дꙋйсѧ, неѡбита́ємаѧ мѣста̀ мл҃твою ѡ҆ст҃и́вый.
Ра́дꙋйсѧ, безмѡ́лвныѧ дє́бри бж҃е́ственными пѣ́сньми ѡ҆гласи́вый: ра́дꙋйсѧ, въ непроходи́мыхъ стєзѝ бла̑ги ѡ҆брѣты́й.
Ра́дꙋйсѧ, въ напа́стехъ и҆ и҆скꙋше́нїихъ терпѣ́нїѧ и҆ ᲂу҆пова́нїѧ не погꙋби́вый: ра́дꙋйсѧ, спꙋ́тники твоѧ̑ въ терпѣ́нїи ᲂу҆крѣпи́вый.
Ра́дꙋйсѧ, въ непра́веднѣмъ и҆згна́нїи, вхо́ды црⷭ҇тва нбⷭ҇нагѡ ѡ҆брѣты́й: ра́дꙋйсѧ, дре́во плодоно́снѡ, при вода́хъ насажде́нное.
Ра́дꙋйсѧ, фі́нїче, процвѣты́й въ пꙋсты́ни: ра́дꙋйсѧ, ꙗ҆́кѡ ке́дръ, и҆́же ѿ лїва́на, возвели́чивыйсѧ.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ є҃
Бг҃оте́чнѣй ѕвѣздѣ̀ ᲂу҆подо́билсѧ є҆сѝ водѧ́й спꙋ́тники твоѧ̑ на мѣ́сто, и҆дѣ́же пе́рвѣе водрꙋзи́лъ є҆сѝ крⷭ҇тъ гдⷭ҇нь, и҆ сле́знѡ моли́лсѧ є҆сѝ влⷣцѣ хрⷭ҇тꙋ̀, сохрани́ти тѧ̀ ѿ вра̑гъ ви́димыхъ и҆ неви́димыхъ, и҆ ᲂу҆тверди́ти въ терпѣ́нїи нестѝ крⷭ҇тъ сво́й и҆ пѣ́ти бг҃ꙋ: А҆ллилꙋ́їа.
І҆́косъ є҃
Ви́дѧ неви́димыхъ врагѡ́въ прило́ги, ѿгонѧ́лъ є҆сѝ тѣ́хъ, под̾е́млѧ рꙋ́цѣ на мл҃твꙋ: въ трꙋдѣ́хъ и҆ по́двизѣхъ непреста́нныхъ, ди́вїими то́чїю ѕє́лїи пита́лсѧ є҆сѝ: а҆́лчꙋщыѧ же ᲂу҆ченикѝ твоѧ̑, не и҆мы́й хлѣ́ба, словесы̀ бжⷭ҇твенными насыща́лъ и҆ ᲂу҆крѣплѧ́лъ є҆сѝ, до́ндеже нѣ́кто, мимоходѧ́й, подаде́ ти всѧ̑ потрє́бнаѧ къ препита́нїю и҆ строе́нїю ѡ҆би́тели. сицево́мꙋ ᲂу҆́бѡ смотрѣ́нїю бж҃їю, ꙗ҆́кѡже и҆ вѣ́рѣ твое́й дивѧ́щесѧ, ра́достнѡ вопїе́мъ тѝ:
Ра́дꙋйсѧ, безси́лїе те́мныхъ си́лъ ѡ҆бличи́вый: ра́дꙋйсѧ, си́лꙋ мл҃твы побѣди́тельнꙋ показа́вый.
Ра́дꙋйсѧ, вѣ́рꙋ непоколеби́мꙋ стѧжа́вый: ра́дꙋйсѧ, ᲂу҆пова́нїе неѿло́жнѡ сохрани́вый.
Ра́дꙋйсѧ, любо́вь нелицемѣ́рнꙋ и҆ безкоры́стнꙋ соблюды́й: ра́дꙋйсѧ, всѧ́ко жите́йское попече́нїе ѿложи́вый.
Ра́дꙋйсѧ, всѧ́кꙋ печа́ль на гдⷭ҇а возвергі́й: ра́дꙋйсѧ, терпѣ́нїемъ во и҆скꙋше́нїихъ, мꙋ́жество неѡбори́мо ꙗ҆ви́вый.
Ра́дꙋйсѧ, мꙋ́дрый строи́телю, не на песцѣ̀, а҆ на тве́рдѣ ка́мени зи́ждѧй: ра́дꙋйсѧ, ꙗ҆́кѡ ни́щъ бы́въ гдⷭ҇а ра́ди, дово́ленъ бы́лъ є҆сѝ мнѡ́ги бг҃олю́бцы собра́ти и҆ препита́ти.
Ра́дꙋйсѧ, ничто́же и҆мы́й, всѧ̑ содержа́й: ра́дꙋйсѧ, въ промышле́нїи любвѐ бж҃їѧ, и҆сто́чникъ всѧ́кагѡ дово́льства неизсѧка́ющъ ѡ҆брѣты́й и҆ и҆ны̑мъ ꙗ҆ви́вый.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ ѕ҃
Проповѣ́дникъ ст҃ы́ни твоеѧ̀, прпⷣбне, ꙗ҆ви́сѧ вра́гъ тво́й, є҆ди́нъ ѿ приста̑вникъ къ собира́нїю да́ней: ѻ҆́нъ бо, непщꙋ́ѧ тѧ̀ и҆мꙋ́ща стѧжа̑нїѧ мнѡ́га, наѧ́тъ разбо́йники расхи́тити ѡ҆би́тель твою̀, но не возмо́же ѡ҆ѕло́бити ю҆̀, наро́да ра́ди, со ѡ҆рꙋ̑жїи ѡ҆бстоѧ́ща ю҆̀: ᲂу҆вѣ́дѣвый же, ꙗ҆́кѡ не человѣ́ки, но си̑лы нбⷭ҇ными ѡ҆хранѧ́ешисѧ, при ногꙋ̀ твоє́ю раска́ѧсѧ ѡ҆ ѕлѣ̀, просѧ́й проще́нїѧ. ты́ же неѕло́бивъ сы́й, съ любо́вїю ѿпꙋсти́въ є҆гѡ̀, воспѣ́лъ є҆сѝ бг҃ꙋ: А҆ллилꙋ́їа.
