Кондак 1
Избра́нный уго́дниче Христо́в, преподо́бне сто́лпниче и пресла́вный чудотво́рче, возсия́вый ми́рови, я́ко звезда́ многосве́тлая, по́двиги и чудесы́ свои́ми, восхваля́ем тя́ любо́вию, о́тче Дании́ле. Ты́ же, я́ко име́яй дерзнове́ние ко Го́споду, моли́твами твои́ми от бе́д и ско́рбных обстоя́ний свободи́ на́с, да благода́рственно, со умиле́нием, зове́м тебе́:
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Икос 1
А́нгельскому житию́ от ю́ности твоея́ поревнова́в, преподо́бне, восприя́л еси́ труды́ и по́двиги и́ночества, в ни́х же до кончи́ны са́мыя пребы́в, Бо́гу угоди́л еси́ и сла́вы небе́сныя сподо́бился еси́. Сего́ ра́ди похва́льная воспису́ем тебе́, вопию́ще такова́я:
Ра́дуйся, Дании́ле, моли́твами ма́тери твоея́ испро́шенный; ра́дуйся, непло́дою рожде́нный.
Ра́дуйся, проро́ческим и́менем нарече́нный; ра́дуйся, роди́тели твои́ми на служе́ние Бо́гу обрече́нный.
Ра́дуйся, от ю́ности чистоту́ жития́ возлюби́вый; ра́дуйся, в о́трочестве ду́ху пло́ть свою́ покори́вый.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 2
Ви́девши тебе́ отроча́ мла́до, в оби́тель и́ноков прише́дшаго, ста́рцы и бра́тия отрица́хуся постриже́ния сподо́бити, глаго́люще, я́ко мла́дость ю́ности не мо́жет трудо́в и́ночества понести́. Ты́ же, отвеща́в, рече́: мне́ е́же жи́ти Христо́с и е́же умре́ти приобре́тение. Сего́ ра́ди вопие́м о тебе́ Бо́гу: Аллилу́иа.
Икос 2
Разуме́я Бо́жие в изволе́нии твое́м зва́ние рабо́тати Го́сподеви и слы́ша к тому́ моле́ние отца́ твоего́ и ма́тери твоея́, да пред очи́ма и́х постри́жен бу́деши, преподо́бнии отцы́ а́нгельскаго о́браза сподо́биша тебе́, Дании́ле. Мы́ же, сла́вяще таково́е постоя́нство твое́, взыва́ем тебе́ такова́я:
Ра́дуйся, Бо́гом избра́нный; ра́дуйся, Го́сподом призва́нный.
Ра́дуйся, хра́м Свято́му Ду́ху предугото́ванный; ра́дуйся, олта́рь на священнослуже́ние Го́споду освяще́нный.
Ра́дуйся, пло́ть свою́ со страстьми́ от ю́ности распина́вый; ра́дуйся, ве́лия по́двиги благоче́стия в и́ночестве показа́вый.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 3
Си́лою Вы́шняго осеня́емый, растя́ще и крепля́шеся ду́хом, блаже́нне Дании́ле, и преизя́щнаго жития́ нача́ток уготовля́я, воспева́л еси́ уста́ми и ду́хом Бо́гу: Аллилу́иа.
Икос 3
Име́юще зе́льное жела́ние поклони́тися святы́м место́м, ше́л еси́, блаже́нне Дании́ле, от Месопота́мии в святы́й гра́д Иерусали́м и ины́я гра́ды и ве́си святы́я земли́ и та́мо поклони́ся Христу́ Бо́гу на́шему. Такову́ю ре́вность прославля́юще, прино́сим тебе́ зва́ния сицева́я:
Ра́дуйся, Дании́ле, я́ко все́м се́рдцем Бо́га возлюби́л еси́; ра́дуйся, я́ко от си́лы в си́лу восходи́л еси́.
Ра́дуйся, оста́вивый до́льная; ра́дуйся, взыска́вый го́рняя.
Ра́дуйся, я́ко свети́льник Ду́ха Бо́жия показа́лся еси́ не угаса́ющий; ра́дуйся, я́ко да́р Бо́жий яви́л еси́ в себе́ возгрева́ющий.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 4
Бу́рю страсте́й, одержа́щих ми́р, жезло́м воздержа́ния, о́тче Дании́ле, в себе́ укроти́в, на го́ру безстра́стия вседу́шно устреми́лся еси́, да Бо́гу и А́нгелом чистото́ю ума́ безмяте́жно бесе́дуеши, вопия́: Аллилу́иа.
Икос 4
Слы́шавши, я́ко е́сть в Антиохи́и на столпе́ подвиза́ющийся блаже́нный Симео́н дивного́рец, возбуди́лся еси́, о́тче, к подража́нию подвиго́м того́. Та́ же созда́в сто́лп, взы́де на него́ и нача́ жи́ти Бо́гу между́ не́бом и земле́ю, сея́ устраня́яся, к тому́ приближа́яся. Си́х ра́ди быва́емых, зове́м к тебе́ такова́я:
Ра́дуйся, преподо́бне Дании́ле, в пла́мени благоче́стия неохлади́мый; ра́дуйся, в труде́х и по́двизех неутоми́мый.
Ра́дуйся, путе́м к небеси́ сто́лп избра́вый; ра́дуйся, на столпе́, я́ко на кресте́, пло́ть свою́ со страстьми́ распя́вый.
Ра́дуйся, житие́м свята́го Дивного́рца плене́нный; ра́дуйся, ре́вностию к подвиго́м сто́лпничества распале́нный.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 5
Звезда́ многосве́тлая, блаже́нне, на столпе́ яви́лся ми́ру, тьму́ пре́лести отгна́л еси́. Те́мже мо́лим тя́: и ны́не облиста́й в сердца́х на́ших незаходя́щий све́т ра́зума, да вопие́м о тебе́ Бо́гу: Аллилу́иа.
Икос 5
Ви́девше лю́дие, преподо́бне, на столпе́ возвы́шена тебе́ и сия́нием чуде́с все́х озаря́ющаго с ве́рою притека́ющих, се́рдцем и усты́ любо́вию взыва́ху к тебе́ си́це:
Ра́дуйся, о́тче, на столпе́ себе́ утверди́вый; Ра́дуйся, вся́цей жесто́кости жития́ сто́лпнаго себе́ покори́вый.
Ра́дуйся, в ле́те зно́й со́лнечный претерпе́вый; Ра́дуйся, в зиме́ мра́з лю́тый презре́вый.
Ра́дуйся, я́ко дожде́м и ве́трами пребы́л еси́ обурева́емый; Ра́дуйся, я́ко и де́моны бы́л еси́ искуша́емый.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 6
Пропове́дует ми́р ве́сь тебе́, преподо́бне Дании́ле, де́монов прогони́теля, боле́зней исцели́теля и ины́х мно́гих чуде́с соверши́теля. Мы́ же, Бо́га о тебе́ прославля́юще, вопие́м Ему́: Аллилу́иа.
