Акафист святителю Стефану Сурожскому

А́нгелов собесе́дниче и челове́ков наста́вниче ны́не, я́ко Бо́жий служи́телю, предстоя́ с вы́шними си́лами, святи́телю Стефа́не, мо́лиши о все́х на́с Христа́ Бо́га на́шего, сего́ ра́ди благода́рно во умиле́нии зове́м ти́:

Ра́дуйся, чистото́ю и святы́нею а́нгелом уподо́бивыйся; ра́дуйся, посто́м и бде́нием безстра́стия дости́гнувый.

Ра́дуйся, ве́рных непрело́жное утвержде́ние; ра́дуйся, неве́рных богому́дренное обличе́ние.

Ра́дуйся, апо́стольских преда́ний ве́рный храни́телю; ра́дуйся, непоколеби́мый правосла́вия сто́лпе.

Ра́дуйся, тве́рдое огражде́ние Христо́вой Це́ркви; ра́дуйся, де́лателю до́брый вертогра́да Госпо́дня.

Ра́дуйся, Стефа́не, испове́дниче Христо́в и чудотво́рче.

Ра́зум свы́ше просвеще́нным и Ду́хом Святы́м озаре́нным неве́рных люде́й Су́рожских ве́рою Христо́вою просвети́л еси́, сего́ ра́ди вопие́м ти́:

Ра́дуйся, трудо́в апо́стольских ревни́телю; ра́дуйся, богосло́вия и́стиннаго прему́дрый учи́телю.

Ра́дуйся, друго́м твои́м спасе́ния жела́вый; ра́дуйся, во дво́р Христо́вы Це́ркве си́х призва́вый.

Ра́дуйся, я́ко небе́сными стезя́ми невозвра́тно ше́ствовал еси́; ра́дуйся, я́ко на высоту́ доброде́телей возше́л еси́.

Ра́дуйся, страны́ Су́рожския просвети́телю; ра́дуйся, христиа́н страны́ сия́ небе́сный покрови́телю.

Ра́дуйся, Стефа́не, испове́дниче Христо́в и чудотво́рче.

Име́я в се́рдце свое́м о́гнь любве́ Боже́ственныя, спасе́ния ра́ди ду́ш челове́ческих па́стырски подвиза́лся еси́, богому́дре, проти́ву ко́знем диа́вольским и победи́тельным Креста́ ору́жием, я́ко паучи́ну лука́ваго се́ти разсека́л еси́. Те́мже приими́ от на́с пе́снь сию́:

Ра́дуйся, ра́бе Бо́жий, благи́й и ве́рный; ра́дуйся, учи́телю смире́ния и целому́дрия.

Ра́дуйся, о́бразе кро́тости и послуша́ния; ра́дуйся, наста́вниче де́л до́брых.

Ра́дуйся, огневи́дный сто́лпе, наставля́яй на пу́ть спасе́ния; ра́дуйся, свети́льниче светоза́рный, ве́рныя просвеща́яй.

Ра́дуйся, неисчерпа́емый сосу́де благода́ти Христо́вы; ра́дуйся, чи́стое прия́телище Ду́ха Свята́го.

Ра́дуйся, Стефа́не, испове́дниче Христо́в и чудотво́рче.

Ви́девше в тебе́ Су́рожстии лю́дие святи́теля, я́ко А́нгела, зна́мение благода́ти небе́сныя нося́ща, возра́довашася ра́достию неизглаго́ланною: ты́ же до́бре внима́л себе́ и всему́ ста́ду, в не́м же тя́ Ду́х Святы́й поста́ви епи́скопа, усе́рдно па́сл еси́ Це́рковь Го́спода и Бо́га, я́ко сло́во возда́ти хотя́: сего́ ра́ди ублажа́ем тя́, о́тче Стефа́не, зову́ще:

Ра́дуйся, челове́че Бо́жий, преподо́бием а́ки по́ясом златы́м препоя́санный; ра́дуйся, дру́же Христо́в, святи́тельством, а́ки би́сером драги́м преукраше́нный.

Ра́дуйся, во́ине Христо́в, непобеди́мый; ра́дуйся, стра́же до́му Бо́жия неусы́пный.