І҆́косъ ѕ҃
Возсїѧ́лъ є҆сѝ ꙗ҆́кѡ ѕвѣзда̀ свѣ́тлаѧ, лꙋча́ми ст҃ы́ни ѡ҆зарѧ́ѧ рѡссі́ю: сла́ва бо добродѣ́телей твои́хъ промче́сѧ по всѣ̑мъ градѡ́мъ, привлача́щи мнѡ́гїѧ во ѡ҆би́тель твою̀. и҆ ца́рь, посла́въ тебѣ̀ гра́мотꙋ, да стро́иши пꙋсты́нное жи́тельство, предадѐ себѐ и҆ ца́рство своѐ твои̑мъ бг҃опрїѧ́тнымъ мл҃твамъ, и҆́миже ѡ҆гражда́еми зове́мъ тѝ:
Ра́дꙋйсѧ, рѡссі́йскихъ царе́й предста́телю: ра́дꙋйсѧ, ѻ҆те́чествїѧ твоегѡ̀ храни́телю.
Ра́дꙋйсѧ, свѣти́льниче, горѧ́й любо́вїю и҆ свѣтѧ́й ст҃ы́нею: ра́дꙋйсѧ, воево́до полка̀ и҆́ноческагѡ.
Ра́дꙋйсѧ, пра́вый води́телю и҆́щꙋщихъ сп҃се́нїѧ: ра́дꙋйсѧ, си́лою бж҃їею и҆з̾има́ѧй и҆з̾ плѣ́на грѣхо́внагѡ.
Ра́дꙋйсѧ, свобожда́ѧй ѿ рабо́ты сꙋ́етныѧ: ра́дꙋйсѧ, мнѡ́гїѧ кѡ́зни лꙋка́вагѡ по́мощїю бж҃їею побѣди́вый.
Ра́дꙋйсѧ, и҆сполнѧ́ѧй дꙋ́шы сла́достей дꙋхо́вныхъ: ра́дꙋйсѧ, и҆сточа́ѧй то́ки слє́зныѧ и҆з̾ серде́цъ ѡ҆камене́нныхъ.
Ра́дꙋйсѧ, воздѣѧ́нїемъ рꙋкꙋ̀ твоє́ю, спаса́ѧй на́съ ѿ нападе́нїй мы́сленнагѡ а҆мали́ка: ра́дꙋйсѧ, преводѧ́й бл҃гопокори̑выѧ тѝ въ зе́млю, ст҃ы̑мъ ѡ҆бѣтова́ннꙋю.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ з҃
Хотѧ́й насыща́ти словесы̀ бжⷭ҇твенными и҆ пѣ́сньми дꙋхо́вными собра́нное тобо́ю ста́до, созда́лъ є҆сѝ хра́мъ живонача́льныѧ трⷪ҇цы, и҆ неѡпи́санный ѡ҆́бразъ трїеди́нагѡ бжⷭ҇тва̀ потща́лсѧ є҆сѝ воѡбрази́ти на і҆кѡ́нѣ, споспѣшествꙋ́ющꙋ тѝ самомꙋ̀ гдⷭ҇ꙋ, є҆мꙋ́же въ постѣ̀ и҆ мл҃твѣ рабо́талъ є҆сѝ, вопїѧ̀: А҆ллилꙋ́їа.
І҆́косъ з҃
Но́вое чꙋ́до ꙗ҆вѝ гдⷭ҇ь, и҆знесы́й неви́димою рꙋко́ю чⷭ҇тнꙋ́ю і҆кѡ́нꙋ и҆з̾ горѧ́щїѧ цр҃кве и҆ невреди́мꙋ ю҆̀ поста́вивый посредѣ̀ ѡ҆би́тели: ты́ же, ра́дꙋѧсѧ, прїе́мь ю҆̀, съ ᲂу҆пова́нїемъ на гдⷭ҇а, но́вый простра́ннѣйши до́мъ прест҃ѣ́й трⷪ҇цѣ воздви́глъ є҆сѝ, и҆ и҆ны̑ѧ хра́мы назда́лъ є҆сѝ, и҆ та́кѡ ѡ҆би́тель бл҃гоꙋстро́илъ є҆сѝ, ю҆́же и҆ ны́нѣ ѡ҆гражда́еши мл҃твами твои́ми, спаса́ѧй вопїю́щыѧ тѝ:
Ра́дꙋйсѧ, ꙗ҆́кѡ твои́ми мл҃твами но́вый и҆сто́чникъ блгⷣти бж҃їѧ ѿве́рзесѧ: ра́дꙋйсѧ, ꙗ҆́кѡ і҆кѡ́на прест҃ы́ѧ трⷪ҇цы, тобо́ю начерта́ннаѧ, чꙋдесы̀ просла́висѧ.
Ра́дꙋйсѧ, ꙗ҆́кѡ въ пꙋсты́ни ѡ҆би́тель бл҃гоче́стїѧ процвѣтѐ: ра́дꙋйсѧ, ꙗ҆́кѡ тобо́ю приста́нище бл҃гоѡти́шно дꙋша́мъ ᲂу҆гото́васѧ.