Икос 6
Возсия́л еси́ ми́рови све́том пречу́дных твои́х по́двигов, преподо́бне Дании́ле. И, на столпе́ возвы́шен бы́в, из гони́теля твоего́ соде́лал еси́ благоде́теля, и́же сто́лп согради́ тебе́ вторы́й и сла́ву и́мени и по́двигов твои́х преумно́жи,– во спасе́ние с ве́рою приходя́щих к тебе́ и по́мощи твое́й прося́щих. Сего́ ра́ди вопие́м тебе́ сицева́я:
Ра́дуйся, бра́ни возста́вших проти́ву тебе́ победи́телю; ра́дуйся, злы́х по́мыслов искорени́телю.
Ра́дуйся, до́брых пожела́ний насади́телю; ра́дуйся, та́йных ко́зней обличи́телю.
Ра́дуйся, бесо́в прогони́телю; ра́дуйся, боля́щих исцели́телю.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 7
Хотя́ше му́ж не́кий прему́др и слове́сен о пода́нии дще́ри его́ здра́вия и спасе́ния руко́ю и моли́твами твои́ми, преподо́бне, благода́рственная принести́, написа́ на столпе́ твое́м стихи́ сицевы́я: «зде́ стои́т му́ж, стихи́ями неуязви́мый; пи́щу имы́й безсме́ртную, а не земну́ю, его́же жили́ще столпы́ двоезра́чны, сла́вящий Сы́на Ма́тере неискусобра́чны». Мы́ же сла́вим Бо́га, прославля́ющаго святы́я Своя́, и хвале́бную пе́снь пое́м Ему́: Аллилу́иа.
Икос 7
Но́вый И́ов яви́лся еси́ ми́ру, досточу́дне Дании́ле, мно́жеством обдержи́м бы́в скорбе́й и искуше́ний; но Дави́дову кро́тость, Иа́ковле беззло́бие и целому́дрие Ио́сифово, па́че же терпе́ние И́овле стяжа́в, вся́ победи́л еси́. Сего́ ра́ди вопие́м тебе́ сицева́я:
Ра́дуйся, преподо́бне Дании́ле, сосу́де благода́ти избра́нный; ра́дуйся, чудотво́рче изря́дный.
Ра́дуйся, ми́лости Бо́жией стяжа́телю; ра́дуйся, к Бо́гу бли́жний предста́телю.
Ра́дуйся, лучеза́рный свети́льниче; ра́дуйся, Бо́гом венча́нный подви́жниче.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 8
Стра́нными чудесы́ прославля́яся, преподо́бне о́тче Дании́ле, утверди́л еси́ ве́ру и упова́ние в лю́дех, я́ко мно́го мо́жет моли́тва пра́веднаго. Мы́ же, ве́руя, я́ко а́ще по Бо́зе упова́ние на тя́ возложи́м, та́кожде прии́мем моли́твами твои́ми проси́мое, пое́м Бо́гу о тебе́: Аллилу́иа.
Икос 8
Во вся́ ору́жия Бо́жия облеки́йся, преподо́бне о́тче Дании́ле, возмо́гл еси́ ста́ти проти́ву все́м ко́знем диа́вольским, на столпе́ тре́тием, и превысоча́йшем, благода́рственне тебе́ созда́нном, подвиза́лся еси́. И на́с, преподо́бне, грехми́ обурева́емых, предста́тельствы твои́ми свободи́, да зове́м тебе́ си́це:
Ра́дуйся, хода́таю все́м спасе́ния; ра́дуйся, приводя́й гре́шных ко исправле́нию.
Ра́дуйся, скорбя́щим подая́й утеше́ние; ра́дуйся, злы́х приводя́й к постыжде́нию.
Ра́дуйся, духо́в искуси́телей прогони́телю; ра́дуйся, покая́ния насади́телю.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 9
Вся́кия ско́рби, боле́зни, искуше́ния, на столпе́ подвиза́яся, преподо́бне о́тче Дании́ле, претерпе́л еси́. И все́м си́м, быва́емым тебе́, по́мощию Бо́жиею, победи́тель яви́лся еси́. Сего́ ра́ди вопие́м о тебе́ Бо́гу: Аллилу́иа.
Икос 9
Вети́и многовеща́ннии не довле́ют изглаго́лати по́двиги твоя́ и промышле́ние о тебе́ Бо́жие, преподо́бне о́тче Дании́ле, я́ко к разли́чным чудесе́м и проро́ческаго да́ра не лиши́ся и благода́ти свяще́нства сподо́бися. Мы́ же, любо́вию побежда́еми, дерза́ем смиренному́дренно зва́ти тебе́ такова́я:
Ра́дуйся, ве́рный ра́бе Влады́ки всеблага́го; ра́дуйся, хра́ме Ду́ха Всесвята́го.
Ра́дуйся, свяще́нниче, Бо́гом избра́нный; ра́дуйся, благода́ти цве́т благоуха́нный.
Ра́дуйся, моли́твы фимиа́м благово́нный; ра́дуйся, орга́н псалмопе́ния сладкостро́йный.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 10
Спасти́ хотя́ вся́ бли́жния и да́льния столпа́ твоего́, блаже́нне Дании́ле, Госпо́дь смотре́нием Свои́м привожда́ше к тебе́ мно́гия лю́ди, моли́твы, благослове́ния, освяще́ния и наставле́ния прося́щия у тебе́. И си́х зря́ще лю́дие, седя́щия во тьме́ заблужде́ния, к све́ту и́стины обраща́хуся. Мы́ же, сла́вяще Спа́са все́х, прише́дшаго в ми́р гре́шных спасти́, пое́м о тебе́ Бо́гу: Аллилу́иа.
Икос 10
Стена́ еси́ все́м, преподо́бне о́тче Дании́ле, с ве́рою и упова́нием к заступле́нию твоему́ прибега́ющим. Те́мже и на́м, в ско́рбех, боле́знех и искуше́ниих с наде́янием к тебе́ приходя́щим, по́мощь твою́ и заступле́ние милосе́рдне яви́, да любо́вию вопие́м тебе́ такова́я:
Ра́дуйся, приста́нище обурева́емым; ра́дуйся, заступле́ние озлобля́емых.
Ра́дуйся, печа́льным утеше́ние; ра́дуйся, немощны́м укрепле́ние.
Ра́дуйся, уныва́ющим ободре́ние; ра́дуйся, моле́ний ско́рое исполне́ние.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 11
Пе́ние всеумиле́нное и благода́рственное Го́споду Бо́гу прино́сим, я́ко и́мамы тебе́, преподо́бне о́тче Дании́ле, моле́бника о на́с гре́шных и святы́ми моли́твами твои́ми спаса́емся. Сего́ ра́ди, пред свято́ю ико́ною твое́ю усе́рдно припа́дающе и покрови́телем на́шим тебе́ почита́юще, всеблагогове́йно вопие́м о тебе́ Бо́гу: Аллилу́иа.
