Песнь 1
Ирмос
Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма Амали́кову си́лу в пусты́ни победи́л е́сть.
Тропарь
Прича́стием, и́же к Бо́гу, преподо́бне, бы́л еси́ све́т и, к Нему́ отлучи́вся, Проко́пие блаже́нне, жела́нием кра́йним, благи́м наде́ждам свои́м исполне́ние, о́тче, прия́л еси́.
Тропарь
Жела́нием, и́же к Бо́гу, распаля́ем, ми́р оста́вил еси́ и Наста́вника обре́те, Христа́, о́тче Проко́пие сла́вне, о Не́мже стезю́ спасе́ную проше́л еси́, ра́дуяся.
Тропарь
Обогати́ся и́же ника́коже истоща́емыми, возжела́в бога́тство Небе́сное, сла́ву же вре́менную, му́дре, и пи́щу мимотеку́щую, и мирско́е достоя́ние доблему́дренно отри́нул еси́.
Богородичен
Кра́сную, и избра́нную, и Всечестну́ю разуме́в Тя́, Бо́жий Сы́н, Всенепоро́чная, Тво́й Сы́н и Бо́г бы́сть, сы́ны сотвори́ благода́тию, Богоро́дице, чту́щия Тя́.
Песнь 3
Ирмос
Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Тропарь
Усе́рдно к мы́сленным совлече́ся дея́нием, побежда́я вра́жия полки́ посо́бием Боже́ственнаго Ду́ха.
Тропарь
Ра́нами моли́твенными, и воздержа́нием, и бие́нием, преподо́бне, стра́сти мирски́я, о́тче Проко́пие, уязви́л еси́.
Тропарь
Умори́ врага́ блаже́нный Тво́й, Иису́се, Проко́пий, умерщвле́ние Твое́, Влады́ко, живоно́сное ра́достно возжеле́в.
Богородичен
Избавля́ющаго челове́ки от преслуша́ния и лю́таго паде́ния, и́же все́м благи́м Вино́внаго, Честна́я и Всенепоро́чная, родила́ еси́.
Песнь 4
Ирмос
Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Тропарь
Соедини́вся к стези́ пра́вды, Богоно́сне, в Боже́ственный гра́д вни́де, блаже́нне Проко́пие, спасе́нным сия́нием обогати́вся.
Тропарь
Единообра́зен, преподо́бне Проко́пие, в смы́сл Богоно́сных муже́й, блаже́нне, вни́де Боже́ственными повестьми́, Боже́ственною оде́ждею оде́явся.
Тропарь
Се́рдце твое́ скрижа́ль очище́ну, ду́ха Свята́го благода́ть обре́тше, о́тче Проко́пие, и написа́ соверше́нно безстра́стие, ве́ру и любо́вь нелицеме́рну.
Богородичен
Седя́й на Престо́ле превознесе́не Херуви́мстем, я́ко престо́л Тя́ име́я, Мари́е Богоневе́сто, на руку́ Твое́ю почи́в, препросла́вленный Бо́г на́ш.
Песнь 5
Ирмос
Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.
Тропарь
Пресве́тлую зарю́, Проко́пие блаже́нне, прии́м, я́ко со́лнце, яви́лся еси́, бесо́вскую тьму́ отогна́в, достосла́вне.
Тропарь
Твои́м жела́нием, Христе́, окрили́вся, блаже́нный Проко́пий жела́ние теле́сное, я́коже сгре́бие мирско́е, му́дре оттрясе́.
Тропарь
Си́лою Боже́ственною укрепи́вся, в ми́р всели́лся, опустева́ющи стра́сти, о́тче Богому́дре Проко́пие.
Богородичен
Рече́ние преста́ тле́нное, Де́ва бо нетле́нно роди́ Бо́га Сло́ва, вы́ше естества́ и сло́ва пребы́вши Де́вою.
Песнь 6
Ирмос
Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися ра́ди ми́лости от ре́бр Твои́х исте́кшею Кро́вию.
Тропарь
У́м сво́й ве́сь к Бо́гу простира́я непреста́нными поуче́ньми, плотску́ю же любо́вь не пощаде́, благи́м хода́тайством, Проко́пие, присвоя́ем.
Тропарь
Ни скве́рны, ни вра́ски прия́т, блаже́нне, посреде́ тебе́ ми́ра живу́щу, честны́ми же па́че мольба́ми свои́ми очища́еши от душе́вныя скве́рны притека́ющия.