Ра́дꙋйсѧ, ꙗ҆́кѡ тобо́ю ᲂу҆чи́лище покаѧ́нїѧ ᲂу҆стро́исѧ: ра́дꙋйсѧ, ꙗ҆́кѡ тобо́ю ѿкры́сѧ пꙋ́ть хотѧ́щымъ къ по́чести вы́шнѧгѡ зва́нїѧ тещѝ.
Ра́дꙋйсѧ, ꙗ҆́кѡ тобо́ю лѣ́ствица дх҃о́вныхъ восхожде́нїй ᲂу҆тверди́сѧ: ра́дꙋйсѧ, ꙗ҆́кѡ и҆́щꙋщымъ спасе́нїѧ ѿ пото́па грѣхо́внагѡ но́въ кора́бль тобо́ю и҆спра́висѧ.
Ра́дꙋйсѧ, ꙗ҆́кѡ во ѡ҆би́тели твое́й и҆сцѣлѧ́ютсѧ недꙋ́ги дꙋ́шъ и҆ тѣле́съ: ра́дꙋйсѧ, даѧ́й прибѣ́жище цѣломꙋ́дрїю, по́стничествꙋ и҆ во́льнѣй нищетѣ̀.
Ра́дꙋйсѧ, ꙗ҆́кѡ и҆́щꙋщїи твоегѡ̀ предста́тельства, прⷭ҇нѡ млⷭ҇ть бж҃їю ѡ҆брѣта́ютъ: ра́дꙋйсѧ, ꙗ҆́кѡ прїѧ́лъ є҆сѝ блгⷣть моли́тисѧ ѡ҆ всѣ́хъ.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ и҃
Стра̑ннаѧ чꙋдеса̀ во ѡ҆би́тели твое́й сотворѝ гдⷭ҇ь свое́ю і҆кѡ́ною, ю҆́же и҆з̾ пла́мене чꙋ́днѡ сп҃сѐ: то́чїю бо прикоснꙋ́сѧ къ не́й ᲂу҆сты̀ слꙋга̀ нѣ́кїй, а҆́бїе свободи́сѧ ѿ дꙋ́ха ѕла́гѡ. и҆ны́й слꙋга̀, положе́нъ бы́въ пред̾ не́ю, и҆зба́висѧ падꙋ́чїѧ болѣ́зни: и҆ сестра̀ і҆ере́а, слѣпа̀ сꙋ́щи, а҆́бїе прозрѣ̀, є҆гда̀ ѡ҆блобыза́ше чꙋдотво́рный ѡ҆́бразъ прест҃ы́ѧ трⷪ҇цы. сегѡ̀ ра́ди и҆ мы̀ прест҃ѣ́й трⷪ҇цѣ вопїе́мъ: А҆ллилꙋ́їа.
І҆́косъ и҃
Ве́сь собо́ръ и҆́нѡкъ є҆два̀ возмо́же преклони́ти смире́нїе твоѐ къ прїѧ́тїю и҆гꙋ́менства: є҆́же прїе́мь, ди́венъ настоѧ́тель бы́лъ є҆сѝ, пе́рвенствꙋѧ въ трꙋдѣ́хъ и҆́ноческихъ, ꙗ҆́кѡ мні́й всѣ́хъ и҆ ра́бъ всѣ̑мъ показꙋ́ѧсѧ, рꙋ́бищемъ покрыва́ѧ себѐ, смире́ннымъ же зра́комъ ᲂу҆таева́ѧ ѻ҆би́лїе блгⷣти и҆ бога́тство ст҃ы́ни. сегѡ̀ ра́ди при́снїи ра́довахꙋсѧ, прише́льцы же не мнѧ́хꙋ тѧ̀ нача́льника бы́ти, мы́ же ᲂу҆ми́льнѣ зове́мъ тѝ:
Ра́дꙋйсѧ, ꙗ҆́кѡ мні́й мнѧ́йсѧ бы́ти, ве́лїй ᲂу҆ гдⷭ҇а сла́вы вмѣни́лсѧ є҆сѝ: ра́дꙋйсѧ, ꙗ҆́кѡ ᲂу҆ча̀ и҆́ны твори́ти, всѧ̑ пе́рвѣе са́мъ сотвори́лъ є҆сѝ.
Ра́дꙋйсѧ, ꙗ҆́кѡ но́щь не премо́же твоегѡ̀ бдѣ́нїѧ: ра́дꙋйсѧ, до́брый стра́же до́ма бж҃їѧ.
Ра́дꙋйсѧ, ꙗ҆́кѡ въ зра́цѣ твое́мъ прⷭ҇нѡ ꙗ҆влѧ́шесѧ трезвѣ́нїе ᲂу҆ма̀ твоегѡ̀: ра́дꙋйсѧ, пра́вило вѣ́ры и҆ ѡ҆́бразъ смире́нїѧ.
Ра́дꙋйсѧ, ꙗ҆́кѡ тѧгча́йшыѧ рабѡ́ты люботрꙋ́днѣ со всѣ́ми раздѣлѧ́лъ є҆сѝ: ра́дꙋйсѧ, ꙗ҆́кѡ болѧ́щымъ ᲂу҆се́рднѡ послꙋжи́лъ є҆сѝ.
