Кондак 1
Избра́нному во иере́ех, ди́вному уго́днику Бо́жию Иоа́нну, па́стырю и учи́телю, о царе́х моли́твеннику, ско́рбных уте́шителю, земли́ Росси́йския све́тлому свети́льнику, все́ житие́ свое́ на служе́ние Бо́гу и бли́жним посвяти́вшему, и мно́жество гре́шников на покая́ние обрати́вшему; мно́гим же боля́щим исцеле́ние у Бо́га испроси́вшему, похвалы́ вознесе́м, я́ко хода́таю на́шему и ско́рому помо́щнику. Ты́ же, о́тче, я́ко име́яй дерзнове́ние ко Го́споду, от вся́ких на́с бе́д свобожда́й, да зове́м ти́ хвале́бно:
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Икос 1
А́нгела Храни́теля своего́, еще́ шестоле́тен сы́й, в све́тлости неизрече́нней я́ве узре́л еси́, Иоа́нне, и́же и рече́ тебе́, я́ко по повеле́нию Госпо́дню всегда́ неви́димо сопрису́тствует и храни́т тя́ от все́х зо́л. Те́мже от ю́ности избра́нника Бо́жия тя́ ве́дуще, взыва́ем си́це:
Ра́дуйся, от младе́нства по предуве́дению Бо́гом избра́нный; ра́дуйся, от ю́ности в служе́ние Ему́ Того́ благода́тию призва́нный.
Ра́дуйся, А́нгела Храни́теля твоего́ из де́тства до́брыми нра́вы весели́вый; ра́дуйся, николи́же того́ чи́м опеча́ливый.
Ра́дуйся, я́ко незри́мый Храни́тель тво́й я́ве тебе́ яви́ся; ра́дуйся, я́ко то́й всегда́ храни́ти тя́ обеща́ся.
Ра́дуйся, благочести́вых роди́телей ча́до возлю́бленное; ра́дуйся, те́ми изде́тска в стра́се Бо́жием воспита́нный.
Ра́дуйся, воздержа́нию от ю́ности себе́ обучи́вый; ра́дуйся, во убо́жестве и нищете́ млады́я дни́ своя́ препроводи́вый.
Ра́дуйся, я́ко благонра́вия твоего́ ра́ди благода́ть Бо́жия я́ве на тебе́ почива́ше; ра́дуйся, я́ко та́ лице́ твое́ всегда́ благоумиле́нно творя́ше.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 2
Ви́дим тя́, богому́дре Иоа́нне, от ю́на во́зраста благода́тию Бо́жиею осене́на бы́вша, и е́ю та́инственно на доброде́тельное житие́ наставля́ема и руководи́ма. Те́мже, иму́щи тя́ во о́браз на́м и подража́ние, уми́льно вопие́м Христу́ Бо́гу: Аллилу́иа.
Икос 2
Ра́зум тво́й измла́да в изуче́ние Свяще́нных и оте́ческих Писа́ний углуби́в, Иоа́нне, и из ни́х восприя́л еси́ оби́льно во́ду жи́ву, от исто́чника Свята́го Ду́ха проистека́ющую. Те́мже мо́лим тя́, умоли́ блага́го Го́спода, да сподо́бит прича́стники бы́ти сея́ живи́тельныя струи́ и на́с, взыва́ющих ти́ си́це:
Ра́дуйся, от младе́нства чи́ста себе́ от страсте́й соблюды́й; ра́дуйся, благода́ть свята́го креще́ния це́лу и невреди́му сохрани́вый.
Ра́дуйся, чте́ние Боже́ственных Писа́ний усе́рдно возлюби́вый; ра́дуйся, сокрове́нный в ни́х смы́сл пра́во и до́бре уразуме́вый.
Ра́дуйся, во уче́нии кни́жнем прилежа́ние приме́рное показа́вый; ра́дуйся, в любому́дрии есте́ственнем и духо́внем сла́вно преуспе́вый.
Ра́дуйся, любому́дрием твои́м ми́ра пре́лести ско́ро распозна́вый; ра́дуйся, те́х се́тей, я́ко оре́л высокопа́рный, му́дре избежа́вый.
Ра́дуйся, се́верныя Росси́йския страны́ чу́дное и све́тлое воспита́ние; ра́дуйся, мра́ка грехо́внаго в лю́дех разгна́ние.
Ра́дуйся, все́м притека́ющим к тебе́ ско́рое вспоможе́ние подава́яй; ра́дуйся, многомо́щное на́м пред Бо́гом заступле́ние явля́яй.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 3
Си́ла благода́ти Бо́жия, недостаю́щая восполня́ющая, оби́льно излия́ся на тя́, Иоа́нне приснопа́мятне, егда́ от святи́теля Христофо́ра во иере́я рукоположе́н бы́л еси́, и гра́ду Кроншта́дту па́стырь учине́н; отто́ле бо нача́л еси́ учи́ти лю́ди е́же ве́рно служи́ти Святе́й Тро́ице и пе́ти Е́й: Аллилу́иа.
Икос 3
Име́я любо́вь Боже́ственную в се́рдце свое́м, му́дре Иоа́нне, и уста́вы воздержа́ния стро́го соблюда́я, удо́бь побора́л еси́ страсте́й двиза́ния, николи́же те́ми запя́т бы́в. Те́мже, я́ко му́ж си́лен, изше́л еси́ на де́лание ни́вы Госпо́дни: сло́вом, а́ки ра́лом, разрыхля́я отверде́вшая и оледене́вшая сердца́ челове́ческая, согрева́я та́ моли́твою и теплото́ю любве́ твоея́, и насева́я в ни́х се́мена и́скренняго покая́ния и живы́я ве́ры. Сего́ ра́ди воспису́ем ти́ похвалы́ таковы́я:
Ра́дуйся, избра́нный сосу́де Бо́жия благода́ти; ра́дуйся, даро́в небе́сных вмести́лище.
Ра́дуйся, все́м се́рдцем и все́м помышле́нием твои́м Бо́га возлюби́вый; ра́дуйся, сего́ ра́ди и ча́да твоя́ духо́вная и́скренне Того́ люби́ти научи́вый.
Ра́дуйся, за́поведи Бо́жия и уста́вы Це́ркве о посте́х опа́сно храни́вый; ра́дуйся, любо́вь твою́ к Бо́гу и бли́жним дея́ньми и уче́ньми твои́ми прояви́вый.
Ра́дуйся, от ю́ности над страстьми́ воцари́выйся; ра́дуйся, сла́вен победи́тель над те́ми яви́выйся.
Ра́дуйся, в ми́ре пожи́вый преми́рно; ра́дуйся, на земли́ му́дрствовавый небе́сно.
Ра́дуйся, ца́рства Правосла́вно-Росси́йскаго сто́лпе непоколеби́мый; ра́дуйся, Правосла́вия и до́брых обы́чаев блюсти́телю непозы́блемый.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 4
Бу́рею мно́гих бе́д и волне́ний жите́йских одержи́мым, на́м помога́й, о́тче Иоа́нне, я́коже и в животе́ твое́м помога́л еси́ все́м, с ве́рою к тебе́ притека́вшим, да вси́ тобо́ю вспомоществу́еми, благода́рно о тебе́ пое́м Бо́гу: Аллилу́иа.
Икос 4
Слы́шав апо́стола глаго́люща: «на́ше житие́ на небесе́х е́сть», и измла́да возжела́в насле́довати е́, маловре́менное сие́ житие́ не во угожде́нии пло́ти и страсте́м ижди́л еси́, Иоа́нне, но во очище́нии души́ от по́мыслов грехо́вных. Те́мже, иму́ще тя́ во о́браз богоуго́днаго жития́ и помо́щника во благоче́стии, взыва́ем ти́ си́це:
Ра́дуйся, све́та ева́нгельскаго в на́ша дни́ све́тлое блиста́ние; ра́дуйся, омраче́нных ду́ш вседе́йственное просвеще́ние.
Ра́дуйся, я́ко в Боже́ственная Писа́ния ве́сь у́м тво́й впери́л еси́; ра́дуйся, в ни́х бо стезю́ пра́вую в Ца́рствие небе́сное обре́л еси́.
Ра́дуйся, я́ко вся́ дея́ния твоя́ све́т ми́ру бы́ша; ра́дуйся, я́ко тобо́ю Оте́ц Небе́сный ди́вно просла́вися.
Ра́дуйся, я́ко сло́во твое́ не бе́, я́коже кимва́л бряца́яй, ме́ртв, нечу́вствен; ра́дуйся, я́ко то́е бя́ше вои́стину жи́во и де́йственно.
Ра́дуйся, я́ко тобо́ю ме́ртвии ду́хом ве́рою оживля́ются; ра́дуйся, я́ко па́дшии в бе́здну грехо́вную тобо́ю к покая́нию возбужда́ются.
Ра́дуйся, я́ко в тебе́ неустраши́маго обличи́теля и кре́пкаго противобо́рца враго́м и́стины ве́рнии обрето́ша.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 5
Звезда́ многосве́тлая земли́ Росси́йския, мра́к грехо́вный просвеща́ющая, яви́лся еси́, свяще́нне Иоа́нне. Те́мже и ны́не пода́ждь просвеще́ние сыно́м Росси́йским, тьмо́ю заблужде́ния объя́тым и во вла́сть нечести́вых преда́вшихся, да позна́ют свое́ окая́нство, и обрати́вшеся ко Го́споду, в покая́нии возопию́т Ему́: Аллилу́иа.
Икос 5
Ви́девше Росси́йстии наро́ди вели́каго тя́ благоче́стия пропове́дника и многомо́щна пред Бо́гом моли́твенника и предста́теля, во мно́жестве отвсю́ду к тебе́ притека́ху, ини́и же издале́ча письмена́ тебе́ посыла́ху, исцеле́ния в боле́знех, сове́та в недоуме́ниих и утеше́ния в ско́рбех прося́ще, и улучи́вше жела́нная, благода́рственно тебе́ взыва́ху:
Ра́дуйся, Иоа́нне, но́вый ми́ру свети́льниче; ра́дуйся, несре́дственный в моли́твах Бо́гу собесе́дниче.
Ра́дуйся, я́ко твоя́ моли́твы си́льны и многомо́щны Влады́ку умилостивля́ти; ра́дуйся, я́ко твое́ к Нему́ предста́тельство многоде́йственно бла́гость Его́ на щедрода́тельство подвиза́ти.
Ра́дуйся, я́ко тобо́ю, по ме́ре ве́ры, подаю́тся благода́тная исцеле́ния; ра́дуйся, я́ко неду́гующии прие́млют тобо́ю ско́рое неду́гов свои́х в здра́вие премене́ние.
Ра́дуйся, я́ко гре́шнии на покая́ние тобо́ю обраща́ются; ра́дуйся, я́ко безчи́ннии крамо́льницы тобо́ю вразумля́ются.
Ра́дуйся, я́ко безу́мнии глуми́телие над та́йнами ве́ры тобо́ю посрамля́ются; ра́дуйся, я́ко посмея́телие чуде́сных твои́х дея́ний тобо́ю подоба́ющее вразумле́ние прие́млют.
Ра́дуйся, скорбя́щих благода́тный уте́шителю; ра́дуйся, в недоуме́нии су́щих бла́гостный вразуми́телю.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 6
Пропове́дником и́стины, богоно́сным отце́м подража́я, всего́ себе́ на служе́ние Бо́гу и бли́жним вда́л еси́, и са́н свяще́нства нося́, поко́я не ве́дал еси́, слу́жбы Бо́жия в хра́ме при́сно соверша́я и в доме́х ве́рных моле́бныя пе́ния воспева́я, нужда́ющимся же ще́дро благотворя́, та́ко наименова́ние благотво́рца и безсре́бренника стяжа́л еси́, Иоа́нне. Те́мже и по успе́нии твое́м, Росси́йстии лю́дие прославля́ют и́мя твое́, и ве́чную па́мять тебе́ возглаша́юще, пою́т Бо́гу: Аллилу́иа.
