Кондак 1
Избра́вшу тя́ Пастыренача́льнику Христу́ во апо́стола страны́ се́верныя, а́бие отри́нул еси́, досточу́дне Три́фоне, ми́ра сего́ кра́сная, претерпе́в же вся́ко озлобле́ние, благовести́л еси́ седя́щым во тме́ и се́ни сме́ртней Бо́га я́вльшагося пло́тию: те́мже со апо́столы сра́дуется ду́х тво́й в небе́сных оби́телех. Име́я у́бо дерзнове́ние ко Христу́ Бо́гу на́шему, от вся́ких бе́д изба́ви на́с зову́щих:
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Икос 1
А́нгелы Своя́ страна́м и язы́ком предста́тели дарова́вый Бо́г, егда́ прии́де време́н исполне́ние, моле́ния ра́ди а́нгела страны́, я́же бли́з океа́на хла́дна, и наро́да ло́пска предста́теля, призва́ тя во благове́стие, всехва́льный Три́фоне, я́ко да спасе́ни бу́дут лю́дие ти́и. Помина́юще у́бо сия́, вопие́м ти́:
Ра́дуйся, свяще́ннаго ко́рене благо́е прозябе́ние; ра́дуйся, пусты́нным изде́тска житие́м сосу́д избра́н себе́ Бо́гови угото́вавый.
Ра́дуйся, зва́н бы́в свы́ше, к океа́ну мо́рю пресели́выйся; ра́дуйся, во Христе́ гряду́щее избавле́ние та́мо благовести́вый.
Ра́дуйся, поспе́шествующей ти́ благода́ти Бо́жией, приведы́й ко Христу́ ча́д мно́жество; ра́дуйся, соверше́нною Христа́ любо́вию уязви́вся, о́браз по се́м и́ноческий на себе́ прие́мый.
Ра́дуйся, Тро́ицы Живонача́льныя оби́тель устро́ивый, и я́же ко Христу́ мона́хов ликостоя́ния; ра́дуйся, ве́лия ра́ди смире́ния от нача́льства над оби́телию отреки́йся, повелева́яй зверьми́ ди́виими.
Ра́дуйся, тече́ние свое́ святоле́пне сконча́в, благоче́стне ко Христу́ отше́дый; ра́дуйся, я́ко оби́тель твоя́, от вра́г разоре́нная, по словеси́ твоему́ па́ки возста́вися.
Ра́дуйся, по преставле́нии твое́м царя́ Фео́дора спасы́й и все́м потре́бная ско́ро подава́яй.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 2
Ви́дяща роди́теля твоя́, досточу́дне Три́фоне, изде́тска по́стническое твое́ житие́, а́ще и стужа́стася о твое́м терпе́нии, оба́че ра́довастася, проразумева́юща, я́ко хо́щет Госпо́дь воздви́гнути тебе́ но́ва ми́ру свети́льника, и Тому́ воспева́ста: Аллилу́иа.
Икос 2
Ра́зум свы́ше осени́ тя, преподо́бне, всего́ себе́ преда́ти Христо́ву изволе́нию, и́мже в пусты́ню приведе́н бы́л еси́: та́мо бо на́йде на тя́ Си́ла Бо́жия, во е́же благовести́ти Ева́нгелие Христо́во наро́ду ино́му. Те́мже вопие́м ти́:
Ра́дуйся, иере́а Бо́жия ра́досте и ма́тере твоея́ весе́лие; ра́дуйся, роди́телей честны́х ча́до, от Бо́га зело́ возлю́бленное.
Ра́дуйся, де́вство драго́е и чистоту́ душе́вную соблюды́й непоро́чны; ра́дуйся, изде́тска в дому́ Бо́жии, а́ки Христо́с о́трок, примета́тися изво́ливый.
Ра́дуйся, услы́шавый та́мо сло́во рече́нное: пусты́нным живо́т сокрове́н е́сть, боже́ственным раче́нием воскриля́ющымся; ра́дуйся, о́ным гла́сом, я́ко во́ин, на служе́ние Царю́ призва́нный.
Ра́дуйся, пусты́нным житие́м себе́ в до́брем изволе́нии утверди́вый; ра́дуйся, во ю́ности плотски́я стра́сти умертви́вый.
Ра́дуйся, посто́м ду́шу свою́, во е́же гла́с свы́ше слы́шати, предочи́стивый; ра́дуйся, от Христа́ язы́ку ло́пску избра́нный благове́стниче.
Ра́дуйся, е́же о ми́ре се́м отложи́вый попече́ние и а́бие восле́д Христу́ после́довавый.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 3
Си́лою во е́же благовести́ти, свы́ше Христо́с облече́ тя, досточу́дне Три́фоне. В пусты́ни бо, а́ки Моисе́ови дре́вле в купине́, гла́с ти́ бы́сть: «Иди́ в зе́млю необетова́нную и рцы́, я́ко любы́ обруче́ния Моего́ не разори́тся». Егда́ же ре́кл еси́: «Кто́ еси́ Го́споди»; отвеща́ ти: «Иису́с Е́смь, Его́же ты́ и́щеши». Сия́ же слы́шав, со умиле́нием прекло́нься, возопи́л еси́ Тому́: Аллилу́иа.
Икос 3
Иму́щу ти́, а́ки Моисе́й, смире́ние ве́лие, во е́же отрещи́ся такова́ зва́ния, ре́кл еси́, преподо́бне: «Неве́жда е́смь, Го́споди, и малокни́жен». Оба́че То́й запове́да ти́: «Ничесо́же вопреки́ глаго́ли, я́ко на вся́ послю́ тя, и и́деши. вся́, я́же запове́даю ти́, глаго́ли, не убо́йся, с тобо́ю бо Е́смь». Сего́ ра́ди вопие́м ти́:
Ра́дуйся, ра́дости роди́телей твои́х оправда́ние; ра́дуйся, ви́девый сла́вы О́тчия сия́ние.
Ра́дуйся, я́ко благода́ть Бо́жия излия́ся на тя́ бога́тно; ра́дуйся, я́ко разуме́ние ти́ язы́ков даде́ся.
Ра́дуйся, я́ко на́йде на тя́ ду́х прему́дрости и ве́дения; ра́дуйся, Ду́ха Свята́го прия́телище.
Ра́дуйся, си́лою Бо́жиею а́ки мече́м препоя́санный; ра́дуйся, я́ко ры́барь ко океа́ну на уловле́ние ду́ш челове́ческих во спасе́ние призва́нный.
Ра́дуйся, Андре́а Первозва́ннаго, на гора́х Ки́евских благове́стника ревни́телю; ра́дуйся, Мефо́диа и Кири́лла избра́нный после́дователю.
Ра́дуйся, Гу́риа и Варсоно́фиа, Стефа́на же и Инноке́нтиа досто́йный прее́мниче.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 4
Бу́ри океа́на хла́дна не убоя́вся, любо́вию Христо́вою согрева́емь, во страну́ се́верную пресели́лся еси́, досточу́дне Три́фоне, да предложи́ши та́мо наро́ду Ло́пску о́гнь любве́ Бо́жия, хла́д и мра́к души́ разгоня́ющ, во е́же чи́стым се́рдцем и усты́ воспева́ти: Аллилу́иа.
Икос 4
Слы́шаще и́долов посрамле́ние от тебе́, злочести́вии люди́й си́х учи́телие, кебу́ни нарица́еми, зло́бу ве́лию воздвиго́ша на тя́, преподо́бне, по лани́тома бию́ще, по ка́мением влача́ще, и и́ны па́кости де́юще. Мы́ же зря́ще тя́, со смире́нием такова́я прие́млюща, уми́льно вопие́м:
Ра́дуйся, я́ко купе́ц многоце́нна ра́ди би́сера ко океа́ну устреми́выйся; ра́дуйся, вве́ргий мре́жу свою́ на уловле́ние ду́ш во спасе́ние.
Ра́дуйся, тщету́ и́долов обличи́вый; ра́дуйся, сего́ ра́ди а́ки Па́влово от иуде́й страда́ние прие́мый.
Ра́дуйся, я́ко сло́во Бо́жие све́тлостию лица́ твоего́ утвержда́шеся; ра́дуйся, я́ко сло́во твое́ про́йде в сердца́ окамене́нная.
Ра́дуйся, от Бо́га созда́ние всея́ тва́ри из небытия́ наро́ду ло́парску возвести́вый; ра́дуйся, благовести́вый си́м лю́дем во Ада́ме на́ше паде́ние, во Христе́ же обновле́ние.
Ра́дуйся, отринове́нныя Христо́вым обруче́нием уте́шивый; ра́дуйся, благове́стием твои́м небе́сныя ли́ки возвесели́вый.
Ра́дуйся, а́нгела предста́теля страны́ се́верныя себе́ яви́вый.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 5
Боготе́чней звезде́ уподо́бився, всю́ страну́ се́верную обте́кл еси́, досточу́дне Три́фоне. Я́ко бо денни́ца, со́лнцу предходя́щая, от язы́ка ло́пска приве́л еси́ ко Христу́ ча́д мно́жество, и́же со умиле́нием се́рдца прии́мше креще́ние, возопи́ша о тебе́ Бо́гу: Аллилу́иа.
Икос 5
Виде́ние бе́ ди́вное, егда́ от мра́чна неве́дения тобо́ю приведе́ннии Христо́ви сочета́шася: земля́ бо и не́бо ликова́ху, во струя́х Пече́нги, а́ки Иорда́на и Днепра́, зря́ща мно́жество креща́емых. Помина́юще у́бо сия́, восклица́ем ти́:
Ра́дуйся, гла́се вопию́щаго, от наро́да ло́пска услы́шанный; ра́дуйся, Крести́теля Христо́ва собесе́дниче.
Ра́дуйся, я́ко тма́ и́дольская от тебе́ разори́ся; ра́дуйся, я́ко кре́ст, а́ки зна́мя побе́дное, тобо́ю зде́ водрузи́ся.