Ра́дꙋйсѧ, ꙗ҆́кѡ стра̑нныѧ вве́лъ и҆ ни́щыѧ препита́лъ є҆сѝ: ра́дꙋйсѧ, ꙗ҆́кѡ не́мѡщи немощны́хъ терпѣли́внѡ поне́слъ є҆сѝ.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ ѳ҃
Всѧ́кꙋ сла́вꙋ и҆ че́сть а҆́ще и҆ пра́веднѣ тебѣ̀ воздае́мꙋ ѿ человѣ̑къ, непщꙋ́ѧ бы́ти вино́внꙋ лише́нїѧ сла́вы бж҃їѧ, преда́лъ є҆сѝ вла́сть твою̀ є҆ди́номꙋ ѿ ᲂу҆чєни́къ твои́хъ, и҆ со є҆ди́нымъ ѿ ни́хъ та́йнѡ ѿше́лъ є҆сѝ во ѻ҆́стровъ є҆ди́нъ, и҆дѣ́же вда́лъ є҆сѝ себѐ непреста́ннѣй мл҃твѣ, трꙋдѡ́мъ и҆ поще́нїю, бо́дреннѡ воспѣва́ѧ гдⷭ҇еви: А҆ллилꙋ́їа.
І҆́косъ ѳ҃
Вѣті́ѧ ди́венъ бы́лъ є҆сѝ, прⷭ҇нѡ ѿ се́рдца и҆спо́лнена любвѐ глаго́лѧй и҆ помышлє́нїѧ человѣ́чєскаѧ дꙋ́хомъ прови́дѧй, є҆ди́наго ѿ ᲂу҆чєни́къ твои́хъ предвари́въ, наста́вилъ є҆сѝ не ѿлага́ти ѡ҆бѣ́ты и҆́ночєскїѧ ра́ди мїрскі́ѧ пре́лести: и҆ ᲂу҆тѣ́шивъ є҆го̀ словесы̀ писа́нїѧ, возбрани́лъ є҆сѝ ѕло́мꙋ по́мыслꙋ возврати́тисѧ въ се́рдце є҆гѡ̀. сегѡ̀ ра́ди зове́мъ тѝ:
Ра́дꙋйсѧ, и҆зрѧ́днѣйшїй врачꙋ̀ дꙋхо́вный: ра́дꙋйсѧ, вѣ́рный наста́вниче ᲂу҆мѡ́въ заблꙋ́ждшихъ.
Ра́дꙋйсѧ, серде́цъ мѧтꙋ́щихсѧ ᲂу҆покои́телю: ра́дꙋйсѧ, ѕлы́хъ начина́нїй разори́телю.
Ра́дꙋйсѧ, бл҃ги́хъ по́мыслѡвъ насади́телю: ра́дꙋйсѧ, ст҃ы́хъ жела́нїй внꙋши́телю.
Ра́дꙋйсѧ, разсла́бленныѧ во́ли ᲂу҆крѣпи́телю: ра́дꙋйсѧ, и҆скꙋше́нїй и҆ собла́знѡвъ и҆зба́вителю.
Ра́дꙋйсѧ, ѿ прило́гѡвъ дїа́волихъ защи́тителю: ра́дꙋйсѧ, ᲂу҆ны́лыхъ и҆ ѿчаѧва́ющихсѧ ᲂу҆тѣ́шителю.
Ра́дꙋйсѧ, ᲂу҆сыпле́нныхъ со́вѣстей возбꙋди́телю: ра́дꙋйсѧ, пꙋте́й покаѧ́нїѧ и҆ спасе́нїѧ мꙋ́дрый сказа́телю.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ і҃
Спасти́сѧ хотѧ́щїи стꙋжа́хꙋ тѝ, приходѧ́ще въ пꙋсты́ннꙋю ке́ллїю твою̀: сегѡ̀ ра́ди далеча́йше въ де́брь ѿбѣ́глъ є҆сѝ, и҆ во глꙋбинѣ̀ го́ръ, а҆́ки въ коно́бѣ, водвори́лсѧ є҆сѝ, и҆ тѧгча́йшыѧ по́двиги под̾ѧ́лъ є҆сѝ, презрѣ́въ страхова̑нїѧ де́монѡвъ и҆ ѡ҆бнажи́въ до чре́слъ тѣ́ло мши́цамъ, въ мл҃твѣ терпѣ́лъ є҆сѝ, воспѣва́ѧ бг҃ꙋ: А҆ллилꙋ́їа.
І҆́косъ і҃
Стѣно́ю крѣ́пкою и҆ ѡ҆пло́томъ наде́жнымъ бы́лъ є҆сѝ ѡ҆би́тели твое́й, є҆гда̀ возврати́лсѧ є҆сѝ въ ню̀ ко ᲂу҆ченикѡ́мъ твои̑мъ, разсѣ́ѧтисѧ хотѧ́щымъ, и҆ до́брѣ па́слъ є҆сѝ ста́до твоѐ. ᲂу҆ста́ бо твоѧ̑, ꙗ҆́кѡ со́тъ ме́дъ, и҆ска́пахꙋ словеса̀ блгⷣти, зра́къ же тво́й ꙗ҆влѧ́ше кро́тость и҆ любо́вь ѻ҆́ч҃ꙋ, сѣди́на и҆звѣ́ствоваше мꙋ́дрость ᲂу҆ма̀ и҆ чистотꙋ̀ се́рдца, согбе́нный ви́дъ тво́й, ста́рче бж҃їй, подо́бѧше тѧ̀ дре́вꙋ, кра́сныхъ плодѡ́въ ѻ҆би́лїемъ до́лꙋ преклоне́нꙋ. сегѡ̀ ра́ди зове́мъ тѝ:
Ра́дꙋйсѧ, красото̀ цр҃кве хрⷭ҇то́вы: ра́дꙋйсѧ, сосꙋ́де ст҃ы́ни.
Ра́дꙋйсѧ, цвѣ́те и҆́ночества: ра́дꙋйсѧ, свѣти́льниче мі́рови.
