Кондак 1
Избра́ннии от все́х племе́н и наро́дов в язы́к свя́т, ца́рское свяще́ние, сы́нове Све́та и насле́дницы Ца́рствия, прииди́те, возра́дуемся Го́сподеви и Спаси́телю Бо́гу, в Вифлее́ме ро́ждшемуся и на́с ра́ди пелена́ми повива́емому, с волхвы́ и па́стыри поклони́мся, а́нгельскую вси́ в весе́лии пою́ще пе́снь:
Сла́ва в вы́шних Бо́гу и на земли́ ми́р, в челове́цех благоволе́ние!
Икос 1
А́нгелом недове́домую, пресла́вную та́йну Твоего́ смотре́ния на коне́ц веко́в открыва́я, Христе́, я́ко Младе́нец в я́слех безслове́сных возлежи́ши и во убо́зем верте́пе ми́ру явля́ешися, Сло́ве Бо́жий, безнача́льне. О́ле стра́шнаго та́инства! О́ле Бо́жия снизхожде́ния! Те́м у́бо со стра́хом и ра́достию взира́юще на неисповеди́мое истоща́ние Твое́, си́це Тебе́ зове́м:
Сла́ва Тебе́, Све́те Ти́хий, от Де́вы ми́ру возсия́вый; сла́ва Тебе́, А́нгелов Ра́досте, во страну́ пла́ча прише́дый.
Сла́ва Тебе́, Нача́льниче ми́ра, спасе́ние благовести́вый; сла́ва Тебе́, Сы́не Бо́жий, Собо́ю то́е устро́ивый.
Сла́ва Тебе́, Сия́ние О́тчия сла́вы; сла́ва Тебе́, от тьмы́ в чу́дный Тво́й све́т челове́ки призва́вый.
Сла́ва Тебе́, Иису́се, Сы́не Единоро́дный, на зе́млю снизше́дый; сла́ва Тебе́, Иису́се, восхо́д земноро́дным на Не́бо устро́ивый.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 2
Ви́дев нищету́ и поги́бель ро́да челове́ческаго, всемогу́щее светоза́рное Сло́во Бо́жие, ти́хому молча́нию содержа́щу вся́ и но́щи преполовля́ющейся, с Небесе́, от Престо́ла Ца́рскаго, во юдо́ль земну́ю поги́бельную сни́де, во спасе́ние пою́щих Ему́: Аллилу́иа.
Икос 2
Разуме́в ду́хом проро́к Авваку́м прише́ствие Твое́, ужа́сся вопия́ше: Го́споди, услы́шах слу́х Тво́й и убоя́хся, разуме́х дела́ Твоя́ и ужасо́хся! Мы́ же сбытие́ та́йны сея́ зря́ще, Вифлее́м честву́ем и я́слем Твои́м покланя́емся, зову́ще:
Сла́ва Тебе́, Бо́жия Прему́дросте и Си́ло; сла́ва Тебе́, омраче́нную не́мощь на́шу посети́вый.
Сла́ва Тебе́, повива́ющему мгло́ю зе́млю и не́бо о́блаки; сла́ва Тебе́, на́с ра́ди пови́тому пелена́ми.
Сла́ва Тебе́, одева́яй красото́ю кри́ны се́льныя; сла́ва Тебе́, наготу́ на́шу облеки́й во оде́жду нетле́ния.
Сла́ва Тебе́, зра́к раба́ прие́мый; сла́ва Тебе́, от ра́бства страсте́й на́с свободи́вый.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 3
Си́лы Небе́сныя ве́лиим гла́сом восхвали́ша Тя́, све́тлое Со́лнце Сла́вы, восходя́щее от де́вственнаго О́блака и просвеща́ющее ми́р за милосе́рдие безме́рное, и в весе́лии воспе́ша: Аллилу́иа.
Икос 3
Име́яй престо́л не́бо и подно́жие зе́млю, ме́ста ни еди́на обре́те во оби́тели, те́мже Чи́стая Де́ва, Ма́ти Твоя́, сокрыва́ет Тя́ от хла́да нощна́го в худе́м верте́пе и во я́слех ско́тиих полага́ет Тя́, Сокро́вище го́рняго ми́ра и Зижди́теля вся́ческих. Дивя́щеся милосе́рдию Твоему́, си́це Тебе́ зове́м:
Сла́ва Тебе́, по на́м неизрече́нно обнища́вый; сла́ва Тебе́, неизче́тно на́с обогати́вый.
Сла́ва Тебе́, на́шу не́мощь восприе́мый; сла́ва Тебе́, на́с си́лою Твое́ю облеки́й.
Сла́ва Тебе́, хла́д нощны́й претерпе́вый; сла́ва Тебе́, теплото́ю Твоея́ любве́ ми́р согре́вый.
Сла́ва Тебе́, не име́вый, где́ главы́ подклони́ти на земли́; сла́ва Тебе́, преклони́вый небеса́ схожде́нием Твои́м.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 4
Бу́рею сумни́тельных помышле́ний мяте́тся И́род и вся́ Иерусали́ма с ни́м; ца́рие же восто́чнии Тебе́, Царю́ царе́й, да́ры избра́нныя прино́сят. С ни́миже и на́с сподо́би Тебе́ кла́нятися ду́хом и и́стиною и приноси́ти Тебе́ ве́ру я́ко зла́то, чи́стое житие́ я́ко лива́н, любо́вь же я́ко сми́рну, зову́ще: Аллилу́иа.
Икос 4
Слы́шав Ада́м первозда́нный гла́с Го́спода сла́вы, ходя́щаго в раи́, стра́хом скры́ся, убоя́вся лица́ Твоего́. Ны́не же Ты́, Спа́се, сокрыва́еши под бре́нным покро́вом стра́шную сла́ву Твоего́ Божества́ и низхо́диши на зе́млю, зра́к Ада́мов нося́, взыска́ти поги́бшаго, вопию́ща Тебе́:
Сла́ва Тебе́, с Небесе́ до́лу низше́дый; сла́ва Тебе́, челове́ка горе́ вознесы́й.
Сла́ва Тебе́, беззако́ния моя́ на Себе́ возложи́вый; сла́ва Тебе́, я́звою Твое́ю мя́ исцели́вый.
Сла́ва Тебе́, приобщи́выйся моея́ пло́ти; сла́ва Тебе́, приобща́яй мя́ Твоего́ Божества́.
Сла́ва Тебе́, сту́дную наготу́ челове́ков ри́зою Твоея́ сла́вы покры́вый; сла́ва Тебе́, гла́д души́ утоля́яй сла́достию трапе́зы Твоея́.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 5
Боготе́чная звезда́ с высоты́ показу́ет Тя́, изда́вна предвозвеще́нную мы́сленную Звезду́, от Иа́кова возсия́вшую. Сподо́би и на́с, ко убо́гому верте́пу со звездосло́вцы прите́кших, узре́ти очище́нными очесы́ души́ па́че зве́зд и со́лнца просия́вшую сла́ву Твоего́ Божества́ и воспе́ти Тебе́: Аллилу́иа.
Икос 5
Прови́дев издале́ча де́нь Тво́й, Христе́, пра́отец Тво́й Авраа́м возра́довася ду́хом; мы́ же ви́дяще Тя́, Све́та невече́рняго, на рука́х Де́вы, Ма́тере Твоея́, я́ко на престо́ле почива́юща, ра́достно срета́ем Тя́ пе́нии си́ми:
Сла́ва Тебе́, млеко́м Неискусому́жныя пита́емый; сла́ва Тебе́, пита́яй вся́ческую тва́рь.