Икос 6
Возсия́вый от Де́вы Христо́с Бо́г на́ш и тьму́ идолобе́сия све́том Ева́нгелия разгна́вый, яви́ тя, о́тче Иоа́нне, ве́рна и ре́вностна пропове́дника Своея́ и́стины, клевре́ты лука́ваго извраща́емыя. Те́мже, я́ко име́яй дерзнове́ние ко Го́споду, изба́ви от те́х зло́бы и кова́рства все́х воспева́ющих ти́ такова́я:
Ра́дуйся, служи́телю Христо́в изря́дный; ра́дуйся, во иере́ех уго́дниче Того́ преизя́щный.
Ра́дуйся, я́ко бы́л еси́ до́му Бо́жия стра́ж неусы́пный; ра́дуйся, я́ко пасо́мым твои́м бы́л еси́ от та́тей духо́вных кре́пкий храни́тель.
Ра́дуйся, писа́ньми твои́ми мно́гих от любве́ мирски́я к любви́ Христо́ве подви́гнувый; ра́дуйся, веща́ньми твои́ми любо́вь Бо́жию к челове́ком, в искупле́нии и промышле́нии на́м явле́нную, изъяви́вый.
Ра́дуйся, де́йствие Ду́ха Бо́жия на сердца́ челове́ческая удобопости́жно сказа́вый; ра́дуйся, та́йну моли́твеннаго с Бо́гом собесе́дования я́ве указа́вый.
Ра́дуйся, целому́дрие в зако́нном супру́жестве твое́м чуде́сно сохрани́вый; ра́дуйся, мно́гая ча́да духо́вная покая́нием породи́вый.
Ра́дуйся, в сердца́х ве́рных благу́ю па́мять по себе́ оста́вивый; ра́дуйся, я́ко па́мять сия́, я́ко пра́ведника, незабве́нна пребу́дет во ве́ки.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 7
Хотя́ Всеблаги́й Госпо́дь уте́шити ве́рныя лю́ди Своя́ и отврати́ти беззако́нных от злы́х де́л и́х, воздви́же тя́, проро́ка земли́ на́шей, я́коже не́когда Ниневи́и, гра́ду вели́кому, Ио́ну: да пропове́си гне́в Бо́жий, гряду́щий вско́ре на зе́млю на́шу, е́же и сбы́сться по твоему́ веща́нию, и́бо непока́яни в горды́ни свое́й пребы́хом и не восхоте́хом с тобо́ю смире́нно пе́ти Христу́ Бо́гу: Аллилу́иа.
Икос 7
Но́ва зна́мения гне́ва Бо́жия постиго́ша на́с, зане́ не восхоте́хом вня́ти богодухнове́нным твои́м глаго́лом: держа́ва бо Росси́йская паде́ся и лю́тым безбо́жником во вла́сть предаде́ся, и́же честны́я оби́тели и́ноческия разори́ша, святы́я хра́мы оскверни́ша, и вся́ благочести́выя лю́ди лю́те озло́биша, и мно́жество духо́внаго и мирска́го чи́на му́ченичестей сме́рти преда́ша. Те́мже из глубины́ души́ покая́ние Го́споду прино́сим, и к твое́й моли́тве прибега́ем, да проще́ние грехо́в на́ших и ми́лости Бо́жией сподо́бимся. Тебе́ же, я́ко предста́телю на́шему, уми́льно глаго́лем:
Ра́дуйся, покая́ния велегла́сный пропове́дниче; ра́дуйся, гряду́щаго гне́ва Бо́жия на лю́ди согреши́вшия нело́жный провозве́стниче.
Ра́дуйся, нече́стия людска́го громогла́сный обличи́телю; ра́дуйся, о исправле́нии те́х ре́вностный рачи́телю.
Ра́дуйся, ца́рства Правосла́вно-Росси́йскаго при животе́ твое́м кре́пкий опло́т бы́вый; ра́дуйся, от крамо́л во дни́ о́ны то́е сохрани́вый.
Ра́дуйся, Госуда́рей благочести́вых при́сный моли́твенниче и спобо́рниче; ра́дуйся, му́дрый те́х наста́вниче и храни́телю.
Ра́дуйся, о вла́сти ца́рстей, я́ко богоуста́вленной, мно́гая словеса́ провеща́вый; ра́дуйся, к послуша́нию и ве́рности зако́нной вла́сти то́й лю́ди тщали́во приводи́вый.
Ра́дуйся, моли́твами твои́ми престо́лы царе́й благочести́вых огражда́яй; ра́дуйся, суды́ пра́вы в лю́дех твори́ти те́х поуча́яй.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 8
Странноле́пный и ангелоподо́бный пу́ть жития́ земна́го соверши́л еси́, о́тче Иоа́нне: в ми́ре бо пожи́в в воздержа́нии и целому́дрии, и во всегда́шнем Бо́га славосло́вии вели́ким отце́м после́довал еси́. С ни́ми же ны́не на небеси́ Христу́ в весе́лии предстоя́, и моли́твы о ми́ре принося́, вы́ну пое́ши: Аллилу́иа.
Икос 8
Вси́ правосла́внии лю́дие, я́коже в животе́ твое́м, та́ко и по преставле́нии, с ве́лиею любо́вию чту́т тя́, о́тче Иоа́нне, я́ко ве́лие дерзнове́ние к Бо́гу и́маши, и мо́лиши бла́гость Его́ о все́х к тебе́ притека́ющих, и та́ко взыва́ющих:
Ра́дуйся, блага́го ко́рене до́брое прозябе́ние; ра́дуйся, благочести́вых роди́телей честно́е рожде́ние и благо́е воспита́ние.
Ра́дуйся, я́ко ма́лая ве́сь Сура́, твоего́ ра́ди в не́й рожде́ния и воспита́ния, все́й земли́ Росси́йстей ве́дома сотвори́ся; ра́дуйся, я́ко гра́д Кроншта́дт твои́м в не́м служе́нием просла́вися.
Ра́дуйся, я́ко милосе́рдыми де́лы твои́ми вся́ земля́ Росси́йская напо́лнися; ра́дуйся, я́ко ве́сть о чу́днем и святе́м житии́ твое́м за преде́лы ея́ распространи́ся.
Ра́дуйся, я́ко писа́ньми твои́ми та́йна благода́тнаго с Бо́гом обще́ния изъясня́ется; ра́дуйся, я́ко си́ми писа́ньми све́т духо́внаго озаре́ния в сердца́ чту́щих я́ излива́ется.
Ра́дуйся, я́ко в писа́ниих твои́х чистота́ души́ твоея́ я́ве прозрева́ется; ра́дуйся, я́ко в ни́х, я́коже в зерца́ле, богоподо́бие души́ челове́ческия отобража́ется.
Ра́дуйся, я́ко богому́дрыми писа́ньми твои́ми не то́кмо лю́дие Росси́йстии, но и инозе́мнии ко благоче́стию своему́ назида́ются; ра́дуйся, я́ко те́ми писа́ньми и́стинная ве́ра возсиява́ет и мра́к ересе́й разгоня́ется.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 9
Вся́кое сло́во не довле́ет к похвале́ твое́й, о́тче Иоа́нне, ты́ бо Ду́хом Святы́м дви́жимь, от ю́ности Бо́гу усе́рдно послужи́л еси́: в изуче́нии Свяще́нных Писа́ний мно́га ле́та усе́рдно тружда́яся и ра́зум глубо́к стяжева́я, та́же о науче́нии отроко́в и о па́стве твое́й приле́жно пеки́йся, все́х поуча́л еси́ разу́мно пе́ти Бо́гу: Аллилу́иа.
Икос 9
Вити́и нечести́вии и суему́дреннии и ве́ры хули́телие тобо́ю я́ве посра́млени бы́ша во злоче́стии свое́м, правосла́внии же в ве́ре утверди́шася, боговеща́нными твои́ми глаго́лы наставля́еми. Те́мже, восхваля́юще тя́, взыва́ем си́це:
Ра́дуйся, цевни́це, боговеща́нная; ра́дуйся, гу́сли Ду́ха сладкозву́чныя.
Ра́дуйся, словесы́ и писа́ньми твои́ми догма́ты ве́ры уясни́вый; ра́дуйся, веща́ньми твои́ми ве́рных смы́слы в Правосла́вии утверди́вый.
Ра́дуйся, мно́гих коле́блющихся в и́стинней ве́ре утверди́вый; ра́дуйся, гордели́ваго в суему́дрии хули́теля та́инств Це́ркве Христо́вы небоя́зненно обличи́вый.
Ра́дуйся, я́ко тобо́ю полки́ богобо́рцев побежде́ни бы́ша; ра́дуйся, я́ко со́нмы пасо́мых твои́м па́стырским раче́нием Ца́рствие небе́сное улучи́ша.
Ра́дуйся, ра́зума боже́ственнаго му́дрый изъяви́телю; ра́дуйся, та́инств церко́вных благогове́йный соверши́телю.
Ра́дуйся, благонаде́жный на́ш в Ца́рствие небе́сное руководи́телю; ра́дуйся, пути́ спаси́тельнаго на́ш и́стинный учи́телю.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 10
Спасти́ хотя́ ду́шу твою́, полноту́ доброде́телей ева́нгельских в себе́ совокупи́л еси́, о́тче Иоа́нне: апо́стольское и святооте́ческое ве́ры испове́дание, му́ченическую в благоче́стии тве́рдость, всегда́шнее в моли́твах бо́дрствование, воздержа́ние и смире́ние, вку́пе же и по́двиги преподо́бных. Те́мже ны́не со святы́ми на небеси́ водворя́яся и непреста́нно Бо́га славосло́вя, помина́й на́с, сла́вную па́мять твою́ почита́ющих и пою́щих Бо́гу: Аллилу́иа.
Икос 10
Царя́ Небе́снаго всеусе́рдный священнослужи́тель бы́в, о благоде́нствии земна́го оте́чества твоего́ ревнова́л еси́, правому́дренно поуча́я, е́же воздава́ти Бо́жие Бо́гови и ке́сареви ке́сарево. Сего́ ра́ди восхваля́ем тя́ си́це:
Ра́дуйся, ра́бе Бо́жий, благи́й и ве́рный; ра́дуйся, служи́телю Того́ усе́рдный.
Ра́дуйся, вся́ повеле́нная от Го́спода, тщали́во твори́вый; ра́дуйся, за́поведей Его́ иску́сный де́латель бы́вый.
Ра́дуйся, о вездесу́щии Бо́жии всегда́ помышля́вый; ра́дуйся, у́мным очесе́м свои́м Того́ вы́ну представля́вый.
Ра́дуйся, благочести́вых царе́й оте́чества твоего́, я́ко слу́г Бо́жиих, почита́вый; ра́дуйся, сло́вом твои́м и моли́твами в тру́днем по́двизе управле́ния и́м помога́вый.
Ра́дуйся, к попече́нию о благи́х Це́ркве и наро́да те́х подвиза́вый; ра́дуйся, от крамо́л и мяте́жей и́х оберега́вый.
Ра́дуйся, и ны́не о земли́ Росси́йстей и о все́х ца́рствах правосла́вных Бо́га умоля́яй; ра́дуйся, я́ко предста́тель еси́ все́х на тя́ наде́ющихся.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 11
Пе́сненными похвала́ми невозмо́жно е́сть изобрази́ти мно́жество о Бо́зе исправле́ний твои́х, о пречу́дне о́тче Иоа́нне, я́же соверши́л еси́ во все́м житии́ твое́м: немощны́я, моли́твами твои́ми, исцеля́я, бе́сы от челове́к изгоня́я, неду́говавшим пия́нством и ины́ми страстьми́ врачу́я, в нищете́ же и убо́жестве су́щия оби́льно ущедря́я, и все́м по коего́ждо потре́бе помога́я и благотворя́, во е́же благода́рно о тебе́ пе́ти Бо́гу: Аллилу́иа.