Ра́дꙋйсѧ, кра́сное зда́нїе блгⷣти хрⷭ҇то́вы: ра́дꙋйсѧ, преꙋкраше́нный хра́мъ ст҃а́гѡ дх҃а.
Ра́дꙋйсѧ, но́вый ѡ҆́бразе бж҃їй: ра́дꙋйсѧ, подо́бїе хрⷭ҇то́во.
Ра́дꙋйсѧ, дража́йшїй кораблю̀, вносѧ́й въ приста́нище неисчє́тна сокрѡ́вища дꙋхѡ́внаѧ: ра́дꙋйсѧ, кꙋпе́цъ, прїꙋмно́живый вда̑нныѧ тѝ ѿ бг҃а тала́нты.
Ра́дꙋйсѧ, вѣ́рный приста́вниче до́мꙋ бж҃їѧ.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ а҃і
Пѣ́нїе гдⷭ҇еви соверши́вшымъ ᲂу҆ченикѡ́мъ твои̑мъ, въ пра́здникъ бг҃олѣ́пнагѡ преѡбраже́нїѧ хрⷭ҇то́ва предложи́лъ є҆сѝ во сла́вꙋ бж҃їю ве́лїе и҆ чꙋ́дно ᲂу҆чрежде́нїе на трапе́зѣ, ꙗ҆́коже и҆ гдⷭ҇ь сотворѝ: повелѣ́лъ бо є҆сѝ рыбарє́мъ, ѡ҆бно́щь всꙋ́е трꙋжда́вшымсѧ ѡ҆ лови́твѣ ры́бъ, па́ки воврещѝ мре́жꙋ во є҆́зеро, и҆ ꙗ҆́коже предре́клъ є҆сѝ и҆̀мъ, и҆звлеко́ша мно́жество вели́кихъ и҆ разли́чныхъ ры́бъ, ꙗ҆́кѡ всѣ̑мъ диви́тисѧ, и҆ ди́вномꙋ во ст҃ы́хъ бг҃ꙋ воспѣ́ти: А҆ллилꙋ́їа.
І҆́косъ а҃і
Свѣтоза́рнꙋю жи́знь скончава́ѧ, (седми́десѧти девѧтѝ лѣ́тъ) ста́рецъ сы́й, ꙗ҆́кѡ ѻ҆те́цъ чадолюби́въ, всѧ̑ смотри́тельнѣ ᲂу҆стро́илъ є҆сѝ во ѡ҆би́тели твое́й. ᲂу҆ченикѝ твоѧ̑, ѡ҆ ско́рѣмъ преставле́нїи твое́мъ скорбѧ́щыѧ, наста́вилъ и҆ ᲂу҆тѣ́шилъ є҆сѝ: ᲂу҆ста́вы ѻ҆бщежи́тїѧ писа́нїемъ ᲂу҆тверди́лъ є҆сѝ, и҆ вмѣ́стѡ себѐ и҆но́го и҆гꙋ́мена наре́клъ є҆сѝ: са́мъ же во бдѣ́нїи и҆ мл҃твѣ не вкꙋси́лъ є҆сѝ поко́ѧ, до́ндеже гдⷭ҇еви пре́далъ є҆сѝ ст҃ꙋ́ю дꙋ́шꙋ твою̀. ᲂу҆ченицы́ же твоѝ, возвра́щшесѧ и҆з̾ хра́ма и҆ ви́дѣвше тѧ̀ бездыха́нна лежа́ща, рꙋ́цѣ же ꙗ҆́кѡ молѧ́щꙋсѧ при пе́рсѣхъ и҆мꙋ́ща, со слеза́ми возопи́ша:
Ра́дꙋйсѧ, бл҃гі́й на́шъ ѻ҆́ч҃е, зрѧ́й ны́нѣ ѻ҆ц҃а̀ свѣ́тѡвъ: ра́дꙋйсѧ, па́стырю на́шъ до́брый, предстоѧ́й ны́нѣ пастыренача́льникꙋ хрⷭ҇тꙋ̀.
Ра́дꙋйсѧ, пита́телю на́шъ, сла́достьми нбⷭ҇ными насыща́ѧйсѧ: ра́дꙋйсѧ, покрови́телю на́шъ, во кро́вѣхъ нбⷭ҇ныхъ водвори́выйсѧ.
Ра́дꙋйсѧ, предста́телю на́шъ пред̾ бг҃омъ, а҆́гг҃льскаѧ зрѧ́й ᲂу҆тѣшє́нїѧ: ра́дꙋйсѧ, сожи́телю ст҃ы̑мъ нб҃ожи́телємъ.
Ра́дꙋйсѧ, граждани́не го́рнѧгѡ і҆ерⷭ҇ли́ма: ра́дꙋйсѧ, сщ҃е́ннаѧ главо̀, вѣнча́ннаѧ ѿ цр҃ѧ̀ сла́вы.
Ра́дꙋйсѧ, зри́телю трїѷпоста́снагѡ свѣ́та: ра́дꙋйсѧ, вѣ́дче бжⷭ҇твенныхъ та̑инъ.
