Кондак 1
Избра́вый от все́х родо́в пречи́стейшую А́нгел Де́ву, и от нея́ роди́выйся пло́тию Христе́ Бо́же на́ш; благода́рственная прино́сим ти́ раби́ Твои́ Влады́ко. Ты́ же я́ко име́яй милосе́рдие неизрече́нное, от вся́ких на́с бе́д свободи́, зову́щих:
Иису́се, Сы́не Бо́жий, воплоти́выйся на́с ра́ди, сла́ва Тебе́.
Икос 1
А́нгел мно́жество собра́ся в Вифлее́ме, ви́дети непости́жное Рождество́; и ви́девше своего́ Творца́, во я́слех я́ко младе́нца лежа́ща, удиви́шася! И стра́хом благогове́юще, Ро́ждшагося и Ро́ждшую боголе́пне почита́ху, пою́ще такова́я:
Сла́ва Тебе́, Сы́не Бо́жий, пре́жде ве́к от Отца́ рожде́нный; сла́ва Тебе́, со Отце́м и Ду́хом вся́ сотвори́вый.
Сла́ва Тебе́, спасти́ поги́бшия прише́дый; сла́ва Тебе́, да́же до ра́бия зра́ка снизше́дый.
Сла́ва Тебе́, Взыска́телю заблу́ждших; сла́ва Тебе́, Спаси́телю поги́бших.
Сла́ва Тебе́, средосте́ние вражды́ разруши́вшу; сла́ва Тебе́, ра́й, преслуша́нием затворе́нный, па́ки отве́рзшу.
Сла́ва Тебе́, ро́д челове́ческий неизрече́нно возлюби́вшу; сла́ва Тебе́, на земли́ верте́п Не́бо яви́вшу.
Сла́ва Тебе́, ро́ждшую Тя́ Де́ву, Престо́л херуви́мский показа́вшу.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 2
Ви́дяще безпло́тнии А́нгели своего́ Влады́ку, от Чи́стыя Де́вы пло́ть прие́мша, ужасо́шася! И дру́г ко дру́гу ре́ша: пресла́вное сие́ Та́инство непостижи́мо на́м явля́ется бы́ти: оба́че дивя́щеся неизрече́нному того́ снизхожде́нию, со стра́хом поя́ху: Аллилу́иа.
Икос 2
Разу́мная вся́ тва́рь ужаса́ющися и благодаря́щи пое́т Твоего́ Рождества́ Влады́ко та́инство! Си́лы небе́сныя ра́дуются пою́ще: сла́ва в вы́шних Бо́гу, и земля́ с челове́ки весели́тся, мы́ же непреста́нно вопие́м:
Сла́ва Тебе́, в вы́шних сла́вимому Бо́гу; сла́ва Тебе́, ми́р на земли́ сотвори́вшему.
Сла́ва Тебе́, на́с Собо́ю примири́вшему; сла́ва Тебе́, на земли́ на́м яви́вшемуся.
Сла́ва Тебе́, от Де́вы неизрече́нно воплоти́вшемуся; сла́ва Тебе́, звезду́ возсия́вшему.
Сла́ва Тебе́, то́ю волхвы́ на поклоне́ние Тебе́ призва́вшему; сла́ва Тебе́, да́ры от ни́х ми́лостивно прия́вшему.
Сла́ва Тебе́, всю́ тва́рь Тебе́ служи́ти научи́вшему; сла́ва Тебе́, и на́с Тебе́ пе́ти наста́вившему.
Сла́ва Тебе́, Себе́ на́м соедини́вшему; сла́ва Тебе́, на́с Собо́ю спа́сшему.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 3
Си́льный в кре́пости, Бо́г ми́ра, и Оте́ц щедро́т, прии́де на зе́млю, спасти́ ми́р погиба́ющий: Ны́не в Вифлее́ме я́ко младе́нец ражда́ется от Де́вы: Ю́же Ма́терь и Хода́таицу спасе́ния показа́, все́м Того́ воплоще́ние сла́вящим и пою́щим: Аллилу́иа.
Икос 3
Иму́ще, Тебе́ пречи́сто ро́ждшую, о на́с непреста́нно моля́щуюся: ра́дующеся пое́м Твоего́ вочелове́чения Влады́ко Та́инство! И Рождество́ от Де́вы Богоприя́тныя славосло́вяще вопие́м:
Сла́ва Тебе́, Сы́не Бо́жий, на́с ра́ди воплоти́выйся; сла́ва Тебе́, Сы́не Де́вы, от Де́вы несказа́нно роди́выйся.
Сла́ва Тебе́, человеколю́бия бе́здну на на́с показа́вшему; сла́ва Тебе́, на́с неизрече́нно возлюби́вшему.
Сла́ва Тебе́, заблу́ждшее овча́ взыска́вшему; сла́ва Тебе́, об обре́тении того́, сра́доватися А́нгелом ре́кшему.
Сла́ва Тебе́, на ра́мо сию́ восприе́мшему; сла́ва Тебе́, ко Отцу́ то́е приве́дшему.
Сла́ва Тебе́, челове́ки со А́нгелы во еди́но ста́до совоку́пльшему; сла́ва Тебе́, ми́р от пре́лести изба́вльшему.
Сла́ва Тебе́, вели́кую и неизрече́нную ми́лость на́м яви́вшему. Сла́ва Тебе́, на́с па́че все́х тва́рей просла́вльшему.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 4
Бу́рю вну́трь помышле́ний сумни́тельных пре́жде име́вый целому́дренный Ио́сиф ны́не вну́трь Боже́ственнаго верте́па ви́дит пресла́вныя. А́ще бо и я́ко челове́ка ви́дяще от Де́вы ражда́емаго, но разумева́ше от веще́й Бо́га бы́ти и́стиннаго: те́м и боголе́пне поклони́вся, ра́достно поя́ше: Аллилу́иа.
Икос 4
Слы́шаша па́стырие А́нгела, возвеща́юща и́м ро́ждшагося Спа́са ми́ру, во гра́де Дави́дове: и ско́ро те́кше, ви́деша Сего́ я́ко а́гнца непоро́чна, во чре́ве Де́выя упа́сшася во я́слех лежа́ща, и Ро́ждшую благогове́йно служа́щу и Ио́сифа со стра́хом предстоя́ща; сказа́ша о глаго́ланных к ни́м, и поклони́вшеся Ро́ждшемуся, ре́ша:
Сла́ва Тебе́, А́гнче Бо́жий Спа́се ми́ра; сла́ва Тебе́, Сы́не Бо́жий, неизрече́нное чу́до на́м показа́вый.
Сла́ва Тебе́, а́нгельских пе́ний слы́шатели на́с бы́ти яви́вый; сла́ва Тебе́, с ни́ми и на́с славосло́вити Тя́ научи́вый.
Сла́ва Тебе́, А́нгелы и челове́ки пе́ти Тя́ вразуми́вый; сла́ва Тебе́, на земли́ и на небеси́ ра́дость сотвори́вый.
Сла́ва Тебе́, я́ко о Тебе́ небе́сная сра́дуются земны́м; сла́ва Тебе́, я́ко Тобо́ю земна́я совокупля́ются небе́сным.
Сла́ва Тебе́, кре́пость диа́волю не́мощну показа́вшему; сла́ва Тебе́, от того́ мучи́тельства на́с изба́вльшему.
Сла́ва Тебе́, в Тя́ ве́рующим неизрече́нная ра́досте; сла́ва Тебе́, лю́бящим Тя́ неизглаго́ланная сла́досте.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 5
Боготе́чную звезду́, Христо́во Рождество́ предъявля́ющую, узре́вше звездоблюсти́тели волсви́; и тоя́ вожде́нием, Непостижи́маго достиго́ша и Неви́димаго ви́деша: возра́довашася же Тому́ вопию́ще: Аллилу́иа.
Икос 5
Ви́дяще ца́рие перси́дстии, на руку́ Деви́чу, Царя́ ца́рствующих, я́ко на престо́ле херуви́мстем седя́ща, и Влады́ку того́ разумева́юще, а́ще ра́бий прия́т зра́к, потща́шася да́ры Ему́ принести́: зла́то, я́ко Царю́ все́х; лива́н же я́ко Бо́гу; сми́рну, я́ко Безсме́ртному, и поклони́вшеся поя́ху:
Сла́ва Тебе́, Све́т все́м возсия́вый; сла́ва Тебе́, на́с звездо́ю на поклоне́ние Тебе́ призва́вый.
Сла́ва Тебе́, зло́бу лю́таго И́рода обличи́вшему; сла́ва Тебе́, су́етно того́ умышле́ние показа́вшему.
Сла́ва Тебе́, на́с от того́ пре́лести изба́вльшему; сла́ва Тебе́, покланя́тися Тебе́, Со́лнцу пра́вды, научи́вшему.
Сла́ва Тебе́, вся́ све́том ра́зума просвети́вшему; сла́ва Тебе́, Твои́м Рождество́м многобо́жия пре́лесть упраздни́вшему.