Ра́дуйся, я́ко трапе́за бесо́вская ни во что́ же та́мо вмени́ся; ра́дуйся, я́ко вме́сто тоя́ утверди́ся та́мо трапе́за Христо́ва спаси́тельная.
Ра́дуйся, тобо́ю бо Ма́терь Бо́жия просла́вися; ра́дуйся, я́ко святи́и просвеще́нным тобо́ю лю́дем при́сни ста́ша.
Ра́дуйся, я́ко Влади́мир святы́й, зря́ ча́д умноже́ние, возвесели́ся; ра́дуйся, в распу́тиих ми́ра сего́ обреты́й на ве́черю Христо́ву избра́нныя.
Ра́дуйся, Це́ркве от наро́да ло́пска созда́телю.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 6
Егда́ пропове́дано бы́сть Ева́нгелие все́й стране́ се́верней, и́н по́двиг прия́л еси́ на себе́, досточу́дне Три́фоне. Язы́ку бо креще́ну бы́вшу, а́бие прие́м о́браз а́нгельский, созда́л еси́ оби́тель Живонача́льныя Тро́ицы, в ню́же стече́ся и́нок мно́жество, во е́же пе́ти Бо́гу: Аллилу́иа.
Икос 6
Возсия́ во мра́це Се́вера, я́ко свети́льник све́та невече́рняго, оби́тель от тебе́ созда́нная, све́том Тро́ическим вся́ осиява́ющая. Те́мже ра́дующеся вопие́м ти́:
Ра́дуйся, апо́столом весе́лие, преподо́бным же удобре́ние; ра́дуйся, куку́лем, а́ки венце́м незло́бия, главу́ свою́ увязи́вый.
Ра́дуйся, по́ясом чре́сла своя́ во умерщвле́ние пло́ти препоя́савый; ра́дуйся, Иоа́нну Бо́гом возлю́бленну поревнова́вый.
Ра́дуйся, нестяжа́ния учи́телю; ра́дуйся, смире́ния вели́каго носи́телю.
Ра́дуйся, ка́меню, на не́мже созда́ся жили́ще Пресвяты́я Тро́ицы; ра́дуйся, в жили́щих тмы́ селе́ние све́та невече́рняго соде́лавый.
Ра́дуйся, я́ко возстена́ кня́зь ми́ра сего́, зря́ во́инства Христо́ва водворе́ние; ра́дуйся, я́ко зде́ ста́ колесни́ца, Иезеки́илем созерца́нная.
Ра́дуйся, я́ко вознесе́ся седя́щему на не́й пе́снь вели́кая, в вы́шних песносло́вимая.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 7
Хотя́й ча́да своя́ препита́ти и спасти́, егда́ гла́д стране́ прилучи́ся, блаже́нному Гу́рию пре́дал еси́, досточу́дне Три́фоне, оби́тель от тебе́ созда́нную, са́м же изше́д во Оте́чествие, осмери́цу ле́т по градо́м та́мо прехожда́л еси́, дая́ния бла́га прие́мля и поя́ Бо́гу: Аллилу́иа.
Икос 7
Но́вую купе́ль Силоа́мскую яви́ тя Бо́г, преподо́бне, егда́ стра́нен сы́й во Оте́чествии, прие́мля дая́ния, многоце́нна сокро́вища все́м источа́л еси́, тобо́ю бо слепи́и прозира́ху, неми́и глаго́лаху, неду́жнии здра́вие улуча́ху. Чудя́щеся сему́, ублажа́ем тя́:
Ра́дуйся, Моисе́ови уподо́бивыйся; ра́дуйся, Тови́та пра́ведна ревни́телю.
Ра́дуйся, я́ко Тови́а в путе́х а́нгелом хране́нный; ра́дуйся, святи́теля Никола́а Мирлики́йскаго подража́телю.
Ра́дуйся, Сампсо́на страннолюби́ва и Филаре́та ми́лостива увесели́телю; ра́дуйся, а́лчущих пита́телю.
Ра́дуйся, си́рых заступле́ние; ра́дуйся, вдови́ц огражде́ние.
Ра́дуйся, младе́нцев соблюде́ние; ра́дуйся, милосе́рдия учи́телю.
Ра́дуйся, о́бразе жития́ богоуго́днаго.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 8
Стра́нствие скончава́я, к ца́рствующему гра́ду устреми́лся еси́, досточу́дне Три́фоне, иде́же но́вое о тебе́ чу́до благоволи́ Бо́г сотвори́ти: не су́щу бо еще́ ти́ та́мо, со еди́нем от оби́тели Солове́цкия царе́ви предста́л еси́ ди́вно. Те́мже последи́ то́й, прие́мль тя́ любо́вию, вся́каго испо́лни дая́ния, поя́ Бо́гу: Аллилу́иа.
Икос 8
Ве́сь благогове́инства испо́лнився, в то́е же вре́мя царе́вич Фео́дор, изше́д от це́ркве, посла́ ти, преподо́бне, оде́жды своя́, я́ко да ми́лостыня его́ предъи́дет ца́рскому дая́нию, е́же и бы́сть по се́м ве́лие. Те́мже вопие́м ти́:
Ра́дуйся, смире́ния ра́ди вознесе́нный; ра́дуйся, си́льным ми́ра сего́ явле́нный.
Ра́дуйся, я́ко ца́рь прише́ствию твоему́ удиви́ся; ра́дуйся, я́ко явле́нием двою́ то́й возвесели́ся.
Ра́дуйся, от царя́ досто́йне почте́нный; ра́дуйся, от сы́на царе́ва одаре́нный и возлю́бленный.
Ра́дуйся, от напа́стей сего́ вы́ну соблюда́вый; ра́дуйся, я́ко ми́лостынею его́ оби́тель твоя́ снабде́ся.
Ра́дуйся, я́ко благоче́стием его́ ца́рство Росси́йское увесели́ся; ра́дуйся, я́ко ца́рство на́ше цари́ благочести́выми украша́ется.
Ра́дуйся, я́ко святы́ми му́жи о́ное утвержда́ется.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 9
Вся́ких дарова́ний испо́лнен сы́й, па́ки во страну́ се́верную, а́ки со́лнце к захожде́нию, прите́к, досточу́дне Три́фоне, созда́л еси́ це́рковь благове́рных князе́й Бори́са и Гле́ба, и оста́вль оби́тель, в до́льней пусты́ни водвори́вся, оста́ток дни́й свои́х препроводи́л еси́ в терпе́нии мно́зе, поя́ Бо́гу: Аллилу́иа.
Икос 9
Вити́и от и́нок ди́вное е́же ти́ тва́рей повинове́ние всю́ду возвести́ша, преподо́бне: не су́щу бо ти́ еди́ножды в ке́ллии, зве́рь ди́вий в ню́ вни́де и нача́т бы́вшая я́сти. Возвра́щшу же ти́ ся и наказа́вшу сего́, николи́же па́ки ко оби́тели твое́й от таце́х приближа́тися сме́яше. Сему́ же чудя́щеся, взыва́ем ти́:
Ра́дуйся, ла́стовице пустыннолюби́вая; ра́дуйся, Успе́нския пу́стыни украше́ние.
Ра́дуйся, молча́ния о́бразе; ра́дуйся, прило́ги лука́ваго уразуме́вый.
Ра́дуйся, горды́ни его́ не приложи́выйся; ра́дуйся, стре́лы того́ безси́льны яви́вый.
Ра́дуйся, в коне́ц сего́ посрами́вый; ра́дуйся, Ада́му первозда́нну уподо́бивыйся.
Ра́дуйся, я́ко тя́ зве́рие ди́вии царя́ себе́ позна́ша; ра́дуйся, от земноро́дных прозябе́ние ди́вное.
Ра́дуйся, кораблю́ вели́кий, ко приста́нищу ти́хому прибли́зивыйся.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 10
Спасти́ хотя́ со́бранныя, пре́жде кончи́ны твоея́ досточу́дне Три́фоне, па́ки во оби́тель твою́ преше́л еси́, и Бо́гови служе́ние запове́дал еси́ бра́тии: ю́же гряду́щаго ра́ди озлобле́ния Христо́вым уте́шив милосе́рдием, в небе́сныя кро́вы отше́л еси́, иде́же со святы́ми пое́ши Бо́гу: Аллилу́иа.
Икос 10
Стена́ бы́л еси́ ча́дом оби́тели твоея́, преподо́бне, и́же со умиле́нием пою́ще надгро́бная, положи́ша свято́е те́ло твое́, я́коже запове́дал еси́, в пу́стыни тобо́ю возлю́бленней Зря́ще же о́ное то́ки чуде́с источа́ющее, ра́достно возопи́ша:
Ра́дуйся, Пресвяты́я Тро́ицы изря́дный почита́телю; ра́дуйся, Де́вы Преблагослове́нныя ублажа́телю.
Ра́дуйся, святы́м Зоси́ме, Савва́тию и Ге́рману единонра́вный; ра́дуйся, до́бре Бо́гови пожи́вый.
Ра́дуйся, в ста́рости масти́те ко Христу́ пресели́выйся; ра́дуйся, я́ко глава́ твоя́, приклоне́на су́щи, труды́ изве́ствоваше.
Ра́дуйся, седи́на бо твою́ му́дрость облича́ше; ра́дуйся, тала́нты, от Бо́га ти́ вда́нныя, приумно́живый.
Ра́дуйся, благи́й ра́бе, вше́дый в ра́дость Го́спода твоего́; ра́дуйся, честны́х мона́хов похвало́ и украше́ние.
Ра́дуйся, оби́тели твоея́ при́сный Бо́гови предста́телю.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 11
Пе́ние всеумиле́нное прино́сим ти́, досточу́дне Три́фоне! Оби́тель бо твоя́, а́ще по словеси́ твоему́ от све́ев разори́ся, оба́че страда́нием бра́тий просла́вльшися, па́ки возста́вися. А́ще и втори́цею опусте́, си́лою же лу́чшею ны́не обнови́ся, в ню́же и́ноцы теку́ще, о тебе́ ра́достно Бо́гови пою́т пе́снь немо́лчную: Аллилу́иа.