Сла́ва Тебе́, Сы́не Де́вы, Емману́иле, Отроча́ мла́до; сла́ва Тебе́, Бо́же Преве́чный, О́тче бу́дущаго ве́ка.
Сла́ва Тебе́, на плещу́ херуви́мов носи́мый; сла́ва Тебе́, на́с ра́ди во я́сли возлеги́й.
Сла́ва Тебе́, на земли́ младе́нствуяй; сла́ва Тебе́, на́с ча́да Бо́жия содева́яй.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 6
Пропове́дует ми́ру ми́лостивое Твое́ прише́ствие проро́к Илия́ Фесви́тянин, тому́ бо на Хори́встей горе́ яви́л еси́ ти́хое сия́ние Твоея́ сла́вы; и́бо не в бу́ри, ни во огни́ ниже́ в трясе́нии, но во гла́се хла́да то́нка соше́л еси́ на зе́млю, Го́споди, просвеща́я и спаса́я вся́ зову́щия: Аллилу́иа.
Икос 6
Возсия́ иногда́ све́т Небе́сный па́стырем вифлее́мским, творя́щим стра́жу нощну́ю о ста́де свое́м и бдя́щим, те́мже и мы́ в нощи́ жития́ сего́ ле́ности со́н отрясе́м, в моли́тве трезвя́щеся, да с па́стырьми зри́телие сла́вы Спа́са ро́ждшагося яви́мся и та́ко Ему́ воззове́м:
Сла́ва Тебе́, Хле́бе живо́тный, все́х ду́ши пита́яй; сла́ва Тебе́, от гла́да сме́ртнаго ми́р избавля́яй.
Сла́ва Тебе́, Гро́зде Боже́ственный, вино́ но́вое источа́яй; сла́ва Тебе́, жа́жды грехо́вныя ми́р изыма́яй.
Сла́ва Тебе́, све́тлое Со́лнце Пра́вды и Све́те И́стины; сла́ва Тебе́, теплото́ю Ду́ха зе́млю животворя́яй.
Сла́ва Тебе́, Небе́сный Дождю́, ороша́яй лице́ земли́; сла́ва Тебе́, ве́сну благода́ти ми́рови да́руяй.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 7
Хотя́ испра́вити горды́ню первозда́ннаго челове́ка, смири́л еси́ Себе́ Сама́го, Сло́ве Бо́жий, до я́слей и сме́рти кре́стныя, о́браз на́м дая́, да вси́, обраща́ющии сердца́ своя́ к Тебе́, облеку́тся в ца́рское одея́ние смире́ния Твоего́ и возоблада́ют над страстьми́ и похотьми́, Тебе́, Царю́ вся́ческих, зову́ще: Аллилу́иа.
Икос 7
Ди́вную та́йну воплоще́ния смири́вшагося Бо́га воспева́юще дне́сь, прииди́те, возвы́симся от земны́х страсте́й, чи́стою мы́слию присту́пим и припаде́м Богомладе́нцу, в я́слех лежа́щему, во умиле́нии зову́ще:
Сла́ва Тебе́, на земли́ рожде́йся; сла́ва Тебе́, ми́ру дарова́вый возрожде́ние.
Сла́ва Тебе́, повеле́нием ке́саревым написа́выйся с рабы́; сла́ва Тебе́, в Кни́гу живота́ на Небеси́ имена́ ве́рных Свои́х вписа́вый.
Сла́ва Тебе́, Соде́телю, Ему́же горе́ слу́жат со́нми А́нгел; сла́ва Тебе́, послужи́ти прише́дый всеро́дному Ада́му.
Сла́ва Тебе́, Не́бо с земле́ю соедини́вый схожде́нием Твои́м; сла́ва Тебе́, Бо́га с челове́ком примири́вый Рождество́м Твои́м.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 8
Стра́нна и прише́льца Бо́га ви́дяще на земли́, устрани́мся су́етнаго ми́ра и взы́щем всеме́рно Небе́снаго на́шего Оте́чества, благода́ть, и ми́р и ми́лость все́м прише́льствующим на земли́ у Сы́на Бо́жия прося́ще и воспева́юще Ему́: Аллилу́иа.
Икос 8
Ве́сь бы́л еси́ до́лу в я́слех, непостижи́ме Го́споди, горе́ на Престо́ле со Отце́м седя́й. А́нгели воспева́ху Тя́ я́ко Преве́чнаго Бо́га, челове́цы же зря́ху Младе́нца пови́та, мы́ же убо́зии прино́сим Ти́ сле́зы умиле́ния, си́це глаго́люще:
Сла́ва Тебе́, не́др Оте́ческих не отступи́вый; сла́ва Тебе́, с до́льними челове́ки неизрече́нно пожи́вый.
Сла́ва Тебе́, непристу́пную сла́ву Твоего́ Божества́ сокры́вый; сла́ва Тебе́, приступа́ющия к Тебе́ гре́шныя не отри́нувый.
Сла́ва Тебе́, Исто́чниче чистоты́ и свя́тости; сла́ва Тебе́, с мытари́ и гре́шники вечеря́вый.
Сла́ва Тебе́, блу́дная ча́да, издале́ча зря́, с любо́вию срета́яй; сла́ва Тебе́, вся́ с покая́нием приходя́щия в ли́к друго́в Твои́х вчиня́яй.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 9
Вся́ земля́ бога́тство любве́ Твоея́ позна́, Иису́се Всецарю́, егда́ Себе́ Сама́го я́ко Младе́нца гре́шному ми́ру во очище́ние дарова́л еси́ и в Же́ртву предугото́вал еси́. Сего́ ра́ди ро́ды родо́в, спасе́ннии прише́ствием Твои́м, во ве́ки благода́рственне зову́т Ти́: Аллилу́иа.
Икос 9
Вети́и многовеща́ннии недоуме́ют воспе́ти недомы́слимое и неизрече́нное Рождество́ Твое́: ки́й бо язы́к, а́нгельский или́ челове́ческий, возглаго́лет сию́ бе́здну ми́лости Твоея́, Спа́се? Приими́ у́бо благода́рныя сле́зы земноро́дных, искупле́нных Твое́ю Кро́вию, Тебе́ припа́дающих и вопию́щих:
Сла́ва Тебе́, изобреты́й вся́к пу́ть худо́жества; сла́ва Тебе́, соедини́вый с челове́ки Божество́.
Сла́ва Тебе́, стра́нно во Своя́ прише́дый; сла́ва Тебе́, устра́ншихся от Бо́га на Не́бо призыва́вый.
Сла́ва Тебе́, верте́п оби́тель Себе́ избра́вый; сла́ва Тебе́, Небе́сныя оби́тели лю́дем угото́вавый.
Сла́ва Тебе́, гре́х ми́ра взе́мляй и обремене́нныя к Себе́ призыва́яй; сла́ва Тебе́, не́мощи челове́ческия исцеля́яй и тружда́ющияся упокоева́яй.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 10
Спасе́ние соде́лал еси́ ми́ру стра́нным истоща́нием Твои́м и врата́ милосе́рдия Бо́жия и вы́шнее Ца́рствие отве́рзл еси́ соше́ствием Твои́м: отны́не бо сы́нове челове́честии о́бщницы А́нгелом быва́ют и ра́дующеся ле́гкою стезе́ю в Небеса́ восхо́дят, немо́лчно зову́ще: Аллилу́иа.