Сла́ва Тебе́, вра́жие влады́чество до конца́ низложи́вшему; сла́ва Тебе́, со Отце́м и Ду́хом Тебе́ покланя́тися на́с научи́вшему.
Сла́ва Тебе́, прельсти́вшаго на́с зми́я главу́ сокруши́вшему; сла́ва Тебе́, от ве́чныя сме́рти на́с изба́вльшему.
Иису́се, Сы́не Бо́жий, воплоти́выйся на́с ра́ди, сла́ва тебе́.
Кондак 6
Пропове́дник богоно́сных веща́ния я́же от Тебе́ исполня́я, на земли́ яви́л еси́ Себе́, Спа́се, во убо́зем ны́не верте́пе ро́ждся от Чи́стыя Де́вы: и бога́т сы́й, на́с ра́ди обнища́л еси́ во́лею, да челове́ки обогати́ши, ве́рою Тебе́ пою́щия: Аллилу́иа.
Икос 6
Возсия́л еси́ от Де́вы, и неискусому́жныя Твоея́ Ма́тере, Иису́се, я́ко со́лнце просвеща́я и прогоня́я лжи́ тьму́: де́мони бо, Спа́се, нетерпя́ще Твоея́ кре́пости, вси́ вострепета́ша, и а́д, ви́дев чу́до, убоя́ся: мы́ же благодаря́ще вопие́м Ти́:
Сла́ва Тебе́, челове́к Спаси́телю; сла́ва Тебе́, бесо́в Потреби́телю.
Сла́ва Тебе́, пре́лести нача́льника Твои́м Рождество́м устраши́вшему; сла́ва Тебе́, и́дольскую пре́лесть упраздни́вшему.
Сла́ва Тебе́, све́том Богопозна́ния вся́ осия́вшему; сла́ва Тебе́, тьму́ неве́дения отгна́вшему.
Сла́ва Тебе́, Ка́меню, во́ду спасе́ния все́м источи́вый; сла́ва Тебе́, жа́жду Ада́мову и Дави́дову утоли́вый.
Сла́ва Тебе́, я́ко со́лнцем, Твои́м Рождество́м вся́ просвети́вшему; сла́ва Тебе́, лучи́ благода́ти вселе́нней облиста́вшему.
Сла́ва Тебе́, зе́млю обетова́ния на́м показа́вшему; сла́ва Тебе́, от всеро́дныя кля́твы на́с Изба́вльшему.
Иису́се, Сы́не Бо́жий, воплоти́выйся на́с ра́ди, сла́ва тебе́.
Кондак 7
Хотя́ от ве́ка сокрове́нную та́йну на́м яви́ти, от всея́ тва́ри служи́тели та́инству показа́л еси́, Спа́се. От А́нгел Гаврии́ла, от челове́к Де́ву, от небе́с звезду́, от земли́ верте́п, в не́мже роди́тися благоволи́л еси́: те́мже дивя́щеся твое́й неизрече́нней прему́дрости, зове́м: Аллилу́иа.
Икос 7
Но́вую показа́л еси́ тва́рь, я́влься пло́тию все́х Зижди́тель, из безсе́менныя прозя́б утро́бы, и сохрани́в ю́, я́коже бе́ нетле́нну, и Хода́таицу спасе́ния показа́л еси́ пою́щим:
Сла́ва Тебе́, Сы́не Бо́жий, Тя́ ро́ждшую Ма́терь милосе́рдия показа́вый; сла́ва Тебе́, Ту́ю и по Рождестве́ Де́ву сохрани́вый.
Сла́ва Тебе́, спасти́ Ада́ма прише́дшему; сла́ва Тебе́, сле́зы Е́вины утоли́вшему.
Сла́ва Тебе́, вся́ спасти́ возжела́вшему; сла́ва тебе́, Воскресе́ния о́браз облиста́вый.
Сла́ва Тебе́, грехо́в на́ших рукописа́ние раздра́вшему; сла́ва тебе́, Собо́ю смире́ния о́браз на́м показа́вый.
Сла́ва Тебе́, на́с ра́ди обнища́вшему; сла́ва Тебе́, Твое́ю нището́ю на́с обогати́вшему.
Сла́ва Тебе́, оде́ждою спасе́ния на́с оде́явшему; сла́ва Тебе́, Твое́ю любо́вию на́с услади́вшему.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 8
Стра́нное и пресла́вное Рождество́ Твое́ ви́девше, в верте́пе соверша́ющееся, устрани́мся су́етнаго ми́ра, у́м на Боже́ственная прело́жше. Сего́ бо ра́ди Бо́г на земли́ яви́ся смире́нный челове́к, да на Небеса́ возведе́т, Тому́ вопию́щия: Аллилу́иа.
Икос 8
Ве́сь еси́ жела́ние, ве́сь сла́дость лю́бящим Тя́, Христе́ Бо́же, и Твое́ Боже́ственное снизхожде́ние сла́вящим: от Де́вы бо Чи́стыя ро́ждшся на земли́, на́с на Небеса́ возво́диши, пою́щих:
Сла́ва Тебе́, Сы́не Бо́жий, на земли́ роди́выйся; сла́ва Тебе́, от Де́вы неизрече́нно воплоти́выйся.
Сла́ва Тебе́, Себе́ на́м показа́вшу; сла́ва Тебе́, на́с от Тебе́ дале́че су́щих призва́вшу.
Сла́ва Тебе́, неизрече́нная на́ша Ра́досте; сла́ва Тебе́, серде́ц на́ших сла́досте.
Сла́ва Тебе́, в Рождестве́ Твое́м све́т спасе́ния возсия́вый; сла́ва Тебе́, сле́зы ра́ди на́шего спасе́ния пролия́вый.
Сла́ва Тебе́, те́ми пла́мень страсте́й на́ших угаси́вый; сла́ва Тебе́, на́с от скве́рны грехо́вныя омы́вый.
Сла́ва Тебе́, преступле́ние разруши́вшему; сла́ва Тебе́, от тле́ния на́с изба́вльшему.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 9
Вся́кое разуме́ние и вся́к у́м а́нгельский и челове́ческий не постига́ет Твоего́ непости́жнаго Рождества́ Та́инства разуме́ти; оба́че, Влады́ко Благи́й, на́шу любо́вь и ве́ру приими́; и спаси́ на́с, Тебе́ пою́щих: Аллилу́иа.
Икос 9
Вети́я многовеща́нныя, я́ко ры́бы безгла́сныя, ви́дим о Твое́м воплоще́нии Влады́ко, недоуме́ют бо глаго́лати, ка́ко Бо́г сы́й соверше́н, челове́к соверше́нный яви́ся, и от Де́вы неискусобра́чныя ка́ко роди́ся; мы́ же Та́йны не испыту́юще, ве́рою еди́ною сла́вим Тя́, вопию́ще:
Сла́ва Тебе́, Ипоста́сная Бо́жия Прему́дросте; сла́ва Тебе́, неизглаго́ланная все́х Ра́досте.
Сла́ва Тебе́, любому́дры нему́дрыя яви́вый; сла́ва Тебе́, о Тебе́ испыту́ющих посрами́вый.
Сла́ва Тебе́, вся́ баснотво́рная плете́ния растерза́вый; сла́ва Тебе́, све́т Богове́дения все́м возсия́вый.
Сла́ва Тебе́, му́дрость во Твои́х де́лех пролия́вшему; сла́ва Тебе́, мно́гим ра́зум просвети́вшему.
Сла́ва Тебе́, пу́ть спасе́ния на́м показа́вшему; сла́ва Тебе́, неизче́тная бе́здно милосе́рдия.
Сла́ва Тебе́, пучи́но щедро́т и человеколю́бия.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 10
Спасти́ восхоте́в ми́р погиба́ющий, и́же все́х украси́тель, от Де́вы, я́ко младе́нец ражда́ется и во я́слех пелена́ми повива́ется, разреша́яй многоплете́нныя плени́цы прегреше́ний: И Сы́н сы́й Бо́жий, Де́выя Сы́н быва́ет! И вся́ му́дре устроя́ет да спасе́т Тому́ пою́щия: Аллилу́иа.
Икос 10
Стена́ и сто́лп зло́бы богопроти́вныя И́род пребеззако́нный показа́ся, жи́знь все́м подаю́щаго уби́ти богобо́рец тща́шеся, и незло́бивыя младе́нцы, я́ко кла́сы незре́лы мече́м пожина́хуся: те́мже и мы́ зло́бу вся́кую от серде́ц на́ших отри́нувше, на́с спасти́ прише́дшаго просла́вим вопию́ще:
Сла́ва Тебе́, и́родово умышле́ние тще́тно показа́вый; сла́ва Тебе́, от того́ избие́нныя младе́нцы со А́нгелы сопричты́й.
Сла́ва Тебе́, зло́бы потреби́телю; сла́ва Тебе́, смире́ния Наста́вниче и сме́ртных Люби́телю.
Сла́ва Тебе́, ро́г го́рдости сломи́вшему; сла́ва Тебе́, све́т пра́вды все́м возсия́вшему.