Икос 11
Светоза́рней звезде́ уподо́бися оби́тель твоя́, преподо́бне, егда́ ю́ све́е разоря́ху: ча́да бо, тобо́ю со́бранная, терпе́нием враги́ посрами́ша, венцы́ му́ченическими украси́шася, и ку́пно с це́рковию огне́м попали́вшася, я́ко же́ртва уго́дна Бо́гови принесо́шася. Помина́юще у́бо такова́я, уми́льно вопие́м ти́:
Ра́дуйся, гряду́щая в Бо́зе созерца́яй; ра́дуйся, оби́тели разоре́ние предъяви́вый.
Ра́дуйся, до вре́мене ю́ во́и небе́сными соблюда́вый; ра́дуйся, я́ко учени́к тво́й Ио́на, моли́твами тя́ вы́ну чты́й, в пу́стыни твое́й от меча́ сконча́ся.
Ра́дуйся, Гу́риа, Ге́рмана и ины́х просла́вленных Бо́гом подви́жников ве́ры и благоче́стия наста́вниче; ра́дуйся, я́ко вся́ ча́да твоя́ от Христа́ прия́шася.
Ра́дуйся, я́ко оби́тель твоя́ па́ки возста́вися; ра́дуйся, я́ко па́ки те́м свети́льник благоче́стия страны́ дарова́ся.
Ра́дуйся, то́ю лжеуче́ния сокруша́ются; ра́дуйся, святы́я бо твоя́ мо́щи а́ки ка́мень краеуго́лен явля́ются.
Ра́дуйся, я́ко вся́ коему́ждо поле́зная моли́твами твои́ми да́руеши.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 12
Благода́ти Христо́вы носи́телю, досточу́дне Три́фоне! С ве́рою тя́ призыва́ющым поле́зная подае́ши, от напа́стей же, я́ко царя́ Фео́дора, ско́ро избавля́еши. Сему́ бо но́щию яви́вся во ста́не, ре́кл еси́: «Ско́ро изы́ди, да не на́йдет на тя́ сме́рть неча́янная». Сия́ же сотво́ршу ему́, а́бие от стреля́ния вра́жеска ски́ния опрове́ржеся и ло́же размета́ся, лю́дие же чудя́щеся поя́ху: Аллилу́иа.
Икос 12
Пою́ще Бо́гу пе́снь благодаре́ния, ра́дуемся о тебе́, преподо́бне, я́ко вся́ на́м поле́зная да́руеши. Тобо́ю бо па́губа отгоня́ется, здра́вие улуча́ется, ми́р и благоустрое́ние водворя́ется: поне́же на небесе́х при́сно хода́тайствуеши о на́с, взыва́ющих ти́ си́це:
Ра́дуйся, на небесе́х о на́с те́плый предста́телю; ра́дуйся, почита́ющих тя́ ве́рный храни́телю.
Ра́дуйся, не чту́щих тебе́ вразуми́телю; ра́дуйся, духо́в зло́бы отгони́телю.
Ра́дуйся, помраче́нных умы́ просвети́телю; ра́дуйся, неду́гов изря́дный цели́телю.
Ра́дуйся, от потопле́ния морска́го спаса́телю; ра́дуйся, я́ко тобо́ю царю́ Фео́дору дарова́ся избавле́ние.
Ра́дуйся, я́ко тобо́ю небе́сное царе́й на́ших позна́ся соблюде́ние; ра́дуйся, я́ко тобо́ю вся́ка печа́ль отгоня́ется.
Ра́дуйся, я́ко тобо́ю благоче́стие во оби́тели твое́й и по все́й стране́ се́й утвержда́ется.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 13
О преподо́бне и досточу́дне о́тче на́ш Три́фоне! Живонача́льней предстоя́ Тро́ице, в непристу́пнем све́те и ра́дости неизглаго́ланней, приими́ сие́ от умиле́ннаго ти́ се́рдца возноси́мое хвале́ние, и не преста́й моля́ся о на́с, да пожи́вше благоче́стне, по успе́нии на́шем сре́тени от тебе́ обря́щемся на небесе́х, и воспое́м Бо́гови со а́нгельскими ли́ки: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелы Своя́ страна́м и язы́ком предста́тели дарова́вый Бо́г, егда́ прии́де време́н исполне́ние, моле́ния ра́ди а́нгела страны́, я́же бли́з океа́на хла́дна, и наро́да ло́пска предста́теля, призва́ тя во благове́стие, всехва́льный Три́фоне, я́ко да спасе́ни бу́дут лю́дие ти́и. Помина́юще у́бо сия́, вопие́м ти́:
Ра́дуйся, свяще́ннаго ко́рене благо́е прозябе́ние; ра́дуйся, пусты́нным изде́тска житие́м сосу́д избра́н себе́ Бо́гови угото́вавый.
Ра́дуйся, зва́н бы́в свы́ше, к океа́ну мо́рю пресели́выйся; ра́дуйся, во Христе́ гряду́щее избавле́ние та́мо благовести́вый.
Ра́дуйся, поспе́шествующей ти́ благода́ти Бо́жией, приведы́й ко Христу́ ча́д мно́жество; ра́дуйся, соверше́нною Христа́ любо́вию уязви́вся, о́браз по се́м и́ноческий на себе́ прие́мый.
Ра́дуйся, Тро́ицы Живонача́льныя оби́тель устро́ивый, и я́же ко Христу́ мона́хов ликостоя́ния; ра́дуйся, ве́лия ра́ди смире́ния от нача́льства над оби́телию отреки́йся, повелева́яй зверьми́ ди́виими.
Ра́дуйся, тече́ние свое́ святоле́пне сконча́в, благоче́стне ко Христу́ отше́дый; ра́дуйся, я́ко оби́тель твоя́, от вра́г разоре́нная, по словеси́ твоему́ па́ки возста́вися.
Ра́дуйся, по преставле́нии твое́м царя́ Фео́дора спасы́й и все́м потре́бная ско́ро подава́яй.
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Кондак 1
Избра́вшу тя́ Пастыренача́льнику Христу́ во апо́стола страны́ се́верныя, а́бие отри́нул еси́, досточу́дне Три́фоне, ми́ра сего́ кра́сная, претерпе́в же вся́ко озлобле́ние, благовести́л еси́ седя́щым во тме́ и се́ни сме́ртней Бо́га я́вльшагося пло́тию: те́мже со апо́столы сра́дуется ду́х тво́й в небе́сных оби́телех. Име́я у́бо дерзнове́ние ко Христу́ Бо́гу на́шему, от вся́ких бе́д изба́ви на́с зову́щих:
Ра́дуйся, Три́фоне, страны́ се́верныя просвети́телю, Пече́нгский чудотво́рче.
Молитвы
О Всесвяты́я Тро́ицы уго́дниче, о блаже́ннейший и равноапо́стольный па́стырю, преподо́бне о́тче на́ш Три́фоне! Не забу́ди твоея́ па́ствы, помина́й во святы́х твои́х и богоприя́тных моли́твах, приноси́мых в Тро́ице сла́вимому Бо́гу, ста́до твое́, е́же са́м, по благове́стию от а́нгела, прише́ствием твои́м собра́л и упа́сл еси́. Поне́же в сродстве́ твоего́ мирска́го жили́ща, слы́шав во святе́й це́ркви на у́трени пою́щих: «Пусты́нным живо́т сокрове́н е́сть, боже́ственным раче́нием воскриля́ющымся»; и от того́ воспери́вся боже́ственною любо́вию, оста́вль до́м и сродство́, и прише́д вскра́й се́верныя страны́, просвети́л еси́ святы́м креще́нием неве́дущий Творца́, все́х Бо́га, ло́парский наро́д, за е́же, во утвержде́нии христиа́нския ве́ры, мно́га изгна́ния и злоключе́ния подъя́л еси́. И бли́з реки́ Пече́нги в пусты́ню всели́вся, бра́тию из мно́гих градо́в и ве́сей собра́в, ве́лию оби́тель воздви́гл еси́, и при отше́ствии к небе́сным селе́нием, о посеще́нии твоея́ оби́тели проро́чествия да́р от Бо́га восприя́л еси́, и по сме́рти на мо́ри и на су́ши мно́га чудеса́ и цельбы́ с ве́рою прося́щым сотвори́л еси́ и ны́не твори́ши. Те́мже мо́лим тя́, не забу́ди присеща́ти ча́д твои́х: моли́ за ны́, преподо́бне о́тче, приходя́щыя к тебе́ с ве́рою, и за вся́ христиа́ны, я́ко име́яй дерзнове́ние к Безсме́ртному Царю́ Христу́ все́х Бо́гу. Не премолчи́ за ны́ ко Го́споду, и не пре́зри на́с ве́рою и любо́вию чту́щих тя́ и помина́ющих святу́ю па́мять твою́. А́ще бо ты́ и преста́вился еси́ от на́с те́лом, но и по сме́рти живы́й ду́хом, всегда́ чудоде́йствуеши. Моли́твами твои́ми сохраня́й на́с от стре́л и ко́зней вра́жиих, и вся́кия пре́лести бесо́вския, и от вра́г ви́димых и неви́димых. Па́стырю на́ш до́брый! А́ще мо́щи твоя́ в ра́це незри́ми на́м су́ть, оба́че, поне́же всегда́ в Тро́ице сла́вимому Бо́гу, при Престо́ле Его́ непостижи́маго вели́чествия неотсту́пно в моли́твах предстои́ши, усе́рдно к тебе́ прибега́ем и про́сим: умоли́ и испроси́ на́м вре́мя к покая́нию, да в ча́с исхо́да души́ пре́йдем от земны́х к небе́сным, мыта́рств же возду́шных и ве́чныя му́ки изба́вимся, и Небе́сному Ца́рствию насле́дницы бу́дем со все́ми от ве́ка угоди́вшими. О всеблаже́нне о́тче на́ш Три́фоне! Не пре́зри и ны́не на́с, притека́ющих к тебе́, я́ко да моли́твами твои́ми и по́мощию спаса́еми, сла́ву и благодаре́ние, хвалу́ и поклоне́ние за вся́ в Тро́ице еди́ному Бо́гу, все́х Созда́телю возсыла́ем, Отцу́ и Сы́ну, и Свято́му Ду́ху, ны́не и при́сно и во ве́ки веко́в. Ами́нь.