Ра́дуйся, мзду́ трудо́в свои́х от Христа́ восприя́вый; ра́дуйся, я́ко воше́л еси́ в ра́дость Го́спода своего́.

Ра́дуйся, страны́ Таври́ческой све́тлое украше́ние; ра́дуйся, преди́вное осия́ние небе́сныя сла́вы.

Ра́дуйся, Стефа́не, испове́дниче Христо́в и чудотво́рче.

Стена́ была́ еси́ по́мощи и заступле́ния все́м безпомо́щным и напа́ствуемым, святи́телю Стефа́не, и милосе́рдия неистощи́мое сокро́вище. Сего́ ра́ди ди́внаго во святы́х свои́х Бо́га сла́вяще ублажа́ем тя́ си́це:

Ра́дуйся, архиере́ю, от Самого́ Го́спода прорече́нный; ра́дуйся, му́жу жела́ний, пасти́ ста́до Христо́во свы́ше избра́нный.

Ра́дуйся, пастыренача́льника Иису́са Христа́ благоволе́ние; ра́дуйся, многосве́тлый Це́ркве свети́льниче.

Ра́дуйся, апо́столов соприча́стниче; ра́дуйся, святи́телей вели́ких сопресто́льниче.

Ра́дуйся, чистоты́ серде́чныя сокро́вище; ра́дуйся, смире́ния Христо́ва зерца́ло.

Ра́дуйся, Стефа́не, испове́дниче Христо́в и чудотво́рче.

Ви́дя себе́ поста́влена на степе́нь архиере́йства, святи́телю о́тче Стефа́не, не да́л еси́ очи́ма твои́ма сна́, ниже́ ве́ждома твои́ма дрема́ния, поставля́я па́стве твое́й па́стыри смы́слены и вся́ лю́ди управля́я ко спасе́нию. Мы́ же ве́дуще тя́ бы́ти пастыренача́льника богому́дренна и строи́теля до́му Бо́жия до́бра, взыва́ем к тебе́ си́це:

Ра́дуйся, кре́пкое корми́ло Христо́вы Це́ркви; ра́дуйся, ни́вы Госпо́дни усе́рдный жа́телю.

Ра́дуйся, ве́рных кре́пкое утвержде́ние; ра́дуйся, неве́рных богому́дренное обличе́ние.

Ра́дуйся, ве́рный та́йн святы́х строи́телю; ра́дуйся, я́ко па́стырем твои́м благовре́менное и безвре́менное пропове́дати запове́дал еси́.

Ра́дуйся, безстра́стия сосу́де чи́стый; ра́дуйся, измла́да Христа́ возлюби́вый.

Ра́дуйся, Стефа́не, испове́дниче Христо́в и чудотво́рче.

Боже́ственным Ду́хом просвеще́н, пропове́дал еси́ со дерзнове́нием правосла́вия преда́ние, всеблаже́нне Стефа́не, и мучи́теля своего́ беззако́нна посрами́л еси́, в заточе́ние непра́ведно посыла́ем. Мы́ же ве́дуще такова́я, вопие́м тебе́ си́це:

Ра́дуйся, за Христа́ пострада́вый и му́чимый; ра́дуйся, тве́рдо Его́ испове́давый.

Ра́дуйся, все́х научи́вый непосра́мленно покланя́тися честны́м ико́нам; ра́дуйся, предста́телю пред Престо́лом Бо́жиим, за на́с гре́шных.

Ра́дуйся, весе́лие земли́ Су́рожския; ра́дуйся, царя́ нечести́ваго обличи́телю.

Ра́дуйся, правосла́вия ревни́телю; ра́дуйся, нечести́вых ересе́й обличи́телю.

Ра́дуйся, Стефа́не, испове́дниче Христо́в и чудотво́рче.

Твоего́ чи́стаго и непоро́чнаго жития́, вели́кий чудотво́рче, челове́ческий язы́к восхвали́ти и воспе́ти, преподо́бие твое́ Стефа́не, не возмо́жет; во все́х бо по́двизех до́бльственне подвиза́лся еси́, нечести́ваго царя́ обличи́л еси́, че́сти же ико́ны научи́л еси́ и отце́в догма́ты, всему́дре, испове́дал еси́, сего́ ра́ди ублажа́ем тя́ си́це:

Ра́дуйся, А́нгелов сожи́телю; ра́дуйся, апо́столов удобре́ние.

