Канон святым трем отрокам мученикам Анании, Азарии и Мисаилу

Безнача́льное Сло́во, из Отца́ пре́жде все́х веко́в рожде́нно боголе́пно, е́же в пещи́ ю́ношам обра́зно ви́денное, просла́вим.

Глаго́лы мучи́теля злочести́ваго благоро́днии о́троцы оплева́вше терпели́вно, сне́дьми пребеззако́нных оскверни́тися халде́йски не восхоте́ша.

Пита́стеся у́бо сло́вом душе́вне, сне́дьми же самора́сленными пло́тски, па́че пита́ющихся дебе́лыми сне́дьми, царю́ красне́йшии ви́ды показа́стеся.

Ра́зум стяжа́вше богонауче́нный, Влады́ко, о́троцы Дави́довы зако́ны оте́ческия богому́дренно соблюдо́ша.

О́гнь не опали́ чисте́йшая телеса́ благочести́вых, посто́м бо душепита́тельным напая́хуся.

Хвалу́ всеми́рную и многопе́тую пою́т о́троцы трие́, посреде́ пе́щи чу́дно ороша́еми.

Дании́л мудре́йший, боже́ственне умо́м просвеща́емь, со́ния разреши́ самоде́ржцев Боже́ственною благода́тию.

Облиста́ет чудесы́ е́же в пещи́ отроко́в страда́ние, мучи́теля бо улови́ша к позна́нию Твоему́, Всеси́льне.

Согла́сия орга́ны и мусики́и пе́сни всесли́чныя до́блественных не привлеко́ша и злато́му о́бразу не подклони́ша.

Научи́вшеся зако́ну, Спа́се, не отверго́шася Твои́ уго́дницы, Дании́л вели́кий с треми́ ю́ношами богоразу́мными, но, кре́пость прие́мше от Тебе́, Благоде́теля, мучи́телей му́жески победи́ша.

Мы́сленно науча́шеся Дании́л, Человеколю́бче, Твои́м та́йнам: на о́блаце бо я́ко Сы́на Тя́ челове́ча гряду́ща, язы́ков все́х я́ко Судию́ и Царя́ зря́ше ума́ чистото́ю.

Украси́ся, о де́ти, па́че ка́мене сапфи́ра ва́ше совокупле́ние, я́ко заря́ злата́я; благоче́стия ре́вностию распа́льшеся, ходя́ще ра́достно в пещи́ и пле́щуще ли́к всеми́рный.

Облада́вше есте́ственными страстьми́ си́лою Сло́ва, стране́ язы́к халде́йских вла́стели бы́сте: ве́сть бо доброде́тель че́сть дарова́ти стяжа́вшим ю́, о Дави́довы му́дрии вну́цы!

В ме́ртвость Дании́л живоно́сную оде́явся дре́вле, я́ко бо́га халде́ем злочести́вно мни́маго убива́ет сне́дию зми́я зле́йшаго, свяще́нники же злочести́выя му́дре уби́л е́сть.

Гла́с боголюбе́зен песнопоя́шеся из среды́ огня́ Вседержи́телю: Аза́рия бо, боже́ственный ли́к соста́вив, пе́снь воспева́я, глаго́лаше: благослове́н Бо́г оте́ц на́ших.

Цевни́ца ю́ношей богосло́вяше все́х Бо́га и Вседержи́теля, те́м в пещи́ я́сно я́вльшагося, и пе́снь воспева́ху, глаго́люще: благослове́н Бо́г оте́ц на́ших.

Три́, в пе́щь вве́рженныя, ви́дев ца́рь, я́ко узре́ четве́ртаго ви́д, Сы́на пронарече́ Бо́жия и все́м возопи́: благослове́н Бо́г оте́ц на́ших.

Авраа́мово благоро́дие сохрани́ти тща́щеся, сво́йственное к нему́ стяжа́сте основа́ние ве́ры и наде́жди, преподо́бнии, терпе́ние и напа́стем пожда́ние, вопию́ще: благослови́те, свяще́нницы, Влады́ку, лю́дие, превозноси́те Его́ во ве́ки.