Икос 11
Свети́льника све́тла и прозорли́вца ди́вна тя́ Госпо́дь во дне́х на́ших, провозвести́вша гряду́щий гне́в Его́ на ца́рство Росси́йское, зане́ не пока́яхомся про́поведию твое́ю. Те́мже, я́ко проро́ка Бо́жия и провозве́стника Того́ суде́б, ублажа́ем тя́ и в покая́нии взыва́ем:
Ра́дуйся, прови́дче ди́вный; ра́дуйся, бу́дущих собы́тий предсказа́телю нело́жный.
Ра́дуйся, дре́вним покая́ния пропове́дником ра́вный; ра́дуйся, гряду́щаго гне́ва Бо́жия на нераска́янныя гре́шники возвести́телю.
Ра́дуйся, покая́ния сладкогла́сный глаша́таю; ра́дуйся, смяте́нных серде́ц умири́телю.
Ра́дуйся, многомо́щный на́ш пред Бо́гом хода́таю; ра́дуйся, благонаде́жный на́ш пред Ни́м предста́телю.
Ра́дуйся, до́брый слове́сных ове́ц па́стырю, мно́жество заблу́ждших ду́ш взыска́вый; ра́дуйся, от у́з темни́чных и сме́рти мно́гих свободи́вый.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 12
Благода́ть Бо́жия, ю́же прия́л еси́ сугу́бо во святе́м креще́нии и во иере́йстем рукоположе́нии, не вотще́ в тебе́ бы́сть, о́тче Иоа́нне: раче́нием бо твои́м употреби́л еси́ сию́ на по́льзу мно́гим и во сла́ву Дарода́теля ея́; све́тлостию бо жития́ твоего́ и де́лы милосе́рдыми вели́кий уго́дник пред Бо́гом яви́лся еси́, и от мно́жества у́ст, тобо́ю духо́вно и теле́сно облагоде́тельствованных, возно́сится Тому́ вели́кая пе́снь: Аллилу́иа.
Икос 12
Пою́ще богоуго́дное твое́ от ю́ности житие́, и духо́вное от си́лы в си́лу восхожде́ние, ублажа́ем пра́ведную твою́ кончи́ну и сла́вное погребе́ние благода́тных твои́х моще́й, ве́чный поко́й обре́тших в созда́нней тобо́ю деви́чей оби́тели. Ве́руем же, я́ко и свята́я душа́ твоя́ упоко́ися в пресве́тлых ра́йских селе́ниих, я́же насле́довати помози́ и на́м, возглаша́ющим ти́ похвалы́ сицевы́я:
Ра́дуйся, тече́ние вре́менныя жи́зни ра́вно и богоуго́дно сконча́вый; ра́дуйся, ве́ру пра́вую непоро́чну сохрани́вый.
Ра́дуйся, ми́рною христиа́нскою кончи́ною пра́ведность твою́ извести́вый; ра́дуйся, поко́й ве́чный на небеси́ со святы́ми получи́вый.
Ра́дуйся, ра́дости пра́ведных во оби́телех ра́йских причасти́выйся; ра́дуйся, со мно́жеством ду́ш, тобо́ю спасе́ние улучи́вших, блаже́нства ве́чнаго сподо́бивыйся.
Ра́дуйся, с ца́рственными новому́ченики Ца́рство небе́сное насле́дивый; ра́дуйся, с ни́ми Царю́ Сла́вы предстоя́й и о избавле́нии оте́чества на́шего от безбо́жных вра́г моли́твы вознося́й.
Ра́дуйся, вели́кий Правосла́вия побо́рниче; ра́дуйся, непреодоли́мый благоче́стия защи́тниче.
Ра́дуйся, со́нными явле́ньми пресла́вно чудотворя́й; ра́дуйся, иносла́вныя ко Правосла́вию приводя́й.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 13
О, всечестны́й о́тче Иоа́нне, не кроншта́дтский то́кмо, но и всеросси́йский, па́че же — всеми́рный свети́льниче и вели́кий Христо́в уго́дниче и чудотво́рче! Приими́ от на́с, недосто́йных, хвале́бное пе́ние сие́, и благоприя́тными твои́ми к Бо́гу моли́твами изба́ви на́с от бе́д вре́менных и муче́ний ве́чных, да сподо́бимся с тобо́ю в Ца́рствии небе́снем ве́чно воспева́ти: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгела Храни́теля своего́, еще́ шестоле́тен сы́й, в све́тлости неизрече́нней я́ве узре́л еси́, Иоа́нне, и́же и рече́ тебе́, я́ко по повеле́нию Госпо́дню всегда́ неви́димо сопрису́тствует и храни́т тя́ от все́х зо́л. Те́мже от ю́ности избра́нника Бо́жия тя́ ве́дуще, взыва́ем си́це:
Ра́дуйся, от младе́нства по предуве́дению Бо́гом избра́нный; ра́дуйся, от ю́ности в служе́ние Ему́ Того́ благода́тию призва́нный.
Ра́дуйся, А́нгела Храни́теля твоего́ из де́тства до́брыми нра́вы весели́вый; ра́дуйся, николи́же того́ чи́м опеча́ливый.
Ра́дуйся, я́ко незри́мый Храни́тель тво́й я́ве тебе́ яви́ся; ра́дуйся, я́ко то́й всегда́ храни́ти тя́ обеща́ся.
Ра́дуйся, благочести́вых роди́телей ча́до возлю́бленное; ра́дуйся, те́ми изде́тска в стра́се Бо́жием воспита́нный.
Ра́дуйся, воздержа́нию от ю́ности себе́ обучи́вый; ра́дуйся, во убо́жестве и нищете́ млады́я дни́ своя́ препроводи́вый.
Ра́дуйся, я́ко благонра́вия твоего́ ра́ди благода́ть Бо́жия я́ве на тебе́ почива́ше; ра́дуйся, я́ко та́ лице́ твое́ всегда́ благоумиле́нно творя́ше.
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Кондак 1
Избра́нному во иере́ех, ди́вному уго́днику Бо́жию Иоа́нну, па́стырю и учи́телю, о царе́х моли́твеннику, ско́рбных уте́шителю, земли́ Росси́йския све́тлому свети́льнику, все́ житие́ свое́ на служе́ние Бо́гу и бли́жним посвяти́вшему, и мно́жество гре́шников на покая́ние обрати́вшему; мно́гим же боля́щим исцеле́ние у Бо́га испроси́вшему, похвалы́ вознесе́м, я́ко хода́таю на́шему и ско́рому помо́щнику. Ты́ же, о́тче, я́ко име́яй дерзнове́ние ко Го́споду, от вся́ких на́с бе́д свобожда́й, да зове́м ти́ хвале́бно:
Ра́дуйся, Иоа́нне, но́вый Росси́йский свети́льниче и те́плый о на́с к Бо́гу моли́твенниче.
Молитвы
Святы́й пра́ведный о́тче на́ш Иоа́нне, вели́кий чудотво́рче и свети́льниче Ру́сския земли́! Ты́ во све́те пренебе́снем Христа́ Бо́га на́шего зри́ши, ми́лости Его́ за любо́вь твою́ сподобля́емь. Боже́ственныя благода́ти испо́лнен бы́в, Те́лом Христо́вым и Кро́вию Его́ при́сно пита́емь, изше́л еси́ на па́стырское де́лание да́же до ве́чера жи́зни твоея́. Оба́че не преста́л еси́ и ны́не от де́лания твоего́, во ве́ки живы́й во Христе́. Ве́мы, вели́кий па́стырю на́ш, я́ко свяще́нствовавшу ти́, ини́и милосе́рдию тобо́ю научи́шася, друзи́и же от нищеты́ и паде́ний грехо́вных тобо́ю возведе́ни бы́ша и зело́ возлюби́ша тя́, вся́кому добру́ и́х науча́юща. Те́мже мо́лим тя́: научи́ и на́с добро́ твори́ти, греха́ огреба́тися, о спасе́нии ду́ш на́ших пещи́ся, и во вся́ком де́ле бла́зе бу́ди на́м помо́щник благи́й, тебе́ бо сказа́ Бо́г ну́жды люде́й Свои́х, цели́телю и благоде́телю на́ш! Ве́мы и сия́, пра́ведный о́тче, я́ко вели́кий моли́твенник и чу́дный соверши́тель Безкро́вныя Же́ртвы ты́ бы́л еси́, испо́лнен сы́й ду́ха ве́ры, наде́жды и любве́ христиа́нския. Се́ бо Боже́ственную Литурги́ю соверша́я и о вручи́вших себе́ моли́твенному твоему́ заступле́нию пла́менно моля́ся, я́ко оте́ц чадолюби́вый все́х любо́вию твое́ю обыма́л еси́, поминове́ние о ни́х творя́, да омы́ются грехи́ и́х святе́йшею Кро́вию Христо́вою. Те́мже и мы́, гре́шнии, упова́юще на любо́вь и по́мощь твою́, усе́рдно взыва́ем ти́: моли́ся, вели́кий па́стырю Ру́сския земли́, о бра́тии твое́й, архипа́стырех и па́стырех на́ших, да поживу́т по во́ли Бо́жией, я́коже пре́жнии па́стыри, Бо́гу угоди́вшии, и да внуши́т Госпо́дь моле́ния и́х на вся́к ча́с. Моли́, чудотво́рче преди́вный, Всеми́лостиваго Спа́са на́шего о все́х неду́гующих и многообра́зне бе́дствующих, утеше́ния ча́ющих, да исцеле́ние и по́мощь прии́мут и да уте́шени бу́дут. Моли́ся Бо́гу, о́тче Иоа́нне, о де́тех и о́троцех уча́щихся, я́ко да позна́ют ти́и ве́ру Христо́ву и да поживу́т по ве́ре, возлюби́в кре́пко Го́спода на́шего, Пречи́стую Влады́чицу Богоро́дицу и вся́ святы́я, с ни́миже и тя́, вои́стину до́браго отца́ и наста́вника и́х, и да соблюда́ют и́х А́нгели Храни́тели и́х, я́коже и тя́ А́нгел Храни́тель тво́й соблюда́ше от прираже́ний вра́жиих. Ду́хом апо́стольския ре́вности о ве́ре Правосла́вной пламене́я, гро́зно и непреста́нно облича́л еси́ хулы́ искази́телей Ева́нгелия Христо́ва. Те́мже мо́лим тя́: порази́ и ны́не, уго́дниче Бо́жий, вся́ собла́зны и разделе́ния, толи́ко умно́жившияся ны́не, да поживу́т лю́дие правосла́внии в едине́нии и ми́ре, и в ве́рности Ма́тери свое́й, Це́ркви Христо́вой. К си́м же и сию́ вели́кую мольбу́ с ве́рою ти́ прино́сим: предста́тельствуй, вели́кий чудотво́рче и проро́че, ро́ду твоему́ явле́нный, у стра́шнаго престо́ла Го́спода Сла́вы, да пощади́т и поми́лует стра́ждущую зе́млю Ру́сскую, в не́йже толи́ко просия́ любы́ твоя́. И да изба́вит Госпо́дь лю́ди Своя́ от и́га лю́тых безбо́жник и го́рькаго мучи́тельства и́х. О, пречу́дный о́тче Иоа́нне, вели́кий иере́ю Бо́га Вы́шняго! Се́ о́браз тво́й честны́й лобыза́ем, ве́дуще, я́ко вели́каго засту́пника и уте́шителя дарова́ тя́ Госпо́дь лю́дем Свои́м. Испроси́ у́бо на́м ду́х покая́ния и обновле́ния и́стиннаго. Ве́мы, я́ко во дни́ земна́го жития́ твоего́ мно́гое мно́жество люде́й во святе́м хра́ме, го́рдость и смуще́ние отло́жше, пла́чуще и рыда́юще, о та́йных свои́х гресе́х я́ве ка́ющеся, чрез тя́ живи́тельное разреше́ние от Бо́га Спа́са приима́ху. Я́коже тогда́ над ни́ми, простри́ и ны́не неви́димо благословля́ющую ру́ку твою́, и проще́ние грехо́в на́ших у Бо́га Милосе́рдаго испроси́. Посо́бствуй у́бо на́м про́чее вре́мя живота́ на́шего богоуго́дне преити́, да сподо́бимся святы́ми твои́ми моли́твами дости́гнути небе́снаго Ца́рствия, и та́мо вку́пе с тобо́ю, отце́м, моли́твенником и засту́пником на́шим, сла́вити Ди́внаго во святы́х Свои́х Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Конда́къ а҃
И҆збра́нномꙋ во і҆ере́ехъ, ди́вномꙋ ᲂу҆го́дникꙋ бж҃їю і҆ѡа́ннꙋ, па́стырю и҆ ᲂу҆чи́телю, ѡ҆ царе́хъ моли́твенникꙋ, ско́рбныхъ ᲂу҆тѣ́шителю, землѝ рѡссі́йскїѧ свѣ́тломꙋ свѣти́льникꙋ, всѐ житїѐ своѐ на слꙋже́нїе бг҃ꙋ и҆ бли̑жнимъ посвѧти́вшемꙋ, и҆ мно́жество грѣ́шникѡвъ на покаѧ́нїе ѡ҆брати́вшемꙋ: мнѡ́гимъ же болѧ́щымъ и҆сцѣле́нїе ᲂу҆ бг҃а и҆спроси́вшемꙋ, похвалы̑ вознесе́мъ: ꙗ҆́кѡ хода́таю на́шемꙋ и҆ ско́ромꙋ помо́щникꙋ. ты́ же ѻ҆́ч҃е, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свобожда́й, да зове́мъ тѝ хвале́бнѡ:
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
І҆́косъ а҃
А҆́гг҃ла храни́телѧ своегѡ̀, є҆щѐ шестолѣ́тенъ сы́й, въ свѣ́тлости неизрече́ннѣй ꙗ҆́вѣ ᲂу҆зрѣ́лъ є҆сѝ, і҆ѡа́нне, и҆́же и҆ речѐ тебѣ̀, ꙗ҆́кѡ по повелѣ́нїю гдⷭ҇ню всегда̀ неви́димѡ соприсꙋ́тствꙋетъ и҆ храни́тъ тѧ̀ ѿ всѣ́хъ ѕѡ́лъ. Тѣ́мже ѿ ю҆́ности и҆збра́нника бж҃їѧ тѧ̀ вѣ́дꙋще, взыва́емъ си́це:
Ра́дꙋйсѧ, ѿ младе́нства по пред̾ꙋвѣ́дѣнїю бг҃омъ и҆збра́нный: ра́дꙋйсѧ, ѿ ю҆́ности въ слꙋже́нїе є҆мꙋ̀ тогѡ̀ бл҃года́тїю призва́нный.