Сла́ва Тебе́, кро́тости и смире́нию все́х собо́ю научи́вшему; сла́ва Тебе́, вся́ в Твое́ позна́ние приве́дшему.
Сла́ва Тебе́, Тя́ Ро́ждшия утро́бу, Твои́м Рождество́м освяти́вый; сла́ва Тебе́, от па́стырей чу́до и от волхво́в да́ры прия́вый.
Сла́ва Тебе́, и безслове́сныя Тебе́ служи́ти научи́вый; сла́ва Тебе́, всю́ тва́рь освяти́вый.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 11
Пе́ние вся́кое побежда́ется, Твоему́ е́же на́с ра́ди воплоще́нию, досто́йно принести́ хотя́щих: те́мже и на́м удо́бее е́сть люби́ти молча́ние, и́бо а́ще и равночи́сленныя песка́ морска́го пе́сни прино́сим Ти́, Царю́ Пресвяты́й, ничто́же соверша́ем досто́йно: те́мже со стра́хом пое́м: Аллилу́иа.
Икос 11
Све́т Тя́ незаходи́мый, су́щии во тьме́ и се́ни сме́ртней седя́щии, Спа́се на́ш, узре́вше от Де́вы возсия́вша: просвети́шася огне́м Твоего́ Божества́; и Тебе́ Прему́дрости и смы́сла Пода́телю поя́ху, сицева́я:
Сла́ва Тебе́, Сы́не Бо́жий, Све́те неизрече́нный; сла́ва Тебе́, Со́лнце пра́вды, Твои́м Рождество́м вся́ просвети́вый.
Сла́ва Тебе́, многосве́тлое просвеще́ние возсия́вшему; сла́ва Тебе́, многотеку́щую благода́ти реку́ на́м источи́вшему.
Сла́ва Тебе́, жа́ждущих водо́ю спасе́ния бога́тно напои́вшему; сла́ва Тебе́, лю́бящим Тя́ и́го бла́го и бре́мя Твое́ легко́ показа́вшему.
Сла́ва Тебе́, от бре́мене грехо́внаго на́с облегчи́вшему; сла́ва Тебе́, на́с от рабо́ты вра́жия изба́вльшему.
Сла́ва Тебе́, Твои́м на земли́ явле́нием вся́ возвесели́вый; сла́ва Тебе́, утеша́тися на́м наде́ждею пакибытия́ дарова́вый.
Сла́ва Тебе́, на́м жела́ний на́ших кра́й Себе́ яви́вый; сла́ва Тебе́, на́с враго́в су́щих со Отце́м примири́вый.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 12
Благода́ть все́м пода́ти и долги́ челове́ков разреши́ти прише́дый, Спа́се на́ш, Твои́м Воплоще́нием: те́м и на́ша долги́ разреши́ и грехо́в рукописа́ние раздери́: Твое́ несказа́нное Рождество́ сла́вящим и непреста́нно пою́щим: Аллилу́иа.
Икос 12
Пою́ще Твое́ вочелове́чение, хва́лим, благослови́м и покланя́емся Тебе́, Спа́се на́ш; и ве́руем, я́ко Госпо́дь и Бо́г еси́, спаса́яй все́х на Тя́ упова́ющих и Твое́ е́же от Де́вы неизрече́нное Рождество́ славосло́вящих и пою́щих такова́я:
Сла́ва Тебе́, Сы́не Бо́жий, в вы́шних со Отце́м и Ду́хом покланя́емый; сла́ва Тебе́, от все́х коле́н небе́сных и земны́х сла́вимый.
Сла́ва Тебе́, сокрове́нное от ве́ка та́инство откры́вый; сла́ва Тебе́, Твою́ к на́м неизрече́нную любо́вь яви́вый.
Сла́ва Тебе́, всея́ тва́ри Украси́телю; сла́ва Тебе́, на́м всеми́лостивый Спаси́телю.
Сла́ва Тебе́, благоче́стно ца́рствующих на земли́ ски́петры утвержда́яй; сла́ва Тебе́, святи́тели благогове́йныя и иере́и прему́дростию и благоле́пием украша́яй.
Сла́ва Тебе́, Це́ркве основа́ние и утвержде́ние; сла́ва Тебе́, все́м ве́рным спасе́ние и украше́ние.
Сла́ва Тебе́, теле́с на́ших Врачу́ и Исцеле́ние; сла́ва Тебе́, ду́ш на́ших Украси́телю и Спаси́телю.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 13
О, Пресла́дкий и Всеще́дрый Иису́се, Спаси́телю на́ш, Тво́рче и Влады́ко! Приими́ ны́не ма́лое сие́ моле́бное благодаре́ние и славосло́вие на́ше, я́коже прия́л еси́ от волхво́в поклоне́ние и да́ры; и сохрани́ на́с, Твои́х рабо́в, от вся́кия напа́сти: и грехо́в проще́ние да́руй; и ве́чныя му́ки изба́ви ве́рно сла́вящих Твое́, от чи́стыя Де́вы, Рождество́ и вопию́щих Ти́: Аллилу́иа.
Повтор
Этот кондак читается трижды, затем икос 1-й и кондак 1-й.
Икос 1
А́нгел мно́жество собра́ся в Вифлее́ме, ви́дети непости́жное Рождество́; и ви́девше своего́ Творца́, во я́слех я́ко младе́нца лежа́ща, удиви́шася! И стра́хом благогове́юще, Ро́ждшагося и Ро́ждшую боголе́пне почита́ху, пою́ще такова́я:
Сла́ва Тебе́, Сы́не Бо́жий, пре́жде ве́к от Отца́ рожде́нный; сла́ва Тебе́, со Отце́м и Ду́хом вся́ сотвори́вый.
Сла́ва Тебе́, спасти́ поги́бшия прише́дый; сла́ва Тебе́, да́же до ра́бия зра́ка снизше́дый.
Сла́ва Тебе́, Взыска́телю заблу́ждших; сла́ва Тебе́, Спаси́телю поги́бших.
Сла́ва Тебе́, средосте́ние вражды́ разруши́вшу; сла́ва Тебе́, ра́й, преслуша́нием затворе́нный, па́ки отве́рзшу.
Сла́ва Тебе́, ро́д челове́ческий неизрече́нно возлюби́вшу; сла́ва Тебе́, на земли́ верте́п Не́бо яви́вшу.
Сла́ва Тебе́, ро́ждшую Тя́ Де́ву, Престо́л херуви́мский показа́вшу.
Иису́се, Сы́не Бо́жий, воплоти́выйся на́с ра́ди, сла́ва Тебе́.
Кондак 1
Избра́вый от все́х родо́в пречи́стейшую А́нгел Де́ву, и от нея́ роди́выйся пло́тию Христе́ Бо́же на́ш; благода́рственная прино́сим ти́ раби́ Твои́ Влады́ко. Ты́ же я́ко име́яй милосе́рдие неизрече́нное, от вся́ких на́с бе́д свободи́, зову́щих:
Иису́се, Сы́не Бо́жий, воплоти́выйся на́с ра́ди, сла́ва Тебе́.
Молитвы
Пребезнача́льное Нача́ло, Бо́же Святы́й и Ве́чный, и всея́ тва́ри Соде́телю! Ки́ими словесы́ возблагодари́м и ки́ими пе́сньми возвели́чим Твое́ на́с ра́ди челове́к неизрече́нное снизхожде́ние, во́лею Божества́ Своего́ не отсту́пльше, и не́др О́тчих не разлуча́яся, Бо́г сы́й, я́ко челове́к, в верте́пе безслове́снем ны́не положи́лся еси́, Христе́ Бо́же на́ш! Кто́ испове́сть неизглаго́ланнаго сего́ та́инства вели́чие и пресла́внаго сбытия́ та́инство: Сы́н Бо́жий – Сы́н Де́вы явля́ется, да свободи́т ми́р от кля́твы зако́нныя, и сы́ны греха́ и беззако́ния – ча́дами Бо́жиими, насле́дниками ве́чных бла́г соде́лает,– Себе́ же, я́ко же́ртву непоро́чную и всесвяту́ю, в зало́г спасе́ния па́дшаго челове́ка да принесе́т. Иису́се Сладча́йший, Влады́ко Всеми́лостивый! Твои́м Пребоже́ственным снизхожде́нием юдо́ль земна́я в хра́м Боже́ственныя Сла́вы Твоея́ освяти́ся, и вси́ живу́щии на не́й небе́сным весе́лием испо́лнишася. Сподо́би у́бо и на́с в де́нь пресла́внаго Рождества́ Твоего́ чи́стым се́рдцем и отве́рстою душе́ю испове́дати Тя́ и́стиннаго А́гнца Бо́жия, услажда́ющаго и укрепля́ющаго на́с наде́ждою гряду́щих бла́г в неме́ркнущем Све́те Трисия́тельнаго Божества́, И́мже вся́ живе́т и дви́жется, И́мже обновле́ние на́шего первообра́знаго бытия́ да усоверши́тся. Е́й, Го́споди, вся́каго благодея́ния бога́тый Да́телю, и Пода́телю Благи́й, за е́же та́ко возлюби́л еси́ ми́р, я́ко вся́ ско́рби и боле́зни на́ша на Себе́ понести́ изво́лил еси́, не оста́ви на́с, до́ндеже суета́ земна́я скорбьми́ и напа́стьми не изсуши́ла души́ на́ша, и не поги́бе пу́ть спасе́ния под нога́ма на́шима, да не посмею́тся о на́с врази́ на́ши, но да́руй на́м в све́те Твоего́ Боже́ственнаго Открове́ния позна́ти пу́ть ми́ра, добра́ и и́стины, и воззови́ ненасы́тною жа́ждою по Тебе́, Спаси́теле на́шем, во е́же твори́ти во́лю Твою́ преблагу́ю во стра́се Твое́м, и в похвалу́ неизрече́нному снизхожде́нию Твоему́, я́ко кади́ло благово́нное, приноси́ти Тебе́ житие́ нескве́рное и любо́вь нелицеме́рную, да в де́лех на́ших и во упова́нии ве́ры на́шея непреста́нно соверша́ется во́ля Твоя́ свята́я, и во ве́ки не умо́лкнет под небесе́м сла́ва Твоя́, сла́ва,– я́ко Единоро́днаго от Отца́, испо́лнь благода́ти и и́стины. Я́ко о Тебе́, ны́не пло́тию от Безневе́стныя и Пречи́стыя Де́вы Мари́и Ро́ждшемся, вся́ коле́на небе́сная и земна́я, ра́дости исполня́ющеся, велегла́сно испове́дуют: с на́ми Бо́г, Ему́же че́сть и поклоне́ние подоба́ет – Отцу́ и Сы́ну и Свято́му Ду́ху, во ве́ки веко́в. Ами́нь.
