Ин канон Рождеству Христову

Изнесе́ чре́во свяще́нное Сло́во, я́ве неопа́льно живопи́санное купино́ю, смеше́на зра́ком челове́чим Бо́га, Е́вы окая́нную утро́бу кля́твы дре́вния разреша́ющее го́рькия, его́же, земни́и, сла́вим.

Показа́ звезда́ пре́жде со́лнца Сло́во, прише́дшее уста́вити грехи́, волхво́м я́ве во убо́зем верте́пе, ми́лостиваго Тебе́, пелена́ми пови́та, его́же, ра́дующеся, ви́дяху Самого́ – и Челове́ка, и Го́спода.

Неве́сты Пречи́стыя пребога́тое Рождество́ ви́дети па́че ума́ сподо́бився, ли́к свиря́ющих преклоня́шеся стра́нным о́бразом, чи́н же пою́щих Безпло́тных, Царя́ Христа́, безсе́менно вопло́щшагося.

Высото́ю ца́рствуяй Небе́с милосе́рдием соверша́ет о на́с из Безневе́стныя Отрокови́цы: невеще́ствен Сы́й пре́жде, но по́слежде Сло́во, одебеле́вшо пло́тию, да па́дшаго к Себе́ привлече́т первозда́ннаго.

Ра́вен произы́де челове́ком Вы́шний, во́лею пло́ть прии́м от Де́вы, я́д очи́стити зми́евы главы́, приводя́ вся́ к Све́ту живоно́сному, Бо́г Сы́й, от вра́т безсо́лнечных.

Язы́цы, и́же дре́вле тле́ю погруже́ни, па́губы зело́ вра́жия убежа́вше, возно́сят ру́ки с похва́льными пе́сньми, еди́наго чту́ще Христа́, я́ко Благоде́теля, к на́м ми́лостивно прише́дшаго.

Из ко́рене изра́стши Иессе́ева, Де́во, уста́вы прешла́ еси́ челове́ческаго существа́, О́тчее ро́ждши Преве́чное Сло́во, я́ко благоволи́ Са́м запеча́танную утро́бу проити́ истоща́нием стра́нным.

Лю́тую вражду́, ю́же к на́м Влады́ка отсека́я па́ки плотски́м прише́ствием, да держа́щаго разруши́т душетле́ющаго, ми́р сочета́я с невеще́ственными существы́, положи́в присту́пна, Ро́ждшаго, тва́ри.

Лю́дие ви́деша, дре́вле омраче́ннии, по дне́х све́т вы́шния све́тлости, язы́ки же Бо́гу насле́дие Сы́н прино́сит, подая́ та́мо неизрече́нную благода́ть, иде́же мно́жайший процвете́ гре́х.

И́же бе́ испе́рва к Бо́гу, Бо́г Сло́во ны́не утвержда́ет немощно́е дре́вле ви́дев сохрани́ти, е́же по на́м существо́, и́мже Себе́ вторы́м обще́нием а́бие проявля́я страсте́й свобо́дное.

Гряде́т на́с ра́ди из Авраа́млих чре́сл темнопа́дшия во мра́це прегреше́ний сы́ны воздви́гнути, до́лу пони́кших, и́же во све́те обита́яй и я́слех чрез достоя́ние, ны́не благоволи́в в челове́ческое спасе́ние.

Слуги́ у́бо неи́стовно попаля́ет, спаса́ет же всепаля́щая со стра́хом ю́ныя, седмочи́сленным разжже́нием возвы́шена; и́хже венча́ пла́мень, незави́стно Го́споду подаю́щу благоче́стия ра́ди ро́су.

Помо́щниче, Христе́, челове́ком, проти́вное гада́ние, воплоще́ние неизглаго́ланное име́яй, посрами́л еси́; бога́тство обоже́ния нося́й, вообра́жся ны́не, его́же ра́ди упова́нием свы́ше в преиспо́дний приидо́хом мра́к.

Зле́ неудержа́нно возвыша́емый, нече́стно беся́щийся от развраще́ния ми́ра, низложи́л еси́ всемо́щне гре́х, я́же привлече́ пре́жде, дне́сь же от се́тей спаса́еши, вопло́щся во́лею, Благоде́телю.