Ра́дуйся, и́ноков украше́ние; ра́дуйся, святи́телей сла́во.

Ра́дуйся, му́чеников похвало́; ра́дуйся, свяще́нная главо́, от пеле́н очи́стивый ду́хом.

Ра́дуйся, я́ко звезда́ све́тлая возсия́вый; ра́дуйся, от среды́ тьмы́ мно́гия изведы́й.

Ра́дуйся, Стефа́не, испове́дниче Христо́в и чудотво́рче.

Вети́и многовеща́нныя не возмо́гут по достоя́нию изрещи́ твои́х благодея́ний мно́жества, святи́телю о́тче Стефа́не, щедрода́тельная бо десни́ца твоя́ всю́ду досяза́ше. Мы́ же благосе́рдию твоему́ дивя́щеся, со умиле́нием взыва́ем ти́:

Ра́дуйся, лучу́ любве́ Бо́жия пресве́тлая; ра́дуйся, сокро́вище милосе́рдия Спа́сова неистощи́мое.

Ра́дуйся, бли́жния своя́ па́че себе́ возлюби́вый; ра́дуйся, в ме́ньших бра́тиях твои́х самого́ Христа́ ви́девый.

Ра́дуйся, си́рых пита́телю и призре́ние; ра́дуйся, скорбя́щих утеше́ние.

Ра́дуйся, страда́льцев укрепле́ние; ра́дуйся, оби́димых засту́пниче.

Ра́дуйся, Стефа́не, испове́дниче Христо́в и чудотво́рче.

Кто́ не блажи́т тебе́, преблаже́нне Стефа́не, слы́ша сла́вное житие́ твое́, ты́ бо еси́ жи́в е́сть душе́ю, мы́ же си́це тебе́ воспева́ем:

Ра́дуйся, вели́кий Бо́гу уго́дниче; ра́дуйся, я́ко во вре́менней жи́зни се́й любве́ ра́ди ко Го́споду вы́ну во спасе́нии души́ твоея́ подвиза́лся еси́.

Ра́дуйся, я́ко его́ по́мощию, оста́вль тле́нная, нетле́нная стяжа́л еси́; ра́дуйся, я́ко благода́тию Бо́жиею сподо́бился еси́ стоя́ти у Престо́ла Влады́чня.

Ра́дуйся, я́ко та́ко сподо́бился еси́ прича́стником бы́ти ве́чной сла́вы; ра́дуйся, та́ко получи́вый благода́ть хода́тайствовати о на́с.

Ра́дуйся, ско́рый помо́щниче призыва́ющих тя́; ра́дуйся, правосла́вному ца́рству на́шему защи́тителю.

Ра́дуйся, Стефа́не, испове́дниче Христо́в и чудотво́рче.

Зна́мений чудесы́ тебе́ Госпо́дь просла́ви, преблаже́нне Стефа́не, прого́ниши бо ду́хи и врачу́еши стра́сти, ду́ши же просвеща́еши ве́рных, си́це тебе́ вопию́щих:

Ра́дуйся, по труде́х стра́нствия земна́го в небе́сных селе́ниих сла́дце почи́вый; ра́дуйся, я́ко сме́рть прия́вый, тле́ния же не позна́вый.

Ра́дуйся, со Христо́м, Его́ же возлюби́л еси́; ра́дуйся, со Христо́м, на ве́ки совокупи́выйся.

Ра́дуйся, Ца́рствия Небе́снаго и сла́вы ве́чныя насле́дниче; ра́дуйся, си́льным ми́ра сего́ небоя́зненный суда́ Бо́жия провозве́стниче.

Ра́дуйся, я́ко за и́стину претерпе́л еси́ ско́рби; ра́дуйся, я́ко стяжа́л еси́ изгна́нных пра́вды ра́ди.

Ра́дуйся, Стефа́не, испове́дниче Христо́в и чудотво́рче.