Конда́къ а҃
И҆збра́вый ѿ всѣ́хъ родѡ́въ пречⷭ҇тѣйшꙋю а҆́гг҃лъ дв҃ꙋ и҆ ѿ неѧ̀ роди́выйсѧ пло́тїю, хрⷭ҇тѐ бж҃е на́шъ, бл҃года́рственнаѧ прино́симъ тѝ рабѝ твоѝ, влⷣко. Ты́ же, ꙗ҆́кѡ и҆мѣ́ѧй млⷭ҇рдїе неизрече́нное, ѿ всѧ́кихъ на́съ бѣ́дъ свободѝ, зовꙋ́щихъ:
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
І҆́косъ а҃
А҆́гг҃лъ мно́жество собра́сѧ въ виѳлее́мѣ ви́дѣти непости́жное рождество̀: и҆, ви́дѣвше своегѡ̀ творца̀, во ꙗ҆́слѣхъ ꙗ҆́кѡ младе́нца лежа́ща, ᲂу҆диви́шасѧ, и҆, стра́хомъ бл҃гоговѣ́юще, ро́ждшагосѧ и҆ ро́ждшꙋю бг҃олѣ́пнѣ почита́хꙋ, пою́ще такова́ѧ:
Сла́ва тебѣ̀, сн҃е бж҃їй, пре́жде вѣ́къ ѿ ѻ҆ц҃а̀ рожде́нный: сла́ва тебѣ̀, со ѻ҆ц҃е́мъ и҆ дх҃омъ всѧ̑ сотвори́вый.
Сла́ва тебѣ̀, сп҃стѝ поги́бшїѧ прише́дый: сла́ва тебѣ̀, да́же до ра́бїѧ зра́ка снизше́дый.
Сла́ва тебѣ̀, взыска́телю заблꙋ́ждшихъ: сла́ва тебѣ̀, сп҃си́телю поги́бшихъ.
Сла́ва тебѣ̀, средостѣ́нїе вражды̀ разрꙋши́вшꙋ: сла́ва тебѣ̀, ра́й, преслꙋша́нїемъ затворе́нный, па́ки ѿве́рзшꙋ.
Сла́ва тебѣ̀, ро́дъ чл҃вѣ́ческїй неизрече́ннѡ возлюби́вшꙋ: сла́ва тебѣ̀, на землѝ верте́пъ нб҃о ꙗ҆ви́вшꙋ.
Сла́ва тебѣ̀, ро́ждшꙋю тѧ̀ дв҃ꙋ, прⷭ҇то́лъ херꙋві́мскїй показа́вшꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ в҃
Ви́дѧще безпло́тнїи а҆́гг҃ли своегѡ̀ влⷣкꙋ, ѿ чⷭ҇тыѧ дв҃ы пло́ть прїе́мша, ᲂу҆жасо́шасѧ и҆ дрꙋ́гъ ко дрꙋ́гꙋ рѣ́ша: пресла́вное сїѐ та́инство непостижи́мѡ на́мъ ꙗ҆влѧ́етсѧ бы́ти. Ѻ҆ба́че дивѧ́щесѧ неизрече́нномꙋ тогѡ̀ снизхожде́нїю, со стра́хомъ поѧ́хꙋ: А҆ллилꙋ́їа.
І҆́косъ в҃
Разꙋ́мнаѧ всѧ̑ тва́рь ᲂу҆жаса́ющисѧ и҆ бл҃годарѧ́щи, пое́тъ твоегѡ̀ рождества̀, влⷣко, та́инство: си́лы нбⷭ҇ныѧ ра́дꙋютсѧ пою́ще: сла́ва въ вы́шнихъ бг҃ꙋ, и҆ землѧ̀ съ чл҃вѣ́ки весели́тсѧ, мы́ же непреста́ннѡ вопїе́мъ:
Сла́ва тебѣ̀, въ вы́шнихъ сла́вимомꙋ бг҃ꙋ: сла́ва тебѣ̀, ми́ръ на землѝ сотвори́вшемꙋ.
Сла́ва тебѣ̀, на́съ собо́ю примири́вшемꙋ: сла́ва тебѣ̀, на землѝ на́мъ ꙗ҆ви́вшемꙋсѧ.
Сла́ва тебѣ̀, ѿ дв҃ы неизрече́ннѡ воплоти́вшемꙋсѧ: сла́ва тебѣ̀, ѕвѣздꙋ̀ возсїѧ́вшемꙋ.
Сла́ва тебѣ̀, то́ю волхвы̀ на поклоне́нїе тебѣ̀ призва́вшемꙋ: сла́ва тебѣ̀, да́ры ѿ ни́хъ ми́лостивнѡ прїѧ́вшемꙋ.
Сла́ва тебѣ̀, всю̀ тва́рь тебѣ̀ слꙋжи́ти наꙋчи́вшемꙋ. Сла́ва тебѣ̀, и҆ на́съ тебѣ̀ пѣ́ти наста́вившемꙋ.
Сла́ва тебѣ̀, себє̀ на́мъ соедини́вшемꙋ: сла́ва тебѣ̀, на́съ собо́ю сп҃сшемꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ г҃
Си́льный въ крѣ́пости, бг҃ъ мі́ра и҆ ѻ҆ц҃ъ щедрѡ́тъ, прїи́де на зе́млю сп҃стѝ мі́ръ погиба́ющїй, ны́нѣ въ виѳлее́мѣ ꙗ҆́кѡ младе́нецъ ражда́етсѧ ѿ дв҃ы, ю҆́же мт҃рь и҆ хода́таицꙋ сп҃се́нїѧ показа̀ всѣ́мъ тогѡ̀ воплоще́нїе сла́вѧщимъ и҆ пою́щимъ: А҆ллилꙋ́їа.
І҆́косъ г҃
И҆мꙋ́ще тебѐ пречⷭ҇тѡ ро́ждшꙋю, ѡ҆ на́съ непреста́ннѡ молѧ́щꙋюсѧ, ра́дꙋющесѧ пое́мъ твоегѡ̀ вочл҃вѣ́ченїѧ, влⷣко, та́инство, и҆ рождество̀ ѿ дв҃ы бг҃опрїѧ́тныѧ славосло́вѧще, вопїе́мъ:
Сла́ва тебѣ̀, сн҃е бж҃їй, на́съ ра́ди воплоти́выйсѧ: сла́ва тебѣ̀, сн҃е дв҃ы, ѿ дв҃ы несказа́ннѡ роди́выйсѧ.
Сла́ва тебѣ̀, чл҃вѣколю́бїѧ бе́зднꙋ на на́съ показа́вшемꙋ: сла́ва тебѣ̀, на́съ неизрече́ннѡ возлюби́вшемꙋ.
Сла́ва тебѣ̀, заблꙋ́ждшее ѻ҆вча̀ взыска́вшемꙋ: сла́ва тебѣ̀, ѡ҆б̾ ѡ҆брѣ́тенїи тогѡ̀ сра́доватисѧ а҆́гг҃лѡмъ ре́кшемꙋ.
Сла́ва тебѣ̀, на ра́мо сїю̀ воспрїе́мшемꙋ: сла́ва тебѣ̀, ко ѻ҆ц҃ꙋ̀ то́е приве́дшемꙋ.