Икос 10
Царю́ Преве́чный, рожде́йся на земли́ челове́ка ра́ди, Христе́ Бо́же! Покажи́ ны досто́йны Твоего́ осия́ния, да́ждь на́м во вся́ дни́ живота́ на́шего помина́ти Твоя́ благодея́ния и чи́стым се́рдцем воспева́ти Тебе́ сицева́я:
Сла́ва Тебе́, Царю́ веко́в, вы́шнее Ца́рство ве́рным отверза́яй; сла́ва Тебе́, Па́стырю до́брый, заблу́ждших ове́ц на па́жить цветоно́сную призыва́яй.
Сла́ва Тебе́, Имы́й клю́ч Дави́дов, Еде́ма врата́ на́м отве́рзый; сла́ва Тебе́, Ключу́ Боже́ственный, отверза́яй сердца́ к прия́тию благода́ти.
Сла́ва Тебе́, Ма́нно Небе́сная, в пусты́ни жития́ сего́ пита́ющая; сла́ва Тебе́, Иису́се Бо́же, Но́вый Изра́иль в зе́млю обетова́нную вводя́й.
Сла́ва Тебе́, А́гнче Бо́жий, на закла́ние в ми́р прише́дый; сла́ва Тебе́, сме́ртию Твое́ю живо́т на́м дарова́вый.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 11
Пе́снь благодаре́ния приими́ от на́с, Сло́ве Бо́жий, и сподо́би на́с, до́льних, сре́сти чи́стыми дея́ньми и подъя́ти Тя́, Христа́, пло́тию младе́нствующа, Христа́, во́лею обнища́вша, Христа́, на́с ра́ди на зе́млю низше́дша, Его́же горе́ пою́т непреста́нно А́нгели Бо́жии, зову́ще: Аллилу́иа.
Икос 11
Све́том одея́йся, я́ко ри́зою, безсла́вен и на́г в ми́р се́й вхо́дит, и Бо́жие Сло́во, нося́щее вся́ глаго́лом си́лы Своея́, немотству́ющий Младе́нец зри́тся на земли́, Ему́же покланя́ющеся вси́ глаго́лем:
Сла́ва Тебе́, Сло́ве, во я́слех немотству́яй; сла́ва Тебе́, добро́те молча́ния и сло́ва науча́яй.
Сла́ва Тебе́, Животе́, пови́тый пелена́ми; сла́ва Тебе́, плени́цы сме́ртныя разреши́ти гряды́й.
Сла́ва Тебе́, благовести́ти ни́щим прише́дый; сла́ва Тебе́, сокруше́нныя се́рдцем исцели́вый.
Сла́ва Тебе́, пропове́дуяй слепы́м прозре́ние; сла́ва Тебе́, отпуща́яй сокруше́нныя во отра́ду.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 12
Благода́ть спаси́тельная все́м челове́ком яви́ся и все́х избавле́ние приспе́: сла́вы бо Госпо́дь низхо́дит на зе́млю ми́лости ра́ди. Го́ры и хо́лми, поля́ и де́бри, челове́цы и А́нгели, вся́кое дыха́ние и тва́рь, весе́лия Боже́ственнаго исполня́еми, воскли́кните срета́юще Того́: Аллилу́иа.
Икос 12
Пою́ще ве́лие та́инство Твоего́ вочелове́чения, Го́споди, мо́лим Тя́, раби́ Твои́, егда́ прии́деши па́ки на зе́млю с си́лою и сла́вою мно́гою, поми́луй и спаси́ все́х, чту́щих Твое́ е́же от Де́вы неизрече́нное Рождество́ и любо́вию зову́щих Ти́:
Сла́ва Тебе́, на земли́ воплоти́выйся благовести́ти заблу́ждшим; сла́ва Тебе́, до а́да снизше́дый взыска́ти па́дших.
Сла́ва Тебе́, сокро́вища благода́ти Твоея́ открыва́яй; сла́ва Тебе́, удо́бен пу́ть к Небеси́ показу́яй.
Сла́ва Тебе́, вода́ми Креще́ния естество́ челове́ческое обнови́вый; сла́ва Тебе́, Боже́ственными Та́йнами сие́ обожи́вый.
Сла́ва Тебе́, ве́рныя по исхо́де от жития́ в Ца́рствие Твое́ вводя́й; сла́ва Тебе́, весе́лие Иерусали́ма го́рняго во ве́ки веко́в подава́яй.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 13
О неизсле́димая и неизглаго́ланная Бе́здно Любве́ и Щедро́т, младе́нствуяй пло́тию Иису́се! Приими́ приноси́мое Тебе́ убо́гое сие́ моле́ние и не возгнуша́йся возлещи́ в я́слех безслове́сныя души́ моея́. О Све́те ми́ра незаходи́мый! Просвети́ мя́ сия́нием Твои́м, прииди́ и оби́тель в се́рдце мое́м сотвори́, да во ве́ки пою́ Ти: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгелом недове́домую, пресла́вную та́йну Твоего́ смотре́ния на коне́ц веко́в открыва́я, Христе́, я́ко Младе́нец в я́слех безслове́сных возлежи́ши и во убо́зем верте́пе ми́ру явля́ешися, Сло́ве Бо́жий, безнача́льне. О́ле стра́шнаго та́инства! О́ле Бо́жия снизхожде́ния! Те́м у́бо со стра́хом и ра́достию взира́юще на неисповеди́мое истоща́ние Твое́, си́це Тебе́ зове́м:
Сла́ва Тебе́, Све́те Ти́хий, от Де́вы ми́ру возсия́вый; сла́ва Тебе́, А́нгелов Ра́досте, во страну́ пла́ча прише́дый.
Сла́ва Тебе́, Нача́льниче ми́ра, спасе́ние благовести́вый; сла́ва Тебе́, Сы́не Бо́жий, Собо́ю то́е устро́ивый.
Сла́ва Тебе́, Сия́ние О́тчия сла́вы; сла́ва Тебе́, от тьмы́ в чу́дный Тво́й све́т челове́ки призва́вый.
Сла́ва Тебе́, Иису́се, Сы́не Единоро́дный, на зе́млю снизше́дый; сла́ва Тебе́, Иису́се, восхо́д земноро́дным на Не́бо устро́ивый.
Сла́ва в вы́шних Бо́гу и на земли́ ми́р, в челове́цех благоволе́ние!
Кондак 1
Избра́ннии от все́х племе́н и наро́дов в язы́к свя́т, ца́рское свяще́ние, сы́нове Све́та и насле́дницы Ца́рствия, прииди́те, возра́дуемся Го́сподеви и Спаси́телю Бо́гу, в Вифлее́ме ро́ждшемуся и на́с ра́ди пелена́ми повива́емому, с волхвы́ и па́стыри поклони́мся, а́нгельскую вси́ в весе́лии пою́ще пе́снь:
Сла́ва в вы́шних Бо́гу и на земли́ ми́р, в челове́цех благоволе́ние!