Ра́дꙋйсѧ, а҆́гг҃ла храни́телѧ твоегѡ̀ и҆з̾ дѣ́тства до́брыми нра́вы весели́вый: ра́дꙋйсѧ, николи́же того̀ чи́мъ ѡ҆печа́ливый.
Ра́дꙋйсѧ, ꙗ҆́кѡ незри́мый храни́тель тво́й ꙗ҆́вѣ тебѣ̀ ꙗ҆ви́сѧ: ра́дꙋйсѧ, ꙗ҆́кѡ то́й всегда̀ храни́ти тѧ̀ ѡ҆бѣща́сѧ.
Ра́дꙋйсѧ, бл҃гочести́выхъ роди́телей ча́до возлю́бленное: ра́дꙋйсѧ, тѣ́ми и҆з̾дѣ́тска въ стра́сѣ бж҃їемъ воспита́нный.
Ра́дꙋйсѧ, воздержа́нїю ѿ ю҆́ности себє̀ ѡ҆бꙋчи́вый: ра́дꙋйсѧ, во ᲂу҆бо́жествѣ и҆ нищетѣ̀ млады̑ѧ дни̑ своѧ̑ препроводи́вый.
Ра́дꙋйсѧ, ꙗ҆́кѡ бл҃гонра́вїѧ твоегѡ̀ ра́ди бл҃года́ть бж҃їѧ ꙗ҆́вѣ на тебѣ̀ почива́ше: ра́дꙋйсѧ, ꙗ҆́кѡ та̀ лицѐ твоѐ всегда̀ бл҃гоꙋмиле́ннѡ творѧ́ше.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ в҃
Ви́димъ тѧ̀, бг҃омꙋ́дре і҆ѡа́нне, ѿ ю҆́на во́зраста бл҃года́тїю бж҃їею ѡ҆сѣне́на бы́вша, и҆ є҆́ю та́инственнѡ на добродѣ́тельное житїѐ наставлѧ́ема и҆ рꙋководи́ма. тѣ́мже, и҆мꙋ́щи тѧ̀ во ѡ҆́бразъ на́мъ и҆ подража́нїе, ᲂу҆ми́льнѡ вопїе́мъ хрⷭ҇тꙋ̀ бг҃ꙋ: А҆ллилꙋ́їа.
І҆́косъ в҃
Ра́зꙋмъ тво́й и҆з̾мла́да въ и҆зꙋче́нїе сщ҃е́нныхъ и҆ ѻ҆те́ческихъ писа́нїй ᲂу҆глꙋби́въ, і҆ѡа́нне, и҆ и҆з̾ ни́хъ воспрїѧ́лъ є҆сѝ ѡ҆би́льнѡ во́дꙋ жи́вꙋ, ѿ и҆сто́чника ст҃а́гѡ дх҃а проистека́ющꙋю. тѣ́мже мо́лимъ тѧ̀: ᲂу҆молѝ бл҃га́го гдⷭ҇а, да сподо́битъ прича́стники бы́ти сеѧ̀ живи́тєльныѧ стрꙋѝ и҆ на́съ, взыва́ющихъ тѝ си́це:
Ра́дꙋйсѧ, ѿ младе́нства чи́ста себє̀ ѿ страсте́й соблюды́й: ра́дꙋйсѧ, бл҃года́ть ст҃а́гѡ креще́нїѧ цѣ́лꙋ и҆ невреди́мꙋ сохрани́вый.
Ра́дꙋйсѧ, чте́нїе бжⷭ҇твєнныхъ писа́нїй ᲂу҆се́рднѡ возлюби́вый: ра́дꙋйсѧ, сокрове́нный въ ни́хъ смы́слъ пра́вѡ и҆ до́брѣ ᲂу҆разꙋмѣ́вый.
Ра́дꙋйсѧ, во ᲂу҆че́нїи кни́жнѣмъ прилѣжа́нїе примѣ́рное показа́вый: ра́дꙋйсѧ, въ любомꙋ́дрїи є҆сте́ственнѣмъ и҆ дꙋхо́внѣмъ сла́внѡ преꙋспѣ́вый.
Ра́дꙋйсѧ, любомꙋ́дрїемъ твои́мъ мі́ра пре́лєсти ско́рѡ распозна́вый: ра́дꙋйсѧ, тѣ́хъ сѣ́тей, ꙗ҆́кѡ ѻ҆ре́лъ высокопа́рный мꙋ́дрѣ и҆збѣжа́вый.
Ра́дꙋйсѧ, сѣ́верныѧ рѡссі́йскїѧ страны̀ чꙋ́дное и҆ свѣ́тлое воспита́нїе: ра́дꙋйсѧ, мра́ка грѣхо́внагѡ въ лю́дехъ разгна́нїе.
Ра́дꙋйсѧ, всѣ́мъ притека́ющымъ къ тебѣ̀ ско́рое вспоможе́нїе подава́ѧй: ра́дꙋйсѧ, многомо́щное на́мъ пред̾ бг҃омъ застꙋпле́нїе ꙗ҆влѧ́ѧй.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ г҃
Си́ла бл҃года́ти бж҃їѧ, недостаю́щаѧ восполнѧ́ющаѧ, ѡ҆би́льнѡ и҆злїѧ́сѧ на тѧ̀, і҆ѡа́нне приснопа́мѧтне, є҆гда̀ ѿ ст҃и́телѧ хрїстофо́ра во і҆ере́а рꙋкоположе́нъ бы́лъ є҆сѝ, и҆ гра́дꙋ кроншта́дтꙋ па́стырь ᲂу҆чине́нъ: ѿто́лѣ бо нача́лъ є҆сѝ ᲂу҆чи́ти лю́ди є҆́же вѣ́рнѡ слꙋжи́ти ст҃ѣ́й трⷪ҇цѣ и҆ пѣ́ти є҆́й: А҆ллилꙋ́їа.
І҆́косъ г҃
И҆мѣ́ѧ любо́вь бж҃е́ственнꙋю въ се́рдцѣ свое́мъ, мꙋ́дре і҆ѡа́нне, и҆ ᲂу҆ста́вы воздержа́нїѧ стро́гѡ соблюда́ѧ, ᲂу҆до́бь побора́лъ є҆сѝ страсте́й двиза̑нїѧ, николи́же тѣ́ми запѧ́тъ бы́въ. тѣ́мже, ꙗ҆́кѡ мꙋ́жъ си́ленъ, и҆зше́лъ є҆сѝ на дѣ́ланїе ни́вы гдⷭ҇ни: сло́вомъ, а҆́ки ра́ломъ, разрыхлѧ́ѧ ѿвердѣ́вшаѧ и҆ ѡ҆леденѣ̑вшаѧ сердца̀ человѣ́чєскаѧ, согрѣва́ѧ та̑ мл҃твою и҆ теплото́ю любвѐ твоеѧ̀, и҆ насѣва́ѧ въ ни́хъ сѣ́мена и҆́скреннѧгѡ покаѧ́нїѧ и҆ живы́ѧ вѣ́ры. сегѡ̀ ра́ди восписꙋ́емъ тѝ похвалы̀ такѡвы́ѧ:
Ра́дꙋйсѧ, и҆збра́нный сосꙋ́де бж҃їѧ бл҃года́ти: ра́дꙋйсѧ, дарѡ́въ нбⷭ҇ныхъ вмѣсти́лище.
Ра́дꙋйсѧ, всѣ́мъ се́рдцемъ и҆ всѣ́мъ помышле́нїемъ твои́мъ бг҃а возлюби́вый: ра́дꙋйсѧ, сегѡ̀ ра́ди и҆ ча̑да твоѧ̑ дꙋхѡ́внаѧ и҆́скреннѣ того̀ люби́ти наꙋчи́вый.
Ра́дꙋйсѧ, за́пѡвѣди бж҃їѧ и҆ ᲂу҆ста́вы цр҃кве ѡ҆ постѣ́хъ ѡ҆па́снѡ храни́вый: ра́дꙋйсѧ, любо́вь твою̀ къ бг҃ꙋ и҆ бли́жнимъ дѣѧ́ньми и҆ ᲂу҆че́ньми твои́ми проѧви́вый.
Ра́дꙋйсѧ, ѿ ю҆́ности над̾ страстьмѝ воцари́выйсѧ: ра́дꙋйсѧ, сла́венъ побѣди́тель над̾ тѣ́ми ꙗ҆ви́выйсѧ.
Ра́дꙋйсѧ, въ мі́рѣ пожи́вый премі́рнѡ: ра́дꙋйсѧ, на землѝ мꙋ́дрствовавый небе́снѡ.
Ра́дꙋйсѧ, ца́рства православнорѡссі́йскагѡ сто́лпе непоколеби́мый: ра́дꙋйсѧ, правосла́вїѧ и҆ до́брыхъ ѡ҆бы́чаєвъ блюсти́телю непозы́блемый.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ д҃
Бꙋ́рею мно́гихъ бѣ́дъ и҆ волне́нїй жите́йскихъ ѡ҆держи̑мымъ на́мъ, помога́й, ѻ҆́ч҃е і҆ѡа́нне, ꙗ҆́коже и҆ въ животѣ̀ твое́мъ помога́лъ є҆сѝ всѣ́мъ, съ вѣ́рою къ тебѣ̀ притека́вшымъ, да всѝ тобо́ю вспомоществꙋ́еми, бл҃года́рнѡ ѡ҆ тебѣ̀ пое́мъ бг҃ꙋ: А҆ллилꙋ́їа.
