Канон святой великомученице Анастасии Узорешительнице, Римляныне, Иллирийской

Пе́ние возсле́м Бо́гу, роди́тися хотя́щему пло́тию из Де́вы в Вифлее́ме гра́де и в я́слех положи́тися Отроча́ти, я́ко младе́нцу, да спасе́т челове́ческий ро́д.

Еди́ныя вожделе́нныя Христо́вы, Анастаси́е сла́вная, добро́ты и́щущи, претекла́ еси́ добро́ты мирски́я тве́рдостию нра́ва и безсме́ртнаго насле́дия, му́ченице, сподо́билася еси́.

Но́щь ле́стнаго омраче́ния, просвеще́нием Ду́ха озаря́ема, честна́я, претекла́ еси́ смы́сленне и ны́не всели́лася еси́, иде́же е́сть Боже́ственное сия́ние Несозда́нныя Тро́ицы.

Пелена́ми повива́емый Младе́нец, неосяза́емый Госпо́дь, хо́щет ви́ден бы́ти, в я́слех возлежа́й; го́ры, взыгра́йте, и ра́достию Боже́ственною, хо́лми, облецы́теся, све́та исполня́еми.

Благоче́стным дерзнове́нием гони́телей притупи́ла еси́ разжже́нных глаго́л стре́лы, спаси́тельным Сло́вом обогати́вшися, Анастаси́е, и Боже́ственною любо́вию двиза́ния душе́вная упра́вивши.

То́чию,— му́ченице, вопия́ла еси́,— ищу́ Го́спода, к еди́ной Того́ любви́ ду́шу привяза́х, Сего́ осия́тися чисте́йшими бога́тно блиста́ньми иду́, обы́чая простото́ю.

Рече́ния уже́ исполня́ются проре́кших Боже́ственным Ду́хом: Де́ва бо и́дет в верте́пе роди́ти Всесоверше́ннаго.

Му́ченическое благосла́вие любо́вию взыска́вши, сего́ получи́ла еси́, тве́рдо пострада́вши несомне́нною во́лею, терпеливоду́шная.

Истка́нною от свы́ше благода́ти ри́зою и́стинно оде́ялася еси́ совлече́нием те́ла, страстоте́рпице му́ченице всехва́льная.

Возсия́ звезда́ Иу́дова от земли́ Халде́йския, дви́жущи на поклоне́ние звездосло́вцы, я́ко писа́ся.

Зако́нно подвиза́лася еси́, беззако́нныя победи́вши, му́ченице всесла́вная, си́лою Ду́ха.

Воскресе́ние Бо́жие образу́еши тезоимени́тством, враги́ проклина́ющи неви́димыя, всехва́льная.

Естество́, е́же от на́с Благоутро́бный прие́м, ви́димь е́сть я́ко Младе́нец, зи́ждай во чре́ве младе́нцы, и повива́ется, и в я́слех возлега́ет, и разреша́ет мои́х страсте́й многоплете́нныя плени́цы бла́гостию.

Святы́х му́ченик следя́щи терпели́вно Христа́ ра́ди по́двиги, и те́х потре́бам служа́щи, и гное́ния, преподо́бная, отира́ющи, обогати́лася еси́ пресве́тло, те́х сия́ющи благосла́вием.

Ка́пли врачева́ний излива́еши ту́чами Боже́ственных дарова́ний, и страсте́й ре́ки воспря́туеши, и помоществу́еши лю́те бе́дствующим, всесла́вная му́ченице Христо́ва, Боже́ственнаго Воскресе́ния тезоимени́тая.

Го́рнии ли́цы славосло́вят безпло́тных, на земли́ же покланя́емся, зря́ще, земни́и, на́м уподо́бльшагося и в я́слех возлежа́ща Тя́, Христе́, Бо́же вся́ческих.

О́гнь испепели́ла еси́ ле́стный, я́коже де́ти, пла́мени приобщи́вшися, пока́зоваше тепло́ раче́ние, Богому́драя, его́же к твоему́ стяжа́ла еси́ Влады́це и Жениху́.

Ту́чи пролива́еши врачева́ний, уставля́ющи пале́ние неду́гов, и лю́ди при́сно устроя́еши песнопе́ти: благослове́н еси́, Го́споди Бо́же, во ве́ки.

Ему́же предстоя́т горе́ ты́сящи и тьмы́ А́нгелов, верте́п но́сит ражда́емаго; Его́же пое́м дела́ непреста́нно, я́ко Го́спода.