Конда́къ а҃
И҆збра́вшꙋ тѧ̀ пастыренача́льникꙋ хрⷭ҇тꙋ̀ во а҆по́стола страны̀ сѣ́верныѧ, а҆́бїе ѿри́нꙋлъ є҆сѝ, досточꙋ́дне трѵ́фѡне, мі́ра сегѡ̀ кра̑снаѧ: претерпѣ́въ же всѧ́ко ѡ҆ѕлобле́нїе, бл҃говѣсти́лъ є҆сѝ сѣдѧ́щымъ во тмѣ̀ и҆ сѣ́ни сме́ртнѣй бг҃а ꙗ҆́вльшагосѧ пло́тїю: тѣ́мже со а҆пⷭ҇лы сра́дꙋетсѧ дꙋ́хъ тво́й въ нбⷭ҇ныхъ ѡ҆би́телехъ. и҆мѣ́ѧ ᲂу҆̀бо дерзнове́нїе ко хрⷭ҇тꙋ̀ бг҃ꙋ на́шемꙋ, ѿ всѧ́кихъ бѣ́дъ и҆зба́ви на́съ зовꙋ́щихъ:
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
І҆́косъ а҃
А҆́гг҃лы своѧ̑ страна́мъ и҆ ꙗ҆зы́кѡмъ предста́тели дарова́вый бг҃ъ, є҆гда̀ прїи́де време́нъ и҆сполне́нїе, моле́нїѧ ра́ди а҆́гг҃ла страны̀, ꙗ҆́же близ̾ ѻ҆кеа́на хла́дна, и҆ наро́да ло́пска предста́телѧ, призва́ тѧ во бл҃говѣ́стїе, всехва́льный трѵ́фѡне, ꙗ҆́кѡ да спасе́ни бꙋ́дꙋтъ лю́дїе ті́и. помина́юще ᲂу҆̀бо сїѧ̑, вопїе́мъ тѝ:
Ра́дꙋйсѧ, свѧще́ннагѡ ко́рене бл҃го́е прозѧбе́нїе: ра́дꙋйсѧ, пꙋсты́ннымъ и҆з̾дѣ́тска житїе́мъ сосꙋ́дъ и҆збра́нъ себѐ бг҃ови ᲂу҆гото́вавый.
Ра́дꙋйсѧ, зва́нъ бы́въ свы́ше, къ ѻ҆кеа́нꙋ мо́рю пресели́выйсѧ: ра́дꙋйсѧ, во хрⷭ҇тѣ̀ грѧдꙋ́щее и҆збавле́нїе та́мѡ бл҃говѣсти́вый.
Ра́дꙋйсѧ, поспѣ́шествꙋющей тѝ бл҃года́ти бж҃їей, приведы́й ко хрⷭ҇тꙋ̀ ча́дъ мно́жество: ра́дꙋйсѧ, соверше́нною хрⷭ҇та̀ любо́вїю ᲂу҆ѧзви́всѧ, ѡ҆́бразъ по се́мъ и҆́ноческїй на себѐ прїе́мый.
Ра́дꙋйсѧ, трⷪ҇цы живонача́льныѧ ѡ҆би́тель ᲂу҆стро́ивый, и҆ ꙗ҆̀же ко хрⷭ҇тꙋ̀ мона́хѡвъ ликостоѧ̑нїѧ: ра́дꙋйсѧ, ве́лїѧ ра́ди смире́нїѧ ѿ нача́льства над̾ ѡ҆би́телїю ѿрекі́йсѧ, повелѣва́ѧй ѕвѣрьмѝ ди́вїими.
Ра́дꙋйсѧ, тече́нїе своѐ ст҃олѣ́пнѣ сконча́въ, бл҃гоче́стнѣ ко хрⷭ҇тꙋ̀ ѿше́дый: ра́дꙋйсѧ, ꙗ҆́кѡ ѡ҆би́тель твоѧ̀, ѿ вра̑гъ разоре́ннаѧ, по словесѝ твоемꙋ̀ па́ки возста́висѧ.
Ра́дꙋйсѧ, по преставле́нїи твое́мъ царѧ̀ ѳео́дѡра спасы́й и҆ всѣ̑мъ потрє́бнаѧ ско́рѡ подава́ѧй.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ в҃
Ви̑дѧща роди́тєлѧ твоѧ̑, досточꙋ́дне трѵ́фѡне, и҆з̾дѣ́тска по́стническое твоѐ житїѐ, а҆́ще и҆ стꙋжа́стасѧ ѡ҆ твое́мъ терпѣ́нїи, ѻ҆ба́че ра́довастасѧ, проразꙋмѣва̑юща, ꙗ҆́кѡ хо́щетъ гдⷭ҇ь воздви́гнꙋти тебѐ но́ва мі́рꙋ свѣти́льника, и҆ томꙋ̀ воспѣва́ста: А҆ллилꙋ́їа.
І҆́косъ в҃
Ра́зꙋмъ свы́ше ѡ҆сени́ тѧ, прпⷣбне, всего̀ себѐ преда́ти хрⷭ҇то́вꙋ и҆зволе́нїю, и҆́мже въ пꙋсты́ню приведе́нъ бы́лъ є҆сѝ: та́мѡ бо на́йде на тѧ̀ си́ла бж҃їѧ, во є҆́же бл҃говѣсти́ти є҆ѵⷢ҇лїе хрⷭ҇то́во наро́дꙋ и҆но́мꙋ. тѣ́мже вопїе́мъ тѝ:
Ра́дꙋйсѧ, і҆ере́а бж҃їѧ ра́досте и҆ ма́тере твоеѧ̀ весе́лїе: ра́дꙋйсѧ, роди́телей честны́хъ ча́до, ѿ бг҃а ѕѣлѡ̀ возлю́бленное.
Ра́дꙋйсѧ, дѣ́вство драго́е и҆ чистотꙋ̀ дꙋше́внꙋю соблюды́й непорѡ́чны: ра́дꙋйсѧ, и҆з̾дѣ́тска въ домꙋ̀ бж҃їи, а҆́ки хрⷭ҇то́съ ѻ҆́трокъ, примета́тисѧ и҆зво́ливый.
Ра́дꙋйсѧ, ᲂу҆слы́шавый та́мѡ сло́во рече́нное: пꙋсты̑ннымъ живо́тъ сокрове́нъ є҆́сть, бж҃е́ственнымъ раче́нїемъ воскрилѧ́ющымсѧ.
Ра́дꙋйсѧ, ѻ҆́нымъ гла́сомъ, ꙗ҆́кѡ во́инъ, на слꙋже́нїе царю̀ призва́нный: ра́дꙋйсѧ, пꙋсты́ннымъ житїе́мъ себѐ въ до́брѣмъ и҆зволе́нїи ᲂу҆тверди́вый.
Ра́дꙋйсѧ, во ю҆́ности плѡтскі́ѧ стра̑сти ᲂу҆мертви́вый: ра́дꙋйсѧ, посто́мъ дꙋ́шꙋ свою̀, во є҆́же гла́съ свы́ше слы́шати, пред̾ѡчи́стивый.
Ра́дꙋйсѧ, ѿ хрⷭ҇та̀ ꙗ҆зы́кꙋ ло́пскꙋ и҆збра́нный бл҃говѣ́стниче: ра́дꙋйсѧ, є҆́же ѡ҆ мі́рѣ се́мъ ѿложи́вый попече́нїе и҆ а҆́бїе вослѣ́дъ хрⷭ҇тꙋ̀ послѣ́довавый.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ г҃
Си́лою во є҆́же бл҃говѣсти́ти, свы́ше хрⷭ҇то́съ ѡ҆блече́ тѧ, досточꙋ́дне трѵ́фѡне. въ пꙋсты́ни бо, а҆́ки мѡѷсе́ови дре́вле въ кꙋпинѣ̀, гла́съ тѝ бы́сть: и҆дѝ въ зе́млю неѡбѣтова́ннꙋю и҆ рцы̀, ꙗ҆́кѡ любы̀ ѡ҆брꙋче́нїѧ моегѡ̀ не разори́тсѧ. є҆гда́ же ре́клъ є҆сѝ: кто̀ є҆сѝ гдⷭ҇и; ѿвѣща́ ти: і҆и҃съ є҆́смь, є҆го́же ты̀ и҆́щеши. сїѧ̑ же слы́шавъ, со ᲂу҆миле́нїемъ прекло́ньсѧ, возопи́лъ є҆сѝ томꙋ̀: А҆ллилꙋ́їа.
І҆́косъ г҃
И҆мꙋ́щꙋ тѝ, а҆́ки мѡѷсе́й, смире́нїе ве́лїе, во є҆́же ѿрещи́сѧ такова̀ зва́нїѧ, ре́клъ є҆сѝ, прпⷣбне: невѣ́жда є҆́смь, гдⷭ҇и, и҆ малокни́женъ. ѻ҆ба́че то́й заповѣ́да тѝ: ничесѡ́же вопрекѝ глаго́ли, ꙗ҆́кѡ на всѧ̑ послю́ тѧ, и҆ и҆́деши: всѧ̑, ꙗ҆́же заповѣ́даю тѝ, глаго́ли, не ᲂу҆бо́йсѧ: съ тобо́ю бо є҆́смь. сегѡ̀ ра́ди вопїе́мъ тѝ:
Ра́дꙋйсѧ, ра́дости роди́телей твои́хъ ѡ҆правда́нїе: ра́дꙋйсѧ, ви́дѣвый сла́вы ѻ҆́ч҃їѧ сїѧ́нїе.