Ра́дꙋйсѧ, на ло́нѣ любвѐ бж҃їѧ ᲂу҆поко́ивыйсѧ: ра́дꙋйсѧ, ра́достей ра́ди нбⷭ҇ныхъ, всѧ́кꙋ болѣ́знь и҆ печа́ль коне́чнѣ забы́вый.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ в҃і
Блгⷣти сосꙋ́дъ чтⷭ҇но́е тѣ́ло твоѐ, не дерзнꙋ́ша ᲂу҆ченицы̀ твоѝ, по глаго́лꙋ твоемꙋ̀, и҆зврещѝ въ де́брь на растерза́нїе ѕвѣрє́мъ, и҆лѝ ѡ҆бѣ́сити на стѣнѣ̀ въ снѣ́дь пти́цамъ и҆лѝ потопи́ти во є҆́зерѣ: но пра́веднѡ разори́ша завѣща́нїе твоѐ, бл҃гоче́стнѣ поло́жше мо́щи твоѧ̑ во хра́мѣ живонача́льныѧ трⷪ҇цы и҆ гробни́цꙋ твою̀ ᲂу҆краси́вше ст҃ы́ми і҆кѡ́ны, по всѧ́къ ве́черъ ᲂу҆се́рднѡ стека́хꙋсѧ пѣ́ти над̾ не́ю надгрѡ́бнаѧ: А҆ллилꙋ́їа.
І҆́косъ в҃і
Пѣ́ти всѧ̑ чꙋдеса̀ твоѧ̑ не возмо́жемъ, мнѡ́га бо ѕѣлѡ̀ ди̑внаѧ сотвори́лъ є҆сѝ и҆ по сме́рти твое́й. сегѡ̀ ра́ди вѣ́рꙋемъ, ꙗ҆́кѡ ны́нѣ на нб҃сѣ́хъ живе́ши, и҆ приноси̑маѧ тебѣ̀ пѣ̑нїѧ ми́лостивнѡ прїе́млеши, и҆ па́че дерза́емъ глаго́лати:
Ра́дꙋйсѧ, бж҃е́ственный врачꙋ̀, всѧ́кꙋ болѣ́знь и҆ всѧ́кꙋ ꙗ҆́зю ско́рѡ и҆сцѣлѧ́ѧй: ра́дꙋйсѧ, разсла́блєнныѧ возставлѧ́ѧй.
Ра́дꙋйсѧ, и҆ малодꙋ̑шныѧ ᲂу҆твержда́ѧй: ра́дꙋйсѧ, слѣпы̑ѧ ви́дѣти творѧ́й.
Ра́дꙋйсѧ, и҆ помрачє́нныѧ ᲂу҆мы̀, смы́слєнны дѣ́ѧй: ра́дꙋйсѧ, и҆ невѣ́рꙋющыѧ вѣ́ровати наꙋча́ѧй.
Ра́дꙋйсѧ, ᲂу҆пова́ющыѧ спаса́ѧй: ра́дꙋйсѧ, и҆з̾ грѣхо́вныѧ бє́здны и҆з̾е́млѧй.
Ра́дꙋйсѧ, ѿ наси́лїѧ де́монскагѡ свобожда́ѧй: ра́дꙋйсѧ, къ самоꙋбі́йствꙋ текꙋ́щыѧ воспѧща́ѧй.
Ра́дꙋйсѧ, па́че наде́жды по́мощь подава́ѧй: ра́дꙋйсѧ, и҆ не зва́вшымъ тѧ̀, ꙗ҆́кѡ зва́нъ, бл҃говре́меннѣ помога́ѧй.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ г҃і
Ѽ преди́вный чꙋдотво́рче и҆ вели́кїй ᲂу҆го́дниче хрⷭ҇то́въ, прпⷣбне ѻ҆́ч҃е а҆нтѡ́нїе, предстоѧ́й ны́нѣ прⷭ҇то́лꙋ прест҃ы́ѧ трⷪ҇цы, прїимѝ ѿ на́съ грѣ́шныхъ приноси̑маѧ тѝ хвалє́бнаѧ пѣ̑нїѧ и҆ мл҃твами твои́ми и҆спросѝ на́мъ ᲂу҆ гдⷭ҇а ѿпꙋще́нїе грѣхѡ́въ, и҆збавле́нїе ѿ бѣ́дъ вре́менныхъ и҆ сп҃се́нїе ѿ мꙋ́къ вѣ́чныхъ, да съ тобо́ю вы́нꙋ трїѷпоста́сномꙋ бг҃ꙋ воспѣва́емъ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡвъ ревни́тель ѿ ю҆́ности показа́лсѧ є҆сѝ, прпⷣбне: рожде́йсѧ во ᲂу҆бо́зѣй ве́си, ꙗ҆́кѡ граждани́нъ нбⷭ҇нагѡ і҆ерⷭ҇ли́ма ходи́лъ є҆сѝ: про́стъ сы́й земледѣ́лецъ, первозва́нномꙋ а҆пⷭ҇лѡвъ тезоимени́тъ и҆ подража́тель бы́лъ є҆сѝ: хрⷭ҇тꙋ̀ послѣ́дꙋѧ, мнѡ́ги ᲂу҆ченики̑ собра́лъ є҆сѝ. сегѡ̀ ра́ди зове́мъ тѝ:
Ра́дꙋйсѧ, рожде́нїемъ ра́дость, ꙗ҆́кѡ пе́рвенецъ, роди́телємъ пода́вый: ра́дꙋйсѧ, и҆ на нб҃сѣ́хъ бл҃гослове́нїе перворо́дныхъ наслѣ́дивый.
Ра́дꙋйсѧ, ю҆́ности бꙋ́есть и҆з̾дѣ́тска ѿложи́вый: ра́дꙋйсѧ, слове́сное млеко̀ бжⷭ҇твенныхъ писа́нїй, па́че ма́тернѧ, вожделѣ́вый.
Ра́дꙋйсѧ, въ дꙋшеполе́зныхъ ᲂу҆че́нїихъ све́рстники своѧ̑ превозше́дый: ра́дꙋйсѧ, бл҃гоче́стїемъ и҆ ра́зꙋмомъ наста́вники ᲂу҆диви́вый.