Ве́сь еси́ в вы́шних, но и ни́жних не оставля́еши, святи́телю о́тче Стефа́не, при́сно со Христо́м ца́рствуеши и о на́с гре́шных моли́твы к нему́ возсыла́еши. Те́мже во умиле́нии зове́м ти́:

Ра́дуйся, прибе́жище на́ше в ско́рбех; ра́дуйся, ско́рый помо́щниче в беда́х су́щих.

Ра́дуйся, на неви́димыя враги́ на́ш побо́рниче; ра́дуйся, посети́телю в не́мощех лежа́щих.

Ра́дуйся, я́ко Христу́ до́блественно после́довал еси́; ра́дуйся, я́ко сладча́йшему Иису́су до конца́ послужи́л еси́.

Ра́дуйся, я́ко наслажда́ешися лицезре́ния Бо́жия; ра́дуйся, я́ко сподо́бился еси́ зре́ти невече́рний де́нь Ца́рствия Христо́ва.

Ра́дуйся, Стефа́не, испове́дниче Христо́в и чудотво́рче.

А҆́гг҃лѡвъ собесѣ́дниче и҆ человѣ́кѡвъ наста́вниче ны́нѣ, ꙗ҆́кѡ бж҃їй слꙋжи́телю, предстоѧ̀ съ вы́шними си́лами, ст҃и́телю стефа́не, мо́лиши ѡ҆ всѣ́хъ на́съ хрⷭ҇та̀ бг҃а на́шего, сегѡ̀ ра́ди бл҃года́рнѡ во ᲂу҆миле́нїи зове́мъ тѝ:

Ра́дꙋйсѧ, чистото́ю и҆ свѧты́нею а҆́гг҃лѡмъ ᲂу҆подо́бивыйсѧ: ра́дꙋйсѧ, посто́мъ и҆ бдѣ́нїемъ безстра́стїѧ дости́гнꙋвый.

Ра́дꙋйсѧ, вѣ́рныхъ непрело́жное ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, а҆пⷭ҇льскихъ преда́нїй вѣ́рный храни́телю: ра́дꙋйсѧ, непоколеби́мый правосла́вїѧ сто́лпе.

Ра́дꙋйсѧ, тве́рдое ѡ҆гражде́нїе хрⷭ҇то́вой цр҃кви: ра́дꙋйсѧ, дѣ́лателю до́брый вертогра́да гдⷭ҇нѧ.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Ра́зꙋмъ свы́ше просвѣще́ннымъ и҆ дх҃омъ ст҃ы́мъ ѡ҆заре́ннымъ невѣ́рныхъ люде́й сꙋ́рожскихъ вѣ́рою хрⷭ҇то́вою просвѣти́лъ є҆сѝ, сегѡ̀ ра́ди вопїе́мъ тѝ:

Ра́дꙋйсѧ, трꙋдѡ́въ а҆пⷭ҇льскихъ ревни́телю: ра́дꙋйсѧ, бг҃осло́вїѧ и҆́стиннагѡ премꙋ́дрый ᲂу҆чи́телю.

Ра́дꙋйсѧ, дрꙋгѡ́мъ твои̑мъ сп҃се́нїѧ жела́вый: ра́дꙋйсѧ, во дво́ръ хрⷭ҇то́вы цр҃кве си́хъ призва́вый.

Ра́дꙋйсѧ, ꙗ҆́кѡ нбⷭ҇ными стезѧ́ми невозвра́тнѡ ше́ствовалъ є҆сѝ: ра́дꙋйсѧ, ꙗ҆́кѡ на высотꙋ̀ добродѣ́телей возше́лъ є҆сѝ.