Ра́дꙋйсѧ, ꙗ҆́кѡ бл҃года́ть бж҃їѧ и҆злїѧ́сѧ на тѧ̀ бога́тнѡ: ра́дꙋйсѧ, ꙗ҆́кѡ разꙋмѣ́нїе тѝ ѧ҆зы́ковъ даде́сѧ.
Ра́дꙋйсѧ, ꙗ҆́кѡ на́йде на тѧ̀ дꙋ́хъ премꙋ́дрости и҆ вѣ́дѣнїѧ: ра́дꙋйсѧ, дх҃а ст҃а́гѡ прїѧ́телище.
Ра́дꙋйсѧ, си́лою бж҃їею а҆́ки мече́мъ препоѧ́санный: ра́дꙋйсѧ, ꙗ҆́кѡ ры́барь ко ѻ҆кеа́нꙋ на ᲂу҆ловле́нїе дꙋ́шъ человѣ́ческихъ во сп҃се́нїе призва́нный.
Ра́дꙋйсѧ, а҆ндре́а первозва́ннагѡ, на гора́хъ кі́евскихъ бл҃говѣ́стника, ревни́телю: ра́дꙋйсѧ, меѳо́дїа и҆ кѷрі́лла и҆збра́нный послѣ́дователю.
Ра́дꙋйсѧ, гꙋ́рїа и҆ варсоно́фїа, стефа́на же и҆ і҆нноке́нтїа досто́йный прее́мниче.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ д҃
Бꙋ́ри ѻ҆кеа́на хла́дна не ᲂу҆боѧ́всѧ, любо́вїю хрⷭ҇то́вою согрѣва́емь, во странꙋ̀ сѣ́вернꙋю пресели́лсѧ є҆сѝ, досточꙋ́дне трѵ́фѡне, да предложи́ши та́мѡ наро́дꙋ ло́пскꙋ ѻ҆́гнь любвѐ бж҃їѧ, хла́дъ и҆ мра́къ дꙋшѝ разгонѧ́ющъ, во є҆́же чи́стымъ се́рдцемъ и҆ ᲂу҆сты̀ воспѣва́ти: А҆ллилꙋ́їа.
І҆́косъ д҃
Слы́шаще і҆́дѡлѡвъ посрамле́нїе ѿ тебѐ ѕлочести́вїи, люді́й си́хъ ᲂу҆чи́телїе, кебꙋ́ни нарица́еми, ѕло́бꙋ ве́лїю воздвиго́ша на тѧ̀, прпⷣбне, по лани́тома бїю́ще, по ка́менїємъ влача́ще, и҆ и҆́ны па́кѡсти дѣ́юще. мы́ же, зрѧ́ще тѧ̀, со смире́нїемъ такова̑ѧ прїе́млюща, ᲂу҆ми́льнѡ вопїе́мъ:
Ра́дꙋйсѧ, ꙗ҆́кѡ кꙋпе́цъ многоцѣ́нна ра́ди би́сера ко ѻ҆кеа́нꙋ ᲂу҆стреми́выйсѧ: ра́дꙋйсѧ, вве́ргїй мре́жꙋ свою̀ на ᲂу҆ловле́нїе дꙋ́шъ во сп҃се́нїе.
Ра́дꙋйсѧ, тщетꙋ̀ і҆́дѡлѡвъ ѡ҆бличи́вый: ра́дꙋйсѧ, сегѡ̀ ра́ди а҆́ки па́ѵлово ѿ і҆ꙋдє́й страда́нїе прїе́мый.
Ра́дꙋйсѧ, ꙗ҆́кѡ сло́во бж҃їе свѣ́тлостїю лица̀ твоегѡ̀ ᲂу҆твержда́шесѧ: ра́дꙋйсѧ, ꙗ҆́кѡ сло́во твоѐ про́йде въ сердца̀ ѡ҆каменє́ннаѧ.
Ра́дꙋйсѧ, ѿ бг҃а созда́нїе всеѧ̀ тва́ри и҆з̾ небытїѧ̀ наро́дꙋ ло́парскꙋ возвѣсти́вый: ра́дꙋйсѧ, бл҃говѣсти́вый си̑мъ лю́демъ во а҆да́мѣ на́ше паде́нїе, во хрⷭ҇тѣ́ же ѡ҆бновле́нїе.
Ра́дꙋйсѧ, ѿриновє́нныѧ хрⷭ҇то́вымъ ѡ҆брꙋче́нїемъ ᲂу҆тѣ́шивый: ра́дꙋйсѧ, бл҃говѣ́стїемъ твои́мъ небє́сныѧ ли́ки возвесели́вый.
Ра́дꙋйсѧ, а҆́гг҃ла предста́телѧ страны̀ сѣ́верныѧ себѐ ꙗ҆ви́вый.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ є҃
Бг҃оте́чнѣй ѕвѣздѣ̀ ᲂу҆подо́бивсѧ, всю̀ странꙋ̀ сѣ́вернꙋю ѡ҆бте́клъ є҆сѝ, досточꙋ́дне трѵ́фѡне. ꙗ҆́кѡ бо денни́ца, со́лнцꙋ предходѧ́щаѧ, ѿ ꙗ҆зы́ка ло́пска приве́лъ є҆сѝ ко хрⷭ҇тꙋ̀ ча́дъ мно́жество, и҆̀же со ᲂу҆миле́нїемъ се́рдца прїи́мше креще́нїе, возопи́ша ѡ҆ тебѣ̀ бг҃ꙋ: А҆ллилꙋ́їа.
І҆́косъ є҃
Видѣ́нїе бѣ̀ ди́вное, є҆гда̀ ѿ мра́чна невѣ́дѣнїѧ тобо́ю приведе́ннїи хрⷭ҇то́ви сочета́шасѧ: землѧ́ бо и҆ нб҃о ликова́хꙋ, во стрꙋѧ́хъ пече́нги, а҆́ки і҆ѻрда́на и҆ днѣпра̀, зрѧ́щѧ мно́жество креща́емыхъ. помина́юще ᲂу҆̀бо сїѧ̑, восклица́емъ тѝ:
Ра́дꙋйсѧ, гла́се вопїю́щагѡ, ѿ наро́да ло́пска ᲂу҆слы́шанный: ра́дꙋйсѧ, крести́телѧ хрⷭ҇то́ва собесѣ́дниче.
Ра́дꙋйсѧ, ꙗ҆́кѡ тьма̀ і҆́дѡльскаѧ ѿ тебѐ разори́сѧ: ра́дꙋйсѧ, ꙗ҆́кѡ крⷭ҇тъ, а҆́ки зна́мѧ побѣ́дное, тобо́ю здѣ̀ водрꙋзи́сѧ.
Ра́дꙋйсѧ, ꙗ҆́кѡ трапе́за бѣсо́вскаѧ ни во что́ же та́мѡ вмѣни́сѧ: ра́дꙋйсѧ, ꙗ҆́кѡ вмѣ́сто тоѧ̀ ᲂу҆тверди́сѧ та́мѡ трапе́за хрⷭ҇то́ва сп҃си́тельнаѧ.
Ра́дꙋйсѧ, тобо́ю бо мт҃рь бж҃їѧ просла́висѧ: ра́дꙋйсѧ, ꙗ҆́кѡ свѧті́и просвѣщє́ннымъ тобо́ю лю́демъ при́сни ста́ша.
Ра́дꙋйсѧ, ꙗ҆́кѡ влади́мїръ ст҃ы́й, зрѧ̀ ча́дъ ᲂу҆множе́нїе, возвесели́сѧ: ра́дꙋйсѧ, въ распꙋ́тїихъ мі́ра сегѡ̀ ѡ҆брѣты́й на ве́черю хрⷭ҇то́вꙋ и҆збра̑нныѧ.
Ра́дꙋйсѧ, цр҃кве ѿ наро́да ло́пска созда́телю.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ ѕ҃
Є҆гда̀ проповѣ́дано бы́сть є҆ѵⷢ҇лїе все́й странѣ̀ сѣ́вернѣй, и҆́нъ по́двигъ прїѧ́лъ є҆сѝ на себѐ, досточꙋ́дне трѵ́фѡне. ꙗ҆зы́кꙋ бо креще́нꙋ бы́вшꙋ, а҆́бїе прїе́мъ ѡ҆́бразъ а҆́гг҃льскїй, созда́лъ є҆сѝ ѡ҆би́тель живонача́льныѧ трⷪ҇цы, въ ню́же стече́сѧ и҆́нѡкъ мно́жество, во є҆́же пѣ́ти бг҃ꙋ: А҆ллилꙋ́їа.
І҆́косъ ѕ҃
Возсїѧ̀ во мра́цѣ сѣ́вера, ꙗ҆́кѡ свѣти́льникъ свѣ́та невече́рнѧгѡ, ѡ҆би́тель ѿ тебѐ созда́ннаѧ, свѣ́томъ трⷪ҇ческимъ всѧ̑ ѡ҆сїѧва́ющаѧ. тѣ́мже ра́дꙋющесѧ вопїе́мъ тѝ:
Ра́дꙋйсѧ, а҆пⷭ҇лѡмъ весе́лїе, прпⷣбнымъ же ᲂу҆добре́нїе: ра́дꙋйсѧ, кꙋкꙋ́лемъ, а҆́ки вѣнце́мъ неѕло́бїѧ, главꙋ̀ свою̀ ᲂу҆вѧзи́вый.
Ра́дꙋйсѧ, по́ѧсомъ чрє́сла своѧ̑ во ᲂу҆мерщвле́нїе пло́ти препоѧ́савый: ра́дꙋйсѧ, і҆ѡа́ннꙋ бг҃омъ возлю́бленнꙋ поревнова́вый.