Сла́ва тебѣ̀, чл҃вѣ́ки со а҆́гг҃лы во є҆ди́но ста́до совокꙋ́пльшемꙋ: сла́ва тебѣ̀, мі́ръ ѿ пре́лести и҆зба́вльшемꙋ.
Сла́ва тебѣ̀, вели́кꙋю и҆ неизрече́ннꙋю ми́лость на́мъ ꙗ҆ви́вшемꙋ: сла́ва тебѣ̀, на́съ па́че всѣ́хъ тва́рей просла́вльшемꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ д҃
Бꙋ́рю внꙋ́трь помышле́нїй сꙋмни́тельныхъ пре́жде и҆мѣ́вый цѣломꙋ́дренный і҆ѡ́сифъ, ны́нѣ внꙋ́трь бжⷭ҇твеннагѡ верте́па ви́дитъ пресла́вныѧ. А҆́ще бо и҆ ꙗ҆́кѡ чл҃вѣ́ка ви́дѧще ѿ дв҃ы ражда́емагѡ, но разꙋмѣва́ше ѿ веще́й бг҃а бы́ти и҆́стиннагѡ: тѣ́мъ и҆ бг҃олѣ́пнѣ поклони́всѧ, ра́достнѡ поѧ́ше: А҆ллилꙋ́їа.
І҆́косъ д҃
Слы́шаша па́стырїе а҆́гг҃ла, возвѣща́юща и҆́мъ ро́ждшагосѧ сп҃са мі́рꙋ во гра́дѣ дв҃довѣ, и҆, ско́ро те́кше, ви́дѣша сегѡ̀ ꙗ҆́кѡ а҆́гнца непоро́чна, во чре́вѣ дв҃ыѧ ᲂу҆па́сшасѧ, во ꙗ҆́слѣхъ лежа́ща, и҆ ро́ждшꙋю, бл҃гоговѣ́йнѡ слꙋжа́щꙋ, и҆ і҆ѡ́сифа, со стра́хомъ предстоѧ̑ща: сказа́ша ѡ҆ глаго́ланныхъ къ ни́мъ и҆, поклони́вшесѧ ро́ждшемꙋсѧ, рѣ́ша:
Сла́ва тебѣ̀, а҆́гнче бж҃їй, сп҃се мі́ра: сла́ва тебѣ̀, сн҃е бж҃їй, неизрече́нное чꙋ́до на́мъ показа́вый.
Сла́ва тебѣ̀, а҆́гг҃льскихъ пѣ́нїй слы́шатели на́съ бы́ти ꙗ҆ви́вый: сла́ва тебѣ̀, съ ни́ми и҆ на́съ славосло́вити тѧ̀ наꙋчи́вый.
Сла́ва тебѣ̀, а҆́гг҃лы и҆ чл҃вѣ́ки пѣ́ти тѧ̀ вразꙋми́вый: сла́ва тебѣ̀, на землѝ и҆ на нб҃сѝ ра́дость сотвори́вый.
Сла́ва тебѣ̀, ꙗ҆́кѡ ѡ҆ тебѣ̀ нбⷭ҇наѧ сра́дꙋютсѧ земны́мъ: сла́ва тебѣ̀, ꙗ҆́кѡ тобо́ю земна́ѧ совокꙋплѧ́ютсѧ нбⷭ҇нымъ.
Сла́ва тебѣ̀, крѣ́пость дїа́волю не́мощнꙋ показа́вшемꙋ: сла́ва тебѣ̀, ѿ тогѡ̀ мꙋчи́тельства на́съ и҆зба́вльшемꙋ.
Сла́ва тебѣ̀, въ тѧ̀ вѣ́рꙋющимъ неизрече́ннаѧ ра́досте: сла́ва тебѣ̀, лю́бѧщимъ тѧ̀ неизглаго́ланнаѧ сла́досте.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ є҃
Бг҃оте́чнꙋю ѕвѣздꙋ̀, хрⷭ҇то́во рождество̀ пред̾ѧвлѧ́ющꙋю, ᲂу҆зрѣ́вше ѕвѣздоблюсти́тели волсвѝ, и҆ тоѧ̀ вожде́нїемъ непостижи́магѡ достиго́ша и҆ неви́димагѡ ви́дѣша, возра́довашасѧ же, томꙋ̀ вопїю́ще: А҆ллилꙋ́їа.
І҆́косъ є҃
Ви́дѧще ца́рїе персі́дстїи на рꙋкꙋ̀ дв҃и́чꙋ цр҃ѧ̀ ца́рствꙋющихъ, ꙗ҆́кѡ на прⷭ҇то́лѣ херꙋві́мстѣмъ сѣдѧ́ща, и҆ влⷣкꙋ тогѡ̀ разꙋмѣва́юще, а҆́ще ра́бїй прїѧ́тъ зра́къ, потща́шасѧ да́ры є҆мꙋ̀ принестѝ: зла́то ꙗ҆́кѡ цр҃ю̀ всѣ́хъ: лїва́нъ же ꙗ҆́кѡ бг҃ꙋ: смѵ́рнꙋ ꙗ҆́кѡ безсме́ртномꙋ, и҆, поклони́вшесѧ, поѧ́хꙋ:
Сла́ва тебѣ̀, свѣ́тъ всѣ́мъ возсїѧ́вый: сла́ва тебѣ̀, на́съ ѕвѣздо́ю на поклоне́нїе тебѣ̀ призва́вый.
Сла́ва тебѣ̀, ѕло́бꙋ лю́тагѡ и҆́рѡда ѡ҆бличи́вшемꙋ: сла́ва тебѣ̀, сꙋ́етнѡ тогѡ̀ ᲂу҆мышле́нїе показа́вшемꙋ.
Сла́ва тебѣ̀, на́съ ѿ тогѡ̀ пре́лести и҆зба́вльшемꙋ: Сла́ва тебѣ̀, покланѧ́тисѧ тебѣ̀, со́лнцꙋ пра́вды, наꙋчи́вшемꙋ.
Сла́ва тебѣ̀, всѧ̑ свѣ́томъ ра́зꙋма просвѣти́вшемꙋ: сла́ва тебѣ̀, твои́мъ рождество́мъ многобо́жїѧ пре́лесть ᲂу҆праздни́вшемꙋ.
Сла́ва тебѣ̀, вра́жїе влады́чество до конца̀ низложи́вшемꙋ: сла́ва тебѣ̀, со ѻ҆ц҃е́мъ и҆ дх҃омъ тебѣ̀ покланѧ́тисѧ на́съ наꙋчи́вшемꙋ.
Сла́ва тебѣ̀, прельсти́вшаго на́съ ѕмі́ѧ главꙋ̀ сокрꙋши́вшемꙋ: сла́ва тебѣ̀, ѿ вѣ́чныѧ сме́рти на́съ и҆зба́вльшемꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ ѕ҃
Проповѣ́дникъ бг҃оно́сныхъ вѣща́нїѧ ꙗ҆́же ѿ тебѣ̀ и҆сполнѧ́ѧ, на землѝ ꙗ҆ви́лъ є҆сѝ себѐ, сп҃се, во ᲂу҆бо́зѣмъ ны́нѣ верте́пѣ ро́ждсѧ ѿ чⷭ҇тыѧ дв҃ы, и҆, бога́тъ сы́й, на́съ ра́ди ѡ҆бнища́лъ є҆сѝ во́лею, да чл҃вѣ́ки ѡ҆богати́ши, вѣ́рою тебѣ̀ пою́щїѧ: А҆ллилꙋ́їа.
І҆́косъ ѕ҃
Возсїѧ́лъ є҆сѝ ѿ дв҃ы и҆ неискꙋсомꙋ́жныѧ твоеѧ̀ мт҃ре, і҆и҃се, ꙗ҆́кѡ со́лнце просвѣща́ѧ и҆ прогонѧ́ѧ лжѝ тмꙋ̀: де́мѡни бо, сп҃се, нетерпѧ́ще твоеѧ̀ крѣ́пости, всѝ вострепета́ша, и҆ а҆́дъ, ви́дѣвъ чꙋ́до, ᲂу҆боѧ́сѧ: мы́ же бл҃годарѧ́ще вопїе́мъ тѝ:
Сла́ва тебѣ̀, чл҃вѣ́къ сп҃си́телю: сла́ва тебѣ̀, бѣсѡ́въ потреби́телю.
Сла́ва тебѣ̀, пре́лести нача́льника твои́мъ рождество́мъ ᲂу҆страши́вшемꙋ: сла́ва тебѣ̀, і҆́дѡльскꙋю пре́лесть ᲂу҆праздни́вшемꙋ.
Сла́ва тебѣ̀, свѣ́томъ бг҃опозна́нїѧ всѧ̑ ѡ҆сїѧ́вшемꙋ: сла́ва тебѣ̀, тмꙋ̀ невѣ́дѣнїѧ ѿгна́вшемꙋ.