Ра́дꙋйсѧ, ꙗ҆́кѡ и҆з̾мла́да сказа̑нїѧ ѡ҆ ст҃ы́хъ и҆ жи́тельство и҆́хъ возлюби́лъ є҆сѝ: ра́дꙋйсѧ, ꙗ҆́кѡ ра́нѡ ᲂу҆разꙋмѣ́лъ и҆ презрѣ́лъ є҆сѝ сꙋетꙋ̀ бла̑гъ вре́менныхъ.
Ра́дꙋйсѧ, ꙗ҆́кѡ до́мъ бж҃їй па́че ѻ҆́тча и҆збра́лъ є҆сѝ: ра́дꙋйсѧ, ꙗ҆́кѡ и҆з̾дѣ́тска навы́клъ є҆сѝ пѣсносло́вити гдⷭ҇а.
Ра́дꙋйсѧ, ꙗ҆́кѡ ѡ҆́бразъ созда́телѧ на дска́хъ живописꙋ́ѧ, ꙗ҆снѣ́йшее подо́бїе є҆гѡ̀ на скрижа́лѣхъ се́рдца твоегѡ̀ воѡбрази́лъ є҆сѝ: ра́дꙋйсѧ, ꙗ҆́кѡ ѿ ю҆́ности въ се́рдцы твое́мъ къ нбⷭ҇нымъ восхождє́нїѧ положи́лъ є҆сѝ.
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Конда́къ а҃
И҆збра́ннаго вождѧ̀ и҆́нокѡвъ, и҆зрѧ́днаго ᲂу҆чи́телѧ подви́жникѡвъ, добродѣ́тельми ꙗ҆́кѡ цвѣ̑ты ᲂу҆краси́вшасѧ, чꙋдесы́ же, ꙗ҆́кѡ лꙋча́ми со́лнечными, сїѧ́юща, восхвалѧ́емъ тѧ̀ съ любо́вїю, прпⷣбне. ты́ же, предстоѧ̀ прⷭ҇то́лꙋ прест҃ы́ѧ трⷪ҇цы, и҆спросѝ на́мъ ѡ҆ставле́нїе грѣхѡ́въ и҆ и҆збавле́нїе ѿ всѣ́хъ бѣ́дъ и҆ ѕѡ́лъ: да житїѐ небла́зненнѡ и҆ безмѧте́жнѡ текꙋ́ще, благода́рнѣ зове́мъ тѝ:
Ра́дꙋйсѧ, прпⷣбне ѻ҆́ч҃е на́шъ а҆нтѡ́нїе.
Моли́твы
Ѽ преди́вный чꙋдотво́рче и҆ вели́кїй ᲂу҆го́дниче бж҃їй, прпⷣбне ѻ҆́ч҃е а҆нтѡ́нїе, па́стырю на́шъ до́брый, те́плый застꙋ́пниче и҆ ско́рый помо́щниче! предстоѧ́й прⷭ҇то́лꙋ прест҃ы́ѧ трⷪ҇цы, при́зри ми́лостивымъ ѻ҆́комъ на ны̀ и҆ на всѧ̑ лю́ди, бл҃гоговѣ́йнѣ притека́ющыѧ къ честно́мꙋ гро́бꙋ твоемꙋ̀, въ не́мже лежа́щыѧ ст҃ы̑ѧ мо́щи твоѧ̑, ѿ дні́й дре́внихъ нетлѣ́нїемъ цвѣтꙋ́щыѧ и҆ блгⷣтїю животворѧ́щагѡ прест҃а́гѡ дх҃а бл҃гоꙋха́ющыѧ, и҆сцѣлє́нїѧ ѿ всѧ́кихъ недꙋ́гѡвъ дꙋше́вныхъ и҆ тѣле́сныхъ неѡскꙋ́днѡ и҆сточа́ютъ. ᲂу҆слы́ши на́съ молѧ́щихсѧ тебѣ̀ и҆ чтꙋ́щихъ ст҃ꙋ́ю па́мѧть твою̀. прострѝ рꙋ́цѣ твоѝ ко влⷣцѣ нб҃сѐ и҆ землѝ, стра́ждꙋщꙋю странꙋ̀ рѡссі́йскꙋю ѿ лю́тыхъ безбѡ́жникъ и҆ вла́сти и҆́хъ да свободи́тъ, и҆ да возста́витъ престо́лъ правосла́вныхъ царе́й: вѣ́рныхъ рабѡ́въ є҆гѡ̀, въ ско́рби и҆ печа́ли де́нь и҆ но́щь вопїю́щихъ къ немꙋ̀, многоболѣ́зный во́пль да ᲂу҆слы́шитъ и҆ да и҆зведе́тъ ѿ поги́бели живо́тъ на́шъ, и҆ и҆спросѝ на́мъ ѡ҆ставле́нїе прегрѣше́нїй на́шихъ. молѝ млⷭ҇тивагѡ бг҃а ѿврати́ти ѿ на́съ всѧ́кїй гнѣ́въ є҆гѡ̀, првⷣнѡ на ны̀ дви́жимый и҆ сохрани́ти не то́чїю ѡ҆би́тель на́шꙋ, но и҆ всѧ̑ гра́ды и҆ вє́си, и҆ всѧ̑ страны̑ хрⷭ҇тїа́нскїѧ, и҆ лю́ди живꙋ́щыѧ въ ни́хъ ѿ гра́да и҆ гла́да, ѿ трꙋ́са и҆ пото́па, ѿ ѻ҆гнѧ̀ и҆ меча̀, ѿ наше́ствїѧ и҆ноплеме́нныхъ и҆ междоꙋсо́бныѧ бра́ни, ѿ смертоно́сныѧ ꙗ҆́звы и҆ всѧ́кїѧ па́гꙋбы и҆ всѧ́кагѡ ѕла̀, дарова́ти