Ра́дꙋйсѧ, нестѧжа́нїѧ ᲂу҆чи́телю: ра́дꙋйсѧ, смире́нїѧ вели́кагѡ носи́телю.
Ра́дꙋйсѧ, ка́меню, на не́мже созда́сѧ жили́ще прест҃ы́ѧ трⷪ҇цы: ра́дꙋйсѧ, въ жили́щихъ тьмы̀ селе́нїе свѣ́та невече́рнѧгѡ содѣ́лавый.
Ра́дꙋйсѧ, ꙗ҆́кѡ возстена̀ кнѧ́зь мі́ра сегѡ̀, зрѧ̀ во́инства хрⷭ҇то́ва водворе́нїе: ра́дꙋйсѧ, ꙗ҆́кѡ здѣ̀ ста̀ колесни́ца, і҆езекі́илемъ созерца́ннаѧ.
Ра́дꙋйсѧ, ꙗ҆́кѡ вознесе́сѧ сѣдѧ́щемꙋ на не́й пѣ́снь вели́каѧ, въ вы́шнихъ пѣсносло́вимаѧ.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ з҃
Хотѧ́й ча̑да своѧ̑ препита́ти и҆ спастѝ, є҆гда̀ гла́дъ странѣ̀ прилꙋчи́сѧ, бл҃же́нномꙋ гꙋ́рїю пре́далъ є҆сѝ, досточꙋ́дне трѵ́фѡне, ѡ҆би́тель ѿ тебѐ созда́ннꙋю, са́мъ же и҆зше́дъ во ѻ҆те́чествїе, ѻ҆смери́цꙋ лѣ́тъ по градѡ́мъ та́мѡ прехожда́лъ є҆сѝ, даѧ̑нїѧ бла̑га прїе́млѧ и҆ поѧ̀ бг҃ꙋ: А҆ллилꙋ́їа.
І҆́косъ з҃
Но́вꙋю кꙋпѣ́ль сїлѡа́мскꙋю ꙗ҆ви́ тѧ бг҃ъ, прпⷣбне, є҆гда̀ стра́ненъ сы́й во ѻ҆те́чествїи, прїе́млѧ даѧ̑нїѧ, многоцѣ̑нна сокрѡ́вища всѣ̑мъ и҆сточа́лъ є҆сѝ, тобо́ю бо слѣпі́и прозира́хꙋ, нѣмі́и глаго́лахꙋ, недꙋ́жнїи здра́вїе ᲂу҆лꙋча́хꙋ. чꙋдѧ́щесѧ семꙋ̀, ᲂу҆блажа́емъ тѧ̀:
Ра́дꙋйсѧ, мѡѷсе́ови ᲂу҆подо́бивыйсѧ: ра́дꙋйсѧ, тѡві́та пра́ведна ревни́телю.
Ра́дꙋйсѧ, ꙗ҆́кѡ тѡві́а въ пꙋте́хъ а҆́гг҃ломъ хране́нный: ра́дꙋйсѧ, ст҃и́телѧ мѷрлѷкі́йскагѡ подража́телю.
Ра́дꙋйсѧ, самѱѡ́на страннолюби́ва и҆ фїларе́та ми́лостива ᲂу҆весели́телю: ра́дꙋйсѧ, а҆́лчꙋщихъ пита́телю.
Ра́дꙋйсѧ, си́рыхъ застꙋпле́нїе: ра́дꙋйсѧ, вдови́цъ ѡ҆гражде́нїе.
Ра́дꙋйсѧ, младе́нцєвъ соблюде́нїе: ра́дꙋйсѧ, милосе́рдїѧ ᲂу҆чи́телю.
Ра́дꙋйсѧ, ѡ҆́бразе житїѧ̀ бг҃оꙋго́днагѡ.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ и҃
Стра́нствїе скончава́ѧ, къ ца́рствꙋющемꙋ гра́дꙋ ᲂу҆стреми́лсѧ є҆сѝ, досточꙋ́дне трѵ́фѡне, и҆дѣ́же но́вое ѡ҆ тебѣ̀ чꙋ́до бл҃говолѝ бг҃ъ сотвори́ти: не сꙋ́щꙋ бо є҆щѐ тѝ та́мѡ, со є҆ди́нѣмъ ѿ ѡ҆би́тели солове́цкїѧ царе́ви предста́лъ є҆сѝ ди́внѡ. тѣ́мже послѣдѝ то́й, прїе́мль тѧ̀ любо́вїю, всѧ́кагѡ и҆спо́лни даѧ́нїѧ, поѧ̀ бг҃ꙋ: А҆ллилꙋ́їа.
І҆́косъ и҃
Ве́сь бл҃гоговѣ́инства и҆спо́лнивсѧ, въ то́е же вре́мѧ царе́вичъ ѳео́дѡръ, и҆зше́дъ ѿ це́ркве, посла́ ти, прпⷣбне, ѡ҆дє́жды своѧ̑, ꙗ҆́кѡ да ми́лостынѧ є҆гѡ̀ пред̾и́детъ ца́рскомꙋ даѧ́нїю, є҆́же и҆ бы́сть по се́мъ ве́лїе. тѣ́мже вопїе́мъ тѝ:
Ра́дꙋйсѧ, смире́нїѧ ра́ди вознесе́нный: ра́дꙋйсѧ, си̑льнымъ мі́ра сегѡ̀ ꙗ҆вле́нный.
Ра́дꙋйсѧ, ꙗ҆́кѡ ца́рь прише́ствїю твоемꙋ̀ ᲂу҆диви́сѧ: ра́дꙋйсѧ, ꙗ҆́кѡ ꙗ҆вле́нїемъ двою̀ то́й возвесели́сѧ.
Ра́дꙋйсѧ, ѿ царѧ̀ досто́йнѣ почте́нный: ра́дꙋйсѧ, ѿ сы́на царе́ва ѡ҆даре́нный и҆ возлю́бленный.
Ра́дꙋйсѧ, ѿ напа́стей сего̀ вы́нꙋ соблюда́вый: ра́дꙋйсѧ, ꙗ҆́кѡ ми́лостынею є҆гѡ̀ ѡ҆би́тель твоѧ̀ снабдѣ́сѧ.
Ра́дꙋйсѧ, ꙗ҆́кѡ благоче́стїемъ є҆гѡ̀ ца́рство рѡссі́йское ᲂу҆весели́сѧ: ра́дꙋйсѧ, ꙗ҆́кѡ ца́рство на́ше царѝ бл҃гочести́выми ᲂу҆краша́етсѧ.
Ра́дꙋйсѧ, ꙗ҆́кѡ ст҃ы́ми мꙋ́жы ѻ҆́ное ᲂу҆твержда́етсѧ.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ ѳ҃
Всѧ́кихъ дарова́нїй и҆спо́лненъ сы́й, па́ки во странꙋ̀ сѣ́вернꙋю, а҆́ки со́лнце къ захожде́нїю, прите́къ, досточꙋ́дне трѵ́фѡне, созда́лъ є҆сѝ це́рковь благовѣ́рныхъ кн҃зе́й бори́са и҆ глѣ́ба, и҆ ѡ҆ста́вль ѡ҆би́тель, въ до́льнѣй пꙋсты́ни водвори́всѧ, ѡ҆ста́токъ дні́й свои́хъ препроводи́лъ є҆сѝ въ терпѣ́нїи мно́зѣ, поѧ̀ бг҃ꙋ: А҆ллилꙋ́їа.
І҆́косъ ѳ҃
Виті̑и ѿ и҆́нѡкъ ди́вное є҆́же тѝ тва́рей повинове́нїе всю́дꙋ возвѣсти́ша, прпⷣбне: не сꙋ́щꙋ бо тѝ є҆ди́ножды въ ке́ллїи, ѕвѣ́рь ди́вїй въ ню̀ вни́де и҆ нача́тъ бы̑вшаѧ ꙗ҆́сти: возвра́щшꙋ же ти́ сѧ и҆ наказа́вшꙋ сего̀, николи́же па́ки ко ѡ҆би́тели твое́й ѿ тацѣ́хъ приближа́тисѧ смѣ́ѧше. семꙋ́ же чꙋдѧ́щесѧ, взыва́емъ тѝ:
Ра́дꙋйсѧ, ла́стовице пꙋстыннолюби́ваѧ: ра́дꙋйсѧ, ᲂу҆спе́нскїѧ пꙋ́стыни ᲂу҆краше́нїе.
Ра́дꙋйсѧ, молча́нїѧ ѡ҆́бразе: ра́дꙋйсѧ, прило́ги лꙋка́вагѡ ᲂу҆разꙋмѣ́вый.
Ра́дꙋйсѧ, горды́ни є҆гѡ̀ не приложи́выйсѧ: ра́дꙋйсѧ, стрѣ́лы тогѡ̀ безси̑льны ꙗ҆ви́вый.
Ра́дꙋйсѧ, въ коне́цъ сего̀ посрами́вый: ра́дꙋйсѧ, а҆да́мꙋ первозда́ннꙋ ᲂу҆подо́бивыйсѧ.
Ра́дꙋйсѧ, ꙗ҆́кѡ тѧ̀ ѕвѣ́рїе ди́вїи царѧ̀ себѣ̀ позна́ша: ра́дꙋйсѧ, ѿ земноро́дныхъ прозѧбе́нїе ди́вное.
Ра́дꙋйсѧ, кораблю̀ вели́кїй, ко приста́нищꙋ ти́хомꙋ прибли́зивыйсѧ.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ і҃
Сп҃стѝ хотѧ̀ сѡ́бранныѧ, пре́жде кончи́ны твоеѧ̀ досточꙋ́дне трѵ́фѡне, па́ки во ѡ҆би́тель твою̀ преше́лъ є҆сѝ, и҆ бг҃ови слꙋже́нїе заповѣ́далъ є҆сѝ бра́тїи: ю҆́же грѧдꙋ́щагѡ ра́ди ѡ҆ѕлобле́нїѧ хрⷭ҇то́вымъ ᲂу҆тѣ́шивъ милосе́рдїемъ, въ нбⷭ҇ныѧ кро́вы ѿше́лъ є҆сѝ, и҆дѣ́же со ст҃ы́ми пое́ши бг҃ꙋ: А҆ллилꙋ́їа.