Молитвы
О Сладча́йший Иису́се, Сло́ве Бо́жий, Сы́не Де́вы, Тебе́ на́с ра́ди на земли́ я́вльшагося вся́ тва́рь испове́да бы́ти Творца́ и Влады́ку вся́ческих, во́лны морски́я смиря́хуся под но́зе Твои́, умолка́ху ве́тры Твои́м повеле́нием, ме́ртвии сло́вом Твои́м возстава́ху, со́лнце Тебе́ умира́ющу поме́рче, земля́ о Тебе́ потрясе́ся, не́бо Тебе́ восходя́щу отве́рзеся. Те́м у́бо и ны́не мо́лим Тя́, раби́ Твои́, Влады́ко, ути́ши вся́ на́ша помышле́ния и чу́вства серде́чная, запрети́ волне́нию страсте́й, возста́ви ны́ от сме́рти грехо́вныя, сотвори́, да пред све́том любве́ Твоея́ поме́ркнут на́м вся́ сла́вная и кра́сная су́етнаго ми́ра, да потрясу́тся тре́петом ду́ши на́ша и отве́рзутся сердца́ прия́ти Тя́ Невече́рняго Све́та, просвеща́ющаго вся́каго челове́ка, гряду́щаго в ми́р. Сподо́би ны́не изы́ти любо́вию в сре́тение Тебе́, низходя́щему на зе́млю на́с ра́ди, и в де́нь исхо́да на́шего от вре́меннаго жития́ сего́ усря́щи на́с, восходя́щих от земли́, милосе́рдием Твои́м, приими́ в Небе́сная Твоя́ селе́ния и сотвори́ прича́стники сла́внаго Ца́рствия Твоего́, да со А́нгелы святы́ми пое́м и сла́вим Тя́, Спа́са ду́ш на́ших, со Безнача́льным Твои́м Отце́м и с Пресвяты́м Ду́хом, Еди́наго в Тро́ице Бо́га, Ему́же подоба́ет вся́кая сла́ва, че́сть и поклоне́ние, во ве́ки веко́в. Ами́нь.
Конда́къ а҃
И҆збра́ннїи ѿ всѣ́хъ племе́нъ и҆ наро́дѡвъ въ ꙗ҆зы́къ ст҃ъ, црⷭ҇кое сщ҃е́нїе, сы́нове свѣ́та и҆ наслѣ̑дницы црⷭ҇твїѧ, прїиди́те, возра́дꙋемсѧ гдⷭ҇еви и҆ сп҃си́телю бг҃ꙋ, въ виѳлее́мѣ ро́ждшемꙋсѧ и҆ на́съ ра́ди пелена́ми повива́емомꙋ, съ волхвы̑ и҆ па̑стыри поклони́мсѧ, а҆́гг҃льскꙋю всѝ въ весе́лїи пою́ще пѣ́снь:
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
І҆́косъ а҃
А҆́гг҃лѡмъ недовѣ́домꙋю, пресла́внꙋю та́йнꙋ твоегѡ̀ смотре́нїѧ на коне́цъ вѣкѡ́въ ѿкрыва́ѧ, хрⷭ҇тѐ, ꙗ҆́кѡ млⷣнцъ въ ꙗ҆́слехъ безслове́сныхъ возлежи́ши и҆ во ᲂу҆бо́зѣмъ верте́пѣ мі́рꙋ ꙗ҆влѧ́ешисѧ, сло́ве бж҃їй безнача́льне. ѽле стра́шнагѡ та́инства! ѽле бж҃їѧ снизхожде́нїѧ! Тѣ́мъ ᲂу҆̀бо со стра́хомъ и҆ ра́достїю взира́юще на неисповѣди́мое и҆стоща́нїе твоѐ, си́це тебѣ̀ зове́мъ:
Сла́ва тебѣ̀, свѣ́те ти́хїй, ѿ дв҃ы мі́рꙋ возсїѧ́вый: сла́ва тебѣ̀, а҆́гг҃лѡвъ ра́досте, во странꙋ̀ пла́ча прише́дый.
Сла́ва тебѣ̀, нача́льниче ми́ра, сп҃се́нїе бл҃говѣсти́вый: сла́ва тебѣ̀, сн҃е бж҃їй, собо́ю то́е ᲂу҆стро́ивый.
Сла́ва тебѣ̀, сїѧ́нїе ѻ҆́ч҃їѧ сла́вы: сла́ва тебѣ̀, ѿ тьмы̀ въ чꙋ́дный тво́й свѣ́тъ человѣ́ки призва́вый.
Сла́ва тебѣ̀, і҆и҃се, сн҃е є҆диноро́дный, на зе́млю снизше́дый: сла́ва тебѣ̀, і҆и҃се, восхо́дъ земнорѡ́днымъ на нб҃о ᲂу҆стро́ивый.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ в҃
Ви́дѣвъ нищетꙋ̀ и҆ поги́бель ро́да человѣ́ческагѡ, всемогꙋ́щее свѣтоза́рное сло́во бж҃їе, ти́хомꙋ молча́нїю содержа́щꙋ всѧ̑ и҆ но́щи преполовлѧ́ющейсѧ, съ нб҃сѐ, ѿ прⷭ҇то́ла црⷭ҇кагѡ, во ю҆до́ль земнꙋ́ю поги́бельнꙋю сни́де, во сп҃се́нїе пою́щихъ є҆мꙋ̀: А҆ллилꙋ́їа.
І҆́косъ в҃
Разꙋмѣ́въ дꙋ́хомъ прⷪ҇ро́къ а҆ввакꙋ́мъ прише́ствїе твоѐ, ᲂу҆жа́ссѧ вопїѧ́ше: гдⷭ҇и, ᲂу҆слы́шахъ слꙋ́хъ тво́й и҆ ᲂу҆боѧ́хсѧ, разꙋмѣ́хъ дѣла̀ твоѧ̑ и҆ ᲂу҆жасо́хсѧ! Мы́ же сбытїѐ та́йны сеѧ̀ зрѧ́ще, виѳлее́мъ чествꙋ́емъ и҆ ꙗ҆́слемъ твои̑мъ покланѧ́емсѧ, зовꙋ́ще:
Сла́ва тебѣ̀, бж҃їѧ премⷣросте и҆ си́ло: сла́ва тебѣ̀, ѡ҆мраче́ннꙋю не́мощь на́шꙋ посѣти́вый.
Сла́ва тебѣ̀, повива́ющемꙋ мгло́ю зе́млю и҆ не́бо ѻ҆́блаки: сла́ва тебѣ̀, на́съ ра́ди пови́томꙋ пелена́ми.
Сла́ва тебѣ̀, ѡ҆дѣва́ѧй красото́ю крі́ны сє́льныѧ: сла́ва тебѣ̀, наготꙋ̀ на́шꙋ ѡ҆блекі́й во ѻ҆де́ждꙋ нетлѣ́нїѧ.
Сла́ва тебѣ̀, зра́къ раба̀ прїе́мый: сла́ва тебѣ̀, ѿ ра́бства страсте́й на́съ свободи́вый.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ г҃
Си̑лы нбⷭ҇ныѧ ве́лїимъ гла́сомъ восхвали́ша тѧ̀, свѣ́тлое сл҃нце сла́вы, восходѧ́щее ѿ двⷭ҇твеннагѡ ѻ҆́блака и҆ просвѣща́ющее мі́ръ за млⷭ҇рдїе безмѣ́рное, и҆ въ весе́лїи воспѣ́ша: А҆ллилꙋ́їа.