Тропарь
Ты́, плотски́х мудрова́ний вы́шши по́мысл име́я, не уязви́ся, посреди́ же́н обнажа́ем, безстра́стия бо оде́ждою, Проко́пие, облече́ся.
Богородичен
Усты́, и по́мыслом, и се́рдцем, Пречи́стая, Тя́, Богоро́дицу, пропове́дуем. Тобо́ю бо Бо́гови примири́хомся, отринове́ннии пе́рвее преступле́нием пра́отца.
Песнь 7
Ирмос
В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Тропарь
Не изво́ли ничто́же на земли́ люби́ти, па́че Зижди́теля, но, посреди́ хра́мов скита́яся, блаже́нне Проко́пие, ра́довашеся и поя́ше, благослове́н еси́, зовы́й, в це́ркви сла́вы Твоея́, Го́споди.
Тропарь
Не пощаде́ пло́ти своея́, но предаде́ ю́ на по́двиги и труды́, ну́жное пребыва́ние, те́м ко́зни бесо́вския му́жески попра́в, блаже́нне Проко́пие, поя́ше, зовы́й всегда́: благослове́н еси́ в це́ркви сла́вы Твоея́, Го́споди.
Тропарь
Одержи́м христоподо́бною, о́тче, Боже́ственною любо́вию, преблаже́нне Проко́пие, вся́ бо, я́ко уме́ты, вмени́л еси́, вопия́ше, зовы́й немо́лчно: благослове́н еси́ в це́ркви сла́вы Твоея́, Го́споди.
Богородичен
Вы́шняго освяще́нное Боже́ственное селе́ние, ра́дуйся. Тобо́ю бо даде́ся ра́дость, Богоро́дице, зову́щим: благослове́нна Ты́ в жена́х еси́, Всенепоро́чная Влады́чице.
Песнь 8
Ирмос
Ру́це распросте́р, Дании́л льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.
Тропарь
Всесве́тлая звезда́, су́щих в тиме́нии страсте́й приводя́ к животу́, науча́я твори́ти Боже́ственныя за́поведи и нечи́стыя целому́дренно жи́ти, отго́ниши лю́тыя неду́ги, вопия́: благослови́те, вся́ дела́ Госпо́дня, Го́спода.
Тропарь
Ты́, це́л умо́м в кро́ве чу́дных, му́дре, мно́ги улови́л еси́ юро́дствовати Го́спода ра́ди, ве́дый наруга́ем бы́ти, вопия́ чисте́йшею душе́ю, Проко́пие блаже́нне: благослови́те, вся́ дела́ Госпо́дня, Го́спода.
Тропарь
Соверше́н еди́н И́же Свои́х сла́вяй Госпо́дь, прославля́я тя́, преподо́бне, ко гро́бу твоему́ притека́ющия исцеля́я, светлослове́ньми зову́щия: благослови́те, вся́ дела́ Госпо́дня, Го́спода.
Богородичен
Избавля́яй на́с, возсия́ из Тебе́ Госпо́дь, Де́во Чи́стая, Его́же моли́, Влады́чице, спасти́ пою́щия Тя́ и от обстоя́ния изба́вити на́с, вопию́щих: благослови́те, вся́ дела́ Госпо́дня, Го́спода.
Песнь 9
Ирмос
Ка́мень нерукосе́чный от несеко́мыя го́ры, Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Тропарь
Все́м се́рдцем, Проко́пие, Тро́ице усе́рдно предложи́вся и, от Нея́ луча́ благоде́льно прие́м, светови́ден бы́в и со А́нгелы лику́еши.
Тропарь
Жела́нием Боже́ственным приедини́вся и воздержа́нием просве́щся, ча́емых ве́чных бла́г во прича́стии бы́в, Богоблаже́нне Проко́пие, и наслажде́нии.
Тропарь
Твоя́ боле́зни и по́ты прия́т весе́лие, ника́коже конца́ иму́щее, в не́мже пита́яся, Проко́пие преблаже́нне, и на́с непреста́нно помина́й.
Богородичен
Спаси́ мя́, ро́ждшая все́х Изба́вителя и Благоде́теля, разори́ души́ мое́й мра́чный о́блак, Све́та о́блаче Свята́я Влады́чице, и си́льна соде́лай на стра́сти, борю́щия мя́.