Икос 11
Светоза́рную свещу́ благода́ти Боже́ственныя зри́м тебе́, преподо́бне о́тче Дании́ле, просвеща́емии благове́стием о пресла́вном житии́ твое́м. Твои́ми бо моли́твами от неду́г свои́х мно́зи свобожда́хуся. К си́м же во уста́х твои́х обре́теся благода́ть Бо́жия, спаси́тельная челове́ком, я́ко от слове́с твои́х умили́тися послу́шающим тебе́ и житие́ свое́ исправля́ти. Сего́ ра́ди зове́м тебе́ такова́я:
Ра́дуйся, преподо́бне о́тче Дании́ле, ве́ры утвержде́ние; ра́дуйся, це́ркве Христо́вы украше́ние.
Ра́дуйся, ра́зума духо́внаго сокро́вище; ра́дуйся, спасе́ния изря́дный наста́вниче.
Ра́дуйся, звездо́, на тве́рди церко́вней блиста́ющая; ра́дуйся, цевни́це боже́ственная, словесы́ и де́лы все́х утеша́ющая.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 12
Благода́ть Боже́ственную, ми́лующую на́с, в тебе́, преподо́бне о́тче Дании́ле, зря́ще, я́ко и немы́й от рожде́ния проглаго́лати возмо́же, и хромы́й от рожде́ния исцели́ся, ра́дуемся и хва́лим Бо́га и тебе́, ско́раго моли́твенника и помо́щника, вопию́ще к Бо́гу: Аллилу́иа.
Икос 12
Пою́ще по́двиги твоя́, преподо́бне о́тче Дании́ле, ублажа́ем равноа́нгельное житие́ твое́, почита́ем сконча́ние жи́тельства твоего́, на не́же снидо́шася не то́кмо священнонача́льницы и кли́р це́ркве земны́я, но и це́ркве перворо́дных, на небесе́х напи́санных. Ты́ же, ра́дуяся, преда́л еси́ чи́стую и святу́ю ду́шу твою́ в ру́це Бо́жия. Бо́г же просла́ви тебе́ по успе́нии твое́м чудеси́ мно́гими. Приими́ у́бо, всеблаже́нне о́тче Дании́ле, и от на́с приноси́мая тебе́ ублаже́ния сицева́я:
Ра́дуйся, обита́телю це́ркве торжеству́ющих; ра́дуйся, с А́нгелами ликовству́ющий.
Ра́дуйся, ра́дости ве́чныя преисполня́емый; ра́дуйся, с проро́ками велича́емый.
Ра́дуйся, с апо́столами прославля́емый; ра́дуйся, с святи́тели благословля́емый.
Ра́дуйся, с му́ченики венча́емый; ра́дуйся, с преподо́бными ублажа́емый.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 13
О пречу́дный и пресла́вный уго́дниче Бо́жий, преподо́бне и богоно́сне о́тче Дании́ле, те́лом на земли́ почива́ющий, душе́ю на небеси́ обита́ющий, ду́хом же от при́сных тебе́ не отлуча́ющийся, приими́ моле́ния на́ша. При́зри ми́лостиво с высоты́ небе́сныя сла́вы твоея́ на на́с, в умиле́нии моле́бно предстоя́щих пред свято́ю твое́ю ико́ною, и умоли́ Влады́ку Спа́са все́х спасти́ся душа́м на́шим и в се́м и в бу́дущем ве́це се́рдцем и усты́ пе́ти Бо́гу: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгельскому житию́ от ю́ности твоея́ поревнова́в, преподо́бне, восприя́л еси́ труды́ и по́двиги и́ночества, в ни́х же до кончи́ны са́мыя пребы́в, Бо́гу угоди́л еси́ и сла́вы небе́сныя сподо́бился еси́. Сего́ ра́ди похва́льная воспису́ем тебе́, вопию́ще такова́я:
Ра́дуйся, Дании́ле, моли́твами ма́тери твоея́ испро́шенный; ра́дуйся, непло́дою рожде́нный.
Ра́дуйся, проро́ческим и́менем нарече́нный; ра́дуйся, роди́тели твои́ми на служе́ние Бо́гу обрече́нный.
Ра́дуйся, от ю́ности чистоту́ жития́ возлюби́вый; ра́дуйся, в о́трочестве ду́ху пло́ть свою́ покори́вый.
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Кондак 1
Избра́нный уго́дниче Христо́в, преподо́бне сто́лпниче и пресла́вный чудотво́рче, возсия́вый ми́рови, я́ко звезда́ многосве́тлая, по́двиги и чудесы́ свои́ми, восхваля́ем тя́ любо́вию, о́тче Дании́ле. Ты́ же, я́ко име́яй дерзнове́ние ко Го́споду, моли́твами твои́ми от бе́д и ско́рбных обстоя́ний свободи́ на́с, да благода́рственно, со умиле́нием, зове́м тебе́:
Ра́дуйся, преподо́бне о́тче Дании́ле, те́плый о ми́ре к Бо́гу моли́твенниче.
Молитвы
О преподо́бне и богоно́сне о́тче на́ш Дании́ле! ублажа́ем ве́лия по́двиги жития́ твоего́, ско́рби лю́тыя, боле́зни, искуше́ния, и́м же победоно́сец преди́вный показа́лся еси́. Велича́ем дарова́ния благода́ти Госпо́дней, тобо́ю многоче́стне и многообра́зне явле́нныя боля́щим и скорбя́щим, гре́шным и заблу́ждшим во спасе́ние и́х. Помина́ем тебе́ наста́вника прему́драго, и́же глаго́ла лю́дем словеса́ учи́тельная от слова́ Госпо́дня, ду́ши умиля́ющия и умы́ и сердца́ к Бо́гу обраща́ющыя. Мо́лимся тебе́: не забу́ди, о преблаже́нне о́тче, ве́ры на́шея к тебе́ и наде́жды упова́ния на́шего на тебе́, пред свято́ю ико́ною твое́ю при́сно предстоя́щих и те́пле моля́щихся. Сподо́би на́с, у́мно взира́ющих на сконча́ние жи́тельства твоего́, подража́ти ве́ре и любви́ твое́й. Помина́й на́с, недосто́йных, во святы́х твои́х и благоприя́тных моли́твах к Бо́гу, я́ко свяще́нник Бо́жий, предстоя́ Престо́лу Вседержи́телеву. Мо́лим тя́, вели́кий моле́бниче и чудотво́рче святы́й, бу́ди на́м всегда́ уте́шитель, цели́тель, помо́щник и засту́пник, и покрови́тель, и наста́вник ве́рен. Не премолчи́, вопия́ за ны́ ко Го́споду, да с терпе́нием тече́м на предлежа́щий по́двиг спасе́ния ду́ш на́ших, взира́юще на тебе́, святы́й учи́телю на́ш, и благоче́стно и пра́ведно, в едине́нии ду́ха, в единомы́слии ве́ры и любве́ поживе́м в ны́нешнем ве́це: в бу́дущем же да сподо́бимся сла́вити благода́ть и человеколю́бие еди́наго в Тро́ице сла́вимаго Бо́га, Отца́ и Сы́на и Свята́го Ду́ха во ве́ки веко́в. Ами́нь.