Сла́ва тебѣ̀, ка́меню, во́дꙋ сп҃се́нїѧ всѣ́мъ и҆сточи́вый: сла́ва тебѣ̀, жа́ждꙋ а҆да́мовꙋ и҆ дв҃довꙋ ᲂу҆толи́вый.
Сла́ва тебѣ̀, ꙗ҆́кѡ со́лнцемъ, твои́мъ рождество́мъ всѧ̑ просвѣти́вшемꙋ: сла́ва тебѣ̀, лꙋчѝ блгⷣти вселе́ннѣй ѡ҆блиста́вшемꙋ.
Сла́ва тебѣ̀, зе́млю ѻ҆бѣтова́нїѧ на́мъ показа́вшемꙋ: сла́ва тебѣ̀, ѿ всеро́дныѧ клѧ́твы на́съ и҆зба́вльшемꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ з҃
Хотѧ̀ ѿ вѣ́ка сокрове́ннꙋю та́йнꙋ на́мъ ꙗ҆ви́ти, ѿ всеѧ̀ тва̑ри слꙋжи́тели та́инствꙋ показа́лъ є҆сѝ, сп҃се: ѿ а҆́гг҃лъ гаврїи́ла, ѿ чл҃вѣ́къ дв҃ꙋ, ѿ нб҃съ ѕвѣздꙋ̀, ѿ землѝ верте́пъ, въ не́мже роди́тисѧ бл҃говоли́лъ є҆сѝ: тѣ́мже дивѧ́щесѧ твое́й неизрече́ннѣй премꙋ́дрости, зове́мъ: А҆ллилꙋ́їа.
І҆́косъ з҃
Но́вꙋю показа́лъ є҆сѝ тва́рь, ꙗ҆́вльсѧ пло́тїю всѣ́хъ зижди́тель, и҆з̾ безсѣ́менныѧ прозѧ́бъ ᲂу҆тро́бы, и҆ сохрани́въ ю҆̀, ꙗ҆́коже бѣ̀ нетлѣ́ннꙋ, и҆ хода́таицꙋ сп҃се́нїѧ показа́лъ є҆сѝ пою́щимъ:
Сла́ва тебѣ̀, сн҃е бж҃їй, тѧ̀ ро́ждшꙋю мт҃рь милосе́рдїѧ показа́вый: сла́ва тебѣ̀, тꙋ́ю и҆ по рождествѣ̀ дв҃ꙋ сохрани́вый.
Сла́ва тебѣ̀, сп҃стѝ а҆да́ма прише́дшемꙋ: сла́ва тебѣ̀, сле́зы є҆́ѵины ᲂу҆толи́вшемꙋ.
Сла́ва тебѣ̀, всѧ̑ сп҃стѝ возжела́вшемꙋ: сла́ва тебѣ̀, воскресе́нїѧ ѻ҆́бразъ ѡ҆блиста́вый.
Сла́ва тебѣ̀, грѣхѡ́въ на́шихъ рꙋкописа́нїе раздра́вшемꙋ: сла́ва тебѣ̀, собо́ю смире́нїѧ ѻ҆́бразъ на́мъ показа́вый.
Сла́ва тебѣ̀, на́съ ра́ди ѡ҆бнища́вшемꙋ: сла́ва тебѣ̀, твое́ю нището́ю на́съ ѡ҆богати́вшемꙋ.
Сла́ва тебѣ̀, ѻ҆де́ждою сп҃се́нїѧ на́съ ѡ҆дѣ́ѧвшемꙋ: сла́ва тебѣ̀, твое́ю любо́вїю на́съ ᲂу҆слади́вшемꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ и҃
Стра́нное и҆ пресла́вное рождество̀ твоѐ ви́дѣвше, въ верте́пѣ соверша́ющеесѧ, ᲂу҆страни́мсѧ сꙋ́етнагѡ мі́ра, ᲂу҆́мъ на бжⷭ҇твеннаѧ прело́жше. Сегѡ́ бо ра́ди бг҃ъ на землѝ ꙗ҆ви́сѧ смире́нный чл҃вѣ́къ, да на нб҃са̀ возведе́тъ томꙋ̀ вопїю́щїѧ: А҆ллилꙋ́їа.
І҆́косъ и҃
Ве́сь є҆сѝ жела́нїе, ве́сь сла́дость лю́бѧщимъ тѧ̀, хрⷭ҇тѐ бж҃е, и҆ твоѐ бжⷭ҇твенное снизхожде́нїе сла́вѧщимъ: ѿ дв҃ы бо чⷭ҇тыѧ ро́ждшсѧ на землѝ, на́съ на нб҃са̀ возво́диши, пою́щихъ:
Сла́ва тебѣ̀, сн҃е бж҃їй, на землѝ роди́выйсѧ: сла́ва тебѣ̀, ѿ дв҃ы неизрече́ннѡ воплоти́выйсѧ.
Сла́ва тебѣ̀, себѐ на́мъ показа́вшꙋ: сла́ва тебѣ̀, на́съ, ѿ тебѣ̀ дале́че сꙋ́щихъ, призва́вшꙋ.
Сла́ва тебѣ̀, неизрече́ннаѧ на́ша ра́досте: сла́ва тебѣ̀, серде́цъ на́шихъ сла́досте.
Сла́ва тебѣ̀, въ рождествѣ̀ твое́мъ свѣ́тъ сп҃се́нїѧ возсїѧ́вый: сла́ва тебѣ̀, сле́зы ра́ди на́шегѡ сп҃се́нїѧ пролїѧ́вый.
Сла́ва тебѣ̀, тѣ́ми пла́мень страсте́й на́шихъ ᲂу҆гаси́вый: сла́ва тебѣ̀, на́съ ѿ скве́рны грѣхо́вныѧ ѡ҆мы́вый.
Сла́ва тебѣ̀, престꙋпле́нїе разрꙋши́вшемꙋ: сла́ва тебѣ̀, ѿ тлѣ́нїѧ на́съ и҆зба́вльшемꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ ѳ҃
Всѧ́кое разꙋмѣ́нїе и҆ всѧ́къ ᲂу҆́мъ а҆́гг҃льскїй и҆ чл҃вѣ́ческїй не постига́етъ твоегѡ̀ непости́жнагѡ рождества̀ та́инства разꙋмѣ́ти: ѻ҆ба́че, влⷣко бл҃гі́й, на́шꙋ любо́вь и҆ вѣ́рꙋ прїимѝ, и҆ сп҃сѝ на́съ, тебѣ̀ пою́щихъ: А҆ллилꙋ́їа.
І҆́косъ ѳ҃
Вѣті̑ѧ многовѣща̑нныѧ ꙗ҆́кѡ ры́бы безгла́сныѧ ви́димъ ѡ҆ твое́мъ воплоще́нїи, влⷣко, недоꙋмѣ́ютъ бо глаго́лати, ка́кѡ, бг҃ъ сы́й соверше́нъ, чл҃вѣ́къ соверше́нный ꙗ҆ви́сѧ, и҆ ѿ дв҃ы неискꙋсобра́чныѧ ка́кѡ роди́сѧ: мы́ же, та́йны не и҆спытꙋ́юще, вѣ́рою є҆ди́ною сла́вимъ тѧ̀, вопїю́ще:
Сла́ва тебѣ̀, ѵ҆поста́снаѧ бж҃їѧ премꙋ́дросте: сла́ва тебѣ̀, неизглаго́ланнаѧ всѣ́хъ ра́досте.
Сла́ва тебѣ̀, любомꙋ́дры немꙋ̑дрыѧ ꙗ҆ви́вый: сла́ва тебѣ̀, ѡ҆ тебѣ̀ и҆спытꙋ́ющихъ посрами́вый.
Сла́ва тебѣ̀, всѧ̑ баснотво́рнаѧ плетє́нїѧ растерза́вый: сла́ва тебѣ̀, свѣ́тъ бг҃овѣ́дѣнїѧ всѣ́мъ возсїѧ́вый.
Сла́ва тебѣ̀, мꙋ́дрость во твои́хъ дѣ́лѣхъ пролїѧ́вшемꙋ: сла́ва тебѣ̀, мно́гимъ ра́зꙋмъ просвѣти́вшемꙋ.
Сла́ва тебѣ̀, пꙋ́ть сп҃се́нїѧ на́мъ показа́вшемꙋ: сла́ва тебѣ̀, неизче́тнаѧ бе́здно милосе́рдїѧ.
Сла́ва тебѣ̀, пꙋчи́но щедрѡ́тъ и҆ чл҃вѣколю́бїѧ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ і҃
Сп҃стѝ восхотѣ́въ мі́ръ погиба́ющїй, и҆́же всѣ́хъ ᲂу҆краси́тель, ѿ дв҃ы, ꙗ҆́кѡ младе́нецъ ражда́етсѧ и҆ во ꙗ҆́слѣхъ пелена́ми повива́етсѧ, разрѣша́ѧй многоплетє́нныѧ плєни́цы прегрѣше́нїй: и҆ сн҃ъ сы́й бж҃їй, дв҃ыѧ сн҃ъ быва́етъ, и҆ всѧ̑ мꙋ́дре ᲂу҆строѧ́етъ, да сп҃се́тъ томꙋ̀ пою́щїѧ: А҆ллилꙋ́їа.