І҆́косъ г҃
И҆мѣ́ѧй прⷭ҇то́лъ нб҃о и҆ подно́жїе зе́млю, мѣ́ста ни є҆ди́на ѡ҆брѣ́те во ѻ҆би́тели, тѣ́мже чⷭ҇таѧ дв҃а, мт҃и твоѧ̀, сокрыва́етъ тѧ̀ ѿ хла́да нощна́гѡ въ хꙋдѣ́мъ верте́пѣ и҆ во ꙗ҆́слехъ ско́тїихъ полага́етъ тѧ̀, сокро́вище го́рнѧгѡ мі́ра и҆ зижди́телѧ всѧ́ческихъ. Дивѧ́щесѧ млⷭ҇рдїю твоемꙋ̀, си́це тебѣ̀ зове́мъ:
Сла́ва тебѣ̀, по на́мъ неизрече́ннѡ ѡ҆бнища́вый: сла́ва тебѣ̀, неизче́тнѡ на́съ ѡ҆богати́вый.
Сла́ва тебѣ̀, на́шꙋ не́мощь воспрїе́мый: сла́ва тебѣ̀, на́съ си́лою твое́ю ѡ҆блекі́й.
Сла́ва тебѣ̀, хла́дъ нощны́й претерпѣ́вый: сла́ва тебѣ̀, теплото́ю твоеѧ̀ любвѐ мі́ръ согрѣ́вый.
Сла́ва тебѣ̀, не и҆мѣ́вый, гдѣ̀ главы̀ подклони́ти на землѝ: сла́ва тебѣ̀, преклони́вый небеса̀ схожде́нїемъ твои́мъ.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ д҃
Бꙋ́рею сꙋмни́тельныхъ помышле́нїй мѧте́тсѧ и҆́рѡдъ и҆ всѧ̀ і҆ерⷭ҇ли́ма съ ни́мъ: ца́рїе же восто́чнїи тебѣ̀, цр҃ю̀ царе́й, да́ры и҆збра̑нныѧ прино́сѧтъ. Съ ни́миже и҆ на́съ сподо́би тебѣ̀ кла́нѧтисѧ дꙋ́хомъ и҆ и҆́стиною и҆ приноси́ти тебѣ̀ вѣ́рꙋ ꙗ҆́кѡ зла́то, чи́стое житїѐ ꙗ҆́кѡ лїва́нъ, любо́вь же ꙗ҆́кѡ смѵ́рнꙋ, зовꙋ́ще: А҆ллилꙋ́їа.
І҆́косъ д҃
Слы́шавъ а҆да́мъ первозда́нный гла́съ гдⷭ҇а сла́вы, ходѧ́щагѡ въ раѝ, стра́хомъ скры́сѧ, ᲂу҆боѧ́всѧ лица̀ твоегѡ̀. Ны́нѣ же ты̀, сп҃се, сокрыва́еши под̾ бре́ннымъ покро́вомъ стра́шнꙋю сла́вꙋ твоегѡ̀ бжⷭ҇тва̀ и҆ низхо́диши на зе́млю, зра́къ а҆да́мовъ носѧ̀, взыска́ти поги́бшаго, вопїю́ща тебѣ̀:
Сла́ва тебѣ̀, съ нб҃сѐ до́лꙋ низше́дый: сла́ва тебѣ̀, человѣ́ка горѣ̀ вознесы́й.
Сла́ва тебѣ̀, беззакѡ́нїѧ моѧ̑ на себѐ возложи́вый: сла́ва тебѣ̀, ꙗ҆́звою твое́ю мѧ̀ и҆сцѣли́вый.
Сла́ва тебѣ̀, прїѡбщи́выйсѧ моеѧ̀ пло́ти: сла́ва тебѣ̀, прїѡбща́ѧй мѧ̀ твоегѡ̀ бжⷭ҇тва̀.
Сла́ва тебѣ̀, стꙋ́днꙋю наготꙋ̀ человѣ́кѡвъ ри́зою твоеѧ̀ сла́вы покры́вый: сла́ва тебѣ̀, гла́дъ дꙋшѝ ᲂу҆толѧ́ѧй сла́достїю трапе́зы твоеѧ̀.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ є҃
Бг҃оте́чнаѧ ѕвѣзда̀ съ высоты̀ показꙋ́етъ тѧ̀, и҆зда́вна предвозвѣще́ннꙋю мы́сленнꙋю ѕвѣздꙋ̀, ѿ і҆а́кѡва возсїѧ́вшꙋю. Сподо́би и҆ на́съ, ко ᲂу҆бо́гомꙋ верте́пꙋ со ѕвѣздослѡ́вцы прите́кшихъ, ᲂу҆зрѣ́ти ѡ҆чище́нными ѻ҆чесы̀ дꙋшѝ па́че ѕвѣ́здъ и҆ со́лнца просїѧ́вшꙋю сла́вꙋ твоегѡ̀ бжⷭ҇тва̀ и҆ воспѣ́ти тебѣ̀: А҆ллилꙋ́їа.
І҆́косъ є҃
Прови́дѣвъ и҆здале́ча де́нь тво́й, хрⷭ҇тѐ, пра́ѻтецъ тво́й а҆враа́мъ возра́довасѧ дꙋ́хомъ: мы́ же ви́дѧще тѧ̀, свѣ́та невече́рнѧго, на рꙋка́хъ дв҃ы, мт҃ре твоеѧ̀, ꙗ҆́кѡ на прⷭ҇то́лѣ почива́юща, ра́достнѡ срѣта́емъ тѧ̀ пѣ̑нїи си́ми:
Сла́ва тебѣ̀, млеко́мъ неискꙋсомꙋ́жныѧ пита́емый: сла́ва тебѣ̀, пита́ѧй всѧ́ческꙋю тва́рь.
Сла́ва тебѣ̀, сн҃е дв҃ы, є҆мманꙋ́иле, ѻ҆троча̀ мла́до: сла́ва тебѣ̀, бж҃е превѣ́чный, ѻ҆́ч҃е бꙋ́дꙋщагѡ вѣ́ка.
Сла́ва тебѣ̀, на плещꙋ̀ херꙋві́мѡвъ носи́мый: сла́ва тебѣ̀, на́съ ра́ди во ꙗ҆́сли возлегі́й.
Сла́ва тебѣ̀, на землѝ млⷣнствꙋѧй: сла́ва тебѣ̀, на́съ ча̑да бж҃їѧ содѣва́ѧй.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ ѕ҃
Проповѣ́дꙋетъ мі́рꙋ млⷭ҇тивое твоѐ прише́ствїе прⷪ҇ро́къ и҆лїа̀ ѳесві́тѧнинъ, томꙋ́ бо на хѡри́встѣй горѣ̀ ꙗ҆ви́лъ є҆сѝ ти́хое сїѧ́нїе твоеѧ̀ сла́вы: и҆́бо не въ бꙋ́ри, ни во ѻ҆гнѝ нижѐ въ трѧсе́нїи, но во гла́сѣ хла́да то́нка соше́лъ є҆сѝ на зе́млю, гдⷭ҇и, просвѣща́ѧ и҆ сп҃са́ѧ всѧ̑ зовꙋ́щыѧ: А҆ллилꙋ́їа.
І҆́косъ ѕ҃
Возсїѧ̀ и҆ногда̀ свѣ́тъ нбⷭ҇ный па́стырємъ виѳлеє́мскимъ, творѧ́щымъ стра́жꙋ нощнꙋ́ю ѡ҆ ста́дѣ свое́мъ и҆ бдѧ́щымъ, тѣ́мже и҆ мы̀ въ нощѝ житїѧ̀ сегѡ̀ лѣ́ности со́нъ ѡ҆трѧсе́мъ, въ мл҃твѣ трезвѧ́щесѧ, да съ па́стырьми зри́телїе сла́вы сп҃са ро́ждшагѡсѧ ꙗ҆ви́мсѧ и҆ та́кѡ є҆мꙋ̀ воззове́мъ:
Сла́ва тебѣ̀, хлѣ́бе живо́тный, всѣ́хъ дꙋ́шы пита́ѧй: сла́ва тебѣ̀, ѿ гла́да сме́ртнагѡ мі́ръ и҆збавлѧ́ѧй.