Конда́къ а҃
И҆збра́нный ᲂу҆го́дниче хрⷭ҇то́въ, прпⷣбне сто́лпниче и҆ пресла́вный чꙋдотво́рче, возсїѧ́вый мі́рови, ꙗ҆́кѡ ѕвѣзда̀ многосвѣ́тлаѧ, по́двиги и҆ чꙋдесы̀ свои́ми, восхвалѧ́емъ тѧ̀ любо́вїю, ѻ҆́тче данїи́ле. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ бѣ́дъ и҆ ско́рбныхъ ѡ҆бстоѧ́нїй свободѝ на́съ, да бл҃года́рственнѡ, со ᲂу҆миле́нїемъ, зове́мъ тебѣ̀:
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
І҆́косъ а҃
А҆́гг҃льскомꙋ житїю̀ ѿ ю҆́ности твоеѧ̀ поревнова́въ, прпⷣбне, воспрїѧ́лъ є҆сѝ трꙋды̀ и҆ по́двиги и҆́ночества, въ ни́хъ же до кончи́ны са́мыѧ пребы́въ, бг҃ꙋ ᲂу҆годи́лъ є҆сѝ и҆ сла́вы нбⷭ҇ныѧ сподо́билсѧ є҆сѝ. Сегѡ̀ ра́ди похва̑льнаѧ восписꙋ́емъ тебѣ̀, вопїю́ще такова̑ѧ:
Ра́дꙋйсѧ, данїи́ле, мл҃твами ма́тери твоеѧ̀ и҆спро́шенный: ра́дꙋйсѧ, непло́дою рожде́нный.
Ра́дꙋйсѧ, прⷪ҇ро́ческимъ и҆́менемъ нарече́нный: ра́дꙋйсѧ, роди́тели твои́ми на слꙋже́нїе бг҃ꙋ ѡ҆брече́нный.
Ра́дꙋйсѧ, ѿ ю҆́ности чⷭ҇тотꙋ̀ житїѧ̀ возлюби́вый: ра́дꙋйсѧ, въ ѻ҆́трочествѣ дꙋ́хꙋ пло́ть свою̀ покори́вый.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ в҃
Ви́дѣвши тебѣ̀ ѻ҆троча̀ мла́до, въ ѻ҆би́тель и҆́нокѡвъ прише́дшагѡ, ста́рцы и҆ бра́тїѧ ѿрица́хꙋсѧ постриже́нїѧ сподо́бити, глаго́люще, ꙗ҆́кѡ мла́дость ю҆́ности не мо́жетъ трꙋдѡ́въ и҆́ночества понестѝ. Ты́ же, ѿвѣща́въ, речѐ: мнѣ̀ є҆́же жи́ти хрⷭ҇то́съ и҆ є҆́же ᲂу҆мре́ти прїѡбрѣ́тенїе. Сегѡ̀ ра́ди вопїе́мъ ѡ҆ тебѣ̀ бг҃ꙋ: А҆ллилꙋ́їа.
І҆́косъ в҃
Разꙋмѣ́ѧ бж҃їе въ и҆зволе́нїи твое́мъ зва́нїе рабо́тати гдⷭ҇еви и҆ слы́ша къ томꙋ̀ моле́нїе ѻ҆тца̀ твоегѡ̀ и҆ ма́тери твоеѧ̀, да пред̾ ѻ҆чи́ма и҆̀хъ постри́женъ бꙋ́деши, прпⷣбнїи ѻ҆тцы̀ а҆́гг҃льскагѡ ѻ҆́браза сподо́биша тебѣ̀, данїи́ле. Мы́ же, сла́вѧще таково́е постоѧ́нство твоѐ, взыва́емъ тебѣ̀ такова̑ѧ:
Ра́дꙋйсѧ, бг҃омъ и҆збра́нный: ра́дꙋйсѧ, гдⷭ҇омъ призва́нный.
Ра́дꙋйсѧ, хра́мъ ст҃о́мꙋ дх҃ꙋ пред̾ꙋгото́ванный: ра́дꙋйсѧ, ѻ҆лта́рь на сщ҃еннослꙋже́нїе гдⷭ҇ꙋ ѡ҆сщ҃е́нный.
Ра́дꙋйсѧ, пло́ть свою̀ со страстьмѝ ѿ ю҆́ности распина́вый: ра́дꙋйсѧ, ве́лїѧ по́двиги бл҃гоче́стїѧ въ и҆́ночествѣ показа́вый.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ г҃
Си́лою вы́шнѧгѡ ѡ҆сѣнѧ́емый, растѧ́ще и҆ крѣплѧ́шесѧ дꙋ́хомъ, бл҃же́нне данїи́ле, и҆ преизѧ́щнагѡ житїѧ̀ нача́токъ ᲂу҆готовлѧ́ѧ, воспѣва́лъ є҆сѝ ᲂу҆ста́ми и҆ дꙋ́хомъ бг҃ꙋ: А҆ллилꙋ́їа.
І҆́косъ г҃
И҆мѣ́юще ѕѣ́льное жела́нїе поклони́тисѧ ст҃ы́мъ мѣстѡ́мъ, ше́лъ є҆сѝ, бл҃же́нне данїи́ле, ѿ месопота́мїи въ ст҃ы́й гра́дъ і҆ерⷭ҇ли́мъ и҆ и҆ны́ѧ гра́ды и҆ вє́си ст҃ы̑ѧ землѝ и҆ та́мѡ поклони́сѧ хрⷭ҇тꙋ̀ бг҃ꙋ на́шемꙋ. Таковꙋ́ю ре́вность прославлѧ́юще, прино́симъ тебѣ̀ зва́нїѧ сицєва́ѧ:
Ра́дꙋйсѧ, данїи́ле, ꙗ҆́кѡ всѣ́мъ се́рдцемъ бг҃а возлюби́лъ є҆сѝ: ра́дꙋйсѧ, ꙗ҆́кѡ ѿ си́лы въ си́лꙋ восходи́лъ є҆сѝ.
Ра́дꙋйсѧ, ѡ҆ста́вивый дѡ́льнаѧ: ра́дꙋйсѧ, взыска́вый го́рнѧѧ.