І҆́косъ і҃
Стѣна̀ и҆ сто́лпъ ѕло́бы бг҃опроти́вныѧ и҆́рѡдъ пребеззако́нный показа́сѧ, жи́знь всѣ́мъ подаю́щагѡ ᲂу҆би́ти бг҃обо́рецъ тща́шесѧ, и҆ неѕлѡ́бивыѧ младє́нцы, ꙗ҆́кѡ кла́сы незрѣ́лы, мече́мъ пожина́хꙋсѧ: тѣ́мже и҆ мы̀ ѕло́бꙋ всѧ́кꙋю ѿ серде́цъ на́шихъ ѿри́нꙋвше, на́съ сп҃стѝ прише́дшагѡ просла́вимъ, вопїю́ще:
Сла́ва тебѣ̀, и҆́рѡдово ᲂу҆мышле́нїе тще́тнѡ показа́вый: сла́ва тебѣ̀, ѿ тогѡ̀ и҆збїе́нныѧ младє́нцы со а҆́гг҃лы сопричты́й.
Сла́ва тебѣ̀, ѕло́бы потреби́телю: сла́ва тебѣ̀, смире́нїѧ наста́вниче и҆ сме́ртныхъ люби́телю.
Сла́ва тебѣ̀, ро́гъ го́рдости сломи́вшемꙋ: сла́ва тебѣ̀, свѣ́тъ пра́вды всѣ́мъ возсїѧ́вшемꙋ.
Сла́ва тебѣ̀, кро́тости и҆ смире́нїю всѣ́хъ собо́ю наꙋчи́вшемꙋ: сла́ва тебѣ̀, всѧ̑ въ твоѐ позна́нїе приве́дшемꙋ.
Сла́ва тебѣ̀, тѧ̀ ро́ждшїѧ ᲂу҆тро́бꙋ твои́мъ рождество́мъ ѡ҆ст҃и́вый: сла́ва тебѣ̀, ѿ па́стырей чꙋ́до и҆ ѿ волхвѡ́въ да́ры прїѧ́вый.
Сла́ва тебѣ̀, и҆ безслове́сныѧ тебѣ̀ слꙋжи́ти наꙋчи́вый: сла́ва тебѣ̀, всю̀ тва́рь ѡ҆ст҃и́вый.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ а҃і
Пѣ́нїе всѧ́кое побѣжда́етсѧ, твоемꙋ̀ є҆́же на́съ ра́ди воплоще́нїю досто́йнѡ принестѝ хотѧ́щихъ: тѣ́мже и҆ на́мъ ᲂу҆до́бѣе є҆́сть люби́ти молча́нїе, и҆́бо а҆́ще и҆ равночи́сленныѧ песка̀ морска́гѡ пѣ́сни прино́симъ тѝ, цр҃ю̀ прест҃ы́й, ничто́же соверша́емъ досто́йнѡ: тѣ́мже со стра́хомъ поѣ́мъ: А҆ллилꙋ́їа.
І҆́косъ а҃і
Свѣ́тъ тѧ̀ незаходи́мый сꙋ́щїи во тмѣ̀ и҆ сѣ́ни сме́ртнѣй сѣдѧ́щїи, сп҃се на́шъ, ᲂу҆зрѣ́вше, ѿ дв҃ы возсїѧ́вша, просвѣти́шасѧ ѻ҆гне́мъ твоегѡ̀ бж҃ества̀: и҆ тебѣ̀, премꙋ́дрости и҆ смы́сла пода́телю, поѧ́хꙋ сицева́ѧ:
Сла́ва тебѣ̀, сн҃е бж҃їй, свѣ́те неизрече́нный: сла́ва тебѣ̀, со́лнце пра́вды, твои́мъ рождество́мъ всѧ̑ просвѣти́вый.
Сла́ва тебѣ̀, многосвѣ́тлое просвѣще́нїе возсїѧ́вшемꙋ: сла́ва тебѣ̀, многотекꙋ́щꙋю блгⷣти рекꙋ̀ на́мъ и҆сточи́вшемꙋ.
Сла́ва тебѣ̀, жа́ждꙋщихъ водо́ю сп҃се́нїѧ бога́тнѡ напои́вшемꙋ: сла́ва тебѣ̀, лю́бѧщимъ тѧ̀ и҆́го бл҃го и҆ бре́мѧ твоѐ легко̀ показа́вшемꙋ.
Сла́ва тебѣ̀, ѿ бре́мене грѣхо́внагѡ на́съ ѡ҆блегчи́вшемꙋ: сла́ва тебѣ̀, на́съ ѿ рабо́ты вра́жїѧ и҆зба́вльшемꙋ.
Сла́ва тебѣ̀, твои́мъ на землѝ ꙗ҆вле́нїемъ всѧ̑ возвесели́вый: сла́ва тебѣ̀, ᲂу҆тѣша́тисѧ на́мъ наде́ждею пакибытїѧ̀ дарова́вый.
Сла́ва тебѣ̀, на́мъ жела́нїй на́шихъ кра́й себѐ ꙗ҆ви́вый: сла́ва тебѣ̀, на́съ, врагѡ́въ сꙋ́щихъ, со ѻ҆ц҃е́мъ примири́вый.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ в҃і
Блгⷣть всѣ́мъ пода́ти и҆ долгѝ чл҃вѣ́кѡвъ разрѣши́ти прише́дый, сп҃се на́шъ, твои́мъ воплоще́нїемъ: тѣ́мъ и҆ на́ша долгѝ разрѣшѝ и҆ грѣхѡ́въ рꙋкописа́нїе раздерѝ, твоѐ несказа́нное рождество̀ сла́вѧщимъ и҆ непреста́ннѡ пою́щимъ: А҆ллилꙋ́їа.
І҆́косъ в҃і
Пою́ще твоѐ вочл҃вѣ́ченїе, хва́лимъ, бл҃гослови́мъ и҆ покланѧ́емсѧ тебѣ̀, сп҃се на́шъ, и҆ вѣ́рꙋемъ, ꙗ҆́кѡ гдⷭ҇ь и҆ бг҃ъ є҆сѝ, сп҃са́ѧй всѣ́хъ на тѧ̀ ᲂу҆пова́ющихъ, и҆ твоѐ є҆́же ѿ дв҃ы неизрече́нное рождество̀ славосло́вѧщихъ и҆ пою́щихъ такова́ѧ:
Сла́ва тебѣ̀, сн҃е бж҃їй, въ вы́шнихъ со ѻ҆ц҃е́мъ и҆ дх҃омъ покланѧ́емый: сла́ва тебѣ̀, ѿ всѣ́хъ колѣ́нъ нбⷭ҇ныхъ и҆ земны́хъ сла́вимый.
Сла́ва тебѣ̀, сокрове́нное ѿ вѣ́ка та́инство ѿкры́вый: сла́ва тебѣ̀, твою̀ къ на́мъ неизрече́ннꙋю любо́вь ꙗ҆ви́вый.
Сла́ва тебѣ̀, всеѧ̀ тва́ри ᲂу҆краси́телю: сла́ва тебѣ̀, на́мъ всеми́лостивый сп҃си́телю.
Сла́ва тебѣ̀, бл҃гоче́стнѡ ца́рствꙋющихъ на землѝ ски́петры ᲂу҆твержда́ѧй: сла́ва тебѣ̀, ст҃и́тели благоговѣ́йныѧ и҆ і҆ерє́и премꙋ́дростїю и҆ бл҃голѣ́пїемъ ᲂу҆краша́ѧй.
Сла́ва тебѣ̀, цр҃кве ѡ҆снова́нїе и҆ ᲂу҆твержде́нїе: сла́ва тебѣ̀, всѣ́мъ вѣ́рнымъ сп҃се́нїе и҆ ᲂу҆краше́нїе.
Сла́ва тебѣ̀, тѣле́съ на́шихъ врачꙋ̀ и҆ и҆сцѣле́нїе: сла́ва тебѣ̀, дꙋ́шъ на́шихъ ᲂу҆краси́телю и҆ сп҃си́телю.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ г҃і
Ѽ, пресла́дкїй и҆ всеще́дрый і҆и҃се, спⷭ҇телю на́шъ, тво́рче и҆ влⷣко. Прїимѝ ны́нѣ ма́лое сїѐ моле́бное бл҃годаре́нїе и҆ славосло́вїе на́ше, ꙗ҆́коже прїѧ́лъ є҆сѝ ѿ волхвѡ́въ поклоне́нїе и҆ да́ры, и҆ сохранѝ на́съ, твои́хъ рабѡ́въ, ѿ всѧ̑кїѧ напа́сти, и҆ грѣхѡ́въ проще́нїе да́рꙋй, и҆ вѣ́чныѧ мꙋ́ки и҆зба́ви вѣ́рнѡ сла́вѧщихъ твоѐ ѿ чⷭ҇тыѧ дв҃ы, рождество̀ и҆ вопїю́щихъ тѝ: А҆ллилꙋ́їа.