Хра́м Тро́ицы показа́лася еси́ в Боже́ственных хра́мех, моли́твами и поще́нии, Анастаси́е, упражня́ющися, — благослови́те, — взыва́ющи, — дела́ Госпо́дня, Го́спода.

Крепча́йшими словесы́ Хрисого́на, страстоте́рпице, укре́пльшися, и́долов немощно́е попра́ла еси́ суровство́, до́блественне пострада́вши.

Игра́йте, го́ры, в весе́лии, и ра́достию, хо́лми, препоя́шитеся: ны́не Де́ва приближа́ется роди́ти Го́спода.

Де́нь весе́лия приноша́ет ти́ тва́рь, Анастаси́е, па́мять прославля́ющи, Его́же просла́вила еси́, Сло́ва, твои́ми кровьми́.

Све́том чисте́йшим ны́не осия́ема, моли́твами твои́ми просвеща́тися свы́ше все́м на́м проси́, му́ченице благода́рная.

Пѣ́нїе возсле́мъ бг҃ꙋ, роди́тисѧ хотѧ́щемꙋ пло́тїю и҆зъ дв҃ы, въ виѳлее́мѣ гра́дѣ, и҆ въ ꙗ҆́слехъ положи́тисѧ ѻ҆троча́ти, ꙗ҆́кѡ млⷣнцꙋ, да спасе́тъ человѣ́ческїй ро́дъ.

Є҆ди́ныѧ вожделѣ́нныѧ хрⷭ҇то́вы, а҆настасі́е сла́внаѧ, добро́ты и҆́щꙋщи, претекла̀ є҆сѝ добрѡ́ты мїрскі̑ѧ тве́рдостїю нра́ва, и҆ безсме́ртнагѡ наслѣ́дїѧ, мꙋ́ченице, сподо́биласѧ є҆сѝ.

Но́щь ле́стнагѡ ѡ҆мраче́нїѧ, просвѣще́нїемъ дх҃а ѡ҆зарѧ́ема, честна́ѧ, претекла̀ є҆сѝ смы́сленнѣ, и҆ ны́нѣ всели́ласѧ є҆сѝ, и҆дѣ́же є҆́сть бжⷭ҇твенное сїѧ́нїе несозда́нныѧ трⷪ҇цы.

Пелена́ми повива́емый млⷣнцъ, неѡсѧза́емый гдⷭ҇ь, хо́щетъ ви́дѣнъ бы́ти въ ꙗ҆́слехъ возлежа́й: го́ры взыгра́йте, и҆ ра́достїю бжⷭ҇твенною хо́лми ѡ҆блецы́тесѧ, свѣ́та и҆сполнѧ́еми.

Благоче́стнымъ дерзнове́нїемъ гони́телей притꙋпи́ла є҆сѝ разжже́нныхъ глагѡ́лъ стрѣ́лы, спаси́тельнымъ сло́вомъ ѡ҆богати́вшисѧ, а҆настасі́е, и҆ бжⷭ҇твенною любо́вїю двиза̑нїѧ дꙋшє́внаѧ ᲂу҆пра́вивши.

То́чїю, мꙋ́ченице, вопїѧ́ла є҆сѝ: и҆щꙋ̀ гдⷭ҇а, къ є҆ди́ной тогѡ̀ любвѝ дꙋ́шꙋ привѧза́хъ, сегѡ̀ ѡ҆сїѧ́тисѧ чистѣ́йшими бога́тнѡ блиста́ньми и҆дꙋ̀, ѻ҆бы́чаѧ простото́ю.

Речє́нїѧ ᲂу҆жѐ и҆сполнѧ́ютсѧ, проре́кшихъ бжⷭ҇твеннымъ дх҃омъ: дв҃а бо и҆́детъ въ верте́пѣ роди́ти всесоверше́ннаго.

Мꙋ́ченическое бл҃госла́вїе любо́вїю взыска́вши, сего̀ полꙋчи́ла є҆сѝ тве́рдѡ пострада́вши, несомнѣ́нною во́лею, терпѣливодꙋ́шнаѧ.

И҆стка́нною ѿ свы́ше бл҃года́ти ри́зою и҆́стиннѡ ѡ҆дѣ́ѧласѧ є҆сѝ совлече́нїемъ тѣ́ла, страстоте́рпице мꙋ́ченице всехва́льнаѧ.

Возсїѧ̀ ѕвѣзда̀ і҆ꙋ́дова ѿ землѝ халде́йскїѧ, дви́жꙋщи на поклоне́нїе ѕвѣздосло́вцы, ꙗ҆́кѡ писа́сѧ.