Ра́дꙋйсѧ, ꙗ҆́кѡ свѣти́льникъ дх҃а бж҃їѧ показа́лсѧ є҆сѝ не ᲂу҆гаса́ющїй: ра́дꙋйсѧ, ꙗ҆́кѡ да́ръ бж҃їй ꙗ҆ви́лъ є҆сѝ въ себѣ̀ возгрѣва́ющїй.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ д҃
Бꙋ́рю страсте́й, ѡ҆держа́щихъ мі́ръ, жезло́мъ воздержа́нїѧ, ѻ҆́тче данїи́ле, въ себѣ̀ ᲂу҆кроти́въ, на го́рꙋ безстра́стїѧ вседꙋ́шнѡ ᲂу҆стреми́лсѧ є҆сѝ, да бг҃ꙋ и҆ а҆́гг҃лѡмъ чⷭ҇тото́ю ᲂу҆ма̀ безмѧте́жнѡ бесѣ́дꙋеши, вопїѧ̀: А҆ллилꙋ́їа.
І҆́косъ д҃
Слы́шавши, ꙗ҆́кѡ є҆́сть въ а҆нтїохі́и на столпѣ̀ подвиза́ющїйсѧ бл҃же́нный сѷмеѡ́нъ дивного́рецъ, возбꙋди́лсѧ є҆сѝ, ѻ҆́тче, къ подража́нїю подвигѡ́мъ тогѡ̀. Та́ же созда́въ сто́лпъ, взы́де на негѡ̀ и҆ нача̀ жи́ти бг҃ꙋ междꙋ̀ нб҃омъ и҆ земле́ю, сеѧ̀ ᲂу҆странѧ́ѧсѧ, къ томꙋ̀ приближа́ѧсѧ. Си́хъ ра́ди быва́емыхъ, зове́мъ къ тебѣ̀ такова̑ѧ:
Ра́дꙋйсѧ, прпⷣбне данїи́ле, въ пла́мени бл҃гоче́стїѧ неѡхлади́мый: ра́дꙋйсѧ, въ трꙋдѣ́хъ и҆ по́двизѣхъ неꙋтоми́мый.
Ра́дꙋйсѧ, пꙋте́мъ къ нб҃сѝ сто́лпъ и҆збра́вый: ра́дꙋйсѧ, на столпѣ̀, ꙗ҆́кѡ на крⷭ҇тѣ̀, пло́ть свою̀ со страстьмѝ распѧ́вый.
Ра́дꙋйсѧ, житїе́мъ ст҃а́гѡ дивного́рца плѣне́нный: ра́дꙋйсѧ, ре́вностїю къ подвигѡ́мъ сто́лпничества распале́нный.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ є҃
Ѕвѣзда̀ многосвѣ́тлаѧ, бл҃же́нне, на столпѣ̀ ꙗ҆ви́лсѧ мі́рꙋ, тмꙋ̀ пре́лести ѿгна́лъ є҆сѝ. Тѣ́мже мо́лимъ тѧ̀: и҆ ны́нѣ ѡ҆блиста́й въ сердца́хъ на́шихъ незаходѧ́щїй свѣ́тъ ра́зꙋма, да вопїе́мъ ѡ҆ тебѣ̀ бг҃ꙋ: А҆ллилꙋ́їа.
І҆́косъ є҃
Ви́дѣвше лю́дїе, прпⷣбне, на столпѣ̀ возвы́шена тебѣ̀ и҆ сїѧ́нїемъ чꙋде́съ всѣ́хъ ѡ҆зарѧ́ющагѡ съ вѣ́рою притека́ющихъ, се́рдцемъ и҆ ᲂу҆сты̀ любо́вїю взыва́хꙋ къ тебѣ̀ си́це:
Ра́дꙋйсѧ, ѻ҆́тче, на столпѣ̀ себѣ̀ ᲂу҆тверди́вый: ра́дꙋйсѧ, всѧ́цѣй жесто́кости житїѧ̀ сто́лпнагѡ себѣ̀ покори́вый.
Ра́дꙋйсѧ, въ лѣ́тѣ зно́й со́лнечный претерпѣ́вый: ра́дꙋйсѧ, въ зимѣ̀ мра́зъ лю́тый презрѣ́вый.
Ра́дꙋйсѧ, ꙗ҆́кѡ дожде́мъ и҆ вѣ́трами пребы́лъ є҆сѝ ѡ҆бꙋрева́емый: ра́дꙋйсѧ, ꙗ҆́кѡ и҆ де́мѡны бы́лъ є҆сѝ и҆скꙋша́емый.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ ѕ҃
Проповѣ́дꙋетъ мі́ръ ве́сь тебѣ̀, прпⷣбне данїи́ле, де́монѡвъ прогони́телѧ, болѣ́зней и҆сцѣли́телѧ и҆ и҆ны́хъ мно́гихъ чꙋде́съ соверши́телѧ. Мы́ же, бг҃а ѡ҆ тебѣ̀ прославлѧ́юще, вопїе́мъ є҆мꙋ̀: А҆ллилꙋ́їа.
І҆́косъ ѕ҃
Возсїѧ́лъ є҆сѝ мі́рови свѣ́томъ пречꙋ́дныхъ твои́хъ по́двигѡвъ, прпⷣбне данїи́ле. И҆, на столпѣ̀ возвы́шенъ бы́въ, и҆з̾ гони́телѧ твоегѡ̀ содѣ́лалъ є҆сѝ бл҃годѣ́телѧ, и҆́же сто́лпъ соградѝ тебѣ̀ вторы́й и҆ сла́вꙋ и҆́мени и҆ по́двигѡвъ твои́хъ преꙋмно́жи, во сп҃се́нїе съ вѣ́рою приходѧ́щихъ къ тебѣ̀ и҆ по́мощи твое́й просѧ́щихъ. Сегѡ̀ ра́ди вопїе́мъ тебѣ̀ сицева̑ѧ:
Ра́дꙋйсѧ, бра́ни возста́вшихъ проти́вꙋ тебє̀ побѣди́телю: ра́дꙋйсѧ, ѕлы́хъ по́мыслѡвъ и҆скорени́телю.
Ра́дꙋйсѧ, до́брыхъ пожела́нїй насади́телю: ра́дꙋйсѧ, та́йныхъ ко́зней ѡ҆бличи́телю.
Ра́дꙋйсѧ, бѣсѡ́въ прогони́телю: ра́дꙋйсѧ, болѧ́щихъ и҆сцѣли́телю.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ з҃
Хотѧ́ше мꙋ́жъ нѣ́кїй премꙋ́дръ и҆ слове́сенъ ѡ҆ пода́нїи дще́ри є҆гѡ̀ здра́вїѧ и҆ сп҃се́нїѧ рꙋко́ю и҆ мл҃твами твои́ми, прпⷣбне, бл҃года́рственнаѧ принестѝ, написа̀ на столпѣ̀ твое́мъ стїхи̑ сицевы́ѧ: здѣ̀ стои́тъ мꙋ́жъ, стїхі́ѧми неꙋѧзви́мый, пи́щꙋ и҆мы́й безсме́ртнꙋю, а҆ не земнꙋ́ю, є҆го́же жили́ще столпы̀ двоезра́чны, сла́вѧщїй сн҃а мт҃ре неискꙋсобра́чны. Мы́ же сла́вимъ бг҃а, прославлѧ́ющагѡ ст҃ы̑ѧ своѧ̑, и҆ хвале́бнꙋю пѣ́снь пое́мъ є҆мꙋ̀: А҆ллилꙋ́їа.