І҆́косъ і҃
Стѣна̀ бы́лъ є҆сѝ ча́дѡмъ ѡ҆би́тели твоеѧ̀, прпⷣбне, и҆̀же со ᲂу҆миле́нїемъ пою́ще надгрѡ́бнаѧ, положи́ша ст҃о́е тѣ́ло твоѐ, ꙗ҆́коже заповѣ́далъ є҆сѝ, въ пꙋ́стыни тобо́ю возлю́бленнѣй. зрѧ́ще же ѻ҆́ное то́ки чꙋде́съ и҆сточа́ющее, ра́достнѡ возопи́ша:
Ра́дꙋйсѧ, прест҃ы́ѧ трⷪ҇цы и҆зрѧ́дный почита́телю: ра́дꙋйсѧ, дв҃ы пребл҃гослове́нныѧ ᲂу҆блажа́телю.
Ра́дꙋйсѧ, ст҃ы̑мъ зѡсі́мѣ, савва́тїю и҆ ге́рманꙋ є҆динонра́вный: ра́дꙋйсѧ, до́брѣ бг҃ови пожи́вый.
Ра́дꙋйсѧ, въ ста́рости масти́тѣ ко хрⷭ҇тꙋ̀ пресели́выйсѧ: ра́дꙋйсѧ, ꙗ҆́кѡ глава̀ твоѧ̀, приклоне́на сꙋ́щи, трꙋды̀ и҆звѣ́ствоваше.
Ра́дꙋйсѧ, сѣди́на бо твою̀ мꙋ́дрость ѡ҆блича́ше: ра́дꙋйсѧ, тала́нты, ѿ бг҃а тѝ вда̑нныѧ, прїꙋмно́живый.
Ра́дꙋйсѧ, благі́й ра́бе, вше́дый въ ра́дость гдⷭ҇а твоегѡ̀: ра́дꙋйсѧ, честны́хъ мона́хѡвъ похвало̀ и҆ ᲂу҆краше́нїе.
Ра́дꙋйсѧ, ѡ҆би́тели твоеѧ̀ при́сный бг҃ови предста́телю.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ а҃і
Пѣ́нїе всеꙋмиле́нное прино́симъ тѝ, досточꙋ́дне трѵ́фѡне! ѡ҆би́тель бо твоѧ̀, а҆́ще по словесѝ твоемꙋ̀ ѿ све́євъ разори́сѧ, ѻ҆ба́че страда́нїемъ бра́тїй просла́вльшисѧ, па́ки возста́висѧ. а҆́ще и҆ втори́цею ѡ҆пꙋстѣ̀, си́лою же лꙋ́чшею ны́нѣ ѡ҆бнови́сѧ, въ ню́же и҆́ноцы текꙋ́ще, ѡ҆ тебѣ̀ ра́достнѡ бг҃ови пою́тъ пѣ́снь немо́лчнꙋю: А҆ллилꙋ́їа.
І҆́косъ а҃і
Свѣтоза́рнѣй ѕвѣздѣ̀ ᲂу҆подо́бисѧ ѡ҆би́тель твоѧ̀, прпⷣбне, є҆гда̀ ю҆̀ свѣ́є разорѧ́хꙋ: ча̑да бо, тобо́ю сѡ́браннаѧ, терпѣ́нїемъ врагѝ посрами́ша, вѣнцы̀ мч҃ническими ᲂу҆краси́шасѧ, и҆ кꙋ́пнѡ съ це́рковїю ѻ҆гне́мъ попали̑вшасѧ, ꙗ҆́кѡ же́ртва ᲂу҆го́дна бг҃ови принесо́шасѧ. помина́юще ᲂу҆̀бо такѡва́ѧ, ᲂу҆ми́льнѡ вопїе́мъ тѝ:
Ра́дꙋйсѧ, грѧдꙋ̑щаѧ въ бз҃ѣ созерца́ѧй: ра́дꙋйсѧ, ѡ҆би́тели разоре́нїе пред̾ѧви́вый.
Ра́дꙋйсѧ, до вре́мене ю҆̀ вѡ́и нбⷭ҇ными соблюда́вый: ра́дꙋйсѧ, ꙗ҆́кѡ ᲂу҆чени́къ тво́й і҆ѡ́на, мл҃твами тѧ̀ вы́нꙋ чты́й, въ пꙋ́стыни твое́й ѿ меча̀ сконча́сѧ.
Ра́дꙋйсѧ, гꙋ́рїа, ге́рмана и҆ и҆ны́хъ просла́вленныхъ бг҃омъ подви́жникѡвъ вѣ́ры и҆ бл҃гоче́стїѧ наста́вниче: ра́дꙋйсѧ, ꙗ҆́кѡ всѧ̑ ча̑да твоѧ̑ ѿ хрⷭ҇та̀ прїѧ́шасѧ.
Ра́дꙋйсѧ, ꙗ҆́кѡ ѡ҆би́тель твоѧ̀ па́ки возста́висѧ: ра́дꙋйсѧ, ꙗ҆́кѡ па́ки тѣ́мъ свѣти́льникъ бл҃гоче́стїѧ страны̀ дарова́сѧ.
Ра́дꙋйсѧ, то́ю лжеꙋчє́нїѧ сокрꙋша́ютсѧ: ра́дꙋйсѧ, свѧты̑ѧ бо твоѧ̑ мо́щи а҆́ки ка́мень краеꙋго́ленъ ꙗ҆влѧ́ютсѧ.
Ра́дꙋйсѧ, ꙗ҆́кѡ всѧ̑ коемꙋ́ждо полє́знаѧ мл҃твами твои́ми да́рꙋеши.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ в҃і
Бл҃года́ти хрⷭ҇то́вы носи́телю, досточꙋ́дне трѵ́фѡне! съ вѣ́рою тѧ̀ призыва́ющымъ полє́знаѧ подае́ши, ѿ напа́стей же, ꙗ҆́кѡ царѧ̀ ѳео́дѡра, ско́рѡ и҆збавлѧ́еши. семꙋ́ бо но́щїю ꙗ҆ви́всѧ во ста́нѣ, ре́клъ є҆сѝ: ско́рѡ и҆зы́ди, да не на́йдетъ на тѧ̀ сме́рть неча́ѧннаѧ. сїѧ̀ же сотво́ршꙋ є҆мꙋ̀, а҆́бїе ѿ стрѣлѧ́нїѧ вра́жеска ски́нїѧ ѡ҆прове́ржесѧ и҆ ло́же размета́сѧ, лю́дїе же чꙋдѧ́щесѧ поѧ́хꙋ: А҆ллилꙋ́їа.
І҆́косъ в҃і
Пою́ще бг҃ꙋ пѣ́снь бл҃годаре́нїѧ, ра́дꙋемсѧ ѡ҆ тебѣ̀, прпⷣбне, ꙗ҆́кѡ всѧ̑ на́мъ полє́знаѧ да́рꙋеши. тобо́ю бо па́гꙋба ѿгонѧ́етсѧ, здра́вїе ᲂу҆лꙋча́етсѧ, ми́ръ и҆ благоꙋстрое́нїе водворѧ́етсѧ: поне́же на нб҃сѣ́хъ при́снѡ хода́тайствꙋеши ѡ҆ на́съ, взыва́ющихъ тѝ си́це:
Ра́дꙋйсѧ, на нб҃сѣ́хъ ѡ҆ на́съ те́плый предста́телю: ра́дꙋйсѧ, почита́ющихъ тѧ̀ вѣ́рный храни́телю.
Ра́дꙋйсѧ, не чтꙋ́щихъ тебѐ вразꙋми́телю: ра́дꙋйсѧ, дꙋхѡ́въ ѕло́бы ѿгони́телю.
Ра́дꙋйсѧ, помраче́нныхъ ᲂу҆мы̀ просвѣти́телю: ра́дꙋйсѧ, недꙋ́гѡвъ и҆зрѧ́дный цѣли́телю.
Ра́дꙋйсѧ, ѿ потопле́нїѧ морска́гѡ спаса́телю: ра́дꙋйсѧ, ꙗ҆́кѡ тобо́ю царю̀ ѳео́дѡрꙋ дарова́сѧ и҆збавле́нїе.
Ра́дꙋйсѧ, ꙗ҆́кѡ тобо́ю небе́сное царе́й на́шихъ позна́сѧ соблюде́нїе: ра́дꙋйсѧ, ꙗ҆́кѡ тобо́ю всѧ́ка печа́ль ѿгонѧ́етсѧ.
Ра́дꙋйсѧ, ꙗ҆́кѡ тобо́ю бл҃гоче́стїе во ѡ҆би́тели твое́й и҆ по все́й странѣ̀ се́й ᲂу҆твержда́етсѧ.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ г҃і
Ѽ преподо́бне и҆ досточꙋ́дне ѻ҆́ч҃е на́шъ трѵ́фѡне! живонача́льнѣй предстоѧ̀ трⷪ҇цѣ, въ непристꙋ́пнѣмъ свѣ́тѣ и҆ ра́дости неизглаго́ланнѣй, прїимѝ сїѐ ѿ ᲂу҆миле́ннагѡ тѝ се́рдца возноси́мое хвале́нїе, и҆ не преста́й молѧ́сѧ ѡ҆ на́съ, да пожи́вше благоче́стнѣ, по ᲂу҆спе́нїи на́шемъ срѣ́тени ѿ тебѐ ѡ҆брѧ́щемсѧ на нб҃сѣ́хъ, и҆ воспое́мъ бг҃ови со а҆́гг҃льскими ли́ки: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лы своѧ̑ страна́мъ и҆ ꙗ҆зы́кѡмъ предста́тели дарова́вый бг҃ъ, є҆гда̀ прїи́де време́нъ и҆сполне́нїе, моле́нїѧ ра́ди а҆́гг҃ла страны̀, ꙗ҆́же близ̾ ѻ҆кеа́на хла́дна, и҆ наро́да ло́пска предста́телѧ, призва́ тѧ во бл҃говѣ́стїе, всехва́льный трѵ́фѡне, ꙗ҆́кѡ да спасе́ни бꙋ́дꙋтъ лю́дїе ті́и. помина́юще ᲂу҆̀бо сїѧ̑, вопїе́мъ тѝ:
Ра́дꙋйсѧ, свѧще́ннагѡ ко́рене бл҃го́е прозѧбе́нїе: ра́дꙋйсѧ, пꙋсты́ннымъ и҆з̾дѣ́тска житїе́мъ сосꙋ́дъ и҆збра́нъ себѐ бг҃ови ᲂу҆гото́вавый.