І҆́косъ д҃
Слы́шавъ а҆пⷭ҇ла гл҃го́люща: на́ше житїѐ на нб҃сѣ́хъ є҆́сть, и҆ и҆з̾мла́да возжела́въ наслѣ́довати є҆̀, маловре́менное сїѐ житїѐ не во ᲂу҆гожде́нїи пло́ти и҆ страсте́мъ и҆жди́лъ є҆сѝ, і҆ѡа́нне, но во ѡ҆чище́нїи дꙋшѝ ѿ по́мыслѡвъ грѣхо́вныхъ. тѣ́мже и҆мꙋ́ще тѧ̀ во ѡ҆́бразъ бг҃оꙋго́днагѡ житїѧ̀ и҆ помо́щника во бл҃гоче́стїи, взыва́емъ тѝ си́це:
Ра́дꙋйсѧ, свѣ́та є҆ѵⷢ҇льскагѡ въ на́шѧ днѝ свѣ́тлое блиста́нїе: ра́дꙋйсѧ, ѡ҆мраче́нныхъ дꙋ́шъ вседѣ́йственное просвѣще́нїе.
Ра́дꙋйсѧ, ꙗ҆́кѡ въ бж҃е́ствєннаѧ писа̑нїѧ ве́сь ᲂу҆́мъ тво́й впери́лъ є҆сѝ: ра́дꙋйсѧ, въ ни́хъ бо стезю̀ пра́вꙋю въ црⷭ҇твїе нбⷭ҇ное ѡ҆брѣ́лъ є҆сѝ.
Ра́дꙋйсѧ, ꙗ҆́кѡ всѧ̑ дѣѧ̑нїѧ твоѧ̑ свѣ́тъ мі́рꙋ бы́ша: ра́дꙋйсѧ, ꙗ҆́кѡ тобо́ю ѻ҆ц҃ъ нбⷭ҇ный ди́внѡ просла́висѧ.
Ра́дꙋйсѧ, ꙗ҆́кѡ сло́во твоѐ не бѣ̀ ꙗ҆́коже кѷмва́лъ брѧца́ѧй, ме́ртвъ, нечꙋ́вственъ: ра́дꙋйсѧ, ꙗ҆́кѡ то́е бѧ́ше вои́стиннꙋ жи́во и҆ дѣ́йственно.
Ра́дꙋйсѧ, ꙗ҆́кѡ тобо́ю ме́ртвїи дꙋ́хомъ вѣ́рою ѡ҆живлѧ́ютсѧ: ра́дꙋйсѧ, ꙗ҆́кѡ па́дшїи въ бе́зднꙋ грѣхо́внꙋю тобо́ю къ покаѧ́нїю возбꙋжда́ютсѧ.
Ра́дꙋйсѧ, ꙗ҆́кѡ въ тебѣ̀ неꙋстраши́маго ѡ҆бличи́телѧ и҆ крѣ́пкаго противобо́рца врагѡ́мъ и҆́стины вѣ́рнїи ѡ҆брѣто́ша.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ є҃
Ѕвѣзда̀ многосвѣ́тлаѧ землѝ рѡссі́йскїѧ, мра́къ грѣхо́вный просвѣща́ющаѧ, ꙗ҆ви́лсѧ є҆сѝ, сщ҃е́нне і҆ѡа́нне. тѣ́мже и҆ ны́нѣ пода́ждь просвѣще́нїе сынѡ́мъ рѡссі́йскимъ, тмо́ю заблꙋжде́нїѧ ѡ҆б̾ѧ̑тымъ и҆ во вла́сть нечести́выхъ преда́вшихсѧ, да позна́ютъ своѐ ѡ҆каѧ́нство, и҆ ѡ҆брати́вшесѧ ко гдⷭ҇ꙋ, въ покаѧ́нїи возопїю́тъ є҆мꙋ̀: А҆ллилꙋ́їа.
І҆́косъ є҃
Ви́дѣвше рѡссі́йстїи наро́ди вели́каго тѧ̀ бл҃гоче́стїѧ проповѣ́дника, и҆ многомо́щна пред̾ бг҃омъ мл҃твенника и҆ предста́телѧ, во мно́жествѣ ѿвсю́дꙋ къ тебѣ̀ притека́хꙋ, и҆ні́и же и҆здале́ча письмена̀ тебѣ̀ посыла́хꙋ, и҆сцѣлє́нїѧ въ болѣ́знехъ, совѣ́та въ недоꙋмѣ́нїихъ и҆ ᲂу҆тѣше́нїѧ въ ско́рбехъ просѧ́ще: и҆ ᲂу҆лꙋчи́вше жела́ннаѧ, бл҃года́рственнѡ тебѣ̀ взыва́хꙋ:
Ра́дꙋйсѧ, і҆ѡа́нне, но́вый мі́рꙋ свѣти́льниче: ра́дꙋйсѧ, несре́дственный въ мл҃твахъ бг҃ꙋ собесѣ́дниче.
Ра́дꙋйсѧ, ꙗ҆́кѡ твоѧ̑ моли́твы си̑льны и҆ многомѡ́щны влⷣкꙋ ᲂу҆милостивлѧ́ти: ра́дꙋйсѧ, ꙗ҆́кѡ твоѐ къ немꙋ̀ предста́тельство многодѣ́йственно бл҃гость є҆гѡ̀ на щедрода́тельство подвиза́ти.
Ра́дꙋйсѧ, ꙗ҆́кѡ тобо́ю, по мѣ́рѣ вѣ́ры, подаю́тсѧ бл҃года̑тнаѧ и҆сцѣлє́нїѧ: ра́дꙋйсѧ, ꙗ҆́кѡ недꙋ́гꙋющїи прїе́млютъ тобо́ю ско́рое недꙋ́гѡвъ свои́хъ въ здра́вїе премѣне́нїе.
Ра́дꙋйсѧ, ꙗ҆́кѡ грѣ́шнїи на покаѧ́нїе тобо́ю ѡ҆браща́ютсѧ: ра́дꙋйсѧ, ꙗ҆́кѡ безчи́ннїи крамо́льницы тобо́ю вразꙋмлѧ́ютсѧ.
Ра́дꙋйсѧ, ꙗ҆́кѡ безꙋ́мнїи глꙋми́телїе над̾ та́йнами вѣ́ры тобо́ю посрамлѧ́ютсѧ: ра́дꙋйсѧ, ꙗ҆́кѡ посмѣѧ́телїе чꙋде́сныхъ твои́хъ дѣѧ́нїй тобо́ю подоба́ющее вразꙋмле́нїе прїе́млютъ.
Ра́дꙋйсѧ, скорбѧ́щихъ бл҃года́тный ᲂу҆тѣ́шителю: ра́дꙋйсѧ, въ недоꙋмѣ́нїи сꙋ́щихъ бла́гостный вразꙋми́телю.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ ѕ҃
Проповѣ́дникѡмъ и҆́стины, бг҃онѡ́снымъ ѻ҆ц҃є́мъ подража́ѧ, всего̀ себѐ на слꙋже́нїе бг҃ꙋ и҆ бли́жнимъ вда́лъ є҆сѝ и҆ са́нъ сщ҃е́нства носѧ̀, поко́ѧ не вѣ́далъ є҆сѝ, слꙋ̑жбы бж҃їѧ въ хра́мѣ при́снѡ соверша́ѧ, и҆ въ домѣ́хъ вѣ́рныхъ молє́бныѧ пѣ́нїѧ воспѣва́ѧ, нꙋжда́ющымсѧ же ще́дрѡ бл҃готворѧ̀, та́кѡ наименова́нїе бл҃готво́рца и҆ безсре́бренника стѧжа́лъ є҆сѝ, і҆ѡа́нне. тѣ́мже и҆ по ᲂу҆спе́нїи твое́мъ, рѡссі́йстїи лю́дїе прославлѧ́ютъ и҆́мѧ твоѐ, и҆ вѣ́чнꙋю па́мѧть тебѣ̀ возглаша́юще, пою́тъ бг҃ꙋ: А҆ллилꙋ́їа.
І҆́косъ ѕ҃
Возсїѧ́вый ѿ дв҃ы хрⷭ҇то́съ бг҃ъ на́шъ, и҆ тмꙋ̀ і҆дѡлобѣ́сїѧ свѣ́томъ є҆ѵⷢ҇лїа разгна́вый, ꙗ҆ви́ тѧ, ѻ҆́ч҃е і҆ѡа́нне, вѣ́рна и҆ ре́вностна проповѣ́дника своеѧ̀ и҆́стины, клеврє́ты лꙋка́вагѡ и҆звраща́емыѧ. тѣ́мже, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, и҆зба́ви ѿ тѣ́хъ ѕло́бы и҆ кова́рства всѣ́хъ воспѣва́ющихъ тѝ такова̑ѧ:
Ра́дꙋйсѧ, слꙋжи́телю хрⷭ҇то́въ и҆зрѧ́дный: ра́дꙋйсѧ, во і҆ере́ехъ ᲂу҆го́дниче тогѡ̀ преизѧ́щный.
Ра́дꙋйсѧ, ꙗ҆́кѡ бы́лъ є҆сѝ до́мꙋ бж҃їѧ стра́жъ неꙋсы́пный: ра́дꙋйсѧ, ꙗ҆́кѡ пасѡ́мымъ твои́мъ бы́лъ є҆сѝ ѿ та́тей дꙋхо́вныхъ крѣ́пкїй храни́тель.
Ра́дꙋйсѧ, писа́ньми твои́ми мно́гихъ ѿ любвѐ мїрскі́ѧ къ любвѝ хрⷭ҇то́вѣ подви́гнꙋвый: ра́дꙋйсѧ, вѣща́ньми твои́ми любо́вь бж҃їю къ человѣ́кѡмъ, въ и҆скꙋпле́нїи и҆ промышле́нїи на́мъ ꙗ҆вле́ннꙋю, и҆з̾ѧви́вый.
Ра́дꙋйсѧ, дѣ́йствїе дх҃а бж҃їѧ на сердца̀ человѣ́чєскаѧ ᲂу҆добопости́жнѡ сказа́вый: ра́дꙋйсѧ, та́йнꙋ мл҃твеннагѡ съ бг҃омъ собесѣ́дованїѧ ꙗ҆́вѣ ᲂу҆каза́вый.
Ра́дꙋйсѧ, цѣломꙋ́дрїе въ зако́нномъ сꙋпрꙋ́жествѣ твое́мъ чꙋде́снѡ сохрани́вый: ра́дꙋйсѧ, мнѡ́гаѧ ча̑да дꙋхѡ́внаѧ покаѧ́нїемъ породи́вый.
Ра́дꙋйсѧ, въ сердца́хъ вѣ́рныхъ бл҃гꙋ́ю па́мѧть по себѣ̀ ѡ҆ста́вивый: ра́дꙋйсѧ, ꙗ҆́кѡ па́мѧть сїѧ̀, ꙗ҆́кѡ пра́ведника, незабве́нна пребꙋ́детъ во вѣ́ки.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ з҃
Хотѧ̀ всебл҃гі́й гдⷭ҇ь ᲂу҆тѣ́шити вѣ́рныѧ лю́ди своѧ̑ и҆ ѿврати́ти беззако́нныхъ ѿ ѕлы́хъ дѣ́лъ и҆́хъ, воздви́же тѧ̀, прⷪ҇ро́ка землѝ на́шей, ꙗ҆́коже нѣ́когда нїнеѵі́и, гра́дꙋ вели́комꙋ, і҆ѡ́нꙋ: да проповѣ́си гнѣ́въ бж҃їй, грѧдꙋ́щїй вско́рѣ на зе́млю на́шꙋ, є҆́же и҆ сбы́стьсѧ по твоемꙋ̀ вѣща́нїю: и҆́бо непока́ѧни въ горды́ни свое́й пребы́хомъ, и҆ не восхотѣ́хомъ съ тобо́ю смире́ннѡ пѣ́ти хрⷭ҇тꙋ̀ бг҃ꙋ: А҆ллилꙋ́їа.