І҆́косъ з҃
Но́вый і҆́ѡвъ ꙗ҆ви́лсѧ є҆сѝ мі́рꙋ, досточꙋ́дне данїи́ле, мно́жествомъ ѡ҆бдержи́мъ бы́въ скорбе́й и҆ и҆скꙋше́нїй, но дв҃довꙋ кро́тость, і҆а́кѡвле безѕло́бїе и҆ цѣломꙋ́дрїе і҆ѡ́сифово, па́че же терпѣ́нїе і҆́ѡвле стѧжа́въ, всѧ̑ побѣди́лъ є҆сѝ. Сегѡ̀ ра́ди вопїе́мъ тебѣ̀ сицєва́ѧ:
Ра́дꙋйсѧ, прпⷣбне данїи́ле, сосꙋ́дѣ блгⷣти и҆збра́нный: ра́дꙋйсѧ, чꙋдотво́рче и҆зрѧ́дный.
Ра́дꙋйсѧ, млⷭ҇ти бж҃їей стѧжа́телю: ра́дꙋйсѧ, къ бг҃ꙋ бли́жнїй предста́телю.
Ра́дꙋйсѧ, лꙋчеза́рный свѣти́льниче: ра́дꙋйсѧ, бг҃омъ вѣнча́нный подви́жниче.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ и҃
Стра́нными чꙋдесы̀ прославлѧ́ѧсѧ, прпⷣбне ѻ҆́тче данїи́ле, ᲂу҆тверди́лъ є҆сѝ вѣ́рꙋ и҆ ᲂу҆пова́нїе въ лю́дѣхъ, ꙗ҆́кѡ мно́гѡ мо́жетъ мл҃тва првⷣнагѡ. Мы́ же, вѣ́рꙋѧ, ꙗ҆́кѡ а҆́ще по бз҃ѣ ᲂу҆пова́нїе на тѧ̀ возложи́мъ, та́кожде прїи́мемъ мл҃твами твои́ми проси́мое, пое́мъ бг҃ꙋ ѡ҆ тебѣ̀: А҆ллилꙋ́їа.
І҆́косъ и҃
Во всѧ̑ ѻ҆рꙋ́жїѧ бж҃їѧ ѡ҆блекі́йсѧ, прпⷣбне ѻ҆́тче данїи́ле, возмо́глъ є҆сѝ ста́ти проти́вꙋ всѣ̑мъ ко́знємъ дїа́вольскимъ, на столпѣ̀ тре́тїемъ, и҆ превысоча́йшемъ, бл҃года́рственнѣ тебѣ̀ созда́нномъ, подвиза́лсѧ є҆сѝ. И҆ на́съ, прпⷣбне, грѣхмѝ ѡ҆бꙋрева́емыхъ, предста́тельствы твои́ми свободѝ, да зове́мъ тебѣ̀ си́це:
Ра́дꙋйсѧ, хода́таю всѣ̑мъ сп҃се́нїѧ: ра́дꙋйсѧ, приводѧ́й грѣ́шныхъ ко и҆справле́нїю.
Ра́дꙋйсѧ, скорбѧ́щимъ подаѧ́й ᲂу҆тѣше́нїе: ра́дꙋйсѧ, ѕлы́хъ приводѧ́й къ постыжде́нїю.
Ра́дꙋйсѧ, дꙋхѡ́въ и҆скꙋси́телей прогони́телю: ра́дꙋйсѧ, покаѧ́нїѧ насади́телю.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ ѳ҃
Всѧ́кїѧ скѡ́рби, болѣ̑зни, и҆скꙋшє́нїѧ, на столпѣ̀ подвиза́ѧсѧ, прпⷣбне ѻ҆́тче данїи́ле, претерпѣ́лъ є҆сѝ. И҆ всѣ́мъ си́мъ, быва́емымъ тебѣ̀, по́мощїю бж҃їею, побѣди́тель ꙗ҆ви́лсѧ є҆сѝ. Сегѡ̀ ра́ди вопїе́мъ ѡ҆ тебѣ̀ бг҃ꙋ: А҆ллилꙋ́їа.
І҆́косъ ѳ҃
Вѣті̑и многовѣща́ннїи не довлѣ́ютъ и҆зглаго́лати по́двиги твоѧ̑ и҆ промышле́нїе ѡ҆ тебѣ̀ бж҃їе, прпⷣбне ѻ҆́тче данїи́ле, ꙗ҆́кѡ къ разли́чнымъ чꙋдесє́мъ и҆ прⷪ҇ро́ческагѡ да́ра не лиши́сѧ и҆ блгⷣти сщ҃е́нства сподо́бисѧ. Мы́ же, любо́вїю побѣжда́еми, дерза́емъ смиренномꙋ́дреннѡ зва́ти тебѣ̀ такова̑ѧ:
Ра́дꙋйсѧ, вѣ́рный ра́бе влⷣки всебл҃га́гѡ: ра́дꙋйсѧ, хра́ме дх҃а всест҃а́гѡ.
Ра́дꙋйсѧ, сщ҃е́нниче, бг҃омъ и҆збра́нный: ра́дꙋйсѧ, блгⷣти цвѣ́тъ бл҃гоꙋха́нный.
Ра́дꙋйсѧ, мл҃твы ѳѷмїа́мъ бл҃гово́нный: ра́дꙋйсѧ, ѻ҆рга́нъ ѱалмопѣ́нїѧ сладкостро́йный.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ і҃
Сп҃стѝ хотѧ̀ всѧ̑ бли̑жнїѧ и҆ да̑льнїѧ столпа̀ твоегѡ̀, бл҃же́нне данїи́ле, гдⷭ҇ь смотре́нїемъ свои́мъ привожда́ше къ тебѣ̀ мно́гїѧ лю́ди, мл҃твы, бл҃гослове́нїѧ, ѡ҆сщ҃е́нїѧ и҆ наставле́нїѧ просѧ́щыѧ ᲂу҆ тебє̀. И҆ си́хъ зрѧ́ще лю́дїе, сѣдѧ́щыѧ во тмѣ̀ заблꙋжде́нїѧ, къ свѣ́тꙋ и҆́стины ѡ҆браща́хꙋсѧ. Мы́ же, сла́вѧще сп҃са всѣ́хъ, прише́дшагѡ въ мі́ръ грѣ́шныхъ сп҃стѝ, пое́мъ ѡ҆ тебѣ̀ бг҃ꙋ: А҆ллилꙋ́їа.