Сла́ва тебѣ̀, гро́зде бжⷭ҇твенный, вїно̀ но́вое и҆сточа́ѧй: сла́ва тебѣ̀, жа́жды грѣхо́вныѧ мі́ръ и҆з̾има́ѧй.
Сла́ва тебѣ̀, свѣ́тлое сл҃нце пра́вды и҆ свѣ́те и҆́стины: сла́ва тебѣ̀, теплото́ю дх҃а зе́млю животворѧ́ѧй.
Сла́ва тебѣ̀, нбⷭ҇ный дождю̀, ѡ҆роша́ѧй лицѐ землѝ: сла́ва тебѣ̀, ве́снꙋ бл҃года́ти мі́рови да́рꙋѧй.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ з҃
Хотѧ̀ и҆спра́вити горды́ню первозда́ннагѡ человѣ́ка, смири́лъ є҆сѝ себѐ сама́го, сло́ве бж҃їй, до ꙗ҆́слей и҆ сме́рти крⷭ҇тныѧ, ѻ҆́бразъ на́мъ даѧ̀, да всѝ, ѡ҆браща́ющїи сердца̀ своѧ̑ къ тебѣ̀, ѡ҆блекꙋ́тсѧ въ црⷭ҇кое ѡ҆дѣѧ́нїе смире́нїѧ твоегѡ̀ и҆ воз̾ѡблада́ютъ над̾ страстьмѝ и҆ похотьмѝ, тебѣ̀, цр҃ю̀ всѧ́ческихъ, зовꙋ́ще: А҆ллилꙋ́їа.
І҆́косъ з҃
Ди́внꙋю та́йнꙋ воплоще́нїѧ смири́вшагѡсѧ бг҃а воспѣва́юще дне́сь, прїиди́те, возвы́симсѧ ѿ земны́хъ страсте́й, чи́стою мы́слїю пристꙋ́пимъ и҆ припаде́мъ бг҃омлⷣнцꙋ, въ ꙗ҆́слехъ лежа́щемꙋ, во ᲂу҆миле́нїи зовꙋ́ще:
Сла́ва тебѣ̀, на землѝ рожде́йсѧ: сла́ва тебѣ̀, мі́рꙋ дарова́вый возрожде́нїе.
Сла́ва тебѣ̀, повелѣ́нїемъ ке́саревымъ написа́выйсѧ съ рабы̑: сла́ва тебѣ̀, въ кни́гꙋ живота̀ на нб҃сѝ и҆мена̀ вѣ́рныхъ свои́хъ вписа́вый.
Сла́ва тебѣ̀, содѣ́телю, є҆мꙋ́же горѣ̀ слꙋ́жатъ со́нми а҆́гг҃лъ: сла́ва тебѣ̀, послꙋжи́ти прише́дый всеро́дномꙋ а҆да́мꙋ.
Сла́ва тебѣ̀, нб҃о съ земле́ю соедини́вый схожде́нїемъ твои́мъ: сла́ва тебѣ̀, бг҃а съ человѣ́комъ примири́вый ржⷭ҇тво́мъ твои́мъ.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ и҃
Стра́нна и҆ прише́льца бг҃а ви́дѧще на землѝ, ᲂу҆страни́мсѧ сꙋ́етнагѡ мі́ра и҆ взы́щемъ всемѣ́рнѡ нбⷭ҇нагѡ на́шегѡ ѻ҆те́чества, бл҃года́ть, и҆ ми́ръ и҆ млⷭ҇ть всѣ̑мъ прише́льствꙋющымъ на землѝ ᲂу҆ сн҃а бж҃їѧ просѧ́ще и҆ воспѣва́юще є҆мꙋ̀: А҆ллилꙋ́їа.
І҆́косъ и҃
Ве́сь бы́лъ є҆сѝ до́лꙋ въ ꙗ҆́слехъ, непостижи́ме гдⷭ҇и, горѣ̀ на прⷭ҇то́лѣ со ѻ҆ц҃е́мъ сѣдѧ́й. А҆́гг҃ли воспѣва́хꙋ тѧ̀ ꙗ҆́кѡ превѣ́чнаго бг҃а, человѣ́цы же зрѧ́хꙋ млⷣнца пови́та, мы́ же ᲂу҆бо́зїи прино́симъ тѝ сле́зы ᲂу҆миле́нїѧ, си́це глаго́люще:
Сла́ва тебѣ̀, нѣ́дръ ѻ҆ч҃ескихъ не ѿстꙋпи́вый: сла́ва тебѣ̀, съ до́льними человѣ̑ки неизрече́ннѡ пожи́вый.
Сла́ва тебѣ̀, непристꙋ́пнꙋю сла́вꙋ твоегѡ̀ бжⷭ҇тва̀ сокры́вый: сла́ва тебѣ̀, пристꙋпа́ющыѧ къ тебѣ̀ грѣ̑шныѧ не ѿри́нꙋвый.
Сла́ва тебѣ̀, и҆сто́чниче чистоты̀ и҆ ст҃ости: сла́ва тебѣ̀, съ мытари̑ и҆ грѣ̑шники вечерѧ́вый.
Сла́ва тебѣ̀, блꙋ̑днаѧ ча̑да, и҆здале́ча зрѧ̀, съ любо́вїю срѣта́ѧй: сла́ва тебѣ̀, всѧ̑ съ покаѧ́нїемъ приходѧ́щыѧ въ ли́къ дрꙋгѡ́въ твои́хъ вчинѧ́ѧй.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ ѳ҃
Всѧ̑ землѧ̀ бога́тство любвѐ твоеѧ̀ позна̀, і҆и҃се всецр҃ю̀, є҆гда̀ себѐ сама́го ꙗ҆́кѡ млⷣнца грѣ́шномꙋ мі́рꙋ во ѡ҆чище́нїе дарова́лъ є҆сѝ и҆ въ же́ртвꙋ пред̾ꙋгото́валъ є҆сѝ. Сегѡ̀ ра́ди ро́ды родѡ́въ, сп҃се́ннїи прише́ствїемъ твои́мъ, во вѣ́ки бл҃года́рственнѣ зовꙋ́тъ тѝ: А҆ллилꙋ́їа.
І҆́косъ ѳ҃
Вѣті̑и многовѣща́ннїи недоꙋмѣ́ютъ воспѣ́ти недомы́слимое и҆ неизрече́нное ржⷭ҇тво̀ твоѐ: кі́й бо ѧ҆зы́къ, а҆́гг҃льскїй и҆лѝ человѣ́ческїй, возглаго́летъ сїю̀ бе́зднꙋ млⷭ҇ти твоеѧ̀, сп҃се: Прїимѝ ᲂу҆̀бо бл҃года̑рныѧ сле́зы земноро́дныхъ, и҆скꙋпле́нныхъ твое́ю кро́вїю, тебѣ̀ припа́дающихъ и҆ вопїю́щихъ:
Сла́ва тебѣ̀, и҆з̾ѡбрѣты́й всѧ́къ пꙋ́ть хꙋдо́жества: сла́ва тебѣ̀, соедини́вый съ человѣ̑ки бжⷭ҇тво̀.