Па́губы убежа́вши, е́же обожи́тися пре́лестию, непреста́нно пое́т излия́вшагося Сло́ва ю́ношески вся́ с тре́петом тва́рь, несла́вну хвалу́, боя́щися, прино́сит, тле́нна су́щи, а́ще и му́дре терпя́ше.

Гряде́ши, заблу́ждшее на па́жить обраща́я цветотво́рную из пусты́нных холмо́в язы́ков возста́ние, челове́ческое естество́, си́лу ну́жную человекоуби́йцы угаси́ти, му́ж же яви́вся и Бо́г промышле́нием.

О́бразы несве́тлы и се́ни приведе́ны, о Ма́ти Чи́стая, ви́девше Сло́ва, но́ва я́вльшагося от вра́т заключе́нных, мня́щии же и́стинную све́тлость, досто́йно твою́ благослови́м утро́бу.

О́бразы несве́тлы и се́ни приведе́ны, о Ма́ти Чи́стая, ви́девше Сло́ва, но́ва я́вльшагося от вра́т заключе́нных, мня́щии же и́стинную све́тлость, досто́йно твою́ благослови́м утро́бу.

О́бразы несве́тлы и се́ни приведе́ны, о Ма́ти Чи́стая, ви́девше Сло́ва, но́ва я́вльшагося от вра́т заключе́нных, мня́щии же и́стинную све́тлость, досто́йно твою́ благослови́м утро́бу.

Жела́ние получи́вше и Бо́жия прише́ствия христокра́снии лю́дие сподо́бльшеся, ны́не утеша́ются па́ки бытие́м: я́ко живоно́сну благода́ть дае́ши, Де́во Чи́стая, поклони́тися сла́ве.

Жела́ние получи́вше и Бо́жия прише́ствия христокра́снии лю́дие сподо́бльшеся, ны́не утеша́ются па́ки бытие́м: я́ко живоно́сну благода́ть дае́ши, Де́во Чи́стая, поклони́тися сла́ве.

Жела́ние получи́вше и Бо́жия прише́ствия христокра́снии лю́дие сподо́бльшеся, ны́не утеша́ются па́ки бытие́м: я́ко живоно́сну благода́ть дае́ши, Де́во Чи́стая, поклони́тися сла́ве.

И҆знесѐ чре́во свѧще́нное сло́во ꙗ҆́вѣ неѡпа́льнѡ живопи́санное кꙋпино́ю, смѣше́на зра́комъ человѣ́чимъ бг҃а, є҆́ѵы ѻ҆каѧ́ннꙋю ᲂу҆тро́бꙋ клѧ́твы дре́внїѧ разрѣша́ющее го́рькїѧ: є҆го́же земні́и сла́вимъ.

Показа̀ ѕвѣзда̀ пре́жде со́лнца, сло́во, прише́дшее ᲂу҆ста́вити грѣхѝ, волхвѡ́мъ, ꙗ҆́вѣ во ᲂу҆бо́зѣмъ верте́пѣ, ми́лостиваго тебѐ, пелена́ми пови́та: є҆го́же ра́дꙋющесѧ ви́дѧхꙋ самого̀ и҆ чл҃вѣ́ка и҆ гдⷭ҇а.

Невѣ́сты пречⷭ҇тыѧ пребога́тое ржⷭ҇тво̀, ви́дѣти па́че ᲂу҆ма̀ сподо́бивсѧ, ли́къ свирѧ́ющихъ преклонѧ́шесѧ стра́ннымъ ѻ҆́бразомъ: чи́нъ же пою́щихъ безпло́тныхъ, цр҃ѧ̀ хрⷭ҇та̀ безсѣ́меннѡ вопло́щшагосѧ.

Высото́ю црⷭ҇твꙋѧй нб҃съ, милосе́рдїемъ соверша́етъ ѡ҆ на́съ, и҆зъ безневѣ́стныѧ ѻ҆трокови́цы: невеще́ственъ сы́й пре́жде, но по́слѣжде сло́во ѡ҆дебелѣ́вшо пло́тїю, да па́дшаго къ себѣ̀ привлече́тъ первозда́ннаго.