І҆́косъ з҃
Нѡ́ва зна́мєнїѧ гнѣ́ва бж҃їѧ постиго́ша на́съ, занѐ не восхотѣ́хомъ внѧ́ти бг҃одꙋхновє́ннымъ твои̑мъ гл҃го́лѡмъ: держа́ва бо рѡссі́йскаѧ паде́сѧ и҆ лю̑тымъ безбѡ́жникѡмъ во вла́сть предаде́сѧ, и҆́же чєстны́ѧ ѡ҆би́тєли и҆́ночєскїѧ разори́ша, ст҃ы́ѧ хра́мы ѡ҆скверни́ша, и҆ всѧ̑ бл҃гочєсти́выѧ лю́ди лю́тѣ ѡ҆ѕло́биша, и҆ мно́жество дꙋхо́внагѡ и҆ мїрска́гѡ чи́на мꙋ́ченичестѣй сме́рти преда́ша. тѣ́мже и҆з̾ глꙋбины̀ дꙋшѝ покаѧ́нїе гдⷭ҇ꙋ прино́симъ, и҆ къ твое́й мл҃твѣ прибѣга́емъ, да проще́нїе грѣхѡ́въ на́шихъ и҆ ми́лости бж҃їей сподо́бимсѧ. тебѣ́ же, ꙗ҆́кѡ предста́телю на́шемꙋ, ᲂу҆ми́льнѡ глаго́лемъ:
Ра́дꙋйсѧ, покаѧ́нїѧ велегла́сный проповѣ́дниче: ра́дꙋйсѧ, грѧдꙋ́щагѡ гнѣ́ва бж҃їѧ на лю́ди согрѣши́вшыѧ нело́жный провозвѣ́стниче.
Ра́дꙋйсѧ, нече́стїѧ людска́гѡ громогла́сный ѡ҆бличи́телю: ра́дꙋйсѧ, ѡ҆ и҆справле́нїи тѣ́хъ ре́вностный рачи́телю.
Ра́дꙋйсѧ, ца́рства правосла́вно-рѡссі́йскагѡ при животѣ̀ твое́мъ крѣ́пкїй ѡ҆пло́тъ бы́вый: ра́дꙋйсѧ, ѿ крамо́лъ во дни̑ ѻ҆́ны то́е сохрани́вый.
Ра́дꙋйсѧ, госꙋда́рей бл҃гочести́выхъ при́сный мл҃твенниче и҆ спобо́рниче: ра́дꙋйсѧ, мꙋ́дрый тѣ́хъ наста́вниче и҆ храни́телю.
Ра́дꙋйсѧ, ѡ҆ вла́сти ца́рстѣй, ꙗ҆́кѡ бг҃оꙋста́вленной, мнѡ́гаѧ словеса̀ провѣща́вый: ра́дꙋйсѧ, къ послꙋша́нїю и҆ вѣ́рности зако́нной вла́сти то́й лю́ди тщали́вѡ приводи́вый.
Ра́дꙋйсѧ, мл҃твами твои́ми престо́лы царе́й бл҃гочести́выхъ ѡ҆гражда́ѧй: ра́дꙋйсѧ, сꙋды̀ пра̑вы въ лю́дехъ твори́ти тѣ́хъ поꙋча́ѧй.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ и҃
Страннолѣ́пный и҆ а҆гг҃лоподо́бный пꙋ́ть житїѧ̀ земна́гѡ сверши́лъ є҆сѝ, ѻ҆́ч҃е і҆ѡа́нне: въ мі́рѣ бо пожи́въ въ воздержа́нїи и҆ цѣломꙋ́дрїи и҆ во всегда́шнемъ бг҃а славосло́вїи вели̑кимъ ѻ҆ц҃є́мъ послѣ́довалъ є҆сѝ. съ ни́ми же ны́нѣ на нб҃сѝ хрⷭ҇тꙋ̀ въ весе́лїи предстоѧ̀, и҆ мл҃твы ѡ҆ мі́рѣ приносѧ̀, вы́нꙋ пое́ши: А҆ллилꙋ́їа.
І҆́косъ и҃
Всѝ правосла́внїи лю́дїе, ꙗ҆́коже въ животѣ̀ твое́мъ, та́кѡ и҆ по преставле́нїи съ ве́лїею любо́вїю чтꙋ́тъ тѧ̀ ѻ҆́ч҃е і҆ѡа́нне, ꙗ҆́кѡ ве́лїе дерзнове́нїе къ бг҃ꙋ и҆́маши, и҆ мо́лиши бл҃гость є҆гѡ̀ ѡ҆ всѣ́хъ къ тебѣ̀ притека́ющихъ, и҆ та́кѡ взыва́ющихъ:
Ра́дꙋйсѧ, бл҃га́го ко́рене до́брое прозѧбе́нїе: ра́дꙋйсѧ, бл҃гочести́выхъ роди́телей честно́е рожде́нїе и҆ благо́е воспита́нїе.
Ра́дꙋйсѧ, ꙗ҆́кѡ ма́лаѧ ве́сь сꙋра̀, твоегѡ̀ ра́ди въ не́й рожде́нїѧ и҆ воспита́нїѧ все́й землѝ рѡссі́йстѣй вѣ́дома сотвори́сѧ: ра́дꙋйсѧ, ꙗ҆́кѡ гра́дъ кроншта́дтъ твои́мъ въ не́мъ слꙋже́нїемъ просла́висѧ.
Ра́дꙋйсѧ, ꙗ҆́кѡ милосе́рдыми дѣ́лы твои́ми всѧ̀ землѧ̀ рѡссі́йскаѧ напо́лнисѧ: ра́дꙋйсѧ, ꙗ҆́кѡ вѣ́сть ѡ҆ чꙋ́днѣмъ и҆ ст҃ѣ́мъ житїѝ твое́мъ за предѣ́лы є҆ѧ̀ распространи́сѧ.
Ра́дꙋйсѧ, ꙗ҆́кѡ писа́ньми твои́ми та́йна бл҃года́тнагѡ съ бг҃омъ ѻ҆бще́нїѧ и҆з̾ѧснѧ́етсѧ: ра́дꙋйсѧ, ꙗ҆́кѡ си́ми писа́ньми свѣ́тъ дх҃о́внагѡ ѡ҆заре́нїѧ въ сердца̀ чтꙋ́щихъ ѧ҆̀ и҆злива́етсѧ.
Ра́дꙋйсѧ, ꙗ҆́кѡ въ писа́нїихъ твои́хъ чистота̀ дꙋшѝ твоеѧ̀ ꙗ҆́вѣ прозрѣва́етсѧ: ра́дꙋйсѧ, ꙗ҆́кѡ въ ни́хъ, ꙗ҆́коже въ зерца́лѣ, бг҃оподо́бїе дꙋшѝ человѣ́ческїѧ ѿѡбража́етсѧ.
Ра́дꙋйсѧ, ꙗ҆́кѡ бг҃омꙋ́дрыми писа́ньми твои́ми не то́кмѡ лю́дїе рѡссі́йстїи, но и҆ и҆нозе́мнїи ко бл҃гоче́стїю своемꙋ̀ назида́ютсѧ: ра́дꙋйсѧ, ꙗ҆́кѡ тѣ́ми писа́ньми и҆́стиннаѧ вѣ́ра возсїѧва́етъ и҆ мра́къ є҆ресе́й разгонѧ́етсѧ.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ ѳ҃
Всѧ́кое сло́во не довлѣ́етъ къ похвалѣ̀ твое́й, ѻ҆́ч҃е і҆ѡа́нне, ты́ бо дх҃омъ ст҃ы́мъ дви́жимь, ѿ ю҆́ности бг҃ꙋ ᲂу҆се́рднѡ послꙋжи́лъ є҆сѝ: въ и҆зꙋче́нїи сщ҃е́нныхъ писа́нїй мнѡ́га лѣ̑та ᲂу҆се́рднѡ трꙋжда́ѧсѧ и҆ ра́зꙋмъ глꙋбо́къ стѧжева́ѧ, та́же ѡ҆ наꙋче́нїи ѻ҆трокѡ́въ и҆ ѡ҆ па́ствѣ твое́й прилѣ́жнѡ пекі́йсѧ, всѣ́хъ поꙋча́лъ є҆сѝ разꙋ́мнѡ пѣ́ти бг҃ꙋ: А҆ллилꙋ́їа.
І҆́косъ ѳ҃
Виті̑и нечести́вїи и҆ сꙋемꙋ́дреннїи и҆ вѣ́ры хꙋли́телїе тобо́ю ꙗ҆́вѣ посра́млени бы́ша во ѕлоче́стїи свое́мъ, правосла́внїи же въ вѣ́рѣ ᲂу҆тверди́шасѧ, бг҃овѣща́нными твои́ми глагѡ́лы наставлѧ́еми. тѣ́мже восхвалѧ́юще тѧ̀, взыва́емъ си́це:
Ра́дꙋйсѧ, цѣвни́це, бг҃овѣща́ннаѧ: ра́дꙋйсѧ, гꙋ́сли дх҃а сладкозвꙋ́чныѧ.
Ра́дꙋйсѧ, словесы̀ и҆ писа́ньми твои́ми догма́ты вѣ́ры ᲂу҆ѧсни́вый: ра́дꙋйсѧ, вѣща́ньми твои́ми вѣ́рныхъ смы́слы въ правосла́вїи ᲂу҆тверди́вый.
Ра́дꙋйсѧ, мно́гихъ коле́блющихсѧ въ и҆́стиннѣй вѣ́рѣ ᲂу҆тверди́вый: ра́дꙋйсѧ, гордели́ваго въ сꙋемꙋ́дрїи хꙋли́телѧ та́инствъ цр҃кве хрⷭ҇то́вы небоѧ́зненнѡ ѡ҆бличи́вый.
Ра́дꙋйсѧ, ꙗ҆́кѡ тобо́ю полкѝ бг҃обо́рцєвъ побѣжде́ни бы́ша: ра́дꙋйсѧ, ꙗ҆́кѡ со́нмы пасо́мыхъ твои́мъ па́стырскимъ раче́нїемъ црⷭ҇твїе нбⷭ҇ное ᲂу҆лꙋчи́ша.
Ра́дꙋйсѧ, ра́зꙋма бжⷭ҇твеннагѡ мꙋ́дрый и҆з̾ѧви́телю: ра́дꙋйсѧ, та́инствъ цр҃ко́вныхъ бл҃гоговѣ́йный соверши́телю.
Ра́дꙋйсѧ, бл҃гонаде́жный на́шъ въ црⷭ҇твїе нбⷭ҇ное рꙋководи́телю: ра́дꙋйсѧ, пꙋтѝ сп҃си́тельнагѡ на́шъ и҆́стинный ᲂу҆чи́телю.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ і҃
Спастѝ хотѧ̀ дꙋ́шꙋ твою̀, полнотꙋ̀ добродѣ́телей є҆ѵⷢ҇льскихъ въ себѣ̀ совокꙋпи́лъ є҆сѝ, ѻ҆́ч҃е і҆ѡа́нне: а҆пⷭ҇льское и҆ свѧтоѻте́ческое вѣ́ры и҆сповѣ́данїе, мꙋ́ченическꙋю въ бл҃гоче́стїи тве́рдость, всегда́шнее въ мл҃твахъ бо́дрствованїе, воздержа́нїе и҆ смире́нїе, вкꙋ́пѣ же и҆ по́двиги преподо́бныхъ. тѣ́мже ны́нѣ со ст҃ы́ми на нб҃сѝ водворѧ́ѧсѧ и҆ непреста́ннѡ бг҃а славосло́вѧ, помина́й на́съ, сла́внꙋю па́мѧть твою̀ почита́ющихъ и҆ пою́щихъ бг҃ꙋ: А҆ллилꙋ́їа.