же на́мъ всѧ̑ къ жи́зни вре́меннѣй бл҃гопотрє́бнаѧ и҆ къ вѣ́чномꙋ спасе́нїю полє́знаѧ. помозѝ на́мъ, свѧ́тче бж҃їй, и҆збѣжа́ти па́гꙋбныхъ сѣте́й дїа́волихъ, препобѣди́ти собла́зны мі́ра и҆ ᲂу҆мертви́ти ᲂу҆́ды на́шѧ сꙋ́щыѧ на землѝ: ѿвратѝ ѻ҆́чи на́ши ѿ сꙋ́етныхъ и҆ преле́стныхъ веще́й земны́хъ, напра́ви же ᲂу҆мы̀ и҆ мы̑сли на́шѧ къ зрѣ́нїю красо́тъ бж҃е́ственныхъ, пренбⷭ҇ныхъ и҆ нетлѣ́нныхъ: сердца̀ на̑ша, недꙋ̑гꙋющаѧ страстьмѝ грѣхо́вными, и҆сцѣлѝ, да не прильпнꙋ́тъ сласте́мъ привре́мєннымъ, и҆ безмѣ̑стнымъ: согрѣ́й же ѧ҆̀ бж҃е́ственною любо́вїю, да вожделѣ́ютъ и҆́стиннагѡ и҆ непреходѧ́щагѡ бл҃же́нства, є҆́же въ бз҃ѣ. ᲂу҆крѣпѝ на́съ ко и҆сполне́нїю за́повѣдей гдⷭ҇нихъ, да́ждь на́мъ покаѧ́нїе серде́чное и҆ ᲂу҆миле́нїе сле́зное, мл҃твꙋ непреста́ннꙋю и҆ трꙋдолю́бїе неѡсла́бное, бо́дренное трезве́нїе ᲂу҆ма̀ и҆ хране́нїе се́рдца, ми́ръ по́мыслѡвъ, чистотꙋ̀ жела́нїй, правотꙋ̀ дѣѧ́нїй, да и҆зба́вльшесѧ тобо́ю ѿ всѣ́хъ вра̑гъ ви́димыхъ и҆ неви́димыхъ, ѿ всѧ́кихъ ѕѡ́лъ дꙋше́вныхъ и҆ тѣле́сныхъ, и҆ соблю́дше вѣ́рꙋ пра́вꙋю, наде́ждꙋ неѿло́жнꙋю и҆ любо́вь нелицемѣ́рнꙋю, бг҃оꙋго́днѣ сконча́емъ житїѐ на́ше на землѝ, и҆ преше́дше въ жи́знь вѣ́чнꙋю, сподо́бимсѧ зрѣ́ти трисвѣ́тлꙋю зарю̀ трисїѧ́ющагѡ вѣ́чнагѡ сл҃нца, и҆ въ невече́рнѣмъ днѝ нбⷭ҇нагѡ црⷭ҇твїѧ, кꙋ́пнѡ съ тобо́ю и҆ со всѣ́ми ст҃ы́ми, бл҃года́рнѣ воспѣва́ти и҆ бл҃гословлѧ́ти прест҃ꙋ́ю трⷪ҇цꙋ, ѻ҆ц҃а̀, и҆ сн҃а, и҆ ст҃а́го дх҃а, во вѣ́ки вѣкѡ́въ. А҆ми́нь.
Ѽ бг҃облаже́нне и҆ приснопа́мѧтне ѻ҆́ч҃е на́шъ а҆нтѡ́нїе! не мни́мъ тѧ̀ ме́ртва сꙋ́ща, а҆́ще тѣ́ломъ и҆ преста́вилсѧ є҆сѝ ѿ на́съ, но жи́въ въ собо́рѣ а҆́гг҃лѡвъ водворѧ́ешисѧ. молѝ за ны̀, и҆збра́нниче хрⷭ҇то́въ, и҆ не пре́зри на́съ вѣ́рою и҆ любо́вїю чтꙋ́щихъ тѧ̀, помина́й на́съ недосто́йныхъ ᲂу҆ прⷭ҇то́ла цр҃ѧ̀ нбⷭ҇нагѡ, тебѣ̀ бо даде́сѧ блгⷣть моли́тисѧ за ны̀. ѽ, застꙋ́пниче и҆ мл҃твенниче на́шъ до́брый! се́ бо ст҃ы́хъ моще́й твои́хъ ра́ка пред̾ ѻ҆чи́ма на́шима ви́дима є҆́сть, сохранѧ́й ᲂу҆̀бо на́съ всегда̀ ѿ сѣте́й вра́жїихъ: моли́сѧ ко гдⷭ҇ꙋ ѡ҆ сп҃се́нїи дꙋ́шъ на́шихъ, и҆ и҆спросѝ на́мъ покаѧ́нїѧ вре́мѧ и҆ хрⷭ҇тїа́нскꙋю кончи́нꙋ безболѣ́зненнꙋ, непосты́днꙋ, ми́рнꙋ, да невозбра́ннѡ пре́йдемъ мыта̑рства воздꙋ́шныхъ кнѧзе́й и҆ сподо́бимсѧ нбⷭ҇нагѡ црⷭ҇твїѧ со всѣ́ми ᲂу҆годи́вшими влⷣцѣ нб҃а и҆ землѝ, гдⷭ҇ꙋ на́шемꙋ і҆и҃сꙋ хрⷭ҇тꙋ̀, є҆мꙋ́же подоба́етъ всѧ́каѧ сла́ва, че́сть и҆ поклоне́нїе всегда̀, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.