Сла́ва тебѣ̀, стра́ннѡ во своѧ̑ прише́дый: сла́ва тебѣ̀, ᲂу҆стра́ншихсѧ ѿ бг҃а на нб҃о призыва́вый.
Сла́ва тебѣ̀, верте́пъ ѻ҆би́тель себѣ̀ и҆збра́вый: сла́ва тебѣ̀, нбⷭ҇ныѧ ѻ҆би́тєли лю́демъ ᲂу҆гото́вавый.
Сла́ва тебѣ̀, грѣ́хъ мі́ра взе́млѧй и҆ ѡ҆бременє́нныѧ къ себѣ̀ призыва́ѧй: сла́ва тебѣ̀, не́мѡщи человѣ́чєскїѧ и҆сцѣлѧ́ѧй и҆ трꙋжда́ющыѧсѧ ᲂу҆покоева́ѧй.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ і҃
Сп҃се́нїе содѣ́лалъ є҆сѝ мі́рꙋ стра́ннымъ и҆стоща́нїемъ твои́мъ и҆ врата̀ млⷭ҇рдїѧ бж҃їѧ и҆ вы́шнее црⷭ҇твїе ѿве́рзлъ є҆сѝ соше́ствїемъ твои́мъ: ѿны́нѣ бо сы́нове человѣ́честїи ѻ҆́бщницы а҆́гг҃лѡмъ быва́ютъ и҆ ра́дꙋющесѧ ле́гкою стезе́ю въ нб҃са̀ восхо́дѧтъ, немо́лчнѡ зовꙋ́ще: А҆ллилꙋ́їа.
І҆́косъ і҃
Цр҃ю̀ превѣ́чный, рожде́йсѧ на землѝ человѣ́ка ра́ди, хрⷭ҇тѐ бж҃е! Покажи́ ны достѡ́йны твоегѡ̀ ѡ҆сїѧ́нїѧ, да́ждь на́мъ во всѧ̑ дни̑ живота̀ на́шегѡ помина́ти твоѧ̑ бл҃годѣѧ̑нїѧ и҆ чи́стымъ се́рдцемъ воспѣва́ти тебѣ̀ сицева̑ѧ:
Сла́ва тебѣ̀, цр҃ю̀ вѣкѡ́въ, вы́шнее црⷭ҇тво вѣ̑рнымъ ѿверза́ѧй: сла́ва тебѣ̀, па́стырю до́брый, заблꙋ́ждшихъ ѻ҆ве́цъ на па́жить цвѣтоно́снꙋю призыва́ѧй.
Сла́ва тебѣ̀, и҆мы́й клю́чь дв҃довъ, є҆де́ма врата̀ на́мъ ѿве́рзый: сла́ва тебѣ̀, ключꙋ̀ бжⷭ҇твенный, ѿверза́ѧй сердца̀ къ прїѧ́тїю бл҃года́ти.
Сла́ва тебѣ̀, ма́нно нбⷭ҇наѧ, въ пꙋсты́ни житїѧ̀ сегѡ̀ пита́ющаѧ: сла́ва тебѣ̀, і҆и҃се бж҃е, но́вый і҆и҃ль въ зе́млю ѡ҆бѣтова́ннꙋю вводѧ́й.
Сла́ва тебѣ̀, а҆́гнче бж҃їй, на закла́нїе въ мі́ръ прише́дый: сла́ва тебѣ̀, сме́ртїю твое́ю живо́тъ на́мъ дарова́вый.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ а҃і
Пѣ́снь бл҃годаре́нїѧ прїимѝ ѿ на́съ, сло́ве бж҃їй, и҆ сподо́би на́съ до́льнихъ, срѣ́сти чи́стыми дѣѧ́ньми и҆ под̾ѧ́ти тѧ̀, хрⷭ҇та̀, пло́тїю млⷣнствꙋюща, хрⷭ҇та̀, во́лею ѡ҆бнища́вша, хрⷭ҇та̀, на́съ ра́ди на зе́млю низше́дша, є҆го́же горѣ̀ пою́тъ непреста́ннѡ а҆́гг҃ли бж҃їи, зовꙋ́ще: А҆ллилꙋ́їа.
І҆́косъ а҃і
Свѣ́томъ ѡ҆дѣѧ́йсѧ, ꙗ҆́кѡ ри́зою, безсла́венъ и҆ на́гъ въ мі́ръ се́й вхо́дитъ, и҆ бж҃їе сло́во, носѧ́щее всѧ̑ глаго́ломъ си́лы своеѧ̀, нѣмотствꙋ́ющїй млⷣнцъ зри́тсѧ на землѝ, є҆мꙋ́же покланѧ́ющесѧ всѝ глаго́лемъ:
Сла́ва тебѣ̀, сло́ве, во ꙗ҆́слехъ нѣмотствꙋ́ѧй: сла́ва тебѣ̀, добро́тѣ молча́нїѧ и҆ сло́ва наꙋча́ѧй.
Сла́ва тебѣ̀, животѐ, пови́тый пелена́ми: сла́ва тебѣ̀, плени̑цы смє́ртныѧ разрѣши́ти грѧды́й.
Сла́ва тебѣ̀, бл҃говѣсти́ти ни́щымъ прише́дый: сла́ва тебѣ̀, сокрꙋшє́нныѧ се́рдцемъ и҆сцѣли́вый.
Сла́ва тебѣ̀, проповѣ́дꙋѧй слѣпы̑мъ прозрѣ́нїе: сла́ва тебѣ̀, ѿпꙋща́ѧй сокрꙋшє́нныѧ во ѿра́дꙋ.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ в҃і
Бл҃года́ть сп҃си́тельнаѧ всѣ̑мъ человѣ́кѡмъ ꙗ҆ви́сѧ и҆ всѣ́хъ и҆збавле́нїе приспѣ̀: сла́вы бо гдⷭ҇ь низхо́дитъ на зе́млю млⷭ҇ти ра́ди. Го́ры и҆ хо́лми, полѧ̀ и҆ дє́бри, человѣ́цы и҆ а҆́гг҃ли, всѧ́кое дыха́нїе и҆ тва́рь, весе́лїѧ бжⷭ҇твеннагѡ и҆сполнѧ́еми, воскли́кните срѣта́юще того̀: А҆ллилꙋ́їа.
І҆́косъ в҃і
Пою́ще ве́лїе та́инство твоегѡ̀ вочл҃вѣ́ченїѧ, гдⷭ҇и, мо́лимъ тѧ̀, рабѝ твоѝ, є҆гда̀ прїи́деши па́ки на зе́млю съ си́лою и҆ сла́вою мно́гою, поми́лꙋй и҆ сп҃сѝ всѣ́хъ, чтꙋ́щихъ твоѐ є҆́же ѿ дв҃ы неизрече́нное ржⷭ҇тво̀ и҆ любо́вїю зовꙋ́щихъ тѝ:
Сла́ва тебѣ̀, на землѝ воплоти́выйсѧ бл҃говѣсти́ти заблꙋ́ждшымъ: сла́ва тебѣ̀, до а҆́да снизше́дый взыска́ти па́дшихъ.
Сла́ва тебѣ̀, сокрѡ́вища бл҃года́ти твоеѧ̀ ѿкрыва́ѧй: сла́ва тебѣ̀, ᲂу҆до́бенъ пꙋ́ть къ нб҃сѝ показꙋ́ѧй.