Я́ко свети́ла просия́вше, и зе́млю онебеси́вше, и благоче́стия просвеще́нием осия́вшеся, всеми́рное соста́вльше ликостоя́ние, пою́т и́же от напа́стей спа́сшему Влады́це: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Ю́ношески погаси́вше распали́мую пе́щь и льво́в че́люсти связа́вше, Дави́довы вну́цы, ны́не ра́дующеся, пою́т Тя́, Благоде́теля, Царя́ все́х: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Достиго́сте кончи́ну жела́нную и жела́ний Кра́йнейшему предстоите́ в небе́сных черто́зех, о́троцы всебога́тии.

Ра́дующеся, рукоя́тие, е́же от сле́з, до́браго ва́шего де́лания прия́сте, нетле́ния кла́с плодоноси́вше.

Возсия́ све́тлость ны́не ва́м досто́йно, и весе́лие се́рдца процвете́: отону́дуже бо отбеже́ печа́ль, всели́стеся.

Безнача́льное сло́во, и҆зъ ѻ҆ц҃а̀ пре́жде всѣ́хъ вѣкѡ́въ рожде́ннѡ бг҃олѣ́пно, є҆́же въ пещѝ ю҆́ношамъ ѻ҆бра́знѡ ви́дѣнное просла́вимъ.

Глаго́лы мꙋчи́телѧ ѕлочести́вагѡ благоро́днїи ѻ҆́троцы ѡ҆плева́вше терпѣли́внѡ, снѣ́дьми пребеззако́нныхъ ѡ҆скверни́тисѧ халде́йски не восхотѣ́ша.

Пита́стесѧ ᲂу҆́бѡ сло́вомъ дꙋше́внѣ, снѣ́дьми же самора́сленными пло́тски, па́че пита́ющихсѧ дебе́лыми снѣ́дьми, царю̀ краснѣ́йшїи ви́ды показа́стесѧ.

Ра́зꙋмъ стѧжа́вше бг҃онаꙋче́нный, влⷣко, ѻ҆́троцы дв҃довы, зако́ны ѻ҆те́чєскїѧ бг҃омꙋ́дреннѡ соблюдо́ша.

Ѻ҆́гнь не ѡ҆палѝ чистѣ̑йшаѧ тѣлеса̀ благочести́выхъ, посто́мъ бо дꙋшепита́тельнымъ напаѧ́хꙋсѧ.

Хвалꙋ̀ всемі́рнꙋю и҆ многопѣ́тꙋю пою́тъ ѻ҆́троцы трїѐ, посредѣ̀ пе́щи чꙋ́днѡ ѡ҆роша́еми.

Данїи́лъ мꙋдрѣ́йшїй бжⷭ҇твеннѣ ᲂу҆мо́мъ просвѣща́емь, сѡ́нїѧ разрѣшѝ самоде́ржцєвъ бжⷭ҇твенною бл҃года́тїю.

Ѡ҆блиста́етъ чꙋдесы̀ є҆́же въ пещѝ ѻ҆трокѡ́въ страда́нїе: мꙋчи́телѧ бо ᲂу҆лови́ша къ позна́нїю твоемꙋ̀, всеси́льне.

Согла́сїѧ ѻ҆рга́ны, и҆ мꙋсїкі́и пѣ̑сни всесли̑чныѧ до́блественныхъ не привлеко́ша, и҆ злато́мꙋ ѻ҆́бразꙋ не подклони́ша.

Наꙋчи́вшесѧ зако́нꙋ, сп҃се, не ѿверго́шасѧ твоѝ ᲂу҆го́дницы, данїи́лъ вели́кїй, съ тремѝ ю҆́ношами бг҃оразꙋ́мными: но крѣ́пость прїе́мше ѿ тебє̀ бл҃годѣ́телѧ, мꙋчи́телей мꙋ́жески побѣди́ша.

Мы́сленнѡ наꙋча́шесѧ данїи́лъ, чл҃вѣколю́бче, твои̑мъ та́йнамъ: на ѻ҆́блацѣ бо ꙗ҆́кѡ сн҃а тѧ̀ чл҃вѣ́ча грѧдꙋ́ща, ꙗ҆зы́кѡвъ всѣ́хъ ꙗ҆́кѡ сꙋдїю̀ и҆ цр҃ѧ̀, зрѧ́ше ᲂу҆ма̀ чистото́ю.