І҆́косъ і҃
Цр҃ѧ̀ нбⷭ҇нагѡ всеꙋсе́рдный сщ҃еннослꙋжи́тель бы́въ, ѡ҆ бл҃годе́нствїи земна́гѡ ѻ҆те́чества твоегѡ̀ ревнова́лъ є҆сѝ, правомꙋ́дреннѡ поꙋча́ѧ є҆́же воздава́ти бж҃їе бг҃ови и҆ ке́сареви ке́сарево. сегѡ̀ ра́ди восхвалѧ́емъ тѧ̀ си́це:
Ра́дꙋйсѧ, ра́бе бж҃їй, благі́й и҆ вѣ́рный: ра́дꙋйсѧ, слꙋжи́телю тогѡ̀ ᲂу҆се́рдный.
Ра́дꙋйсѧ, всѧ̑ повелѣ̑ннаѧ ѿ гдⷭ҇а тщали́вѡ твори́вый: ра́дꙋйсѧ, за́повѣдей є҆гѡ̀ и҆скꙋ́сный дѣ́латель бы́вый.
Ра́дꙋйсѧ, ѡ҆ вездѣсꙋ́щїи бж҃їи всегда̀ помышлѧ́вый: ра́дꙋйсѧ, ᲂу҆́мнымъ ѻ҆чесє́мъ свои́мъ того̀ вы́нꙋ представлѧ́вый.
Ра́дꙋйсѧ, бл҃гочести́выхъ царе́й ѻ҆ч҃ества твоегѡ̀, ꙗ҆́кѡ слꙋ́гъ бж҃їихъ почита́вый: ра́дꙋйсѧ, сло́вомъ твои́мъ и҆ мл҃твами въ трꙋ́днѣмъ по́двизѣ ᲂу҆правле́нїѧ и҆̀мъ помога́вый.
Ра́дꙋйсѧ, къ попече́нїю ѡ҆ бл҃ги́хъ цр҃кве и҆ наро́да тѣ́хъ подвиза́вый: ра́дꙋйсѧ, ѿ крамо́лъ и҆ мѧте́жей и҆̀хъ ѡ҆берега́вый.
Ра́дꙋйсѧ, и҆ ны́нѣ ѡ҆ землѝ рѡссі́йстѣй и҆ ѡ҆ всѣ́хъ ца́рствахъ правосла́вныхъ бг҃а ᲂу҆молѧ́ѧй: ра́дꙋйсѧ, ꙗ҆́кѡ предста́тель є҆сѝ всѣ́хъ на тѧ̀ надѣ́ющихсѧ.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ а҃і
Пѣ́сненными похвала́ми невозмо́жно є҆́сть и҆зѻбрази́ти мно́жество ѡ҆ бз҃ѣ и҆справле́нїй твои́хъ, ѽ пречꙋ́дне ѻ҆́ч҃е і҆ѡа́нне, ꙗ҆́же соверши́лъ є҆сѝ во все́мъ житїѝ твое́мъ: немѡщны́ѧ моли́твами твои́ми и҆сцѣлѧ́ѧ, бѣ́сы ѿ человѣ́къ и҆згонѧ́ѧ, недꙋ́говавшымъ пїѧ́нствомъ и҆ и҆ны́ми страстьмѝ врачꙋ́ѧ, въ нищетѣ́ же и҆ ᲂу҆бо́жествѣ сꙋ́щыѧ ѡ҆би́льнѡ ᲂу҆щедрѧ́ѧ, и҆ всѣ́мъ по коего́ждо потре́бѣ помога́ѧ и҆ бл҃готворѧ̀, во є҆́же бл҃года́рнѡ ѡ҆ тебѣ̀ пѣ́ти бг҃ꙋ: А҆ллилꙋ́їа.
І҆́косъ а҃і
Свѣти́льника свѣ́тла и҆ прозорли́вца ди́вна тѧ̀ гдⷭ҇ь во дне́хъ на́шихъ, провозвѣсти́вша грѧдꙋ́щїй гнѣ́въ є҆гѡ̀ на црⷭ҇тво рѡссі́йское, занѐ не пока́ѧхомсѧ, про́повѣдїю твое́ю. тѣ́мже, ꙗ҆́кѡ прⷪ҇ро́ка бж҃їѧ и҆ провозвѣ́стника тогѡ̀ сꙋде́бъ, ᲂу҆блажа́емъ тѧ̀ и҆ въ покаѧ́нїи взыва́емъ:
Ра́дꙋйсѧ, прови́дче ди́вный: ра́дꙋйсѧ, бꙋ́дꙋщихъ собы́тїй предсказа́телю нело́жный.
Ра́дꙋйсѧ, дрє́внимъ покаѧ́нїѧ проповѣ́дникѡмъ ра́вный: ра́дꙋйсѧ, грѧдꙋ́щагѡ гнѣ́ва бж҃їѧ на нераска̑ѧнныѧ грѣ̑шники возвѣсти́телю.
Ра́дꙋйсѧ, покаѧ́нїѧ сладкогла́сный глаша́таю: ра́дꙋйсѧ, смѧте́нныхъ серде́цъ ᲂу҆мири́телю.
Ра́дꙋйсѧ, многомо́щный на́шъ пред̾ бг҃омъ хода́таю: ра́дꙋйсѧ, бл҃гонаде́жный на́шъ пред̾ ни́мъ предста́телю.
Ра́дꙋйсѧ, до́брый слове́сныхъ ѻ҆ве́цъ па́стырю, мно́жество заблꙋ́ждшыхъ дꙋ́шъ взыска́вый: ра́дꙋйсѧ, ѿ ᲂу҆́зъ темни́чныхъ и҆ сме́рти мно́гихъ свободи́вый.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ в҃і
Блгⷣть бж҃їѧ, ю҆́же прїѧ́лъ є҆сѝ сꙋгꙋ́бѡ во ст҃ѣ́мъ кр҃ще́нїи и҆ во і҆ере́йстѣмъ рꙋкоположе́нїи, не вотщѐ въ тебѣ̀ бы́сть, ѻ҆́ч҃е і҆ѡа́нне: раче́нїемъ бо твои́мъ ᲂу҆потреби́лъ є҆сѝ сїю̀ на по́льзꙋ мнѡ́гимъ и҆ во сла́вꙋ дарода́телѧ є҆ѧ̀: свѣ́тлостїю бо житїѧ̀ твоегѡ̀ и҆ дѣ́лы милосе́рдыми вели́кїй ᲂу҆го́дникъ пред̾ бг҃омъ ꙗ҆ви́лсѧ є҆сѝ, и҆ ѿ мнѡ́жества ᲂу҆́стъ, тобо́ю дꙋхо́внѡ и҆ тѣле́снѡ ѡ҆бл҃годѣ́тельствованныхъ, возно́ситсѧ томꙋ̀ вели́каѧ пѣ́снь: А҆ллилꙋ́їа.
І҆́косъ в҃і
Пою́ще бг҃оꙋго́дное твоѐ ѿ ю҆́ности житїѐ, и҆ дх҃о́вное ѿ си́лы въ си́лꙋ восхожде́нїе, ᲂу҆блажа́емъ пра́веднꙋю твою̀ кончи́нꙋ и҆ сла́вное погребе́нїе бл҃года́тныхъ твои́хъ моще́й, вѣ́чный поко́й ѡ҆брѣ́тшихъ въ созда́ннѣй тобо́ю дѣви́чей ѡ҆би́тели. вѣ́рꙋемъ же, ꙗ҆́кѡ и҆ ст҃а́ѧ дꙋша̀ твоѧ̀ ᲂу҆поко́исѧ въ пресвѣ́тлыхъ ра́йскихъ селе́нїихъ, ꙗ҆́же наслѣ́довати помозѝ и҆ на́мъ возглаша́ющымъ тѝ похвалы̀ сицєвы́ѧ:
Ра́дꙋйсѧ, тече́нїе вре́менныѧ жи́зни ра́внѡ и҆ бг҃оꙋго́днѡ сконча́вый: ра́дꙋйсѧ, вѣ́рꙋ пра́вꙋю непоро́чнꙋ сохрани́вый.
Ра́дꙋйсѧ, ми́рною хрїстїа́нскою кончи́ною пра́ведность твою̀ и҆звѣсти́вый: ра́дꙋйсѧ, поко́й вѣ́чный на нб҃сѝ со ст҃ы́ми полꙋчи́вый.
Ра́дꙋйсѧ, ра́дости пра́ведныхъ во ѡ҆би́телехъ ра́йскихъ причасти́выйсѧ: ра́дꙋйсѧ, со мно́жествомъ дꙋ́шъ, тобо́ю сп҃се́нїе ᲂу҆лꙋчи́вшихъ, бл҃же́нства вѣ́чнаго сподо́бивыйсѧ.
Ра́дꙋйсѧ, съ ца́рственными новомч҃ники црⷭ҇тво нбⷭ҇ное наслѣ́дивый: ра́дꙋйсѧ, съ ни́ми цр҃ю̀ сла́вы предстоѧ́й и҆ ѡ҆ и҆збавле́нїи ѻ҆те́чества на́шегѡ ѿ безбо́жныхъ вра́гъ мл҃твы возносѧ́й.
Ра́дꙋйсѧ, вели́кїй правосла́вїѧ побо́рниче: ра́дꙋйсѧ, непреѡдоли́мый бл҃гоче́стїѧ защи́тниче.
Ра́дꙋйсѧ, сѡ́нными ꙗ҆вле́ньми пресла́внѡ чꙋдотворѧ́й: ра́дꙋйсѧ, и҆носла́вныѧ ко правосла́вїю приводѧ́й.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ г҃і
ѽ всечестны́й ѻ҆́ч҃е і҆ѡа́нне, не кроншта́дтскїй то́кмѡ, но и҆ всерѡссі́йскїй, па́че же всемі́рный свѣти́льниче и҆ вели́кїй хрⷭ҇то́въ ᲂу҆го́дниче и҆ чꙋдотво́рче: прїимѝ ѿ на́съ недосто́йныхъ хвале́бное пѣ́нїе сїѐ, и҆ бл҃гопрїѧ́тными твои́ми къ бг҃ꙋ мл҃твами и҆зба́ви на́съ ѿ бѣ́дъ вре́менныхъ и҆ мꙋче́нїй вѣ́чныхъ: да сподо́бимсѧ съ тобо́ю въ црⷭ҇твїи нбⷭ҇нѣмъ вѣ́чно воспѣва́ти: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃ла храни́телѧ своегѡ̀, є҆щѐ шестолѣ́тенъ сы́й, въ свѣ́тлости неизрече́ннѣй ꙗ҆́вѣ ᲂу҆зрѣ́лъ є҆сѝ, і҆ѡа́нне, и҆́же и҆ речѐ тебѣ̀, ꙗ҆́кѡ по повелѣ́нїю гдⷭ҇ню всегда̀ неви́димѡ соприсꙋ́тствꙋетъ и҆ храни́тъ тѧ̀ ѿ всѣ́хъ ѕѡ́лъ. Тѣ́мже ѿ ю҆́ности и҆збра́нника бж҃їѧ тѧ̀ вѣ́дꙋще, взыва́емъ си́це:
Ра́дꙋйсѧ, ѿ младе́нства по пред̾ꙋвѣ́дѣнїю бг҃омъ и҆збра́нный: ра́дꙋйсѧ, ѿ ю҆́ности въ слꙋже́нїе є҆мꙋ̀ тогѡ̀ бл҃года́тїю призва́нный.
Ра́дꙋйсѧ, а҆́гг҃ла храни́телѧ твоегѡ̀ и҆з̾ дѣ́тства до́брыми нра́вы весели́вый: ра́дꙋйсѧ, николи́же того̀ чи́мъ ѡ҆печа́ливый.
Ра́дꙋйсѧ, ꙗ҆́кѡ незри́мый храни́тель тво́й ꙗ҆́вѣ тебѣ̀ ꙗ҆ви́сѧ: ра́дꙋйсѧ, ꙗ҆́кѡ то́й всегда̀ храни́ти тѧ̀ ѡ҆бѣща́сѧ.