Ра́венъ произы́де человѣ́кѡмъ вы́шнїй, во́лею пло́ть прїи́мъ ѿ дв҃ы, ꙗ҆́дъ ѡ҆чи́стити ѕмі́евы главы̀, приводѧ̀ всѧ̑ къ свѣ́тꙋ живоно́сномꙋ, бг҃ъ сы́й, ѿ вра́тъ безсо́лнечныхъ.

Ꙗ҆зы́цы, и҆̀же дре́вле тле́ю погрꙋже́ни, па́гꙋбы ѕѣлѡ̀ вра́жїѧ ᲂу҆бѣжа́вше, возно́сѧтъ рꙋ́ки съ похва́льными пѣ́сньми, є҆ди́наго чтꙋ́ще хрⷭ҇та̀, ꙗ҆́кѡ бл҃годѣ́телѧ, къ на́мъ ми́лостивнѡ прише́дшаго.

И҆зъ ко́рене и҆зра́стши і҆ессе́ева, дв҃о, ᲂу҆ста́вы прешла̀ є҆сѝ человѣ́ческагѡ сꙋщества̀, ѻ҆́ч҃ее ро́ждши превѣ́чное сло́во, ꙗ҆́кѡ благоволѝ са́мъ запеча́таннꙋю ᲂу҆тро́бꙋ проитѝ, и҆стоща́нїемъ стра́ннымъ.

Лю́тꙋю враждꙋ̀, ю҆́же къ на́мъ влⷣка ѿсѣка́ѧ па́ки, плотски́мъ прише́ствїемъ, да держа́щаго разрꙋши́тъ дꙋшетлѣ́ющаго, мі́ръ сочета́ѧ съ невеще́ственными сꙋществы̀, положи́въ пристꙋ́пна, ро́ждшаго, тва́ри.

Лю́дїе ви́дѣша дре́вле ѡ҆мраче́ннїи по дне́хъ свѣ́тъ вы́шнїѧ свѣ́тлости: ꙗ҆зы́ки же бг҃ꙋ наслѣ́дїе сн҃ъ прино́ситъ, подаѧ̀ та́мѡ неизрече́ннꙋю бл҃года́ть, и҆дѣ́же мно́жайшїй процвѣтѐ грѣ́хъ.

И҆́же бѣ̀ и҆спе́рва къ бг҃ꙋ, бг҃ъ сло́во, ны́нѣ ᲂу҆твержда́етъ немощно́е дре́вле: ви́дѣвъ сохрани́ти, є҆́же по на́мъ сꙋщество̀, и҆́мже себѐ вторы́мъ ѻ҆бще́нїемъ а҆́бїе проѧвлѧ́ѧ страсте́й свобо́дное.

Грѧде́тъ на́съ ра́ди, и҆зъ а҆враа́млихъ чре́слъ, темнопа́дшыѧ во мра́цѣ прегрѣше́нїй, сы́ны воздви́гнꙋти до́лꙋ пони́кшихъ: и҆́же во свѣ́тѣ ѡ҆бита́ѧй и҆ ꙗ҆́слехъ, чрезъ достоѧ́нїе, ны́нѣ благоволи́въ въ человѣ́ческое спасе́нїе.

Слꙋги̑ ᲂу҆́бѡ неи́стовнѡ попалѧ́етъ, спаса́етъ же всепалѧ́щаѧ со стра́хомъ ю҆́ныѧ, седмочи́сленнымъ разжже́нїемъ возвы́шена: и҆̀хже вѣнча̀ пла́мень, незави́стнѡ гдⷭ҇ꙋ подаю́щꙋ благоче́стїѧ ра́ди ро́сꙋ.

Помо́щниче хрⷭ҇тѐ человѣ́кѡмъ, проти́вное гада́нїе, воплоще́нїе неизглаго́ланное и҆мѣ́ѧй, посрами́лъ є҆сѝ: бога́тство ѡ҆боже́нїѧ носѧ́й, воѡбра́жсѧ ны́нѣ, є҆гѡ́же ра́ди ᲂу҆пова́нїемъ, свы́ше въ преиспо́днїй прїидо́хомъ мра́къ.