І҆́косъ і҃
Стѣна̀ є҆сѝ всѣ̑мъ, прпⷣбне ѻ҆́тче данїи́ле, съ вѣ́рою и҆ ᲂу҆пова́нїемъ къ застꙋпле́нїю твоемꙋ̀ прибѣга́ющымъ. Тѣ́мже и҆ на́мъ, въ ско́рбѣхъ, болѣ́знехъ и҆ и҆скꙋше́нїихъ съ надѣ́ѧнїемъ къ тебѣ̀ приходѧ́щымъ, по́мощь твою̀ и҆ застꙋпле́нїе млⷭ҇рдне ꙗ҆вѝ, да любо́вїю вопїе́мъ тебѣ̀ такова̑ѧ:
Ра́дꙋйсѧ, приста́нище ѡ҆бꙋрева́ємымъ: ра́дꙋйсѧ, застꙋпле́нїе ѡ҆ѕлоблѧ́емыхъ.
Ра́дꙋйсѧ, печа́льнымъ ᲂу҆тѣше́нїе: ра́дꙋйсѧ, немѡщны́мъ ᲂу҆крѣпле́нїе.
Ра́дꙋйсѧ, ᲂу҆ныва́ющымъ ѡ҆бодре́нїе: ра́дꙋйсѧ, моле́нїй ско́рое и҆сполне́нїе.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ а҃і
Пѣ́нїе всеꙋмиле́нное и҆ бл҃года́рственное гдⷭ҇ꙋ бг҃ꙋ прино́симъ, ꙗ҆́кѡ и҆́мамы тебѣ̀, прпⷣбне ѻ҆́тче данїи́ле, моле́бника ѡ҆ на́съ грѣ́шныхъ и҆ ст҃ы́ми мл҃твами твои́ми сп҃са́емсѧ. Сегѡ̀ ра́ди, пред̾ ст҃о́ю і҆кѡ́ною твое́ю ᲂу҆се́рднѡ припа́дающе и҆ покрови́телемъ на́шимъ тебѣ̀ почита́юще, всебл҃гоговѣ́йнѡ вопїе́мъ ѡ҆ тебѣ̀ бг҃ꙋ: А҆ллилꙋ́їа.
І҆́косъ а҃і
Свѣтоза́рнꙋю свѣщꙋ̀ блгⷣти бжⷭ҇твенныѧ зри́мъ тебѣ̀, прпⷣбне ѻ҆́тче данїи́ле, просвѣща́емїи бл҃говѣ́стїемъ ѡ҆ пресла́вномъ житїѝ твое́мъ. Твои́ми бо мл҃твами ѿ недꙋ̑гъ свои́хъ мно́зи свобожда́хꙋсѧ. Къ си́мъ же во ᲂу҆ста́хъ твои́хъ ѡ҆брѣ́тесѧ блгⷣть бж҃їѧ, сп҃си́тельнаѧ чл҃вѣ́кѡмъ, ꙗ҆́кѡ ѿ слове́съ твои́хъ ᲂу҆мили́тисѧ послꙋ́шающымъ тебѣ̀ и҆ житїѐ своѐ и҆справлѧ́ти. Сегѡ̀ ра́ди зове́мъ тебѣ̀ такова́ѧ:
Ра́дꙋйсѧ, прпⷣбне ѻ҆́тче данїи́ле, вѣ́ры ᲂу҆твержде́нїе: ра́дꙋйсѧ, цр҃кве хрⷭ҇то́вы ᲂу҆краше́нїе.
Ра́дꙋйсѧ, ра́зꙋма дꙋхо́внагѡ сокро́вище: ра́дꙋйсѧ, сп҃се́нїѧ и҆зрѧ́дный наста́вниче.
Ра́дꙋйсѧ, ѕвѣздо̀, на тве́рди цр҃ко́внѣй блиста́ющаѧ: ра́дꙋйсѧ, цѣвни́це бжⷭ҇твеннаѧ, словесы̀ и҆ дѣ́лы всѣ́хъ ᲂу҆тѣша́ющаѧ.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ в҃і
Блгⷣть бжⷭ҇твеннꙋю, ми́лꙋющꙋю на́съ, въ тебѣ̀, прпⷣбне ѻ҆́тче данїи́ле, зрѧ́ще, ꙗ҆́кѡ и҆ нѣмы́й ѿ рожде́нїѧ проглаго́лати возмо́же, и҆ хромы́й ѿ рожде́нїѧ и҆сцѣли́сѧ: ра́дꙋемсѧ и҆ хва́лимъ бг҃а и҆ тебѣ̀, ско́рагѡ мл҃твенника и҆ помо́щника, вопїю́ще къ бг҃ꙋ: А҆ллилꙋ́їа.
І҆́косъ в҃і
Пою́ще по́двиги твоѧ̑, прпⷣбне ѻ҆́тче данїи́ле, ᲂу҆бл҃жа́емъ равноа́гг҃льное житїѐ твоѐ, почита́емъ сконча́нїе жи́тельства твоегѡ̀, на не́же снидо́шасѧ не то́кмѡ сщ҃еннонача́льницы и҆ кли́ръ цр҃кве земны́ѧ, но и҆ цр҃кве перворо́дныхъ, на нбⷭ҇ѣ́хъ напи́санныхъ. Ты́ же, ра́дꙋѧсѧ, преда́лъ є҆сѝ чⷭ҇тꙋю и҆ ст҃ꙋ́ю дꙋ́шꙋ твою̀ въ рꙋ́цѣ бж҃їѧ. Бг҃ъ же просла́ви тебѐ по ᲂу҆спе́нїи твое́мъ чꙋдесѝ мно́гими. Прїимѝ ᲂу҆́бѡ, всебл҃же́нне ѻ҆́тче данїи́ле, и҆ ѿ на́съ приноси́маѧ тебѣ̀ ᲂу҆блаже́нїѧ сицева̑ѧ:
Ра́дꙋйсѧ, ѻ҆бита́телю цр҃кве торжествꙋ́ющихъ: ра́дꙋйсѧ, съ а҆́гг҃лами ликовствꙋ́ющїй.
Ра́дꙋйсѧ, ра́дости вѣ́чныѧ преисполнѧ́емый: ра́дꙋйсѧ, съ прⷪ҇ро́ками велича́емый.
Ра́дꙋйсѧ, съ а҆пⷭ҇лами прославлѧ́емый: ра́дꙋйсѧ, съ ст҃и́тєли бл҃гословлѧ́емый.