Оу҆краси́сѧ, ѽ дѣ́ти, па́че ка́мене сапфі́ра, ва́ше совокꙋпле́нїе, ꙗ҆́кѡ зарѧ̀ злата́ѧ: благоче́стїѧ ре́вностїю распа́льшесѧ, ходѧ́ще ра́достнѡ въ пещѝ и҆ пле́щꙋще ли́къ всемі́рный.

Ѡ҆блада́вше є҆сте́ственными страстьмѝ си́лою сло́ва, странѣ̀ ꙗ҆зы̑къ халде́йскихъ вла́стели бы́сте: вѣ́сть бо добродѣ́тель че́сть дарова́ти стѧжа́вшымъ ю҆̀, ѽ дв҃довы мꙋ́дрїи внꙋ́цы!

Въ ме́ртвость данїи́лъ живоно́снꙋю ѡ҆дѣ́ѧвсѧ дре́вле, ꙗ҆́кѡ бг҃а халде́ємъ ѕлочести́внѡ мни́маго, ᲂу҆бива́етъ снѣ́дїю ѕмі́ѧ ѕлѣ́йшаго: свѧще́нники же ѕлочести̑выѧ мꙋ́дрѣ ᲂу҆би́лъ є҆́сть.

Гла́съ бг҃олюбе́зенъ пѣснопоѧ́шесѧ и҆зъ среды̀ ѻ҆гнѧ̀ вседержи́телю: а҆за́рїа бо, бжⷭ҇твенный ли́къ соста́вивъ, пѣ́снь воспѣва́ѧ, глаго́лаше: бл҃гослове́нъ бг҃ъ ѻ҆тє́цъ на́шихъ.

Цѣвни́ца ю҆́ношей бг҃осло́вѧше всѣ́хъ бг҃а и҆ вседержи́телѧ, тѣ̑мъ въ пещѝ ꙗ҆́снѡ ꙗ҆́вльшагосѧ, и҆ пѣ́снь воспѣва́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.

Трѝ въ пе́щь вве́ржєнныѧ ви́дѣвъ ца́рь, ꙗ҆́кѡ ᲂу҆зрѣ̀ четве́ртагѡ ви́дъ, сн҃а пронаречѐ бж҃їѧ, и҆ всѣ̑мъ возопѝ: бл҃гослове́нъ бг҃ъ ѻ҆тє́цъ на́шихъ.

А҆враа́мово благоро́дїе сохрани́ти тща́щесѧ, сво́йственное къ немꙋ̀ стѧжа́сте ѡ҆снова́нїе вѣ́ры и҆ наде́жди, прпⷣбнїи, терпѣ́нїе и҆ напа́стемъ пожда́нїе, вопїю́ще: благослови́те свѧще́нницы влⷣкꙋ, лю́дїе, превозноси́те є҆го̀ во вѣ́ки.

Ꙗ҆́кѡ свѣти̑ла просїѧ́вше, и҆ зе́млю ѡ҆небеси́вше, и҆ благоче́стїѧ просвѣще́нїемъ ѡ҆сїѧ́вшесѧ, всемі́рное соста́вльше ликостоѧ́нїе, пою́тъ и҆́же ѿ напа́стей спа́сшемꙋ влⷣцѣ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Ю҆́ношески погаси́вше распали́мꙋю пе́щь, и҆ львѡ́въ чє́люсти свѧза́вше, дв҃довы внꙋ́цы, ны́нѣ ра́дꙋющесѧ пою́тъ тѧ̀ бл҃годѣ́телѧ цр҃ѧ̀ всѣ́хъ: ѻ҆́троцы бл҃гослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Достиго́сте кончи́нꙋ жела́ннꙋю, и҆ жела́нїй кра́йнѣйшемꙋ предстоитѐ въ нбⷭ҇ныхъ черто́зѣхъ, ѻ҆́троцы всебога́тїи.

Ра́дꙋющесѧ рꙋкоѧ́тїе, є҆́же ѿ сле́зъ, до́брагѡ ва́шегѡ дѣ́ланїѧ прїѧ́сте, нетлѣ́нїѧ кла́съ плодоноси́вше.

Возсїѧ̀ свѣ́тлость ны́нѣ ва́мъ досто́йнѡ, и҆ весе́лїе се́рдца процвѣтѐ: ѿѻнꙋ́дꙋже бо ѿбѣжѐ печа́ль, всели́стесѧ.