Ѕлѣ̀ неꙋдержа́ннѡ возвыша́емый, нече́стнѡ бѣсѧ́щїйсѧ ѿ развраще́нїѧ мі́ра, низложи́лъ є҆сѝ всемо́щнѣ грѣ́хъ, ꙗ҆̀же привлечѐ пре́жде, дне́сь же ѿ сѣ́тей спаса́еши, вопло́щсѧ во́лею бл҃годѣ́телю.

Па́гꙋбы ᲂу҆бѣжа́вши, є҆́же ѡ҆божи́тисѧ пре́лестїю непреста́ннѡ пое́тъ и҆злїѧ́вшагосѧ сло́ва, ю҆́ношески всѧ̀ съ тре́петомъ тва́рь, несла́внꙋ хвалꙋ̀ боѧ́щисѧ прино́ситъ, тлѣ́нна сꙋ́щи, а҆́ще и҆ мꙋ́дрѣ терпѧ́ше.

Грѧде́ши, заблꙋ́ждшее на па́жить ѡ҆браща́ѧ цвѣтотво́рнꙋю, и҆зъ пꙋсты́нныхъ холмѡ́въ, ꙗ҆зы́кѡвъ возста́нїе, человѣ́ческое є҆стество̀, си́лꙋ нꙋ́жнꙋю человѣкоꙋбі́йцы ᲂу҆гаси́ти: мꙋ́жъ же ꙗ҆ви́всѧ и҆ бг҃ъ промышле́нїемъ.

Ѻ҆́бразы несвѣ̑тлы, и҆ сѣ̑ни приведе́ны, ѽ мт҃и чⷭ҇таѧ, ви́дѣвше сло́ва, но́ва ꙗ҆́вльшагѡсѧ ѿ вра́тъ заключе́нныхъ: мнѧ́щїи же и҆́стиннꙋю свѣ́тлость, досто́йнѡ твою̀ благослови́мъ ᲂу҆тро́бꙋ.

Ѻ҆́бразы несвѣ̑тлы, и҆ сѣ̑ни приведе́ны, ѽ мт҃и чⷭ҇таѧ, ви́дѣвше сло́ва, но́ва ꙗ҆́вльшагѡсѧ ѿ вра́тъ заключе́нныхъ: мнѧ́щїи же и҆́стиннꙋю свѣ́тлость, досто́йнѡ твою̀ благослови́мъ ᲂу҆тро́бꙋ.

Ѻ҆́бразы несвѣ̑тлы, и҆ сѣ̑ни приведе́ны, ѽ мт҃и чⷭ҇таѧ, ви́дѣвше сло́ва, но́ва ꙗ҆́вльшагѡсѧ ѿ вра́тъ заключе́нныхъ: мнѧ́щїи же и҆́стиннꙋю свѣ́тлость, досто́йнѡ твою̀ благослови́мъ ᲂу҆тро́бꙋ.

Жела́нїе полꙋчи́вше, и҆ бж҃їѧ прише́ствїѧ хрⷭ҇токра́снїи лю́дїе сподо́бльшесѧ, ны́нѣ ᲂу҆тѣша́ютсѧ па́ки бытїе́мъ: ꙗ҆́кѡ живоно́снꙋ благода́ть дае́ши, дв҃о чⷭ҇таѧ, поклони́тисѧ сла́вѣ.

Жела́нїе полꙋчи́вше, и҆ бж҃їѧ прише́ствїѧ хрⷭ҇токра́снїи лю́дїе сподо́бльшесѧ, ны́нѣ ᲂу҆тѣша́ютсѧ па́ки бытїе́мъ: ꙗ҆́кѡ живоно́снꙋ благода́ть дае́ши, дв҃о чⷭ҇таѧ, поклони́тисѧ сла́вѣ.

Жела́нїе полꙋчи́вше, и҆ бж҃їѧ прише́ствїѧ хрⷭ҇токра́снїи лю́дїе сподо́бльшесѧ, ны́нѣ ᲂу҆тѣша́ютсѧ па́ки бытїе́мъ: ꙗ҆́кѡ живоно́снꙋ благода́ть дае́ши, дв҃о чⷭ҇таѧ, поклони́тисѧ сла́вѣ.