Канон преподобному Илии Муромцу

Иже вся творяй и претворяяй, Иже тя, Илие, поборника Си прозорливне избра, да и моей худости воспети подвиги твоя глагол дарует.

Любезен народу Божию душеполаганием о том присным явлься, Илие, ныне сердца того благодарное приими.

Избрание твое, Илие, от младых ногтей боговместимою немощию печатлеется, да, яко сам искушен, возможеши и искушаемым помощи.

Верою благодушною яко от руки Спасовы болезнь приемлет кротостию Илия, сердце заповедьми Того утверждая присно.

От юности терпение крайнее явил еси, да не от земных основание подвигом положиши, Илие, но о Господе Подвигоположнице.

Иже всякую добродетель яко сродную Себе зрит, Сей и немощное ти врачует, паче же преисполняет тя духа силою.

Адаманту крепкодушие подобится Илиино, сего ради воинствует той на супостаты изрядне, яко новый Сампсон богозванну народу является.

Добре сечет иноплеменники ослею челюстию назорей, добре Илия, сему подражая, враги сокрушает яко ратник Христов.

Украшен вельми доблестию, Илие, яко по всяческим во бранех искушен, в супостатех видимых исконнаго врага-человекоубийцу прозираеши, Божиим онаго сокрушая Духом.

Огнепаляща пророка имени и благодати наследник быв, Илие, ревностию о народе Божии сему подобяся, паки и дерзновением на супостаты.

Верою огнь с небеси призывая от Господа, закалает пророк Иезавелины, тако и новый Илия разит поганыя, небоязненным духом исполнь.

Не в вихре, не во огни и дусе явися пророку Господь, тако и тебе, Илие, яко чистоты рачителю, тонка хлада Иисусова глас открывается, яко иноку совершенну Божию.

Грады могущих покаряются, веси ограждаются русстии, мир вселяется Божий в сердца христиан - тобою, Илие, о хвала Муромская.

Оглашается воздух похвалами ти сугубыми. Илие, яко стратигу истинну, супостатом еси убо страх, верным же образ к подражанию известнейший.

Любовию оскудевше, любовию подвизаемся, Илие, тобою ограждаеми присно от видимых и невидимых враг, по образу твоему дерзающе от земли до небесных достигнути.

Бренность жития открывается яве ти, досточудне Илие, раною нецелимою, сердце Божию любовию уязвляющею.

От славы ти достодолжныя, обаче привременныя, устранитися тщишися, да стяжеши мир паче онаго, о немже воинствовал еси.

Вся ко спасению устрояющему, промышляющу премудре о всех, поет новый Илия-инок: Боже, благословен еси.

Юность положивый, Илие, да терпение стяжеши, зрелостию послужил еси бранным князю велику подвигом, ныне ко мироотшествию приближся, мир обрел еси, всяк ум преимущ.

Во бранех слава твоя, Божий воине, в Книзе Жизни имя твое, во святых жребий твой, Илие преподобне.

Благословим: Образ буди нам, святе, терпеливодушия непостыдна, небоязненна духа, паче же смирения, вся от Бога ходатайствующа.

Помолися о нас, Божий трудниче Илие, да твердостию храним заповеди, да послужим любовию, в Вифлеемских изволившу восклонитися яслех.

Огради помышления нам, еже суетная презирати, твоим образом вдохновенным, о Илие, и хранимым молитвами.

Илие, крепосте Господня земли Русския, Илие, неусыпный нам страже, возбуди дух нам, еже дерзновением по Господе следовати.