Ра́дꙋйсѧ, зва́нъ бы́въ свы́ше, къ ѻ҆кеа́нꙋ мо́рю пресели́выйсѧ: ра́дꙋйсѧ, во хрⷭ҇тѣ̀ грѧдꙋ́щее и҆збавле́нїе та́мѡ бл҃говѣсти́вый.
Ра́дꙋйсѧ, поспѣ́шествꙋющей тѝ бл҃года́ти бж҃їей, приведы́й ко хрⷭ҇тꙋ̀ ча́дъ мно́жество: ра́дꙋйсѧ, соверше́нною хрⷭ҇та̀ любо́вїю ᲂу҆ѧзви́всѧ, ѡ҆́бразъ по се́мъ и҆́ноческїй на себѐ прїе́мый.
Ра́дꙋйсѧ, трⷪ҇цы живонача́льныѧ ѡ҆би́тель ᲂу҆стро́ивый, и҆ ꙗ҆̀же ко хрⷭ҇тꙋ̀ мона́хѡвъ ликостоѧ̑нїѧ: ра́дꙋйсѧ, ве́лїѧ ра́ди смире́нїѧ ѿ нача́льства над̾ ѡ҆би́телїю ѿрекі́йсѧ, повелѣва́ѧй ѕвѣрьмѝ ди́вїими.
Ра́дꙋйсѧ, тече́нїе своѐ ст҃олѣ́пнѣ сконча́въ, бл҃гоче́стнѣ ко хрⷭ҇тꙋ̀ ѿше́дый: ра́дꙋйсѧ, ꙗ҆́кѡ ѡ҆би́тель твоѧ̀, ѿ вра̑гъ разоре́ннаѧ, по словесѝ твоемꙋ̀ па́ки возста́висѧ.
Ра́дꙋйсѧ, по преставле́нїи твое́мъ царѧ̀ ѳео́дѡра спасы́й и҆ всѣ̑мъ потрє́бнаѧ ско́рѡ подава́ѧй.
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Конда́къ а҃
И҆збра́вшꙋ тѧ̀ пастыренача́льникꙋ хрⷭ҇тꙋ̀ во а҆по́стола страны̀ сѣ́верныѧ, а҆́бїе ѿри́нꙋлъ є҆сѝ, досточꙋ́дне трѵ́фѡне, мі́ра сегѡ̀ кра̑снаѧ: претерпѣ́въ же всѧ́ко ѡ҆ѕлобле́нїе, бл҃говѣсти́лъ є҆сѝ сѣдѧ́щымъ во тмѣ̀ и҆ сѣ́ни сме́ртнѣй бг҃а ꙗ҆́вльшагосѧ пло́тїю: тѣ́мже со а҆пⷭ҇лы сра́дꙋетсѧ дꙋ́хъ тво́й въ нбⷭ҇ныхъ ѡ҆би́телехъ. и҆мѣ́ѧ ᲂу҆̀бо дерзнове́нїе ко хрⷭ҇тꙋ̀ бг҃ꙋ на́шемꙋ, ѿ всѧ́кихъ бѣ́дъ и҆зба́ви на́съ зовꙋ́щихъ:
Ра́дꙋйсѧ, трѵ́фѡне, страны̀ сѣ́верныѧ просвѣти́телю, пече́нгскїй чꙋдотво́рче.
Моли́твы
Ѽ всест҃ы́ѧ трⷪ҇цы ᲂу҆го́дниче, Ѽ бл҃же́ннѣйшїй и҆ равноапⷭ҇льный па́стырю, прпⷣбне ѻ҆́ч҃е на́шъ трѵ́фѡне! не забꙋ́ди твоеѧ̀ па́ствы, помина́й во ст҃ы́хъ твои́хъ и҆ бг҃опрїѧ́тныхъ мл҃твахъ, приноси́мыхъ въ трⷪ҇цѣ сла́вимомꙋ бг҃ꙋ, ста́до твоѐ, є҆́же са́мъ, по бл҃говѣ́стїю ѿ а҆́гг҃ла, прише́ствїемъ твои́мъ собра́лъ и҆ ᲂу҆па́слъ є҆сѝ. поне́же въ сродствѣ̀ твоегѡ̀ мїрска́гѡ жили́ща, слы́шавъ во ст҃ѣ́й цр҃кви на ᲂу҆́трени пою́щихъ: пꙋсты̑ннымъ живо́тъ сокрове́нъ є҆́сть, бж҃е́ственнымъ раче́нїемъ воскрилѧ́ющымсѧ: и҆ ѿ тогѡ̀ воспери́всѧ бж҃е́ственною любо́вїю, ѡ҆ста́вль до́мъ и҆ сродство̀, и҆ прише́дъ вскра́й сѣ́верныѧ страны̀, просвѣти́лъ є҆сѝ ст҃ы́мъ кр҃ще́нїемъ невѣ́дꙋщїй творца̀, всѣ́хъ бг҃а, ло́парскїй наро́дъ, за є҆́же, во ᲂу҆твержде́нїи хрⷭ҇тїа́нскїѧ вѣ́ры, мнѡ́га и҆згна̑нїѧ и҆ ѕлоключє́нїѧ под̾ѧ́лъ є҆сѝ: и҆ бли́з̾ рѣкѝ пече́нги въ пꙋсты́ню всели́всѧ, бра́тїю и҆з̾ мно́гихъ градѡ́въ и҆ ве́сей собра́въ, ве́лїю ѡ҆би́тель воздви́глъ є҆сѝ, и҆ при ѿше́ствїи къ небє́снымъ селе́нїємъ, ѡ҆ посѣще́нїи твоеѧ̀ ѡ҆би́тели проро́чествїѧ да́ръ ѿ бг҃а воспрїѧ́лъ є҆сѝ, и҆ по сме́рти на мо́ри и҆ на сꙋ́ши мнѡ́га чꙋдеса̀ и҆ цѣльбы̑ съ вѣ́рою просѧ́щымъ сотвори́лъ є҆сѝ и҆ ны́нѣ твори́ши. тѣ́мже мо́лимъ тѧ̀, не забꙋ́ди присѣща́ти ча́дъ твои́хъ: молѝ за ны̀, прпⷣбне ѻ҆́ч҃е, приходѧ́щыѧ къ тебѣ̀ съ вѣ́рою, и҆ за всѧ̑ хрⷭ҇тїа́ны, ꙗ҆́кѡ и҆мѣ́ѧй дерзнове́нїе къ безсме́ртномꙋ цр҃ю̀ хрⷭ҇тꙋ̀ всѣ́хъ бг҃ꙋ: не премолчѝ за ны̀ ко гдⷭ҇ꙋ, и҆ не пре́зри на́съ вѣ́рою и҆ любо́вїю чтꙋ́щихъ тѧ̀ и҆ помина́ющихъ ст҃ꙋ́ю па́мѧть твою̀. а҆́ще бо ты̀ и҆ преста́вилсѧ є҆сѝ ѿ на́съ тѣ́ломъ, но и҆ по сме́рти живы́й дꙋ́хомъ, всегда̀ чꙋдодѣ́йствꙋеши. мл҃твами твои́ми сохранѧ́й на́съ ѿ стрѣ́лъ и҆ ко́зней вра́жїихъ, и҆ всѧ́кїѧ пре́лести бѣсо́вскїѧ, и҆ ѿ вра̑гъ ви́димыхъ и҆ неви́димыхъ. па́стырю на́шъ до́брый! а҆́ще мо́щи твоѧ̑ въ ра́цѣ незри́ми на́мъ сꙋ́ть, ѻ҆ба́че, поне́же всегда̀ въ трⷪ҇цѣ сла́вимомꙋ бг҃ꙋ, при прⷭ҇то́лѣ є҆гѡ̀ непостижи́магѡ вели́чествїѧ неѿстꙋ́пнѡ въ мл҃твахъ предстои́ши, ᲂу҆се́рднѡ къ тебѣ̀ прибѣга́емъ и҆ про́симъ: ᲂу҆молѝ и҆ и҆спросѝ на́мъ вре́мѧ къ покаѧ́нїю, да въ ча́съ и҆схо́да дꙋшѝ пре́йдемъ ѿ земны́хъ къ небє́снымъ, мыта́рствъ же воздꙋ́шныхъ и҆ вѣ́чныѧ мꙋ́ки и҆зба́вимсѧ, и҆ нбⷭ҇номꙋ црⷭ҇твїю наслѣ́дницы бꙋ́демъ со всѣ́ми ѿ вѣ́ка ᲂу҆годи́вшими. ѽ всебл҃же́нне ѻ҆́ч҃е на́шъ трѵ́фѡне! не пре́зри и҆ ны́нѣ на́съ, притека́ющихъ къ тебѣ̀, ꙗ҆́кѡ да мл҃твами твои́ми и҆ по́мощїю спаса́еми, сла́вꙋ и҆ бл҃годаре́нїе, хвалꙋ̀ и҆ поклоне́нїе за всѧ̑ въ трⷪ҇цѣ є҆ди́номꙋ бг҃ꙋ, всѣ́хъ созда́телю возсыла́емъ, ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.