Ра́дꙋйсѧ, страны̀ сꙋ́рожскїѧ просвѣти́телю: ра́дꙋйсѧ, хрⷭ҇тїа́нъ страны̀ сїѧ̀ нбⷭ҇ный покрови́телю.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

И҆мѣ́ѧ въ се́рдце свое́мъ ѻ҆́гнь любвѐ бжⷭ҇твенныѧ, сп҃се́нїѧ ра́ди дꙋ́шъ человѣ́ческихъ па́стырски подвиза́лсѧ є҆сѝ, бг҃омꙋ́дре, проти́вꙋ ко́знемъ дїа́вѡльскимъ и҆ побѣди́тельнымъ крⷭ҇та̀ ѻ҆рꙋ́жїемъ, ꙗ҆́кѡ паꙋчи́нꙋ лꙋка́вагѡ сѣ̑ти разсѣка́лъ є҆сѝ. тѣ́мже прїимѝ ѿ на́съ пѣ́снь сїю̀:

Ра́дꙋйсѧ, ра́бе бж҃їй, благі́й и҆ вѣ́рный: ра́дꙋйсѧ, ᲂу҆чи́телю смире́нїѧ и҆ цѣломꙋ́дрїѧ.

Ра́дꙋйсѧ, ѡ҆́бразе кро́тости и҆ послꙋша́нїѧ: ра́дꙋйсѧ, наста́вниче дѣ́лъ до́брыхъ.

Ра́дꙋйсѧ, ѻ҆гневи́дный сто́лпе, наставлѧ́ѧй на пꙋ́ть сп҃се́нїѧ: ра́дꙋйсѧ, свѣти́льниче свѣтоза́рный, вѣ́рныѧ просвѣща́ѧй.

Ра́дꙋйсѧ, неисчерпа́емый сосꙋ́де блгⷣти хрⷭ҇то́вы: ра́дꙋйсѧ, чи́стое прїѧ́телище дх҃а ст҃а́гѡ.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Ви́дѣвше въ тебѣ̀ сꙋ́рожстїи лю́дїе ст҃и́телѧ, ꙗ҆́кѡ а҆́гг҃ла, зна́менїе блгⷣти нбⷭ҇ныѧ носѧ́ща, возра́довашасѧ ра́достїю неизглаго́ланною: ты́ же до́брѣ внима́лъ себѣ̀ и҆ всемꙋ̀ ста́дꙋ, въ не́мъ же тѧ̀ дх҃ъ ст҃ы́й поста́ви є҆пⷭ҇копа, ᲂу҆се́рднѡ па́слъ є҆сѝ цр҃ковь гдⷭ҇а и҆ бг҃а, ꙗ҆́кѡ сло́во возда́ти хотѧ̀: сегѡ̀ ра́ди ᲂу҆бл҃жа́емъ тѧ̀, ѻ҆́ч҃е стефа́не, зовꙋ́ще:

Ра́дꙋйсѧ, человѣ́че бж҃їй, прпⷣбїемъ а҆́ки по́ѧсомъ златы́мъ препоѧ́санный: ра́дꙋйсѧ, дрꙋ́же хрⷭ҇то́въ, ст҃и́тельствомъ, а҆́ки би́серомъ драги́мъ преꙋкраше́нный.

Ра́дꙋйсѧ, во́ине хрⷭ҇то́въ, непобѣди́мый: ра́дꙋйсѧ, стра́же до́мꙋ бж҃їѧ неꙋсы́пный.

Ра́дꙋйсѧ, мздꙋ̀ трꙋдѡ́въ свои́хъ ѿ хрⷭ҇та̀ воспрїѧ́вый: ра́дꙋйсѧ, ꙗ҆́кѡ воше́лъ є҆сѝ въ ра́дость гдⷭ҇а своегѡ̀.

Ра́дꙋйсѧ, страны̀ таври́ческой свѣ́тлое ᲂу҆краше́нїе: ра́дꙋйсѧ, преди́вное ѡ҆сїѧ́нїе нбⷭ҇ныѧ сла́вы.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Стѣна̀ была̀ є҆сѝ по́мощи и҆ застꙋпле́нїѧ всѣ̑мъ безпомѡ́щнымъ и҆ напа́ствꙋємымъ, ст҃и́телю стефа́не, и҆ милосе́рдїѧ неистощи́мое сокро́вище. сегѡ̀ ра́ди ди́внагѡ во ст҃ы́хъ свои́хъ бг҃а сла́вѧще ᲂу҆бл҃жа́емъ тѧ̀ си́це:

Ра́дꙋйсѧ, а҆рхїере́ю, ѿ самогѡ̀ гдⷭ҇а прорече́нный: ра́дꙋйсѧ, мꙋ́жꙋ жела́нїй, пастѝ ста́до хрⷭ҇то́во свы́ше и҆збра́нный.