Ра́дꙋйсѧ, съ мч҃ники вѣнча́емый: ра́дꙋйсѧ, съ прпⷣбными ᲂу҆бл҃жа́емый.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ г҃і
Ѽ пречꙋ́дный и҆ пресла́вный ᲂу҆го́дниче бж҃їй, прпⷣбне и҆ бг҃оно́сне ѻ҆́тче данїи́ле, тѣ́ломъ на землѝ почива́ющїй, дꙋше́ю на нб҃сѝ ѻ҆бита́ющїй, дꙋ́хомъ же ѿ при́сныхъ тебѣ̀ не ѿлꙋча́ющїйсѧ, прїимѝ молє́нїѧ на̑ша. При́зри млⷭ҇тивѡ съ высоты̀ нбⷭ҇ныѧ сла́вы твоеѧ̀ на на́съ, въ ᲂу҆миле́нїи моле́бнѡ предстоѧ́щихъ пред̾ ст҃о́ю твое́ю і҆кѡ́ною, и҆ ᲂу҆молѝ влⷣкꙋ сп҃са всѣ́хъ сп҃сти́сѧ дꙋша́мъ на́шимъ и҆ въ се́мъ и҆ въ бꙋ́дꙋщемъ вѣ́цѣ се́рдцемъ и҆ ᲂу҆сты̀ пѣ́ти бг҃ꙋ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃льскомꙋ житїю̀ ѿ ю҆́ности твоеѧ̀ поревнова́въ, прпⷣбне, воспрїѧ́лъ є҆сѝ трꙋды̀ и҆ по́двиги и҆́ночества, въ ни́хъ же до кончи́ны са́мыѧ пребы́въ, бг҃ꙋ ᲂу҆годи́лъ є҆сѝ и҆ сла́вы нбⷭ҇ныѧ сподо́билсѧ є҆сѝ. Сегѡ̀ ра́ди похва̑льнаѧ восписꙋ́емъ тебѣ̀, вопїю́ще такова̑ѧ:
Ра́дꙋйсѧ, данїи́ле, мл҃твами ма́тери твоеѧ̀ и҆спро́шенный: ра́дꙋйсѧ, непло́дою рожде́нный.
Ра́дꙋйсѧ, прⷪ҇ро́ческимъ и҆́менемъ нарече́нный: ра́дꙋйсѧ, роди́тели твои́ми на слꙋже́нїе бг҃ꙋ ѡ҆брече́нный.
Ра́дꙋйсѧ, ѿ ю҆́ности чⷭ҇тотꙋ̀ житїѧ̀ возлюби́вый: ра́дꙋйсѧ, въ ѻ҆́трочествѣ дꙋ́хꙋ пло́ть свою̀ покори́вый.
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Конда́къ а҃
И҆збра́нный ᲂу҆го́дниче хрⷭ҇то́въ, прпⷣбне сто́лпниче и҆ пресла́вный чꙋдотво́рче, возсїѧ́вый мі́рови, ꙗ҆́кѡ ѕвѣзда̀ многосвѣ́тлаѧ, по́двиги и҆ чꙋдесы̀ свои́ми, восхвалѧ́емъ тѧ̀ любо́вїю, ѻ҆́тче данїи́ле. Ты́ же, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, мл҃твами твои́ми ѿ бѣ́дъ и҆ ско́рбныхъ ѡ҆бстоѧ́нїй свободѝ на́съ, да бл҃года́рственнѡ, со ᲂу҆миле́нїемъ, зове́мъ тебѣ̀:
Ра́дꙋйсѧ, прпⷣбне ѻ҆́тче данїи́ле, те́плый ѡ҆ мі́рѣ къ бг҃ꙋ мл҃твенниче.
Моли́твы
Ѽ прпⷣбне и҆ бг҃оно́сне ѻ҆́тче на́шъ данїи́ле! ᲂу҆бл҃жа́емъ вє́лїѧ по́двиги житїѧ̀ твоегѡ̀, скѡ́рби лю̑тыѧ, болѣ̑зни, и҆скꙋшє́нїѧ, и҆́мъ же побѣдоно́сецъ преди́вный показа́лсѧ є҆сѝ. Велича́емъ дарова́нїѧ блгⷣти гдⷭ҇нѣй, тобо́ю многоче́стнѣ и҆ многоѻбра́знѣ ꙗ҆вле́нныѧ болѧ́щымъ и҆ скорбѧ́щымъ, грѣ̑шнымъ и҆ заблꙋ́ждшымъ во сп҃се́нїе и҆̀хъ. Помина́емъ тебѐ наста́вника премꙋ́драгѡ, и҆́же глаго́ла лю́дємъ словеса̀ ᲂу҆чи́тєльнаѧ ѿ слова̀ гдⷭ҇нѧ, дꙋ́ши ᲂу҆милѧ́ющїѧ и҆ ᲂу҆мы̀ и҆ сердца̀ къ бг҃ꙋ ѡ҆браща́ющыѧ. Мо́лимсѧ тебѣ̀: не забꙋ́ди, ѽ пребл҃же́нне ѻ҆́тче, вѣ́ры на́шеѧ къ тебѣ̀ и҆ наде́жды ᲂу҆пова́нїѧ на́шегѡ на тебѣ̀, пред̾ ст҃о́ю і҆кѡ́ною твое́ю при́снѡ предстоѧ́щихъ и҆ те́плѣ молѧ́щихсѧ. Сподо́би на́съ, ᲂу҆́мнѡ взира́ющихъ на сконча́нїе жи́тельства твоегѡ̀, подража́ти вѣ́рѣ и҆ любвѝ твое́й. Помина́й на́съ, недосто́йныхъ, во ст҃ы́хъ твои́хъ и҆ бл҃гопрїѧ́тныхъ мл҃твахъ къ бг҃ꙋ, ꙗ҆́кѡ сщ҃е́нникъ бж҃їй, предстоѧ̀ прⷭ҇то́лꙋ вседержи́телевꙋ. Мо́лимъ тѧ̀, вели́кїй моле́бниче и҆ чꙋдотво́рче ст҃ы́й, бꙋ́ди на́мъ всегда̀ ᲂу҆тѣ́шитель, цѣли́тель, помо́щникъ и҆ застꙋ́пникъ, и҆ покрови́тель, и҆ наста́вникъ вѣ́ренъ. Не премолчѝ, вопїѧ̀ за ны̀ ко гдⷭ҇ꙋ, да съ терпѣ́нїемъ тече́мъ на предлежа́щїй по́двигъ сп҃се́нїѧ дꙋ́шъ на́шихъ, взира́юще на тебѣ̀, ст҃ы́й ᲂу҆чи́телю на́шъ, и҆ бл҃гоче́стнѡ и҆ првⷣнѡ, въ є҆дине́нїи дꙋ́ха, въ є҆диномы́слїи вѣ́ры и҆ любвѐ поживе́мъ въ ны́нѣшнемъ вѣ́цѣ: въ бꙋ́дꙋщемъ же да сподо́бимсѧ сла́вити блгⷣть и҆ чл҃вѣколю́бїе є҆ди́нагѡ въ трⷪ҇цѣ сла́вимагѡ бг҃а, ѻ҆ц҃а̀ и҆ сн҃а и҆ ст҃а́гѡ дх҃а во вѣ́ки вѣкѡ́въ. А҆ми́нь.