Зако́ннѡ подвиза́ласѧ є҆сѝ, беззакѡ́нныѧ побѣди́вши, мꙋ́ченице всесла́внаѧ, си́лою дх҃а.

Воскрⷭ҇нїе бж҃їе ѡ҆бразꙋ́еши тезоимени́тствомъ, врагѝ проклина́ющи неви̑димыѧ, всехва́льнаѧ.

Є҆стество̀ є҆́же ѿ на́съ бл҃гоꙋтро́бный прїе́мъ, ви́димь є҆́сть ꙗ҆́кѡ млⷣнецъ, зи́ждай во чре́вѣ младе́нцы: и҆ повива́етсѧ, и҆ въ ꙗ҆́слехъ возлега́етъ, и҆ разрѣша́етъ мои́хъ страсте́й многоплетє́нныѧ плени̑цы бл҃гостїю.

Ст҃ы́хъ мч҃никъ слѣдѧ́щи терпѣли́внѡ хрⷭ҇та̀ ра́ди по́двиги, и҆ тѣ́хъ потре́бамъ слꙋжа́щи, и҆ гноє́нїѧ, преподо́бнаѧ, ѡ҆тира́ющи, ѡ҆богати́ласѧ є҆сѝ пресвѣ́тлѡ, тѣ́хъ сїѧ́ющи благосла́вїемъ.

Ка̑пли врачева́нїй и҆злива́еши тꙋ́чами бжⷭ҇твенныхъ дарова́нїй, и҆ страсте́й рѣ́ки воспрѧ́тꙋеши, и҆ помоществꙋ́еши лю́тѣ бѣ́дствꙋющымъ, всесла́внаѧ мꙋ́ченице хрⷭ҇то́ва, бжⷭ҇твеннагѡ воскресе́нїѧ тезоимени́таѧ.

Го́рнїи ли́цы славосло́вѧтъ безпло́тныхъ, на землѝ же покланѧ́емсѧ, зрѧ́ще земні́и на́мъ ᲂу҆подо́бльшагосѧ, и҆ въ ꙗ҆́слехъ возлежа́ща тѧ̀, хрⷭ҇тѐ, бж҃е всѧ́ческихъ.

Ѻ҆́гнь и҆спепели́ла є҆сѝ ле́стный, ꙗ҆́коже дѣ́ти пла́мени приѡбщи́вшисѧ: пока́зоваше тепло̀ раче́нїе бг҃омꙋ́драѧ, є҆го́же къ твоемꙋ̀ стѧжа́ла є҆сѝ влⷣцѣ и҆ женихꙋ̀.

Тꙋ́чи пролива́еши врачева́нїй, ᲂу҆ставлѧ́ющи пале́нїе недꙋ́гѡвъ, и҆ лю́ди при́снѡ ᲂу҆строѧ́еши пѣснопѣ́ти: бл҃гослове́нъ є҆сѝ, гдⷭ҇и бж҃е, во вѣ́ки.

Є҆мꙋ́же предстоѧ́тъ горѣ̀ ты́сѧщы и҆ тмы̑ а҆́гг҃лѡвъ, верте́пъ но́ситъ ражда́емаго: є҆гѡ́же пое́мъ дѣла̀ непреста́ннѡ ꙗ҆́кѡ гдⷭ҇а.

Хра́мъ трⷪ҇цы показа́ласѧ є҆сѝ въ бжⷭ҇твенныхъ хра́мѣхъ, моли́твами и҆ пощє́нїи, а҆настасі́е, ᲂу҆пражнѧ́ющисѧ, бл҃гослови́те, взыва́ющи, дѣла̀ гдⷭ҇нѧ, гдⷭ҇а.

Крѣпча́йшими словесы̀ хрѷсого́на, страстоте́рпице, ᲂу҆крѣ́пльшисѧ, і҆́дѡлѡвъ немощно́е попра́ла є҆сѝ сꙋровство̀, до́блественнѣ пострада́вши.

И҆гра́йте го́ры въ весе́лїи, и҆ ра́достїю хо́лми препоѧ́шитесѧ, ны́нѣ дв҃а приближа́етсѧ роди́ти гдⷭ҇а.

Де́нь весе́лїѧ приноша́етъ тѝ тва́рь, а҆настасі́е, па́мѧть прославлѧ́ющи, є҆го́же просла́вила є҆сѝ сло́ва твои́ми кровьмѝ.

Свѣ́томъ чистѣ́йшимъ ны́нѣ ѡ҆сїѧ́ема, моли́твами твои́ми просвѣща́тисѧ свы́ше всѣ̑мъ на́мъ просѝ, мꙋ́ченице благода́рнаѧ.