Ра́дꙋйсѧ, пастыренача́льника і҆и҃са хрⷭ҇та̀ бл҃говоле́нїе: ра́дꙋйсѧ, многосвѣ́тлый цр҃кве свѣти́льниче.

Ра́дꙋйсѧ, а҆пⷭ҇лѡвъ соприча́стниче: ра́дꙋйсѧ, ст҃и́телей вели́кихъ сопресто́льниче.

Ра́дꙋйсѧ, чистоты̀ серде́чныѧ сокро́вище: ра́дꙋйсѧ, смире́нїѧ хрⷭ҇то́ва зерца́ло.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Ви́дѧ себѐ поста́влена на степе́нь а҆рхїере́йства, ст҃и́телю ѻ҆́ч҃е стефа́не, не да́лъ є҆сѝ ѻ҆чи́ма твои́ма сна̀, нижѐ вѣ́ждома твои́ма дрема́нїѧ, поставлѧ́ѧ па́ствѣ твое́й па́стыри смы́слены и҆ всѧ̀ лю́ди ᲂу҆правлѧ́ѧ ко сп҃се́нїю. мы́ же вѣ́дꙋще тѧ̀ бы́ти пастыренача́льника бг҃омꙋ́дренна и҆ строи́телѧ до́мꙋ бж҃їѧ до́бра, взыва́емъ къ тебѣ̀ си́це:

Ра́дꙋйсѧ, крѣ́пкое корми́ло хрⷭ҇то́вы це́ркви: ра́дꙋйсѧ, ни́вы гдⷭ҇ни ᲂу҆се́рдный жа́телю.

Ра́дꙋйсѧ, вѣ́рныхъ крѣ́пкое ᲂу҆твержде́нїе: ра́дꙋйсѧ, невѣ́рныхъ бг҃омꙋ́дренное ѡ҆бличе́нїе.

Ра́дꙋйсѧ, вѣ́рный та́йнъ ст҃ы́хъ строи́телю: ра́дꙋйсѧ, ꙗ҆́кѡ па́стырємъ твои̑мъ благовре́менное и҆ безвре́менное проповѣ́дати заповѣ́далъ є҆сѝ.

Ра́дꙋйсѧ, безстра́стїѧ сосꙋ́де чи́стый: ра́дꙋйсѧ, и҆змла́да хрⷭ҇та̀ возлюби́вый.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Бжⷭ҇твеннымъ дх҃омъ просвѣще́нъ, проповѣ́далъ є҆сѝ со дерзнове́нїемъ правосла́вїѧ преда́нїе, всебл҃же́нне стефа́не, и҆ мꙋчи́телѧ своегѡ̀ беззако́нна посрами́лъ є҆сѝ, въ заточе́нїе непра́веднѡ посыла́емъ. мы́ же вѣ́дꙋще такова́ѧ, вопїе́мъ тебѣ̀ си́це:

Ра́дꙋйсѧ, за хрⷭ҇та̀ пострада́вый и҆ мꙋ́чимый: ра́дꙋйсѧ, тве́рдѡ є҆гѡ̀ и҆сповѣ́давый.

Ра́дꙋйсѧ, всѣ́хъ наꙋчи́вый непосра́мленнѡ покланѧ́тисѧ честны̑мъ і҆кѡ́намъ: ра́дꙋйсѧ, предста́телю пред̾ прⷭ҇то́ломъ бж҃їимъ, за на́съ грѣ́шныхъ.

Ра́дꙋйсѧ, весе́лїе землѝ сꙋ́рожскїѧ: ра́дꙋйсѧ, царѧ̀ нечести́ваго ѡ҆бличи́телю.