Сла́ва тебѣ̀, вода́ми кр҃ще́нїѧ є҆стество̀ человѣ́ческое ѡ҆бнови́вый: сла́ва тебѣ̀, бжⷭ҇твенными та́йнами сїѐ ѡ҆божи́вый.
Сла́ва тебѣ̀, вѣ̑рныѧ по и҆схо́дѣ ѿ житїѧ̀ въ црⷭ҇твїе твоѐ вводѧ́й: сла́ва тебѣ̀, весе́лїе і҆ерⷭ҇ли́ма го́рнѧгѡ во вѣ́ки вѣкѡ́въ подава́ѧй.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ г҃і
Ѽ неизслѣ́димаѧ и҆ неизглаго́ланнаѧ бе́здно любвѐ и҆ щедро́тъ, млⷣнствꙋѧй пло́тїю і҆и҃се! Прїимѝ приноси́мое тебѣ̀ ᲂу҆бо́гое сїѐ моле́нїе и҆ не возгнꙋша́йсѧ возлещѝ въ ꙗ҆́слехъ безслове́сныѧ дꙋшѝ моеѧ̀. Ѽ свѣ́те мі́ра незаходи́мый! Просвѣтѝ мѧ̀ сїѧ́нїемъ твои́мъ, прїидѝ и҆ ѻ҆би́тель въ се́рдцѣ мое́мъ сотворѝ, да во вѣ́ки пою́ ти: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лѡмъ недовѣ́домꙋю, пресла́внꙋю та́йнꙋ твоегѡ̀ смотре́нїѧ на коне́цъ вѣкѡ́въ ѿкрыва́ѧ, хрⷭ҇тѐ, ꙗ҆́кѡ млⷣнцъ въ ꙗ҆́слехъ безслове́сныхъ возлежи́ши и҆ во ᲂу҆бо́зѣмъ верте́пѣ мі́рꙋ ꙗ҆влѧ́ешисѧ, сло́ве бж҃їй безнача́льне. ѽле стра́шнагѡ та́инства! ѽле бж҃їѧ снизхожде́нїѧ! Тѣ́мъ ᲂу҆̀бо со стра́хомъ и҆ ра́достїю взира́юще на неисповѣди́мое и҆стоща́нїе твоѐ, си́це тебѣ̀ зове́мъ:
Сла́ва тебѣ̀, свѣ́те ти́хїй, ѿ дв҃ы мі́рꙋ возсїѧ́вый: сла́ва тебѣ̀, а҆́гг҃лѡвъ ра́досте, во странꙋ̀ пла́ча прише́дый.
Сла́ва тебѣ̀, нача́льниче ми́ра, сп҃се́нїе бл҃говѣсти́вый: сла́ва тебѣ̀, сн҃е бж҃їй, собо́ю то́е ᲂу҆стро́ивый.
Сла́ва тебѣ̀, сїѧ́нїе ѻ҆́ч҃їѧ сла́вы: сла́ва тебѣ̀, ѿ тьмы̀ въ чꙋ́дный тво́й свѣ́тъ человѣ́ки призва́вый.
Сла́ва тебѣ̀, і҆и҃се, сн҃е є҆диноро́дный, на зе́млю снизше́дый: сла́ва тебѣ̀, і҆и҃се, восхо́дъ земнорѡ́днымъ на нб҃о ᲂу҆стро́ивый.
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Конда́къ а҃
И҆збра́ннїи ѿ всѣ́хъ племе́нъ и҆ наро́дѡвъ въ ꙗ҆зы́къ ст҃ъ, црⷭ҇кое сщ҃е́нїе, сы́нове свѣ́та и҆ наслѣ̑дницы црⷭ҇твїѧ, прїиди́те, возра́дꙋемсѧ гдⷭ҇еви и҆ сп҃си́телю бг҃ꙋ, въ виѳлее́мѣ ро́ждшемꙋсѧ и҆ на́съ ра́ди пелена́ми повива́емомꙋ, съ волхвы̑ и҆ па̑стыри поклони́мсѧ, а҆́гг҃льскꙋю всѝ въ весе́лїи пою́ще пѣ́снь:
Сла́ва въ вы́шнихъ бг҃ꙋ и҆ на землѝ ми́ръ, въ человѣ́цѣхъ бл҃говоле́нїе!
Моли́твы
Ѽ сладча́йшїй і҆и҃се, сло́ве бж҃їй, сн҃е дв҃ы, тебѐ на́съ ра́ди на землѝ ꙗ҆́вльшагосѧ всѧ̑ тва́рь и҆сповѣ́да бы́ти творца̀ и҆ влⷣкꙋ всѧ́ческихъ, во́лны морскі̑ѧ смирѧ́хꙋсѧ под̾ но́зѣ твоѝ, ᲂу҆молка́хꙋ вѣ́тры твои́мъ повелѣ́нїемъ, ме́ртвїи сло́вомъ твои́мъ возстава́хꙋ, со́лнце тебѣ̀ ᲂу҆мира́ющꙋ поме́рче, землѧ̀ ѡ҆ тебѣ̀ потрѧсе́сѧ, не́бо тебѣ̀ восходѧ́щꙋ ѿве́рзесѧ. Тѣ́мъ ᲂу҆̀бо и҆ ны́нѣ мо́лимъ тѧ̀, рабѝ твоѝ, влⷣко, ᲂу҆ти́ши всѧ̑ на̑ша помышлє́нїѧ и҆ чꙋ̑вства сердє́чнаѧ, запретѝ волне́нїю страсте́й, возста́ви ны̀ ѿ сме́рти грѣхо́вныѧ, сотворѝ, да пред̾ свѣ́томъ любвѐ твоеѧ̀ поме́ркнꙋтъ на́мъ всѧ̑ сла̑внаѧ и҆ кра̑снаѧ сꙋ́етнагѡ мі́ра, да потрѧсꙋ́тсѧ тре́петомъ дꙋ́шы на́шѧ и҆ ѿве́рзꙋтсѧ сердца̀ прїѧ́ти тѧ̀ невече́рнѧго свѣ́та, просвѣща́ющаго всѧ́каго человѣ́ка, грѧдꙋ́щаго въ мі́ръ. Сподо́би ны́нѣ и҆зы́ти любо́вїю въ срѣ́тенїе тебѣ̀, низходѧ́щемꙋ на зе́млю на́съ ра́ди, и҆ въ де́нь и҆схо́да на́шегѡ ѿ вре́меннагѡ житїѧ̀ сегѡ̀ ᲂу҆срѧ́щи на́съ, восходѧ́щихъ ѿ землѝ, млⷭ҇рдїемъ твои́мъ, прїимѝ въ нбⷭ҇наѧ твоѧ̑ селє́нїѧ и҆ сотворѝ прича́стники сла́внагѡ црⷭ҇твїѧ твоегѡ̀, да со а҆́гг҃лы ст҃ы́ми пое́мъ и҆ сла́вимъ тѧ̀, сп҃са дꙋ́шъ на́шихъ, со безнача́льнымъ твои́мъ ѻ҆ц҃е́мъ и҆ съ прест҃ы́мъ дх҃омъ, є҆ди́наго въ трⷪ҇цѣ бг҃а, є҆мꙋ́же подоба́етъ всѧ́каѧ сла́ва, че́сть и҆ поклоне́нїе, во вѣ́ки вѣкѡ́въ. А҆ми́нь.