Повто́ръ
Сей конда́къ глаго́лется три́жды, та́же і҆́косъ а҃-й и҆ конда́къ а҃-й.
І҆́косъ а҃
А҆́гг҃лъ мно́жество собра́сѧ въ виѳлее́мѣ ви́дѣти непости́жное рождество̀: и҆, ви́дѣвше своегѡ̀ творца̀, во ꙗ҆́слѣхъ ꙗ҆́кѡ младе́нца лежа́ща, ᲂу҆диви́шасѧ, и҆, стра́хомъ бл҃гоговѣ́юще, ро́ждшагосѧ и҆ ро́ждшꙋю бг҃олѣ́пнѣ почита́хꙋ, пою́ще такова́ѧ:
Сла́ва тебѣ̀, сн҃е бж҃їй, пре́жде вѣ́къ ѿ ѻ҆ц҃а̀ рожде́нный: сла́ва тебѣ̀, со ѻ҆ц҃е́мъ и҆ дх҃омъ всѧ̑ сотвори́вый.
Сла́ва тебѣ̀, сп҃стѝ поги́бшїѧ прише́дый: сла́ва тебѣ̀, да́же до ра́бїѧ зра́ка снизше́дый.
Сла́ва тебѣ̀, взыска́телю заблꙋ́ждшихъ: сла́ва тебѣ̀, сп҃си́телю поги́бшихъ.
Сла́ва тебѣ̀, средостѣ́нїе вражды̀ разрꙋши́вшꙋ: сла́ва тебѣ̀, ра́й, преслꙋша́нїемъ затворе́нный, па́ки ѿве́рзшꙋ.
Сла́ва тебѣ̀, ро́дъ чл҃вѣ́ческїй неизрече́ннѡ возлюби́вшꙋ: сла́ва тебѣ̀, на землѝ верте́пъ нб҃о ꙗ҆ви́вшꙋ.
Сла́ва тебѣ̀, ро́ждшꙋю тѧ̀ дв҃ꙋ, прⷭ҇то́лъ херꙋві́мскїй показа́вшꙋ.
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Конда́къ а҃
И҆збра́вый ѿ всѣ́хъ родѡ́въ пречⷭ҇тѣйшꙋю а҆́гг҃лъ дв҃ꙋ и҆ ѿ неѧ̀ роди́выйсѧ пло́тїю, хрⷭ҇тѐ бж҃е на́шъ, бл҃года́рственнаѧ прино́симъ тѝ рабѝ твоѝ, влⷣко. Ты́ же, ꙗ҆́кѡ и҆мѣ́ѧй млⷭ҇рдїе неизрече́нное, ѿ всѧ́кихъ на́съ бѣ́дъ свободѝ, зовꙋ́щихъ:
І҆и҃се, сн҃е бж҃їй, воплоти́выйсѧ на́съ ра́ди, сла́ва тебѣ̀.
Моли́твы
Пребезнача́льное нача́ло, бж҃е ст҃ы́й и҆ вѣ́чный, и҆ всеѧ̀ тва́ри содѣ́телю! Кі́ими словесы̀ возбл҃годари́мъ и҆ кі́ими пѣ́сньми возвели́чимъ твоѐ на́съ ра́ди чл҃вѣ́къ неизрече́нное снизхожде́нїе; во́лею бж҃ества̀ своегѡ̀ не ѿстꙋ́пльше, и҆ не́дръ ѻ҆́ч҃ихъ не разлꙋча́ѧсѧ, бг҃ъ сы́й, ꙗ҆́кѡ чл҃вѣ́къ, въ верте́пѣ безслове́снѣмъ ны́нѣ положи́лсѧ є҆сѝ, хрⷭ҇тѐ бж҃е на́шъ. Кто̀ и҆сповѣ́сть неизглаго́ланнагѡ сегѡ̀ та́инства вели́чїе и҆ пресла́внагѡ сбытїѧ̀ та́инство; сн҃ъ бж҃їй, сн҃ъ дв҃ы ꙗ҆влѧ́етсѧ, да свободи́тъ мі́ръ ѿ клѧ́твы зако́нныѧ, и҆ сы́ны грѣха̀ и҆ беззако́нїѧ ча́дами бж҃їими, наслѣ́дниками вѣ́чныхъ бл҃гъ содѣ́лаетъ, себе́ же, ꙗ҆́кѡ же́ртвꙋ непоро́чнꙋю и҆ всест҃ꙋ́ю, въ зало́гъ сп҃се́нїѧ па́дшагѡ чл҃вѣ́ка да принесе́тъ. І҆и҃се сладча́йшїй, влⷣко всеми́лостивый. Твои́мъ пребжⷭ҇твеннымъ снизхожде́нїемъ ю҆до́ль земна́ѧ въ хра́мъ бжⷭ҇твенныѧ сла́вы твоеѧ̀ ѡ҆ст҃и́сѧ, и҆ всѝ живꙋ́щїи на не́й нбⷭ҇нымъ весе́лїемъ и҆спо́лнишасѧ. Сподо́би ᲂу҆́бѡ и҆ на́съ въ де́нь пресла́внагѡ рождества̀ твоегѡ̀ чⷭ҇тымъ се́рдцемъ и҆ ѿве́рстою дꙋше́ю и҆сповѣ́дати тѧ̀ и҆́стиннагѡ а҆́гнца бж҃їѧ, ᲂу҆слажда́ющагѡ и҆ ᲂу҆крѣплѧ́ющагѡ на́съ наде́ждою грѧдꙋ́щихъ бл҃гъ въ неме́ркнꙋщемъ свѣ́тѣ трисїѧ́тельнагѡ бж҃ества̀, и҆́мже всѧ̑ живе́тъ и҆ дви́жетсѧ, и҆́мже ѡ҆бновле́нїе на́шегѡ первоѻбра́знагѡ бытїѧ̀ да ᲂу҆соверши́тсѧ. Є҆́й, гдⷭ҇и, всѧ́кагѡ бл҃годѣѧ́нїѧ бога́тый да́телю, и҆ пода́телю бл҃гі́й, за є҆́же та́кѡ возлюби́лъ є҆сѝ мі́ръ, ꙗ҆́кѡ всѧ̑ ско́рби и҆ болѣ́зни на́ша на себѣ̀ понестѝ и҆зво́лилъ є҆сѝ, не ѡ҆ста́ви на́съ, до́ндеже сꙋета̀ земна́ѧ скорбьмѝ и҆ напа́стьми не и҆зсꙋши́ла дꙋшѝ на́ша, и҆ не поги́бе пꙋ́ть сп҃се́нїѧ под̾ нога́ма на́шима, да не посмѣю́тсѧ ѡ҆ на́съ вразѝ на́ши, но да́рꙋй на́мъ въ свѣ́тѣ твоегѡ̀ бжⷭ҇твеннагѡ ѿкрове́нїѧ позна́ти пꙋ́ть мі́ра, добра̀ и҆ и҆́стины, и҆ воззовѝ ненасы́тною жа́ждою по тебѣ̀, сп҃си́телѣ на́шемъ, во є҆́же твори́ти во́лю твою̀ пребл҃гꙋ́ю во стра́сѣ твое́мъ, и҆ въ похвалꙋ̀ неизрече́нномꙋ снизхожде́нїю твоемꙋ̀, ꙗ҆́кѡ кади́ло бл҃гово́нное, приноси́ти тебѣ̀ житїѐ нескве́рное и҆ любо́вь нелицемѣ́рнꙋю, да въ дѣ́лѣхъ на́шихъ и҆ во ᲂу҆пова́нїи вѣ́ры на́шеѧ непреста́ннѡ соверша́етсѧ во́лѧ твоѧ̀ ст҃а́ѧ, и҆ во вѣ́ки не ᲂу҆мо́лкнетъ под̾ нб҃се́мъ сла́ва твоѧ̀: сла́ва, ꙗ҆́кѡ є҆диноро́днагѡ ѿ ѻ҆ц҃а̀, и҆спо́лнь блгⷣти и҆ и҆́стины. Ꙗ҆́кѡ ѡ҆ тебѣ̀, ны́нѣ пло́тїю ѿ безневѣ́стныѧ и҆ пречⷭ҇тыѧ дв҃ы мр҃і́и ро́ждшемсѧ, всѧ̑ колѣ́на нбⷭ҇наѧ и҆ земна́ѧ, ра́дости и҆сполнѧ́ющесѧ, велегла́снѡ и҆сповѣ́дꙋютъ: съ на́ми бг҃ъ, є҆мꙋ́же че́сть и҆ поклоне́нїе подоба́етъ ѻ҆ц҃ꙋ̀ и҆ сн҃ꙋ, и҆ ст҃о́мꙋ дх҃ꙋ, во вѣ́ки вѣкѡ́въ. А҆ми́нь.