Ра́дꙋйсѧ, правосла́вїѧ ревни́телю: ра́дꙋйсѧ, нечести́выхъ є҆ресе́й ѡ҆бличи́телю.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Твоегѡ̀ чи́стагѡ и҆ непоро́чнагѡ житїѧ̀, вели́кїй чꙋдотво́рче, человѣ́ческїй ѧ҆зы́къ восхвали́ти и҆ воспѣ́ти, преподо́бїе твоѐ стефа́не, не возмо́жетъ: во всѣ́хъ бо по́двизѣхъ до́бльственнѣ подвиза́лсѧ є҆сѝ, нечести́ваго царѧ̀ ѡ҆бличи́лъ є҆сѝ, че́сти же і҆кѡ́ны наꙋчи́лъ є҆сѝ и҆ ѻ҆тцє́въ догма́ты, всемꙋ́дре, и҆сповѣ́далъ є҆сѝ, сегѡ̀ ра́ди ᲂу҆бл҃жа́емъ тѧ̀ си́це:

Ра́дꙋйсѧ, а҆́гг҃лѡвъ сожи́телю: ра́дꙋйсѧ, а҆пⷭ҇лѡвъ ᲂу҆добре́нїе.

Ра́дꙋйсѧ, и҆́нокѡвъ ᲂу҆краше́нїе: ра́дꙋйсѧ, ст҃и́телей сла́во.

Ра́дꙋйсѧ, мꙋ́ченикѡвъ похвало̀: ра́дꙋйсѧ, сщ҃е́ннаѧ главо̀, ѿ пеле́нъ ѡ҆чи́стивый дх҃омъ.

Ра́дꙋйсѧ, ꙗ҆́кѡ ѕвѣзда̀ свѣ́тлаѧ возсїѧ́вый: ра́дꙋйсѧ, ѿ среды̀ тмы̀ мнѡ́гїѧ и҆зведы́й.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Вѣті̑и многовѣща́нныѧ не возмо́гꙋтъ по достоѧ́нїю и҆зрещѝ твои́хъ бл҃годѣѧ́нїй мно́жєства, ст҃и́телю ѻ҆́ч҃е стефа́не, щедрода́тельнаѧ бо десни́ца твоѧ̀ всю́дꙋ досѧза́ше. мы́ же бл҃госе́рдїю твоемꙋ̀ дивѧ́щесѧ, со ᲂу҆миле́нїемъ взыва́емъ тѝ:

Ра́дꙋйсѧ, лꙋчꙋ̀ любвѐ бж҃їѧ пресвѣ́тлаѧ: ра́дꙋйсѧ, сокро́вище милосе́рдїѧ сп҃сова неистощи́мое.

Ра́дꙋйсѧ, бли̑жнїѧ своѧ̑ па́че себє̀ возлюби́вый: ра́дꙋйсѧ, въ ме́ньшихъ бра́тїѧхъ твои́хъ самогѡ̀ хрⷭ҇та̀ ви́дѣвый.

Ра́дꙋйсѧ, си́рыхъ пита́телю и҆ призрѣ́нїе: ра́дꙋйсѧ, скорбѧ́щихъ ᲂу҆тѣше́нїе.

Ра́дꙋйсѧ, страда́льцєвъ ᲂу҆крѣпле́нїе: ра́дꙋйсѧ, ѡ҆би́димыхъ застꙋ́пниче.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Кто̀ не блажи́тъ тебѣ̀, пребл҃же́нне стефа́не, слы́ша сла́вное житїѐ твоѐ, ты́ бо є҆сѝ жи́въ є҆́сть дꙋше́ю, мы́ же си́це тебѣ̀ воспѣва́емъ:

Ра́дꙋйсѧ, вели́кїй бг҃ꙋ ᲂу҆го́дниче: ра́дꙋйсѧ, ꙗ҆́кѡ во вре́меннѣй жи́зни се́й любвѐ ра́ди ко гдⷭ҇ꙋ вы́нꙋ во сп҃се́нїи дꙋшѝ твоеѧ̀ подвиза́лсѧ є҆сѝ.

Ра́дꙋйсѧ, ꙗ҆́кѡ є҆гѡ̀ по́мощїю, ѡ҆ста́вль тлѣ̑ннаѧ, нетлѣ́ннаѧ стѧжа́лъ є҆сѝ: ра́дꙋйсѧ, ꙗ҆́кѡ блгⷣтїю бж҃їею сподо́билсѧ є҆сѝ стоѧ́ти ᲂу҆ прⷭ҇то́ла влады́чнѧ.