Ра́дꙋйсѧ, бл҃гочести́выхъ роди́телей ча́до возлю́бленное: ра́дꙋйсѧ, тѣ́ми и҆з̾дѣ́тска въ стра́сѣ бж҃їемъ воспита́нный.
Ра́дꙋйсѧ, воздержа́нїю ѿ ю҆́ности себє̀ ѡ҆бꙋчи́вый: ра́дꙋйсѧ, во ᲂу҆бо́жествѣ и҆ нищетѣ̀ млады̑ѧ дни̑ своѧ̑ препроводи́вый.
Ра́дꙋйсѧ, ꙗ҆́кѡ бл҃гонра́вїѧ твоегѡ̀ ра́ди бл҃года́ть бж҃їѧ ꙗ҆́вѣ на тебѣ̀ почива́ше: ра́дꙋйсѧ, ꙗ҆́кѡ та̀ лицѐ твоѐ всегда̀ бл҃гоꙋмиле́ннѡ творѧ́ше.
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Конда́къ а҃
И҆збра́нномꙋ во і҆ере́ехъ, ди́вномꙋ ᲂу҆го́дникꙋ бж҃їю і҆ѡа́ннꙋ, па́стырю и҆ ᲂу҆чи́телю, ѡ҆ царе́хъ моли́твенникꙋ, ско́рбныхъ ᲂу҆тѣ́шителю, землѝ рѡссі́йскїѧ свѣ́тломꙋ свѣти́льникꙋ, всѐ житїѐ своѐ на слꙋже́нїе бг҃ꙋ и҆ бли̑жнимъ посвѧти́вшемꙋ, и҆ мно́жество грѣ́шникѡвъ на покаѧ́нїе ѡ҆брати́вшемꙋ: мнѡ́гимъ же болѧ́щымъ и҆сцѣле́нїе ᲂу҆ бг҃а и҆спроси́вшемꙋ, похвалы̑ вознесе́мъ: ꙗ҆́кѡ хода́таю на́шемꙋ и҆ ско́ромꙋ помо́щникꙋ. ты́ же ѻ҆́ч҃е, ꙗ҆́кѡ и҆мѣ́ѧй дерзнове́нїе ко гдⷭ҇ꙋ, ѿ всѧ́кихъ на́съ бѣ́дъ свобожда́й, да зове́мъ тѝ хвале́бнѡ:
Ра́дꙋйсѧ, і҆ѡа́нне, но́вый рѡссі́йскїй свѣти́льниче, и҆ те́плый ѡ҆ на́съ къ бг҃ꙋ мл҃твенниче.
Моли́твы
Ст҃ы́й пра́ведный ѻ҆́ч҃е і҆ѡа́нне, вели́кїй чꙋдотво́рче и҆ свѣти́льниче рꙋ́сскїѧ землѝ: ты̀ во свѣ́тѣ пренбⷭ҇нѣмъ хрⷭ҇та̀ бг҃а на́шего зри́ши, млⷭ҇ти є҆гѡ̀ за любо́вь твою̀ сподоблѧ́емь. бж҃е́ственныѧ бл҃года́ти и҆спо́лненъ бы́въ, тѣ́ломъ хрⷭ҇то́вымъ и҆ кро́вїю є҆гѡ̀ при́снѡ пита́емь, и҆зше́лъ є҆сѝ на па́стырское дѣ́ланїе да́же до ве́чера жи́зни твоеѧ̀. ѻ҆ба́че не преста́лъ є҆сѝ и҆ ны́нѣ ѿ дѣ́ланїѧ твоегѡ̀, во вѣ́ки живы́й во хрⷭ҇тѣ̀. вѣ́мы, вели́кїй па́стырю на́шъ, ꙗ҆́кѡ сщ҃е́нствовавшꙋ тѝ, и҆ні́и милосе́рдїю тобо́ю наꙋчи́шасѧ, дрꙋзі́и же ѿ нищеты̀ и҆ паде́нїй грѣхо́вныхъ тобо́ю возведе́ни бы́ша и҆ ѕѣлѡ̀ возлюби́ша тѧ̀, всѧ́комꙋ добрꙋ̀ и҆̀хъ наꙋча́юща. тѣ́мже мо́лимъ тѧ̀: наꙋчѝ и҆ на́съ добро̀ твори́ти, грѣха̀ ѡ҆греба́тисѧ, ѡ҆ спасе́нїи дꙋ́шъ на́шихъ пещи́сѧ, и҆ во всѧ́комъ дѣ́лѣ бла́зѣ бꙋ́ди на́мъ помо́щникъ бл҃гі́й, тебѣ́ бо сказа̀ бг҃ъ нꙋ̑жды люде́й свои́хъ, цѣли́телю и҆ бл҃годѣ́телю на́шъ: вѣ́мы, и҆ сїѧ̑ пра́ведный ѻ҆́ч҃е, ꙗ҆́кѡ вели́кїй мл҃твенникъ и҆ чꙋ́дный соверши́тель безкро́вныѧ же́ртвы ты̀ бы́лъ є҆сѝ, и҆спо́лненъ сы́й дꙋ́ха вѣ́ры, наде́жды и҆ любвѐ хрⷭ҇тїа́нскїѧ. се́ бо бж҃е́ственнꙋю лїтꙋргі́ю соверша́ѧ и҆ ѡ҆ врꙋчи́вшихъ себє̀ мл҃твенномꙋ твоемꙋ̀ застꙋпле́нїю пла́меннѡ молѧ́сѧ, ꙗ҆́кѡ ѻ҆те́цъ чадолюби́вый всѣ́хъ любо́вїю твое́ю ѡ҆б̾има́лъ є҆сѝ, поминове́нїе ѡ҆ ни́хъ творѧ̀, да ѡ҆мы́ютсѧ грѣхѝ и҆́хъ ст҃ѣ́йшею кро́вїю хрⷭ҇то́вою. тѣ́мже и҆ мы̀ грѣ́шнїи ᲂу҆пова́юще на любо́вь и҆ по́мощь твою̀, ᲂу҆се́рднѡ взыва́емъ тѝ: моли́сѧ, вели́кїй па́стырю рꙋ́сскїѧ землѝ, ѡ҆ бра́тїи твое́й, а҆рхїпа́стырехъ и҆ па́стырехъ на́шихъ, да поживꙋ́тъ по во́ли бж҃їей, ꙗ҆́коже пре́жнїи па̑стыри, бг҃ꙋ ᲂу҆годи́вшїи, и҆ да внꙋши́тъ гдⷭ҇ь молє́нїѧ и҆́хъ на всѧ́къ ча́съ. молѝ, чꙋдотво́рче преди́вный, всеми́лостивагѡ сп҃са на́шего ѡ҆ всѣ́хъ недꙋ́гꙋющихъ и҆ многоѡбра́знѣ бѣ́дствꙋющихъ, ᲂу҆тѣше́нїѧ ча́ющихъ, да и҆сцѣле́нїе и҆ по́мощь прїи́мꙋтъ и҆ да ᲂу҆тѣ́шени бꙋ́дꙋтъ. моли́сѧ бг҃ꙋ, ѻ҆́ч҃е і҆ѡа́нне, ѡ҆ дѣ́техъ и҆ ѻ҆́троцѣхъ ᲂу҆ча́щихсѧ, ꙗ҆́кѡ да позна́ютъ ті́и вѣ́рꙋ хрⷭ҇то́вꙋ и҆ да поживꙋ́тъ по вѣ́рѣ, возлюби́въ крѣ́пкѡ гдⷭ҇а на́шего, пречⷭ҇тꙋю влⷣчцꙋ бцⷣꙋ и҆ всѧ̑ ст҃ы̑ѧ, съ ни́миже и҆ тѧ̀, вои́стиннꙋ, до́браго ѻ҆ц҃а̀ и҆ наста́вника и҆́хъ, и҆ да соблюда́ютъ и҆̀хъ а҆́гг҃ли храни́тели и҆́хъ, ꙗ҆́коже и҆ тѧ̀ а҆́гг҃лъ храни́тель тво́й соблюда́ше ѿ прираже́нїй вра́жїихъ. дх҃омъ а҆пⷭ҇льскїѧ ре́вности ѡ҆ вѣ́рѣ правосла́вной пламенѣ́ѧ, гро́знѡ и҆ непреста́ннѡ ѡ҆блича́лъ є҆сѝ хꙋлы̑ и҆скази́телей є҆ѵⷢ҇лїа хрⷭ҇то́ва. тѣ́мже мо́лимъ тѧ̀: поразѝ и҆ ны́нѣ, ᲂу҆го́дниче бж҃їй, всѧ̑ собла́зны и҆ раздѣлє́нїѧ толи́кѡ ᲂу҆мно́жившыѧсѧ ны́нѣ, да поживꙋ́тъ лю́дїе правосла́внїи въ є҆дине́нїи и҆ ми́рѣ, и҆ въ вѣ́рности ма́тери свое́й, цр҃кви хрⷭ҇то́вой. къ си́мъ же и҆ сїю̀ вели́кꙋю мольбꙋ̀ съ вѣ́рою тѝ прино́симъ: предста́тельствꙋй, вели́кїй чꙋдотво́рче и҆ прⷪ҇ро́че, ро́дꙋ твоемꙋ̀ ꙗ҆вле́нный, ᲂу҆ стра́шнагѡ прⷭ҇то́ла гдⷭ҇а сла́вы, да пощади́тъ и҆ поми́лꙋетъ стра́ждꙋщꙋю зе́млю рꙋ́сскꙋю, въ не́йже толи́кѡ просїѧ̀ любы̀ твоѧ̀. и҆ да и҆зба́витъ гдⷭ҇ь лю́ди своѧ̑ ѿ и҆́га лю́тыхъ безбѡ́жникъ и҆ го́рькагѡ мꙋчи́тельства и҆́хъ. Ѽ пречꙋ́дный ѻ҆́ч҃е і҆ѡа́нне, вели́кїй і҆ере́ю бг҃а вы́шнѧгѡ: сѐ ѡ҆́бразъ тво́й честны́й лобыза́емъ, вѣ́дꙋще, ꙗ҆́кѡ вели́каго застꙋ́пника и҆ ᲂу҆тѣ́шителѧ дарова̀ тѧ̀ гдⷭ҇ь лю́демъ свои́мъ. и҆спросѝ ᲂу҆̀бо на́мъ дꙋ́хъ покаѧ́нїѧ и҆ ѡ҆бновле́нїѧ и҆́стиннагѡ. вѣ́мы, ꙗ҆́кѡ во дни̑ земна́гѡ житїѧ̀ твоегѡ̀ мно́гое мно́жество люде́й во ст҃ѣ́мъ хра́мѣ, го́рдость и҆ смꙋще́нїе ѿло́жше, пла́чꙋще и҆ рыда́юще, ѡ҆ та́йныхъ свои́хъ грѣсѣ́хъ ꙗ҆́вѣ ка́ющесѧ, чрез̾ тѧ̀, живи́тельное разрѣше́нїе ѿ бг҃а сп҃са прїима́хꙋ. ꙗ҆́коже тогда̀ над̾ ни́ми, прострѝ и҆ ны́нѣ неви́димѡ бл҃гословлѧ́ющꙋю рꙋ́кꙋ твою̀ и҆ проще́нїе грѣхѡ́въ на́шихъ ᲂу҆ бг҃а млⷭ҇рдагѡ и҆спросѝ. посо́бствꙋй ᲂу҆̀бо на́мъ про́чее вре́мѧ живота̀ на́шегѡ бг҃оꙋго́днѣ преитѝ, да сподо́бимсѧ ст҃ы́ми твои́ми мл҃твами дости́гнꙋти нбⷭ҇нагѡ црⷭ҇твїѧ и҆ та́мѡ вкꙋ́пѣ съ тобо́ю, ѻ҆ц҃е́мъ, мл҃твенникомъ и҆ застꙋ́пникомъ на́шимъ, сла́вити ди́внаго во ст҃ы́хъ свои́хъ бг҃а, ѻ҆ц҃а̀, и҆ сн҃а, и҆ ст҃а́го дх҃а, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.