Ра́дꙋйсѧ, ꙗ҆́кѡ та́кѡ сподо́билсѧ є҆сѝ прича́стникомъ бы́ти вѣ́чной сла́вы: ра́дꙋйсѧ, та́кѡ полꙋчи́вый бл҃года́ть хода́тайствовати ѡ҆ на́съ.

Ра́дꙋйсѧ, ско́рый помо́щниче призыва́ющихъ тѧ̀: ра́дꙋйсѧ, правосла́вномꙋ ца́рствꙋ на́шемꙋ защи́тителю.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Зна́менїй чꙋдесы̀ тебѐ гдⷭ҇ь просла́ви, пребл҃же́нне стефа́не, прого́ниши бо дꙋ́хи и҆ врачꙋ́еши стра̑сти, дꙋ́ши же просвѣща́еши вѣ́рныхъ, си́це тебѣ̀ вопїю́щихъ:

Ра́дꙋйсѧ, по трꙋдѣ́хъ стра́нствїѧ земна́гѡ въ нбⷭ҇ныхъ селе́нїихъ сла́дцѣ почи́вый: ра́дꙋйсѧ, ꙗ҆́кѡ сме́рть прїѧ́вый, тлѣ́нїѧ же не позна́вый.

Ра́дꙋйсѧ, со хрⷭ҇то́мъ, є҆гѡ̀ же возлюби́лъ є҆сѝ: ра́дꙋйсѧ, со хрⷭ҇то́мъ, на вѣ́ки совокꙋпи́выйсѧ.

Ра́дꙋйсѧ, црⷭ҇твїѧ нбⷭ҇нагѡ и҆ сла́вы вѣ́чныѧ наслѣ́дниче: ра́дꙋйсѧ, си́льнымъ мі́ра сегѡ̀ небоѧ́зненный сꙋда̀ бж҃їѧ провозвѣ́стниче.

Ра́дꙋйсѧ, ꙗ҆́кѡ за и҆́стинꙋ претерпѣ́лъ є҆сѝ ско́рби: ра́дꙋйсѧ, ꙗ҆́кѡ стѧжа́лъ є҆сѝ и҆згна́нныхъ пра́вды ра́ди.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.

Ве́сь є҆сѝ въ вы́шнихъ, но и҆ ни́жнихъ не ѡ҆ставлѧ́еши, ст҃и́телю ѻ҆́ч҃е стефа́не, при́снѡ со хрⷭ҇то́мъ ца́рствꙋеши и҆ ѡ҆ на́съ грѣ́шныхъ мл҃твы къ немꙋ̀ возсыла́еши. тѣ́мже во ᲂу҆миле́нїи зове́мъ тѝ:

Ра́дꙋйсѧ, прибѣ́жище на́ше въ ско́рбехъ: ра́дꙋйсѧ, ско́рый помо́щниче въ бѣда́хъ сꙋ́щихъ.

Ра́дꙋйсѧ, на неви̑димыѧ врагѝ на́шъ побо́рниче: ра́дꙋйсѧ, посѣти́телю въ не́мощехъ лежа́щихъ.

Ра́дꙋйсѧ, ꙗ҆́кѡ хрⷭ҇тꙋ̀ до́блественнѡ послѣ́довалъ є҆сѝ: ра́дꙋйсѧ, ꙗ҆́кѡ сладча́йшемꙋ і҆и҃сꙋ до конца̀ послꙋжи́лъ є҆сѝ.

Ра́дꙋйсѧ, ꙗ҆́кѡ наслажда́ешисѧ лицезрѣ́нїѧ бж҃їѧ: ра́дꙋйсѧ, ꙗ҆́кѡ сподо́билсѧ є҆сѝ зрѣ́ти невече́рнїй де́нь црⷭ҇твїѧ хрⷭ҇то́ва.

Ра́дꙋйсѧ, стефа́не, и҆сповѣ́дниче хрⷭ҇то́въ и҆ чꙋдотво́рче.